CNI International News

၂၀၂၃ ခုနှစ်၊ ဇန်နဝါရီ ၉

ဘရာဇီးလ်ရဲတပ်ဖွဲ့သည် ဘရာစီးလီးယားမြို့ရှိ လွှတ်တော်၊ သမ္မတနန်းတော်နှင့် ဗဟိုတရားရုံးချုပ်တို့ကို စီးနင်း ထားသော သမ္မတဟောင်း ဘော်ဆိုနာရိုအား ထောက်ခံသူများကို မျက်ရည်ယိုဗုံး၊ အသံဗုံး၊ ရေအမြှောက်များနှင့် ရှင်းလင်း ဖယ်ရှားမှု လုပ်ဆောင်ခဲ့သည်။

CNI International News

ဘာလင်၊ ဇန်နဝါရီ ၉

အမေရိကန်လုံခြုံရေး အရာရှိများ၏ သတင်းပေးမှုကြောင့် အသက် ၃၂ နှစ်အရွယ် အီရန်အမျိုးသားတစ်ဦးကို ဂျာမနီအာဏာပိုင်များက တနင်္ဂနွေနေ့တွင် ဖမ်းဆီးခဲ့သည်ဟု အေပီသတင်းတွင် ဖော်ပြထားသည်။

ထိုအမျိုးသားသည် ပြင်းထန်သော ဓာတုပစ္စည်းများဖြင့် တိုက်ခိုက်ရန် ကြံစည်နေသည်ဟု အမေရိကန်ဘက်မှ သတင်းပေးခဲ့ခြင်း ဖြစ်သည်။

၎င်းနှင့် နောက်ထပ် တစ်ဦးတို့ကို ဒေါ့မွန်အနောက်မြောက် ကတ်ရော့-ရောက်ဆယ် (Castrop-Rauxel) တွင် ညတွင်းခြင်း ထိန်းသိမ်းခဲ့သည်ဟု ရဲတပ်ဖွဲ့နှင့် အစိုးရရှေ့နေများက ပြောသည်။

အဆိုပါ အမျိုးသားသည် အစ္စလာမ္မစ် အစွန်းရောက် လှုံ့ဆော်မှုကြောင့် ပြင်းထန်သော တိုက်ခိုက်မှုတစ်ခု ကျူးလွန် ရန် စီစဉ်နေသည်ဟု သံသယရှိကြောင်း၊ ထို့ကြောင့် ၎င်းသည် အလွန်ပြင်းထန်သော ဆိုင်ရာနိုင်နှင့် ricin ဟု ခေါ်သော အဆိပ်တစ်မျိုးကို ရှာဖွေနေကြောင်း အာဏာပိုင်များ၏ ပူးတွဲကြေညာချက်တွင် ဖော်ပြသည်။

 ဂျာမနီဆေးတပ်ဖွဲ့က စစ်ဆေးနေစဉ် (AP)

ထိုသူ၏ နေအိမ်တွင် အဆိပ်အတောက် ကာကွယ်ပေးသော ဝတ်စုံများဖြင့် သက်သေ ရှာဖွေနေသည်ကိုလည်း တွေ့ရသည်။ သို့သော် လက်ရှိအချိန်ထိ တိုက်ခိုက်မှုအတွက် မည်မျှပြင်ဆင်ပြီးသည်နှင့် မည်သည့် ပစ်မှတ်ကို တိုက်ခိုက်မည် ဆိုသည်ကိုတော့ မသိရသေးပေ။

ခိုင်လုံသည့် သတင်းပေးမှုကြောင့် ညတွင်းချင်း ရှာဖွေမှု လုပ်ဆောင်ခဲ့ရသည်ဟု ဂျာမနီအာဏာပိုင်တစ်ဦးက ပြောခဲ့ကြောင်း DPA သတင်းတွင် ကိုးကားဖော်ပြထားသည်။

ထိုသတင်းကို မိတ်ဖက်ထောက်လှမ်းရေး အဖွဲ့များက ပေးခဲ့သည်ဟု Bild သတင်းက ဆိုသည်။ အစိုးရ ရှေ့နေများဘက်က ထိုသတင်းသည် အမေရိကန်မှ လာသည်ဟု အတည်ပြု ထားသော်လည်း အတိအကျကိုမူ မပြောခဲ့ပေ။

လက်ရှိအချိန်အထိ သံသယရှိသူသည် အီရန်အစိုးရကိုယ်စား လုပ်ဆောင်သည်ဟု သံသယရှိစရာ မတွေ့ရသေး ကြောင်း၊ ၎င်းသည် ဆွန်နီအစိုးရအဖွဲ့များကို ထောက်ခံသူ ဖြစ်နိုင်ကြောင်း အမည်မဖော်လိုသူ အရာရှိတစ်ဦးကို ကိုးကား၍ DPA သတင်းတွင် ရေးသားထားသည်။

ပြည်ထဲရေးဝန်ကြီး နန်စီဖေဆာကိုတွေ့ရစဉ်(GETTY IMAGES)

ယခု ရှာဖွေမှုတွင် ပါဝင်သည့် ရောဂါထိန်းချုပ်ရေး အေဂျင်စီမှ တာဝန်ရှိသူများနှင့် ရဲတပ်ဖွဲ့ကို ကျေးဇူး တင်ကြောင်း ဂျာမနီအာဏာပိုင်များက ပြောသည်။

လုံခြုံရေး တာဝန်ရှိသူများသည် အစ္စလာမ္မစ် အကြမ်းဖက်မှုများနှင့် ဆက်နွယ်သော ခြိမ်းခြောက်မှု၊ လုပ်ရပ်များနှင့် ပတ်သက်သည့် သတင်းများကို အထူးအလေးထား ဆောင်ရွက်သွားမည်ဟုလည်း ပြည်ထဲရေးဝန်ကြီး နန်စီဖေဆာ (Nancy Faser) က ပြောသည်။

ဂျာမနီတွင် ယခုရာစုနှစ်အတွင်း အစ္စလာမ္မစ် အစွန်းရောက်များ၏ တိုက်ခိုက်မှုပေါင်း ၂၁ ကြိမ် ပေါ်ပေါက်ခဲ့သည်။

