CNI International News

ဘန်စကာ ဘိုင်စတာရီကာ၊ မေ ၁၇

မေလ ၁၅ ရက်နေ့က သေနတ်ဖြင့် ပစ်ခတ်လုပ်ကြံခံခဲ့ရသည့် ဆလိုဗက်ကီးယားဝန်ကြီးချုပ် ရောဘတ် ဖီကို (Robert Fico) သည် အသက်အန္တရာယ် မစိုးရိမ်ရတော့ကြောင်း ဒုတိယဝန်ကြီးချုပ်နှင့် သဘာဝပတ်ဝန်းကျင် ဆိုင်ရာဝန်ကြီး တာဝန်ယူထားသူ တိုမက်စ် တာရာဘာက ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဝန်ကြီးချုပ် ဖီကို (၅၉ နှစစ်) သည် အစိုးရအဖွဲ့ အစည်းအဝေးမှ ပြန်လာချိန်တွင် သေနတ်သမားက ဖီကိုအား သေနတ်ဖြင့် ၅ ချက်ပစ်ခတ်ခဲ့ခြင်းဖြစ်သည်။

အဆိုပါ ပစ်ခတ်ခံရမှုကြောင့် အစောပိုင်းတွင် အသက်အန္တရာယ် စိုးရိမ်ရသည့် အခြေအနေတွင်ရှိခဲ့ပြီး ခွဲစိတ်ကုသ မှုခံယူခဲ့ရသည်။

“ကျနော် တော်တော်လန့် သွားခဲ့ပါတယ်။ ကံကောင်းတာက ခွဲစိတ်မှုဟာ အောင်မြင်သွားခဲ့ပါတယ်။ သူ အသက် ရှင် ပါလိမ့်မယ်။ အခုအချိန်မှာတော့ အသက်အန္တရာယ် မစိုးရိမ်ရပါဘူး” ဟု တာရာဘာက ဘီဘီစီသတင်းဌာန၏ Newshour အစီအစဉ်တွင် ပြောကြားခဲ့သည်။

ဆလိုဗက်ကီးယားဝန်ကြီးချုပ် ရောဘတ်ဖီကိုအား ဆေးရုံသယ်သွားစဉ်

ကျည်ဆန်တစ်ခုသည် ဖီကို၏ အစာအိမ်ကို ဖောက်ထွက်သွားခဲ့ကြောင်း တာရာဘာက ပြောသည်။ 

လက်ရှိတွင် ဖီကိုသည် ခွဲစိတ်ခန်းမှ ထွက်လာပြီး ကျန်းမာရေးအခြေအနေ တည်ငြိမ်နေကြောင်း Aktuality.sk သတင်းဝက်ဘ်ဆိုက်မှ ဖော်ပြခဲ့သည်။

ဖီကိုသည် သေနတ်ဒဏ်ရာအချို့ ရရှိခဲ့ပြီးနောက် ပြင်းထန်သည့် ဒဏ်ရာ အများအပြား ရရှိခဲ့ကြောင်း ကာကွယ်ရေးဝန်ကြီး ရောဘတ် ကာလီနက် (Robert Kalinak)က ပြောကြားခဲ့သည်။

ထို့နောက် ဝန်ကြီးချုပ်၏ အခြေအနေသည် အသက်အန္တရာယ် စိုးရိမ်ရကြောင်း ပြည်ထဲရေးဝန်ကြီး မာတပ်စ် ဆူတက်ဂျ် အက်စ်တော့ခ် (Matus Sutai Estok)က ထပ်မံ၍ အစောပိုင်းတွင် ပြောကြားခဲ့သည်။

ဝန်ကြီးချုပ်အား ပစ်ခတ်သူသည် အသက် ၇၁ နှစ်အရွယ် သက်ကြီးပိုင်း အမျိုးသားဖြစ်သဖြင့် လူထုကို တုန်လှုပ် သွားစေခဲ့သည်။

လက်ရှိတွင် သေနတ်ဖြင့် ပစ်ခတ်သူကို လူသတ်ရန် ကြံစည်မှုဖြင့် တရားစွဲဆိုထားသည်။

ဆလိုဗက်ကီးယားဝန်ကြီးချုပ် ရောဘတ် ဖီကိုကို တွေ့ရစဉ်

ဥရောပသမဂ္ဂနှင့် နေတိုးအဖွဲ့ဝင်ဖြစ်သည့် ဆလိုဗက်ကီးယားတွင် နိုင်ငံရေး အကြမ်းဖက်မှုများသည် ရှားပါး ဖြစ်စဉ်ဖြစ်သည်။

ရုရှားသမ္မတ ပူတင် (Vladimir Putin) နှင့် အမေရိကန်သမ္မတ ဂျိုးဘိုင်ဒန် (Joe Biden) တို့ အပါအဝင် ဥရောပသမဂ္ဂ ခေါင်းဆောင်များက ထိုပစ်ခတ်မှုကို ထိတ်လန့်ကြောင်း ဖော်ပြခဲ့ပြီး ရှုတ်ချခဲ့ကြသည်။

လူဦးရေ ၅ ဒသမ ၄ သန်း နေထိုင်သည့် ဆလိုဗက်ကီးယားနိုင်ငံတွင် မကြာသေးမီ နှစ်များအတွင်း နိုင်ငံရေး သဘောထား ကွဲလွဲမှုများနှင့် အငြင်းအခုံများ ဖြစ်ပွားခဲ့သည်။

ထို့နောက် ပြီးခဲ့သည့်နှစ် အောက်တိုဘာလကုန်က ဖီကိုသည် ဝန်ကြီးချုပ်ရာထူးကို ဒုတိယအကြိမ် ပြန်လည် ရရှိခဲ့သည်။

ဖီကို အာဏာပြန်ရလာပြီးနောက် ဆလိုဗက်ကီးယား အစိုးရအဖွဲ့သည် ယူကရိန်းကို ထောက်ခံမှု လျှော့ချခဲ့ပြီး ရုရှားနှင့် ဆွေးနွေးညှိနှိုင်းမှုများ ပြုလုပ်ခဲ့သဖြင့် အတိုက်အခံများ၏ ဝေဖန်မှုများနှင့် ရင်ဆိုင်ခဲ့ရသည်။

Source: ရိုက်တာ

CNI International News

နယူးဒေလီ၊ မေလ ၁၇

အိန္ဒိယစစ်တပ်သည် တရုတ်နယ်စပ်အနီးရှိ အရှေ့လာဒက် (Eastern Ladakh) ဒေသတွင် တင့်ကားများနှင့် ခြေလျင် တိုက်ခိုက်ရေးတပ်မှ ယာဉ်အစီးရေ ၅၀၀ နှင့်အတူ ထိုဒေသတွင် ကမ္ဘာ့အမြင့်ဆုံး တင့်ကားပြုပြင်ရေး စက်ရုံနှစ်ခုကို တည်ဆောက်ခဲ့ကြောင်း Economic Times မှ ဖော်ပြခဲ့သည်။

