CNI International News

ဂျကာတာ၊ စက်တင်ဘာ ၆

မြန်မာနိုင်ငံ၏ ငြိမ်းချမ်းရေး လုပ်ငန်းစဉ်များနှင့်ပတ်သက်ပြီး အာဆီယံအဖွဲ့အတွင်း သဘောထားကွဲလွဲမှုများ ရှိနေသည်ဆိုသည့် စိုးရိမ်မှုများကို ပြေပျောက်စေရန် အာဆီယံခေါင်းဆောင်များ ကြိုးပမ်းနေကြချိန်တွင် အာဆီယံ အစည်းအဝေးသည် အင်အားကြီးနိုင်ငံများ၏ ပြိုင်ဆိုင်မှုများအတွင်းသို့ ရောက်ရှိသွားနိုင်သည်ဟု အင်ဒိုနီးရှားက စက်တင်ဘာ ၅ ရက်တွင် သတိပေးခဲ့သည်။

အင်ဒိုနီရှားသမ္မတ ဂျိုကို ဝီဒိုဒို (Joko widodo) သည် ဂျကာတာမြို့တော်တွင် အိမ်ရှင်အဖြစ် လက်ခံကျင်းပသည့် အာဆီယံအစည်းအဝေး၏ အဖွင့်မိန့်ခွန်းတွင် အထက်ပါအတိုင်း ပြောကြားခဲ့ခြင်းဖြစ်သည်ဟု ဘန်ကောက်ပို့စ်မှ ဖော်ပြခဲ့သည်။

အာဆီယံအနေနှင့် ပြည်သူများ၏ မျှော်လင့်ချက်များနှင့် ကိုက်ညီမှုရှိပြီး ဆီလျှော်သည့် ရေရှည် နည်းဗျူဟာတစ်ခု ကို ဖန်တီးရန်လည်း ဝီဒိုဒိုက တိုက်တွန်းခဲ့သည်။

"အာဆီယံဟာ အင်အားကြီးနိုင်ငံတွေရဲ့ အကျိုးတော်ဆောင်အဖြစ် လုပ်ဆောင်ပေးဖို့ သဘောမတူခဲ့ပါဘူး။ ပျက်စီးဆုံးရှုံးမှုတွေကို ဖြစ်စေတဲ့ ပြိုင်ဆိုင်မှုကြိုးဝိုင်းထဲကို ကျနော်တို့ရဲ့ အာဆီယံသင်္ဘောကြီး ဝင်ရောက်သွား တာမျိုး မဖြစ်ပါစေနဲ့" ဟု ဝီဒိုဒိုက ပြောသည်။

အာဆီယံ အစည်းအဝေးမှာ မြန်မာကိုယ်စားလှယ် ထိုင်ခုံလွတ်နေစဉ်

"ခေါင်းဆောင်တွေဖြစ်တဲ့ ကျနော်တို့ဟာ ဒီသင်္ဘောကြီး ဆက်လက် ရွှေ့လျားဖို့နဲ့ ရွက်လွှင့်ဖို့ကို စိတ်ချသေချာ အောင် လုပ်ဆောင်ရမှာဖြစ်ပြီး ငြိမ်းချမ်းရေး၊ တည်ငြိမ်ရေးနဲ့ ချမ်းသာကြွယ်ဝရေးတွေ ရရှိအောင် ကျနော်တို့ လုပ်ဆောင်ရပါလိမ့်မယ်"ဟု ဝီဒိုဒိုက ထပ်လောင်း ပြောကြားခဲ့သည်။

ကွန်မြူနစ်ဝါဒပျံ့နှံ့မှုကို ဆန့်ကျင်ရန် ၁၉၆၀ ပြည့်နှစ်ကျော် ကာလများက စစ်အေးကာလ၏ တင်းမာမှုအမြင့်ဆုံး အချိန်ဖြစ်သည့် ၁၉၆၇ ခုနှစ်တွင် ဖွဲ့စည်းတည်ထောင်ခဲ့သည့် အာဆီယံသည် အဖွဲ့ဝင်နိုင်ငံများအကြား ပြည်တွင်း ရေးကို ဝင်ရောက် မစွက်ဖက်ရေး မူနှင့် စည်းလုံးညီညွတ်ရေးတို့ကို ဦးစားပေး လုပ်ဆောင်သည့် မူကို ကျင့်သုံးခဲ့ သည်။

တရုတ်နဲ့ အမေရိကန် ခေါင်းဆောင် နှစ်ဦးကိုတွေ့ရစဉ်

သို့သော် ဝေဖန်သူများကမူ ထိုမူဝါဒများသည် မြန်မာနိုင်ငံအရေးကို ကိုင်တွယ်ဖြေရှင်းရာတွင် အာဆီယံ၏ အရေးယူ လုပ်ဆောင်နိုင်စွမ်းကို ကန့်သတ်ရာ ရောက်ခဲ့သည်ဟု ပြောကြားခဲ့သည်။

အာဆီယံသည် ထိပ်သီးအဆင့် အစည်းအဝေးများတွင် မြန်မာနိုင်ငံ၏ စစ်ခေါင်းဆောင်များကို တက်ရောက်ခွင့် ပိတ်ပင်ခဲ့သည်။ 

သို့သော် အင်ဒိုနီးရှားနိုင်ငံက အာဆီယံ ငြိမ်းချမ်းရေး အစီအစဉ်တစ်ခုကို တွန်းအားပေး လုပ်ဆောင်ရန် သက်ဆိုင် ရာ အဖွဲ့အစည်းများနှင့် ထိတွေ့ဆက်ဆံမှုများ ပြုလုပ်ရန် ကြိုးပမ်းခဲ့ပြီး ထိုင်းနိုင်ငံက မြန်မာစစ်တပ် ခေါင်းဆောင် များနှင့် ထိတွေ့ဆက်ဆံရန် ကြိုးပမ်းနေမှုနှင့်အတူ အာဆီယံအတွင်း သဘောထားကွဲလွဲမှုများ ပေါ်ပေါက်ခဲ့သည်။

CNI International News

ဂျကာတာ၊ စက်တင်ဘာ ၆

မြန်မာနိုင်ငံကိုယ်စား ၂၀၂၆ ခုနှစ်၏ အာဆီယံဥက္ကဋ္ဌနေရာကို တာဝန်ယူရန် အဆင်သင့်ရှိကြောင်း ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr) က ပြောကြားခဲ့သည်ဟု Thai PBS World မှ ဖော်ပြခဲ့သည်။ 

မြန်မာနိုင်ငံတွင် ၂၀၂၁ ခုနှစ်က စစ်တပ်မှ ဒေါ်အောင်ဆန်းစုကြည်၏ အစိုးရကို ဖြုတ်ချခဲ့ပြီးနောက် နိုင်ငံအတွင်း သွေးထွက်သံယိုမှုများ ဖြစ်ပွားခဲ့ကာ နိုင်ငံရေးအကျပ်အတည်းနှင့် ရင်ဆိုင်နေရသည်။

