CNI News

၂၀၂၃ ခုနှစ်၊ စက်တင်ဘာ ၁၅

ထိုင်းဘုရင့်လေတပ်ဦးစီးချုပ် Air Chief Marshal Alongkorn Vannarot နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် တို့ ၂၀၂၃ ခုနှစ်၊ စက်တင်ဘာ ၁၅ ရက်နေ့က နေပြည်တော်မှာ တွေ့ဆုံ ဆွေးနွေးခဲ့ကြသည်။

အဆိုပါ တွေ့ဆုံမှုတွင် နှစ်နိုင်ငံ တပ်မတော်နှစ်ရပ်အကြား ချစ်ကြည်ရင်းနှီးမှုများ တိုးတက်ကောင်းမွန်လျက်ရှိမှု အခြေအနေများနှင့် ပူးပေါင်းဆောင်ရွက်လျက်ရှိမှု အခြေအနေများကို ဆွေးနွေးခဲ့ကြောင်း နစကဘက်က ထုတ် ပြန်ခဲ့သည်။

ထို့နောက် မြန်မာ့တပ်မတော်(လေ)နှင့် ထိုင်းဘုရင့်လေတပ်အကြား ပူးပေါင်းဆောင်ရွက်လျက်ရှိသည့် အခြေအ နေများ၊ မြန်မာ-ထိုင်း တပ်မတော်နှစ်ရပ်အကြား အဆင့်မြင့်အရာရှိကြီးများ အစည်းအဝေး (HLC)နှင့် မြန်မာ-ထိုင်း ဒေသဆိုင်ရာ နယ်ခြားကော်မတီ အစည်းအဝေး(RBC)ကို နှစ်စဉ် ဆောင်ရွက်နေမှု အခြေအနေများ၊ နှစ်နိုင်ငံ ချစ်ကြည်ရင်းနှီးမှုတိုးတက်ရေး ဆိုင်ရာကိစ္စရပ်များနှင့် ချစ်ကြည်ရေးခရီးစဉ်များ လည်ပတ်ရေးဆိုင်ရာ ကိစ္စရပ် များကို ဆွေးနွေးခဲ့ကြောင်း သိရသည်။

ထိုင်းလေတပ်ဦးစီးချုပ်သည် မြန်မာနိုင်ငံက အိမ်ရှင်အဖြစ် ကျင်းပခဲ့သည့် (၂၀)ကြိမ်မြောက် အာဆီယံ လေတပ် ဦးစီးချုပ်များ ညီလာခံသို့ ၂၀၂၃ ခုနှစ်၊ စက်တင်ဘာ ၁၄ ရက်နေ့က တက်ရောက်ခဲ့ပြီးနောက် ယနေ့ (စက်တင်ဘာ ၁၅ ရက်)မှာ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံခဲ့ခြင်း ဖြစ်သည်။

လက်ရှိ ထိုင်း-မြန်မာ နယ်စပ် ကရင်ပြည်နယ်၊ ကယားပြည်နယ်တို့တွင် မြန်မာ့တပ်မတော်နှင့် တော်လှန်ရေး အင်အားစုများကြား လက်နက်ကိုင် ပဋိပက္ခများ ပြင်းထန်လျက်ရှိနေသည်။

အဆိုပါ လက်နက်ကိုင် ပဋိပက္ခများကြောင့် ကုန်သွယ်ရေး လမ်းကြောင်းများ ပျက်စီးမှုများ ရှိခဲ့သလို ထိုင်း-မြန်မာ ချစ်ကြည်ရေးတံတားများလည်း ဗုံးဖောက်ကွဲခံရမှုများ ဖြစ်ပွားခဲ့သေးသည်။

CNI News

၂၀၂၃ ခုနှစ်၊ စက်တင်ဘာ ၁၅

NCA စာချုပ်ကို ကရင်အမျိုးသားအစည်းအရုံး(KNU)မှ တရားဝင် ပျက်ပြယ်ကြောင်း ထုတ်ပြန်ကြေညာခြင်းမရှိ သည့်အပြင် နယ်မြေဒေသတည်ငြိမ်ရေးနှင့်ပြည်တွင်း ငြိမ်းချမ်းရေး ရရှိရေးအတွက် နိုင်ငံရေးနည်းဖြင့်သာ အဖြေရှာသွားမည်ဟု KNU ၏ တပ်မဟာ(၇) ဘားအံခရိုင် ဥက္ကဋ္ဌ စောအောင်မော်ဧက ၂၀၂၃ ခုနှစ်၊ စက်တင်ဘာ ၁၄ ရက်တွင် ထုတ်ပြန်ခဲ့သည်။

KNU မှ မိမိနိုင်ငံရေး ရည်ရွယ်ချက်၊ ရည်မှန်းချက်များနှင့် ဖက်ဒရယ်ဒီမိုကရေစီ ပြည်ထောင်စု တည်ဆောက်နိုင် ရေးသဘောထားများအား NCA စာချုပ်တွင် အခြေခံအားဖြင့် ထားရှိနိုင်ရေးအတွက် ထည့်သွင်းထားပြီးဖြစ် ကြောင်း ၎င်းထုတ်ပြန်ချက်တွင် ဖော်ပြထားသည်။

ဥက္ကဋ္ဌ စောအောင်မော်ဧက “ သို့ဖြစ်၍ တပ်မဟာ(၇) ဘားအံခရိုင်အနေဖြင့် NCA စာချုပ်ကို KNU မှ တရားဝင် ပျက်ပြယ်ကြောင်း ထုတ်ပြန်ကြေညာခြင်း မရှိသည့်အပြင် နယ်မြေဒေသ တည်ငြိမ်ရေးနှင့် ပြည်တွင်း ငြိမ်းချမ်း ရေး ရရှိရေးအတွက် NCA ကို အခြေခံလျက် ပြည်သူ့အကျိုးကို ရှေ့ရှု၍ နိုင်ငံရေးပြဿနာကို နိုင်ငံရေးနည်းဖြင့် သာ အဖြေရှာလာနိုင်ကြရေးအတွက် ဆောင်ရွက်သွားမည်ဖြစ်ကြောင်း အသိပေးဖော်ပြအပ်ပါသည်”ဟု ထုတ်ပြန် ပြောကြားခဲ့သည်။

ထို့နောက် NCA ခေါ် တပြည်လုံး အပစ်အခတ်ရပ်စဲရေးစာချုပ် သဘောတူချုပ်ဆိုနိုင်ရေးနှင့် နိုင်ငံရေး ပြဿနာ ကို နိုင်ငံရေးနည်းလမ်းဖြင့် ဆွေးနွေးအဖြေရှာနိုင်ရေးသည် KNU ၏ တစိုက်မတ်မတ် တောင်းဆိုလာရာမှ ဖြစ် ပေါ်လာသော စာချုပ်တရပ်ဖြစ်ကြောင်း၊ NCA စာချုပ်ကို ချုပ်ဆိုနိုင်ရန်နှင့် NCA စာချုပ် ခိုင်ခိုင်မာမာ သက်ဝင် ချုပ်ဆိုထားနိုင်ရန် ပြည်တွင်းနှင့် နိုင်ငံတကာ အသိသက်သေများရှေ့တွင် ချုပ်ဆိုထားသော စာချုပ်တရပ်လည်း ဖြစ်ကြောင်း KNU တပ်မဟာ(၇) ဘားအံခရိုင်ဥက္ကဋ္ဌက ထုတ်ပြန်ခဲ့သည်။

