CNI International News
ဆိုးလ်၊ ဒီဇင်ဘာ ၂၈
တောင်ကိုရီးယားသည် မြောက်ကိုရီးယား စပိုင်အကြီးအကဲတစ်ဦးနှင့် အခြား မြောက်ကိုရီးယားနိုင်ငံသား ၇ ဦးကို တရားမဝင် ဆိုက်ဘာလှုပ်ရှားမှုစွဲချက်ဖြင့် ပိတ်ဆို့မှုများ ပြုလုပ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။
ပိတ်ဆို့မှု ချမှတ်ခံခဲ့ရသူများသည် မြောက်ကိုရီးယား၏ နျူကလီးယား လက်နက်များနှင့် ဒုံးကျည်စီမံကိန်းများ အတွက် ရန်ပုံငွေများ ရှာဖွေထောက်ပံ့ပေးခဲ့သူများဖြစ်သည်ဟု တောင်ကိုရီးယားက ယူဆထားသည်။
မြောက်ကိုရီးယား၏ အထွေထွေ ကင်းထောက်ဗျူရို၏ အကြီးအကဲ ရီချန်းဟို (Ri Chang Ho) သည် တရားမဝင် ဆိုက်ဘာလှုပ်ရှားမှုများနှင့် နည်းပညာ ခိုးယူမှုတို့မှတစ်ဆင့် နိုင်ငံခြားငွေကြေးများ ရယူခဲ့မှုတွင် ပါဝင်ပတ်သက် မှုအတွက် ပိတ်ဆို့ခံရခြင်းဖြစ်သည်ဟု တောင်ကိုရီးယား နိုင်ငံခြားရေးဝန်ကြီးဌာနက ဒီဇင်ဘာ ၂၇ ရက်တွင် ပြော ကြားခဲ့သည်။
မြောက်ကိုရီးယား ခေါင်းဆောင် ကင်မ်ကို တွေ့ရစဉ်
၎င်း၏ လှုပ်ရှားမှုများသည် မြောက်ကိုရီးယား အစိုးရနှင့် မြောက်ကိုရီးယား၏ နျူကလီးယား၊ ဒုံးကျည်လှုပ်ရှားမှု များအတွက် ရန်ပုံငွေများ ရရှိစေရန် အထောက်အကူ ဖြစ်ခဲ့သည်ဟု တောင်ကိုရီးယားနိုင်ငံခြားရေးဝန်ကြီးဌာနက ပြောကြားခဲ့သည်။
ရီချန်းဟို ဦးဆောင်သည့် အေဂျင်စီသည် ယခင်ကတည်းက တောင်ကိုရီးယား၏ ပိတ်ဆို့မှုများ ခံထားရသော Kimsuky၊ Lazarus နှင့် Andariel အမည်ရှိ ဟက်ကာအဖွဲ့များကို ကြိုးကိုင်နေသည့် အဖွဲ့အစည်းတစ်ခုအဖြစ် ယူဆခံထားရသည်။
မြောက်ကိုရီးယားသည် ပြည်ပနိုင်ငံများမှ လေကြောင်း၊ အာကာသနှင့် ကာကွယ်ရေး ကုမ္ပဏီများကို ပစ်မှတ်ထား ပြီး ဒစ်ဂျစ်တယ်ငွေကြေးများကို ခိုးယူရန် ထူးခြားဆန်းပြားသည့် နည်းပညာများကို အသုံးပြုခဲ့သည်ဟု ကုလသမဂ္ဂ၏ ယခုနှစ် အစောပိုင်းတွင် ထုတ်ပြန်ခဲ့သည့် အစီရင်ခံစာတွင် ဖော်ပြခဲ့သည်။
ကွယ်လွန်သွားပြီး ဖြစ်တဲ့ မြောက်ကိုရီးယား ခေါင်းဆောင် ၂ ဦးကိုတွေ့ရစဉ်
နျူကလီးယားနှင့် ပဲ့ထိန်းဒုံးကျည် စီမံကိန်းများကြောင့် နိုင်ငံတကာ၏ ပိတ်ဆို့မှုများ ချမှတ်ခံထားရသည့် မြောက်ကိုရီးယားနိုင်ငံသည် ခေါင်းဆောင် ကင်မ်ဂျုံအန် (Kim Jong Un) လက်အောက်တွင် စစ်တပ်နှင့် စစ်လက်နက်ပစ္စည်းများကို အဆင့်မြှင့်တင် မွမ်းမံမှုများ ပြုလုပ်ခဲ့သည်။
မြောက်ကိုရီးယား၏ ဆိုက်ဘာ ရာဇဝတ်မှု၊ ဒစ်ဂျစ်တယ်ငွေကြေး၊ ငွေမည်းခဝါချမှုတို့ကို ဖြေရှင်းရန် အမေရိကန်၊ ဂျပန်နှင့် တောင်ကိုရီးယားတို့အကြား သုံးပွင့်ဆိုင် စီမံကိန်းများကို စတင်လုပ်ဆောင်ခဲ့ပြီးနောက် သီတင်းပတ် အနည်းငယ်အကြာတွင် တောင်ကိုရီးယား၏ ပိတ်ဆို့မှုကြေညာချက် ထွက်ပေါ်ခဲ့ခြင်း ဖြစ်သည်။
တောင်ကိုရီးယားသည် ရီချန်းဟို အပြင် တရုတ်နိုင်ငံအခြေစိုက် သံတမန်ဟောင်း ယွန်ချောလ် (Yun Chol) အပါအဝင် အခြား မြောက်ကိုရီးယားနိုင်ငံသား ၇ ဦးကိုလည်း ကုလသမဂ္ဂ၏ တားမြစ်ပိတ်ပင်မှုထဲတွင် ပါဝင်သည့် နျူကလီးယားနှင့် ဆက်နွှယ်သော lithium-6 ဓာတ်သတ္တုကို ရောင်းဝယ်မှုများ၌ ပါဝင်မှုဖြင့် ပိတ်ဆို့မှုများ ပြုလုပ်ခဲ့ သည်။
Source: အယ်လ်ဂျာဇီးယား
