- By CNI
- Category: နိုင်ငံရေး
- Hits: 159
CNI News
၂၀၂၄ ခုနှစ်၊ မတ်လ ၂၀
ရခိုင်ပြည်နယ်၊ ဘူးသီးတောင်မြို့နယ်တွင် နေထိုင်ကြသော မွတ်ဆလင်များသည် ရက္ခိုင့်တပ်တော်(AA) အလိုမ ရှိကြောင်း ၂၀၂၄ ခုနှစ်၊ မတ်လ ၁၉ ရက်နေ့က ဆန္ဒပြကန့်ကွက်ခဲ့သည်။
လက်ရှိတွင် ရခိုင်ပြည်နယ်အတွင်းမှာ မြန်မာ့တပ်မတော်နှင့် AA ကြား တိုက်ပွဲများ အပြင်းအထန်ဖြစ်ပွားနေ သည်။
ထို့နောက် AA က ရသေ့တောင်၊ ပုဏ္ဏကျွန်း၊ ပေါက်တော၊ မင်းပြား၊ ကျောက်တော်၊ မြောက်ဦး၊ မြေပုံ၊ ရမ်းဗြဲ မြို့နယ်များကို သိမ်းပိုက်ထားပြီး ဘူးသီးတောင်နှင့်မောင်တောမြို့နယ်များကို ထိုးစစ်ဆင် တိုက်ခိုက်လျက်ရှိ သည်။
AA ကို ဘူးသီးတောင်မြို့နယ်မှာ မွတ်ဆလင်များ ဆန္ဒပြ ကန့်ကွက်နေကြစဉ်
တခြားတစ်ဖက်မှာလည်း မြန်မာ့တပ်မတော်သည် ရခိုင်ပြည်နယ်အတွင်းရှိ မွတ်ဆလင်များကို ပြည်သူ့စစ်မှုထမ်း ဥပဒေ ပြဋ္ဌာန်းပြီးနောက် စစ်သင်တန်းများ ပေးအပ်လျက်ရှိကြောင်း ရုပ်သံဖိုင်များ ထွက်ပေါ်လျက်ရှိနေသည်။
ရခိုင်ပြည်နယ်သည် လူမျိုးရေး ပဋိပက္ခများ ဖြစ်ပွားလေ့ရှိပြီး မွတ်ဆလင် ဒုက္ခသည်များ ဘင်္ဂလားဒေ့ရှ်နိုင်ငံ ဘက်သို့ ထွက်ပြေးခိုလှုံနေရသည်များလည်း ရှိနေသည်။
- By CNI
- Category: နိုင်ငံရေး
- Hits: 120
CNI News
၂၀၂၃ ခုနှစ်၊ မတ်လ ၂၀
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသား လက်နက်ကိုင် ၇ ဖွဲ့၏ မဟာမိတ်စုဖွဲ့မှုမှာ မည်ကဲ့သို့ ဦးတည်နေသလဲဆိုသည့်အပေါ် နိုင်ငံရေးနှင့် စစ်ရေး အကဲခတ်များအကြား သုံးသပ်မှုများ ရှိနေသည်။
၂၀၂၄ ခုနှစ်၊ မတ်လ ၁၈ ရက်နေ့က ထိုင်းနိုင်ငံ၊ ချင်းမိုင်မြို့တွင် ကျင်းပသည့် အပစ်ရပ် ၇ ဖွဲ့၏ မျက်နှာစုံညီ အစည်းအဝေးအပြီး 7 EAO Alliance ဆိုပြီး ဖွဲ့စည်းနိုင်ခဲ့ကြောင်း ထုတ်ပြန်ခဲ့သည်။
မိမိတို့ မဟာမိတ်အဖွဲ့အစည်းအနေဖြင့် ငြိမ်းချမ်းရေး၊ နိုင်ငံရေးများ ဆွေးနွေးရန် အဓိကဖြစ်ကြောင်း၊ လုံခြုံရေး များကို စုပေါင်းလုပ်မည့် သဘောရှိသော်လည်း စစ်ရေးပူးတွဲသည့် သဘောမဟုတ်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) မှ နာယက ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။
၎င်းက “အဓိကတော့ နိုင်ငံရေးပါပဲ။ ငြိမ်းချမ်းရေး၊ နိုင်ငံရေး ဆွေးနွေးဖို့ အဓိကပါပဲ။ စစ်ရေးကြတော့ ဦးစားပေး မပါပါဘူး။ ဒါပေမဲ့ လုံခြုံရေးအတွက်တော့ စုပေါင်းလုပ်ကြမယ်ဆိုတဲ့ သဘောလေးတော့ ရှိတာပေါ့ဗျာ၊ စစ်ရေး ပူးတွဲတဲ့ သဘောတော့ မဟုတ်ပါဘူး။ အဓိကကတော့ ငြိမ်းချမ်းရေး လုပ်ငန်းစဉ်တွေ နိုင်ငံရေး ဆွေးနွေးပွဲတွေ ပေါ်လာအောင် မူလ NCA လမ်းကြောင်း ကျနော်တို့ PPST က လုပ်ခဲ့တဲ့ လမ်းကြောင်း အတိုင်းပဲ ဆက်လုပ်မှာပါ” ဟု ပြောသည်။
ဗိုလ်ချုပ်ကြီးယွက်စစ်နဲ့ ဗိုလ်ချုပ်ကြီးစောမူတူးစေးဖိုးကိုတွေ့ရစဉ်
အဆိုပါ မဟာမိတ် ၇ ဖွဲ့တွင် မြန်မာ့တပ်မတော်နှင့် တိုက်ပွဲများ ဖြစ်ပွားနေသော PNLO မှာ အပြည့်အဝ ပါဝင်ခြင်း မရှိသေးဘဲ ဆက်စပ်အဖွဲ့အဖြစ်သာ ပါဝင်ကြောင်း ၎င်းက ပြောသည်။
ထို့အတူ မဟာမိတ် ၇ ဖွဲ့က ထိန်းချုပ်နယ်မြေ အသီးသီးတွင် မိမိတို့၏ ကိုယ်ပိုင်ပြဋ္ဌာန်းခွင့် အုပ်ချုပ်ရေးစနစ်ဖြင့် စတင် အုပ်ချုပ်သွားမည်ဖြစ်ကြောင်း သျှမ်းပြည်ပြန်လည်ထူထောင်ရေးကောင်စီ (RCSS/SSA) မှ ဥက္ကဋ္ဌ ဗိုလ်ချုပ်ကြီးယွက်စစ်က ပြောကြားထားသည်။
အဆိုပါ ဖွဲ့စည်းလုပ်ဆောင်မှုမှာ အချိန်နှောင်းသွားပြီဖြစ်ကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။
၎င်းက “အဲဒီဟာကတော့ ကျနော်သုံးသပ်ကြည့် သလောက်ဆိုတော့ အတော်လေးတော့ နောက်ကျသွားတယ် အဲဒီအခြေအနေမျိုးတော့၊ တကယ်တော့ ၂၀၂၁ ပေါ့၊ တကယ်လို့များ လုပ်ချင်တယ်ဆိုရင် ၂၀၂၁ နှစ်ဦးပိုင်းမှာ အာဏာသိမ်းတဲ့နောက်ပိုင်းမှာ သူ့လက်ထဲမှာ လုပ်နိုင်တဲ့ဟာမျိုးဆိုတော့ ဘာပဲဖြစ်ဖြစ် ဖက်ဒရယ်ကို သူတစ်ခါ တည်း လုပ်မယ်ဆိုတဲ့ စောက်ချပြီးမှ လုပ်သွားရင်တော့ ဒီလိုမျိုးတော့ ဖြစ်လာမှာ မဟုတ်ဘူး။ အခုဟာတော့ ကျနော်ထင်တာတော့ လုပ်ရင်လည်း လုပ်တာပဲ ဖြစ်ပါလိမ့်မယ်၊ သိပ်တော့ မလွယ်တော့ဘူးလို့ ကျနော်တော့ ဒီလိုပဲမြင်တယ်၊ ဘာဖြစ်လို့လဲဆိုတော့ PDF တွေ အခိုင်အခန့်တွေ ရှိနေတယ်ဆိုတော့ PDF တွေက လက်ခံ၊ အခု စကစတွေ လုပ်နေတဲ့ဟာကို PDF နဲ့ တခြားတိုင်းရင်းသား လက်နက်ကိုင် အဖွဲ့အစည်းတွေက လက်ခံဦးမှ၊ ဆိုတော့ ရေရှည်မှာ သွားလို့ လွယ်ပါ့မလားဆိုတာ ကျနော် မခန့်မှန်းတတ်အောင် ဖြစ်နေတယ်၊ ဒါပေမဲ့ အချိန် တော့ အတော်လေးတော့ နောင်းသွားပြီလို့ ကျနော်တော့ ဒီလိုပဲ သုံးသပ်မိပါတယ်” ဟု ပြောသည်။
၂၀၂၄ ခုနှစ်၊ မတ်လ ၁၇ ရက်မှ ၁၈ ရက်ထိ NCA-S EAO 7 ဖွဲ့ မျက်နှာစုံညီ အစည်းအဝေး လုပ်နေစဉ်
