CNI News

၂၀၂၄ ခုနှစ်၊ ဖေဖော်ဝါရီ ၇

ယခု ၂၀၂၄ ခုနှစ်ကို မြန်မာ့တပ်မတော်အား အပြီးတိုင်ချေမှုန်းမည့် မှတ်တိုင်နှစ်ဖြစ်ကြောင်း အမျိုးသားညီညွတ် ရေးအစိုးရ(NUG)၏ ပြည်ထောင်စုဝန်ကြီး မန်းဝင်းခိုင်သန်းက ပြည်ထောင်စုလွှတ်တော် အစည်းအဝေးတွင် ပြောကြားသွားသည်။

တပ်မတော်အလွန် နိုင်ငံရေး၊ စီးပွားရေး၊ လူမှုရေးများ တည်ငြိမ်စေရေးနှင့် အသွင်ကူးပြောင်းရေးကာလ ချောမွေ့စွာ ရောက်ရှိပြီး ကျူးလွန်သူများအား တရားစီရင်နိုင်ရေးကိုလည်း ဆောင်ရွက်သွားမည်ဖြစ်ကြောင်း ၎င်းက ပြောသည်။

မန်းဝင်းခိုင်သန်းက “၂၀၂၄ ခုနှစ်၊ စစ်ကောင်စီကို အပြီးတိုင်ချေမှုန်းမယ့်နှစ်မှာ ကျနော်တို့ ရှင်းလင်းပြီး မဟာမိတ်များ ပိုမိုအင်အားကောင်းလာရေး၊ တော်လှန်ရေးအတွက် ရင်ဘတ်ချင်းတူ ရည်ရွယ်ချက်ချင်းတူတဲ့ အင်အားတူအားလုံးနဲ့ ချိတ်ဆက်ဆောင်ရွက်နိုင်ရေး စစ်မှန်တဲ့ ဖက်ဒရယ်ဒီမိုကရေစီအတွက် အခြေခံအုတ်မြစ်များ တည်ဆောက်နိုင်ရေး၊ စစ်ကောင်စီအလွန် နိုင်ငံရေး၊ စီးပွားရေး၊ လူမှုရေးများ တည်ငြိမ်စေရေး၊ အသွင်ကူးပြောင်း ရေးကာလ ချောမွေ့စွာရောက်ရှိပြီး ကျူးလွန်သူများကို တရားမျှတမှုအတွက် လူထုထိခိုက်မှုများ ပြန်လည်ကုစား နိုင်ရေးအတွက် တရားစီရင်နိုင်ရေးတို့ကို ကြိုးစားဆောင်ရွက်သွားမယ် ဆိုတာကိုလည်း ပြည်သူ့ကိုယ်စားလှယ် ကြီးများ ရှေ့မှောက်မှာ ကတိပြု ပြောကြားလိုပါတယ်။ အထက်ပါ တင်ပြခဲ့သလို ၂၀၂၁ ဆန့်ကျင်ရေး၊ ၂၀၂၂ အခိုင်အမာ၊ ၂၀၂၃ စုစည်းအပြီးမှာ ၂၀၂၄ ခုနှစ်မှာတော့ အကြမ်းဖက် စစ်အာဏာရှင်စနစ် အပြီးသတ်ချေမှုန်းမယ့် မှတ်တိုင်နှစ်အဖြစ် မဟာမိတ်များနှင့် အားလုံးအတူတကွ အစွမ်းကုန် ပူးပေါင်းဆောင်ရွက် သွားကြဖို့ရန် ကျနော် တို့ အစိုးရမှ အသင့်ဖြစ်နေပြီဖြစ်ကြောင်းကို အမျိုးသားညီညွတ်ရေးအစိုးရကိုယ်စား လေးလေးနက်နက် ကတိပြု ပြောကြားရင်း နိဂုံးချုပ်ပါတယ်” ဟု ပြောသည်။

 NUG အဖွဲ့ကိုတွေ့ရစဉ်

ပြီးခဲ့သည့် ဇန်နဝါရီလ ၃၁ ရက်နေ့က NUG မှ ထုတ်ပြန် ကြေညာခဲ့သော ဘုံသဘောထားရပ်တည်ချက်တွင် စစ်အာဏာရှင်စနစ် ချုပ်ငြိမ်းရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးတို့ ပါဝင်သည်။

အဆိုပါ ဘုံသဘောတူညီချက်ကို [K3C] ဟုခေါ်သော ကချင်လွတ်လပ်ရေးအဖွဲ့ (KIO)၊ ကရင်အမျိုးသား အစည်းအရုံး (KNU)၊ ကရင်နီအမျိုးသားတိုးတက်ရေးပါတီ (KNPP) နှင့် ချင်းအမျိုးသားတပ်ဦး (CNF) စသော  တိုင်းရင်းသား မဟာမိတ် အစုအဖွဲ့များကြားတွင် သဘောတူညီချက်အားဖြင့် ရရှိထားသည့်အချက်များ ဖြစ် ကြောင်း၊ ဆက်လက်၍ တိုင်းရင်းသား မဟာမိတ်အဖွဲ့အစည်းများ စုရုံးသဘောတူညီစေမှုကို ဆက်လက် ကြိုးပမ်းရမှာဖြစ်ကြောင်း NUG ၏ ယာယီသမ္မတဒူဝါလရှီးလက ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်မှ အာဏာရယူပြီးနောက် ဆန့်ကျင်ဆန္ဒပြမှုနှင့်အတူ လက်နက်ဆွဲကိုင် တော်လှန်မှုကို ဒီမိုကရေစီအင်အားစုများက ဆင်နွှဲခဲ့ကြသည်။

ပြည်သူလူထု၏ ဆင်းရဲဒုက္ခကို ငှဲ့ညာ၍ အဖြေတစ်ခုကို ရစေလိုကြောင်း၊ ပြည်သူလူထုများမှာ အကျပ်အတည်း အမျိုးမျိုးကို ရင်ဆိုင်နေကြရကြောင်း မြန်မာ့နိုင်ငံရေးလေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

မြန်မာ့တပ်မတော်ကို တွေ့ရစဉ်

၎င်းက “ကြွေးကြော်သံဆိုတာကတော့ ဒီလိုပဲပေါ့၊ ဒီလိုပဲ ကြွေးကြော်ကြရတာပဲလေ၊ ဒါပေမဲ့လို့ တကယ့် လက်တွေ့နဲ့ကြ အဲဒါက ဖြစ်ချင်လည်း ဖြစ်သွားနိုင်တယ်ပေါ့နော်၊ ဖြစ်သွားနိုင်စရာ အကြောင်းတွေလည်း ရှိတာပေါ့၊ နောက်မဖြစ်နိုင်တဲ့ အကြောင်းလေးတွေကလည်း သူ့ဖက်ကိုယ့်ဖက် ရှိတာပေါ့နော်၊ အဲဒါတော့ ကျနော်တို့တော့ ဘယ်ပါတီဝင်မှ မဟုတ်ဘူးဆိုတော့ ကြားကလူတွေ အမြင်နဲ့ကတော့ အဖြေတစ်ခု ရစေချင်တာ ပေါ့နော်၊ အဖြေတစ်ခုရပြီးတော့ တိုင်းသူပြည်သားတွေ မျက်နှာကို ငှဲ့စေချင်တာပေါ့နော်၊ ငှဲ့စေချင်တယ်။ တိုင်းသူ ပြည်သားတွေ အရမ်းဆင်းရဲ ဒုက္ခရောက်နေတယ်၊ တစ်ဖက်ကလည်း သေဘေးအန္တရာယ်က ပုံသဏ္ဍန်မျိုးစုံနဲ့ သေဘေးနဲ့ ရင်ဆိုင်နေရတယ်၊ အငတ်ဘေးနဲ့ ရင်ဆိုင်နေရပါတယ်။ အဲဒီအခါမှာ စိတ်မကောင်းဘူးပေါ့နော်၊ အဲဒီလိုတော့ ရှိပါတယ်” ဟု ပြောသည်။

