CNI News

၂၀၂၄ ခုနှစ်၊ နိုဝင်ဘာ ၇

တရုတ်နိုင်ငံအတွင်း အခြေပြုပြီး မြန်မာနိုင်ငံ၏ အကျိုးကို ပျက်စီးအောင် ဆောင်ရွက်နေမှုများကို လက်သင့်ခံမည် မဟုတ်ဘူးဟု တရုတ်နိုင်ငံဝန်ကြီးချုပ် လီချန်က နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံစဉ် ပြော ကြားလိုက်သည်။

၂၀၂၄ ခုနှစ်၊ နိုဝင်ဘာ ၆ ရက်နေ့က တရုတ်ဝန်ကြီးချုပ် လီချန်နှင့် ကူမင်းမြို့ရှိ Haigeng Garden Hotel (ဟိုင်ဂင် ဂါဒင်းဟိုတယ်)၌ တွေ့ဆုံ၍ မြန်မာ-တရုတ်အရေး ဆွေးနွေးစဉ် ၎င်းက ပြောကြားခဲ့ခြင်း ဖြစ်သည်။

ယခုတွေ့ဆုံမှု၌ နှစ်နိုင်ငံအကြား ရှိရင်းစွဲချစ်ကြည်ရင်းနှီးမှုနှင့် ဆွေမျိုးပေါက်ဖော် ပူးပေါင်းဆောင်ရွက်မှုဆိုင်ရာ ကိစ္စရပ်များ ဆွေးနွေးနိုင်ကာ နှစ်နိုင်ငံအကြားသာမက ဒေသတွင်းနှင့် နိုင်ငံတကာ မျက်နှာစာတို့၌ ပိုမိုနီးကပ်စွာ ပူးပေါင်းဆောင်ရွက်သွားနိုင်မည်ဟု ယုံကြည်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

တရုတ်ဝန်ကြီးချုပ် လီချန်က “ တရုတ်နိုင်ငံအနေဖြင့် မြန်မာနိုင်ငံ၏ အချုပ်အခြာအာဏာနှင့် နယ်မြေပိုင်ဆိုင်မှု တို့ကို ထပ်လောင်းအသိအမှတ်ပြုပါကြောင်းနှင့် တရုတ်နိုင်ငံအတွင်း အခြေပြု၍ မြန်မာနိုင်ငံ၏ အကျိုးကို ပျက်စီး အောင် ဆောင်ရွက်နေမှုများကို လက်သင့်ခံမည် မဟုတ်ဘူး”ဟု ပြောသည်။

၂၀၂၄ ခုနှစ်၊ နိုဝင်ဘာ ၆ ရက်က တရုတ်ဝန်ကြီးချုပ် လီချန်နဲ့ နစကဥက္ကဋ္ဌ တွေ့ဆုံစဉ်

တရုတ်-မြန်မာနယ်စပ် ကချင်ပြည်နယ်နှင့် ရှမ်းပြည်နယ်မြောက်ပိုင်းတွင် ကိုးကန့်တပ်ဖွဲ့(MNDAA)၊ ပလောင် တပ်ဖွဲ့ (TNLA)၊ ရခိုင်တပ်ဖွဲ့(AA)၊ ကချင်တပ်ဖွဲ့(KIA)တို့က မြန်မာ့တပ်မတော်ကို အပြင်းအထန် တိုက်ခိုက်ခဲ့ပြီး မြို့များနှင့် နယ်စပ်ကုန်သွယ်ရေးဂိတ်များကို သိမ်းပိုက်ခဲ့သည်။

TNLA-AA-MNDAA တို့သည် အမျိုးသားညီညွတ်ရေးအစိုးရ(NUG) လက်အောက်ရှိ PDF များ၊ BPLA၊ KNDF၊ PLA တို့နှင့် ပူးပေါင်း၍ ၂၀၂၃ ခုနှစ်၊ အောက်တိုဘာ ၂၇ ရက်နေ့က ၁၀၂၇ စစ်ဆင်ရေးကို ရှမ်းပြည်နယ်မြောက်ပိုင်းမှာ ဖော်ဆောင်ခဲ့ပြီး လားရှိုး၊ သိန္နီ၊ ကွတ်ခိုင်၊ နမ့်ခမ်း၊ နမ့်ဆန်၊ မန်တုံ၊ မိုင်းငေါ့၊ နမ္မတူ၊ လောက်ကိုင်၊ ကုန်ကြမ်း၊ မုံးကိုး၊ ဖောင်ဆိုင်း၊ ချင်းရွှေဟော် တို့ကို သိမ်းပိုက်ခဲ့သည်။

ထို့နောက် ၂၀၂၄ ခုနှစ်၊ ဇွန်လ ၂၅ ရက်တွင် ၁၀၂၇ ဒုတိယပိုင်း စစ်ဆင်ရေးကို ရှမ်းပြည်နယ်မြောက်ပိုင်း နောင်ချို၊ သီပေါ၊ ကျောက်မဲနှင့် မန္တလေးတိုင်းဒေသကြီး မိုးကုတ်၊ မိုးမိတ်၊ မတ္တရာ၊ စဉ့်ကိုင်၊ နွားထိုးကြီး၊ သပိတ်ကျင်း စသည့် ဒေသများကို သိမ်းပိုက်ရေး ထိုးစစ်ဆင် တိုက်ခိုက်ခဲ့သည်။

အဆိုပါ ၁၀၂၇ စစ်ဆင်ရေးကို တရုတ်နှင့် UWSA က ထောက်ပံ့ပေးခဲ့ခြင်းဖြစ်သည်ဟု အမျိုးသားရေး အင်အားစု များက စွပ်စွဲ၍ တရုတ်နိုင်ငံ ဆန့်ကျင်ရေး ဆန္ဒပြမှုများ ရန်ကုန်၊ နေပြည်တော်နှင့် မန္တလေးမြို့များမှာ ပြုလုပ်ခဲ့ သည်။

တရုတ်ဝန်ကြီးချုပ် လီချန်က “မြန်မာနိုင်ငံ၏အရေးသည် တရုတ်နိုင်ငံ၏ အိမ်နီးချင်းနိုင်ငံ အရေးပင်ဖြစ်သဖြင့် နိုင်ငံတကာမျက်နှာစာ၌လည်း တရုတ်နိုင်ငံအနေဖြင့် မြန်မာနိုင်ငံအပေါ် ရပ်တည်ဆောင်ရွက်သွားမည်”ဟု ပြောသည်။

 ၂၀၂၄ ခုနှစ်၊ နိုဝင်ဘာ ၆ ရက်က တရုတ်ဝန်ကြီးချုပ် လီချန်နဲ့ နစကဥက္ကဋ္ဌ တွေ့ဆုံစဉ်

MNDAA-TNLA-AA တို့သည် မြန်မာအစိုးရ၏ ၂၀၂၂ ခုနှစ်၊ ဧပြီလက ငြိမ်းချမ်းရေးကမ်းလှမ်းချက်ကို ငြင်းပယ်ပြီး MNDAA အနေဖြင့် ၎င်းတို့၏ အထူးဒေသ(၁) ပြန်လည် အသက်သွင်းနိုင်ရေး ရှမ်းပြည်နယ်မြောက်ပိုင်း၊ နယ်စပ် ဒေသတွင်ရှိသည့် တပ်မတော်စခန်းများနှင့် ချင်းရွှေဟော်မြို့ကို ၂၀၂၃ ခုနှစ်၊ အောက်တိုဘာ ၂၇ ရက်တွင် အင်အား သုံးစတင် တိုက်ခိုက်ခဲ့ကြောင်း၊ တရုတ်အစိုးရ၏ ကြားဝင်စေ့စပ်မှုဖြင့် ငြိမ်းချမ်းရေးသဘောတူညီချက် ရရှိခဲ့သော် လည်း ၎င်းတို့အနေဖြင့် သဘောတူညီချက်ကို ချိုးဖောက်ကာ မြို့ရွာများကို ဆက်လက်တိုက်ပွဲဖော်ဆောင်ခဲ့ ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က တရုတ်ဝန်ကြီးချုပ် လီချန်ကို ပြောကြားခဲ့သည်။