တချို့သော လက်နက်ကိုင်အဖွဲ့အစည်းများက နယ်မြေစိုးမိုးမှုများ ရယူကာ အုပ်ချုပ်ရေးများ စတင်နေချိန်တွင် မိမိတို့ အပစ်ရပ်အဖွဲ့အစည်း အနေဖြင့်လည်း ကိုယ်ပိုင်ပြဋ္ဌာန်းခွင့်အား အခြေခံသော အုပ်ချုပ်မှုစနစ်ကို စတင်ခြင်း ဖြစ်ကြောင်း ဗိုလ်မှူးကြီး ခွန်ဥက္ကာက ပြောသည်။
၎င်းက “မြို့သိမ်း၊ စခန်းသိမ်းလုပ်တဲ့ လူတွေလည်း နယ်မြေအုပ်ချုပ်ရေးတွေ စနေတော့ ကျနော်တို့ NCA ထိုးထား တဲ့ အဖွဲ့တွေလည်း ကိုယ့်ရဲ့ ထိန်းချုပ်နယ်မြေမှာ ကိုယ်ပိုင်ပြဋ္ဌာန်းခွင့်ကို အခြေခံတဲ့ ဒေသန္တသရ အုပ်ချုပ်ရေးစနစ် လေးတွေ ကိုယ့်ဟာကိုယ် ဖော်ထုတ်နေကြတာတော့ ရှိတာပေါ့၊ ဒါမူအားဖြင့် ပြောတာပါ၊ လက်တွေ့ ဖော်ရင်တော့ နယ်နိမိတ်သတ်မှတ်တာတို့ ပုံစံချမှတ်တာတို့လည်း နည်းနည်း ညှိနှိုင်းဖို့ လိုလာလိမ့်မယ်ပေါ့ဗျာ၊ တချို့ကြတော့ နယ်မြေတွေက overlap ဖြစ်နေကြတယ်လေ။ overlap ဖြစ်နေတဲ့ နေရာတွေမှာတော့ တစ်ပုံစံထဲ ချလို့တော့ မရဘူးပေါ့။ တိုင်တိုင်ပင်ပင်တော့ လုပ်ရမယ့် သဘောရှိပါတယ်။ မူအားဖြင့်တော့ မှန်ပါတယ်။ ဒါပေမဲ့ လက်တွေ့ လုပ်ရင်တော့ ပြင်ဆင်မှု ထပ်လိုဦးမယ်လို့ ယူဆပါတယ်” ဟု ပြောသည်။
တိုင်းရင်းသားလက်နက်ကိုင် ၇ ဖွဲ့၏ မဟာမိတ်အဖွဲ့အစည်းကို အဖွဲ့ခေါင်းဆောင်အဖြစ် ဗိုလ်ချုပ်ကြီးယွက်စစ်၊ ဒုတိယအဖွဲ့ခေါင်းဆောင်အဖြစ် နိုင်အောင်မင်းတို့က တာဝန်ယူဆောင်ရွက်မည် ဖြစ်သည်။
- By CNI
- Category: နိုင်ငံရေး
- Hits: 207
CNI News
၂၀၂၄ ခုနှစ်၊ မတ်လ ၁၉
“ဝ”ပြည်သွေးစည်းညီညွတ်ရေးပါတီ/ “ဝ”ပြည်သွေးစည်းညီညွတ်ရေးတပ်မတော်(UWSP/UWSA)ခေါင်းဆောင် များသည် ၎င်းတို့အား ပြည်နယ်အဆင့် သတ်မှတ်ပေး ရန်တောင်းဆိုခြင်းက မည်သည့် အဆင့်အတန်းမျိုးရှိသည့် ပြည်နယ်အဆင့်ကို တောင်းဆိုနေခြင်း ဖြစ်နိုင်လဲ နိုင်ငံရေးနှင့်စစ်ရေး အကဲခတ်သူများကြား သုံးသပ်ဆွေးနွေး လျက်ရှိသည်။
UWSP/UWSA ခေါင်းဆောင်များသည် မြန်မာ့တပ်မတော် ခေါင်းဆောင်များ အပါအဝင် ရွေးကောက်ခံ အစိုးရတိုင်းကို တွေ့ဆုံသည့်အခါမှာ “ဝ”ကိုယ်ပိုင်အုပ်ချုပ်ခွင့်ရတိုင်းအား “ဝ”ပြည်နယ်အဖြစ် သတ်မှတ်ပေးရန် တောင်းဆိုလျက် ရှိနေသည်။
လက်ရှိ UWSA ရရှိထားသည့် အနေအထားမှာ ကွန်ဖက်ဒရေးရှင်း(ကွန်ဖက်ဒရိတ်) ပြည်နယ်အဆင့်မျိုး ရှိနေ ကြောင်း၊ ၂၀၀၈ ဖွဲ့စည်းပုံအခြေခံဥပဒေအရ ပေးထားသည့် ပြည်နယ်ထက်သာလွန်သော ပြည်နယ်မျိုး တောင်းဆို ခြင်းဖြစ်နိုင်ကြောင်း စည်းလုံးညီညွတ်သော တိုင်းရင်းရင်းသားလူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။
၎င်းက “ကျနော်တို့ မြင်တဲ့ဟာက ၂၀၀၈ အရ “ဝ”က အထူးဒေသတိုင်းပေါ့ဗျာ၊ သူ့ကို ပေးထားတဲ့ အနေအထား ဟာလေ အထူးဒေသအနေနဲ့ ပေးထားတာ ဖြစ်တယ်။ ဒါပေမဲ့ “ဝ” က တောင်းနေတာ ပြည်နယ်ဆိုပြီး တောင်း တယ်။ ဒါပေမဲ့ “ဝ” ရထားတဲ့ အနေအထားက တကယ့်ကို ကွန်ဖက်ဒရိတ်ပြည်နယ် ဆိုတဲ့အဆင့်ကို ရောက်နေ တယ်ပေါ့ဗျာ၊ ဆိုလိုတာက သူ့မှာ သူ့အချုပ်အခြာအာဏာနဲ့သူ သူ့တပ်နဲ့ သူ့နယ်မြေထဲမှာ သူတို့က လွဲလို့ ဘယ်သူ့ ခွင့်ပြုချက်မရှိရင် ဘယ်သူမှ လက်နက်ကိုင်ဆောင်ခွင့် မရှိဘူးပေါ့၊ ဆိုလိုတာကလေ သူ့နေရာကို သူတို့ ခွင့်ပြုမှ တခြားပြည်နယ်က လူတွေရော ဝန်ထမ်းတွေရော ဝင်လို့ထွက်လို့ရတယ်ဆိုတဲ့ အနေအထား သူ့အချုပ်အခြာ အာဏာကို သူထိန်းထားနိုင်တယ်ဆိုတဲ့ အနေအထားမျိုး ရောက်နေတယ်၊ ဒါအကုန်လုံးလည်း မြင်နေတာပဲ။ အဲဒီ တော့ သူတောင်းတဲ့ ပြည်နယ်ဆိုတာကတော့ သေချာတယ်၊ ကျနော်တို့ မြန်မာနိုင်ငံမှာ ၂၀၀၈ အရ ပေးထားတဲ့ ပြည်နယ်တွေထက်တော့ သာလိမ့်မယ်ပေါ့ဗျာ၊ အဓိပ္ပာယ်ဖွင့်မယ် ဆိုရင်လေ” ဟု ပြောသည်။
UWSA ၏ ဌာနချုပ်ရှိရာ ပန်ခမ်း(ပန်ဆန်း)မြို့ကိုတွေ့ရစဉ်
UWSP/UWSA တောင်းဆိုသည့် “ဝ” ဒေသကို ကိုယ်ပိုင်အုပ်ချုပ်ခွင့်ရ အမျိုးသားပြည်နယ်အဖြစ် တည်ထောင်ရန် တောင်းဆိုချက်ကို မူဝါဒအားဖြင့် သဘောတူကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ၂၀၂၂ ခုနှစ်၊ ဇွန်လ ၁ ရက်နေ့ သတင်းစာရှင်းလင်းပွဲတွင် ပြောကြားထားသည်။
သို့သော်လည်း နောင်မှာ ပါတီစုံဒီမိုကရေစီအရ ရွေးကောက်ပွဲကျင်းပပြီး လွှတ်တော်အခင်းအကျင်း ဖြစ်ပေါ်လာ ပြီးနောက်ပိုင်းတွင် ဆက်လက် ဆွေးနွေးမည်ဖြစ်ကြောင်း သိရသည်။
၂၀၀၈ ဖွဲ့စည်းပုံ အခြေခံ ဥပဒေအရ ရှမ်းပြည်နယ်ရှိ ဟိုပန်၊ မိုင်းမော၊ ပန်ဝိုင်၊ နားဖန်း၊ မက်မန်းနှင့် ပန်ခမ်း (ပန်ဆန်း) မြို့နယ် ခြောက်ခုအား ခရိုင်နှစ်ခုဖွဲ့ကာ “ဝ” ကိုယ်ပိုင်အုပ်ချုပ်ခွင့်ရတိုင်းအဖြစ် သတ်မှတ်ပေးထား သည်။
UWSA သည် ပြည်နယ်အဆင့် ရယူလိုပါက ၂၀၀၈ ဖွဲ့စည်းပုံအခြေခံဥပဒေပါ ပြည်နယ်အဆင့်အတန်း မျိုးသာ ရရှိမည်ဖြစ်ပြီး ၂၀၀၈ ဖွဲ့စည်းပုံအခြေခံဥပဒေတွင် အုပ်ချုပ်ရေး၊ တရားစီရင်ရေး၊ ဥပဒေပြုရေးအာဏာများ ကို ဗဟိုအစိုးရက ထိန်းချုပ်ထားသည့်အတွက် လက်ရှိတွင် UWSA သည် အုပ်ချုပ်ရေး၊ တရားစီရင်ရေး၊ ဥပဒေ ပြုရေးအာဏာများကို ကျင့်သုံးနေခြင်းကြောင့် ၂၀၀၈ ထက်ကျော်လွန်နေသည်။
