CNI International News

ဆိုးလ်၊ ဒီဇင်ဘာ ၃

တောင်ကိုရီးယားနိုင်ငံ၏ အမျိုးသားလုံခြုံရေး ဒါရိုက်တာဟောင်း တစ်ဦးကို စနေနေ့တွင် ဖမ်းဆီးခဲ့သည်ဟု The Washington Post က ရေးသား ဖော်ပြခဲ့သည်။

၂၀၂၀ ခုနှစ် မြောက်ကိုရီးယား ရေပိုင်နက်အနီး တောင်ကိုရီးယား ငါးလုပ်ငန်း အရာရှိတစ်ဦး အသတ်ခံရမှုနှင့် ပတ်သက်၍ ဖုံးကွယ်ထားမှုအတွက် ယခုကဲ့သို့ ဖမ်းဆီးခဲ့ခြင်း ဖြစ်သည်။

ဒါရိုက်တာဟောင်း ဆုဟွန်း (Suh Hoon)ကို စနေနေ့ မနက်ပိုင်းတွင် ဖမ်းဆီးခဲ့ခြင်းဖြစ်သည်။

အဆိုပါ ဖြစ်စဉ်သည် လက်ရှိ သမ္မတ ယွန်ဆော့ရွဲ(Yoon Suk Yeol)၏ ယခင် သမ္မတဟောင်း လက်ထက် နယ်စပ်ဒေသမှ သတ်ဖြတ်မှုများအပေါ် စုံစမ်းစစ်ဆေးမှုများ ပြုလုပ်ချိန်တွင် ပေါ်ပေါက်လာခြင်း ဖြစ်သည်။

ထိုသို့ စုံစမ်း စစ်ဆေးမှုများကြောင့် တောင်ကိုရီးယားသည် မြောက်ကိုရီးယားနှင့် ဆက်ဆံရေး တိုးတက်စေဖို့ အတွက် အလျော့ပေးမှု များစွာ ပြုလုပ်ခဲ့သည်ဆိုသော ဝေဖန်မှုများလည်း ရှိလာခဲ့သည်။

တောင်ကိုရီးယား ငါးလုပ်ငန်းအရာရှိ လီဒေဂျွန်း၏ မိသားစု၀င်များ အမှန်တရားပေါ်ပေါက်ရေး တောင်းဆိုနေစဉ် (Yonhap)

ထို့ကြောင့် သမ္မတဟောင်း မွန်ဂျေအင်းက ဆုဟွန်းအား ဖမ်းဆီးမှုကို ပြင်းပြင်းထန်ထန် ကန့်ကွက်ခဲ့သည်။

ယွန်ဆော့ရွဲ အစိုးရ၏ လုပ်ဆောင်မှုများသည် အခြေအမြစ်မရှိသော စွပ်စွဲမှုများနှင့် နိုင်ငံရေးအရ အထိအခိုက် မခံသည့် လုံခြုံရေးကိစ္စများကို ဖြစ်ပေါ်လာစေသည်ဟုလည်း တုန့်ပြန်ထားသည်။

သက်သေ အထောက်အထားများကို မဖျက်စီးခင် ဖမ်းဆီးနိုင်ရေးအတွက် ဆုဟွန်း၏ ဖမ်းဝရမ်းကို ဆိုးလ်ဗဟို တရားရုံးက ထုတ်ပေးခဲ့ခြင်းဖြစ်ကြောင်း၊ ထိုကိစ္စနှင့်ပတ်သက်၍ သတင်းထောက်များ၏ မေးမြန်းမှုကို ဆုဟွန်းက ဖြေကြားရန် ငြင်းဆန်ထားသည်။

အသက် ၄၇ နှစ်အရွယ် တောင်ကိုရီးယား ငါးလုပ်ငန်းအရာရှိ လီဒေဂျွန်း (Lee Dae-Jun) သည် ၂၀၂၀ ခုနှစ်၊ စက်တင်ဘာလတွင် ကိုရီးယားအနောက်ပင်လယ် နယ်စပ်အနီး မျှောပါသွားခဲ့ခြင်းဖြစ်ကြောင်း၊ ၎င်းကို ကယ် တင်ရန်အတွက် ထိုစဉ်က မွန်ဂျေအင်း အစိုးရဘက်မှ ကြိုးစားအားထုတ်ခဲ့ခြင်း မရှိဟု တောင်ကိုရီးယားစာရင်း စစ်နှင့် စုံစမ်းစစ်ဆေးရေး ဘုတ်အဖွဲ့၏ (South Korea’s Board of Audit and Inspection) ယခင် စုံစမ်းမှုတွင် ဖော်ပြထားသည်။

တောင်ကိုရီးယား သမ္မတ ယွန်ဆော့ရွဲကိုတွေ့ရစဉ် (GETTY IMAGES)

နောက်ပိုင်းတွင် လီသည် မြောက်ကိုရီးယားတပ်ဖွဲ့၏ ဆိုးဆိုးရွားရွား ပစ်သတ်ခြင်းကို ခံခဲ့ရသော်လည်း အစိုးရ တာဝန်ရှိသူများက လီသည် မိသားစုအရေးနှင့် လောင်းကစား အကြွေးများကြောင့် မြောက်ကိုရီးယားကို ခိုလှုံရန် ကြိုးပမ်းခဲ့ခြင်း ဖြစ်သည်ဟု လူသိရှင်ကြား လိမ်ညာထုတ်ပြန်ခဲ့ကြောင်း SKBOAAI ၏ စုံစမ်းမှုတွင် ဖော်ပြသည်။

တောင်ကိုရီးယား အစိုးရဘက်မှ ထုတ်ပြန်ချက်များမှ သက်သေများနှင့် မကိုက်ညီဟုလည်း ဘုတ်အဖွဲ့၏ အောက်တိုဘာလ ထုတ်ပြန်မှုတွင် ဖော်ပြထားသည်။

အဖမ်းခံခဲ့ရသော ဆုဟွန်းသည် ဒါရိုက်တာမဖြစ်ခင် ထောက်လှမ်းရေး အရာချုပ်အဖြစ် ဆောင်ရွက်ခဲ့သူ ဖြစ်ပြီး လီ အသတ်ခံရမှုနှင့် ပတ်သက်သည့် ထောက်လှမ်းရေး မှတ်တမ်းများကို ဖျက်ဆီးရန် အစိုးရအဖွဲ့၊ ကာကွယ်ရေးဌာန နှင့် အမျိုးသားထောက်လှမ်းရေးအဖွဲ့တို့ကို အမိန့်ပေးခဲသည်ဟု စွပ်စွဲခံထားရသည်။

ထိုအခြေအနေများကြောင့် မွန်ဂျေအင်း အစိုးရသည် မြောက်ကိုရီးယားနှင့် အဆင်ပြေစေရေးအတွက် အစွမ်းကုန် အလျော့ပေးသည့် နည်းလမ်းများကို အသုံးပြုခဲ့သည်ဟုလည်း ဝေဖန်သူများက ထောက်ပြသည်။