၎င်းက “ ငြိမ်းချမ်းရေးကို အမှန်တကယ် လိုလားပါက မိမိတို့အနေဖြင့် ငြိမ်းချမ်းရေးတံခါးကို အမြဲဖွင့်ထားပြီး ဆွေးနွေးရန်အသင့်ရှိပါကြောင်း၊ လက်နက်ကိုင် အကြမ်းဖက်သမားများအနေဖြင့် ဖြစ်လိုသည်ကို ရှေ့တန်းတင် မည့်အစား ဖြစ်သင့်သည်ကို လုပ်ဆောင်ကြရန်လိုကြောင်း၊ MNDAA -TNLA-AA အနေဖြင့် ငြိမ်းချမ်းရေးကို လိုလား ကြောင်း ရှင်းလင်းပြတ်သားသည့် လုပ်ဆောင်ချက် ပြသလာမှသာလျင် မိမိတို့အနေဖြင့် ဆွေးနွေးမှုကို ဆောင်ရွက် နိုင်မည်”ဟု ပြောသည်။

နစကသည် ၂၀၂၄ ခုနှစ်၊ စက်တင်ဘာ ၂၆ ရက်က လက်နက်ကိုင်နည်းလမ်းဖြင့် မတောင်းဆိုဘဲ နိုင်ငံရေးနည်း လမ်းအရ တွေ့ဆုံဆွေးနွေးရန်၊ ရွေးကောက်ပွဲကနေ တောင်းဆိုရန် လက်နက်ကိုင်အဖွဲ့များနှင့် PDF များကို ဖိတ်ခေါ်ကမ်းလှမ်းထားသည်။

နစကသည် ၂၀၂၅ ခုနှစ်တွင် ရွေးကောက်ပွဲ ကျင်းပမည်ဖြစ်ပြီး အနိုင်ရရှိသည့် နိုင်ငံရေးပါတီကို နိုင်ငံတော်အာဏာ လွှဲပြောင်းပေးသွားမည်ဟု ဗိုလ်ချုပ်မှူးကြီးမင်းအောင်လှိုင်က ပြောကြားထားသည်။

တရုတ်နိုင်ငံအနေဖြင့် နစကမှ ချမှတ်ထားသည့် ရှေ့လုပ်ငန်းစဉ် ၅ ရပ်ကို ထောက်ခံပါကြောင်း၊ မြန်မာနိုင်ငံ၏ ရွေးကောက်ပွဲ အောင်မြင်စွာ ကျင်းပနိုင်ရေးအတွက်လည်း ဆန္ဒပြုကူညီနိုင်မည်ဖြစ်ကြောင်း တရုတ်ဝန်ကြီးချုပ် လီချန်က နစကဥက္ကဋ္ဌနှင့်တွေ့ဆုံစဉ် ပြောကြားလိုက်သည်။

CNI News

၂၀၂၄ ခုနှစ်၊ နိုဝင်ဘာ ၆

လာအို၊ ကမ္ဘောဒီးယား ဝန်ကြီးချုပ်တို့နှင့် နစကဥက္ကဌ ဗိုလ်ချုပ်မှူးကြီးမင်းအောင်လှိုင် တွေ့ဆုံ၍ မြန်မာ့အရေး ဆွေးနွေးကြကြောင်း နစက၏သတင်းထုတ်ပြန်ရေးအဖွဲ့က ထုတ်ပြန်ခဲ့သည်။

တရုတ်နိုင်ငံသို့ ရောက်ရှိနေသည့် နစကဥက္ကဌသည် နိုဝင်ဘာ ၆ ရက်နေ့က  ယူနန်ပြည်နယ်၊ ကူမင်းမြို့ရှိ HUALUXE Kunming ဟိုတယ်မှာ လာအိုနိုင်ငံ ဝန်ကြီးချုပ် H.E. Mr. Sonexay Siphandone နှင့် တွေ့ဆုံ ဆွေးနွေးခဲ့သလို ကမ္ဘောဒီးယားနိုင်ငံ ဝန်ကြီးချုပ် H.E. Mr. Hun Manet တို့နှင့်လည်း Green Lake ဟိုတယ်မှာ တွေ့ဆုံ ဆွေးနွေးခဲ့ကြသည်။

နစကဥက္ကဌ ဗိုလ်ချုပ်မှူးကြီးမင်းအောင်လှိုင်သည် နိုဝင်ဘာ ၆ ရက်နှင့် ၇ ရက်နေ့များတွင် တရုတ်နိုင်ငံမှာ ကျင်းပ မည့် အဌမအကြိမ် မြောက် မဟာမဲခေါင် ဒေသခွဲ ထိပ်သီးအစည်းအဝေး၊ (၁၀)ကြိမ်မြောက် ဧရာဝတီ-ကျောက်ဖရား- မဲခေါင် စီးပွားရေး ပူးပေါင်း ဆောင်ရွက်မှု မဟာဗျူဟာ ထိပ်သီးအစည်းအဝေး၊ (၁၁)ကြိမ်မြောက် ကမ္ဘောဒီယား- လာအို- မြန်မာ- ဗီယက်နမ် ပူးပေါင်း ဆောင်ရွက်မှု ထိပ်သီး အစည်းအဝေးများသို့ တက်ရောက် ဆွေးနွေးလျက်ရှိသည်။

အဆိုပါ ထိပ်သီး အစည်းအဝေးများသို့ တက်ရောက်လာသည့် တခြားသော နိုင်ငံများမှ ခေါင်းဆောင်များနှင့် တွေ့ဆုံကာ မြန်မာ့အရေးကို ဆွေးနွေးခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်နဲ့ ကမ္ဘောဒီးယား ဝန်ကြီးချုပ်တွေ့ဆုံစဉ်

လာအို၊ ကမ္ဘောဒီးယား ဝန်ကြီးချုပ်များနှင့် တွေ့ဆုံစဉ် မြန်မာနိုင်ငံ၏ နိုင်ငံရေး ဖြစ်ပေါ် ပြောင်းလဲမှု အခြေအနေ များနှင့် လက်ရှိ ပကတိ အခြေအနေများ၊ လွတ်လပ်၍ တရားမျှတသည့် ပါတီစုံဒီမိုကရေစီ အထွေထွေရွေးကောက် ပွဲ ကျင်းပနိုင်ရေး ကိစ္စရပ်များကို ဆွေးနွေးခဲ့ကြသည်။

ထို့နောက် အာဆီယံအတွင်း မြန်မာနိုင်ငံအနေဖြင့် အကောင်းဆုံး ပူးပေါင်းဆောင်ရွက်လျက်ရှိမှု အခြေအနေများ နှင့် အာဆီယံ အစည်းအဝေးများတွင် မြန်မာနိုင်ငံမှ ပါဝင်နိုင်မှု အခြေအနေများ၊ မြန်မာနိုင်ငံ၌ ဖြစ်ပေါနေသည့် အခြေအနေများကို ငြိမ်းချမ်းစွာ ဖြေရှင်းနိုင်ရန်လိုအပ်သည့် အခြေအနေများကို နစကဥက္ကဌ ချပြ ဆွေးနွေးခဲ့ ကြောင်း သိရသည်။

အလားတူ နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု၊ ခရီးသွားအခြေအနေ၊ လူမှုရေး အခြေအနေနှင့် ယဉ်ကျေးမှု အခြေအနေများ မြှင့်တင်ရေးဆိုင်ရာကိစ္စရပ်များကိုလည်း ဆွေးနွေးခဲ့ကြကြောင်း သိရသည်။

CNI News

၂၀၂၄ ခုနှစ်၊ နိုင်ဝင်ဘာ ၆

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် တရုတ်ကွန်မြူနစ်ပါတီ၊ ဗဟိုကော်မတီ အဖွဲ့ဝင်နှင့် ယူနန် ပြည်နယ် ပါတီကော်မတီအတွင်းရေးမှူး မစ္စတာဝမ်နင်နှင့် တွေ့ဆုံ၍ နယ်စပ်ဒေသတည်ငြိမ်အေးချမ်‌ရေးကိစ္စ ရပ်များကို ဆွေးနွေးရာ ဘယ်လိုအပြောင်းအလဲများဖြစ်ပေါ် ထူးခြားလာနိုင်သလဲဆိုကာ မေးခွန်းထုတ်လာကြ သည်။

