CNI News

၂၀၂၅ ခုနှစ်၊ ဧပြီ ၈

မြန်မာနိုင်ငံတွင် လှုပ်ခတ်ခဲ့သော ငလျင်ကြောင့် လူသားချင်း စာနာထောက်ထားမှု အကူအညီများ လိုအပ်နေ သည့် ပြည်သူများအတွက် ဩစတြေးလျနိုင်ငံက ထောက်ပံ့ရေးပစ္စည်းများ ၂၀၂၅ ခုနှစ်၊ ဧပြီ ၈ ရက်တွင် မြန်မာနိုင်ငံသို့ ရောက်ရှိခဲ့သည်။

ဩစတြေးလျနိုင်ငံသည် မြန်မာနိုင်ငံကို ဒေါ်လာ ၉ သန်း ထောက်ပံ့မည်ဟု ကြေညာထားသည်။ ဧပြီ ၈ ရက်က ရောက်ရှိခဲ့သော ကူညီကယ်ဆယ်ရေးပစ္စည်းများသည် ဩစတြေးလျနိုင်ငံက ပေးအပ်မည့် ဒေါ်လာ ၉ သန်း ထောက်ပံ့မှု၏ တစ်စိတ်တစ်ပိုင်းဖြစ်ကြောင်း မြန်မာနိုင်ငံဆိုင်ရာ ဩစတြေးလျသံရုံးက ထုတ်ပြန်ခဲ့သည်။

မြန်မာနိုင်ငံသို့ ရောက်ရှိလာသော လူသားချင်း စာနာထောက်ထားမှု အကူအညီများတွင် အမိုးအကာများ၊ မီးဖို ချောင်သုံးပစ္စည်းများနှင့် တစ်ကိုယ်ရေ သန့်ရှင်းရေးသုံးပစ္စည်းများ ပါဝင်သည့် ထောက်ပံ့ရေးပစ္စည်း အထုပ် ၁၀၀ ကျော် ဖြစ်သည်။ 

ထို့နောက် ဩစတြေးလျနိုင်ငံသည် နိုင်ငံတကာ ကြက်ခြေနီကော်မတီ၊ အာဆီယံ၊ ဩစတြေးလျ NGO များဖြင့် ပူးပေါင်း၍ ငလျင်ဘေးသင့် ပြည်သူများကို ပံ့ပိုးပေးသွားမည်ဟု သံရုံးက ထုတ်ပြန်ခဲ့သည်။

CNI News

၂၀၂၅ ခုနှစ်၊ ဧပြီ ၈

မြန်မာနိုင်ငံမှာ လတ်တလော ဖြစ်ပွားနေသော ငလျင်ဘေးကြောင့် တရားမျှတစွာ စဥ်းစားမည်ဆိုပါက နစက အနေဖြင့် ရွေးကောက်ပွဲလုပ်ရန် မဖြစ်နိုင်ကြောင်း တရုတ်-မြန်မာအရေး လေ့လာသုံးသပ်သူ ဒေါက်တာ လှကျော်ဇောက CNI သတင်းဌာနသို့ ပြောသည်။

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်မှုကြောင့် နေပြည်တော်ရှိ လွှတ် တော် အဆောက်အအုံများ အပါအဝင် အစိုးရဌာနများ၊ လမ်းတံတားများ ပြိုကျပျက်စီးဆုံးရှုံးခဲ့သည်။

အလားတူ စစ်ကိုင်းတိုင်းနှင့် မန္တလေးတိုင်း အတွင်းမှာလည်း လူသေဆုံး ထိခိုက်ဒဏ်ရာရရှိမှုများ ရှိနေသလို နေအိမ်များ၊ ဟိုတယ်များ၊ ဘာသာရေး အဆောက်အအုံများနှင့် လမ်းတံတားများ ပြိုကျပျက်စီးလျက်ရှိသည်။

ထို့ကြောင့် မြန်မာနိုင်ငံတွင် ငလျင်ဘေး ပြန်လည်ထူထောင်ရေး လုပ်ငန်းများနှင့် စစ်ဘေး ပြန်လည်ထူထောင် ရေး လုပ်ငန်းများ ဆောင်ရွက်ရန် ရှိနေသကဲ့သို့ စီးပွားရေး ကျဆင်းမှု ပြန်လည် ဦးမော့ရေး ကြိုးပမ်းရန်လည်းလိုအပ် နေခြင်းကြောင့် ၂၀၂၅ ခုနှစ်အတွင်း ရွေးကောက်ပွဲ ကျင်းပရန်မှာ မလွယ်ကူတော့ကြောင်း ထောက်ပြကြသည်။

နစက အနေဖြင့် လုပ်ချင်သလို လုပ်မည်ဆိုလျှင် ရွေးကောက်ပွဲ ကျင်းပနိုင်ကြောင်း၊ တရားမျှတမှုဖြင့် ကြည့်ပါက ရွေးကောက်ပွဲ ကျင်းပနိုင်ခြေမရှိကြောင်း တရုတ်-မြန်မာအရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

၂၀၂၅ ခုနှစ်၊ မတ်လ ၂၈ ရက်နေ့ ငလျင်ကြောင့် လွှတ်တော်အဆောက်အအုံ ပျက်စီးသွားစဉ်

၎င်းက  “တရားသဘောအရ စဥ်းစားရင်တော့ လုပ်နိုင်ဖို့ အကြောင်းမရှိဘူး၊ အဲဒီတော့ အခု ရွေးကောက်ပွဲ သူတို့ လုပ်မယ်ဆိုရင် လုပ်ချင်သလို လုပ်လို့ရတယ်၊ တကယ့်တကယ် တရားသဖြင့် တရားမျှတစွာ စဥ်းစားရင်တော့ မဖြစ်နိုင်ဘူး၊ အခုသူပြောတဲ့ထဲမှာ သူကတခြားနိုင်ငံတွေကိုလည်း ဖိတ်ပါ့မယ်ဆိုရင်တော့ မဖြစ်ဖို့များတယ် ထင်တယ်၊ တခြားနိုင်ငံတွေကလည်း သူနဲ့ဘယ်လောက် အဆင်ပြေပြေလေ၊ တရုတ်ပဲဖြစ်ဖြစ်၊ ရုရှားပဲဖြစ်ဖြစ် ဘယ်လောက် အဆင်ပြေပြေ မဟုတ်တရုတ်ကြီးကိုတော့ ဝင်ပြီးအာမခံပေးနိုင်မယ် မထင်ဘူး။ ဒါကြောင့်မို့လို့ မလုပ်ဖြစ်ဖို့ များပါတယ်၊ စစ်ကောင်စီကတော့ ကြာလေသူ အကျပ်အတည်းတွေ့လေ ဖြစ်မှာပဲလေ။ နေပြည်တော် က ပျက်စီးတဲ့ဟာလည်း မနည်းဘူးလေ၊ နေပြည်တော်မှာရှိတဲ့ ဝန်ထမ်း ဟိုနင်း(အဆောက်အဦ) တွေကလည်း မနည်းဘူး ပျက်စီးကုန်တာ၊ အဲဒီတော့ အစိုးရယန္တရားတစ်ခုလုံး ပတ်ချာလိုက် နေတာပဲလေ၊ အဲဒီတော့ လောလောဆယ်တော့ ဒီတစ်နှစ်လုံးကတော့ တော်တော်ကို ခက်ခက်ခဲခဲ ကျော်ဖြတ်ရမယ်ထင်တယ်” ဟု ပြောသည်။

