CNI News

၂၀၂၅ ခုနှစ်၊ မေလ ၁၅

လက်ရှိ မြန်မာ့နိုင်ငံရေး အခင်းအကျင်းတွင် တစ်ပါတီစနစ်ဖြင့် သွားမည်ဆိုပါက တိုင်းပြည် ပိုပျက်သွားနိုင် ကြောင်း နိုင်ငံရေးပါတီအချို့က ထောက်ပြကြသည်။

နိုင်ငံရေးပါတီများအကြားတွင် မြန်မာနိုင်ငံ၏ စစ်ရေးတင်းမာမှု၊ တည်ငြိမ်အေးချမ်းမှု မရှိခြင်းတို့သည် ပါတီစုံ စနစ်ကြောင့်ဖြစ်ပြီး တစ်ပါတီစနစ်ဖြင့် ပြန်လည်တည်ဆောက် သွားသင့်ကြောင်း သဘောထား ကွဲလွဲမှုများ ရှိနေကြသည်။

မြန်မာနိုင်ငံတွင် ပါတီစုံဒီမိုကရေစီ ကျင့်သုံးမှုကြောင့် လက်နက်ကိုင်အဖွဲ့အစည်း ပေါများကာ တိုင်းပြည် တည်ငြိမ်အေးချမ်းမှု မရှိခြင်းမဟုတ်ဘဲ ယခင် တစ်ပါတီစနစ် ကျင့်သုံးခဲ့သည့် မြန်မာ့ဆိုရှယ်လစ်လမ်းစဉ်ပါတီ ခေတ်ကတည်းက လက်နက်ကိုင်အဖွဲ့အစည်း အများအပြား ရှိခဲ့ခြင်းဖြစ်ကြောင်း တိုင်းလိုင်(ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP)မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

ယခင်ကျင့်သုံးခဲ့စဉ်ကလည်း တိုင်းပြည်တိုးတက်လာခြင်းမရှိဘဲ ဆုတ်ယုတ်ခြင်းသာရှိခဲ့ကြောင်း၊ ထို့ကြောင့် လက်ရှိ အခင်းအကျင်း၌ တစ်ပါတီစနစ်ဖြင့် သွားမည်ဆိုပါက တိုင်းပြည် ပိုပျက်သွားနိုင်ကြောင်း ၎င်းက ပြောသည်။

