CNI News

၂၀၂၃ ခုနှစ်၊ နိုဝင်ဘာ ၃၀

ရှမ်းလက်နက်ကိုင်တပ်များဖြစ်သော သျှမ်းပြည်ပြန်လည်ထူထောင်ရေးကောင်စီ (RCSS) နှင့် ရှမ်းပြည် တိုးတက်ရေးပါတီ (SSPP) တို့ ပေါင်းစည်းလာမည်ဟု ယုံကြည်ကြောင်း ရှမ်းနှင့် တိုင်းရင်းသားများ ဒီမိုကရက်တစ်ပါတီမှ ဥက္ကဋ္ဌ စိုင်းအိုက်ပေါင်းက CNI သတင်းဌာနကို ပြောသည်။

ရှမ်းလူထုနှင့် သံဃာတော်တို့၏ လိုအင်ဆန္ဒအတိုင်း RCSS နှင့် SSPP တို့သည် နှစ်ဖက်ပစ်ခတ်တိုက်ခိုက်မှု ရပ်စဲကြောင်း နိုဝင်ဘာ ၂၉ ရက်နေ့က ထုတ်ပြန်ကြေညာခဲ့သည်။

စိုင်းအိုက်ပေါင်းက “ရှမ်းတိုင်းရင်းသားတစ်ယောက်အနေနဲ့ အရမ်းဝမ်းသာတယ်၊ ဂုဏ်ယူတယ်၊ ရေရှည် ဖြစ်မှာလည်း ယုံကြည်တယ်၊ အပစ်ရပ်စဲတာတောင် မဟုတ်ဘူး။ နောက်ပိုင်းကြရင် နှစ်ဖွဲ့တစ်ဖွဲ့တည်းဖြစ်အောင် ဆိုလို့ရှိရင် ပိုကောင်းတာပေါ့ဗျာ၊ အဲဒီလို စည်းစည်းလုံးလုံးနဲ့ ဆိုလို့ရှိရင် ရှမ်းတွေအားလုံးရဲ့ ဆန္ဒ ဒီအတိုင်းပဲ ဖြစ်စေချင်တယ်၊ တစ်ဖွဲ့ပဲ ဖြစ်စေချင်တယ် နောက်ပိုင်းကြရင် ပြည်သူရဲ့ ဆန္ဒပေါ့နော်၊ ပြည်သူရဲ့ဆန္ဒကို ကိုယ်စား ပြောပေးတာပဲ။ ဖြစ်လာမယ်လို့တော့ ယုံကြည်တယ်၊ ဖြစ်လာမယ်လို့ ယုံကြည်တယ်၊ ဘာလို့လဲဆိုတော့ ရဟန်း ရှင်လူ ပြည်သူတစ်ရပ်လုံးက အရွယ်သုံးပါးလုံးက အဲဒါကို ဖြစ်စေချင်တဲ့ ဆန္ဒရှိကြတယ်လေ၊ ရှင်းရှင်း ပြောရရင် ရှမ်းတိုင်းရင်းသားတင် မဟုတ်ဘူး ပြည်ထောင်စုသား အားလုံးကလည်း အဲဒီလိုမျိုး ဖြစ်စေချင်တယ်၊ တောင့်တောင့်တင်းတင်း အင်အားဖြစ်စေချင်တယ်၊ တောင့်တောင့်တင်းတင်း ဖြစ်ပြီးတော့ တစ်ဖွဲ့တည်း ဖြစ်သွားရင် ရှမ်းပြည်သူလူထုအကျိုးကို လုံးဝကာကွယ်နိုင်မှာပေါ့” ဟု ပြောသည်။

SSPP/SSA တပ်ဖွဲ့ဝင်များကို တွေ့ရစဉ်

၂၀၂၃ ခုနှစ်၊ နိုဝင်ဘာ ၂၉ ရက်နေ့က SSPP မှ ကိုယ်စားလှယ် ၃ ဦး၊ RCSS မှ ကိုယ်စားလှယ် ၄ ဦးတို့ တွေ့ဆုံ ဆွေးနွေးပြီး ပစ်ခတ်တိုက်ခိုက်မှုရပ်စဲခြင်းကို တရားဝင်သဘောတူညီခဲ့ကြောင်းထုတ်ပြန်ချက်တွင် ဖော်ပြ ထားသည်။

RCSS နှင့် SSPP တို့သည် နယ်မြေ အငြင်းပွားမှုများကြောင့် တိုက်ပွဲများ မကြာခဏ ဖြစ်ပွားလျက်ရှိနေပြီး အဆိုပါ တိုက်ပွဲများကြောင့် ဒေသခံများ ဘေးလွတ်ရာသို့ ထွက်ပြေးတိမ်းရှောင်မှုများ ရှိနေသည်။

နှစ်ဖက်ပစ်ခတ်တိုက်ခိုက်မှု ရပ်စဲကြောင်းထုတ်ပြန်ချက်

RCSS နှင့် SSPP တို့ အပစ်အခတ်ရပ်စဲမှုမှတဆင့် နှစ်ဖွဲ့ပေါင်းစည်းရေးကို မျှော်လင့်ထားကြောင်း သျှမ်းအရပ်ဖက် အဖွဲ့အစည်းများမှ ပြောရေးဆိုခွင့်ရှိသူ စိုင်းစိုင်းက CNI သတင်းဌာနကို ပြောသည်။