"၂၀၂၆ ခုနှစ် အာဆီယံ ဥက္ကဋ္ဌနေရာကို တာဝန်ယူဖို့ ဖိလစ်ပိုင်က အဆင်သင့် ရှိနေတယ်ဆိုတာကို ကျနော် ပြောကြားလိုပါတယ်" မားကို့စ်က အင်ဒိုနီးရှားနိုင်ငံ၊ ဂျကာတာမြို့တော်တွင် ပြုလုပ်သည့် အရှေ့တောင်အာရှ နိုင်ငံများအသင်း (အာဆီယံ) အစည်းအဝေး၌ တက်ရောက်လာသည့် ခေါင်းဆောင်များကို ပြောကြားခဲ့သည်။

အာဆီယံညီလာခံမှာ မြန်မာကိုယ်စားလှယ် ထိုင်ခုံလွတ်နေစဉ်

မိမိတို့ အဖွဲ့အစည်း၏ အခြေခံအုတ်မြစ်များကို အခိုင်အမာ တည်ဆောက်သွားမည်ဖြစ်ပြီး အာဆီယံအား အခန်းကဏ္ဍ အသစ်တစ်ခုဆီ ခေါ်ဆောင်သွားရန် လမ်းပြမည်ဖြစ်ကြောင်း မားကို့စ်က ပြောကြားခဲ့သည်ဟု ဖိလစ်ပိုင်သမ္မတနန်းတော်မှ ထုတ်ပြန်သည့် အစီရင်ခံစာတွင် ဖော်ပြခဲ့သည်။

ဖိလစ်ပိုင်အနေဖြင့် မည်သည့် အတွက်ကြောင့် မြန်မာနိုင်ငံထံမှ အာဆီယံ အလှည့်ကျဥက္ကဋ္ဌ တာဝန်ကို လွှဲပြောင်း ရယူလိုခြင်းကိုမူ အသေးစိတ် ပြောကြားခဲ့ခြင်း မရှိပေ။

ညီလာခံသို့ တက်ရောက်ခဲ့သည့် အာဆီယံ သံတမန်နှစ်ဦးကမူ ဖိလစ်ပိုင်၏ အစီအစဉ်ကို ကျန်ခေါင်းဆောင်များက သဘောတူခဲ့ကြသဖြင့် ဖိလစ်ပိုင်၏ အစီအစဉ်သည် မြန်မာ့အရေးနှင့် ပတ်သက်ပြီး အာဆီယံအဖွဲ့၏ လုပ်ငန်းစဉ် အား  ထိခိုက်စေမည် မဟုတ်ကြောင်း ပြောကြားခဲ့သည်။

 အာဆီယံကိုယ်စားလှယ်များကိုတွေ့ရစဉ်

"အဲဒီလိုပဲ ဆုံးဖြတ်ခဲ့ကြပါတယ်။ အာဆီယံခေါင်းဆောင်တွေရဲ့ အစည်းအဝေးမှာ ဖိလစ်ပိုင်ရဲ့ ကြေညာချက်ကို ဘယ်သူကမှ မကန့်ကွက်ခဲ့ပါဘူး"ဟု အမည်မဖော်လိုသည့် သံတမန်တစ်ဦးက ပြောသည်။

၂၀၂၆ ခုနှစ်အတွက် အာဆီယံအလှည့်ကျ ဥက္ကဋ္ဌနေရာကို လက်ခံရန်ဆန္ဒ ရှိ/မရှိ အာဆီယံက ဖိလစ်ပိုင်ကို မေးမြန်းခဲ့ရာတွင် ဖိလစ်ပိုင်က လက်ခံခဲ့သည်ဟု အဆိုပါ သံတမန်က ပြောကြားခဲ့သည်။

အမည်မဖော်လိုသည့် ဒုတိယမြောက် သံတမန်တစ်ဦးကလည်း ပြီးခဲ့သည့် ၂ နှစ်က မြန်မာနိုင်ငံအတွက် အာဆီယံ ၏ အချက် ၅ ချက်ပါ ဘုံသဘောတူညီချက်၏ တိုးတက်ဖြစ်ထွန်းမှုကို အာဆီယံခေါင်းဆောင်များက လေ့လာ ဆန်းစစ်ခဲ့ပြီးနောက် ဖိလစ်ပိုင်ကို မြန်မာကိုယ်စား အာဆီယံဥက္ကဋ္ဌနေရာ တာဝန်ယူရန် သဘောတူခဲ့ခြင်းဖြစ်သည် ဟု ပြောကြားခဲ့သည်။

လာအိုနိုင်ငံသည် ၂၀၂၄ အာဆီယံအလှည့်ကျ ဥက္ကဋ္ဌနေရာကို တာဝန်ယူမည်ဖြစ်ပြီး မလေးရှားသည် ၂၀၂၅ အာဆီယံ အလှည့်ကျဥက္ကဋ္ဌ နေရာအား တာဝန်ယူမည်ဖြစ်သည်။

Source: Thai PBS World

CNI International News

ဂျီနီဗာ၊ စက်တင်ဘာ ၆

ရုရှားကို တိုက်ခိုက်နေသည့် ယူကရိန်းနိုင်ငံအား ဗဒေသာဗုံးဟု လူသိများသည့် ကလပ်စတာဗုံးများ ပေးပို့ရန် ဆုံးဖြတ်ခဲ့သည့် အမေရိကန်ကို လူ့အခွင့်အရေးအဖွဲ့များက ဝေဖန်ခဲ့ကြသည်ဟု အေပီမှ ဖော်ပြခဲ့သည်။

ကလပ်စတာဗုံးများ အသုံးပြုမှုကို တားဆီးပိတ်ပင်သည့်် နိုင်ငံတကာ သဘောတူညီချက်ကို ထောက်ခံသူများကမူ ကလပ်စတာဗုံးများကြောင့် တိုက်ပွဲအတွင်း စစ်သားများထက် အရပ်သားများ ထိခိုက်သေဆုံးမှု ပိုမိုများပြား ကြောင်း ပြောကြားခဲ့သည်။

ကလပ်စတာဗုံးများ အသုံးပြုမှု တားမြစ်ပိတ်ပင်ရေး ညွန့်ပေါင်းအဖွဲ့ (Cluster Munitions Coalition) တွင် ပါဝင်သည့်် အဖွဲ့များက နှစ်စဉ် ထုတ်ပြန်လေ့ရှိသည့် အစီရင်ခံစာကို စက်တင်ဘာ ၅ ရက်က ထုတ်ပြန်ခဲ့ပြီး အမေရိကန်၏ ဆုံးဖြတ်ချက်အား ဝေဖန်ခဲ့ကြသည်။