Source: အေပီ

CNI International News

ဂျေရုစလင်၊ ဇန်နဝါရီ ၉

ဝန်ကြီးချုပ် ဘန်ဂျမင် နေတန်ညာဟု (Benjamin Netanyahu) အစိုးရသစ်၏ အစီအစဉ်များသည် ဒီမိုကရေစီနှင့် လွတ်လပ်ခွင့်ကို ခြိမ်းခြောက်နေသည်ဟုဆိုကာ အစ္စရေးပြည်သူထောင်ပေါင်းများစွာက လမ်းပေါ်ထွက် ဆန္ဒပြခဲ့ ကြသည်ဟု အယ်လ်ဂျာဇီးယားသတင်းတွင် ဖော်ပြသည်။

နိုင်ငံ၏ ၇၄ နှစ်တာ သမိုင်းတစ်လျှောက် လက်ယာယိမ်းမှုနှင့် ဘာသာရေးအရ ရှေးရိုးစွဲမှု အများဆုံး အစိုးရအဖြစ် ကျမ်းကျိန်ပြီးနောက် ရက်အနည်းငယ်အကြာတွင် ပြည်သူများက တဲလ်အဗစ် (Tel Aviv) မြို့တွင် စုဝေးဆန္ဒပြ ခဲ့ကြခြင်းဖြစ်သည်။ အစိုးရသစ်သည် တရားစီရင်ရေး အာဏာလျော့ကျစေရန် ကျူးကျော်ထားသော အနောက် ဘက်ကမ်းခြေဒေသတွင် တရားမဝင်အခြေချနေထိုင်ခြင်းများ တိုးမြှင့်လာသည့် ကိစ္စရပ်များကို ပြုပြင် ပြောင်းလဲမှုများ လုပ်ဆောင်ရန် စီစဉ်ထားသည်။

“ဒီမိုကရေစီအန္တရယ်ကျရောက်ပြီ၊ ဖက်ဆစ်စနစ်နှင့် လူမျိုးရေးခွဲခြားမှုများကိုအတူတကွ ဆန့်ကျင်ကြ” ဟူသော စာတန်းများဖြင့်ဆန္ဒပြသူများက ကန့်ကွက်ဆန္ဒပြခဲ့ကြခြင်းဖြစ်သည်။ တချို့ ဆန္ဒပြသူများကလည်း နေအိမ်၊ လူနေမှု၊ မျှော်လင့်ချက် ဟူသောစာတန်းများ ကိုင်ဆောင်ကြပြီး တချို့က သက်တန့်ရောင်အလံများဖြင့် ဆန္ဒပြခဲ့ ကြသည်။ ယခုဆန္ဒပြမှုများကို လက်ဝဲယိမ်းအဖွဲ့များနှင့် Knesset ဟုခေါ်သော အစ္စရေးလွှတ်တော်တွင်းမှ ပါလက် စတိုင်း အဖွဲ့ဝင်များက ဦးဆောင်ခဲ့ခြင်းဖြစ်သည်။

အစ္စရေးအလံကို ကိုင်မြှောက်ပြီး ဝန်ကြီးချုပ် နေတန်ညာဟု ခေါင်းဆောင်သည့် အစိုးရကို ဆန့်ကျင် ဆန္ဒပြ နေစဉ်

အစိုးရ၏ တရားစီရင်ရေးစနစ်ကို ကာလရှည်ပြင်ဆင်ရေးသည် နိုင်ငံ၏ဗဟိုတရားရုံးချုပ်ကို အင်အားနည်းအောင် လုပ်ဆောင်ခြင်းဖြစ်သည်ဟု အစ္စရေးတရားရေးဝန်ကြီးက ပြောသည်။ အစိုးရသစ်၏ အစီအစဉ်များသည် မဟာမိတ်အစိုးရကို အကြွင်းမဲ့လုပ်ပိုင်ခွင့်ပေးခြင်းဖြင့် နိုင်ငံ၏ဒီမိုကရေစီအဖွဲ့အစည်းများကို လျော့ပါးစေရုံ သာမက နိုင်ငံ၏အပြန်အလှန် ထိန်းကျောင်းမှုစနစ်ကို အဆုံးသတ်သွားစေမည်ဖြစ်ကြောင်း ထောက်ပြကာ အစိုးရ သစ်သည် တရားစီရင်ရေးစနစ်ကို စတင် စစ်ကြေညာလိုက်ခြင်းဖြစ်သည်ဟုလည်း ဝေဖန်သူများက စွပ်စွဲထားသည်။

ဒီမိုကရေစီစနစ်အား ဆုံးရှုံးရမည်ကိုကြောက်ကြောင်း၊ လူပုဂ္ဂိုလ်တစ်ဦး၏ တရားစီရင်မှုကို ရှောင်လွဲလိုခြင်း အတွက် အာဏာရှင်စနစ်အောက်ကိုမသွားလိုကြောင်း အသက် ၇၇ နှစ်အရွယ်ဆန္ဒပြသူတစ်ဦးက ပြောသည်။ ယင်းက ၂၀၂၁ ခုနှစ်တွင်အကျင့်ပျက်ခြစားမှုဖြင့်စွဲချက်တင်ခံရသော နေတန်ညာဟုကို ရည်ညွှန်းပြောဆိုခြင်း လည်းဖြစ်သည်။

အသက် ၇၃ နှစ်အရွယ် နေတန်ညာဟုသည် အစ္စရေးသမိုင်းတစ်လျှောက် သက်တမ်းအကြာဆုံး ဝန်ကြီးချုပ် အဖြစ် သတ်မှတ်ခံထားရသူဖြစ်သည်။ ၎င်း၏ အစိုးရအသစ်တွင် အခွန်ရှောင်ခဲ့ကြောင်း ဝန်ခံထားသည့်နိုင်ငံ ရေးသမားတစ်ဦးအပြင် ပါလက်စတိုင်းဝတ်ပြုသူများကို အစုလိုက်အပြုံလိုက်သတ်ခဲ့သူ၏ ပုံတူကိုနေအိမ်တွင် ချိတ်ဆွဲထားသူတစ်ဦးအပါအဝင် လက်ယာစွန်းနိုင်ငံရေးသမားများ ပါဝင်နေသည်။ ယင်းကြောင့် ဆန္ဒပြသူများက နိုင်ငံတွင်းရှိ ဂျူးနှင့်ပါလက်စတိုင်းတို့အကြား ငြိမ်းချမ်းရေးနှင့် အတူယှဉ်တွဲနေထိုင်ရေးတို့ကိုတောင်းဆိုခဲ့ကြသည်။

