CNI International News

ဘန်ကောက်၊ စက်တင်ဘာ ၁၁

ရုရှားနိုင်ငံထံမှ Su-30 တိုက်လေယာဉ်များ၏ ပထမအသုတ်အဖြစ် Su-30 လေယာဉ်နှစ်စင်းကို လက်ခံရရှိ ခဲ့သည်ဟု မြန်မာကုန်သွယ်ရေးဝန်ကြီး ဦးချာလီသန်း (Charlie Than)က စက်တင်ဘာ ၉ ရက်တွင် ရုရှား၏ RIA သတင်းအေဂျင်စီသို့ ပြောကြားခဲ့သည်။

"လေယာဉ်နှစ်စင်း ရောက်ရှိခဲ့ပါပြီ" ဟု ဦးချာလီသန်းက စက်တင်ဘာ ၉ ရက်တွင် ဗလာဒီဗော့စတော့ ဆိပ်ကမ်း မြို့၌ ပြုလုပ်သည့် ရုရှား၏ နှစ်စဉ်ကျင်းပနေကျ အရှေ့တိုင်းစီးပွားရေးဖိုရမ် (Eastern Economic Forum)မှာ RIA နှင့် သီးသန့်တွေ့ဆုံစဉ် ပြောကြားခဲ့သည်။

ရုရှားနှင့် မြန်မာသည် ၂၀၂၂ ခုနှစ်၊ စက်တင်ဘာလက Su-30ME တိုက်လေယာဉ် ၆ စင်း ရောင်းဝယ်ရေးအတွက် သဘောတူစာချုပ် ချုပ်ဆိုခဲ့သည်ဟု RIA မှ ဖော်ပြခဲ့သည်။

Sukhoi Su-30SME သည် ဘက်စုံသုံး တိုက်လေယာဉ် အမျိုးအစားဖြစ်ပြီး ရန်သူများ၏ လေကြောင်း ပစ်မှတ်များ ကို တိုက်ခိုက်ရန်၊ လေကြောင်း ကင်းထောက်လှမ်းမှုများ ပြုလုပ်ရန်၊ လေယာဉ်မှူးများကို လေ့ကျင့်သင်ကြားပေး ရန် အသုံးပြုသည့် လေယာဉ်ဖြစ်သည်ဟု ရုရှားနိုင်ငံပိုင် လက်နက်တင်ပို့ ရောင်းချသည့် ကုမ္ပဏီဖြစ်သော Roso boronexport က ပြောကြားခဲ့သည်။

Sukhoi Su-30SME တိုက်လေယာဉ်များကို တွေ့ရစဉ်

ရုရှားနှင့် မြန်မာအကြား ခရီးသွားကဏ္ဍ ဖွံ့ဖြိုးတိုးတက်ရေး အပါအဝင် အရှေ့တိုင်းစီးပွားရေး ဖိုရမ်အတွင်း နှစ်နိုင်ငံ အကြား ပူးတွဲ သဘောတူညီချက်များကို လက်မှတ်ရေးထိုးသွားမည်ဟု ရုရှားနိုင်ငံပိုင် တာ့စ်သတင်းအေဂျင်စီက ဖော်ပြခဲ့သည်။

ထိုအကြောင်းအရာနှင့် ပတ်သက်ပြီး ရုရှားကာကွယ်ရေးဝန်ကြီးဌာနက ရိုက်တာသတင်းဌာန၏ မှတ်ချက်ပေးရန် တောင်းဆိုချက်ကို ချက်ချင်း တုံ့ပြန်ခဲ့ခြင်း မရှိပေ။

အမေရိကန်ကမူ မြန်မာကို စစ်ရေး အထောက်အပံ့ ပေးနေသည့် ရုရှား၏ လုပ်ဆောင်ချက်ကို လက်ခံနိုင်ဖွယ် မရှိကြောင်း၊ ထိုကဲ့သို့ လက်နက်များ ထောက်ပံ့ပေးမှုသည် ပဋိက္ခဖြစ်ပွားနေသည့် မြန်မာနိုင်ငံ၏ တည်ငြိမ်မှုကို ပိုမိုဆိုးရွားစေနိုင်ကြောင်း သတိပေးခဲ့သည်။

ရုရှားကာကွယ်ရေးဝန်ကြီးနှင့် ထိပ်သီး သံတမန်တစ်ဦးသည် မြန်မာနိုင်ငံကို လာရောက်ခဲ့ပြီး ၂၀၂၁ ခုနှစ် နောက်ပိုင်း မြန်မာတပ်မတော်အကြီးအကဲ ဗိုလ်ချုပ်မှူးကြီး မင်းအောင်လှိုင်သည် ရုရှားသို့ မကြာခဏ သွားရောက်ခဲ့ပြီး ဂုဏ်ထူးဆောင်ဆုတံဆိပ် ချီးမြှင့်ခံခဲ့ရသည်။

Source: ဘန်ကောက်ပို့စ်

CNI News

၂၀၂၃ ခုနှစ်၊ စက်တင်ဘာ ၉

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) ၈ နှစ်မြောက် နှစ်ပတ်လည် အခမ်းအနား ကို လက်တွေ့ကျကျ၊ အဓိပ္ပာယ်ရှိရှိ၊ အလေးအနက်ထား၍ စီစဉ်ကျင်းပသွားမည်ဟု နစကဥက္ကဋ္ဌ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောသည်။

၂၀၂၃ ခုနှစ်၊ စက်တင်ဘာ ၉ ရက်နေ့က ရှမ်းပြည်နယ်(မြောက်ပိုင်း)ရှိ ပြည်နယ်၊ ခရိုင်၊ မြို့နယ်အဆင့်ဌာန ဆိုင်ရာ တာဝန်ရှိသူများ၊ မြို့မိ/မြို့ဖများ၊ အသေးစား၊ အငယ်စားနှင့်အလတ်စားစီးပွားရေး(MSME) လုပ်ငန်းရှင် များနှင့် တွေ့ဆုံစဉ် ၎င်းက အထက်ပါ အတိုင်းပြောကြားခဲ့ခြင်း ဖြစ်သည်။

လာမည့် အောက်တိုဘာ ၁၅ ရက်နေ့သည် NCA စာချုပ် ချုပ်ဆိုမှု ၈ နှစ်မြောက် နှစ်ပတ်လည်နေ့ ဖြစ်ကြောင်း၊ ယခင်က အကြောင်းအမျိုးမျိုးကြောင့် ငြိမ်းချမ်းရေး နှစ်ပတ်လည်နေ့ကို ကျင်းပပြုလုပ်နိုင်ခဲ့ခြင်းမရှိကြောင်း၊ ယခုနှစ်တွင် အဆိုပါ အခမ်းအနားကို အဓိပ္ပာယ် လေးနက်စွာဖြင့် ကျင်းပပြုလုပ်သွားရန် စီစဉ် ဆောင်ရွက်လျက် ရှိကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