မြန်မာနိုင်ငံတွင် အထွေထွေရွေးကောက်ပွဲကို ၂၀၂၅ ခုနှစ်၊ ဒီဇင်ဘာလ သို့မဟုတ် ၂၀၂၆ ခုနှစ်၊ ဇန်နဝါရီလတွင် ကျင်းပသွားရန် စီစဉ်ထားကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က  ၂၀၂၅ ခုနှစ်၊ မတ်လ ၇ ရက် တွင် ဘယ်လာရုစ်သမ္မတ လူကာရှန်ကိုနှင့် ပူးတွဲ သတင်းစာ ရှင်းလင်းပွဲ၌ ပြောကြားခဲ့သည်။

ပြန်လည်ထူထောင်ရေးနှင့် လမ်းတံတား၊ အဆောက်အဦများ ပြန်လည်တည်ဆောက်ရန် အချိန်ယူရမည်ဖြစ်ပြီး ကုန်ကျစရိတ်လည်း ကြီးမားမည်ဖြစ်သောကြောင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ပြောသည့် ရွေးကောက်ပွဲ ကျင်းပမည့် အချိန်အတွင်း ရွေးကောက်ပွဲ ကျင်းပနိုင်ရန် ခက်ခဲကြောင်း စစ်ရေးနှင့်နိုင်ငံရေး အကဲခတ်များက ပြောသည်။

သို့သော် ပြန်လည်တည်ဆောက်ရေးလုပ်ငန်းများ လုပ်ဆောင်ပြီးမှသာ ရွေးကောက်ပွဲအား ပြုလုပ်မည်ဆိုပါက တိုင်းပြည်တွင် နိုင်ငံရေးအရ အ‌ရွေ့၊ အကူးအပြောင်းများ လိုအပ်နေသည့် အချိန်ဖြစ်သောကြောင့် နစကအနေဖြင့် ရွေးကောက်ပွဲ လုပ်မည်/မလုပ်မည်ကို ခန့်မှန်း၍မရကြောင်းလည်း စစ်ရေးနှင့်နိုင်ငံရေး အကဲခတ်များက ထောက်ပြသည်။

ငလျင်ဘေး ကူညီရေးအဖွဲ့တွေကို နစကဥက္ကဋ္ဌသွားတွေ့စဉ်

အရေးကြီးသည့် အဆောက်အဦ နေရာများအား စုပေါင်းပြီး ပြင်ဆင်သွားကြမည်ဆိုပါက ရွေးကောက်ပွဲ ဖြစ်နိုင် သည့် အတိုင်းအတာမျိုးရှိကြောင်း တိုင်းလိုင် (ရှမ်းနီ) အမျိုးသားဖွံ့ဖြိုး တိုးတက်ရေးပါတီ (TNDP) မှ ဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။

၎င်းက “သူပြောတဲ့အချိန်တော့ ဖြစ်အောင်တော့ လုပ်ပေးမှာပဲ၊ တစ်ကြိမ်ပြောတာလည်း မဟုတ်တော့ဘူးလေ၊ အခုကတော့ ၄ ရက်နေ့တုန်းကလည်း နီပေါနဲ့ တွေ့တဲ့အခါတုန်းကလည်း ပြောခဲ့တယ်လေ၊ ရွေးကောက်ပွဲကတော့ မဖြစ်မနေလုပ်မယ်ဆိုတဲ့ သဘောပေါ့နော် ဒါကယောင်္ကျားတစ်ယောက်ရဲ့ ကတိမဟုတ်ဘဲနဲ့ အစိုးရတစ်ရပ်ရဲ့ ကတိလို့ ပြောလို့ရတာပေါ့၊ သဘာဝဘေးဒဏ်ကြောင့် ပျက်စီးတာ ပျက်စီးခြင်းက တစ်ကြောင်းပေါ့ဗျာ၊ ပထမဦး ဆုံးအကြိမ် လွတ်လပ်ရေး ရပြီး‌နောက်ပိုင်းခေါ်တဲ့ လွှတ်တော်တောင်မှ ပုံစံအခင်းအကျင်းတွေကို ပြန်ကြည့်မယ် ဆိုရင်တော့ ဖြစ်သလိုခေါ်သွားမဲ့ အပိုင်းလေးတွေ ရှိတယ်ပေါ့နော်၊ အခုလည်း ဒီအဆောက်အဦတွေ ပြင်ကြမယ်၊ အရေးကြီးတဲ့နေရာ စုပေါင်းပြီး ပြင်ဆင်သွား ကြမယ်ဆိုရင်တော့ ဖြစ်နိုင်တဲ့ အတိုင်းအတာမျိုး ရှိပါတယ်၊ ရွေးကောက်ပွဲတော့ ရွှေ့မယ်လို့တော့ ကျနော် မထင်ဘူးဗျ၊ ရွေးကောက်ပွဲ ရွှေ့လေလေ နိုင်ငံကြီးအတွက်ကတော့ ‌ဘေးကျပ်နံကျပ် ကြုံလေလေ ဖြစ်နေမှာပဲ” ဟု ပြောသည်။ 

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကတော့ ပါတီစုံဒီမိုကရေစီ အထွေထွေရွေးကောက်ပွဲအား ယခုနှစ် ဒီဇင်ဘာလ တတိယပတ်မှ ၂၀၂၆ ခုနှစ်၊ ဇန်နဝါရီလ ဒုတိယပတ်အတွင်း ကျင်းပပြုလုပ်ရန် လျာထားပြီး ရွေးကောက်ပွဲ အထမြောက်သည့် အဆင့်ကို ဦးစားပေး ပြီးမြောက်အောင် ဆောင်ရွက်မည်ဖြစ်ကြောင်း ၂၀၂၅ ခုနှစ်၊ မတ်လ ၃ ရက်နေ့တွင် နိုင်ငံတော်စီမံအုပ်ချုပ်ရေးကောင်စီ အစည်းအဝေး၌ ပြောကြားခဲ့သည်။

CNI News

၂၀၂၅ ခုနှစ်၊ ဧပြီ ၈

ကုလသမဂ္ဂ၏ မြန်မာနိုင်ငံဆိုင်ရာ အထူးကိုယ်စားလှယ် မစ္စစ်ဂျူလီဘိရှော့သည် မြန်မာနိုင်ငံသို့ သွားရောက်မည် ဖြစ်ကြောင်း ကုလအတွင်းရေးမှူးချုပ် ဂူတာရက်စ်က ထုတ်ပြန်ခဲ့သည်။

မစ္စစ်ဘိရှော့သည် ဧပြီ ၈ ရက်တွင် မြန်မာနိုင်ငံသွား သွားရောက်မည်ဖြစ်ပြီး နစကအဖွဲ့ဝင်များဖြင့် တွေ့ဆုံ ဆွေးနွေးမည်ဖြစ်ကြောင်း သိရသည်။

အထူးကိုယ်စားလှယ် မစ္စစ်ဘိရှော့၏ ခရီးစဉ်သည် ငြိမ်းချမ်းရေးနှင့် ဆွေးနွေးညှိနှိုင်းရေးအတွက် အားဖြည့်ရန် ရည်ရွယ်ထားကြောင်း ကုလအတွင်းရေးမှူးချုပ် ဂူတာရက်စ်၏ ထုတ်ပြန်ချက်တွင် ဖော်ပြထားသည်။

