CNI News

၂၀၂၅ ခုနှစ်၊ မတ်လ ၅

မြန်မာနိုင်ငံတွင် အသေးစားအနုမြူဓာတ်အားပေးစက်ရုံ ဆောက်လုပ်ရေးအတွက် ရုရှားနှင့်မြန်မာ သဘောတူညီခဲ့ ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ရုရှားသမ္မတ ပူတင်တို့က ပူးတွဲထုတ်ပြန်ခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားနိုင်ငံသို့ တရားဝင် ချစ်ကြည်ရေးခရီးကို မတ်လ ၃ ရက်က စတင်သွားရောက်ခဲ့ပြီးနောက် မတ်လ ၄ ရက်တွင် ရုရှားသမ္မတ ပူတင်နှင့် တွေ့ဆုံ ဆွေးနွေးခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ ကျနော်တို့ နှစ်နိုင်ငံရဲ့ အစိုးရအချင်းချင်း ပူးပေါင်းဆောင်ရွက်မှု ကော်မရှင်ကလည်း တက်တက်ကြွကြွ ပူးပေါင်းဆောင်ရွက်နေပါတယ်။ မကြာခင်က ကုန်သွယ်ရေးကော်မရှင် အစည်းအဝေးကို နေပြည်တော်မှာ ကျင်းပခဲ့ပါတယ်။ စွမ်းအင်အခန်းကဏ္ဍမှာလည်း ပူးပေါင်းဆောင်ရွက်လျက်ရှိ ပြီး မဟာဗျူဟာမြောက် ပူးပေါင်းဆောင်ရွက်ဖို့ စီစဉ်နေပါတယ်။ အခြားနယ်ပယ်တွေမှာလည်း ပူးပေါင်းဆောင် ရွက်သွားဖို့ စီစဉ်နေပါတယ်။ အခြားနယ်ပယ်တွေမှာလည်း ပူးပေါင်းဆောင်ရွက်သွားဖို့ မိမိတို့ အနေနဲ့အသင့်ရှိပါ တယ်။ အထူးသဖြင့် ပြန်လည်ပြည့်ဖြိုးမြဲ စွမ်းအင်အရင်းအမြစ်များ တိုးတက်ရေး၊ မြန်မာနိုင်ငံတွင် အသေးစား အနုမြူဓာတ်အားပေးစက်ရုံ ဆောက်လုပ်ရေးအတွက် သဘောတူညီခဲ့ပါတယ်”ဟု ပြောသည်။

အဆိုပါ အနုမြူဓာတ်အားပေး စက်ရုံ တည်ဆောက်ပြီးပါက မြန်မာနိုင်ငံ စီးပွားရေးအတွက် လိုအပ်သည့် လျှပ်စစ်ဓာတ်အား ပေါပေါများများ ပေးနိုင်မည်ဟု ၎င်းက ပြောသည်။

လက်ရှိ မြန်မာနိုင်ငံတွင် လျှပ်စစ်ဓာတ်အားသည် တစ်နေလျှင် ၄ နာရီခြား တစ်ခါသာ ပေးနိုင်သည့်အတွက် စက်ရုံ၊ အလုပ်ရုံများနှင့် ရုံးလုပ်ငန်းများ အပါအဝင် နေအိမ်များသည် လုပ်ငန်းလည်ပတ်ရန် နှေးကွေးသွားသလို လူမှုကုန် ကျစရိတ်များလည်း မြင့်တက်ခြင်း အခြေအနေဖြင့် ရင်ဆိုင်နေကြရသည်။

ထို့ကြောင့် နစကသည် လျှပ်စစ်ဓာတ်အား အပြည့်အဝ ပြန်လည်ရရှိရေးအတွက် ဆိုလာစနစ်ဖြင့် လည်ပတ်ရန် လည်း စီမံကိန်းများ အကောင်အထည်ဖော်လျက်ရှိနေသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားခရီးစဉ်တွင် ရုရှား-မြန်မာ သဘောတူညီချက် ၁၀ ခုကို လက်မှတ်ရေးထိုးခဲ့ကြောင်း နှစ်နိုင်ငံ ပူးတွဲထုတ်ပြန်ချက်ခဲ့သည်။

အလားတူ နှစ်နိုင်ငံ ကုန်သွယ်ရေး၊ စီးပွားရေး ရင်းနှီးမြှုပ်နှံရေး၊ လုံခြုံရေးကဏ္ဍပူးပေါင်းဆောင်ရွက်ရေး၊ စက်မှု လုပ်ငန်းများ တည်ဆောက်ရေး စသည့် အခြေအနေများကိုလည်း ဆွေးနွေးခဲ့ကြကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၂ ခုနှစ်၊ စက်တင်ဘာလကလည်း ရုရှားနိုင်ငံသို့ သွားရောက် ခဲ့ပြီး စက်တင်ဘာ ၇ ရက်တွင် သမ္မတပူတင်နှင့် တွေ့ဆုံ ဆွေးနွေးခဲ့ကြသေးသည်။

CNI News

၂၀၂၅ ခုနှစ်၊ မတ်လ ၅

မြန်မာနိုင်ငံအတွင်းရှိ လက်နက်ကိုင်ထားသော အဖွဲ့အစည်းများအနေဖြင့် လက်နက်ကိုင်၍ စီးပွားရှာရသည်မှာ လွယ်ကူနေသဖြင့် လက်နက်စွန့်ရန်အတွက် အင်မတန်ဝန်လေးကြကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ(TNDP)မှဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။

ဦးစိုင်းဋ္ဌေးအောင်က “လက်နက်ကိုင် အဖွဲ့အစည်းများက သေနတ်ကိုင်ပြီး စီးပွားရှာရတာ လွယ်ကူနေတဲ့ အခါကြ တော့ လက်နက်စွန့်ဖို့ အင်မတန် ဝန်လေးပါတယ်။ ပွင့်ပွင့်လင်းလင်းပြောရရင် ဖက်ဒရယ်တို့၊ ဒီမိုကရေစီတို့ သူတို့ ပါးစပ်ဖျားက အော်နေကြတာက အလကားပါ။ အခုသူတို့လုပ်ရပ်တွေက သက်သေပြနေပါတယ်။ နိုင်ငံအတွက်ကို ချစ်ပေးကြပါ။ လူပုဂ္ဂိုလ်ကို မချစ်ပါနဲ့။ လူပုဂ္ဂိုလ်အကြောင်းပြပြီးမှ ကိုယ်ကျိုးစီးပွား မရှာကြပါနဲ့လို့ မေတ္တာရပ်ခံ ချင်တယ်။ ကိုယ်ကျိုး အတ္တတွေနည်းပြီး နိုင်ငံကိုချစ်စိတ်တွေ စုပေါင်းသွားပြီဆိုရင်တော့ ငြိမ်းချမ်းရေးက မရစရာ အကြောင်းမရှိဘူးလို့ မြင်ပါတယ်” ဟု ပြောသည်။

