CNI News

၂၀၂၃ ခုနှစ်၊ စက်တင်ဘာ ၁၅

ကာကွယ်ရေးနှင့် လုံခြုံရေးကဏ္ဍများတွင် ပူးပေါင်းဆောင်ရွက်ရန် နစက၏ ဒုတိယဝန်ကြီးချုပ်နှင့် နိုင်ငံခြားရေး ဝန်ကြီးဖြစ်သူ ဦးသန်းဆွေနှင့် ရုရှားနိုင်ငံခြားရေးဝန်ကြီး ဆာဂျေလာဗရော့ဗ်တို့ ရုရှားနိုင်ငံမှာ ၂၀၂၃ ခုနှစ်၊ စက်တင်ဘာ ၁၄ ရက်နေ့က တွေ့ဆုံ ဆွေးနွေးခဲ့ကြသည်။

ရုရှားနိုင်ငံခြားရေးဝန်ကြီး၏ ဖိတ်ကြားချက်အရ နစက၏ ဒုတိယဝန်ကြီးချုပ်နှင့် နိုင်ငံခြားရေး ဝန်ကြီးဖြစ်သူ ဦးသန်းဆွေနှင့် ကိုယ်စားလှယ်အဖွဲ့သည် ရုရှားနိုင်ငံသို့ သွားရောက်ခဲ့ပြီးနောက် စက်တင်ဘာ ၁၄ ရက်နေ့က ရုရှားနိုင်ငံခြားရေးဝန်ကြီးဌာနမှာ နှစ်နိုင်ငံ ဆွေးနွေးပွဲ တစ်ရပ်ကို ကျင်းပခဲ့သည်။

ထိုဆွေးနွေးပွဲတွင် မြန်မာ-ရုရှား နှစ်နိုင်ငံ နိုင်ငံခြားရေးဝန်ကြီးဌာနများအကြား ပိုမို နီးကပ်စွာ ပူးပေါင်းဆောင် ရွက်ရေး၊ စိန့်ပီတာစဘတ်မြို့နှင့် နိုဗိုစီဗစ်မြို့တို့၌ မြန်မာကောင်စစ်ဝန်ချုပ်ရုံးများ ဖွင့်လှစ်ရေး ဆွေးနွေးခဲ့ကြ ကြောင်း နစကဘက်က ထုတ်ပြန်ခဲ့သည်။

ဒုဝန်ကြီးချုပ် ဦးသန်းဆွေနှင့် ရုရှားနိုင်ငံခြားရေးဝန်ကြီး ဆာဂျေလာဗရော့ဗ်ကို တွေ့ရစဉ်

ထို့နောက် ကာကွယ်ရေး၊ လုံခြုံရေး၊ ခရီးသွားလုပ်ငန်းနှင့် ပြည်သူ အချင်းချင်း ထိတွေ့ဆက်ဆံမှု၊ စီးပွားရေး နှင့် ကုန်သွယ်ရေး၊ ဘဏ်လုပ်ငန်း၊ စွမ်းအင်၊ စက်မှု၊ ပညာရေး၊ ပြန်ကြားရေး အစရှိသည့် ကဏ္ဍများတွင် ပူးပေါင်း ဆောင်ရွက်ရေးကိုလည်း ဆွေးနွေးခဲ့ကြောင်း သိရသည်။

ဒုတိယဝန်ကြီးချုပ် ဦးသန်းဆွေက “ နှစ်နိုင်ငံနှင့် နိုင်ငံတကာ မျက်နှာစာ အထူးသဖြင့် ကုလသမဂ္ဂ၌ မြန်မာနိုင်ငံ အပေါ် ရုရှားဖက်ဒရယ်ရှင်းနိုင်ငံ၏ မူအရ ရပ်တည်ချက်၊ နားလည်မှုနှင့် ခိုင်မာစွာ ထောက်ခံမှုများအပေါ် မြန်မာ နိုင်ငံ အနေဖြင့် လှိုက်လဲှစွာ ကျေးဇူးတင်ကြောင်း” ပြောကြားခဲ့သည်။

