CNI International News

အာမတ်ဒါဘတ်၊ ဒီဇင်ဘာ ၉

အိန္ဒိယဝန်ကြီးချုပ် နာရန်ဒရာ မိုဒီ (Narendra Modi)၏ BJP ပါတီသည် သူ၏မွေးရပ်မြေ ဂူဂျာရတ်ပြည်နယ်တွင် သောင်ပြိုကမ်းပြို အနိုင်ရရှိခဲ့သည်ဟု ကြာသပတေးနေ့ မဲရေတွက်မှုများတွင် တွေ့ခဲ့ရကြောင်း AFP သတင်း တွင် ဖော်ပြသည်။

အဆိုပါ အနိုင်ရလဒ်သည် လာမည့် ၂၀၂၄ ရွေးကောက်ပွဲမတိုင်ခင် ကောင်းမွန်သော စွမ်းဆောင်ရည် ဖြစ်သည်။

လူဦးရေ သန်း ၆၀ နီးပါး နေထိုင်သော ဂူဂျာရတ်ပြည်နယ်တွင် လွှတ်တော်ကိုယ်စားလှယ် ၁၈၂ နေရာရှိကာ BJP ပါတီက အနည်းဆုံး ၁၄၇ နေရာကို အနိုင်ရရှိခဲ့သည်။

သို့သော် မဲရေတွက်မှု အားလုံး ပြီးဆုံးချိန်တွင် နောက်ထပ် ၉ နေရာ ထပ်မံရရှိမည်ဟုလည်း ခန့်မှန်းထားသည်။

မိုဒီသည် သူ၏မွေးရပ်မြေတွင် မဲဆွယ်စည်းရုံးမှုများကို အရှိန်အဟုန်မြှင့် လုပ်ဆောင်ခဲ့သည်။

ကွန်ဂရက်ပါတီ ခေါင်းဆောင်များကိုတွေ့ရစဉ် (GETTY IMAGES)

မိုဒီသည် ၂၀၁၄ ခုနှစ်က အိန္ဒိယနိုင်ငံ၏ ဝန်ကြီးချုပ် ဖြစ်မလာခင် ထိုပြည်နယ်တွင် ၁၂ နှစ်ကြာ ပြည်နယ်ဝန်ကြီး ချုပ်အဖြစ် ဆောင်ရွက်ခဲ့ဖူးသည်။

မဲရလဒ်ကြောင့် အလွန်အင်မတန် စိတ်လှုပ်ရှားရကြောင်း၊ ပြည်နယ်သူ/သားများကို ကျေးဇူးတင်ကြောင်း မိုဒီက တွစ်တာတွင် ရေးသားခဲ့သည်။

မိုဒီ ပြည်နယ် ဝန်ကြီးချုပ်အဖြစ် တာဝန်ထမ်းဆောင်ခဲ့သည့် ဂူဂျာရတ်ပြည်နယ်တွင် လူဦးရေ ၁၀၀၀ နီးပါး သေဆုံးခဲ့ရသော လူမျိုးရေးပြဿနာ ဖြစ်ပွားခဲ့ဖူးသည်။ အဆိုပါ သေဆုံးသူ အများစုမှာ မူဆလင်များ ဖြစ်သည်။

ဂူဂျာရတ်ပြည်နယ်တွင် ဒီဇင်ဘာ ၁ ရက်နေ့မှ ၅ ရက်အထိ မဲပေးမှု လုပ်ဆောင်ခဲ့ရာ မဲပေးမှု မစတင်ခင်က ရေပန်း စားခဲ့သော ကွန်ဂရက်ပါတီမှာ အဆိုးရွားဆုံး ရလဒ်အဖြစ် နေရာ ၁၆ နေရာသာ အနိုင်ရခဲ့သည်။

 AAP ခေါင်းဆောင်များကိုတွေ့ရစဉ် (GETTY IMAGES)

BJP သည် နယူးဒေလီနှင့် ပန်ဂျပ်ကို အုပ်ချုပ်နေသော AAP ပါတီ၏ ခြိမ်းခြောက်မှုနှင့် ရင်ဆိုင်ခဲ့ရသော်လည်း အဆိုပါ ပါတီမှာ ၅ နေရာသာ အနိုင်ရရှိခဲ့သည်။

BJP ပါတီသည် ဂူဂျာရတ်ပြည်နယ်ကို ၂၇ နှစ်ဆက်တိုက် အုပ်ချုပ်ခဲ့ကာ ၎င်းနှင့် မဟာမိတ်ပါတီများသည် အိန္ဒိယ၏ ပြည်နယ် ၂၈ ခုမှ ၁၆ ခုကို ကြီးစိုးထားသည်။

မဲဆွယ်ကာလအတွင်း BJP သည် လူမှုကွန်ယက်ကို အင်တိုက်အားတိုက် အသုံးချခဲ့သလို ခရစ်ကတ် ကစားသမား ဟောင်းတစ်ဦးနှင့် လက်ရှိ ကစားသမားတစ်ဦးတို့၏ ဇနီးသည်တို့ကိုလည်း အသုံးချ မဲဆွယ်ခဲ့သည်။

အစောပိုင်း ရလဒ်များတွင်လည်း BJP သည် အူတာပရာဒတ်ရှ် ပြည်နယ်တွင် ကြီးကြီးမားမား အနိုင်ရရှိခဲ့သော် လည်း ဟီမာချယ် ပရာဒတ်ရှ် ပြည်နယ်တွင်တော့ ကွန်ဂရက်ပါတီကို ရှုံးနိမ့်ထားသည်။

လာမည့် ၂၀၂၄ ခုနှစ်တွင် အိန္ဒိယနိုင်ငံ၌ ရွေးကောက်ပွဲ ကျင်းပရန် စီစဉ်ထားပြီး အသက် ၇၂ နှစ်အရွယ် မိုဒီပဲ တတိယသက်တမ်းကို အနိုင်ရရှိလိမ့်မည်ဟု ခန့်မှန်းမှုများ ရှိနေသည်။

Source: CNA

CNI International News

ဗျူနိုအေရိစ်၊ ဒီဇင်ဘာ ၉

သမ္မတအဖြစ် တာဝန်ထမ်းဆောင်စဉ်ကာလအတွင်း ဒေါ်လာ ၁ ဘီလီယံကို အလွဲသုံးစားလုပ်မှုဖြင့် အာဂျင်တီးနား ဒုသမ္မတ ခရစ္စတီးနား ဖာနန်ဒက်ဇ်ကို ထောင်ဒဏ်ချမှတ်ခဲ့ကြောင်း AP သတင်းတွင်ဖော်ပြသည်။
ပြည်သူ့လုပ်ငန်းများအတွက် ငွေကို အလွဲသုံစားမှုကြောင့် သူမသည်နိုင်ငံရေးလောကမှ ရာသက်ပန် ဖယ်ရှားခံခဲ့ရ ပြီလည်း ဖြစ်သည်။