နိုင်ငံရေးပါတီများနဲ့ နစကဥက္ကဋ္ဌ တွေ့ဆုံစဉ်

စိုင်းဋ္ဌေးအောင်က “ ပါတီစုံနဲ့ပဲသွားရမှာပါ။ တစ်ပါတီနဲ့ကတော့ သွားလို့မရပါဘူး။ ကျနော်တို့ အခုနေ တစ်ပါတီ နဲ့သွားရင် တိုင်းပြည် ပိုပျက်သွားပါလိမ့်မယ်။ လောလောဆယ် ပြောင်းမယ်ဆိုရင်။ မလွယ်ကူဘူး။ တစ်ပါတီစနစ်နဲ့ ပါတီစုံဆိုရင်တော့ ကျနော်တို့ စနစ်ရှိရင်တော့ ဘာမဆိုကောင်းပါတယ်။ အမေရိကန်နဲ့ တရုတ်ကိုပဲ နှိုင်းယှဉ်ကြည့် ရမယ့် ပုံစံပေါ့။ တရုတ်ကတော့ တစ်ပါတီစနစ်နဲ့သွားနေတယ်။ အခုရုရှားတို့၊ တရုတ်တို့ကကြတော့။ စည်းနဲ့ကမ်းနဲ့ မူနဲ့ဘောင်နဲ့ အားလုံးက လုပ်မယ်ဆိုရင်ကြတော့ တိုင်းပြည်တိုးတက်တာပေါ့။ အမေရိကန်လည်း ပါတီစုံစနစ်ကို ကျင့်သုံးပေမယ့်လည်း အဆင်ပြေတာပဲလေ။ ကျနော်တို့က ဆိုရှယ်လစ်ခေတ်နဲ့ မြန်မာနိုင်ငံကို နှိုင်းယှဉ်ရမယ်။ ဆိုရှယ်လစ်ခေတ်နဲ့ ယနေ့ခေတ်ကို ပြန်နှိုင်းယှဉ်ရမယ်ဆိုရင်တော့ အခုပါတီစုံက ပိုလို့လွတ်လပ်တယ်လို့ ပြောလို့ရ တာပေါ့။ ပြည်သူလူထု အနေနဲ့လည်း နိုင်ငံရေး ကောင်းကောင်းနားလည်ပြီးမှ စနစ်တကျ ဖြစ်ဖို့တော့ လိုအပ်တာ ပေါ့။ ဘယ်စနစ်မဆို လူထုက နိုင်ငံရေးနားမလည်ရင် နိုင်ငံတည်ဆောက်ရ အရမ်းခက်ပါတယ်။ မလွယ်ကူဘူး ကျနော်တို့ ကျင့်သုံးခဲ့ပြီးပါပြီ တစ်ပါတီစနစ်ကို။ ၂၄ နှစ်တာပေါ့နော်။ ၇၄ အခြေခံဥပဒေအတည်ပြုပြီးမှ ၈၈။ အဲဒါ ကျင့်သုံးခဲ့တာလည်း တိုင်းပြည်က တိုးတက်လာတာမရှိဘဲ ဆုတ်ယုတ်တာပဲ ရှိတာပေါ့” ဟု ပြောသည်။

၁၉၆၂ ခုနှစ်က မြန်မာ့တပ်မတော်သည် နိုင်ငံတော်အာဏာကို ရယူခဲ့ပြီးနောက် ဗိုလ်ချုပ်ကြီးနေဝင်း ဦးဆောင်၍ မဆလပါတီကို ဖွဲ့စည်းကာ မြန်မာနိုင်ငံအား တစ်ပါတီစနစ်ဖြင့် ၁၉၈၈ ခုနှစ်အထိ အုပ်ချုပ်ခဲ့သည်။

ထို့နောက် ပြည်သူလူထု တစ်ရပ်လုံး၏ ကြီးမားကျယ်ပြန့်သော အုံကြွဆန့်ကျင်မှု ပေါ်ပေါက်ခဲ့ရပြီး သမိုင်းဝင် ရှစ်လေးလုံး အရေးအခင်းကြီးနှင့် ရင်ဆိုင်ခဲ့ရသည်။ 

ထို့ကြောင့် မြန်မာ့ဆိုရှယ်လစ်လမ်းစဉ်ပါတီ စနစ်ကြီးလည်း ချုပ်ငြိမ်းခဲ့ရပြီး ၁၉၈၈ ခုနှစ်၊ စက်တင်ဘာလ ၁၈ ရက် နေ့တွင် ဗိုလ်ချုပ်မှူးကြီး စောမောင် ခေါင်းဆောင်သော တပ်မတော်မှ အာဏာရယူခဲ့ကာ နိုင်ငံတော်ငြိမ်ဝပ် ပိပြားမှု တည်ဆောက်ရေးအဖွဲ့(နဝတ)ကို ဖွဲ့စည်း၍ တိုင်းပြည်ကို အုပ်ချုပ်ခဲ့သည်။

 ဗိုလ်ချုပ်မှူးကြီးမင်းအောင်လှိုင် ရွေးကောက်ပွဲ မဲပေးနေစဉ်

ထို့နောက် ၁၉၉၀ ခုနှစ်၊ မေလ ၂၇ ရက်နေ့တွင် ပြည်ထောင်စုမြန်မာနိုင်ငံတော် ပါတီစုံဒီမိုကရေစီ အထွေထွေ ရွေးကောက်ပွဲကို ကျင်းပခဲ့ကြရာမှ လက်ရှိအချိန်အထိ ပါတီစုံစနစ်ကိုသာ ကျင့်သုံးလာခဲ့ခြင်းဖြစ်သည်။

