CNI News

၂၀၂၃ ခုနှစ၊ ဒီဇင်ဘာ ၁၈

ဗုံးပေါက်ကွဲမှုများ မကြာခဏဖြစ်ပွားနေသော ရန်ကုန်တွင် ပြည်သူလူထုများအနေဖြင့် သတိထားသွားလာကြရန် စီးပွားရေး လုပ်ငန်းရှင် ဦးသက်ဇော်က CNI သတင်းဌာနသို့ ပြောသည်။

လက်ရှိကာလမှာ ပြည်သူလူထုအများစု အကျပ်အတည်းဖြင့် ရင်ဆိုင်နေရကြောင်း ပေါက်ကွဲမှု ဖြစ်စဉ်များကို လည်း ပြည်သူများ မထိခိုက်ရန် လုပ်ဆောင်သင့်ကြောင်း ၎င်းက ပြောသည်။

ဦးသက်ဇော်က “သတိထားသင့်တာပေါ့ဗျာ၊ အတတ်နိုင်ဆုံးတော့ မသိတဲ့ ပစ္စည်းတွေ မကိုင်စေချင်ဘူး။ ဖြစ်ရင်‌ တော့ သက်ဆိုင်ရာကို သတင်းပေးပေါ့၊ ဘာလို့လဲဆိုတော့ ပစ္စည်းတွေ့တိုင်း အခုချိန်မှာလည်း ရှားပါးနေတဲ့ အခါကြတော့ ဘာလေးများလဲ ဆိုပြီးတော့ စူးစမ်းစိတ်နဲ့ ဖွင့်လိုက်လို့ရှိရင် ဒီပြဿနာတွေ ရှိတာပေါ့၊ ပေါက်ကွဲ တဲ့ဟာတွေက ဒီပေါက်ကွဲတဲ့ ဖြစ်စဉ်တွေက ပြည်သူတွေကို အထိအခိုက် မရှိနိုင်အောင်လို့ပဲ ကျနော်တို့က Knowledge ပေးစေချင်တာပေါ့ဗျာ ဘာဖြစ်လို့လဲဆိုရင် မရှိဆင်းရဲသားမှာမှ ဖြစ်ခါမှ ထိခိုက်ဒဏ်ရာ ဖြစ်လို့ရှိရင် ဆေးကုရတာတွေရော သူ့ရဲ့ recovery ဖြစ်ရမယ့် အခြေအနေရော ပေးဆပ်ရမယ့် မိသားစုရဲ့ တာဝန်တွေက မသေးဘူးလေ၊ ဒါကြောင့်မို့လို့ ဒီလိုတော့ ဖြစ်တာတော့ ကျနော်တို့က သိပ်ပြီးတော့ အားမပေးဘူးပေါ့ဗျာ၊ ဘာပဲ ပြောပြော အားလုံးက ငြိမ်းငြိမ်းချမ်းချမ်းနဲ့ပဲ ပြည်သူတွေရဲ့ စားဝတ်နေရေးကိုတော့ အထိအခိုက်တော့ မခံစေချင် ဘူးပေါ့ဗျာ” ဟု CNI သတင်းဌာနသို့ ပြောသည်။

ရန်ကုန်မြို့တွင်း တစ်နေရာကိုတွေ့ရစဉ်

လက်ရှိတွင် ရန်ကုန်မြို့နှင့် အခြားမြို့နယ်များမှာ စစ်ဆင်ရေးများ ဆောင်ရွက်နေကြောင်း ပြည်သူများအနေဖြင့် မိမိနှင့် မသက်ဆိုင်သော ပစ္စည်းများကို ကောက်ယူကိုင်တွယ်ခြင်းများ မပြုလုပ်ရန် တော်လှန်ရေးအင်အားစု များက ထုတ်ပြန်ထားသည်။

ထို့အတူ ပြီးခဲ့သည့် ဒီဇင်ဘာ ၁၅ ရက်၊ ၁၆ ရက်များတွင် Bluetooth ဆောင်းဘောက်ဖြင့် တွဲထားသော မိုင်း ထောင်တိုက်ခိုက်မှုမှာ အရပ်သား နှစ်ဦး ဆောင်းဘောက်တစ်လုံးကို ကောက်ယူစမ်းသပ်မိရာမှ ထိခိုက်ဒဏ်ရာ ရရှိခဲ့သည်။

ပြည်သူလူထုများအနေဖြင့် အပြင်သွားလာပါက သတိထားသွားလာသင့်ပြီး သတင်းကိစ္စများအား နားစွင့်ကာ အချင်းချင်း အသိပေးနေထိုင်သင့်ကြောင်း ပလောင်နိုင်ငံရေးသမား မိုင်းအုဏ်းခိုင်က CNI သတင်းဌာနသို့ ပြော သည်။

ဈေး၀ယ်များကို တွေ့ရစဉ်

၎င်းက “ဒီလို အချိန်မျိုးမှာတော့ သွားလာတဲ့အချိန်မှာ သတိအမြဲတမ်း လိုအပ်တယ်၊ ပြီးတော့ မသွားခင်မှာ သတင်းလေးဘာလေး စုံစမ်းပြီးမှ သွားသင့်တာပေါ့၊ သွားတဲ့နေရာမှာလည်း ခုနလို တစ်ယောက်နဲ့ တစ်ယောက် အသိပေးပြီးမှ သတိပေးပြီးမှ သွားလာသင့်တာပေါ့၊ ဒီအချိန်မှာ ပြီးတော့ ကိုယ်မသင်္ကာစရာတို့ ဘာတို့တွေ တွေ့ပြီဆိုရင်လည်း သတိထားပြီးနေတတ်ဖို့ သတိထားပြီး သွားလာတတ်ဖို့ လိုတာပေါ့” ဟု ပြောသည်။

လက်ရှိတွင် ရန်ကုန်မြို့၊ မန္တလေးမြို့တို့ အပါအဝင် မြို့ကြီးများတွင် မကြာခဏ လုပ်ကြံသတ်ဖြတ်မှုများ၊ မိုင်းထောင်ဖောက်ခွဲမှုများ ဖြစ်ပွားလျက်ရှိနေပြီး အရပ်သားများ ထိခိုက်သေဆုံးမှုများလည်း ရှိနေသည်။

CNI News

၂၀၂၃ ခုနှစ်၊ ဒီဇင်ဘာ ၁၅

ရှမ်းနီတိုင်းရင်းသားများ နေထိုင်သည့် ကချင်ပြည်နယ်၊ မြစ်ကြီးနားမြို့နယ်၊ တာလောကြီးရွာကို ယနေ့ (ဒီဇင်ဘာ ၁၅ ရက်) နံနက် ၅ နာရီတွင် ကချင်လွတ်လပ်ရေးတပ်မတော်(KIA)က ဝင်ရောက်စီးနင်း၍ လီဆူ ပြည်သူ့စစ်နှင့် တိုက်ပွဲများ ဖြစ်ပွားနေသည်။

KIA သည် တာလောကြီးရွာကို စီးနင်းထားရာတွင် ကျေးရွာနေ ရှမ်းနီပြည်သူလူထုကို ထွက်ပြေးတိမ်းရှောင်ခွင့် မပေးဘဲ လူသားတံတိုင်းပြု၍ အကာအကွယ်ယူကာ တိုက်ခိုက်နေကြောင်း ရှမ်းနီအမျိုးသားများ ညီညွတ်ရေး အစည်းအရုံး(SNUA)က သတင်းထုတ်ပြန်ခဲ့သည်။

ထို့နောက် မြန်မာ့တပ်မတော်ကလည်း မြစ်ကြီးနားမြို့ဘက်မှ လက်နက်ကြီးများ၊ လေကြောင်းပစ်ကူများဖြင့် KIA တပ်ဖွဲ့ကို တိုက်ခိုက်ရာ တာလောကြီးရွာဘေးအထိ ကျရောက် ပေါက်ကွဲနေကြောင်း၊ ရွာနေ ရှမ်းနီပြည်သူလူထု အတွက် အန္တရာယ်ကြီးစွာ ကျရောက်နေကြောင်း ထုတ်ပြန်ချက်တွင် ဖော်ပြထားသည်။