KNU ၏ တပ်မဟာ(၇) ဘားအံခရိုင် ဥက္ကဋ္ဌ စောအောင်မော်ဧ ထုတ်ပြန်ချက်ကို တွေ့ရစဉ်

KNU နှင့် အစိုးရကြား ဆန့်ကျင် တိုက်ခိုက်လာရသည့် အကြောင်းအရင်းသည် နိုင်ငံရေးပြဿနာကို နိုင်ငံရေး နည်းအရ အဖြေမရှာဘဲ စစ်ရေးနည်းဖြင့် အဖြေရှာလာခြင်းမှ ဖြစ်ပေါ်လာရသော ပြဿနာကြီးကြောင့် နှစ် ၇၀ ခန့် စစ်ပွဲအတွေ့အကြုံကို အခြေခံ၍ အဖြေရှာခဲ့ရာ နိုင်ငံရေးပြဿနာကို နိုင်ငံရေးနည်းဖြင့် တွေ့ဆုံအဖြေရှာခြင်း သည် အကောင်းဆုံးဖြစ်သည့် ဆုံးဖြတ်ချက် တရပ်ရရှိလာသည့်အပေါ် KNU ကွန်ကရက်မှ ပစ်ခတ်တိုက်ခိုက်မှု ရပ်စဲရေးနှင့် ပြည်တွင်း ငြိမ်းချမ်းရေးအတွက် လမ်းစဉ်၊ လုပ်ငန်းစဉ်နှင့် ရှေ့လုပ်ငန်းစဉ်တွင် နိုင်ငံရေးပြဿနာ ကို နိုင်ငံရေးနည်းဖြင့် အဖြေရှာရန် အတိအလင်း ဖော်ပြထားပြီးဖြစ်သည်ဟု ၎င်းထုတ်ပြန်ချက်တွင် ဖော်ပြ ထားသည်။

KNU၊ ရှမ်းပြည်ပြန်လည်ထူထောင်ရေးကောင်စီ(RCSS)၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ်မြောက်ရေးပါတီ(ALP)၊ ဒီမိုကရေစီအကျိုးပြုကရင်အမျိုးသားတပ်မတော်(DKBA)၊ KNU/KNLA- ငြိမ်းချမ်းရေးကောင်စီ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF)၊ ချင်းအမျိုး သားတပ်ဦး (CNF)တို့သည် ၂၀၁၅ ခုနှစ်၊ အောက်တိုဘာ ၁၅ ရက်နေ့က NCA စာချုပ်ကို လက်မှတ်ထိုးခဲ့သည်။

KNU ၏ အထွေထွေအတွင်းရေးမှူးချုပ် ပဒိုစောတာဒိုမူးက NCA စာချုပ် ပျက်ပြယ်သွားပြီဟု ၂၀၂၃ ခုနှစ်၊ သြဂုတ်လက သတင်းစာ ရှင်းလင်းပွဲမှာ ပြောသွားခဲ့သည်။

CNI News

၂၀၂၃ ခုနှစ်၊ စက်တင်ဘာ ၁၅

မြန်မာနိုင်ငံ၏ ရခိုင်ပြည်နယ်အတွင်းက ဘူးသီးတောင်၊ မောင်တောမြို့နယ်တို့တွင် အာရကန်ရိုဟင်ဂျာ ကယ်တင် ရေးအဖွဲ့(ARSA-အာဆာ) ပိုမိုလှုပ်ရှားလာနေသည့်အတွက် လုံခြုံရေးအဖွဲ့အစည်းများမှ လူထုမထိခိုက်စေရန် စီမံ ဆောင်ရွက်ပေးသင့်ကြောင်း Roma Time Organization မှ တည်ထောင်သူ ကိုကျော်လင်းက CNI သတင်းဌာန သို့ ပြောသည်။

ရခိုင်ပြည်နယ်တွင် မြန်မာ့တပ်မတော်နှင့် ရက္ခိုင့်တပ်တော် (ULA/AA) တို့ တိုက်ပွဲများကြောင့် တိုက်ပွဲရှောင်များ နေရပ် မပြန်နိုင်သေးကြောင်း၊ ထိုအခြေအနေမှာပဲ ARSA သည် ရခိုင်အနောက်ပိုင်းဒေသမှ စတင်ပြီး ယခုကဲ့သို့ ပိုမိုလှုပ်ရှားလာမှုမှာ ဒေသခံလူထုအတွက် စိုးရိမ်ရကြောင်း ၎င်းက ပြောသည်။

ကိုကျော်လင်း “ဒါကတော့ တာဝန်ယူမယ်ဆိုတာထက်ကို ရက္ခိုင့်တပ်တော်ကလည်း ရခိုင်ပြည်ကို တိုးတက်ဖွံ့ဖြိုး စေချင်တယ်၊ နောက် မြန်မာနိုင်ငံအစိုးရဖြစ်တဲ့ ပြည်ထောင်စုအစိုးရလို့ ပြောနေတဲ့ တပ်မတော်ဖက်ကလည်း သူတို့က ပြည်ထောင်စုအနေအထားနဲ့ အကုန်လုံး နယ်မြေဧရိယာတွေနဲ့ သူတို့နဲ့ သက်ဆိုင်တယ်လို့ ထင်တာပေါ့၊ အဲဒီလို ယူဆတဲ့အခါကြတော့ နှစ်ဦးနှစ်ဖက်စလုံးမှာ ကိုင်တွယ်ဖြေရှင်းရမယ့် ကိစ္စတွေ အဲဒီလို လုပ်ရမယ့် ကိစ္စ တွေတော့ ရှိလာပါလိမ့်မယ်၊ အရင်တုန်းကလည်း လုပ်ခဲ့တာပဲလေ၊ အနောက်ဖက်မှာ ဟိုဟာဖြစ်ပြီဆိုတော့ သူတို့ စစ်ဆင်ရေးတွေ ဘာတွေ လုပ်ခဲ့တာပဲလေ၊ အဲဒီမှာ စိုးရိမ်စရာ တစ်ချက်တော့ ရှိတာပေါ့လေ၊ အာဆာကို လိုက်ရှာ ရင်းနဲ့ တခြားတခြား လူထုတွေ မထိခိုက်စေဖို့လည်း အရေးကြီးတာပေါ့၊ လူထုဆိုတာက အနောက်ဖက်မှာနေတဲ့ ရခိုင်ဖြစ်ဖြစ်၊ မွတ်စလင်ဖြစ်ဖြစ်၊ တခြား ဘယ်မျိုးနွယ်စုမဆိုလေ စစ်ရေးအရ ရှင်းလင်းရင်းနဲ့ တခြားဥစ္စာတွေကို မထိခိုက်စေဖို့လည်း အရေးကြီးတာပေါ့” ဟု ပြောသည်။

မြန်မာ့တပ်မတော်ကို တွေ့ရစဉ်

ပြီးခဲ့သည့် စက်တင်ဘာ ၉ ရက်နေ့က ဘူးသီးတောင်မြို့နယ် မီးကျောင်းခေါင်းဆွဲကျေးရွာမှ မွတ်ဆလင် အမျိုးသား တစ်ဦးကို ARSA မှ ဖမ်းဆီးသွားပြီးနောက် ၁ ရက်အကြာတွင် သေဆုံးလျက် ပြန်လည်တွေ့ရှိခဲ့ကြောင်း သိရသည်။
ထို့အတူ ပြီးခဲ့သည့် ဩဂုတ်လ အတွင်းကလည်း မောင်တောမြို့နယ် စံပတ်ကုံးကျေးရွာမှ မွတ်ဆလင် အမျိုးသား နှစ်ဦးကို ARSA အဖွဲ့က ဖမ်းဆီးသွားခဲ့သည့် ဖြစ်စဉ်များလည်း ရှိခဲ့သည်။

ARSA ၏ လမ်းကြောင်းမှာ အကြမ်းဖက်မှုကို သွားနေသည့် လမ်းကြောင်းဟု မိမိတို့ အနေဖြင့် အမြဲထောက်ပြ ခဲ့ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

