CNI News

၂၀၂၅ ခုနှစ်၊ မေလ ၁၆

လက်ရှိ မြန်မာ့တော်လှန်ရေး အခင်းအကျင်းတွင် တိုင်းရင်းသားလက်နက်ကိုင်အဖွဲ့အစည်း(EAOs) အပါအဝင် အခြား လက်နက်ကိုင်အဖွဲ့များနှင့် မြန်မာ့တပ်မတော်တို့အကြား စစ်ကိုင်းတိုင်းကို ဘာကြောင့် လိုချင်နေကြသလဲ ဆိုသည့်အပေါ် မေးခွန်းထုတ်မှုများ ရှိလာသည်။

စစ်ကိုင်းတိုင်းသည် တိုင်းဒေသကြီး ၇ ခုထဲတွင် အကျယ်ဆုံး တိုင်းတစ်ခုဖြစ်ပြီး မကွေးတိုင်းဒေသကြီး၊ မန္တလေး တိုင်းဒေသကြီး၊ ရှမ်းပြည်နယ်၊ ကချင်ပြည်နယ်၊ အိန္ဒိယနိုင်ငံနှင့် ချင်းပြည်နယ်တို့ဖြင့် ဝန်းရံထားခြင်းဖြစ်သည်။

စစ်ကိုင်းတိုင်းသည် မြန်မာနိုင်ငံ လွတ်လပ်ရေး ယူစဉ်ကတည်းက နိုင်ငံရေးသမား အများစုရှိခဲ့ကြခြင်းဖြစ်သလို ရတနာများ ထွက်ရှိသည့်အတွက် နှစ်ဖက်အင်အားစုများအကြား လိုချင်နေကြခြင်းဖြစ်ကြောင်း တိုင်းလိုင်(ရှမ်းနီ) အမျိုးသားများဖွံ့ဖြိုးတိုးတက်ရေးပါတီ(TNDP) မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

KIA/PDF ပူးပေါင်းတပ်ဖွဲ့ကို တွေ့ရစဉ်

၎င်းက “ဘာကြောင့် ယူထားတာလဲဆို စစ်ကိုင်းမှာကြ ရတနာတွေ တော်တော်ထွက်တယ်။ ရတနာတွေဆိုတာက သတ္တုတွေကအစပေါ့နော်။ ရွှေတွေ အဲဒီဟာအပြင်ကို နျူကလီးယားလုပ်တဲ့ ယူရေနီယမ်တွေကအစ စစ်ကိုင်းတိုင်း မှာ ထွက်ရှိတယ်လို့ သိရှိထားရတာပေါ့။ အဲဒါတွေလည်း ပါမှာပေါ့လေ စစ်ကိုင်းတိုင်းကို အရမ်းလိုချင်နေတဲ့ကိစ္စ ကတော့ အရင် နဝတ၊ နအဖ လက်ထက်တုန်းကလည်း ရွှေတိုင်းဒေသကြီးလို့ သတ်မှတ်ထားခဲ့တာလေ စစ်ကိုင်း တိုင်းကို။ စိုက်ပျိုးရေး ကတော့ နဝတ လက်ထက်က တည်ထောင်ခဲ့တာပေါ့။ အစကတော့ ရေသွင်း စိုက်ပျိုးရေး ဆိုပြီး စစ်ကိုင်းတိုင်းမှာ မရှိခဲ့ဘူးလေ နဝတလက်ထက်မှာ တော်တော်အောင်အောင်မြင်မြင် ဖြစ်ခဲ့တယ်” ဟု ပြော သည်။

