CNI News

၂၀၂၄ ခုနှစ်၊ ဇန်နဝါရီ ၃၁

၂၀၀၈ ဖွဲ့စည်းပုံအခြေခံဥပဒေအရ ရွေးကောက်ပွဲကျင်းပရန် ကြိုးပမ်းခြင်းသည် ဒီမိုကရေစီကို ပြန်လည် ဖော်ဆောင်နိုင်မှာ မဟုတ်ကြောင်း တော်လှန်ရေးအင်အားစုများဖြစ်သည့် KNU၊ CNF၊ KNPP၊ NUG တို့က ယ‌နေ့ (ဇန်နဝါရီ ၃၁ ရက်)တွင် ပူးတွဲထုတ်ပြန်ခဲ့သည်။

မြန်မာ့တပ်မတော်၏ အာဏာရယူမှုသည် ၎င်းတို့ကိုယ်တိုင် ရေးဆွဲပြဋ္ဌာန်းခဲ့သည့် ၂၀၀၈ ဖွဲ့စည်းပုံအခြေခံဥပဒေ ပါ ပြဋ္ဌာန်းချက်များကို ချိုးဖောက်ခဲ့ကြောင်း၊ ထို့ကြောင့် ၂၀၀၈ ဖွဲ့စည်းပုံအခြေခံဥပဒေသည် တရားမဝင်တော့ဟု ပူးတွဲထုတ်ပြန်ချက်တွင် ဖော်ပြထားသည်။

KNU၊ CNF၊ KNPP၊ NUG တို့က “၂၀၀၈ ဖွဲ့စည်းပုံအခြေခံဥပဒေအရ ရွေးကောက်ပွဲကျင်းပရန် ကြိုးပမ်းခြင်းသည် ဒီမိုကရေစီကို ပြန်လည်ဖော်ဆောင်နိုင်မည် မဟုတ်သည့်အပြင် အာဏာသိမ်းမှု တရားဝင်ဖြစ်စေပြီး မြန်မာစစ်တပ် ကို ကာလ အကန့်အသတ်မရှိ အုပ်ချုပ်ခွင့် ပေးခြင်းသာ ဖြစ်မည်။ စစ်တပ်သည် အနာဂတ် နိုင်ငံရေး လုပ်ငန်းစဉ် တွင် ပါဝင်ခွင့် မရှိစေရ။ ကိုယ်ပိုင်ပြဋ္ဌာန်းခွင့်၊ အမျိုးသားတန်းတူရေး၊ ဒီမိုကရေစီရေး၊ ငြိမ်းချမ်းရေးနှင့် တည်ငြိမ် ရေး ပြန်လည်ဖော်ဆောင်ရန် သက်ဆိုင်သူများအားလုံး လက်ခံနိုင်သည့် ဖက်ဒရယ်နှင့်ဒီမိုကရေစီ ဖွဲ့စည်းပုံအခြေခံ ဥပဒေသစ် တစ်ရပ် လိုအပ်သည်” ဟု ပူးတွဲ ထုတ်ပြန်ချက်တွင် ဖော်ပြထားသည်။

NUG ကာကွယ်ရေး၀န်ကြီးကို တွေ့ရစဉ်

ထို့အတူ ၂၀၀၈ ဖွဲ့စည်းပုံအခြေခံဥပဒေကို အပြီးတိုင်ဖျက်သိမ်းရန်နှင့် ၎င်းကို ပြန်လည်အသက်သွင်းရန် ကြိုးပမ်းမှု မှန်သမျှ တိုက်ဖျက်ရန်၊ သက်ဆိုင်သူများအားလုံး လက်ခံနိုင်သော ဖက်ဒရယ်နှင့် ဒီမိုကရေစီစနစ်ကို အခြေခံသည့် ဖွဲ့စည်းပုံအခြေခံဥပဒေ ရေးဆွဲပြဋ္ဌာန်းရန်များ ပါရှိသည်။

၂၀၀၈ ဖွဲ့စည်းပုံအခြေခံ ဥပဒေအရ ရွေးကောက်ပွဲ နှစ်ကြိမ်တိုင် ကျင်းပနိုင်ခဲ့ပြီး ဒီမိုကရေစီ ဖော်ဆောင်နိုင်ခဲ့ ကြောင်း လီဆူအမျိုးသားဖွံ့ဖြိုးတိုးတက်ရေးပါတီ (ဒူးလေးပါတီ) မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

၎င်းက “ဒီမိုကရေစီ ဖော်ဆောင်နိုင်လို့ သက်တမ်းနှစ်ကြိမ်တောင်မှ ၂၀၁၀ ကနေ ၂၀၂၀ အထိတောင် လုပ်ခဲ့ပြီးပြီ လေ၊ သက်တမ်းနှစ်ကြိမ်တောင်မှ ဒီမိုကရေစီ ဖော်ဆောင်ခဲ့ပြီပဲ၊ ဒီမိုကရေစီဆိုတာကတော့ တဖြည်းဖြည်းတော့ ပြောင်းရမှာပေါ့၊ အခု မြန်မာနိုင်ငံရဲ့ အခြေအနေအရကတော့ ဒီလိုအကန့်အသတ်လေး မလုပ်ထားရင်လည်း မဖြစ်ဘူးလေ၊ ကျနော်တို့ ဒီမိုကရေစီက နုနယ်နေသေးတော့ ပရမ်းပတာတွေ ဖြစ်နေတာ အခုတောင်မှ လွန်ခဲ့တဲ့ ရွေးကောက်ပွဲ နှစ်ကြိမ်တောင်မှ ပရမ်းပတာတွေ ရှိနေတယ်။ အဲတော့ တဖြည်းဖြည်းတော့ ပြောင်းလဲ ရမှာပေါ့” ဟု ပြောသည်။