Source: Washingtonpost

CNI International News

မက်ဒရစ်၊ ဒီဇင်ဘာ ၃

စပိန်ပြည်ထဲရေးဝန်ကြီး Fernando Grande-Marlaska (ဖာရန်ဒို ဂရန်ဒီ- မာလစကာ)က ၎င်း၏နိုင်ငံရှိ ပစ်မှတ်များသို့ ပေးပို့သော စာအိတ်ဗုံးများသည် ယူကရိန်းရှိ ရုရှား၏စစ်ပွဲနှင့် ဆက်နွှယ်နေနိုင်ကြောင်း ပြောကြားခဲ့သည်ဟု Aljazeera သတင်းတွင်ဖော်ပြသည်။

စာအိတ်ဗုံးခြောက်ခုသည် ရုရှားကျူးကျော်စစ်နှင့် ပတ်သက်နေနိုင်သည်ဟု ဂရန်ဒီ-မာလက်စ်ကာက ဥရောပမှ ဝန်ကြီးများနှင့် ဥရောပကော်မရှင်ထံပေးပို့ခဲ့သောစာတွင် ဖော်ပြထားသည်ဟု ဥရောပသတင်း (Europa Press) တွင် သောကြာနေ့က ဖော်ပြသည်။ ပြည်ထဲရေးဝန်ကြီးဌာနကလည်း အဆိုပါသတင်းကို အတည်ပြုသည်။

စာအိတ်ဗုံးခြောက်ခုသည် စပိန်နိုင်ငံရေးသမားများ၊ ယူကရိန်းနှင့် အမေရိကန်သံရုံး၊ အီးယူ ဂြိုဟ်တုစင်တာနှင့် ယူကရိန်းကို စစ်လက်နက်များထောက်ပံ့ပေးနေသော စပိန်လက်နက်စက်ရုံတစ်ခုတို့ထံ ပေးပို့ခဲ့ခြင်းဖြစ်သည်။

သံသယရှိဖွယ်အထုပ်တစ်ထုပ်ရောက်ရှိလာခဲ့ခြင်းကြောင့် ချက်ရဲတပ်ဖွဲ့က ဘရွန်(Bron) မြို့ရှိ ယူကရိန်း ကောင်စစ်ဝန်ရုံးကို ရွှေ့ပြောင်းပေးခဲ့ရသည်။ ချက်ရဲတပ်ဖွဲ့က အဆိုပါအထုပ်ကို X-ray ဖြင့် စစ်ဆွေးတွေ့ရှိခဲ့ပြီး ၎င်းမှာ စပိန်တွင် ထုပ်ပိုးတပ်ဆင်ခဲ့ခြင်းဖြစ်သည်ဟု ရဲတပ်ဖွဲ့ပြောခွင့်ရပုဂ္ဂိုလ်က ပြောသည်။

စပိန်ပြည်ထဲရေးဝန်ကြီး ဖာရန်ဒို ဂရန်ဒီ- မာလစကာ(ဓါတ်ပုံ-ရိုက်တာ)

စပိန်နိုင်ငံတွင်တွေ့ရှိခဲ့ရသော ဖောက်ခွဲရေးပစ္စည်းများသည် အိမ်တွင်းလုပ်ဖြစ်ကာ ပေါက်ကွဲစေတတ်သော ပစ္စည်းနှင့် သတ္တုလုံးအနည်းငယ်သာပါဝင်သည်ဟု စပိန်မီဒီယာများက ပြောသည်။ အဆိုပါ အထုပ်များသည် ဖွင့်ဖွင်ခြင်းပေါက်ကွဲခဲ့ခြင်းမရှိသော်လည်း မီးပွားများသာထွက်ပေါ်လာခဲ့ကြောင်း ရဲတပ်ဖွဲ့ကို ကိုးကားပြီး စပိန် သတင်းစာများနှင့်ရုပ်သံဌာနတို့က ထုတ်ပြန်သည်။

အဆိုပါဗုံးခြောက်လုံးမှ တစ်လုံးသာ စပိန်မြို့ရှိ ယူကရိန်းသံရုံးဝန်းအတွင်းပေါက်ကွဲခဲ့ပြီး လုံခြုံရေးဝန်ထမ်းတစ်ဦး ဒဏ်ရာရရှိခဲ့သည်။ ယခုအချိန်အထိ အဆိုပါစာအိတ်ဗုံးများ ပေးပို့ခဲ့သည်ဟု မည်သည့်အဖွဲ့မှ ထုတ်ပြန်ခဲ့ခြင်း မရှိသေးသလို အာဏာပိုင်များဘက်ကလည်း သံသယရှိသူများနှင့်ပတ်သက်သည့် သတင်းများကို ထုတ်ပြန်ထား ခြင်းမရှိသေးပေ။

စပိန်ကာကွယ်ရေးဝန်ကြီး မာဂရီတာ ရိုဘယ်စ် (Margarita Robles) ကလည်း သူမ ၏ယူကရိန်းခရီးစဉ်အတွင်း အဆိုပါဗုံးများနှင့်ပတ်သက်၍ တစ်စုံတစ်ရာပြောဆိုခဲ့ခြင်းမရှိခဲ့ပေ။ သို့သော် စပိန်နိုင်ငံအနေဖြင့် ယူကရိန်းပဋိပက္ခ အတွင်း ယူကရိန်းနိုင်ငံဘက်မှ ဆက်လက်ရပ်တည်သွားမည်ဟု ပြောဆိုခဲ့သည်။ တခြားနိုင်ငံများရှိ ယူကရိန်း သံရုံးများသို့ တိရစ္ဆာန်များ၏ မျက်လုံးများပါဝင်သော အထုပ်များရောက်ရှိခဲ့သည်ဟုလည်း ယူကရိန်းနိုင်ငံခြားရေး ဌာနက ပြောသည်။

Source:Aljazeera

CNI International News

အစ္စလာမ်မာဘတ်၊ ဒီဇင်ဘာ ၃

အာဖဂန်နစ္စတန်နိုင်ငံတွင်းရှိ ပါကစ္စတန်ထိပ်တန်း သံတမန်အဖွဲ့ကို ပစ်မှတ်ထားသော တိုက်ခိုက်မှုတစ်ခု ဖြစ်ပွား ခဲ့သည်ဟု ပါကစ္စတန် ဝန်ကြီးချုပ်က ပြောကြောင်း Aljazeera သတင်းတွင် ဖော်ပြထားသည်။

အိမ်နီးချင်း နှစ်နိုင်ငံကြား တင်းမာမှုများ ရှိနေချိန်တွင် ယခုကဲ့သို့ ဖြစ်ပွားခဲ့ခြင်း ဖြစ်သည်။

အာဖဂန်နစ္စတန်နိုင်ငံရှိ ပါကစ္စတန် သံရုံးဝန်းအတွင်း ဖြစ်ပွားခဲ့သော တိုက်ခိုက်ခံရမှုတွင် ပါကစ္စတန် လုံခြုံရေး ဝန်ထမ်းတစ်ဦး ထိခိုက်ဒဏ်ရာ ရရှိခဲ့သည်ဟု ပါကစ္စတန်သံရုံး အဖွဲ့ခေါင်းဆောင် အူဘဲ့အာရာမာန်နီဇာမာနီ (Ubaid Ur Rehman Nizamani)က ပြောသည်။

ပါကစ္စတန် ဝန်ကြီးချုပ် ရှာဘတ် ရှရစ်ဖ် (Shehbaz Sharif)တွစ်တာတွင် ရေးသားထားစဉ် (GETTY IMAGES)