ထို့နောက် ဒုတိယဝန်ကြီးချုပ် ဦးသန်းဆွေသည် ရုရှားနိုင်ငံခြားရေးဝန်ကြီး ဆာဂျေလာဗရော့ဗ်နှင့် ပူးတွဲ သတင်း စာ ရှင်းလင်းပွဲ လုပ်ခဲ့သည်။

လက်ရှိ မြန်မာနိုင်ငံ၏ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ တနင်္လာရီးတိုင်းဒေ သကြီး၊ ချင်းပြည်နယ်၊ ကရင်ပြည်နယ်၊ ကယားပြည်နယ်၊ ကချင်ပြည်နယ်၊ ရှမ်းပြည်နယ်တို့တွင် မြန်မာ့တပ်မ တော်နှင့် တော်လှန်ရေး အင်အားစုများကြား တိုက်ပွဲများ ဖြစ်ပွားနေသည်။

CNI International News

ဆိုးလ်၊ စက်တင်ဘာ ၁၅

ရုရှားနိုင်ငံတွင် ယခုသီတင်းပတ်အတွင်း ပြုလုပ်ခဲ့သည့် ရုရှားသမ္မတ ဗလာဒီမာ ပူတင် (Vladimir Putin) နှင့် မြောက်ကိုရီးယားခေါင်းဆောင် ကင်မ်ဂျုံအန်(Kim Jong Un)တို့၏ အစည်းအဝေးသည် ပြိုင်ဘက်များကို သတိ ပေးခြင်းဖြစ်သည်ဟု ကျွမ်းကျင်သူများက ပြောကြားခဲ့ကြောင်း ရိုက်တာမှ ဖော်ပြခဲ့သည်။

စက်တင်ဘာ ၁၄ ရက်က ပြုလုပ်သည့် ထိုအစည်းအဝေးတွင် ပူတင်နှင့် ကင်မ်တို့သည် တစ်ဦးနှင့်တစ်ဦး ရဲဘော်၊ ရဲဘက်ဟု သုံးနှုန်းခေါ်ဝေါ်ခဲ့ကြပြီး ပူတင်က ကင်မ်ကို ရုရှား၏ ခေတ်အမီဆုံး အာကာသစင်တာထဲတွင် လိုက်လံ ပြသခဲ့ကာ နှစ်နိုင်ငံကာကွယ်ရေးဝန်ကြီးများကလည်း ၎င်းတို့နှင့်အတူ လိုက်ပါခဲ့ကြသည်။

ပထဝီနိုင်ငံရေးအရ ဖယ်ကြဉ်ခံထားရသည့်တိုင် မြောက်ကိုရီးယားနှင့် ရုရှားသည် တစ်ဖက်နှင့်တစ်ဖက် အကျိုး စီးပွားများ ရှိနေကြောင်း ပြသခဲ့ကြသည်။ 

Center for a New American Security မှ ကျွမ်းကျင်သူ ဒူယွမ် ကင်မ်ကို တွေ့ရစဉ်

ထို့ပြင် ယူကရိန်းစစ်ပွဲကြောင့် ရုရှားအပေါ် ပိတ်ဆို့မှုများ ချမှတ်ခြင်း၊ နျူကလီးယားနှင့် ဒုံးကျည်စီမံကိန်းတို့ ကြောင့် မြောက်ကိုရီးယားအပေါ် ပိတို့မှုများ ချမှတ်ခြင်းတို့ကို ပြုလုပ်ခဲ့သည့် အမေရိကန်၏ ပိတ်ဆို့မှုများကို အားနည်းစေရန် ရုရှားနှင့် မြောက်ကိုရီးယားတို့က အတူတကွ ကြိုးပမ်းဆောင်ရွက်နေသည်ဟု ကျွမ်းကျင်သူများ က ပြောသည်။