လက်ရှိ မြန်မာနိုင်ငံတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများ အပြင်းအထန် ဖြစ်ပွားနေပြီး တိုက်ပွဲများအတွင်း လက်နက်ကိုင်အင်အားစုများက အရှေ့မြောက်ပိုင်းတိုင်းစစ်ဌာနချုပ်(ရမခ)၊ အနောက်ပိုင်းတိုင်းစစ်ဌာနချုပ်(နပခ) ဆိုသည့် စစ်ဌာန ၂ ခု အပါအဝင် မြို့နယ်ပေါင်း ၉၀ ကျော်ကို ထိန်းချုပ် ထားနိုင်နေသည်။

 လက်နက်ကိုင်ထားသူများကို တွေ့ရစဉ်

တွေ့ဆုံဆွေးနွေးရေးနှင့်ပတ်သက်၍ နစကမှ ဖိတ်ခေါ်ထားသကဲ့သို့ ညီနောင်မဟာမိတ် ၃ ဖွဲ့တို့ကလည်း တွေ့ဆုံ ဆွေးနွေးရန် အသီးသီး ထုတ်ပြန်ထားကြသော်လည်း ကျန်လက်နက်ကိုင်အဖွဲ့များကတော့ ထုတ်ပြန်ထားခြင်း မတွေ့ရပေ။

နိုင်ငံရေးပြဿနာအား လက်နက်ဖြင့် ဖြေရှင်း၍ ရသွားသည့်ကိစ္စမှာ အင်မတန်ရှားပါးကြောင်း၊ လက်ရှိတွင် နစကမှ ဗဟို အားနည်းနေသည့်အတွက် တွေ့ဆုံဆွေးနွေးရေး ဖိတ်ခေါ်မှုအပေါ် လာရောက်ကြရန်မှာ လက်နက် ကိုင် အဖွဲ့များအတွက် ခဲယဉ်းကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေး ပါတီ(TNDP)မှဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။

NSPNC နဲ့ နိုင်ငံရေးပါတီများ ဆွေးနွေးကြစဉ်

၎င်းက “အမှန်က နိုင်ငံရေးကိစ္စဆိုတာ လက်နက်နဲ့ ဖြေရှင်းလို့ရသွားတဲ့ကိစ္စ တော်တော်ရှားပါတယ်။ နိုင်ငံရေး ပြဿနာ မပြေလည်လို့ လက်နက်ကိုင်ကြတာ။ ဒါပေမယ့် စားပွဲဝိုင်းယဉ်ကျေးမှုနဲ့ပဲ သွားကြရတဲ့ ကိစ္စတွေပါ။ အဲဒီ အခါကြတော့ စားပွဲဝိုင်းကို ရောက်လာဖို့လည်း ဒီဖက်ကလည်း ဖိတ်ခေါ်တယ်။ နစကတော့ တစ်ဖွဲ့ချင်း ဆွေးနွေး မယ် ဘာညာ ဖိတ်ခေါ်ခဲ့တာတွေ အာဏာသိမ်းခဲ့တုန်းက ရှိတယ်။ ဒါပေမယ့် ယနေ့ လက်ရှိလည်း သူတို့ပြန်ပြီး တော့မှ ဖိတ်ခေါ်တယ်။ လာဖို့တော့ အင်မတန် ခဲယဉ်းပါတယ်။ ဘာကြောင့်လဲဆိုတော့ ဗဟိုအားနည်းတဲ့ အခါကြ တော့ ပြည်နယ်တွေမှာရှိတဲ့ လက်နက်ကိုင် အဖွဲ့အစည်းတွေက မခန့်လေးစားဖြစ်တဲ့အခါ ငါတို့သွားစရာ မလိုဘူး ဆိုတဲ့ မာနလေးတွေနဲ့ နေထားကြတာ အများကြီးရှိပါတယ်။ တွေ့ဆုံဆွေးနွေးရေးဖြစ်ဖို့ရယ်၊ နိုင်ငံငြိမ်းချမ်းရေး ရဖို့ရယ် ဒီအဖွဲ့အစည်းပေါင်းစုံတွေ အနေနဲ့ကတော့ လက်နက်ကိုင် အဖွဲ့အစည်းတွေအနေနဲ့က မာနတွေလျှော့ပြီး နိုင်ငံကိုချစ်ဖို့ နံပါတ်တစ် ပြောချင်တယ်” ဟု ပြောသည်။

(၄)နှစ်ကျော်ကြာ မြန်မာ့နိုင်ငံရေး အခင်းအကျင်းတွင် တွေ့ဆုံဆွေးနွေးခြင်း နည်းလမ်းဖြင့် အဖြေရှာရန်အတွက် စတင်လုပ်ဆောင်ရာမှာ တိုင်းရင်းသားလက်နက်ကိုင် ၂ ဖွဲ့ဖြစ်သည့် ကိုးကန့်တပ်ဖွဲ့(MNDAA)နှင့် ပလောင်တပ်ဖွဲ့ (TNLA) တို့ဖြင့်သာ ဆွေးနွေးရသေးပြီးTNLA နှင့် နစကတို့အကြား အဆင်မပြေခဲ့ကြကြောင်း သိရသည်။

တိုင်းရင်းသားများ အချင်းချင်း အပြန်အလှန် လေးစားခြင်း၊ တစ်ဦးနှင့်တစ်ဦးအကြား ပူးပေါင်းဆောင်ရွက်မှု ဖြစ်ပေါ်စေပြီး နားလည်မှုလွဲမှားခြင်းနှင့် ပဋိပက္ခများကို လျှော့ချကာ တွေ့ဆုံဆွေးနွေးခြင်းဖြင့် ဖြေရှင်းနိုင်ကြ ကြောင်း နစကဥက္ကဋ္ဌက ပြောကြားထားဖူးသည်။

CNI News

၂၀၂၅ ခုနှစ်၊ မတ် ၅

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၏ တရားဝင် ရုရှားခရီးစဉ်ကို ကြည့်ခြင်းအားဖြင့် နစကအပေါ် နိုင်ငံတကာ၏ အသိအမှတ်ပြုမှု အဆင့်အတန်း ပိုမိုမြင့်တက်သွားသည်ဟု တရုတ်အနေဖြင့် သဘောပေါက်သွား နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ရုရှားသမ္မတ ပူတင်နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ ၂၀၂၅ ခုနှစ်၊ မတ်လ ၄ ရက်က ကရင်မလင်နန်းတော်တွင် တွေ့ဆုံဆွေးနွေးခဲ့ကြသည်။