တရားသူကြီး ၃ ဦးပါသော အဖွဲ့က အလွဲသုံးစားမှုဖြင့် သူမကို ပြစ်ဒဏ်ပေးခဲ့ခြင်းဖြစ်သည်။ ဖာနန်ဒက်ဇ်သည် တရားမဝင် ရာဇဝတ်ဂိုဏ်းတစ်ခုကို ဖွဲ့စည်းမှုဖြင့်လည်း စွပ်စွဲခံထားရသော်လည်း ယင်းကို တရားသူကြီးများက ပယ်ဖျက်ခဲ့သည်။ ထိုအမှုတွင်ပါ အပြစ်ရှိကြောင်းတွေ့ရလျှင် သူမ၏ ပြစ်ဒဏ်မှာနှစ်ဆ ဖြစ်လာနိုင်သည်။

ဖာနန်ဒက်ဇ်သည် တာဝန်ယူချိန်အတွင်းအပြစ်ပေးခံရသည့် ပထမဆုံးသော ဒုတိယသမ္မတအဖြစ်လည်း အာဂျင်တီးနားသမိုင်းတွင် မှတ်တမ်းဝင်သွားခဲ့ပြီဖြစ်သည်။ ၂၀၀၇ မှ ၂၀၁၅ အထိ သမ္မတအဖြစ် ထမ်းဆောင် ခဲ့သော ဖာနန်ဒက်ဇ်က တရားရင်ဆိုင်ရချိန်တွင် သူမသည် မတရားခံခဲ့ရသည်ဟု ထွက်ဆိုခဲ့သော်လည်း နောက်ပိုင်းတွင် လာမယ့်နှစ် သမ္မတရွေးကောက်ပွဲကို မဝင်တော့ဟု ပြောသည်။ ပြစ်ဒဏ်ချခံခဲ့ရသော်လည်း ၎င်းသည် အယူခံနှင့်ပတ်သတ်၍ မဆုံးဖြတ်မချင်း အကျုံးဝင်ဦးမည်မဟုတ်ပေ။ အယူခံဖြစ်စဉ်သည် နှစ် အနည်းငယ် ကြာမြင့်နိုင်ကာ ဖာနန်ဒက်ဇ်သည်လည်း ဖမ်းဆီးခံရဦးမည်မဟုတ်ပေ။

အာဂျင်တီးနားသမ္မတဟောင်း ခရစ္စတီးနား ဖာနန်ဒက်ဇ်အား ထောက်ခံသူများသည် တရားရုံးအပြင်ဘက်တွင် တရားသူကြီးများက သူမအား အကျင့်ပျက်ခြစားမှုဖြင့် စီရင်ချက်ချမည့် ၂၀၂၂ ခုနှစ် ဒီဇင်ဘာ ၆ ရက်နေ့၌ စုရုံးကာ ဆန္ဒထုတ်ဖော်ခဲ့ကြစဉ်(ဓါတ်ပုံ-အေပီ)

ပြစ်ဒဏ်ချခံရမှုကြောင့် ဖာနန်ဒက်ဇ်ကို ထောက်ခံသူများက တစ်နိုင်ငံလုံးအတိုင်းအတာဖြင့် သပိတ်မှောက်မည် ဟုပြောသည်။ ထောက်ခံသူများသည် မြို့တော် ဗျူနိုအေးရိစ် (Buenos Aires) မြို့လယ်မှ ဖက်ဒရယ်တရားရုံး အဆောက်အဦသို့ချီတက်ခဲ့ကြသည်။

ဖာနန်ဒက်ဇ်က သူမအပေါ်စွဲထားသော စွဲချက်များအားလုံးကို ငြင်းဆိုထား သည်။ သူမသည် မိသားစုနှင့် နီးစပ်သော ဆောက်လုပ်ရေးလုပ်ငန်းတစ်ခုနှင့် ပြည်သူ့လုပ်ငန်း စာချုပ်များကို ချုပ်ဆိုရာတွင် အလွဲသုံးစားမှု လုပ်ခဲ့သည်ဟု စွပ်စွဲခံထားရခြင်းဖြစ်သည်။ဖာနန်ဒက်ဇ်သည် တိုင်းပြည်အတွင်း ချစ်သူ၊ မုန်းသူများကို ပိုင်ဆိုင်ထားခြင်းကြောင့် သူမကိုပြစ်ဒဏ်ချမှတ်ခြင်းက အာဂျင်တီးနားနိုင်ငံ၏ နိုင်ငံရေးအခြေအနေမှာ ဆိုးရွားလာဖို့ရှိနေသည်။

ဖာနန်ဒက်ဇ်သည် အပြစ်ကင်းစင်ကြောင်းနှင့် သူမကို တရားရုံးစစ်ဆေးမှုများတွင် လိုအပ်ချက်များရှိနေသည်ဟု လက်ရှိ အာဂျင်တီးနားသမ္မတ အဲလ်ဘာတို ဖာနန်ဒက်ဇ် (Alberto Fernandez) က ပြောသည်။ ဖာနန်ဒက်ဇ်သည် သူမအပြင် ကွယ်လွန်ခဲ့ပြီဖြစ်သော သူမ၏ခင်ပွန်းသမ္မတဟောင်း နက်စ်တိုကစ်ချနာ (Nestor Kirchner)တို့နှင့် နီးစပ်သည့် ဆောက်လုပ်ရေးလုပ်ငန်းတစ်ခုဖြစ်သည့် Lázaro Báez နှင့် ပြည်သူပိုင်လုပ်ငန်း ၅၁ ခုကို စာချုပ်ချုပ် ဆိုရာတွင် အလွဲသုံးစားမှုများကို ဦးဆောင်ခဲ့ခြင်းဖြစ်သည်ဟုလည်း အစိုးရရှေ့နေများက ပြောသည်။

Source:AP

CNI International News

ရီယတ်၊ ဒီဇင်ဘာ ၉

စွမ်းအင်နှင့် ရင်းနှီးမြှုပ်နှံမှုဆိုင်ရာ ကဏ္ဍများ အပါအဝင် တရုတ်နှင့်ဆော်ဒီနိုင်ငံတို့သည် သဘောတူညီချက်များစွာတွင် လက်မှတ်ရေးထိုးခဲ့သည်ဟု Reuters သတင်းမှာ ဖော်ပြထားသည်။