အိန္ဒိယသည် တရုတ်နယ်စပ်အနီးရှိ ညိုမာ (Nyoma) နှင့် DBO Sector ဒေသတွင် ကျည်ကာကားများ ပြုပြင် ထိန်းသိမ်းရေး စက်ရုံနှစ်ခုကို တည်ဆောက်ခဲ့ခြင်းဖြစ်သည်။

ထိုဒေသသည် အမြင့်ပေပေါင်း ၁၄,၅၀၀ ခန့်၌ တည်ရှိသဖြင့် ကမ္ဘာ့အမြင့်ဆုံး တိုက်ပွဲဝင် တင့်ကားများနှင့် ခြေလျင်တပ် တိုက်ခိုက်ရေးယာဉ်များ ပြုပြင်သည့် စက်ရုံများအဖြစ် မှတ်တမ်းဝင်ခဲ့ခြင်းဖြစ်သည်။

အရှေ့လာဒက်ဒေသက တရုတ်နဲ့ အိန္ဒိယ နယ်နိမိတ်ကိုတွေ့ရစဉ်

၂၀၂၀ ပြည့်နှစ် ဧပြီလမှ မေလတွင် အိန္ဒိယနှင့် တရုတ် စစ်သားများအကြား ခိုက်ရန်ဖြစ်ပွားမှုများ ရှိခဲ့ပြီးနောက် အိန္ဒိယသည် အရှေ့လာဒက်ဒေသ၌ Quick Reaction တိုက်ခိုက်ရေးယာဉ်များကဲ့သို့ အိန္ဒိယနိုင်ငံသို့ ကျည်ကာ ကားများ၊ BMP တိုက်ခိုက်ရေးယာဉ်များနှင့် တင့်ကားများကို ဖြန့်ကြက်ချထားခဲ့သည်။

“တင့်ကားတွေနဲ့ ခြေလျင် တိုက်ခိုက်ရေးယာဉ်တွေကို ပင်လယ်ရေမျက်နှာပြင်အထက် အရမ်းမြင့်တဲ့ နေရာဒေသ တွေမှာ ဖြန့်ကြက်ချထားခဲ့တာပါ။ အဲဒါကြောင့် အဲဒီလို မြေမျက်နှာပြင် အမြင့်မှာရှိတဲ့ တင့်ကားတွေကို မြေပြန့်ကို ပြန်ခေါ်ပြီး ပြုပြင်ထိန်းသိမ်းဖို့ ခက်ခဲပါတယ်” ဟု အိန္ဒိယစစ်တပ်အရာရှိများက ANI သတင်းဌာနသို့ ပြောကြားခဲ့ သည်။

“အဲဒီပြဿနာကို ဖြေရှင်းတဲ့ အနေနဲ့ အဲဒီဒေသမှာပဲ ကျည်ကာကားတွေ ပြုပြင်ထိန်းသိမ်းတဲ့ စက်ရုံတွေကို ညိုမာ ဒေသနဲ့ DBO Sector ဒေသတွေမှာ တည်ဆောက်ခဲ့ပါတယ်။ အဲဒီဒေသနှစ်ခုမှာ တင့်ကားတွေနဲ့ ခြေလျင်တပ် တိုက်ခိုက်ရေးယာဉ်တွေကို ပြုပြင်ထိန်းသိမ်းမှာဖြစ်ပြီး လာဒက်ဒေသ အရှေ့ပိုင်းကို အာရုံစိုက်သွားမှာ ဖြစ်ပါ တယ်” ဟု အိန္ဒိယစစ်တပ်အရာရှိများက ပြောကြားခဲ့သည်။

အိန္ဒိယစစ်တပ်သည် အပူချိန် အလွန်ကျဆင်းသည့် ဆောင်းရာသီတွင် ကုန်းမြင့်ဒေသများ၌ T-90 နှင့် T-72 တင့်ကားများ၊ BMP နှင့် K-9Vajra ဟောင်ဝဇ္ဇာများ အပါအဝင် ၎င်း၏တင့်ကားများကို လက်ခံထားရှိရေးအတွက် ကြီးမားသည့် အခြေခံ အဆောက်အအုံများကို ဖန်တီးခဲ့သည်။

အိန္ဒိယကြည်းတပ် အကြီးအကဲ ဗိုလ်ချုပ်ကြီး မနို့ဂျ် ပန်ဒီကို တွေ့ရစဉ်

မကြာသေးမီကလည်း အိန္ဒိယကြည်းတပ် အကြီးအကဲ ဗိုလ်ချုပ်ကြီး မနို့ဂျ် ပန်ဒီ (Manof Pande) သည် ကျည်ကာ တိုက်ခိုက်ရေးယာဉ် (AFV) များအတွက် အလတ်စား ပြုပြင်ထိန်းသိမ်ရေးစက်ရုံ တစ်ခုသို့ သွားရောက်ကြည့်ရှုခဲ့ သည်။ 

ကုန်းမြင့်ဒေသများတွင် တည်ဆောက်ခဲ့သည့် တင့်ကားပြုပြင် ထိန်းသိမ်းရေးစက်ရုံများသည် အပူချိန် အနုတ် ၄၀ ဒီဂရီအထိ ကျဆင်းသွားသည့် အခြေအနေမျိုးမှာပင် စက်ရုံကို လည်ပတ်နိုင်ကြောင်း အရာရှိများက ပြောကြားခဲ့ သည်။

ပြီးခဲ့သည့် ၄ နှစ်အတွင်း အိန္ဒိယနှင့် တရုတ်သည် လာဒက်ဒေသတွင် ထိပ်တိုက်တွေ့ခဲ့ပြီး နယ်စပ်ဒေသများ၌ စစ်သားအင်အား ၅၀,၀၀၀ စီ ဖြန့်ကြက်ချထားခဲ့သည်။

Source: Economic Times

CNI International News

အစ္စလာမ်မာဘက်၊ မေလ ၁၇

ပါကစ္စတန်က ထိန်းချုပ်ထားသည့် ဂျမူးနှင့် ကက်ရှ်မီးယား (PoKJ) ဒေသတွင် ရဲတပ်ဖွဲ့နှင့် ဆန္ဒပြသူများအကြား အဓိကရုဏ်းများ ဖြစ်ပွားခဲ့၍ အကျပ်အတည်းသည် တောင်အာရှကို ရိုက်ခတ်နိုင်သည်ဟု Times of Israel သတင်းဝက်ဘ်ဆိုက်မှ ဖော်ပြခဲ့သည်။

ထို့အပြင် အာဖဂန်နစ္စတန်တွင် တာလီဘန်အဖွဲ့ အာဏာပြန်ရလာပြီးနောက် ပါကစ္စတန်နိုင်ငံအပေါ် ရန်လိုနေမှု များနှင့်လည်း ရင်ဆိုင်နေရသည်။

ပါကစ္စတန်အစိုးရက အာဇက် ဂျမူးနှင့် ကက်ရှ်မီးယား (AJK) ဟု ခေါ်ဆိုသည့် ထိုဒေသတွင် မေလ ၁၀ ရက်မှ ၁၂ ရက်အထိ နေရာဒေသ အနှံ့အပြား၌ ဆန္ဒပြသူများနှင့် ရဲတပ်ဖွဲ့များအကြား အဓိကရုန်း ဖြစ်ပွားခဲ့ခြင်းဖြစ်သည်။