 NUG အဖွဲ့ကိုတွေ့ရစဉ်

အဆိုပါ ကိစ္စရပ်များမှာ မိမိတို့၏ မူဝါဒများကို ထုတ်ပြန်ကြခြင်းဖြစ်ကြောင်း ၂၀၀၈ ခြေဥအရ ဒီမိုကရေစီ ဖော်ဆောင်နိုင်ခြင်း ရှိ/မရှိကိုမူ ပြည်သူလူထုက ဆုံးဖြတ်လိမ့်မည်ဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “ကျနော်ပြောသလိုပဲ သူ့အမြင် ကိုယ့်အမြင်ပေါ့ဗျာ၊ သူတို့လည်း သူတို့ အမြင်ကို ထုတ်ပြန်တာပေါ့ဗျာ၊ ပြည်သူလူထုအများစုက ဘယ်သူ့ကို ထောက်ခံလဲ၊ ပြည်သူထောက်ခံတဲ့ အပေါ်မှာပဲ မူတည်ပြီးတော့ သမိုင်းက သွားမှာပဲ၊ အဲဒီလိုရှိတာကိုး ပြည်သူထောက်ခံတယ်ဆိုတာလည်း နှစ်နည်းရှိတာပေါ့ဗျာ၊ လက်နက်နဲ့ ချိန်ပြီးတော့ ထောက်ခံခိုင်းတာနဲ့ ဒီမိုကရေစီနည်းနဲ့ ရွေးကောက်ပွဲနဲ့ ထောက်ခံတာနဲ့ ကွာတာပေါ့၊ အဲဒီဟာတော့ ဗမာပြည်မှာ အခုဖြစ်နေတဲ့ဟာပေါ်မှာ ကြည့်ပြီးတော့ ပြည်သူလူထုက ဆုံးဖြတ်လိမ့်မယ်လို့ ကျနော်ဒီလိုပဲ ပြောချင်ပါတယ်” ဟု ပြောသည်။

လက်ရှိ ၂၀၂၄ ခုနှစ်အတွင်း နစကသည် နိုင်ငံတစ်ဝှမ်း သန်းခေါင်စာရင်း အပြီးသတ် ကောက်ယူသွားမည် ဖြစ်ကြောင်း၊ ထို့နောက် အထွေထွေရွေးကောက်ပွဲ ကျင်းပပြီး အရပ်သားအစိုးရထံ အာဏာလွှဲအပ် သွားမည် ဖြစ်ကြောင်း ပြောကြားထားသည်။

CNI News

၂၀၂၄ ခုနှစ်၊ ဇန်နဝါရီ ၃၁

မြန်မာ့တပ်မတော် ဖြုတ်ချရေး ပူးပေါင်းလက်တွဲ၍ လက်နက်ကိုင် တိုက်ခိုက်နေကြသည့် KNU၊ KNPP၊ CNF၊ NUG တို့သည် တွေ့ဆုံဆွေးနွေးရေး လုပ်နိုင်သော လုပ်ငန်းစဉ်များကို ချပြ၍ ပူးတွဲ ထုတ်ပြန်ချက် တစ်စောင်ကို ထုတ်ပြန်ခဲ့သည်။

နစက အနေဖြင့် မိမိတို့၏ နိုင်ငံရေး ဦးတည်ချက် ၆ ရပ်ကို လက်ခံလျှင် တွေ့ဆုံ ဆွေးနွေးသွားမည်ဟု ၎င်းတို့က ပူးတွဲထုတ်ပြန်ခဲ့သည်။

CNI News

၂၀၂၄ ခုနှစ်၊ ဇန်နဝါရီ ၃၀

ကျဉ်းမြောင်းသော အမြင်ရှိသည့် မျက်ကန်းမျိုးချစ်ဝါဒနှင့် နယ်မြေချဲ့ထွင်ရေးဝါဒများကို ဆန့်ကျင်သော မိတ်ဆွေများနှင့် ပူးပေါင်းချီတက်သွားမည်ဟု ရှမ်းပြည်တိုးတက်ရေးပါတီ(SSPP/SSA)က ထုတ်ပြန် ကြေညာခဲ့ သည်။

SSPP/SSA သည် ဗဟိုကော်မတီမျက်နှာစုံညီ ၂၀၂၃ နှစ်ချုပ် အစည်းအဝေးကို ၂၀၂၄ ခုနှစ်၊ ဇန်နဝါရီ ၂၀ ရက်မှ ၂၉ ရက်နေ့အထိ ကျင်းပခဲ့ပြီးနောက် အထက်ပါအတိုင်း ထုတ်ပြန်ခဲ့သည်။

ရှမ်းပြည်တိုးတက်ရေးပါတီ/ရှမ်းပြည်တပ်မတော်(SSPP/SSA)က အာဏာရှင်စနစ်၊ မဟာလူမျိုးကြီးယါဒနှင့် နယ် မြေချဲ့ထွင်ရေးဝါဒတို့ကို ဆန့်ကျင်ပြီး တန်းတူရေးနှင့်ကိုယ်ပိုင်ပြဋ္ဌာန်းခွင့်ကို အခြေခံသော ဖက်ဒရယ်ဒီမိုကရေစီ ပြည်ထောင်စုအား တည်ဆောက်နိုင်မှသာလျှင် အေးချမ်းသာယာပြီး ကမ္ဘာနှင့်ရင်ဘောင်တန်းနိုင်သော ဖွံ့ဖြိုးတိုး တက်သည့် ပြည်ထောင်စု တည်ဆောက်နိုင်မည်ဖြစ်သဖြင့် အာဏာရှင်စနစ်၊ မဟာလူမျိုးကြီးဝါဒ၊ ကျဉ်းမြောင်း သော အမြင်ရှိသည့် မျက်ကန်းမျိုးချစ်ဝါဒနှင့် နယ်မြေချဲ့ထွင်ရေးဝါဒများကို ဆန့်ကျင်သော မိတ်ဆွေများနှင့် ပူး ပေါင်းချီတက်သွားမည်ဟု ဇန်နဝါရီ ၂၉ ရက်တွင် ထုတ်ပြန်ပြောကြားခဲ့သည်။

လက်ရှိတွင် SSPP/SSA သည် တအာင်းအမျိုးသားလွတ်မြောက်ရေးတပ်မတော်(TNLA)နှင့် ရှမ်းပြည်နယ်( မြောက်ပိုင်း) နမ့်ခမ်းမြို့နယ်အတွင်း နယ်မြေ အငြင်းပွားကာ သဘောထား တင်းမာလျက်ရှိနေကြသည်။

SSPP ထုတ်ပြန်ချက်ကို တွေ့ရစဉ်

TNLA သည် ၁၀၂၇ စစ်ဆင်ရေးအတွင်း နမ့်ခမ်းမြို့နယ်အတွင်းရှိ တပ်မတော်စစ်စခန်းများကို တိုက်ခိုက်ကာ နယ်မြေ ထိန်းချုပ်နိုင်ရေး ကြိုးပမ်းထားသည်။

သို့သော် နမ့်ခမ်းမြို့နယ်သည် ယခင်ကတည်းက SSPP/SSA ၏ ထိန်းချုပ်နယ်မြေဖြစ်ပြီး နှစ်ဖက် အုပ်ချုပ်ရေးနှင့် စစ်ရေးနယ်မြေအဖြစ် အငြင်းပွားလျက်ရှိနေသည်။