စစ်ကိုင်းတိုင်းတွင် တိုင်းအတိုင်ပင်ခံကောင်စီ (သို့မဟုတ်) အစုအဖွဲ့တစ်ခု တည်ဆောက်၍ အာဏာရှင်စနစ် ချုပ်ငြိမ်းရေး၊ ကိုယ်ပိုင်ပြဋ္ဌာန်းခွင့်နှင့် ကိုယ်ပိုင်အုပ်ချုပ်ခွင့်ရရှိရေး၊ ဖက်ဒရယ်စနစ် ပေါ်ထွန်းရေးတို့ ဖော်ဆောင်ရန် နွေဦးတော်လှန်ရေး၌ ပါဝင်သည့် နိုင်ငံရေး အင်အားစုများနှင့် လက်နက်ကိုင်များသည် စစ်ကိုင်းဖိုရမ်ဆိုကာ စုဖွဲ့ ထားကြသည်။

ထိုသို့ နိုင်ငံရေးအရ စစ်ကိုင်းဖိုရမ်ကဲ့သို့ လုပ်ဆောင်မှုများရှိပြီး တိုင်းရင်းသားများဘက်မှ ကြည့်ပါက စစ်ကိုင်းတိုင်း သည် ဦးစားပေး မဟုတ်သော်လည်း ၎င်းတို့ဒေသများကို ကာကွယ်ရန် စစ်ရေးလှုပ်ရှားမှုများ လုပ်ဆောင်ကြခြင်း ဖြစ်ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “စစ်ကိုင်းတိုင်းကတော့ တိုင်းရင်းသားဘက်က ကြည့်ရင်တော့ အစွန်းထွက်တဲ့ နေရာပေါ့။ ဥပမာအားဖြင့် ကချင်ဘက်ကကြည့်ရင်လည်း ကချင်ပြည်နယ်နဲ့ ကချင်ဒေသကို စစ်ကိုင်းတိုင်းမှာ သူ့ကချင်ပြည်နယ်ရဲ့ ပြင်ပ ပေါ့လေ။ အဲဒီမှာ စစ်ရေးဖော်ဆောင်ပြီးတော့ ကချင်ပြည်နယ်ကို စစ်ရေးလျော့အောင် သူလုပ်နိုင်တာပေါ့။ ထို့ အတူပဲ ချင်းတို့ဘာတို့လည်းပဲ ဒီအတိုင်းပါပဲ။ ချင်းတို့၊ ရခိုင်တို့ လုပ်နိုင်တဲ့ သဘောရှိပါတယ်။ ဒါကြောင့် စစ်ကိုင်း တိုင်းက ကြားဖြစ်ပြီးတော့ အဖွဲ့အစည်းအသီးသီးက စစ်ကိုင်းတိုင်းကို ဦးစားပေးတော့ မဟုတ်ဘူးပေါ့။ ဒါပေမယ့် လှုပ်ရှားမှု အနေနဲ့တော့ ပါလာနိုင်တာပေါ့။ သို့သော်လည်းပဲ စစ်ကိုင်းကိုယ်တိုင်က လုပ်ရမယ့် အလုပ်တွေလည်း ရှိပါတယ်။ စစ်ကိုင်းဖိုရမ်တို့ ဘာတို့လည်း တချို့ အသိအမှတ်ပြုခံရပြီးတော့ ဆွေးနွေးတာတွေ ဘာတွေတွေ့ရ ပါတယ်။ ဒါကြောင့် စစ်ကိုင်းဖိုရမ်နဲ့ နိုင်ငံရေးပုံစံပေါ့လေ။ စစ်ကိုင်း constitution ပေါ့” ဟု ပြောသည်။

BPLA တပ်ဖွဲ့ကို တွေ့ရစဉ် 

စစ်ကိုင်းတိုင်းထဲတွင် ဂတ်စ်၊ ရေနံ၊ ကျောက်၊ ရွှေ၊ ကြေးနီ၊ သစ်၊ ရွှေဖြူ၊ ခရိုမိုက်၊ ပလက်တီနမ်၊ ကျောက်မီးသွေး၊ သံ၊ မြေရှားသတ္တု စသည့် သယံဇာတများ ထွက်ရှိကြောင်း သိရသည်။