၂၀၂၄ ခုနှစ်၊ နိုင်ဝင်ဘာလ ၅ ရက်က တရုတ်နိုင်ငံ၊ ကူမင်းမြို့မှာ တွေ့ဆုံ၍ နှစ်ဖက် ဆွေးနွေးခဲ့ကြခြင်း ဖြစ်သည်။

မြန်မာနိုင်ငံနှင့် ယူနန်ပြည်နယ်အကြား နှစ်ဖက် ပူးပေါင်းဆောင်ရွက်မှုကို မြှင့်တင်နိုင်ရန် နယ်စပ်ဒေသ တည်ငြိမ် အေးချမ်းရေး အလေးထား ဆောင်ရွက်ကြရန် လိုအပ်ကြောင်း နစကဥက္ကဋ္ဌက ပြောကြားခဲ့သည်။

တွေ့ဆုံဆွေးနွေးမှုမှ အချက်အလက်များအား မြေပြင်တွင် အကောင်အထည် ဖော်နိုင်ပါက အပေါင်းလက္ခဏာ ဆောင်နိုင်မည်ဖြစ်ကြောင်း သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “နယ်နိမိတ်ကပ်နေတဲ့ နိုင်ငံတွေကြားထဲမှာ အထူးသဖြင့် နယ်စပ်ဒေသ ကုန်သွယ်‌ရေးနဲ့ တည်ငြိမ်အေးချမ်း ရေးက သိပ်အရေးကြီးတယ်။ နှစ်နိုင်ငံလုံး ပူးပေါင်းဆောင်ရွက်ခြင်းအားဖြင့် ဒါကို ကျော်လွှားရမှာ။ ဆိုလိုတာက တစ်ဖက်တည်းက လုပ်လို့မရဘူး၊ တစ်ဖက်တည်းက သူ့ဘက်ဖြစ်တာပဲ၊ ငါ့ဘက်မှာ ပြဿနာ မရှိဘူးဆိုပြီးနေလို့ တော့မရဘူး။ ဒါကတော့ နယ်နိမိတ် ထိစပ်နေတဲ့ နိုင်ငံတွေကြားမှာ အမြဲတမ်း လှုပ်ရှားရတဲ့ ပြဿနာပဲ၊ ဖြစ်လေ့ ဖြစ်ထ ဒါကိုဖြေရှင်းရမယ်။ တွေ့ဆုံဆွေးနွေးမှုအရတော့ ဒီအချက်တွေက တော်တော်ကောင်းတာ ဖြစ်တဲ့အတွက် ကြောင့် မြေပြင်မှာသာ တကယ်တမ်း အကောင်အထည် ဖော်မယ်ဆိုရင် လက်ရှိဖြစ်ပျက်နေတဲ့ ဒီလက်နက်ကိုင် ပဋိပက္ခတွေရော၊ ရပ်တန့်နေတဲ့ ကုန်သွယ်ရေး အပိုင်းတွေရော ပြန်ပြီးတော့ ပိုကောင်းလာအောင်ပေါ့၊ လက်နက် ကိုင် ပဋိပက္ခတွေလည်း ချုပ်ငြိမ်းသွားမယ်၊ ရပ်တန့်နေတဲ့ ကုန်သွယ်ရေးတွေလည်း ပြန်ပြီးတော့ စနိုင်မယ်ဆိုရင် တော့ အကုန်လုံးကတော့ အပေါင်းလက္ခဏာဆောင်တဲ့ လုပ်ငန်းစဥ်တွေလို့ မျှော်လင့်လို့ရပါတယ်” ဟုပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ တရုတ်လုပ်ငန်းရှင်များတွေ့ဆုံစဉ်

မြန်မာနိုင်ငံနှင့် တရုတ်နိုင်ငံသည် အိမ်နီးချင်းများ ဖြစ်၍ အစဥ်အမြဲ ယှဥ်တွဲနေထိုင်ရမည် ဖြစ်သောကြောင့် အိမ်နီးချင်းကြားထဲတွင် ရန်သူ သို့မဟုတ် မိတ်ဆွေဟု မြင်၍မရကြောင်း၊ နှစ်ဖက်အကျိုးစီးပွား ဖြစ်စေသော၊ နှစ်ဦးနှစ်ဖက် ကောင်းမွန်သော ရလဒ်များ ဖော်ဆောင်နိုင်သောကြောင့် ယခုတွေ့ဆုံ ဆွေးနွေးမှုသည် အရေးပါ ကြောင်း နိုင်ငံရေးအကဲခတ်များက သုံးသပ်ကြသည်။

ဗိုလ်ချုပ်မှူးကြီး မင်းအောင်လှိုင်က နှစ်နိုင်ငံအကြား ခွဲခြား၍မရသည့် ဆက်ဆံရေးကောင်းကို ပိုင်ဆိုင်ထားမှု၊ နှစ်ဘက်ပူးပေါင်းဆောင်ရွက်မှုများ ပိုမိုမြှင့်တင်နိုင်ရန် နယ်စပ်ဒေသ တည်ငြိမ်အေးချမ်းရေးကို အလေးထား ဆောင်ရွက်ရန်လိုအပ်သည်ဟု ပြောကြားခဲ့သည်။

ထို့အပြင် နယ်စပ်ဒေသ တည်ငြိမ်အေးချမ်းမှသာ သွင်းကုန်၊ ပို့ကုန် ကဏ္ဍများအား ပိုမိုဆောင်ရွက်နိုင်မည် ဖြစ်သလို စီးပွားရေးအရလည်း ကူးလူးဆက်သွယ်မှုကို ပိုမို အကောင်အထည် ဖော်နိုင်မည်ဟု ၎င်းက ပြောကြားခဲ့ သည်။

နယ်စပ်ဒေသ တည်ငြိမ်အေးချမ်းရေးမူသည် အရေးကြီးသော်လည်း တည်ငြိမ်အေးချမ်းရေးနှင့် ပတ်သက်၍ တရုတ်နိုင်ငံ၏ ပေါ်လစီတွင် stability (တည်ငြိမ်မှု)သာဖြစ်ပြီး နိုင်ငံရေးအရ အဖြေရှာခြင်း မဟုတ်ကြောင်း NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

တရုတ်−မြန်မာနယ်စပ် အဝင်အထွက်ဂိတ်ကို တွေ့ရစဥ်

၎င်းက “အရေးကြီးပါတယ်၊ နယ်စပ်ဒေသ တည်ငြိမ်အေးချမ်းမှုက တရုတ်ရဲ့ တသက်လုံး တစိုက်မတ်မတ် အော်နေတာပဲ။ တရုတ်‌ပေါ်လစီမှာက Stability လို့ပဲခေါ်တယ်ဗျ၊ Peace လို့ သူမသုံးဘူး။ တည်ငြိမ်အေးချမ်းမှု ဆိုတာက သူက ငြိမ်းချမ်းရေးကို ပြောတာမဟုတ်ဘူး၊ နိုင်ငံရေးအဖြေရှာတာကို ပြောတာမဟုတ်ဘူး၊ ဘယ်နည်း နဲ့ဖြစ်ဖြစ် တည်ငြိမ်မှုရှိရင်ရပြီ။ Stability နောက်မှာမှ သူ့မူဝါဒ တစ်ခုက Economic Development ပေါ့။ Stable ရှိမှ စီးပွားရေး ဖွံ့ဖြိုးတိုးတက်မယ်ပေါ့ဗျာ။ အဲဒီနှစ်ခုကို သူကကိုင်ထားတာ၊ အခု Stable မရှိတော့ စီးပွားရေးက လည်း ကျဆင်းလာပေါ့။ ဒါကြောင့် ဒီအဲဟာကို ပြန်သွားမယ်ဆိုရင်တော့ တရုတ် Policy နဲ့ကိုက်ပါတယ်၊ ယူနန် အနေနဲ့လည်း ကိုက်တယ်” ဟု ပြောသည်။