"ပူတင်နဲ့ ကင်မ်ဟာ အပြန်အလှန် ညှိနှိုင်းဆောင်ရွက်မှုတွေကတစ်ဆင့် အကျိုးအမြတ်တွေ ရခဲ့ပြီး နျူကလီးယား လက်နက်တွေ ပိုင်ဆိုင်တဲ့ သူတို့ နှစ်နိုင်ငံအကြား စစ်ရေးပူးပေါင်း ဆောင်ရွက်မှုတွေဟာ ပထဝီနိုင်ငံရေးအရ အမေရိကန်နဲ့ မဟာမိတ်တွေအပေါ် သက်ရောက်မှု ရှိစေခဲ့ပါတယ်"ဟု Center for a New American Security မှ ကျွမ်းကျင်သူ ဒူယွမ် ကင်မ် (Duyeon Kim)က ပြောသည်။

ပါမောက္ခတစ်ဦးဖြစ်သူ လိဖ် အဲရစ် အက်စလေကို တွေ့ရစဉ်

ထို့ပြင် ရုရှားသည် အရှေ့မြောက်အာရှတွင် တန်ပြန် ထိုးနှက်နိုင်သည့် အခြေအနေကို ကင်မ်က အမေရိကန်၊ တောင်ကိုရီးယားနှင့် ဂျပန်တို့အား အချက်ပြရာ ရောက်ခဲ့သည်ဟုလည်း ၎င်းက ဆိုသည်။ 

ရုရှားနှင့် မြောက်ကိုရီးယားသည် ၎င်းတို့နှစ်နိုင်ငံအကြား လက်နက်များ ထောက်ပံ့ရန် စီစဉ်နေသည်ဆိုသည့် အမေရိကန်၏ စွပ်စွဲချက်များကို ငြင်းဆိုခဲ့သော်လည်း ပူတင်နှင့်ကင်မ်သည် ကာကွယ်ရေး ပူးပေါင်းဆောင်ရွက်မှု များကို မြှင့်တင်မည်ဟု ကတိပြုခဲ့သည်။

ထို့ပြင် မြောက်ကိုရီးယား၏ ဂြိုဟ်တု တည်ဆောက်ရေး အစီအစဉ်ကို ရုရှား ကူညီပေးသွားမည်ဟုလည်း ပူတင်က ပြောသည်။

"ပူတင်နဲ့ ကင်မ်တို့ရဲ့ သံတမန်ဆက်ဆံရေး အခြေအနေဟာ အမေရိကန်ဦးဆောင်တဲ့ နိုင်ငံတကာ အခင်းအကျင်း ကို စိန်ခေါ်ရာမှာ အောင်မြင်မှု ရှိတယ်ဆိုတာကို ပြသရာရောက်ပြီး တရုတ်အပေါ် အလွန်အကျူး မှီခိုမှုကို ရှောင်လွှဲ နိုင်တယ်ဆိုတဲ့ အချက်ကိုလည်း ပြသရာရောက်ခဲ့ပါတယ်"ဟု တောင်ကိုရီးယားနိုင်ငံ ဆိုးလ် (Seoul) မြို့တော်ရှိ ယူဝါတက္ကသိုလ်(Ewha University)မှ ပါမောက္ခတစ်ဦးဖြစ်သူ လိဖ် အဲရစ် အက်စလေ (Leif-Eric Easley) က ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ စက်တင်ဘာ ၁၅

အမေရိကန်စစ်တပ်သည် နိုက်ဂျာတွင် စစ်ဆင်ရေးများကို ပြန်လည်စတင်ခဲ့ပြီး နိုင်ငံအတွင်းရှိ စစ်စခန်းမှ ဒရုန်း ပျံသန်းမှုများနှင့် အခြားလေယာဉ်ပျံသန်းမှုများအား လုပ်ဆောင်ခဲ့ကြောင်း အမေရိကန်၏ ဥရောပနှင့် အာဖရိက လေတပ်များ (Air Forces in Europe and Air Forces in Africa)၏ အကြီးအကဲက ပြောကြားခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