နယ်မြေဒေသ တည်ငြိမ်အေးချမ်းရေးကို ကာကွယ်ထိန်းသိမ်းပြီး ဒေသဖွံ့ဖြိုးရေးဖြစ်သော ပညာရေး၊ စိုက်ပျိုးရေး၊ ကျန်းမာရေး၊ ဆည်မြောင်း၊ ရေရရှိရေး၊ လမ်း၊ တံတားများ တည်ဆောက်ရေးအပြင် ဒေသတွင်းရှိ မိဘပြည်သူလူထုများကို လူနေမှုဘဝမြှင့်တင်ရေး၊ စားဝတ်နေရေး ချောင်လည်စေရေးအတွက် တတ်နိုင်သည့် ဘက်မှ ကူညီပံ့ပိုးပေးခြင်း၊ အကာအကွယ်ပေးခြင်း လုပ်ငန်းများကို ကြိုးပမ်းဆောင်ရွက်သွားမည်ဟု SSPP က ဇန်နဝါရီ ၂၉ ရက်တွင် ထုတ်ပြန်ခဲ့သည်။

CNI News

၂၀၂၄ ခုနှစ်၊ ဇန်နဝါရီ ၃၀

နစကသည် နိုင်ငံရေးအစိုးရ မဟုတ်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဇန်နဝါရီ ၂၉ ရက် တွင် ကျင်းပခဲ့သည့် ပြည်ထောင်စုအစိုးရအဖွဲ့ အစည်းအဝေးတွင် ပြောကြားခဲ့သည်။

မိမိတို့ အစိုးရမှာ နိုင်ငံရေးကင်းရှင်းသည့် အစိုးရဖြစ်ပြီး နိုင်ငံ့ဝန်ထမ်း အများစုဖြင့် ဖွဲ့စည်းထားသော အစိုးရဖြစ် ကြောင်း၊ တိုင်းဒေသကြီးနှင့် ပြည်နယ်များမှာ နိုင်ငံ့ဝန်ထမ်းများကိုသာ အဆင့်အလိုက် တာဝန်ပေးထားကြောင်း ၎င်းက ပြောသည်။

ဗိုလ်ချုပ်မှူးကြီး မင်းအောင်လှိုင်က “နိုင်ငံ့ဝန်ထမ်းများသည် ပါတီနိုင်ငံရေး ကင်းရှင်းစွာဖြင့် ဆောင်ရွက်ရမည် ဖြစ်ပြီး လူပုဂ္ဂိုလ်အတွက် ဆောင်ရွက်ခြင်း မဟုတ်ဘဲ နိုင်ငံအကျိုးအတွက် တာဝန်ထမ်းဆောင်ခြင်း ဖြစ်စေလို ကြောင်း၊ ထို့ကြောင့် တာဝန်ထမ်းဆောင်ရာတွင် အုပ်ချုပ်မှု အားနည်းဖြစ်စဉ်များ၊ လုံခြုံရေး အားနည်းဖြစ်စဉ်များ ဖြစ်ပေါ်မှု မရှိစေရေး သတ်မှတ်ထားသည့် စည်းမျဉ်းစည်းကမ်း၊ လုပ်ထုံးလုပ်နည်းများနှင့်အညီသာ ဆောင်ရွက်ကြ ရန်လိုကြောင်း၊ မိမိတို့ အစိုးရသည် နိုင်ငံရေးကင်းရှင်းသည့် အစိုးရဖြစ်ပြီး နိုင်ငံရေးအစိုးရ မဟုတ်ကြောင်း၊ နိုင်ငံ့ ဝန်ထမ်း အများစုဖြင့် ဖွဲ့စည်းထားသည့် အစိုးရအဖွဲ့ဖြစ်ပြီး တိုင်းဒေသကြီးနှင့် ပြည်နယ်များ၌လည်း နိုင်ငံ့ဝန်ထမ်း များကိုသာ အဆင့်အလိုက် တာဝန်ပေးအပ်ထားခြင်း ဖြစ်သည်”ဟု ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က တပ်မတော်မှ အမျိုးသားဒီမိုကရေစီအဖွဲ့ချုပ် (NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုကို မဖြေရှင်းပေးဘဲ အစိုးရဖွဲ့စည်းရေး ကြိုးပမ်းသည်ဟု ဆိုကာ ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာကာ တာဝန်ယူလျက်ရှိနေသည်။

ပြည်ထောင်စုအစိုးရအဖွဲ့ကို တွေ့ရစဉ်

နစကအနေဖြင့် မည်သည့် နိုင်ငံရေးပါတီကိုမှ ကိုယ်စားမပြုသော်လည်း နိုင်ငံရေး လုပ်ဆောင်နေကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
၎င်းက “အဲဒါတော့ သူက တစ်စိတ်တစ်ပိုင်း ဝန်ခံလိုက်တာပေါ့ဗျာ၊ ပြောချင်တဲ့ အဓိပ္ပာယ်က စစ်ကောင်စီဟာ ဘယ်နိုင်ငံရေးပါတီမှ ကိုယ်စားမပြုဘူး။ ဒါပေမဲ့ နိုင်ငံရေးကတော့ လုပ်နေတာပဲ၊ လုပ်နေတဲ့ နိုင်ငံရေးက စစ်အာဏာရှင်စနစ် သက်ဆိုးရှည်ရေးအတွက် ၂၀၀၈ ဖွဲ့စည်းပုံကို ဖက်တွယ်ပြီးတော့ ဒီနေ့ ကြိုးပမ်းနေတာ ဖြစ်ပါတယ်။ ဒါကြောင့် သူတို့က နိုင်ငံရေးအစိုးရ မဟုတ်ပေမယ့် သူတို့လည်း နိုင်ငံရေး အလုပ်တွေတော့ လုပ်နေ ကြတာပဲ၊ အခုကို ရွေးကောက်ပွဲကျင်းပဖို့၊ လူဦးရေစာရင်း ကောက်ဖို့ဆိုတာလည်း သူတို့ လုပ်နေတာပဲ၊ နိုင်ငံရေး ပါတီ တစ်ရပ်အဖြစ် နာမည်မခံတာကတော့ ရွေးကောက်ပွဲနဲ့ လူထုထောက်ခံမှုနဲ့ တက်လာတဲ့ အစိုးရမဟုတ်ဘဲနဲ့ အာဏာသိမ်းအစိုးရအဖြစ် တက်လာတဲ့ စစ်ကောင်စီ ဖြစ်တယ်ဆိုတာကို တစ်စိတ်တစ်ပိုင်းက သူဝန်ခံတဲ့ သဘော ပါ” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့က နိုင်ငံတော်ကို အရေးပေါ်ကြေညာကာ မြန်မာ့တပ်မတော်က အာဏာရ ယူခဲ့သည်မှာ လာမည့် ၂၀၂၄ ခုနှစ်၊ ဖေဖော်ဝါရီ ၁ ရက်နေ့တွင် ၃ နှစ်ပြည့်မည် ဖြစ်သည်။