လက်ရှိတွင် တရုတ်-မြန်မာနယ်စပ်များဖြစ်သည့် ကချင်ပြည်နယ်နှင့် ရှမ်းပြည်နယ်အတွင်းမှာ မြန်မာ့တပ်မတော် နှင့် KIA၊ MNDAA၊ TNLA၊ PDF များကြား တိုက်ပွဲများ ဖြစ်ပွားနေပြီး နယ်စပ်ဂိတ်များလည်း တရုတ်ဘက်က ပိတ် ထားသည်။

အလားတူ မြန်မာဘက်ကလည်း ထိုင်းနှင့် တရုတ် ကုန်စည်များကို တရားမဝင် ကုန်စည်များအဖြစ် သတ်မှတ်ကာ ဖမ်းဆီးအရေးယူမှုများ ပြုလုပ်လျက်ရှိသည်။

CNI News

၂၀၂၄ ခုနှစ်၊ နိုဝင်ဘာ ၆

မြန်မာ့အရေးနိုင်ငံတကာ အာရုံစိုက်လာရန် လုပ်ဆောင်ဖို့လိုအပ်သလို နိုင်ငံတကာပါဝင်သည့် ယန္တရား (mechanism)တစ်ခုကို ဖော်ဆောင်ရမည်ဟု ကရင်အမျိုးသားအစည်းအရုံး(KNU)အထွေထွေအတွင်းရေးမှူးချုပ် ပဒိုစောတာဒိုမူးက ပြောသည်။

၂၀၂၄ ခုနှစ်၊ နိုဝင်ဘာ ၅ ရက်နေ့က KNU၊ ချင်းအမျိုးသားတပ်ဦး(CNF)၊ ကရင်နီအမျိုးသားတိုးတက်ရေးပါတီ(KNP P)၊ အမျိုးသားညီညွတ်ရေးအစိုးရ(NUG)တို့ ပူးတွဲ သတင်းစာ ရှင်းလင်းပွဲမှာ ၎င်းက ပြောကြားသွားခဲ့ခြင်း ဖြစ် သည်။

ပဒိုစောတာဒိုမူးက “ မြန်မာနိုင်ငံ၏ လုံခြုံရေး၊ တစ်ကမ္ဘာလုံး လုံခြုံရေးနဲ့ပတ်သက်နေပါတယ်။ ဒီ Scam Business တွေ တရားမဝင် အွန်လိုင်းငွေလိမ်လည်တဲ့ လှုပ်ရှားမှုတွေ လူကုန်ကူးမှုတွေ၊ မူးယစ်ဆေးဝါး ကုန်ကူးမှု တွေက တစ်ကမ္ဘာလုံး ပြန့်နေပါတယ်။ အမေရိကန်နိုင်ငံ၊ နယူးယောက်မြို့က လမ်းမကြီးတွေမှာရှိသလို ဘန်ကောက်မြို့ရဲ့ လမ်းမကြီးတွေမှာလည်း ရောက်နေပါတယ်။ ဥရောပကိုလည်း ရောက်ပါတယ်။ ဒါကြောင့် ကျနော်တို့ရဲ့ ပြဿနာ က အကြီးကြီးပါ။ အဲဒါကြောင့် ဒါကို   High Light လုပ်ပြီးတော့ တစ်ကမ္ဘာလုံးက အာရုံစိုက်အောင် လုပ်ရမယ့် တာဝန် ကျနော်တို့မှာရှိပါတယ်။ ဒါကို ကျနော်တို့က ဆက်လုပ်မယ်။ အဲဒီနည်းလမ်းကနေ နိုင်ငံတကာပါဝင်တဲ့ mechanism(ယန္တရား)တစ်ခုကနေပြီးတော့ ဒီလမ်းကြောင်းကို လုပ်ခြင်းအားဖြင့် ပိုပြီးတော့ စဉ်ဆက်မပြတ်ဖြစ်တဲ့ နိုင်ငံထူထောင်ရေးလမ်းကြောင်း တည်ဆောက်မှုလမ်းကြောင်းကို ရောက်သွားမယ်လို့ ယုံကြည်ပါတယ်" ဟု ပြော သည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က အမျိုးသားဒီမိုကရေစီအဖွဲ့ချုပ်(NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ် ချ၍ တပ်မတော်က အာဏာရယူခဲ့သည်။

ထို့နောက် NLD ပါတီ ခေါင်းဆောင်များ၊ လွှတ်တော်အမတ်များ၊ တက်ကြွလှုပ်ရှားသူများ၊ ဒီမိုကရေစီအင်အားစု များ၊ လက်နက်ကိုင်များ စုပေါင်း၍ မြန်မာ့တပ်မတော် ဖြုတ်ချရေး နွေဦးတော်လှန်ရေးကို ဖော်ဆောင်လျက်ရှိ သည်။

အဆိုပါ နွေဦးတော်လှန်ရေး ဖော်ဆောင်နေချိန်မှာပဲ အွန်လိုင်းငွေလိမ်လည်မှုနှင့် အွန်လိုင်းလောင်းကစား လုပ်ငန်း များ နှိမ်နင်းရေး တရုတ်က မြန်မာအစိုးရကို ဖိအားပေးလာသလို လက်နက်ကိုင်တချို့ကို အသုံးချခဲ့မှုများလည်း ပေါ်ပေါက်ခဲ့သည်။

ဘစ်ရှော့နဲ့ နစကဥက္ကဌကို တွေ့ရစဉ်

ထိုအခြေအနေများကြောင့် မြန်မာနိုင်ငံ၏ စစ်ကိုင်းတိုင်းဒေသကြီး၊ တနင်္သာရီတိုင်းဒေသကြီး၊ မကွေးတိုင်းဒေသ ကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ ရှမ်းပြည်နယ်၊ ချင်းပြည်နယ်၊ ကရင်ပြည်နယ်၊ ကယားပြည်နယ်၊ ကချင်ပြည်နယ်၊ မွန်ပြည်နယ်၊ ရခိုင်ပြည်နယ်တို့မှာ လက်နက်ကိုင်ပဋိပက္ခများ ပြင်းထန်နေကာ နေရပ်စွန့်ခွာ ထွက်ပြေးတိမ်းရှောင်နေရသူ ၆ သန်းကျော်ရှိကြောင်း သိရသည်။

နိုင်ငံတကာကလည်း မြန်မာ့တပ်မတော် ခေါင်းဆောင်များ၊ နစကအဖွဲ့ဝင်များ၊ နိုင်ငံတော်ပိုင် ဘဏ်များ၊ မြန်မာ့ တပ်မတော်နှင့်ဆက်စပ်သူများ စသည့် အစုအဖွဲ့နှင့် လူပုဂ္ဂိုလ်များကို စီးပွားရေးပိတ်ဆို့ထားသည်။

ထို့အပြင် အမေရိကန်နိုင်ငံသည် Burma Ace ဆိုသော ဥပဒေကို ပြဌာန်းကာ အတိုက်အခံများကို ငွေကြေး ထောက်ပံ့ပေးလျက်ရှိသလို ဥရောပနှင့် တခြားသော နိုင်ငံတကာများကတော့ နစကနှင့်မြန်မာ့တပ်မတော်ကို မဆက်ဆံရေး မူဝါဒများ ချမှတ်ကာ ဖိအားပေးလျက်ရှိနေသည်။

မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ် မစ္စစ်ဘစ်ရှော့သည် မြန်မာနိုင်ငံသို့ အောက်တိုဘာလက လာရောက်ခဲ့ပြီး နစကဥက္ကဌ ဗိုလ်ချုပ်မှူးကြီးမင်းအောင်လှိုင်နှင့်တွေ့ဆုံခဲ့ပြီးနောက် မြန်မာဦးဆောင်သည့် နိုင်ငံတကာပါဝင်သော လုပ်ငန်းစဉ်ကို ဖော်ဆောင်ရန် ကုလညီလာခံမှာ ပြောကြားခဲ့သည်။