ရုရှားသမ္မတ ကိုယ်တိုင်က ဖိတ်ခေါ်သည့်အတွက် နိုင်ငံတကာ၏ အသိအမှတ်ပြုမှု အဆင့်အတန်း ပိုမိုမြင့်တက် သွားသည်ကို တရုတ်အနေဖြင့် သဘောပေါက်နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “တရုတ်အနေနဲ့ ရုရှားကို မင်းအောင်လှိုင် သွားတဲ့အ‌ပေါ်မှာ တရုတ်က မလိုလားတဲ့သ‌ဘော၊ ဝေဖန်လိုတဲ့ သဘောတော့ ရှိပုံမရပါဘူး၊ သို့သော် တစ်ခုတော့ရှိတာပေါ့၊ အခု ရုရှားက ဖိတ်တာက ပူတင် ကိုယ်တိုင်က ဖိတ်တဲ့ အတွက် မင်းအောင်လှိုင်ရဲ့ နိုင်ငံတကာရဲ့ အသိအမှတ်ပြုမှု အဆင့်အတန်းကတော့ ပိုမိုမြင့်တက် သွားတယ်ဆိုတာ ကို တရုတ်ကတော့ သဘောပေါက်ပါတယ်၊ သို့သော်ငြားလည်း တရုတ်ကတော့ မင်းအောင်လှိုင်နဲ့ ပတ်သက်လို့ တစ်ဆင့်လျှော့ပြီးတော့ အသိအမှတ်ပြုထားတဲ့အတွက် အခုကသူက ရှီကျင့်ဖျင်လို တရုတ်အစိုးရရဲ့ ထိပ်သီး ခေါင်းဆောင်နဲ့တော့ တွေ့ရတဲ့ အဆင့်အတန်း မရှိသေးခဲ့ပါဘူး၊ ရုရှားကတော့ ပူတင် ကိုယ်တိုင်နဲ့ တွေ့ဆုံရတာ ဖြစ်တဲ့အတွက် သူ့အတွက် ရုရှားဟာ ပိုမိုယုံကြည်စိတ်ချရတဲ့ မဟာမိတ်လို့ သူယူဆပါလိမ့်မယ်၊ ဒါကြောင့်လည်း ဒီတစ်ခေါက်သွားတဲ့ အခါမှာ သူ့အနေနဲ့ လက်ရှိ ဗမာပြည်မှာ ရှိနေတဲ့ ဘက်ပေါင်းစုံ စစ်ရေးအရ ရှုံးနိမ့်နေတဲ့ အနေအထားပေါ်မှာ သူ့အတွက် အာမခံချက်ရှိတဲ့ အနေအထား တစ်ရပ်၊ လုံခြုံတဲ့ နေထိုင်ရာ တစ်ရပ်ကိုတော့ ရုရှားမှာ ရှာဖွေလိမ့်မယ်လို့ ယုံကြည်မျှော်လင့်ပါတယ်” ဟု ပြောသည်။ 

ဗိုလ်ချုပ်မှူးကြီးမင်းအောင်လှိုင်နဲ့ ရုရှားသမ္မတ ပူတင်ကို တွေ့ရစဉ်

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို ရုရှားသမ္မတ ပူတင်က တရားဝင်ချစ်ကြည်ရေးခရီး လာရောက်ရန် အတွက် ဖိတ်ကြားခဲ့ပြီးနောက် နစကဥက္ကဋ္ဌသည် ၂၀၂၅ ခုနှစ်၊ မတ်လ ၃ ရက်နေ့ နံနက်ပိုင်းက နေပြည်တော်မှ ထွက်ခွာသွားခဲ့သည်။

ထို့နောက် နစကဥက္ကဋ္ဌသည် ရုရှားသမ္မတ ပူတင်နှင့် ကရင်မလင်နန်းတော်၌ တွေ့ဆုံခဲ့သလို ရုရှားနိုင်ငံ၊ မော်စကိုမြို့တွင် ရုရှားနိုင်ငံဝန်ကြီးချုပ် မီခေးလ် မီရှူစတင်၊ ရုရှားလုံခြုံရေးကောင်စီ အတွင်းရေးမှူး Mr. Sergey Kuzhugetovich Shoigu၊ ဒူးမားလွှတ်တော်ဥက္ကဋ္ဌတို့နှင့်လည်း မတ်လ ၄ ရက်က သီးခြားစီ တွေ့ဆုံ၍ ဆွေးနွေးခဲ့ ကြောင်း သိရသည်။

ထိုတွေ့ဆုံ ဆွေးနွေးပွဲများ၌ လုံခြုံရေးဆိုင်ရာ ကိစ္စရပ်များ ပူးပေါင်းဆောင်ရွက်မှု ပိုမိုမြှင့်တင်ရေး၊ နိုင်ငံရေးပါတီ များ ဖွဲ့စည်းထားမှု အခြေအနေ၊ မြန်မာ-ရုရှား လွှတ်တော် ၂ ရပ်ကြား ပူးပေါင်းဆောင်ရွက်မည့် အခြေအနေ၊ ၂၀၂၀ ရွေးကောက်ပွဲ မဲစာရင်း အငြင်းပွားမှုကနေ နစကမှ တာဝန်ယူခဲ့ရမှု အခြေအနေများ စသည်တို့အား ဆွေးနွေးခဲ့ ကြောင်း သိရသည်။

ရုရှားနှင့်တရုတ်သည် မဟာမိတ်ဖြစ်သောကြောင့် နစကဥက္ကဋ္ဌ၏ ခရီးစဥ်အား တရုတ်အနေဖြင့် ဘာမှသိပ်ဖြစ်စရာ မရှိကြောင်း တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ ရုရှားဝန်ကြီးချုပ်ကိုတွေ့ရစဉ်

၎င်းက “ကျမ ကြားတာတော့ ရုရှားနဲ့တရုတ်နဲ့က အစောကြီးကတည်းက မင်းအောင်လှိုင်က သွားချင်လို့ ကြိုးစား နေတယ်လို့ ပြောတာပဲ၊ တရုတ်ပြည်က ပြန်သွားကတည်းက သူက ရုရှားသွားဖို့ ဆက်ကြိုးစားနေတယ်လို့ ပြော တယ်၊ အဲတော့ တရုတ်ကတော့ ဘာမှသိပ်ဖြစ်မှာ မဟုတ်ဘူးလေ၊ ဘာဖြစ်လို့လဲဆို‌တော့ ရုရှားကသူ့ရဲ့ မဟာမိတ် ပဲ ဖြစ်တာကိုး၊ အဲတော့ ဘာမှသိပ်ပြဿနာ မရှိဘူးထင်တယ်၊ အခုတရုတ်နဲ့ ရုရှားရဲ့ ဆက်ဆံရေးက ဒီလောက် ကောင်းနေတဲ့ဟာကြီးကို အစောကြီးထဲက မင်းအောင်လှိုင်က ရုရှားကို သွားတိုင်မလိုတောင် ပြောနေသေးတာ လေ၊ ကျနော်တို့က ငြိမ်းချမ်းရေးရအောင် အများကြီးကြိုးစားပါတယ်၊ ဒါပေမယ့် အိမ်နီးနားချင်း နိုင်ငံကြီးက လက်နက်တွေ အဲဒီ နယ်ခြားက တပ်တွေကို ထောက်ပံ့နေလို့ ကျနော်တို့က ငြိမ်းချမ်းရေး လုပ်လို့မရတာပါ နဲ့တောင် ရုရှားကို သွားတိုင်နေသေးတာပဲ အစောပိုင်းလေ သူအာဏာ မသိမ်းခင်က အဲတော့ ဗမာပြည်ရဲ့ ငြိမ်းချမ်းရေး မရတာဟာ တရုတ်ကြောင့် ဆိုပြီး‌တော့တောင် ရုရှားသွားတိုင် နေသေးတာပဲ၊ အဲတာတောင် တရုတ်က ဂရုမစိုက်ပါဘူး” ဟု ပြောသည်။ 

