CNI News

၂၀၂၄ ခုနှစ်၊ ဇန်နဝါရီ ၂၄

ရှမ်းပြည်နယ်မြောက်ပိုင်း၊ နမ့်ခမ်းမြို့နယ်အတွင်းမှာ ရှမ်းပြည်တိုးတက်ရေးပါတီ (SSPP/SSA) နှင့် ပလောင်ပြည် လွတ်မြောက်ရေးတပ်ဦး (PSLF/TNLA) တို့ကြား အုပ်ချုပ်ရေးအားပြိုင်မှုများ ဖြစ်ပေါ်လာနေသည်။

၂၀၂၄ ခုနှစ်၊ ဇန်နဝါရီလ အစောပိုင်းက နမ့်ခမ်းမြို့နယ်အတွင်းရှိ ရပ်ကွက်နှင့် ကျေးရွာအချို့ကို SSPP မှ အုပ်ချုပ်ရေးမှူးများအား အစည်းအဝေးခေါ်ယူကာ တပ်သားသစ်စုဆောင်းပေးရန် ပြောကြားခဲ့သည်။

ထို့နောက် SSPP အနေဖြင့် နမ့်ခမ်းမြို့နယ်အတွင်း တပ်သားသစ် စုဆောင်းခြင်း၊ စစ်ရေး၊ အုပ်ချုပ်ရေး ယန္တရား တည်ဆောက်ခြင်း၊ ငွေကြေးကောက်ခံခြင်းများ မပြုလုပ်ရန် TNLA က  ၂၀၂၄ ခုနှစ်၊ ဇန်နဝါရီ ၂၁ ရက်မှာ စာပို့ အသိပေးခဲ့သည်။

မဟာမိတ်အချင်းချင်းကြား ပြေပြေလည်လည်ဖြင့် ညှိနှိုင်းတိုင်ပင်မှုများ လုပ်ဆောင်ပါက အဆင်ပြေလိမ့်မည်ဟု  တအာင်းအမျိုးသမီးအဖွဲ့အစည်း (TWO) မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။

SSPP ထံ TNLA က ပေးတဲ့စာကိုတွေ့ရစဉ်

၎င်းက “ကျမတို့လည်း ဒီကိစ္စနဲ့ ပတ်သက်ပြီးမှ ဒီတလောမှာ နည်းနည်းလေး ကြားနေရတဲ့ အနေအထား ဖြစ်တာ ပေါ့နော်၊ ကျမတို့ ထင်တာက ဒီလိုမျိုး ကိစ္စမှာက အချင်းချင်း နဂိုကတည်းကလည်း ဒီအဖွဲ့တွေ ဆိုတာက မြောက်ပိုင်းမဟာမိတ်တွေ ဖြစ်ကြတဲ့ အခါကြတော့ အချင်းချင်းကြားမှာ ညှိနှိုင်းတာမျိုး တိုင်ပင်တာမျိုးတွေ ဘယ်လိုပုံစံ ဖြစ်သင့်သလဲဆိုတဲ့ဟာတွေကို ပြေပြေလည်လည်နဲ့ တိုင်ပင်မှုတွေ ညှိနှိုင်းမှုတွေ လုပ်ရင်တော့ ပိုပြီးမှ အဆင်ပြေမယ်လို့ မြင်တယ်” ဟု ပြောသည်။

၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ညီနောင်မဟာမိတ်သုံးဖွဲ့၏ ၁၀၂၇ စစ်ဆင်ရေးအတွင်း နမ့်ခမ်းမြို့ကို TNLA က ဒီဇင်ဘာ ၁၉ ရက်နေ့မှာ သိမ်းပိုက်ခဲ့သည်။

ထို့နောက် ယခုနှစ် ဇန်နဝါရီလ အစောပိုင်းက TNLA က နမ့်ခမ်းမြို့နယ်အတွင်းက ကျေးရွာအုပ်ချုပ်ရေးမှူးများကို ခေါ်ယူပြီး သန်းခေါင်စာရင်း ကောက်ယူရန်နှင့် မြို့တွင်းရှိ စီးပွားရေးလုပ်ငန်းရှင်များကို အစည်းအဝေးခေါ်ယူကာ အခွန်ကိစ္စများကို ဆွေးနွေးခဲ့ကြကြောင်း သိရသည်။

တော်လှန်ရေး အင်အားစုများအနေဖြင့် ၎င်းတို့ သိမ်းယူထားသော မြို့များမှ နောက်ဆုတ်ပေးမှာ မဟုတ်ကြောင်း၊ သို့သော်လည်း နယ်မြေအငြင်းပွားမှုများ အများစုဖြစ်ပွားလာနိုင်ကြောင်း စည်းလုံးညီညွတ်သော တိုင်းရင်းသား လူမျိုးများ မဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

 နမ့်ခမ်းမြို့နယ် တရားရုံးရှေ့မှာ TNLA တပ်ဖွဲ့တွေကို တွေ့ရစဉ်

၎င်းက “အခုကတော့ တော်လှန်ရေး ဘောင်ကျယ်သွားတယ်ပေါ့ဗျာ၊ နမ့်ခမ်းဆိုတာတော့ မူလကတည်းက ဒီနေရာ ကနေပြီးတော့ ကျနော်ထင်တယ်၊ ကျနော်တို့ နယ်မြေမဟုတ်ပေမယ့် ရှမ်းတွေကတော့ အများစုရှိလိမ့်မယ်၊ ဒါပေမယ့် လောလောဆယ်ကတော့ တော်လှန်ရေးအင်အားစုဖြစ်တဲ့ မြောက်ပိုင်းမဟာမိတ် အဖွဲ့ဝင်ဖြစ်တဲ့ တအာန်းတို့က အဲဒီနယ်မြေကို သိမ်းပိုက်ရရှိတယ်ပေါ့နော်၊ သူတို့ သိမ်းပိုက်လိုက်လို့လည်း စစ်ကောင်စီဟာ နောက်ဆုတ်သွားတယ်ပေါ့ဗျာ၊ အဲဒီတော့ လောလောဆယ်မှာတော့ သူတို့ သိမ်းထားတဲ့ နယ်မြေကိုတော့ တအာန်းအနေနဲ့လည်း ဆုတ်ပေးမှာမဟုတ်ဘူး။ အဲဒီတော့ ဒေသခံဖြစ်တဲ့ ရှမ်းတွေနဲ့ ဘာပဲဖြစ်ဖြစ် ပွတ်တိုက်မှု တွေတော့ ရှိလိမ့်မယ်ပေါ့လေ၊ တနည်းအားဖြင့် ပြောရရင် သူပိုင်တယ်၊ ငါပိုင်တယ်ဆိုတာမျိုး အငြင်းပွားမှုတွေ ကတော့ တော်တော်များများ နမ့်ခမ်းရယ်မဟုတ်ဘူး တခြားနေရာတွေမှာလည်း ဆက်ပြီး ဖြစ်လာနိုင်တဲ့ အနေ အထားရှိတယ်” ဟု ပြောသည်။
အဆိုပါ ကိစ္စများအား သက်ဆိုင်ရာ အဖွဲ့အစည်းများ အနေဖြင့် လက်နက်ဖြင့် ဖြေရှင်းခြင်း မဟုတ်ဘဲ တွေ့ဆုံ ညှိနှိုင်း အဖြေရှာသင့်ကြောင်း ၎င်းက ပြောသည်။