CNI News
၂၀၂၄ ခုနှစ်၊ နိုဝင်ဘာ ၅

တရုတ်နိုင်ငံသို့ တရားဝင် သွားရောက်သည့် ခရီးစဉ်တွင် နစကဥက္ကဌ ဗိုလ်ချုပ်မှူးကြီးမင်းအောင်လှိုင်သည် ကူမင်း သိပ္ပံနှင့်နည်းပညာတက္ကသိုလ် အပါအဝင် ယူနန်နည်းပညာကောလိပ်တို့ကို သွားရောက်၍ လေ့လာခဲ့ကြောင်း သိရသည်။

နစကဥက္ကဌသို့ တရုတ်နိုင်ငံသို့ နိုဝင်ဘာ ၅ ရက်နေ့ နံနက် ၆ နာရီကျော်တွင် နေပြည်တော်မှ MAI လေယာဉ်ဖြင့် ထွက်ခွာခဲ့ပြီးနောက် ကူမင်းအပြည်ပြည်ဆိုင်ရာလေဆိပ်မှာ တရုတ်ကွန်မြူနစ်ပါတီ၊ အမြဲတမ်း ကော်မတီအဖွဲဝင် Mr. Yang Yalin မှ ကြိုဆိုခဲ့သည်။

ထို့နောက် ယူနန်ပြည်နယ်ပါတီ ကော်မတီအတွင်းရေးမှူး မစ္စတာဝမ်နင်(Mr.Wang Ning)နှင့် နစကဥက္ကဌ ဗိုလ်ချုပ်မှူးကြီးမင်းအောင်လှိုင်တို့ နိုဝင်ဘာ ၅ ရက်နေ့က တွေ့ဆုံကြသည်။

၂၀၂၄ ခုနှစ်၊ နိုဝင်ဘာ ၅ ရက်က ကူမင်းအပြည်ပြည်ဆိုင်ရာလေဆိပ်မှာ နစကဥက္ကဌကို ကြိုဆိုနေကြစဉ်

အလားတူ ကူမင်းမြို့မှာ တရုတ်နိုင်ငံသား လုပ်ငန်းရှင်များနှင့်လည်း တွေ့ဆုံ၍ စီးပွားရေးနှင့် ရင်းနှီးမြှုပ်နှံမှုများ အကြောင်းကို ဆွေးနွေးကြသည်။

အလားတူ နိုဝင်ဘာ ၆ ရက်နှင့် ၇ ရက်နေ့များတွင် တရုတ်နိုင်ငံမှာ ကျင်းပမည့် အဌမအကြိမ် မြောက် မဟာမဲခေါင် ဒေသခွဲ ထိပ်သီးအစည်းအဝေး၊ (၁၀)ကြိမ်မြောက် ဧရာဝတီ-ကျောက်ဖရား- မဲခေါင် စီးပွားရေး ပူးပေါင်း ဆောင် ရွက်မှု မဟာဗျူဟာ ထိပ်သီးအစည်းအဝေး၊ (၁၁)ကြိမ်မြောက် ကမ္ဘောဒီယား- လာအို- မြန်မာ- ဗီယက်နမ် ပူးပေါင်း ဆောင်ရွက်မှု ထိပ်သီး အစည်းအဝေးများသို့ တက်ရောက် ဆွေးနွေးမည်ဖြစ်သည်။

CNI News
၂၀၂၄ ခုနှစ်၊ နိုဝင်ဘာ ၅

တရုတ်နိုင်ငံသို့ တရားဝင် သွားရောက်သည့် ခရီးစဉ်တွင် ယူနန်ပြည်နယ်ပါတီ ကော်မတီအတွင်းရေးမှူး မစ္စတာ ဝမ်နင်(Mr.Wang Ning)နှင့် နစကဥက္ကဌ ဗိုလ်ချုပ်မှူးကြီးမင်းအောင်လှိုင်တို့ နိုဝင်ဘာ ၅ ရက်နေ့က တွေ့ဆုံကြ သည်။

နစကဥက္ကဌသို့ တရုတ်နိုင်ငံသို့ နိုဝင်ဘာ ၅ ရက်နေ့ နံနက် ၆ နာရီကျော်တွင် နေပြည်တော်မှ MAI လေယာဉ်ဖြင့် ထွက်ခွာခဲ့ပြီးနောက် မစ္စတာဝမ်နင်နှင့် ယူနန်ပြည်နယ်၊ ကူမင်းမြို့မှာ တွေ့ဆုံကြခြင်း ဖြစ်သည်။

၂၀၂၄ ခုနှစ်၊ နိုဝင်ဘာ  ၅ ရက်က မစ္စတာဝမ်နင်နဲ့ ဗိုလ်ချုပ်မှူးကြီးမင်းအောင်လှိုင်တွေ့ဆုံစဉ်

ထို့နောက် ကူမင်းမြို့မှာ တရုတ်နိုင်ငံသား လုပ်ငန်းရှင်များနှင့်တွေ့ဆုံကာ စီးပွားရေးနှင့် ရင်းနှီးမြှုပ်နှံမှုများ အကြောင်းကို ဆွေးနွေးကြသည်ဟု သိရသည်။

အလားတူ နိုဝင်ဘာ ၆ ရက်နှင့် ၇ ရက်နေ့များတွင် တရုတ်နိုင်ငံမှာ ကျင်းပမည့် အဌမအကြိမ် မြောက် မဟာမဲခေါင် ဒေသခွဲ ထိပ်သီးအစည်းအဝေး၊ (၁၀)ကြိမ်မြောက် ဧရာဝတီ-ကျောက်ဖရား- မဲခေါင် စီးပွားရေး ပူးပေါင်း ဆောင် ရွက်မှု မဟာဗျူဟာ ထိပ်သီးအစည်းအဝေး၊ (၁၁)ကြိမ်မြောက် ကမ္ဘောဒီယား- လာအို- မြန်မာ- ဗီယက်နမ် ပူးပေါင်း ဆောင်ရွက်မှု ထိပ်သီး အစည်းအဝေးများသို့ တက်ရောက် ဆွေးနွေးမည်ဖြစ်သည်။

CNI News

၂၀၂၄ ခုနှစ်၊ နိုဝင်ဘာ ၅

မြန်မာ့တပ်မတော်၏ အနောက်ပိုင်းတိုင်းစစ်ဌာနချုပ် တည်ရှိရာ ရခိုင်ပြည်နယ်၊ အမ်းမြို့နယ်တွင် တိုက်-ပွဲများ အပြင်းအထန် ဖြစ်ပွားနေသောကြောင့် အမ်းမြို့သည် စစ်ရေး/စီးပွားရေးအတွက် ဘယ်လောက်အရေးပါသလဲဟု မေးခွန်းထုတ်မှုများ ရှိနေသည်။

အနောက်ပိုင်းတိုင်းစစ်ဌာနချုပ် တည်ရှိရာ အမ်းမြို့သည် မဟာဗျူဟာအရ အရေးပါသော နယ်မြေဖြစ်ကြောင်း ရခိုင်အမျိုးသားပါတီ(ANP)မှ မူဝါဒရေးရာဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

၎င်းက “အရေးပါတယ်ဆို ရခိုင်မှာ အဓိကနေပြီးတော့ သူကဌာနချုပ်လေ၊ တကယ်ကို အချက်အချာကျတယ်။ ဘာလို့လဲဆိုတော့ သူတို့က အမ်းကိုက မူလရှိနေတဲ့ ဗမာပြည်မက အုပ်ချုပ်မယ့်အချိန်မှာ မဟာဗျူဟာအရ တည်ထားတဲ့ဟာဖြစ်တယ်၊ ဒီနေ့ခါက ပြည်မမှာတော့ တစ်နိုင်ငံလုံးမှာတော့ သူ့ကိုလက်မခံတော့ဘူး ဆိုတဲ့ အချိန်မှာ အမ်းက ကုန်းတွင်းပိတ်သွားတဲ့ မဟာဗျူဟာအရ တွက်ချက်ထားတဲ့ဟာတွေက လွဲသွားတယ်ပေါ့ဗျာ။ အမ်းမြို့နယ်မှာဆိုရင် ကျေးရွာပေါင်း ၃၀၀ ကျော်လောက်ရှိတယ်၊ နယ်ကျယ်တယ်ပေါ့လေ အကျယ်ဆုံးဖြစ်တယ်။ အဲဒီနယ်တွေ အကုန်လုံးကို ဘယ်လိုမှ စကစ-က ထိန်းချုပ်လို့မရဘူး။ သူအဲ့တာတွေကို လက်လွှတ်ထားတာကြာ ပြီ၊ သူက အမ်းမြို့ပေါ်မှာပဲရှိတယ်။ အခုချိန်မှာ သူအဲ့ဒီဟာတွေ ဆုံးရှုံးသွားမယ်ဆိုလည်း သူ့ရဲ့အနောက်ဘက် ခံတပ်ကြီးလုံးဝ ဆုံးရှုံးသွားတာဖြစ်တယ်၊ ကျိုးသွားတာဖြစ်တယ်"ဟု ပြောသည်။