KIA တပ်ဖွဲ့ကိုတွေ့ရစဉ်

SNUA က “ စစ်ရေးပဋိပက္ခအတွင်း ပါဝင်လျက်ရှိသည့် KIA တပ်ဖွဲ့၊ လီဆူပြည်သူ့စစ်နှင့် စစ်ကောင်စီတို့သည် အပြည်ပြည်ဆိုင်ရာ လူသားချင်းစာနာထောက်ထားမှုဥပဒေ(IHL)နှင့် အပြည်ပြည်ဆိုင်ရာ လူ့အခွင့်အရေးဥပဒေ (IHRL)အပေါ် လေးစားလိုက်နာရန် လိုအပ်ကြောင်း သတိပေးပါသည်။ KIA တပ်ဖွဲ့၊ လီဆူပြည်သူ့စစ်နှင့် စစ်ကောင်စီတို့သည် ရှမ်းနီပြည်သူလူထုကို အကာအကွယ်ယူ၍ တိုက်ခိုက်ခြင်း၊ ရှမ်းနီပြည်သူလူထုနေထိုင်ရာ အဆောက်အဦများ၊ စာသင်ကျောင်း၊ ဆေးရုံနှင့် ဘာသာရေး အဆောက်အဦများတွင် ဝင်ရောက်နေရာယူခြင်း၊ ၎င်းနေရာများကို စစ်ရေးပစ်မှတ်အဖြစ် ပစ်ခတ်တိုက်ခိုက်ခြင်း မပြုကြရန်နှင့် ရှမ်းနီပြည်သူလူထုကို စစ်ဘေး လွတ်ရာသို့ ထွက်ခွာခွင့်ပြုရန် တောင်းဆိုပါသည်”ဟု ထုတ်ပြန်ပြောကြားထားသည်။

တာလောကြီးရွာသည် ရှမ်းနီတိုင်းရင်းသားများ အစဉ်အဆက် နေထိုင်ခဲ့ကြသည့် သမိုင်းဝင် ကျေးရွာကြီးဖြစ်ပြီး KIA ၏ ရန်ပြုခြင်း၊ အဓမ္မစစ်သားစုဆောင်းခြင်းကို အကြိမ်ကြိမ် ခံရသည့်ရွာ တစ်ရာဖြစ်ရာ ယခုစစ်ရေးပဋိပက္ခ ဖြစ်စဉ်အတွင်း၌လည်း လူ့အခွင့်အရေး ချိုးဖောက်ခံရသည့် ဖြစ်စဉ်များရှိလာမည်ကို များစွာစိုးရိမ်နေရသလို အခြေအနေအရပ်ရပ်ကို မိမိတို့ အစည်းအရုံးက စောင့်ကြည့်မှတ်တမ်းတင်သွားမည်ဖြစ်ကြောင်း အသိပေး ကြေညာသည်ဟု SNUA က ဒီဇင်ဘာ ၁၅ ရက်နေ့တွင် ထုတ်ပြန်ခဲ့သည်။

၂၀၁၄ သန်းခေါင်စာရင်းအရ တာလောကြီးကျေးရွာတွင် ကျား ၃၄၁၀ ဦး၊ မ ၃၄၆၉ ဦး စုစုပေါင်း ၆၈၇၉ ဦး နေထိုင်လျက်ရှိသည်။

CNI News

၂၀၂၃ ခုနှစ်၊ ဒီဇင်ဘာ ၁၅

ရက္ခိုင့်တပ်တော် (ULA/AA) က သိမ်းယူထားသည့် နှုံးဘူးနှင့် ထရွန်အိုင်ဗျူဟာကုန်းမှာ မြန်မာနိုင်ငံ၏ လုံခြုံရေးနှင့်စီးပွားရေးအတွက် အရေးကြီးသည် မဟာဗျူဟာမြောက်နေရာဟု နိုင်ငံရေးနှင့် စစ်ရေးလေ့လာ သူများက ပြောသည်။

မြန်မာ့တပ်မတော်၏ အထိုင်စခန်းဖြစ်သော ထရွန်အိုင်ဗျူဟာ ကုန်းကို AA မှ ဒီဇင်ဘာ ၄ ရက်နေ့က သိမ်းယူခဲ့ သလို  နှုံးဘူးဗျူဟာကုန်းကို ဒီဇင်ဘာ ၁၀ ရက်နေ့မှာ သိမ်းယူခဲ့ ကြောင်း ULA/AA က ထုတ်ပြန်ခဲ့သည်။

အဆိုပါ နှုံးဘူးဗျူဟာကုန်းနှင့် ထရွန်အိုင်ဗျူဟာကုန်းသည် ချင်းပြည်နယ်၊ ပလက်ဝမြို့နယ်အတွင်း တည်ရှိပြီး အိန္ဒိယနှင့် ဘင်္ဂလား‌ဒေ့ရှ်နိုင်ငံတို့ဖြင့် ကုန်သွယ်နိုင်သော မဟာဗျူဟာမြောက်လမ်းကြောင်းပေါ်မှာရှိသည်။

မြန်မာ့တပ်မတော်ဘက်က ထိုဗျူဟာကုန်းများကို အခိုင်အမာ တည်ဆောက်ထားကြောင်း၊ AA ဘက်ကလည်း ပေးဆပ်မှုများနိုင်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြော သည်။

 ပလက်ဝမြို့ကို တွေ့ရစဉ်

၎င်းက “တနည်းအားဖြင့် ကျနော်ခုနပြောတဲ့ အဲဒီဖက်က ဝင်ပေါက်သည် ပထမ အင်္ဂလိပ်-မြန်မာ စစ်ပွဲကတည်းက ရှိတော့ အခုထိ အဲဒီဖက်ကိုပဲ မြန်မာနိုင်ငံနဲ့ ပတ်သက်တဲ့ အန္တရာယ်ကို အာရုံစုစိုက်ထားပုံရပါတယ်၊ အဲဒီတော့ တစ်ခုရှိတာက အဲဒီလိုမျိုး ခိုင်ခိုင်မာမာ တည်ဆောက်ထားတဲ့ ထရွန်အိုင်တို့၊ နှုံးဘူးဗျူဟာတို့ဆိုတာ တော်ရုံတန်ရုံ ပေးဆပ်မှုမျိုးနဲ့ဖြင့် AA ဖက်လည်း ရမယ်မထင်ဘူး။ ဘာလို့ဆိုရင် ထိုးစစ်တစ်ရာ ခံစစ်တစ်ယောက်လို့လည်း သတ်မှတ်ကြတာကိုး ခံစစ်တစ်ဦးနဲ့ ထိုးစစ်အယောက် ၁၀၀ ကို သူ့ဘက်က ကာကွယ်နိုင်တယ်လေ၊ နောက် register လုပ်ထားတဲ့ တကယ့်ပုံသေပစ်မှတ်ကြီးတွေ ဖြစ်တဲ့အခါမှာ အမြဲတမ်း ပြန်သိမ်းဖို့ ပြန်ပြီးတော့ ထိန်းသိမ်း ထားဖို့ဆိုတာလည်း AA အတွက်လည်း ခက်ခဲပါလိမ့်မယ်၊ ပေးဆပ်ခဲ့ရတဲ့ အသက်တွေလည်း တော်တော်များပုံရပါ တယ်။ ဒီဘက်ကလည်း ဗျူဟာမှူးကျတယ်ဆိုတဲ့ သတင်းလေးတွေလည်း နှုံးဘူးဗျူဟာနောက်ပိုင်းမှာ သတင်း ထွက်လာတာပေါ့၊ ဗိုလ်ချုပ်ဇော်မင်းထွန်းတို့ကလည်း ကျည်ဆံ နောက်ဆုံးတစ်ထောင့်ဟာ အသက်ကို စွန့်တဲ့အထိ ဘာညာဆိုတဲ့ ဒီဘက်က စိတ်ဓါတ်စစ်ဆင်ရေးအားဖြင့်လည်း ဆောင်ရွက်ထားတဲ့ ကာလမျိုးမှာ ပေးရတဲ့အသက် တွေ ရှိမှာပေါ့၊ အဲဒီမြေနေရာတွေ အားလုံးကလည်း register လုပ်ထားတဲ့ ခုနလို အတိအကျ သတ်မှတ်ထားတဲ့ နေရာဖြစ်တဲ့အခါမှာ AA အတွက်လည်း အင်မတန် ကြောက်စရာကောင်းတယ်၊ ဒါ သတ်ကွင်းကြီးလည်း ဖြစ်သွား နိုင်တာပေါ့၊ အဲဒါကြောင့် သူ့အတွက် တစ်ဖက်ပြန်ကြည့်ရင်လည်း ညှိနှိုင်းမှုဟာ ဒီကာလမှာ လိုအပ်တယ် ဆိုတဲ့ ဖက်နဲ့ လူကြီးပိုင်းတွေဖက်ကလည်း စဉ်းစားမှာပေါ့ဗျာ” ဟု ပြောသည်။