ရုရှားသမ္မတ ပူတင်နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့၏ ယခုတွေ့ဆုံမှုသည် ဒုတိယ အကြိမ် မြောက်ဖြစ်ပြီး ၂၀၂၂ ခုနှစ်၊ စက်တင်ဘာလ ၄ ရက်ကလည်း ရုရှားနိုင်ငံဗလာဒီဗော့ စတော့ခ်မြိုတွင် ပြုလုပ်ခဲ့သည့် (၇) ကြိမ်မြောက် အရှေ့ဖျားစီးပွားရေးဖိုရမ် (EEF) အား နစကဥက္ကဋ္ဌက တက်ရောက်ခဲ့ကာ စက်တင်ဘာ ၇ ရက် တွင် ရုရှားသမ္မတ ပူတင်နှင့် တွေ့ဆုံ ဆွေးနွေးခဲ့ကြသေးသည်။

CNI News
၂၀၂၅ ခုနှစ်၊ မတ်လ ၄

ရုရှားနိုင်ငံ၊ မော်စကိုမြို့မှာ ရုရှားနိုင်ငံဝန်ကြီးချုပ် မီခေးလ် မီရှူစတင်၊ ရုရှားလုံခြုံရေးကောင်စီ အတွင်းရေးမှူး Mr. Sergey Kuzhugetovich Shoigu၊ ဒူးမား လွှတ်တော်ဥက္ကဋ္ဌတို့နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် သည် မတ်လ ၄ ရက်က သီးခြားစီ တွေ့ဆုံ၍ ဆွေးနွေးခဲ့ကြောင်း သိရသည်။

ရုရှားလုံခြုံရေးကောင်စီ အတွင်းရေးမှူးနှင့် တွေ့ဆုံရာမှာတော့ လုံခြုံရေးဆိုင်ရာကိစ္စရပ်များ ပူးပေါင်းဆောင်ရွက်မှု ပိုမိုမြှင့်တင်ရေးကို အဓိကထား ဆွေးနွေးခဲ့ကြသည်။

ထို့နောက် ဒူးမားလွှတ်တော်ဥက္ကဋ္ဌ H.E. Mr.Vyacheslav Volodin နှင့် တွေ့ဆုံ၍ နိုင်ငံရေးပါတီများ ဖွဲ့စည်းထားမှု အခြေအနေ၊ မြန်မာ-ရုရှား လွှတ်တော် ၂ ရပ်ကြား ပူးပေါင်းဆောင်ရွက်မည့် အခြေအနေ၊ ၂၀၂၀ ရွေးကောက်ပွဲ မဲစာ ရင်း အငြင်းပွားမှုကနေ နစကမှ တာဝန်ယူခဲ့ရမှု အခြေအနေများကို ဆွေးနွေးခဲ့ကြောင်း သိရသည်။

ရုရှားလုံခြုံရေးကောင်စီ အတွင်းရေးမှူး Mr. Sergey Kuzhugetovich Shoigu နဲ့ နစကဥက္ကဋ္ဌ တွေ့ဆုံ ဆွေးနွေးစဉ်

ထို့ပြင် လွတ်လပ်၍ တရားမျှတသည့် ရွေးကောက်ပွဲ ကျင်းပနိုင်ရေး ကြိုတင်ပြင်ဆင် ဆောင်ရွက်လျက်ရှိမှု အခြေအနေများနှင့် မြန်မာနိုင်ငံ ရွေးကောက်ပွဲ ကျင်းပချိန်မှာ ရုရှားနိုင်ငံက ထောက်ခံအားပေးသွားမည့် အခြေအနေများကိုလည်း ဆွေးနွေးခဲ့ကြကြောင်း နစကဘက်က သတင်းထုတ်ပြန်ခဲ့သည်။

ဒူးမားလွှတ်တော်ဥက္ကဋ္ဌ H.E. Mr.Vyacheslav Volodin နဲ့ နစကဥက္ကဋ္ဌ တွေ့ဆုံစဉ်

ပြည်ပမှ အကူအညီများ ရယူသည့် ပါတီများကြောင့် နိုင်ငံတည်ငြိမ်အေးချမ်းမှုကို ထိခိုက်စေမှု အခြေအနေများကို လည်း ဒူးမားလွှတ်တော်ဥက္ကဋ္ဌနှင့် နစကဥက္ကဋ္ဌတို့ ဆွေးနွေးခဲ့ကြကြောင်း သိရသည်။

CNI News
၂၀၂၅ ခုနှစ်၊ မတ်လ ၄

ရုရှားသမ္မတ ပူတင်နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ ၂၀၂၅ ခုနှစ်၊ မတ်လ ၄ ရက်က ကရင်မလင်နန်းတော်မှာ တွေ့ဆုံ ဆွေးနွေးခဲ့ကြသည်။

ရုရှား - မြန်မာ သံတမန် ဆက်ဆံရေးသည် (၇၇)နှစ်ပြည့်မြောက်ခဲ့ပြီဖြစ်သည်။

နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၂  ခုနှစ်၊ စက်တင်ဘာလ ၄ ရက်ကလည်း ရုရှားနိုင်ငံဗလာဒီဗော့ စတော့ခ်မြိုတွင် ပြုလုပ်ခဲ့သည့် (၇) ကြိမ်မြောက် အရှေ့ဖျားစီးပွားရေးဖိုရမ်(EEF)ကို တက်ရောက်ခဲ့ပြီး စက်တင်ဘာ ၇ ရက်မှာ ရုရှားသမ္မတ ပူတင်နှင့် တွေ့ဆုံ ဆွေးနွေးခဲ့ကြသေးသည်။

CNI News

၂၀၂၅ ခုနှစ်၊ မတ်လ ၄

ရုရှားနိုင်ငံသို့ ရောက်ရှိနေသည့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် မော်စကိုမြို့ရှိ အညတရ စစ်သည် ဂူဗိမာန်၌ မတ်လ ၄ ရက်နေ့ နံနက်က လွမ်းသူပန်းခွေချ အလေးပြုခဲ့ကြောင်း သိရသည်။