နှစ်နိုင်ငံ ခေါင်းဆောင်များသည် မြို့တော်ရီယတ်တွင် အစည်းအဝေးတစ်ခု ကျင်းပခဲ့သည်။ ထိုအစည်းအဝေးသည် နှစ်နိုင်ငံဆက်ဆံရေး၌ ရေနံရောင်းဝယ်ရေးထက် ပို၍လေးနက်ကြောင်း ဖော်ပြနေသည်။

အဆိုပါ အစည်းအဝေးကို တော်ဝင်နန်းတော်တွင် ကျင်းပခဲ့ခြင်းဖြစ်ပြီး ဆော်ဒီဘုရင် ဆဲလ်မန် ဘင် အဗ္ဗဒဲလ် အဇစ် (Salman bin Abdul Aziz)၊ အိမ်ရှေ့စံ မိုဟာမက် ဘင် ဆဲလ်မန် (Mohammad bin Salman) တို့နှင့် တရုတ်သမ္မတ ရှီကျင့်ဖျင်(Xi Jinping) တို့က လက်မှတ်ထိုးခဲ့ခြင်းဖြစ်သည်။

လက်မှတ်ထိုးခဲ့သော သဘောတူညီမှုများတွင် မဟာဗျူဟာမြောက် မိတ်ဖက် သဘောတူညီချက်၊ ရေနံအပေါ် စီးပွားရေး မှီခိုနေရမှုကို ပြောင်းလဲရေး ဆော်ဒီ၏ Vision 2030 လိုက်လျောညီထွေမှု အစီစဉ်နှင့် တရုတ်၏ Belt & Road စီမံကိန်း တို့ ပါဝင်သည်။

ရှီကျင့်ဖျင်နဲ့ ဆော်ဒီဘုရင် ဆဲလ်မန် ဘင် အဗ္ဗဒဲလ် အဇစ် သဘောတူစာချုပ် လက်မှတ်ထိုးအပြီး လဲလှယ်နေစဉ် (GETTY IMAGES)

ဟိုက်ဒရိုဂျင် စွမ်းအင်၊ ဆိုလာစွမ်းအင်၊ တိုက်ရိုက်ရင်းနှီးမြှုပ်နှံမှုနှင့် အိမ်ယာ စီမံကိန်းများတွင်လည်း နားလည်မှု စာချွန်လွှာများ ပါဝင်သည်။ ဆော်ဒီဘုရင် ဆဲလ်မန်သည် ထင်သာမြင်သာရှိသော မဟာဗျူဟာမြောက် မိတ်ဖက် သဘောတူညီချက်ကိုလည်း သမ္မတရှီနှင့် လက်မှတ်ရေးထိုးသည်။

သမ္မတရှီကို ဆော်ဒီဘက်မှ အခမ်းအနားဖြင့် ကြီးကြီးကျယ်ကျယ် ကြိုဆိုခဲ့ပြီး ဆော်ဒီမီဒီယာတစ်ခုနှင့် တွေ့ဆုံရာ တွင် ယခုခရီးစဉ်သည် တရုတ်နှင့် အာရပ်ကမ္ဘာ၊ ပင်လယ်ကွေ့ရှိ အာရပ်နိုင်ငံများနှင့် ဆော်ဒီတို့၏ ဆက်ဆံရေး ခေတ်သစ်တစ်ခု ထူထောင်ရန် အစပျိုးသည့် ခရီးစဉ်ဖြစ်သည်ဟု ညွှန်းဆိုခဲ့သည်။

တရုတ်နှင့် အာရပ်နိုင်ငံများသည် ပြည်တွင်းရေးကို ကြားဝင်မစွက်ဖက်ရေး မူဝါဒအား ဆက်လက် ကိုင်ဆွဲကာ၊ အချုပ်အခြာအာဏာဆိုင်ရာ ကိစ္စများတွင် အပြန်အလှန် အခိုင်အမာ ထောက်ပံ့သွားမည်ဟုလည်း ရှီက ပြောသည်။

ဆော်ဒီသည် ကမ္ဘာ့အကြီးမားဆုံး ရေနံရောင်းချသည့် နိုင်ငံဖြစ်ကာ တရုတ်က ၎င်းတို့၏ အကြီးဆုံး ဖောက်သည် ဖြစ်သောကြောင့် နှစ်နိုင်ငံဆက်ဆံရေးတွင် ရေနံမှာ အရေးပါသည်။ ထို့ကြောင့် နှစ်နိုင်ငံစလုံးမှ စွမ်းအင်ကိစ္စ အပြင် တရားသော ကဏ္ဍများတွင်လည်း ဆက်ဆံရေး ခိုင်မာစေရန် ဆောင်ရွက်နေခြင်း ဖြစ်သည်။

Source: Reuters

CNI International News

ဒူဘိုင်း၊ ဒီဇင်ဘာ ၉

လက်ရှိဖြစ်ပေါ်နေသော ဆန္ဒပြပွဲများအတွင်း ပြစ်ဒဏ်ကျူးလွန်ခဲ့သူတစ်ဦးကို ကွပ်မျက်လိုက်ပြီဟု အီရန်နိုင်ငံက ကြာသပတေးနေ့တွင် ထုတ်ပြန်ခဲ့ကြောင်း AP သတင်းတွင် ဖော်ပြသည်။ ယင်းက အီရန်အစိုးရ၏ ပထမဆုံးသော ကွပ်မျက်မှုလည်းဖြစ်သည်။

ကျင့်ဝတ်ထိန်းသိမ်းရေးဆိုင်ရာ ရဲတပ်ဖွဲ့ဝင်များ၏လုပ်ရပ်မှတစ်ဆင့် ပေါ်ပေါက်လာခဲ့သော ဆန္ဒပြပွဲများသည် စက်တင်ဘာလလယ်ပိုင်းတွင် စတင်ခဲ့သည်။ ကြာသပတေးနေ့ ကွပ်မျက်မှုကြောင့် တခြားသော ထိန်းသိမ်းခံ ထားရသူများလည်း ကွပ်မျက်ခံရမည်ကို စိုးရိမ်မှုများရှိလာသည်။

လက်ရှိအချိန်တွင် ဆန္ဒပြပွဲများတွင်ပါဝင်ခဲ့မှုဖြင့် အနည်းဆုံးလူ တစ်ဒါဇင်ခန့် သေဒဏ်ချမှတ်ခံထားရသည်ဟု တက်ကြွလှုပ်ရှားသူများက ပြောသည်။ ဆန္ဒပြသူများကို ကွပ်မျက်မှုလုပ်ဆောင်ခဲ့ခြင်းအား ပြင်းပြင်းထန်ထန် တုန့်ပြန်သင့်ကြောင်းနှင့် ထိုသို့မဟုတ်လျှင် နေ့တိုင်းလိုလို ကွပ်မျက်မှုများရှိလာနိုင်သည်ဟု အော်စလိုအခြေစိုက် အီရန်လူ့အခွင့်အရေးအဖွဲ့ ဒါရိုက်တာ မာမွတ်အမီရီ-မိုဟတ်ဒမ် (Mahmood Amiry-Moghaddam) ကပြောသည်။ ကွပ်မျက်မှုကို နိုင်ငံတကာအတိုင်းအတာဖြင့် လက်တွေ့ကျကျ အရေးယူရမည်ဟုလည်း ၎င်းကဆက်ပြောသည်။