Source:Aljazeera

CNI International News

ဘဲလ်ဂရိတ်၊ ဇန်နဝါရီ ၉

ဆားဘီးယားစစ်သားနှင့် ရဲတပ်ဖွဲ့ဝင် ၁၀၀၀ ကို ကိုဆိုဗိုသို့ စေလွှတ်ရေး ဆားဘီးယားအစိုးရ၏ တောင်းဆိုမှုအား နေတိုးအဖွဲ့က ပယ်ချလိုက်ကြောင်း အယ်ဂျာဇီးယားသတင်းတွင် ဖော်ပြထားသည်။

ဆားဘီးယားနှင့် ကိုဆိုဗိုအာဏာပိုင်များအကြား တင်းမာမှုများ ပေါ်ပေါက်နေချိန်တွင် ထိုသို့ လုပ်ဆောင်ခဲ့ခြင်း ဖြစ်သည်။

ဆားဘီယား၏ ဒေသဟောင်း တစ်ခုဖြစ်သော ကိုဆိုဗိုသည် ၁၉၉၈-၉၉ စစ်ပွဲပြီးနောက် ၂၀၀၈ ခုနှစ်တွင် လွတ်လပ်ရေး ကြေညာခဲ့သည်။

အဆိုပါ လွတ်လပ်ရေးကြေညာသည့် ဒေသတွင် အယ်လ်ဘေးနီးယား အများစုနေထိုင်သည်။ ကိုဆိုဗိုရှိ လုပ်ပိုင်ခွင့် အပေါ် ကုလသမဂ္ဂ၏ အတည်ပြုမှုကို ကိုးကားပြီး ကိုဆိုဗိုသို့ ဆားဘီးယားတပ်များ စေလွှတ်ရန် မလိုအပ်ဟု ကိုဆိုဗိုရှိ နေတိုးအဖွဲ့ KFOR က အကြောင်းပြန်ခဲ့ကြောင်း ဆားဘီးယားသမ္မတ အလက်ဇန္ဒား ဗူစစ် (Aleksandar Vucic) က ပြောသည်။

ပြီးခဲ့သည့်လတွင် စစ်ပွဲကာလ အပြီးနောက်ပိုင်း ပထမဆုံးအဖြစ် ဆားဘီးယားနှင့် ကိုဆိုဗိုအာဏာပိုင်များအကြား ကိုဆိုဗို မြောက်ပိုင်းတွင် တင်းမာမှုများ ဖြစ်ပွားခဲ့သည်။

 ကိုဆိုဗိုဒေသကိုတွေ့ရစဉ် (GETTY IMAGES)

မြောက်ပိုင်းဒေသတွင် ဆားဘီးယားလူမျိုးအများစု နေထိုင်ရာ ဆားဘီးယားအစိုးရက တပ်များစေလွှတ်ခွင့်ပေးရန် တောင်းဆိုခဲ့သည်။ ကုလလုံခြုံရေးကောင်စီက KFOR မှ ခွင့်ပြုမည်ဆိုလျှင် ဆားဘီးယားတပ်များကို အော်သိုဒေါ့ ခရစ္စယာန်ဘာသာရေးဆိုင်ရာ နေရာများ၊ ဆားဘီးယားလူမျိုး အများစု နေထိုင်ရာ ဧရိယာများနှင့် နယ်စပ်ဖြတ်ကျော်ဂိတ်များသို့ ဝင်ရောက် ခွင့်ပေးမည်ဟု ပြန်လည်ဖြေဆိုခဲ့သည်။

၎င်းတို့၏ ဆုံးဖြတ်ချက်ကို အော်သိုဒေါ့ ခရစ္စမတ်နေ့တွင် အကြောင်းကြားခဲ့ခြင်း အတွက်လည်း ဗူစစ်က KFOR ကို ဝေဖန်ခဲ့သည်။ ဘယ်ရန် (Shterpce) မြို့အနီးရှိ ဆားဘီးယားလူငယ်နှစ်ဦးကို ပစ်ခတ်ခြင်း၊ ဒဏ်ရာရရှိ စေခြင်းတို့ ဖြင့် ကိုဆိုဗိုရဲတပ်ဖွဲ့က တာဝန်ချိန်ပြင်ပ စစ်သားတစ်ဦးကို ဖမ်းဆီးခဲ့သည်။

ဘုရားကျောင်းမှ ပြန်လာသော နောက်ထပ် လူငယ်တစ်ဦးကိုလည်း အယ်လ်ဘေးနီးယား အုပ်စုတစ်ခုက တိုက်ခိုက်ခဲ့သည်ဟု ဆားဘီးယားမီဒီယာများတွင် ဖော်ပြသည်။

ထိုဖြစ်ရပ်များသည် အကြမ်းဖက်မှုများ ဖြစ်သည်ဟု ဆားဘီးယားအာဏာပိုင်များက သတ်မှတ်ကာ ကိုဆိုဗိုတွင် ဆားဘီးယားလူမျိုးများကို အလိုမရှိကြောင်း ဖော်ပြနေသည်ဟု ပြောသည်။

ဘယ်ရန်မြို့တွင် ကန့်ကွက်ဆန္ဒပြမှုများ လုပ်ဆောင်မည်ဟုလည်း ကြေညာခဲ့သည်။ ကိုဆိုဗိုရှိ ဆားဘီးယားလူမျိုး အများစုမှာ မြောက်ပိုင်းတွင် နေထိုင်ကြပြီး အများစုက ကိုဆိုဗို၏ လွတ်လပ်ရေးကို အသိအမှတ် မပြုကြပေ။ ကိုဆိုဗိုပဋိပက္ခသည် အယ်လ်ဘေးနီးယား ခွဲထွက်ရေးသမားများက ဆားဘီးယား အုပ်ချုပ်မှုကို ပုန်ကန်ခြင်း အပေါ် ဆားဘီးယားအစိုးရဘက်မှ ပြင်းပြင်းထန်ထန် တုန့်ပြန်ရာမှ စတင်ခဲ့ပြီး နေတိုးအဖွဲ့မှ ကြားဝင်ဖြေရှင်း ပေးခဲ့ရသည်။