ကလပ်စတာဗုံးကိုတွေ့ရစဉ်

လာမည့် သတင်းပတ်တွင် ပြုလုပ်မည့် ကလပ်စတာဗုံးဆိုင်ရာ ညီလာခံတွင် နိုင်ငံပေါင်း ၁၁၂ နိုင်ငံမှ သံတမန်များ တက်ရောက်မည် ဖြစ်သည်။

ထိုညီလာခံကို တက်ရောက်မည့် နိုင်ငံများထဲတွင် ကလပ်စတာဗုံးများ အသုံးပြုမှုကို ပိတ်ပင်ရေးနှင့် ယခင်က ကလပ်စတာဗုံးများ ကြဲချခဲ့သည့် နေရာဒေသများတွင် ရှင်းလင်းရေးများ လုပ်ဆောင်ရန် အတည်ပြု လက်မှတ် ရေးထိုးထားသည့်နိုင်ငံများ ပါဝင်သည်။

ညီလာခံတွင် အတည်ပြု လက်မှတ်ရေးထိုးခဲ့သည့် နိုင်ငံပေါင်း ၁၂ နိုင်ငံရှိပြီး အမေရိကန်နှင့် ရုရှားတို့ ပါဝင်ခြင်း မရှိပေ။

၁၅ နှစ်ကြာ သက်တမ်းရှိပြီဖြစ်သည့် ထိုညီလာခံဘက်မှ ရပ်တည် ကာကွယ်ပေးခဲ့သည့် လူ့အခွင့်အရေး စောင့်ကြည့်ရေးအဖွဲ့ (HWR) မှ မေရီ ဝဲဟမ်း (Mary Wareham) က Cluster Munitions ညွန့်ပေါင်းအဖွဲ့သည် ဇူလိုင်လအတွင်းက ယူကရိန်းကို ကလပ်စတာဗုံးများ ပေးပို့မည့် အမေရိကန်၏ လုပ်ဆောင်ချက်အပေါ် အလွန် စိုးရိမ်ကြောင်း ပြောကြားခဲ့သည်။

ဗုံးတစ်ခုကိုတွေ့ရစဉ်

အမေရိကန်၏ ဆုံးဖြတ်ချက်ကို နိုင်ငံပေါင်း ၂၀ ကျော်မှ အစိုးရခေါင်းဆောင်များနှင့် အရာရှိများက ဝေဖန်ခဲ့ကြ သည်ဟုလည်း Cluster Munitions ညွန့်ပေါင်းအဖွဲ့က ပြောသည်။

ညီလာခံတွင် ကလပ်စတာဗုံး အသုံးပြုမှု တားဆီးပိတ်ပင်ရေး ထောက်ခံသူများက ထိုအန္တရာယ် ကြီးမားသည့် လက်နက်မျိုးကို တားမြစ်ပိတ်ပင်ရန် နိုင်ငံအများအပြားက အတည်ပြု လက်မှတ်ရေးထိုးရန် မျှော်လင့်နေ ကြသည်ဟုလည်း ဝဲဟမ်းက ပြောကြားခဲ့သည်။ 

အမေရိကန်ကမူ ယူကရိန်းကို ပေးပို့သည့် ကလပ်စတာဗုံး အမျိုးအစားသည် တင့်ကားများ၊ စစ်လက်နက် ပစ္စည်း များနှင့် စစ်သားများကို ထိခိုက်ပျက်ဆီးစေရန် ပြုလုပ်ထားသည့် လက်နက် အမျိုးအစား ဖြစ်သည်ဟု ပြောကြား ခဲ့သည်။

Source: အေပီ

CNI International News

နယူးဒေလီ၊ စက်တင်ဘာ ၅

ယူကရိန်းအပေါ်ဆင်နွှဲခဲ့သည့် ရုရှား၏ စစ်ပွဲနှင့်ပတ်သက်ပြီး သဘောထားကွဲလွဲမှုများ ပိုမိုနက်ရှိုင်းလာမှုသည် လာမည့် သီတင်းပတ်ကုန်တွင် အိန္ဒိယနိုင်ငံ နယူးဒေလီမြို့တော်တွင် ကျင်းပမည့် စက်မှုထိပ်သီးနိုင်ငံ ၂၀ (G-20) အစည်းအဝေးအတွင်း ဆွေးနွေးမည့် စားနပ်ရိက္ခာလုံခြုံမှု၊ ကြွေးမြီပြဿနာနှင့် ရာသီဥတုဖောက်ပြန် ပြောင်းလဲမှု အတွက် ကမ္ဘာလုံးဆိုင်ရာ ပူးပေါင်းဆောင်ရွက်ရေးတို့အပေါ် ဆိုးရွားစွာ သက်ရောက်စေသည်ဟု ရိုက်တာမှ ဖော်ပြခဲ့သည်။

စစ်ပွဲနှင့်ပတ်သက်ပြီး သဘောထားကွဲလွဲမှုများကြောင့် ယခင် ရာသီဥတု ဖောက်ပြန်ပြောင်းလဲမှု တားဆီးရေး ဆိုင်ရာ ညီလာခံအတွင်း သဘောတူညီချက် တစ်စုံတစ်ရာ မရရှိခဲ့ဘဲ ယခုနှစ်တွင် ပြုလုပ်သည့် G-20 အဖွဲ့ဝင် ဝန်ကြီးအဆင့် အစည်းအဝေးများတွင်လည်း ထိုပြဿနာနှင့်ပတ်သက်ပြီး အဖြေရှာနိုင်ခဲ့ခြင်းမရှိပေ။

အိန္ဒိယတွင် ပြုလုပ်မည့် G-20 အစည်းအဝေးကို တရုတ်သမ္မတ ရှီကျင့်ဖျင် (Xi Jinping) တက်ရောက်မည် မဟုတ်ဘဲ ဝန်ကြီးချုပ် လီချင် (Li Qiang) ကို စေလွှတ်မည်ဖြစ်ကာ ရုရှားသမ္မတ ဗလာဒီမာ ပူတင် (Vladimir Putin) ကလည်း တက်ရောက်မည် မဟုတ်ကြောင်း အတည်ပြုခဲ့သဖြင့် ထိုအစည်းအဝေးတွင် မည်သည့် သဘောတူညီချက်ကိုမျှ ရရှိလိမ့်မည် မဟုတ်ကြောင်း ထင်ကြေးပေးမှုများ ထွက်ပေါ်ခဲ့သည်။

မိုဒီပုံ နောက်ခံနဲ့ လုံခြုံရေးယူထားသူများကိုတွေ့ရစဉ်

ထို့ကြောင့် စက်တင်ဘာ ၉ ရက်ကစပြီး နှစ်ရက်ကြာ ပြုလုပ်မည့် G-20 အစည်းအဝေးကို အနောက်နိုင်ငံများနှင့် ၎င်းတို့၏ မဟာမိတ်များက လွှမ်းမိုးထားမည့်သဘော ဖြစ်သည်။