အောက်တိုဘာလလယ်မှ စတင်လာခဲ့သည့် အီရန်ဆန္ဒပြမှုများအတွင်း မြင်ကွင်း(ဓါတ်ပုံ- Associated Press)

အီရန်အစိုးရ၏သေဒဏ်ပေးမှုအပေါ် ဂျာမနီနိုင်ငံခြားရေးဝန်ကြီးကလည်း ရှုတ်ချခဲ့ပြီး အစိုးရသည် လူသားဆန်မှု ဘောင်ကိုကျော်လွန်သွားခဲ့ပြီဟု ပြောသည်။ အီရန်တရားရေးဌာန၏ The Mizan သတင်းတွင် ကွပ်မျက်ခံရသည့် ဆန္ဒပြသူမှာ မိုဟန်ရှိတ်ကာရီ(Mohsen Shekari)ဟု ဖော်ပြသည်။ ယင်းကို တီဟီရန်မြို့ရှိ တော်လှန်ရေးတရားရုံးက အမိန့်ချ ခဲ့ခြင်းဖြစ်သည်ဟု သတင်းတွင်ဖော်ပြထားသည်။

အဆိုပါတရားရုံးသည် ပုံမှန်အားဖြင့် တံခါးပိတ်စစ်ဆေးမှုကို လုပ်ဆောင်သည်။ ထို့ကြောင့် ရှေ့နေခေါ်ခွင့်မပေးခြင် သို့မဟုတ် စွဲဆိုထားမှုနှင့်ပတ်သတ်သည့် သက်သေတင်ပြမှု မရှိခြင်းတို့ကြောင့်လည်း အဆိုပါတရားစီရင်ရေးကို နိုင်ငံတကာက ဝေဖန်ထားသည်။

ရှိတ်ကာရီသည် တီဟီရန်မြို့ရှိလမ်းမတစ်ခုကို ပိတ်ပစ်ခဲ့ခြင်း၊ လုံခြုံရေးတပ်ဖွဲ့ဝင်များကို ဓားဖြင့် တိုက်ခိုက်ကာ ဒဏ်ရာရစေခြင်းတို့ဖြင့် စွပ်စွဲခံထားရသည်။ ရှိတ်ကာရီသည် ထိုသို့တိုက်ခိုက်မှုပြုလုပ်ရန်အတွက် တစ်စုံ တစ်ယောက်ဆီမှ ငွေးကြေးလက်ခံရယူခဲ့သည်ဟုလည်း The Mizan သတင်းတွင် ဖော်ပြထားသည်။

အီရန်အစိုးရသည် နိုင်ငံတွင်းမှ မတည်ငြိမ်မှုများကို တခြားနိုင်ငံများက ကြိုးကိုင်စီစဉ်နေသည်ဟု လပေါင်းများစွာ စွပ်စွဲထားခဲ့သော်လည်း အထောက်အထားပြသခြင်းမရှိပေ။ ယခုဆန္ဒပြပွဲများမှာ နိုင်ငံ၏စီးပွားရေးပြိုလဲမှု၊ အစိုးရ ပိုင်းမှအကျင့်ပျက်ခြစားမှုနှင့် နိုင်ငံ၏အစ္စလာမ္မစ်ခေါင်းဆောင်များ အားကောင်းလာမှုတို့အပေါ် ပြည်သူများ၏ ဒေါသကြောင့် ပေါ်ပေါက်လာရခြင်းဖြစ်သည်ဟု ဆန္ဒပြသူများဘက်မှ ပြောသည်။

Source:AP

CNI International News

တီဟီရန်၊ ဒီဇင်ဘာ ၈

နိုင်ငံအတွင်း အစိုးရဆန့်ကျင်ရေး ဆန္ဒပြပွဲများ ဖြစ်ပွားနေချိန်တွင် အီရန်သမ္မတ အီဘရာဟင် ရိုင်စီ (Ebrahim Raisi )သည် အမေရိကန်နိုင်ငံကို ပြစ်တင်ရှုတ်ချခဲ့ပြီးနောက် အာဏာရှင်အစစ်က ဘယ်သူလဲဟု မေးခွန်းထုတ်ခဲ့ ကြောင်း အယ်ဂျာဇီးယားသတင်းဌာနတွင် ဖော်ပြထားသည်။

သမ္မတသည် ကျောင်းသားနေ့ အခမ်းအနားအတွက် ဗုဒ္ဓဟူးနေ့တွင် တီဟီရန် တက္ကသိုလ်သို့ သွားရောက်ခဲ့ပြီး ၎င်း၏ မိန့်ခွန်းအတွင်း ဆန္ဒပြမှုများနှင့် အဓိကရုန်း ဖြစ်ရပ်များအကြား မတူကွဲပြားပုံကို ဇောင်းပေး ပြောဆိုခဲ့သည်။

သုံးလ သက်တမ်းအတွင်းသို့ ရောက်ရှိလာပြီဖြစ်သော အီရန်ုနိုင်ငံ၏ ဆန္ဒပြပွဲများကို အာဏာပိုင်များက အဓိကရုန်း ဖြစ်ရပ်များဟု မကြာခဏဆိုသလို သုံးနှုန်းလေ့ ရှိသည်။

အမေရိကန်များက ဖျက်ဆီးရေး သမားများဖြစ်ပြီး အားကောင်းသော အီရန်နိုင်ငံထက် ပျက်စီးနေသော အီရန်နိုင်ငံကို ပိုမြင်ချင်နေကြသည်ဟု အီရန်သမ္မတ အီဘရာဟင်ရိုင်စီက ပြောသည်။

သူတို့သည် အီရန်နိုင်ငံကို ဆီးရီးယား၊ အာဖဂန်တို့လို ဖြစ်စေလိုနေကြောင်း သို့သော် ပညာတတ် အီရန်နိုင်ငံသား များက ထိုသို့ အဖြစ်မခံကြောင်း ၎င်းက ဆက်ပြောသည်။

ဆီးရီးယား စစ်ပွဲအတွင်းက အခြေအနေကိုတွေ့ရစဉ် (GETTY IMAGES)