ကိုဆိုဗိုအတွင်း လုံခြုံရေးတပ်ဖွဲ့ကိုတွေ့ရစဉ် (GETTY IMAGES)

ထိုပဋိပက္ခအတွင်းလူ ၁၃၀၀၀ နီးပါး သေဆုံးခဲ့ရပြီး အများစုမှာ အယ်လ်ဘေးနီးယားလူမျိုးများ ဖြစ်သည်။

ထိုစစ်ပွဲအတွင်း ကုလသမဂ္ဂ၏ ဖြေရှင်းပေးမှုအရ ဆားဘီးယားလုံခြုံရေးတပ်များ ကိုဆိုဗိုသို့ ဝင်ရောက် တပ်စွဲ ခွင့် ရှိကြောင်း၊ ဆားဘီးယားတပ်များ ပြန်လည်ရောက်ရှိလာပါက ကိုဆိုဗိုတွင် တင်းမာမှုများ လျော့ကျသွားနိုင် ကြောင်း ဆားဘီးယားဘက်က ပြောသည်။

သို့သော်လည်း ယင်းကို ကိုဆိုဗိုနှင့် အနောက်အုပ်စု အာဏာပိုင်များက ငြင်းဆိုထားသည်။

အနောက်အုပ်စုက ကိုဆိုဗို လွတ်လပ်ရေးကို ထောက်ခံထားသည့်အတွက် ဆားဘီးယား၏ တောင်းဆိုမှုကို ပယ်ချ မည်ဟု ကြိုတင် ခန့်မှန်းထားပြီး ဖြစ်ကြောင်းလည်း ဗူစစ်က ပြောသည်။ အီးယူ အဖွဲ့ဝင်ဖြစ်ရေး တိုးတက်မှုများ ရရှိရန် ဆားဘီးယားနှင့် ကိုဆိုဗို အာဏာပိုင်များအနေဖြင့် ပုံမှန်ဆက်ဆံရေးအတိုင်း ပြန်ဖြစ်အောင် ဆောင်ရွက်ရန် ပြောကြားထားပြီးလည်း ဖြစ်သည်။

မတင်မကျဖြစ်နေသော အီးယူမှ ကမကထ ပြုထားသည့် ဆွေးနွေးပွဲများကို တွန်းအားဖြစ်စေရန် အမေရိကန်မှ ထိပ်တန်း ကိုယ်စားလှယ် အဖွဲ့တစ်ခုသည် လာမည့် သီတင်းပတ်တွင် ထိုဒေသသို့ သွားရောက်မည်ဟု သိရသည်။

Source: အယ်ဂျာဇီးယား

CNI International News

ပူထရာဂျာယာ၊ဇန်နဝါရီ ၇

ဆာဘတ် (Sabah)ပြည်နယ် ဝန်ကြီးချုပ် ဟာဂျီဂျီနော (Hajiji Noor)အား ရာထူးမှ ထုတ်ပယ်မည်ဟု ကောလာဟလများ ထွက်ပေါ်နေချိန်တွင် ထိုပြည်နယ်ရှိ နိုင်ငံရေးအခြေအနေမှာ တည်တည်ငြိမ်ငြိမ် ရှိနေသည်ဟု မလေးရှားဝန်ကြီးချုပ် အန်ဝါ အီဗရာဟင် (Anwar Ibrahim)က ပြောကြားခဲ့ကြောင်း CNA သတင်းတွင် ဖော်ပြ ထားသည်။

ဆာဘတ်ပြည်နယ်တွင် ကိစ္စရပ်တချို့ရှိခဲ့ကြောင်း သိခဲ့ရသော်လည်း နောက်ထပ် ထပ်မံ ပေါ်ပေါက်လာမည်ဟု မထင်ကြောင်းလည်း အန်ဝါက သောကြာနေ့တွင် ပြောခဲ့သည်။

သို့သော် မည်သည့် ကိစ္စရပ်များ ဖြစ်နေသည်နှင့် ဝန်ကြီးချုပ်နေရာကို အစားထိုးမှု ဖြစ်မည်ဟု ပေါ်ပေါက်နေသော နိုင်ငံရေးဆိုင်ရာ ကိစ္စရပ်များမှာ မည်သို့မည်ပုံ ဖြစ်သည်ကို ရှင်းလင်းပြောဆိုသွားခြင်း မရှိပေ။

သောကြာနေ့ ဝတ်ပြုဆုတောင်းမှုအပြီး သတင်းထောက်များနှင့် တွေ့ဆုံရာတွင် အန်ဝါက ဆာဘတ်ပြည်နယ်တွင် အခြေအနေမှာ တည်ငြိမ်နေကြောင်းနှင့် ကသောင်းကနင်း ဖြစ်မည့်အလားအလာမျိုး မတွေ့ရကြောင်းသာ ပြောခဲ့သည်။

ဆာဘတ် (Sabah)ပြည်နယ် ဝန်ကြီးချုပ် ဟာဂျီဂျီနောကိုတွေ့ရစဉ် (GETTY IMAGES)

ထို့နောက် သောကြာနေ့က ပြည်နယ်ဝန်ကြီးချုပ်၊ ဒုတိဝန်ကြီးချုပ်၊ ဆာဘတ်ညီညွှတ်သော မလေးအမျိုးသား အဖွဲ့အစည်း (UMNO) ဥက္ကဋ္ဌ၊ ဝါရီဆန် (Warisan) ပါတီ ဥက္ကဋ္ဌ၊ ဒီမိုကရက်တစ်ပါတီ (DAP)၏ အထွေထွေ အတွင်းရေးမှူးချုပ်တို့နှင့် တွေ့ဆုံခဲ့ကာ ဆွေးနွေးခဲ့သည်ဟုလည်း အန်ဝါက ပြောခဲ့သည်။