ငလျင်ဘေး ကူညီကယ်ဆယ်ရေးလုပ်နေကြစဉ်

ကုလသမဂ္ဂသည် မြန်မာနိုင်ငံ ငလျင်ဘေးသင့် ပြည်သူများ ကူညီကယ်ဆယ်ရေးနှင့် ပြန်လည်ထူထောင်ရေး အတွက် အမေရိကန် ဒေါ်လာ ၉၃ သန်း ထောက်ပံ့ရန် ကတိပြုထားသလို ကုလသမဂ္ဂ၏ အရေးပေါ် ရန်ပုံငွေထဲ ကနေ အမေရိကန် ဒေါ်လာ ၅ သန်း ထောက်ပံ့ရန်လည်း ကတိပြုထားသည်။

မြန်မာနိုင်ငံတွင် ငလျင်ဘေးကြောင့် လူဦးရေ သန်း ၂၀ ကူညီထောက်ပံ့မှုများ လိုအပ်လာမည်ဖြစ်ကြောင်း ကုလအတွင်းရေးမှူးချုပ် ဂူတာရက်စ်က ဧပြီ ၄ ရက်နေ့ သတင်းစာ ရှင်းလင်းပွဲမှာ ထုတ်ဖော် ပြောကြားခဲ့သည်။

CNI News

၂၀၂၅ ခုနှစ်၊ ဧပြီ ၈

မြန်မာနိုင်ငံတွင် ငလျင်ဘေးဒဏ်ကြောင့် မြန်မာ့တပ်မတော်နှင့် တိုင်းရင်းသားလက်နက်ကိုင်များ အနေဖြင့် တစ်ဖက်သတ် အပစ်ရပ်စဲကြောင်း ကြေညာကြခြင်းသည် မြေပြင်တွင် ခိုင်မာမှုမရှိနိုင်ဟု NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာန သို့ ပြောသည်။

အပစ်ရပ်သည့် အခါတွင် တစ်ဖက်သတ် အပစ်ရပ်ကြခြင်းသည် ခိုင်မာမှု မရှိကြောင်း၊ နှစ်ဖက်သဘောတူ လက်မှတ်ထိုး၍ အပစ်ရပ်ခြင်းနှင့် တတိယအင်အားစုပါဝင်သည့် အပစ်ရပ် လက်မှတ်ထိုးခြင်းတို့က ပို၍ ခိုင်မာ ကြောင်း ၎င်းက ပြောသည်။

ဗိုလ်မှူးကြီးခွန်ဥက္ကာက  “အပစ်မရပ်ခင်တည်းက တိုင်းရင်းသား လက်နက်ကိုင်တွေထဲက တချို့မြောက်ပိုင်းဆိုရင် ရပ်ပြီးသားပါ။ တောင်ပိုင်းနဲ့ အလယ်ပိုင်းတော့ မရပ်ပါဘူး။ အထူးသဖြင့်တော့ အလယ်ပိုင်းမှာရှိတဲ့ PDF အင်အား စုတွေ၊ NUG အင်အားစုတွေ၊ ရခိုင်အင်အားစုတွေ ဒီအဖွဲ့တွေကတော့ အပစ်ရပ်တာ မတွေ့ပါဘူး။ သူတို့လှုပ်ရှားမှု မူလအတိုင်းပဲ ဆက်သွားနေတာရှိပါတယ်။ အဲဒါကြောင့် ဒီလိုအပစ်ရပ်လိုမျိုးက unilateral တစ်ဖက်သတ် အပစ်ရပ်တာမျိုးရှိတယ်၊ တချို့ကလည်း bilateral ပေါ့ နှစ်ဖက်သဘောတူ လက်မှတ်ထိုးပြီးတော့ ရပ်တာရှိ တယ်။ နှစ်ဖက်သဘောတူ လက်မှတ်ထိုးပြီးရပ်တာတော့ နည်းနည်းလေး ပိုခိုင်တယ်။ သို့သော်လည်းပဲ နှစ်ဖက် သဘောတူမှ တတိယအင်အားစုလို့ခေါ်တဲ့ သက်သေနိုင်ငံတွေ ကြားအင်အားစုတွေပါပြီးတော့ သက်သေခံပေးပြီး အပစ်ရပ်တာ မှန်ပါတယ်လို့ ဝင်ထိုင်ပေးတဲ့ သူရှိရင်တော့ တတိယအင်အားစုပါတဲ့ အပစ်ရပ်ကတော့ ပိုပြီးတော့ ခိုင်မာတယ်။ bilateral ပိုခိုင်တယ်။ တတိယအင်အားစုပါရင် ပိုပြီးတော့ခိုင်တယ်။ အပြန်အလှန် unilateral ပေါ့ ကိုယ့်သဘောနဲ့ကိုယ် တစ်ဖွဲ့ချင်းရပ်တာတွေကတော့ အမြတ်ထုတ်ကြတာပါပဲ” ဟု ပြောသည်။

 NUG နဲ့ KIA ခေါင်းဆောင်များကိုတွေ့ရစဉ်

ငလျင်ဒဏ် ထိခိုက်ခံစားနေရခြင်းနှင့် ပြန်လည်ထူထောင်ရေးလုပ်ငန်းများ ဆောင်ရွက်နိုင်ရေးအတွက် တည်ငြိမ် အေးချမ်းမှုကို ရှေးရှုပြီး တပ်မတော်အနေဖြင့် ၂၀၂၅ ခုနှစ်၊ ဧပြီ ၂ ရက်မှ ၂၂ ရက်အထိ ယာယီပစ်ခတ်တိုက်ခိုက်မှု ရပ်စဲကြောင်း ထုတ်ပြန်ကြေညာခဲ့သည်။

ထို့ပြင် မြောက်ပိုင်းမဟာမိတ်သုံးဖွဲ့(AA-TNLA-MNDAA)တို့ကလည်း ဧပြီ ၁ ရက်မှ ၃၀ ရက်အထိ ယာယီအပစ် အခတ်ရပ်စဲကြောင်း ထုတ်ပြန် ကြေညာထားသကဲ့သို့ အမျိုးသားညီညွတ်‌ရေးအစိုးရ (NUG) ကလည်း ယာယီ အပစ်ရပ်စဲကြောင်း ထုတ်ပြန်ထားသည်။

အလားတူ ကချင်လွတ်လပ်ရေးတပ်မတော်(KIA)ကလည်း ဧပြီလကို အပစ်ရပ်ကြောင်း ထုတ်ပြန်ထားသည်။

အပစ်ရပ်ကြောင်း ထုတ်ပြန်ထားကြသော်လည်း လာရောက် ထိပါးလာပါက အရေးယူ တုန့်ပြန်မှုနှင့် ခုခံစစ်ဖြင့် ပြန်လည်တုန့်ပြန် သွားကြမည်ဟုလည်း ပါရှိသည်။

လက်ရှိတွင် မြန်မာ့တပ်မတော်နှင့် တိုင်းရင်းသားလက်နက်ကိုင်များအကြား အပစ်ရပ်ထားသော်လည်း မြေပြင်၌ ထိုးစစ်ဆင် တိုက်ခိုက်မှုများကြောင့် အပစ်ရပ်ကြေညာချက်ကို ချိုးဖောက်သည်ဟု နှစ်ဖက် အပြန်အလှန် ပြောဆို နေမှုများ ရှိနေသည်။

သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက “အပစ်ရပ်တဲ့အထဲမှာ နစကဘက်က ကြေညာတဲ့အထဲမှာ ရှင်းရှင်းလင်းလင်း လုပ်ထားပြီးသား။ ဘယ်အချက်အလက်တွေကိုတော့ မလုပ်ရဘူး။ ဘာတွေကို ထိပါးရင်တော့ ဘယ်လိုတုန့်ပြန်မယ်ဆိုတာ။ အဲဒီ အချက်အလက်တွေနဲ့ ပတ်သက်လို့ မြေပြင်က အဖွဲ့တွေက ဘယ်လိုထိပါးသလဲ။ သွားထိပါးတဲ့လူတွေ ကိုယ်တိုင် သိပါလိမ့်မယ်။ ထိပါးမှုရှိလို့ လုပ်တာပေါ့။ အရင်တုန်းကဆိုရင်တော့ သတင်းအရ မျက်မြင်သက်သေတွေ မရှိတဲ့အခါ ဟုတ်သလား၊ မဟုတ်ဘူးလား ဆိုပြီးတော့ရှိတယ်။ အခုကတော့ ဘာပဲပြောပြော ဘယ်သူက ဘယ်နေရာမှာသွားလုပ်လို့ ဘာပြန်လုပ်ခံရတယ် ဆိုတာ အဲဒီဖြစ်စဉ်မှာ ပါဝင်တဲ့သူတွေ သိကြပါလိမ့်မယ်” ဟု ပြောသည်။

 မြန်မာ့တပ်မတော် ခေါင်းဆောင်များကို တွေ့ရစဉ်

ငလျင်ဘေးသင့်ခဲ့တဲ့ မြန်မာနိုင်ငံမှာ ကယ်ဆယ်ရေးနှင့် ပြန်လည်ထူထောင်ရေးများ ဆက်လက် လုပ်ဆောင်နိုင်ရန် အပစ်အခတ်ရပ်စဲရေး သက်တမ်းတိုးဖို့ မလေးရှားနိုင်ငံခြားရေးဝန်ကြီး Datuk Seri Mohamad Hasan ကလည်း နစကကို တိုက်တွန်းထားသည်။

အာဆီယံနိုင်ငံများထဲမှ အထူးသဖြင့် မလေးရှားနိုင်ငံသည် နစက အပစ်အခတ်ရပ်စဲရေး ကြေညာထားသည့် ကာလထက် သက်တမ်းတိုးနိုင်မည်ဟု မျှော်လင့်ကြောင်းလည်း ၎င်းက ပြောဆိုထားသည်။

KIA နှင့် NUG တို့သည် အပစ်ရပ်ကြောင်း ကြေညာထားသော်လည်း စစ်ကိုင်းတိုင်းဒေသကြီး၊ အင်းတော်မြို့ကို ၂၀၂၅ ခုနှစ်၊ ဧပြီ ၇ ရက်က သိမ်းပိုက်လိုက်ကြောင်း ကြေညာလာခဲ့သည်။

အလားတူ မြန်မာ့တပ်မတော်ကလည်း လေကြောင်း တိုက်ခိုက်မှုများ ပြုလုပ်လျက်ရှိသည်။

CNI News
၂၀၂၅ ခုနှစ်၊ ဧပြီ ၇

မြန်မာနိုင်ငံ၊ မန္တလေးမြို့အနီးလှုပ်ခတ်ခဲ့သော မန္တလေးငလျင်ကြောင့် လူပေါင်း ၃၆၀၀ သေဆုံးပြီး ၅၀၁၇ ဦး ထိခိုက် ဒဏ်ရာရရှိခဲ့ကြောင်း ၂၀၂၅ ခုနှစ်၊ ဧပြီ ၇ ရက်တွင် နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

ထို့နောက် ပျောက်ဆုံးနေသူ ၁၆၀ ဦးရှိကြောင်း၊ ထိုစာရင်းသည် ၂၀၂၅ ခုနှစ်၊ ဧပြီ ၇ ရက်နေ့ အထိ စာရင်းသာ ဖြစ်ကြောင်း ထုတ်ပြန်ခဲ့သည်။

ဗိုလ်ချုပ်ဇော်မင်းထွန်းက " ကူညီကယ်ဆယ်မှုတွေနဲ့ ပတ်သက်ပြီးတော့ ဒီနေ့အထိ နိုင်ငံပေါင်း ၂၀ က လေယာဉ် ၉၄ ခေါက်၊ မော်တင်ယာဉ် ၆ စီး၊ သင်္ဘော  ၅ စီး ရောက်ရှိ ကူညီပြီးဖြစ်ပါတယ်။ ကယ်ဆယ်ရေး ဝန်ထမ်းပေါင်း ၁၇၃၈ ဦး လွှတ်ပြီး ကယ်ဆယ် ကူညီရေးလုပ်ငန်းတွေ ဆောင်ရွက်နေပါတယ်။ ထောက်ပံ့ရေးပစ္စည်း ၁၂၈၁ တန် ကျော်၊ ကယ်ဆယ်ရေးပစ္စည်း ၈၈၄ တန်ကျော် ရောက်ရှိပြီးဖြစ်ပါတယ်။ ကူညီကယ်ဆယ်မှုတွေအနေနဲ့ မြန်မာနိုင်ငံ မီးသတ်တပ်ဖွဲ့၊ ပရဟိတအဖွဲ့တွေ၊ ပြီးရင် နိုင်ငံတကာက ကယ်ဆယ်ရေးအဖွဲ့တွေ ပူးပေါင်းပြီး အသက်ရှင်လျက် အမျိုးသား ၃၃၈ ဦး၊ အမျိုးသမီး ၃၁၅ ဦး၊ စုစုပေါင်း ၆၅၃ ဦး၊ DB တွေ့ရှိမှုအနေနဲ့ အမျိုးသား ၃၄၀ ဦး၊ အမျိုးသမီး ၃၆၀ ဦး၊ စုစုပေါင်း ၇၀၀ ဦး ကူညီကယ်ဆယ်နိုင်ခဲ့ပါတယ်"ဟု ပြောသည်။

ငလျင်သင့် ပြည်သူများကို ကျန်းမာရေးစောင့်ရှောက်ပေးနေတဲ့ အိန္ဒိယရဲ့ယာယီဆေးရုံကို နစကဥက္ကဋ္ဌ လာကြည့်စဉ်

လက်ရှိ မန္တလေးငလျင် ကယ်ဆယ်ရေးကို အမေရိကန်၊ ရုရှား၊ တရုတ်/ဟောင်ကောင်၊ အိန္ဒိယ၊ ဘူတန်၊ သီရိလင်္ကာ၊ မလေးရှား၊ စင်္ကာပူ၊ ဖိလစ်ပိုင်၊ ယူအေအီး၊ ထိုင်း၊ ဘယ်လာရုစ်၊ ဗီယက်နမ်၊ ဘင်္ဂလားဒေ့ရှ်၊ ပါကစ္စတန်၊ လာအို၊ အင်ဒိုနီးရှား၊ ဂျပန်၊ နီပေါ၊ တူရကီ စသည့် နိုင်ငံများမှ ပါဝင်ဆောင်ရွက်ပေးလျက်ရှိသည်။