 ပါကစ္စတန် ဝန်ကြီးချုပ် ရှာဘက် ရှရစ်ဖ်ကို တွေ့ရစဉ်

ဂျုံစျေးနှုန်းများ မြင့်တက်ခြင်း၊ အစားအစာ စျေးနှုန်းများ ဖောင်းပွခြင်း၊ အလုပ်လက်မဲ့နှုန်း မြင့်တက်လာခြင်း၊ အစိုးရ၏ ဂျုံထောက်ပံ့မှု ရပ်တန့်သွားခြင်း၊ မကြာခဏ လျှပ်စစ်ဓာတ်အားများ ပြတ်တောက်ခြင်းနှင့် PoJK ဒေသ၏ သဘာဝသယံဇာတများ အမြတ်ထုတ် ခံရခြင်းတို့ကြောင့် နိုင်ငံရေးသမားများနှင့် လူ့အခွင့်အရေးအဖွဲ့များ က ဆန္ဒပြခဲ့ခြင်းဖြစ်သည်။

ပါကစ္စတန်အစိုးရက ထိုဆန္ဒပြမှုများကို ကြမ်းတမ်းစွာ ကိုင်တွယ်ခဲ့ပြီး ဆန္ဒပြသူများ၊ လူ့အခွင့်အရေးအဖွဲ့ ခေါင်းဆောင်များကို ဖမ်းဆီးထိန်းသိမ်းခြင်းတို့ ပြုလုပ်ခဲ့သဖြင့် ဆန္ဒပြမှုများ ငြိမ်သက်သွားခဲ့သည်။

ထို့ပြင် ငြိမ်းချမ်းစွာ ဆန္ဒပြမှုများကို ဖြိုခွင်းရန် ပါကစ္စတန်အစိုးရက အာဇက်ကက်ရှ်မီးယားဒေသသို့ ရာနှင့်ချီသည့် စစ်သားများ ဖြန့်ကြက်ချထားခဲ့သည်။

မေလ ၁၁ ရက်က ဆန္ဒပြမှု ဖြစ်ပွားခဲ့ပြီးနောက် ပါကစ္စတန် ရိန်းဂျားတပ်ရင်း ၃ ရင်းသည် AJK ဒေသအတွင်းသို့ ဝင်ရောက်လာခဲ့ပြီးနောက် မူဇက်ဖာရာဘက် (Muzaffarabad) မြို့တော်တွင် ဆန္ဒပြသူများကို ဖြိုခွင်းခဲ့သဖြင့် ရာနှင့်ချီသည့် ဒေသခံများ ဒဏ်ရာရခဲ့သည်။

ပါကစ္စတန်သမ္မတ အဆစ်ဖ် အလီ ဇာဒါရီကို တွေ့ရစဉ်

အာဇက် ကက်ရှ်မီးယား ဒေသအနှံ့နှင့် မူဇက်ဖာရာဘက်မြို့တော်တွင် အခြေအနေများ တင်းမာလျက်ရှိနေပြီး တည်ငြိမ်မှုကို ပြန်လည်ထိန်းသိမ်းရန် ဝန်ကြီးချုပ် ရှာဘက် ရှရစ်ဖ်က (Shehbaz Sharif) က X လူမှုမီဒီယာတွင် ကြေညာချက် ထုတ်ပြန်ခဲ့သည်။

ထိုကြေညာချက်တွင် ရှရစ်ဖ်က အာဇက် ဂျမူးနှင့် ကက်ရှ်မီးယား(AJK)ဒေသ ဝန်ကြီးချုပ် ချောင်ဒရီ အန်ဝါ အူဟက် (Chaudhry Anwar-ul-Haq)အား ဂျမူး-ကက်ရှ်မီးယား ပူးတွဲ အဝါမီ လှုပ်ရှားမှု ကော်မတီ (JAAC) နှင့် ဆွေးနွေးညှိနှိုင်းမှုများ ပြုလုပ်ရန် တိုက်တွန်းခဲ့သည်။

ပါကစ္စတန်သမ္မတ အဆစ်ဖ် အလီ ဇာဒါရီ (Asif Ali Zardari) ကလည်း AJK ဒေသတွင် ဖြစ်ပွားနေသည့် လက်ရှိ အခြေအနေအပေါ် ဝမ်းနည်းကြောင်း၊ ထိုဒေသတွင် ကျန်းမာရေး၊ ပညာရေး၊ ခရီးသွားလာရေးနှင့် အခြေခံ အဆောက်အအုံကဏ္ဍများ အပါအဝင် လူမှုစီးပွား ဖွံ့ဖြိုးတိုးတက်ရေး အစီအစဉ်များကို ဦးစားပေး လုပ်ဆောင်သင့် ကြောင်း ပြောကြားခဲ့သည်။

Source: Times of Israel

CNI International News

နယူးဒေလီ၊ မေလ ၁၆

အိန္ဒိယနှင့် ဩစတြေးလျအကြား ပင်လယ်ရေကြောင်းဆိုင်ရာ ပူးပေါင်းဆောင်ရွက်မှုကို တိုးမြှင့်သည့် ခြေလှမ်း တစ်ရပ်အနေဖြင့် ၁၆ ကြိမ်မြောက် အိန္ဒိယရေတပ်-ဩစတြေးလျရေတပ် ဆွေးနွေးပွဲအား မေလ ၁၄ ရက်က အောင်မြင်စွာ နိဂုံးချုပ်ခဲ့သည်ဟု Devdiscourse သတင်းဝက်ဘ်ဆိုက်မှ ဖော်ပြခဲ့သည်။

အန္ဒိယရေတပ်၏ ဒုတိယရေတပ်ဦးစီးချုပ် ရေတပ်ဗိုလ်ချုပ်ကြီး နီယာဘဟေး ဘက်ပ်နာ (Nirbhay Bapna) နှင့် ဩစတြေးလျ တော်ဝင်ရေတပ်မှ ရေတပ်ဗိုလ်ချုပ်ကြီး ဂျွန်နသန် အာလေး (Jonathan Earley) တို့က ကြီးမှူး ကျင်းပသည့် ထိုဆွေးနွေးပွဲသည် နှစ်နိုင်ငံရေတပ်များအကြား ပူးပေါင်းဆောင်ရွက်မှုများတွင် သမိုင်းမှတ်တိုင် တစ်ခု ဖြစ်ခဲ့သည်။

“၁၆ ကြိမ်မြောက် အိန္ဒိယရေတပ်-ဩစတြေးလျရေတပ် ၊ ရေတပ်အချင်းချင်း ဆွေးနွေးမှုတွေကို ကိုချီ (Kochi) မြို့မှာ အောင်မြင်စွာ အဆုံးသတ်နိုင်ခဲ့ပြီး အိန္ဒိယနဲ့ ဩစတြေးလျအကြား ပင်လယ်ရေကြောင်းဆိုင်ရာ ပူးပေါင်း ဆောင်ရွက်မှုမှာ ကြီးမားတဲ့ သမိုင်းမှတ်တိုင်တစ်ခု စိုက်ထူခဲ့ပါတယ်။ 