လက်ရှိတွင် တိုင်းပြည်တစ်ဝှမ်း မြန်မာ့တပ်မတော်နှင့် တိုင်းရင်းသားလက်နက်ကိုင် အဖွဲ့အစည်းအချို့၊ ပြည်သူ့ ကာကွယ်ရေးတပ် (PDF) ပူးပေါင်းတပ်တို့အကြား တိုက်ပွဲများ ဖြစ်ပွားလျက်ရှိနေသည်။ 

အဆိုပါ တိုက်ပွဲများကြောင့် ပြည်သူလူထုများမှာ စီးပွားရေးအကျပ်အတည်း၊ ခရီးသွားလာမှု အခက်အခဲ၊ မလုံခြုံမှုများ နေ့စဉ်နှင့်အမျှ ခံစားနေကြရသည်။

CNI News

၂၀၂၄ ခုနှစ်၊ ဖေဖော်ဝါရီ ၆

နာဂအမျိုးသားဆိုရှယ်လစ်ကောင်စီ-ကပ္ပလန်/ယုံးအောင်(NSCN-K/YA)အဖွဲ့မှ ဗိုလ်မှူးကြီးဝင်ရမ်းသည် ၂၀၂၄ ခုနှစ်၊ ဖေဖော်ဝါရီ ၅ ရက်နေ့က ကချင်ပြည်နယ်၊ မြစ်ကြီးနားမြို့မှာ ကွယ်လွန်သွားကြောင်း NSCN-K/YA မှ ထုတ်ပြန်ခဲ့သည်။

ဗိုလ်မှူးကြီးဝင်ရမ်းသည် ကချင်ပြည်နယ်၊ မြစ်ကြီးနားမြို့မှာ ကျန်းမာရေး မကောင်းသည့်အတွက် ဆေးကုသမှု ခံယူနေရင် ကွယ်လွန်သွားခဲ့ခြင်း ဖြစ်သည်။

NSCN-K/YA တွင် ဗိုလ်မှူးကြီးဝင်ရမ်းသည် ဒုတိယအတွင်းဝန်ဖြစ်ပြီး ၁၂ နှစ်ကြာ တာဝန်ထမ်းဆောင်ခဲ့သူ ဖြစ်သည်။

ထို့ကြောင့် NSCN-K/YA က အလွန်ဝမ်းနည်းပူဆွေးကြောင်း၊ ဗိုလ်မှူးကြီးဝင်ရမ်းသည် နာဂလူမျိုးများအတွက် နောက်ဆုံးထွက်သက်အထိ ရဲစွမ်းသတ္တိအပြည့်ဖြင့် တာဝန်ထမ်းဆောင်သွားခဲ့ကြောင်း ထုတ်ပြန်ခဲ့သည်။

ဗိုလ်မှူးကြီးဝင်ရမ်း ကွယ်လွန်မှု NSCN-K/YA က ဝမ်းနည်းကြောင်း ထုတ်ပြန်ချက်ကို တွေ့ရစဉ်

နာဂအမျိုးသားဆိုရှယ်လစ်ကောင်စီကို ၁၉၈၀ ခုနှစ်က စတင် ထူထောင်ခဲ့ရာမှ ခေါင်းဆောင်များဖြစ်သည့် ကပ္ပလန်၊ အိုက်ဇက်၊ ဗွီဗားတို့ကြား သဘောထား ကွဲလွဲ၍ ၁၉၈၉ တွင် နာဂအမျိုးသားဆိုရှယ်လစ်ကောင်စီ-ကပ္ပလန်(NSCN-K)နှင့် နာဂအမျိုးသားဆိုရှယ်လစ်ကောင်စီ-အိုက်ဇက်/ဗွီဗား(NSCN-IM)ဆိုပြီး ၂ ဖွဲ့ကွဲသွား သည်။

NSCN-K သည် မြန်မာပြည်မှာ အခြေစိုက်ပြီး NSCN-IM ကတော့ အိန္ဒိယဘက်မှာ အခြေစိုက်၍ နာဂနိုင်ငံရေး ကို ဆောင်ရွက်ကြသည်။

ထို့နောက် NSCN-K ဥက္ကဋ္ဌ ကပ္ပလန်သည် ၂၀၁၇ ခုနှစ်မှာ ကွယ်လွန်သွားခဲ့သည့်အတွက် ဒုဥက္ကဋ္ဌ ဦးခမ်းငေါ် (Khango Konyak)ကို ၂၀၁၈ ခုနှစ်မှာ ဥက္ကဋ္ဌအဖြစ်တင်မြှောက်ပြီး မကြာခင် သြဂုတ် ၁၇ ရက်နေ့တွင် ပြန်လည် ဖြုတ်ချ၍ ဦးယုံးအောင်ကို ဥက္ကဋ္ဌအဖြစ် တင်မြှောက်ခဲ့သည်။

NSCN-K/AM အဖွဲ့ခေါင်းဆောင် အန်းမိုင်ကို တွေ့ရစဉ်

ထို့နောက် ၂၀၂၀ ခုနှစ်၊ ဇူလိုင် ၂၉ ရက်တွင် ဦးယုံးအောင်သည် NSCN-K/YA အဖွဲ့ကနေ ဒုစစ်ဦးစီးချုပ် နီကီဆူမီ၊ ဝန်ကြီး စတားဆမ်၊ စစ်ဦးစီးချုပ် ညမ်လန်တို့ကို ထုတ်ပယ်လိုက်သည့်အတွက် နီကီဆူမီက SNCN-K/ NK ဆိုသော အဖွဲ့အား ထူထောင်၍ အိန္ဒိယအစိုးရနှင့် ၂၀၂၁ ခုနှစ်၊ စက်တင်ဘာ ၈ ရက်မှာ ငြိမ်းချမ်းရေးယူ သွားခဲ့သည်။

အလားတူ ၂၀၂၃ ခုနှစ်အတွင်းမှာလည်း ပြည်ထဲရေးဝန်ကြီး အန်းမိုင်ကို NSCN-K/YA က ထုတ်ပယ်လိုက်သည့် အတွက် NSCN-K/AM ဆိုသော အဖွဲ့ကိုထူထောင်၍ အန်းမိုင်က လှုပ်ရှားလျက်ရှိသည်။

ထို့အပြင် NSCN-K ထဲကနေ ထုတ်ပယ်ခံလိုက်ရသော ဦးအောင်ဆိုင်းနှင့် ဂျင်မီတို့ကလည်း အရှေ့နာဂကာ ကွယ်ရေးတပ်မတော်(ENDA/ENNO)ဆိုသော အဖွဲ့ကို ထူထောင်၍ လှုပ်ရှားလျက်ရှိနေသည်။

CNI News

၂၀၂၄ ခုနှစ်၊ ဖေဖော်ဝါရီ ၆

ယခုနှစ်အတွင်း နစကကို တော်လှန်ရေးအင်အားစုများက ဘယ်လိုပုံစံဖြင့် ဖိအားပေးလာနိုင်သလဲဆိုသည့်အပေါ် နိုင်ငံရေး၊ စစ်ရေးကျွမ်းကျင်သူများက သုံးသပ်ဆွေးနွေးလျက်ရှိနေသည်။