ရိုင်စီက “အာဏာရှင်အကြောင်း ကျနော်တို့ ပြောနေကြပေမယ့် ဘယ်သူက အာဏာရှင်လဲ။ ကျနော်တို့ နိုင်ငံ အပေါ် ပိတ်ဆို့အရေးယူမှုတွေ လုပ်ဆောင်နေသူကသာ အာဏာရှင် မဟုတ်ဘူးလား” ဟု မေးခွန်းထုတ်သည်။

၎င်းက အီရန်နိုင်ငံအပေါ် ပိတ်ဆို့အရေးယူမှုများ ချမှတ်ဆောင်ရွက်နေသည့် အမေရိကန်နိုင်ငံကို ညွှန်းဆို ပြော ကြားဖြစ်သည်ဟု အယ်ဂျာဇီးယားသတင်းဌာနက ရေးသားခဲ့သည်။

သမ္မတ၏ တီဟီရန်တက္ကသိုလ် ခရီးစဉ်သည် အွန်လိုင်းတွင် ပျံ့နှံ့နေသည့် တစ်နိုင်ငံလုံး အတိုင်းအတာဖြင့် ဆန္ဒပြ၊ သပိတ်မှောက်မှု၏ နောက်ဆုံးနေ့တွင် ဖြစ်ခဲ့သည်။

နိုင်ငံတွင်း အင်တာနက် ကန့်သတ်မှုများ လုပ်ဆောင်ထားသော်လည်း မြို့တော်တီဟီရန် (Tehran) အပါအဝင် တခြား မြို့များ၌ ဆန္ဒပြပွဲများ ဖြစ်ပွားနေသည့် ဗွီဒီယိုဖိုင်များ ပျံ့နှံ့လျက်ရှိသည်။

တခြား ဗွီဒီယိုများတွင် နိုင်ငံတစ်လွှားရှိ မြို့ကြီးများမှ ဆိုင်များ ပိတ်ထားသည်ကို မြင်တွေ့ခဲ့ရသော်လည်း နိုင်ငံပိုင် မီဒီယာများတွင်တော့ ဆိုင်များ ပုံမှန်အတိုင်း ဖွင့်လှစ်လျက်ရှိသော ပုံရိပ်များကို ဖော်ပြထားသည်။

Source: Al Jazeera

CNI International News

ဒူဘိုင်း၊ ဒီဇင်ဘာ ၈

ပင်လယ်ကွေ့ နိုင်ငံများနှင့်တွေ့ဆုံရန် တရုတ်သမ္မတ ရှီကျင့်ဖျင်သည် ဗုဒ္ဓဟူးနေ့တွင် ဆော်ဒီအာရေးဗျ နိုင်ငံသို့ ရောက်ရှိခဲ့သည်ဟု AP သတင်းတွင် ဖော်ပြထားသည်။

ကိုရိုနာဗိုင်းရပ်စ်ဆိုင်ရာ ကန့်သတ်ချက်များကြောင့် တရုတ်နိုင်ငံအတွင်း စီးပွားရေး ကျဆင်းနေမှုကို ပြန်လည် ဦးမော့ရန် ကြိုးပမ်းမှုအဖြစ် စွမ်းအင်လိုအပ်ချက်အား ဖြည့်စည်းရန်အတွက် ထိုသို့ သွားရောက်ခဲ့ခြင်းလည်း ဖြစ်သည်။

ရှီကျင့်ဖျင် (Xi Jinping)သည် တရုတ်လေကြောင်းလိုင်း၏ ဘိုးရင် ၇၄၇ လေယာဉ်ဖြင့် ရောက်ရှိလာခဲ့ခြင်းဖြစ်သည်။

ရှီသည် လေဆိပ်တွင် ရီယတ်မြို့အုပ်ချုပ်ရေးမှူး မင်းသား ဖိုင်ဆယ်ဘင်ဘန်ဒါ ( Faisal bin Bandar)နှင့် တွေ့ဆုံသည်။ အမေရိကန်ဘက်မှ စိတ်ဝင်စားမှု လျော့နည်းလာခြင်းကြောင့် ပင်လယ်ကွေ့နိုင်ငံများသည် ၎င်းတို့၏ နိုင်ငံခြားရေးမူဝါဒကို ပြောင်းလဲရန် ကြိုးစားလျက်ရှိသည်။

ထို့အပြင် ရုရှား၏ ယူကရိန်း ကျူးကျော်စစ်ကြောင့်လည်း အာရပ်နိုင်ငံများက တရုတ်နှင့်ဆက်ဆံရေးကို ခိုင်မာအောင် ဆောင်ရွက်လိုနေခြင်း ဖြစ်သည်။

ရှီကျင့်ဖျင်နဲ့ ဆော်ဒီ အိမ်ရှေ့စံမင်းသား မိုဟာမက်ဘင်ဆယ်လ်မန် (GETTY IMAGES)

ဆော်ဒီ ခရီးစဉ်တွင် ရှီသည် တရုတ်-အာရပ်ပြည်ထောင်စုများ ညီလာခံနှင့် ပင်လယ်ကွေ့နိုင်ငံများ ပူးပေါင်း ဆောင်ရွက်မှု အစည်းအဝေးကို တက်ရောက်မည်ဟု ယူဆရသည်။

အဆိုပါ အစည်းအဝေးတွင်း ဘာရိန်း၊ ကူဝိတ်၊ အိုမန်၊ ကာတာနှင့် ယူအေအီးနိုင်ငံတို့ ပါဝင်သည်။

တရုတ် - အာရပ်ဆက်ဆံရေး သမိုင်းကြောင်းကို တစ်ခေတ်ဆန်းစေသည့် အောင်မြင်မှု မှတ်တိုင်တစ်ခုကို လုပ် ဆောင်မည့် အကြီးမားဆုံးနှင့် အမြင့်ဆုံးသော တရုတ်၊ အာရပ်သံတမန် အခမ်းအနားဟု တရုတ်နိုင်ငံခြားရေး ဌာနက ထုတ်ပြန်ထားသည်။

တရုတ်နိုင်ငံသည် ရေနံစိမ်း တင်သွင်းမှုဆိုင်ရာ ကမ္ဘာ့အကြီးဆုံး နိုင်ငံတစ်ခုဖြစ်ပြီး ဆော်ဒီမှ ရေနံများကို နှစ်စဉ် ဒေါ်လာဘီလီယံနှင့်ချီ ဝယ်ယူလျက်ရှိသည်။ ထို့အပြင် တရုတ်နိုင်ငံအတွင်း ရေနံစိမ်း လိုအပ်ချက်နှင့်ပတ်သက် ၍လည်း ရှီက နားလည် သဘောပေါက်ထားသည်။