ထို့နောက် မော်စကိုမြို့ရှိ အညတရစစ်သည်ဂူဗိမာန်သို့ ရောက်ရှိစဉ် မော်စကို တပ်နယ်မှူးနှင့် တာဝန်ရှိသူများက ကြိုဆိုခဲ့ကြသည်။

လမ်းသူပန်းခွေချ အလေးပြုစဉ် အချိန်ဥ ရုရှားနိုင်ငံ ဂုဏ်ပြုတပ်ဖွဲ့က မြန်မာနိုင်ငံ၏ နိုင်ငံတော်သီချင်းအား တီးမှုတ်ကြသည်။ 

ထို့နောက် နစကဥက္ကဋ္ဌသည် ဂုဏ်ပြုတပ်ဖွဲ့၏ ချီတက်အလေးပြုခြင်းကို ခံယူခဲ့သည်။

CNI News

၂၀၂၅ ခုနှစ်၊ မတ်လ ၄

မြန်မာ့နိုင်ငံရေး အခင်းအကျင်းသည် ယခု အနေအထားတိုင်း ဆက်သွားနေမည်ဆိုပါက ကျရှုံးနိုင်ငံ ဖြစ်သွားနိုင် ကြောင်း စစ်ရေးနှင့်နိုင်ငံရေးအကဲခတ်များက CNI သတင်းဌာနသို့ ပြောသည်။

လက်ရှိ မြန်မာ့နိုင်ငံရေးသည် နေရာအနှံ့အပြား တိုက်ပွဲများဖြစ်ပွားပြီး နယ်မြေသိမ်းပိုက်မှုများကြောင့် ပြိုကွဲနိုင်ငံ နီးပါး ဖြစ်နေကြောင်း သုံးသပ်မှုများရှိသည်။

ထို့ကြောင့် ယခုအနေအထားတွင် အဖွဲ့အစည်းအသီးသီး၏ ခေါင်းဆောင်များအနေဖြင့် ကိုယ့်အကျိုးစီးပွား အတွက် ရပ်တည်မည်ဆိုပါက ရေရှည်တွင် ကျရှုံးနိုင်ငံဖြစ်သွားနိုင်ကြောင်း 7 EAO Alliance မှ ပြောရေးဆိုခွင့်ရှိသူ ဦးနိုင်အောင်မငေးက CNI သတင်းဌာနသို့ ပြောသည်။

 မြန်မာ့တပ်မတော်ကို တိုက်ခိုက်နေတဲ့ မွန်လက်နက်ကိုင် တပ်ဖွဲ့တစ်ဖွဲ့ကို တွေ့ရစဉ်

၎င်းက “အဖွဲ့အစည်းအသီးသီးရဲ့ နိုင်ငံခေါင်းဆောင်ပေါ့။ ခေါင်းဆောင်လို့ ပြောတဲ့နေရာမှာ တိုင်းရင်းသား ခေါင်းဆောင်ရှိတယ်၊ ဒီမိုကရေစီ ခေါင်းဆောင်ရှိတယ်။ နောက် လက်နက်ကိုင် အဖွဲ့အစည်း ခေါင်းဆောင်တွေ ရှိတယ်။ ဒီခေါင်းဆောင်တွေ အားလုံးက ကိုယ်ကျိုးစီးပွားတွေ တင်းနိုင်တယ်၊ ကိုယ်ကျိုးစီးပွားအတွက်ပဲ ရပ်တည်မယ် ဆိုရင်တော့ ဒါက တစ်စနှစ်စ မကျရှုံးသည့်တိုင်အောင် တစ်နေ့တော့ ကျရှုံးမှာပဲ။ တစ်နေ့တော့ ပြိုကွဲမှာပဲလို့ မှတ်ချက်ပေးချင်တယ်။ တခြားနိုင်ငံမှာ နည်းလမ်းတွေက အများကြီးရှိတယ်။ ကျနော်တို့က ဒီနိုင်ငံ လူမျိုးများလို့၊ ဘာသာမတူလို့၊ လူမျိုးကွဲပြားလို့ ဒါတွေက တခြားနိုင်ငံနဲ့ ကြည့်ရင် ဆင်ခြင်တွေပဲ။ မတူကွဲပြားတဲ့ နိုင်ငံမှာ ပေါင်းစည်းတဲ့ နိုင်ငံတွေ အများကြီးရှိတယ်လေ။ ဥပမာအားဖြင့် အိန္ဒိယကို ကြည့်ပါလား၊ ဘာသာမတူဘူး၊ အခြေအမြစ်မတူဘူး၊ ပုံစံမတူဘူး။ အဲဒါတောင် ကျနော်တို့ ပေါင်းစည်းနိုင်တယ်ဆိုတာ ကျ‌နော်တို့လည်း ပေါင်းစည်းနိုင်ဖို့ လွယ်လွယ်လေးပဲလေ” ဟု ပြောသည်။

လက်ရှိ မြန်မာ့နိုင်ငံရေး အခင်းအကျင်းသည် ကမ္ဘာစစ်ကြီးကဲ့သို့ အနေအထား မဟုတ်သေးသော်လည်း အင်မတန် ဆိုးရွားသည့် အနေအထားကို ရောက်သွားပြီဖြစ်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြနေကြ သည်။ 

(၄) နှစ်‌ကျော်ကြာ ယခုအခြေအနေမှာ လူထုအတွက် ထိခိုက်နစ်နာမှု များပြားနေပြီ ဖြစ်သည့်အတွက် နှစ်ဖက် အင်အားစုများအနေဖြင့် ညှိနှိုင်းရန်လိုအပ်ကြောင်း၊ ၎င်းတို့ မပြေလည်သရွေ့ ကျဆုံးနိုင်ငံ ဖြစ်နိုင်ကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) မှ ဥက္ကဋ္ဌ ဦးစိုင်းညွန့်လွင်က CNI သတင်းဌာနသို့ ပြောသည်။

NSPNC နဲ့ နိုင်ငံ‌ရေးပါတီများ တွေ့ဆုံဆွေးနွေးနေစဉ်

၎င်းက “တစ်ဖက်နဲ့တစ်ဖက် ညှိနှိုင်းဖို့လိုတာပေါ့။ မပြေလည်မချင်းကတော့ ကျဆုံးနိုင်ငံ ဖြစ်နိုင်တယ်။ ပြိုကွဲတဲ့ အနေအထားမျိုး ရောက်လာနိုင်တယ်။ တော်တော်လေး ဆိုးရွားတဲ့ အခြေအနေမျိုးကို ရင်ဆိုင်ရမှာပဲ။ ဘာပဲ ဖြစ်ဖြစ် အားလုံးပါဝင်တဲ့ state holder တွေ ဒါတွေကို ပြန်စဉ်းစားသင့်တယ်။ နာကျည်းမှုတွေ၊ မုန်းတီးမှုတွေ၊ မခံချင်စိတ်တွေ၊ ကလဲ့စားချေချင်စိတ်တွေ အဲဒီလိုဖြစ်နေကြတော့ အရမ်းတော့ခက်တဲ့ အနေအထားမျိုး။ အင်အား စုကြီးတွေက တဖြေးဖြေးနဲ့ သူ့နေရာနဲ့သူ သိမ်းပိုက်တဲ့ နေရာတွေ ဖြစ်နေကြတော့ အင်အားစု သေးသေးလေး ဆိုရင်တော့ ပြိုကွဲမှုမရှိဘူး။ ဥပဒေစိုးမိုးမှုတွေ ပျက်သုန်းတာမရှိဘူး။ သို့သော်လည်း အခုက အင်အားစုကြီးတွေ အကြီးကြီးဖြစ်ပြီး နေရာအနှံ့အပြားမှာ ဖြစ်နေတဲ့ ပြိုကွဲနိုင်တယ်လို့ ပြောနိုင်တာပေါ့”ဟု ပြောသည်။