ပြီးခဲ့သည့် ၂၀၂၃ ခုနှစ်၊ နှစ်ကုန်ပိုင်းမှ စတင်ပြီး တိုင်းရင်းသားလက်နက်ကိုင် အဖွဲ့အစည်းများနှင့် တော်လှန်ရေး ပူးပေါင်းတပ်တို့က မြန်မာ့တပ်မတော်၏ စစ်စခန်း၊ စခန်းကုန်းများနှင့် မြို့အချို့ကို သိမ်းယူနိုင်ခဲ့သည်။

ယခုနှစ်တွင် တော်လှန်ရေးအင်အားစုများက မြို့လတ်နှင့် မြို့ငယ်များကို သိမ်းယူလာနိုင်ကြောင်း၊ စစ်ကြောင်း အားလုံး နေပြည်တော်သို့ ချီတက်ကြဆိုသည့် ကြွေးကြော်သံလည်း ထုတ်ထားကြောင်း မြန်မာ့နိုင်ငံရေး လေ့လာ သုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “အခုကတော့ အဲဒီအဆင့် ကနေပြီးတော့ မြို့လတ်နဲ့ မြို့ငယ်တွေ သိမ်းတာပေါ့ဗျာ၊ ဒီလာမယ့် နှစ်ထဲမှာ တော့ မြို့လတ်နဲ့ မြို့ကြီးတွေ သိမ်းမယ့် စစ်ဆင်ရေးတွေ ကျနော်တော့ ထင်ပါတယ်ခင်ဗျ၊ အဲဒါတော့ မြို့လတ်တွေ တကယ်လို့ မြို့လတ်တွေ လွယ်လွယ်ကူကူနဲ့ ရရှိပြီးတော့ စစ်ကောင်စီတပ်ရဲ့ ပြိုကွဲမှုက ဒီထက်ပိုမြန်ဆန်လာရင် တော့ အဲဒီအထိ သွားကြမှာပေါ့ဗျာ၊ စစ်ကြောင်းအားလုံး နေပြည်တော် ချီတက်ကြဆိုတာ သူတို့ ကြွေးကြော်သံ ထုတ်ထားတာ အဲဒီလိုပဲ လုပ်ကြမှာပါ” ဟု ပြောသည်။

ပြီးခဲ့သည့် ၂၀၂၃ ခုနှစ်ကို နွေဦးတော်လှန်ရေး၏ အဆုံးအဖြတ်နှစ်ဟု ကြွေးကြော်ခဲ့သော်လည်း တစ်ဖက်နှင့် တစ်ဖက် အပြတ်အသတ် အနိုင်ယူနိုင်ခဲ့ခြင်း မရှိသည်ကို တွေ့ရသည်။

သို့သော်လည်း ညီနောင်မဟာမိတ်သုံးဖွဲ့က အောက်တိုဘာ ၂၇ ရက်က စတင်ခဲ့သော ၁၀၂၇ စစ်ဆင်ရေးပြီးနောက် မြို့ပေါင်း ၃၉ မြို့အား တော်လှန်ရေးအင်အားစုများက ထိန်းချုပ်ထားနိုင်ခဲ့ကြောင်း အသီးသီး သတင်းထုတ်ပြန်လာ ခဲ့ကြသည်။

လက်ရှိတွင် ပြည်သူလူထုများအနေဖြင့် ငွေကြေးဖောင်းပွမှုကြောင့် ကုန်ဈေးနှုန်း မြင့်တက်လာသလို တော်လှန် ရေးအင်အားစုများ၏ လမ်းပိတ်ဆို့မှု၊ ငွေကြေးကောက်ခံမှုများကြောင့် အကျပ်အတည်းများဖြင့် ကြုံတွေ့နေကြ ရကြောင်း လီဆူအမျိုးသားဖွံ့ဖြိုးတိုးတက်ရေးပါတီ (ဒူးလေးပါတီ) မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

 ချင်းတပ်ဖွဲ့ကို တွေ့ရစဉ်

၎င်းက “ကျနော်တို့ မြင်တာကတော့ ဒီလို ဒုက္ခတော့ ပေးနိုင်တာပေါ့ကွာ၊ ဒါပေမဲ့ ဟိုဖက်ကို တအားကြီး ဟိုဖြစ် အောင်တော့ သူတို့လည်း မလုပ်နိုင်ပါဘူး။ မလုပ်နိုင်ဘူးဆိုတာ သူတို့ ရှင်းရှင်းပြောမယ်ဆိုရင်တော့ ဘာပဲလုပ်လုပ် ငွေရေးကြေးရေးက အရေးကြီးတာပဲ၊ ငွေရေးကြေးရေးက အခုတောင်မှ ပြည်သူတွေက တော်တော်လေး ညည်းပြီ လေ၊ သူတို့ကို ထောက်ပို့လုပ်တဲ့ သူကလည်း ညည်းလာပြီ။ ထောက်ပို့ မလုပ်တဲ့သူကလည်း ဒါကို ရှင်းရှင်းပြောရ မယ်ဆိုရင် ကုန်ဈေးနှုန်းတွေ မြင့်လာတဲ့အခါကြတော့ တစ်ဖက်က ငွေကြေးဖောင်းပွမှုကြောင့် မြင့်လာတာ တစ်မျိုး၊ သူတို့တွေ အခွန်ကြေး၊ ဆက်ကြေးကောက်ပြီးမှ မြင့်တာက တစ်မျိုးဆိုတော့ ပြည်သူတွေက ညည်း လာပြီလေ၊ ဒီလို ဆက်သွားနေရင်တော့ ပြည်သူ ပိုပြီးမှ ညည်းမှာပေါ့။ ပြည်သူမပါတဲ့ အလုပ်မျိုးကတော့ အောင်မြင်မှာတော့ မဟုတ်ဘူးလို့ မြင်တာပေါ့လေ” ဟု ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က တပ်မတော်မှ အမျိုးသားဒီမိုကရေစီအဖွဲ့ချုပ် (NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုကို မဖြေရှင်းပေးဘဲ အစိုးရဖွဲ့စည်းရေး ကြိုးပမ်းသည်ဟု ဆိုကာ ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာကာ တာဝန်ယူလျက်ရှိနေသည်။

ထို့နောက် မြန်မာ့တပ်မတော်နှင့် တိုင်းရင်းသားလက်နက်ကိုင် အဖွဲ့အစည်းအချို့၊ တော်လှန်ရေးအင်အားစု ပူးပေါင်းတပ်တို့အကြား နိုင်ငံတစ်ဝှမ်းတိုက်ပွဲများ ဖြစ်ပွားလာပြီး တိုင်းပြည်၏ နိုင်ငံရေး၊ ငြိမ်းချမ်းရေး၊ စီးပွားရေး၊ ကျန်းမာရေး၊ ပညာရေးများမှာ အကျပ်အတည်းများဖြင့် ရင်ဆိုင်နေရသည်။

CNI News

၂၀၂၄ ခုနှစ်၊ ဖေဖော်ဝါရီ ၅

ကရင့်အမျိုးသားအစည်းအရုံး (KNU) ၏ တော်လှန်ရေးကာလမှာ အဖွဲ့အစည်းအတွင်း အကွဲအပြဲများ ဖြစ်ပေါ်ခဲ့ပြီး စိန်ခေါ်မှု ကြီးမားခဲ့ကြောင်း KNU မှ အတွင်းရေးမှူး (၂) ပဒိုစောလှထွန်းက ပြောသည်။

KNU ၏ (၇၅) နှစ်မြောက် စိန်ရတု ကရင်တော်လှန်ရေးနေ့မှ တော်လှန်ရေး ဖြတ်သန်းမှု အတွေ့အကြုံနှင့် ပတ်သက်၍ ပြောကြားခဲ့ရာမှာ အခြားသော တော်လှန်ရေးအဖွဲ့အစည်းများနှင့် မတူညီဘဲ အကွဲကွဲ အပြဲပြဲ ဖြစ်ခဲ့ကြောင်း ၎င်းက ပြောသည်။