မြန်မာနိုင်ငံတွင် မတ်လ ၂၈ ရက်က လှုပ်ခတ်ခဲ့သော ငလျင်ကြီးကို မန္တလေးငလျင်ဟု ခေါ်ဝေါ်သတ်မှတ်ရန် နစက-က ထုတ်ပြန်ခဲ့သည်။

CNI News
၂၀၂၅ ခုနှစ်၊ ဧပြီ ၇

မြန်မာနိုင်ငံတွင် ငလျင်ဘေးသင့် ပြည်သူများ ပြန်လည်ထူထောင်ရေးနှင့် ကူညီကယ်ဆယ်ရေးအတွက် ဥရောပသမဂ္ဂ(EU)က ယူရို ၁၀ သန်း ထပ်မံ ထောက်ပံ့ပေးမည်ဖြစ်ကြောင်း ၂၀၂၅ ခုနှစ်၊ ဧပြီ ၇ ရက်တွင် ထုတ်ပြန်ခဲ့သည်။

ဤရန်ပုံငွေသည် မြန်မာနိုင်ငံတွင် လှုပ်ခတ်ခဲ့သော ငလျင်အတွက် ဥရောပသမဂ္ဂ၏ လူသားချင်းစာနာထောက်ထားမှုဆိုင်ရာ အကူအညီ  စုစုပေါင်း ယူရို ၁၃ သန်း အထိ ရောက်ရှိခဲ့ပြီဖြစ်ပြီး ၂၀၂၅ ခုနှစ်အတွက် လူသားချင်းစာနာထောက်ထားမှုဆိုင်ရာ အကူအညီလျာထားချက် ယူရို ၄၆ သန်း၏ တစိတ်တဒေသ ဖြစ်သည်ဟု ထုတ်ပြန်ခဲ့သည်။

ထို့နောက် ဥရောပနိုင်ငံသား ကျွမ်းကျင်ပညာရှင် ၁၂ ဦး ပါဝင်သည့်အဖွဲ့နှင့် EU မှ ဆက်သွယ်ရေးအရာရှိနှစ်ဦးတို့သည် လူသားချင်းစာနာထောက်ထားမှု မိတ်ဖက်အဖွဲ့များနှင့် ညှိနှိုင်းဆောင်ရွက်မှုများ မြှင့်တင်ရန် လက်ရှိမြေပြင်တွင် တာဝန်ထမ်းဆောင်လျက်ရှိသည်။

EU သည် ပထမဆုံး လူသားချင်း စာနာထောက်ထားမှုဆိုင်ရာ စီမံကိန်းအဖြစ် ကိုပင်ဟေဂင်မှ ရန်ကုန်သို့ အီးယူပိုင်အရေးကြီးသောပစ္စည်း ၈၀ တန်ကို သယ်ဆောင်လာခဲ့ပြီး ယခုအခါ UNICEF မှ မြေပြင်ပေါ်တွင် ဖြန့်ဖြူးပေးနေကြောင်း ဧပြီ ၇ ရက်ထုတ်ပြန်ချက်တွင် ဖော်ပြခဲ့သည်။

CNI News

၂၀၂၅ ခုနှစ်၊ ဧပြီ ၇

မြန်မာနိုင်ငံက ငလျင်ဘေးသင့်ပြည်သူများ ပြန်လည်ထူထောင်ရေး လုပ်ငန်းများအတွက် BIMSTEC အစည်းအဝေးသည် အထောက်အကူ ဖြစ်စေကြောင်း အမျိုးသားဒီမိုကရေစီအင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

ကဏ္ဍစုံနည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဥ် (BIMSTEC) ထိပ်သီးခေါင်းဆောင်များ အစည်းအဝေးကို ၂၀၂၅ ခုနှစ်၊ ဧပြီ ၄ ရက်တွင် ထိုင်းနိုင်ငံ၊ ဘန်ကောက်မြို့၌ ကျင်းပခဲ့ သည်။

ထိုအစည်းအဝေးတွင် ပါဝင်သည့် နိုင်ငံများကလည်း မြန်မာနိုင်ငံ ငလျင်ဘေးဒဏ်သင့် ဒေသများ၌ သိသိသာသာ ဝင်ရောက် ကူညီနေခြင်းဖြစ်၍ ပြန်လည်ထူထောင်ရေး လုပ်ငန်းများအတွက်  အထောက်အကူဖြစ်ကြောင်း အမျိုးသားဒီမိုကရေစီအင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

၂၀၂၅ ခုနှစ်၊ ဧပြီ ၄ ရက်က ကျင်းပသည့် BIMSTEC အစည်းအဝေးကို တွေ့ရစဉ် 

၎င်းက “ဒီတစ်ခေါက်က ငလျင်ဘေးဆိုတဲ့ အခါကျတော့ လူတွေအများကြီး ထိခိုက်နစ်နာဆုံးရှုံး ပျက်စီးသွားတယ် ဆိုတော့ လူသားဆန်သော လူတွေမှန်သမျှက ဒါဘယ်သူ အုပ်ချုပ်နေပါသည် ဖြစ်စေပေါ့နော် ဒီဟာကို က ကူညီပေးရမယ်ဆိုတဲ့ဟာမျိုး ရှိတာကိုး၊ ဒီအတွက်ကြောင့်မို့လို့ BIMSTEC ဒါနဲ့ ချိန်ကိုက် အားလျော်စွာ BIMSTEC အစည်းအဝေးကလည်း ဖြစ်သွားတဲ့ အခါကျတော့ နစကဥက္ကဋ္ဌ နိုင်ငံတော်ဝန်ကြီးချုပ် သွားတက်တဲ့ အခါမှာ အကုန်လုံးက ဒီငလျင်ဘေးကို အဓိက ဂရုစိုက်ပြီး ပြောကြတယ်၊ အားလုံးက ဝိုင်းကူညီမယ် ဆိုတဲ့ဟာမျိုး ဖြစ်တယ်ဆိုတဲ့ အခါကျတော့ ဒါတော်တော်လေးကို ပြန်လည် ထူထောင်ရေး အတွက်ကတော့ ဒီ BIMSTEC ၅ နိုင်ငံစလုံးကလည်း အခုတော်တော်ကို သိသိသာသာလည်း ဝင်ပြီး ကူညီနေတာ ဖြစ်တော့လေ အများကြီးတော့ အထောက်အကူ ဖြစ်ပါတယ်၊ ပြီးတော့ ဒီဥစ္စာကလည်း အခုဆိုရင်ပဲ ကျနော်တို့ ကြားသိရသလောက် ဆိုလို့ရှိရင် အမေရိကန်တို့ ဘာတို့လည်း တော်‌တော်လေး ထဲထဲဝင်ဝင် ကူညီမယ်ဆိုတဲ့ အတိုင်းအတာမျိုးလေးတွေ ကြားလာ ရတာပေါ့၊ အဲအပေါ်မှာကတော့ ပြည်သူတွေအတွက် အားလုံးကမ္ဘာ့နိုင်ငံ အသီးသီးက ကျနော်တို့ မြန်မာပြည်သူ လူထုကို ပြစ်မထားဘူးပေါ့နော်၊ အားလုံးသေချာ ဝိုင်းပြီးတော့မှ ကူညီစောင့်ရှောက်ကြတာကိုး မြင်ရတော့လည်း ဝမ်းသာရပါတယ်” ဟု ပြောသည်။ 