အာရက္ခတပ်တော် AA ကိုတွေ့ရစဥ်

ထို့အတူ စီးပွားရေးအရ နိုင်ငံတကာ ရင်းနှီးမြှုပ်နှံမှုများ၊ စီမံကိန်းများရှိသောကြောင့် အမ်းမြို့ကို မြန်မာ့တပ်မတော် လက်လွတ်လိုက်ရပါက အိန္ဒိယ၊ တရုတ်နှင့် အာရက္ခတပ်တော်(AA) တို့ ဆွေးနွေးကြရမည့် အခြေအနေ ပေါ်ပေါက်လာနိုင်ကြောင်း ဦးထွန်းအောင်ကျော်က ဆက်ပြောသည်။

၎င်းက “စီးပွားရေးအရကတော့ အမ်းစစ်ဌာနချုပ် ကျပြီဆိုတာနဲ့ ရခိုင်မှာအဓိက နိုင်ငံတကာ ရင်းနှီးမြှုပ်နှံထားတဲ့ စစ်တွေ၊ ရခိုင်ပြည်နယ်ရဲ့မြို့တော် အဲဒီနေရာမှာ ကုလားတန်စီမံကိန်းရှိတယ်၊ ဒါလည်း အရေးကြီးတယ်။ နောက် တစ်ခါ ကျောက်ဖြူ တရုတ်ရဲ့ တကယ့်ကို သမုဒ္ဒရာနှစ်စင်းစီမံကိန်း တရုတ်ကရေရှည် Plan ဆွဲပြီးတော့ လုပ်ထား တဲ့ထဲမှာ ကျောက်ဖြူဟာ အရမ်းအရေးကြီးတဲ့ နေရာမှာရှိတယ်။ ပြီးတော့ ဒီလိုအရေးကြီးတဲ့နေရာ အခု အမ်း ကျပြီဆိုရင် အမ်းကနေအောက်ကို နည်းနည်းလေး ဆင်းလိုက်တာနဲ့တင် ကျောက်ဖြူ ရေထွက်ပေါက်ကို ရောက် သွားတာပဲလေ။ ဒီတော့ သေချာပေါက် အမ်း ကျပြီဆိုတာနဲ့ စစ်တွေရယ်၊ ကျောက်ဖြူရယ် ဆိုတာကတော့ အိန္ဒိယ ရယ်၊ တရုတ်ရယ်၊ တပ်တော်ရယ်ပေါ့နော် သူတို့တွေ စကားပြောကြရလိမ့်မယ်"ဟု ပြောသည်။

တရုတ်- မြန်မာနှစ်နိုင်ငံ နယ်စပ်ဖြတ်ကျော် ရေနံနှင့် သဘာဝဓာတ်ငွေ့ ပိုက်လိုင်းစီမံကိန်းသည် မြန်မာနိုင်ငံ၏ ရခိုင်ပြည်နယ် အနောက်ဘက်ကမ်းရိုးတန်းမှ အရှေ့မြောက် ရှမ်းပြည်နယ်ကတဆင့် တရုတ်နိုင်ငံ၏ အနောက် ဘက် ပြည်နယ်များအထိ ဆက်သွယ်ထားသော စီမံကိန်းကြီးဖြစ်သည်။ 

ထိုစီမံကိန်းသည် ရခိုင်ပြည်နယ်၊ မန္တလေးတိုင်းဒေသကြီး၊ မကွေးတိုင်းဒေသကြီးနှင့် ရှမ်းပြည်နယ်အတွင်းရှိ မြို့နယ်ပေါင်း ၂၂ မြို့နယ်ကို ဖြတ်သန်းသွားပြီး စုစုပေါင်း ကုန်ကျစရိတ်မှာ အမေရိကန်ဒေါ်လာ ၂ ဒသမ ၄၅ ဘီလီယံကျော် ဖြစ်သည်။

ထို့ပြင် အိန္ဒိယနိုင်ငံ၊ မီဇိုရမ်ပြည်နယ်မှ ရခိုင်ပြည်နယ်မြို့တော် စစ်တွေဆိပ်ကမ်းအထိ ချင်းပြည်နယ်၊ ပလက်ဝ မြို့နယ်အားဖြတ်ပြီး ကုန်းလမ်း၊ ရေလမ်း ကုန်သွယ်ရေးလမ်းကြောင်းကို တည်ဆောက်နေသည့် ကုလားတန်မြစ် စီမံကိန်းလည်းရှိနေသည်။

အမ်းမြို့သည် နှစ်ဖက်စလုံးအတွက် အရေးပါသော မြို့ဖြစ်သောကြောင့် ပိုမိုပြင်းထန်လာနိုင်ကြောင်း တရုတ်-မြန်မာအရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

မြန်မာ့တပ်မတော်ကို တွေ့ရစဥ်

၎င်းက “နှစ်ဖက်စလုံးအတွက် ခင်ဗျားပြောသလိုပဲ တော်တော်အရေးပါပါတယ်၊ ဒီဘက်ကလည်း အကုန်လုံး လောက်နီးနီး ရပြီလေ၊ ဒါပဲကျန်သလို ဖြစ်တာကိုး။ အဲတော့ စစ်ကောင်စီဘက်ကလည်း ဒါကို အ-သေအကြေခံဖို့ စဥ်းစားထားထင်တယ်။ ဘာဖြစ်လို့လဲဆို‌တော့ ဒီဘက်မှာလည်း ထိထားတာတွေက အများကြီးဆိုတော့ တော်တော်လေးတော့ ပြဿနာကြီးမယ်ထင်တယ်၊ အပြင်းအထန်တော့ တိုက်နေကြရမယ်ထင်တယ်။ တိုက်နေ တာလည်း ကြာလည်းကြာပြီနော်၊ ဘေးပတ်ပတ်မှာလည်း AA ကပဲ ဝိုင်းထားတယ်လို့ ကြားတယ်။ အရေးကြီး တာတော့ နှစ်ဖက်စလုံးအတွက် အရေးကြီးတာပဲ၊ ဒါကြောင့်မို့ အ‌-သေအလဲ တိုက်နေကြတာ ဖြစ်မယ်ထင်တယ် ကြည့်ရတာ"ဟု ပြောသည်။

AA သည် စစ်ဆင်ရေးများ စတင်ဖော်ဆောင်စဉ် ကတည်းက တရုတ်၏ အကျိုးစီးပွားနှင့် ရင်းနှီးမြှုပ်နှံမှုများအား ကာကွယ်မည်ဟု ပြောကြားထားကြောင်း၊ နှစ်ဖက် အဖွဲ့အစည်းများအနေဖြင့် တရုတ်ကို ထိခိုက်နစ်နာအောင် လုပ်နိုင်လိမ့်မည် သို့မဟုတ် လုပ်ရဲလိမ့်မည်ဟု မထင်ကြောင်း၊ လုပ်ရန်လည်း သင့်တော်မည် မဟုတ်ကြောင်း စစ်ရေးအကဲခတ်များက ထောက်ပြကြသည်။

မြန်မာ့တပ်မတော်နှင့် AA ကြား ရခိုင်ပြည်နယ်ရှိ အမ်း၊ မောင်တောနဲ့ တောင်ကုတ်မြို့နယ်များမှာ တိုက်ပွဲများ ပြင်းထန်နေကြသည်။

