CNI News
၂၀၂၅ ခုနှစ်၊ မေလ ၁၆
မြန်မာနိုင်ငံတွင် ရွေးကောက်ပွဲအလွန် အစိုးရတစ်ရပ်ပေါ်ပေါက်လာပါက ပြည်တွင်းမှာဖြစ်ပွားနေသည့် နိုင်ငံရေး တည်ငြိမ်အောင် မည်သို့ လုပ်ဆောင်မည်လဲဆိုကာ မေးခွန်းထုတ်မှုများ ရှိနေသည်။
လက်ရှိ မြန်မာနိုင်ငံတွင် လှုပ်ခတ်ခဲ့သည့် ငလျင်ဒဏ်ကြောင့် ပြန်လည်ထူထောင်ရေးကဏ္ဍ၊ ပြည်တွင်း ငြိမ်းချမ်း ရေး ဆောင်ရွက်ရမည့်ကိစ္စများ၊ ထိုမှတဆင့် ဖွံ့ဖြိုးတိုးတက်သည့် နိုင်ငံအသစ်အား တည်ဆောက်ရန် စသည့် ဦးတည်ချက် ၃ ချက်သည် ရွေးကောက်ပွဲအလွန် ပေါ်ထွက်လာမည့် အစိုးရအတွက် တာဝန်ကြီးမားကြောင်း ရခိုင့်ဦးဆောင်ပါတီ(AFP)မှဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။
အဆိုပါ အချက် ၃ ချက်အား ဆောင်ရွက်နိုင်မည့် တစ်ခုတည်းသော နည်းလမ်းသည် နိုင်ငံရေးတည်ငြိမ်မှုပင် ဖြစ်ကြောင်း၊ ထို့ကြောင့် ပြီးခဲ့သည့်ကာလ အစိုးရလက်ထက်များတွင် လုပ်ဆောင်ခဲ့သည်များအား နောက်လာမည့် အစိုးရအနေဖြင့် ချေဖျက်ခြင်းမျိုး မဖြစ်သင့်ဘဲ စုပေါင်းကာ ခိုင်မာသည့် အစိုးရတစ်ရပ်အား ပုံဖော်ရမည်ဖြစ် ကြောင်း ၎င်းက ပြောသည်။
နိုင်ငံရေးပါတီများ တွေ့ဆုံကြစဉ်
ဒေါက်တာအေးမောင်က “လာမယ့် ရွေးကောက်ပွဲအလွန် အစိုးရမှာ တာဝန်ကြီးတာပေါ့၊ ပထမတစ်ချက်က ကျနော်တို့ရဲ့ ပြည်တွင်းစစ်ကြီးပေါ့ဗျာ၊ ဒါကြီးကို အပစ်အခတ်ရပ်တဲ့ ကိစ္စကနေစပြီးတော့ အချင်းချင်း နိုင်ငံရေး ယုံကြည်မှုရှိအောင် ဆွဲခေါ်ယူနိုင်ရမှာပေါ့၊ ဒါကတော့ အလွန်ကြီးမားတဲ့ တာဝန်ပေါ့ဗျာ၊ လက်ငင်းမှာ မန္တလေး ငလျင်ကြီးကြောင့် ဖြစ်နေတဲ့ ပြန်လည်ထူထောင်ရေးကဏ္ဍကို အင်အားအပြည့်နဲ့ ဆောင်ရွက်ကြရမှာပေါ့၊ အဲဒီ နောက်မှာ ခုနကပြောတဲ့ ဆောင်ရွက်ကြရမယ့် ပြည်တွင်းငြိမ်းချမ်းရေးပေါ့ဗျာ၊ အဲဒီကနေတဆင့် ဖွံ့ဖြိုး တိုးတက် တဲ့နိုင်ငံ အသစ်ပေါ့ဗျာ၊ ဒီဦးတည်ချက် ၃ ရပ်ကတော့ လိုအပ်တာ၊ ဆိုတော့ အဲဒီလို တာဝန်ကြီး ၃ ရပ်ကရှိနေတော့ ရွေးကောက်ခံပြီးတော့ ပေါ်ထွန်းလာမယ့် အစိုးရသည် တာဝန်ကြီးတယ် ဆိုတာတစ်ခုကတော့ အားလုံးကလည်း ဒီလိုပဲ သတ်မှတ်မယ်ထင်တယ်၊ အဲဒီတော့ အဲဒီ ၃ ခု ခုနက ဦးတည်ချက် ၃ ခုကို ဆောင်ရွက်နိုင်မယ့် တစ်ခုတည်း သော နည်းသည် နိုင်ငံရေးတည်ငြိမ်မှုပေါ့ဗျာ၊ အဲဒီလို လုပ်နိုင်ဖို့အတွက် အခု နစကရဲ့ ၅ နှစ်ပေါ့ဗျာ၊ အဲဒီမတိုင်ခင် NLD ရဲ့ ၅ နှစ်ပေါ့၊ အဲဒီမတိုင်ခင် USDP ရဲ့ ၅ နှစ်ကို ခိုင်ခိုင်မာမာ ချိတ်ဆတ်နိုင်ရမယ့် တာဝန်ကြီးတစ်ခု လာမယ့် အစိုးရမှာ ပေါ်ထွန်းလာတာပေါ့၊ ပြီးခဲ့တဲ့ကာလ လုပ်ခဲ့တာအကုန်လုံးကို နောက်အစိုးရက အကုန်ချေဖျက်တာမျိုး မဖြစ်သင့်ဘူးပေါ့၊ စုပေါင်းပြီးတော့ ခိုင်မာတဲ့ အစိုးရတစ်ရပ်ကို ပုံဖော်ရမှာပေါ့၊ အဲဒီလို ပုံဖော်ခြင်းသည် ပြည်တွင်း ပဋိပက္ခကိုလည်း ပိုပြီးတော့ တည်ငြိမ် အေးချမ်းသွားအောင် ဦးဆောင်နိုင်ရမှာပေါ့” ဟု ပြောသည်။
နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာလနှင့် ၂၀၂၆ ခုနှစ်၊ ဇန်နဝါရီလများအတွင်း ရွေးကောက်ပွဲ ကျင်းပသွားမည်ဟု ပြောကြားထားသည်။
ရွေးကောက်ပွဲအလွန် အစိုးရအနေဖြင့် လက်နက်ကိုင်ပြဿနာများအား ရှင်းကိုရှင်းရမည်ဖြစ်ကြောင်း၊ ထို့ပြင် သတိထားရမည့် အချက်သည် အင်အားကြီး နိုင်ငံတချို့၏ ပါဝင်ပတ်သက်မှုများလည်း ရှိနေသောကြောင့် နိုင်ငံတကာ ဆက်ဆံရေးအား အာရုံစိုက်ပြီး လုပ်ဆောင်ရမည်ဖြစ်ကြောင်း ပြည်သူ့ရှေ့ဆောင်ပါတီ(PPP)မှ အထွေထွေအတွင်းရေးမှူး ဦးမျိုးဆက်သွေးက CNI သတင်းဌာနသို့ ပြောသည်။
KIA-PDF ပူးပေါင်းတပ်ဖွဲ့ကိုတွေ့ရစဉ်
၎င်းက “အဓိက,ကတော့ ပဋိပက္ခပြဿနာတွေပေါ့နော်၊ ပဋိပက္ခဆိုတာ လက်နက်ကိုင်ပဋိပက္ခ ပြဿနာတွေပေါ့၊ ဒါတွေက ရွေးကောက်ပွဲပြီးအစိုးရက ရှင်းကိုရှင်းရမှာပေါ့၊ အဲဒီတော့ ဒီပဋိပက္ခ ပြဿနာတွေက အရင်းအမြစ်တွေ လိုက်ရှာလိုက်ရင်တော့ သမိုင်းကြောင်း ဖြစ်စဥ်တွေလည်း ရှိတယ်၊ သယံဇာတ ခွဲဝေမှုကိစ္စတွေလည်းရှိတယ်၊ နိုင်ငံရေး ရပ်တည်မှုတွေလည်း ရှိတယ်။ အဲဒီအပြင် ပိုပြီးတော့မှ သတိထားဖို့ကောင်းတာက အင်အားကြီးနိုင်ငံ တချို့ရဲ့ ပါဝင်ပတ်သတ်မှုတွေ ရှိနေတယ်၊ အဲဒီတော့ ဒါတွေကို မဖြေရှင်းပဲနဲ့ နိုင်ငံတည်ဆောက်ရေး လုပ်ဖို့က လည်း တော်တော်လေး ခက်လိမ့်မယ်ဆိုတော့ နိုင်ငံတကာဆက်ဆံရေးကို တော်တော်လေးကို အာရုံစိုက်ပြီး လုပ်ရလိမ့်မယ်၊ ပြည်တွင်းလက်နက်ကိုင် အဖွဲ့အစည်းတွေအားလုံးက တကယ်သေချာ စဥ်းစားကြည့်ရင် အထောက်အပံ့ မပါဘဲနဲ့ ရပ်တည်လို့ မရဘူးလေ၊ လက်နက်ဆိုတာ တစ်ခုခု တစ်နေရာရာက ထောက်ပံ့နေမှ ရမှာလေ၊ အဲဒီ အထောက်အပံ့တွေ ဘယ်ကလာလဲပေါ့၊ ဒါစဥ်းစားကြည့်ရင် ရှင်းရှင်းလေးပါ၊ ဒါတွေအားလုံးက နိုင်ငံတကာကိစ္စတွေနဲ့ ပတ်သက်နေတာပဲ၊ မူဝါဒတို့ နိုင်ငံရေး ခံယူချက်တို့ဆိုတာ စားပွဲပေါ်မှာညှိရင် ရတယ်လေ၊ ညှိလို့မရတာက ထောက်ပံ့နေတဲ့ အင်အားစုတွေလေ၊ အဲဒါတွေကကျတော့ သံခင်းတမန်ခင်းနဲ့မှ ဆက်ဆံလို့ ရမှာပေါ့” ဟု ပြောသည်။
လက်ရှိမြန်မာနိုင်ငံတွင် ၂၀၂၅ ခုနှစ်၊ မတ်လ ၂၈ ရက်နေ့က လှုပ်ခတ်ခဲ့သည့် ငလျင်ကြောင့် လူပေါင်း ၄၀၀၀ ကျော်သေဆုံးပြီး ၅၀၀၀ ကျော် ထိခိုက်ဒဏ်ရာရရှိခဲ့ကာ လူနေအိမ်များ၊ စာသင်ကျောင်းများ၊ ဘာသာရေး အဆောက်အအုံများ၊ ဆေးရုံ/ဆေးခန်းများနှင့် လမ်း၊ တံတားများ ပျက်စီးဆုံးရှုံးခဲ့သည်။
ထို့ပြင် မြန်မာနိုင်ငံတစ်ဝှမ်းတွင် မြန်မာ့တပ်မတော်နှင့် တိုင်းရင်းသားလက်နက်ကိုင်တပ်ဖွဲ့များနှင့် ပြည်သူ့ ကာကွယ်ရေးတပ် (PDF) တို့ကြား တိုက်ပွဲများ ဖြစ်ပွားနေပြီး နေရပ်စွန့်ခွာ ထွက်ပြေးတိမ်းရှောင် နေရသူ များလည်း မြင့်တက်လျက်ရှိသည်။
ထို့ကြောင့် ပြန်လည်ထူထောင်ရေး လုပ်ငန်းများ၊ ပြည်တွင်းငြိမ်းချမ်းရေးနှင့် လက်နက်ကိုင်ပဋိပက္ခများအား ဖြေရှင်းဆောင်ရွက်နိုင်ရန် ရွေးကောက်ပွဲအလွန် အစိုးရအနေဖြင့် နိုင်ငံရေးတည်ငြိမ်ရန် လုပ်ရမည်ဖြစ်ကြောင်း စစ်ရေးနှင့် နိုင်ငံရေးအကဲအခတ်များက ထောက်ပြသည်။