ပဒိုစောလှထွန်းက “၇၅ နှစ်တာကာလမှာ ကျနော်တို့ ကရင်အမျိုးသားတွေဟာ တော်လှန်ရေးကို ကရင့်အမျိုးသား လွတ်မြောက်ရေးအတွက် သော်လည်းကောင်း၊ တိုင်းရင်းသားလူမျိုးများ လွတ်မြောက်ရေးအတွက် သော်လည်း ကောင်း၊ မြန်မာနိုင်ငံ ဒီမိုကရေစီ တည်ဆောက်နိုင်ရေးအတွက် သော်လည်းကောင်း၊ အစဉ်တစိုက် စွမ်းစွမ်းတမံ ကြိုးစား တိုက်ပွဲဝင်ခဲ့တာ ဖြစ်ပါတယ်။ ဒီလိုမျိုး တိုက်ပွဲဝင်တဲ့နေရာမှာ စိန်ခေါ်မှုတွေ အများကြီး ရှိခဲ့တယ်၊ ကြမ်းတမ်းခက်ထန်မှုတွေ အများကြီးရှိခဲ့တယ်၊ အသက်သွေးကြွေး ခန္ဓာအများကြီး ပေးဆပ်မှုတွေ ရှိခဲ့တယ်၊ အဖွဲ့အစည်းတွင်းမှာ အကွဲကွဲ အပြဲပြဲတွေ ဖြစ်ပေါ်လာတဲ့အထိ စိန်ခေါ်မှု ကြီးမားခဲ့ရတယ်၊ ဖြတ်သန်းမှု ရှိခဲ့ရတာ ဖြစ်ပါတယ်။ KNU ကရင့်အမျိုးသားအစည်းအရုံးရဲ့ ကရင့်တော်လှန်ရေး သက်တမ်းကာလမှာ အခြားသော အဖွဲ့ အစည်းတွေနဲ့ မတူတဲ့ အကွဲကွဲ အပြဲပြဲဖြစ်မှုဟာ အများဆုံးနဲ့ အကွဲကွဲ ဖြစ်မှုဒဏ်ကိုလည်း KNU ကရင့်အမျိုးသား အစည်းအရုံးက မိခင်လို ခုနက သဘောထားပြီးတော့ ကြံ့ကြံ့ခိုင် တွန်းလှန်ရင်းနဲ့ ဒီစိန်ခေါ်မှုတွေကိုလည်း ကျော်လွှားခဲ့ရတာ ဖြစ်ပါတယ်” ဟု ပြောသည်။

KNU အတွင်းရေးမှူး(၂) ပဒိုစောလှထွန်းကို တွေ့ရစဉ်

ကရင်အမျိုးသားကာကွယ်ရေးတပ် (KNDO) ၏ စစ်ဦးစီးချုပ်ဟောင်း ဗိုလ်မှူးချုပ် စောနယ်ဒါးမြသည် KNU မှ တာဝန်များ ရပ်ဆိုင်းခံရပြီးနောက် ၂၀၂၂ ခုနှစ်၊ ဇူလိုင် ၁၆ ရက်နေ့က ကော်သူးလေတပ်မတော်ကို တည်ထောင် ကြောင်း ကြေညာခဲ့သည်။

ထို့နောက် KNU တပ်မဟာ ၄ နှင့် ကောင်သူးလေတပ်မတော်တို့အကြား ထိတွေ့တိုက်ပွဲများ ဖြစ်ပွားခဲ့ပြီး အချင်းချင်း ရန်မူတိုက်ခိုက်နေမှုများ အမြန်ဆုံး အဆုံးသတ်ပေးရန် နိုင်ငံတကာကရင်အဖွဲ့အစည်း (IKO) က တောင်းဆိုခဲ့ရသည်။

၁၉၉၄ ခုနှစ်၊ ဇန်နဝါရီလအတွင်းက ဒီမိုကရေစီအကျိုးပြု ကရင်တပ်မတော်(DKBA) သည် KNU အဖွဲ့မှ ခွဲထွက်ခဲ့ ပြီး ငြိမ်းချမ်းရေးယူခဲ့သလို ၂၀၀၇ ခုနှစ်တွင်လည်း KNU တပ်မဟာ ၇ မှ တပ်ဖွဲ့များသည် အစိုးရနှင့် ငြိမ်းချမ်းရေး လက်မှတ်ထိုးခဲ့ကာ ကရင့်အမျိုးသားအစည်းအရုံး/ ကရင့်အမျိုးသားလွတ်မြောက်ရေး တပ်မတော်/ ငြိမ်းချမ်းရေး ကောင်စီ (KNU/KNLA/PC) ကို ဖွဲ့စည်းခဲ့သည်။

DKBA ခေါင်းဆောင်တွေကို တွေ့ရစဉ်

ကရင်လက်နက်ကိုင် တပ်ဖွဲ့အချင်းချင်းကြား ပြန်လည်ပူးပေါင်းနိုင်ရေး ကြိုးပမ်းမှုများ ရှိနေကြောင်း ကရင်အမျိုး သား ဒီမိုကရတ်တစ်ပါတီမှ ဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။

၎င်းက “သူတို့ သဘောထားတွေက မတူကြဘူးလေ၊ KNU ထဲမှာပဲ နယ်ဒါးမြတို့ ခွဲထွက်သွားတယ်၊ ကျန်တဲ့ ခရိုင် ၇ ခုကလည်း ၆ ခရိုင်က တစ်မျိုး၊ ၁ ခရိုင်က တစ်မျိုး ဖြစ်နေတယ်၊ အဲဒါကို ကျနော်တို့အနေနဲ့ကတော့ ဘယ်လိုမှ သုံးသပ်လို့မရဘူး။ ဒါပေမဲ့ သူတို့‌တော့ ကြိုးစားနေတယ်၊ နဂိုတုန်းက ဒီ ၆ ခရိုင်နဲ့ ၁ ခရိုင် KNU အတွင်းမှာ မဖြစ်ခင်ကတည်းကိုက ကျန်တဲ့ PC တို့၊ DKBA တို့၊ BGF တို့နဲ့ ကရင်အချင်းချင်း သဘောထားတိုက်ဆိုင်ဖို့ သူတို့ ကြိုးစားနေသေးတယ်၊ အဲဒါလည်း အခုလည်း ဆက်ပြီးကြိုးစားနေတာပဲ၊ အဖြေကတော့ မပေါ်သေးဘူးပေါ့လေ၊ ဘယ်တော့ ပေါ်လာမလဲဆိုတာ စောင့်ကြည့်ရတဲ့ အနေအထားမျိုးတော့ ရှိမှာပေါ့” ဟု ပြောသည်။

လက်ရှိတွင် ကရင်လက်နက်ကိုင်တပ်ဖွဲ့များ အနေဖြင့် ကရင်အမျိုးသား အစည်းအရုံး (KNU)၊ ဒီမိုကရေစီ အကျိုး ပြု ကရင်တပ်မတော် (DKBA)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေးတပ်မတော်/ ငြိမ်းချမ်းရေး ကောင်စီ (KNU/KNLA/PC)၊ ကော်သူးလေတပ်မတော်နှင့် ဗိုလ်မှူးကြီး စောချစ်သူ ဦးဆောင်သော ကရင်ပြည်နယ် နယ်ခြား စောင့်တပ် (BGF) တို့ ဖြစ်သည်။