“အများကြီး မျှော်လင့်လို့ ရတာပေါ့နော်၊ ဒါအစပြုတဲ့ ခြေလှမ်းပေါ့နော်၊ ပထမဦးဆုံးခြေလှမ်းပေါ့၊ အခုအခြေအနေ မှာဆိုရင် ကျနော်တို့နိုင်ငံမှာ နိုင်ငံရေး၊ စစ်ရေးက ပြင်းထန်နေတယ်ပေါ့နော်၊ ရှမ်းပြည်မြောက်ပိုင်းမှာဆိုရင် အားလုံးသိပြီးသား သိထားပြီးသား ဖြစ်တဲ့အတိုင်းပေါ့နော်၊ ဒါတွေကို ကျနော်တို့‌ဒေသတွေကို ကျနော်တို့ လူထု တွေကို အကာအကွယ်ပေးနိုင်ဖို့ဆိုရင် အရင်ဆုံး ကျနော်တို့ အချင်းချင်းကြားမှာ အပစ်အခတ်ရပ်ဖို့ လိုတာပေါ့နော်၊ ဒါကိုလည်း ကျနော်တို့ တစိုက်မတ်မတ်တောင်းဆိုလာတာ ကျနော်တို့ ၂၀၂၁ ကတည်းကပေါ့နော်၊ တစိုက် မတ်မတ် ကျနော်တို့ တောင်းဆိုခဲ့တာ ဖြစ်တာပေါ့၊ ဒီနေ့ ၊ ဒီရက်၊ ဒီလို ထွက်လာတာကတော့ ရှမ်းပြည်သူ တစ်ရပ်လုံးပေါ့နော် ရှမ်းပြည်ပြင်ပမှာရှိတဲ့ နိုင်ငံခြားမှာရှိတဲ့ ကျနော်တို့ ရှမ်းတွေရော အကုန်လုံးက ဒါကို ဝမ်းမြောက်ဝမ်းသာနဲ့ ကြိုဆိုကြတာကို တွေ့ရတယ်၊ မျှော်လင့်စရာဆိုရင်တော့ ကျနော်တို့ အများကြီး မျှော်လင့် ထားတာပေါ့နော်၊ ဘယ်လောက်အထိ မျှော်လင့်ထားသလဲလို့ ပြောရမယ်ဆိုရင် သူတို့ နှစ်ခုပေါင်း သွားရအောင် အထိအောင် ကျနော်တို့ ဖြစ်စေချင်တယ်ပေါ့နော်၊ ဒါပေမဲ့ ဒါတွေ လုပ်ရမယ့်အလုပ်‌တွေ အများကြီး ကျန်နေဦးမယ် လို့တော့ မြင်ပါသေးတယ်ဗျ” ဟု ပြောသည်။

သျှမ်းပြည်ပြန်လည်ထူထောင်ရေးကောင်စီ (RCSS) သည် တစ်နိုင်ငံလုံးအပစ်အခတ်ရပ်စဲရေး သဘောတူစာချုပ် (NCA) လက်မှတ်ရေးထိုးထားပြီး ရှမ်းပြည်တိုးတက်ရေးပါတီ (SSPP) သည် လက်မှတ်မထိုးရသေးသည့် ရှမ်း လက်နက်ကိုင်တပ်ဖွဲ့များ ဖြစ်သည်။

CNI News
၂၀၂၃ ခုနှစ်၊ နိုဝင်ဘာ ၂၉

နိုင်ငံတော်စီမံအုပ်ချုပ်ရေးကောင်စီ၏ အစည်းအဝေးကို နိုဝင်ဘာ ၂၉ ရက်နေ့က ကျင်းပခဲ့ပြီး နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ဒီမိုကရေစီအရေး၊ လက်နက်ကိုင်အဖွဲ့များအရေး၊ မြောက်ပိုင်းသုံးဖွဲ့၏ တိုက်ခိုက်မှု အခြေအနေများကို ချပြဆွေးနွေးသွားခဲ့သည်။

KIA အဖွဲ့သည် တပ်အင်အားများ တိုးချဲ့ခြင်း အပါအဝင် ကချင်ပြည်နယ်၊ စစ်ကိုင်းတိုင်းဒေသကြီးနှင့် မကွေး တိုင်းဒေသကြီးများကို မတည်ငြိမ်အောင် လုပ်ကိုင်နေကြောင်း ၎င်းက ပြောသွားခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ ကျနော်တို့သည် ပါတီစုံဒီမိုကရေစီစနစ်ကို သွားနေတဲ့ နိုင်ငံ တစ်ခု ဖြစ်ပါတယ်။ ပါတီစုံဒီမိုကရေစီက ပြည်သူက တောင်းဆိုတဲ့အတွက်ကြောင့် တပ်မတော်က ဖော်ဆောင် ပေးခြင်း ဖြစ်ပါတယ်။ တပ်မတော်က ဦး ဆောင်ပြီးတော့မှ ပါတီစုံဒီမိုကရေစီစနစ်ကို ဖော်ဆောင်ပေးတာပါ။ အခုမှ တပ်မတော်က လိုက်ပြီးတော့ ပါတီစုံ ဒီမိုကရေစီစနစ်ကို ထောက်ခံတာမဟုတ်ပါဘူး။ ကျနော်တို့ ပြီးခဲ့တဲ့ ၁၉၈၈ ခုနှစ် ဒီမိုကရေစီ တောင်းဆိုမှု အရေး အခင်းပြီးတဲ့ နောက်ပိုင်း ကနေပြီးတော့ အဲဒီက နဝတ ကြေညာ ချက်တွေကို ကြည့်မယ်ဆိုရင် ဒါ တပ်မတော်က ကိုယ်စားပြုပြီး ကြေညာခဲ့တာဖြစ်ပါတယ်။ အဲဒီမှာ ပါတီစုံဒီမိုက ရေစီကို သွားမယ်ဆိုပြီးတော့ ကျနော်တို့က ပြောခဲ့တာရှိပါတယ်”ဟု ပြောသည်။

ကိုးကန့်တပ်ဖွဲ့(MNDAA)သည် ကိုးကန့်ဒေသ အထူးဒေသကို ပြန်လည် ရရှိရေးအတွက် ကြိုးပမ်းနေကြောင်း၊ ထိုသို့ တိုက်ခိုက်ရာတွင် Drop Bomb များ ၂၅၀၀၀ ကျော်အသုံးပြုခဲ့ကြောင်း၊ AA သည်လည်း အပစ်ရပ်ထား သည်ကို အခွင့်ကောင်းယူ၍ လူသစ်စုဆောင်းမှုများ ပြုလုပ်ကာ အင်အားတိုးချဲ့နေကြောင်း၊ TNLA သည် စစ်ကိုင်းတိုင်းဒေသကြီးအတွင်းရှိ PDF များကို လက်နက်ခဲယမ်းများ ထောက်ပံ့ပေးနေသလို ပလောင်ဒေသ ရရှိရေး MNDAA နှင့်ပူးပေါင်း တိုက်ခိုက်နေကြောင်း ၎င်းက ပြောသည်။