နစကမှာ နိုင်ငံရေးအစိုးရ မဟုတ်ဟု ပြောဆိုမှုမှာ လုံလောက်မှု မရှိကြောင်း၊ နိုင်ငံရေးသမားများပါဝင်သော အစိုးရ တစ်ရပ် ဖော်ဆောင်သင့်ကြောင်း နိုင်ငံရေးလေ့လာသုံးသပ်သူ ဦးသက်ဇော်က CNI သတင်းဌာနသို့ ပြောသည်။

တိုင်းဒေသကြီးနဲ့ပြည်နယ်၀န်ကြီးချုပ်များကို တွေ့ရစဉ်

၎င်းက “သူကတော့ ဟုတ်တယ်လေ၊ သူက နိုင်ငံရေးပါတီမှ မဟုတ်ဘဲနဲ့ နိုင်ငံရေးအစိုးရတော့ မဟုတ်ဘူးပေါ့၊ နိုင်ငံရေး အစိုးရဆိုတာတော့ နိုင်ငံရေးပါတီ ရွေးချယ်ခံအစိုးရဖြစ်လာမှ ဒါရှင်းရှင်းပြောရရင်တော့ အပြည်ပြည် ဆိုင်ရာမှာရော နိုင်ငံတကာမှာရော တကယ်ကို တင်းပြည့်ကျပ်ပြည့် ပြောနိုင်ဆိုနိုင်တဲ့ အစိုးရတစ်ရပ်ဖြစ်လာမှာ လေ၊ ခုဟာက တင်းပြည့်ကျပ်ပြည့် အစိုးရတော့ မဖြစ်သေးဘူးလို့ ဆရာတို့ ဒီလိုပဲ မှတ်ချက်ပြုပါတယ်။ ဘာလို့လဲ ဆိုတော့ ရွေးချယ်ခံပုဂ္ဂိုလ်တွေနဲ့ လုပ်မှသာလျှင် နိုင်ငံတကာကလည်း လက်ခံလာလိမ့်မယ်လို့ ယူဆတယ်၊ ဒါမှ နိုင်ငံတကာရဲ့ ရင်းနှီးမြှပ်နှံမှုတွေ ဝင်လာမယ်၊ အပြည်ပြည်ဆိုင်ရာက အကူအညီ အထောက်အပံ့တွေ ဝင်လာမယ်၊ ခုချမှတ်ထားတဲ့ resolutions တွေ၊ sanctions တွေကိုလည်း ပယ်ဖျက်နိုင်အောင် ကြိုးစားရမယ်၊ စီးပွားရေး လုပ်ငန်းလုပ်တဲ့အခါမှာလည်း ဒီပိတ်ဆို့မှုတွေကြောင့် အများကြီး နှောင့်နှေးကြန့်ကြာပြီးတော့ ဆုံးရှုံးမှု ဖြစ်နေတာ ကလည်း အများကြီးပါ။ ဒါကြောင့်မို့လို့ နိုင်ငံရေးအစိုးရ မဟုတ်ဘူးဆိုတဲ့ တစ်ခုတည်းကြောင့်တော့ ပြောရင်တော့ နည်းနည်းတော့ မလုံလောက်ဘူးပေါ့နော်၊ တကယ်နိုင်ငံရေးသမားတွေ ပါဝင်တဲ့အစိုးရ တစ်ရပ်ကိုတော့ ဖော်ဆောင်ပေးသင့်တယ်လို့ တိုက်တွန်းပါတယ်” ဟု ပြောသည်။

ပြီးခဲ့သည့် ၂၀၂၃ ခုနှစ်၊ ဇူလိုင် ၃၁ ရက်နေ့က ကျင်းပသည့် အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေးတွင် ဖွဲ့စည်းပုံအခြေခံဥပဒေပုဒ်မ ၄၂၅ အရ ၆ လသက်တမ်း ဒုတိယအကြိမ် တိုးခဲ့ရာ လာမည့် ဇန်နဝါရီ ၃၁ ရက်နေ့၌ သက်တမ်းကုန်ဆုံးတော့မည် ဖြစ်သည်။

CNI News

၂၀၂၄ ခုနှစ်၊ ဇန်နဝါရီ ၃၀

လာအိုနိုင်ငံတွင် ကျင်းပသည့် နိုင်ငံခြားရေးဝန်ကြီးများ အစည်းအဝေးကို မြန်မာကိုယ်စားလှယ် အနေဖြင့် နစက၏ နိုင်ငံခြားရေးဝန်ကြီးဌာနမှ ဝန်ထမ်းတစ်ဦး တက်ရောက် ဆွေးနွေးကြောင်း သိရသည်။

အဆိုပါ အစည်းအဝေးကို ၂၀၂၄ ခုနှစ်၊ ဇန်နဝါရီ ၂၉ ရက်နေ့က စတင် ကျင်းပခြင်း ဖြစ်သည်။

မြန်မာ့အရေးနှင့် တောင်တရုတ်ပင်လယ် အရေးကို အဓိက ဆွေးနွေးသွားမည်ဟု လာအိုနိုင်ငံခြားရေးဝန်ကြီး မစ္စတာ ဆလေးမက်ဆေ ကိုမက်ဆစ်က ပြောသည်။

၂၀၂၁ ခုနှစ်၊ ဖေဖော်ဝါရီလတွင် နိုင်ငံတော်အာဏာကို ရယူခဲ့သည့် တပ်မတော်ခေါင်းဆောင်များက လာအို နိုင်ငံ၏ သမိုင်းဝင် လူအန်ပါရာဘန် (Luang Prabang) မြို့၌ ကျင်းပနေသော အာဆီယံအစည်းအဝေးကို တက်ရောက်ရန် ပထမဆုံးအကြိမ်အဖြစ် ထိပ်သီးကိုယ်စားလှယ်တစ်ဦး စေလွှတ်ခဲ့ခြင်းသည် ကောင်းမွန်သည့် လက္ခဏာတစ်ရပ် ဖြစ်သည်ဟု ၎င်းက ပြောကြားခဲ့သည်ဟု အေပီမှ ဖော်ပြခဲ့သည်။

 ၂၀၂၄ ခုနှစ်၊ ဇန်နဝါရီ ၂၉ ရက်နေ့က နစကကိုယ်စားလှယ်ကို အာဆီယံနိုင်ငံခြားရေးဝန်ကြီးများ အစည်းအဝေးမှာ တွေ့ရစဉ်