ရခိုင်ပြည်နယ်အတွင်း လမ်းဆုံတစ်ခုကို တွေ့ရစဉ်

၎င်းက “အဲဒီအပိုင်းကတော့ အကောင်းဆုံးကတော့ အဲဒါနဲ့ ပတ်သက်ရင်တော့ အခုလောလောဆယ် ရခိုင်ဒေသမှာ သူတို့ရဲ့ လွတ်မြောက်ရေး ဘာညာပေါ့နော်၊ အမြဲတမ်း ကြွေးကြော်နေတဲ့ AA ဖက်ကို ချိတ်ဆက်ပြီးမေးရင်တော့ ပိုပြီး သိသာလိမ့်မယ်၊ အဓိကကတော့ အဲဒီပြဿနာကလည်း ဘာဖြစ်လဲဆိုတော့ ARSA စပြီးတော့ ဖြစ်လာတဲ့ အချိန်မှာ ARSA သွားနေတဲ့ လမ်းကြောင်းက Terrorism (အကြမ်းဖက်ဝါဒ) လမ်းကြောင်းပေါ် ရှိနေတယ်လို့ ကျနော်တို့ အမြဲတမ်းထောက်ပြခဲ့ဖူးတာ ရှိတယ်၊ ဒါပေမဲ့ AA က‌ နောက်ပိုင်း ဘာဖြစ်လာသလဲဆိုတော့ ARSA က သူတို့ ပူးပေါင်းချင်တဲ့ ပုံစံမျိုး ARSA နဲ့ ပတ်သက်ပြီး သူတို့ နေရာတစ်ခုပေးသင့်တဲ့ ပုံစံမျိုး ဖြစ်လာတယ်ဆိုတော့ ARSA လှုပ်ရှားမှု ဘာကြောင့် ထကြွလာသလဲဆိုတဲ့ အတိအကျ အဖြေမျိုး သိချင်တယ်ဆိုရင်တော့ AA နဲ့ ချိတ် ဆက်ပြီး မေးရင်တော့ နည်နည်း ပိုတိကျတဲ့ အဖြေမျိုး ထွက်နိုင်ပါလိမ့်မယ်” ဟု ပြောသည်။

ပြီးခဲ့သည့် ၂၀၁၇ ခုနှစ်၊ ဩဂုတ်လ ၂၆ ရက်နေ့က မြန်မာနယ်ခြားစောင့်တပ် ကင်းစခန်း ၃၀ ဝန်းကျင်အား ARSA တပ်ဖွဲ့များ ဝင်ရောက်တိုက်ခိုက်ခဲ့ပြီးနောက် ၂၀၁၈ နှစ်ကုန်ပိုင်းအထိ မြန်မာ့တပ်မတော်နှင့် ARSA တို့ တိုက်ပွဲများ ဖြစ်ပွားခဲ့သည်။

ထို့နောက် ရခိုင်ပြည်နယ် ဘူးသီးတောင်နှင့် မောင်တောမြို့နယ်များတွင် ယခုနှစ် ဩဂုတ်လမှာ စတင်ကာ ARSA အဖွဲ့ဝင်များ ပိုမိုလှုပ်ရှားလာပြီး ဖမ်းဆီးမှုများ၊ သတ်ဖြတ်ခံရမှုများ ဖြစ်ပွားလာခဲ့ကြောင်း ဒေသခံများက ပြောသည်။

ရခိုင်ပြည်နယ်မြောက်ပိုင်းတွင် မြန်မာ့တပ်မတော်၊ ULA/AA၊ ARSA အပါအဝင် ရခိုင်ပြည်လွတ်မြောက်ရေးပါတီ (ALP)၊ ရိုဟင်ဂျာသွေး စည်းညီညွတ်ရေးအဖွဲ့ (RSO) များလည်း လှုပ်ရှားလျက်ရှိကြောင်း သိရသည်။

CNI News

၂၀၂၃ ခုနှစ်၊ စက်တင်ဘာ ၁၅

မြန်မာ့တပ်မတော်၏ လုပ်ငန်းဆောင်ရွက်မှုများအတွက် ဘဏ္ဍာငွေ ထောက်ပံ့မှု ပြုလုပ်ပေးနေသည်ဟုဆိုကာ မြန်မာနိုင်ငံတော်ဗဟိုဘဏ် ဥက္ကဋ္ဌ အပါအဝင် ဝန်ထမ်း ၄၄ ဦး အကြမ်းဖက်သမားများအဖြစ် အမျိုးသားညီညွတ် ရေးအစိုးရ(NUG)က ၂၀၂၃ ခုနှစ်၊ စက်တင်ဘာ ၁၄ ရက်နေ့စွဲဖြင့် ထုတ်ပြန်ကြေညာခဲ့သည်။

အဆိုပါ ထုတ်ပြန်ခဲ့သော ဝန်ထမ်းများမှာ ဗဟိုဘဏ်ဥက္ကဋ္ဌ ဒေါ်သန်းသန်းဆွေ၊ ဒုဥက္ကဋ္ဌ ဦးဇော်မြင့်နိုင်၊ ဒုဥက္ကဋ္ဌ ဒေါက်တာလင်းအောင်၊ အမြဲတမ်းအတွင်းဝန် ဦးအောင်အောင်၊ ညွှန်ကြားရေးမှူးချုပ်များ အပါအဝင် ဒုတိယ ညွှန်ကြားရေးမှူးချုပ်များနှင့် ညွှန်ကြားရေးမှူးများ ပါဝင်ကြသည်။

ဗဟိုဘဏ်တစ်ခုအနေဖြင့် နိုင်ငံ၏ အခြေအနေနှင့် ကိုက်ညီပြီး ပြည်တွင်းဈေးနှုန်းတည်ငြိမ်ရေးကို ရရှိစေမည့် ငွေကြေးမူဝါဒကို ချမှတ်၍ အကောင်အထည်ဖော်မှု မရှိခြင်း၊ ယင်းအစား ပြည်တွင်းသုံးငွေကြေး(မြန်မာကျပ်) အား အမြောက်အများ ရိုက်ထုတ်ခဲ့ပြီး နစက (မူရင်း- အကြမ်းဖက်အုပ်စု)အတွက် အဓိကငွေကြေး ထောက်တိုင်များ အဖြစ် ဆောင်ရွက်ခဲ့ခြင်း၊ ယင်း၏ အကျိုးဆက်အဖြစ် အဆမတန် ငွေကြေးဖောင်းပွမှုကြောင့် ပြည်သူများ ကုန် ဈေးနှုန်း ကြီးမြင့်သည့်ဒဏ်ကို ခံစားကြရကြောင်း NUG ၏ ထုတ်ပြန်ချက်တွင် ဖော်ပြထားသည်။

 NUG ရဲ့ ထုတ်ပြန်ချက်ပါ လူစာရင်းကိုတွေ့ရစဉ် 

ထို့နောက် ဗဟိုဘဏ်တစ်ခု အနေဖြင့် ပြည်သူ့ကိုယ်စား စီမံခန့်ခွဲရမည့် နိုင်ငံ၏ နိုင်ငံခြားသုံး သီးသန့်ငွေများ အား နစက (မူရင်း- စစ်ကောင်စီ)အတွက် နိုင်ငံခြား တိုင်းပြည်များမျ လေယာဉ်ဆီ အပါအဝင် လူအများအပြား သေ ကြေ ပျက်စီးနိုင်သည့် လက်နက်များ ဝယ်ယူရာတွင် အသုံးပြုခြင်း၊ ပြည်သူပိုင်ငွေကို တလွဲ အသုံးပြုခြင်းတို့ရှိ သည်ဟု ထုတ်ပြန်ခဲ့သည်။

အထက်ပါ လုပ်ရပ်များကို ကျူးလွန်ခြင်းကြောင့် ဗဟိုဘဏ် ဥက္ကဋ္ဌ နှင့် ဝန်ထမ်း ၄၄ ဦးကို အကြမ်းဖက် သမားများ အဖြစ် သတ်မှတ်ကြေညာ NUG က ထုတ်ပြန် ကြေညာသွားခဲ့သည်။

NUG ၏ ထုတ်ပြန်ချက်သည် လက်တွေ့မှာ အသုံးမဝင်နိုင်ကြောင်း၊ လက်တွေ့ လုပ်ပိုင်ခွင့် အာဏာသည် NUG ထံမှာ မရှိဘဲဖြစ်နေကြောင်း နိုင်ငံရေးအသိုင်းအဝိုင်းကြား ထောက်ပြနေကြသည်။