CNI News

၂၀၂၃ ခုနှစ်၊ နိုဝင်ဘာ ၂၉

စစ်ကိုင်းတိုင်းဒေသကြီးအထက်ပိုင်း ဟုမ္မလင်းမြို့ပေါ်မှာ ရှမ်းနီမြေကို ရှမ်းနီကာကွယ်ရမည်ဟု ရှမ်းနီအမျိုးသား များတပ်မတော်(SNA)က ဗွီနိုင်းစာတမ်းများ ချိတ်ကာ ဒေသတွင်းနေ ပြည်သူများကို အသိပေးလာသည်ကို တွေ့ရသည်။

SNA သည် စစ်ကိုင်းတိုင်းဒေသကြီးအတွင်းရှိ ကလေး၊ တမူး၊ ဟုမ္မလင်း၊ ကသာ၊ မော်လိုက်၊ ဗန်းမောက်၊ ဖောင်းပြင်၊ ကောလင်း၊ ဝန်းသို၊ ပင်လည်ဘူး အပါအဝင် ကချင်ပြည်နယ်အတွင်းက ဗန်းမော်၊ မြစ်ကြီးနား၊ မိုးညှင်း၊ မိုးကောင်း၊ အင်းတော်ကြီး စသည့် ဒေသများကို စုစည်း၍ ရှမ်းနီပြည်နယ် ရရှိရေး ကြိုးပမ်းနေသော ရှမ်းနီလက်နက်ကိုင်ဖြစ်သည်။

လက်ရှိတွင် SNA လှုပ်ရှားနေသော ဒေသများထဲက ဟုမ္မလင်း၊ ဗန်းမောက်၊ ရွှေပြည်အေး၊ ဖောင်းပြင်၊ မိုးညှင်း၊ မိုးကောင်း၊ အင်းတော်၊ ဖားကန့်တို့၌ KIA-PDF ပူးပေါင်းတပ်ဖွဲ့များဖြင့် တိုက်ပွဲများ ဖြစ်ပွားနေသည်။

KIA သည် PDF များကို အသုံးချ၍ ရှမ်းနီဒေသများကို ထိန်းချုပ်နိုင်ရေးနှင့် SNA ကို တိုက်ဖျက်ရေး ကြိုးပမ်း နေသည်ဟု ဒေသတွင်းနေ ရှမ်းနီတိုင်းရင်းသားများက ပြောသည်။

CNI News

၂၀၂၃ ခုနှစ်၊ နိုဝင်ဘာ ၂၉

ညီနောင်မဟာမိတ်သုံးဖွဲ့ (AA-TNLA-MNDAA) တို့ကို မြန်မာ့တပ်မတော်အနေဖြင့် ထိုးစစ်ဆင် တိုက်ခိုက်သည့် အခင်းအကျင်း ဖြစ်လာနိုင်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) မှ နာယက ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ပြီးခဲ့သည့် ရက်ပိုင်းက တရုတ်-မြန်မာနယ်စပ်အနီး တရုတ်စစ်တပ်မှ စစ်ရေးလေ့ကျင့်မှု ပြုလုပ်ခဲ့သလို လက်ရှိတွင် လည်း တရုတ်-မြန်မာရေတပ်တို့ ပူးတွဲ စစ်ရေးလေ့ကျင့်မှု ပြုလုပ်လျက်ရှိနေသည်။

အဆိုပါ အခြေအနေမှာ တရုတ်နှင့် မြန်မာ ဆက်ဆံရေး ကောင်းမွန်သည်ကို ပြသလို၍ ဖြစ်နိုင်ကြောင်း၊ ထို့နောက် မြောက်ပိုင်း လက်နက်ကိုင်တပ်ဖွဲ့များ၏ စစ်ဆင်ရေးကို ရပ်တန့်ရန် တရုတ်က လုပ်ဆောင်မည့် သဘောဖြစ်နိုင် ကြောင်း ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

တရုတ်နဲ့ မြန်မာ ရေတပ် ပူးတွဲစစ်ရေးလေ့ကျင့်ရန် ပြင်ဆင်နေစဉ်

၎င်းက “ဘာအခင်းအကျင်းလဲဆိုတော့ နေပြည်တော်နဲ့ တရုတ်နဲ့ ဆက်ဆံရေး ကောင်းပါတယ်ဆိုတာ ပြတဲ့ သဘောပါတယ်။ နောက်ပြီးတော့ မြောက်ပိုင်းက စစ်ဆင်ရေးတွေကိုလည်း ရပ်တန့်သွားဖို့အတွက် တရုတ်က ပြောနေတာ လက်တွေ့ လုပ်ပြမယ့် သဘောရှိပါတယ်၊ အဲဒီသဘောရှိပါတယ်။ ဒီလကုန်လောက်မှာ တချိန်ချိန်မှာ အပြင်းအထန် စစ်တပ်ဘက်က နေပြည်တော်ဘက်က ထိုးစစ်ပြန်ဆင်ဖို့ အခင်းအကျင်းနဲ့ တူပါတယ်။ ကြည့်ရတာ တရုတ်နဲ့ ညှိပြီးတော့ ဒါကြောင့် မြောက်ပိုင်းအဖွဲ့တွေကလည်း ရပ်သင့်တဲ့အချိန်မှာ ရပ်လိုက်ရင်တော့ အပြစ်အနာ အဆာ နည်းနည်း သက်သာတာပေါ့ဗျာ၊ အဲဒီလို ဖြစ်နိုင်ပါတယ်” ဟု ပြောသည်။

ပြီးခဲ့သည့် အောက်တိုဘာ ၂၇ ရက်က ညီနောင်မဟာမိတ်သုံးဖွဲ့မှ ၁၀၂၇ စစ်ဆင်ရေးတစ်ခုကို စတင်ခဲ့ပြီးနောက် ရှမ်းပြည်နယ် (မြောက်ပိုင်း)တွင် မြန်မာ့တပ်မတော်နှင့် ညီနောင်မဟာမိတ် ပူးပေါင်းတပ်ဖွဲ့တို့အကြား တိုက်ပွဲများ အပြင်းအထန် ဖြစ်ပွားလျက်ရှိနေသည်။

အဆိုပါ တိုက်ပွဲများကြောင့် တရုတ်-မြန်မာ နယ်စပ်ကုန်သွယ်ရေးမှာ ရပ်တန့်လျက်ရှိနေသလို ဒေသခံ အများစုမှာ လည်း ဘေးလွတ်ရာသို့ ထွက်ပြေးတိမ်းရှောင်လျက် ရှိနေသည်။