နမ့်ခမ်းမြို့နယ်တွင် ရှမ်းလူမျိုးများ အဓိကနေထိုင်ကြပြီး မြန်မာပြည်ဖွား တရုတ်များ၊ အစိုးရဝန်ထမ်းများ၊ ပြည်မမှ လာရောက် အခြေချနေထိုင်သော ဗမာများ နေထိုင်ကြသလို ပတ်ဝန်းကျင်ရွာများနှင့် တောင်ပေါ်ဒေသများတွင် ကချင်လူမျိုးများနှင့် ပလောင်လူမျိုးများ နေထိုင်ကြသည်။

လက်ရှိတွင် နမ့်ခမ်းမြို့နယ်အတွင်း SSPP က တပ်အင်အားတိုးချလျက်ရှိနေသလို မြို့တွင်းမှာလည်း သွားလာလှုပ် ရှားမှုများ ရှိနေကြောင်း TNLA ကလည်း မြန်မာ့တပ်မတော်ထံကနေ တိုက်ခိုက်ထိန်းချုပ်နိုင်ခဲ့၍ အုပ်ချုပ်ရေး ထူထောင်ရန် ပြင်ဆင်လျက်ရှိနေသည်။

CNI News
၂၀၂၄ ခုနှစ်၊ ဇန်နဝါရီ ၂၃ 

မြန်မာနိုင်ငံ၊ ရှမ်းပြည်နယ်အထူးဒေသ(၁) နယ်မြေအတွင်း အိမ်ခြံမြေ ရောင်း/ဝယ်ခြင်းများ ရပ်တန့်ထားရန်နှင့် ကိုးကန့်ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့မှ ထုတ်ပေးထားသော လက်နက်ခဲယမ်းများ ပြန်လည်အပ်နှံရန် မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)က သတင်းထုတ်ပြန်ခဲ့သည်။

အဆိုပါ ထုတ်ပြန်ချက်ကို မြန်မာနိုင်ငံ၊ ရှမ်းပြည်နယ်အထူးဒေသ(၁)၊ စစ်ရေးအုပ်ချုပ်မှုကော်မတီဟု ညွှန်းဆို ထားသည်။

ထိုကော်မတီက (၁) မြေယာ၊ အိမ်ရောင်းဝယ်ခြင်းနှင့် ငှားရမ်းခြင်းဆိုင်ရာ ယာယီစီမံခန့်ခွဲမှု စည်းကမ်းများ သတ်မှတ်ခြင်း အသိပေးညွှန်ကြားစာ၊ (၂) လက်နက်ခဲယမ်းထိန်းသိမ်းရေး စည်းကမ်းသတ်မှတ်ခြင်း အသိပေး ညွှန်ကြားစာ တို့ကို ထုတ်ပြန်ခဲ့ခြင်း ဖြစ်သည်။

MNDAA သည် တအာင်းအမျိုးသားလွတ်မြောက်ရေးတပ်မတော်(TNLA)၊ ရက္ခိုင့်တပ်တော်(AA)၊ ဗမာပြည်သူ့ လွတ်မြောက်ရေးတပ်တော်(BPLA)၊ ပြည်သူ့လွတ်မြောက်ရေးတပ်မတော်(PLA)၊ ဗမာအမျိုးသားတော်လှန်ရေး တပ်မတော်(BNRA)၊ ကရင်နီအမျိုးသားကာကွယ်ရေးတပ်မတော်(KNDF)တို့နှင့် ပူးပေါင်း၍ ၂၀၂၃ ခုနှစ်၊ အောက်တိုဘာ ၂၇ ရက်နေ့က ၁၀၂၇ စစ်ဆင်ရေးကို ဖော်ဆောင်ခဲ့သည်။

အဆိုပါ ၁၀၂၇ စစ်ဆင်ရေးသည် ရှမ်းပြည်နယ်မြောက်ပိုင်းရှိ မြို့များထိန်းချုပ်ရေးနှင့် မြန်မာ့တပ်မတော် စစ်စခန်းများ သိမ်းပိုက်ရေးဖြစ်သည်။

ထို့နောက် ၁၀၂၇ စစ်ဆင်ရေး စတင်ခဲ့သည့် အချိန်မှ ယနေ့ ၂၀၂၄ ခုနှစ်၊ ဇန်နဝါရီ ၂၃ ရက်နေ့အထိ မဟာမိတ် အဖွဲ့များသည် ရှမ်းပြည်နယ်မြောက်ပိုင်းအတွင်းက လောက်ကိုင်၊ ကုန်းကြမ်း၊ ချင်းရွှေဟော်၊ ကွမ်လုံ၊ ဖောင်းဆိုင် ၊ သိန္နီ၊ သီပေါ၊ နမ့်ခမ်း၊ နမ့်ဆန်၊ မန်တုံ၊ ကွတ်ခိုင်၊ နမ္မတူ၊ မိုင်းငေါ့ စသည့် မြို့နယ်များကို ထိန်းချုပ်ထားသလို မြန်မာ့တပ်မတော်၏ စစ်စခန်းပေါင်း ရာချီကိုလည်း သိမ်းပိုက်ထားသည်။

CNI News

၂၀၂၄ ခုနှစ်၊ ဇန်နဝါရီ ၂၃

မြန်မာနိုင်ငံအတွင်း လက်ရှိ ဖြစ်ပွားနေသော တိုက်ပွဲများတွင် မြန်မာ့တပ်မတော်သည် စစ်စခန်းများ ဆုံးရှုံးနေရ သလို နယ်မြေများလည်း လက်လွှတ်နေရခြင်းကြောင့် မည်ကဲ့သို့ စစ်ရေးအပြောင်းအလဲများ လုပ်လာနိုင်သလဲ ဆိုသည့်အပေါ် စစ်ရေးနှင့်နိုင်ငံရေး အကဲခတ်များကြား သုံးသပ်နေကြသည်။