UWSA ၏ ဌာနချုပ်ရှိရာ ပန်ခမ်း(ပန်ဆန်း)မြို့ကိုတွေ့ရစဉ်
ထို့ကြောင့် UWSA သည် မည်သည့် အဆင့်အတန်းမျိုးရှိသော ပြည်နယ်ကို တောင်းဆိုနေခြင်းလဲဆိုသည်မှာ မေးခွန်းထုတ်စရာ ဖြစ်နေသလို ၂၀၀၈ ဖွဲ့စည်းပုံအခြေခံဥပဒေကို ကျော်လွန်၍ ပြည်နယ်ပေးခွင့်မရှိသည့် အခြေအနေကို ဘယ်လို ဖြေရှင်းမလဲဆိုသည်မှာလည်း မေးခွန်းထုတ်စရာဖြစ်နေသည်။
တန်းတူရေး၊ ကိုယ်ပိုင်ပြဋ္ဌာန်းပိုင်ခွင့် စသော အခွင့်အရေးများကြောင့် လက်နက်ကိုင်ပဋိပက္ခများ ဖြစ်လာကြောင်း၊ အခြေခံဥပဒေဆိုင်ရာ ပြဿနာများကို ဖြေရှင်းရန်လိုအပ်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။
၎င်းက “လက်နက်ကိုင်ပဋိပက္ခတွေ အကုန်လုံး ပင်ရင်းဖြစ်တဲ့ အမျိုးသားကိုယ်ပိုင်အုပ်ချုပ်ပိုင်ခွင့် လိုချင်လို့၊ တန်းတူအခွင့်အရေး လိုချင်လို့ဆိုတဲ့ ဦးတည်ချက်ကြောင့်ဖြစ်တဲ့ လက်နက်ကိုင်ပဋိပက္ခ ပြဿနာဖြစ်တော့ ဒါကြီးက အခြေခံဥပဒေဆိုင်ရာ ပြဿနာပါလားလို့ သတိဝင်ပြီးခါမှ အခြေခံဥပဒေဆိုင်ရာပြဿနာ အဓိက အကြောင်းအရာတွေကို ညှိနှိုင်းတိုင်ပင်မယ်ဆိုတဲ့ အယူအဆဘက်ကိုသွားရင် ၂၀၀၈ ကို အသေကိုင်မှ ဖြစ်မယ် ဆိုတဲ့ အယူအဆက ကျော်လွှားနိုင်တာပေါ့။ အဲဒီလိုမျိုး ကျော်လွှားနိုင်ဖို့အတွက် နိုင်ငံရေးအရ ထွက်ပေါက်ကို တွေးမိပြီဆိုရင်တော့ဖြင့် ခင်ဗျားတို့ ကျနော်တို့ ပြောတဲ့ လက်ရှိ “ဝ” ပဲ ပြောပြောပေါ့ဗျာ၊ ဗိုလ်ချုပ်ထွန်းမြတ်နိုင် တို့ကပဲ ပြောပြောပေါ့ဗျာ၊ပြည်ထောင်စုကို ဖွဲ့စည်းမယ့် ပုံသဏ္ဍန်သည် ၂၀၀၈ ပုံသဏ္ဍန်ထက် ကျော်သွားမှာပေါ့။ အခင်းအကျင်းက တော်တော်ကြီးကြီးမားမား နဲ့ ညှိညှိနှိုင်းနှိုင်းနဲ့ ပြည်ထောင်စုကြီးရဲ့ နဂိုပုံဏ္ဍာန်အတိုင်း ရပိုင်ခွင့် တွေ ပြောင်းပြီးမှ ပြည်ထောင်စုကြီးကို ဖွဲ့စည်း ကြပြီးမှ လက်နက်ကိုင်ပဋိပက္ခမဲ့ နိုင်ငံသစ်တစ်ခုကို သွားမယ်ဆိုတဲ့ လမ်းကြောင်းပေါ်ကို တင်ပေးနိုင်ရင်တော့ဖြင့် “ဝ” ပြောတဲ့ဟာရော တခြားလက်နက်ကိုင် လက်ရှိ ပဋိပက္ခတွေ ရော ဖြေရှင်းနိုင်လို့ရမယ့် ထွက်ပေါက် တစ်ခုပါ လားလို့ တွေ့မိကြရင်တော့ဖြင့် ကျနော်တို့ အဖြေတစ်ခု ရမယ်ထင် ပါတယ်” ဟု ပြောသည်။
ပြီးခဲ့သည့် ၂၀၂၄ ခုနှစ်၊ ဇန်နဝါရီလအတွင်းက ညီနောင်မဟာမိတ်သုံးဖွဲ့ (AA-TNLA-MNDAA) တို့က ဟိုပန်နှင့် ပန်လုံမြို့နှစ်ခုကို တိုက်ခိုက်သိမ်းယူခဲ့ပြီးနောက်ပိုင်း ၎င်းမြို့နှစ်မြို့အား "ဝ"ပြည်သွေးစည်းညီညွတ်ရေး တပ်မတော်(UWSA) က ဝင်ရောက် ထိန်းချုပ်ခဲ့သည်။
- By CNI
- Category: နိုင်ငံရေး
- Hits: 341
CNI News
၂၀၂၄ ခုနှစ်၊ မတ်လ ၁၉
ပြည်သူ့စစ်မှုထမ်းခေါ်ယူမှုတွင် ဥပဒေနှင့်ကျော်လွန်ဆန့်ကျင် ဆောင်ရွက်နေမှုများအား တားမြစ် အရေးယူပေး ရန် ပြည်သူ့ပါတီက ၂၀၂၄ ခုနှစ်၊ မတ်လ ၁၉ ရက်တွင် ထုတ်ပြန် တောင်းဆိုခဲ့သည်။
ပြည်သူ့စစ်မှုထမ်းဥပဒေကို ၂၀၂၄ ခုနှစ်၊ ဖေဖော်ဝါရီ ၁၀ ရက်တွင် စတင် အာဏာတည်စေကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က လက်မှတ်ထိုး ထုတ်ပြန်ခဲ့သည်။
ထို့နောက် ပြည်သူလူထုအကြား စိုးရိမ်စိတ်မှုများ၊ အဂတိလိုက်စားမှုများ၊ ထွက်ပြေးတိမ်းရှောင်မှုများ ဖြစ်ပေါ် လာခဲ့သည်။
ပြည်သူ့ပါတီက “ ပုဂ္ဂလိက စီးပွားရေးကဏ္ဍတွင်လည်း ပုဂ္ဂလိက အလုပ်ရုံ စက်ရုံဝန်ထမ်းများ အနေဖြင့် ယာယီ ကင်းလွတ်ခွင့်တွင် နိုင်ငံတော်ဌာနဆိုင်ရာ ဝန်ထမ်းများသာ အကျုံးဝင်သည်ဟု နားလည်ပြီး ထွက်ပြေးတိမ်း ရှောင်နေမှုများကြောင့် လုပ်ငန်းများ ဆက်လက် လည်ပတ်နိုင်ရန် အခက်အခဲများ ကြုံတွေ့နေရပါသည်”ဟု ထုတ်ပြန်ခဲ့သည်။
ပြည်သူ့စစ်မှုထမ်းဥပဒေ ပုဒ်မ ၇(ခ)တွင် ရပ်ကွက် သို့မဟုတ် ကျေးရွာအုပ်စု အေးချမ်းသာယာရေးနှင့် ဖွံ့ဖြိုးရေး ကောင်စီသည်၊ ဒီဇင်ဘာ ၃၁ ရက်နေ့တွင် စစ်မှုထမ်းရမည့် အသက်အရွယ် ရောက်သူများ၏ စာရင်းကို ပြည်သူ့ စစ်မှုထမ်းဆင့်ခေါ်ရေး မြို့နယ်အဖွဲ့သို့ သတ်မှတ်ချက်များနှင့်အညီ နှစ်စဉ် ဇန်နဝါရီ ၁၃ ရက်နေ့ အရောက် ပြုစု ပေးပိုပရမည်”ဟူ၍သာ ပြဋ္ဌာန်းထားပါသည်ဟု ပြည်သူ့ပါတီက ထုတ်ပြန်ခဲ့သည်။
ပြည်သူ့ပါတီထုတ်ပြန်ချက်ကို တွေ့ရစဉ်
ထို့ကြောင့် မူရင်းပြဋ္ဌာန်းဥပဒေအရ ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးအဖွဲ့သည် စာရင်းပြုစုပေးပို့ ရန်သာဖြစ်ပြီး ရွေးချယ်အတည်ပြုခွင့်၊ မဲနှိုက်ခြင်း အပါအဝင် စာရင်းမှ ပယ်ဖျက်ခွင့်မရှိကြောင်း တွေ့ရှိရပါသည် ဟု ထိုထုတ်ပြန်ချက်တွင် ဖော်ပြထားသည်။
သို့ဖြစ်ပါ၍ ပြည်သူ့စစ်မှုထမ်းဥပဒေ ကျင့်သုံးခြင်းနှင့် ပတ်သက်ပြီး ပြည်သူအများ စိုးရိမ်ပူပန်မှု လျော့ပါးစေရန် အတွက် နိုင်ငံတော်စီမံအုပ်ချုပ်ရေးကောင်စီအနေဖြင့် နိုင်ငံနှင့်အဝှမ်း တပြေးညီကျင့်သုံးမည့် နည်းဥပဒေ ညွှန် ကြားချက်များကို အများပြည်သူ အလွယ်တကူ သိရှိနိုင်ရန် တိကျသေချာစွာ ထုတ်ပြန်ပေးပါရန်နှင့် ဥပဒေနှင့် ကျော်လွန်ဆန့်ကျင် ဆောင်ရွက်နေမှုများအား တားမြစ်အရေးယူပေးရန် လိုအပ်မည်ဖြစ်ကြောင်း ပြည်သူ့ပါတီ က ထုတ်ပြန်ခဲ့သည်။