ညီနောင်မဟာမိတ်သုံးဖွဲ့၏ စစ်ဆင်ရေးကို တရုတ်မပါဝင်ပါက တိုက်ပွဲများမှာ ပိုကျယ်ပြန့်လာနိုင်ကြောင်း မြန်မာ့နိုင်ငံရေး လေ့လာသုံးသပ်သူ စာရေးဆရာ ဦးထက်မြက်က CNI သတင်းဌာနသို့ ပြောသည်။

မြောက်ပိုင်းမဟာမိတ်သုံးဖွဲ့ကိုတွေ့ရစဉ်

၎င်းက “အဲဒါကတော့ နှစ်မျိုးရှိတယ်လေ၊ တစ်မျိုးက အဲဒါသူတို့တကယ် တရုတ်က နောက်က မပါဘူးဆိုရင်တော့ ညီနောင်သုံးဖော်ရဲ့ စစ်ပွဲက ပိုပြီး နက်ရှိုင်းလာနိုင်တယ်၊ နောက်က ဘယ်သူမှ မရှိဘူး။ သူတို့သဘောနဲ့ သူတို့ ဆိုရင် ဒီထက်အားကောင်းသွားလိမ့်မယ်၊ ချင်းတို့ ကချင်တို့ကပါ လုံးဝအပြတ်သူတို့ ဒီ ၃ ဖွဲ့နဲ့ ပူးပေါင်းပြီး တိုက်ခိုက်လာနိုင်တယ်၊ တချိန်တည်းမှာ ထိုင်းနယ်စပ်မှာရှိတဲ့ လက်နက်ကိုင်တွေကိုယ်၌ကိုက အဲဒီမှာ ပါဝင် သွားနိုင်တယ်၊ ဘာလို့လဲဆိုတော့ ရခိုင်တောင်မှ သူတို့ နားလည်မှုအရ ပါဝင်တိုက်ခိုက်နေပြီကိုး၊ အဲဒါက တရုတ်နဲ့ သူတို့နဲ့ ပြတ်တယ်ဆိုရင် ပြောတာ။ ဒါပေမဲ့ တရုတ်ရဲ့ သဘောထားအတိုင်းသူတို့ ဒီဟာကို လှုပ်ရှားပေးတယ် ဆိုရင်တော့ ဒီကိစ္စကြီးက တရုတ်က ရပ်ဆိုရင် သူတို့က ရပ်ကြမယ်၊ တရုတ်က ရပ်ဆိုရင် ရပ်လိုက်ရင်တော့ အခု တော်လှန်ရေးဆိုတဲ့ဟာက တကယ်ကတော့ ဟန်ပြပဲ ဖြစ်သွားလိမ့်မယ်” ဟု ပြောသည်။
ညီနောင်မဟာမိတ်သုံးဖွဲ့၏ စစ်ဆင်ရေး စတင်ခဲ့ပြီးနောက် လက်ရှိ တစ်လကျော် ကြာမြင့်လာသည့်တိုင် ရပ်တန့် နိုင်ခြင်း မရှိသေးဘဲ နှစ်ဖက်တိုက်ပွဲမှာ အပြင်းအထန် ဖြစ်ပွားလျက်ရှိနေသည်။

အဆိုပါ စစ်ဆင်ရေးမှာ ရှမ်းပြည်နယ် (မြောက်ပိုင်း တွင် သာမကဘဲ ကချင်ပြည်နယ်၊ စစ်ကိုင်းတိုင်း ဒေသကြီးနှင့် မန္တလေးတိုင်းဒေသကြီးတို့တွင်လည်း ဖြစ်ပွားလျက်ရှိနေသည်။

CNI News

၂၀၂၃ ခုနှစ်၊ နိုဝင်ဘာ ၂၉

ရှမ်းပြည်နယ်အတွင်း တိုက်ပွဲများ အပြင်းအထန် ဖြစ်ပွားနေချိန် ရှမ်းပြည်သူများ ကာကွယ်စောင့်ရှောက်နိုင်ရေး အတွက် အပစ်အခတ်ရပ်စဲရေးကို သဘောတူကြောင်း ရှမ်းပြည်ပြန်လည်ထူထောင်ရေးကောင်စီ(RCSS)နှင့် ရှမ်းပြည်တိုးတက်ရေးပါတီ(SSPP)တို့က နိုဝင်ဘာ ၂၉ ရက်နေ့တွင် ပူးတွဲ ထုတ်ပြန် ကြေညာခဲ့သည်။

RCSS နှင့် SSPP ရှမ်းလက်နက်ကိုင် ၂ ဖွဲ့သည် နယ်မြေ အငြင်းပွား၍ တိုက်ပွဲများ ဖြစ်ပွားနေခြင်းကို ရပ်တန့်ရန် သဘောတူညီမှု ရရှိခဲ့သည်။

လက်ရှိ ရှမ်းပြည်နယ်မြောက်ပိုင်း သိန္နီ၊ သီပေါ၊ ကျောက်မဲ၊ နောင်ချို၊ နမ့်ခမ်း၊ လောက်ကိုင်၊ ဖောင်းဆိုင်၊ ကြူကုန် (ပန်ဆိုင်း)၊ မုံးကိုး၊ ချင်းရွှေဟော် စသည့် မြို့နယ်များတွင် ကိုးကန့်တပ်ဖွဲ့(MNDAA)၊ ရခိုင်တပ်ဖွဲ့ (AA)၊ ပလောင်တပ်ဖွဲ့(TNLA)တို့သည် အောက်တိုဘာ ၂၇ ရက်က စတင်၍ ၁၀၂၇ စစ်ဆင်ရေးကို ဖော်ဆောင်ကာ မြို့ သိမ်းတိုက်ပွဲများ ဆင်နွှဲလျက်ရှိနေသည်။

RCSS နဲ့ SSPP အပစ်အခတ်ရပ်စဲကြောင်း ထုတ်ပြန်ချက်ကိုတွေ့ရစဉ်

အဆိုပါ တိုက်ပွဲများကြောင့် ဒေသတွင်းနေ ပြည်သူများထွက်ပြေး တိမ်းရှောင်နေကြရသလို အသက်ဆုံးရှုံးမှုများ လည်းကြုံတွေ့နေရသည်။ ထိုအထဲတွင် ရှမ်းလူမျိုးများက အများဆုံးကြုံတွေ့နေရသည်။