အဆိုပါ ဗျူဟာကုန်း ၂ ခု၏ အရေးပါမှုမှာ အိန္ဒိယနှင့် မြန်မာ ကုလားတန်စီမံကိန်းကို ထိန်းချုပ်ထားသည့် နေရာ ဖြစ်ကြောင်း၊ ထိုဗျူဟာကုန်းကို ရရှိခြင်းအားဖြင့် စီမံကိန်းအား AA ထိန်းချုပ်နိုင်ကြောင်း မြန်မာ့နိုင်ငံရေး လေ့လာ သုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “အဲဒီဗျူဟာကုန်းက အရေးပါမှုဆိုတာ အဓိကအားဖြင့် အိန္ဒိယနဲ့ မြန်မာ ကုလားတန်မြစ်ဝှမ်း စီမံကိန်းကို အဓိကအားဖြင့် ထိန်းချုပ်ထားတဲ့ နေရာပေါ့ဗျာ၊ အဲဒီတော့ ဒီစခန်းနှစ်ကို ရရှိခြင်းအားဖြင့် ကုလားတန်မြစ်ဝှမ်းကို AA အဖွဲ့ကနေပြီးတော့ လွှမ်းမိုးထိန်းချုပ်နိုင်တဲ့ အနေအထားကို ဖော်ပြရာရောက်ပါတယ်၊ အဲဒါဟာ အိန္ဒိယရဲ့ အရှေ့မျှော်ရည်ဝါဒကို အကောင်အထည်ဖော်ဖို့အတွက် အရေးပါတဲ့ နေရာဖြစ်ပါတယ်။ ဒါကြောင့် ဒီနေရာမှာ AA ရဲ့ လွှမ်းမိုးသိမ်းပိုက်လိုက်နိုင်မှုဟာ စစ်ကောင်စီအနေနဲ့ ဒီလုပ်ငန်းတွေ ဆက်လုပ်ဖို့အတွက် အကြောင်းအချက် မရှိတော့ဘူး။ အဲဒီအဆုံးအဖြတ်ဟာ AA လက်ထဲမှာ ရောက်ရှိသွားပြီ ဖြစ်တဲ့အတွက် တော်တော်လေး အကျိုး အမြတ် ရှိတဲ့ အတော်လေး အလားအလာကောင်းတဲ့ အနေအထားလို့ ကျနော်တို့ သုံးသပ်ရပါတယ်” ဟု ပြော သည်။

ကုလားတန်မြစ်တစ်လျှောက်ရှိ ထရွန်အိုင်ကျေးရွာကိုတွေ့ရစဉ်

သို့သော် AA အနေဖြင့် မြန်မာ့တပ်မတော်နှင့် မြန်မာနိုင်ငံ၏ လုံခြုံရေးနှင့် စီးပွားရေးအတွက် အရေးကြီးသည့် မဟာဗျူဟာကျသော ဗျူဟာကုန်းများကို တပ်မတော်က ပြန်လည်ထိုးစစ်ဆင် တိုက်ခိုက်လာမှာဖြစ်၍ ရေရှည် ထိန်းထားနိုင်ရန် ခက်ခဲနိုင်ကြောင်း စစ်ရေးအကဲခတ်များက သုံးသပ်ကြသည်။

ဒေါက်တာ အေးမောင်က “အဲဒီထိန်းချုပ် ဗျူဟာကုန်းတွေကို ပြန်ကြည့်ရင် ကစ္ဆပနဒီမြစ်တို့ ပလက်ဝတို့ နောက် အိန္ဒိယနယ်စပ်တို့ တစ်ဖက်က ဘင်္ဂလားနယ်စပ်တို့ထိ ထိန်းချုပ်နိုင်တဲ့ ကုန်းမြင့်၊ ဗျူဟာကုန်း တနည်းအားဖြင့် အလွန်အက္ခရာကျတဲ့ နေရာလည်း ဖြစ်နိုင်တာပေါ့၊ ဆိုတော့ အဲဒီဒေသစိုးမိုးမှုအတွက် AA ရည်မှန်းတယ်ဆိုရင် အိန္ဒိယ၊ ဘင်္ဂလားဒေ့ရှ်နယ်စပ်ပေါ့ဗျာ၊ တနည်းအားဖြင့် အိန္ဒိယရဲ့ ပရောဂျက်ရဲ့ အဓိက အထိုင်စခန်းပေါ့ဗျာ၊ ထိန်းချုပ်နယ်မြေ တနည်းအားဖြင့် ပလက်ဝကနေ ဟိုးဖက်က အိန္ဒိယအရှေ့မြောက်ကို သွားတဲ့ ကုန်းလမ်း တစ်ကြောလုံးကို ထိန်းချုပ်နိုင်တဲ့ ဗျူဟာမြောက်ကုန်းတွေ ဖြစ်နိုင်တာပေါ့၊ အဲဒါကြောင့်လည်း အသည်းအသန် သူတို့ဖက်က မရရအောင် ကြိုးစားရယူတာလည်း ဖြစ်နိုင်တာပေါ့၊ အဲဒီတော့ ပြေငြိမ်းဖို့အတွက်ကြရင် ညှိနှိုင်း တိုင်ပင်မှုသည် AA အတွက်လည်း လိုအပ်လာမှာပေါ့ဗျာ ဒီကြားထဲမှာ ရှမ်းမြောက်မှာဖြစ်တဲ့ မဟာမိတ်သုံးဖွဲ့ရဲ့ ညှိနှိုင်းမှုသည် နောက်ပိုင်းမှာ AA၊ TNLA တို့နဲ့ ပြေလည်ခဲ့လို့ရှိရင် ဒီပလက်ဝဒေသရဲ့ သူ့ရဲ့ အိန္ဒိယ ဘင်္ဂလားဒေ့ရှ် ထိစပ် ဧရိယာတစ်ခုလုံးနဲ့ ပတ်သက်တဲ့ AA နဲ့ ပတ်သက်တဲ့ Bilateral agreement သည်လည်းပဲ အောင်မြင်ရင် တော့ နှစ်ဖက်ညှိနှိုင်းမှု အောင်မြင်ရင် ပေါ်ထွန်းလာနိုင်တာပေါ့” ဟု ပြောသည်။

ပြီးခဲ့သည့် နိုဝင်ဘာ ၁၃ ရက်နေ့က စတင်ပြီး ရခိုင်ပြည်နယ်မှာ မြန်မာ့တပ်မတော်နှင့် AA တို့ တိုက်ပွဲပြန်လည် ဖြစ်ပွားခဲ့သည်။ ထို့နောက် ချင်းပြည်နယ်၊ ပလက်ဝမြို့နယ်အတွင်းမှာလည်း ဆက်လက် ဖြစ်ပွားလျက် ရှိနေသည်။

လက်ရှိတွင် ရခိုင်ပြည်နယ်အတွင်းရှိ စစ်တွေ၊ ကျောက်ဖြူ၊ ရမ်းဗြဲ၊ မြေပုံ၊ တောင်ကုတ်၊ သံတွဲ၊ မောင်တော၊ ဘူးသီးတောင်၊ ရသေ့တောင်၊ ကျောက်တော်၊ ပေါက်တော၊ မင်းပြား၊ မြောက်ဦး၊ ပုဏ္ဏားကျွန်းမြို့နယ် အပါအဝင် ချင်းပြည်နယ် ပလက်ဝမြို့နယ်အတွင်း မြန်မာ့တပ်မတော်နှင့် ရက္ခိုင့်တပ်တော် (AA) တို့ အကြား တိုက်ပွဲများ ဖြစ်ပွားလျက်ရှိနေသည်။

CNI News

၂၀၂၃ ခုနှစ်၊ ဒီဇင်ဘာ ၁၄

နွေဦးတော်လှန်ရေးနှင့် ညီနောင်မဟာမိတ်သုံးဖွဲ့(MNDAA-TNLA-AA)က ဖော်ဆောင်နေသည့် ၁၀၂၇ စစ်ဆင်ရေး ပေါင်းစပ်ကာ ရည်မှန်းချက်အဆုံးထိ သွားမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ပြီးခဲ့သည့် ရက်ပိုင်းက တရုတ်၏ ကြားဝင်စေ့စပ်မှုဖြင့် အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ (NSPNC)နှင့် ညီနောင်မဟာမိတ်သုံးဖွဲ့တို့ တရုတ်နိုင်ငံ၊ ကူမင်းမြို့တွင် တိုက်ပွဲများ ရပ်တန့်ရေး တွေ့ဆုံ ဆွေးနွေးခဲ့ကြသည်။