၎င်းက “ လာမည့် အောက်တိုဘာ ၁၅ ရက်တွင် ကျရောက်မည့် ၈ နှစ်မြောက် NCA နှစ်ပတ်လည်နေ့ အခမ်းအနား ကိုလည်း လက်တွေ့ကျကျ၊ အဓိပ္ပာယ်ရှိရှိ၊ အလေးအနက်ထား၍ စီစဉ်ကျင်းပသွားမည်ဖြစ်ပြီး မိမိတို့အနေဖြင့် ငြိမ်းချမ်းရေး လုပ်ငန်းစဉ်များ အောင်မြင်မှုရရှိစေရေး ဆက်လက်ကြိုးပမ်း ဆောင်ရွက်သွားမည်”ဟု ပြောသည်။

NCA စာချုပ်သည် ပျက်ပြယ်သွားပြီးဖြစ်ကြောင်း ကရင်အမျိုးသားအစည်းအရုံး(KNU) အထွေထွေအတွင်းရေးမှူး ပဒိုစောတာဒိုမူးက ၂၀၂၃ ခုနှစ်၊ သြဂုတ်လတွင် သတင်းစာ ရှင်းလင်းပွဲတစ်ခုမှာ ပြောကြားခဲ့သည်။

NCA စာချုပ်ကို ၂၀၁၅ ခုနှစ်၊ အောက်တိုဘာ ၁၅ ရက်တွင် အစိုးရ၊ လွှတ်တော်၊ တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းများက ကမ္ဘာ့ကုလသမဂ္ဂ အပါအဝင် နိုင်ငံတကာမှ အသိသက်သေများ ပြည်တွင်း အသိသက်သေများ ရှေ့မှောက်တွင် ခမ်းနားထည်ဝါစွာ လက်မှတ်ရေးထိုးခဲ့ကြကြောင်း၊ Union Accord အဖြစ် ပြည်ထောင်စုလွှတ်တော်က အတည်ပြုပေးထားသည့် သမိုင်းဝင် စာချုပ်ဖြစ်ပြီး မည်သည့် အချိန်မှ ပျက်ပြယ်မှု မရှိ တည်ရှိနေမည့် စာချုပ်ဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့နောက် တပ်မတော်အနေဖြင့် ငြိမ်းချမ်းရေး လုပ်ငန်းစဉ်များနှင့်ပတ်သက်၍ NCA စာချုပ်အပေါ်တွင်သာ ခိုင်ခိုင် မာမာ ရပ်တည် ဆောင်ရွက်သွားမည်ဟု ၎င်းက ပြောသည်။

NCA စာချုပ်ကို  KNU ၊ ရှမ်းပြည်ပြန်လည်ထူထောင်ရေးကောင်စီ(RCSS)၊ ဒီမိုကရေစီ အကျိုးပြု ကရင်တပ်မ တော် (DKBA)၊ KNU/KNLA-ငြိမ်းချမ်းရေးကောင်စီ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF)၊ ရခိုင်ပြည်လွတ်မြောက်ရေးပါတီ(ALP)၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ချင်းအမျိုးသားတပ်ဦး(CNF)၊ မွန်ပြည်သစ်ပါတီ(NMSP)၊ လားဟူဒီမိုကရက်တစ် အစည်းအရုံး(LDU)တို့ လက် မှတ်ထိုးထားသည်။

CNI International News

ပြုံယမ်း၊ စက်တင်ဘာ ၉

မြောက်ကိုရီးယားသည် ၎င်း၏ ပထမဆုံး နည်းဗျူဟာမြောက် နျူကလီးယားတိုက်ခိုက်ရေး ရေငုပ်သင်္ဘောကို ရေချခဲ့ပြီး ကိုရီးယားကျွန်းဆွယ်နှင့် ဂျပန်အကြား ရေပြင်များတွင် ကင်းလှည့်ရန် စစ်သင်္ဘောအုပ်စုအတွင်း တာဝန် ပေးခဲ့သည်ဟု နိုင်ငံပိုင် KCNA သတင်းအေဂျင်စီက ဖော်ပြခဲ့သည်။

စက်တင်ဘာ ၆ ရက်က ပြုလုပ်ခဲ့သည့် ထိုရေငုပ်သင်္ဘော ရေချသည့် အခမ်းအနားကို မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un) တက်ရောက်ခဲ့ပြီး ရေတပ်ကို နည်းဗျူဟာမြောက် နျူကလီးယား လက်နက်များ တပ်ဆင်ထားသည့် ရေငုပ်သင်္ဘောများနှင့် တခြားသော စစ်သင်္ဘောများကို ပိုမိုလွှဲပြောင်းအပ်နှံ မည်ဟု ကတိပြုခဲ့ကြောင်း ရိုက်တာမှ ဖော်ပြခဲ့သည်။

"ရေငုပ်သင်္ဘော ရေချတဲ့ အခမ်းအနားဟာ DPRK ရဲ့ ရေတပ်ကို အင်အားမြှင့်တင်ဖို့အတွက် ကဏ္ဍသစ်တစ်ခု စတင် ဖွင့်လှစ်ခြင်း ဖြစ်ပါတယ်"ဟု KCNA က မြောက်ကိုရီးယား၏ တရားဝင် အမည်ဖြစ်သည့် ကိုရီးယား ဒီမိုကရက်တစ် ပြည်သူ့သမ္မတနိုင်ငံ (Democratic People's Republic of Korea) ၏ အတိုကောက် စကားလုံး ဖြင့် သုံးနှုန်းဖော်ပြခဲ့သည်။

မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်

Hero Kim Kun Ok ဟု အမည်ပေးထားသည့်် ရေငုပ်သင်္ဘော နံပါတ် ၈၄၁ သည် မြောက်ကိုရီးယားရေတပ်၏ ရေအောက် ထိုးစစ်ဆင် တိုက်ခိုက်မှုများ၏ အဓိကအခန်းကဏ္ဍတွင် ပါဝင်လိမ့်မည်ဟု ကင်မ်က ပြောသည်။

မြောက်ကိုရီးယားသည် လက်ရှိရေတပ်တွင် ရှိနေသည့် ရေငုပ်သင်္ဘောများကို နျူကလီးယား လက်နက်များ တပ်ဆင်ထားသည့် တိုက်ခိုက်ရေး ရေငုပ်သင်္ဘောများအဖြစ် ပြောင်းလဲတည်ဆောက် သွားမည်ဖြစ်ကြောင်း၊  နျူကလီးယား စွမ်းအင်သုံး ရေငုပ်သင်္ဘောများ တည်ဆောက်ရေးကိုလည်း အရှိန်မြှင့် လုပ်ဆောင်သွားမည်ဟု ကင်မ်က ပြောသည်။