ထို့ကြောင့် ရှမ်းလက်နက်ကိုင် ၂ ဖွဲ့ဖြစ်သည့် RCSS နှင့် SSPP တို့သည် အပစ်အခတ်ရပ်စဲရေး သဘောတူညီမှု ရရှိခဲ့ပြီးနောက် ရှမ်းလူမျိုးများနှင့် ရှမ်းဒေသများ ကာကွယ်ရေး ကြိုးပမ်းသွားရန် ပြင်ဆင်လာခဲ့ကြသည်။

TNLA သည် ၁၀၂၇ ကို ဖော်ဆောင်ခြင်းဖြင့် ပလောင်ပြည်နယ် ရရှိရေး ရည်မှန်းကာ ကြိုးပမ်းလျက်ရှိနေသလို ရှမ်း လူမျိုးများ အများဆုံးနေထိုင်သည့် ဒေသဖြစ်သော နမ့်ခမ်းမြို့နယ်ကို ထိန်းချုပ်နိုင်ရေး ကြိုးပမ်းလျက်ရှိနေသည် ကို ရှမ်းတိုင်းရင်းသားများက လက်မခံနိုင်ဘဲဖြစ်နေကြသည်။

CNI News

၂၀၂၃ ခုနှစ်၊ နိုဝင်ဘာ ၂၈

မြန်မာနှင့်တရုတ်မှာ မဟာဗျူဟာမိတ်ဖက်နိုင်ငံများဖြစ်ကြောင်း နစက သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်း နိုဝင်ဘာ ၂၇ ရက်က ထုတ်ပြန်ပြောကြားခဲ့သည်။

လက်ရှိတွင်လည်း မြန်မာ - တရုတ်နယ်စပ်တွင် တည်ငြိမ်အေးချမ်းရေးနှင့် နယ်မြေဒေသ လုံခြုံအေးချမ်းရေးအတွက် တရုတ်စစ်ရေး လေ့ကျင့်မှု ပြုလုပ်လျက်ရှိနေသည်။

ထို့အတူ နိုဝင်ဘာ ၂၇ ရက်က တရုတ်စစ်တပ်မှ အရာရှိ၊ စစ်သည် ၇၀၀ ဦးခန့်ပါဝင်သော ရေယာဉ် ၃ စင်း မြန်မာသို့ ရောက်ရှိခဲ့ကြောင်း ဗိုလ်ချုပ်ဇော်မင်းထွန်းက ပြောကြားထားသည်။

၎င်းက “မြန်မာနိုင်ငံနဲ့ တရုတ်နိုင်ငံဟာ မနေ့က ကျနော်ပြောခဲ့သလို မဟာဗျူဟာမိတ်ဖက်နိုင်ငံတွေ ဖြစ်ပါတယ်။ ဆွေမျိုးပေါက်ဖော်နိုင်ငံများ ဖြစ်ပါတယ်။ ငြိမ်းချမ်းစွာအတူ ယှည်တွဲနေထိုင်ရေးမူကြီး ငါးရပ်ကို လေးစားလိုက်နာပြီး နှစ်နိုင်ငံအစိုးရနဲ့ တပ်မတော်နှစ်ရပ်အကြားမှာ ခိုင်မာတဲ့ ချစ်ကြည်ရင်းနှီးမှုရှိတဲ့ နိုင်ငံတွေဖြစ်ကြောင်း ပြောကြားလိုပါတယ်။ ဒီနေ့မှာတော့ နယ်စပ်ဒေသများမှာ တရားမဝင် ဝင်ရောက်နေထိုင်သူများကို ကျနော်တို့ ပြန်လည်အပ်နှံရာမှာ တရုတ်အမျိုးသား ၄၆၆ ဦး၊ အမျိုးသမီး ၈၇ ဦး ပေါင်း ၅၅၃ ဦးကို တရုတ်ပြည်သူ့သမ္မတနိုင်ငံ တာဝန်ရှိသူတွေထံ ပြန်လည်လွှဲပြောင်းပေးနိုင်ခဲ့ပါတယ်” ဟု ပြောသည်။

သီလဝါဆိပ်ကမ်းသို့ တရုတ်စစ်ရေယာဥ် ဆိုက်ကပ်လာပုံ

မြန်မာနိုင်ငံသို့ ရောက်ရှိခဲ့သည့် တရုတ်ရေတပ်အနေဖြင့် မြန်မာနိုင်ငံအတွင်းမှာ ချစ်ကြည်ရေးခရီးလည်ပတ်မှု၊ လေ့လာမှု နှစ်နိုင်ငံ ချစ်ကြည်ရေး အားကစားပြိုင်ပွဲများ ပြုလုပ်သွားမည်ဖြစ်ကြောင်း ဗိုလ်ချုပ်ဇော်မင်းထွန်းက ပြောကြားထားသည်။

လက်ရှိတွင်လည်း မြန်မာ-တရုတ် နယ်စပ်အနီးတွင် ညီနောင်မဟာမိတ်သုံးဖွဲ့ (AA-TNLA-MNDAA) နှင့် မြန်မာ့တပ်မတော်တို့အကြား တိုက်ပွဲများ ဖြစ်ပွားလျက်ရှိနေသည်။

တရုတ်အနေဖြင့် ညီနောင်မဟာမိတ်သုံးဖွဲ့ကို အားပေးအားမြောက်ပြုလုပ်နေသည်ဟု လူထုများက မြင်ကြကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာ အောင်မျိုးက CNI သတင်းဌာနကို ပြောသည်။ 