ထိုင်းနိုင်ငံမှ အိမ်ရှင်အဖြစ် လက်ခံကျင်းပသည့် ထိုအစည်းအဝေးတွင် အိန္ဒိယ၊ မြန်မာ၊ ထိုင်း၊ ဘင်္ဂလားဒေ့ရှ်၊ နီပေါ၊ ဘူတန်၊ သီရိလင်္ကာ စသည့် နိုင်ငံပေါင်း ၇ နိုင်ငံမှ ခေါင်းဆောင်များ တက်ရောက်ခဲ့ကြသည်။

မြန်မာနိုင်ငံကတော့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ကိုယ်တိုင် တက်ရောက်ခဲ့သည်။

BIMSTEC အစည်းအဝေးမှတဆင့် အိမ်နီးချင်း နိုင်ငံများနှင့် နစကသည် အဆက်အသွယ်တစ်ခု ရရှိခဲ့ကြောင်း၊ လူသားချင်းစာနာမှုဆိုင်ရာ အကူအညီများ သေချာပေါက် ပေးလာနိုင်မည်ဖြစ်ပြီး ယခုလည်း ပေးနေကြပြီဖြစ် ကြောင်း စည်းလုံးညီညွတ်သော တိုင်းရင်းသားလူမျိုးများမဟာမိတ်(UNA)မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

အိန္ဒိယဝန်ကြီးချုပ် မိုဒီနဲ့ နစကဥက္ကဋ္ဌ တွေ့ဆုံ ဆွေးနွေးစဉ်

၎င်းက “ဘာပဲဖြစ်ဖြစ် အဲဒီအိမ်နီးချင်း နိုင်ငံတွေနဲ့တော့ သူတို့ကတော့ အဆက်အသွယ်တစ်ခုတော့ ရခဲ့တာပေါ့ဗျာ၊ သံတမန်ရေးရာ ကိစ္စတွေလည်း အပါအဝင်ပေါ့လေ၊ အဓိက ကျနော်တို့နိုင်ငံမှာက အာဏာသိမ်းပြီး‌နောက် တိုင်းပြည်ရဲ့ ပြည်တွင်းစစ်ဟာ နက်နက်ရှိုင်းရှိုင်း ဖြစ်လာတယ်၊ အကုန်လုံးက ပြည်တွင်းစစ်ဒဏ်ကို ခံကြရတယ်၊ စစ်ဘေးရှောင်တွေ အများကြီးဖြစ်တယ်၊ နောက်မကြာခင် ပြီးခဲ့တဲ့လ ၂၈ က စစ်ကိုင်း၊ မန္တလေး၊ နေပြည်တော်ကို အဓိက မြို့ကြီးတွေမှာ လှုပ်သွားတဲ့ ငလျင်ကလည်း ကျနော်တို့ ဒီဖက် ရာစုနှစ်မှာဆိုရင် အဆိုးရွားဆုံး အခြေအနေ ဖြစ်တယ်၊ ဒီဟာတွေအတွက်လည်း လူသားချင်းစာနာမှုဆိုင်ရာ အကူအညီ အထောက်အပံ့ဆိုတဲ့ ဟာမျိုးတော့ နိုင်ငံတကာကလည်း ပေးနိုင်တယ်၊ ဒီအဖွဲ့အစည်းတွေ ထဲကလည်း ပေးလာလိမ့်မယ်လို့‌တော့ မြင်ရပါတယ်၊ သေချာပေါက် ပေးလာမယ့် သဘောဖြစ်ပါတယ်၊ ဘာဖြစ်လို့လဲဆိုတော့ အခုလည်း ပေးနေကြတာပဲ၊ မပေးလို့မှ မရတာလေ။ အဲတော့ ကမ္ဘာ့အဝန်းအဝိုင်းထဲမှာ ဒီနိုင်ငံကလည်း ရှိတယ်ဆိုတဲ့ အနေအထားမျိုးကြောင့် ‌ပေးရတယ် လို့ မြင်တယ်ပေါ့နော်” ဟု ပြောသည်။ 

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် BIMSTEC အစည်းအဝေးအား တက်ရောက်ရန် ၂၀၂၅ ခုနှစ်၊ ဧပြီ ၃ ရက်က ဘန်ကောက်မြို့(ထိုင်းနိုင်ငံ) သို့ ရောက်ရှိလာခဲ့ပြီး နီပေါဝန်ကြီးချုပ်နှင့် သီးသန့် တွေ့ဆုံဆွေးနွေးခဲ့ သည်။

ထို့ပြင် အိန္ဒိယဝန်ကြီးချုပ် မိုဒီနှင့် ထိုင်းဝန်ကြီးချုပ် ပေတုန်တန်တို့ဖြင့်လည်း ဧပြီ ၄ ရက်က သီးသန့်စီ တွေ့ဆုံ ဆွေးနွေးခဲ့သည်။

အိန္ဒိယဝန်ကြီးချုပ် မိုဒီကတော့ မြန်မာနိုင်ငံအတွက် လိုအပ်သည့် အကူအညီများကို မိမိတို့အနေဖြင့် ဆက်လက် ပေးအပ်သွားမည်ဟု နစကဥက္ကဋ္ဌနှင့် တွေ့ဆုံစဥ် ပြောကြားခဲ့သလို ထိုင်းဝန်ကြီးချုပ် ပေတုန်တန်ကလည်း မြန်မာငလျင်ဘေးသင့် ပြည်သူများကို အကူအညီများ ဆက်လက်ပေးမည်ဟု ပြောကြားခဲ့သည်။

BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်ပြီး အဖွဲ့ဝင် နိုင်ငံများအကြား စီးပွားရေး ပူးပေါင်းဆောင်ရွက်မှုများကို မြှင့်တင်ရန် ရည်ရွယ်ချက်ဖြင့် အစည်းအဝေး များ ပြုလုပ်လေ့ရှိသည်။

CNI News

၂၀၂၅ ခုနှစ်၊ ဧပြီ ၇

နစကအနေဖြင့် ကိုးကန့်တပ်ဖွဲ့ (MNDAA) ကို “ဝ”ကဲ့သို့ နိုင်ငံရေး သဘောတူညီချက်မျိုး ပေးထားသလားဆိုသည့် အပေါ် စစ်ရေးနှင့်နိုင်ငံရေးအကဲခတ်များအကြား သုံးသပ်နေကြသည်။

ရှမ်းပြည်နယ်မြောက်ပိုင်း လားရှိုးမြို့ကို တိုက်ခိုက်၍ ထိန်းချုပ်ထားသည့် ကိုးကန့်တပ်ဖွဲ့(MNDAA)သည် လာမည့် ဧပြီလ ၂၁ ရက်နေ့ နောက်ဆုံးထား၍ မြို့ပေါ်မှ ဆုတ်ခွာရန် ပြင်ဆင်နေကြောင်း သတင်းများ ထွက်ပေါ်လျက် ရှိသည်။