ယခု ခရီးစဉ်အတွင်း ရှီသည် အသက် ၈၆ နှစ်အရွယ် ဆော်ဒီဘုရင် ဆယ်လ်မန် (King Salman) အပြင် အိမ်ရှေ့စံ မင်းသား မိုဟာမက်ဘင်ဆယ်လ်မန် (Mohammed bin Salman) တို့နှင့်လည်း တွေ့ဆုံရန် စီစဉ်ထားသည်။

ထို့နောက် ခရီးစဉ်အတွင်း ရေနံရောင်းဝယ်မှုအပြင် ဆော်ဒီမင်းသား၏ ဒေါ်လာ ဘီလီယံ ၅၀၀ တန် နီယွန် (Neom) မြို့တော်စီမံကိန်းအတွက် တရုတ်ဆောက်လုပ်ရေးကုမ္ပဏီများ ပါဝင်ရေးအတွက်လည်း ဆွေးနွေးမှုများ လုပ်ဆောင် သွားမည်ဖြစ်သည်။

Source: AP

CNI International News

ဘာလင်၊ ဒီဇင်ဘာ ၈

ကိုယ့်ကိုယ်ကို မင်းသားဟု သတ်မှတ်ထားသူတစ်ဦး၊ အငြိမ်းစား လေထီးတပ်သားနှင့် တရားသူကြီးဟောင်း တစ်ဦးတို့ အပါအဝင် အာဏာသိမ်းရန် ကြိုးပမ်းခဲ့သူ ဒါဇင်ပေါင်းများစွာကို ဂျာမန်ရဲတပ်ဖွဲ့က ဗုဒ္ဓဟူးနေ့တွင် ဖမ်းဆီးခဲ့သည်ဟု AP သတင်းမှ ဖော်ပြခဲ့သည်။

ဖမ်းဆီးခဲ့သည့် သံသယရှိသူများသည် အစိုးရကို အကြမ်းဖက်ဖြုတ်ချရန် စီစဉ်နေသည်ဟု စွပ်စွဲခံထားရသော် လည်း ၎င်းတို့၏ အစီစဉ်များမှာ မည်မျှ ခိုင်မာမှု ရှိနေသည်ဆိုကြောင်းတော့ ရှင်းရှင်းလင်းလင်း မသိရသေးပေ။

အာဏသိမ်းရန် အမှန်တကယ် စီစဉ်နေခြင်း သို့မဟုတ် စိတ်ကူးယဉ် ဇာတ်လမ်းဆင်ခြင်း နှစ်မျိုးစလုံးနှင့်ပတ် သက်၍ အစိုးရရှေ့နေများက သတိပြုမိခဲ့သည်ဟု ဂျာမန်အရာရှိ တစ်ဦးနှင့် လွှတ်တော်အမတ်တစ်ဦးတို့ကပြောသည်။

သို့သော်လည်း ဂျာမန်ရဲတပ်ဖွဲ့က ယခုကဲသို့ လက်ယာစွန်းအဖွဲ့များ၏ ခြိမ်းခြောက်မှုကို အလေးအနက်ထား ဆောင်ရွက်ခဲ့ပြီး တပ်ဖွဲ့ဝင် ထောင်ပေါင်းများစွာမှ နိုင်ငံအနှံ့မှာ စီးနင်းဖမ်းဆီးမှုများ ပြုလုပ်ခဲ့သည်။

အာဏာသိမ်းရန် ကြံစည်မှု စွပ်စွဲချက်ဖြင့် ဂျာမနီရဲတပ်ဖွဲ့ စစ်ဆေးနေစဉ် (AP)

လက်ရှိ အခြေအနေများအရ လူစုတစ်စုက ဒီမိုကရေစီအစိုးရကို အကြမ်းဖက် ဖျက်သိမ်းရန်နှင့် လွှတ်တော် အဆောက်အဦကို လက်နက်ကိုင် တိုက်ခိုက်ရန် စီစဉ်ခဲ့သည်ဟု ဂျာမန်အစိုးရ ပြောခွင့်ရပုဂ္ဂိုလ်က ပြောသည်။

သို့သော် ထိုလူစုတွင် အစီအစဉ်သာရှိခဲ့ပြီး တစ်စုံတစ်ရာ လုပ်နိုင်စွမ်းမရှိကြောင်းလည်း လွှတ်တော်အမတ်တစ်ဦး က ပြောသည်။

အခြေအနေ အမှန်များကို သိလာချိန်မှာ ထိုလူစုသည် အာဏာသိမ်းမှုကို အမှန်တကယ် လုပ်ဆောင်နိုင်ဖို့အထိ ထူးချွန်နေမလားဆိုတာ သံသယဝင်လာပါသည်။ သို့သော်လည်း ၎င်းတို့၏ အစီအစဉ်များမှာ အန္တရာယ်ရှိသည်ဟု လွှတ်တော်အမတ် ဆာရာနန်နီ (Sara Nanni) က ပြောသည်။

ဖမ်းဆီခံခဲ့ရသူများမှာ ဖွဲ့စည်းပုံအခြေခံဥပဒေကို ဆန့်ကျင်သည့် Reich Citizens လှုပ်ရှားမှုများမှ ဇာတ်လမ်းများ အပါအဝင် ပူးပေါင်းဆောင်ရွက်ခြင်းဆိုင်ရာ လျှို့ဝှက်ကြံစည်မှုများနှင့် QAnon ideology ဟုခေါ်သော အမေရိကန် ဘက်မှလာသည့် နိုင်ငံရေးဆိုင်ရာ လျှို့ဝှက်ကြံစည်မှုများကို ယုံကြည်ကြသူများ ဖြစ်သည်ဟု ဖက်ဒရယ်အစိုးရ ရှေ့နေတစ်ဦးက ပြောသည်။

Reich Citizens လှုပ်ရှားမှုသည် ဂျာမနီနိုင်ငံ၏ စစ်နှောင်းကာလ အခြေခံဥပဒေကို ဆန့်ကျင်သူများဖြစ်ကာ အစိုးရကို ဖြုတ်ချရန် တောင်းဆိုခဲ့ဖူးသည်။ Reich Citizens လှုပ်ရှားမှုကို ဂျာမနီထောက်လှမ်းရေးအဖွဲ့က ၂၀၁၆ ခုနှစ်ကတည်းက စောင့်ကြည့်နေခဲ့ပြီး ၎င်းကိုလက်ခံသူပေါင်း ၂ သောင်းကျော်လောက် ရှိသည်ဟုလည်း သိရသည်။

အာဏာသိမ်းရန် ကြံစည်မှု စွပ်စွဲချက်ဖြင့် ဂျာမနီရဲတပ်ဖွဲ့ စစ်ဆေးနေစဉ် (AP)