လက်ရှိတွင် ရပ်ကွက် သို့မဟုတ် ကျေးရွာအုပ်ချုပ်ရေးမှူးများသည် စစ်မှုထမ်းဆောင်ရန်အတွက် စာရင်းများ ကောက်ယူနေသလို စာရင်းပါသူများကို မဲနှိုက်ခိုင်းခြင်းများ ပြုလုပ်လျက်ရှိသည်။
ထို့နောက် စစ်မှုထမ်းခြင်းကနေ ရှောင်လွှဲလိုပါက ငွေကြေး တစ်စုံတစ်ရာပေးရကြောင်း သိရသည်။
- By CNI
- Category: နိုင်ငံရေး
- Hits: 144
CNI News
၂၀၂၄ ခုနှစ်၊ မတ်လ ၁၈
အပစ်ရပ် ၇ ဖွဲ့၏ မျက်နှာစုံညီ အစည်းအဝေးမှ ချမှတ်သော နိုင်ငံရေးလုပ်ငန်းစဉ် အစီအစဉ်များ အကောင်အထည် ဖော်ရန်အတွက် ဗိုလ်ချုပ်ကြီးယွက်စစ် ဦးဆောင်သည့် 7 EAO Alliance ၏ ဦးဆောင် အဖွဲ့ကို ဖွဲ့စည်းလိုက် ကြောင်း မတ်လ ၁၈ ရက်နေ့တွင် သတင်းထုတ်ပြန်ခဲ့သည်။
တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA) လက်မှတ်ထိုးထားသည့် လက်နက်ကိုင် ၁၀ ဖွဲ့ အနက် ရှမ်းပြည်ပြန်လည်ထူထောင်ရေးကောင်စီ(RCSS)၊ မွန်ပြည်သစ်ပါတီ(NMSP)၊ ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ်မြောက်ရေးပါတီ(ALP)၊ လားဟူဒီမိုကရက်တစ် အစည်းအရုံး (LDU)၊ ဒီမိုကရေစီအကျိုးပြု ကရင်တပ်မတော်(DKBA)၊ ကရင်အမျိုးသားအစည်းအရုံး/ကရင်အမျိုးသား လွတ် မြောက်ရေးတပ်မတော်- ငြိမ်းချမ်းရေးကောင်စီ(KNU/KNLA-PC)တို့ မျက်နှာစုံညီ အစည်းအဝေးကို ထိုင်းနိုင်ငံ၊ ချင်းမိုင်မြို့မှာ ၂၀၂၄ ခုနှစ်၊ မတ်လ ၁၇ ရက်မှ ၁၈ ရက်နေ့အထိ ကျင်းပခဲ့သည်။
ဗိုလ်မှူးကြီးစိုင်းငင်း၊ ဗိုလ်မှူးကြီးစောကျော်ညွှန့်နဲ့ မနန်းယဉ်ယဉ်စိုးတို့ကိုတွေ့ရစဉ်
ထို့နောက် တိုင်းရင်းသားလက်နက်ကိုင်မဟာမိတ် ၇ ဖွဲ့၏ ဦးဆောင်အဖွဲ့ကို ဖွဲ့စည်းခဲ့ပြီး RCSS ဥက္ကဋ္ဌ ဗိုလ်ချုပ်ကြီး ယွက်စစ်အား အဖွဲ့ခေါင်းဆောင်အဖြစ် လည်းကောင်း၊ NMSP ဒုဥက္ကဋ္ဌ နိုင်အောင်မင်းကို ဒုအဖွဲ့ ခေါင်းဆောင်အဖြစ် လည်းကောင်း တာဝန်ပေးခဲ့သည်။
အလားတူ အထွေထွေအတွင်းရေးမှူးအဖြစ် ဗိုလ်မှူးကြီးစိုင်းငင်း၊ တွဲဖက်အတွင်းရေးမှူးအဖြစ် ဗိုလ်မှူးကြီးစော ကျော်ညွှန့်၊ အဖွဲ့ဝင်များအဖြစ် နိုင်အောင်မငေး၊ ဗိုလ်မှူးချုပ် စောစိန်ဝင်း၊ ကျာယာကုပ်၊ ဗိုလ်မှူးကြီး ခိုင်ကျော် လှိုင်၊ PNLO မှ တစ်ဦး၊ ဦးမျိုးဝင်းတို့ ဖြစ်ကြသည်။
အပစ်ရပ် ၇ ဖွဲ့က “ မိမိတို့ 7 EAO ALLIANCE အနေဖြင့် လက်ရှိနိုင်ငံရေး အကျပ်အတည်းကို နိုင်ငံရေးနည်းဖြင့် ဖြေရှင်းကာ ကျော်လွှားနိုင်ရေးအတွက် သက်ဆိုင်ရာ အင်အားစုများနှင့် ဆွေးနွေးညှိနှိုင်းပြီး ဖက်ဒရယ်ဒီမိုကရေ စီ ပြည်ထောင်စုတည်ဆောက်နိုင်သည့်အထိ ဆက်လက်ပြီး ကြိုးပမ်းအားထုတ်သွားမည်”ဟု ထုတ်ပြန်ခဲ့သည်။
EAO ၇ ဖွဲ့ မျက်နှာစုံညီ အစည်းအဝေးကျင်းပနေစဉ်
မိမိတို့၏ အန္တိမရည်မှန်းချက်မှာ ဒီမိုကရေစီရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်များ အပြည့်အဝ ရှိသော ဖက်ဒရယ်ဒီမိုကရေစီပြည်ထောင်စု ထူထောင်သွားရန်ဖြစ်ပြီး မျှော် မှန်းချက်မှာ ဖက်ဒရယ်ဒီမိုကရေစီ အသွင်ကူးပြောင်းရေး လုပ်ငန်းစဉ်မှတဆင့် ရေရှည်တည်တံ့ခိုင်မြဲသော ငြိမ်း ချမ်းရေး တည်ဆောက်သွားမည်ဟု ထိုထုတ်ပြန်ချက်တွင် ဖော်ပြထားသည်။
ထို့နောက် 7 EAO ALLIANCE သည် အားလုံးပါဝင်သော တွေ့ဆုံဆွေးနွေးရေးမှတဆင့် ငြိမ်းချမ်းရေးဆိုင်ရာ ရလဒ် များ ဖော်ထုတ်နိုင်ရန် လူထု၏ သဘောထားများ ဖော်ထုတ်နိုင်သော အခင်းအကျင်းများ ဖန်တီးခြင်း၊ သက်ဆိုင် သည့် အဖွဲ့အစည်းများ အနေဖြင့် ပြည်သူလူထုအား ကာကွယ်ရန် တာဝန်ရှိမှုကို သိရှိစေခြင်း၊ အဓိပ္ပာယ်ပြည့်ဝ၍ နိုင်ငံရေး အပြောင်းအလဲများ တိုးတက်ဖြစ်ပေါ်လာစေရန် သက်ဆိုင်သူများအားလုံးနှင့် နိုင်ငံရေး ဆွေးနွေးပွဲများ ကို စဉ်ဆက်မပြတ် ကျင်းပခြင်းတို့ကို ဆောင်ရွက်သွားမည်ဟု အပစ်ရပ် ၇ ဖွဲ့က ထုတ်ပြန်ခဲ့သည်။
အလားတူ ရည်မှန်းချက်များ အနေဖြင့် အဓိပ္ပာယ်ပြည့်ဝသော နိုင်ငံရေးအပြောင်းအလဲများ တိုးတက်ဖြစ်ပေါ် လာစေရန်၊ နိုင်ငံရေးဆွေးနွေးပွဲများကို သက်ဆိုင်သူများအားလုံးနှင့် စဉ်ဆက်မပြတ်ကျင်းပသွားရန်၊ လက်ရှိ ပဋိပက္ခကို ဖြေရှင်းရာတွင် ငြိမ်းချမ်းစွာ အဖြေရှာလိုသော အင်အားစုများ၏ သဘောထားများ ဖော်ထုတ်နိုင်ရေး အတွက် အခင်းအကျင်းနှင့် နည်းလမ်းများ ဖော်ဆောင်သွားရန်နှင့် ပြည်သူလူထုအား ကာကွယ်စောင့်ရှောက် ရေးနှင့် သက်ဆိုင်သည့် အဖွဲ့အစည်းများအနေဖြင့် ပြည်သူလူထုအား ကာကွယ်ရန် တာဝန်ရှိခြင်းကို သိရှိစေရေး တိုးမြှင့်ဆောင်ရွက်သွားမည်ဟု ထုတ်ပြန်ချက်တွင် ဖော်ပြထားသည်။
- By CNI
- Category: နိုင်ငံရေး
- Hits: 255
CNI News
၂၀၂၄ ခုနှစ်၊ မတ်လ ၁၈