နိုက်ဂျာတွင် ဇူလိုင်လက သမ္မတ မိုဟာမက် ဘာဇုမ်း (Mohamed Bazoum) ကို ဖြုတ်ချခဲ့သည့် အာဏာသိမ်းမှု ဖြစ်ပွားပြီးချိန်ကတည်းက နိုက်ဂျာနိုင်ငံအတွင်း ဖြန့်ကြက်ထားသော အမေရိကန်စစ်သား ၁၁၀၀ ခန့်သည် ၎င်းတို့ ၏ စစ်စခန်းများအတွင်းမှာပင် နေထိုင်ခဲ့ကြသည်။

နိုက်ဂျာ၏ စစ်ခေါင်းဆောင်များနှင့် ဆွေးနွေးညှိနှိုင်းမှုများ ပြုလုပ်ခဲ့ပြီးနောက် ထောက်လှမ်းရေးနှင့် ကင်းထောက် မစ်ရှင်အချို့ကို ပြန်လည် စတင်ခဲ့ခြင်း ဖြစ်သည်ဟု ဗိုလ်ချုပ်ကြီး ဂျိမ်းစ်ဟက်ကာ (James Hecker)က စက်တင် ဘာ ၁၃ ရက်တွင် ပြောသည်။

"အခုမတိုင်ခင် အချိန်အထိ စစ်စခန်းတွေမှာ ဘယ်လိုမစ်ရှင်မျိုးကိုမှ မပြုလုပ်ခဲ့ပါဘူး။ လေယာဉ်ကွင်းတွေကို လည်း ပိတ်ထားခဲ့တာ ဖြစ်တယ်" ဟု ဗိုလ်ချုပ်ကြီး ဂျိမ်းစ်ဟက်ကာက နှစ်စဉ်ကျင်းပနေကျ လေကြောင်းနှင့် အာကာသတပ်ဖွဲ့များ အသင်း (Air and Space Forces Association) ညီလာခံတွင် သတင်းထောက်များကို ပြောကြားခဲ့သည်။

အမေရိကန် စစ်သားများကိုတွေ့ရစဉ်

မိမိတို့အနေနှင့် သံတမန်ရေးရာ ဆွေးနွေးမှုများ ပြုလုပ်နေပြီး ယခင်က လုပ်ဆောင်ခဲ့သည့် မစ်ရှင်များကဲ့သို့ ၁၀၀ ရာခိုင်နှုန်း အပြည့်အဝ မလုပ်ဆောင်နိုင်သည့်တိုင် မစ်ရှင်အများအပြားကို လုပ်ဆောင်မည်ဖြစ်ကြောင်း ဗိုလ်ချုပ်ကြီးဂျိမ်းစ်ဟက်ကာက ပြောသည်။

အမေရိကန်သည် မကြာသေးမီ သီတင်းပတ်များအတွင်း မောင်းသူမဲ့ လေယာဉ်များနှင့် လေယာဉ်အမှုထမ်းများ လိုက်ပါသည့် လေယာဉ်ပျံသန်းမှု မစ်ရှင်များကို ပြန်လည်စတင်ခဲ့သည်ဟု ၎င်းက ပြောသည်။

အမေရိကန်တပ်ဖွဲ့များသည် နိုက်ဂျာ၏မြို့တော် နီယာမေ (Niamey)အနီးရှိ အမှတ် ၁၀၁ လေတပ်စခန်းမှ (Air Base 101) အဂါဒက်ဇ် (Agadez) မြို့ရှိ အမှတ် ၂၀၁ လေတပ်စခန်း (Air Base 201) သို့ ပြောင်းရွှေ့ခဲ့ကြောင်း ပြီးခဲ့သည့်် သီတင်းပတ်တွင် အမေရိကန်ကာကွယ်ရေးဝန်ကြီးဌာနက ထုတ်ပြန်ခဲ့သည်။