 မြောက်ကိုရီးယားရဲ့ နျူကလီးယား ရေငုပ်သင်္ဘောကို တွေ့ရစဉ်

"ရန်သူတွေရဲ့ ရန်လိုတဲ့ လှုပ်ရှားမှုတွေနဲ့ စစ်ရေး လုပ်ဆောင်ချက်တွေကြောင့် ကျနော်တို့ ရေတပ်ရဲ့ လျင်မြန်တဲ့ ဖွံ့ဖြိုးတိုးတက်မှုဟာ ဦးစားပေးကိစ္စ တစ်ခုဖြစ်ပြီး နှောင့်နှေးကြန့်ကြာလို့ မရနိုင်ပါဘူး"ဟု မြောက်ကိုရီးယားက အမေရိကန်နှင့် တောင်ကိုရီးယားကို ရည်ညွှန်းသည့် သဘောဖြင့် ပြောကြားခဲ့သည်။

မြောက်ကိုရီးယားသည် ၂၀၁၆ ခုနှစ်က ရေငုပ်သင်္ဘောအသစ် တစ်စီးကို တည်ဆောက်နေသည့် အရိပ်လက္ခဏာ များကို ကျွမ်းကျင်သူများက ပထမဆုံးအကြိမ် သတိထားမိခဲ့ပြီး ၂၀၁၉ ခုနှစ်တွင်လည်း ကင်မ်သည် သတင်း ထုတ်ပြန်ခဲ့ခြင်းမရှိသည့် ရေငုပ်သင်္ဘောတစ်စင်းကို စစ်ဆေးလေ့လာခဲ့သည်ဟု ၂၀၁၉ ခုနှစ်က KCNA သတင်းဌာန မှ ဖော်ပြခဲ့ သည်။

ထိုအချိန်က KCNA သည် ရေငုပ်သင်္ဘော၏ လက်နက်စနစ်များနှင့် သင်္ဘော၏ တည်နေရာကို အသေးစိတ် ဖော်ပြခဲ့ခြင်း မရှိသော်လည်း ကျွမ်းကျင်သူများကမူ ရေငုပ်သင်္ဘောအသစ်၏ အရွယ်အစားသည် ဒုံးကျည်များကို သယ်ဆောင်နိုင်ရန် တည်ဆောက်ခဲ့ခြင်းဖြစ်သည်ဟု ပြောကြားခဲ့သည်။

ယခုထုတ်ဖော်ပြသခဲ့သည့် ရေငုပ်သင်္ဘောသစ်တွင် မည်သည့်ဒုံးကျည်များ တပ်ဆင်နိုင်မည်ကို ရှင်းလင်းစွာ မသိရ သေးပေ။ ယခင်က မြောက်ကိုရီးယားသည် ရေငုပ်သင်္ဘောမှ ပစ်လွှတ်သည့် ပဲ့ထိန်းဒုံးကျည် (SLBM) များနှင့် ခရုစ်ဒုံးကျည်များကို ရေငုပ်သင်္ဘောများဖြင့် စမ်းသပ်ပစ်လွှတ်ခဲ့သည်။

Source: ရိုက်တာ

CNI International News

ဝါရှင်တန်၊ စက်တင်ဘာ ၉

အမေရိကန်သည် လက်နက်ခဲယမ်းများ၊ မိုင်းရှင်းလင်းရေး ပစ္စည်းကိရိယာများ၊ အမြောက်ဆန်များနှင့် အခြား လက်နက်များ အပါအဝင် ဒေါ်လာ သန်း ၆၀၀ တန်ကြေးရှိ စစ်ရေးအကူအညီသစ်ကို ယူကရိန်းအား ထောက်ပံ့ ပေးမည်ဟု ကြေညာခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ယူကရိန်းအတွက် ဒေါ်လာ ၁ ဘီလျံ တန်ကြေးရှိ စစ်ရေးနှင့် လူသားချင်း စာနာထောက်ထားမှုဆိုင်ရာ အကူအညီ သစ် ပေးမည်ဟု ကတိပြုခဲ့ပြီးနောက် ရက်ပိုင်းအကြာတွင် ယခုကဲ့သို့ ကြေညာခဲ့ခြင်း ဖြစ်သည်။

စက်တင်ဘာ ၆ ရက်က အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) ၏ ယူကရိန်း ခရီးစဉ်အတွင်း အမေရိကန်အစိုးရသည် ယူကရိန်းအတွက် အမေရိကန်လုပ် M1 Abrams တင့်ကားများအတွက် ယူရေနီယံ ခဲယမ်းများ အပါအဝင် စစ်ရေးနှင့် လူသားချင်းစာနာ ထောက်ထားမှုဆိုင်ရာ အကူအညီအဖြစ် ဒေါ်လာ ၁ ဘီလျံ ကူညီပေးမည်ဟု ကြေညာခဲ့သည်။ 

အမေရိကန် ကာကွယ်ရေး၀န်ကြီး၊ အမေရိကန်နိုင်ငံခြားရေး၀န်ကြီး ဘလင်ကင်နဲ့ ယူကရိန်း သမ္မတ ဇာလန်းစကီးကို တွေ့ရစဉ်

ယူကရိန်းအတွက် ကြေညာခဲ့သည့် ဒေါ်လာ သန်း ၆၀၀ တန်ကြေးရှိ စစ်ရေးအကူအညီသည် ယူကရိန်း၏ စစ်မြေပြင် လိုအပ်ချက်များကို ထောက်ပံ့ပေးနိုင်မည်ဖြစ်ပြီး ယူကရိန်းအား အမေရိကန်၏ လျော့ပါးခြင်းမရှိသည့် ထောက်ပံ့မှုကို ပြသရာရောက်သည်ဟု အမေရိကန်ကာကွယ်ရေးဝန်ကြီးဌာနက စက်တင်ဘာ ၇ ရက်တွင် ထုတ်ပြန်ခဲ့သည်။

အဆိုပါ စစ်ရေးအကူအညီသည် အမေရိကန်စစ်တပ်၏ လက်နက်တိုက်မှ လက်နက်များကို တိုက်ရိုက်ပေးအပ်ခြင်း မဟုတ်ဘဲ လက်နက်ထုတ်လုပ်သည့် ကုမ္ပဏီများနှင့် မိတ်ဖက်များထံမှ လက်နက်များအား ထောက်ပံ့ပေးမည်ဖြစ် သဖြင့် ယူကရိန်းစစ်မြေပြင်သို့ ချက်ချင်းရောက်ရှိလိမ့်မည် မဟုတ်ပေ။

အမေရိကန်သမ္မတ ဂျိုးဘိုင်ဒင် (Joe Biden) အစိုးရအဖွဲ့သည် ရုရှားက သိမ်းပိုက်ထားသည့် နယ်မြေများကို ပြန်လည် သိမ်းယူရန် ကြိုးပမ်းနေသည့် ယူကရိန်းတပ်ဖွဲ့များ၏ ၃ လကြာ တန်ပြန် ထိုးစစ်အတွက် ထောက်ပံ့မှု များအား ဆက်လက် လုပ်ဆောင်နေချိန်တွင် ယခုကဲ့သို့ စစ်ရေးအကူအညီသစ် တစ်ခုကို ထပ်မံကြေညာခဲ့ခြင်း ဖြစ်သည်။

