CNI International News

ဘေဂျင်း၊ ဒီဇင်ဘာ ၂၃

တရုတ်သမ္မတတစ်ဖြစ်လဲ တရုတ်ကွန်မြူနစ်ပါတီ(CPC) ဗဟိုကော်မတီ၏ အထွေထွေအတွင်းရေးမှူးချုပ်တာဝန် နှင့်တရုတ်သမ္မတ တာဝန်တို့ကို ထမ်းဆောင်နေသည့် ရှီကျင့်ဖျင် (Xi Jinping)နှင့် ရုရှားသမ္မတဟောင်း ဒီမီထရီ မက်ဗီဒက်ဗ် (Dmitry Medvedev)တို့ တွေ့ဆုံ၍ ယူကရိန်းအရေး ဆွေးနွေးခဲ့ကြသည်။

လက်ရှိတွင် ဒီမီထရီ မက်ဗီဒက်ဗ်သည် ညီညွတ်သောရုရှားပါတီ (United Russia) ဥက္ကဋ္ဌအဖြစ် တာဝန် ထမ်းဆောင်လျက်ရှိသည်။

ရှီကျင့်ဖျင်နှင့် မက်ဗီဒက်ဗ်တို့သည် ဒီဇင်ဘာ ၂၁ ရက်နေ့က တွေ့ဆုံခဲ့ခြင်းဖြစ်သည်ဟု Global Times သတင်းတွင် ဖော်ပြထားသည်။

အဆိုပါ တွေ့ဆုံပွဲတွင် နှစ်ဖက်စလုံးက နှစ်နိုင်ငံဆက်ဆံရေး အကြောင်းနှင့် ယူကရိန်း ပဋိပက္ခအပေါ် ဆွေးနွေးခဲ့ ကြသည်။

ရှီကျင့်ဖျင်နဲ့ မက်ဗီဒက်ဗ် တွေ့ဆုံ ဆွေးနွေးစဉ်

ထိုဆွေးနွေးမှုက ယူကရိန်းအရေး ငြိမ်းချမ်းရေး ဆွေးနွေးပွဲများတွင် တိုးတက်မှုများ ရှိလာစေရေး အကူအညီ ဖြစ်စေရန် မျှော်လင့်ထားသည်။ ခေါင်းဆောင်နှစ်ဦး တွေ့ဆုံပွဲသည် နှစ်နိုင်ငံရေတပ်များ ပူးတွဲစစ်ရေး လေ့ကျင့်မှု ကျင်းပခြင်းနှင့်လည်း တိုက်ဆိုင်နေသည်။

ထို လေ့ကျင့်မှုက နှစ်နိုင်ငံကြား အပြန်အလှန် ယုံကြည်မှုကို ထင်ဟပ်ကာ ငြိမ်းချမ်းရေးနှင့် တည်ငြိမ်ရေးတို့ အတွက် အထောက်အကူ ဖြစ်စေနိုင်သည်ဟုလည်း လေ့လာသူများက သုံးသပ်ထားသည်။

မက်ဒီဗက်ဗ်နှင့် တွေ့ဆုံစဉ် သမ္မတရှီက “CPC နှင့်ရုရှား ပါတီတို့အကြား ကာလရှည် ဆက်ဆံရေးမှာ ပိုမို ကောင်းမွန်သော လမ်းကြောင်းတစ်ခု ဖြစ်လာပြီး နှစ်နိုင်ငံကြား နိုင်ငံရေးဆိုင်ရာ အပြန်အလှန် ယုံကြည်မှုကို မြှင့်တင်ပေးသည့်အပြင် အပြန်အလှန် အကျိုးဖြစ်ထွန်းစေမည့် ပူးပေါင်းဆောင်ရွက်မှုများကို မြှင့်တင်ပေးကာ မဟာဗျူဟာမြောက် ညီညွှတ်မှုကို ဖော်ပြနေသည်”ဟု ပြောသည်။

နိုင်ငံတကာ ပြောင်းလဲမှုဆိုင်ရာ စမ်းသပ်မှုများ ရှိနေသော်လည်း ပြီးခဲ့သည့် ဆယ်စုနှစ်အတွင်း တရုတ်-ရုရှား ဆက်ဆံရေးမှာ သိသိသာသာ ဖွံ့ဖြိုးတိုးတက်လာကြောင်း၊ ခေတ်သစ် တစ်ခုအတွက် နှစ်နိုင်ငံကြား ပူးပေါင်း ဆောင်ရွက်မှုဆိုင်ရာ သိသာထင်ရှားသည့် မဟာဗျူဟာမြောက် မိတ်ဖက်ဆက်ဆံရေး တစ်ခု ဖော်ဆောင်ခြင်းသည် သက်ဆိုင်ရာ နိုင်ငံအခြေအနေများအပေါ်တွင် အခြေခံကာ နှစ်ဖက်စလုံးမှ ရွေးချယ်ထားသော ကာလရှည် မဟာ ဗျူဟာမြောက် ဆက်ဆံရေး ဖြစ်သည်ဟု ရှီက ပြောခဲ့သည်။

ဇာလန်းစကီးနဲ့ ဘိုင်ဒန် တွေ့ဆုံစဉ် 

ညီညွတ်သော ရုရှားပါတီနှင့် CPC တို့ကြား ဆက်ဆံရေးမှာ တရုတ်-ရုရှား ဆက်ဆံရေးအတွက် အရေးပါသော အစိတ်ပိုင်းတစ်ခု ဖြစ်သည်ဟု မက်ဗီဒက်ဗ်က ပြောသည်။

ရုရှားပါတီအနေဖြင့် နိုင်ငံခေါင်းဆောင်များအကြား ရရှိထားသော သဘောတူညီချက်များကို အပြည့်အဝ အကောင် အထည် ဖော်လိုကြောင်း၊ စီးပွားရေး၊ ကုန်သွယ်ရေး၊ စွမ်းအင်နှင့် စိုက်ပျိုးရေးကဏ္ဍတို့တွင် အပြန်အလှန် ပူးပေါင်း မှုများကို မြှင့်တင်ကာ ပြင်ပဖိအားများနှင့် မမျှတသော လုပ်ရပ်များကို ကြံ့ကြံ့ခံရင်း နှစ်နိုင်ငံဆက်ဆံရေးအား မြှင့် တင် သွားလိုသည်ဟု ပြောခဲ့သည်။

ယူကရိန်းအရေးနှင့် ပတ်သက်၍ ရှီက တရုတ်နိုင်ငံ၏ ရပ်တည်ချက်နှင့် မူဝါဒများအကြောင်းကို ပြောကြားခဲ့ကာ ငြိမ်းချမ်းရေး ဆွေးနွေးပွဲများကို လုပ်ဆောင်သွားရန်လည်း တိုက်တွန်းခဲ့သည်။