ဗုဒ္ဓဟူးနေ့က ဖမ်းဆီးခံခဲ့ရသူများထဲမှ တစ်ဦးမှာ ရုစ်မင်းသား ဟင်းရစ် ၁၃ ဖြစ်သည်။ အသက် ၇၁ နှစ်အရွယ် မင်းသားသည် ဂျာမနီတွင် တော်ဝင်မိသားစုများနှင့် ပတ်သက်မှုသည်များကို ဖျက်သိမ်းလိုက်သည့်တိုင် အဆိုပါ အမည်နာမ်မကို ဆက်လက် သုံးစွဲနေသူဖြစ်သည်။

၎င်းသည် Reich Citizens အဖွဲ့ဝင်တစ်ဦးလည်း ဖြစ်သည်။

ဂျာမနီအစိုးရရှေ့နေများ၏ ပြောဆိုချက်အရ ရုစ်သည် နိုင်ငံတွင်း ခေါင်းဆောင်သစ် တင်ရန် ကြံစည်နေသူဖြစ်ပြီး အစိုးရပြုတ်ကျသွားချိန်တွင် နိုင်ငံတွင်း အုပ်ချုပ်မှုပုံစံသစ်တစ်ခု ဖော်ဆောင်ရန် ရည်ရွယ်ချက်ဖြင့် ရုရှားအရာရှိ များကိုပါ ဆက်သွယ်ခဲ့သည်ဟု သိရသည်။

သို့သော် ရုရှားဘက်မှ ထိုဆက်သွယ်မှုကို တုန့်ပြန်ခဲ့သည့် အနေအထားမျိုးကိုတော့ မတွေ့ရပေ။

CNI International News

လီမာ၊ ဒီဇင်ဘာ ၈

ပီရူးသမ္မတ ပီဒရို ကတ်စတယ်လို(Pedro Castillo)သည် ပုန်ကန်မှုဖြင့် ရာထူးမှဖယ်ရှားခံရကာ ဖမ်းဆီးခံခဲ့ရ သည်ဟု AP သတင်း တွင်ဖော်ပြသည်။

ဥပဒေပြုလွှတ်တော်ကို ဖယ်ရှားရန် ကြံစည်မှု၊ အစိုးရအဖွဲ့ကို တစ်ဖက်သတ် ထိန်းချုပ်ရန် ကြိုးပမ်းမှုတို့ကြောင့် အခြေခံဥပဒေဆိုင်ရာ အကြပ်အတည်း ဖြစ်ပွားခဲ့ပြီးနောက် ယခုကဲ့သို့ ဖမ်းခံခဲ့ရခြင်းလည်းဖြစ်သည်။

ကတ်စတယ်လို၏ နေရာကို ဒု-သမ္မတ ဒီနာ ဘိုလူရာတီ(Dina Boluarte) က အစားထိုးဝင်ရောက်မည်ဖြစ်ပြီး သူမသည် နိုင်ငံသမိုင်းတွင် ပထမဆုံးသော အမျိုးသမီးခေါင်းဆောင်လည်းဖြစ်လာသည်။ အသက် ၆၀ အရွယ် ရှေ့နေတစ်ဦးဖြစ်သူ ဘိူလူရာတီက နိုင်ငံရေးဆိုင်ရာ ပြေလည်မှုနှင့် ညီညွတ်သော အမျိုးသားအစိုးရတစ်ရပ် ဖွဲ့စည်းရန်တောင်းဆိုသည်။

သမ္မတဟောင်း ပီဒရို ကတ်စတယ်လို(ထိုင်ခုံ လက်ဝဲဘက်ထောင့်စွန်း)နှင့်ဝန်ကြီးချုပ်ဟောင်း အန်နီဘယ်လ် တော်ရက်စ်(ထိုင်ခုံ လက်ယာဘက်ထောင့်စွန်း) တို့ကို အစိုးရရှေ့နေများက မေးမြန်စစ်ဆေးမှုများ ပြုလုပ်နေစဉ် (ဓါတ်ပုံ-အေပီ)

“ကိုယ်ကျင့်တရားဆိုင်ရာ မစွမ်းဆောင်မှု” ဟူသော အကြောင်းပြချက်များဖြင့် သမ္မတဟောင်း ကတ်စတယ်လိုကို လွှတ်တော်အတွင်း ထောက်ခံမဲ ၁၀၁ မဲ၊ ကန့်ကွက်မဲ ၆ မဲ၊ ပျက်ကွက် ၁၀ မဲဖြင့် ရာထူးမှဖယ်ရှားရန် လွှတ်တော် အမတ်များက မဲပေးခဲ့ကြသည်။ ၎င်းသည် သမ္မတနန်းတော်မှထွက်ခွာကာ ရဲစခန်းတစ်ခုအတွင်းသို့ ဝင်ရောက် သွားခဲ့ပြီး နာရီအနည်းငယ်အကြာတွင် ဖက်ဒရယ်အစိုးရရှေ့နေများက ဖွဲ့စည်းပုံအခြေခံဥပဒေကို ချိုးဖျက်ခြင်း ဆိုင်ရာ ပုန်ကန်မှုဖြင့် ကတ်စတယ်လိုကို ဖမ်းဆီးလိုက်ပြီဟု ကြေညာခဲ့သည်။ အဆိုပါဖြစ်ရပ် အပြီးတွင် ရဲစခန်းအနီးလာရောက်ဆန္ဒပြသူများနှင့် ရဲတပ်ဖွဲ့တို့အကြား ပဋိပက္ခ အနည်းငယ် ဖြစ်ပွားခဲ့သည်ဟုလည်း မျက်မြင်တွေ့ရှိသူများကပြောသည်။

လွှတ်တော်အမတ်များက ၎င်းကိုဖယ်ရှားရန် မဲပေးဆုံးဖြတ်မှုအပြီး မကြာခင်မှာပင် ကတ်စတယ်လိုက အရေးပေါ် အစိုးရတစ်ရပ်ဖွဲ့စည်းကြောင်း၊ ဒီကရီဖြင့် အုပ်ချုပ်မည်ဖြစ်ကြောင်း ကြေညာခဲ့သည်။ ဒါ့အပြင် ဗုဒ္ဓဟူးနေ့မှ စတင်မည့် ကာဖျူးအမိန့်တစ်ခုကိုလည်း ညတွင်းချင်းထုတ်ပြန်ခဲ့သည်။

သမ္မတဟောင်း ကတ်စတယ်လိုကို ထောက်ခံအားပေးသူများနှင့် အဓိကရုဏ်းနှိမ်နှင်းရေး ရဲတပ်ဖွဲ့ဝင်များ တွေ့ဆုံစဉ်(ဓါတ်ပုံ-အေပီ)