အဂါဒက်ဇ်မြို့သည် နီယာမေမြို့တော်၏ အရှေ့မြောက်ဘက် ကီလိုမီတာ ၉၂၀ (မိုင် ၅၇၀) အကွာတွင် တည်ရှိသည်။

Source: အယ်လ်ဂျာဇီးယား

CNI News

၂၀၂၃ ခုနှစ်၊ စက်တင်ဘာ ၁၄

(၂၀)ကြိမ်မြောက် အာဆီယံလေတပ် ဦးစီးချုပ်များ အစည်းအဝေးကို မြန်မာနိုင်ငံက အိမ်ရှင်အဖြစ် စက်တင်ဘာ ၁၃ ရက်နေ့က နေပြည်တော်မှာ ကျင်းပခဲ့သည်။

အဆိုပါ အစည်းအဝေးကို ကာကွယ်ရေးဦးစီးချုပ်(လေ) ဗိုလ်ချုပ်ကြီး ထွန်းအောင်က ဦးဆောင်၍ ကျင်းပခြင်း ဖြစ်ပြီး ဘရူးနိုင်း၊ ကမ္ဘောဒီးယား၊ လာအို၊ ထိုင်း၊ ဗီယက်နမ် နိုင်ငံတို့မှ ကာကွယ်ရေးဦးစီးချုပ်(လေ)တို့ တက် ရောက်ခဲ့သည်။

သို့သော် စင်္ကာပူ၊ ဖိလစ်ပိုင်၊ မလေးရှား၊ အင်ဒိုနီးရှားမှ ကာကွယ်ရေးဦးစီးချုပ်(လေ)တို့ တက်ရောက်ခဲ့ခြင်း မရှိ ကြောင်း၊ ဖိလစ်ပိုင်နှင့် စင်္ကာပူ လေတပ်ဦးစီးချုပ်များကတော့ Video Message ပေးပို့၍ ပါဝင် ဆွေးနွေးခဲ့ ကြောင်း သိရသည်။

CNI International News

ဟနွိုင်း၊ စက်တင်ဘာ ၁၄ 

ဗီယက်နမ်နှင့် ဆက်ဆံရေးများ တိုးမြှင့်သည့် အမေရိကန်၏ လုပ်ဆောင်ချက်သည် တရုတ်ကို ဆန့်ကျင်သည့် စစ်အေးတစ်ခု မဟုတ်ကြောင်း အမေရိကန် အမျိုးသားလုံခြုံရေးကောင်စီမှ အရာရှိတစ်ဦးက စက်တင်ဘာ ၁၃ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

"ဒီကိစ္စဟာ စစ်အေး အခြေအနေ တစ်ခုအတွက် မဟုတ်သလို ဗီယက်နမ်နဲ့ တရုတ်အကြား သံတမန်ရေးရာအရ တစ်ဖက်ဖက်ကို ရွေးချယ်ဖို့အတွက်လည်း မဟုတ်ပါဘူး။ အဲဒီလို ယူဆချက်တွေထဲက တစ်ခု မဟုတ် တစ်ခု ဖြစ်လိမ့်မယ်လို့လည်း ကျနော် မထင်ပါဘူး" ဟု အမေရိကန်၏ အင်ဒို-ပစိဖိတ်ဆိုင်ရာ အမျိုးသား လုံခြုံရေး ကောင်စီ၏ ညွှန်ကြားရေးမှူး မစ္စစီရာရက်ပ်ဟော့ပါ (Mria Rapp-Hooper) က ပြောသည်။

စက်တင်ဘာ ၁၀ ရက်က အမေရိကန်သမ္မတ ဂျိုးဘိုင်ဒန် (Joe Biden) ၏ ဗီယက်နမ်ခရီးစဉ်အတွင်း အမေရိကန်-ဗီယက်နမ် ဆက်ဆံရေးကို သံတမန်ရေးအရ အမြင့်ဆုံး အနေအထားအထိ တိုးမြှင့်ခဲ့သည်။