CNI News

၂၀၂၃ ခုနှစ်၊ စက်တင်ဘာ ၁၄

မြန်မာနိုင်ငံက အိမ်ရှင်အဖြစ် လက်ခံကျင်းပနေသည့် အာဆီယံလေတပ်ဦးစီးချုပ်များ အစည်းအဝေးတွင် လက်ရှိ မြန်မာ့နိုင်ငံရေး၊ သံတမန်ရေးရာများ၌ မည်ကဲ့သို့ သက်ရောက်နေမှုများ ရှိလာနိုင်သလဲဆိုသည့်အပေါ် နိုင်ငံရေး အသိုင်းအဝိုင်းကြား ဆွေးနွေးမှုများ ရှိနေသည်။

အဆိုပါ အစည်းအဝေးသို့ ဘရူနိုင်း၊ ကမ္ဘောဒီးယား၊ လာအို၊ ထိုင်းနှင့် ဗီယက်နမ်နိုင်ငံတို့မှ လေတပ်ဦးစီးချုပ်များ တက်ရောက်ခဲ့သလို ဖိလစ်ပိုင်နှင့် စင်္ကာပူလေတပ် ဦးစီးချုပ်များမှ Video Message များ ပေးပို့ပြီး ဆွေးနွေးခဲ့သည် ဟု နစကမှ စက်တင်ဘာ ၁၃ ရက်မှာ ထုတ်ပြန်ခဲ့သည်။

ထိုသို့ အာဆီယံနိုင်ငံအများစုမှ တက်ရောက်ခြင်းကြောင့် နစကနှင့် NUG အကြား သံတမန်ရေးရာ အားပြိုင်မှု အပေါ် သက်ရောက်သလားဟု သုံးသပ်မှုများ ရှိခဲ့သည်။

လက်ရှိ မြန်မာနိုင်ငံ၏ အာဏာ ၃ ရပ်ကို ကိုင်စွဲထားသည့် အဖွဲ့အစည်းက နိုင်ငံ၏ အစိုးရဖြစ်ကြောင်း၊ နစက အနေဖြင့် သံတမန်ရေးရာတွင် အားသာလျက်ရှိကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၂၀၂၃ ခုနှစ်၊ စက်တင်ဘာ ၁၃ ရက်နေ့က အာဆီယံ လေတပ်ဦးစီးချုပ်များ အစည်းအဝေး ကျင်းပနေစဉ်

၎င်းက “အဲဒါက ဟိုတုန်းကလည်း တော်တော်များများ ကျနော်တို့ focus ပြောဖူးတယ်ဗျ၊ ရှင်းရှင်းလေးပဲ၊ နိုင်ငံ တစ်နိုင်ငံမှာ တကယ်တမ်း ဒီနိုင်ငံရဲ့ အာဏာ ၃ ရပ်ပေါ့၊ အုပ်ချုပ်ရေး၊ ဥပဒေပြုရေး၊ တရားစီရင်ရေး ဒီအာဏာ ၃ ရပ်ကို တကယ်တမ်း ကိုင်တွယ်ပြီး အလုပ်လုပ်တဲ့ နိုင်ငံတစ်နိုင်ငံက ဒီနိုင်ငံရဲ့ အစိုးရပဲ၊ သူ့ဟာသူ သီအိုရီအရ လျှောက်ပြော legitimate ဖြစ်လား၊ မဖြစ်ဘူးလား ငြင်းနေကြတာ တကယ်တမ်းကြ အဲဒီနိုင်ငံကို အုပ်ချုပ်နေတဲ့ အစိုးရတစ်ရပ်က တည်ဆဲအစိုးရပဲ ပြောရရင် တရားဝင်အစိုးရပဲ၊ အဲဒီအချက်မှာတင် တော်တော်လေး ရှင်းလင်းနေ ပြီးသားပဲ၊ ရုံးခန်းတစ်ခန်းတောင် သေချာဖွင့်လှစ်ဖို့ အနေအထားမရှိဘဲနဲ့ ဟိုနိုင်ငံက ခေါ်တွေ့၊ ဒီနိုင်ငံက ခေါ်တွေ့ လောက်နဲ့ သာယာနေတဲ့ အဖွဲ့အစည်း တစ်ခုလောက်နဲ့တော့ ယှဉ်လို့မရဘူးပေါ့လေ၊ အဓိကကတော့ လက်တွေ့ ကတော့ အဲဒီအတိုင်းပဲဗျ၊ အဲဒီတော့ သံတမန်ရေးရာ အားသာချက်ရှိလား မရှိလားဆိုတော့ အစကတည်းက နစက ဖက်က သံတမန်ရေးရာ အားသာချက် ရှိပြီးသားပါ၊ အားသာချက် မရှိဘူးလို့ လူတွေက ထင်နေကြတာပဲ ဖြစ်ပါလိမ့် မယ်” ဟု‌ ပြောသည်။

၂၀၂၃ ခုနှစ်၊ စက်တင်ဘာ ၁၃ ရက်နေ့က နစက၏ လေတပ်ဦးစီးချုပ် ဗိုလ်ချုပ်ကြီးထွန်းအောင်သည် အာဆီယံအဖွဲ့ ဝင် လေတပ်ဦးစီးချုပ်များနှင့် စုပေါင်းတွေ့ဆုံမှု ရှိခဲ့သလို နိုင်ငံချင်းစီ တွေ့ဆုံဆွေးနွေးမှုများလည်း ပြုလုပ်ခဲ့ ကြောင်း ထုတ်ပြန်ချက်တွင် ဖော်ပြထားသည်။

အဆိုပါ တွေ့ဆုံဆွေးနွေးမှုအား မလေးရှားနိုင်ငံနှင့် အင်ဒိုနီးရှားနိုင်ငံတို့က တက်ရောက်ခြင်း မရှိသလို Video Message ပေးပို့ခြင်းလည်း မရှိကြောင်း သိရသည်။

လက်ရှိတွင် အာဆီယံအနေဖြင့် မြန်မာ့နိုင်ငံရေး ဖြေရှင်းရေးအတွက် ပြင်ဆင်မှုများ ရှိနေကြောင်း ကရင်အမျိုးသား ဒီမိုကရက်တစ်ပါတီမှ မန်းအောင်ပြည်စိုးက CNI သတင်းဌာနသို့ ပြောသည်။

၂၀၂၃ ခုနှစ်၊ စက်တင်ဘာ ၁၃ ရက်နေ့က ဗိုလ်ချုပ်ကြီး ထွန်းအောင်ကို တွေ့ရစဉ်

၎င်းက “အခုတလောပိုင်းကတော့ အာဆီယံက မြန်မာကို ပြင်ထားသလိုတော့ ရှိတာပေါ့လေ၊ ဒါပေမဲ့ အခု တပ်ပိုင်းဆိုင်ရာက လာတယ်ဆိုတော့ သံတမန်ပိုင်းက နည်းနည်းလေး ပြန်ပြီးတော့ အလားအလာ ကောင်းတယ် လို့ ပြောလို့ရမလားတော့ မပြောတတ်ဘူး။ အဲဒီလို တွေ့ဆုံတယ်ဆိုလို့ ရှိရင်ပေါ့လေ၊ အင်ဒိုနီးရှားနဲ့ မလေးရှားက တော့ နဂိုကတည်းက ကျနော်တို့နိုင်ငံကို သိပ်ကြိုက်တဲ့ နိုင်ငံတွေ မဟုတ်ဘူးလေ၊ အဲဒါကြောင့်မို့ သူတို့ ကျန်နေခဲ့ တာ ဖြစ်မှာပေါ့၊ ဒီဖက်ဟာတွေကတော့ အဲဒီလို သံတမန်ရေးရာအရတော့ တစ်စုံတစ်ရာသော အတိုင်းအတာအထိ အောင်မြင်မှုရတယ်လို့ ပြောရင်လည်း ပြောလို့ရမယ် ထင်ပါတယ်” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း ပြောင်းလဲခဲ့သည့် နိုင်ငံရေး အခင်းအကျင်းများအရ မြန်မာနိုင်ငံတွင် အကျပ်အတည်းများဖြင့် ရင်ဆိုင်နေရသည်။ 