ဂါဘန်ဂန် ရတ်ယတ် ဆာဘတ် (Gabungan Rakyat Sabah (GRS) ပါတီဥက္ကဋ္ဌဖြစ်သူ ဟာဂျီဂျီသည် ၎င်းအား ပြည်နယ်ခေါင်းဆောင်နေရာမှ ဖယ်ရှားတော့မည်ဟု သတင်းထွက်ပေါ်လာပြီးနောက် ပြည်နယ်လွှတ်တော်နှင့် ညီညွှတ်မှုရှိကြောင်း ထုတ်ဖော်ပြသခဲ့သည်။

ဆာဘတ် UMNO လွှတ်တော်အဖွဲ့ဝင် ခုနစ်ဦးနှင့် တွေ့ဆုံခဲ့ကာ ယခုနှစ်အတွင်း ပိုမိုကောင်းမွန်သော ပြည်နယ် ဖြစ်လာစေရေးအတွက် ကြိုးပမ်းမှုများနှင့် စီမံကိန်းများကို ဆွေးနွေးခဲ့သည်ဟု ဟာဂျီဂျီက ဖေ့စ်ဘွတ်ခ် စာမျက်နှာတွင် ရေးသားခဲ့သည်။

ဘုရားသခင်၏ အလိုတော်အရ မိမိတို့ကြား ပူးပေါင်းဆောင်ရွက်မှု၊ တည်ငြိမ်မှုနှင့် သဘောတူညီမှုများဖြင့် အရာရာကို အောင်မြင်မှုရရှိ လိမ့်မည်ဟုလည်း ၎င်းက ပြောဆိုခဲ့သည်။

Source: CNA

CNI International News

ဘန်ကောက်၊ ဇန်နဝါရီ - ၇

မုဒါဟန် (Mukdahan) ပြည်နယ်မှ ဖြူးထိုင်းပါတီ လွှတ်တော်အမတ် အနူရတ် တန်ပန်နီတာနွန်သည် ဘတ် ၅ သန်း လာဘ်စားရန် ကြိုးပမ်းမှုဖြင့် အပြစ်ရှိကြောင်း တွေ့ခဲ့ရသည်ဟု ဘန်ကောက်ပို့စ် သတင်းတွင် ဖော်ပြထားသည်။

လွှတ်တော်အမတ် အနူရတ် တန်ပန်နီတာနွန် (Anurak Tangpanitanon) သည် အဆိုပြုထားသော ဘတ်ဂျက် တစ်ခုကို အတည်ပြုပေးရန် ဘတ် ၅ သန်း တောင်းဆိုခဲ့မှုဖြင့် လွှတ်တော်ကျင့်ဝတ်ဆိုင်ရာ ဥပဒေကို ချိုးဖောက်ခဲ့ ကြောင်း ထိုင်းဗဟိုတရားရုံးချုပ်၏ အာဏာရနိုင်ငံရေးသမားများဆိုင်ရာ ရာဇဝတ်မှု အဖွဲ့ခွဲမှ တွေ့ခဲ့ရခြင်း ဖြစ်သည်။

ထိုသို့ လုပ်ဆောင်ခဲ့ခြင်းက ကိုယ်ကျိုးအတွက် လုပ်ပိုင်ခွင့်ကို တလွဲအသုံးပြုခဲ့ခြင်း ဖြစ်ကြောင်း ယင်းကို ထိုင်းနိုင်ငံ ၏ အကျင့်ပျက်ခြစားမှု တိုက်ဖျက်ရေးနှင့် တားဆီးရေး ၂၀၁၈ ဥပဒေ၏ ပုဒ်မ ၈၇ တွင် တားမြစ်ထားသည်ဟု တရားရုံး၏ စီရင်ချက်တွင် ဖော်ပြထားသည်။

ထိုင်းလွှတ်တော်ကိုတွေ့ရစဉ် (GETTY IMAGES)

အကျင့်ပျက်ခြစားမှုဆိုင်ရာ စွဲချက်များကို တရားရုံးက ကြားနာမှုပြုလုပ်ရန် သဘောတူခဲ့ပြီးနောက် အနူရတ်ကို ၂၀၂၁ ခုနှစ်၊ ဒီဇင်ဘာ ၁၅ ရက်တွင် ရာထူးမှ ရပ်နားခဲ့သည်။

၎င်းသည် ထိုပြစ်မှုအတွက် ရွေးကောက်ပွဲ ဝင်ရောက်ယှဉ်ပြိုင်ခွင့်နှင့် နိုင်ငံရေးအာဏာ ရယူခွင့် တစ်သက်တာ ပိတ်ခံခဲ့ရပြီး မဲပေးခွင့်လည်း ၁၀ နှစ်ကြာ ဆုံးရှုံးရမည် ဖြစ်သည်။

အနူရတ် အပေါ် စွပ်စွဲထားမှုများက ဖြစ်နိုင်ချေရှိသည်ကို တွေ့ရှိခဲ့ပြီးနောက် ထိုင်းအမျိုးသား အကျင့်ပျက်ခြစားမှု တိုက်ဖျက်ရေးကော်မရှင်က တွေ့ရှိခဲ့သည်။ ထို့နောက် ယင်းကို တရားရုံးတင်ပို့ခဲ့သည်။

သောကြာနေ့ ဆုံးဖြတ်ချက်များ၌ အနူရတ်သည် ဌာန၏ အဆိုပြု ဘတ်ဂျက်ကို မဖြတ်ချရေး ကမ်းလှမ်းမှုဖြင့် မြေအောက် ရေအရင်းအမြစ်ဌာန ညွှန်ကြားရေးမှူးချုပ်ထံမှ လာဘ်ငွေကို တောင်းဆိုခဲ့ခြင်း ဖြစ်သည်ဟု သိရသည်။

Mukdahan ပြည်နယ်ကိုတွေ့ရစဉ် (GETTY IMAGES)

ထိုဖြစ်ရပ်သည် လွှတ်တော်ကော်မတီက ၂၀၂၁ ဘတ်ဂျက် စိစစ်ရေး လုပ်ဆောင်နေစဉ် ပေါ်ပေါက်ခဲ့ခြင်း ဖြစ်ကာ ထိုအချိန်တွင် အနူရတ်သည် ဘတ်ဂျက်များကို စိစစ်ရသော လွှတ်တော်ကော်မတီဌာနခွဲတွင် အဖွဲ့ဝင်အဖြစ် ဆောင်ရွက်နေခဲ့သည်။