G-20 အစည်းအဝေးကို တက်ရောက်မည့် အဖွဲ့ဝင်နိုင်ငံများမှ ခေါင်းဆောင်များထဲတွင် အမေရိကန် သမ္မတ ဂျိုးဘိုင်ဒန် (Joe Biden) ၊ ဂျာမနီ ဝန်ကြီးချုပ် အိုလက်ဖ် ရှောဇ်(Olaf Scholz) ၊ ပြင်သစ်သမ္မတ မက်ခရွန် (Emmanuel Macron) ၊ ဆော်ဒီအာရေဗျ အိမ်ရှေ့စံ မိုဟာမက် ဘင် ဆယ်လ်မန် (Mohammed Bin Salman) နှင့် ဂျပန်ဝန်ကြီးချုပ် ဖူမီယို ကီရှီဒါ (Fumio Kishida) တို့ ပါဝင်သည်။ 

အိန္ဒိယမှာ ကျင်းပဖို့လုပ်နေတဲ့ G-20 အစည်းအဝေး ပြင်ဆင်မှုကိုတွေ့ရစဉ်

ထို့ကြောင့် လာမည့် G-20 အစည်းအဝေးတွင် မည်သည့် သဘောတူညီမှုမျှ မရရှိဘဲ တစ်စုံတစ်ရာ အောင်မြင်မှု မရှိပါက အနောက်နိုင်ငံများနှင့် အနောက်အင်အားကြီး မဟုတ်သည့် နိုင်ငံများအကြား ပူးပေါင်းဆောင်ရွက်မှုများ အပေါ် သက်ရောက်မှု ရှိစေနိုင်ပြီး သက်ဆိုင်ရာ နိုင်ငံများအနေနှင့် ၎င်းတို့နှင့် စိတ်သဘောထားချင်း တူညီသည့် နိုင်ငံများနှင့်သာ ပူးပေါင်းပြီး အုပ်စုများကို ပိုမိုဖွဲ့စည်းလာလိမ့်မည်ဟု ကျွမ်းကျင်သူများက ပြောသည်။

ကမ္ဘာလုံးဆိုင်ရာ ခြိမ်းခြောက်မှုများကို ဖြေရှင်းရာတွင် အနောက်နိုင်ငံများနှင့် အခြားနိုင်ငံများအကြား ပူးပေါင်း ဆောင်ရွက်မှုများကို ချိုးဖျက်ခြင်းသည် မည်သူကမျှ လိုချင်သည့် အခြေအနေမျိုး မဟုတ်ကြောင်း ဝါရှင်တန်ရှိ Wilson Center မှ တောင်အာရှရေးရာဌာန၏ ညွှန်ကြားရေးမှူး မိုက်ကယ် ကူဂယ်မန် (Michael Kugelman) က ပြောကြားခဲ့သည်။

G-20 အစည်းအဝေး မအောင်မြင်ခဲ့ပါက သံတမန်ရေးအရ ထိခိုက်နစ်နာမည့် သူများထဲတွင် အစည်းအဝေးကို အိမ်ရှင်အဖြစ် လက်ခံကျင်းပသည့်် အိန္ဒိယ၏ ဝန်ကြီးချုပ် မိုဒီ (Modi) လည်း ပါဝင်လာလိမ့်မည်ဟု ကျွမ်းကျင် သူများက ပြောသည်။

G-20 အစည်းအဝေးတွင် ထိပ်သီးခေါင်းဆောင်အချို့ တက်ရောက်ခြင်း မရှိမှုသည် အိန္ဒိယ၊ အထူးသဖြင့် မိုဒီ အတွက် သံတမန်ရေးနှင့် နိုင်ငံရေးဆိုင်ရာ ထိုးနှက်ချက်တစ်ခု ဖြစ်လာနိုင်သည်ဟုလည်း မစ္စတာ ကူဂယ်မန်က ပြောကြားခဲ့သည်။

Source: ရိုက်တာ

CNI International News

ဘန်ကောက်၊ စက်တင်ဘာ ၅ 

ယခုလအတွင်း ကျင်းပမည့် ကုလသမဂ္ဂ အထွေထွေညီလာခံ (UNGA) တွင် အမေရိကန်နှင့် သီးသန့်တွေ့ဆုံပြီး လုံခြုံရေး အခြေအနေများကို ဆွေးနွေးသွားမည်ဟု ထိုင်းဝန်ကြီးချုပ်သစ် ဆရီသာ သာဗီဆင် (Srettha Thavisin) က ပြောကြောင်း ဘန်ကောက်ပို့စ်မှ ဖော်ပြခဲ့သည်။

သြဂုတ်လအတွင်းက ဝန်ကြီးချုပ်အဖြစ် ရွေးကောက်တင်မြှောက် ခံခဲ့ရသည့် မစ္စတာဆရီသာက ၎င်း၏ ပထမဆုံး ပြည်ပခရီးစဉ်သည် စက်တင်ဘာလ၏ တတိယသီတင်းပတ်တွင် ကျင်းပမည့် UNGA ကို တက်ရောက်ရန် အမေရိကန်သို့ သွားရောက်သည့်ခရီးစဉ် ဖြစ်လာလိမ့်မည်ဟု စက်တင်ဘာ ၄ ရက်က ပြောသည်။

စက်တင်ဘာ ၅ ရက်တွင် ထိုင်းဘုရင်ရှေ့မှောက်၌ ကျမ်းသစ္စာ ကျိန်ဆိုမည့်် မစ္စတာဆရီသာသည် လာမည့် ရက်ပိုင်းအတွင်း လွှတ်တော်၌ အစိုးရအဖွဲ့၏ မူဝါဒများကို တင်ပြရန် လုပ်ငန်းစဉ်ကို အပြီးသတ် ရေးဆွဲနေသဖြင့် အလုပ်များနေသည်။ 

ဆရီသာက သူသည် ဘဏ္ဍာရေးဝန်ကြီးအဖြစ်လည်း တာဝန်ထမ်းဆောင်မည်ဟု ပြီးခဲ့သည့် သီတင်းပတ်ကုန်က ပြောကြားခဲ့သည်။

အလွန်များပြားသည့် အလုပ်တာဝန်များကြောင့် သူသည် ယခုသီတင်းပတ်အတွင်း အင်ဒိုနီးရှားနိုင်ငံ ဂျကာတာမြို့ တွင် ပြုလုပ်မည့် အရှေ့တောင်အာရှနိုင်ငံများအသင်း (အာဆီယံ) အစည်းအဝေးကို တက်ရောက်မည် မဟုတ် ကြောင်း ဆီရီသာက ပြောသည်။