၎င်းက “ပထမတစ်ချက် ပြောရမှာကတော့ ကျနော်တို့ ဒီဗမာပြည်မှာ ဖြစ်နေတဲ့ တရုတ်သဘောထားပေါ့နော်၊ တရုတ်သဘောထားက အထွေထွေအားဖြင့်တော့ ကျနော်တို့ အခု မြောက်ပိုင်းသုံးဖွဲ့ဖြစ်တဲ့ ကိစ္စမှာ တရုတ်က နောက်ကနေပြီးတော့ မီးထိုးပေးတယ်လို့ လူထုအထွေထွေပေါ့နော် General Public Opinion အဲဒီလိုလေး မြင်နေကြတာပေါ့။ အဲဒီလိုမြင်တာ ဘယ်လောက်မှန်သလဲ၊ မမှန်သလဲဆိုတာကတော့ ပြောရခက်တယ်၊ တစ်ခု ကျနော်တို့ မှန်းဆကြည့်တာတော့ အဲဒီဖက်မှာ ကျနော်တို့က တရုတ်ပြည်ဖက်က ရှင်းလင်းပြတ်သားတဲ့ တုံ့ပြန်မှုတစ်ခုကို ကျနော်တို့ မတွေ့ရဘူး။ တစ်ခုရှိတာကတော့ အခုလုပ်တဲ့သဘောက တစ်ချက်က နှစ်နိုင်ငံ မိတ်မပျက် ချစ်ကြည်ပါတယ်လို့ မီးစတစ်ဖက် ရေမုတ်တစ်ဖက် လုပ်တာလား ဒါမှ မဟုတ် တကယ့်ကို ချစ်ကြည်ရင်းနှီးလိုတဲ့ စေတနာဆန္ဒအမှန်ပဲ ရှိသလားဆိုတာက ဘယ်သူမှ ကျနော်တို့က ဝေခွဲမရဘူး ဖြစ်နေတာပေါ့နော်၊ ကျနော်တို့ သုံးသပ်တဲ့ လူတွေရော လူထုမှာလည်း အဲဒီလို ဖြစ်နေတာ၊ အဲဒီတော့ ဒီဖက် ပိုပြီး ရှင်းရှင်းလင်းလင်းဖြစ်အောင်တော့ လုပ်သင့်တယ်လို့ ထင်တာပေါ့နော်” ဟု ပြောသည်။

တရုတ် - မြန်မာ နှစ်နိုင်ငံနယ်နိမိတ်မှာ မိုင်ပေါင်း ၁၃၀၀ ကျော် ထိစပ်လျက်ရှိပြီး နယ်စပ်အနီးတွင် ရှမ်းပြည်ပြန်လည် ထူထောင်ရေးကောင်စီ (RCSS/SSA)၊ ကချင်လွတ်လပ်ရေးတပ်မတော် (KIA)၊ ရှမ်းပြည်တိုးတက် ရေးပါတီ (SSPP/SSA)၊ ‘ဝ’ ပြည်သွေးစည်းညီညွတ်ရေးပါတီ (UWSA)၊ အမျိုးသားဒီမိုကရေစီ မဟာမိတ် တပ်မတော် (NDAA)၊ MNDAA၊ TNLA နှင့် AA စသည့် လက်နက်ကိုင် အဖွဲ့အစည်းများ လှုပ်ရှားလျက်ရှိသည်။

CNI News

၂၀၂၃ ခုနှစ်၊ နိုဝင်ဘာ ၂၄

ကချင်လွတ်လပ်ရေးတပ်မတော်(KIA) အနေဖြင့် မိမိတို့ ကချင်ပြည်နယ်နှင့် စစ်ကိုင်းတိုင်းဒေသကြီးအား တည်ငြိမ် အေးချမ်းမှု မရှိစေရန် ဆက်လက်လုပ်ဆောင်နေပါက မိမိတို့ ရှမ်းနီလူငယ်များအနေဖြင့် KIA ကို တန်ပြန်ချေမှုန်းတိုက်ခိုက်မည်ဟု ရှမ်းနီလူငယ်များအဖွဲ့က နိုဝင်ဘာ ၂၃ ရက်နေ့စွဲဖြင့် ထုတ်ပြန်ခဲ့သည်။

အဆိုပါ ထုတ်ပြန်ချက်တွင် ကချင်ပြည်နယ်အတွင်းရှိ တိုင်းရင်းသား ပြည်သူများ၏ တည်ငြိမ်အေးချမ်းစွာ နေထိုင်လိုမှုအား တည်ငြိမ်မှုမရှိစေရေး ရည်ရွယ်ချက် ရှိရှိဖြင့် KIA သည် PDF ကို အားပေးထောက်ပံ့ကူညီ၍ ပူးပေါင်းဆောင်ရွက်ကာ မိမိတို့(ရှမ်းနီ)ဒေသအတွင်းရှိ ကျေးရွာများအား မီးရှို့ခြင်း၊ ဒေသခံပြည်သူများအား မတရားသဖြင့် ညှင်းပန်းနှိပ်စက်သတ်ဖြတ်ခြင်း၊ ဓားပြတိုက်လုယက်ခြင်း၊ အတင်းအဓမ္မ လူသစ်စုဆောင်းခြင်း နှင့် အမျိုးသမီးများအား အဓမ္မပြုကျင့်ခြင်းများ ပြုလုပ်၍ အဖျက်အမှောင့်လုပ်ငန်းများကို အမျိုးမျိုးလုပ်ဆောင် နေကြသည်ဟု ဖော်ပြထားသည်။

ရှမ်းနီလူငယ်များအဖွဲ့ ထုတ်ပြန်ချက်ကို တွေ့ရစဉ်

ထို့ကြောင့် မိမိတို့ ရှမ်းနီလူငယ်များအဖွဲ့သည် KIA အား လက်တုန့်ပြန်သည့် အနေဖြင့် နိုဝင်ဘာ ၂၃ ရက်နေ့က ကချင်ပြည်နယ် မြစ်ကြီးနားမြို့၊ မိုးကောင်းမြို့နှင့် ဗန်းမော်မြို့များတွင် သတိပေး မိုင်းဖောက်ခွဲမှုများ ဆောင်ရွက် ခဲ့သည်ဟု ရှမ်းနီလူငယ်များအဖွဲ့က ထုတ်ပြန်ခဲ့သည်။