စက်တင်ဘာ ၁၁ ရက်တွင်မူ တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မောင်နင်း (Mao Nign)က အမေရိကန်-ဗီယက်နမ် ဆက်ဆံရေး မြှင့်တင်မှုကို တုံ့ပြန်ခဲ့ရာတွင် အမေရိကန်အနေဖြင့် စစ်အေးကာလက အတွေးအမြင်များနှင့် သြဇာလွှမ်းမိုးရေးကို စွန့်လွှတ်ရန် ပြောကြားခဲ့သည်။

အမေရိကန်နဲ့ တရုတ် ခေါင်းဆောင်ကို တွေ့ရစဉ်

"အမေရိကန်အနေနဲ့ အာရှနိုင်ငံတွေနဲ့ ဆက်ဆံရာမှာ နိုင်ငံတကာ ဆက်ဆံရေးရဲ့ အခြေခံ စံနှုန်းတွေနဲ့အညီ ဒေသတွင်း နိုင်ငံတွေရဲ့ တည်ငြိမ်ရေး၊ ပူးပေါင်းဆောင်ရွက်ရေး၊ ဖွံ့ဖြိုးတိုးတက်ရေးကို လေးစားလိုက်နာဖို့ ကျမတို့ တိုက်တွန်းလိုပါတယ်"ဟု မစ္စနင်းက ပြောကြားခဲ့သည်။

အမေရိကန်၏ အင်ဒို-ပစိဖိတ်ဆိုင်ရာ အမျိုးသား လုံခြုံရေးကောင်စီ၏ ညွှန်ကြားရေးမှူး မစ္စမီရာရက်ပ်ဟော့ပါက ဗီယက်နမ်နှင့် ဆက်ဆံရေး မြှင့်တင်ခြင်းသည် အရှိန်အဟုန်ကောင်းပြီး ပွင့်လင်းမှုရှိကာ ဘက်စုံပါဝင်သည့် မိတ်ဖက် ဆက်ဆံရေးဖြစ်ကြောင်း၊ ဗီယက်နမ်ကို နည်းပညာ၊ စီးပွားရေးနှင့် ဖွံ့ဖြိုးတိုးတက်ရေများအတွက် ကူညီ ထောက်ပံ့ပေးရန် ရည်ရွယ်ကြောင်း ပြောကြားခဲ့သည်။

"ဒီဆက်ဆံရေးက ဘယ်သူ့အတွက်မှ မဟုတ်ပါဘူး။ ကျမတို့ နှစ်နိုင်ငံကြားက ဆက်ဆံရေးအတွက် ဖြစ်ပါတယ်။ လွတ်လပ်ပွင့်လင်းတဲ့ တောင်တရုတ်ပင်လယ်မှာ၊ လွတ်လပ် ပွင့်လင်းတဲ့ အင်ဒို-ပစိဖိတ်ဒေသမှာ ကျမတို့ရဲ့ ဘုံ အကျိုးစီးပွားတွေ၊ လုံခြုံရေးနဲ့ ချမ်းသာကြွယ်ဝရေးတွေအတွက် သဘောတရားအရ တန်ဖိုးကြီးမားတဲ့ တန်ဖိုး တစ်ခု ဖြစ်ပါတယ်"ဟု ဟော့ပါက ပြောကြားခဲ့သည်။

အမေရိကန်နှင့် တရုတ်သည် ဗီယက်နမ်၏ အကြီးမားဆုံး ကုန်သွယ်ဖက် နိုင်ငံများ ဖြစ်သည်။

ဗီယက်နမ်နှင့် တရုတ်သည် သဘာဝ သယံဇာတ ပေါကြွယ်ဝသည့် တောင်တရုတ်ပင်လယ်တွင် နယ်မြေ ပိုင်ဆိုင်မှုနှင့်ပတ်သက်ပြီး နှစ်ပေါင်းများစွာကြာ အငြင်းပွားခဲ့သည်။

