CNI News
၂၀၂၅ ခုနှစ်၊ ဇွန်လ ၁၆
မြန်မာနိုင်ငံတွင် နစက ကျင်းပမည့် ရွေးကောက်ပွဲအပေါ် ပြည်တွင်းနိုင်ငံရေးသမားများနှင့် ပြည်ပနိုင်ငံများကြား ရှုမြင်ပုံ မတူညီဘဲ သဘောထားကွဲလွဲနေကြသည်ကို တွေ့ရသည်။
နိုင်ငံ့ခေါင်းဆောင်များနှင့် နိုင်ငံရေးသမားများအား ဖမ်းဆီးထားပြီး နစကမှ ရွေးကောက်ပွဲကျင်းပရန် ပြင်ဆင် နေခြင်းသည် တိုင်းပြည်မတည်ငြိမ်မှုကို ဦးတည်နေသည်ဟု မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ် မစ္စဂျူလီဘီစ်ရှော့က ၂၀၂၅ ခုနှစ်၊ ဇွန်လ ၉ ရက်တွင် ကျင်းပသည့် ကုလသမဂ္ဂ အထွေထွေညီလာခံ၏ အလွတ် သဘော ဆွေးနွေးပွဲ၌ ပြောကြားခဲ့သည်။
မြန်မာ့နိုင်ငံရေး၏ လက်ရှိအနေအထားသည် ၂၀၂၀ ရွေးကောက်ပွဲ မဲမသမာမှုဆိုသည့်ကိစ္စကြောင့် ပေါ်ပေါက် လာခြင်းဖြစ်ပြီး လူထုသည် အဓိက ဆုံးဖြတ်ပေးရမည့် တာဝန်နေရာ၌ ရှိနေသည်ဟု ရခိုင့်ဦးဆောင်ပါတီ (AFP)မှ ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။
AFP ပါတီသည် ၂၀၂၅ ခုနှစ်၊ ဒီဇင်ဘာလနှင့် ၂၀၂၆ ခုနှစ်၊ ဇန်နဝါရီလတွင် နစက ကျင်းပမည့် ရွေးကောက်ပွဲတွင် ဝင်ရောက်ယှဉ်ပြိုင်ရန် နိုင်ငံရေးပါတီ မှတ်ပုံတင်ထားသည်။
ရွေးကောက်ပွဲ မဲရလဒ်ကို ရေတွက်နေစဉ်
ဒေါက်တာအေးမောင်က “ အများအားဖြင့် ဖက်ဒရယ်ဒီမိုကရေစီကို ကိုင်စွဲတဲ့ နိုင်ငံတော်တော်များများကတော့ NLD ရဲ့ လွှမ်းမိုးခံ ဖြစ်သွားတာပေါ့၊ အာဆီယံလည်း ဒီလိုဘဲ နှစ်ဖွဲ့ကွဲနေတဲ့ပုံပေါက်တယ်။ အာဆီယံဒေသမှာလေ လစ်ဘရယ်ဘက်က သြဇာရှိတဲ့အခြမ်း၊ နောက်ဒီဘက်က ကုန်းမြေဆက်စပ်တဲ့အခြမ်း အခု ဒါအကြမ်းဖျင်း သုံးသပ် လို့ ဒီလိုပဲ ရမယ်ထင်တယ်။ မြန်မာနိုင်ငံရဲ့ အိမ်နီးချင်းနိုင်ငံတွေရဲ့ မြန်မာနိုင်ငံအပေါ် စိုးရိမ်စိတ်က အရေးကြီးပါ တယ် နောက်ကုလသမဂ္ဂ ဆိုတာလည်း လက်ဝေခံသက်သက်ပဲ အဲတော့ မြန်မာ့နိုင်ငံရေးရဲ့ လက်ရှိအနေအထား အကျဥ်းအကျပ်က ၂၀၂၀ ရွေးကောက်ပွဲ မဲမသမာမှုဆိုတဲ့ဥစ္စာကြောင့် ပေါ်ပေါက်လာတာလို့ အခြေခံဥပဒေကို အခြေပြုပြီးမှ အာဏာရယူခဲ့တဲ့ နစက,က ဒီတိုင်းပဲ ရပ်တည်တာ။ အဲတာကြောင့် မငြိမ်မသက်မှုတွေ ဖြစ်တယ် ကိုယ်ဘက်စွဲ၊ သူ့ဘက်စွဲ နောက်ဆုံး လူထုသည် အနီးကပ်ခံရတာပေါ့။ ဆိုတော့ လူထုသည် အဓိက ဆုံးဖြတ်ပေး ရမယ့် နေရာမှာရှိတာပေါ့”ဟု ပြောသည်။
ထို့ပြင် လူထု၏ အခြေအနေကို ပြန်လည် လေ့လာကြည့်ပါက မြန်မာ့နိုင်ငံရေးကို မြန်မြန် ထွက်ပေါက်ရှိလာစေ ချင်သည့် ဆန္ဒရှိနေကြကြောင်း ၎င်းက ပြောသည်။