ကုလညီလာခံ ကျင်းပနေစဉ်

UNGA ခရီးစဉ်တွင်မူ ထိုင်းကာကွယ်ရေး တပ်ဖွဲ့များ၏ အကြီးအကဲသည် အမေရိကန်နှင့် လုံခြုံရေး အကြောင်း အရာများကို ဆွေးနွေးမည်ဖြစ်ပြီး ထိုဆွေးနွေးပွဲသို့ သူလည်း တက်ရောက်မည်ဖြစ်သည်ဟု ဆီရီသာက ဘန်ကောက်မြို့တော်တွင် သတင်းထောက်များကို ပြောကြားခဲ့သည်။

သို့သော်လည်း အသေးစိတ် အချက်အလက်များကို ထုတ်ဖော် ပြောဆိုခြင်း မရှိခဲ့ပေ။

လွန်ခဲ့သည့် ဆယ်စုနှစ် တစ်စုနီးပါးအတွင်း စစ်တပ်က ကျောထောက်နောက်ခံ ပြုထားသည့် အုပ်ချုပ်သူများ ကြောင့် စစ်တပ်နှင့် ပြည်သူများအကြား သဘောထား ကွဲလွဲနေမှုကို ပေါင်းကူးတံတားအဖြစ် ထိုးပေးရန် ရည်ရွယ် သည့်အနေဖြင့် စစ်တပ်၏ သဘောထားများအား နားထောင်ရန် စက်တင်ဘာ ၃ ရက်က စစ်တပ် ခေါင်းဆောင်များ နှင့် တွေ့ဆုံခဲ့သည်ဟု ဆရီသာက ပြောသည်။

ထိုင်းဝန်ကြီးချုပ်သစ် ဆရီသာ သာဗီဆင်ကို တွေ့ရစဉ်

စစ်တပ်ကို ပြည်သူနှင့် နီးစပ်စေရန်နှင့် ဆက်ဆံရေးများ တိုးမြှင့်ရာတွင် ကူညီပေးရန် ဆန္ဒရှိကြောင်း၊ စစ်တပ်သည် ကောင်းမွန်သည့် အရာများကို လုပ်ဆောင်ခဲ့ကြောင်း၊ သို့သော် အချို့အရေးကိစ္စများတွင် ရှင်းလင်းပြတ်သားသည့် အသေးစိတ်ထုတ်ပြန်မှုများ မလုပ်ခဲ့ကြောင်း ဆရီသာက ပြောကြားခဲ့သည်။

၎င်း၏ မှတ်ချက် စကားများသည် ကွန်ဆာဗေးတစ် နိုင်ငံရေးအင်အားစုနှင့် မဟာမိတ်ဖွဲ့ခဲ့သည့်် အာဏာရ ဖြူးထိုင်းပါတီအတွင်း လျင်မြန်သည့် သဘောထား ပြောင်းလဲမှုကို ဖော်ပြရာ ရောက်ခဲ့သည်။

ထို့ပြင် ဝန်ကြီးချုပ် ပရာယွတ် ချန်အိုချာ (Prayut Chan-o-cha) က စစ်တပ်၏ ထိပ်သီးခေါင်းဆောင် နေရာများကို ပြောင်းလဲခန့်အပ်ခဲ့ပြီးနောက် ရက်ပိုင်းအကြာတွင် ဆရီသာက စစ်တပ်၏ ထိပ်သီးခေါင်းဆောင်များနှင့် တွေ့ဆုံခဲ့ ခြင်းလည်း ဖြစ်သည်။

Source: ဘန်ကောက်ပို့စ်

CNI International News

ကိယက်ဗ်၊ စက်တင်ဘာ ၅

ယူကရိန်းသမ္မတ ဇာလန်စကီး (Volodymyr Zelenskyy) သည် ယခုသီတင်းပတ်အတွင်း ကာကွယ်ရေးဝန်ကြီး အိုလက်စီ ရက်ဇ်နီကော့ဗ် (Oleksii Reznikov) ကို ထုတ်ပယ်လိုက်သည်။

ထို့နောက် အိုလက်စီရက်ဇ်နီကော့ဗ်၏ နေရာတွင် ယူကရိန်း၏ အဓိက ပုဂ္ဂလိကရန်ပုံငွေ အကြီးအကဲဟောင်း ရပ်စ်တမ် အူမာရော့ဗ် (Rustem Umerov) နှင့် အစားထိုးခန့်အပ်ရန် လွှတ်တော်ကို တောင်းဆိုသွားမည်ဟု ပြောကြားခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

စက်တင်ဘာ ၃ ရက်က ထုတ်ပြန်ခဲ့သည့် ဇာလန်စကီး၏ နိုင်ငံတော် မိန့်ခွန်းပြောကြားမှုတွင် စစ်ပွဲကာလအတွင်း ထူထောင်ခဲ့သည့်် ယူကရိန်း၏ ကာကွယ်ရေးကဏ္ဍကို အကြီးမားဆုံး အပြောင်းအလဲများ ပြုလုပ်မည်ဟု ကြေညာ ခဲ့သည်။

၂၀၂၁ ခုနှစ်၊ နိုဝင်ဘာလက ကာကွယ်ရေးဝန်ကြီးအဖြစ် ခန့်အပ်ခံခဲ့ရသည့် ရက်ဇ်နီကော့ဗ်သည် အနောက်နိုင်ငံ များထံမှ စစ်ရေးအကူအညီ ဒေါ်လာ ဘီလျံချီ ရရှိအောင် ကူညီပေးခဲ့သော်လည်း အဂတိလိုက်စားမှု စွဲချက်များနှင့် လည်း ရင်ဆိုင်ခဲ့ရသူ ဖြစ်သည်။

 ယူကရိန်း ကာကွယ်ရေးဝန်ကြီး အသစ်ဖြစ်လာမယ့် ရပ်စ်တမ် အူမာရော့ဗ်ကို တွေ့ရစဉ်

"ယူကရိန်း ကာကွယ်ရေးဝန်ကြီးရာထူးကို အစားထိုးဖို့ ကျနော် ဆုံးဖြတ်ခဲ့ပါတယ်။ အိုလက်စီ ရက်ဇ်နီကော့ဗ်ဟာ ယူကရိန်းစစ်ပွဲရဲ့ ရက်ပေါင်း ၅၅၀ ကျော်မှာ တစ်လျှောက်လုံး တာဝန်ထမ်းဆောင်ခဲ့သူပါ"ဟု ဇာလန်စကီးက ပြော သည်။

"ကာကွယ်ရေးဝန်ကြီးဌာန အနေနဲ့ စစ်တပ်သာမကဘဲ လူ့အဖွဲ့အစည်း တစ်ခုလုံးကိုပါ ထိတွေ့ဆက်ဆံမှုရှိစေမည့် ချဉ်းကပ်မှုအသစ်နဲ့ အခြားပုံစံတွေကို လိုအပ်နေတယ်လို့ ကျနော် ယူဆမိပါတယ်" ဟု ၎င်းက ထပ်လောင်း ပြော ကြားခဲ့သည်။