ရှမ်းနီလူငယ်များအဖွဲ့ “ KIA အနေဖြင့် မိမိတို့ ကချင်ပြည်နယ်နှင့်စစ်ကိုင်းတိုင်းဒေသကြီးအား တည်ငြိမ်အေး ချမ်းမှု မရှိစေရန် ဆက်လက် လုပ်ဆောင်နေပါက မိမိတို့ ရှမ်းနီလူငယ်များအနေဖြင့် ကချင်ပြည်နယ်အတွင်းရှိ KIA အဖွဲ့ စိုးမိုးထားသည့် နေရာများအား တန်ပြန်ဖောက်ခွဲခြင်းနှင့် တိုက်ခိုက်ချေမှုန်းခြင်းများကို နည်းလမ်းမျိုးစုံ ဖြင့် လုပ်ကိုင်ဆောင်ရွက်သွားမည်”ဟု ပြောသည်။

လက်ရှိတွင် KIA သည် ရှမ်းနီလူမျိုးများ နေထိုင်ရာ စစ်ကိုင်းတိုင်းဒေသကြီးအတွင်းရှိ ဗန်းမောက်မြို့နယ်၊ ကော လင်း၊ ပင်လည်ဘူး၊ ဖောင်းပြင်၊ ကလေး၊ တမူး၊ ဟုမ္မလင်း၊ ရွှေပြည်အေး၊ ကသာ၊ ထီးချိုင့် စသည့် မြို့နယ်များ၌ AA၊ ABSDF၊ PDF၊ KNA Burma အဖွဲ့များကို လက်နက်ခဲယမ်းများ ထောက်ပံ့ပေးကာ ဒေသတည်ငြိမ်အေးချမ်း ရေးအတွက် ထိန်းသိမ်းထားသော ရှမ်းနီအမျိုးသားများတပ်မတော်(SNA)ကို တိုက်ခိုက်ချေမှုန်းလျက်ရှိနေ သည်။

ရှမ်းနီအမျိုးသားများတပ်မတော်(SNA)ကို တွေ့ရစဉ်

အလားတူ ကချင်ပြည်နယ်အတွင်းရှိ မိုးညှင်း၊ မိုးကောင်း၊ ဗန်းမော်၊ ဖားကန့်ဒေသများတွင်လည်း KIA သည် PDF များကို ထောက်ပံ့ပေးကာ တိုက်ပွဲများ ဖော်ဆောင်လျက်ရှိသည်။

KIA သည် စစ်ကိုင်းတိုင်းဒေသကြီး တစ်ခုလုံးကို ထိန်းချုပ်နိုင်ရေးအတွက် ကသုံးလုံး (ကသာ-ကောလင်း- ကန့်ဘလူ) စစ်ဆင်ရေး၊ ထီးချိုင့်မြို့နယ် ဗဟိုပြု စစ်ဆင်ရေး၊ ဗန်းမောက်မြို့နယ် ဗဟိုပြုစစ်ဆင်ရေးတို့ကို ဖော်ဆောင်လျက်ရှိနေသည်။

အဆိုပါ စစ်ဆင်ရေးဖော်ဆောင်မှု အောင်မြင်ပါက စစ်ကိုင်းတိုင်းဒေသကြီးတစ်ခုလုံးကို ထိန်းချုပ်ကာ မန္တလေး တိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ရခိုင်ပြည်နယ်တို့ိကို ထိန်းချုပ်နိုင်ရေးအတွက် AA၊ CNF၊ CDF၊ PDF တို့ကို လက်နက်ခဲယမ်းများ ထောက်ပံ့ပေး၍ တိုက်ပွဲများ ဖော်ဆောင်ခိုင်းမည်ဟု စစ်ရေးကျွမ်းကျင် သူများက ထောက်ပြကြသည်။

CNI News

၂၀၂၃ ခုနှစ်၊ နိုဝင်ဘာ ၂၄

လက်ရှိ လက်နက်ကိုင်ပဋိပက္ခများကြောင့် ဘေးလွတ်ရာသို့ ထွက်ပြေးတိမ်းရှောင်နေကြရသည့် တိုက်ပွဲရှောင် ပြည်သူများကို နစကနှင့် NUG ပါ အကူအညီပေးသင့်ကြောင်း ငြိမ်းချမ်းရေး လုပ်ငန်းစဉ်မှာ ပါဝင်နေသူ စဝ်ခွန်းဆိုင်က CNI သတင်းဌာနသို့ ပြောည်။

အပစ်ရပ် လက်မှတ် ရေးထိုးထားသော အဖွဲ့အစည်းများမှ ဆက်ဆံရေးရုံးကနေတဆင့် ကူညီနေကြောင်း၊ နိုင်ငံရေး ကို မတွက်ဘဲ လူသားချင်း စာနာထောက်ထားမှုအရ အကူအညီပေးသင့်ကြောင်း ၎င်းက ပြောသည်။

စဝ်ခွန်းဆိုင်က “အပစ်ရပ်တွေက ဆက်ဆံရေးရုံးဆိုလည်း သူက စစ်တပ်နဲ့ တိုက်ရိုက်ဆက်နွယ်တယ်၊ နောက်ပြီး တော့မှ TSC ကလည်း စစ်တပ်နဲ့ တိုက်ရိုက်ဆက်နွယ်တယ်၊ အဲဒီတော့ တချို့ နိုင်ငံခြားက အဖွဲ့အစည်းတွေ ကလည်း သူတို့က အဲဒီ TSC တို့  အခု ဆက်ဆံရေးရုံးတို့ကနေတဆင့် သူတို့ ကူညီတာလည်း ရှိပါတယ်။ သို့သော် လည်းပဲ ဥပမာ ကရင်နီလိုမျိုးကြတော့ မရတော့ဘူး၊ ဘာလို့လဲဆိုရင် ဆက်ဆံရေးရုံးတွေက မရှိတော့ဘူး။ သူတို့ လုပ်နိုင်တာ အခုလောလောဆယ်က မကျယ်ပြန့်သေးဘူးပေါ့၊ လောလောဆယ်က မကျယ်ပြန့်သေးပေမယ့် ဒီကိစ္စ ကို ကျယ်ကျယ်ပြန့်ပြန့် လုပ်နိုင်ဖို့ ဆိုပြီးတော့မှ အခုလောလောဆယ် ဆွေးနွေးနေတာ ရှိပါတယ်၊ ဒီလိုမျိုး ဆွေးနွေးတဲ့ အခါကြတော့ ရတဲ့နယ်မှာ အကုန်လုံး လုပ်ရမှာပဲ၊ ဖြစ်နိုင်လို့ ရှိရင် ဒီကိစ္စနဲ့ ပတ်သက်ပြီး ဒါလူသား ချင်း စာနာမှု အကူအညီ ပေးတယ်ဆိုတော့ SAC ဘက်ကပဲ မကဘူး NUG တို့၊ PDF တို့ ဘာတို့ကလည်း လူသား ချင်းစာနာမှု ကိုယ့်ရဲ့ ပြည်သူကို ကူညီနိုင်ဖို့ ဆိုပြီးတော့မှ နိုင်ငံရေးကို မတွက်ဘဲနဲ့ ကူညီနိုင်ရင် အကောင်းဆုံး ပါပဲ” ဟု CNI သတင်းဌာနသို့ ပြောသည်။