၂၀၂၃ ခုနှစ်၊ အောက်တိုဘာ ၂၇ ရက်က စတင်သည့် ညီနောင်မဟာမိတ်သုံးဖွဲ့ (AA-TNLA-MNDAA) တို့ ဆင်နွှဲခဲ့ သော ၁၀၂၇ စစ်ဆင်ရေးအတွင်း ရှမ်းမြောက်ရှိ မြို့နယ်အများစုကို တပ်မတော်ဘက်က လက်လွှတ်ခဲ့ရသလို ရခိုင်ပြည်နယ်နှင့် မန္တလေးတိုင်းဒေသကြီးအတွင်းက မြို့နယ်တချို့လည်း လက်လွတ်ခဲ့ရသည်။

တိုင်းပြည်ကမောက်ကမ ဖြစ်နေပါက ပြန်လည်ထူထောင်ရေး လုပ်ဆောင်၍ မရကြောင်း၊ စီးပွားရေးလည်း ကောင်းလာမှာ မဟုတ်ကြောင်း နိုင်ငံရေးလေ့လာသုံးသပ်သူ ဦးသက်ဇော်က CNI သတင်းဌာနသို့ ပြောသည်။

၎င်းက “ရှင်းရှင်းပြောရရင်တော့ဗျာ၊ ကျနော်တို့က အင်အားရော တကယ်ရော တပ်မှာ ရှိသေးရဲ့လားလို့ ကျနော်တို့ က သုံးသပ်တယ်ဗျ၊ ဘာလို့လဲဆိုတော့ နောက်ကလည်း စစ်ကူလည်း မလိုက်နိုင်၊ ရှေ့လူတွေနဲ့တိုက် မရရင် ပြန် ဆုတ်ဆိုတဲ့ဟာကြီးကြတော့ အဲဒီအချိုးအတိုင်းဖြစ်နေတော့ ရှင်းရှင်းပြောရရင်‌တော့ တိုင်းပြည်ကာကွယ်ရေး အတွက်တောင် ကျနော်တို့က စိတ်ပူလာတယ်ဗျ။ ပြန်ပြီးတော့ ခုခံကာကွယ်နိုင်တာ ချောင်းနှစ်ခွစခန်းတစ်ခုပဲရှိ တယ်။ ကျန်တာတွေ အကုန်လုံးက ဆုတ်နေရတာကြီးပဲ မြင်နေရတယ်ဗျ၊ ဘာကြောင့် အဲဒီလောက်အထိ တပ်မတော်နဲ့ တိုက်ရေးခိုက်ရေးက စွမ်းရည်တွေက ကျဆင်းပြီးတော့ ဘယ်လိုဖြစ်သလဲဆိုတာ ကျနော်လည်း သုံးသပ်လို့တော့ မရဘူးဗျ၊ ရှင်းရှင်းပြောရရင်တော့ တိုင်းပြည်က ကမောက်ကမဖြစ်နေရင်တော့ ဘယ်တော့မှ ထူထောင်နိုင်မှာလည်း မဟုတ်ဘူး။ စီးပွားရေးလည်း ကောင်းလာနိုင်မှာလည်း မဟုတ်ဘူး။ တိုင်းပြည်က နစ်သထက် နစ်သွားမယ်ပဲလို့ ကျနော်မြင်ပါတယ်ဗျ” ဟု ပြောသည်။

 မြန်မာ့တပ်မတော် စစ်စခန်းတစ်ခုကို AA ထိန်းချုပ်လိုက်စဉ်

လာမည့် ဇန်နဝါရီ ၃၁ ရက်မှာ နစကအနေဖြင့် အပြောင်းအလဲ ပြုလုပ်လာနိုင်ကြောင်း၊ ထို့နောက် မြန်မာ့ တပ်မတော် အနေဖြင့် နယ်မြေတည်ငြိမ်ရေးများ လုပ်ဆောင်လာနိုင်ကြောင်း နိုင်ငံရေးသမားတစ်ဦးက သုံးသပ် သည်။

လက်ရှိတွင် ချင်းပြည်နယ်၊ ရခိုင်ပြည်နယ်၊ ကယား (ကရင်နီ) ပြည်နယ်အတွင်းရှိ မြန်မာ့တပ်မတော်၏ စစ်စခန်း အချို့ နောက်ဆုတ်ရမှုများ ရှိနေသလို မြို့အချို့အား တော်လှန်ရေးအင်အားစုများဘက်မှ သိမ်းယူမှုများ ရှိနေ သည်။

မြန်မာ့တပ်မတော်အနေဖြင့် စားနပ်ရိက္ခာ၊ ဆေးဝါး၊ ခရီးသွားလာမှုများကို ကန့်သတ်လာနိုင်ကြောင်း ကရင် ငြိမ်းချမ်းရေး အထောက်အကူပြုကွန်ယက် (KPSN) မှ စောလေးကပေါက CNI သတင်းဌာနသို့ ပြောသည်။

၎င်းက “လောလောဆယ် အနေအထားမှာ ကျနော်တို့ တွေ့နေရတာတော့ ရွာတွေကို ခြိမ်းခြောက်တာတို့ နောက်တစ်ခု လက်နက်ကြီး၊ လေယာဉ်တို့နဲ့ ပစ်ခတ်တာတို့ စားနပ်ရိက္ခာပိုင်းဆိုင်ရာ၊ ဆေးဝါးပိုင်းဆိုင်ရာ ဖြတ်တောက်တာတို့ သွားလာရေးတွေ ဖြတ်တောက်တာတို့ လတ်တလောမှာ စစ်ကောင်စီ လုပ်နေကြ အလုပ်တွေလို့ ကျနော်တို့ တွေ့နေရပါတယ်ခင်ဗျ” ဟု ပြောသည်။

နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

လတ်တလော အနေအထားတွင် နစကအနေဖြင့် စစ်ရေး၊ နိုင်ငံရေး အကျပ်အတည်းများ ကြုံတွေ့နေရပြီး လာမည့် ဇန်နဝါရီ ၃၁ ရက်နေ့တွင် မည်ကဲ့သို့သော အပြောင်းအလဲ လုပ်ဆောင်လာမလဲ ဆိုသည့်အပေါ် မူတည်ပြီး တိုင်းပြည်၏ အဆိုးအကောင်းကို ကြုံတွေ့ရမည်ဟု နိုင်ငံရေး အသိုင်းအဝိုင်းကြား သုံးသပ်လျက်ရှိသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က တပ်မတော်မှ အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုကို မဖြေရှင်းပေးဘဲ အစိုးရဖွဲ့စည်းရေး ကြိုးပမ်းသည်ဟု ဆိုကာ ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာကာ တာဝန်ယူလျက်ရှိနေသည်။