နစကမှ အတည်ပြုပြဋ္ဌာန်းခဲ့သည့် ပြည်သူ့စစ်မှုထမ်းဥပဒေကြောင့် ပြည်သူလူထုများ စိုးရိမ်နေကြရပြီး ၎င်းအပေါ် မည်ကဲ့သို့ ကုစားရမလဲဆိုသည်ကို နိုင်ငံရေးအသိုင်းအဝိုင်းကြား ဆွေးနွေးလျက်ရှိနေသည်။
လက်ရှိတွင် ရန်ကုန်၊ နေပြည်တော် အပါအဝင် အခြားသော မြို့ကြီးများတွင် ပြည်သူ့စစ်မှုထမ်း ဥပဒေအရ ရပ်ကွက်အုပ်ချုပ်ရေးမှူးများမှတဆင့် လူစာရင်းကောက်ယူမှုများ၊ အစည်းအဝေး ခေါ်ယူမှုများ ပြုလုပ်လျက် ရှိနေသည်။
နစကအနေဖြင့် ပြည်သူ့စစ်မှုထမ်းဥပဒေနှင့် ပတ်သက်၍ တိကျသော နည်းဥပဒေများ၊ လမ်းညွန်ချက်များကို ပြည်သူလူထုသိရှိရန် ထုတ်ပြန်ပေးဖို့ လိုအပ်ကြောင်း ပြည်သူ့ပါတီ (PP) မှ ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။
၂၀၀၈ ဖွဲ့စည်းပုံအခြေခံဥပဒေကို တွေ့ရစဉ်
၎င်းက “အဓိက,ကတော့ ဒီစစ်မှုထမ်းဥပဒေဆိုတာက ယေဘုယျအားဖြင့် နိုင်ငံတစ်နိုင်ငံမှာ နိုင်ငံသားတိုင်း နိုင်ငံတော်ကာကွယ်ရေးအတွက် တာဝန်ရှိတယ်ဆိုတော့ ဒီဟာက လက်ခံရမယ့် ကိစ္စပါ။ သို့သော်လည်းပဲ အခြေအနေ အချိန်အခါအပေါ်မှာ မူတည်ပြီးတော့ ပြည်သူကြားထဲမှာ စိုးရိမ်ကြောင်းကြမှု အရမ်းကြီးတယ်။ နောက်တစ်ခုက အုပ်ချုပ်ရေး အားနည်းချက်တွေလည်း ကျနော်တို့က တွေ့တယ်၊ တွေ့တယ်ဆိုတာက တစ်ရွာတစ်ပုဒ်ဆန်းသလို ဖြစ်နေတယ်၊ တစ်နေရာမှာ တစ်မျိုးစီလုပ်နေတော့ ပြီးတော့ ဒီခေတ်က ဆိုရှယ်မီဒီယာ ခေတ်ဆိုတော့ ဖြစ်သမျှသတင်းအားလုံးက လိုင်းပေါ်တက်လာတယ်၊ တက်လာတော့ အလန့်တကြားနဲ့ ရှောင်ကြ ပြေးကြဆိုတာမျိုးတွေ ဖြစ်တယ်။ ဒါကြောင့်မို့လို့ အဓိကကတော့ ဒီစစ်မှုထမ်းဥပဒေနဲ့ ပတ်သက်လို့ တိကျတဲ့ နည်းဥပဒေ ညွန်ကြားချက်တွေကို အများပြည်သူသိရှိအောင် ထုတ်ပြန်ကြေညာပေးဖို့လိုတယ်” ဟု ပြောသည်။
အဆိုပါ ပြည်သူ့စစ်မှုထမ်းဥပဒေအား အကြောင်းပြု၍ ငွေကြေးကောက်ခံမှု၊ ခြိမ်းခြောက်၍ ငွေကြေးတောင်ခံ မှုများ ဖြစ်ပေါ်လာပါက မိမိတို့ ပြည်သူ့ပါတီထံ တိုက်ရိုက် တိုင်တန်းနိုင်ကြောင်း ၎င်းက ဆက်ပြောသည်။
ဦးကိုကိုကြီးက “ပြီးတော့ အုပ်ချုပ်ရေးယန္တရား အဆင့်ဆင့်ကိုလည်း တပြေးညီထဲ တစ်ပုံစံထဲ တိကျတဲ့ လမ်းညွန် ချက်တွေ ညွန်ကြားချက်တွေ သတ်မှတ်ပေးဖို့ လိုတယ်။ မဟုတ်ရင် အောက်ခြေမှာ အလန့်တကြားနဲ့ ငွေကြေး ပိုက်ဆံပေးပြီးတော့ ရှောင်တိမ်းဖို့ ကြိုးစားနေကြတာတွေရော တချို့ဟာကြတော့လည်း ငွေကြေးကောက်ခံတာ တွေရော ကျနော်တို့ ပုံစံမျိုးစုံ ကြားနေရတယ်။ ဒါကြောင့်မို့လို့ ကျနော်တို့ ပြည်သူ့ပါတီဟာလည်းပဲ အကယ်၍ အဲဒါမျိုးခြိမ်းခြောက်တာ ငွေညှစ်တာမျိုးရှိခဲ့ရင် တိုက်ရိုက်တိုင်တန်းနိုင်ဖို့ ဖုန်းနံပတ်တွေ ကျနော်တို့ ပို့ပေးထား ပါတယ်။ အဓိကကတော့ နစကအစိုးရ အနေနဲ့ စစ်မှုထမ်းဥပဒေနဲ့ ပတ်သက်တဲ့ တစ်နိုင်ငံလုံးကို တစ်ပြေးညီ တိကျတဲ့ လမ်းညွန်ချက်၊ ညွန်ကြားချက်တွေ ထုတ်ပြန်ပေးဖို့ လိုတယ်လို့ ကျနော်မြင်ပါတယ်ဗျ” ဟု CNI သတင်း ဌာနသို့ ပြောသည်။
မြန်မာ့တပ်မတော်ကို တွေ့ရစဉ်
ပြည်သူ့စစ်မှုထမ်းဥပဒေအရ အမျိုးသားမှာ အသက် ၁၈ နှစ် ပြည့်ပြီး၍ အသက် ၃၅ နှစ် မပြည့်သေးသော နိုင်ငံသားတိုင်းကို လည်းကောင်း၊ အမျိုးသမီးမှာ အသက် ၁၈ နှစ် ပြည့်ပြီး၍ အသက် ၂၇ နှစ် မပြည့်သေးသော နိုင်ငံသားတိုင်း ပါဝင်သည်။
ထို့အတူ ဆရာဝန်၊ အင်ဂျင်နီယာ၊ စက်မှုလက်မှုပညာ တတ်မြောက်သူ သို့မဟုတ် အခြားသော အတတ်ပညာ တစ်ရပ်ရပ်ဖြင့် အသက်မွေးဝမ်းကျောင်းနေသော ကျွမ်းကျင်သူ အမျိုးသားဖြစ်ပါက အသက် ၁၈ နှစ် ပြည့်ပြီး၍ အသက် ၄၅ နှစ် မပြည့်သေးသော နိုင်ငံသားတိုင်းကိုလည်းကောင်း၊ အမျိုးသမီးဖြစ်ပါက အသက် ၁၈ နှစ် ပြည့် ပြီး၍ အသက် ၃၅ နှစ် မပြည့်သေးသော နိုင်ငံသားတိုင်းကို ဆိုသည်။
ထိုပြည်သူ့စစ်မှုထမ်းဥပဒေအား အကောင်အထည်ဖော် ဆောင်ရာတွင် ပွင့်လင်းမြင်သာမှု လိုအပ်ကြောင်း၊ ထို ဥပဒေအား နားလည်တတ်ကျွမ်းသည့် ပညာရှင်ဖြင့် လုပ်ဆောင်ပါက ပို၍ အဆင်ပြေနိုင်ကြောင်း မွန်ညီညွတ်ရေး ပါတီ (MUP) မှ ပြောရေးဆိုခွင့်ရှိသူ နိုင်သန်းရွှေက CNI သတင်းဌာနသို့ ပြောသည်။
၎င်းက “ဒီဥပဒေကို ထုတ်ပြန်လိုက်ပြီဆိုတာနဲ့ လူထုကြားထဲမှာ တော်တော်လေး ရိုက်ခတ်သွားတယ်ဆိုတာ လူ အများသိတယ်လေ။ ဒါပေမဲ့ တစ်ခုတော့ ရှိတယ် ဒီဥပဒေကို ပြဋ္ဌာန်းလိုက်ပြီဆိုတာနဲ့ လွှတ်တော်က ပြဋ္ဌာန်း လို့ရှိရင် တစ်မျိုးပေါ့နော်၊ အခုက စစ်ကောင်စီကနေ ပြဋ္ဌာန်းတယ်ဆိုတော့ တစ်မျိုးဖြစ်နေတော့ နောက်တစ်ခုက ကုစားတဲ့နည်းလမ်းက ဥပဒေမဖြစ်ခင် ပြည်သူလူထုကြားထဲမှာ ချပြပေးရမယ်။ ဒီဥပဒေဖြစ်ပြီး ဆိုလို့ရှိရင်လည်း ပြည်သူလူထုတွေကို နားလည်အောင် ရှင်းပြရမယ်။ ဒါတစ်ချက်ပေါ့။ နောက်ပြီးတော့ ဒီဥပဒေကို အကောင် အထည်ဖော်တဲ့နေရာမှာ နည်းဥပဒေတွေ လိုအပ်လာတယ်။ နောက်ပြီးတော့ ညွန်ကြားတွေကလည်း ဒီဥပဒေကို မကျော်လွန်ဖို့ နောက်ပြီးတော့ အကောင်အထည်ဖော်တဲ့ နေရာမှာလည်း ပွင့်လင့်မြင်သာမှုရှိဖို့ နောက်တစ်ခု တစ်ခုခု လွဲချော်မှားယွင်းခဲ့လို့ရှိရင် တိုင်းကြားမယ့် နေရာတွေ အရေးယူမယ့်နေရာတွေရှိဖို့ လိုအပ်တယ်။ လူထု ကြားထဲမှာ ဒီဥပဒေကို တကယ့်နားလည်တဲ့ ဥပဒေပညာရှင်တွေနဲ့ လုပ်လို့ရှိရင်တော့ ပိုပြီးတော့ အဆင်ပြေမယ် ထင်တယ်” ဟု ပြောသည်။