"မြန်မာနိုင်ငံမှာ ဖြစ်ပွားနေတဲ့ အခြေအနေတွေကို ညတွင်းချင်းဖြေရှင်းလို့ မရဘူးဆိုတာ ကျနော်တို့ ဝန်ခံရမှာ ဖြစ်ပေမယ့် ထိတွေ့ဆက်ဆံမှုတွေဟာ အလုပ်ဖြစ်တယ်ဆိုတာ ကောင်းတဲ့ဘက်ကနေ ခံစားသိရှိရပါတယ်" ဟု ကိုမက်ဆစ်က ပြောကြားခဲ့သည်။ 

မြန်မာနိုင်ငံသည် ၂၀၂၁ ခုနှစ်ကုန်ပိုင်းကတည်းက အာဆီယံထိပ်သီး အစည်းအဝေးများကို နိုင်ငံရေးကိုယ်စား လှယ် သို့မဟုတ် နိုင်ငံခြားရေးဝန်ကြီး စေလွှတ်ခြင်းမှ တားမြစ်ခံခဲ့ရသည်။

သို့သော် လာအိုတွင် ပြုလုပ်သည့် အစည်းအဝေးကိုမူ မြန်မာနိုင်ငံခြားရေးဝန်ကြီးဌာနမှ ပြည်သူ့ဝန်ထမ်းတစ်ဦး ကို စေလွှတ်ခဲ့ကြောင်း အာဆီယံ အမြဲတမ်းအတွင်းရေးမှူး မာလာ သန်းထိုက် (Marlar Than Htike) က ပြော ကြားခဲ့သည်ဟု အေပီမှ ဖော်ပြခဲ့သည်။

နစကဘက်ကတော့ လာအိုနိုင်ငံတွင် ကျင်းပနေသည့် နိုင်ငံခြားရေးဝန်ကြီးများ အစည်းအဝေး၌ မည်သူကို ကိုယ်စားလှယ်အဖြစ် စေလွှတ်ခဲ့ကြောင်း ထုတ်ပြန်ထားခြင်း မရှိပေ။

CNI News

၂၀၂၄ ခုနှစ်၊ ဇန်နဝါရီ ၂၉

ဖက်ဒရယ်ဒီမိုကရေစီပြည်ထောင်စု တည်ဆောက်နိုင်မှသာ ပြည်ထောင်စု မြန်မာနိုင်ငံ၏ ပြဿနာများကို ဖြေရှင်းနိုင်မည်ဖြစ်ကြောင်း သျှမ်းပြည်ပြန်လည်ထူထောင်ရေးကောင်စီ (RCSS/SSA) က ယနေ့ (ဇန်နဝါရီ ၂၉) မှာ ထုတ်ပြန်ပြောကြားခဲ့သည်။

ဇန်နဝါရီ ၂၆ ရက်မှ ၂၈ ရက်နေ့အထိ RCSS ၏ ဌာနချုပ် လွယ်တိုင်းလျဲန်းတွင် ကျင်းပခဲ့သော နှစ်ပတ်လည်အစည်းအဝေး ထုတ်ပြန်ချက်တွင် ထည့်သွင်းပြောကြားခဲ့ခြင်းဖြစ်ပြီး မြန်မာနိုင်ငံ၏ နိုင်ငံရေးပြဿနာဖြေရှင်းနိုင်ရေးအတွက် သက်ဆိုင်ရာအဖွဲ့အစည်းများနှင့် တွေ့ဆုံညှိနှိုင်းဆွေးနွေးပြီး နိုင်ငံရေးပြဿနာကို တွေ့ဆုံဆွေးနွေးခြင်း နည်းလမ်းဖြင့် ဖြေရှင်းနိုင်ရေး ကြိုးပမ်းသွားမည်ဟု ဖော်ပြထားသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့က ဖြစ်ပေါ်ခဲ့သော နိုင်ငံရေး အပြောင်းအလဲများကြောင့် ပြည်တွင်းမှာ လက်နက်ကိုင်ပဋိပက္ခများ ကျယ်ကျယ်ပြန့်ပြန့် ဖြစ်ပေါ်လျက်ရှိနေပြီး တိုင်းပြည်၏ နိုင်ငံရေး၊ ငြိမ်းချမ်းရေး၊ စီးပွားရေး၊ လူမှုရေး၊ ပညာရေး၊ ကျန်းမာရေး စသည်များမှာ အဘက်ဘက်မှ ယိုယွင်းကျဆင်းလျက်ရှိနေသည်။

RCSS/SSA ဥက္ကဋ္ဌ ဗိုလ်ချုပ်ကြီး ယွက်စစ်

ဖက်ဒရယ်ဒီမိုကရေစီပြည်ထောင်စု တည်ဆောက်မှ နိုင်ငံရေးပြဿနာ ပြေငြိမ်းနိုင်မည်ဆိုသည်မှာ မှန်ကန်ကြောင်း၊ သို့သော်လည်း မည်ကဲ့သို့သော ဖက်ဒရယ်ပုံစံတည်ဆောက်မည်ဆိုသည်ကို တိုင်းရင်းသားများနှင့် နိုင်ငံသားများ၏ ဆန္ဒသဘောထားရယူရန် လိုအပ်ကြောင်း ပလောင်နိုင်ငံရေးသမား မိုင်းအုမ်းခိုင်က CNI သတင်းဌာနကို ပြောသည်။

၎င်းက “ဒါကတော့ မှန်ပါတယ်၊ ဒါကတော့ ဖက်ဒရယ်ပြည်ထောင်စု ဖွဲ့စည်းထူထောင်မှပဲ ဒါနိုင်ငံရေးပြဿနာ ပြေငြိမ်းနိုင်မယ်လေ၊ ဒါက မှန်ပါတယ်။ တချို့ကြေညာချက် အသေးစိတ်ကတော့ ဘယ်လိုဖော်ပြထားသလဲ ကျနော်လည်း မတွေ့သေးဘူးပေါ့လေ၊ မှန်ပါတယ်၊ အဲဒါကတော့ ထောက်ခံပါတယ်။ ဖက်ဒရယ်ပုံစံကတော့ အမျိုးမျိုး ရှိတာပေါ့လေ၊ ကျနော်တို့ ဒီမှာရှိတဲ့ နိုင်ငံသားအားလုံး တိုင်းရင်းသားအားလုံး စုပေါင်းပြီးမှ ဘယ်ပုံစံဖွဲ့စည်းမလဲဆိုတာ ကျနော်တို့ ဆန္ဒရယူပြီးမှ ဖွဲ့စည်းတာ အကောင်းဆုံးပဲပေါ့” ဟု ပြောသည်။