နိုင်ငံရေးသဘောတူညီချက် တစ်စုံတစ်ရာ ရရှိထားမှသာ ထိုသို့ ဆုတ်ခွာခြင်း ဖြစ်နိုင်ကြောင်း၊ နိုင်ငံရေးသဘော တူညီချက်အနေဖြင့် နစကမှ MNDAA ကို “ဝ”ကဲ့သို့ အထူးဒေသအဖြစ် အုပ်ချုပ်နေမှုကို အသိအမှတ် ပြုလိုက် သည့် သဘောတွေ့ရကြောင်း NCA ထိုးထားသည့် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

၎င်းက “ပေးပြီးသားပဲ SAC က။ အဲဒါဘာလဲဆိုတော့ သူတို့ရဲ့နယ်မြေချုပ်ကိုင်ခွင့် အခွင့်၊ ကိုးကန့်အထူးဒေသ ကိုယ်ပိုင်အုပ်ချုပ်ခွင့်အခွင့်အ‌ရေး ဒါတွေက အလိုလိုရပြီးသားပဲ၊ အခုလည်း ရနေတာပဲ။ သို့သော် အဲဒီရနေတာကို SAC ဘက်က အသိအမှတ်ပြုလိုက်တဲ့သဘောပဲ။ မင်းတို့ နေခွင့်ရှိတယ်၊ အထူးဒေသကို အုပ်ချုပ်ခွင့်ရှိတယ်ဆိုတာ အသိအမှတ်ပြုပေးတဲ့ သဘောတော့ အသက်ဝင်သွားတာပေါ့။ ဥပမာ “ဝ” အထူးဒေသကို “ဝ”အုပ်ချုပ်နေသလိုပဲ အဲဒီလို နားလည်မှု အသိအမှတ်ပြုမှု ပေးလိုက်တဲ့သဘော တွေ့ရပါတယ်။ အဲဒီဒေသမှာ စစ်ရေးပဋိပက္ခ ပေါ်လာဖို့ အကြောင်းမရှိတော့ဘူးပေါ့။ ကိုးကန့်ကိုလည်း နားလည်မှု ပေးရပါမယ် ဒီကိစ္စမှာ။ ကိုးကန့်ဆိုတဲ့နယ်မြေ၊ ကိုးကန့် ဆိုတဲ့လူမျိုးက တရုတ်ပါပဲ အားလုံးယူနန်ပါပဲ။ သို့သော် ဗမာပြည်ကို အင်္ဂလိပ်သိမ်းပြီးတော့ အားလုံးကိုလိုနီပြုတဲ့ အချိန်မှာ တရုတ်ပြည်ကြီးကနေ အင်္ဂလိပ်ကိုလိုနီတွေကို လက်ဆောင်ပေးတဲ့နယ်မြေပါ။ လွတ်လပ်ရေး ရပြီးမှ ကိုးကန့်နယ်က ဗမာပြည် နယ်နိမိတ်ထဲ ပါလာသော်လည်း ကိုးကန့်ဆိုတာ “ဝ”အပိုင်နယ်မြေတွေ၊ အားလုံးက တရုတ်လူမျိုးတွေ” ဟု ပြောသည်။

လားရှိုးမြို့အတွင်းကို တွေ့ရစဉ်

လားရှိုးမြို့တွင် MNDAA ဆုတ်ခွာပြီးနောက် နစက၏ အုပ်ချုပ်ရေးယန္တရားများဖြင့် လည်ပတ်မည်ဖြစ်ကြောင်း၊ နစက၊ ကိုးကန့်တပ်နှင့် တရုတ်ကိုယ်စားလှယ်များပေါင်း၍ ရုံးထိုင်ကြမည့် အခြေအနေရှိကြောင်း သတင်းများ ထွက်ပေါ်နေသည်။

ထိုသို့ ဆုတ်ခွာခြင်းသည် နစကဘက်မှ ဆုတ်ခိုင်းခြင်းမဟုတ်ဘဲ တရုတ်ဘက်မှ ဆုတ်ခွာရန် ၂၀၂၄ ခုနှစ်၊ ဒီဇင်ဘာလကတည်းက တောင်းဆိုခဲ့ခြင်းဖြစ်ကြောင်း စစ်ရေးနှင့်နိုင်ငံရေးအကဲခတ်များက ပြောသည်။

ထို့ပြင် MNDAA အနေဖြင့် လာရှိုးမှ အမှန်တကယ် ဆုတ်ခွာနေခြင်းမဟုတ်ဘဲ အခြားတိုက်ပွဲတစ်ခုကို ဖော်ဆောင်ရန် အယောင်ပြ လှုပ်ရှားနေခြင်း ဖြစ်နိုင်ကြောင်းလည်း ၎င်းတို့က သုံးသပ်နေကြသည်။

MNDAA အနေဖြင့် လားရှိုးမှ ဆုတ်ခွာခဲ့မည်ဆိုပါက နှစ်ဖက် စစ်ရေးပဋိပက္ခမရှိဘဲ လွယ်ကူစွာ ဖြေရှင်းသွားနိုင်မှာ ဖြစ်ပြီး မဆုတ်ခွာခဲ့ပါက နစကဘက်မှ ပြန်လည် တိုက်ခိုက်ပြီး ရအောင်ယူမည့် အနေအထားရှိကြောင်း သေနင်္ဂ မဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။ 

လားရှိုးမြို့အတွင်းမှာ MNDAA ရဲဘော်တွေကိုတွေ့ရစဉ်

၎င်းက “အဓိက ကတော့ လက်ရှိ ၂၀၀၈ အခြေခံဥပဒေရဲ့ ပေးထားချက်အရ MNDAA သည် လက်ရှိနေရာကို လက်နက်ကိုင်ပြီး သိမ်းထားတာဖြစ်တယ်။ ဆုတ်သည်ဖြစ်စေ မဆုတ်သည်ဖြစ်စေ ဗဟိုအစိုးရရဲ့ တရားဝင် အာဏာပြန်ပြီး သက်ရောက်အောင်က ပြန်ပြီးတော့ ဒီဖက်က လုပ်ယူရမှာပဲ။ အဲဒီတော့ သူတို့ဘာသာ ဆုတ်သွား ရင်တော့ နှစ်ဖက် စစ်ရေးပဋိပက္ခမရှိဘဲ လွယ်လွယ်ကူကူ ဖြစ်သွားနိုင်တာပေါ့။ မဆုတ်ဘူးဆိုရင်လည်း ဒီဘက်က ရအောင် ပြန်တိုက်ပြီးတော့ ယူရမှာပဲ။ ဆုတ်ခြင်း၊ မဆုတ်ခြင်းကိစ္စက ဟိုတုန်းကလည်း ၆ လအတွင်း ဆုတ်မယ် တို့ဘာတို့ ယူနန်မှာ သွားဆွေးနွေးတဲ့ ဆွေးနွေးပွဲတွေမှာ ကောလာဟလ အနေနဲ့ ထွက်ခဲ့တာတွေရှိတယ်။ တစ်ခုရှိ တာက ၂၂ ရက်နေ့ ဆုတ်မယ်ဆိုတော့ ကျနော်တို့လည်း စောင့်ကြည့်မှုတော့ ရှိတယ်။ ဒါပေမယ့် သူတို့ဘယ်လို ဆုတ်သွားမှာလဲ။ ဆုတ်သွားရင်တော့ တစ်မျိုးကောင်းတာကတော့ အပြင်မှာလည်း ထိခိုက်မှုမရှိဘဲနဲ့ အဖြေတစ်ခု ထွက်သွားတာပေါ့။ မဆုတ်ဘူးဆိုရင်တော့ ဒီဘက်က ပြန်တိုက်ယူရမယ့် အနေအထား။ ဆိုတော့ ဆုတ်ခဲ့မယ် ဆိုရင်တော့ ကောင်းတဲ့ အနေအထားပါ” ဟု ပြောသည်။