အဆိုပါ ပြည်သူ့စစ်မှုထမ်းဥပဒေနှင့် ပတ်သက်၍ နည်းဥပဒေ အသေးစိတ်အား ထုတ်ပြန်ခြင်း မရှိသေးသလို လူထုများအကြား အမျိုးမျိုးသော ကောလာဟလများလည်း ပျံ့နှံ့လျက်ရှိနေပြီး စိုးရိမ်လျက်ရှိနေကြသည်။
တချို့သော အာဏာပိုင်အဖွဲ့အစည်းများသည် ပြည်သူ့စစ်မှုထမ်းဥပဒေကို အကြောင်းပြု၍ ငွေကြေးတစ်စုံတစ်ရာ တောင်းခံခြင်းများ ပြုလျက်ရှိနေသည်ဟု ရပ်ကွက်နေ ပြည်သူများက ပြောသည်။
- By CNI
- Category: နိုင်ငံရေး
- Hits: 134
CNI News
၂၀၂၄ ခုနှစ်၊ မတ်လ ၁၇
မိမိတို့ ၇ ဖွဲ့ထိန်းချုပ်ထားသည့် နယ်မြေအသီးသီးမှာ မိမိတို့ကိုယ်ပိုင်ပြဋ္ဌာန်းခွင့်၏ အုပ်ချုပ်ရေးစနစ်ဖြင့် စတင် အုပ်ချုပ်သွားမည်ဟု ရှမ်းပြည် ပြန်လည်ထူထောင်ရေးကောင်စီ (RCSS) ဥက္ကဋ္ဌ ဗိုလ်ချုပ်ကြီးယွက်စစ်က ပြောသည်။
တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ထိုးထား သည့် တိုင်းရင်းသား လက်နက်ကိုင် ၇ ဖွဲ့သည် ငြိမ်းချမ်းရေး လုပ်ငန်းစဉ်များနှင့်ပတ်သက်ပြီး အစည်းအဝေး တစ်ရပ်ကို ထိုင်းနိုင်ငံ၊ ချင်းမြိက်မြို့မှာ ကျင်းပလျက်ရှိနေသည်။
အဆိုပါ အစည်းအဝေးကို မတ်လ ၁၇ ရက်မှ ၁၉ ရက်နေ့အထိ ကျင်းပနေပြီး ဗိုလ်ချုပ်ကြီးယွက်စစ်က မိန့်ခွန်းပြောစဉ် အထက်ပါအတိုင်း ပြောသွားခဲ့သည်။
ဗိုလ်ချုပ်ကြီးယွက်စစ်က “ မိမိတို့ ၇ ဖွဲ့ရဲ့ ထိန်းချုပ်တဲ့ နယ်မြေအသီးသီးတွေမှာ မိမိတို့ ကိုယ်ပိုင်ပြဋ္ဌာန်းခွင့်ရဲ့ ကိုယ်ပိုင်အုပ်ချုပ်ရေးစနစ်နဲ့ စတင်အုပ်ချုပ်သွားရမှာ ဖြစ်ပါတယ်။ မိမိတို့ ဒေသမှာ ရှိနေကြတဲ့ လူထုတွေအတွက် အုပ်ချုပ်ရေး၊ လုံခြုံရေး၊ စီးပွါးရေး၊ ပညာေးရ၊ ကျန်းမာရေး၊ စားဝတ်နေရေး အပါအဝင် အခြားဝန်ဆောင်မှု လုပ်ငန်းတွေကို ဆောင်ရွက်သွားမှာ ဖြစ်ပါတယ်။ ဖက်ဒရယ်ဒီမိုကရေစီပြည်ထောင်စု ကို တဆင့်ပြီးတဆင့် တည်ဆောက်သွားရမှာဖြစ်ပါတယ်။ တဖက်တွင်လည်း မိမိတို့ ၇ ဖွဲ့ကြား မှာ တူတာတွဲလုပ် မတူတာခွဲလုပ်ဆိုတဲ့ မူအတိုင်း ဆောင်ရွက်သွားဖို့လိုပါတယ်”ဟု ပြောသည်။
၂၀၂၄ ခုနှစ်၊ မတ်လ ၁၇ ရက်မှ ၁၉ ရက်အထိ အပစ်ရပ် (၇)ဖွဲ့ မျက်နှာစုံညီ အစည်းအဝေးတက်ရောက်နေသူများကို တွေ့ရစဉ်
ကချင်လွတ်လပ်ရေးတပ်မတော်(KIA)ဒုက္ကဋ္ဌ ဒုဗိုလ်ချုပ်ကြီး ဂွမ်မော်ကလည်း ၂၀၂၅ ခုနှစ်တွင် တိုင်းရင်းသားများ သည် ဖက်ဒရယ်ထက် ကျော်လွန်းသည့် စဉ်းစားမှုများကို လုပ်လာမည်ဟု ဗိုလ်ချုပ်မှူးကြီးမင်းအောင်လှိုင်နှင့် ဒေါ်အောင်ဆန်းစုကြည်တို့ဖြင့် တွေ့ဆုံစဉ်က ပြောကြားထားသည်။
ထို့ကြောင့် တိုင်းရင်းသား လက်နက်ကိုင်များသည် ဖက်ဒရယ်ကနေ ကွန်ဖက်ဒရေးရှင်း (ကွန်ဖက်ဒရိတ်)သို့ တဖြေးဖြေး ပြောင်းလဲ စဉ်းစားလာနေသည်ကို တွေ့လာရသည်ဟု ငြိမ်းချမ်းရေးလုပ်ငန်းစဉ်တွင် ပါဝင်နေသူ တစ်ဦးက ထောက်ပြသည်။
ရက္ခိုင့်တပ်တော်(AA)ကတော့ UWSA “ဝ”ထက် မနိမ့်သောအဆင့်အတန်းမျိုး သို့မဟုတ် ကွန်ဖက်ဒရေးရှင်း အဆင့်ကို ရယူမည်ဟု ကြွေးကြော်ထားသည်။
ရှမ်းပြည်ပြန်လည်ထူထောင်ရေးကောင်စီ(RCSS) ဥက္ကဋ္ဌ ဗိုလ်ချုပ်ကြီးယွက်စစ်နှင့် ကရင်အမျိုးသား အစည်းအရုံး (KNU)ဥက္ကဋ္ဌဟောင်း စောမူတူးစေးဖိုးလည်း တက်ရောက်ခဲ့သည်။
- By CNI
- Category: နိုင်ငံရေး
- Hits: 203
CNI News
၂၀၂၄ ခုနှစ်၊ မတ်လ ၁၅
မြန်မာနိုင်ငံတွင် လက်နက်ကိုင်ဆောင်ထားသူများက စစ်မှုထမ်းဆောင်ရန် မတူညီသော လုပ်ငန်းစဉ်များဖြင့် ဖော်ဆောင်နေကြခြင်းကြောင့် လူငယ်များ၏ အနာဂတ်များ ပျောက်ဆုံးလာနေသည်ဟု လူငယ်များနှင့် နိုင်ငံရေး အသိုင်းအဝိုင်းကြား ပြောဆိုလာကြသည်။
လတ်တလော နစက၏ ပြည်သူ့စစ်မှုထမ်းဥပဒေနှင့် တိုင်းရင်းသားလက်နက်ကိုင် အဖွဲ့အစည်းများ၏ စစ်သားခေါ်ယူမှုများကြောင့် လူငယ်အများစုသည် စိုးရိမ်နေကြသလို ပြည်ပသို့ အများအပြား ထွက်ခွာမှုများ ရှိနေကြောင်း သိရသည်။
အလားတူ မတူညီသော လက်နက်ကိုင်ထားသည့် အဖွဲ့အစည်းများ၏ စစ်မှုထမ်းရန် ဆင့်ခေါ်ခြင်းကို ရှောင်လွှဲမရ သော လူငယ်များသည်လည်း ယခင်က မျှော်မှန်းခဲ့သော အနာဂတ်များ ပျောက်ဆုံးလာခဲ့သည်။
လူငယ်များ အနာဂတ်ပျောက်ဆုံးရခြင်းမှာ တိုင်းပြည်ကို အုပ်ချုပ်မည့် ခေါင်းဆောင်၏ စီမံခန့်ခွဲမှုနှင့် သက်ဆိုင် ကြောင်း၊ ယခင်ကတည်းက ဖြစ်လာသည့်ကိစ္စဖြစ်ကြောင်း ပြည်သူ့လွှတ်တော်အမတ်ဟောင်း ဦးစိန်ဝင်း(မအူပင်) က CNI သတင်းဌာနသို့ ပြောသည်။
လုံခြုံရေးယူထားသည့် မြန်မာ့တပ်မတော်သား တစ်ဦးကိုတွေ့ရစဉ်