ဒေါက်တာအေးမောင်က “ လူထုရဲ့ အနေအထားကို ပြန်ကြည့်တဲ့အခါမှာ ကမ္ဘာတစ်ခုလုံးမှာ ဖြစ်နေတဲ့ ပဋိပက္ခ တွေ၊ ကျနော်တို့ နိုင်ငံရဲ့ ပြည်တွင်းပဋိပက္ခတွေ ဆိုးကြိုးတွေပေါ့ဗျာ။ အဲတော့ ပြန်ကြည့်ရင် ထွက်ပေါက်ရှာကြတာပေါ့။ မြန်မာ့နိုင်ငံရေးနဲ့ ပတ်သက်လို့ လက်ရှိ အကျဥ်းအကျပ်ကို ဘယ်လိုကျော်ဖြတ်မှာလဲဆိုတဲ့ အယူအဆလေးတွေ ဟိုဘက်ဒီဘက် သွားဆွဲကြတာပေါ့။ ဥပမာ စစ်ဘေးကြောင့်ဖြစ်ဖြစ်၊ တခြားနော် ငလျင်ဘေးကြောင့် ဖြစ်ဖြစ်နော် အကျပ်အတည်းတွေ စီးပွားရေး၊ လူမှုရေး၊ ဒုက္ခတွေ၊ နောက်ဆက်တွဲ ပါလာတဲ့ ပိတ်ဆို့မှုတွေ၊ ပြည်တွင်းပဋိပက္ခ တွေ ဒီလို ဒုက္ခအားလုံးရဲ့ဒဏ် ခံရတဲ့အခါကြတော့ လူထုဘက်ကို ပြန်အာရုံစူးစိုက်ပြီး မေးမြန်းရမှာပေါ့။ လူထု သည် လက်ရှိအကျပ်အတည်းကို ရုန်းထွက်လိုစိတ် ရှိ/မရှိ တည်ငြိမ်အေးချမ်းပြီးမှ ဖွံဖြိုးတိုးတက်တဲ့ နိုင်ငံအဖြစ် ရယူချင်စိတ် ရှိ/မရှိ ပြည်တွင်းစစ်ရဲ့ ဒဏ်ရာဒဏ်ချက်လက်ခံသလား လက်မခံဘူးလား။ ဒါလည်း ကျနော်တို့ မသိနိုင်ဘူး ဝါဒဖြန့်တဲ့ အင်အားစုတွေကြား ရောက်နေတာပေါ့။ ဘယ်လိုပဲဖြစ်ဖြစ် ကမ္ဘာ့အကျပ်အတည်း မြန်မာ အကျပ်အတည်း ဒီတစ်ခုရဲ့ ထွက်ဖို့ ထွက်လမ်းဆိုတာကို လူထုသည် စဥ်းစားနေလောက်ပြီထင်တယ်”ဟု CNI သတင်းဌာနသို့ ပြောသည်။
ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်
ပြည်ပနိုင်ငံများနှင့် ပြည်ပရောက် နိုင်ငံရေး အင်အားစုများကတော့ နစက ကျင်းပမည့် ရွေးကောက်ပွဲသည် နစက၏ နိုင်ငံရေးထွက်ပေါက်သာ ဖြစ်ကြောင်း ယူဆလျက်ရှိသည်။
မြန်မာနိုင်ငံဆိုင်ရာ အာဆီယံအထူးကိုယ်စားလှယ်ကလည်း နစက ကျင်းပမည့် ရွေးကောက်ပွဲသည် နိုင်ငံရေး ဟန်ပြတစ်ခုသာဖြစ်ပြီး ရွေးကောက်ပွဲအစား အကြမ်းဖက်မှုများ ရပ်စဲရေးနှင့် ငြိမ်းချမ်းရေး ဆွေးနွေးမှုများကိုသာ ဦးစားပေး လုပ်ဆောင်သင့်သည်ဟု ပြောကြားထားသည်။
ကရင်ပြည်သူ့ပါတီ(KPP)ဥက္ကဋ္ဌ ဒေါ်နန့်ခင်အေးဦးကတော့ နစက ကျင်းပမည့် ရွေးကောက်ပွဲသည် နစက၏ ထွက်ပေါက်မဟုတ်ဘဲ ပြည်သူလူထုအတွက် ထွက်ပေါက်ဖြစ်သည်ဟု CNI သတင်းဌာနသို့ ပြောသည်။
နစကသည် ၂၀၂၅ ခုနှစ်၊ ဒီဇင်ဘာလတွင်နှင့် ၂၀၂၆ ခုနှစ်၊ ဇန်နဝါရီလများတွင် ရွေးကောက်ပွဲ ကျင်းပမည်ဖြစ် ကြောင်း၊ ရွေးကောက်ပွဲကို မြို့နယ်ပေါင်း ၃၃၀ အနက် ၂၆၇ မြို့နယ်မှာ ကျင်းပမည်ဖြစ်ကြောင်း၊ ရွေးကောက်ပွဲ အနိုင်ရသည့် နိုင်ငံရေးပါတီအား နိုင်ငံတော်အာဏာလွှဲပြောင်းပေးမည်ဖြစ်ကြောင်း ပြောကြားထားသည်။
သို့သော် နစက ကျင်းပမည့် ရွေးကောက်ပွဲတွင် ပြည်သူလူထုက မဲမထည့်ဘဲ No Vote ဖြစ်မည်ကို နိုင်ငံရေးပါတီ များက စိတ်ပူလျက်ရှိနေသည်။
တခြားတစ်ဖက်မှာလည်း လက်နက်ကိုင်အဖွဲ့တချို့နှင့် အမျိုးသားညီညွတ်ရေးအစိုးရ(NUG)က နစက ကျင်းပမည့် ရွေးကောက်ပွဲကို မပျက်ပျက်အောင် ဖျက်မည်ဟု ကြေညာထားသည်။