ကာကွယ်ရေးဝန်ကြီးရာထူး အပြောင်းအလဲအတွက် လွှတ်တော်၏ ထောက်ခံချက်ကို လိုအပ်မည်ဖြစ်သော်လည်း လွှတ်တော်အမတ်အများစုသည် ဇာလန်စကီး၏ ဆုံးဖြတ်ချက်ကို ထောက်ခံဖွယ်ရှိနေသည်။

ဇာလန်စကီးကလည်း အူမာရော့ဗ်ကို ကာကွယ်ရေးဝန်ကြီးအဖြစ် ခန့်အပ်မှုအား လွှတ်တော်က အတည်ပြုလိမ့် မည်ဟု မျှော်လင့်ထားကြောင်း ပြောကြားခဲ့သည်။

အသက် ၄၁ နှစ်အရွယ် အူမာရော့ဗ်သည် ခရိုင်းမီးယား တာတာ (Crimean Tatar) လူမျိုးဖြစ်ပြီး လွှတ်တော် အမတ်ဟောင်း တစ်ခုဖြစ်ကာ ၂၀၂၂ ခုနှစ်၊ စက်တင်ဘာလ ကတည်းက နိုင်ငံပိုင် အိမ်ခြံမြေ ရန်ပုံငွေ အေဂျင်စီတွင် အကြီးအကဲအဖြစ် တာဝန်ထမ်းဆောင်ခဲ့သူ ဖြစ်သည်။

Source: အယ်လ်ဂျာဇီးယား

CNI International News

လိုင်မန်၊ စက်တင်ဘာ ၄ 

ယူကရိန်းနိုင်ငံ အရှေ့မြောက်ပိုင်းရှိ စစ်မြေပြင်တွင် ရုရှားတပ်ဖွဲ့များသည် ယူကရိန်းတပ်ဖွဲ့များကို ကြမ်းကြုတ် ရက်စက်စွာ ထိုးစစ်ဆင် တိုက်ခိုက်နေသည်ဟု အေပီမှ ဖော်ပြခဲ့သည်။ 

ရုရှားသည် ယူကရိန်းတောင်ပိုင်းတွင် ဖြစ်ပွားနေသည့် ပိုမိုအရေးကြီးသော တိုက်ပွဲများတွင် ယူကရိန်းတပ်ဖွဲ့များ၏ တပ်ဖွဲ့ဝင်အင်အားကို လျော့ကျစေရန်နှင့် ယူကရိန်း၏ တန်ပြန်ထိုးစစ်ကို အာရုံပြောင်းစေရန်အတွက် အရှေ့ မြောက် စစ်မြေပြင်တွင် ရုရှားတပ်များက ပြင်းထန်စွာ တိုက်ခိုက်နေခြင်း ဖြစ်သည်။

ရုရှား၏ ထိုနည်းဗျူဟာကြောင့် လွန်ခဲ့သည့် ၃ လနီးပါးက စတင်ခဲ့သည့် ယူကရိန်း၏ တန်ပြန်ထိုးစစ်အပေါ် ဖိအားများ ကျရောက်ခဲ့သည်။ ရုရှားက သိမ်းပိုက်ထားသည့် နယ်နိမိတ်များကို ပြန်လည်သိမ်းယူရန် ရုရှား၏ အားထုတ်ကြိုးပမ်းမှုများသည် အနည်းငယ်သာ အောင်မြင်မှုရရှိခဲ့ပြီး ထိခိုက်ကျဆုံးမှု အများအပြားရှိခဲ့သည်။

ထို့ကြောင့် ယူကရိန်းစစ်တပ်သည် လက်ရှိတွင် အရှေ့မြောက် စစ်မြေပြင်၌ ဖြစ်ပွားနေသည့် တိုက်ပွဲများကို အာရုံစိုက်လာခဲ့သည်။ 

ယူကရိန်း ဒုတိယကာကွယ်ရေးဝန်ကြီး  ဟန်နာမာလီယာကိုတွေ့ရစဉ်

အထူးသဖြင့် ရုရှား၏ အဓိက ခံစစ်ဖြစ်သည့် လိုင်မန် (Lyman) မြို့အနီးရှိ တောအုပ်များအတွင်း ဖြစ်ပွားနေသည့် တိုက်ပွဲများနှင့် ခါကိဗ် (Kharkiv)ဒေသ၏ ကူးပီးယန့်စ် (Kupiansk) မြို့တို့တွင် ဖြစ်ပွားနေသော တိုက်ပွဲများသည် ပြင်းထန်လာခဲ့သည်။

တစ်ချိန်တည်းမှာပင် ယူကရိန်းသည် တောင်ပိုင်းစစ်မြေပြင်ကိုလည်း အာရုံစိုက်ထားပြီး တန်ပြန်ထိုးစစ် စစ်ဆင် ရေးများကို ပြုလုပ်ခဲ့သည်။ အဇော့ပင်လယ် (Sea of Azov) ၏ ကမ်းရိုးတန်းများပေါ်သို့ ချင်းနင်းဝင်ရောက်လာ ခဲ့ပြီး ခရိုင်းမီးယားကျွန်းဆွယ်၏ မြေပြင်စင်္ကြံန်ကို ဖြတ်တောက်ရန် ကြိုးပမ်းခဲ့သည်။

ထိုသို့ လုပ်ဆောင်ခြင်းဖြင့် ယူကရိန်းတောင်ပိုင်းရှိ ရုရှားတို့ သိမ်းပိုက်ထားသည့် နယ်မြေကို နှစ်ခြမ်းကွဲစေမည် ဖြစ်ပြီး ရုရှား၏ ထောက်ပို့လမ်းကြောင်းများကို အားနည်းစေမည် ဖြစ်သည်။

ယူကရိန်း ဒုတိယကာကွယ်ရေးဝန်ကြီး  ဟန်နာမာလီယာ (Hanna Maliar) ကမူ လေ့လာစောင့်ကြည့် သူများ အနေနှင့် ယူကရိန်း၏ တန်ပြန်ထိုးစစ်တွင် နယ်မြေများကို ပြန်လည်သိမ်းယူနိုင်သည့် အခြေအနေ တစ်ခုထဲမှ မကြည့်ဘဲ ရုရှားကို ဖိအားပေးထားနိုင်သော အခြေအနေများကိုလည်း ထည့်သွင်းစဉ်းစားသင့်ကြောင်း ပြောကြား ခဲ့သည်။

ယူကရိန်းတပ်မှူး တစ်ဦးဖြစ်သည့် ဒုတိယဗိုလ်ချုပ်ကြီး အိုလက်ဇန်းဒါး ဆာဆကီကိုတွေ့ရစဉ်

ယူကရိန်းတောင်ပိုင်း စစ်မြေပြင်များတွင် ယူကရိန်းတပ်ဖွဲ့များသည် မကြာသေးမီက ရုရှားတပ်များ၏ ခံစစ်စည်း များကို အောင်မြင်စွာ ဖြတ်တောက်နိုင်ခဲ့သည်။