Source: Global Times

CNI International News

ဆူဗာ၊ ဒီဇင်ဘာ ၂၃

လွှတ်တော် မခေါ်နိုင်ခဲ့သည့် ပြီးခဲ့သည့် သီတင်းပတ် အငြင်းပွားဖွယ် ရွေးကောက်ပွဲပြီးနောက် နိုင်ငံ၏ တရား ဥပဒေ စိုးမိုးမှုကို ထိန်းသိမ်းရန် ဖီဂျီစစ်တပ်အား ဝန်ကြီးချုပ် ဖရန့်ဘိုင်နီမာရာမာ (Frank Bainimarama)က အကူအညီ တောင်းခံခဲ့ရသည်ဟု အယ်ဂျာဇီးယားသတင်းတွင် ဖော်ပြထားသည်။

နိုင်ငံ၏ သက်တော်ရှည် ဝန်ကြီးချုပ် ဖရန့်ဘိုင်နီမာရာမာက ယခုဖြစ်ရပ်ကို ကြာသပတေးနေ့(ဒီဇင်ဘာ ၂၂ ရက်) တွင် အတည်ပြုပေးသည်။

ရွေးကောက်ပွဲ မတိုင်ခင် လူမျိုးစု အကြမ်းဖက်မှုများ ပေါ်ပေါက်ခဲ့သည်ဆိုသော သတင်းများကြောင့် ယခုကဲ့သို့ စစ်တပ်ကို အကူအညီတောင်းခံရခြင်း ဖြစ်ကြောင်း ၎င်းက ပြောသည်။

ရွေးကောက်ပွဲတွင် ညွှန့်ပေါင်းအစိုးရဖွဲ့ရန် လိုအပ်သော မဲအရေအတွက်ကို ရရှိခဲ့သည်ဟု ပြိုင်ဘက် ဆီတီဗန်နီ ရာဗူကာ(Sitiveni Rabuka)၏ Political Alliance ပါတီနှင့် တခြား ပါတီနှစ်ခုတို့က ပြောသော်လည်း ဘိုင်နီ မာရာမာက ဝန်ခံရန် ငြင်းဆိုထားသည်။

ဝန်ကြီးချုပ် ဖရန့်ဘိုင်နီမာရာမာကိုတွေ့ရစဉ် (GETTY IMAGES)

“အစိုးရအဖြစ် ကျနော်တို့မှာ တာဝန်ရှိနေသရွေ့ ဖီဂျီနိုင်ငံသားတိုင်း၏ လုံခြုံရေးကို ကာကွယ်ရမည်မှာ ကျနော်တို့ တာဝန်ဖြစ်သည်”ဟု ၎င်းက လူမှုကွန်ယက်တွင် ရေးသားခဲ့သည်။

ဒီဇင်ဘာ ၁၄ ရက်က ရွေးကောက်ပွဲ ပြီးနောက် ပထမဆုံးအကြိမ် လူသိရှင်ကြား ရေးသား ပြောဆိုခြင်းလည်း ဖြစ် သည်။

“ရွေးကောက်ပွဲ အချိန်ကာလတွင်း ကျနော်တို့ နိုင်ငံသားများ ထိခိုက်မှု၊ အင်ဒို-ဖီဂျီ အိမ်များနှင့်စီးပွားရေး လုပ်ငန်း များ အကြမ်းဖက် ခံရသည်ဆိုသည့် သတင်းများက စိတ်ပျက်စရာ ကောင်းသည်”ဟု ဝန်ကြီးချုပ်က ပြောခဲ့သည်။

ဘိုင်နီမာရာမာနှင့် ရဲတပ်ဖွဲ့၊ စစ်ဘက်ဆိုင်ရာ အရာရှိများ တွေ့ဆုံပြီးနောက် စစ်တပ်နှင့် ရေတပ် တပ်သားများကို အကူအညီ တောင်းခံခဲ့ခြင်း ဖြစ်သည်ဟု ရဲကော်မရှင်နာ ဆီတီဗန်နီကွီလီဟို (Sitiveni Qiliho)က ပြောသည်။

နိုင်ငံတွင်းရှိ လူနည်းစု တိုင်းရင်းသားများအပေါ် ခြိမ်းခြောက်မှုများ ရှိနေပြီး ၎င်းတို့သည် နိုင်ငံရေး အခြေအနေများ ကြောင့် ကြောက်ရွံမှုဖြင့် နေထိုင်နေရသည်ဟု ကွီလီဟိုက ပြောသည်။

ပြိုင်ဘက် ဆီတီဗန်နီ ရာဗူကာ(Sitiveni Rabuka)ကိုတွေ့စဉ် (GETTY IMAGES)

သို့သော် ထိုသတင်းများမှာ လုံးဝ အခြေအမြစ်မရှိဟု နိုင်ငံ၏ပထမဆုံးသော အင်ဒို-ဖီဂျီ ဝန်ကြီးချုပ် မဟန်ဒရာ ချောက်ရီ (Mahendra Chaudhry)က ပြောသည်။

မတည်ငြိမ်မှုများ လုံးဝ မရှိကြောင်းနှင့် ပြည်သူများသည် ဝန်ကြီးချုပ်အသစ် ရွေးချယ်ရေး လွှတ်တော်ခေါ်ရန် သမ္မတကို စောင့်ဆိုင်းနေကြောင်း မဟန်ဒရာချောက်ရီ (Mahendra Chaudhry) က ပြောသည်။

၎င်းသည် ၂၀၀၀ ခုနှစ် အာဏာသိမ်းမှုတွင် ရာထူးမှ ဖယ်ရှားခံခဲ့ရသူဖြစ်သည်။

ပစိတ်ဖိတ် နိုင်ငံငယ်ဖြစ်သည့် ဖီဂျီသည် လွန်ခဲ့သော ၃၅ နှစ်အတွင်း စစ်တပ် အာဏာသိမ်းမှု ၄ ကြိမ်နှင့် ကြုံတွေ့ ခဲ့ရပြီး ဖြစ်သည်။

လက်ရှိ ဝန်ကြီးချုပ် ဘိုင်နီမာရာမာသည် စစ်တပ် အာဏာသိမ်းမှု တစ်ခုကို ဦးဆောင်ခဲ့ပြီးနောက် မိမိကိုယ် မိမိ ဒီမိုကရက်တစ် ခေါင်းဆောင်တစ်ဦးအဖြစ် အသွင်ပြောင်းကာ ရာထူးကို ၁၆ နှစ်ကြာ ရယူထားခဲ့သူ ဖြစ်သည်။

Source: အယ်ဂျာဇီးယား

CNI International News

မော်စကို၊ ဒီဇင်ဘာ ၂၃

အမေရိကန်နိုင်ငံသည် ရုရှားကိုဆန့်ကျင်သည့် ကြားခံစစ်ပွဲတစ်ခုကို လုပ်ဆောင်နေကြောင်း ရုရှားအစိုးရဘက်မှ စွပ်စွဲလိုက်သည်ဟု Aljazeera သတင်းတွင်ဖော်ပြသည်။