စစ်ကိုင်းတိုင်း၌ ဗဟိုအစိုးရအာဏာ တိုက်ရိုက် သက်ရောက်မှု မရှိသော်လည်း မြန်မာနိုင်ငံ၏ နယ်နိမိတ်တွင်သာ ရှိပြီး ခြေ/ဥအရ ပေးထားချက် ပိုင်နက်ရှိပြီးသားဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “စစ်ကိုင်းတိုင်း အရေးပါခြင်း၊ မပါခြင်းဆိုတာ အဲဒီစစ်ကိုင်းတိုင်းမှာ လောလောဆယ် ဘယ်သူက ကွပ်ကဲမှု ပေးနိုင်လဲဆိုတာ အရေးကြီးတယ်။ ဆိုလိုတာက ဗဟိုအစိုးရအာဏာချက်အရ တချို့နေရာတွေက အာဏာချက် တိုက်ရိုက် သက်ရောက်မှု မရှိဘူးဆိုပေမယ့် မြန်မာနိုင်ငံရဲ့ နယ်နိမိတ်အတွင်းဝိုင်းမှာ စစ်ကိုင်းတိုင်းက ရှိနေတယ်။ အဲဒီတော့ အဲဒီအချက်ကိုသာ မူတည်ပြီး ပြောမယ်ဆိုရင် စစ်ကိုင်းတိုင်းသည် မြန်မာနိုင်ငံရဲ့ လက်ရှိ ၂၀၀၈ အခြေခံ ဥပဒေအောက်မှာပဲရှိတာ။ ဥပဒေရဲ့ ပေးထားချက် ပိုင်နက်ထဲမှာ ရှိပြီးသားဖြစ်တဲ့ အတွက်ကြောင့် ဗဟိုအစိုးရရဲ့ အဓိက သဘောထားပေါ့” ဟု ၎င်းက ပြောသည်။

စစ်ကိုင်းတိုင်းအတွင်း၌ နာဂလက်နက်ကိုင် NSCN (နာဂလက်နက်ကိုင် အဖွဲ့အစည်း အနည်းဆုံး ၆ ဖွဲ့ ရှိ)၊ ရှမ်းနီ အမျိုးသားများတပ်မတော်(SNA)၊ ကသည်းလက်နက်ကိုင် (PLA,MPA)၊ ကချင်လွတ်လပ်ရေးတပ်မတော် (KIA)၊ အာရက္ခတပ်တော်(AA)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABSDF)၊ ကရင် အမျိုးသား အစည်းအရုံး(KNU)တို့ရှိသည်။

ထို့ပြင် ချင်းအမျိုးသားတပ်ဦး(CNF)၊ ဇိုမီးတော်လှန်ရေးတပ်မတော်(ZRA/ZRO)၊ ကူကီးအမျိုးသားတပ်မတော်-မြန်မာနိုင်ငံ(KNA-B)၊ NUG အောက်ရှိ ပြည်သူ့ကာကွယ်ရေးတပ်ဖွဲ့(PDFs)များ၊ ဗမာအမျိုးသား တော်လှန်ရေး တပ်မတော် (BNRA)၊ ပြည်သူ့လွတ်မြောက်ရေးတပ်မတော်(PLA-ကွန်မြူနစ်)၊ 96 soldier (ကိုဇေယျာလွင် ဦးဆောင်)၊ CNDF(ချင်းမျိုးနွယ်စုအဖွဲ့)၊ ဒေသကာကွယ်ရေးတပ်ဖွဲ့(LPDFs)များ စသဖြင့် ရှိကြသည်။

အလားတူ မြန်မာ့တပ်မတော်၏ လက်အောက်ရှိ ပြည်သူ့စစ်တပ်ဖွဲ့(ပသစ)များနှင့် ပျူ‌စောထီးတပ်ဖွဲ့(ပစထ)များ လည်း ရှိကြသည်။