အဆိုပါ ဖြစ်ရပ်အတွက် အာဖဂန်အစိုးရအနေဖြင့် ချက်ချင်း အရေးယူ ဆောင်ရွက်ပေးရန် လိုအပ်သလို အာဖဂန်နိုင်ငံတွင်းရှိ ပါကစ္စတန် သံတမန်ဝန်ထမ်းများနှင့် နိုင်ငံသားများ၏ လုံခြုံရေးနှင့် ဘေးကင်းရေးကို ဦးစားပေး ဆောင်ရွက်ပေးသင့်ကြောင်း ပါကစ္စတန်နိုင်ငံခြားရေးဝန်ကြီးဌာနက ပြောသည်။

ကာဘူးလ်မြို့ရှိ ပါကစ္စတန်သံအဖွဲ့အပေါ် ပစ်မှတ်ထား တိုက်ခိုက်မှုကို ပြင်းထန်စွာ ရှုတ်ချကြောင်း ပါကစ္စတန် ဝန်ကြီးချုပ် ရှာဘတ် ရှရစ်ဖ် (Shehbaz Sharif)က တွစ်တာတွင် ရေးသား၍ ပြောကြားခဲ့သည်။

ယခုတိုက်ခိုက်မှုသည် ပါကစ္စတန်နိုင်ငံခြားရေးဝန်ကြီး၏ အာဖဂန်ခရီးစဉ်အပြီး ရက်ပိုင်းအတွင်း ပေါ်ပေါက် ခဲ့ခြင်း ဖြစ်သည်။

အိမ်နီးချင်း နှစ်နိုင်ငံကြား နယ်စပ်အရေး တင်းမားမှုများနှင့် ပတ်သက်၍ နိုင်ငံခြားရေးဝန်ကြီး နှစ်ဦး တွေ့ဆုံ ဆွေးနွေးခဲ့ခြင်း ဖြစ်သည်။

အဆိုပါ တိုက်ခိုက်ခံရမှုတွင် ပါကစ္စတန်သံတမန်များ ထိခိုက်ဒဏ်ရာရရှိမှု မရှိခဲ့သော်လည်း လုံခြုံရေးဝန်ထမ်း တစ်ဦးသာ ထိခိုက်ခဲ့ကြောင်း၊ အခင်းဖြစ်စဉ် အခြေအနေကို လက်ရှိတွင် ရှင်းရှင်းလင်းလင်း မသိရသေးကြောင်း ပါကစ္စတန်ဝန်ကြီးချုပ်က ပြောသည်။

တာလီဘန်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ်က တွစ်တာတွင် ကန့်ကွက်ကြောင်း ရေးသား ထားစဉ် (GETTY IMAGES)

တိုက်ခိုက်မှုဖြစ်စဉ်ကို သေနတ်သမား တစ်ဦးတည်းက လုပ်ဆောင်ခဲ့ခြင်း ဖြစ်ကြောင်း၊ တိုက်ခိုက်သူသည် အဆောက်အဦများကို အကာအကွယ်ယူ၍ ရောက်ရှိလာခဲ့ပြီး စတင် ပစ်ခတ်ခဲ့ကြောင်း ပါကစ္စတန်သံရုံး ဝန်ထမ်းတစ်ဦးက ပြောသည်။

အာဖဂန်ကို တာလီဘန်တို့ ထိန်းချုပ်ခဲ့သည့် ၂၀၂၁ ခုနှစ်၊ သြဂုတ်လမှ စတင်ကာ နိုင်ငံတွင်းရှိ သံရုံးအများစုမှာ ထွက်ခွာခဲ့ကြပြီ ဖြစ်သော်လည်း ပါကစ္စတန်သံရုံး အပါအဝင် သံရုံးအနည်းငယ်သည် ဆက်လက် လည်ပတ်နေ ဆဲဖြစ်သည်။

ပါကစ္စတန်နိုင်ငံခြားရေးဝန်ကြီး နီဇာမာနီ၏ ကာဘူးလ်ခရီးစဉ်က လည်ပတ်နေဆဲ သံရုံးအခြေအနေကို ရပ်တန့် ပစ်ရန် ဖြစ်သည်။ ယခုတိုက်ခိုက်မှုအပေါ် တာလီဘန်တို့ဘက်ကလည်း ပြင်းပြင်းထန်ထန် ကန့်ကွက် ရှုတ်ချသည် ဟု တာလီဘန်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ်က တွစ်တာတွင် ပြောကြားခဲ့သည်။

Source: Al Jazeera

CNI International News

ကိယက်ဗ်၊ ဒီဇင်ဘာ ၃

အမေရိကန်သမ္မတဂျိူးဘိုင်ဒန် (Joe Biden) အနေဖြင့် ယူကရိန်းအရေးအတွက် ရုရှားသမ္မတ ဗလာဒီမာပူတင် (Vladimir Putin) နှင့်တွေ့ဆုံဆွေးနွေးရန် အစီစဉ်မရှိသေးကြောင်း Reuters သတင်းတွင်ဖော်ပြသည်။

အိမ်ဖြူတော်ဘက်မှ သောကြာနေ့တွင် ယင်းသို့ပြောဆိုခဲ့ခြင်းဖြစ်ပြီး ကာကွယ်ရေးဌာနက ပြောခွင့်ရပုဂ္ဂိုလ် ဂျွန်ကာဘီက ယင်းသို့ပြောဆိုခဲ့ခြင်းဖြစ်သည်။ အဆိုပါ ပြောစကားမှာ ကိုးလကြာ ယူကရိန်း ပဋိပက္ခနှင့်ပတ်သက်၍ ရုရှားနှင့် အနောက်အုပ်စုတို့အကြား ရင်ကြာစေ့ရေး ကွာဟချက်ကြီးမားနေမှုကို ဖော်ပြနေသည်။

ရုရှားအနေဖြင့် ယင်းတို့၏ထိုးစစ်ဆင်မှုများနှင့် သိမ်းယူထားသောယူကရိန်းနယ်မြေများမှ ဆုတ်ခွာသွားမှသာလျှင် ငြိမ်းချမ်းရေးဆွေးနွေးပွဲများ ပေါ်ပေါက်လာနိုင်စရာရှိသည်ဟု ယူကရိန်းဘက်က ပြောသည်။ သို့သော် ရုရှားဘက် ကလည်း ပူတင်နှင့်ဆွေးနွေးပွဲများပြုလုပ်လိုလျှင် ယင်းဆွေးနွေးပွဲများမတိုင်ခင် ရုရှား၏နယ်မြေသစ်များ ကြေညာ ခြင်းဆိုင်ရာ စက်တင်ဘာလုပ်ရပ်ကို အနောက်အုပ်စုအနေဖြင့် အသိအမှတ်ပြုရန် လိုအပ်သည်ဟုပြောသည်။