အိန္ဒိယရေတပ်ဗိုလ်ချုပ်ကြီး ဘက်ပ်နာနဲ့ ဩစတြေးလျ ရေတပ်ဗိုလ်ချုပ်ကြီး အာလေးတို့က ပူးတွဲပြီး ကြီးမှူးကျင်းပတဲ့ အဲဒီဆွေးနွေးပွဲတွေမှာ ပူးပေါင်း စစ်ဆင်ရေးကို တိုးမြှင့်ရေး၊ ပင်လယ်ရေကြောင်းဆိုင်ရာ မိတ်ဖက်ဆက်ဆံမှုအတွက် လမ်းကြောင်းသစ်တွေနဲ့ ဆက်ဆံရေးကို ခိုင်မာစေရေးတို့ကို အဓိကထားပြီး ဆွေးနွေးခဲ့ပါတယ်” ဟု အိန္ဒိယရေတပ်က မေလ ၁၄ ရက်တွင် ပြောကြားခဲ့သည်။

အိန္ဒိယနဲ့ ဩစတြေးလျရေတပ်ကို တွေ့ရစဉ်

ဆွေးနွေးညှိနှိုင်းမှုများတွင် ပင်လယ်ရေကြောင်း ပိုင်နယ်များအတွင်း နှစ်နိုင်ငံ ပူးပေါင်းဆောင်ရွက်သည့် အားထုတ် ကြိုးပမ်းမှုကို ခိုင်မာစေရန်နှင့် ဆက်ဆံရေးများ နက်ရှိုင်းစေရန် ကတိကဝတ်များကို နှစ်ဖက်စလုံးက ဖော်ပြခဲ့ကြ သည်။

ထိုဆွေးနွေးပွဲများသည် အင်ဒို-ပစိဖိတ်ဒေသတွင် အိန္ဒိယနှင့် ဩစတြေးလျအကြား ပူးပေါင်းဆောင်ရွက်မှု၏ မဟာဗျူဟာမြောက် အရးကြီးသည့် အခြေအနေကို မီးမောင်းထိုးပြသရာ ရောက်နေပြီး သမုဒ္ဒရာများအတွင်း ဟာကွက်များကို ဖြည့်ဆည်းခြင်းဖြင့် နှစ်နိုင်ငံရေတပ်များသည် ဒေသတွင် ငြိမ်းချမ်းရေးနှင့် ချမ်းသာကြွယ်ဝ ရေးတို့ကို တိုးမြှင့်ရုံသာမက လုံခြုံရေးနှင့် တည်ငြိမ်ရေးတို့ကိုလည်း စိတ်ချသေချာမှုရှိအောင် လုပ်ဆောင်ရန် မျှော်မှန်းထားသည်ဟု အိန္ဒိယရေတပ်က ပြောကြားခဲ့သည်။

မေလ ၁၂ ရက်ကလည်း အိန္ဒိယ၏ INS Kiltan သင်္ဘောသည် ဗီယက်နမ်နိုင်ငံ ကမ်ရန် ပင်လယ်အော် (Cam Ranh Bay) သို့ ရောက်ရှိခဲ့ပြီး ထိုသင်္ဘောကို ဗီယက်နမ်ရေတပ်နှင့် ဗီယက်နမ်ရှိ အိန္ဒိယသံရုံးတို့က ကြိုဆိုခဲ့ကြသည်။

ထိုခရီးစဉ်သည် အိန္ဒိယရေတပ်၏ အရှေ့ပိုင်း စစ်သင်္ဘောအုပ်စု၏ စစ်ဆင်ရေးဆိုင်ရာ ဖြန့်ကြက်ချထားမှု၏ တစ်စိတ်တစ်ပိုင်းဖြစ်ပြီး နှစ်နိုင်ငံ မိတ်ဖက်ဆက်ဆံရေးနှင့် ပူးပေါင်းဆောင်ရွက်မှုကို တိုးမြှင့်လိုသည့် ရည်ရွယ်ချက်ကို ဖော်ပြခဲ့ခြင်းဖြစ်သည်။

အိန္ဒိယနဲ့ ဩစတြေးလျရေတပ် အကြီးအကဲများကို တွေ့ရစဉ်

အိန္ဒိယနှင့် ဗီယက်နမ်သည် ပြည့်စုံကျယ်ပြန့်သည့် မဟာဗျူဟာမြောက် မိတ်ဖက်ဆက်ဆံရေးကို ထူထောင်ထား သည်။

ထိုဆက်ဆံရေးကို မြှင့်တင်သည့် အနေဖြင့် အိန္ဒိယရေတပ်၏ INS Kiltan စစ်သင်္ဘော ဗီယင်္ကနမ်သို့ ရောက်ရှိလာ သော ခရီးစဉ်တွင် နှစ်နိုင်ငံရေတပ်အကြား အပြန်အလှန် ထိတွေ့ဆက်ဆံမှုကို တိုးမြှင့်ပြီး စံတန်ဖိုးများကို မျှဝေ မှုများ ပြုလုပ်ရန် အာရုံစိုက်လုပ်ဆောင်ခဲ့သည်။

ထိုခရီးစဉ်ကို နှစ်နိုင်ငံရေတပ်အကြား ပင်လယ်ပြင်တွင် ပင်လယ်ရေကြောင်းဆိုင်ရာ မိတ်ဖက်ဆက်ဆံမှု လေ့ကျင့် ခန်းများဖြင့် အဆုံးသတ်မည် ဖြစ်သည်။

ထိုလေ့ကျင့်ခန်းများသည် နှစ်နိုင်ငံအကြား ထိတွေ့ဆက်ဆံမှုနှင့် အကောင်းဆုံး စစ်ရေးဆောင်ရွက်ချက်များကို မျှဝေမှုများတွင် ပိုမိုခိုင်မာ အားကောင်းစေမည်ဖြစ်သည်။

Source: Devdiscourse

CNI International News

ဘန်ကောက်၊ မေလ ၁၆

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ထိုင်း-မြန်မာနယ်စပ်တွင် ငြိမ်းချမ်းရေးကို မြှင့်တင်လိုသည့် ဆန္ဒသာရှိကြောင်း ၎င်း၏သမီးဖြစ်သူ ပေတုန်တန် ရှင်နာဝပ် (Paetongtarn Shinawatra) က ပြောကြားခဲ့သည်ဟု The Nation သတင်းစာမှ ဖော်ပြခဲ့သည်။

သက်ဆင်သည် ပုဂ္ဂိုလ်ရေးခင်မင်မှုကို အသုံးချပြီး မြန်မာနိုင်ငံ၏ လက်နက်ကိုင်အဖွဲ့များနှင့် ဆွေးနွေးမှုများ ပြုလုပ်နေမှုအပေါ် ဖြူးထိုင်းပါတီခေါင်းဆောင် ပေတုန်တန်က ကာကွယ်ပြောဆိုပေးခဲ့ခြင်း ဖြစ်သည်။