CNI News

၂၀၂၄ ခုနှစ်၊ ဖေဖော်ဝါရီ ၂

ရှမ်းနီအမျိုးသားများတပ်မတော် (SNA) ၏ အုပ်ချုပ်မှုနယ်မြေအတွင်း အရပ်သားများကို သစ်ခိုးထုတ်ခိုင်းပြီး ကချင်လွတ်လပ်ရေးတပ်မတော် (KIA)နှင့် ပြည်သူ့ကာကွယ်ရေးတပ် (PDF) တို့က နယ်မြေချဲ့ထွင်လာကြောင်း SNA မှ တာဝန်ရှိသူတစ်ဦးက CNI သတင်းဌာနသို့ ပြောသည်။

SNA ထိန်းချုပ်နယ်မြေ ဗန်းမောက်ဒေသအတွင်းသို့ လုပ်ငန်းရှင်၊ KIA၊ PDF တို့ ပူးပေါင်းပြီး ရွှေကူမြို့နယ်၊ ဗန်းမော်မြို့နယ်မှ ဒေသခံများကို သစ်ခိုးထုတ်ခိုင်းခဲ့ကြောင်း ကာယကံရှင်များက ပြောသည်။

လက်ရှိ နိုင်ငံရေး အခြေအနေများကြောင့် အလုပ်အကိုင် ရှားပါးနေသည့်အတွက် သစ်ခုတ်ရန်ကိစ္စကို လက်ခံခဲ့ ကြောင်း၊ SNA နယ်မြေတွင် သစ်ထုတ်ရမည်ကို မသိရှိခဲ့ကြောင်း သစ်ခိုးထုတ်ရန် လာစဉ် SNA ၏ ဖမ်းဆီးခြင်းကို ခံခဲ့ရသူတစ်ဦးက ပြောသည်။ 

၎င်းက “ကျနော်တို့ ဗန်းမော်က ကိုတူးကနေပြီးတော့မှ ဖုန်းဆက်ပြီးမှ မင်းတို့ အလုပ်လိုက်မလားပေါ့၊ အဲဒါမျိုး မေးတော့ ကျနော်တို့လည်း လိုက်မယ်ပေါ့၊ အလုပ်မရှိတော့ အဲဒါလည်း ကျနော်တို့လည်း အိမ်မှာ မိသားစုတွေ ရှိတယ်၊ စားဝတ်နေရေးကလည်း သိပ်အဆင်ပြေတာ မဟုတ်ဘူး။ ပိုက်ဆံလေးတော့ လုပ်ပေးမှလို့ အဲဒါမျိုး ကျနော်တို့ကပြောတော့ သူတို့ကလည်း အဲဒါဆိုလည်း ရတယ်ပေါ့၊ မင်းတို့ ဘယ်လောက်လိုသလဲ လိုသလောက် ကိုပြော ကျနော်တို့လည်း မိသားစု အတိုင်းအတာနဲ့ဆိုတော့ အိမ်မှာလည်း ပေးထားစေချင်တယ်၊ ကျနော်တို့ တောထဲကိုလည်း လမ်းစရိတ်ကလေး နည်းနည်းပါးပါး ယူခဲ့ချင်တယ်၊ သူက ငွေလာယူပေါ့၊ ဗန်းမော်မှာ အဲဒါ ကျနော်တို့က ဗန်းမော်မှာ ငွေတက်ယူရတာ” ဟု ပြောသည်။

KIA-PDF တပ်ဖွဲ့ကိုတွေ့ရစဉ်

လုပ်ငန်းရှင်၊ KIA၊ PDF တို့မှ စေလွှတ်၍ သစ်ခိုးထုတ်ခိုင်းသူများကို SNA ၏ တပ်မဟာ ၆၁၄ ထိန်းချုပ်နယ်မြေ ဗန်းမောက်မြို့နယ်ထဲမှာ ဖမ်းဆီးရမိထားကြောင်း၊ နို့ဆို့အရွယ် ကလေးငယ် အပါအဝင် စုစုပေါင်း ၂၅ ဦးရှိကြောင်း၊ ထို ၂၅ ဦးတွင် အမျိုးသား ၁၆ ဦးနှင့် အမျိုးသမီး ၅ ဦး၊ ကလေးငယ် ၄ ဦး ပါဝင်ကြောင်း သိရသည်။

၎င်းတို့ သစ်ခိုးထုတ်မည့် နေရာမှာ လူသူအရောက်အပေါက်နည်းသလို လမ်းများလည်း ကောင်းမွန်ခြင်း မရှိကြောင်း၊ နေရပ်ပြန်ရန်အတွက် ပြောဆိုရာတွင်လည်း လုပ်ငန်းရှင်များက ၎င်းတို့၏ မှတ်ပုံတင်နှင့် ကိုယ်ရေး အချက်အလက်များအား KIA၊ PDF များကိုပေးကာ ဖြတ်သန်းသွားလာခွင့်ကို ပိတ်ပင်ထားကြောင်း ဖမ်းဆီးခံခဲ့ရသူ တစ်ဦးက ပြောသည်။

၎င်းက “လမ်းကောင်းတယ်၊ နီးတယ်ဆိုပြီးမှ ကျနော်တို့ကို ခေါ်ခဲ့တာဗျ၊ ကားလမ်းလည်း ထိုးထားပြီးပြီတဲ့ အလုပ်လည်း လုပ်လိုက်ရုံပဲဆိုပြီး ကျနော်တို့ ရောက်ရောက်ချင်း လုပ်လိုက်ရုံပဲဆိုပြီး ခေါ်ခဲ့တာဗျ၊ ဒီရောက်တော့ ကျနော်တို့ တစ်လကျော်ကြီးတောင် နေနေရတာဗျ၊ နေနေရတာ၊ နောက်မှ လမ်းထိုးထားပြီးပြီ တက်ရအောင် ဆိုပြီးမှ ကျနော်လည်း အိမ်က မိန်းမတွေ ပါတဲ့ဟာတွေကို နေထားအုံးဆိုပြီး လမ်းကြောသွားကြည့်ဦးမယ်ဆိုပြီး သွားတော့ လမ်းလည်း မကောင်းတော့ ပြန်လှည့်ပြီးတော့ သူတို့က တားထားတာဗျ၊ ပိုက်ဆံကို ပြန်ဆပ်ပေးမယ်၊ အိမ်ရောက်ရင် ကျနော်တို့ မလုပ်ချင်တော့ဘူးလို့ ပြောတာကို အဲဒါကို ကျနော်တို့ကို မပြန်ခိုင်းတော့တာဗျ၊ အဲဒါဆို အကြွေးကျေအောင် လုပ်သွားဦးဆိုမှ ဟုတ်ပြီ။ အကြွေးကျေရင် ပြန်သွားလို့ရလားဆိုတော့ ရတယ်၊ အဲဒါဆို ကျနော်တို့ တက်ပေးမယ်ဆိုပြီးမှ တက်လာတာဗျ၊ တစ်ညပဲ အိပ်ရသေးတယ်၊ နောက်ရက်တော့ လာဖမ်းတာပဲဗျ၊ တဲလေးဆောက်ပြီးတော့ တစ်ညပဲ အိပ်ရသေးတယ်” ဟု ပြောသည်။

ပြီးခဲ့သည့် ၂၀၂၃ ခုနှစ်၊ ဩဂုတ်လအတွင်းက ဗန်းမောက်မြို့နယ်အတွင်းရှိ SNA ၏ ရှေ့တန်းစခန်းတစ်ခုကို KIA၊ PDF မှ အင်အား ၂၀၀ ခန့်ဖြင့် တိုက်ခိုက်ခဲ့ပြီးနောက် လက်ရှိတွင်လည်း မကြာခဏ ထိုးစစ်ဆင်တိုက်ခိုက်မှုများ ရှိခဲ့သည်။