၂၀၂၁ ခုနှစ် နိုင်ငံရေး အပြောင်းအလဲ ဖြစ်ပွားပြီးနောက်ပိုင်း မြန်မာနိုင်ငံတွင် လက်နက်ကိုင် တော်လှန်ရေး အင်အားစုများမှာ ယခင်ကထက် ပိုမိုများပြားလာခဲ့သည်။

လက်ရှိ မြန်မာ့နိုင်ငံရေး အခင်းအကျင်းတွင် တွေ့ဆုံဆွေးနွေးခြင်း နည်းလမ်းဖြင့် အဖြေရှာရန် တိုက်တွန်း နေကြသော်လည်း ပြုပြင်ပြောင်းလဲရေး အရွေ့တစ်ခုကို သွားနိုင်သော နိုင်ငံရေးတွေ့ဆုံဆွေးနွေးမှုမျိုး မရှိသေးကြောင်းလည်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

CNI News

၂၀၂၅ ခုနှစ်၊ မတ် ၄

တိုင်းပြည်နှင့် ကိုက်ညီနိုင်သည့် ဖွဲ့စည်းပုံတစ်ခုခုအား အဖွဲ့အစည်းများအားလုံးမှ ပွင့်ပွင့်လင်းလင်း ဆွေးနွေး ရမည့် အချိန်တစ်ခုလိုအပ်ကြောင်း ရခိုင်ပြည်လွတ်မြောက်ရေးပါတီ(ALP)ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

ကိုယ့်တိုင်းပြည်နှင့် ကိုက်ညီသည့် ဖွဲ့စည်းပုံတစ်ခုခုအား အားလုံးပွင့်ပွင့်လင်းလင်း ဆွေးနွေးရမည့်အချိန် တစ်ခုလိုအပ်ကြောင်း၊ အိန္ဒိယနိုင်ငံအတိုင်း တိုက်ရိုက်ဖြစ်ချင်မှ ဖြစ်မည်ဖြစ်ပြီး ပိုကောင်းသည့် အနေအထား တစ်ခုလည်း မရောက်ဘူး ပြော၍မရကြောင်း ရခိုင်ပြည်လွတ်မြောက်ရေးပါတီ (ALP) ဥက္ကဋ္ဌ ဒေါ်စောမြရာဇာ လင်းက CNI သတင်းဌာနသို့ ပြောသည်။

၎င်းက “ထင်ရသ‌လောက် ဆိုလို့ရှိရင်တော့ Governor အဆင့်ကို မြန်မာနိုင်ငံမှာ အစိုးရတွေက ကျင့်သုံးလိုခြင်း ရှိ၊ မရှိ ဆိုတာကတော့ အစိုးရပိုင်းကပဲ ပိုပြီးတော့မှ နားလည်လိမ့်မယ်လို့ ထင်ပါတယ်၊ အိန္ဒိယမှာကတော့ ဝန်ကြီး ချုပ်ရဲ့ အားနည်းချက်တွေ၊ ဝန်ကြီးတွေရဲ့ အားနည်းချက်တွေ အဲတာမျိုးကို ကျလို့ရှိရင် Governor (အုပ်ချုပ်ရေး မှူး)က ထိန်းချုပ်တဲ့စနစ်ကို သူတို့တွေက ကျင့်သုံးထားတယ်၊ နည်းနည်းတော့ ခပ်ရှုပ်ရှုပ်တော့ရှိတယ်၊ တိုင်းပြည်တစ်ခုရဲ့ အကြောင်းအရာ၊ တိုင်းပြည်တစ်ခုရဲ့ ဖွဲ့စည်းပုံကို နောက်တိုင်းပြည် တစ်ခုကနေ ပုံတူကူး ချမယ်ဆိုတာလည်း ဖြစ်ချင်မှဖြစ်မှာ၊ အဓိက ကိုယ့်တိုင်းကိုယ့်ပြည်နဲ့ ဖက်စပ်နိုင်တဲ့ ဖွဲ့စည်းပုံ တစ်ခုခုကို တော့ တိုင်းရင်းသားလက်နက်ကိုင် တော်လှန်ရေး အဖွဲ့အစည်းတွေရော၊ နိုင်ငံရေးပါတီတွေ‌ရော၊ အစိုးရ‌ရော အားလုံးဝိုင်းပြီးတော့မှ ပွင့်ပွင့်လင်းလင်း ဆွေးနွေးရမယ့် အချိန်တစ်ခုတော့ လိုတယ်၊ အိန္ဒိယအတိုင်းလည်း တိုက်ရိုက်ဖြစ်ချင်မှဖြစ်မယ်၊ ကိုယ့်တိုင်းပြည်ရဲ့ အနေအထားကို ကြည့်ပြီးတော့မှ အဲလိုမျိုး ဆွေးနွေးကြတဲ့ အခါမှာ ပိုပြီးတော့မှ ကောင်းတဲ့ အနေအထား တစ်ခုလည်း မရောက်ဘူးလို့ ပြောလို့တော့ ဘယ်ရမလဲ၊ အဓိက,က လုပ်ကြည့်ဖို့လိုတယ်၊ စနစ်သစ်တွေကို တီထွင်ပြီးတော့ လုပ်ကြည့်သင့်တယ်လို့တော့ မြင်ပါ တယ်”ဟု ပြောသည်။

NSPNC နဲ့ နိုင်ငံရေးပါတီများ တွေ့ဆုံဆွေးနွေးစဉ်

၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးဆိုင်ရာ ကိစ္စရပ်များအား အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နှင့် နိုင်ငံရေးပါတီများ အစုအဖွဲ့၏ အလုပ်အဖွဲ့တို့ အကြား ဆွေးနွေးလျက်ရှိနေသည်။