ယူကရိန်း ပေးပို့မယ် လက်နက်ခဲယမ်းများကိုတွေ့ရစဉ်

အမေရိကန်၏ မဟာမိတ်အချို့ကမူ ယူကရိန်း၏ တန်ပြန်ထိုးစစ် နှေးကွေးလေးလံနေမှုအပေါ် စိုးရိမ်ကြောင်း ဖော်ပြခဲ့ကြသည်။ သို့သော် မဟာမိတ်အချို့ကတော့ ယူကရိန်းသည် လေကြောင်းကာကွယ်ရေး စနစ်များဖြင့် ရုရှား၏ ဒုံးကျည်များကို ကြားဖြတ်ပစ်ချမှုတွင် အောင်မြင်မှုများရရှိနေကြောင်း ပြောကြားခဲ့ကြသည်။

နေတိုးအဖွဲ့၏ အကြီးအကဲ ယန်း စတိုတန်ဘတ်ချ် (Jens Stoltenberg) ကမူ ယူကရိန်း၏ တန်ပြန်ထိုးစစ်သည် မျှော်မှန်းထားသလောက် တိုးတက်မှုမရှိသော်လည်း ယူကရိန်းတပ်ဖွဲ့များသည် နေ့စဉ်နှင့်အမျှ ရုရှားတပ်ဖွဲ့များ သိမ်းပိုက်ထားသည့် နယ်မြေများကို ပြန်လည်သိမ်းယူနေသည်ဟု စက်တင်ဘာ ၇ ရက်က ပြောကြားခဲ့သည်။

"ယူကရိန်းမှာ တိုက်ပွဲတွေက ပြင်းပြင်းထန်ထန် ဖြစ်ပွားနေပါတယ်။ ဒါပေမယ့် ယူကရိန်းတပ်ဖွဲ့တွေဟာ ရုရှား တပ်ဖွဲ့တွေရဲ့ ခံစစ်စည်းတွေကို ချိုးဖောက် ဝင်ရောက်နိုင်စွမ်းရှိခဲ့ပါတယ်။ တစ်ချိန်တုန်းကတော့ ရုရှားစစ်တပ်ဟာ ကမ္ဘာမှာ ဒုတိယမြောက် အင်အားအကြီးဆုံး ဖြစ်ခဲ့ပါတယ်။ အခုတော့ ရုရှားစစ်တပ်ဟာ ယူကရိန်းနိုင်ငံမှာပဲ ဒုတိယအင်အားအကြီးဆုံး စစ်တပ်ဖြစ်နေပါတယ်" ဟု စတိုတန်ဘတ်ချ်က ပြောကြားခဲ့သည်။

Source: အယ်လ်ဂျာဇီးယား

CNI International News

မက္ကဆီကိုစီးတီး၊ စက်တင်ဘာ ၈

၂၀၂၄ ခုနှစ်တွင်ပြုလုပ်မည့် မက္ကဆီကို သမ္မတရွေးကောက်ပွဲတွင် မက္ကဆီကိုစီးတီး မြို့တော်ဝန်ဟောင်းဖြစ်သည့် ကလော်ဒီယာ ရှိန်ဘမ်း (Claudia Sheinbaum) က အနိုင်ရရှိရန် ရေပန်းစားနေသည်ဟု ရိုက်တာမှ ဖော်ပြခဲ့သည်။

ကလော်ဒီယာ၏ ဆရာဖြစ်သူမှာ လက်ရှိ မက္ကဆီကိုသမ္မတ အန်ဒရီ မန်နျူယယ် လိုပက်ဇ် အိုဘရာဒေါ (Andres Manuel Lopez Obrador) ဖြစ်ပြီး ကလော်ဒီယာသည် ဆရာဖြစ်သူ အိုဘရာဒေါ၏ သမ္မတရာထူးကို ဆက်ခံမည့် သူအဖြစ် ထင်ကြေးပေး ခံခဲ့ရသည်။

ယခင်အစိုးရအဖွဲ့ကို ဝေဖန်ခဲ့သည့် သမ္မတ အိုဘရာဒေါ၏ လုပ်ငန်းစဉ်များအား ဆက်လက် တာဝန်ယူ လုပ်ဆောင် သွားမည်ဟု အသက် ၆၁ နှစ်အရွယ် ကလော်ဒီယာက ပြောသည်။

"သမ္မတ အန်ဒရီ မန်နျူယယ် လိုပက်ဇ် အိုဘရာဒေါ စတင် လုပ်ဆောင်ခဲ့တဲ့ ပြုပြင်ပြောင်းလဲမှုတွေကို ဆက်လက် လုပ်ဆောင်သွားမှာပါ။ နောက်ကြောင်း ပြန်လှည့်ဖို့ အကြောင်းမရှိပါဘူး" ဟု ကလော်ဒီယာက ပြီးခဲ့သည့်လ အတွင်း မက္ကဆီကိုစီးတီးမြို့တော်တွင် ပြုလုပ်သည့် မဲဆွယ်စည်းရုံးမှုအတွင်း ပြောကြားခဲ့သည်။

မက္ကဆီကိုစီးတီးမြို့ခံများကို တွေ့ရစဉ်

လက်ရှိ အာဏာရ လက်ဝဲယိမ်းပါတီဖြစ်သည့် MORENA ကလည်း ကလော်ဒီယာသည် သမ္မတရွေးကောက်ပွဲ ဝင်ရောက်ယှဉ်ပြိုင်မည့် ပါတီကိုယ်စားပြု ကိုယ်စားလှယ်လောင်း ဖြစ်လာလိမ့်မည်ဟု စက်တင်ဘာ ၆ ရက်က ပြောကြားခဲ့သည်။

ကလော်ဒီယာသည် မက္ကဆီကိုစီးတီး မြို့တော်ဝန်အဖြစ် တာဝန်ထမ်းဆောင်ခဲ့ကာ ယခုနှစ် ဇွန်လက သက်တမ်း ပြည့်ခဲ့ပြီး ရာထူးမှ ဆင်းခဲ့သူ ဖြစ်သည်။

၎င်း၏ ပြိုင်ဘက်ဖြစ်သည့် နိုင်ငံခြားရေးဝန်ကြီးဟောင်း မာဆယ်လို အက်ဘ်ရက် (Mercelo Ebrard) ကမူ သမ္မတ ရွေးကောက်ပွဲ ဝင်ရောက်ယှဉ်ပြိုင်ရန်အတွက် MORENA ပါတီ၏ ကိုယ်စားလှယ်လောင်း ရွေးချယ်မှု လုပ်ငန်းစဉ် ကို ဝေဖန်ခဲ့သည်။