ထို့နောက် ညီနောင်မဟာမိတ်သုံးဖွဲ့က ပြည်သူများလိုလားသည့် ဘုံရည်မှန်းချက် အလုံးစုံပြည့်ဝသည်အထိ ပြည်သူတစ်ရပ်လုံးနှင့် လက်တွဲလုပ်ဆောင်သွားမည်ဖြစ်ကြောင်း ဒီဇင်ဘာ ၁၂ ရက်နေ့က ထုတ်ပြန်ခဲ့သည်။

ညီနောင်မဟာမိတ်သုံးဖွဲ့၏ ထုတ်ပြန်ချက်အရ ၎င်းတို့အနေဖြင့် နွေဦးတော်လှန်ရေးတွင် အဆုံးအထိ ပါဝင်မည် ဆိုသည့် ရပ်တည်မှုကို အသိအမှတ်ပြုခြင်းဖြစ်ကြောင်း ဦးသန်းစိုးနိုင်က CNI သတင်းဌာနသို့ ပြောသည်။

ချင်းရွှေဟော်မြို့ကို MNDAA က ထိန်းချုပ်ထားကြောင်း ပြသထားစဉ်

၎င်းက “အဲဒါကတော့ သူတို့ မူလအဆိုပြုထားတဲ့ ၁၀၂၇ စီမံကိန်းဟာ နွေဦးတော်လှန်ရေးနဲ့ ပေါင်းစပ်မှာ ဖြစ် တယ်၊ ဗမာပြည်သူတွေ လိုလားတဲ့ စစ်အာဏာရှင်စနစ် ဖျက်သိမ်းရေး ပန်းတိုင်အထိ၊ အဆုံးအထိ ပါဝင်မယ်ဆိုတဲ့ အချက်ကို ထပ်မံပြီး အတည်ပြုပေးလိုက်တာ ဖြစ်တဲ့အတွက် ပေါ်ပေါက်လာတဲ့ ကောလာဟလတွေ သတင်းတွေ နဲ့ ပတ်သက်ပြီး‌တော့ ပြည်သူလူထု အနေနဲ့ စိုးရိမ်ကြောင်းကြမှုရှိစရာ မလိုဘူးဆိုတာကို ကျနော်တို့ သဘော ပေါက် သွားတဲ့အတွက် နိုင်ငံရေးအရတော့ အကျိုးရှိတဲ့ ခြေလှမ်းတစ်ခုဖြစ်တယ်လို့ ကျနော်တော့ သုံးသပ်ပါတယ်” ဟု ပြောသည်။

ပြီးခဲ့သည့် အောက်တိုဘာ ၂၇ ရက်က ညီနောင်မဟာမိတ်သုံးဖွဲ့မှ ၁၀၂၇ စစ်ဆင်ရေးတစ်ခုကို စတင်ခဲ့ပြီးနောက် ရှမ်းပြည်နယ် (မြောက်ပိုင်း)တွင် မြန်မာ့တပ်မတော်နှင့် ညီနောင်မဟာမိတ် ပူးပေါင်းတပ်ဖွဲ့တို့အကြား တိုက်ပွဲများ အပြင်းအထန် ဖြစ်ပွားလျက်ရှိနေသည်။

အဆိုပါ တိုက်ပွဲများအတွင်း ညီနောင်မဟာမိတ်အဖွဲ့တွင် ရက္ခိုင့်တပ်တော် (ULA/AA)၊ ပလောင်ပြည်လွတ်မြောက် ရေးတပ်ဦး (PSLF/TNLA)၊ မြန်မာနိုင်ငံ အမှန်တရားနှင့် တရားမျှတသော အမျိုးသားပါတီ (MNTJP/MNDAA) တို့အပြင် ဗမာပြည်သူ့လွတ်မြောက်ရေးတပ်တော်(BPLA)၊ မန္တလေးပြည်သူ့ကာကွယ်ရေးတပ်(MDY-PDF)တို့လည်း ပါဝင်ခဲ့သည်။ 

BPLA ရဲဘော်များကိုတွေ့ရစဉ်

လက်ရှိ မြန်မာ့တပ်မတော်နှင့် ညီနောင်မဟာမိတ်တို့ တိုက်ပွဲမှာ တပ်ဖက်က အရံတပ်ဖွဲ့များ ထုတ်လာပါက ညီနောင်မဟာမိတ်အဖွဲ့များ နောက်ဆုတ်ရမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာ အောင်မျိုးက CNI သတင်းဌာနသို့ ပြောသည်။

၎င်းက “သူတို့ရဲ့ ဘုံရည်မှန်းချက်လို့ပဲ သူတို့က ပြောရမှာပေါ့၊ ဘာဖြစ်လို့လဲဆိုရင် MNDAA ချင်းရွှေဟော်ကို သိမ်း နိုင်အောင်၊ ကွမ်းလုံကို သိမ်းနိုင်အောင် ဒီဖက်က TNLA တို့၊ AA တို့က ဒီဖက်မှာ လမ်းကြောင်း ဖြတ်တောက်ရေးတို့ သိန္နီတို့၊ နောင်ချိုတို့၊ လားရှိုးတို့မှာ တိုက်ကွက် ဖော်ပေးရတာပေါ့နော်၊ အဲဒီတော့ သူ့ရည်မှန်းချက် အောင်မြင်သွား မှ သူက မင်းတို့ ဖြစ်ချင်တိုင်းဖြစ်တော့ကွာ ငါတော့ မလုပ်တော့ဘူးဆိုတာမျိုးတော့ ဘယ်လုပ်လို့ကောင်းမလဲ၊ အဲဒီ တော့ ဒါကတော့ ကျင့်ဝတ်အရတော့ ဒီလိုပဲ ပြောမှာပဲ၊ သူတို့အချင်းချင်း တကယ့်တကယ်ကြတော့ အခုလက်တွေ့ အနေအထားမှာ သူတို့ ဘယ်လိုပဲလုပ်လုပ် လက်ရှိအနေအထားမှာ ကျနော် ခုနပြောသလိုပေါ့၊ တပ်က သူရဲ့ Strategic Reserve ပေါ့၊ မဟာဗျူဟာမြောက် အရံတပ်ဖွဲ့တွေ ဒီဘက်က မထုတ်သေးဘူးပေါ့နော်၊ ဘာကြောင့်လဲ ကျနော်မသိဘူး။ အဲဒီလို ထုတ်လာတဲ့ တနေ့ကြရင် သူတို့ နောက်ဆုတ်ရမှာပဲ၊ သူတို့ လက်ရှိ အနေအထားအရ တော့ သူတို့ရည်မှန်းချက်က အောင်မြင်မှာ မဟုတ်ဘူး။ တနေ့နေ့တော့ အားလုံးတော့ ပြန်ပါသွားမှာပဲလို့ ကျနော် တော့ ပြောချင်တယ်” ဟု ပြောသည်။

ညီနောင်မဟာမိတ် ၃ ဖွဲ့၏ စစ်ဆင်ရေးကြောင့် ရှမ်းမြောက်တွင် အောက်တိုဘာ ၂၇ ရက်က စတင်ပြီး နှစ်ဖက် တိုက်ပွဲများ ပြင်းထန်နေသလို လက်နက်ကြီး ပစ်ခတ်မှုနှင့် လေကြောင်း တိုက်ခိုက်မှုများလည်း ရှိနေသည်။

CNI News

၂၀၂၃ ခုနှစ်၊ ဒီဇင်ဘာ ၁၃

ပဲခူးတိုင်းဒေသကြီး၊ ဖြူးမြို့၊ ရန်ကုန်-မန္တလေးလမ်းမပေါ်ရှိ ညောင်ပင်သာ နယ်မြေရဲစခန်းကို ဒီဇင်ဘာ ၁၃ ရက်နေ့ မနက်ပိုင်းက KNLA၊ PDF၊ BPLA တို့ပါဝင်သော ပူးပေါင်းတပ်ဖွဲ့က တိုက်ခိုက်သိမ်းပိုက်ခဲ့သည်ဟု ဗမာပြည်သူ့လွတ်မြောက်ရေးတပ်တော်(BPLA)က သတင်းထုတ်ပြန်ခဲ့သည်။