မကြာသေးမီက သက်ဆင်သည် မြန်မာနိုင်ငံတွင် ဖြစ်ပွားနေသည့် ပဋိပက္ခများကို အဖြေရှာရန်အတွက် ကချင် လက်နက်ကိုင်နှင့် NUG ၏ ကိုယ်စားလှယ်များဖြင့် တွေ့ဆုံခဲ့သည်။

အဆိုပါ ကိုယ်စားလှယ်များနှင့် တွေ့ဆုံပြီးနောက် သက်ဆင်သည် ရှမ်းပြည်ပြန်လည်ထူထောင်ကောင်စီ(RCSS)မှ  ခေါင်းဆောင်များနှင့် တွေ့ဆုံခဲ့သည်။

သက်ဆင်၏ လုပ်ဆောင်ချက်များကို ထိုင်းနိုင်ငံအတွင်းရှိ အဖွဲ့အစည်းအချို့က ဝေဖန်ခဲ့ကြသည်။

ထို့နောက် အမျိုးသားလုံခြုံရေးနှင့် နယ်စပ်ရေးရာ အောက်လွှတ်တော်ကော်မတီက ထိုဖြစ်စဉ်ကို စုံစမ်းစစ်ဆေးမှု ပြုလုပ်ရသည့် အခြေအနေသို့ ရောက်ရှိစေခဲ့သည်။

သက်ဆင်ကိုတွေ့ရစဉ်

သက်ဆင်သည် အစိုးရအဖွဲ့ထဲတွင် မည်သည့်ရာထူးကိုမျှ ရယူထားခြင်းမရှိသဖြင့် ၎င်း၏ လုပ်ဆောင်ချက်များ သည် ထိုင်းနိုင်ငံ၏ နိုင်ငံတကာမူဝါဒကို မေးခွန်းများ ထွက်ပေါ်စေခဲ့ကြောင်း အမျိုးသားလုံခြုံရေးနှင့် နယ်စပ်ရေးရာ အောက်လွှတ်တော်ကော်မတီဥက္ကဋ္ဌ ရန်စီမန် ရိုမီ (Rangsiman Rome) က ပြောကြားခဲ့သည်။

ပေတုန်တန်ကမူ ရန်စီမန်၏ မှတ်ချက်ကို တုန့်ပြန်သည့်အနေဖြင့် သက်ဆင်သည် မိမိနိုင်ငံအရေးကို စိုးရိမ်နေ သည့် ထိုင်းနိုင်ငံသားတစ်ဦးအဖြစ် ဆောင်ရွက်ခဲ့ခြင်းသာဖြစ်ကြောင်း ပြောကြားခဲ့သည်။

“ပြည်ပမှာ ၁၇ နှစ်လောက် နေခဲ့တာတောင်မှ သူဟာ ထိုင်းပြည်သူတွေကို ဂရုစိုက်နေတုန်းပါပဲ။ ပြီးတော့ သူတတ်နိုင်တဲ့ဘက်က ဘာမဆိုလုပ်ပေးဖို့ ကူညီချင်တဲ့သူပါ” ဟု ပေတုန်တန်က ပြောကြားခဲ့သည်။

သက်ဆင်သည် အစိုးရအဖွဲ့ထဲတွင် မည်သည့်ရာထူးကိုမျှ ရယူထားခြင်း မရှိသော်လည်း သူသည် ၂၀၀၁ ခုနှစ်မှ ၂၀၀၆ ခုနှစ်အထိ ဝန်ကြီးချုပ်အဖြစ် တာဝန်ထမ်းဆောင်ခဲ့ချိန်အတွင်း မြန်မာနိုင်ငံ၏ တိုင်းရင်းသားအဖွဲ့များ အပါအဝင် မြန်မာ့တပ်မတော်နှင့် ပုဂ္ဂိုလ်ရေးအရ ခင်မင်မှုရှိခဲ့သည်။

ထို့နောက် နယ်စပ်ဖြတ်ကျော် မူးယစ်ဆေးဝါးဂိုဏ်းများကို နှိမ်နင်းခဲ့ဖူးကြောင်း ပေတုန်တန်က ထပ်လောင်း ပြောကြားခဲ့သည်။

Source: The Nation

CNI International News

အမ်မန်၊ မေလ ၁၆

အမေရိကန်၏ မဟာမိတ်ဖြစ်သည့် ဂျော်ဒန်နိုင်ငံတွင် အီရန်က ဦးဆောင်ပြုလုပ်သည်ဟု သံသယရှိသော လက်နက်များ မှောင်ခိုကူးမည့် အစီအစဉ်တစ်ခုကို ဟန့်တားနိုင်ခဲ့သည်ဟု ရိုက်တာမှ ဖော်ပြခဲ့သည်။ 

ထိုလက်နက်မှောင်ခိုကူးမည့် အစီအစဉ်သည် ဂျော်ဒန်ဘုရင်၏  အတိုက်အခံများကို အဖျက်အမှောင့် လုပ်ငန်းများ လုပ်ဆောင်ရာတွင် အကူအညီ ပေးရန်ဖြစ်သည်ဟု ထိုအကြောင်းအရာနှင့် နီးစပ်သည့် ဂျော်ဒန် သတင်း အရင်းအမြစ်နှစ်ခုက ပြောကြားခဲ့သည်။

ထိုလက်နက်များကို ဆီးရီးယားရှိ အီရန်က ကျောထောက်နောက်ခံ ပေးထားသည့် စစ်သွေးကြွများက ဂျော်ဒန် နိုင်ငံအတွင်းရှိ Muslim Brotherhood အဖွဲ့အစည်း၏ လက်အောက်ခံအဖွဲ့ထံ ပေးပို့ခဲ့ခြင်းဖြစ်သည်။

ထိုအဖွဲ့သည် ပါလက်စတိုင်း ဟားမာ့စ်အဖွဲ့နှင့် အဆက်အသွယ်ရှိသည်ဟု အမည်မဖော်လိုသူတစ်ဦးက ရိုက်တာ သို့ ပြောကြားခဲ့သည်။

ဂျော်ဒန်အစိုးရ ခေါင်းဆောင်ကိုတွေ့ရစဉ်

ထိုလက်နက်သေတ္တာကို မတ်လအတွင်းက ဖမ်းဆီးရမိခဲ့သည့် ဂျော်ဒန်နိုင်ငံအတွင်းရှိ ပါလက်စတိုင်းများ ဖွဲ့စည်းထားသော အဖွဲ့ဝင်များနှင့်အတူ သိမ်းဆည်းရမိခဲ့ခြင်း ဖြစ်သည်ဟု ၎င်းက ပြောသည်။

အဆိုပါ ပူးပေါင်းကြံစည်မှုနှင့် ဖမ်းဆီးမှုများကို ယခုမှ ပထမဆုံးအကြိမ် သတင်းထုတ်ပြန်ခဲ့ခြင်းဖြစ်ပြီး အမေရိကန် က ထောက်ခံပေးထားသည့် အစ္စရေးနှင့် အီရန်၏ တော်လှန်ရေး အင်အားစု ကွန်ရက်တွင် ပါဝင်သော ဟားမာ့စ် အဖွဲ့အကြား စစ်ပွဲဖြစ်ပွားနေမှုနှင့်အတူ အရှေ့အလယ်ပိုင်းတွင် တင်းမာမှုများ မြင့်တက်နေသည့် အချိန်နှင့် တိုက်ဆိုင်နေသည်။