ယင်းနောက် ပီရူးကာကွယ်ရေးဦးစီးချုပ်အပါအဝင် ဝန်ကြီး ၄ ဦးက ရာထူးမှနုတ်ထွက်သွားခဲ့သည်။ အဆိုပါ အခြေအနေများကြောင့် ကတ်စတယ်လိုအနေဖြင့် ရဲစခန်းတွင် ကိုယ်တိုင်သွားရောက်အဖမ်းခံသင့်သည်ဟု လွတ်လပ်သော အစိုးရအဖွဲ့အစည်းတစ်ခုဖြစ်သည့် Ombudsman’s Office က ပြောသည်။

နှစ်ပေါင်းများစွာ ဒီမိုကရေစီနည်းလမ်းကို ကျင့်သုံးခဲ့ပြီးနောက် ပီရူးနိုင်ငံသည် အခြေခံဥပဒေ ပျက်စီးခြင်းနှင့် ရင်ဆိုင်နေရကာ အာဏာသိမ်းရန်မှလွဲ၍ တခြားလုပ်ဆောင်စရာ မရှိတော့ဟုလည်း ကြေညာချက် တစ်စောင် တွင်ဖော်ပြသည်။
လွတ်တော်ကိုဖျက်သိမ်းခြင်းနှင့်ပတ်သက်၍ ကတ်စတယ်လို၏ လုပ်ရပ်ကို နိုင်ငံတကာအသိုင်းအဝိုင်းများက လည်း ဝေဖန်ခဲ့သည်။

Source:AP

CNI International News

ဘန်ကောက်၊ ဒီဇင်ဘာ ၇

အနည်းဆုံးလုပ်ခလစာနှင့် ကောက်ပဲသီးနှံဈေးနှုန်းကို မြှင့်တင်ပေးသွားမည်ဟု ထိုင်းနိုင်ငံ၏ ပင်မအတိုက်အခံ ပါတီတစ်ခုဖြစ်သော ဖြူးထိုင်းပါတီက အင်္ဂါနေ့တွင် ကတိပြုခဲ့သည်ဟု Bangkok Post သတင်းတွင်ဖော်ပြသည်။

လာမည့်နှစ်အစောပိုင်းတွင် ကျင်းပရန်ရည်ရွယ်ထားသည့် ရွေးကောက်ပွဲများတွင် စစ်တပ်နှင့်ဆက်နွယ်နေသည့် ဆယ်စုနှစ် တစ်ခုကြာအုပ်ချုပ်မှုကို အဆုံးသတ်ရေးမဲဆွယ်မှုများ စတင်ချိန်တွင် ထိုသို့ ပြောဆိုခဲ့ခြင်းဖြစ်သည်။

သူတို့ကိုသာ မဲပေးရွေးချယ်ခဲ့မည်ဆိုလျှင် စီးပွားရေးဖွံ့ဖြိုးမှုကို နှစ်စဉ်ပျမ်းမျှ ၅ ရာခိုင်နှုန်းမြှင့်တင်ရန်၊ ကျန်းမာရေး စောင့်ရှောက်ပေးနိုင်မှုကို တိုးချဲ့ရန်နှင့် ပြည်သူများဝင်ငွေပိုမိုရရှိစေရေးတီထွင်မှုအရည်အသွေးနှင့် ဒစ်ဂျစ်တယ် စီပွားရေးတို့အား လုပ်ဆောင်ပေးသွားမည်ဟုလည်း ဖြူးထိုင်းပါတီက ကတိပေးသည်။

ပြူထိုင်းပါတီ၏ မဲဆွယ်မှုကို ဝန်ကြီးချုပ်ဟောင်း သက်ဆင်ရှင်နာဝပ်ထရာ(Thaksin Shinawatra)၏ သမီးဖြစ်သူ ပေတုန်တန်း(Paetongtarn) က အင်္ဂါနေ့တွင်စတင်ခဲ့ကာ ၎င်းမှာ အမတ်နေရာ ၅၀၀ ရှိသော လွှတ်တော်အတွက် ရွေးကောက်ပွဲများတွင် သောင်ပြိုကမ်းပြိုအနိုင်ရရှိရေး ကြိုးပမ်းမှု၏ အစိတ်အပိုင်းတစ်ခုလည်းဖြစ်သည်။ ရွေး ကောက်ပွဲများကို လာမည့်မတ်လတွင် ကျင်းပရန် စီစဉ်ထားသည်။

ထိုင်းဝန်ကြီးချုပ်ဟောင်း သက်ဆင်ရှင်နာဝပ်၏ သမီးဖြစ်သူ ပေတုန်တန်း

အဆိုပါ ရွေးကောက်ပွဲတွင် ဖြူးထိုင်းပါတီက အနိုင်ရရှိမည်ဟု သတင်းကြီးနေသော်လည်း အစိုးရဖွဲ့ရန် လိုအပ် သော လွှတ်တော်အတွင်း နေရာ ၂၅၀ အတွက် တခြားသောပါတီများ၏ ထောက်ခံမှုများမှာ လိုအပ်နေဆဲ ဖြစ်သည်။ ထိုမှတစ်ဆင့် ဝန်ကြီးချုပ်ကို ဆက်လက်ရွေးချယ်မည် ဖြစ်သည်။

အတိုက်အခံပါတီသည် လက်ရှိဝန်ကြီးချုပ် ပရာယွတ် (Prayut) ၏ အုပ်ချုပ်မှုကို အဆုံးသတ်ရေးအတွက် စီးပွားရေးနာလန်ထူရန် ရုန်းကန်နေရမှု၊ လူနေမှုစရိတ်ကြီးမြင့်လာမှုတို့အပေါ် ပြည်သူများ၏ အလိုမကျမှုကို အခြေခံကာ မဲဆွယ်မှု လုပ်ဆောင်နေသည်။

ငွေကြေးဖောင်းပွမှုမြင့်တက်နေခြင်းနှင့် ကူးစက်ရောဂါအလွန် ကာလအတွင်း စီးပွားရေးရုန်းကန်နေရသည့် အခြေအနေများကြောင့် မကြာသေးခင်ကပြုလုပ်ခဲ့သော လူထုစစ်တမ်းအတွင်း ပရာယွတ်သည် ပေတုန်တန်း၏ နောက်တွင်သာရှိနေသည်။

“ကျနော်တို့ ယခုရွေးကောက်ပွဲကို ရှုံးလို့မဖြစ်ပါဘူး။ ကျနော်တို့အနေနဲ့ ပြည်သူများအတွက် အခွင့်အရေးများနဲ့ မျှော်လင့်ချက်များကို ပြန်လည်ယူဆောင်ပေးရပါမည်” ဟုလည်း ဖြူးထိုင်းပါတီခေါင်းဆောင် ချိုနန်ဆရီကော က ပြောသည်။

Source:Bangkok Post