မက္ကဆီကိုသမ္မတ အန်ဒရီ မန်နျူယယ် လိုပက်ဇ် အိုဘရာဒေါကို တွေ့ရစဉ်

သမ္မတရွေးကောက်ပွဲ ဝင်ရောက်ယှဉ်ပြိုင်မည့် နောက်ထပ် အမျိုးသမီး ကိုယ်စားလှယ်လောင်း တစ်ဦးမှာ စီးပွား ရေး လုပ်ငန်းရှင်အဖြစ်မှ နိုင်ငံရေးလောကထဲ ခြေချခဲ့သည့် ဆော်ချီ ဂဲလ်ဗက်ဇ် (Xochitl Galvez) ဖြစ်သည်။

၂၀၂၄ ခုနှစ်၊ ဇွန်လ ၂ ရက်တွင် ပြုလုပ်မည့် ရွေးကောက်ပွဲ၌ ကလော်ဒီယာနှင့် ဂဲလ်ဗက်ဇ် တို့နှစ်ဦးထဲမှ တစ်ဦး အနိုင် ရရှိခဲ့မည်ဆိုပါက မက္ကဆီကိုနိုင်ငံ သမိုင်းမှာ ပထမဆုံး အမျိုးသမီးသမ္မတ ဖြစ်လာမည် ဖြစ်သည်။

Source: ရိုက်တာ

CNI International News

မော်စကို၊ စက်တင်ဘာ ၈

အာရှ-ပစိဖိတ်ဒေသအတွင်းသို့ ထိုးဖောက်ဝင်ရောက်ရန် နေတိုး၏ အားထုတ်ကြိုးပမ်းမှုများကြောင့် ထိုဒေသတွင် စစ်ရေးအသွင်ဆောင်သည့် အန္တရာယ်များ ဖြစ်ပွားလာနိုင်ကြောင်း ရုရှားနိုင်ငံခြားရေးဝန်ကြီး ဆာဂျေ လာဗရော့ဗ် (Sergey Lavrov)က အရှေ့အာရှ ညီလာခံ၌ ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။

"အာရှ-ပစိဖိတ်ဒေသမှာ နေတိုးတပ်ဖွဲ့တွေရဲ့ ထိုးဖောက်ဝင်ရောက်မှု၊ အနောက်နိုင်ငံတွေက ဖန်တီးခဲ့တဲ့ ကွန်ရက် တွေနဲ့ အမေရိကန်၊ ဗြိတိန်၊ သြစတြေးလျ (AUKUS) အဖွဲ့ရဲ့ ထိပ်တိုက်တွေ့တဲ့ အစီအစဉ်တွေကြောင့် အရှေ့အာရှ မှာ စစ်ရေး အသွင်ဆောင်တဲ့ အန္တရာယ်တွေကို ဖြစ်လာစေခဲ့ပါတယ်" ဟု လာဗရော့ဗ်က ပြောသည်။ 

ဒေသတွင်း သာတူညီမျှမှု ရှိစေရေးနှင့် လုံခြုံရေးတို့ကို ထောက်ခံပေးထားသော ရုရှား၏ ခိုင်မာသည့် ရပ်တည်ချက် နှင့် မိတ်ဖက်နိုင်ငံများအတွက် ဖွံ့ဖြိုးတိုးတက်မှု ရှိစေသော ရုရှား၏ လုပ်ဆောင်မှုများကို  သံတမန်များက အလေး ထား ပြောကြားခဲ့သည်ဟု ရုရှားနိုင်ငံခြားရေးဝန်ကြီးက ထုတ်ပြန်ခဲ့သည်။

အရှေ့အာရှ ညီလာခံကို ကျင်းပနေစဉ်

"အာဆီယံရဲ့ ခိုင်မာတဲ့ ပူးပေါင်းဆောင်ရွက်မှု စနစ်ထဲမှာ နိုင်ငံပေါင်းစုံ ပါဝင်တဲ့ ပူးပေါင်းဆောင်ရွက်ရေး ယန္တရား တွေကို ထိန်းသိမ်းရေးဟာ အရေးကြီးပါတယ်။ အပြန်အလှန် လေးစားမှု၊ အကျိုးစီးပွားတွေနဲ့ အများသဘော ဆန္ဒ တွေအပေါ် အခြေခံပြီး နိုင်ငံရေးသဘော သက်ဝင်ခြင်းမရှိတဲ့ ဆွေးနွေးညှိနှိုင်းမှုတွေနဲ့ ပူးပေါင်းဆောင်ရွက်မှုတွေ ပြုလုပ်ဖို့ အရေးကြီးပါတယ်"ဟု လာဗရော့ဗ်က ပြောသည်။

အရှေ့အာရှညီလာခံ၏ မူဘောင်အတွင်း လက်တွေ့ကျသည့် လုပ်ဆောင်ချက်များကို မြှင့်တင်မှု၏ အရေးကြီးပုံကို လည်း လာဗရော့ဗ်က အလေးထား ပြောဆိုခဲ့သလို အာရှ-ပစိဖိတ်ဒေသတွင် ဖွဲ့စည်းထားသည့် အဖွဲ့အစည်းများ အကြား ခိုင်မာသော ဆက်ဆံရေးများ ထူထောင်ရန်၊ ခရီးသွားကဏ္ဍကို မြှင့်တင်ရန်၊ ကပ်ရောဂါ၏ ခြိမ်းခြောက်မှု များကို တုံ့ပြန်ရန် ရုရှား၏ အစီအစဉ်များအား ထုတ်ဖော်ပြောခဲ့သည်ဟု ရုရှားနိုင်ငံခြားရေးဝန်ကြီးဌာနက ထုတ် ပြန်ခဲ့သည်။

"ရုရှားဟာ အရှေ့တောင်အာရှနိုင်ငံများအသင်း (အာဆီယံ) ၊ ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) နဲ့ ယူရေးရှား စီးပွားရေး သမဂ္ဂ (EAEU) တို့အကြား ခိုင်မာတဲ့ ထိတွေ့ဆက်ဆံမှုတွေကို တိုးမြှင့်ဖို့ အပါအဝင် ပူးတွဲ ဖွံ့ဖြိုးတိုးတက်ရေး စိတ်ဓာတ်နဲ့အတူ ဒေသတွင်း ပူးပေါင်းဆောင်ရွက်မှုအတွက် ခိုင်မာတဲ့ မူဘောင်တစ်ခု ရေးဆွဲဖို့ အာရုံစိုက် လုပ်ဆောင်နေတယ်ဆိုတာ အတည်ပြုပါတယ်" ဟု လာဗရော့ဗ်က ပြောသည်။