ထို့အတူ နိုင်ငံရေးပြဿနာ ဖြေရှင်းနိုင်ရေး အာဆီယံအနေဖြင့်လည်း အလေးအနက်ထားပြီး ကြားဝင်ဖြေရင်းပေးနိုင်ရန် တိုက်တွန်းကြောင်းလည်း RCSS ၏ ထုတ်ပြန်ချက်တွင် ဖော်ပြထားသည်။

NCA ၈ နှစ်ပြည့် အခမ်းအနားကျင်းပစဉ်

သျှမ်းပြည်အမျိုးသား စည်းလုံးညီညွတ်ရေးကို ရေရှည်တည်တံ့ ခိုင်မြဲရန် ကြိုးပမ်းဆောင်ရွက်သွားမည် ဖြစ်ပြီး RCSS ထိန်းချုပ်နယ်မြေအတွင်း မူးယစ်ဆေးဝါးတိုက်ဖျက်ရေးလုပ်ငန်း၊ အွန်လိုင်းငွေကြေး လိမ်လည်ခြင်း (ကျားဖြန့်) ပိတ်ပင်တားဆီးရေး လုပ်ငန်းနှင့် လူကုန်ကူးမှု တားဆီးရေးလုပ်ငန်းတို့အား ဆောင်ရွက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

သျှမ်းပြည်ပြန်လည်ထူထောင်ရေးကောင်စီ (RCSS/SSA) သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် လက်မှတ်ရေးထိုးထားသော ရှမ်းလက်နက်ကိုင်တပ်ဖွဲ့ဖြစ်သည်။

CNI News
၂၀၂၄ ခုနှစ်၊ ဇန်နဝါရီ ၂၇

ရှမ်းနီတိုင်းရင်းသား လူမျိုးများအပေါ် လက်နက်ကိုင် အနိုင်ကျင့် သတ်ဖြတ်မှုများအား ရှမ်းနီတိုင်းရင်းသားများက ဆန့်ကျင်ဆန္ဒပြခဲ့ကြသည်။

အဆိုပါ ဆန္ဒပြပွဲကို စစ်ကိုင်းတိုင်းဒေသကြီး၊ ဟုမ္မလင်းမြို့တွင် ၂၀၂၄ ခုနှစ်၊ ဇန်နဝါရီ ၂၇ ရက်နေ့ ၌ ဒေသခံ ၄၀၀၀ ကျော်က ပြုလုပ်ခဲ့ကြခြင်းဖြစ်သည်။

ရှမ်းနီတိုင်းရင်းသားများကို ကချင်လွတ်လပ်ရေး တပ်မတော်(KIA)၊ ကူကီးအမျိုးသားများတပ်မ တော်(KNA/KNO)တို့က ဖမ်းဆီးသတ်ဖြတ်မှုများ ပြုလုပ်ခဲ့သည်ဟု ရှမ်းနီတိုင်းရင်းသားများက ပြောသည်။

ကူကီးအဖွဲ့ KNA/KNO သည် ၂၀၂၃ ခုနှစ်၊ နိုဝင်ဘာလက တမူးမြို့နယ်၊ သနန်ကျေးရွာသား ရှမ်းနီလူမျိုး ၃၇ ဦးကိုလည်းကောင်း၊ ၂၀၂၄ ခုနှစ်၊ ဇန်နဝါရီလက သနန်ကျေးရွာသား ရှမ်းနီလူမျိုး ၄ ဦးကိုလည်းကောင်း သတ်ဖြတ်ခဲ့သည်။

အလားတူ KIA-PDF ပူးပေါင်းအဖွဲ့ကလည်း ဗန်းမောက်မြို့နယ်တွင် ရှမ်းနီလူမျိုး ဦးဇင်းတစ်ပါး အပါအဝင် ရှမ်းနီလူငယ်များ၊ ရှမ်းနီပါတီဝင်များ၊ ရှမ်းနီစာပေနှင့်ယဉ်ကျေးမှုအသင်းဝင်များကို သတ်ဖြတ်ခဲ့သည်ဟု ရှမ်းနီတိုင်းရင်းသားများက ပြောသည်။

CNI News

၂၀၂၄ ခုနှစ်၊ ဇန်နဝါရီ ၂၆

ပြည်သူများ ကိုယ်တိုင်ပူးပေါင်းပါဝင်သည့် ပြည်သူ့လုံခြုံရေးမှာ အလွန်ထိရောက်ကြောင်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က နိုင်ငံရေးပါတီများဖြင့် တွေ့ဆုံစဉ် ပြောကြားခဲ့ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနကို ပြောသည်။

ဇန်နဝါရီလအစောပိုင်းက တွေ့ဆုံစဉ်ပြောကြားခဲ့ခြင်းဖြစ်ပြီး နိုင်ငံရေးပါတီများ အနေဖြင့်လည်း ပူးပေါင်းပါဝင်ပါက ကောင်းမွန်ကြောင်းနှင့် တည်ငြိမ်အေးချမ်းမှုလို၍ ညွှန်းဆိုခြင်းဖြစ်ကြောင်း ၎င်းက ပြောသည်။

“တနည်းအားဖြင့် ပြည်သူတွေရဲ့ လုံခြုံရေး၊ ကိုယ့်အိမ်၊ ကိုယ့်မိသားစု၊ ကိုယ့်ပတ်ဝန်းကျင်၊ ကိုယ့်ရပ်ကွက် လုံခြုံရေးကို ကိုယ်တို့ကိုယ်တိုင် လုံခြုံမှုအဖွဲ့အစည်းကို သတင်းပို့မှပဲ ကိုယ်တို့ကိုယ်တိုင်အန္တရာယ်တွင်းထဲမှာ မကျရောက်နိုင်အောင် အကာအကွယ်ပြုသလို ဖြစ်တယ်ဆိုတဲ့ ပြည်သူတွေကိုယ်တိုင် သိလာတဲ့ ပြည်သူတွေ ကိုယ်တိုင်ပူးပေါင်းပါဝင်တဲ့ ပြည်သူ့လုံခြုံရေးဆိုတာ အလွန်တရာထိရောက်တယ်ဆိုတာ သူဥပမာလေးနဲ့ ပြောတာပါ။ အဲဒီတော့ ပါတီတွေဖက်ကို ပြောတာက ပါတီတွေဆိုတာ ဖက်ဒရယ်ဒီမိုကရေစီစနစ်ကို ယုံကြည်ပြီးမှ ထူထောင်ထားကြတဲ့ ပါတီဖြစ်တယ်၊ ပါတီစုံစနစ်ကို အားပေး ကူညီကြတယ်။ အဲဒါကြောင့် ပါတီဆိုတာလည်းပဲ ပါတီရဲ့ မူဝါဒအရ ပါတီရဲ့ လမ်းညွန်မှုကို ခံကြတဲ့ ပါတီဝင်ထုတွေနဲ့ ဖွဲ့စည်းထားတဲ့အခါမှာ ခုနားက ကဏ္ဍတွေမှာ ပူးပေါင်းပါဝင်ဖို့ လိုတယ်၊ ပူးပေါင်းပါဝင်ရင်ကောင်းတယ်၊ ဒီမိုကရေစီကျင့်စဉ်အရ တည်ငြိမ်အေးချမ်းတဲ့ အခင်းအကျင်းတစ်ခု ပြီးတဲ့နောက်မှာ ရွေးကောက်ပွဲ ဝင်ကြမယ်ဆိုတဲ့အခါမှာ တည်ငြိမ်အေးချမ်းမှု လိုချင်တာမျိုး ဒီလိုပဲ ညွန်းတာပါ၊ ပါဝင်မှ ဖြစ်မယ်၊ ပါဝင်ရမယ်လို့ မသုံးနှုန်းပါဘူး” ဟု ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က နိုင်ငံရေးအပြောင်းအလဲများကြောင့် တိုင်းပြည်မှာ အကျပ်အတည်းများ၊ စီးပွားရေး ကျဆင်းမှုများ ကြုံတွေ့နေရသည်။