ထို့နောက် ၂၀၂၄ ခုနှစ်၊ ဖေဖော်ဝါရီ ၁ ရက်နေ့တွင် ၃ နှစ်ပြည့်မည် ဖြစ်ပြီး နောက်ထက် ၆ လ သက်တမ်းတိုး လာနိုင်သည်။

CNI News

၂၀၂၄ ခုနှစ်၊ ဇန်နဝါရီ ၂၃

တည်ငြိမ်အေးချမ်းလုံခြုံမှုရှိနေပြီဖြစ်သည့် နမ့်ခမ်းမြို့နယ်တွင် ညီနောင်မဟာမိတ်ဖြစ်သည့် ရှမ်းပြည်တိုးတက် ရေးပါတီ(SSPP/SSA)အနေဖြင့် တပ်သားစု ဆောင်းရေးကိစ္စရပ် အပါအဝင် စစ်ရေး၊ အုပ်ချုပ်ရေး၊ ငွေကြေး ကောက်ခံရေး စသည့် ကိစ္စများ မလုပ်ရန် တအာင်းအမျိုးသားလွတ်မြောက်ရေးတပ်မတော်(TNLA)က စာ ပေးပို့ ပြောကြားခဲ့သည်။

အဆိုပါ စာကို ၂၀၂၄ ခုနှစ်၊ ဇန်နဝါရီ ၂၁ ရက်နေ့စွဲဖြင့် SSPP ၏ မဟာမိတ်ရေးရာဌာန၊ ဌာနမှူးကြီးကို လိပ်မူ၍ ပေးပို့ခဲ့ခြင်း ဖြစ်သည်။

SSPP မှ TNLA ၏ နမ့်ခမ်းမြို့နယ်ရှိ ဒေသနေ ရှမ်းလူထု မိဘပြည်သူများကို ကျေးရွာလုံခြုံရေးတပ်ဖွဲ့စည်းရန်နှင့် စစ်မှုထမ်းရန် ဆောင်ရွက်နေသည်ကို မိမိတို့၏ ရပ်ရွာအုပ်ချုပ်ရေးမှူးအဖွဲ့များမှ အုပ်ချုပ်ရေးဌာနမှ တင်ပြလာ သည်ဟု စာထဲမှာ ဖော်ပြထားသည်။

နမ့်ခမ်းမြို့ ဧရိယာအတွင်းရှိ မိဘပြည်သူများသည် ယခုချိန်တွင် လွတ်မြောက်လွတ်လပ်သည့် ပြည်သူများ ဖြစ်ကြောင်း၊ နမ့်ခမ်းမြို့နယ်ရှိ ဗမာစစ်အာဏာရှင်အုပ်စုကို ဖယ်ရှားရင်းလင်းမောင်းနှင်ထုတ်သည့် TNLA မှ လည်း နမ့်ခမ်းမြို့နယ်ရှိ ပြည်သူများ၏ သဘောတူဆန္ဒအတိုင်း နမ့်ခမ်းမြို့နယ်ကြီး တည်ငြိမ်အေးချမ်းဖွံ့ဖြိုး လာအောင် တာဝန်ယူပြီး ဆောင်ရွက်နေပြီဖြစ်ကြောင်း TNLA က SSPP ထံ စာပေးပို့ခဲ့သည်။

SSPP ထံ TNLA က ပို့တဲ့စာကို တွေ့ရစဉ်

TNLA က “သို့ဖြစ်ပါ၍ တည်ငြိမ်အေးချမ်းလုံခြုံမှုရှိနေပြီဖြစ်သည့် နမ့်ခမ်းမြို့နယ်တွင် ညီနောင်မဟာမိတ်ဖြစ် သည့် SSPP မှ တပ်သားစုဆောင်းရေး ကိစ္စရပ် အပါအဝင် စစ်ရေး၊ အုပ်ချုပ်ရေး၊ ငွေကြေးကောက်ခံရေး စသည့် ကိစ္စများ ဆက်လက် မလုပ်ဆောင်ရန် TNLA မှ အထူးမေတ္တာရပ်ခံအပ်ပါသည်”ဟု စာထဲမှာ ပြောထားသည်။

မိမိတို့၏ မိဘပြည်သူများ၏ သဘာတူဆန္ဒများနှင့်ဆန့်ကျင်ပြီး အဆိုပါကိစ္စရပ်များ ဆက်လက် ဆောင်ရွက်နေ မည်ဆိုပါက မိမိတို့ ညီနောင်မဟာမိတ်အကြား မလိုလားအပ်သည့်ပြဿနာများ ပေါက်ဖွားလာစေနိုင်သည့် အတွက် ဤမေတ္တာရပ်ခံလွှာအား ပေးပို့ရခြင်းဖြစ်ပါသည်ဟု TNLA က ပြောသည်။

နမ့်ခမ်းဒေသခံ တစ်ဦးက “ နမ့်ခမ်းဆိုတာ ရှမ်းလူမျိုးအများဆုံး နေထိုင်ကြတာ။ အဲဒါကြောင့် SSPP က အုပ်ချုပ် ရေးလုပ်တာ မမှားဘူးလေ။ ပြီးတော့ နမ့်ခမ်းမှာ SSPP က အရင်ကတည်း လှုပ်ရှားနေတာ။ TNLA က SSPP ရဲ့ စယ်လန့်က ဆိပ်ကမ်းကို လိုချင်နေတာ။ နမ့်ခမ်းကို ထိန်းချုပ်ပြီး တရုတ်နယ်စပ် ထွက်ပေါက်ကို လိုချင်နေတာ။ ရှမ်းလူထုကလည်း ပလောင်အုပ်ချုပ်မှာကို ဘယ်လိုလို့ လက်ခံမလဲ၊ နှစ်ဖက် တင်းမာပြီး တိုက်ခိုက်မှုတွေဖြစ် လာမလားတော့ မသိတော့ဘူး”ဟု ပြောသည်။

TNLA သည် ၂၀၂၃ ခုနှစ်၊ အောက်တိုဘာ ၂၇ ရက်နေ့က ဖော်ဆောင်ခဲ့သည့် ၁၀၂၇ စစ်ဆင်ရေးမှာ ပါဝင် တိုက်ခိုက်နေပြီး နမ့်ခမ်း၊ နမ့်ဆန်၊ မန်တုံ၊ မိုင်းငေါ့၊ နမ္မတူ၊ ကွတ်ခိုင်၊ သိန္နီ တို့ကို ထိန်းချုပ်ထားသည်။