ထိုဆွေးနွေးမှုများအနက် ၂၀၀၈ ဖွဲ့စည်းပုံ အခြေခံဥပ‌ဒေဆိုင်ရာ ပုဒ်မ ၂၆၁ အား ပြင်ဆင်ပြဋ္ဌာန်းလိုက်ပါက အိန္ဒိယကဲ့သို့ ဝန်ကြီးချုပ်များအား Governor (အုပ်ချုပ်ရေးမှူး) မှတဆင့် ထိန်းချုပ်သောအဆင့်အား ကျင့်သုံး လာမည်လားဆိုကာ မေးခွန်းများလည်း ထွက်ပေါ်လျက်ရှိသည်။

၂၀၀၈ ခြေ/ဥ ဖြင့် စဥ်းစားသည့်အခါ ပုဒ်မ ၂၆၁ သည် အုပ်ချုပ်ရေး တစ်ခုပင်ဖြစ်ကြောင်း၊ ပြည်ထောင်စုမှ အားလုံးကို ချုပ်ကိုင်ထားပြီး ပုဒ်မ ၂၆၁ အား ဖွင့်ပေးရုံဖြင့်လည်း ပြေလည်မှုရရန် ခက်ခဲနိုင်ကြောင်း ရခိုင့်ဦးဆောင်ပါတီ(AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

NSPNC နဲ့ နိုင်ငံရေးပါတီများ ဆွေးနွေးထားချက်ကို တွေ့ရစဉ်

၎င်းက “၂၆၁ က အုပ်ချုပ်ရေး တစ်ခုပဲဗျ၊ ၂၆၁ က အုပ်ချုပ်ရုံလောက်နဲ့ အိန္ဒိယတို့ ဘာတို့မှာက အုပ်ချုပ်ရေးနဲ့ ပတ်သက်ရင် သူ့ရဲ့ ဖွဲ့စည်းပုံက ခိုင်မာတာပေါ့၊ သမ္မတက အုပ်ချုပ်တယ်၊ သမ္မတမှာ လုပ်ပိုင်ခွင့်ရှိတယ်၊ အဲတော့ တခြား ပြည်နယ်တွေမှာကျတော့ သမ္မတကြီးက တိုက်ရိုက်ခန့်တဲ့ Governor (အုပ်ချုပ်ရေးမှူး)နဲ့ အုပ်ချုပ်တာပေါ့၊ တစ်နည်းအားဖြင့် Governor (အုပ်ချုပ်ရေးမှူး) ဟာ သမ္မတကြီးရဲ့ အေးဂျင့် ဖြစ်သွားတာ ပေါ့ဗျာ၊ သူ့ရဲ့လုပ်ပိုင်ခွင့် အဆင့်ဆင့်ပါ၊ အဲတော့ ၂၀၀၈ ဖွဲ့စည်းပုံနဲ့ အိန္ဒိယဖွဲ့စည်းပုံက မတူဘူးဗျ၊ သမ္မတကို လွှတ်တော်က အတည်ပြုပေးတယ်၊ အာဏာရပါတီက အဆိုပြုတယ်ပေါ့ဗျာ၊ လွှတ်တော်က ခန့်အပ်တယ်၊ သမ္မတကြီးဆီမှာ ခုနက အနိုင်ရတဲ့ ပါတီရဲ့ ဝန်ကြီးချုပ်လောင်းလျာပေ့ါဗျာ၊ သူက ကျမ်းကျိန်ပေးရတာပေါ့၊ အဲတော့ သမ္မတလုပ်ပိုင်ခွင့်ရှိတယ်၊ ပြည်နယ်ဝန်ကြီးချုပ်တွေက Governor (အုပ်ချုပ်ရေးမှူး) တွေဆီမှာ ကျမ်းကျိန်ရတာပေါ့၊ တစ်နည်းအားဖြင့် Governor (အုပ်ချုပ်ရေးမှူး) တွေက သမ္မတကြီးရဲ့ အေးဂျင့် ဖြစ်တာ ပေါ့ဗျာ၊ ဒါက သူ့ဖွဲ့စည်းပုံနဲ့ သူသွားတာကိုး၊ အဲတော့ ၂၀၀၈ နဲ့ စဥ်းစားတဲ့အခါ ၂၆၁ သည် အဲတာက အုပ်ချုပ်‌ရေး တစ်ခုပဲဗျ၊ အကုန်လုံးကို ပြည်ထောင်စုက ချုပ်ကိုင်ထားမှာလား၊ အဲလိုချုပ်ကိုင်ထားပြီးတော့ ၂၆၁ ကို ဖွင့်ပေးရုံနဲ့လည်း ပြေလည်မှုရဖို့က ခက်တယ်ဗျ” ဟု ပြောသည်။

NSPNC နှင့် နိုင်ငံရေးပါတီများ အစုအဖွဲ့၏ အလုပ်အဖွဲ့တို့သည် ၂၀၂၅ ခုနှစ်၊ ဇန်နဝါရီ ၂၃-၂၄ ရက်များတွင် တွေ့ဆုံဆွေးနွေးခဲ့ပြီး ၂၀၀၈ ဖွဲ့စည်းပုံပြင်ဆင်ရေး သဘောထားစုစည်းချက် ၄၃ ချက်အား လက်မှတ်ရေးထိုး နိုင်ခဲ့ကြောင်း ပြည်သူ့ပါတီ (PP) ဥက္ကဋ္ဌ ဦးကိုကိုကြီးက သတင်းစာရှင်းလင်းပွဲ၌ ပြောကြားခဲ့သည်။

ထိုသဘောတူညီချက် ၄၃ ချက်အနက် ဒီမိုကရေစီနှင့် ဖက်ဒရယ်စနစ်ကို အခြေခံသော ပြည်ထောင်စုအဖြစ် ဖွဲ့စည်းတည်ဆောက်သည်ဟူ၍ ဖွဲ့စည်းပုံအခြေခံဥပဒေတွင် ပြင်ဆင်ပြဋ္ဌာန်းရန် သဘောတူဆုံးဖြတ် နိုင်ခဲ့ ကြောင်း ၎င်းက ပြောသည်။

ထို့ပြင် ဖက်ဒရယ်ပြည်ထောင်စု တည်ဆောက်ရေးတွင် အာဏာခွဲဝေခြင်း၊ ဘဏ္ဍာရေးဆိုင်ရာ ခွဲဝေခြင်းသည် အရေးပါကြောင်း၊ ယခုသဘောတူညီချက်တွင် တိုင်းဒေသကြီးနှင့် ပြည်နယ်အသီးသီး၌ သက်ဆိုင်ရာ ဝန်ကြီးချုပ်များအား သက်ဆိုင်ရာ လွှတ်တော်များမှ ရွေးကောက်တင်မြှောက်ခွင့် ရရှိလာမည် ဖြစ်ကြောင်း ဦးကိုကိုကြီးက ပြောကြားခဲ့သည်။