ဂျော်ဒန် သတင်းရင်းမြစ်နှစ်ခုကမူ စုံစမ်းစစ်ဆေးမှုများကို ဆက်လက် ပြုလုပ်နေဆဲဖြစ်သဖြင့် ထိုလက်နက်များ မှောင်ခိုကူးမှု၏ အဓိကရည်ရွယ်ချက်ဖြစ်သည့် အဖျက်အမှောင့်လုပ်ငန်း၏ အကြောင်းအရာ အသေးစိတ်ကို ပြောကြားရန် ငြင်းဆိုခဲ့သည်။

ပူးပေါင်းကြံစည်မှု၏ အဓိကရည်မှန်းချက်မှာ အမေရိကန် စစ်စခန်းများကို လက်ခံထားရှိပြီး အစ္စရေး၊ ဆီးရီးယား၊ အီရတ်တို့နှင့် နယ်စပ်ချင်း ထိစပ်နေသည့် ဂျော်ဒန်နိုင်ငံကို တည်ငြိမ်မှု ပျက်ပြားစေရန် ဖြစ်ကြောင်း အဆိုပါ သတင်းရင်းမြစ်များက ပြောကြားခဲ့သည်။

ဂျော်ဒန်လူထုကိုတွေ့ရစဉ်

မတ်လအတွင်းက သိမ်းဆည်းရမိခဲ့သည့် လက်နက်သေတ္တာထဲတွင် မည်သည့် လက်နက်အမျိုးအစားများ ပါဝင်သည်ကို အသေးစိတ် ဖော်ပြခဲ့ခြင်းမရှိဘဲ မကြာသေးမီ လများအတွင်းက ဂျော်ဒန်ထောက်လှမ်းရေးအဖွဲ့ သည် မြေမြှုပ်မိုင်းများ၊ ကလက်ရှ်နီကော့ဗ် ရိုင်ဖယ်များနှင့် ၁၀၇ မမ Katyusha ဒုံးကျည်များ အပါအဝင် လက်နက်များ မှောင်ခိုကူးရန် အီရန်နှင့် ၎င်း၏မဟာမိတ်များ၏ အားထုတ်ကြိုးပမ်းမှုများကို ဟန့်တားနိုင်ခဲ့ သည်ဟု ဆိုသည်။

ဂျော်ဒန်နိုင်ငံအတွင်းသို့ ဝင်ရောက်လာသည့် ထိုလက်နက် အများစုသည် အစ္စရေးက သိမ်းပိုက်ထားသည့် အနောက်ဘက်ကမ်း ပါလက်စတိုင်းနယ်မြေသို့ ပေးပို့ရန် ရည်ရွယ်ခဲ့ခြင်းဖြစ်သည်ဟု ဂျော်ဒန် သတင်း အရင်းအမြစ်များက ပြောကြားခဲ့သည်။

Source: ရိုက်တာ

CNI International News

မူဇက်ဖာရာဘက်၊ မေလ ၁၆

ပါကစ္စတန်နိုင်ငံက ထိန်းချုပ်ထားသည့် ကက်ရှ်မီးယားဒေသ(PoK)ဘက်ခြမ်းတွင် မကြာသေးမီက ဆန္ဒပြမှုများ၊ အဓိကရုဏ်းများ ဖြစ်ပွားခဲ့မှုနှင့်အတူ လူထု၏ ဖီဆန်ပုန်ကန်မှု ဖြစ်ပွားနေသည်ဟု ကျွမ်းကျင်သူများက ပြောကြား ခဲ့ကြောင်း Al Arabiya Post မှ ဖော်ပြခဲ့သည်။

PoK ဒေသ၏ မြို့တော်ဖြစ်သည့် မူဇက်ဖာရာဘက် (Muzaffarabad) တွင် မေလ ၉ ရက်က ဖြစ်ပွားခဲ့သည့် ဆန္ဒပြ မှုများကြောင့် စီးပွားရေးလုပ်ငန်းများ ပိတ်ထားရပြီး လမ်းများပေါ်တွင် ယာဉ်များ အသွားအလာ ကင်းမဲ့ခဲ့သည်။

မေလ ၉ ရက်က ဆန္ဒပြသူများနှင့် ရဲတပ်ဖွဲ့ဝင်များအကြား ခိုက်ရန်ဖြစ်ပွားခဲ့ပြီး ရဲတပ်ဖွဲ့သည် ဆန္ဒပြသူများကို မျက်ရည်ယိုဗုံးများ အသုံးပြု၍ လူစုခွဲခဲ့ကာ ဆန္ဒပြသူများကလည်း ရဲတပ်ဖွဲ့ဝင်များကို ကျောက်ခံများဖြင့် ပြန်လည် ပစ်ပေါက်ခဲ့ကြသည်။

ထိုဆန္ဒပြမှုများတွင် လွတ်လပ်ရေးအတွက် တောင်းဆိုသည့် ကြွေးကြော်သံများလည်း ကျယ်ကျယ်လောင်လောင် ထွက်ပေါ်ခဲ့သည်။

PoK ဒေသ၏ မြို့တော်ဖြစ်သည့် မူဇက်ဖာရာဘက်ကို တွေ့ရစဉ်

၂၀၁၉ ခုနှစ်၊ ဩဂုတ်လက လွတ်လပ်ရေး တောင်းဆိုမှုကြောင့်  ရာနှင့်ချီသည့် ဆန္ဒပြသူများသည် မျက်ရည်ယိုဗုံး များဖြင့် ပစ်ခတ်ဖမ်းဆီးခံခဲ့ရသည်။

ပါကစ္စတန်အာဏာပိုင်များသည် PoK(ကက်ရှ်မီးယား)ဒေသနှင့် ထိုဒေသတွင် နေထိုင်သူများကို ခြိမ်းခြောက်မှုများ ပြုလုပ်ခဲ့သဖြင့် အတိတ်ကာလက ထိုကဲ့သို့သော ဆန္ဒပြမှုများ ပေါ်ပေါက်ခဲ့ဖူးသည်။ 

ထို့နောက် PoK ဒေသတွင် လွတ်လပ်ရေး လိုလားသည့် လက်နက်ကိုင်အုပ်စုများ ပေါ်ပေါက်လာခဲ့ပြီး အကြမ်းဖက် သမားများ ခိုလှုံရာနေရာတစ်ခု ဖြစ်ခဲ့သည်။

PoK ဒေသတွင် လျှပ်စစ်ဓာတ်အား မီတာခများနှင့် ဂျုံစျေးနှုန်းများ မြင့်တက်နေမှုကြောင့် အမိန့်မနာခံရေး လှုပ်ရှားမှု (CDM)သည် လပေါင်းများစွာကြာ ဖြစ်ပွားခဲ့သလို ဒေသခံအများစုသည် ပြီးခဲ့သည့် နွေရာသီကစပြီး မီတာခများ ပေးဆောင်ခဲ့ခြင်းမရှိပေ။