သို့သော် နမ့်ခမ်းမြို့နယ်၊ သိန္နီမြို့နယ်တို့မှာ SSPP တပ်ဖွဲ့များ ယခင်ကတည်းက လှုပ်ရှားလျက်ရှိပြီး လက်ရှိမှာ လည်း တပ်အင်အား တိုးမြှင့်ထားကြောင်း သိရသည်။

CNI News

၂၀၂၄ ခုနှစ်၊ ဇန်နဝါရီ ၂၂

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီးဌာန(၃) ပြည်ထောင်စုဝန်ကြီးအဖြစ် ဦးအောင်ကျော်ဟိုးကို ခန့်အပ်တာဝန်ပေးလိုက်ကြောင်း ၂၀၂၄ ခုနှစ်၊ ဇန်နဝါရီ ၂၂ ရက်တွင် ထုတ်ပြန်ခဲ့သည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီးဌာန(၄)၏ ဒုတိယဝန်ကြီးအဖြစ် ဗိုလ်ချုပ် ခွန်သန့်ဇော်ထူးကို ခန့်အပ်ခဲ့သည်။
ဗိုလ်ချုပ်ခွန်သန့်ဇော်ထူးသည် နယ်စပ်ရေးရာဝန်ကြီးဌာန ဒုဝန်ကြီးအဖြစ်လည်း ခန့်အပ်တာဝန်ပေးခံထားရသည်။

နစကဥက္ကဋ္ဌရုံးဝန်ကြီးဌာန(၄) ပြည်ထောင်စုဝန်ကြီးမှာ ဗိုလ်ချုပ်ကြီးမိုးအောင် ဖြစ်ပြီး နစကဥက္ကဋ္ဌရုံးဝန်ကြီးဌာန (၁)၏ ပြည်ထောင်စုဝန်ကြီးမှာ ဦးကိုကိုလှိုင်ဖြစ်သည်။ 

အလားတူ နစကဥက္ကဋ္ဌရုံးဝန်ကြီးဌာန(၂) ပြည်ထောင်စုဝန်ကြီးမှာ ဦးအောင်နိုင်ဦး ဖြစ်သည်။

CNI News

၂၀၂၄ ခုနှစ်၊ ဇန်နဝါရီ ၂၂

ရှမ်းပြည်နယ်တောင်ပိုင်း၊ ဟိုပုံးမြို့နယ် စံဖူးကျေးရွာတွင် ပအိုဝ်းအမျိုးသားလွတ်မြောက်ရေးတပ်မတော် (PNLO/ PNLA) နှင့် ပအိုဝ်းအမျိုးသားအဖွဲ့ (PNO) တို့အကြား ညှိနှိုင်းမှု အဆင်မပြေ၍ ထိတွေ့တိုက်ပွဲ ဖြစ်ပွားခဲ့ကြောင်း PNO မှ ဒုဗိုလ်မှူးကြီး ခွန်ထွန်းရွှေက CNI သတင်းဌာနသို့ ပြောသည်။

အဆိုပါ တိုက်ပွဲအတွင်း PNLO မှ တစ်ဦးသေဆုံးပြီး မိမိတို့ PNO တွင်လည်း ထိခိုက်ဒဏ်ရရှိခဲ့ကြောင်း၊ PNLO က သယ်ဆောင်လာသော လက်နက်ခဲယမ်းများကို ၎င်းတို့ကိုယ်တိုင် မီးပြန်ရှို့ခဲ့ကြောင်း ၎င်းက ပြောသည်။

ဒုဗိုလ်မှူးကြီး ခွန်ထွန်းရွှေက “ကျနော်သိတာကတော့ အဲဒီ PNLA က သူတို့ မြောက်ဖက်ဆိုတော့ ဘယ်ကနေ လာတာလဲ မသိဘူး။ နောင်ယန်းဂိတ်ကို ဖြတ်တော့ မရပ်တော့ ကျနော်တို့က လိုက်တာပေါ့။ ဟိုပုံးဘက်ရောက် တော့ စံဖူးရွာ ရောက်တော့ အဲဒီမှာ နည်းနည်းလေး ဖြစ်ကြတာပေါ့နော်၊ ဖြစ်ကြတော့ အဲဒီမှာ ကျနော်တို့လည်း သူတို့နဲ့ အဲဒီညမှာ နည်းနည်းပါးပါး ထိတွေ့မှုဖြစ်တယ်။ သူတို့ဖက်က တစ်ယောက်ကျတယ်၊ ကျနော်တို့ဖက်က လည်း ဒဏ်ရာရတယ်။ နောက်ရက်ကြတော့ ညှိနှိုင်းမှုလုပ်တာ အဆင်မပြေတော့ သူတို့ပါလာတဲ့ လက်နက်တို့ ခဲယမ်းတို့ သူတို့ ပြန်ရှို့တော့ အဲဒါ ခဲယမ်းတွေ ပေါက်ကွဲလို့ ရွာတွေ မီးလောင်သွားတာ” ဟု CNI သတင်းဌာနသို့ ပြောသည်။

 PNO တပ်ဖွဲ့ကို တွေ့ရစဉ်

PNLO အနေဖြင့် ရှမ်းမြောက်မှ လက်နက်ခဲယမ်း သယ်ဆောင်လာကြောင်း၊ လက်နက်ခဲယမ်းများအား မီးရှို့ ဖျက်ဆီးခဲ့ကြောင်း ပြောဆိုခြင်းနှင့် ပတ်သက်၍ PNLO ၏ သဘောထားကို သိရှိနိုင်ရေး ဆက်သွယ်ခဲ့သော်လည်း ဗိုလ်မှူးခွန်မင်းသိမ်းက တိုက်ပွဲဖြစ်ပွားခြင်းမှာ မှန်ကန်ပြီး ၎င်းကိစ္စအား ပြောဆိုခြင်း မပြုပေ။

PNLO ယူနီဖောင်း ဝတ်ဆင်ထားသူများ လိုက်ပါလာသည့် မော်တော်ယာဉ် ၅ စီးပါ ယာဉ်တန်းအား စစ်ဆေးမှုပြု လုပ်ရာ ပစ်ခတ်မှု အနည်းငယ်ဖြစ်ပွားခဲ့ပြီး ယာဉ်ပေါ်ရှိ လက်နက်ခဲယမ်းများ ပေါက်ကွဲမှု ဖြစ်ပွားခဲ့သည်။