ယူကရိန်းသမ္မတ၏ သမိုင်းဝင်အမေရိကားခရီးစဉ်တွင် ယူကရိန်းကို အမေရိကန်ဘက်မှ စစ်လက်နက်များ တိုးမြှင့် ထောက်ပံ့ပေးသွားမည်ဟု ပြောဆိုခဲ့ပြီးနောက် ယခုကဲ့သို့ စွပ်စွဲလိုက်ခြင်းဖြစ်သည်။

ယူကရိန်းသမ္မတ ဇာလန်းစကီး (Zelenskyy) သည် ဗုဒ္ဓဟူးနေ့ အမေရိကန်ခရီးစဉ်တွင် အမေရိကန်သမ္မတ ဂျိုးဘိုင်ဒန် (Joe Biden) နှင့် တွေ့ဆုံခဲ့သည်။ ထိုတွေ့ဆုံမှုတွင် Patriot ဒုံးကျည်ကာကွယ်ရေးစနစ်အပါအဝင် ဒေါ်လာ ၁ ဒသမ ၈ ဘီလီယံတန်ကြေးရှိ စစ်ဘက်သုံးပစ္စည်းများကို ယူကရိန်းသို့ ထောက်ပံ့ပေးမည်ဟု ဘိုင်ဒန်က ပြောကြားခဲ့သည်။

ယင်းနှင့်ပတ်သတ်၍ ရုရှားအစိုးရအဖွဲ့ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ် (Dmitry Peskov) က သတင်း ထောက်များနှင့်တွေ့ဆုံရာတွင် အမေရိကန်တို့ ယခုတစ်ခေါက်ပေးပို့မည့် ထောက်ပံ့ရေးပစ္စည်းများက ရက် ၃၀၀ ကျော်ကြာ ယူကရိန်းပဋိပက္ခကို ရပ်တန့်နိုင်လိမ့်မည်မဟုတ်ဟု ပြောခဲ့သည်။အမေရိကန်တို့၏ ထောက်ပံ့မှုကြောင့် မြန်မြန်အဆင်ပြေသွားရန်ထက် ပိုဆိုးရွားဖို့ ဖြစ်လာနိုင်သည်ဟုလည်း ၎င်းက ထပ်လောင်းပြောကြားပြီး ယင်းက ရုရှားနိုင်ငံ၏ အထူးစစ်ဆင်ရေးဆိုင်ရာ ရည်မှန်းချက်များကို တားဆီးဖို့မဖြစ်နိုင်ပါဘူးဟု ပတ်စ်ကော့ဗ်က ဆိုသည်။

ရုရှားအစိုးရ ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ်(ဓါတ်ပုံ-ရိုက်တာ)

ယူကရိန်း ကျူးကျော်စစ်နှင့်ပတ်သက်၍ ရုရှားတို့ဘက်က ၎င်းတို့၏ ထိုးစစ်ဆင်မှုများအပေါ် သုံးနှုန်းထားသည့် အသုံးအနှုန်းအတိုင်း ပြောဆိုသွားခဲ့ခြင်းဖြစ်သည်။ ဇာလန်းစကီး၏ အမေရိကန်ခရီးစဉ်အတွင်း ငြိမ်းချမ်းရေး အတွက် တောင်းဆိုခြင်း သို့မဟုတ် ရုရှားဘက်မှစိုးရိမ်မှု များအပေါ် နားထောင်ပေးလိုစိတ်မရှိခြင်းတို့ကိုသာ မြင်တွေ့ခဲ့ရပြီး ယင်းက အမေရိကန်အနေဖြင့် ယူကရိန်းကို အသုံးချပြီး ရုရှားနှင့်ကြားခံစစ်ပွဲတစ်ခု ဆင်နွှဲနေခြင်း သာဖြစ်သည်ဟုလည်း ပတ်စ်ကော့ဗ်က ပြောခဲ့သည်။

ယူကရိန်းသမ္မတ ဇာလန်းစကီး၏ ရုရှားခရီးစဉ်သည် ယူကရိန်းကို ရုရှားတို့ဘက်မှ ကျူးကျော်ခဲ့သည့် ဖေဖော်ဝါရီ ၂၄ ရက် နောက်ပိုင်း ပထမဆုံးသော နိုင်ငံခြားခရီးစဉ်ဖြစ်သည်။ ကွန်ဂရက်ပူးတွဲအစည်းအဝေးတွင် မိန့်ခွန်းမပြော ခင် ဇာလန်းစကီးသည် သမ္မတဘိုင်ဒန်နှင့်အိမ်ဖြူတော်တွင်တွေ့ဆုံခဲ့ပြီး ထိုတွေ့ဆုံမှုအတွင်း ယူကရိန်းသို့ Patriot ဒုံးကျည်စနစ်များ ပေးပို့သွားမည်ဟု ဘိုင်ဒန်က ကတိပြုခဲ့သည်။

ရုရှားတို့အနေဖြင့် ယူကရိန်းနိုင်ငံတစ်ဝန်းမှ စွမ်းအင်ဆိုင်ရာ အခြေခံအဆောက်အဦများကို ပစ်မှတ်ထားကာ လေကြောင်းတိုက်ခိုက်နေမှုများကို ကာကွယ်ရန်အတွက် ယူကရိန်းလေကြောင်း ကာကွယ်ရေးစနစ်ကို အဆင့် မြှင့်တင်ရေး အကူအညီများပေးရန် ဇာလန်းစကီးသည် ယခင်ကတည်းက တောင်းဆိုခဲ့ဖူးသည်။ ထို တောင်းဆိုမှု တွင် Patriot ဒုံးကျည်စနစ်လည်း တစ်ခုအပါအဝင်ဖြစ်သည်။ ယင်းသည် အမေရိကန်၏ ခေတ်ရှေ့ပြေး လေကြောင်းကာကွယ်ရေးစနစ်တစ်ခုဖြစ်ကာ လေယာဉ်များနှင့် ပဲ့ထိန်းဒုံးများကို ကြားဖြတ်နိုင်စွမ်းရှိသည်ဟု သိရသည်။

Source:Aljazeera

CNI International News

ဘာလင်၊ ဒီဇင်ဘာ ၂၁

လူသတ်မှု ၁၀၀၀၀ ကျော်တွင် ကြံရာပါအဖြစ် ပါဝင်ခဲ့မှုဖြင့် အသက် ၉၇ နှစ်အရွယ် အမျိုးသမီးတစ်ဦးကို ဂျာမနီ တရားရုံးတစ်ခုက အင်္ဂါနေ့(ဒီဇင်ဘာ ၂၀ ရက်)တွင် အမိန့်ချမှတ်ခဲ့သည်ဟု အေပီသတင်းတွင် ဖော်ပြထားသည်။

သူမသည် ဒုတိယ ကမ္ဘာစစ် နာဇီစစ်အကျဉ်းစခန်း တစ်ခုရှိ အရာရှိတစ်ဦး၏ ကိုယ်ရေးအရာရှိအဖြစ် လုပ်ဆောင် ခဲ့သူဖြစ်သည်။