Source: ရိုက်တာ

CNI International News

ကိယက်ဗ်၊ စက်တင်ဘာ ၁၄

ရုရှားက သိမ်းပိုက်ထားသည့် ခရိုင်းမီးယားဒေသရှိ စီဗက်စ်တိုပိုးလ် (Sevastopol) မြို့ရှိ သင်္ဘောကျင်းတစ်ခုကို ယူကရိန်းက ဒုံးကျည်ဖြင့် တိုက်ခိုက်ခဲ့ပြီးနောက် ရုရှားစစ်သင်္ဘောနှစ်စင်း မီးလောင်ခဲ့ပြီး လူ ၂၄ ဦးထက်မနည်း ဒဏ်ရာရခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ယူကရိန်းသည် စက်တင်ဘာ ၁၃ ရက် နံနက်အစောပိုင်းက ဒုံးကျည်များဖြင့် တိုက်ခိုက်ခဲ့သည်။

အဆိုပါ တိုက်ခိုက်မှုကို ရုရှားလေကြောင်း ကာကွယ်ရေးအဖွဲ့မှ ကြားဖြတ်ပစ်ချရန် ကြိုးပမ်းခဲ့ကြောင်း စီဗက်စ်တိုပိုးလ်မြို့ရှိ ရုရှားက ခန့်အပ်ထားသည့်် အုပ်ချုပ်ရေးမှူး မီဟိုင်း ရက်ဇ်ဗိုဇာယက်ဗ်(Mikhail Razvozhayev )က Telegram လူမှုမီဒီယာတွင် ရေးသားခဲ့သည်။

ပင်လယ်အတွင်းရှိ ရုရှားသင်္ဘောများသည်လည်း ယူကရိန်း မောင်းသူမဲ့ ရေယာဉ်များ၏ တိုက်ခိုက်မှုကို တွန်းလှန်နိုင်ခဲ့သည်ဟု ၎င်းက ဆိုသည်။

အုပ်ချုပ်ရေးမှူး မီဟိုင်း ရက်ဇ်ဗိုဇာယက်ဗ်ကို တွေ့ရစဉ်

ယူကရိန်းတပ်ဖွဲ့များသည် ပင်လယ်နက်အတွင်းရှိ ရုရှားစစ်သင်္ဘောများကို မောင်းသူမဲ့ ရေယာဉ် ၃ စင်းဖြင့် တိုက်ခိုက်ခဲ့ပြီး သင်္ဘောကျင်းအား ခရုဇ်ဒုံးကျည် ၁၀ စင်းဖြင့် တိုက်ခိုက်ခဲ့သည်ဟု ရုရှားကာကွယ်ရေးဝန်ကြီး ဌာန(Russia’s Ministry of Defence)က ပြောကြားခဲ့သည်။

ယူကရိန်း၏ ဒုံးကျည် ၇ စင်းကို ပစ်ချနိုင်ခဲ့ပြီး မောင်းသူမဲ့ ရေယာဉ်များအား ဖျက်ဆီးနိုင်ခဲ့သော်လည်း အချို့ ဒုံးကျည်များသည် သင်္ဘောနှစ်စင်းကို ထိခိုက်ပျက်စီးစေခဲ့သည်။

အဆိုပါ သင်္ဘောများကို စီဗက်စ်တိုပိုးလ် သင်္ဘောကျင်းတွင် ပြုပြင်နေကြောင်း ရုရှားကာကွယ်ရေးဝန်ကြီးဌာနက ထုတ်ပြန်ခဲ့သည်။

စီဗက်စ်တိုပိုးလ်မြို့သည် ရုရုား၏ ပင်လက်နက် စစ်သင်္ဘောအုပ်စု အခြေချသည့် ခရိုင်းမီးယားဒေသမှ အကြီးဆုံး မြို့ဖြစ်သည်။ 