ထို့နောက် စံဖူးရွာရှိ ဒေသခံများ၏ နေအိမ် ၂၇ လုံး မီးလောင်ပျက်စီးခဲ့ကြောင်း နစကမှ ဇန်နဝါရီ ၂၁ ရက်မှာ သတင်းထုတ်ပြန်ထားသည်။

မီးဘေးသင့်ပြည်သူများအား သက်ဆိုင်ရာ အာဏာပိုင် အဖွဲ့အစည်းများက အကူအညီပေးနိုင်ရေး လုပ်ဆောင်နေ ကြောင်း၊ လက်နက်ကိုင် တပ်ဖွဲ့အချင်းချင်း အပြန်အလှန် လေးစားမှုရှိရန် လိုအပ်ကြောင်း ဒုဗိုလ်မှူးကြီး ခွန်ထွန်းရွှေက CNI သတင်းဌာနသို့ ပြောသည်။

၎င်းက “သူတို့ကတော့ NCA အဖွဲ့ဆိုတော့ ကျနော်တို့ကတော့ တရားမဝင် ဘာညာ ကျနော်တို့ ဂိတ်တွေ သူတို့ ဖြတ်ရင် အကြောင်းကြားပေါ့၊ တစ်ဖွဲ့နဲ့ တစ်ဖွဲ့ အပြန်အလှန် လေးစားမှု ရှိဖို့ကတော့ ကျနော်တို့ကတော့ ညှိနှိုင်း သဘောတူထားတာ ရှိတယ်၊ အခုက သူတို့ အပြန်အလှန်လေးစားမှု မရှိတဲ့အတွက် တားတယ်၊ မေးတယ်ဆိုတာ လည်း သူတို့က အမေးမခံ၊ အစစ်မခံတော့ အဲဒီလို ပြဿနာတွေ ဖြစ်ကုန်တာပေါ့နော်” ဟု ပြောသည်။

 PNLO တပ်ဖွဲ့ကို တွေ့ရစဉ်

တောင်ကြီးမြို့တွင် ဖွင့်လှစ်ထားသော PNLO ၏ ဆက်ဆံရေးရုံးမှ ဗိုလ်မှူးခွန်မင်းသိမ်း အပါအဝင် ၃ ဦးကို မြန်မာ့တပ်မတော်က ဇန်နဝါရီ ၂၁ ရက်မှာ ခေါ်ယူတွေ့ဆုံခဲ့သည်။

တပ်မတော်နှင့် ငြိမ်းချမ်းရေး ရယူခဲ့ပြီးနောက် PNO ကို ပအိုဝ်းဒေသအား အုပ်ချုပ်နိုင်ရေး အထူးဒေသ ၆ အဖြစ် သတ်မှတ်ပေးခဲ့သည်။

ထို့နောက် ပင်လောင်းမြို့နယ်၊ ဆီဆိုင်မြို့နယ်၊ ဟိုပုန်းမြို့နယ်တို့ ပါဝင်သော ပအိုဝ်းကိုယ်ပိုင်အုပ်ချုပ်ခွင့်ရဒေသ အား စီမံအုပ်ချုပ်လျက်ရှိသည်။

PNLO/PNLA မှာ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ထိုးထားသည့် ပအိုဝ်းလက်နက်ကိုင်ဖြစ်ပြီး ရှမ်းပြည်နယ်(တောင်ပိုင်း) ဆီဆိုင်၊ ဟိုပုန်း၊ မောက်မယ်ဒေသများတွင် လှုပ်ရှားလျက် ရှိပြီး မောက်မယ်ကို ဌာနချုပ်အဖြစ် သတ်မှတ်ထားသည်။

CNI News

၂၀၂၄ ခုနှစ်၊ ဇန်နဝါရီ ၁၉

ဆိုရှယ်လူမှုကွန်ရက်(အင်တာနက်)ပေါ်တွင် သတင်းတု၊ သတင်းမှားများတင်ခြင်း၊ မဖွယ်မရာများတင်ခြင်း၊ နိုင်ငံရေးအရ တိုက်ခိုက်ပြောကြားခြင်းအပေါ် ဥပဒေကြောင်းအရ တားမြစ်အရေးယူဆောင်ရွက်မည့် ကော်မတီ ကို နစက-က ဖွဲ့စည်းထားကြောင်း သိရသည်။

အဆိုပါ ကော်မတီသည် အင်တာနက်ပေါ်တွင် သတင်းတု၊ သတင်းမှားများတင်ခြင်း၊ မြန်မာ့ရိုးရာယဉ်ကျေးမှုနှင့် ကိုက်ညီမှု မရှိသည့် မဖွယ်မရာပုံများ၊ ဗွီဒီယိုများနှင့် လိင်အသားပေးကိစ္စရပ်များတင်ခြင်း၊ နိုင်ငံရေးအရ တိုက် ခိုက် ပြောဆိုခြင်းများကို ဥပဒေကြောင်းအရ တားမြစ်နိုင်ရေး၊ ဖော်ထုတ်အရေးယူနိုင်ရေး ဖွဲ့စည်းခဲ့ခြင်းဖြစ်သည် ဟု သိရသည်။

ထိုကော်မတီတွင် ပြည်ထဲရေးဒုဝန်ကြီးက ဥက္ကဋ္ဌအဖြစ်လည်းကောင်း၊ ပို့ဆောင်ရေးနှင့်ဆက်သွယ်ရေးဒုဝန်ကြီး က ဒုတိယဥက္ကဋ္ဌအဖြစ်လည်းကောင်း၊ မြန်မာနိုင်ငံရဲတပ်ဖွဲ့ ဒုတိယရဲချုပ်(၂)က အတွင်းရေးမှူးအဖြစ် လည်း ကောင်း၊ မြန်မာနိုင်ငံရဲတပ်ဖွဲ့ မှုခင်းရဲတပ်ဖွဲ့မှူးက တွဲဖက်အတွင်းရေးမှူး(၁)အဖြစ် လည်းကောင်း၊ ပို့ဆောင်ရေး နှင့် ဆက်သွယ်ရေးဝန်ကြီးဌာန ဒုတိယညွှန်ကြားရေးမှူးချုပ်က တွဲဖက်အတွင်းရေးမှူး(၂)အဖြစ် လည်းကောင်း အသီးသီး တာဝန်ယူထားကြသည်။