အဆိုပါ နိုင်ငံရေး အကျပ်အတည်းများကို ဖြေရှင်းနိုင်ရေး အာဆီယံ ဘုံသဘောတူညီချက် ၅ ချက်အား သဘောတူ ခဲ့ကြသော်လည်း အကောင်အထည် ဖော်နိုင်ခြင်း မရှိကြောင်း သုံးသပ်မှုများလည်း ရှိနေသလို အာဆီယံ အစည်း အဝေးများတွင် မြန်မာ့အား တက်ရောက်ခွင့် ကန့်သတ်ထားသည်။ 

သို့သော် အခြားတစ်ဖက်တွင်လည်း နစကမှ လက်ခံကျင်းပသော (၂၀)ကြိမ်မြောက် အာဆီယံ လေတပ်ဦးစီးချုပ် များ အစည်းအဝေးအား အာဆီယံအဖွဲ့ဝင် အများစု တက်ရောက်ခဲ့သည်ကို တွေ့ရသည်။

CNI News

၂၀၂၃ ခုနှစ်၊ စက်တင်ဘာ ၁၃

ရှမ်းပြည်နယ်မြောက်ပိုင်း၊ မူဆယ်မြို့နယ်အတွင်း မြန်မာ့တပ်မတော်နှင့် ပြည်သူ့စစ်တပ်ဖွဲ့များ အစစ်အဆေး များလာကြောင်း တအာင်းအမျိုးသားလွတ်မြောက်ရေးတပ်မတော် (TNLA) ၏ မူဆယ်မြို့နယ်မှူး တားအလိပ်က CNI သတင်းဌာနသို့ ပြောသည်။

လက်ရှိမှာ မူဆယ်မြို့နယ်၏ အဓိက လမ်းမကြီးနှင့် မြို့တွင်းလမ်းများတွင် ပိုမိုစစ်ဆေးလာကြောင်း၊ ပြည်သူများ အနေဖြင့် စီးပွားရေးမှာလည်း အဆင်မပြေကြကြောင်း ၎င်းက ပြောသည်။

တားအလိပ်က “လတ်တလောကတော့ သူတို့ဖက်ကလည်း ဒီအတိုင်းပေါ့ အမြဲတမ်းလှုပ်ရှားတယ်၊ ဘာမှတော့ ထူးခြားမှု မရှိသေးဘူး။ ဒါပေမဲ့ မြို့ထဲမှာတော့ စစ်ဆေးတဲ့အပိုင်း တော်တော်လေး ကြမ်းတယ်၊ ပြည်သူ့စစ်တွေ ရော အသုံးချတာတော့ ပြည်သူ့စစ်တွေ အသုံးချခံရတာပေါ့၊ အပြစ်မဲ့ပြည်သူတွေ အပြောအဆို မတတ်ရင် သူတို့ တော်တော်လေး ခံရတာပေါ့၊ ထိုးကြိတ်ရိုက်ခံရတယ်၊ အဲဒီလိုမျိုး ကြားနေရတယ်၊ တိုက်ပွဲဖြစ်နေတဲ့ အတော အတွင်းဆိုရင် လမ်းမှာ မြို့တွင်းတို့ သူတို့ အဲဒီလိုမျိုး ကားတစ်စီးဖြတ်လို့ရှိရင် ၃ သောင်း၊ ပြီးရင် ၁၀ နာရီကနေ ဒီ ၄ နာရီကြားထဲမှာ သွားလာတာရှိရင် အကုန်လုံး ကုတ် (ဖမ်းဆီး) ထားတာပဲ။ လူရော ကားရော၊ လက်ရှိကြတော့ main (အဓိက) လမ်းနဲ့ မြို့တွင်းနဲ့ အဆင်ကို မပြေဘူး။ သွားလာရတာ၊ ပြည်သူတွေကအစပေါ့၊ စီးပွားရေးလည်း အဆင်မပြေတော့ သူတို့က အဲဒီလိုလုပ်တော့ ပိုဆိုးတာပေါ့” ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ ရှမ်းပြည်နယ်(မြောက်ပိုင်း)အတွင်းရှိ ပြည်သူ့စစ်ခေါင်းဆောင်များ တွေ့ဆုံစဉ်

ပြီးခဲ့သည့် သြဂုတ်လ အစောပိုင်းက စတင်ပြီး ရှမ်းပြည်နယ် မြောက်ပိုင်းတွင် မြန်မာ့တပ်မတော်နှင့် TNLA တို့ တကြော့ပြန် တိုက်ပွဲ ပြန်လည်ဖြစ်ပွားခဲ့သည်။

မြန်မာ့တပ်မတော်နှင့် ပြည်သူ့စစ်တို့ မူဆယ်မြို့တွင်း အစစ်အဆေး ပိုမိုလုပ်ဆောင်နေဟု ပြောဆိုချက်အား မိမိအနေဖြင့် မကြားမိကြောင်း မူဆယ်ကုန်ကားသမားတစ်ဦးက CNI သတင်းဌာနသို့ ပြောသည်။

“ဘာမှတော့ မကြားမိဘူး။ ကျနော်တို့ဖက်ကတော့ ဘာလို့ဆို ကျနော်က ၅ မိုင်မှာဆိုတော့၊ ၅ မိုင်၊ ၁၀၅ မိုင်မှာ ဆိုတော့ ဘာမှတော့ မဖြစ်ဘူး။ အဲဒီလိုတော့ မမေးမြန်းဘူး၊ သွားတော့ သွားနေတာပဲ၊ လမ်းတကြောတော့ ပေးကမ်းသွားရတာပေါ့” ဟု ပြောသည်။

 TNLA တပ်ဖွဲ့ကိုတွေ့ရစဉ်

လက်ရှိ မူဆယ်မြို့နယ်အတွင်း မြန်မာ့တပ်မတော်နှင့် TNLA တို့ နှစ်ဖက် စစ်ရေးတင်းမာသည့် အနေအထားတွင် မရှိတော့ကြောင်း တားအလိပ်က ပြောသည်။

၎င်းက “အဲဒီလောက်ထိလည်း မဟုတ်တော့ပါဘူး။ သူတို့ဖက်ကလည်း ငြိမ်ထားတယ်ပေါ့၊ ဒါပေမဲ့ တစ်ချက် တစ်ချက်တော့ သူတို့ထဖောက်တယ်၊ အဲဒီလိုမျိုးတော့ ရှိတယ်၊ ကျနော်တို့ကတော့ ကိုယ့်နေရာနဲ့ ကိုယ်နေတယ်၊ တစ်ချက်တစ်ချက်တော့ သူတို့ ပေါ်ပေါ်လာတာပေါ့၊ ဒီရက်ပိုင်းတော့ ငြိမ်ပါတယ်။ လွန်ခဲ့တဲ့ တစ်ပတ် ၅ ရက် လောက်ပေါ့၊ ဆက်တိုက်ပဲ ညရောနေ့ရော ကျနော်တို့ ရှိတဲ့ဖက်တွေ ရမ်းသမ်းပစ်တာပေါ့၊ ရွာထဲမှာ သူတို့ ပစ်ထား တဲ့ လက်နက်ကြီးတွေ မပေါက်ကွဲသေးတဲ့ဟာတွေ ကျနော်တို့ လိုက်ရှင်းနေရတဲ့ အပိုင်းလည်း ရှိတယ်” ဟု ပြော သည်။

ရှမ်းပြည်နယ်(မြောက်ပိုင်း)ရှိ မူဆယ်၊ နမ့်ခမ်း၊ ကွတ်ခိုင် အပါအဝင် မန္တလေးတိုင်းဒေသကြီးအနီးက မိုးကုတ်၊ နောင်ချို အနီးပတ် ဝန်းကျင်များတွင် TNLA ၊ ပြည်သူ့ကာကွယ်ရေးတပ် (PDF) ပူးပေါင်းတပ်နှင့် တပ်မတော် အကြား တိုက်ပွဲများ ပိုမိုဖြစ်ပွားလာခဲ့သည်။