ပါကစ္စတန်နဲ့ အိန္ဒိယရဲ့ နယ်မြေပိုင်ခြားမှုကို တွေ့ရစဉ်

ထိုကဲ့သို့ လူထု၏ ဆန္ဒပြမှုကြောင့် ရဲတပ်ဖွဲ့သည် မူဇက်ဖာရာဘက်မြို့တော်နှင့် မီယာပူရ (Mirpur) မြို့များတွင် ညအချိန် ဝင်ရောက်စီးနင်းမှုများ ပြုလုပ်ပြီး ဆန္ဒပြခေါင်းဆောင်များနှင့် ဆန္ဒပြသူများကို ဖမ်းဆီးထိန်းသိမ်းခဲ့ သည်။

ဖမ်းဆီးခံရသူ အများစုမှာ မေလ ၁၁ ရက်က မူဇက်ဖာရာဘက်မြို့တော်သို့ ခရီးရှည်ချီတက် ဆန္ဒပြမှုပြုလုပ်ရန် တိုက်တွန်းခဲ့သည့် ဂျမူး-ကက်ရှ်မီးယား ပူးတွဲ အဝါမီ လုပ်ရှုားမှု ကော်မတီ (Jammu Kashmir Joint Awami Acttion Committtee) မှဖြစ်သည်။ 

ပါကစ္စတန်အစိုးရသည် ဒေသခံလူထု၏ တောင်းဆိုမှုများကို အလေးအနက်ထားပြီး ဖြေရှင်းပေးခဲ့ခြင်း မရှိသဖြင့် PoK ဒေသတွင် ယခုကဲ့သို့ ဆန္ဒပြမှုများနှင့် CDM လှုပ်ရှားမှုများ ကျယ်ကျယ်ပြန့်ပြန့် ဖြစ်ပွားလာခဲ့ခြင်းဖြစ်သည်ဟု လေ့လာစောင့်ကြည့်သူများက ပြောကြားခဲ့သည်။

Source: Al Arabiya Post

CNI International News

ဝါရှင်တန်၊ မေလ ၁၅

ယီမင်နိုင်ငံရှိ ဟူရ်သီသူပုန်အဖွဲ့အား မမျှော်မှန်းနိုင်လောက်အောင် များပြားသည့် လက်နက်များ ထောက်ပံ့ပေး နေမှုကို ရပ်တန့်ရန် အမေရိကန်က အီရန်ကို တိုက်တွန်းခဲ့သည်ဟု အေပီမှ ဖော်ပြခဲ့သည်။

ဟူရ်သီသူပုန်များသည် အီရန်က ထောက်ပံ့ပေးသည့် လက်နက်များဖြင့် ပင်လယ်နီ (Red Sea) နှင့် အခြားနေရာ ဒေသများတွင် ကုန်တင်သင်္ဘောများကို မဆင်မခြင် တိုက်ခိုက်မှုများ ပြုလုပ်နေသည်ဟု အမေရိကန်က ပြောကြား ခဲ့သည်။

ယီမင်နိုင်ငံတွင် ပြည်တွင်းစစ်ကို အဆုံးသတ်နိုင်ရန် အလားအလာကောင်းများ ရရှိလိုပါက အီရန်အနေဖြင့် ဟူရ်သီ အဖွဲ့အား ထောက်ပံ့ပေးနေပြီး တည်ငြိမ်မှု ပျက်ပြားစေမည့် လုပ်ဆောင်မှုများကို ရပ်တန့်ရန် ပူးပေါင်းတိုက်တွန်း ရမည်ဟု အမေရိကန်၏ လက်ထောက်သံအမတ်ဖြစ်သည့် ရောဘတ် ဝုဒ် (Robert Wood) က ကုလသမဂ္ဂ လုံခြုံရေးကောင်စီတွင် ပြောကြားခဲ့သည်။

အမေရိကန်၏ လက်ထောက်သံအမတ်ဖြစ်သည့် ရောဘတ်ဝုဒ်ကို တွေ့ရစဉ်

"လက်နက်ဝယ်ယူခွင့် ပိတ်ပင်မှုကို ဆက်လက် ချိုးဖောက်နေတာနဲ့ ပတ်သက်ပြီး လုံခြုံရေးကောင်စီရဲ့ စိုးရိမ်မှုကို အလေးထားဖော်ပြဖို့အတွက် ကျနော်တို့ဟာ ပိတ်ဆို့မှုတွေကို ချိုးဖောက်တဲ့သူတွေကို တားဆီးဖို့နဲ့ ပိတ်ဆို့မှုတွေ ခိုင်မာစေဖို့ အခုထက်ပိုပြီး လုပ်ဆောင်ရမှာပါ" ဟု ဝုဒ်က ပြောကြားခဲ့သည်။

ဟူရ်သီအဖွဲ့ကမူ ဂါဇာတွင် လူပေါင်း ၃၅,၀၀၀ ကျော် သေဆုံးစေခဲ့သည့် အစ္စရေး၏ စစ်ပွဲအား အဆုံးသတ်စေရန် အစ္စရေးကို ဖိအားပေးသည့်အနေဖြင့် ပင်လယ်နီနှင့် အေဒင်ပင်လယ်ကွေ့(Gulf of Aden) တို့တွင် သင်္ဘောများကို ပစ်မှတ်ထား တိုက်ခိုက်နေခြင်းဖြစ်ကြောင်း ပြောကြားခဲ့သည်။

ဟားမာ့စ်အဖွဲ့သည် ပြီးခဲ့သည့်နှစ် အောက်တိုဘာ ၇ ရက်က အစ္စရေးနိုင်ငံကို ဝင်ရောက် တိုက်ခိုက်ခဲ့သဖြင့် လူ ၁၂၀၀ ခန့် သေဆုံးကာ လူပေါင်း ၂၅၀ ခန့် ဓားစာခံအဖြစ် ပြန်ပေးဆွဲခံခဲ့ရပြီးနောက် စစ်ပွဲ စတင်ဖြစ်ပွားခဲ့ခြင်း ဖြစ်သည်။ 

ဟူရ်သီသူပုန်ကို တွေ့ရစဉ်

ဟူရ်သီအဖွဲ့သည် ပြီးခဲ့သည့်နှစ် နိုဝင်ဘာလကတည်းက သင်္ဘောများကို တိုက်ခိုက်မှု အကြိမ်အရေအတွက် ၅၀ ကျော်ပြုလုပ်ခဲ့ပြီး သင်္ဘောတစ်စင်း နစ်မြှုပ်ခဲ့သည်ဟု အမေရိကန် ပင်လယ်ရေကြောင်း အုပ်ချုပ်ရေးအဖွဲ့က ပြီးခဲ့သည့်လတွင် ပြောကြားခဲ့သည်။