SNA တပ်ဖွဲ့ကို တွေ့ရစဉ်

ဖမ်းဆီးခံခဲ့ရသူ တစ်ဦးက “ကျနော်တို့လည်း အလုပ်မရှိလို့ ဒီကိုလိုက်လာလိုက်တာ၊ အလုပ်က အားလုံး အဆင်ပြေ တယ်၊ ရောက်တာနဲ့ တစ်ခါတည်း တန်းလုပ်ရမယ်ပေါ့၊ သူတို့ ခေါ်ခဲ့တာ၊ အဲဒါနဲ့ ကျနော်တို့ လိုက်ခဲ့တဲ့အခါကြ တော့ ဒီရောက်တော့ ရက်ပေါင်း ၂၅ ရက် ၁ လနီးပါး ကျနော်တို့ ထိုင်စောင့်နေရတာဗျ၊ စောင့်နေရတော့ ကျနော် တို့လည်း မစောင့်နိုင်တဲ့အခါကြတော့ ပြန်ဖို့ပြောတော့ လက်မခံဘူးဗျ၊ တုံးခွဲဖို့နေရာ ဆရာတို့ နယ်နိမိတ်နဲ့ နေရာ ကို တုံးခွဲဖို့ မိသားစုကို မခေါ်ဘဲနဲ့ ကျနော်တို့ဟာ ကျနော်တို့ တစ်ယောက်ထဲ တစ်ယောက်ကို ဆိုင်ကယ်တစ်စီးဆီ နဲ့ လမ်းသွားကြည့်တာဗျ၊ လမ်းသွားကြည့်တော့ လမ်းမကောင်းတဲ့အခါကြတော့ မတရားကြီးဝေးလို့ မိသားစုနဲ့ အဆင်မပြေဘူး။ တစ်ယောက်ထဲတောင် ဆင်းတွန်း၊ ဝိုင်းပြီးတွန်းတက်ရတဲ့ဟာကို အဆင်မပြေဘူး၊ ပြန်မယ်လို့ ပြောတဲ့ အခါကြတော့ ဂိတ်တွေကို သူတို့ ပိတ်ထားပြီး ကျနော်တို့ကို မပြန်ခိုင်းတာဗျ။ ကျနော်တို့က ပိုက်ဆံ ပြန်အမ်းမယ်၊ ကျနော်တို့ ပြန်မယ်ဆိုတော့ မရဘူးဗျ သူတို့က အဲဒါကျနော်တို့ အခုလိုမျိုး ဖြစ်သွားတာဗျ၊ သူတို့က PDF ဂိတ်တွေကို ကျနော်တို့ မပြန်ရအောင် စာရွက်တွေနဲ့ ကျနော်တို့ မှတ်ပုံတင်တွေနဲ့ မှတ်ပုံတင်နံပါတ်တွေကို ပေးထားတာဗျ၊ ဂိတ်တိုင်း ဂိတ်တိုင်းကို” ဟု ပြောသည်။

SNA ထိန်းချုပ်ရာ နယ်မြေအတွင်း နောင်တွင် သစ်ခိုးထုတ်မှု မပြုလုပ်ရန်နှင့် ဖမ်းဆီးရမိသူများအားလုံးကို ပြန်လွတ်ပေးမှာဖြစ်ကြောင်း၊ လောလောဆယ် ဖမ်းမိထားသူများကို ကျွေးမွေးစောင့်ရှောက်ထားကြောင်း SNA မှ တာဝန်ရှိသူတစ်ဦးက ပြောသည်။

ရှမ်းနီအမျိုးသားများတပ်မတော်(SNA)သည် စစ်ကိုင်းတိုင်းဒေသကြီးတွင် ပါဝင်နေသည့် မော်လိုက်ခရိုင်၊ ကလေး ခရိုင်၊ ခန္တီးခရိုင်၊ ဟုမ္မလင်းခရိုင်၊ ကသာခရိုင်၊ တမူးခရိုင်နှင့် ကချင်ပြည်နယ်အတွင်း ပါဝင်နေသော ဗန်းမော်ခရိုင်၊ မြစ်ကြီးနားခရိုင်၊ မိုးညှင်းခရိုင်၊ မိုးကောင်း ဒေသတို့ကို စုစည်း၍ ရှမ်းနီပြည်နယ် ပြန်လည်ရရှိရေး ကြိုးပမ်း နေသည့် တိုင်းရင်းသားလက်နက်ကိုင်အဖွဲ့ ဖြစ်သည်။

CNI News

၂၀၂၄ ခုနှစ်၊ ဖေဖော်ဝါရီ ၁

ရက္ခိုင့်တပ်တော် (AA) က ဒေသမတည်မငြိမ်ဖြစ်အောင် လုပ်ဆောင်နေသည့်ဒဏ်ကို ဒေသခံရခိုင်များ ခံစားနေရ ကြောင်း ဇန်နဝါရီ ၃၁ ရက်နေ့က ကျင်းပခဲ့သော အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေး တွင် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

ရခိုင်တွင် မိုခါမုန်တိုင်းအပြီး ၇ လခန့်အကြာတွင် AA က ၂၀၂၃ ခုနှစ်၊ နိုဝင်ဘာ ၁၃ ရက်နေ့က နယ်ခြားစောင့် ဒုံးပိုက်ရဲကင်းစခန်းကို စတင်တိုက်ခဲ့ကြောင်း ၎င်းက ပြောသည်။

ဗိုလ်ချုပ်မှူးကြီး မင်းအောင်လှိုင်က “AA သောင်းကျန်းသူ အဖွဲ့အနေဖြင့် ဒေသမတည်မငြိမ်ဖြစ်အောင် လုပ်ဆောင် နေသည့်အတွက် အဆိုပါဒဏ်ကို ဒေသခံရခိုင်တိုင်းရင်းသား အများစုသာ  အဓိကခံစားနေကြရပါကြောင်း၊ ယခု အချိန်သည် ၂၀၂၃-၂၀၂၄ ပညာသင်နှစ်၏ အခြေခံကျောင်းများနှင့် တက္ကသိုလ်များ ပညာသင်ကြားနေသည့် အချိန် ဖြစ်ပါကြောင်း၊ ရခိုင်ပြည်နယ်တွင် ၂၀၂၃-၂၀၂၄ ပညာသင်နှစ် စတင်ချိန်တွင် အခြေခံပညာကျောင်းသားဦးရေ ၅၇၃,၀၀၀ ဦး တက်ရောက်ခဲ့ပြီး ယခုအချိန်တွင် AA သောင်းကျန်းသူအဖွဲ့၏ အကြမ်းဖက် ခြိမ်းခြောက်မှုများ ကြောင့် အခြေခံကျောင်းများတွင် ၂၇၉,၃၉၂ သာ ကျောင်းတက်လျက်ရှိပါကြောင်း၊ ၄၈ ဒသမ ၇၆ ရာခိုင်နှုန်းကျော် ပျက်ကွက်မှု ဖြစ်ခြင်းကြောင့် AA သောင်းကျန်းသူအဖွဲ့၏ ဆိုးကျိုးကို ဒေသခံတိုင်းရင်းသား ကျောင်းသား/သူများ ၏ အနာဂတ်ထိခိုက်သည်အထိ ခံစားနေကြရပါသည်” ဟု ပြောသည်။

ရခိုင်ပြည်နယ်တွင် ထာဝရငြိမ်းချမ်းရေး ဆောင်ရွက်နိုင်မှသာ ဒေသခံနောင်လာနောင်သားများကို ကောင်းမွန် သည့် အနာဂတ်ဘဝများ လက်ဆင့်ကမ်းနိုင်မည်ဖြစ်ပြီး ဒေသသည်လည်း ပိုမိုဖွံ့ဖြိုးတိုးတက်လာမည် ဖြစ်သည့် အတွက် တပ်မတော်အနေဖြင့် နယ်မြေတည်ငြိမ်အောင် ဆောင်ရွက်နေကြောင်း ၎င်းက ပြောသည်။