နစကဥက္ကဋ္ဌအနေဖြင့် ၂၀၂၅ ခုနှစ်၊ ဒီဇင်ဘာလ၌ ရွေးကောက်ပွဲ ကျင်းပမည်ဟု ကတိပြု ပြောဆိုထားသည့်အပြင် ပါတီစုံဒီမိုကရေစီစနစ်အရ ရွေးကောက်ပွဲ ကျင်းပမည်ဟု ပြောထား၍ တစ်ပါတီစနစ် ဖြစ်လာနိုင်စရာ မရှိကြောင်း ပြည်သူ့ပါတီ(PP)၏ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းက “၂၀၀၈ ဖွဲ့စည်းပုံအတိုင်း ဆက်လက် ဆောင်ရွက်မယ်လို့ ပြောနေတဲ့အတွက်ကြောင့် တချို့ကိစ္စတွေက အငြင်းပွားစရာ မရှိဘူးလို့ မြင်ပါတယ်။ နိုင်ငံတော်က ပါတီစုံဒီမိုကရေစီစနစ်နဲ့ သွားမယ်ဆိုတာ ပြောပြီးသားဖြစ် တယ်။ အဲဒီတော့ ပါတီစုံဒီမိုကရေစီစနစ်ကို ပုံစံတကျ စနစ်တကျဖြစ်အောင် ဆောင်ရွက်ကြဖို့ လိုတယ်လို့ပဲ မြင်ပါ တယ်။ ပါတီစုံက နိုင်ငံတကာမှာ တကယ်ဖွံ့ဖြိုးတိုးတက်နေတဲ့ နိုင်ငံတွေမှာလည်း ပါတီစုံဒီမိုကရေစီစနစ်နဲ့ သွား တာပဲလေ။ တစ်ပါတီနဲ့ သွားတယ်ဆိုတဲ့ကိစ္စက ထူးခြားတဲ့အခြေအနေတွေနဲ့ အဲဒီတစ်ပါတီစနစ် ဆက်လက် တည်မြဲနေတယ်ဆိုတာကလည်း အဲဒီခေါင်းဆောင်တွေရဲ့ အမြော်အမြင်တွေက ဆင်ခြင်တုံတရား အပေါ်မှာ လည်း မူတည်တယ်လို့ မြင်ပါတယ်” ဟု ပြောသည်။

တစ်ပါတီစနစ်ဆိုသည်မှာ တိုင်းပြည်တစ်ခုကို နိုင်ငံရေး(လမ်းစဉ်)အယူအဆ တစ်မျိုးတည်းကျင့်သုံး၍ ပါတီ တစ်ခုတည်းမှ အုပ်ချုပ်သည့် စနစ်ဖြစ်ပြီး ပါတီခေါင်းဆောင်(သို့မဟုတ်) ပါတီ၏ ဗဟိုအာဏာပိုင်အဖွဲ့က တိုင်းပြည်အာဏာအား ဆုပ်ကိုင်ထားကာ အုပ်ချုပ်ခြင်းဖြစ်သည်။

ဒီမိုကရေစီစနစ်ဆိုသည်မှာ ပြည်သူက ၎င်းတို့အား ကိုယ်စားပြုသူကို ကိုယ်တိုင် ရွေးချယ်အုပ်ချုပ်စေသော စနစ် ဖြစ်ပြီး ဖက်ဒရယ်စနစ်ဆိုသည်မှာ စုစည်းလုပ်ကိုင်ရာမှ လုပ်ကိုင်နိုင်ခွင့်များအား ခွဲဝေကျင့်သုံးသည့် အယူအဆ သဘောတရားဖြစ်၍ ပေါင်းစည်း နေထိုင်ခြင်း၊ မျှဝေခံစားခြင်းဖြစ်သည်ဟု နိုင်ငံရေးသမားများက ထောက်ပြကြ သည်။