အဆိုပါ တိုက်ပွဲအတွင်း နစကဘက်က ၁၀ ဦးကျဆုံးပြီး BPLA ဘက်မှ ၄ ဦး ဒဏ်ရာရရှိခဲ့သည်ဟု ထုတ်ပြန် ချက်တွင် ဖော်ပြထားသည်။

ထို့နောက် တိုက်ပွဲအတွင်း RPG ထိပ်ဖူး ၂၁ လုံး၊ RPG ပို့ယမ်း ၁၇ ခု၊ ၉ မမကျည် ၈၀ တောင့်၊ ၆၀ မမဗုံးသီး ၂၇ ခု၊ G2 ၁ လက်၊ G3 ၂ လက်၊ ပြောင်းချော ၄ လက်၊ BA 94 ၂ လက်၊ MA-13 ၁ လက်၊ Tear Gas Gun ၂ ခု၊ လက်ပစ်ဗုံး ၆ လုံး၊ G3 ကျည် ၂၃၁ တောင့်၊ 5.56 ကျည် ၁၄၃ တောင့်၊ လက်ထိပ် ၄ ခု၊ လက်တော့ ၁ လုံး၊ မျက်ရည်ယိုဗုံး ၄၆ လုံး၊ အသံဗုံး ၁ လုံး၊ ကျည်ကာ ၂ စုံ၊ ဦးထုပ် ၅ လုံး၊ G3 ကျည်ဘောက် ၆ ခုနှင့် ၉ လုံးကျည် ၂၀၁ တောင့်တို့ သိမ်းဆည်းရမိခဲ့သည်ဟု BPLA က ထုတ်ပြန်ခဲ့သည်။

CNI News

၂၀၂၃ ခုနှစ်၊ ဒီဇင်ဘာ ၁၃

မြန်မာနိုင်ငံအတွင်း ဖြစ်ပွားနေသော လက်နက်ကိုင်ပဋိပက္ခကြောင့် တိုင်းပြည်မပျက်စီးစေလို၍ နိုင်ငံရေးနည်း လမ်းဖြင့် ဖြေရှင်းရန် နစက-က ဖိတ်ခေါ်ခြင်း ဖြစ်နိုင်ကြောင်း ရခိုင့်ဦးဆောင်ပါတီ (AFP)ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

တိုက်ပွဲများကြောင့် ကယားပြည်နယ်၊ လွိုင်ကော်မြို့မှာ ပျက်စီးခဲ့ပြီး ပြန်လည်ထူထောင်ရေး လုပ်ရန်ပင် ခက်ခဲ ကြောင်း၊ တိုက်ပွဲကြောင့် ဒေသခံပြည်သူများ မြေစာပင်ဖြစ်နေခြင်းကို ကိုယ်ချင်းစာ၍ နိုင်ငံရေးနည်းလမ်းဖြင့် ဖြေရှင်းရန်လိုမည်ဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ဒီဇင်ဘာ ၄ ရက်တွင် ပြောကြား ထားသည်။

လက်ရှိ တိုက်ပွဲများကြောင့် မြို့ရွာများ ပျက်စီးနေခြင်းကို နိုင်ငံအုပ်ချုပ်သူများအနေဖြင့် ဖြေရှင်းနိုင်ရေး နည်းလမ်း ရှာဖွေနေခြင်းဖြစ်ကြောင်း ဒေါက်တာအေးမောင်က ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “အဲဒီတော့ စိတ်ဝင်စားစရာ ပိုကောင်းတာပေါ့၊ ပွင့်ပွင့်လင်းလင်း ပြောရရင်ဗျာ၊ ၇၅ နှစ်ကြာ ပြည်တွင်း ပဋိပက္ခမှာ တကယ့် ဒုက္ခ ဒုက္ခခံရတဲ့ ကျေးလက်ဒေသကို ကိုယ်တိုင်မကြုံဖူးရင် စစ်ရဲ့ ဒဏ်ရာဒဏ်ချက်ကို ကိုယ်ချင်းစာစိတ် ရှိချင်မှရှိမယ်၊ ဒါပေမဲ့ လက်နက်ကိုင်နေကြတဲ့ တပ်မတော်သားတွေက ပိုမြင်ရမှာပေါ့ဗျာ၊ ကိုယ့်ရဲ့ လုပ်ဖော်ကိုင်ဖက်တွေ အသက်စွန့်ခဲ့ကြတာတွေ အာဃာတတွေ မရှိဘဲနဲ့ အမိန့်ကြား ဒါမျိုးလည်း ရှိမှာ ပေါ့၊ အဲဒီရဲ့ ဒဏ်ရာဒဏ်ချက်က ခုနလို အသက်အိုးအိမ်စည်းစိမ်ရယ်၊ လုပ်သားပြည်သူများရဲ့ မြို့ပြကြီး ပျက်တာ တွေ ကျေးလက်ပျက်တာတွေ ခုနလို ကလေးတွေ မိဘတွေအားလုံး ဆင်းရဲဒဏ်ချက်ကြောင့် ပညာမသင်ကြားနိုင် တာတွေ စားနပ်ရိက္ခာ သာမကပေါ့ဗျာ၊ ကျေးလက်ကို စွန့်တာတွေပါ၊ တခြားနိုင်ငံတွေရောက် ဒုက္ခသည်ဖြစ်ပေါ့ ဗျာ၊ ဒါတွေသည် တွေးမယ်ဆိုရင် မိမိရဲ့ မျက်မြင်ပေါ့ဗျာ၊ ဥပမာ လွိုင်ကော်မြို့ကြီး ပျက်သွားတယ်ဗျာ၊ နှစ်ဖက်ရဲ့ နိုင်ငံရေး တင်းမာမှုကြောင့် ဥပမာ ထန်တလန်မြို့ကြီး ပျက်သွားတယ်ဗျာ၊ ရခိုင်ဖက်က ပေါက်တောမြို့ကြီး ပျက် သွားတယ်ဗျာ၊ နမ့်ခမ်းကြီး၊ သိန္နီကြီးပေါ့ဗျာ၊ ဒီဖက်က အဲဒါမျိုးတွေ မြင်ရတဲ့အခါမှာ နိုင်ငံအုပ်ချုပ်တဲ့ ပုဂ္ဂိုလ်တွေ တိုင်းမှာ ဒါတွေကို မပျက်စီးနိုင်အောင် ဘယ်လိုညှိနှိုင်းတိုင်ပင် ဖြစ်မလဲဆိုတဲ့ alternative တစ်ခုကတော့ဖြင့် သူ လည်း တွေးမှာပဲ ကိုယ်လည်း တွေးမှာပဲ” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း နိုင်ငံရေး အပြောင်းအလဲများကြောင့် နယ်စပ်ဒေသများတွင် လက်နက်ကိုင်ပဋိပက္ခများ ဖြစ်ပွားခဲ့သည်။ 

ထို့နောက် လက်နက်ကိုင်ပဋိက္ခဖြစ်ပွားခြင်း မရှိခဲ့သော ပြည်မဒေသများတွင်လည်း ဖြစ်ပွားလာခဲ့သည်။

မြောက်ပိုင်းမဟာမိတ်သုံးဖွဲ့မှ ခေါင်းဆောင်များကိုတွေ့ရစဉ်

နိုင်ငံရေးပြဿနာကို နိုင်ငံရေးနည်းလမ်းဖြင့် ဖြေရှင်းခြင်းက တိုင်းပြည်ရော လူထုအတွက်ပါ ကောင်းမွန်ကြောင်း လီဆူအမျိုးသားဖွံ့ဖြိုးတိုးတက်ရေးပါတီ (ဒူးလေးပါတီ) မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