ရုရှားနိုင်ငံခြားရေးဝန်ကြီး ဆာဂျေ လာဗရော့ဗ်ကို တွေ့ရစဉ်

အရှေ့အာရှ ညီလာခံကို စက်တင်ဘာ ၇ ရက်က အင်ဒိုနီးရှားနိုင်ငံ၊ ဂျကာတာမြို့တော်တွင် စတင်ပြုလုပ်ခဲ့ခြင်း ဖြစ်သည်။ 

ထိုညီလာခံကို နှစ်စဉ်ပြုလုပ်နေကျ အာဆီယံ အစည်းအဝေးများအပြီးတွင် ပြုလုပ်လေ့ရှိသည်။

အာဆီယံအစည်းအဝေးနှင့် အရှေ့အာရှညီလာခံကို လာဗရော့ဗ်က ရုရှားနိုင်ငံကိုယ်စားပြုပြီး တက်ရောက်ခဲ့သည်။

အာရှ-ပစိဖိတ်ဒေသတွင်းရှိ နိုင်ငံများအကြား မဟာဗျူဟာမြောက် ဆွေးနွေးမှု၊ လုံခြုံရေးနှင့် စီးပွားရေး ဖွံ့ဖြိုးတိုး တက်မှု၊ လက်တွေ့ကျသည့် ပူးပေါင်းဆောင်ရွက်မှုများကို မြှင့်တင်ရန်အတွက် အရှေ့အာရှ ညီလာခံအား  ၂၀၀၅ ခုနှစ်က တည်ထောင်ခဲ့ခြင်း ဖြစ်သည်။

ထိုညီလာခံကို အာဆီယံနိုင်ငံများဖြစ်သည့် ဘရူနိုင်း၊ ကမ္ဘောဒီးယား၊ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ စင်ကာပူ၊ ထိုင်းနှင့် ဗီယက်နမ်နိုင်ငံတို့အပြင် ရုရှား၊ သြစတြေးလျ၊ တရုတ်၊ အိန္ဒိယ၊ နယူးဇီလန်၊ တောင်ကိုရီးယား၊ အမေရိကန်နှင့် ဂျပန်နိုင်ငံတို့လည်း တက်ရောက်ခဲ့သည်။ 

အာဆီယံအဖွဲ့ဝင်ဖြစ်ရန် အဆိုပြုခံထားရသည့်် အရှေ့တီမောနိုင်ငံကိုလည်း ယခုနှစ် အရှေ့အာရှညီလာခံကို တက်ရောက်ရန် ဖိတ်ကြားခဲ့သည်။

Source: တာ့စ်

CNI International News

ဂျကာတာ၊ စက်တင်ဘာ ၈

မြန်မာနိုင်ငံတွင် ဖြစ်ပွားနေသည့် အကျပ်အတည်းကို အဆုံးသတ်ရန် စည်းလုံးညီညွတ်သည့် မဟာဗျူဟာကို ရှာဖွေကြရန် ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်(Antonio Guterres)က စက်တင်ဘာ ၇ ရက် တွင် နိုင်ငံတကာအသိုင်းအဝိုင်းကို တိုက်တွန်းခဲ့သည်ဟု အေပီမှ ဖော်ပြခဲ့သည်။

ကုလသမဂ္ဂအနေနှင့် ဝမ်းနည်းဖွယ် အခြေအနေကို တုံ့ပြန်ဆောင်ရွက်နိုင်စွမ်း ရှိစေရန် ကျဆင်းနေသည့် ဘဏ္ဍာ ရေး အထောက်အပံ့ကို ယခင်ပမာဏအထိ ရောက်ရှိစေရန် မြှင့်တင်သင့်သည်ဟုလည်း ဂူတာရက်စ်က ပြောသည်။ 

၂၀၂၂ ခုနှစ်က အာဆီယံ ခေါင်းဆောင်များနှင့် တွေ့ဆုံခဲ့ပြီးနောက်ပိုင်း မြန်မာနိုင်ငံ၏ အခြေအနေသည် ပိုမိုဆိုးရွား လာခဲ့ကြောင်း၊ တပ်မတော်က ဖွဲ့စည်းထားသည့် အစိုးရအနေနှင့် နိုင်ငံရေး အကျဉ်းသားများ အားလုံးကို ပြန်လည် လွှတ်ပေးရန်၊ ဒီမိုကရေစီ အုပ်ချုပ်ရေးစနစ်ကို ပြန်လည်ရရှိစေရေးအတွက် တံခါးဖွင့်ထားရန် ဂူတာရက်စ်က ပြော ကြားခဲ့သည်။

အာဆီယံ ခေါင်းဆောင်များကိုတွေ့ရစဉ်

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က တပ်မတော်မှ ဒေါ်အောင်ဆန်းစုကြည် ဦးဆောင်သည့် အစိုးရ ကို ဖြုတ်ချခဲ့ပြီးနောက် နိုင်ငံအတွင်း သွေးထွက်သံယိုမှုများ ဖြစ်ပွားခဲ့သည်။

ဂူတာရက်စ်သည် အင်ဒိုနီးရှားနိုင်ငံ၊ ဂျကာတာမြို့တော်တွင် ပြုလုပ်ခဲ့သည့် အရှေ့တောင်အာရှ နိုင်ငံများအသင်း (အာဆီယံ) ခေါင်းဆောင်များ အစည်းအဝေးသို့ မတက်ရောက်မီ စက်တင်ဘာ ၇ ရက်က မြန်မာနိုင်ငံ အရေးနှင့် ပတ်သက်ပြီး နိုင်ငံတကာ၏ တုံ့ပြန်ဆောက်ရွက်မှု အခြေအနေကို သတင်းစာ ရှင်းလင်းပွဲ ပြုလုပ်ခဲ့ခြင်း ဖြစ်သည်။

ဂူတာရက်စ်က ကွဲပြားခြားနားမှုများနှင့် လုံခြုံရေး မူဘောင်များ ချမှတ်ရာတွင် ပဋိပက္ခဖြစ်မှုများနှင့်အတူ ကမ္ဘာ့ စီးပွားရေးနှင့် ဘဏ္ဍာရေးစနစ်များ၌ ကြီးမားသည့် အက်ကြောင်းများကြောင့် အစိတ်စိတ်အမွှာမွှာ ပြိုကွဲနိုင်သည့် အန္တရာယ်ကိုလည်း သတိပေးခဲ့သည်။

 အင်ဒိုသမ္မတနဲ့ ဂူတာရက်စ်ကို တွေ့ရစဉ်

ရာသီဥတု ဖောက်ပြန်ပြောင်းလဲမှု အခြေအနေ ပိုမိုဆိုးရွားလာခြင်း၊ စစ်ပွဲများ၊ ပဋိပက္ခ ဖြစ်ပွားမှုများ မြင့်တက်လာ ခြင်း၊ ဆင်းရဲမွဲတေမှုနှုန်းနှင့် မညီမျှမှုများ ပိုမိုကွာဟလာခြင်း၊ ပထဝီနိုင်ငံရေး တင်းမာမှုများ ပိုမိုမြင့်တက်လာခြင်း စသည့်တို့ကြောင့် မိမိတို့ ကမ္ဘာသည် အကျပ်အတည်းများအတွင်းသို့ ကျရောက်နိုင်သည်ဟု ဂူတာရက်စ်က ပြော သည်။