လွှတ်တော်ကော်မတီနှင့် တွေ့ဆုံစဉ် ညွှန်ကြားရေးမှူးဖြစ်သူ ဆက်ဒါ (Sakda)က အနူရတ်၏ တောင်းဆိုမှုကို ဖော်ထုတ်ခဲ့ခြင်း ဖြစ်သည်။ ထို့နောက်တွင် အကျင့်ပျက်ခြစားမှု တိုက်ဖျက်ရေး ကော်မရှင်က စုံစမ်းစစ်ဆေးမှု ပြုလုပ်ခဲ့ရာ အနူရတ်သည် ဆက်ဒါ၏ ဖုန်းကိုခေါ်ကာ စွပ်စွဲချက်အတိုင်း ပြောဆိုခဲ့သည့် သက်သေများကို တွေ့ခဲ့ရသည်။

Source: ဘန်ကောက်ပို့စ်

CNI International News

မက္ကဆီကိုစီးတီး၊ ဇန်နဝါရီ ၇

ထောင်ကျနေသော နာမည်ကျော် မူးယစ်ရာဇာ ဂျိုအာကွင်း အယ်လ်ချာပို ဂတ်ဇ်မန်း (Joaquin “El Chapo” Guzman)၏ သားဖြစ်သူ အိုဗီဒီယို ဂတ်ဇ်မန်း (Ovidio Guzman) ကို မက္ကဆီကို အာဏာပိုင်များက ဖမ်းဆီးခဲ့သည်။

ထို့နောက် ဖမ်းဆီးမှုဖြစ်ပြီး နောက်ရက်များတွင် ဆီနာလိုအာ (Sinaloa) ပြည်နယ် ကူလီယာကန် (Culiacan) မြို့တွင်း၌ ကားများမီးရှို့ခံရခြင်း၊ ဒေသခံများ၏ ကားများကို ပြန်ပေးဆွဲခြင်းများ ပေါ်ပေါက်ခဲ့သည်။

ထိုလုပ်ရပ်များကို ရာဇဝတ်ဂိုဏ်းသားများက ကျူးလွန်သည်ဟု ယူဆရသည်။ အာဏာပိုင်များ အနေဖြင့် အဘယ် ကြောင့် ယခုလို အကြမ်းဖက်မှုများ ဖြစ်နေသည်ကို ထုတ်ဖော်ပြောဆိုထားခြင်း မရှိသော်လည်း ထိုသို့သော လုပ် ရပ်များသည် ဂိုဏ်းအဖွဲ့ဝင် တစ်ဦး ဖမ်းဆီးခံရချိန်တွင် တုန့်ပြန်သည့်အနေဖြင့် ဂိုဏ်းသားများက လုပ်ဆောင် လေ့ရှိသော အပြုအမှုများ ဖြစ်သည်။

မက္ကဆီကိုသမ္မတ အန်ဒရေ မန်နျူရယ် လိုပတ်ဇ် အိုဘရာဒေါကိုတွေ့ရစဉ် (GETTY IMAGES)

မြို့နေရာ အနှံ့အပြားတွင် လမ်းများပိတ်ဆို့မှုများ ဖြစ်ပေါ်နေခြင်းကြောင့် ဒေသခံများအနေဖြင့် အိမ်အပြင်မ ထွက်ကြရန် တောင်းဆိုကြောင်း ကူလီယာကန်မြို့တော်ဝန် ဟွမ်ဒီဒီယို့ဂါမက်ဇ် (Juan de Dios Gamez) က တွစ်တာတွင် ရေးသားခဲ့သည်။

အဖမ်းခံခဲ့ရသော အိုဗီဒီယိုသည် ၎င်း၏ဖခင်ဖြစ်သူ အဖမ်းခံခဲ့ရပြီးနောက် ဆီနာလိုအာဂိုဏ်း၏ အရေးကြီးသော ပုံရိပ်တစ်ခုဖြစ်ခဲ့ပြီး ၎င်းကို မက္ကဆီကိုအာဏာပိုင်များက ၂၀၁၉ ခုနှစ်၊ အောက်တိုဘာလတွင် ဖမ်းဆီးထိန်းသိမ်း ခဲ့သည်။

ထို့နောက်တွင် အိုဗီဒီယို၏ ဂိုဏ်းသားများက မြို့အနှံ့ အင်အားပြင်း လက်နက်များဖြင့် ပစ်ခတ်မှုများ စတင်ပြု လုပ်ခဲ့ရာ အိုဗီဒီယိုလည်း ပြန်လည်လွတ်မြောက်လာခဲ့သည်။

၎င်းက မက္ကဆီကိုသမ္မတ အန်ဒရေ မန်နျူရယ် လိုပတ်ဇ် အိုဘရာဒေါ (Andres Manuel Lopez Obrador) အစိုးရအတွက် ကြီးမားသည့် အရှက်ရမှုကိုလည်း ဖြစ်စေခဲ့သည်။

 မြို့တွင်း အကြမ်းဖက်မှုများဖြစ်ထားစဉ် (AP)

ကြာသပတေးနေ့ သတင်းစာရှင်းလင်းပွဲတွင် သမ္မတက ကူလီယာကန်တွင် စစ်ဆင်ရေးများ ဆောင်ရွက်နေ သည်ဟု ပြောခဲ့သော်လည်း မည်သို့ လုပ်ဆောင်နေသည်ကိုတော့ မရှင်းပြခဲ့ပေ။

လူမှုကွန်ယက်ပေါ်သို့ ပေါ်ထွက်လာသည့် အတည်မပြုနိုင်သေးသော ဗွီဒီယိုများတွင် ရဟတ်ယာဉ် တစ်စင်းပေါ်မှ အပါအဝင် မြို့အနှံ့ ပစ်ခတ်မှုများ ဖြစ်နေသည်ကို တွေ့ခဲ့ရသည်။

ထို့ပြင် မြို့ရှိ လေဆိပ်ကိုလည်း ယာယီရပ်ဆိုင်ထားရသလို အစိုးရဝန်ထမ်းများ လုပ်ငန်းဆောင်ရွက်ခြင်းကိုလည်း ရပ်နားထားရသည်။