အမ်ဂတ် ဖာ့ချ်နာ (Irmgard Furchner)သည် ဒန်ဇစ် (Danzig) စခန်း (လက်ရှိ ပိုလန်နိုင်ငံ ဂဒန့်မြို့)ကို အကူအညီ ပေးခဲ့သော အဖွဲ့၏ အစိတ်အပိုင်း တစ်ခုအဖြစ် စွပ်စွဲခံထားရသည်။

ထို့ကြောင့် သူမကို လူသတ်မှု ၁၀၅၀၅ ခု၊ လူသတ်ရန် ကြံစည်မှု ၅ ခုတို့အတွက် ကြံရာပါအဖြစ် ဂျာမနီနိုင်ငံ မြောက်ပိုင်း ပြည်နယ်တရားရုံးတစ်ခုက ဆိုင်းငံ့ ထောင်ဒဏ် ၂ နှစ် ပြစ်ဒဏ် ချမှတ်ခဲ့သည်။

ဒန်ဇစ် (Danzig) စခန်းကိုတွေ့ရစဉ်

ဖာ့ချ်နာသည် စတက်ဟော့ဖ်(Stutthof) အကျဉ်းစခန်းတွင် လက်နှိပ်စက် စာရေးအဖြစ် ဆောင်ရွက်စဉ်အတွင်း အကျဉ်းသား ၁၀၀၀၀ ကျော် အသတ်ခံရမှုများတွင် သိရှိနေခြင်း၊ ပါဝင် ပတ်သက်နေခြင်းတို့အတွက် ယခုကဲ့သို့ ပြစ်ဒဏ် ချမှတ်ရန် တရားသူကြီးများက ဆုံးဖြတ်ခဲ့သည်ဟု တရားရုံးက ထုတ်ပြန်ခဲ့သည်။

သူမသည် စခန်းအုပ်ချုပ်ရေးမှူးရုံး၌ အလုပ်လုပ်နေစဉ် ထိုကဲ့သို့သော ဖြစ်ရပ်များကို ဖြစ်စေသည့် လုပ်ရပ်များကို ရှုပ်ထွေးသော စာရွက်စာတမ်း ကိစ္စများမှတဆင့် ပါဝင်ခဲ့ပြီး ထိုလုပ်ရပ်များက အကျဉ်းစခန်း အဖွဲ့အစည်းနှင့် လူမဆန်သော သတ်ဖြတ်မှုများအတွက် မရှိမဖြစ် အရေးပါခဲ့သည်ဟုလည်း တရားရုံး ထုတ်ပြန်ချက်တွင် ဖော်ပြ ထားသည်။

အစိုးရရှေ့နေများ၏ တောင်းဆိုမှုနှင့် တရားရုံး ထုတ်ပြန်ချက်တို့ ထပ်တူကြခဲ့သော်လည်း တရားခံ ရှေ့နေမှ ၎င်း ၏ အမှုသည်ကို တရားသေလွှတ်ပေးရန် တောင်းဆိုခဲ့သည်။

ဖာ့ချ်နာသည် စနစ်တကျ သတ်ဖြတ်ခဲ့ခြင်းများကို သိနေသည်ဆိုသော သက်သေများမှာ သံသယအဆင့်တွင်သာ ရှိနေကြောင်း၊ ထိုအခြေအနေက သူမကို ပြစ်မှုကျူးလွန်သည်ဟု သက်သေပြရန် မလုံလောက်ကြောင်း ထောက်ပြ ၍ တရားသေလွှတ်ပေးရန် တောင်းဆိုခဲ့ခြင်း ဖြစ်သည်။

ဒန်ဇစ် (Danzig) စခန်းကို စစ်ဆေးနေတဲ့ နာဇီအရာရှိများကိုတွေ့ရစဉ် (AP)

ဖာ့ချ်နာက အတိတ်တွင် ဖြစ်ခဲ့သော ကိစ္စများအတွက် ဝမ်းနည်းကြောင်းနှင့် သူမ စတက်ဟော့ဖ် စခန်းတွင် ရှိနေခဲ့ သည်ကို နောင်တရမိကြောင်း ပြောသည်။

တရားသူကြီးများမှ ပြစ်ဒဏ်ချမှတ်ချိန်တွင် ဖာ့ချ်နာ၌ မည်သည့်ခံစားမှုမှ ရှိမနေသည်ကို တွေ့ရပြီး လက်ရှိ အချိန် အထိ အဆိုပါ ပြစ်ဒဏ်အတွက် အယူခံဝင်မည်လား ဆိုသည်ကို မသိရသေးပေ။ သို့သော် တရားခံရှေ့နေအဖွဲ့က ယခုပြစ်ဒဏ် ချမှတ်မှုအပေါ် သံသယရှိနေဆဲ ဖြစ်သည်ဟု ရှေ့နေတစ်ဦးက ပြောသည်။

ဖာ့ချ်နာ အနေဖြင့် အကျဉ်းစခန်းတွင် တာဝန်ထမ်းဆောင်နေစဉ် စတက်ဟော့ဖ်မှ လူသတ်မှုများကို မသိဘဲ ရှိခဲ့သည်ဆိုသည်မှာ လုံးဝမဖြစ်နိုင်ဟုလည်း တရားသူကြီး ဒေါမနစ် ဂရော့စ် (Dominik Gross) က ပြောသည်။

Source: AP

CNI International News

ဆိုးလ်၊ ဒီဇင်ဘာ ၂၁

မြောက်ကိုရီးယားခေါင်းဆောင် ကင်မ်ဂျုံအန်၏ သြဇာကြီးမားသော ညီမဖြစ်သူ ကင်ယိုဂျုံက တာဝေးပစ် ဒုံးကျည် စမ်းသပ်ပစ်လွှတ်မည်ဟု ခြိမ်းခြောက်နေချိန်တွင် အမေရိကန်သည် အင်္ဂါနေ့(ဒီဇင်ဘာ ၂၁ ရက်)က နျူကလီးယား ဗုံးကြဲလေယာဉ်များနှင့် အဆင့်မြင့် ကိုယ်ပျောက် ဂျက်လေယာဉ်များ ပျံသန်းခဲ့သည်ဟု အေပီသတင်းမှာ ဖော်ပြ ထားသည်။ .