၎င်းက “နိုင်ငံရေးနည်းလမ်းအရ ဖြေရှင်းဖို့ကတော့ ပိုပြီးတော့ကောင်းတာပေါ့၊ တိုင်းပြည်အတွက် ကောင်းတာပေါ့၊ ပြည်သူလူထုအတွက်လည်း ကောင်းတာပေါ့၊ ဒီလိုနဲ့ တိုက်ပွဲတွေ ဖြစ်နေတယ်ဆိုရင်တော့ ဒါတိုင်းပြည် အတွက် လည်း မကောင်းဘူးလေ၊ ဟိုဖက်ဒီဖက် သေကြေတာလည်း ဒါကိုယ့်နိုင်ငံထဲမှာ ကိုယ့်နိုင်ငံက ပြည်သူတွေပဲ၊ နောက်ပြီး ဟိုဖက်ဒီဖက် စစ်စရိတ်တွေ ကုန်ကျတာလည်း ကိုယ့်နိုင်ငံက ဘဏ္ဏာငွေတွေကြီးပဲ၊ အဲဒါကို ကောင်း ကောင်းမွန်မွန်နဲ့ စားပွဲပေါ်မှာ ဆွေးနွေးပြီးတော့ ပြေလည်သွားတာတော့ အကောင်းဆုံးပဲပေါ့” ဟု ပြောသည်။

ပြီးခဲ့သည့် အောက်တိုဘာ ၂၇ ရက်က စတင်ကာ မြန်မာ့တပ်မတော်နှင့် တိုက်ပွဲပြင်းထန်ခဲ့သော ညီနောင်မဟာ မိတ်သုံးဖွဲ့မှာ တရုတ်၏ ကြားဝင်စေ့စပ်မှုကြောင့် ဒီဇင်ဘာ ၁၁ ရက်မှ ၃၁ ရက်နေ့အထိ ယာယီ အပစ်ရပ်စဲထားရန် သဘောတူညီမှု ရရှိခဲ့ကြသည်။

ပြည်တွင်း လက်နက်ကိုင်ပဋိပက္ခ ဖြေရှင်းနိုင်ရေး တိုင်းရင်းသားလက်နက်ကိုင် အဖွဲ့အစည်းအချို့၊ နိုင်ငံရေးပါတီ အချို့၊ ကုလသမဂ္ဂ၊ အာဆီယံ အပါအဝင် အိမ်နီးချင်းနိုင်ငံများလည်း ကြိုးပမ်းလျက်ရှိနေသည်။

CNI News

၂၀၂၃ ခုနှစ်၊ ဒီဇင်ဘာ ၁၂

နစကနှင့် ညီနောင်မဟာမိတ်သုံးဖွဲ့(MNDAA၊ TNLA၊ AA) တို့ တွေ့ဆုံဆွေးနွေးမှုမှတဆင့် တော်လှန်ရေးမှာ အပြောင်းအလဲ ဖြစ်လာနိုင်သလားဆိုသည့်အပေါ် နိုင်ငံရေးအသိုင်းအဝိုင်းကြား သုံးသပ်လျက်ရှိနေသည်။

တရုတ်၏ ကြားဝင်စေ့စပ်မှုဖြင့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော် မတီ (NSPNC)နှင့် ညီနောင်မဟာမိတ်သုံးဖွဲ့တို့ တရုတ်နိုင်ငံ၊ ကူမင်းမြို့တွင် တိုက်ပွဲများရပ်တန့်ရေး တွေ့ဆုံ ဆွေးနွေးခဲ့ကြသည်။

နိုင်ငံတစ်ခုလုံးနှင့် ပတ်သက်ပြီး တည်ငြိမ်သည့် အခင်းအကျင်းကို ဝိုင်းဝန်းစဉ်းစားစေလိုကြောင်း၊ လက်ရှိ လူထု အနေဖြင့်လည်း ငြိမ်းချမ်းသည့် တိုင်းပြည်ကို လိုလားကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

၎င်းက “ကျနော်ကတော့ ငြိမ်းချမ်းရေးကို လက်ခံတယ်ဗျ၊ မြန်မာနိုင်ငံ တစ်ခုလုံးနဲ့ ပတ်သက်တဲ့ တည်ငြိမ် အေးချမ်းတဲ့ အခင်းအကျင်းကြီး တစ်ခုလုံးကို အားလုံးစဉ်းစားစေချင်တယ်၊ တရုတ်ရော၊ အိန္ဒိယရောပေါ့ဗျာ၊ ဒါမျိုး ပူးပေါင်း ကူညီစဉ်းစားပေးစေချင်တယ်၊ ဘယ်လိုတည်ငြိမ်အေးချမ်းတဲ့ ဖွံ့ဖြိုးတိုးတက်တဲ့ နိုင်ငံတစ်ခုအဖြစ် ရှေ့ဆက်သွားကြမှာလဲ။ လွတ်လပ်ရေးအလွန် ၇၅ နှစ်ကျော်ကာလ တိုင်းရင်းသားများရဲ့ လက်နက်ကိုင်ပဋိပက္ခ အားလုံးကို ချုပ်ငြိမ်းနိုင်မယ့် နိုင်ငံရေး အပေးအယူတစ်ခုကို လက်ရှိ SAC ဘက်က ရဲရဲဝံ့ဝံ့ ညှိနှိုင်းတိုင်ပင်ရင်တော့ ဖြင့် မြန်မာနိုင်ငံအတွက် ရလဒ်ကောင်းတစ်ခု ထွက်ပေါ်လာနိုင်တာပေါ့၊ အဲဒီရလဒ်ဟာ အလွန်တရာမှ ထူးခြားရင် တော့ဖြင့် ပြည်ထောင်စုတပ်မတော်ကြီးတစ်ခု အဖြစ်လည်း အသွင်ပြောင်းသွားနိုင်တာပေါ့၊ အနာဂတ်မျိုးဆက် သစ်တွေအတွက် တည်ငြိမ်အေးချမ်းပြီးမှ ငြိမ်းချမ်းတဲ့၊ ဖွံ့ဖြိုးတဲ့နိုင်ငံ အသစ်တစ်ခုကိုတော့ဖြင့် လိုလားတယ်ဆိုတဲ့ ဘက်က ပိုများမယ်ထင်ပါတယ်။ အဲဒါကြောင့် ဒီကာလဟာ စစ်ကိုမုန်းတဲ့ကာလဖြစ်ဖို့လိုတယ်၊ စစ်ရဲ့ ဒဏ်ရာဒဏ် ချက်ကနေ တည်ငြိမ်အေးချမ်းပြီးမှ ဖွံ့ဖြိုးတိုးတက်တဲ့ နိုင်ငံအသစ်တစ်ခုကို လိုချင်တဲ့ လူထုဆန္ဒတစ်ခု ပေါ်ထွန်း လာရင်တော့ဖြင့် SAC သည်လည်းကောင်း၊ ခုနက တိုင်းရင်းသား လက်နက်ကိုင်တော်လှန်ရေး ခေါင်းဆောင်များ  သည်လည်းကောင်း၊ အနာဂတ်မျိုးဆက်သစ်အတွက် အမွေကောင်းတစ်ခုကို ပေးနိုင်တဲ့ ကာလဆိုတာကို ယုံယုံ ကြည်ကြည်သာ ညှိနှိုင်းတိုင်ပင် နိုင်မယ်ဆိုရင် ငြိမ်းချမ်းမှုဖြစ်စဉ် အသစ်တစ်ခု ခိုင်ခိုင်မာမာ ပေါ်ထွန်းလာနိုင်ပါ တယ်။ အဲဒီလို ပေါ်ထွန်းလာရင် လူထုကတော့ ဝမ်းပန်းတသာကြိုဆိုကြမှာဗျ” ဟု ပြောသည်။

MNDAA-AA-TNLA တို့နှင့် မြန်မာ့တပ်မတော်ကြား တိုက်ပွဲကြောင့် လောက်ကိုင်မြို့မှ ထွက်ပြေးလာသူများ ကိုတွေ့ရစဉ်

ပြီးခဲ့သည့် အောက်တိုဘာ ၂၇ ရက်က ညီနောင်မဟာမိတ်သုံးဖွဲ့မှ ၁၀၂၇ စစ်ဆင်ရေးတစ်ခုကို စတင်ခဲ့ပြီးနောက် ရှမ်းပြည်နယ် (မြောက်ပိုင်း)တွင် မြန်မာ့တပ်မတော်နှင့် ညီနောင်မဟာမိတ်(MNDAA-AA-TNLA) ပူးပေါင်းတပ်ဖွဲ့တို့ အကြား တိုက်ပွဲများ အပြင်းအထန် ဖြစ်ပွားလျက်ရှိနေသည်။

အဆိုပါ တိုက်ပွဲများကြောင့် တရုတ်-မြန်မာ နယ်စပ်ကုန်သွယ်ရေး ရပ်တန့်လျက်ရှိနေသလို ဒေသခံ အများစုမှာ လည်း ဘေးလွတ်ရာသို့ ထွက်ပြေးတိမ်းရှောင်လျက် ရှိနေသည်။