လက်ရှိတွင် အမ်း၊ မောင်တော၊ ဂွနှင့် တောင်ကုတ် မြို့နယ်များတွင် AA က အင်အားအလုံးအရင်းနှင့် ထိုးစစ်ဆင် နေသလို ကျောက်ဖြူ၊ မာန်အောင်နှင့် စစ်တွေမြို့နယ်များကိုလည်း AA မှ ဝိုင်းရံပိတ်ဆို့ထားကြောင်း သိရသည်။

AA ဘက်ကနေ ချင်းလက်နက်ကိုင် တချို့နှင့် ကျောင်းသားလက်ရုံးတပ်ဖွဲ့(SAF) အပါအဝင် တခြားသော နွေဦး တော်လှန်ရေးမှတဆင့် ပေါ်ပေါက်လာသော လက်နက်ကိုင်များ ပူးပေါင်းတိုက်ခိုက်ပေးလျက်ရှိနေသည်။

CNI News

၂၀၂၄ ခုနှစ်၊ နိုဝင်ဘာ ၅

တရုတ်အစိုးရ၏ ဖိတ်ကြားချက်အရ စီးပွားရေးဆိုင်ရာ အစည်းအဝေးများတက်ရောက်ရန်နှင့် တရုတ်အစိုးရ တာဝန်ရှိသူများဖြင့် တွေ့ဆုံဆွေးနွေးရန်အတွက် နစကဥက္ကဌ ဗိုလ်ချုပ်မှူးကြီးမင်းအောင်လှိုင်သည် နိုဝင်ဘာ ၅ ရက်နေ့ နံနက်ပိုင်းက အပြည်ပြည်ဆိုင်ရာမြန်မာလေကြောင်းလိုင်း(MAI)နှင့် ထွက်ခွာသွားပြီဖြစ်ကြောင်း သိရ သည်။

အဆိုပါ တရုတ်ခရီးစဉ်တွင် နစကဥက္ကဌနှင့်အတူ နစက တွဲဖက်အတွင်းရေးမှူး ဗိုလ်ချုပ်ကြီးရဲဝင်းဦး၊ ကောင်စီဝင် နှင့်အကြံပေး ဗိုလ်ချုပ်ကြီးညိုစော၊ ပြည်ထောင်စုဝန်ကြီးတချို့၊ ရန်ကုန်တိုင်းဒေသကြီး၊ တနင်္သာရီတိုင်းဒေသကြီး၊ ဧရာဝတီတိုင်းဒေသကြီးတို့ မှ ဝန်ကြီးချုပ်များ လိုက်ပါသွားသည်။

ထို့နောက် နိုဝင်ဘာ ၆ ရက်နှင့် ၇ ရက်နေ့များတွင် တရုတ်နိုင်ငံမှာ ကျင်းပမည့် အဌမအကြိမ် မြောက် မဟာမဲခေါင် ဒေသခွဲ ထိပ်သီးအစည်းအဝေး၊ (၁၀)ကြိမ်မြောက် ဧရာဝတီ-ကျောက်ဖရား- မဲခေါင် စီးပွားရေး ပူးပေါင်း ဆောင် ရွက်မှု မဟာဗျူဟာ ထိပ်သီးအစည်းအဝေး၊ (၁၁)ကြိမ်မြောက် ကမ္ဘောဒီယား- လာအို- မြန်မာ- ဗီယက်နမ် ပူးပေါင်း ဆောင်ရွက်မှု ထိပ်သီး အစည်းအဝေးများသို့ တက်ရောက် ဆွေးနွေးမည်ဖြစ်သည်။

ထို့နောက် တရုတ်အစိုးရအဖွဲ့ တာဝန်ရှိသူများနှင့်တွေ့ဆုံ ဆွေးနွေးမှုများ ပြုလုပ်မည်ဖြစ်ကြောင်း နစကသတင်း ထုတ်ပြန်ရေးအဖွဲ့က ထုတ်ပြန်ခဲ့သည်။

နှစ်နိုင်ငံ အစိုးရနှင့် ပြည်သူများအကြား ချစ်ကြည်ရေး၊ စီးပွားရေးနှင့် ကဏ္ဍပေါင်းစုံတွင် ပူးပေါင်းဆောင်ရွက်မှုများ ပိုမိုတိုးတက်ခိုင်မာအောင် ဆွေးနွေးဆောင်ရွက်သွားမည်ဖြစ်ကြောင်း သိရသည်။

လက်ရှိတွင် တရုတ်-မြန်မာ နယ်စပ်ဒေသများဖြစ်သည့် ရှမ်းပြည်နယ်မြောက်ပိုင်းနှင့် ကချင်ပြည်နယ်၌ မြန်မာ့တပ် မတော်နှင့် KIA-MNDAA-TNLA-PDF များကြား တိုက်ပွဲများ အပြင်းအထန်ဖြစ်ပွားနေသည်။

အဆိုပါ တိုက်ပွဲများကြောင့် တရုတ်-မြန်မာ နယ်စပ်ဂိတ်များ ပိတ်ထားရပြီး ကုန်သွယ်ရေးများ ရပ်တန့်နေသည်။

CNI News

၂၀၂၄ ခုနှစ်၊ နိုင်ဝင်ဘာ ၄

မြန်မာနိုင်ငံတွင် ဖြစ်ပွားနေသော နိုင်ငံရေးအကျပ်အတည်းကနေ လက်နက်ကိုင်ပဋိပက္ခ ကြီးထွားလာနေမှုကို ဖြေရှင်းနိုင်ရန်အတွက် နှစ်ဖက်စလုံး အဆင်ပြေနိုင်သော ဆွေးနွေးချက်ကို ရှာဖွေရန် ထောက်ပြကြသလို နှစ်ဖက် စလုံး အဆင်ပြေနိုင်သည့် ဆွေးနွေးချက်က ဘာဖြစ်နိုင်သလဲဟု မေးခွန်းထုတ်သူများလည်းရှိနေကြသည်။

နှစ်ဖက်စလုံး အဆင်ပြေမည့် ဆွေးနွေးချက်ဖြစ်သော တွေ့ဆုံဆွေးနွေးမှုများကို အဆင့်လိုက် လုပ်ဆောင်ရမည် ဖြစ်ကြောင်း NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “တွေ့ဆုံဆွေးနွေးရေးကလည်း ပုံစံအမျိုးမျိုးနဲ့ လုပ်လို့ရပါတယ်၊ အဆင့်လိုက် အဆင့်လိုက်လည်း လုပ်လို့ ရတယ်။ အားလုံးတစ်ခါထဲ ထည့်ပြီးရောသမ မွှေတဲ့ဟာတော့ မရဘူးပေါ့၊ ပြေလည်ရာပြေလည်ကြောင်း၊ နီးစပ်ရာ နီးစပ်ကြောင်းကနေ စလုပ်ရမှာ‌ပေါ့။ အထူးသဖြင့်တော့ EAO တွေ ERO တွေနဲ့စပြောရင် ပိုလွယ်မယ်။ ပြီးတဲ့ခါကျ မှ PDF တွေ၊ NUG တွေကို နောက်ချန်ထားပြီးတော့ ပြောရင်လွယ်မယ်။ ဒါမှမဟုတ်လည်း ကိုယ်စားလှယ် ထားပြီး တော့ ပြောပေါ့ဗျာ၊ ကုလသမဂ္ဂ ကြားထားမလား၊ တရုတ်ကို ကြားထားမလား၊ ကျနော်တို့ ထိုင်းကိုပဲ ကြားထား မလား၊ အာဆီယံကို ကြားထားမလား၊ အဲဒီလို ကြားလူကြီးတွေနဲ့ ပြောတယ်ဆိုရင်လည်း ပြေလည်နိုင်ပါတယ်။ အဲဒါတွေမရှိဘဲနဲ့ အဲဒီအဆင့်တွေ မဖြတ်ဘဲနဲ့ နောက်နှစ်မှာလုပ်မဲ့ ရွေးကောက်ပွဲ ဆိုတာကြီးကလည်း ဖြစ်ပေါ်လာ ဖို့ တော်တော်ခက်ပါတယ်”ဟု ပြောသည်။