CNI News

၂၀၂၃ ခုနှစ်၊ စက်တင်ဘာ ၁၂

ဗိုလ်နဂါးဦးဆောင်၍ ဗမာတပ်ကို ဖွဲ့စည်းခဲ့ပြီးနောက် NUG က ဗိုလ်နဂါးနှင့် ဆွေးနွေးခဲ့ရာတွင် တစ်စုံတစ်ရာ သဘောတူညီချက် မရှိခဲ့ကြောင်း ထုတ်ပြန်လာခြင်းကြောင့် ဗိုလ်နဂါးဦးဆောင်သည့် ဗမာတပ်ကို NUG က အသိအမှတ် ပြုသလား/မပြုဘူးလား အငြင်းပွားကာ သုံးသပ်ဆွေးနွေးနေကြသည်။

အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလ၊ ပြည်ထောင်စုဝန်ကြီး ဦးရည်မွန်တို့နှင့် မြန်မာ့ တော်ဝင်နဂါးတပ်တော် (MRDA) ခေါင်းဆောင် ဗိုလ်နဂါးတို့ တွေ့ဆုံခဲ့မှုကို NUG က သတင်းထုတ်ပြန်ခဲ့သည်။

၂၀၂၃ ခုနှစ်၊ မေလ ၂ ရက်နေ့က တွေ့ဆုံမှု၏ ရည်ရွယ်ချက်မှာ ကာကွယ်ရေးဝန်ကြီးဌာနနှင့် မဟာမိတ်များ စစ် ဒေသအလိုက် တည်ဆောက်ထားသည့် Chain of Command (COC)မှာ ပါဝင်ဆောင်ရွက်ကြရန်၊ အမျိုးသား ညီညွတ်ရေး အစိုးရက မြေပြင်မှာ တည်ဆောက်လျက်ရှိသည့် အုပ်ချုပ်ရေး၊ ကာကွယ်ရေးဆိုင်ရာ ယန္တရားများနှင့် ညှိနှိုင်းပူးပေါင်းဆောင်ရွက်ရန်၊ တော်လှန်ရေးအလွန်ကာလမှာ အကောင်အထည်ဖော်ရမည့် လုံခြုံရေးကဏ္ဍ ပြုပြင်ပြောင်းလဲရေးဆိုင်ရာ အစီအစဉ်များတွင် လက်ခံပါဝင်ဆောင်ရွက်ရန်  စသည့် ကိစ္စရပ်များကို အလေးထား ပြောခဲ့ခြင်းဖြစ်ကြောင်း NUG က ထုတ်ပြန်ခဲ့သည်။

NUG က “နိုင်ငံတော်ယာယီသမ္မတ ဒူဝါလရှီးလနှင့် ပြည်ထောင်စုဝန်ကြီး ဦးရည်မွန် အနေဖြင့် အထက်ပါ ဆွေးနွေးချက်များမှလွဲ၍ အခြားမည်သည့် ဆွေးနွေးချက်၊ သဘောတူညီချက် တစ်စုံတစ်ရာ လုံးဝ မရှိခဲ့ပါ” ဟု ပြောသည်။

ပြီးခဲ့သည့် စက်တင်ဘာ ၉ ရက်နေ့က ဗိုလ်နဂါး ဦးဆောင်ပြီး NUG လက်အောက်သို့ မဝင်ရောက်နိုင်သေးသည့် တော်လှန်ရေး အင်အာစုများကို စုစည်းကာ ဗမာအမျိုးသား တော်လှန်ရေးတပ်မတော် (BNRA) ကို ဖွဲ့စည်း တည်ထောင်ခဲ့သည်။

BNRA တပ်ဖွဲ့ကိုတွေ့ရစဉ်

အဆိုပါ ဗမာအမျိုးသား တော်လှန်ရေး တပ်မတော် တည်ထောင်မှုကို NUG အနေဖြင့် အသိအမှတ် မပြုဘူးလား ဆိုကာ နိုင်ငံရေးအသိုင်းအဝိုင်းကြား သုံးသပ်မှုများ ရှိနေသည်။

ဗိုလ်နဂါးအနေဖြင့် NUG ၏ ခေါင်းဆောင်မှုကို အသိအမှတ်ပြုပြီး ပါဝင်မည်ဆိုပါက အခြားသော တိုင်းရင်းသား လက်နက်ကိုင် အဖွဲ့အစည်းများနည်းတူ ဗမာလက်နက်ကိုင်တပ်ဖွဲ့ကို ကြိုဆိုကြကြောင်း၊ ထို့အတူ အဖွဲ့အစည်း နှစ်ရပ်အနေဖြင့် တစ်ပေါင်းတစ်စည်းတည်း မဖြစ်သေးသော ကာလတွင် ကွဲပြားခြားနားမှုများ ရှိနေမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနကို ပြောသည်။

၎င်းက “ကျနော်တော့ အဲဒီလို သဘောထားတော့ ပေးမှာ မဟုတ်ဘူး။ အဲဒီအဆင့်ထိတော့ အဲဒီသဘောအထိတော့ ရောက်မှာ မဟုတ်ဘူးလို့ ကျနော်တော့ ယူဆပါတယ်။ ပူးပေါင်းဆောင်ရွက်ကြရမှာပါပဲ။ သို့သော် မတူတဲ့နေရာ မတူတဲ့ အခြေအနေနဲ့ မတူတဲ့ လုပ်ငန်းစဉ်အပေါ်မှာ တစ်စုံတစ်ရာ ကွဲပြားခြားနားမှုတွေ ရှိနိုင်တာကိုလည်း ကျနော်တို့ ကာလတစ်ခု အသိအမှတ်ပြုရမှာပါ။ တကယ်တမ်း တစ်စည်းတစ်ရုံးနဲ့ ဖြစ်ရေးဆိုတာက လက်တွေ့ ပူးပေါင်းဆောင်ရွက်မှု ဖြစ်စဉ်အတွင်းမှာပဲ တည်ဆောက်ယူရမယ်လို့ ကျနော်ကတော့ ယူဆပါတယ် ခင်ဗျ” ဟု ပြောသည်။

ဗမာအမျိုးသား တော်လှန်ရေး တပ်မတော်ကို တည်ထောင်ခြင်းမှာ တစ်စင်ထောင်ခြင်း မဟုတ်ကြောင်း၊ တပ် တည်ထောင်ခြင်း ကိစ္စကို NUG မှ သက်ဆိုင်ရာ ဝန်ကြီးဌာနများနှင့် ဆွေးနွေးပြီးဖြစ်ကြောင်း ဗိုလ်နဂါးက ၂၀၂၃ ခုနှစ်၊ စက်တင်ဘာ ၉ ရက်နေ့တွင် ပြောထားသည်။

PDF တပ်ဖွဲ့ကို တွေ့ရစဉ်

တစ်ဖက်ရန်သူက မိမိတို့ တော်လှန်ရေး အင်အားစုများအကြား ပုံစံအမျိုးမျိုးဖြင့် ဖြိုခွဲရန် ကြိုးစားမှာ ဖြစ်ကြောင်း၊ မိမိတို့အနေဖြင့်လည်း စုစုစည်းစည်းရှိရန် လိုအပ်ကြောင်း ကရင်ငြိမ်းချမ်းရေး အထောက်အကူပြုကွန်ယက်မှ စောလေးကပေါက CNI သတင်းဌာနသို့ ပြောသည်။