အမေရိကန်သမ္မတ ဂျိုးဘိုင်ဒန်နှင့် ရုရှားသမ္မတ ဗလာဒီမာပူတင်

ပူတင်၏ ကျူးကျော်စစ်ကြောင့် လူထောင်ပေါင်းများစွာ သေဆုံးကာ၊ သန်းနှင့်ချီ၍ နေရပ်စွန့်ခွာခဲ့ရရုံမက မြို့ပေါင်း များစွာလည်းပျက်စီခဲ့ရပြီးဖြစ်သည်။ ရုရှား၏ စစ်ပွဲဆင်နွှဲနိုင်မှုအစွမ်းကို ထိန်းချုပ်နိုင်ရေး နိုင်ငံတကာကြိုးပမ်းမှု ၏အစိတ်အပိုင်းတစ်ခုအဖြစ် ရုရှားရေနံစိမ်းတစ်စည်၏ဈေးကို ဒေါ်လာ ၆၀ တွင် ကန့်သတ်ထားရန် သဘော တူညီမှုရရှိခဲ့ပြီဖြစ်ကြောင်း G7 နှင့် သြစတြေးလျနိုင်ငံတို့က သောကြောနေ့တွင်ပြောခဲ့သည်။

အဆိုပါ ကန့်သတ်ချက်သည် ဒီဇင်ဘာ ၅ ရက်နှင့် မကြာခင်ရက်ပိုင်းအတွင်း စတင်အသက်ဝင်လာနိုင်သည်ဟု လည်း G7 နှင့် သြစတြေးလျနိုင်ငံတို့ကပြောသည်။ ထိုလုပ်ဆောင်ချက်က ရုရှားဘက်မှရေနံရောင်းကာ စီပွား ရှာဖွေနေမှုကို လျော့ချရန်၊ ကမ္ဘာလုံးဆိုင်ရာ ရေနံဈေးအတွက် အနှောင့်အယှက်ဖြစ်လာမည်ကို တားဆီးရန် ရည်ရွယ်သည်။

သို့သော် အဆိုပါ သဘောတူညီချက်ကို ဥရောပသမဂ္ဂအစိုးရများဘက်မှ ယခုသီတင်းပတ်ကုန်ပိုင်းအတွင်း အတည် ပြုရန် လိုအပ်နေဆဲဖြစ်သည်။ အီးယူအနေဖြင့်ယခုကဲ့သို့ဆောင်ရွက်ခြင်းက ယင်းတို့၏ ကိုယ်ပိုင်စွမ်းအင် လုံခြုံ ရေးအပေါ် ထိခိုက်အောင် ဆောင်ရွက်ခြင်းသပ်သပ်သာဖြစ်ကြောင်း ရုရှားအောက်လွှတ်တော်၏ နိုင်ငံခြားရေး ကော်မတီဥက္ကဋ္ဌ လီယိုနစ်စလုစကိုင်း (Leonid Slutsky) က ပြောသည်။

Source:Reuters

CNI International News

မက်ဒရစ်၊ ဒီဇင်ဘာ ၂

မက်ဒရစ်မြို့ရှိ အမေရိကန်သံရုံးသို့ စာအိတ်ဗုံးတစ်လုံး ရောက်ရှိလာခဲ့ကြောင်း Aljazeera သတင်းတွင် ဖော်ပြ သည်။

ထို့နောက် အမေရိကန်သံရုံး၊ ယူကရိန်းသံရုံး အပါအဝင် စပိန်နိုင်ငံရှိ နေရာ ၆ နေရာသို့ အလားတူ ဗုံး ၆ လုံး ရောက်ရှိလာခဲ့ခြင်း ဖြစ်သည်။

မက်ဒရစ်မြို့ရှိ အမေရိကန်သံရုံးသို့ သံသယရှိဖွယ် အထုပ်တစ်ထုပ် ရောက်ရှိလာခဲ့သည်ကို အတည်ပြုနိုင်ပြီး စပိန်နိုင်ငံရှိ အခြားနေရာများသို့ တခြားအထုပ်များ ရောက်ရှိခဲ့သည်ဆိုသော သတင်းများလည်း သတိပြုမိသည်ဟု အမေရိကန်သံရုံးက ထုတ်ပြန်ထားသည်။

အမေရိကန်သံရုံးသည် မက်ဒရစ်မြို့လယ်တွင် တည်ရှိပြီး အထက်ပါ ဖြစ်ရပ်ကြောင့် သံရုံး၏ အနီးပတ်ဝန်းကျင်ကို ပိတ်ဆို့ထားခဲ့ရသည်။ ယခုဖြစ်ရပ်တွင် ပူးပေါင်းကူညီပေးမှုအတွက် စပိန်လုံခြုံရေးတပ်ဖွဲ့ဝင်များကို ကျေးဇူးတင် ကြောင်း အမေရိကန်သံရုံးက ပြောသည်။

စပိန်ဝန်ကြီးချုပ် ပီဒရို ဆန်းချက်ဇ် (GETTY IMAGES)

မက်ဒရစ်မြို့ရှိ သံရုံး ၂ ခု အပြင်၊ လက်နက်စက် ရုံ ၁ ခုနှင့် တခြားအစိုးရ အဖွဲ့အစည်း နေရာ ၃ ခုသို့ စာအိတ်ထုပ် များ ရောက်ရှိခဲ့ကြောင်း စပိန်ပြည်ထဲရေးဝန်ကြီး ရာဖေးလ် ပီရတ်ဇ်(Rafael Perez )က ပြောသည်။

အဆိုပါ အထုပ်များကို စပိန်နိုင်ငံတွင်းမှပင် ပို့ဆောင်ခဲ့သည်ဟု ယူဆရကြောင်းနှင့် ယခုဖြစ်ရပ်အပေါ် အသေးစိတ် စုံစမ်းစစ်ဆေးမှုများ မလုပ်ဆောင်ရသေးကြောင်း ၎င်းက ပြောသည်။

စပိန်ဝန်ကြီးချုပ် ပီဒရို ဆန်းချက်ဇ်(Pedro Sanchez) ကို လိပ်မူထားသည့် ပေါက်ကွဲ လောင်ကျွမ်းစေ တတ်သော အထုတ်တစ်ထုပ်ကို နိုဝင်ဘာ ၂၄ ရက်က ရရှိခဲ့ပြီး ထိုအထုပ်ကို လုံခြုံရေးအဖွဲ့က ဖောက်ခွဲ ဖျက်စီးခဲ့ရသည်။

အလားတူ အထုပ်တစ်ထုပ်သည် ဗုဒ္ဓဟူးနေ့တွင်လည်း ယူကရိန်းသံရုံးသို့ ရောက်ရှိလာခဲ့ပြီး သံအမတ် ဆာဟီ ပိုဟိုရတ်ဆတ်ဗ် (Serhii Pohoreltsev) ထံ လိပ်မူထားကြောင်း၊ ထိုအထုပ်ကို လုံခြုံရေတပ်ဖွဲ့ဝင်တစ်ဦးက ကြည့်ရှု စစ်ဆေးစဉ် ပေါက်ကွဲခဲ့ကြောင်း စပိန်ပြည်ထဲရေးဝန်ကြီးက ပြောသည်။

သံရုံး ၂ ရုံးအပြင် စပိန်အရှေ့မြောက်ပိုင်း ဇာရာဂိုဇာ(Zaragoza)ရှိ အင်စတယ်လာဇာ(Instalaza) လက်နက်စက်ရုံ သို့လည်း ဗုဒ္ဓဟူးနေ့ညက အထုပ်တစ်ထုပ် ရောက်ရှိလာခဲ့သေးသည်။

စပိန်ကာကွယ်ရေးဝန်ကြီး မာဂရီတာ ရိုဘလက်စ် (GETTY IMAGES)