နှစ်ဖက်ဆွေးနွေးမှုမှတဆင့် တိုက်ပွဲများ ရပ်တန့်သွားပါက တိုက်ပွဲရှောင်များအတွက် အဆင်ပြေသွားနိုင်သလို လမ်းတံတားများ ပြန်ဆောက်ပေးနိုင်ပါက ကုန်သွယ်ရေးအတွက် ပိုမိုကောင်းမွန် လာမည်ဖြစ်ကြောင်း တိုင်းရင်းသား လက်နက်ကိုင်ခေါင်းဆောင်တစ်ဦးဖြစ်သူ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “ဒါက တိုက်ပွဲလျော့တာဖြစ်ဖြစ်၊ ရပ်တာဖြစ်ဖြစ် ပဋိပက္ခနည်းရင် လူထု အထိအခိုက် အသေပျောက် သက်သာတာပေါ့ဗျာ၊ အကယ်၍ အဲဒီကြားမှာ တရုတ်ကလည်း လမ်းတံတားတွေ၊ ပြန်ဆောက်ပေးမယ်၊ ပြန်လုပ် ပေးမယ်ဆိုရင်တော့ လူထု သွားရေးလာရေး၊ စစ်ပြေး၊ စစ်ရှောင်တွေအတွက်လည်း နည်းနည်း အခြေအနေ ပြန် ကောင်းနိုင်တာပေါ့၊ မဟုတ်ရင်တော့ ပြေးနေရှောင်နေရတာ ကြာလာရင် ဆောင်းတွင်းမှာ မလွယ်ဘူး။ ရိက္ခာ တစ်ခု၊ အနွေးထည်တစ်ခု၊ ဆေးဝါးတစ်ခု၊ စောစောစီးစီး ပြေလည်ရာ ပြေလည်ကြောင်း ဖြစ်ရင်တော့ စစ်ပြေးစစ် ရှောင်တွေအတွက် အများကြီး သက်သာတာပေါ့၊ ဒီတစ်ဆောင်းကို ဖြတ်ကျော်ဖို့အတွက် အများကြီး နည်းနည်း ဝန်ထုတ်ဝန်ပိုး ပေါ့သွားတာပေါ့၊ မဟုတ်ရင်တော့ ဒီတစ်ဆောင်းမှာ တော်တော်လေး မြောက်ပိုင်းပြည်သူတွေ ထိခိုက်နိုင်တယ်ဗျ၊ ပဋိပက္ခဆက်သွားရင်တော့” ဟု ပြောသည်။

သိန်းနီမြို့မှာ လက်နက်ကြီးကျရောက်လို့ နေအိမ်များ မီးလောင်နေစဉ်

ညီနောင်မဟာမိတ်သုံးဖွဲ့၏ စစ်ဆင်ရေး စတင်ခဲ့ပြီးနောက် လက်ရှိ တစ်လကျော် ကြာမြင့်လာသည့်တိုင် ရပ်တန့် နိုင်ခြင်း မရှိသေးဘဲ နှစ်ဖက်တိုက်ပွဲများ အပြင်းအထန် ဖြစ်ပွားလျက်ရှိနေသည်။

အဆိုပါ စစ်ဆင်ရေးမှာ ရှမ်းပြည်နယ်မြောက်ပိုင်းတွင် သာမကဘဲ ကချင်ပြည်နယ်၊ စစ်ကိုင်းတိုင်း ဒေသကြီးနှင့် မန္တလေးတိုင်းဒေသကြီးတို့တွင်လည်း ဖြစ်ပွားလျက်ရှိနေသလို ရခိုင်ပြည်နယ်နှင့် ချင်းပြည်နယ်မှာလည်း မြန်မာ့တပ်မတော်နှင့် AA တို့ တိုက်ပွဲများ ဖြစ်ပွားလျက်ရှိနေသည်။

၂၀၂၃ ခုနှစ်၊ ဒီဇင်ဘာ ၁၀ ရက်နေ့က တရုတ်နိုင်ငံ၊ ကူမင်းမြို့မှာ MNDAA-AA-TNLA မှ ကိုယ်စားလှယ်များနှင့် နစက၏ NSPNC မှ ကိုယ်စားလှယ် တွေ့ဆုံဆွေးနွေးပြီးနောက် ဒီဇင်ဘာ ၁၁ ရက်မှ ၃၁ ရက်နေ့အထိ ယာယီ အပစ်ရပ်စဲထားရန် သဘောတူညီမှု ရရှိခဲ့ကြောင်း နှစ်ဖက်ကိုယ်စားလှယ်များနှင့်နီးစပ်သူများက ပြောသည်။ 

CNI News
၂၀၂၃ ခုနှစ်၊ ဒီဇင်ဘာ ၁၁

တရုတ်နိုင်ငံ၏ ကြားဝင်ဆောင်ရွက်ပေးမှုဖြင့် အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)မှ တာဝန်ရှိသူများနှင့် MNDAA၊ TNLA၊ AA တို့မှ တာဝန်ရှိသူများ တရုတ်နိုင်ငံ၊ ကူမင်းမြို့မှာ တွေ့ဆုံ၍ တိုက်ပွဲများရပ်တန့်ရေး ဆွေးနွေးခဲ့ကြသည်။

အဆိုပါ တွေ့ဆုံဆွေးနွေးမှုကနေ ဖြစ်ပေါ်လာမည့် တိုးတက်မှုများအပေါ် မူတည်ပြီး ယခုလကုန်ပိုင်းမှာလည်း ထပ်မံ တွေ့ဆုံဆွေးနွေးကြမည်ဖြစ်သည်။

နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက “ ကျနော်တို့ မြန်မာနိုင်ငံအမျိုးသား စည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ညှိနှိုင်းရေးကော်မတီက တာဝန်ရှိတဲ့လူတွေနဲ့ MNDAA- TNLA-AA အဖွဲ့က တာဝန်ရှိတဲ့သူတွေဟာ တရုတ်နိုင်ငံရဲ့ အကူအညီနဲ့ နိုင်ငံရေးအရ ဖြေရှင်းနိုင်ဖို့ တွေ့ဆုံ ဆွေးနွေးမှုများ ပြုလုပ်ခဲ့ပါတယ်။ ဒီဆွေးနွေးမှုအပေါ်မှာ တိုးတက်မှုအပေါ်မှာမူတည်ပြီး ဒီလကုန်ပိုင်းမှာလည်း ထပ်မံဆွေးနွေးသွားဖို့ရှိကြောင်း ပြောကြားလိုပါတယ်”ဟု ပြောသည်။

MNDAA- TNLA-AA  တို့မှ ဒုတိယတန်း ခေါင်းဆောင်များကိုတွေ့ရစဉ်

ထိုတွေ့ဆုံဆွေးနွေးခဲ့သည့် အကြောင်းအရာများကိုတော့ နှစ်ဖက်စလုံးက တရားဝင် ထုတ်ပြန်ကြေညာခြင်း မရှိသေးပေ။

ဒီဇင်ဘာ ၁၁ ရက်နေ့မှ ၃၁ ရက်နေ့အထိ ယာယီအပစ်အခတ်ရပ်စဲကြောင်း မြောက်ပိုင်းသုံးဖွဲ့(MNDAA-AA-TNLA)နှင့် NSPNC တို့ဖြင့် နီးစပ်သူများထံကနေ ကြားသိရသည်။

CNI New

၂၀၂၃ ခုနှစ်၊ ဒီဇင်ဘာ ၁၁

စစ်ကိုင်းတိုင်ဒေသကြီးနှင့် ကချင်ပြည်နယ်အတွင်းရှိ ရှမ်းနီတိုင်းရင်းသား ဘာသာစကားပြောခြင်းအပေါ် တော်လှန်ရေး အင်အားစုများက ကန့်သတ်မှု ပြုလုပ်နေကြောင်း ရှမ်းအရပ်ဖက် အဖွဲ့အစည်းများက ဒီဇင်ဘာ ၉ ရက်နေ့ ရက်စွဲဖြင့် ထုတ်ပြန်ခဲ့သည်။