မြန်မာ့တပ်မတော်နှင့် ပြည်သူ့စစ်အားတွေ့ရစဥ်

ထို့အတူ ပြည်သူလူထုများမှာလည်း စားဝတ်နေရေးအတွက် နေ့စဉ်ရုန်းကန်နေရပြီး လုံခြုံမှုမရှိခြင်း၊ ကုန်ဈေးနှုန်းကြီးမြင့်ခြင်း စသော အထွေထွေအကျပ်အတည်းများ ရင်ဆိုင်နေကြရသလို မကြာခဏ လုပ်ကြံသတ်ဖြတ်မှု၊ မိုင်းထောင်ဖောက်ခွဲမှုများလည်း ကြုံတွေ့နေကြရသည်။

လက်နက်ကိုင်အဖွဲ့အစည်း နှစ်ခုအားပြိုင်မှု ဖြစ်လာပါက မထင်မှတ်သော ထိတွေ့တိုက်ခိုက်မှုများ ဖြစ်လာနိုင်ကြောင်း နိုင်ငံရေး လေ့လာသုံးသပ်သူ ဦးသက်ဇော်က CNI သတင်းဌာနကို ပြောသည်။

၎င်းက “ပြည်သူ့လုံခြုံရေးကတော့ ရှင်းရှင်းပြောရရင်တော့ ဟိုဖက်ကလည်း ပြည်သူ့ကာကွယ်ရေးတပ်ဖွဲ့ဆိုတော့ ဒီဖက်ကလည်း ပြည်သူ့လုံခြုံရေး ဖွဲ့ကြတာပေါ့ဗျာ၊ အဖွဲ့နှစ်ဖွဲ့ အားပြိုင်ရင်လည်း ကြားထဲမှာတော့ မထင်မှတ်နိုင်တဲ့ ထိတွေ့တိုက်ခိုက်မှုတွေတော့ ဖြစ်လာနိုင်စရာတော့ လမ်းတော့ မြင်တာပေါ့ဗျာ၊ သတ်ဖြတ်မှုတွေလည်း ဖြစ်လာနိုင်တယ်လို့ ဆရာတို့ မျှော်လင့်တယ်၊ တကယ်တော့ ပြည်သူ့လုံခြုံရေး အဖွဲ့ဆိုတာလည်း ပြည်သူတွေ ကာကွယ်ရေးအတွက်ကိုတော့ လိုအပ်တဲ့အဖွဲ့ပါပဲ၊ အဲဒီလိုပဲ ယူဆပါတယ်” ဟု ပြောသည်။

လက်ရှိ ပြည်တွင်း လက်နက်ကိုင်ပဋိပက္ခများကြောင့် ပြည်သူလူထု အများအပြား သေဆုံးခဲ့ရပြီး နေအိမ်ပျက်စီး မီးလောင်မှု၊ ဒေသခံအများစု ဘေးလွတ်ရာ ထွက်ပြေးတိမ်းရှောင်မှုများ ဖြစ်ပွားလျက်ရှိနေသည်။

၎င်း လက်နက်ကိုင်ပဋိပက္ခအား ဖြေရှင်းနိုင်ရေး တိုင်းရင်းသားလက်နက်ကိုင်အဖွဲ့အစည်းအချို့၊ နိုင်ငံရေးပါတီအချို့၊ အာဆီယံ အပါအဝင် နိုင်ငံတကာအဖွဲ့အစည်းများက ကြိုးပမ်းနေသည့်တိုင် ပြေလည်နိုင်ခြင်း မရှိဘဲ ဖြစ်နေသည်။

CNI News

၂၀၂၄ ခုနှစ်၊ ဇန်နဝါရီ ၂၅

လူထုထိခိုက်မည့် နည်းလမ်းကို ရွေးချယ်မှာ မဟုတ်ကြောင်း ပအိုဝ်းအမျိုးသားအဖွဲ့ချုပ် (PNO) မှ ဗဟိုအလုပ်မှုဆောင် စောခွန်ကျော်ဝင်းက CNI သတင်းဌာနကို ပြောသည်။

လက်ရှိတွင် ရှမ်းပြည်နယ်တောင်ပိုင်း ဆီဆိုင်မြို့ကို ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO)နှင့် ကရင်နီအမျိုးသား ကာကွယ်ရေးတပ်ဖွဲ့KNDF၊ ပြည်သူ့ကာကွယ်ရေးတပ် (PDF) ပူးပေါင်းတပ်ဖွဲ့တို့က ဇန်နဝါရီ ၂၄ ရက်က ဝင်ရောက်တိုက်ခိုက်ခဲ့သည်။

၎င်းတို့အနေဖြင့် မြန်မာ့တပ်မတော်နှင့် PNO စစ်ဆေးရေးဂိတ်တို့ကို ဝင်ရောက်တိုက်ခိုက်ခဲ့ပြီး ဆီဆိုင်မြို့ခံများလည်း ဘေးလွှတ်ရာသို့ တိမ်းရှောင်လျက်ရှိကြောင်း သိရသည်။