တန်ပြန်ထိုးစစ် စတင်ခဲ့ချိန်ကတည်းက ယူကရိန်းတပ်ဖွဲ့များသည် ရုရှား၏ ခံစစ်စည်းများကို ချိုးဖောက်ကာ ဇာပိုရီရှား (Zaporizhzhia) ဒေသတောင်ပိုင်းသို့ ၇ ကီလိုမီတာ (၄ ဒသမ ၃ မိုင်) အထိ ချင်းနင်း ဝင်ရောက် နိုင်ခဲ့သည်။ 

ရုရှားစစ်သားများသည် ကူးပီးယန့်စ်နှင့် လိုင်မန် မြို့များတွင် တပ်များပြန်စုနေပြီး တပ်ရင်းတပ်ဖွဲ့များနှင့် လက်နက်ပစ္စည်းများ ဖြန့်ကြက်ချထားနေကြောင်း ယူကရိန်းတပ်မှူး တစ်ဦးဖြစ်သည့် ဒုတိယဗိုလ်ချုပ်ကြီး အိုလက်ဇန်းဒါး ဆာဆကီ (Oleksandr Syrskyi) က ပြောကြားခဲ့သည်။

Source: အေပီ

CNI International News

ပြုံယမ်း၊ စက်တင်ဘာ ၄ 

မြောက်ကိုရီးယားသည် နျူကလီးယားထိပ်ဖူးအတုများ တပ်ဆင်ထားသည့် တာဝေးပစ်ဒုံးကျည်နှစ်စင်း ပစ်လွှတ်မှု နှင့်အတူ နည်းဗျူဟာမြောက် နျူကလီးယား တိုက်ခိုက်မှုပုံစံ သရုပ်ဖော်ထားသည့် စစ်ရေးလေ့ကျင့်မှုကို ပြုလုပ်ခဲ့ သည်ဟု အယ်လ်ဂျာဇီးယားမှ ဖော်ပြခဲ့သည်။ 

စက်တင်ဘာ ၂ ရက်နေ့ အစောပိုင်းက ပြုလုပ်ခဲ့သည့် အဆိုပါ စစ်ရေးလေ့ကျင့်မှုသည် ရန်သူများကို သတိပေးခြင်း ဖြစ်ကြောင်း၊ မိမိတို့သည် နျူကလီးယားစစ်ပွဲ ဖြစ်ပွားလာမည့် အခြေအနေအတွက် ကြိုတင်ပြင်ဆင်မှုများ ပြုလုပ် သွားမည်ဖြစ်ကြောင်း၊ တောင်ကိုရီးယားနှင့် အမေရိကန်ကို ဆန့်ကျင်သည့် စစ်ရေးအဟန့်အတားများကို မြှင့်တင် သွားမည်ဖြစ်ကြောင်း မြောက်ကိုရီးယားနိုင်ငံပိုင် KCNA သတင်းအေဂျင်စီက ဖော်ပြခဲ့သည်။

နျူကလီးယား ထိပ်ဖူးအတုများကို တပ်ဆင်ထားသည့် ခရုစ်ဒုံးကျည်နှစ်စင်းကို ကိုရီးယားကျွန်းဆွယ်၏ ကမ်းလွန် အနောက်ပင်လယ်ထဲသို့ ပစ်လွှတ်ခဲ့ပြီး ထိုဒုံးကျည်များသည် ၁၅၀ မီတာ အမြင့်မှ ၁၅၀၀ ကီလိုမီတာ (မိုင် ၉၅၀) အကွာအဝေးအထိ ပျံသန်းခဲ့သည်ဟု KCNA က ထုတ်ပြန်ခဲ့သည်။

တောင်ကိုရီးယားနဲ့ အမေရိကန် စစ်တပ်ကိုတွေ့ရစဉ်

မြောက်ကိုရီးယားသည် ပြီးခဲ့သည့် လကုန်က အောင်မြင်ခဲ့ခြင်းမရှိသည့် ကင်းထောက်ဂြိုဟ်တု လွှတ်တင်မှု အပါအဝင် မကြာသေးမီ သီတင်းပတ်များအတွင်း ဒုံးကျည်စမ်းသပ်မှုများနှင့် စစ်ရေးလေ့ကျင့်မှုများကို ဆက်တိုက် ပြုလုပ်ခဲ့သည်။

တောင်ကိုရီးယားနှင့် အမေရိကန်တို့သည် နှစ်စဉ်ပြုလုပ်နေကျ Ulchi Freedom အမည်ရှိ ပူးတွဲစစ်ရေး လေ့ကျင့်မှု ကို ပြုလုပ်ခဲ့ပြီးနောက် မြောက်ကိုရီးယားက ဒုံးကျည်များ ပစ်လွှတ်ခဲ့ခြင်းဖြစ်သည်။

အမေရိကန်နှင့် တောင်ကိုရီးယားသည် B-1B ဗုံးကြဲလေယာဉ်များနှင့်အတူ လေကြောင်း စစ်ရေး လေ့ကျင့်မှုများကို သြဂုတ် ၂၁ ရက်မှ ၃၁ ရက်အထိ ၁၁ ရက်ကြာ ပြုလုပ်ခဲ့ပြီးနောက် စစ်ရေးလေ့ကျင့်မှုကို အဆုံးသတ်ခဲ့သည်။

 မြောက်ကိုရီးယား ဒုံးကျည် ပစ်လွှတ်နေသည့် သတင်းကို ထုတ်လွှင့်နေစဉ်

မြောက်ကိုရီးယားကမူ တောင်ကိုရီးယားနှင့် အမေရိကန်တို့၏ ပူးတွဲစစ်ရေးလေ့ကျင့်မှုများကို ရှုတ်ချခဲ့ပြီး အဆိုပါ စစ်ရေးလေ့ကျင့်မှုများသည် စစ်ပွဲအတွက် ကြိုတင်ပြင်ဆင်နေခြင်း ဖြစ်သည်ဟု ပြောကြားခဲ့သည်။

ထို့နောက် အမေရိကန်၏ မဟာဗျူဟာမြောက် ဗုံးကြဲလေယာဉ်များ ဖြန့်ကြက်မှုကို ဆန့်ကျင်ကြောင်း ပြသသည့် အနေဖြင့် သြဂုတ် ၃၁ ရက်က ပဲ့ထိန်းဒုံးကျည် နှစ်စင်း မြောက်ကိုရီးယားဘက်က ပစ်လွှတ်ခဲ့သည်။