ကောလင်းမြို့အတွင်း PDF တစ်ဦး သွားနေသလို တိုက်ပွဲရှောင်ရန်ထွက်ခွာနေသော ဒေသခံများကိုလည်း တွေ့ရစဉ်

၂၀၂၁ ခုနှစ်၊ ဖေဖော်ဝါရီ ၁ ရက်နေ့က နိုင်ငံရေး အပြောင်းအလဲများကြောင့် တိုင်းပြည်တစ်ဝှမ်း လက်နက်ကိုင် ပဋိပက္ခ ဖြစ်ပွားလာခဲ့ပြီး ပြည်သူလူထု အများအပြား ဘေးလွတ်ရာသို့ ထွက်ပြေးတိမ်းရှောင်ခဲ့ကြရသည်။

ထို့နောက် တိုက်ပွဲများကြောင့် ကုန်းလမ်းနှင့်ရေလမ်း ပိတ်ဆို့မှုများ ဖြစ်လာပြီး ကုန်ဈေးနှုန်း အဆမတန် မြင့်တက်မှုများ၊ နယ်မြေမလုံခြုံမှုများကို ပြည်သူများ ကြုံတွေ့နေကြရသည်။

လက်ရှိ နယ်မြေများကို စိုးမိုးထားသည့် အဖွဲ့အစည်းအနေဖြင့် တိုက်ပွဲရှောင်များကို အကူအညီပေးနိုင်ရေး ခွင့်ပြုပေးသင့်ကြောင်း ရခိုင်နိုင်ငံရေးသမား ဦးဘရှိန်က CNI သတင်းဌာနသို့ ပြောသည်။

၎င်းက “ထွက်ပြေးနေကြတာတော့ အွန်လိုင်းမှာလည်း ပေါ်နေတာပဲ၊ မီဒီယာ အချင်းချင်း ပြောကြဆိုကြ အကုန်လုံး သိနေကြတာပဲ။ ပြည်သူတွေကို အကူအညီပေးဖို့ ဘယ်သူတွေက ဘယ်လို ကူညီပေးရမလဲဆိုတာ အခုက ပဋိပက္ခဖြစ်သွားတဲ့ နယ်မြေမှာ နယ်မြေကို ဘယ်သူက စိုးမိုးထားသလဲ၊ စိုးမိုးထားတဲ့ လူက မင်းတို့ ဒါလာလုပ်ကြ၊ မင်းတို့ လုပ်ကြလို့၊ အဲဒီလို လုပ်ခွင့် ကိုင်ခွင့်ပေးရင်တော့ ကူညီမယ့်သူတွေ ပေါ်လာမှာပေါ့။ အခုကတော့ လုပ်ချင်ကိုင်ချင်တဲ့ လူတွေ၊ ကူညီပေးချင်တဲ့ လူတွေက ရှိနေမှာပါ။ အန်ကယ်တို့လည်း စိတ် မကောင်းပါဘူး။ ပြည်သူတွေရဲ့ စိုးရိမ်ကြောင့်ကြမှုတွေကို ကြည့်ရတာ စိတ်မကောင်းပါဘူး” ဟု ပြောသည်။

၂၀၂၃ ခုနှစ်၊ နိုဝင်ဘာလ ၆ ရက်နေ့က ပြည်သူ့ကာကွယ်ရေးတပ် (PDF)၊ ပြည်သူ့ကာကွယ်ရေးအဖွဲ့(ပကဖ)နှင့် မဟာမိတ်ပူးပေါင်းတပ်ဖွဲ့များက ကောလင်းမြို့ကို အောင်မြင်စွာ တိုက်ခိုက် သိမ်းပိုက်နိုင်ခဲ့ကြောင်း၊ ထို့နောက် မြို့ခံ ၅၀,၀၀၀ ကျော် ထွက်ပြေးတိမ်းရှောင်ကြရပြီး စားနပ်ရိက္ခာများ၊ ဆေးဝါးများ လိုအပ်ကြောင်း တော်လှန်ရေး အင်အားစုများက ထုတ်ပြန်ခဲ့သည်။

CNI News

၂၀၂၃ ခုနှစ်၊ နိုဝင်ဘာ ၂၄

ရှမ်းပြည်နယ်မြောက်ပိုင်း၊ သီပေါမြို့နယ်အတွင်းမှာ မြန်မာ့တပ်မတော်နှင့် တအာင်းအမျိုးသားလွတ်မြောက်ရေး တပ်မတော်(TNLA)၊ မန္တလေးပြည်သူ့ကာကွယ်ရေးတပ်ဖွဲ့(MDY-PDF)ပူးပေါင်းတပ်ဖွဲ့ကြား တိုက်ပွဲများ ဖြစ်ပွား နေသည်။

သီပေါမြို့ပေါ်မှာ တိုက်ပွဲရှောင်နေရသူများ လူဦးရေစာရင်းကို တွေ့ရစဉ်

ထို့နောက် သီပေါမြို့နယ်အတွင်းရှိ ကျေးလက် ဒေသများမှ ဒေသခံ ၁၁၁၀ ဦး သီပေါမြို့ရှိ ဘုန်ကြီးကျောင်းများ နှင့် စာသင်ကျောင်းများသို့ ထွက်ပြေးတိမ်းရှောင်လာခဲ့ကြသည်။

အဆိုပါ တိုက်ပွဲရှောင်များသည် ဆောင်းရာသီဖြစ်၍ အနွေးထည်များ၊ စောင်များနှင့် စားနပ်ရိက္ခာများ အကူအညီ လိုအပ်နေကြောင်း ဒေသခံများက ပြောသည်။