CNI News

၂၀၂၅ ခုနှစ်၊ မတ်လ ၄

နောင်လာမည့် လွှတ်တော်အခင်းအကျင်းတွင် ဖွဲ့စည်းပုံအခြေခံဥပဒေ(၂၀၀၈) တစ်ခုလုံး ပြန်လည်သုံးသပ်ခြင်း ဆိုင်ရာ ညီလာခံတစ်ခု ကျင်းပပေးရန် ဆွေးနွေးထားသည်ဟု ပြည်သူ့ပါတီ(PP)ဥက္ကဋ္ဌ ဦးကိုကိုကြီးက ပြောသည်။

နစက၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဆွေးနွေးညှိနှိုင်းရေးကော်မတီ(NSPNC)နှင့် နိုင်ငံရေး ပါတီများ အစုအဖွဲ့၏ အလုပ်အဖွဲ့တို့ကြား ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး အချက်များကို ဆွေးနွေးထားကြကြောင်း သိရသည်။

ဦးကိုကိုကြီးက “ကျနော်တို့က နောင်လာမယ့် လွှတ်တော်မှာ သင့်တော်တဲ့အချိန်တစ်ခုမှာ ဖွဲ့စည်းပုံအခြေခံဥပဒေ တစ်ခုလုံး ပြန်လည်သုံးသပ်ခြင်းဆိုင်ရာ ညီလာခံတစ်ခု ကျင်းပဖို့ ကျနော်တို့ ဆွေးနွေးထားတယ်။ အဲဒါက အားလုံး ပါဝင်သော ဆိုတာထက် ပို၍ပို၍ ပြည့်စုံသောပေါ့။ တစ်ဆင့်ချင်း တစ်ဆင့်ချင်း ဆွေးနွေးသွားခြင်းအားဖြင့် ပိုပြီး ကျယ် ကျယ်ပြန့်ပြန့် ပါဝင်တဲ့ ဆွေးနွေးမှုတွေ ဖြစ်လာနိုင်တယ်လို့ ကျနော်က အဲလိုပဲ ယုံကြည်ပါတယ်”ဟု CNI သတင်းဌာနသို့ ပြောသည်။

NSPNC နဲ့ နိုင်ငံရေးပါတီ အစုအဖွဲ့၏ အလုပ်အဖွဲ့ ဆွေးနွေးထားချက်များကို တွေ့ရစဉ်

လက်ရှိတွင် နိုင်ငံရေးပါတီများ အစုအဖွဲ့၏ အလုပ်အဖွဲ့နှင့် NSPNC တို့ကြား ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး ဆွေးနွေးထားရာတွင် ပြင်ဆင်နိုင်ရေး သဘောထားစုစည်းချက် ၄၃ ချက် ရရှိထားပြီး ဆက်လက် ဆွေးနွေးရန် အချက် ၇ ချက်ရှိကြောင်း သိရသည်။

၂၀၀၈ ဖွဲ့စည်းပုံအခြေခံဥပဒေ ဖျက်သိမ်း၍ အသစ်ရေးဆွဲရန် လက်နက်ကိုင်များ၊ ဒီမိုကရေစီအရေး လှုပ်ရှားသူများ၊ နိုင်ငံရေးပါတီတချို့က တောင်းဆိုထားကြသည်။

သို့သော် မြန်မာ့တပ်မတော်က ၂၀၀၈ ဖွဲ့စည်းပုံအခြေခံဥပဒေကို ကာကွယ်စောင့်ရှောက်ရန် တာဝန်ရှိသည့် အတွက် ဖျက်သိမ်းရေး တောင်းဆိုမှုများကို လက်မခံဘဲ ပြင်ဆင်ရေးကိုသာ လက်ခံကြောင်း သဘောထားရပ် တည်လျက်ရှိသည်။

နစကသည် ရွေးကောက်ပွဲ ကျင်းပပေးနိုင်ခြေ ရှိ/မရှိ မသေချာသေးသည့်အတွက် လွှတ်တော်ပေါ်ပေါက်လာရေးမှာ မျှော်လင့်ချက် နည်းနေသေးကြောင်း၊ လွှတ်တော်ပေါ်လာပါကလည်း သင့်တော်သည့်အချိန်ဆိုသည်မှာ မည်သည့် အချိန်ကို ဆိုလိုသလဲ တိတိကျကျ မပြောနိုင်ခြင်းကို လေ့လာကြည့်လျှင် ၂၀၀၈ ဖွဲ့စည်းပုံအခြေခံဥပဒေ တစ်ခုလုံး ပြင်ဆင်သုံးသပ်ခြင်း ညီလာခံပေါ်ပေါက်ဖို့မှာ ဖြစ်နိုင်ပါ့မလားဟု မေးခွန်းထုတ်စရာ ဖြစ်နေကြောင်း စစ်ရေးနှင့် နိုင်ငံရေး အကဲခတ်များက ထောက်ပြကြသည်။

ဗိုလ်ချုပ်မှူးကြီးမင်းအောင်လှိုင်နဲ့ ၂၀၀၈ ဖွဲ့စည်းပုံအခြေခံဥပဒေကို တွေ့ရစဉ်

လက်ရှိအချိန်မှာတော့ ၂၀၀၈ ဖွဲ့စည်းပုံအခြေခံဥပဒေကို ကျင့်သုံး၍ မြန်မာ့တပ်မတော်က ၂၀၂၁ ခုနှစ်၊ ဖေဖော်ဝါရီ ၁ ရက်မှစတင်၍ နိုင်ငံတော်ကို အရေးပေါ် ကြေညာပြီး အုပ်ချုပ်လျက်ရှိသည်။

ထို့ကြောင့် နိုင်ငံရေးပါတီများက ရွေးကောက်ပွဲ ကျင်းပ၍ မြန်မာ့နိုင်ငံရေး အကျပ်အတည်းကို ကျော်လွှားရန် တောင်းဆိုနေပြီး ကြိုတင် သဘောတူညီချက်များ ရရှိရေးအတွက်လည်း နစက၏ NSPNC နှင့် တွေ့ဆုံ ဆွေးနွေး လျက်ရှိသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၅ ခုနှစ်အတွင်း ရွေးကောက်ပွဲ ကျင်းပပေးမည်ဖြစ်ပြီး အနိုင်ရ သည့် ပါတီကို နိုင်ငံတော်အာဏာလွှဲပြောင်းပေးမည်ဟု ပြောကြားထားသော်လည်း မည်သည့် အချိန်တွင် ကျင်းပ မည်ဟု တိတိကျကျ ပြောကြားမထားသည့်အတွက် စိုးရိမ်မှုများလည်း ရှိနေကြသည်။

နစကနှင့် နီးစပ်သူများကတော့ ၂၀၂၅ ခုနှစ်၊ အောက်တိုဘာ၊ နိုဝင်ဘာ၊ ဒီဇင်ဘာ စသည့် လများအတွင်း ရွေးကောက်ပွဲ ကျင်းပနိုင်ကြောင်း၊ ၂၀၂၆ ခုနှစ်၊ ဧပြီလတွင် အာဏာလွှဲပြောင်းရေးကို လုပ်လာနိုင်ကြောင်း ပြောသည်။