စောခွန်ကျော်ဝင်းက “PNO ရဲ့ မူကတော့ နဂိုကတည်းက ကျနော်ကတော့ လက်နက်ကိုင်အနေနဲ့ ပြောတာမဟုတ်ဘူး။ နိုင်ငံရေးပါတီအနေနဲ့ ပြောတာပေါ့နော်၊ ကျနော်မှာ အားလုံးက မိတ်ဆွေအနေနဲ့ပဲ သတ်မှတ်တာပေါ့လေ၊ ရန်သူမရှိဘူးပေါ့နော်၊ နောက်တစ်ခု သူတို့မူကတော့ လုပ်တဲ့ လုပ်ငန်းစဉ်တွေအားလုံးက လူထုထိခိုက်မယ့် နည်းလမ်းကို ကျနော်တို့ မရွေးဘူး။ လူထုနစ်နာမယ့်အလုပ်ကို ကျနော်တို့ မလုပ်ဘူးပေါ့နော်၊ ဖြစ်လာခဲ့ရင် အထိအခိုက်အနည်းဆုံး ဖြစ်အောင်တော့ ကျနော်တို့ ကြိုးစားတယ်။ အဲဒီမူနဲ့ သွားမှာပေါ့နော်၊ သက်ဆိုင်ရာ အဖွဲ့အစည်းက သူ့အလုပ်သူလုပ်ကြတာပေါ့နော်၊ ကျနော်တို့ကတော့ လောလောဆယ်ကတော့ အဲဒီမူနဲ့ သွားတာပေါ့နော်၊ နဂိုကတည်းက ခေါင်းဆောင်ပိုင်းတော့ အမြဲတမ်း ဆွေးနွေးပြောဆိုတာ အမြဲတမ်းရှိပါတယ်” ဟု ပြောသည်။

ဆီဆိုင်မြို့ကို ဝင်ရောက်တိုက်ခိုက်ခြင်းနှင့် ပတ်သက်၍ အကြောင်းအရာ အပြည့်အစုံကို သိရှိနိုင်ရေး PNLO မှာ တာဝန်ရှိသူများထံ ဆက်သွယ်ခဲ့သော်လည်း လက်ခံဖြေကြားခြင်း မရှိပေ။

လက်ရှိတွင် ဆီဆိုင်မြို့ခံများ နီးစပ်ရာ တောင်ကြီး၊ ဟိုပုံးတို့ တိမ်းရှောင်လာကြောင်း၊ တိုက်ပွဲရှောင် လူဦးရေ အတိအကျမသိရှိသေးကြောင်း တိုက်ပွဲရှောင်များကို အကူအညီပေးနေသူ တောင်ကြီးဒေသခံတစ်ဦးက CNI သတင်းဌာနကို ပြောသည်။

တော်လှန်ရေးအင်အားစုများကို တွေ့ရစဉ်

၎င်းက “ဟုတ်တယ်ဗျ၊ အခုဆီဆိုင်ထဲမှာတော့ လုံးဝတိတ်ဆိတ်သလောက်တော့ ရှိသွားမှာပေါ့။ သူသူကိုယ်ကိုယ် အလျှိုလျှိုထွက်နေကြတာဆိုတော့လေ၊ လောလောဆယ်တော့ ကျနော်တို့လည်း စာရင်းတော့ အတိအကျ မသိသေးဘူးဗျ၊ ဆက်သွယ်လာတာတွေလည်း ရှိတယ်‌။ မေးလာတာတွေလည်း ရှိတယ်။ တချို့က အကူအညီတောင်းလာတာတွေလည်း ရှိတယ်လေ၊ သူတို့က ဘယ်ကိုသွားလာနေထိုင်ကြမလဲဆိုတာလည်း မသိသေးဘူးပေါ့နော်၊ ဒါပေမဲ့ ဒီဖက်ကို များသောအားဖြင့် ဒီတောင်ကြီးနယ်ဖက် ရွေ့လာကြတာတော့ များတယ်၊ ကျနော်တို့က အခြားဟာမဟုတ်ဘူး။ ဘယ်လိုပြောမလဲဆိုရင် လမ်းစရိတ်မရှိဘူး။ ကားမရှိဘူး။ အကုန်ဒုက္ခအကြီးအကျယ်ရောက်နေတယ်၊ ကျနော်တို့က လမ်းစရိတ် ဓါတ်ဆီဖိုးအနေနဲ့ အဲဒီလိုမျိုးလေး အကူအညီပေးဖို့ ရှိတာပါ” ဟု ပြောသည်။

ပြီးခဲ့သည့် ဇန်နဝါရီလ ၂၁ ရက် နံနက်အစောပိုင်းတွင် ဟိုပုံးမြို့နယ်၊ စံဖူးကျေးရွာအနီးတွင် PNO/PNA နှင့် PNLA တို့ တိုက်ပွဲဖြစ်ပွားခဲ့ပြီးနောက် စံဖူးကျေးရွာ ဒေသခံတို့၏ နေအိမ် ၂၇ လုံး မီးလောင်ပျက်စီးမှုဖြစ်ပွားခဲ့သည်။

PNO/PNA သည် ၁၉၉၁ ခုနှစ်က တပ်မတော်နှင့် ငြိမ်းချမ်းရေး ရယူခဲ့ပြီးနောက် ပအိုဝ်းဒေသကို အထူးဒေသ ၆ အဖြစ် သတ်မှတ်ပေးကာ ကိုယ်ပိုင်အုပ်ချုပ်ခဲ့သည်။

ထို့နောက် ၂၀၁၀ ခုနှစ်တွင် ပအိုဝ်းပြည်သူ့စစ်အဖွဲ့/ပအိုဝ်းအမျိုးသားတပ်မတော်(PNO/PNA)အဖြစ် ပြောင်းလဲခဲ့သလို ပြည်ထောင်စုရွေးကောက်ပွဲကော်မရှင်မှာလည်း ပအိုဝ်းအမျိုးသားအဖွဲ့ချုပ်(PNO)နာမည်ဖြင့် နိုင်ငံရေးပါတီ အနေနှင့် မှတ်ပုံတင်ခဲ့သည်။

ထို့ကြောင့် PNO သည် ပြည်သူ့စစ်နှင့် နိုင်ငံရေးပါတီဟုဆိုကာ အသွင်နှစ်မျိုးဖြစ် ရပ်တည်လျက်ရှိပြီး ပင်လောင်း မြို့နယ်၊ ဆီဆိုင်မြို့နယ်၊ ဟိုပုန်းမြို့နယ်တို့ ပါဝင်သော ပအိုဝ်းကိုယ်ပိုင်အုပ်ချုပ်ခွင့်ရဒေသအား စီမံအုပ်ချုပ် လျက်ရှိသည်။

PNLO/PNLA သည် ရှမ်းပြည်နယ်(တောင်ပိုင်း) ဆီဆိုင်၊ ဟိုပုန်း၊ မောက်မယ် ဒေသများတွင် လှုပ်ရှား လျက်ရှိပြီး မောက်မယ်တွင် ဌာနချုပ်အဖြစ် သတ်မှတ်ထားသည်။