အင်တာနက်အသုံးပြုမှု စောင့်ကြည့်နေစဉ်

ထို့နောက် ဥပဒေရေးရာဝန်ကြီးဌာန ညွှန်ကြားရေးမှူးချုပ်၊ ပြန်ကြားရေးဝန်ကြီးဌာန ညွှန်ကြားရေးမှူးချုပ်၊ တပ်မတော်စစ်ဘက်ရေးရာလုံခြုံရေးအရာရှိချုပ်ရုံး ကိုယ်စားလှယ်တစ်ဦး၊ မြန်မာနိုင်ငံတော် ဗဟိုဘဏ် ညွှန် ကြားရေးမှူးချုပ်၊ ပြည်ထဲရေးဝန်ကြီးဌာန အထူးစုံစမ်းစစ်ဆေးရေးဦးစီးဌာန ဒုတိယညွှန်ကြားရေးမှူးချုပ်၊ မြန်မာနိုင်ငံရဲတပ်ဖွဲ့ မှုခင်းနှင့် ဥပဒေရေးရာဌာနကြီး ဌာနကြီးမှူးတို့က အဖွဲ့ဝင်များအဖြစ် တာဝန်ယူထားကြ ကြောင်း သိရသည်။

အဆိုပါ ကော်မတီသည် အင်တာနက်ပေါ်တွင် သတင်းတု၊ သတင်းမှားများ တင်ခြင်း၊ မြန်မာ့ရိုးရာယဉ်ကျေးမှု နှင့် ကိုက်ညီမှု မရှိသည့် မဖွယ်မရားပုံများ၊ ဗွီဒီယိုများနှင့် လိင်အသားပေးကိစ္စရပ်များတင်ခြင်း၊ နိုင်ငံရေးအရ တိုက်ခိုက်ပြောဆိုခြင်း စသည့် ဆောင်ရွက်မှုဖြစ်စဉ်များကို နည်းပညာကျွမ်းကျင်သည့် ပညာရှင်များ ပါဝင်သော အဖွဲ့ ဖွဲ့စည်းပြီး ၂၄ နာရီစောင့်ကြည့်မည် ဖြစ်သည်။

ထို့နောက် အထက်ပါ ကိစ္စရပ်များကို ပို့စ်တင်ခြင်း၊ ထုတ်လွှင့်ခြင်း၊ မျှဝေခြင်း၊ အားပေးအားမြှောက်ပြုခြင်းများ ဆောင်ရွက်နေမှုအပေါ် နည်းပညာအရ ရှာဖွေဖော်ထုတ်ပြီး တားမြစ်မည်ဖြစ်သလို ကျူးလွန်သူများအား တည် ဆဲ ဥပဒေများနှင့်အညီ ထိထိရောက်ရောက် အရေးယူနိုင်ရေး ဆောင်ရွက်မည်ဟု ကော်မတီဖွဲ့စည်းကြောင်း ထုတ်ပြန်ချက်တွင် ဖော်ပြထားသည်။

CNI News

၂၀၂၄ ခုနှစ်၊ ဇန်နဝါရီ ၁၉

ရှမ်းပြည်နယ်မြောက်ပိုင်းမှာ မြန်မာ့တပ်မတော်နှင့် ညီနောင်မဟာမိတ်သုံးဖွဲ့တို့ အပစ်ရပ်ပြီးနောက် စစ်ကိုင်းတိုင်း ဒေသကြီးနှင့် မကွေးတိုင်းဒေသကြီးတို့တွင် စစ်ရေး ပြင်းထန်လာနိုင်ကြောင်း စစ်ရေး/နိုင်ငံရေး အကဲခတ်များက သုံးသပ် ပြောကြားသည်။

ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ၁၀၂၇ စစ်ဆင်ရေးမှာ ၂ လကျော်အကြာ ၂၀၂၄ ခုနှစ်၊ ဇန်နဝါရီ ၉ ရက်မှ ၁၁ ရက်အထိ ၃ ရက်ကြာ ဆွေးနွေးပြီးနောက် ယာယီအပစ်ရပ်စဲရန် သဘောတူခဲ့ကြ သည်။

ညီနောင်မဟာမိတ်တို့ ဆင်နွှဲခဲ့သော ၁၀၂၇ စစ်ဆင်ရေးအတွင်း သွားရောက်ပူးပေါင်းခဲ့သော ပြည်မမှ ပြည်သူ့ ကာကွယ်ရေးတပ် (PDF) များမှာ ပြန်ဆင်းလာမှာ ဖြစ်ကြောင်း၊ နစက ကျင်းပမည့် ရွေးကောက်ပွဲအတွက်လည်း စိုးရိမ်စရာရှိကြောင်း နိုင်ငံရေးလေ့လာသုံးသပ်သူ ဦးသက်ဇော်က CNI သတင်းဌာနသို့ ပြောသည်။

BNRA တပ်ဖွဲ့ကိုတွေ့ရစဉ်

၎င်းက “အပစ်ရပ်တော့ ဟိုမှာ သွားပေါင်းတဲ့ PDF က ပြန်ဆင်းလာမှာကို၊ ပြန်ဆင်းလာရင် သူကလည်း PDF ထုံးစံ အတိုင်း ထကြွသောင်းကျန်းမယ့် အစီအစဉ်လည်း လုပ်ကြဦးမှာကိုးဗျ၊ ရှင်းရှင်းပြောရရင်တော့ အချုပ်ပြောရရင် တော့ အရပ်သားအစိုးရ ပေါ်ပေါက်ရေးကိုလည်း PDF က မကြိုက်ဘူးဗျ၊ သူတို့ နောက်ကျောက NUG၊ CRPH ကလည်း သူ့တို့ရဲ့ ရပ်တည်ရေးအတွက်ကလည်း ရွေးကောက်ပွဲ မဖြစ်မှ ဖြစ်မယ်ဆိုတော့ ရွေးကောက်ပွဲ မဖြစ်ဖို့ လည်း သူတို့က အတင်းတွန်းမှာပဲ၊ ဆိုတော့ ရွေးကောက်ပွဲအတွက်ကလည်း စိုးရိမ်စရာ ဖြစ်လာတာပေါ့ဗျာ၊ သူတို့ ပြန်ဆင်းလာတာကတော့ အခုလောလောဆယ်က ရှမ်းမြောက်မှာ တိုက်ပွဲဖြစ်ပြီးသွားပြီ စစ်ကိုင်းနဲ့ မကွေးက တိုက်ပွဲ တော်တော်ငြိမ်သွားတယ်ဆိုတာ အဲဒီက အင်အားတွေက အပေါ်တက်သွားတာကိုး၊ အခု အောက်ပြန်ဆင်း လာမယ်ဆိုရင်တော့ အရင်လိုပဲ တိုက်ပွဲ ပြန်ဖြစ်နေရင်လည်း မကောင်းဘူးပေါ့ဗျာ၊ အဲဒီလိုတော့ သုံးသပ်ပါတယ်” ဟု ပြောသည်။