ရခိုင်ပြည်နယ်အတွင်းက လမ်းဆုံတစ်ခုကို တွေ့ရစဉ်

ရခိုင်ပြည်နယ်မှာ ၂၀၂၃ ခုနှစ်၊ နိုဝင်ဘာ ၁၃ ရက်က မြန်မာ့တပ်မတော်နှင့် ရက္ခိုင့်တပ်တော် (ULA/AA) တို့အကြား တိုက်ပွဲ ပြန်လည် ဖြစ်ပွားခဲ့ပြီးနောက် လမ်းပိတ်ဆို့မှုများ ရှိလာခဲ့သည်။ 

အဆိုပါ လမ်းပိတ်ဆို့မှုများကြောင့် ဒေသတွင်း ကုန်သွယ်ရေးပြတ်တောက်သွားသလို ကုန်ဈေးနှုန်းများလည်း ကြီးမြင့်လာခဲ့သည်။

မြန်မာ့နိုင်ငံရေးပြဿနာကို လက်တွေ့ကျကျ ဖြေရှင်းသင့်ကြောင်း၊ လက်တွေ့ကျကျ ဖြေရှင်းနိုင်မည့် အခင်း အကျင်းကိုလည်း ဖန်တီးသင့်ကြောင်း ရခိုင်အမျိုးသားပါတီ (ANP) ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။

၎င်းက “မြန်မာနိုင်ငံမှာ အခုဖြစ်ပေါ်နေတဲ့ တိုက်ပွဲတွေက နိုင်ငံရေးပြဿနာဖြစ်တယ်၊ မြန်မာနိုင်ငံ လွတ်လပ်ရေး ရပြီးကတည်းက ဖြစ်ပေါ်လာတဲ့ နိုင်ငံရေးပြဿနာရဲ့ အကျိုးဆက်တွေ ဖြစ်တယ်၊ ဖြစ်ပေါ်နေတဲ့ နိုင်ငံရေးပြဿနာ တိုင်းရင်းသားလူမျိုးတွေရဲ့ ကိုယ်ပိုင်ပြဋ္ဌာန်းခွင့်၊ ကိုယ်ပိုင်အုပ်ချုပ်ခွင့် ဆုံးရှုံးခဲ့တဲ့ ပြဿနာဖြစ်တယ်၊ အဲဒါကြောင့် ဒီနိုင်ငံရေးပြဿနာကို ဖြေရှင်းတဲ့နေရာမှာ နိုင်ငံရေးနည်းလမ်းအရ ဖြေရှင်းမယ့် လုပ်ငန်းစဉ်တွေကို အားထည့် အားစိုက် လုပ်ကိုင်ဆောင်ရွက်ဖို့ လိုတယ်၊ အဲဒီလို နိုင်ငံရေးနည်းလမ်းအရ ဖြေရှင်းတဲ့နေရာမှာ အားစိုက်ပြီး လုပ်ကိုင်ဆောင်ရွက်မှုကို မလုပ်နိုင်ဘဲနဲ့ ပါးစပ်က ပြောရုံသက်သက်နဲ့ ဖြေရှင်းဆောင်ရွက်မှုတွေ မလုပ်ခဲ့လို့ ပါးစပ်နဲ့ ပြောရုံသက်သက်ပဲ ဖြစ်နေခဲ့တဲ့ အခြေအနေကြောင့် အခုလို တိုက်ပွဲတွေ ပြင်းထန်လာတယ်လို့ ကျနော် အဲဒီလိုမြင်တယ်” ဟု ပြောသည်။

AA ခေါင်းဆောင် ဗိုလ်ချုပ်ထွန်းမြတ်နိုင်ကို တွေ့ရစဉ်

ပြီးခဲ့သည့် ၂၀၂၃ ခုနှစ် နိုဝင်ဘာလက စတင်ခဲ့သော မြန်မာ့တပ်မတော်နှင့် ရက္ခိုင့်တပ်တော် (ULA/AA) တို့ကြား တိုက်ပွဲ များကြောင့် ဒေသခံပြည်သူ ၅ သိန်းကျော် အိုးအိမ်စွန့်ခွာ ထွက်ပြေးနေရကြောင်း သိရသည်။

လက်ရှိတွင် ရခိုင်ပြည်နယ်အတွင်းရှိ စစ်တွေ၊ ကျောက်ဖြူ၊ ရမ်းဗြဲ၊ မြေပုံ၊ တောင်ကုတ်၊ သံတွဲ၊ မောင်တော၊ ဘူးသီး တောင်၊ ရသေ့တောင်၊ ကျောက်တော်၊ ပေါက်တော၊ မင်းပြား၊ မြောက်ဦး၊ ပုဏ္ဏားကျွန်းမြို့နယ် အပါအဝင် ချင်းပြည် နယ် ပလက်ဝမြို့နယ်အတွင်း မြန်မာ့တပ်မတော်နှင့် AA တို့အကြား တိုက်ပွဲများ ဖြစ်ပွားလျက်ရှိနေသည်။

CNI News
၂၀၂၄ ခုနှစ်၊ ဖေဖော်ဝါရီ ၁

ပြည်ထောင်စုအစိုးရအဖွဲ့ကို ပြင်ဆင်ဖွဲ့စည်းကြောင်း နစက-က ၂၀၂၄ ခုနှစ်၊ ဖေဖော်ဝါရီ ၁ ရက်နေ့တွင် သတင်း ထုတ်ပြန် ကြေညာခဲ့သည်။

အဆိုပါ ပြင်ဆင်ဖွဲ့စည်းသည့် အစိုးရအဖွဲ့တွင် ဝန်ကြီးချုပ်အဖြစ် ဗိုလ်ချုပ်မှူးကြီးမင်းအောင်လှိုင်ပဲ ဆက်လက် တာဝန်ယူပြီး ဒုဝန်ကြီးချုပ်များအဖြစ် ယခင်က တာဝန်ယူထားသူ ၆ ဦးက ဆက်လက် တာဝန်ယူမည်ဖြစ်သည်။

အသစ် ပါဝင်လာသူများကတော့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး ဝန်ကြီးဌာန (၁-၂-၃-၄) သာ ထပ်တိုးလာခဲ့သည်ကို တွေ့ရသည်။

နိုင်ငံရေးသမားတစ်ဦးက “ဘာမှ ထူးခြား ပြောင်းလဲတာမရှိဘူး၊ ဒီအတိုင်းပဲ၊ အခု ဖွဲ့စည်းမှုနဲ့ မူဝါဒကြောင့် လက်ရှိ မြန်မာနိုင်ငံရေး အခြေအနေ ဖြစ်လာတာ၊ အဲဒါကို ပြုပြင်ပြောင်းလဲရေး လုပ်ရမှာ မလုပ်ဘဲနဲ့ ဒီအတိုင်းပဲ ဘာမှမထူးခြား မပြောင်းလဲတဲ့ အစိုးရဖွဲ့စည်းပုံအတိုင်းဆို မြန်မာနိုင်ငံရေး အခြေအနေက ဘယ်လိုပုံစံနဲ့မျှော်လင့် လို့ရမှာလဲ၊ လူတွေနဲ့ ဝန်ကြီးဌာနတွေသာ ပိုလာတယ်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်သည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့မှ ၂၀၂၄ ခုနှစ်၊ ဖေဖော်ဝါရီ ၁ ရက်နေ့ ၃ နှစ်ပြည့်သည့် ကာလကို အရေးပေါ် အခြေအနေ ပြဋ္ဌာန်း၍ အုပ်ချုပ်လာခဲ့သည်။