အမေရိကန်၏ B-52 ဗုံးကြဲ လေယာဉ်များနှင့် F-22 ကိုယ်ပျောက် လေယာဉ်များကို ပျံသန်းခြင်းသည် တောင်ကိုရီး ယား စစ်လေယာဉ်များနှင့် ပူးတွဲစစ်ရေး လေ့ကျင့်မှု ပြုလုပ်ရန်အတွက် ဖြစ်သည်ဟု တောင်ကိုရီးယား ကာကွယ် ရေးဌာနက ပြောသည်။

၎င်းက နျူးကလီးယား လက်နက် အပါအဝင် ဖြစ်လာနိုင်သော အန္တရာယ်အားလုံးမှ တောင်ကိုရီးယားကို ကာကွယ် ပေးရန် သဘောတူချက်တစ်ခု၏ အစိတ်အပိုင်းလည်း ဖြစ်သည်။

စစ်ရေးလေ့ကျင့်မှုတွင် တောင်ကိုရီးယားမှ F-35၊ F-15 ဂျက်တိုက်လေယာဉ်များပါ ပါဝင်ကာ ဂျေဂူး (Jeju)ကျွန်း အနောက်တောင်ဘက် ရေပြင်တွင် ပြုလုပ်သွားမည်ဟု တောင်ကိုရီးယား ကွာကွယ်ရေးဌာနက ပြောသည်။

မြောက်ကိုရီးယားက ဩဇာရှိသူ ကင်မ်ယိုဂျုံ (Kim Yo Jong)ကိုတွေ့ရစဉ် (AP)

အမေရိကန်၏ F-22 ကိုယ်ပျောက် လေယာဉ်များသည် လေးနှစ်အတွင်း တောင်ကိုရီးယား မြေပေါ်သို့ ပထမဆုံး အကြိမ် ရောက်ရှိလာခြင်းဖြစ်ကာ လေ့ကျင့်ရေး ပြုလုပ်မည့် ယခုသီတင်းပတ် တစ်ခုလုံး တောင်ကိုရီးယားတွင် ရှိနေမည် ဖြစ်သည်။

ပထမဆုံးသော စစ်ဘက်ထောက်လှမ်းရေးဂြိုလ်တု လွှတ်တင်ရန် စမ်းသပ်ဂြိုလ်တုတစ်ခုကို လွှတ်တင် နိုင်ခဲ့ပြီး ပိုမို ရွေ့လျားနိုင်သော တိုက်ချင်းပစ် ပဲ့ထိန်းဒုံးကျည် တစ်ခုတွင် အသုံးပြုမည့် solid-fuel သုံး မော်တာတစ်ခုကို စမ်းသပ်နိုင်ခဲ့သည်ဟု မြောက်ကိုရီးယားဘက်မှ ပြောကြားခဲ့ပြီးနောက် ယခုကဲ့သို့ စစ်ရေး လေ့ကျင့်မှု ဖြစ်ပေါ် လာခြင်း ဖြစ်သည်။

အမေရိကန်-တောင်ကိုရီးယား နှစ်နိုင်ငံ၏ ပူးတွဲစစ်ရေး လေ့ကျင့်မှုများကို ကျူးကျော်ရန် လေ့ကျင့်ခြင်းဟု မြောက်ကိုရီးယားဘက်မှ မှတ်ယူထားပြီး ထိုလေ့ကျင့်မှုများကို သတိပေးရန်အတွက် ယခုနှစ်အတွင်း ဒုံးကျည် စမ်းသပ်မှုများအား စံချိန်တင် လုပ်ဆောင်ခဲ့သည်။

ထို့ကြောင့် ယခု လေတပ် စစ်ရေးလေ့ကျင့်မှုကိုလည်း နောက်ထပ် ဒုံးကျည်စမ်းသပ်မှုများဖြင့် တုန့်ပြန်လာမည်ကို စိုးရိမ်မှုလည်း ရှိနေသည်။

အမေရိကန်ရဲ့ ဗုံးကြဲလေယာဉ်နဲ့ ကိုယ်ပျောက်လေယာဉ်များ ပျံသန်းပြနေစဉ် (AP)

မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un)၏ ညီမဖြစ်သူ ကင်မ်ယိုဂျုံ (Kim Yo Jong)က လည်း မိမိတို့နိုင်ငံ၏ ထောက်လှမ်းရေး ဂြိုလ်တုနှင့် တာဝေးပစ် ဒုံးကျည်များအတွက် ပြင်ပကမ္ဘာ၏ သံသယများ အပေါ် ပျက်ရယ်ပြုကာ ပြင်းထန်သော စကားလုံးများ သုံးနှုန်း တုန့်ပြန်ခဲ့သည်။

တနင်္ဂနွေနေ့(ဒီဇင်ဘာ ၁၈ ရက်)က ဂြိုလ်တုလွှတ်တင်မှုသည် နိုင်ငံ၏ ပထမဆုံးသော စစ်ဘက်ထောက်လှမ်းရေး သုံး ဂြိုလ်တုစနစ်များကို စမ်းသပ်ရန်အတွက်သာ ဖြစ်ကြောင်းပြောကြားခဲ့သည်။ ထို့နောက် ဂြိုလ်တုမှ ပေးပို့လိုက် သော တောင်ကိုရီးယား မြို့နှစ်မြို့၏ ဓာတ်ပုံကိုလည်း ထုတ်ပြန်ခဲ့သည်။

သို့သော် ထုတ်ပြန်ခဲ့သော ဓာတ်ပုံများမှာ ရုပ်ထွက်ညံ့ဖျင်းနေသောကြောင့် ထိုသို့သော စွမ်းရည်မျိုးဖြင့် ထောက် လှမ်းရန် မဖြစ်နိုင်ကြောင်း၊ ယခု ဒုံးကျည်လွှတ်တင်မှုမှာ မြောက်ကိုရီးယားဘက်မှ ၎င်းတို့၏ ဒုံးကျည်နည်းပညာကို ကာကွယ်ရန် အတွက်သာ ဖြစ်သည်ဟု တောင်ကိုရီးယား အရပ်ဘက်ပညာရှင်များနှင့် တခြားသောနေရာများမှ ပညာရှင်များက မှတ်ချက်ပြုထားသည်။

Source: AP

CNI International News

ခိုဟီမာ၊ဒီဇင်ဘာ ၂၁

နာဂလန်းပြည်နယ်တွင် ခရစ္စမတ်အခမ်းအနားကို မကျင်းပခင် နာဂနိုင်ငံရေးအကြပ်အတည်းကို ဖြေရှင်းနိုင်ရန် ဖြစ်နိုင်ခြေနည်းပါးနေသည်ဟု Northeast Now သတင်းတွင် ဖော်ပြသည်။ ယင်းကို နာဂလန်းဝန်ကြီးချုပ် နိုင်ဖျူရီယို (Neiphiu Rio) က ပြောကြားခဲ့ခြင်းဖြစ်သည်။

ခရစ္စမတ်အခမ်းအနားကျင်းပရန်အတွက် နာဂစေ့စပ်ညှိနှိုင်းသူများသည် နယူးဒေလီမှ နာဂလန်းသို့ ပြန်လာ ခဲ့ကြပြီး ပွဲတော်ရာသီပြီးဆုံးချိန်မှသာလျှင် ဆွေးနွေးပွဲများကို ပြန်လည်စတင်နိုင်မည်ဟုလည်း ပြည်နယ် ဝန်ကြီးချုပ်ကပြောသည်။