အင်စတယ်လာဇာ (Instalaza) လက်နက်စက်ရုံသည် စပိန်အစိုးရမှ ယူကရိန်းကို ထောက်ပံ့ပေးနေသည့် စီ ၉၀ (C90) ဒုံးကျည်လောင်ချာများ ထုတ်လုပ်သည့် စက်ရုံဖြစ်သည်။ ထို့အပြင် မြို့တော်အနီးရှိ လေတပ်စခန်း တစ်ခုထဲ မှ ဥရောပသမဂ္ဂ(EU)၏ ဒုံးကျည်စင်တာသို့လည်း စာအိတ်တစ်ထုပ် ရောက်ရှိလာခဲ့သေးသည်။

အဆိုပါ စင်တာသည် ဥရောပသမဂ္ဂ(EU)၏ နိုင်ငံခြားရေးနှင့် လုံခြုံရေးမူဒါဝများကို ထောက်ပံ့ပေးသည့် နေရာ တစ်ခု ဖြစ်သည်။

နောက် ဗုံးတစ်လုံးမှာ စပိန်ကာကွယ်ရေးဝန်ကြီး မာဂရီတာ ရိုဘလက်စ် (Margarita Robles)ကို လိပ်မူထားပြီး စပိန်ကာကွယ်ရေးဝန်ကြီးဌာနသို့ အင်္ဂါနေ့ မနက်ပိုင်းတွင် ရောက်ရှိလာခဲ့သည်။

စပိန်နိုင်ငံသည် ယူကရိန်းအား ရုရှား၏ကျူးကျော်စစ် စတင်ချိန်ကတည်းက ယူကရိန်းကို စစ်ဘက်ဆိုင်ရာနှင့် လူသားချင်း စာနာမှုဆိုင်ရာ အထောက်အပံ့ အကူအညီများ ပေးခဲ့သည့် နိုင်ငံတစ်ခုဖြစ်ကာ ယခုဖြစ်ရပ်များကြောင့် ယူကရိန်းနှင့်ပတ်သတ်သည့် စပိန်ုနိုင်ငံ၏ ရပ်တည်ချက်များ ပြောင်းလဲသွားရန် မရှိဟုလည်း ကာကွယ်ရေး ဝန်ကြီးက ပြောသည်။

ယခု ဖြစ်ရပ်များနှင့်ပတ်သတ်၍ စပိန်ရှိ ရုရှားသံရုံးကလည်း ကန့်ကွက်ရှုတ်ချကြောင်း ကြေညာချက်တစ်စောင် ထုတ်ပြန်ခဲ့သည်။

Source: Al Jazeera

CNI International News

ဝါရှင်တန်၊ ဒီဇင်ဘာ ၂

အမေရိကန်မှ ထောက်ပံ့ပေးထားသော Radio Free Europe ၏ ရေဒီယိုလိုင်းတစ်ခုကို တာလီဘန်များက ဒီဇင်ဘာ ၁ ရက်တွင် လေလှိုင်း ပေါ်မှ ဖယ်ရှားခဲ့ကြောင်း Channel News Asia သတင်းတွင် ဖော်ပြထားသည်။

နိုင်ငံ၏ အစ္စလာမ္မစ်ဥပဒေများနှင့် ညီညွတ်မှု မရှိခြင်းကြောင့် ယခုကဲ့သို့ လုပ်ဆောင်ရခြင်း ဖြစ်ကြောင်း တာလီဘန်များက ပြောသည်။

အဇာဒီ (Azadi)ဟု ခေါ်သော လွတ်မြောက်မှုဆိုသော အဓိပ္ပါယ်ရသည့် ရေဒီယိုလိုင်းသည် ဒါရီ (Dari) ၊ ပတ်ရှ်တို ( Pashto) စသည့် ဘာသာစကားများနှင့် ထုတ်လွှင့်လျက်ရှိသော ရေဒီယိုလှိုင်းဖြစ်သည်။ အဆိုပါ ရေဒီယိုလှိုင်းကို တာလီဘန်တို့ အာဖဂန်နစ္စတန်အား သိမ်းယူ လိုက်ချိန်မှစ၍ ကျောင်းတက်ရန် ပိတ်ပင်ခံထားရသော မိန်းကလေး များအတွက် ပညာရေးဆိုင်ရာ အစီစဉ်များအား ထောက်ပံ့ပေးခဲ့သည်။

 တာလီဘန်သတင်း ထုတ်ပြန်ရေးဌာန၏  အရာရှိတစ်ဦးဖြစ်သူ အဗ္ဗဒဲလ်ဟက်ဟားမတ်ကိုတွေ့ရစဉ် (FB)

အဇာဒီလိုင်းသည် သတင်းပညာရပ်ဆိုင်ရာ စည်းကပ်ချက်များနှင့် မကိုက်ညီသည့်အပြင် တစ်ဖက်သတ် ထုတ်လွှင့်မှုများကြောင့် လေလှိုင်းပေါ်မှ ဖယ်ရှားခဲ့ရခြင်း ဖြစ်သည်ဟု တာလီဘန်သတင်း ထုတ်ပြန်ရေးဌာန၏ အရာရှိတစ်ဦးဖြစ်သူ အဗ္ဗဒဲလ်ဟက်ဟားမတ် (Abdul Haq Hammad)က ပြောသည်။

အဇာဒီလိုင်းကို အမေရိကန်ဘက်မှ ထောက်ပံ့ပေးထားသည့် Radio Free Europe/Radio Liberty အဖွဲ့က ထုတ်လွှင့်သည်။ အဇာဒီလိုင်း ဖြုတ်ချခံရမှုကို Radio Free Europe အဖွဲ့မှ အတည်ပြုပေးခဲ့ပြီး တခြားသော ပုံစံမျိုးဖြင့် အာဖဂန်ပြည်သူများ ဖမ်းယူရရှိနိုင်ရေး ကြိုးပမ်းသွားမည်ဟုလည်း ၎င်းတို့က ပြောသည်။

အဇာဒီလိုင်းကို အာဖဂန်ပြည်သူ သန်းပေါင်းများစွာက နားဆင်ကြသောကြောင့် တာလီဘန်များ၏ ဆုံးဖြတ် ချက်မှာ စိတ်ပျက်စရာဖြစ်သည်ဟု Radio Free Europe/Radio Liberty အဖွဲ့၏ ဥက္ကဋ္ဌဖြစ်သူ ဂျင်မီဖလိုင်းက ပြောသည်။

Radio Free Europe/Radio Liberty အဖွဲ့ ၏ ဥက္ကဌဖြစ်သူ ဂျင်မီ ဖလိုင်းကို တွေ့ရစဉ် (GETTY IMAGES)

ဆက်လက် ထုတ်လွှင့်ခွင့် ရရေးအတွက် တာလီဘန်များ၏ တောင်းဆိုမှုများအတိုင်း လိုက်နာဆောင်ရွက်သွား မည် မဟုတ်ကြောင်းနှင့် အာဖဂန်နိုင်ငံတွင်းမှ နားဆင်သူများသည် ၎င်းတို့ ရေဒီယိုလိုင်းကို တခြားနည်လမ်း များဖြင့် ဆက်လက် ရှာဖွေနေမည်ဟုလည်း ယုံကြည်ကြောင်း ဖလိုင်းက ဆက်လက် ပြောခဲ့သည်။

စစ်တမ်းတစ်ခုအရ အာဖဂန် ပြည်သူတစ်ဝက်ခန့်က အဇာဒီရေဒီယိုလိုင်းကို အပတ်စဉ် နားဆင်ကြသည်။