ထိုအဆင့်များအား ဖြတ်ကျော်ပြီးမှသာ လာမည့် ‌‌‌ရွေးကောက်ပွဲတွင် ကတိကဝတ်များ၊ နိုင်ငံရေးဆုံချက်၊ သဘော တူညီချက်များရရှိပြီး တိုင်းပြည်တစ်ခုလုံး၏ နိုင်ငံရေးထွက်ပေါက်အဖြစ် ရွေးကောက်ပွဲအား ဝန်းရံကြရမည်ဖြစ် ကြောင်း စစ်ရေးနှင့်နိုင်ငံရေး အကဲခတ်များက ထောက်ပြကြသည်။

မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ် မစ္စဂျူလီဘစ်ရှော့သည် နစကဥက္ကဌ ဗိုလ်ချုပ်မှူးကြီး မင်းအောင်လှိုင်နှင့် နေပြည်တော်တွင် တွေ့ဆုံခဲ့ပြီး မြန်မာ့အရေး ဆွေးနွေးခဲ့ကြောင်း ကုလသမဂ္ဂ အထွေထွေ ညီလာခံမှာ ၂၀၂၄ ခုနှစ်၊ အောက်တိုဘာ ၂၉ ရက်နေ့က ပြောကြားခဲ့သည်။ 

ရွေးကောက်ပွဲကော်မရှင်နဲ့နိုင်ငံရေးပါတီများတွေ့ဆုံစဉ်

ထို့နောက် အိမ်နီးချင်းနိုင်ငံများနှင့် အာဆီယံအား ၎င်းတို့၏ သြဇာလွှမ်းမိုးမှုကို အသုံးချပြီး အာဆီယံ၏ ဘုံသဘော တူညီချက် ၅ ချက်ကို အကောင်အထည်ဖော်ရန်၊ မြန်မာနိုင်ငံက ဦးဆောင်ပြီး ပဋိပက္ခကို အဖြေရှာရန် ဘစ်ရှော့က ကုလသမဂ္ဂညီလာခံမှာ တိုက်တွန်းခဲ့သည်။

ထို့ပြင် မြန်မာ့အရေး သက်ဆိုင်ရာ ပါဝင်ပတ်သက်သူများသည် ''တစ်ဖက်တည်းက အပြတ်အသတ်နိုင်ရမယ်'' ဆိုသော အခင်းအကျင်းအား ကျော်လွန်စဥ်းစားရမည်ဟု မြန်မာနိုင်ငံဆိုင်ရာ ကုလအထူးကိုယ်စားလှယ် ဘစ်ရှော့ က ချပြခဲ့သည်။

ယေဘုယျအားဖြင့် နှစ်ဖက်စလုံး အဆင်ပြေနိုင်မည့် လမ်းကြောင်းသည် ဒီမိုကရေစီ လမ်းကြောင်းအရ ရွေးကောက်ပွဲ နည်းလမ်းရှိသော်လည်း လက်နက်ကိုင်နေသာ အဖွဲ့အစည်းများအားလုံးသည် ‌ရွေးကောက်ပွဲ နည်းလမ်းဝင်ရန် ဆန္ဒရှိရန်လိုအပ်ကြောင်း သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “ယေဘယျသဘော စဥ်းစာမယ်ဆိုရင်တော့ နှစ်ဖက်လုံး အဆင်ပြေမယ့် နည်းလမ်းသည် မြန်မာနိုင်ငံရဲ့ လက်ရှိသွားနေတဲ့ လမ်းကြောင်းအရ ဒီမိုကရေစီလမ်းကြောင်း သွားမယ်ဆိုရင် ရွေးကောက်ပွဲထဲသွားဖို့ရှိတယ်၊ ဒါက ကျနော်တို့ ယေဘုယျ တွက်ရမယ့်လမ်းကြောင်း။ ကုလသမဂ္ဂကတော့ သူက သံတမန်ရေးရာစကား ပြောတာ ပေါ့၊ တစ်ဖက်ကနိုင်လို့မရဘူး၊ တစ်ဖက်က ဆုံးရှုံးလို့မရဘူး။ ဒါပေမယ့် လက်ရှိအခြေအနေမှာ အဲဒီလမ်းကြောင်း ကိုသွားဖို့ ခုနပြောတဲ့ ရွေးကောက်ပွဲ လမ်းကြောင်းကိုသွားဖို့ အခု လက်နက်ကိုင်နေတဲ့ အဖွဲ့အစည်းတွေ အကုန် လုံးက ဆန္ဒရှိရမယ်ဆိုတာ အရေးကြီးတဲ့ အချက်ဖြစ်တယ်။ ဒီမိုကရေစီလမ်းကြောင်း သွားမယ်ဆိုရင် ရွေးကောက်ပွဲဝင် အဲဒီမှာ ဝင်အရွေးခံပြီး‌တော့ ကိုယ့်ရဲ့တိုင်းဒေသထဲမှာအုပ်ချုပ် ခုနပြောသလိုပေါ့ အခြေခံဥပဒေ ထဲမှာပါတဲ့ နယ်မြေဒေသ၊ သယံဇာတ၊ ဖွံ့ဖြိုးမှု ဘာညာတွေ ဒါတွေက လွှတ်တော်ထဲဝင်မှ အလုပ်လုပ်လို့ရမယ့် ကိစ္စ။ အဲဒီနည်းလမ်း မသုံးဘဲနဲ့ လက်နက်ကိုင်ဆိုတဲ့ နည်းလမ်းသွားသုံးရင်တော့ လွယ်လွယ်ကူကူ သက်သက် သာသာနဲ့ သွေးမထွက်ဘဲနဲ့ အထိခိုက်အရှနာ မရှိဘဲနဲ့ ဖြေရှင်းရမဲ့ နည်းလမ်းက ဘယ်လိုမှ ပေါ်ပေါက်လာစရာ အကြောင်းမရှိဘူး”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ ဘစ်ရှော့ကိုတွေ့ရစဉ်

တွေ့ဆုံဆွေးနွေးရန် ဖိတ်ခေါ်ကမ်းလှမ်းမှုများအား လက်ခံတက်ရောက်ခြင်းမရှိဘဲ လက်နက်ကိုင် လမ်းစဥ်ဖြင့်သာ ဆက်သွားနေပါက ရွေးကောက်ပွဲလမ်းကြောင်း၊ နှစ်ဖက် အဆင်ပြေနိုင်စေသော လမ်းကြောင်းများ ပေါ်ပေါက်လာ ရန် ဖြစ်နိုင်ခြေ မရှိသလောက် ဖြစ်သွားနိုင်ကြောင်း နိုင်ငံရေးအကဲခတ်များက ပြောသည်။

လာမည့်နှစ်(၂၀၂၅ ခုနှစ်)အတွင်း လွတ်လပ်၍ တရားမျှတသည့် ပါတီစုံဒီမိုကရေစီ အထွေထွေရွေးကောက်ပွဲ ကျင်းပနိုင်ရေး ကြိုတင်ပြင်ဆင် ဆောင်ရွက်လျက်ရှိကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားထားသည်။ 

လက်ရှိတွင် နိုင်ငံတစ်ဝှမ်း လက်နက်ကိုင် ပဋိပက္ခများ ဖြစ်ပွားနေသလို နယ်မြေ မတည်ငြိမ်ခြင်းနှင့် တရားဥပဒေ စိုးမိုးမှု အားနည်းနေခြင်းကြောင့် လက်တွေ့မှာ ဖြစ်နိုင်ခြေ အလွန်နည်းသည်ဟုလည်း ထောက်ပြမှုများ ရှိနေ သည်။

ထို့ကြောင့် နစကသည် ရွေးကောက်ပွဲ ကျင်းပနိုင်ရေးအတွက် လက်နက်ကိုင်ပဋိပက္ခများ ချုပ်ငြိမ်းရေး ကြိုးပမ်း ရန်လိုအပ်သလို နယ်မြေတည်ငြိမ်ရေးနှင့် တရားဥပဒေစိုးမိုးရေး ရရှိအောင်လည်း အကောင်အထည်ဖော်ရန် လိုအပ်သည်ဟု နိုင်ငံရေးပါတီများက ပြောသည်။