၎င်းက “တော်လှန်ရေး ရေရှည်ဖြစ်ပေါ်လာတဲ့ အချိန်မှာ ဖြစ်နေကျ ပုံစံမျိုး မဖြစ်တဲ့အတွက်ကြောင့်မို့ အထူးသဖြင့် ခေါင်းဆောင်နဲ့ အောက်ခြေနဲ့ ပတ်သက်တဲ့ လက်နက်ကိုင်တော်လှန်နေတဲ့ အပေါ်မှာ သေသေချာချာ စနစ်တကျ စုစည်းဖို့အတွက်က ကြိုးစားမှု လိုအပ်တယ်၊ အထူးသဖြင့် သူတို့ရဲ့ အခြေအနေကို ကျနော်တို့ သေသေချာချာ သိရှိ ဖို့အတွက် အရင်ဆုံး လေ့လာဖို့ လိုအပ်တယ်၊ နောက်တစ်ချက်က စကစဖက်ကလည်း နည်းအမျိုးမျိုးနဲ့ တော်လှန် ရေး အင်အားစုတွေကြားထဲကို ပုံစံအမျိုးမျိုးနဲ့ ဖြိုခွဲဖို့အတွက် ကြိုးစားမှာပဲ” ဟု ပြောသည်။

ဗမာအမျိုးသား တော်လှန်ရေးတပ်မတော် (BNRA) မှာ စစ်ကိုင်းတိုင်းဒေသကြီး၊ မန္တလေးတိုင်းဒေသကြီးနှင့် မကွေး တိုင်း ဒေသကြီးတို့မှာ အခြေပြု လှုပ်ရှားသွား မည်ဖြစ်ကြောင်း၊ တပ်အင်အားအနေဖြင့် တပ်ရင်း ၁၈ ရင်းဖြစ် ပြင်ဆင်ထားကြောင်း သိရသည်။

CNI News

၂၀၂၃ ခုနှစ်၊ စက်တင်ဘာ ၁၁

ဗမာအမျိုးသား တော်လှန်ရေး တပ်မတော် (BNRA) ကို ဖွဲ့စည်းလိုက်ခြင်းသည် ဗမာတိုင်းရင်းသား ဒေသအတွက် အားတက်စရာကောင်းသော အခြေအနေတစ်ရပ်ဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

တိုင်းရင်းသားအားလုံး တန်းတူအခွင့်အရေးရရှိသည့် စစ်မှန်သော ဖက်ဒရယ်ဒီမိုကရေစီပြည်ထောင်စု ပေါ်ပေါက် ရေး၊ လွတ်လပ်ခြင်း၊ တရားမျှတခြင်း၊ တန်းတူညီမျှခြင်းနှင့် ငြိမ်းချမ်းခြင်းတို့ကို အခြေခံသော နိုင်ငံရေးမူဝါဒ တစ်ရပ် ပေါ်ပေါ်ရေးအတွက် စက်တင်ဘာ ၉ ရက်နေ့က ဗမာအမျိုးသား တော်လှန်ရေး တပ်မတော်ကို ဖွဲ့စည်း ကြောင်း ဗိုလ်နဂါး ကြေညာခဲ့သည်။

ဦးသန်းစိုးနိုင်က “ဟုတ်ကဲ့ ဗမာအမျိုးသားတပ်မတော် ဖွဲ့စည်းလိုက်တာဟာ ဗမာအမျိုးသားဒေသအတွက် အခြား သော တိုင်းရင်းသားဒေသများနည်းတူ လက်နက်ကိုင်တပ်ဖွဲ့ ပေါ်ပေါက်ဖို့ လိုအပ်တယ်ဆိုတဲ့အမြင် ကျနော်တို့ ရှိပါ တယ်။ ဒါပေမဲ့ ဗိုလ်နဂါးတို့အဖွဲ့က ဗမာအမျိုးသားဒေသမှာ ရှိနေတဲ့ အင်အားစုတွေ အားလုံးပါဝင်၊ မပါဝင်တော့ သေချာလည်း ကျနော်တို့ မသိရသေးပါဘူး။ ဒါပေမဲ့ အားလုံးစုစုပေါင်း အဖွဲ့ ၁၃ ဖွဲ့လို့ ပြောကြပါတယ်။ အဲဒီ ၁၃ ဖွဲ့ ထဲမှာ ၁၁ ဖွဲ့က ဗိုလ်နဂါးတို့နဲ့ တပ်မဟာ ၁ ခု ဖွဲ့စည်းတယ်လို့ သဘောတူကြတာ ကြားရတဲ့အတွက် ဒါကတော့ ဗမာတိုင်းရင်းသားဒေသအတွက် လက်နက်ကိုင် အင်အားတစ်ရပ် ပေါ်ပေါက်လာတဲ့အတွက် ကြိုဆိုတယ်လို့ ယေဘုယျ ခြုံပြီးတော့ ပြောလို့ရပါတယ်။ ဖြစ်နိုင်ရင်တော့ အားလုံးပူးပေါင်း ပါဝင်ဆောင်ရွက်နိုင်ရင် ကောင်းပါ တယ်။ ဒါပေမဲ့ ကျန်တဲ့ နှစ်ဖွဲ့ကလည်း NUG နဲ့ ဆက်စပ်ပြီး ဆောင်ရွက်လုပ်ကိုင်မယ့် သဘောရှိတဲ့အတွက် ဒီအင်အားစု ပေါ်ပေါက်လာခြင်းကို ကျနော်တို့ ယေဘုယျအားဖြင့် ပြောရလို့ရှိရင် ဗမာတိုင်းရင်းသားဒေသအတွက် အားတက်စရာကောင်းတဲ့ အခြေအနေတစ်ရပ် ပေါ်ပေါက်လာလတယ်လို့ ယူဆပါတယ်” ဟု ပြောသည်။

ဗမာအမျိုးသား တော်လှန်ရေး တပ်မတော်(BNRA) တပ်ဖွဲ့၀င်များကို တွေ့ရစဉ်

BNRA ကို စစ်ကိုင်းတိုင်းဒေသကြီး၊ မန္တလေးတိုင်းဒေသကြီးနှင့် မကွေးတိုင်းဒေသကြီးတို့မှာ အခြေပြု လှုပ်ရှားသွား မည်ဖြစ်ကြောင်း၊ တပ်အင်အားအနေဖြင့် တပ်ရင်း ၁၈ ရင်းဖြစ် ပြင်ဆင်ထားကြောင်း သိရသည်။

လက်ရှိ အညာဒေသတွင် အမျိုးသားညီညွတ်ရေးအစိုးရ (NUG) လက်အောက်သို့ မဝင်ရောက်နိုင်သေးသည့် တော်လှန်ရေး အဖွဲ့အစည်းများရှိနေကြောင်း၊ ပြန့်ကျဲနေသော အဖွဲ့အစည်းများကို စုစည်းပြီး BNRA ကို တည် ထောင်ခြင်းဖြစ်ကြောင်း BNRA ဥက္ကဋ္ဌ ဗိုလ်နဂါးမှ ပြောသည်။