တောင်ကိုရီးယားအရာရှိများကတော့ နျူကလီးယားဖြင့် အောင်မြင်စွာ တိုက်ခိုက်နိုင်စွမ်း ရှိသည်ဆိုသည့် မြောက်ကိုရီးယား၏ ပြောကြားချက်ကို အယုံအကြည်ကင်းမဲ့ကြောင်း ပြောကြားခဲ့သည်ဟု တောင်ကိုရီးယား၏ ယွန်ဟပ်သတင်းအေဂျင်စီက ဖော်ပြခဲ့သည်။

မြောက်ကိုရီးယားသည် ဒုံးကျည်ပစ်လွှတ်မှုများနှင့် ပတ်သက်ပြီး ပုံကြီးချဲ့ ပြောဆိုနေခြင်းဖြစ်ပြီး ဒုံးကျည်ပစ်လွှတ် မှု အားလုံးသည် အောင်မြင်ခြင်းမရှိကြောင်း လေ့လာမှုများက ညွှန်ပြနေသည်ဟု တောင်ကိုရီးယား စစ်ဦးစီးချုပ် များအဖွဲ့ (JCS) မှ အမည်မဖော်လိုသည့် ထိပ်သီးအရာရှိတစ်ဦးက ပြောကြားခဲ့သည်။

Source: အယ်လ်ဂျာဇီးယား

CNI International News

ဘန်ကောက်၊ စက်တင်ဘာ ၂ 

ထိုင်းအစိုးရသစ်သည် ကျမ်းသစ္စာကျိန်ဆိုပြီးပါက စီးပွားရေးလှုံ့ဆော်ရေး၊ လျှပ်စစ်ရထား စီးနင်းခကို ဘတ် ၂၀ အထိ ဈေးနှုန်းလျှော့ချခြင်း အပါအဝင် ကုန်ကျစရိတ်များ လျှော့ချဖြတ်တောက်ရေးတို့ကို ဦးစားပေး လုပ်ဆောင် သွားမည်ဟု ဝန်ကြီးချုပ်သစ် ဆရီသာ သာဗီဆင် (Srettha Thavisin) က စက်တင်ဘာ ၁ ရက်တွင် ပြောကြားခဲ့ ကြောင်း ဘန်ကောက်ပို့စ်မှ ဖော်ပြခဲ့သည်။

ဖြူးထိုင်းပါတီသည် ၂၀၂၃ ခုနှစ်၊ မေလ ၁၄ ရက်နေ့က ကျင်းပခဲ့သည့် ရွေးကောက်ပွဲ ကတိကဝတ်များ၏ တစ်စိတ်တစ်ပိုင်း အနေနှင့် မူဝါဒများကို အကောင်အထည်ဖော် ဆောင်ရွက်နိုင်စေရန် ဆွေးနွေးမှုများ ပြုလုပ် သွားရန် လိုအပ်သည်ဟုလည်း မစ္စတာ ဆရီသာက ပြောသည်။

မီးရထားသယ်ယူပို့ဆောင်ရေးဌာနသည် ဘန်ကောက်မြို့တော်၏ လျှပ်စစ်ရထားလမ်း ကွန်ရက်တစ်လျှောက် ရထားစီးနင်းခကို ဘတ် ၂၀ အထိ လျှော့ချမည့် ဖြူးထိုင်းပါတီ၏ ကတိကဝတ်ကို အကောင်အထည်ဖော်ရန် နည်းလမ်းများကို ရှာဖွေဖော်ထုတ်ခဲ့ပြီးဖြစ်သည်ဟု ထိုမီးရထားဌာနမှ သတင်းရင်းမြစ်တစ်ခုက ပြောသည်။

ထိုအကြောင်းအရာနှင့် ပတ်သက်ပြီး ညွန့်ပေါင်းအဖွဲ့ထဲတွင် ပါဝင်သည့် ပါတီအားလုံး၏ ထင်မြင်ချက်များကို မေးမြန်းရန် အရေးကြီးကြောင်းနှင့် အဆိုပါ ရထားစီးနင်းခ ဘတ် ၂၀ အစီအစဉ်ကို ဝင်ငွေနည်းပါးသည့် ပြည်သူများနှင့် ပထမဆုံး စမ်းသပ်လုပ်ဆောင်သွားမည်ဖြစ်ကြောင်း ဆရီသာက ပြောသည်။

ထိုင်းအမျိုးသမီး တစ်ဦး ဈေးရောင်းနေစဉ်

ဆရီသာ၏ အစိုးရအဖွဲ့သစ်သည် စွမ်းအင်ဈေးနှုန်းများ လျှော့ချသွားမည့် အစီအစဉ်ကို ယခင်ကတည်းက ကြေညာခဲ့ပြီး စက်တင်ဘာလမှ ဒီဇင်ဘာလအတွင်း လျှော့ဈေးများရရှိရန် လျှောက်ထားနိုင်သည်ဟု ပြောကြား ခဲ့သည်။

လျှပ်စစ်ဓာတ်အားခအတွက် တစ်ယူနစ်ကို ၄ ဒသမ ၂၅ ဘတ် အထိ လျှော့ချပေးရန် စက်ရုံများက တောင်းဆိုထား ပြီး ထိုနှုန်းထားအထိ လျှော့ချပေးမည် ဟုတ်/မဟုတ်ကို စောင့်ကြည့်ရမည်ဖြစ်ကြောင်း ဆရီသာက ပြောသည်။

လက်ရှိ ထိုင်းတွင် လျှပ်စစ်ဓာတ်အားခများသည် တစ်ယူနစ်လျှင် ၄ ဒသမ ၇၀ ဘတ်ဖြစ်ပြီး လျှော့ဈေးပေးသည့် နှုန်းထားသည် တစ်ယူနစ်လျှင် ၄ ဒသမ ၄၅ ဘတ်ထက် မများသင့်ကြောင်းလည်း ၎င်းက ဆိုသည်။

ထိုင်းပြည်သူ တစ်ဦးချင်းစီကို ဒစ်ဂျစ်တယ် ငွေကြေးအဖြစ် ဘတ် ၁၀၀၀၀ စီ ထောက်ပံ့မည့် မူဝါဒကို ကြေညာခဲ့ သည့် ဖြူးထိုင်းပါတီသည် ကာလတို စီးပွားရေးလှုံ့ဆော်မှုအတွက် အစိုးရ အေဂျင်စီများနှင့် ဆွေးနွေး ညှိနှိုင်းနေ သည်ဟုလည်း ထိုင်းဝန်ကြီးချုပ်သစ်က ပြောသည်။

ဘတ် ၁၀၀၀၀ စီ ထောက်ပံ့မည့် မူဝါဒကို လာမည့်နှစ် ပထမသုံးလပတ် ကာလထက် နောက်မကျစေဘဲ အကောင်အထည် ဖော်သွားဖွယ်ရှိသည်ဟု ဆရီသာက ပြောကြားခဲ့သည်။

Source: ဘန်ကောက်ပို့စ်