နစကဘက်မှ ကိုယ်စားလှယ်အဖွဲ့နှင့် ကိုးကန့်တပ်ဖွဲ့(MNDAA)တို့အနေဖြင့် တရုတ်၏ ကြားဝင်စေ့စပ်ပေးမှု ကြောင့် ၂၀၂၄ ခုနှစ် ဒီဇင်ဘာလအတွင်းက ကူမင်းမြို့၌ ပထမအကြိမ် တွေ့ဆုံခဲ့ပြီး အဆင်မပြေဖြစ်ခဲ့ကြရာ ၂၀၂၅ ခုနှစ်၊ ဇန်နဝါရီလအတွင်း ဒုတိယအကြိမ် ထပ်မံတွေ့ဆုံခဲ့ကြခြင်းဖြစ်သည်။

ဒုတိယအကြိမ် တွေ့ဆုံမှုတွင် ယာယီအပစ်အခတ်ရပ်စဲသည့် သဘောတူညီချက်ကို ရရှိခဲ့ကြောင်း တရုတ်ဘက်က သတင်းထုတ်ပြန်ခဲ့သည်။

ထို့ပြင် ၂၀၂၅ ခုနှစ်၊ မတ်လ ၂၂ ရက်မှ ၂၄ ရက်နေ့အထိ တရုတ်နိုင်ငံ၊ ကူမင်းမြို့မှာ နစကနှင့် MNDAA တို့ ထပ်မံ တွေ့ဆုံဆွေးနွေး ခဲ့ကြပြီးနောက် ယခုကဲ့သို့ လားရှိုးမှ ပြန်လည်ဆုတ်ခွာမည့် သတင်းများ ထွက်ပေါ်လာခြင်း ဖြစ်သည်။

MNDAA အနေဖြင့် ၁၀၂၇ စစ်ဆင်ရေး ကာလဖြစ်သည့် ၂၀၂၄ ခုနှစ်တွင် လားရှိုးမြို့အခြေစိုက် အရှေ့မြောက်တိုင်း စစ်ဌာနချုပ်ကို သိမ်းပိုက်ပြီး လားရှိုးမြို့ကိုပါ ထိန်းချုပ်ထားခဲ့ခြင်းဖြစ်သည်။

CNI News 

၂၀၂၅ ခုနှစ်၊ ဧပြီ ၇

မြန်မာငလျင်ဘေးသင့် ပြည်သူများအား ကူညီရန်အတွက် နိုင်ငံတကာမှ ယခုအချိန်အထိ လှူဒါန်းရန် ကတိပြုငွေ အမေရိကန် ဒေါ်လာ ၉၃ သန်းရရှိထားပြီးဖြစ်သည်ဟု ကုလသမဂ္ဂ လူသားချင်းစာနာထောက်ထားမှုဆိုင်ရာ ညှိနှိုင်းရေးရုံး(UNOCHA)၏ အကြီးအကဲဖြစ်သူ Mr. Tom Fletcher က ပြောသည်။

Mr. Tom Fletcher သည် ကုလသမဂ္ဂ လူသားချင်းစာနာထောက်ထားမှုဆိုင်ရာနှင့် အရေးပေါ် ကယ်ဆယ်ရေး ဆိုင်ရာ ညှိနှိုင်းရေးမှူးလည်း ဖြစ်သည်။

၎င်းဦးဆောင်သည့် ကိုယ်စားလှယ်အဖွဲ့သည် ၂၀၂၅ ခုနှစ်၊ ဧပြီ ၆ ရက်က နေပြည်တော်မှာ နိုင်ငံခြားရေးဝန်ကြီး ဦးသန်းဆွေနှင့် တွေ့ဆုံ၍ ငလျင်ဘေးသင့် ပြည်သူများ ကူညီကယ်ဆယ်ရေး လုပ်ငန်းစဉ်များကို ဆွေးနွေးခဲ့သည်။

ထိုသို့ တွေ့ဆုံဆွေးနွေးစဉ် Mr. Tom Fletcher က ငလျင်ဘေးသင့် ပြည်သူများအား ကူညီရန်အတွက် နိုင်ငံတကာ မှ ယခုအချိန်အထိ လှူဒါန်းရန် ကတိပြုငွေ အမေရိကန် ဒေါ်လာ ၉၃ သန်း ရရှိထားကြောင်း၊ ကုလသမဂ္ဂ၏ အရေး ပေါ် ရန်ပုံငွေမှ အမေရိကန် ဒေါ်လာ ၅ သန်းအား အသုံးပြုသွားမည်ဖြစ်ကြောင်း ပြောကြားခဲ့သည်။

အဆိုပါ ငွေကြေး ကူညီမှုများကို အသုံးပြု၍ အကူအညီပေးရေး လုပ်ငန်းများကို အကောင်အထည်ဖော်ရန်အတွက် ကုလသမဂ္ဂဝန်ထမ်းများကို စေလွှတ်သွားမည်ဖြစ်ကြောင်း ၎င်းက ပြောသည်။

မြန်မာငလျင်ဘေးသင့် ပြည်သူများကို ကူညီကယ်ဆယ်ရေးလုပ်နေကြစဉ်

မြန်မာငလျင်ဘေးသင့် ပြည်သူများအတွက် အမေရိကန်က ဒေါ်လာ ၉ သန်း ထောက်ပံ့ပေးမည်ဟု ကတိပြုထား သလို အမေရိကန်၊ ဂျပန်၊ ဩစတြေးလျ၊ အိန္ဒိယတို့ ပါဝင်သည့် Quad(ကွတ်စ်)အဖွဲ့ကလည်း ဒေါ်လာ သန်း ၂၀ ထောက်ပံ့ပေးမည်ဟု ကတိပြုထားသည်။

မြန်မာနိုင်ငံတွင် မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်ကြီးနှင့် နောက် ဆက်တွဲ ငလျင်ငယ်များ မတ်လ ၂၈ ရက်၌ လှုပ်ခတ်ခဲ့သည်။

ထိုငလျင်ကြောင့် လူပေါင်း ၃၀၀၀ ကျော် သေဆုံးပြီး ၄၀၀၀ ကျော် ထိခိုက်ဒဏ်ရာရရှိကာ ၄၀၀ ဝန်းကျင် ပျောက်ဆုံးလျက်ရှိသည်။

အလားတူ လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေးအဆောက်အအုံများ ပြိုကျပျက်စီးခဲ့သည်။

လက်ရှိမှာတော့ စစ်ကိုင်းတိုင်း၊ ပဲခူးတိုင်း၊ မကွေးတိုင်း၊ မန္တလေးတိုင်း၊ နေပြည်တော်ကောင်စီနယ်မြေနှင့်ရှမ်းပြည် နယ်တို့ကို အရေးပေါ် အခြေအနေ ကြေညာထားပြီး လူသားချင်း စာနာထောက်ထားမှု အကူအညီများ လိုအပ် လျက်ရှိသည်။