အိန္ဒိယနိုင်ငံ နာဂလန်းပြည်နယ်တွင် နေထိုင်သည့် Angami မျိုးနွယ်စု

ငြိမ်းချမ်းရေးဆွေးနွေးပွဲများမှ ယုတ္တိတန်သောအဖြေတစ်ခုကို  နာဂလန်းတွင်ကျင်းပမည့် ရွေးကောက်ပွဲမတိုင်ခင် ရယူနိုင်ခဲ့ခြင်းမရှိပါက ယင်းသည် နာဂလန်းပြည်နယ်အစိုးရနှင့်သက်ဆိုင်မှု ရှိမည်မဟုတ်ကြောင်းလည်း ဝန်ကြီးချုပ်က နာဂအဖွဲ့အစည်းများကို အသိပေးသည်။ နာဂငြိမ်းချမ်းရေးဖြစ်စဉ်အတွက် နာဂလန်းအစိုးရသည် ကြားနေပံ့ပိုးသူသာဖြစ်ကြောင်း၊ ရွေးကောက်ပွဲကြေညာချိန်တွင် ပါဝင်ရမည်ဖြစ်ကြောင်း၊ ယင်းကို နားလည်မှု မလွဲမှားသင့်ကြောင့်လည်း ၎င်းကပြောသည်။

ပြည်ထောင်စုအစိုးရသည် NSCN-IM၊ နာဂအမျိုးသားနိုင်ငံရေးအင်အားစုအဖွဲ့များ (NNPGs) နှင့် ၁၉၉၇ မှ ၂၀၁၇ ခုနှစ်အထိ သီးခြားစီ တွေ့ဆုံဆွေးနွေးမှုများ ပြုလုပ်ခဲ့သည်။

နာဂလန်းပြည်နယ် မြင်ကွင်း

ဗဟိုအစိုးရသည် ၂၀၁၅ ခုနှစ်တွင် NSCN-IM နှင့် မူဘောင်သဘောတူညီချက်တွင် လက်မှတ်ရေးထိုးခဲ့ပြီး ၂၀၁၇ ခုနှစ်တွင် NNPGs နှင့် သဘောတူညီချက် ရရှိခဲ့သည်။ NNPGs သည်နာဂနိုင်ငံရေး ကိစ္စအတွက် နောက်ဆုံး သဘောတူညီချက်တွင် လက်မှတ်ရေးထိုးပြီးနောက် ဆွေးနွေးမှုများဆက်လက်ပြုလုပ်ရန် သဘောတူညီခဲ့သော် လည်း NSCN-IM က သီးခြားအလံခွင့်ပြုခြင်းနှင့် နောက်ဆုံးသဘောတူညီချက်မတိုင်ခင် ဖွဲ့စည်းပုံအခြေခံဥပဒေ ဆောင်ရွက်ရေးတို့အတွက် ၎င်းတို့၏ တောင်းဆိုချက်ကို ဆက်လက်ကိုင်စွဲထားဆဲဖြစ်သည်။

Source:Nenow

CNI International News

နယူးဒေလီ၊ ဒီဇင်ဘာ ၂၁

ဒေသတွင်း တင်းမာမှုများကို လျော့ချရေး တရုတ်အစိုးရကို ဖိအားပေးရန်အတွက် တရုတ်နှင့်နယ်စပ်တွင် စံချိန်တင် တပ်သားအရေအတွက်အား ချထားသည်ဟု အိန္ဒိယနိုင်ငံခြားရေးဝန်ကြီး ဆပ်ဘရာမန်ယမ် ဂျီရှန်ကာ (Subramanyam Jaisahankar)က ပြောခဲ့ကြောင်း အာရ်တီသတင်းတွင် ဖော်ပြထားသည်။

အငြင်းပွားနေသော နယ်စပ်တွင် ၂၀၂၀ ခုနှစ်မစ၍ တရုတ်ဘက်မှ တပ်သား အင်အားများကို သိသိသာသာ မြှင့်တင်လာခဲ့ခြင်းအပေါ် တုန့်ပြန်ရန် ထိုသို့ လုပ်ဆောင်ရခြင်းဖြစ်သည်ဟု ၎င်းက ပြောသည်။

တရုတ်နှင့်အိန္ဒိယ တပ်သားများသည် အိန္ဒိယအရှေ့မြောက်ပိုင်း အရူနာချာပရာဒတ်ရှ် (Arunachal Pradesh) ပြည်နယ်တွင် ဒီဇင်ဘာ ၉ ရက်နေ့၌ ပဋိပက္ခ ဖြစ်ပွားခဲ့ကြသည်။

အဆိုပါ ပဋိပက္ခက နျူကလီးယားပိုင်ရှင် အာရှအင်အားကြီး နှစ်နိုင်ငံအကြား နှစ်နှစ်နီးပါး ကာလအတွင်း ပထမ ဆုံးအကြိမ် ထိပ်တိုက်တွေ့ဆုံမှုလည်း ဖြစ်သည်။

အိန္ဒိယ/တရုတ် စစ်သားများကိုတွေ့ရစဉ် (GETTY IMAGES)

သို့သော် နှစ်ဘက်စလုံးမှ နောက်ဆုတ်ခဲ့မှုကြောင့် အဆိုပါပဋိပက္ခသည် ကြာမြင့်ခဲ့ခြင်း မရှိဘဲ စစ်သားအနည်း ငယ်သာ အသေးစား ဒဏ်ရာများ ရရှိခဲ့သည်။

ထိုဖြစ်ရပ်တွင် တရုတ်တပ်သားများမှ ဦးစွာရန်စခဲ့ခြင်း ဖြစ်ကြောင်း၊ ၎င်းတို့သည် အငြင်းပွားနေသော ဟိမဝန္တာ နယ်စပ်ကို ဖြတ်ကျော်ရန် ကြိုးပမ်းခဲ့ကြောင်း၊ တရုတ်သည် ဒေသတွင်း အခြေအနေများကို တစ်ဖက်သတ် ပြောင်းလဲရန် ကြိုးစားနေခြင်း ဖြစ်ကြောင်း အန္ဒိယကာကွယ်ရေးဌာနက ပြောသည်။

အဆိုပါ ဖြစ်ရပ်ဖြစ်ပွားပြီးနောက် အိန္ဒိယအစိုးရသည် တရုတ်၏ ခြိမ်းခြောက်မှုအပေါ် ကွဲပြားစွာ တုန့်ပြန်နေသည် ဟု အိန္ဒိယအတိုက်အခံများက စွပ်စွဲခဲ့ပြီး နယ်စပ်အရေးကို ချက်ချင်း ဆွေးနွေး အဖြေရှာရန်လည်း တောင်းဆိုခဲ့ သည်။

သို့သော် နိုင်ငံခြားရေးဝန်ကြီးက တရုတ်နှင့်ပတ်သက်၍ အစိုးရဘက်မှ ခြားနားစွာ ဆောင်ရွက်မည်ဆိုလျှင် နယ်စပ်သို့ တပ်သားများ စေလွှတ်ခြင်း၊ တင်းမားမှုများကို လျော့ကျစေရန် ဆောင်ရွက်ခြင်း အပြင် လူသိရှင်ကြား ဝေဖန်ခြင်းများ ပြုလုပ်ရန်မရှိဟု အတိုက်အခံများ၏ ပြောစကားကို တုန့်ပြန်ပြောဆိုခဲ့သည်။

 တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဝမ်ဝန်ဘင်းကိုတွေ့ရစဉ်

ထိုအအခြေများနှင့် ပတ်သက်၍ တရုတ်အစိုးရဘက်မှ ရှေ့တန်းရှိ တပ်သားများကို တင်းကြပ်စွာ ထိန်းသိမ်းရန် အိန္ဒိယ အစိုးရအား တောင်းဆိုခဲ့ပြီး နယ်စပ်ဒေသ ငြိမ်းချမ်းရေးနှင့် တည်ငြိမ်ရေးကို ထိန်းသိမ်းရန်အတွက် အတူတကွ ဆောင်ရွက်သွားရန်လည်း ကမ်းလှမ်းခဲ့သည်။

၎င်း မတိုင်ခင် တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin) က တရုတ်-အိန္ဒိယ နယ်စပ်သည် တည်ငြိမ်ကြောင်းနှင့် နယ်စပ်ရေးရာ ကိစ္စများအတွက် နှစ်နိုင်ငံကြား ဆွေးနွေးပွဲများကို ဆက်လက် ထိန်းသိမ်းသွားရေး အတူတကွ ဆောင်ရွက်သွားရန် ကမ်းလှမ်းခဲ့သည်။

Source: အာရ်တီ

CNI International News

ကိဗ်ယတ်၊ ဒီဇင်ဘာ ၂၀

တနင်္လာနေ့(ဒီဇင်ဘာ ၁၉ ရက်)မနက် အာရုံတက်ချိန်တွင် ရုရှားက ယူကရိန်းမြို့တော် ကိဗ်ယက်ကို ဒရုန်းဖြင့် တိုက်ခိုက်မှုများစွာ ပြုလုပ်ခဲ့ကြောင်း အေပီသတင်းမှာ ဖော်ပြထားသည်။

အဆိုပါ တိုက်ခိုက်မှုသည် စစ်ရေးအရ မလူးသာ မလွန့်သာ အခြေအနေတွင် လေကြောင်း တိုက်ခိုက်မှုများမှ တဆင့် စစ်ဘက်ဆိုင်ရာ အသာစီးရရှိရန် ရုရှားအနေဖြင့် ကြိုးပမ်းမှုလည်း ဖြစ်သည်။

ထို့အပြင် ယူကရိန်းသို့ ရုရှားဘက်မှ တပ်များ ထပ်မံ စေလွှတ်မည့် အရိပ်လက္ခဏာ တစ်ခုအဖြစ် ရုရှားသမ္မတ ဗလာဒီမာ ပူတင်(Vladimir Putin) သည် ဘီလာရုစ်နိုင်ငံသို့ သွားရောက်ခဲ့သည်ဟုလည်း သိရသည်။

ဘီလာရုစ်နိုင်ငံသည် လွန်ခဲ့သော ၁၀ လ ရုရှားဘက်မှ ယူကရိန်းကျူးကျော်စစ် စတင်ခဲ့ချိန်တွင် ရုရှားတပ်များ အတွက် ဒုံးကျည်ပစ်လွှတ်ရာ နေရာတစ်ခုကို ထောက်ပံ့ပေးခဲ့သည့် နိုင်ငံလည်း ဖြစ်သည်။

တနင်္လာနေ့ တိုက်ခိုက်မှုသည် စစ်ပွဲ စတင်ချိန်မှစ၍ ရုရှားတို့၏ အပြင်းထန်ဆုံး တိုက်ခိုက်မှုများဟု ယူကရိန်း အာဏာပိုင်များက ညွန်းဆိုခဲ့သည့် တိုက်ခိုက်မှုများအပြီး ၃ ရက်အကြာတွင် ပေါ်ပေါက်ခဲ့ခြင်း ဖြစ်သည်။

ရုရှားက ဒရုန်းဖြင့် တိုက်ခိုက်စဉ် (GETTY IMAGES)

အောက်တိုဘာလမှ စတင်ကာ ရုရှားတို့သည် ယူကရိန်း၏ စွမ်းအင်ထောက်ပံ့ပေးရာ အခြေခံ အဆောက်အဦများ ကို ပစ်မှတ်ထား တိုက်ခိုက်ခဲ့သည်။ ၎င်းက ပြင်းထန်သော ရာသီဥတု အခြေအနေအတွင်း ယူကရိန်းနိုင်ငံကို အပူနှင့် အလင်းရောင် ဖြတ်တောက်ပစ်ရန် ရည်ရွယ်ခြင်းလည်း ဖြစ်သည်။

အနောက်အုပ်စုမှ အရေးယူ ပိတ်ဆို့မှုများအပြင် ယူကရိန်း တပ်ဖွဲ့များအတွက် လေကြောင်း လုံခြုံရေးစနစ်များ ထောက်ပံ့ ပေးနေသော်လည် ရုရှားတို့၏ တိုက်ခိုက်မှုများကို တားဆီးနိုင်ခြင်း မရှိသေးပေ။

တနင်္လာနေ့ ကိဗ်ယက်တစ်မြို့လုံး အိပ်မောကျနေချိန်တွင် ရုရှားက ဒရုန်း ၂၃ စီး လွှတ်တင်ခဲ့ကြောင်း၊ ထိုအထဲက ၁၈ စီးကို ယူကရိန်းတပ်ဖွဲ့ဝင်များမှ ပစ်ချနိုင်ခဲ့ကြောင်း ကိဗ်ယက်မြို့ အုပ်ချုပ်ရေးအဖွဲ့က ပြောသည်။

ယခု တိုက်ခိုက်မှုများတွင် ကြီးကြီးမားမား ထိခိုက်မှု မရှိသော်လည်း တနင်္ဂနွေနှင့် တနင်္လာနေ့ကြား တိုက်ခိုက် မှုများကြောင့် အနည်းဆုံး လူ ၃ ဦး သေဆုံးကာ ၁၁ ဦး ဒဏ်ရာရခဲ့သည်ဟု ယူကရိန်းသမ္မတက ပြောသည်။

ဒရုန်းဖြင့် တိုက်ခိုက်မှုကြောင့် မြို့တော် ဧရိယာ အပါအဝင် ယူကရိန်းနိုင်ငံ အရှေ့ပိုင်းနှင့် အလယ်ပိုင်းဒေသ ၁၁ ခု တို့တွင် အရေးပေါ် စွမ်းအင် ပြတ်တောက်မှုများ ဖြစ်ပွားခဲ့သည်ဟု အာဏာပိုင်များက ပြောသည်။

တနင်္လာနေ့သည် ယူကရိန်းတွင် ခရစ္စမတ် ပိတ်ရက် စတင်ရာ စိန့်နီကိုလပ်နေ့ (St. Nicholas Day) ဖြစ်ပြီး ထိုနေ့တွင် တိုက်ခိုက်မှု ပြုလုပ်ခဲ့သည့် ရုရှား၏ လုပ်ရပ်အပေါ် ယူကရိန်းသမ္မတ အပါအဝင် အရေးပေါ် လုပ်ငန်း ဆိုင်ရာ အကြီးအကဲနှင့် လူ့အခွင့်အရေး အရာရှိများက ပြစ်တင်ဝေဖန်သည်။