 မကြာသေးမီ လများအတွင်းက အမေရိကန်ဦးဆောင်သည့် လေကြောင်းတိုက်ခိုက်မှု စစ်ဆင်ရေးများသည် ယီမင်နိုင်ငံအတွင်းရှိ ဟူရ်သီအဖွဲ့၏ ပစ်မှတ်များကို တိုက်ခိုက်ခဲ့သဖြင့် ဟူရ်သီအဖွဲ့၏ တိုက်ခိုက်မှုများ လျော့ကျ သွားခဲ့သည်။

သို့သော်လည်း ဟူရ်သီအဖွဲ့သည် ပင်လယ်နီ၊ အေဒင်ပင်လယ်ကွေ့နှင့် အိန္ဒိယသမုဒ္ဒရာအတွင်းရှိ သင်္ဘောများကို ရန်လိုမှုများ ဆက်ရှိနေသေးကြောင်း ယီမင်နိုင်ငံဆိုင်ရာ အမေရိကန်အထူးသံတမန် ဟန်းစ် ဂရန်းဘာ့ချ် (Hans Grundberg) က ပြောကြားခဲ့သည်။

Source: အေပီ

CNI International News

မနီလာ၊ မေလ ၁၅

တောင်တရုတ်ပင်လယ်တွင် တရုတ်၏ စစ်ရေးလှုပ်ရှားမှုများနှင့် ခြိမ်းခြောက်မှုများ မြင့်တက်လာခဲ့သဖြင့် ဖိလစ်ပိုင်သည် ၎င်း၏ စစ်တပ်ကို အဆင့်မြှင့်တင် မွမ်းမံမှုများ ပြုလုပ်နေရကြောင်း South China Morning  Post  မှ ဖော်ပြခဲ့သည်။

ဖိလစ်ပိုင်နိုင်ငံသားများသည် ၎င်းတို့နိုင်ငံ၏ လေတပ်အင်အားနှင့် ပတ်သက်ပြီး ဟာသတစ်ခုသဖွယ် လှောင်ပြောင် ပြောဆိုလာခဲ့ကြသည်မှာ ဆယ်စုနှစ်များစွာ ကြာမြင့်ခဲ့ပြီးဖြစ်သည်။

ဖိလစ်ပိုင်နိုင်ငံသားများသည် "ဖိလစ်ပိုင် လေတပ်" ဆိုသည့် စကားလုံးကို "လေ" သာရှိပြီး "တပ်" မရှိသည့် လေတပ်အဖြစ် လှောင်ပြောင်ခဲ့ကြခြင်းဖြစ်သည်။

စစ်စစ်တွင်လည်း ဖိလစ်ပိုင်လေတပ်တွင် ဂျက်တိုက်လေယာဉ်များနှင့် ဒုံးကျည်များမရှိခဲ့ဘဲ သမားရိုးကျ စစ်လေယာဉ်များ အပေါ်သာ မှီခိုခဲ့ရခြင်းဖြစ်သည်။

တရုတ်စစ်တပ်ကို တွေ့ရစဉ်

ကျည်းတပ်နှင့် ရေတပ်တွင်မူ လက်နက်ပစ္စည်း အနေအထားသည် လေတပ်ထက် ပိုမိုသာလွန်သည်ဟု ပြောနိုင် သည်။

သို့သော်လည်း ဖိလစ်ပိုင်ရေတပ်တွင် ခေတ်မီစစ်သင်္ဘောများ မရှိခဲ့ပေ။ ကျည်းတပ်တွင်လည်း တင့်ကားများ၊ ခေတ်မီ လက်နက်ကြီးစနစ်များမရှိခဲ့ဘဲ သမားရိုးကျ အမြောက်တပ်ဖွဲ့ကိုသာ အားကိုးနေရသည်။

သို့သော် လက်ရှိတွင် ဖိလစ်ပိုင်သည် တိုက်လေယာဉ်များ၊ သင်္ဘောများ၊ တင့်ကားများ၊ လက်နက်ကြီးစနစ်များ၊ အသံထက် ၁၀ ဆခန့် ပိုမိုမြန်သည့် ဟိုက်ပါဆိုးနစ် (hypersonic) ဒုံးကျည်များ၊ လေကြောင်းကာကွယ်ရေး စနစ်များနှင့် ရေဒါများကို ဝယ်ယူပြီး စစ်တပ်အင်အားကို မြှင့်တင်ရန် လုပ်ဆာင်လာသည်ကို တွေ့ရပြီး ရေငုပ် သင်္ဘောများပင် ဝယ်ယူမည့်အထိ ရည်မှန်းထားသည်။

ဖိလစ်ပိုင်စစ်တပ်၏ ပြည်သူ့ရေးရာ ဆက်ဆံရေးရုံး၏ အကြီးအကဲ ဗိုလ်မှူးကြီး ဇာဇီ ထရီနီဒက် (Xerxes Trinidad) က စစ်တပ်အင်အား အဆင့်မြင့်တင် မွမ်းမံမှု အစီအစဉ်သည် ယခင်က တစ်ခါမှမမြင်ဖူးသည့် ဖိလစ်ပိုင်စစ်တပ်၏ အပြောင်းအလဲများကို ဖြစ်စေခဲ့ကြောင်း ပြောကြားခဲ့သည်။

 လက်နက်ကြီးကို တွေ့ရစဉ်

လက်ရှိ ဖိလစ်ပိုင်စစ်တပ်၏ အနေအထားသည် လွန်ခဲ့သည့် ၁၅ နှစ်က အနေအထားနှင့် နှိုင်းယှဉ်ပါက ပိုမို ခေတ်မီလာကြောင်း ၎င်းက ထပ်လောင်းပြောကြားခဲ့သည်။

တောင်တရုတ်ပင်လယ်တွင် တရုတ်၏ ပင်လယ်ရေကြောင်းဆိုင်ရာ ထိပ်တိုက်တွေ့သည် အပြုအမူများ၊ နယ်နိမိတ် ပိုင်ဆိုင်ကြောင်း ထွက်ဆိုမှုများကြောင့် ဖိလစ်ပိုင်စစ်တပ်သည် ခေတ်မီစစ်လက်နက်ပစ္စည်းများ ပိုင်ဆိုင်ရေးနှင့် ကာကွယ်ရေးမဟာဗျူဟာကို အဆင့်မြှင့်တင်ရသည့် အခြေအနေသို့ ရောက်ရှိခဲ့ခြင်းဖြစ်သည်ဟု ကျွမ်းကျင်သူများက ပြောကြားခဲ့သည်။

သို့သော်လည်း စစ်လက်နက်စ္စည်းများ ဝယ်ယူရေးနှင့်ပတ်သက်ပြီး ကြိုးပမ်းအားထုတ်မှုများသည် နှစ်ပေါင်းများ စွာကြာ နှောင့်နှေးကြန့်ကြာခဲ့ရသည့် ယခုကဲ့သို့ စစ်တပ်ကို အဆင့်မြှင့်တင်သော အပြောင်းအလဲများသည် တိုးတက်မှု နှေးကွေးနေဆဲဖြစ်ကြောင်း ကျွမ်းကျင်သူများက ပြောကြားခဲ့သည်။

Source: SCMP