" မြန်မာနိုင်ငံရဲ့ နိုင်ငံရေး၊ လူသာချင်း စာနာထောက်ထားမှု အခြေအနေနဲ့ လူ့အခွင့်အရေး အခြေအနေတွေ ပိုမို ဆိုးရွားလာတာနဲ့ပတ်သက်ပြီး ကျနော် အရမ်းစိုးရိမ်မိပါတယ်"ဟု ဂူတာရက်စ်က ပြောကြားခဲ့သည်။

ထို့ပြင် ၂၀၂၁ ခုနှစ်က မြန်မာနိုင်ငံတွင် အကြမ်းဖက်မှုများကို ရပ်တန့်ရန် တောင်းဆိုထားသည့် အာဆီယံ၏ အချက် ၅ ချက်ပါ ဘုံသဘောတူညီချက်ကို ထောက်ခံကြောင်းလည်း ဂူတာရက်စ်က ပြောကြားခဲ့သည်။  

Source: အေပီ

CNI International News

ဂျကာတာ၊ စက်တင်ဘာ ၇

နိုင်ငံများအကြား ပဋိပက္ခများကို ဖြေရှင်းရန် ကြိုးပမ်းနေချိန်တွင် စစ်အေးအသစ် ဖြစ်ပွားမည့် အခြေအနေအား ရှောင်လွှဲရန် အရေးကြီးကြောင်း တရုတ်ဝန်ကြီးချုပ် လီချင် (Li Qiang) က သတိပေးခဲ့သည်ဟု ရိုက်တာမှ ဖော်ပြခဲ့သည်။

စက်တင်ဘာ ၅ ရက်က အင်ဒိုနီးရှားနိုင်ငံ ဂျကာတာမြို့တော်၌ ပြုလုပ်နေသည့် အာဆီယံအစည်းအဝေးတွင် ၎င်းက ပြောကြားခဲ့ခြင်း ဖြစ်သည်။ 

နှစ်စဉ်ပြုလုပ်နေကျ အရှေ့တောင်အာရှ နိုင်ငံများအသင်း (အာဆီယံ) နှင့် တရုတ်၊ ဂျပန်၊ တောင်ကိုရီးယား (အာဆီယံ အပေါင်း ၃ နိုင်ငံ) အစည်းအဝေးတွင် မိန့်ခွန်းပြောကြားခဲ့ချိန်၌ လီက နိုင်ငံများအနေနှင့် မတူကွဲပြား မှုများနှင့် အငြင်းပွားမှုများကို သင့်တော်စွာ ကိုင်တွယ်ဖြေရှင်းရန် လိုအပ်ကြောင်း ပြောကြားခဲ့သည်။

"လက်ရှိအချိန်မှာ ဟိုဘက်၊ ဒီဘက်ဆိုပြီး ဘက်ရွေးတာကို ဆန့်ကျင်ဖို့ ထိပ်တိုက်တွေ့မှုနဲ့ စစ်အေးအသစ် ဖြစ်ပွားမယ့် အခြေအနေကို ဆန့်ကျင်ဖို့ အရမ်းအရေးကြီးပါတယ်"ဟု လီက ပြောသည်။

အမေရိကန်ဒုတိယသမ္မတ ကာမယ်လာဟားရစ်ကို တွေ့ရစဉ်

အင်အားကြီး နိုင်ငံများ၏ ပြိုင်ဆိုင်မှုအကြား ရောက်ရှိနိုင်ကြောင်း သတိပေးခံထားရသည့် အာဆီယံသည် အမေရိကန်ဒုတိယသမ္မတ ကာမယ်လာ ဟားရစ် (Kamala Harris)နှင့် ဂျပန်၊ တောင်ကိုရီးယား၊ သြစတြေးလျနှင့် အိန္ဒိယ အပါအဝင် မိတ်ဖက်နိုင်ငံများမှ ခေါင်းဆောင်များနှင့် အစည်းအဝေး ကျင်းပနေခြင်း ဖြစ်သည်။

ထိုအစည်းအဝေးကို အမေရိကန်သမ္မတ ဂျိုးဘိုင်ဒန်(Joe Biden) နှင့် တရုတ်သမ္မတ ရှီကျင့်ဖျင် (Xi Jinping) တို့ တက်ရောက်ခဲ့ခြင်း မရှိပေ။

ထိုအစည်းအဝေးတွင် တရုတ်နှင့် အာဆီယံအဖွဲ့ဝင် နိုင်ငံအချို့အကြား နယ်မြေပိုင်ဆိုင်မှု အငြင်းပွားနေသည့် တောင်တရုတ်ပင်လယ်၌ တရုတ်၏ လှုပ်ရှားမှုများ မြင့်တက်နေမှုအပေါ် စိုးရိမ်ကြောင်း ဖော်ပြခဲ့သည်။

 တရုတ်ဝန်ကြီးချုပ် လီချင်နဲ့ အာဆီယံ ခေါင်းဆောင်များကို တွေ့ရစဉ်

အာဆီယံသည် ယခုသီတင်းပတ်အတွင်း တောင်တရုတ် ပင်လယ်အတွင်းရှိ ရေလမ်းကြောင်းများ အသုံးပြုရေးနှင့် ပတ်သက်သည့် စံသတ်မှတ်ချက်တစ်ခုကို ချမှတ် အကောင်အထည် ဖော်ရေးအတွက် တရုတ်နှင့် ဆွေးနွေးခဲ့သည် ဟု အာဆီယံအလှည့်ကျဥက္ကဋ္ဌဖြစ်သည့် အင်ဒိုနီးရှား၏ နိုင်ငံခြားရေးဝန်ကြီး ရတ်နို မာဆူဒီ (Retno Marsudi)က ပြောကြားခဲ့သည်။

အမေရိကန်နှင့် ၎င်း၏ မဟာမိတ်များသည် တောင်တရုတ်ပင်လယ်၏ အငြင်းပွားနေသည့် ရေပြင်များတွင် ရုပ်ပိုင်းဆိုင်ရာ အဆောက်အအုံများ ဆောက်လုပ်ခြင်း မပြုရန်နှင့် လွတ်လပ်စွာ ရေကြောင်းသွားလာခွင့်၊ လေယာဉ်မောင်းနှင်ခွင့်တို့အတွက် အာဆီယံ၏ တောင်းဆိုချက်များကို သံယောင်လိုက် ပြောဆိုခဲ့ကြသည်။