မက္ကဆီကိုအစိုးရသည် နိုင်ငံတစ်ဝန်းလုံးတွင် အကြမ်းဖက်မှုများ မြင့်မားနေခြင်း၊ မူးယစ်ဆေးဝါးဂိုဏ်းများ အင်အား ကြီးမားနေခြင်းတို့ကို ဖြေရှင်းရန် ရုန်းကန်နေရသည်။

Source: အယ်ဂျာဇီးယား

ဆိုးလ်၊ဇန်နဝါရီ - ၆

မကြာသေးခင်က ပြုလုပ်ခဲ့သော အခမ်းအနားများတွင် သမီးဖြစ်သူကို ပွဲထုတ်ခဲ့သော မြောက်ကိုရီးယား ခေါင်းဆောင် ကင်ဂျုံအန်(Kim Jong Un)၏ လုပ်ရပ်သည် နောင်တစ်ချိန်တွင် ၎င်း၏နေရာကို သားသမီးများ ဆက်ခံသွားမည်ကို ပြည်သူများသို့ အသိပေးရန် ကြိုးပမ်းခြင်း ဖြစ်နိုင်ကြောင်း တောင်ကိုရီးယားထောက်လှမ်းရေး အေဂျင်စီဘက်က မှတ်ယူထားကြောင်း အေပီသတင်းတွင် ဖော်ပြထားသည်။

ကင်သည် သမီးဖြစ်သူကို ပြီးခဲ့သည့် လများတွင် ပြုလုပ်ခဲ့သော ဒုံးကျည်ပစ်လွှတ်ခြင်း၊ လက်နက်ပညာရှင်များနှင့် ဓာတ်ပုံရိုက်ခြင်း၊ ဒုံးကျည်စက်ရုံသို့ခေါ်သွားခြင်း စသဖြင့် လူမြင်ကွင်းသို့ခေါ် ထုတ်လာခဲ့သည်။

ကင်၏ သမီးဖြစ်သူကို မြောက်ကိုရီးယားမီဒီယာက ချစ်စရာ အကောင်းဆုံး ကလေးအဖြစ် သတ်မှတ်ထားပြီး သူမ၏ အသက်မှာ ၉ နှစ် သို့မဟုတ် ၁၀ နှစ်အရွယ် ဖြစ်သည့်တိုင် ထိုကလေးသည် နောင်တစ်ချိန်တွင် ကင်၏ ဆက်ခံသူ ဖြစ်လာနိုင်မလားဆိုတာ ငြင်းခုံမှုများ ရှိလာသည်။

တံခါးပိတ် လွှတ်တော်ကော်မတီ အစည်းအဝေးတစ်ခုတွင် တောင်ကိုရီးယား အမျိုးသားထောက်လှမ်းရေး အဖွဲ့(NIS)က ကင်၏ ပွဲထုတ်မှုသည် နောင်တစ်ချိန်တွင် ဆက်ခံသူကို ဖော်ပြရန် ရည်ရွယ်သည်ဟု ပြောကြောင်း ထိုအစည်းအဝေးကို တက်ရောက်ခဲ့သည့် လွှတ်တော်အမတ် ယိုဆန်ဘမ်း (Yoo Sang-bum) ကပြောသည်။

တောင်ကိုရီးယားအမျိုးသားလုံခြုံရေးကော်မတီရုံး(GETTY IMAGES)

ကင်တွင် သားသမီး သုံးဦးရှိသည်ဟု တောင်ကိုရီးယားမီဒီယာများက ဖော်ပြကြပြီး သမီးဖြစ်သူမှလွှဲ၍ မည်သူ့ကိုမှ လူမြင်ကွင်းသို့ ထုတ်မပြခဲ့ဖူးချေ။ ကင်၏အကြီးကလေးမှာ ယောင်္ကျားလေး ဖြစ်သည်ဟု သိရပြီး ယခုကဲ့သို့ လူမြင် ကွင်းကို ထုတ်ပြသည့်တိုင် ကင်၏သမီးသည် ခေါင်းဆောင်နေရာကို မဖြစ်မနေ ဆက်ခံလိမ့်မည်ဟု NIS ဘက်က မယူဆထားဟုလည်း ယိုက ပြောသည်။

ကင်သည် သမီးဖြစ်သူကို နိုဝင်ဘာလတွင် ပထမဆုံး လူမြင်ကွင်းသို့ ပွဲထုတ်ခဲ့ခြင်းဖြစ်ပြီး ထိုကလေးသည် အသက် ၁၀ နှစ်ဝန်းကျင်အရွယ် ကင်၏ဒုတိယသမီး ဂျူအီ (Ju Ae) ဖြစ်သည်ဟု NIS က လွှတ်တော် အမတ်များကို ပြောခဲ့ သည်။
သမီးဖြစ်သူကို ဒုံးကျည် ပစ်လွှတ်ရာ နေရာသို့ ခေါ်ဆောင်လာခြင်းသည် နိုင်ငံ၏အနာဂတ် မျိုးဆက်သစ်များ၏ လုံခြုံရေးကို ကာကွယ်ရန် ကင်၏ကြိုးပမ်းမှုဟု ထိုအချိန်တုန်းက NIS က သုံးသပ်ခဲ့သည်။ ဂျူအီသည် NBA ကစားသမားဟောင်း ဒန်းနစ်ရော့မန်း (Dennis Rodman) မြောက်ကိုရီးယားသို့ သွားရောက်စဉ်က တွေ့ဆုံခဲ့သည့် ကလေးငယ်လည်း ဖြစ်သည်။

အသက် ၃၉ နှစ် ပြည့်တော့မည်ဖြစ်သော ကင်သည် မြောက်ကိုရီးယားနိုင်ငံ၏ မျိုးရိုးသုံးဆက်မြောက် ခေါင်းဆောင်ဖြစ်ကာ ၎င်းမတိုင်ခင် အဖေဖြစ်သူ ကင်ဂျုံအီ (Kim Jong Il) နှင့် အမျိုးဖြစ်သူ ကင်အီဆန်း (Kim Il Sung) တို့က အုပ်ချုပ်ခဲ့သည်။