အဆိုပါ ကန့်သတ်မှုကို စစ်ကိုင်းဒေသကြီးအတွင်းရှိ ဟုမ္မလင်း၊ ဖောင်းပြင်၊ ပင်လည်ဘူး၊ ဗန်းမောက်တို့တွင် ကြုံတွေ့နေရကြောင်း၊ ထိုလုပ်ရပ်များမှာ စစ်ရာဇဝတ်မှုမြောက်သော လူမျိုးသုဉ်းစေရန် ဖိနှိပ်မှုဖြစ်ကြောင်း ရှမ်းအရပ်ဖက် အဖွဲ့အစည်းများမှ ပြောရေးဆိုခွင့်ရှိသူ စိုင်းအိုက်ဆိုင်က CNI သတင်းဌာနသို့ ပြောသည်။

၎င်းက “ပင်လည်ဘူးနယ်ကနေ ထွက်ပြေးတိမ်းရှောင်လာတဲ့ ဖုန်းလိုင်းရတဲ့ နေရာအထိ ရောက်လာတဲ့ ဒေသခံ တွေ ရှိတယ်၊ ဒေသခံတွေကို ကျနော်တို့ ကိုယ်တိုင် အင်တာဗျူးလုပ်တယ်၊ ကျနော်တို့ ကိုယ်တိုင် မေးမြန်းတယ်၊ သေချာအောင် ဒါတကယ်ရော ဟုတ်သလား၊ မယုံနိုင်လို့၊ မယုံနိုင်လို့ ကျနော်တို့က သေချာအောင် မေးရတာ၊ မေးတဲ့အခါမှာ မေးတိုင်း သူတို့က အဲဒီဟာကို ဖြေတယ်၊ ဥပမာ ရှမ်းနီစကားပြောရင်ကိုပဲ ခေါ်ရိုက်တာမျိုးတွေ ဖြစ် တယ်၊ ပွင့်ပွင့်လင်းလင်း ပြောရရင် ဗန်းမောက်၊ ပင်လည်ဘူးနယ်ဟာ လွန်ခဲ့တဲ့ အစိုးရအဆက်ဆက်ရဲ့ လဝက မှတ်တမ်းတွေအရ ရှမ်းနီတကယ်ရှိတာတောင်မှ မရှိပါဘူးဆိုပြီးတော့ စာရင်းပယ်ဖျောက်ခြင်း ခံထားရတဲ့ မြို့နယ် တွေဖြစ်တယ်၊ ဒီမြို့နယ်တွေမှာ ရှမ်းနီဘာသာစကားပြောမှုကိုပါ လက်ရှိ တော်လှန်ရေးမှာ ပါဝင်နေတဲ့ လက်နက် ကိုင် တပ်ဖွဲ့တွေက ထပ်ပြီး ကန့်သတ်မယ်ဆိုရင် ဒီလူမျိုးဟာ ပျောက်သွားဖို့ပဲ ရှိတော့တယ်၊ ဒါက တကယ်တမ်း ပြောမယ်ဆိုရင် ကမ္ဘာက သတ်မှတ်ထားတဲ့ ဂျီနိုဆိုက် စံချိန်စံညွန်းတွေနဲ့ သွားပြီး ညှိစွန်းနေတယ်ဆိုတာ ကျနော် တို့ သတိပေးတာပါ။ ကမ္ဘာက ပြောနေတဲ့ ရိုဟင်ဂျာကိစ္စတွေကိုပဲ ထောက်ပြနေကြတယ်၊ စစ်ကိုင်းတိုင်းဒေသကြီး နဲ့ ကချင်ပြည်နယ်မှာ ရှိနေတဲ့ ရှမ်းနီတိုင်းရင်းသားတွေကလည်း ဒါ ရိုဟင်ဂျာပုံစံမျိုးကို ကန့်သတ်ခံလာရပြီးလို့ ကျနော့်အနေနဲ့ သတိပေးလိုတယ်” ဟု ပြောသည်။

ဟုမ္မလင်း PDF ကို တွေ့ရစဉ်

တော်လှန်ရေးအင်အားစုများ၏ စစ်ဆေးရေးဂိတ်တွင် ၅/ မှတ်ပုံတင် ကိုင်ဆောင်ထားပြီး လူမျိုးနာမည်တွင် ရှမ်း ဖြစ်နေပါက ပိုမိုစစ်ဆေး မေးမြန်းနေသလို ဖုန်းအတွင်း ရှမ်းသီချင်း၊ ရှမ်းဝတ်စုံများ တွေ့ရှိပါက ရိုက်နှိက်ခြင်း၊ ဖမ်းဆီးခြင်း၊ ဖြတ်သန်းသွားလာမှုကို ကန့်သတ်ခြင်းများ ပြုလုပ်ကြောင်း ၎င်းက ပြောသည်။

ရှမ်းနီအမျိုးသားများ တပ်မတော် (SNA) တွင် ရှမ်းနီလူငယ်အများစု တာဝန်ထမ်းဆောင်နေသလို ဟုမ္မလင်းမြို့ နယ်အတွင်းရှိ PDF များတွင်လည်း ရှမ်းနီလူငယ်အများစု တာဝန်ထမ်းဆောင်နေကြောင်း၊ အချင်းချင်း သတ်ဖြတ် နေမှုအား ညှိနှိုင်းဖြေရှင်းစေလိုကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီမှဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

ရှမ်းနီအမျိုးသားများတပ်မတော်(SNA)ကို တွေ့ရစဉ်

၎င်းက “ဟုမ္မလင်းမှာ သူတို့ ညီလာခံလုပ်တယ်လေ၊ ရှမ်းနီညီလာခံဆိုပြီးမှ အဲဒါ ဖြစ်စဉ်လေးတစ်ခု ပြောချင်တာ ပါ။ အဲဒါနဲ့ ဆက်စပ်ပြီးမှ ညီလာခံလုပ်တဲ့ အခါကြတော့ ညီလာခံပြန်တဲ့လူတွေက ဓါတ်ပုံရိုက်သွားကြတယ်၊ ဓါတ်ပုံရိုက်သွားတဲ့ အခါကြတော့ သူတို့က (PDF) တွေက နမ့်နန်းလောက်မှာ သူတို့ ရှိနေကြပြီ။ ခိုတောင်းတို့၊ နောင်ဆန်းကျင်တို့ နားလောက်မှာ အဲဒီလမ်းတစ်လျှောက်မှာ သူတို့ ရှိနေကြပြီ၊ PDF တွေ ရောက်နေကြပြီ။ ရောက်နေတဲ့အခါ ဘယ်ကပြန်တာလဲ၊ ကျနော်တို့ ဟုမ္မလင်းက ပြန်တာ၊ ဘာသွားလုပ်တာလဲ၊ ကျနော်တို့ ညီလာခံ သွားတက်တာ၊ ကြွားချင်တာကိုး ကိုယ့်လူမျိုး အချင်းချင်းဆိုတော့ ပြစမ်းဆိုတာ ဓါတ်ပုံတွေ ပြတယ်၊ ပြတဲ့အခါ ကြတော့ အဲဒီက ညီလာခံကို ဘာကြောင့်မို့ သွားတက်တာလဲ၊ ဘာလဲဆိုပြီး အဲဒီတုန်းက ကျနော်သတင်းရတာ ၅ ယောက်ရှိတယ်တဲ့ အဲဒီညီလာခံအပြန်မှာ သူတို့ ရိုက်သတ်လိုက်တာ PDF တွေ အဲဒီညီလာခံ သွားတက်ရကောင်း မလားဆိုပြီး စစ်ဘောမ ကိစ္စပေါ့လေ၊ ရှမ်းနီအချင်းချင်းနော်၊ အဲဒါလည်း ရှမ်းနီအချင်းချင်း သတ်ကြတာ၊ အဲဒီလိုမျိုး လေးတွေပေါ့နော်” ဟု ပြောသည်။

လက်ရှိ စစ်ရေး၊ နိုင်ငံရေး ပဋိပက္ခအတွင်း လူ့အခွင့်အရေး ချိုးဖောက်ခြင်း ခံနေရသော ရှမ်းနီတိုင်းရင်းသားတို့၏ ဘဝကို ကုလသမဂ္ဂနှင့် နိုင်ငံတကာအဖွဲ့အစည်းများ၊ တရုတ်၊ အိန္ဒိယနှင့် ထိုင်းနိုင်ငံ စသော အိမ်နီးချင်းနိုင်ငံများ၊ အာဆီယံနိုင်ငံများမှ ကူညီပေးရန် ရှမ်းအရပ်ဖက် အဖွဲ့အစည်းများက ထုတ်ပြန်တောင်းဆိုထားသည်။