အဇာဒီရေဒီယိုလိုင်းကို အမေရိကန်တို့က တာလီဘန်များကို ဖယ်ရှားခဲ့ပြီးချိန်မှ စတင်ခဲ့ခြင်းဖြစ်ကာ တာလီဘန်များ ပြန်လည်အာဏာရရှိ လာချိန်တွင် ၎င်းတို့၏ရုံးကို ပိတ်ခဲ့ရသည်။

အဇာဒီလိုင်းသည် အာဖဂန် နိုင်ငံတွင်းမှ ထွက်ခွာခဲ့ရသော်လည်း နိုင်ငံပြင်ပမှတစ်ဆင့် အသက် ၇ နှစ်မှ ၁၂ နှစ် ကြား မိန်းမလေးများအတွက် အစီစဉ်များအပြင် တာလီဘန်တို့ လက်ထက်တွင်း တင်းကြပ်စွာ နေထိုင်နေရသော အမျိုးသမီးများ၊ မိန်းကလေးများနှင့် LGBTQ အသိုက်အဝန်းတို့၏ အခြေအနေများကို ဆက်လက် ထုတ်လွှင့်နေဆဲ ဖြစ်သည်။

Source: CNA

CNI International News

ဒါကာ၊ ဒီဇင်ဘာ ၂

ဆီနီဂေါလွှတ်တော်အတွင်း လွှတ်တော်အမတ်များ အချင်းချင်း အပြန်အလှန်တိုက်ခိုက်မှုဖြစ်ပွားခဲ့သည်ဟု အယ်လ်ဂျာဇီးယားသတင်းတွင်ဖော်ပြသည်။

နိုင်ငံ၏ အာဏာရပါတီနှင့် အတိုက်အခံပါတီဝင်တို့အကြား တင်းမာမှုများမြင့်တက်နေချိန်တွင် ယခုကဲ့သို့ ဖြစ်ပွားခဲ့ခြင်းဖြစ်ပြီး အတိုက်အခံအမျိုးသားလွှတ်တော်အမတ်တစ်ဦးက အခြားလွှတ်တော်အမတ် အမျိုးသမီး တစ်ဦးကို ပါရိုက်ခဲ့သည်ကိုလည်း ထွက်ပေါ်လာသည့်ရုပ်သံမှတ်တမ်းတွင် မြင်တွေ့ခဲ့ရသည်။

ယခုဖြစ်ရပ်သည် ကြာသပတေးနေ့က ဘဏ္ဍာရေးဆိုင်ရာ ရှင်းလင်ပြောဆိုမှုတစ်ခုတွင် ဖြစ်ပွားခဲ့ခြင်းဖြစ်သည်။ အတိုက်အခံလွှတ်တော်အမတ် မာဆာတာဆမ့်(Massata Samb) က အာဏာရ ညွန့်ပေါင်းအဖွဲ့ ဘန်နိုဘောက် ယာကာ Benno Bokk Yakaar (BBY) ၏ လွှတ်တော်အမတ်တစ်ဦးဖြစ်သူ အေမီဒီယာယီဂျီနာဘီ( Amy Ndiaye Gniby) ကို ပါးရိုက်ရာမှ စတင်ခဲ့ခြင်းဖြစ်သည်။ပါးရိုက်မှုကြောင့် လွှတ်တော်အတွင်း ရုန်းရင်း ဆန်ခတ်မှုများ စတင်ပေါ်ပေါက်လာခဲ့ကာ ဂျီနာဘီကလည်း ဆမ့်ကို ခုန်ဖြင့်ပြန်ပစ်ခဲ့သည်။သူမကို အခြား လွှတ်တော်အမတ် တစ်ဦးက ဝင်ရောက်ထိန်းသိမ်းပေးခဲ့ရပြီး အပြန်အလှန် တိုက်ခိုက်မှုများကြောင့် အင်္ဂါနေ့အစီအစဉ်ကို ရပ်နားခဲ့ ရသည်။

ပြီးခဲ့သည့် စက်တင်ဘာလအတွင်း လွှတ်တော်အမတ်များအကြား တိုက်ခိုက်မှုတစ်ကြိမ် ဖြစ်ပွားခဲ့စဉ်(ဓါတ်ပုံ-အေအက်ဖ်ပီ)

ယခုတစ်ကြိမ်ဖြစ်ရပ်သည် ဒုတိယအကြိမ်ဖြစ်ပြီး ပြီးခဲ့သည့် စက်တင်ဘာလတွင်လည်း လွှတ်တော်အမတ်များ အကြားတိုက်ခိုက်မှုများ ပေါ်ပေါက်ခဲ့သေးသည်။ဂျီနာဘီက သမ္မတဆဲလ်၏ တတိယမြောက်သက်တမ်းကိစ္စ နှင့်ပတ်သတ်၍ ဆန့်ကျင်ပြောဆိုခဲ့သည့် နတ်ဆရာတစ်ဦးအပေါ်ဝေဖန်မှုကြောင့် ယခုဖြစ်ရပ်ဖြစ်ပွားခဲ့ခြင်း ဖြစ်သည်ဟု ဆမ့်က ကြာသပတေးနေ့ဖြစ်ရပ်နှင့်ပတ်သတ်၍ပြန်လည်ရှင်းလင်းခဲ့သည်။ သို့သော် ဂျီနာဘီဘက်မှ ဆမ့်၏ပြောဆိုမှုကို လှောင်ပြောင်ခဲ့ကာ သူမဘက်မှ လုံးဝဂရုမစိုက်ကြောင်းပြောကြားခဲ့သည်။

လွှတ်တော်အတွင်း ရုန်းရင်းဆန်ခတ်ဖြစ်ပွားမှုမှတ်တမ်းသည် လူမှုကွန်ယက်အတွင်း ပျံ့နှံ့လျက်ရှိကာ ယင်းသည် အမျိုးသမီးများအပေါ်အကြမ်းဖက်မှုနှင့်ပတ်သတ်သည့် ငြင်းခုန်မှုများကိုလည်း ပေါ်ပေါက်စေလျက်ရှိသည်။

ဇူလိုင်လ ဥပဒေပြုရွေးကောက်ပွဲပြီးချိန်မှစ၍ ဆီနီဂေါနိုင်ငံ၏ အတိုက်အခံနှင့် အာဏာရပါတီတို့မှ နိုင်ငံရေးသမား များအကြား တင်းမားမှုများမှာမြင့်တက်ခဲ့သည်။ဇူလိုင်လရွေးကောက်ပွဲတွင် အာဏာရပါတီမှ ၎င်းတို့၏မဲ အများစု ကိုဆုံးရှုံးခဲ့ရပြီး လက်ရှိသမ္မတ မက်ကီဆဲလ် (Macky Sall)က ၂၀၂၄ ခုနှစ်တွင် တတိယအကြိမ် တာဝန် ထမ်းဆောင်ခွင့်ရရန် ကြိုးပမ်းနိုင်သည်ဆိုသည့် စိုးရိမ်မှုများလည်းရှိခဲ့သည်။