ရုရှား၏ တိုက်ခိုက်မှုများမှ ကာကွယ်နိုင်ရေးအတွက် ခေတ်မီလေကြောင်း ကာကွယ်ရေး လက်နက်များ ထောက်ပံ့ ပေးရန်လည်း ယူကရိန်းသမ္မတ ဇာလန်းစကီး(Zelenskyy)က ထပ်မံတောင်းဆိုခဲ့သည်။

Source: AP

CNI International News

ဘန်ကောက်၊ ဒီဇင်ဘာ ၂၀

ထိုင်းပင်လယ်ကွေ့ရေပြင်တွင် စစ်သင်္ဘောနစ်မြုပ်မှု ဖြစ်ပွားပြီးနောက် ပျောက်ဆုံးနေဆဲ ဖြစ်သော သင်္ဘောသား ၃၁ ဦးကို ထိုင်းရေတပ်သင်္ဘောများနှင့် ရဟတ်ယာဉ်များက ရှာဖွေရေး ဆောင်ရွက်လျက်ရှိသည်ဟု အေပီသတင်း မှာ ရေးသားဖော်ပြထားသည်။

တာဝန်ရှိသူများက နစ်မြှုပ်ခဲ့သော သင်္ဘောပေါ်တွင် အသက်ကယ်အင်္ကျီ လုံလောက်စွာ မပါရှိခဲ့ကြောင်း အတည် ပြုခဲ့သည်။

ဒီဇင်ဘာ ၁၉ ရက်နေ့ ညအထိ နစ်မြှုပ်ခဲ့သော HTMS Sukhothai စစ်သင်္ဘောမှ သင်္ဘောသား ၇၅ ဦးကို ကယ် တင်နိုင်ခဲ့ပြီး ၃၁ ဦးမှာ ပျောက်ဆုံးနေဆဲ ဖြစ်သည်ဟု ထိုင်းရေတပ်က ပြောသည်။

ထို့နောက် သင်္ဘောနစ်မြှုပ်မှုကို ဖြစ်စေသည့် လှိုင်းကြီးခြင်း အခြေအနေမှာ လျော့ပါး သွားပြီ ဖြစ်သော်လည်း လှေငယ်များအတွက် အန္တရာယ်ရှိနေဆဲ ဖြစ်သည်ဟုလည်း သိရသည်။

လက်ရှိအချိန်အထိ စစ်သင်္ဘောနစ်မြှုပ်ရခြင်းနှင့် ကယ်ဆယ်ရေး လုပ်ငန်းများ အခြေအနေကို အသေးစိတ် မသိရ သေးပေ။

ရေတပ်ဒုတိယဗိုလ်မှူးကြီး ချောင်ချိုင် ချွမ်ချိုးပတ်ကိုတွေ့ရစဉ် (GETTY IMAGES)

သင်္ဘောနစ်မြှုပ်ချိန်တွင် သင်္ဘောပေါ်၌ ရှိသင့်သည့် လူဦးရေထက် ပိုနေပြီး အသက်အင်္ကျီ လုံလောက်ခဲ့ခြင်း မရှိဘူး ဟု အသက်ဘေးမှ လွတ်မြောက်လာသူတစ်ဦးက Thai Rath ရုပ်သံသို့ ပြောသည်။

ထိုပြောဆိုမှုမှာ မှန်ကန်သည်ဟုလည်း ရေတပ်ဒုတိယဗိုလ်မှူးကြီး ချောင်ချိုင် ချွမ်ချိုးပတ် (Choengchai Chomchoengpaet)က ပြောသည်။

နစ်မြှုပ်ခဲ့သော သင်္ဘောသည် ပုံမှန်အားဖြင့် သင်္ဘောသား ၈၇ ဦးနှင့် အရာရှိများကိုသာ တင်ဆောင် နိုင်သည်ဟု ထိုင်းရေတပ် ဝဘ်ဆိုဒ်တွင် ဖော်ပြထားသည်။

ကယ်ဆယ်ထားသည့် သူများမှ ၁၁ ဦးကို ဆေးရုံတင်ထားရပြီး ၎င်းတို့ထဲတွင် သေဆုံးသူတစ်ဦး ရှိသည်ဆိုသည့် သတင်းများကို ထိုင်ရေတပ်က ငြင်းဆိုထားသည်။

ဒီဇင်ဘာ ၁၈ ရက်နေ့ ညနေပိုင်းတွင် ဖြစ်ပွားခဲ့သော ဖြစ်ရပ်၌ လေတိုက်နှုန်း ပြင်းထန်မှုကြောင့် HTMS Sukhothai ပေါ်သို့ ပင်လယ်ရေများ ရောက်ရှိလာခဲ့ပြီး သင်္ဘော၏ လျှပ်စစ်စနစ် ပျက်စီးသွားခဲ့ကာ ထိန်းချုပ်ရန် ရုန်းကန်ခဲ့ရသည်။

HTMS Sukhothai စစ်သင်္ဘောကိုတွေ့ရစဉ်

ရေတပ်ဘက်မှ ဖရီးဂိတ်သင်္ဘော ၃ စင်း၊ အကူစက်များ တင်ဆောင်ထားသော ရဟတ်ယာဉ် ၂ စင်း စေလွှတ်ကာ သင်္ဘောပေါ်မှ ရေများကို ဖယ်ရှားရန် ကြိုးပမ်းခဲ့သော်လည်း မအောင်မြင်ခဲ့ပေ။ လေတိုက်နှုန်း ပြင်းထန်မှုကြောင့် မအောင်မြင်ခဲ့ရခြင်း ဖြစ်သည်။

စွမ်းအင် ပြတ်တောက် သွားမှုကြောင့် သင်္ဘောပေါ်သို့ ရေများ ထပ်မံ ဝင်ရောက်လာခဲ့ကာ နစ်မြှုပ်မှုကို ဖြစ်စေခဲ့သည်။

သင်္ဘောနစ်မြှုပ်မှု မဖြစ်ပွားခင် ထိုင်းမိုးလေဝသဌာနမှ သတိပေးချက် ထုတ်ပြန်မှုလည်း လုပ်ဆောင်ခဲ့သေးသည်။

Sukhothai သင်္ဘောကို ဝါရှင်တန်ရှိ တာကိုမာတွင် တည်ဆောက်ခဲ့ကာ ၁၉၈၇ ခုနှစ်တွင် စတင်တာဝန် ထမ်း ဆောင်ခဲ့သည်။

အဆိုပါ သင်္ဘောသည် ၂၅၂ ပေအရှည်ရှိသည်။ သင်္ဘောသည် လက်နက်တပ်ဆင်ထားသည့် အလယ်လတ်တန်းစား အမြှာက်တစ်လက်တင် သင်္ဘောဖြစ်ကာ ကမ်းလွန်ရေပြင်အနီး ကင်းလှည့်ခြင်းအတွက် အများဆုံး အသုံးပြုသည်။

Source: AP