၎င်းက “ဟိုတုန်းကတည်းက ဖြစ်တဲ့အကြောင်းတရားတွေကို ပြန်ပြီးတော့ စစ်လိုက်တဲ့အခါမှာ ဘာကြောင့် ဒီလို တွေ ဖြစ်တာလဲဆိုတော့ လူငယ်တွေရဲ့ အနာဂတ်ကို အလေးထားရမှန်း မသိဘူး။ တက်လာတဲ့ အစိုးရက၊ တက်လာတဲ့ အစိုးရက စီမံကိန်းတွေကို အိမ်ဆောက်မယ်၊ လမ်းဆောက်မယ်၊ တံတားခင်းမယ်၊ ဒါပဲ စိတ်ဝင်စား တယ်၊ ပြည်သူတွေရဲ့ အသိပညာတိုးတက်အောင် လူငယ်တွေရဲ့ အနာဂတ် ပညာရေး၊ နည်းပညာပိုင်းဆိုင်ရာတွေ ဒါတွေကို မလုပ်နိုင်ဘူး။ အဲဒီကတည်းက တစ်လတစ်လကို အန်ကယ် သိသလောက်ဆိုရင် ယိုးဒယားမှာဆိုရင် အန်ကယ်တို့ လူပေါင်း ၃ သန်းလောက်ရှိတယ်။ အခုလောက်ဆို ၅ သန်းလောက်တောင် ဖြစ်နေပြီ။ မြန်မာနိုင်ငံ ကနေ တစ်လတစ်လကို ထွက်သွားနေတာ ၃ သောင်း ပတ်ဝန်းကျင်လောက်ရှိတယ် အဲဒီတုန်းက ဖတ်ထားတယ်။ လူငယ်တွေက အနာဂတ်အတွက် အရမ်းအရေးကြီးတယ်။ လူငယ်တွေ အသိမှားတာသည် လူငယ်တွေ အပြစ် မဟုတ်ဘူး။ အုပ်ချုပ်တဲ့ လူပေါ်မှာ အပြစ်။ လူငယ်တွေ အလုပ်လုပ်ကိုင်ခွင့် မရှိတာသည် လူငယ်တွေ အပြစ် မဟုတ်ဘူး။ အဲဒီနိုင်ငံမှာ အုပ်ချုပ်တဲ့ လူရဲ့ ခေါင်းဆောင်တွေရဲ့ စီမံခန့်ခွဲမှု အားနည်းလို့ ဒီလိုဖြစ်တာ။ အဲဒီတော့ လူငယ်တွေ အနာဂတ်ပျောက်တယ်၊ မှန်တယ်။ အနာဂတ် မပျောက်အောင် အန်ကယ်တို့ကတော့ ရတဲ့ဖက်ကနေ တတ်နိုင်သလောက် ပြည်သူနဲ့ တစ်သားတည်းနေပြီးတော့ ဆောင်ရွက်ပေးပါတယ်” ဟု ပြောသည်။
ယခင်က တိုင်းရင်းသားလက်နက်ကိုင် အဖွဲ့အစည်းများ ထိန်းချုပ်ရာဒေသများတွင် လူသစ်စုဆောင်းမှုများကြောင့် လူငယ်အများစုမှာ ရန်ကုန်၊ မန္တလေး၊ စစ်ကိုင်း စသည့် မြို့ကြီးများသို့ ထွက်ပြေးတိမ်းရှောင်ကြသလို နီးစပ်ရာ နိုင်ငံသို့ ထွက်ခွာကြရသည်။
ထို့နောက် ရန်ကုန်၊ နေပြည်တော်တို့တွင် နစကမှ ပြည်သူ့စစ်မှုထမ်းဥပဒေ ပြဋ္ဌာန်းပြီးနောက် စစ်မှုထမ်းနိုင်သည့် အသက်အရွယ် အပိုင်းအခြားအရ လူငယ်များကို ရပ်ကွက်အုပ်ချုပ်ရေးမှူးများမှတဆင့် စာရင်းကောက်ယူမှုများ ရှိနေသည်။
တိုင်းရင်းသားလက်နက်ကိုင် အဖွဲ့အစည်းများ စစ်သားခေါ်ယူမှုမှာ မိမိတို့၏ ရပ်ရွာ၊ ဒေသများကို ကာကွယ်နိုင်ရန် ခေါ်ယူခြင်းဖြစ်ကြောင်း ပအိုဝ်းအမျိုးသားဖက်ဒရယ်ကောင်စီ (PNFC) မှ အတွင်းရေးမှူး - ၂ ခွန်ဝေထူးက CNI သတင်းဌာနသို့ ပြောသည်။
စစ်သင်တန်းတက်နေကြစဉ်
၎င်းက “စစ်ကောင်စီ အခုစစ်မှုထမ်းဥပဒေပြဋ္ဌာန်းပြီး စစ်သားခေါ်ယူတဲ့ ကိစ္စသည် ယနေ့မှ လုပ်တာမျိုး မဟုတ် ဘူး။ ခေတ်အဆက်ဆက်က တိုင်းရင်းသားနယ်မြေ၊ တိုင်းရင်းသားဒေသတွေမှာ လိုအပ်ရင် လိုအပ်သလို ကြုံရင် ကြုံသလို မိန်းမ၊ ယောကျ်ား၊ ကလေးလူကြီး မရှောင်ဘဲနဲ့ ပေါ်တာဖမ်းတယ်ပေါ့ခင်ဗျာ၊ ယနေ့ စစ်ကောင်စီသည် ပြည်သူ့စစ်မှုထမ်းဥပဒေကို ပြဋ္ဌာန်းလိုက်ခြင်းအားဖြင့် ဒါတရားဝင်ပေါ်တာဖမ်းလို့ရပြီလို့ကြေညာလိုက်တာနဲ့ အတူတူပဲဖြစ်တယ်။ စစ်ကောင်စီက တရားဝင်ပေါ်တာဖမ်းတဲ့ လုပ်ငန်းစဉ်ရဲ့ ရည်ရွယ်ချက်ဟာ ပြည်သူအချင်းချင်း သွေးမြေကျမယ့် ရည်ရွယ်ချက်ဖြစ်တယ်၊ ပြည်သူအချင်းချင်းကို တိုက်ခိုက်သတ်ဖြတ်ရမယ့် ရည်ရွယ်ချက်တွေ ဖြစ်တယ်ဆိုတာကို အဓိက highlight ပေးပြီးပြောလိုတယ်။ ဗမာမဟုတ်သော တိုင်းရင်းသားဒေသတွေမှာ တိုင်းရင်းသား လက်နက်ကိုင် အဖွဲ့အစည်းတွေ စစ်သားခေါ်ယူတဲ့ ကိစ္စသည် သူ့ရဲ့ရည်ရွယ်ချက်အပေါ်မှာ မူတည် တယ်။ အဲဒါက ဘာလဲဆိုတော့ ဒီအာဏာရှင် ခေတ်အဆက်ဆက်သော စစ်အာဏာရှင် လူတစ်စုတွေက တိုင်းရင်းသားဒေသတွေမှာ လာရောက်တိုက်ခိုက် စိုးမိုးအနိုင်ကျင့်တဲ့အပေါ်မှာ ဖိနှိပ်ခံတိုင်းရင်းသားတွေအနေနဲ့ မိမိတို့ရဲ့ မြို့၊ မိမိတို့ရဲ့ ဒေသ၊ မိမိတို့ရဲ့ ရပ်ရွာကို ပြန်လည်ကာကွယ်နိုင်ဖို့အတွက် စစ်ပညာတွေကို သင်ကြားပေး တာ ဖြစ်တယ်။ စစ်ပညာတွေကို သင်ယူတတ်မြောက်ပြီးတော့မှ မိမိအတွက်လုံခြုံရေး၊ မိမိရပ်ရွာ၊ မိမိမြို့လုံခြုံရေး၊ မိမိဒေသလုံခြုံရေးအတွက် မိမိကိုယ်ကိုယ်ကာကွယ်ရန် ရည်ရွယ်ချက်နဲ့ ဒါကျနော်တို့ ခေါ်ယူကြတာ ဖြစ်တယ်လို့ ကျနော်ကတော့ ဒီလို ပြန်ပြီးတော့ တင်ပြလိုပါတယ်” ဟု ပြောသည်။
လက်ရှိ မြန်မာနိုင်ငံတွင် လက်နက်ကိုင်ထားသော အဖွဲ့အစည်းပေါင်းစုံက လူငယ်များကို စစ်မှုမထမ်း မနေရ စစ်သားစုဆောင်းမှုများရှိနေခြင်းကြောင့် လူငယ်များသည် ၎င်းတို့ဖြစ်ချင်ခဲ့သော အနာဂတ်ရည်မှန်းချက်များ အကောင်အထည် ဖော်နိုင်ရေးအတွက်လည်း လမ်းစများ ပျောက်ကွယ်လာနေသည်။
လက်ရှိ မြန်မာနိုင်ငံတွင် မြန်မာ့တပ်မတော် အပါအဝင် တိုင်းရင်းသား လက်နက်ကိုင် အဖွဲ့အစည်းများ၊ နယ်ခြား စောင့်တပ်များ၊ ပြည်သူ့စစ်များ၊ ပြည်သူ့ကာကွယ်ရေးတပ်ဖွဲ့(PDF)များ စသည့် မတူညီသော လက်နက်ကိုင်ထား ကြသည့် အဖွဲ့အစည်းပေါင်းများစွာ ရှိနေသည်။
အားလုံးကလည်း မြန်မာနိုင်ငံအတွင်းရှိ လူငယ်များနှင့် စစ်မှုထမ်းနိုင်သည့် အရွယ်ရှိသူများကို မတူညီသော အကြောင်းအမျိုးမျိုးကို ပြ၍ လူသစ်စုဆောင်းမှုများ ပြုလုပ်လျက်ရှိနေသည်။