ကင်ဂျုံအန်သည် အင်ဂျုံအီ၏ တတိယမြောက်နှင့် အငယ်သုံးသားဖြစ်ပြီး ၎င်းကို ဖခင်ဖြစ်သူက အသက် ၂၆ နှစ် အရွယ်မှသာ လူမြင်ကွင်းသို့ ထုတ်ပြခဲ့ခြင်း ဖြစ်သည်။

ထို့ကြောင့် ကင်ဂျုံအန်၏ ၁၀ နှစ်ဝန်းကျင်အရွယ် သမီးဖြစ်သူကို လူမြင်ကွင်းသို့ ခေါ်ဆောင်လာခြင်းက မြောက်ကိုရီးယားအရေး စောင့်ကြည့်သူများကို အံ့သြသင့်စေခဲ့သည်။

Source: AP

CNI International News

ဒီမာပေါ၊ ဇန်နဝါရီ ၆

အဖွဲ့၏ ခွင့်ပြုချက်မပါဘဲ ကိုယ့်သဘောအတိုင်း လုပ်ဆောင်နေသည့်အတွက်ကြောင့် NSCN-K(Khango) အဖွဲ့၏ ဥက္ကဋ္ဌ ဖြစ်သူ ခန်ဂိုကွန်ယတ် (Khango Konyak)က အထွေထွေအတွင်းရေးမှူး အိုင်ဆတ် ဆူမီ (Isak Sumi) ကို ရာထူးမှထုတ်ပယ်၍ အပြစ်ပေးခဲ့သည်ဟု NORTHEAST News သတင်းတွင် ဖော်ပြထားသည်။

ကြာသပတေးနေ့တွင် ရရှိခဲ့သော အသိပေးစာ၌ ဆူမီသည် စုပေါင်းခေါင်းဆောင်မှု၏ ခွင့်ပြုချက်မရှိဘဲ အကြွင်းမဲ့ အာဏာများနှင့် လုပ်ဆောင်မှုများကို လုယူခဲ့မှုအတွက် အပြစ်ရှိကြောင်း တွေ့ရှိခဲ့သည် ကွန်ယတ်က ပြောသည်။

ထို့အပြင် ၎င်း(ဆူမီ)သည် အာဏာအလွဲသုံးစားမှုလုပ်ခြင်း၊ ဆွေမျိုးကောင်းစားရေးနှင့် တစ်ဦးတည်း အုပ်ချုပ်မှုဟု ကိုယ့်ကိုယ်ကို သတ်မှတ်ခြင်း စသဖြင့် စွဲဆိုခံထားရသည်။

အဆိုပါ လုပ်ဆောင်ချက်များသည် အခြေခံဥပဒေနှင့် စည်းမျဉ်းတို့ကို ချိုးဖောက်မှုဖြစ်သည်ဟု သတ်မှတ်ခဲ့သည်။

ဆူမီအား အပြစ်ပေးမှုသည် ၂၀၂၃ ခုနှစ်၊ ဇန်နဝါရီ ၄ ရက်နေ့မှ စတင် အကျုံးဝင်ခဲ့ကြောင်းလည်း ကွန်ယတ်က ပြောသည်။

NSCN-K (Khango) မှ ခေါင်းဆောင် ခန်ဂိုကွန်ယတ်နဲ့အဖွဲ့ကိုတွေ့ရစဉ်(GETTY IMAGES)

ထို့နောက် ဆူမီအား ၎င်း၏လုပ်ပိုင်ခွင့်၊ တာဝန်များအားလုံးမှ ဖယ်ရှားကြောင်း ၊ ၎င်းသည် GPRN/NSCN-K တို့၏ အစိတ်အပိုင်း မဟုတ်တော့ကြောင်း၊ အဖွဲ့အစည်း အနေဖြင့် ယခုအချိန်မှ စတင်ကာ ၎င်း၏ လုပ်ဆောင်မှုများကို လုံးဝ တာဝန်ယူမည် မဟုတ်ကြောင်း ကွန်ယတ်၏ အသိပေးစာတွင် ဖော်ပြထားသည်။

ဆူမီသည် နာဂလန်းအမျိုးသားနိုင်ငံရေးအုပ်စုများ (NNPGs) မှ NSCN-K (Khango) ကို ကိုယ်စားပြုကာ ယင်း၏ လုပ်ငန်းကော်မတီမှ ပူးတွဲဖိတ်ခေါ်သူတစ်ဦးလည်း ဖြစ်သည်။

ခန်ဂိုကွန်ယတ်သည် မြန်မာနိုင်ငံတွင် အခြေစိုက်၍ အိန္ဒိယကိုတော်လှန်နေသည့် နာဂအမျိုးသားဆိုရှယ်လစ် ကောင်စီ-ကပ္ပလန်(NSCN-K)မှ ဖြစ်သည်။

ဦးကပ္ပလန် ၂၀၁၇ ခုနှစ်၊ ဇွန်လတွင် ကွယ်လွန်သွားခဲ့သည့်အတွက် ခန်ဂိုကွန်ယတ်ကို NSCN-K(Khango) ဥက္ကဋ္ဌအဖြစ် ရွေးချယ်တင်မြောက်ခဲ့သည်။

ထို့နောက် ခန်ဂိုကွန်ယတ်ကို တာဝန်မကျေမွန်မှုဖြင့် NSCN-K ၏ ဗဟိုဌာနချုပ်တည်ရှိရာ နမ်းယွန်းမြို့နယ်ရှိ တံခါးစခန်းတွင် ၂၀၁၈ ခုနှစ်၊ သြဂုတ်လ ၁၅ ရက်နေ့မှ ၁၇ ရက်နေ့အထိ ခေါင်းဆောင်ပိုင်း အစည်းအဝေး ပြုလုပ်ပြီး ဥက္ကဋ္ဌ အဖြစ်မှ ထုတ်ပယ်ကာ ဦးယုံးအောင်(Yung Aung)အား ဥက္ကဋ္ဌအဖြစ် တင်မြှောက်ခဲ့သည်။

လက်ရှိတွင် ခန်ဂိုကွန်ယတ် ဦးဆောင်သည့် NSCN-K(Khango)သည် အိန္ဒိယအစိုးရနှင့် ငြိမ်းချမ်းရေးယူထားပြီး အိန္ဒိယဘက်ခြမ်းမှာ နေထိုင်လျက်ရှိသည်။

Source: Northeast News