၁၀၂၇ စစ်ဆင်ရေးကို ညီနောင်မဟာမိတ်အဖွဲ့ဝင် ရက္ခိုင့်တပ်တော် (ULA/AA)၊ ပလောင်ပြည်လွတ်မြောက် ရေးတပ်ဦး (PSLF/TNLA)၊ မြန်မာနိုင်ငံ အမှန်တရားနှင့် တရားမျှတသော အမျိုးသားပါတီ (MNTJP/MNDAA) တို့အပြင် ဗမာပြည်သူ့လွတ်မြောက်ရေးတပ်တော်(BPLA)၊ ဗမာအမျိုးသားတော်လှန်ရေးတပ်မတော် (BNRA)၊ မန္တလေးပြည်သူ့ကာကွယ်ရေးတပ်(MDY-PDF)၊ ပြည်သူ့လွတ်တော်မြောက်ရေးတပ်မတော်(PLA)တို့လည်း ပါဝင်ခဲ့သည်။

မြောက်ပိုင်းမဟာမိတ်တပ်ဖွဲ့ကို တွေ့ရစဉ်

ရှမ်းမြောက်ရှိ မြို့နယ်အများစုကို ညီနောင်မဟာမိတ်က သိမ်းယူထားနိုင်ကြောင်း၊ ၎င်းတို့၏ စစ်ရေး ရည်မှန်းချက် မှာ အောင်မြင်ပြီဟု ယေဘုယျပြောနိုင်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်း ဌာနသို့ ပြောသည်။

၎င်းက “ရှမ်းမြောက်မှာ လားရှိုးကလွဲလို့ရှိရင် ကျန်တဲ့ဒေသအားလုံးဟာ ညီနောင်သုံးဖွဲ့က သူတို့ရဲ့ စစ်ရေးရည်မှန်း ချက်တွေ ပေါက်ရောက်အောင်မြင်ပြီး ဖြစ်ပြီလို့ ယေဘုယျပြောလို့ရပါတယ်။ အခုကျန်နေတာ လားရှိုးတစ်ခုတည်း ဖြစ်ပါတယ်။ လားရှိုးကိုလည်း ကိုးကန့်ဒေသလိုပဲ သူတို့ လုပ်ဆောင်မယ့် သဘောရှိပါတယ်။ ဆိုလိုတာကတော့ နှစ်ဖက် အပစ်ရပ်ပြီးတော့ ဝိုင်းပတ်ထားတဲ့ အနေအထားပါ၊ အဲဒီကနေပြီးတော့ လောက်ကိုင်က ဖြေရှင်းနည်းလို တစ်စုံတစ်ရာ ဖြေရှင်းမယ့် အနေအထား ရှိနေပါပြီ။ အဲဒီတော့ အခုအရှေ့မြောက်ရဲ့ စစ်ရေးဦးတည်ချက်က ပြီးဆုံး သွာပါပြီ၊ နောင်ချိုအထိ ရောက်နေပါပြီ။ အခုနောက်ထပ် ရင်ဆိုင်မယ့် ပြဿနာကတော့ ပြင်ဦးလွင်နဲ့ မန္တလေး တိုင်း ဖြစ်ပါတယ်။ ဒါကြောင့် အဲဒီစစ်ရေးရည်မှန်းချက်ကို ဆက်အကောင်အထည်ဖော်ဖို့ ကိစ္စမှာ အခုဆွေးနွေးပွဲ သဘောတူညီချက်ထဲမှာ အဲဒီကိစ္စမပါပါဘူး။ တစ်ချိန်ထဲမှာ စစ်ကိုင်းနဲ့ မကွေးက PDF အဖွဲ့အစည်းတွေရဲ့ လှုပ်ရှား တိုက်ခိုက်မှုဟာလည်း ပိုမိုမြင့်တက်လာစရာ အကြောင်းရှိတယ်။ အဲဒါနဲ့ တပြိုင်နက်ထဲ စစ်ကောင်စီရဲ့ အဲဒီဒေသ တွေကို စစ်ရေးအရ ချေမှုန်းတိုက်ခိုက်မယ့် အလားအလာဟာ ပိုပြီးတော့ များပြားလာတယ်လို့ ကျနော်ကတော့ ယူဆပါတယ်ခင်ဗျ” ဟု ပြောသည်။

၁၀၂၇ စစ်ဆင်ရေးအတွင်း လောက်ကိုင်၊ ကုန်းကြမ်း၊ ကွမ်းလုံ၊ ပန်ဆိုင်း၊ မုံးကိုး၊ ဖောင်းဆိုင်၊ သိန္နီ၊ ချင်းရွှေဟော်၊ နမ့်ခမ်း၊ ကွတ်ခိုင်၊ မန်တုံ၊ နမ့်ဆန်၊ နမ္မတူ၊ မိုင်းလုံ၊ မိုင်းငေါ့တို့ကို ညီနောင်မဟာမိတ်တို့က သိမ်းယူထားသည်။

CNI News

၂၀၂၄ ခုနှစ်၊ ဇန်နဝါရီ ၁၉

ရှမ်းပြည်နယ်မြောက်ပိုင်း၊ နမ္မတူမြို့နယ်ကို ထိန်းချုပ်ထားသော တအာင်းအမျိုးသားလွတ်မြောက်ရေး တပ်မတော်(TNLA)မှ အထွေထွေအတွင်းရေးမှူး ဗိုလ်မှူးချုပ်တားဘုန်းကျော် ဦးဆောင်သည့်အဖွဲ့ အုပ်ချုပ်ရေး လုပ်ငန်းများ လည်ပတ်နိုင်ရေး သွားရောက်ကြည့်ရှိခဲ့ကြောင်း သိရသည်။

ဗိုလ်မှူးချုပ်တားဘုန်းကျော်နှင့်အတူ တွဲဖက်အထွေထွေအတွင်းရေးမှူး(၁) ဗိုလ်မှူးကြီး တားအိုမ်တမာဝ်း နှင့် အုပ်ချုပ်ရေးဌာနမှူး ဗိုလ်မှူးကြီး တားဂူဇားတို့လည်း ပါဝင်ကြောင်း PSLF/TNLA က ဇန်နဝါရီ ၁၉ ရက်တွင် သတင်းထုတ်ပြန်ခဲ့သည်။