- By CNI
- Category: နိုင်ငံရေး
- Hits: 638
CNI News
၂၀၂၄ ခုနှစ်၊ မတ်လ ၁၄
ရက္ခိုင့်တပ်တော် (AA) အနေဖြင့် ထိန်းချုပ်နယ်မြေများလာသော်လည်း နစကနှင့် ငြိမ်းချမ်းရေးလုပ်ငန်းစဉ်များ ဆွေးနွေးကာ တည်ငြိမ်အေးချမ်းသည့် အခင်းအကျင်းကို ဖန်တီးရမှာဖြစ်ကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။
ရခိုင်ပြည်နယ်နှင့် ချင်းပြည်နယ်အတွင်းက မြို့အချို့ကို AA က ထိန်းချုပ်ထားသော်လည်း မြန်မာ့တပ်မတော်တွင် လေကြောင်းတိုက်ခိုက်မှု ရှိနေကြောင်း၊ တည်ငြိမ်သည့် အနေအထားရှိပြီးကာမှ အုပ်ချုပ်မှု ယန္တရားကို ထူထောင်၍ ရကြောင်း ၎င်းက ပြောသည်။
ဒေါက်တာ အေးမောင်က “အုပ်ချုပ်မှု ယန္တရားတစ်ခုကို ထူထောင်တယ်ဆိုတာ တည်ငြိမ်မှဗျ အခုရန်ကုန်ကိုကြည့် လေ တည်ငြိမ်နေတာကိုး။ မတည်ငြိမ်ဘဲနဲ့ တရားဥပဒေ မစိုးမိုးဘဲနဲ့ ဘယ်လိုမှ အုပ်ချုပ်ရေးယန္တရားကို မထူ ထောင်နိုင်ဘူး။ ရှမ်းပြည်အထူးဒေသတွေကို ပြန်ကြည့်ပေါ့ဗျာ၊ “ဝ”တို့၊ မိုင်းလားတို့ ဘာကြောင့် အုပ်ချုပ်မှု ယန္တရားကို ထူထောင်နိုင်သလဲဆိုတာ တည်ငြိမ်အေးချမ်းတယ်၊ တရားဥပဒေစိုးမိုးတယ်၊ ဘာကြောင့် တည်ငြိမ် အေးချမ်းသလဲ၊ ဘာကြောင့် တရားဥပဒေစိုးမိုးသလဲဆိုရင် ငြိမ်းချမ်းမှုကြောင့်၊ ဗိုလ်ချုပ်ကြီးခင်ညွန့်တို့ ဗိုလ်ချုပ်မှူး ကြီး ဦးသန်းရွှေတို့ လက်ထက်ကသာ ငြိမ်းချမ်းမှု မဖော်ဆောင်နိုင်ခဲ့ဘူးဆိုရင် “ဝ” ဒေသ နှစ် ၃၀ အခုလို ထူထောင်နိုင်မယ့်၊ ထူထောင်လို့ရမယ့် အခင်းအကျင်း မပေါ်နိုင်ဘူးဗျ။ ဘာလို့ဆို ဝေဟင်စိုးမိုးမှုက မြန်မာ့ တပ်မတော်မှာ ရှိတာကိုး။ ဆိုတော့ ခုနက မတည်ငြိမ်မှုဆိုတဲ့ အခင်းအကျင်းတွေ မဖြစ်အောင် တည်ငြိမ်တဲ့ အခင်းအကျင်းဖြစ်အောင် ငြိမ်းချမ်းမှုရဲ့ ပထမဆုံးခြေလှမ်းဖြစ်တဲ့ အပစ်အခတ်ရပ်စဲရေးဆိုတဲ့ လက်နက်ကိုင်အဖွဲ့ နှစ်ဖွဲ့ရဲ့ သဘောတူချက်ပေါ့၊ နိုင်ငံရေးအရဖြစ် နောက်တက်လာတဲ့ နိုင်ငံရေးအစိုးရ ပေါ်လာမှပဲ ခင်ဗျားတို့ ဆွေးနွေးကြပါဆိုတဲ့ တပ်မတော်တွေ တနည်းအားဖြင့် မြန်မာ့တပ်မတော်နဲ့ “ဝ”၊ မိုင်းလားတပ်တို့ပေါ့ဗျာ ညှိနှိုင်းမှု ကြောင့် လက်ရှိအခင်းအကျင်း အသီးအပွင့်ကို တွေ့ရတာကိုး” ဟု CNI သတင်းဌာနသို့ ပြောသည်။
ရခိုင်ပြည်နယ်ထဲမှာ ဗုံးကြဲခံရ၍ ဖျက်စီးနေသော အဆောက်အအုံကိုတွေ့ရစဉ်
လက်ရှိ ကိုးကန့်တပ် (MNDAA)၊ တအာင်းတပ် (TNLA) တို့သည်လည်း ဟိုင်ဂင်သဘောတူညီချက်ဖြင့် မြန်မာ့တပ်မတော်နှင့် ငြိမ်းချမ်းရေးဆွေးနွေးကာ အပစ်ရပ်ခဲ့ကြောင်း၊ အုပ်ချုပ်ရေး၊ ဖွံ့ဖြိုးရေးများ စတင်ရေး မြန်မာ့တပ်မတော်နှင့် စကားပြောဆိုရန် လိုအပ်ကြောင်း ၎င်းက ပြောသည်။
မြောက်ပိုင်းသုံးဖွဲ့(MNDAA-TNLA-AA)၏ ၁၀၂၇ စစ်ဆင်ရေး စတင်ခဲ့ပြီးနောက်ပိုင်း ရခိုင်ပြည်နယ်အတွင်းရှိ ပေါက်တော၊ ကျောက်တော်၊ မြေပုံ၊ မြောက်ဦး၊ တောင်ပြိုလက်ဝဲ၊ မင်းပြား၊ ပုဏ္ဏားကျွန်း၊ ရမ်းဗြဲ အပါအဝင် ချင်းပြည်နယ်အတွင်းရှိ ပလက်ဝ၊ ဆမီးတို့ကို ရက္ခိုင့်တပ်တော် (AA) က သိမ်းပိုက်ထားသည်။
နှစ်ဖက်တိုက်ပွဲကြောင့် ရခိုင်ဒေသတွင်း လူထုများ စားဝတ်နေရေး အခက်အခဲ၊ လမ်းပန်းဆက်သွယ်ရေး အခက်အခဲများ ကြုံတွေ့နေကြရကြောင်း၊ လက်ရှိတိုက်ပွဲမှာ ရခိုင်မြောက်ပိုင်းကနေ တောင်ပိုင်းသို့ ကူးစက် လာပြီဖြစ်ကြောင်း ညီညွတ်သောတိုင်းရင်းသားလူမျိုးများမဟာမိတ်(UNA)မှ ဦးမျိုးကျော်က CNI သတင်းဌာနသို့ ပြောသည်။
AA တပ်ဖွဲ့ကိုတွေ့ရစဉ်
၎င်းက “တရုတ်မှာ ညီနောင်သုံးဖွဲ့ကနေပြီးတော့ အပစ်ရပ်တာတို့ လက်မှတ်ထိုးတာတို့ ရှိတယ်။ ဒါပေမဲ့ ကျနော် သိသလောက်က ရခိုင်မှာ အဲဒီဟာနဲ့ မဆိုင်ဘူးနဲ့တူတယ်။ ပုံမှန်ပစ်တာ ခတ်တာတို့ လေယာဉ်နဲ့ လာကြဲတာတို့ ဒါမျိုးတွေက ကြားနေရတာပေါ့နော်၊ အခုဆိုရင် ရခိုင်ပြည်မြောက်ဖက်မှာဆိုရင် တော်တော်များများတော့ သူတို့ ဆုတ်သွားတာတွေ့တယ်၊ ဒါပေမဲ့ တောင်ပိုင်းကို စစ်မီးကူးတာပေါ့ဗျာ၊ စစ်မီးကူးတယ်၊ အခုရမ်းဗြဲဆိုရင် မြို့က ကုန်သလောက်ဖြစ်နေပြီ။ အဲဒီကနေ တဆင့်ဆိုရင် ကျောက်ဖြူမြို့ အနီးအနားမှာရော တိုက်ပွဲတွေဖြစ်တော့ အခု မြို့ကလူတွေပါ ပြေးနေကြတဲ့ဟာတွေ တွေ့နေရတယ်ပေါ့နော်” ဟု ပြောသည်။
AA အနေဖြင့် ၎င်းတို့၏ နိုင်ငံရေးရည်မှန်းချက်ဖြစ်သည့် ကွန်ဖက်ဒရေးရှင်း(ကွန်ဖက်ဒရိတ်)ကို ရရှိရန် လုပ်ဆောင် သွားမည်ဖြစ်ကြောင်း ပြောဆိုထားသလို ၎င်းတို့ သိမ်းပိုက်ထားသော နယ်မြေများကိုလည်း အုပ်ချုပ်ရေး၊ ဥပဒေ ပြုရေး၊ တရားစီရင်ရေးများကို ဖော်ဆောင်လာနိုင်ကြောင်း ဒေသခံများက ပြောသည်။
လက်ရှိ ရခိုင်ပြည်နယ်တွင် မြန်မာ့တပ်မတော်နှင့် ရက္ခိုင့်တပ်တော် (AA) တို့အကြား တိုက်ပွဲများ အပြင်းအထန် ဖြစ်ပွားလျက်ရှိနေပြီး ဒေသခံလူထုများလည်း ဘေးလွတ်ရာသို့ ထွက်ပြေးတိမ်းရှောင်လျက် ရှိနေသည်။