ထိုအခြေအနေက သက်တမ်းကန့်သတ်ချက်နှင့် သမ္မတ၏ ယခင်ကတိကဝတ်များကို ချိုးဖောက်ခြင်းဖြစ်သည်ဟု အတိုက်အခံများဘက်မှ ပြောကြားထားသော်လည်း သမ္မတဘက်က တတိယမြောက်သက်တမ်းနှင့် ပတ်သတ်၍ လက်ရှိအချိန်ထိ ရှင်းရှင်းလင်းလင်းပြောဆိုထားခြင်းမရှိသေးပေ။

Source:Aljazeera

CNI International News

လန်ဒန်၊ ဒီဇင်ဘာ ၁

မတူညီသည့် ကျန်းမာရေးသမဂ္ဂ ၃ ခုကို ကိုယ်စားပြုသော လူနာတင်ယာဉ်ဝန်ထမ်း ထောင်ပေါင်းများစွာက သပိတ်မှောက်ရန် ပြင်ဆင်နေကြောင်း CNA သတင်းဌာနက ရေးသား ဖော်ပြခဲ့သည်။

အဆိုပါ သပိတ်မှောက်ရန် ဆုံးဖြတ်ခဲ့မှုကြောင့် ဗြိတန်နိုင်ငံ၏ ကျန်းမာရေး စောင့်ရှောက်မှုစနစ်ဟာ ဒီဇင်ဘာလ တွင် အခက်အခဲများနှင့် ရင်ဆိုင်ရတော့မည် ဖြစ်သည်။

လစာနှင့်လုပ်ငန်းခွင် အခြေအနေများအပေါ် မကျေနပ်မှုများကြောင့် ဝန်ထမ်းများဘက်က သပိတ်မှောက်ရန် ဆုံးဖြတ်ခဲ့ခြင်း ဖြစ်သည်။

သပိတ်မှောက်ရန်အဆိုကို အင်္ဂလန်နှင့်ဝေလနယ်များမှ လူနာတင်ယာဉ် ဝန်ထမ်း ၁၀၀၀၀ ကျော်တို့က ထောက်ခံ ခဲ့သည်ဟု GMB သမဂ္ဂက ထုတ်ပြန်ခဲ့သလို Unite နှင့် Unison သမဂ္ဂအဖွဲ့ဝင်များကလည်း သပိတ်မှောက်ရန် အဆိုကို လက်ခံသည်။

ဗြိတိန်နိုင်ငံ၏ အမျိုးသားကျန်းမာရေးဝန်ဆောင်မှု(NHS)သည် ယခု ဆောင်းရာသီ ကာလတွင် မမျှော်လင့်ထား သော သပိတ်မှောက် ကန့်ကွက်မှုများနှင့် ရင်ဆိုင်ရဖို့ရှိနေပြီး သူနာပြုပေါင်း ၁၀၀၀၀၀ နီးပါးက ဒီဇင်ဘာ ၁၅ ရက် နှင့် ၂၀ ရက်တို့တွင် သပိတ်မှောက်ရန် စီစဉ်ထားသည်။

 ဗြိတိန်က လူနာတင်ယာဉ်များဘေးက အမျိုးသားတစ်ဦးကိုတွေ့ရစဉ် (Reuters)

အဆိုပါ သပိတ်မှောက်မည့် အခြေအနေသည် နှစ်ပေါင်း ၁၀၀ သမိုင်းကြောင်းအတွင်း ပထမဆုံး အကြိမ်လဲ ဖြစ်သည်။

“အဖွဲ့ဝင်တိုင်းက ဒီကိစ္စကို အလေးအနက် ထားကြပါတယ်။ ဒါဟာသူတို့ လက်ရှိ အခြေအနေတွေအပေါ် ဘယ်လောက် စိတ်ပျက်နေလဲဆိုတာ မြင်သာပါတယ်။ ဒါဟာ ဝန်ထမ်းတွေ၊ လူနာတွေရဲ့ ဘေးကင်းရေးအပြင် အကျိုးခံစားခွင့်နဲ့လည်း သက်ဆိုင်နေပါတယ်။ ကျနော်တို့ တစ်ခုခုကို ပြောင်းလဲဖို့ လိုအပ်ပြီး ဒီလိုမှ မဟုတ်ရင် အားလုံးပျက်စီးသွားပါလိမ့်မယ်” လို့ GMB သမဂ္ဂတာဝန်ရှိသူတစ်ဦးဖြစ်သူ ရေချယ်ဟယ်ရစ်ဆင်က ပြောသည်။

ယူကရိန်းအပေါ် ရုရှား၏ ကျူးကျော်စစ် ပေါ်ပေါက်နေချိန်တွင် ဗြိတိန်နိုင်ငံအတွင်း ယခုနှစ်၌ ငွေကြေး ဖောင်းပွမှု နှုန်း မြင့်တက်လာကာ လူနေမှု ကုန်ကျစရိတ်ဆိုင်ရာ ပြဿနာများ ရှိလာသည်။

ခရစ္စမတ် မတိုင်ခင် သပိတ်မှောက်မည့်နေ့ကို လာမည့် ရက်များအတွင်း သတ်မှတ်သွားမည်ဟု GMB က ပြော သည်။

ဗြိတိန်က NHS ကိုတွေ့ရစဉ် (GETTY IMAGES)

၁၉၄၈ ခုနှစ်မှ စတင်ကာ ဗြိတိန်တွင် အခမဲ့ ကျန်းမာရေး စောင့်ရှောက်မှု ပေးခဲ့သော NHS သည် ကိုဗစ်ဖြစ်စဉ် ကြောင့် စံချိန်တင် လူနာ အရေအတွက် မြင့်တက်မှုနှင့်ရင်ဆိုင်ခဲ့ရသလို ဝန်ထမ်းများ၏ သပိတ်မှောက်မှုကြောင့် ရာထူး လစ်လပ်မှုများနှင့်လည်း ကြုံတွေ့နေရသည်။

သပိတ်မှောက်မှုတွင် ပါဝင်ရန် သမဂ္ဂအဖွဲ့ဝင် ဆေးဘက်ဝန်ထမ်းများ၊ အရေးပေါ် ဖုန်းလက်ခံ ဖြေဆိုသူများနှင့် လူနာတင်ယာဉ် ဝန်ထမ်းများပါ သဘောတူထားသည်ဟု Unison နှင့် Unite သမဂ္ဂများကလည်း အသီးသီး ထုတ်ပြန် ထားသည်။

တိုင်းပြည်အနေနှင့် စိန်ခေါ်မှုများသော ဆောင်းရာသီ ကာလနှင့် နီးကပ်လာချိန်တွင် ဝန်ထမ်းများမှ သပိတ်မှောက် ရန် ပြင်ဆင်နေမှုအတွက် စိတ်မကောင်း ဖြစ်မိသည်ဟု ဗြိတိန် ကျန်းမာရေးနှင့်လူမှုစောင့်ရှောက်ရေးဝန်ကြီး စတိဗ်ဘာကလေက ပြောသည်။

“ဘယ်လို အခြေအနေမျိုးမဆို လူနာတွေရဲ့ ဘေးကင်းရေးကို ထိန်းသိမ်းထားဖို့က ကျနော်တို့ရဲ့ ပထမဦးစားပေး အခြေအနေပါ။ NHS အနေနဲ့ ထိခိုက်မှုတွေကို လျှော့ချဖို့နဲ့ အရေးပေါ် ဝန်ဆောင်မှုတွေကို ဆက်လက် လုပ်ဆောင် သွားဖို့အတွက် ကြိုးစား ဆောင်ရွက်သွားပါမယ်”ဟု ၎င်းက ပြောသည်။