အမေရိကန်ဒုသမ္မတသည် တောင်တရုတ်ပင်လယ် အပါအဝင် စည်းမျဉ်းအခြေပြု နိုင်ငံတကာ အခင်းအကျင်းကို ထိန်းသိမ်းရာတွင် အမေရိကန်နှင့် အာဆီယံ၏ ဘုံအကျိုးစီးပွားများကို အလေးထား ပြောဆိုသွားမည်ဟု အိမ်ဖြူတော်က စက်တင်ဘာ ၆ ရက်တွင် ထုတ်ပြန်ခဲ့သည်။

Source: ရိုက်တာ

CNI International News

ကိယက်ဗ်၊ စက်တင်ဘာ ၇

ယူကရိန်းဘက်သို့ Mi-8 ရဟတ်ယာဉ်နှင့်အတူ ဘက်ပြောင်းခိုလှုံခဲ့သည့်် ရုရှားပိုင်းလော့ တစ်ဦးကို ယူကရိန်းအစိုးရ က ဒေါ်လာ ၅ သိန်း ချီးမြှင့်သွားမည်ဖြစ်ကြောင်း အယ်လ်ဂျာဇီးယားမှ ဖော်ပြခဲ့သည်။

မက်ဆင် ကုဇ်မီနော့ဗ် (Maxim Kuzminov) အမည်ရှိ ရုရှားပိုင်းလော့သည် ရုရှား၏ စစ်တပ်သုံး ရဟတ်ယာဉ်နှင့် အတူ ဘက်ပြောင်းခိုလှုံခဲ့သဖြင့် ဆုငွေချီးမြှင့်ခံမည် ဖြစ်သည်။

ကုဇ်မီနော့ဗ်ကို ယူကရိန်းငွေကြေးဖြစ်သည့် Hryvnia ဖြင့် ဆုငွေချီးမြှင့် သွားမည်ဖြစ်ပြီး အခြားရုရှား စစ်မှုထမ်း များကိုလည်း ကုဇ်မီနော့ဗ်ကဲ့သို့ ယူကရိန်းထံ ဘက်ပြောင်းခိုလှုံကြရန် ယူကရိန်းစစ်တပ် ထောက်လှမ်းရေး ပြောရေးဆိုခွင့်ရှိသူ အန်ဒရီ ယူဆော့ဗ် (Andriy Yusov)က စက်တင်ဘာ ၅ ရက်တွင် နိုင်ငံပိုင်ရုပ်သံမှတဆင့် တိုက်တွန်းခဲ့သည်။

ယူကရိန်းစစ်တပ် ထောက်လှမ်းရေး ပြောရေးဆိုခွင့်ရှိသူ အန်ဒရီ ယူဆော့ဗ်ကို တွေ့ရစဉ်

အသက် ၂၈ နှစ်အရွယ် ကုဇ်မီနော့ဗ်၏ ဘက်ပြောင်းခိုလှုံမှုသတင်းကို ယူကရိန်းမီဒီယာများတွင် အကျယ်တဝင့် ဖော်ပြခဲ့ကြသည်။ 

"စစ်ရာဇဝတ်ကောင်တွေ မဖြစ်ချင်တဲ့ ရုရှားနိုင်ငံသားတွေ အနေနဲ့ အခုလို လက်နက်ချပြီး ယူကရိန်းဘက်ကို ဘက်ပြောင်းခိုလှုံကြပါ။ သင်တို့ရဲ့ ဂုဏ်သိက္ခာကို ကာကွယ်ကြပါ။ ရုရှားသမ္မတ ဗလာဒီမာပူတင် (Vladimir Putin)ရဲ့ အစိုးရကို ဆန့်ကျင်တိုက်ခိုက်ကြပါ"ဟု ယူဆော့ဖ်က ရုပ်သံမှတဆင့် ပြောကြားခဲ့သည်။

ယူကရိန်း ထောက်လှမ်းရေးအဖွဲ့သည် ကုဇ်မီနော့ဗ်ကို ဘက်ပြောင်းခိုလှုံစေရန် အထူးစစ်ဆင်ရေးတစ်ရပ် ပြုလုပ်ခဲ့ပြီး ထိုအကြောင်းအရာကို သြဂုတ်လက လူသိရှင်ကြား ထုတ်ပြန်ခဲ့သည်။

ဆုငွေ ဒေါ်လာ ၅ သိန်း ချီးမြှင့်မည့် အကြောင်း ရေးသားထားစဉ်

ယူကရိန်း၏ အွန်လိုင်းသတင်း ဝက်ဘ်ဆိုက်ဖြစ်သည့် Ukrainska Pravda ၏ ဖော်ပြချက်အရ ထိုစစ်ဆင်ရေးကို စနစ်တကျ အချိန်ယူ လုပ်ဆောင်ခဲ့ရကြောင်းနှင့် ကုဇ်မီနော့ဗ်သည် ၎င်း၏ ရဟတ်ယာဉ်နှင့်အတူ ယူကရိန်း နယ် မြေအတွင်းသို့ ဝင်ရောက်လာခဲ့ပြီး ယူကရိန်းအထူးတပ်ဖွဲ့ဝင်များ စောင့်ဆိုင်းနေသည့် ခါကိဗ်ဒေသ၏ အရှေ့ပိုင်း တွင် ဆင်းသက်ခဲ့ကြောင်း သိရသည်။

ကုဇ်မီနော့ဗ်၏ ဘက်ပြောင်းခိုလှုံမည့် အစီအစဉ်ကို မသိဘဲ ထိုရဟတ်ယာဉ်ပေါ်တွင် လိုက်ပါလာခဲ့သည့် ရုရှား စစ်သားနှစ်ဦးသည် လက်နက်ချ အညံ့ခံရန် ငြင်းပယ်ခဲ့သဖြင့် ယူကရိန်းတပ်ဖွဲ့ဝင်များ၏ ပစ်သတ်ခြင်းကို ခံခဲ့ရ သည်ဟု သတင်းများတွင် ဖော်ပြခဲ့သည်။ 
ကုဇ်မီနော့ဗ်၏ မိသားစုသည် အစောပိုင်းကတည်းက ရုရှားနိုင်ငံမှ ထွက်ပြေးတိမ်းရှောင်ခဲ့ပြီး ယူကရိန်းသို့ ရောက်ရှိခဲ့သည်ဟု ဒေသခံ မီဒီယာများက ဖော်ပြခဲ့သည်။

Mi-8 ရဟတ်ယာဉ်သည် ယူကရိန်းတပ်ဖွဲ့များအတွက် တန်ဖိုးကြီးမားသည့် ပိုင်ဆိုင်ရရှိမှုဖြစ်ပြီး ထိုရဟတ်ယာဉ် ပေါ်တွင် ရုရှားတိုက် လေယာဉ်များအတွက် အပိုပစ္စည်းများလည်း တင်ဆောင်လာခဲ့ကြောင်း Ukrainska Pravda သတင်းဝက်ဘ်ဆိုက်က ဖော်ပြခဲ့သည်။

Source: အယ်လ်ဂျာဇီးယား