၎င်းက “ဒီလိုပြန့်ကျဲနေတဲ့ အဖွဲ့အစည်းတွေ အစိုးရအနေနဲ့ လက်ကြားယိုနေတဲ့ အဖွဲ့တွေကို စုပြီးတော့ ကျနော်တို့ က BNRA ဆိုတဲ့ ဗမာအမျိုးသားတော်လှန်ရေး တပ်မတော်ကို ဖွဲ့စည်းရခြင်းလည်း ဖြစ်တယ်၊ ဒီကိစ္စကို အားလုံး ပြောနေကြသလို တစ်စင်ထောင်တာ၊ တစ်စုဖွဲ့တာလည်း မဟုတ်ဘူး။ ကျနော်တို့ရဲ့ ကိုယ်ကျိုးအတွက်လည်း မဟုတ်ဘူး။ ကျနော်တို့က ဒီကိစ္စကို သက်ဆိုင်ရာ ဝန်ကြီးဌာနတွေနဲ့ ဆွေးနွေးပြီး ဖြစ်တယ်၊ စောစောက ခက်ခက် ခဲခဲနဲ့ ခရီးသွားခဲ့ရတယ်၊ ခရီးသွားခဲ့ရပြီးတော့ ကျနော်တို့ ကာကွယ်ရေးဝန်ကြီးဌာနနဲ့ ကျနော်လူချင်းတွေ့ပြီးတော့ ရက်ရှည်အချိန်ကြာ ကျနော်တို့ ဆွေးနွေးညှိနှိုင်းခဲ့ကြပြီးလည်း ဖြစ်တယ်၊ ဝန်ကြီးနဲ့တော့ မျက်နှာချင်းဆိုင် ဆွေးနွေးခဲ့ကြပေမယ့် ဝန်ကြီးရယ်၊ ကျနော်ရယ်၊ နောက်သမ္မတကြီးရယ်က Zoom Meeting မှာ တွေ့ပြီးတော့ ကျနော်တို့ ဒီကိစ္စကို ဆွေးနွေးခဲ့တယ်၊ MRDA ကို နောက်ပူးပေါင်းလာတဲ့ အဖွဲ့တွေနဲ့ COC စနစ်တကျ တည် ဆောက်ပြီးတော့ စစ်ရေးမှာလည်း တိုင်းရင်းသားတွေရဲ့ ကူညီမှုနဲ့ ကျနော်တို့ Regular army၊ Standard Army ပုံစံ သေချာ ဖွဲ့စည်းပြီးတော့ NUG အစိုးရ ကာကွယ်ရေးဝန်ကြီးဌာနနဲ့ လက်တွဲလုပ်သွားနိုင်ဖို့ ပူးပေါင်း လုပ်ဆောင် မယ်ဆိုတဲ့ ဒီကြေညာချက်တွေနဲ့ ထုတ်ဖို့ ဆွေးနွေးကတိပြုခဲ့ကြပြီး ဒါလုပ်ဆောင်လာတဲ့ အဖွဲ့အစည်းလည်း ဖြစ် တယ်” ဟု ပြောသည်။

ဗမာပြည်သူ့လွတ်မြောက်ရေးတပ်တော်(BPLA)ကို တွေ့ရစဉ်

BNRA သည် ဗမာဆိုသော လူမျိုးနာမည် ပါနေခြင်းက ဗမာတိုင်းရင်းသားအရေး တစ်ခုတည်းကို ဦးတည်ဆောင် ရွက်မှာလား တစ်နိုင်ငံလုံးအရေးကို ဆောင်ရွက်မှာလား စောင့်ကြည့်ရမှာဖြစ်ကြောင်း၊ ဗမာအမျိုးသား တော်လှန်ရေး တပ်မတော်ဆိုသော နာမည်ဖြင့် တစ်နိုင်ငံလုံး အရေးလုပ်ဆောင်မည်ဆိုပါကလည်း တခြားသော တိုင်းရင်းသားများ၏ ထောက်ခံမှုကို ရယူနိုင်ပါ့မလား မေးခွန်းထုတ်စရာဖြစ်နေကြောင်း နိုင်ငံရေးလေ့လာသုံးသပ် သူများက ပြောသည်။

လက်ရှိတွင် နွေဦးတော်လှန်ရေးနှင့်အတူ ပေါ်ပေါက်လာသော ဗမာကိုယ်စားပြု အဖွဲ့အစည်းအနေဖြင့် ဗမာ ပြည်သူ့လွတ်မြောက်ရေးတပ်တော် (BPLA)၊ ဗမာအမျိုးသား တော်လှန်ရေး တပ်မတော် (BNRA) တို့ ရှိနေပြီး အခြားသော ဒေသအခြေပြု လက်နက်ကိုင်အဖွဲ့အစည်းများလည်း ရာနှင့်ချီရှိနေကြောင်း သိရသည်။

အဆိုပါ ကွဲပြားနေသော တော်လှန်ရေးအင်အားစုများကို NUG အနေဖြင့် စုစည်းရန် လိုအပ်ကြောင်း နိုင်ငံ‌ရေး အသိုင်းအဝိုင်းကြား သုံးသပ်ဆွေးနွေးမှုများလည်း ရှိနေသည်။

CNI News

၂၀၂၃ ခုနှစ်၊ စက်တင်ဘာ ၁၁

မိမိတို့နိုင်ငံသည် ဒေသကို အခြေခံသည့် ဖက်ဒရယ်စနစ်သာလျင် အသင့်တော်ဆုံးဖြစ်သည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၃ ခုနှစ်၊ စက်တင်ဘာ ၁၀ ရက်နေ့က ရှမ်းပြည်နယ်(မြောက်ပိုင်း)အတွင်းရှိ ပြည်သူ့စစ်ဌာနေတပ်ဖွဲ့ ခေါင်းဆောင်များနှင့် တွေ့ဆုံစဉ် အထက်ပါအတိုင်း ၎င်းက ပြောကြားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ဒီမိုကရေစီစနစ်နှင့် ဖက်ဒရယ် အုပ်ချုပ်ရေး ဆောင်ရွက်ရာတွင် ဒေသကို အခြေခံသည့် ဖက်ဒရယ်စနစ်ကို ကျင့်သုံးရမည်ဖြစ်ကြောင်း၊ ဖက်ဒရယ်စနစ်တွင် တိုင်းရင်းသားကို အခြေခံ သည့် ဖက်ဒရယ်နှင့် ဒေသကို အခြေခံသည့် ဖက်ဒရယ်ဟူ၍ ရှိပြီး ကမ္ဘာ့နိုင်ငံအများစုတွင် ဒေသကို အခြေခံ သည့် ဖက်ဒရယ်စနစ်ကို ကျင့်သုံးကြသည်ကို တွေ့ရှိရကြောင်း၊ မိမိတို့ နိုင်ငံတွင်လည်း ဒေသကို အခြေခံသည့် ဖက်ဒရယ်စနစ်သည်သာလျင် အသင့်တော်ဆုံးဖြစ်သည်”ဟု ပြောသည်။

၂၀၂၃ ခုနှစ်၊ စက်တင်ဘာ ၁၀ ရက်နေ့က ပြည်သူ့စစ်ခေါင်းဆောင်များနှင့် ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

ထို့နောက် ငြိမ်းချမ်းရေး ဆွေးနွေးမှုများတွင် တိုင်းရင်းသား လက်နက်ကိုင် အဖွဲ့များအနေဖြင့် တိုင်းရင်းသားတို့၏ အရေးကိုသာ တောင်းဆိုလျက်ရှိပြီး ဒေသအရေးကို တောင်းဆိုမှု အားနည်းကြောင်း၊ လူတစ်စုကို ကိုယ်စားပြု သည့် အဖွဲ့အစည်းများဖြစ်၍ မရဘဲ ဒေသကို ကိုယ်စားပြုသည့် အဖွဲ့အစည်းများ ဖြစ်ရန်လိုကြောင်း နစကဥက္ကဋ္ဌ က ပြောသည်။

တပ်မတော်အနေဖြင့် ငြိမ်းချမ်းရေး လုပ်ငန်းစဉ်များနှင့်ပတ်သက်၍ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) အပေါ်တွင်သာ ခိုင်ခိုင်မာမာ ရပ်တည် ဆောင်ရွက်သွားမည်ဟု ၎င်းက ပြောသည်။

လက်ရှိ မြန်မာနိုင်ငံတွင် ၂၀၀၈ ဖွဲ့စည်းပုံအခြေခံဥပဒေအရ တိုင်းဒေသကြီး (၇)ခု၊ ပြည်နယ် (၇)ခု၊ ကိုယ်ပိုင် အုပ်ချုပ်ခွင့်ရဒေသ (၅)ခု၊ ကိုယ်ပိုင်အုပ်ချုပ်ခွင့်ရတိုင်း(၁)ခုတို့ဖြင့် ဖွဲ့စည်းထားသည်။

ထို့ကြောင့် ဒေသနှင့်လူမျိုးကို အခြေခံသည့် ဖက်ဒရယ်စနစ်ပုံစံဖြစ်နေခြင်းကြောင့် ဒေသကို အခြေခံသော ဖက်ဒရယ် စနစ်ကို သွားမည်ဆိုပါက ၂၀၀၈ ဖွဲ့စည်းပုံအခြေခံဥပဒေအား ပြင်ဆင် ရေးဆွဲရမည့် အခြေအနေ ဖြစ်နေသည်။