Source: CNA

CNI International News

ဒမတ်စကပ်၊ ဒီဇင်ဘာ ၁

အဖွဲ့ခေါင်းဆောင်ဖြစ်သူ အဘူအယ်လ်ဟက်ဆန် အယ်လ်-ဟာရှီမီ အယ်လ်ကွီရေရှီ(Abu al-Hassan al-Hashemi al-Qurayshi) သေဆုံးသွားခဲ့ပြီ ဟု IS အဖွဲ့က ထုတ်ပြန်ကြေညာခဲ့ကြောင်း BBC သတင်းဌာနက ဖော်ပြသည်။

“ဘုရားသခင်၏ ရန်သူတော်များ” ဟု ဆိုသည့် တိုက်ပွဲအတွင်း ခေါင်းဆောင်ကျဆုံးခဲ့ပြီဟု အဖွဲ့၏ပြောခွင့်ရ ပုဂ္ဂိုလ်က အသံဖိုင်တစ်ခုတွင် ထုတ်ပြန်ခဲ့သော်လည်း အတိအကျကို ဖော်ပြထားခြင်းမရှိပေ။

IS ခေါင်းဆောင်သည် အောက်တိုဘာလလယ်ပိုင်းတွင် ဆီးရီးယား အနောက်-တောင်ဘက် စစ်ဆင်ရေးတစ်ခု၌ ဆီးရီးယားလွတ်မြောက်ရေး တပ်မတော်ဟုခေါ်သည့် လက်နက်ကိုင်အဖွဲ့လက်ချက်ကြောင့် သေဆုံးခဲ့ရကြောင်း အမေရိကန်ဘက်က ထုတ်ပြန်ခဲ့သည်။ သေဆုံးခဲ့သူ အဘူအယ်လ်ဟက်ဆန် အယ်လ်-ဟာရှီမီ အယ်လ်ကွီရေရှီ သည် မတ်လကမှ အဖွဲ့ခေါင်းဆောင်ဖြစ်လာခဲ့သူဖြစ်သည်။ ၎င်း၏အရင်ခေါင်းဆောင်ဖြစ်သူသည် ဆီးရီးယား အနောက်-မြောက်ဘက်အတွင်း အမေရိကန်တပ်ဖွဲ့ဝင်များ၏ စီးနင်းမှုတစ်ခုတွင် ကိုယ့်ကိုယ်ကို အဆုံးစီရင်ခဲ့ သည်။

IS အဖွဲ့ပြောခွင့်ရပုဂ္ဂိုလ်က သေဆုံးခဲ့သည့် ခေါင်းဆောင်နေရာတွင် အစားထိုးမည့် ခေါင်းဆောင်သစ်ကိုပါ တစ်ပါတည်း ကြေညာခဲ့သော်လည် ခေါင်းဆောင်သစ်၏ အမည်အပါအဝင် မည်သည့် နိုင်ငံသား သို့မဟုတ် မည်သည့်နောက်ခံသမိုင်းကြောင်းရှိသည်ကိုတော့ ထုတ်ဖော်ခဲ့ခြင်းမရှိပေ။

အီရတ်ရှိ IS တိုက်ခိုက်ရေးသမားများကို တွေ့ရစဉ်(ဓါတ်ပုံ-credit)

ပြောခွင့်ရပုဂ္ဂိုလ်က သေဆုံးခဲ့သည့်ခေါင်းဆောင်ဟောင်းမှာ မူဂျာဟစ်ဒင် စစ်သားဟောင်းတစ်ဦးဖြစ်သည်ဟု ဖော်ပြခဲ့ပြီး ၎င်းအပေါ် သစ္စာစောင့်သိကြရန်လည်း ထောက်ခံသူများကို တိုက်တွန်းခဲ့သည်။ သေဆုံးခဲ့သူ အဘူ အယ်လ်ဟက်ဆန်သည် IS ခေါင်းဆောင်တစ်ဦးအနေဖြင့်ကြေညာချက်ထုတ်ပြန်ခဲ့ဖူးသူမဟုတ်သည့်အတွက် ၎င်းနှင့်ပတ်သတ်ပြီး များများစားစားမသိရပေ။ အဘူအယ်လ်ဟက်ဆန်သည်ယခင်ကတည်းက သေဆုံးခဲ့ခြင်း ဖြစ်သည်ဟုလည်း သတင်းဌာနတစ်ခုက ထုတ်ပြန်ခဲ့သည်။ IS အဖွဲ့နှင့်ပြိုင်ဘက် အယ်လ်ကိုင်းဒါးအဖွဲ့ကို ထောက်ခံသည့် သတင်းချန်နယ်တစ်ခုက တနင်္လာနေ့တွင်ထုတ်ပြန်ခဲ့ခြင်းဖြစ်သည်။

အဘူအယ်လ်ဟက်ဆန်ကို ဆီးရီးယား အနောက်တောင်ဘက် ဒီရားပြည်နယ်တွင် ဆီးရီးယားလွတ်မြောက်ရေး တပ်မတော်မှ ရှင်းလင်းခဲ့ခြင်းဖြစ်သည်ဟု အမေရိကန်ဘက်က ထုတ်ပြန်ထားခဲ့သည်။ အဆိုပါအဖွဲ့သည် ဆီးရီးယား ပြည်တွင်းစစ်အတွင်းအာဆတ်အစိုးရကို ဖြုတ်ချရန်ကြိုးပမ်းနေသည့် သူပုန် တပ်ပေါင်းစုလည်း ဖြစ်သည်။ အဆိုပါစစ်ဆင်ရေးတွင် အမေရိကန်အနေဖြင့် ပါဝင်ပတ်သတ်ခဲ့ခြင်းမရှိဟု ကြေညာခဲ့ပြီး အဘူအယ်လ်ဟက်ဆန် သေဆုံးခဲ့မှုအပေါ် ကြိုဆိုသည်ဟု အမေရိကန်လုံခြုံရေးကောင်စီ မှပြောခွင့်ရပုဂ္ဂိုလ် ဂျွန်ကာဘီက ပြောသည်။

IS အဖွဲ့သည် တစ်ချိန်က အီရတ်အရှေ့ပိုင်းမှ ဆီးရီးယား အနောက်ပိုင်းအထိ စတုရန်းကီလိုမီတာ ၈၈၀၀၀ (စတုရန်းမိုင် ၃၄၀၀၀) ခန့်ကို ထိန်းချုပ်နိုင်ခဲ့ပြီး လူပေါင်း ၈ သန်းခန့်ကို လူမဆန်စွာ အုပ်ချုပ်ခဲ့သည်။ ယင်းတို့၏ နောက်ဆုံးထိန်းချုပ်ရာနယ်မြေကို ၂၀၁၉ ခုနှစ်ကတည်းက ရှင်းလင်းနိုင်ခဲ့သော်လည်း IS အဖွဲ့သည် စိုးရိမ်စရာ ခြိမ်းခြောက်မှုအဖြစ် တည်ရှိနေဆဲဖြစ်ကြောင်း ကုလသမဂ္ဂက ဇူလိုင်လတွင် ထုတ်ပြန်သတိပေးခဲ့သည်။

Source:BBC