ထို့နောက် ၃ နှစ်ပြည့်ကာလ ဖေဖော်ဝါရီ ၁ ရက်နေ့ နောက်ပိုင်းတွင် တပ်မတော်အတွင်းနှင့် အစိုးရအဖွဲ့အစည်း အတွင်း ပြုပြင်ပြောင်းလဲရေး လုပ်လာနိုင်သည်ဟု အားလုံးက ခန့်မှန်းထားကြသော်လည်း ထူးခြားသော ပြုပြင် ပြောင်းလဲမှုများကို လုပ်လာခြင်းမရှိကြောင်း ယခုပြင်ဆင် ဖွဲ့စည်းလာသော အစိုးရအဖွဲ့ကို ကြည့်ခြင်းအားဖြင့် သိနိုင်သည်ဟု နိုင်ငံရေးအသိုင်းအဝိုင်းကြား ထောက်ပြကြသည်။

CNI News

၂၀၂၄ ခုနှစ်၊ ဇန်နဝါရီ ၃၁

ပြည်ထောင်စုရွေးကောက်ပွဲကော်မရှင်(UEC)ဥက္ကဋ္ဌ ဦးသိန်းစိုးကို ရာထူးကနေ အနားပေးလိုက်ပြီး ဦးကိုကိုအား အစားထိုး ခန့်အပ် တာဝန်ပေးလိုက်ကြောင်း ၂၀၂၄ ခုနှစ်၊ ဇန်နဝါရီ ၃၁ ရက်တွင် နစက-က သတင်းထုတ်ပြန် ကြေညာခဲ့သည်။

ဦးသိန်းစိုးသည် UEC ဥက္ကဋ္ဌအဖြစ် ၂၀၂၁ ခုနှစ်ကနေ ၂၀၂၄ ခုနှစ်၊ ဇန်နဝါရီ ၃၁ ရက်နေ့အထိ တာဝန်ယူခဲ့သည်။

ထို့နောက် ၂၀၂၃ ခုနှစ်၊ ဇန်နဝါရီ ၃၁ ရက်နေ့တွင် နိုင်ငံရေးပါတီများ မှတ်ပုံတင်ခြင်း ဥပဒေကို ပြဋ္ဌာန်းခဲ့ပြီး နိုင်ငံရေးပါတီများကို ပြန်လည်၍ ပါတီမှတ်ပုံတင်ခိုင်းခဲ့သည်။

အဆိုပါ နိုင်ငံရေးပါတီများ မှတ်ပုံတင်ခြင်း ဥပဒေတွင် ပါဝင်သည့် နိုင်ငံတစ်ဝန်း ယှဉ်ပြိုင်မည့် ပါတီမှာ ရုံးပေါင်း ၁၆၅ ရုံးနှင့် ပါတီဝင် အင်အား ၁၀၀,၀၀၀ ရှိရမည်ဟု သတ်မှတ်ချက်အပေါ် ဝေဖန်မှုများ ခံခဲ့ရသည်။

CNI News
၂၀၂၄ ခုနှစ်၊ ဇန်နဝါရီ ၃၁

နိုင်ငံတော်ကို ပျက်စီးရာပျက်စီးကြောင်း လုပ်နေကြသည့် သစ္စာမဲ့ တိုင်းရင်းသား လက်နက်ကိုင်အဖွဲ့များ ရှိနေ ခြင်းသည် တိုင်းပြည်အတွက် အန္တရာယ်ကြီးမားသည်ဟု တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောသည်။

၂၀၂၄ ခုနှစ်၊ ဇန်နဝါရီ ၃၁ ရက်နေ့က ကျင်းပခဲ့သည် အမျိုးသားကာကွယ်ရေးနှင့်လုံခြုံရေးကောင်စီ (၁/၂၀၂၄) အစည်းအဝေးတွင် ၎င်းက အထက်ပါအတိုင်း ပြောကြားသွားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ နိုင်ငံတော်ကြီးကို ဒီမိုကရေစီနှင့် ဖက်ဒရယ်စနစ်အခြေခံသည့် ပြည်ထောင် စုကြီး တည်ဆောက်နေချိန်တွင် ပဋိပက္ခများ ပိုမိုကြီးမားအောင်၊ နိုင်ငံတော်ကို ပျက်စီးရာပျက်စီးကြောင်း လုပ် နေကြသည့် သစ္စာမဲ့ တိုင်းရင်းသားလက်နက်ကိုင်အဖွဲ့များရှိနေခြင်းသည် တိုင်းပြည်အတွက် အန္တရာယ်ကြီးမား ပါသည်”ဟု ပြောသည်။

၂၀၂၄ ခုနှစ်၊ ဇန်နဝါရီ ၃၁ ရက်နေ့က ကာ/လုံ အစည်းအဝေး ကျင်းပနေစဉ်

ထို့နောက် ကရင်လက်နက်ကိုင် KNU သည် PDF များကို လေ့ကျင့်ထောက်ပံ့ပေးခြင်းနှင့် တပ်မတော် စစ်စခန်း များကို တိုက်ခိုက်ခဲ့ကြောင်း၊ KNPP နှင့် PDF တို့ကလည်း အကြမ်းဖက်တိုက်ခိုက်မှုများ ပြုလုပ်ခဲ့ကြောင်း၊ ရခိုင် လက်နက်ကိုင် AA ပါဝင်သည့် မူးယစ်မှောင်ခို ဂိုဏ်းအဖွဲ့ကို ဖော်ထုတ်ဖမ်းဆီးရမိခဲ့ကြောင်း၊ ချင်းလက်နက်ကိုင် CNF သည် CDF အဖွဲ့နှင့်ပေါင်းပြီး ချင်းပြည်နယ်အတွင်း အကြမ်းဖက်လုပ်ရပ်များ လုပ်ဆောင်နေကြောင်း၊ MND AA နှင့် TNLA တို့သည် တပ်မတော်၏ စစ်စခန်းများ အပါအဝင် နယ်စပ်ကုန်သွယ်ရေးလမ်းကြောင်းများကို တိုက် ခိုက်ခဲ့ကြောင်း ၎င်းက ပြောကြားခဲ့သည်။

သို့သော် သစ္စာမဲ့သည့် တိုင်းရင်းသားလက်နက်ကိုင်အဖွဲ့များ ရှိနေသည်ဆိုခြင်းနှင့်ပတ်သက်ပြီး မည်သည့် အဖွဲ့ ဆိုသည်ကိုတော့ တိုက်ရိုက်ထုတ်ဖော် ပြောကြားသွားခြင်း မရှိပေ။

KIA ၊ SSPP၊ KNPP တို့သည် PDF အမည်ခံသမားများကို အားပေးကူညီခဲ့ပြီး နိုင်ငံတစ်ဝန်း အကြမ်းဖက် လုပ်ရပ် များကို လုပ်ဆောင်ခဲ့သည်ဟု ဗိုလ်ချုပ်မှူးကြီးမင်းအောင်လှိုင်က ပြောသည်။

လက်ရှိတွင် မြန်မာ့တပ်မတော်သည် KIA၊ TNLA၊ MNDAA၊ AA၊ KNU၊ CNF၊ KNPP၊ PNLO၊ ABSDF စသည့် လက်နက်ကိုင် အဖွဲ့အစည်းများနှင့် တိုက်ပွဲများ အပြင်းအထန် ဖြစ်ပွားနေသလို ၎င်းတို့ ထောက်ပံ့ကူညီပေး နေသော PDF အဖွဲ့များနှင့်လည်း တိုက်ပွဲများ ဖြစ်ပွားနေသည်။