ယူကရိန်း၏ Kyiv Independent သတင်းဌာနကမူ အဆိုပါ တိုက်ခိုက်မှုသည် ဒေသစံတော်ချိန် နံနက် ၃ နာရီခန့် တွင် ဖြစ်ပွားခဲ့သည်ဟု ဖော်ပြခဲ့သည်။ 

Sevastopol မြို့တိုက်ခိုက်ခံရမှုကိုတွေ့ရစဉ်

ယူကရိန်းအရာရှိများကလည်း ခရိုင်းမီးယားဒေသကို ရုရှားထံမှ ပြန်လည်သိမ်းယူမည်ဟု ကတိပြုခဲ့ပြီး မကြာသေး မီ သီတင်းပတ်များအတွင်း ခရိုင်းမီးယားကျွန်းဆွယ်အား လေကြောင်းနှင့် ရေကြောင်း တိုက်ခိုက်မှုများကို အရှိန် မြှင့်တင်ခဲ့ကြောင်း ပြောကြားခဲ့သည်။

စက်တင်ဘာ ၁၃ ရက် နံနက်ခင်းမှာပင် ယူကရိန်း၏ အိုဒက်ဆာ (Odesa)ဒေသရှိ ဒန်နူဘီ (Danube)မြစ် အဇ်မေးလ်(Izmail)ဆိပ်ကမ်းတွင် ရုရှား၏ ဒရုန်းတိုက်ခိုက်မှုကြောင့် မီးလောင်ကျွမ်းမှု ဖြစ်ပွားခဲ့ကာ အရပ်သား များ ဒဏ်ရာရခဲ့သည်ဟု ဒေသအုပ်ချုပ်ရေမှူးက ပြောသည်။

ယူကရိန်းစစ်တပ်ကလည်း ရုရှား၏ ဒရုန်း ၃၂ စင်းကို ပစ်ချနိုင်ခဲ့ကြောင်း ထုတ်ပြန်ခဲ့သည်။

ရိုမေးနီးယားနိုင်ငံနှင့် နယ်စပ်ချင်း ထိစပ်နေသည့် ယူကရိန်း၏ ဒန်နူဘီမြစ်တွင် ဆောက်လုပ်ထားသော ဆိပ်ကမ်း များသည် ယူကရိန်း၏ စိုက်ပျိုးရေး ထွက်ကုန်များ တင်ပို့ရောင်းချရေးအတွက် အဓိကကျသည့် ဆိပ်ကမ်းများ ဖြစ်သည်။

Source: အယ်လ်ဂျာဇီးယား

CNI International News

ဆိုးလ်၊ စက်တင်ဘာ ၁၄

တောင်ကိုရီးယားသမ္မတ ယွန်းဆော့ရွဲ(Yoon Suk Yeol) သည် အာဏာရပါတီ၏ လွှတ်တော်အမတ်တစ်ဦးလည်း ဖြစ် အငြိမ်းစား ဗိုလ်ချုပ်ကြီးလည်းဖြစ်သူ ရှင်းဝမ်ဆစ်(Shin Won-sik)ကို ကာကွယ်ရေးဝန်ကြီးအဖြစ် အမည် စာရင်းတင်သွင်းခဲ့သည်ဟု စက်တင်ဘာ ၁၃ ရက်တွင် သမ္မတရုံးမှ ထုတ်ပြန်ခဲ့ကြောင်း ရိုက်တာမှ ဖော်ပြခဲ့သည်။

မြောက်ကိုရီးယား၏ ဒုံးကျည်စမ်းသပ် ပစ်လွှတ်မှုများနှင့် မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် ရုရှားသမ္မတ ဗလာဒီမာပူတင် (Vladimir Putin)နှင့် အစည်းအဝေး ပြုလုပ်ခဲ့သည့် အချိန်တွင် တောင်ကိုရီးယား ကာကွယ်ရေးဝန်ကြီးနေရာကို အပြောင်းအလဲ ပြုလုပ်သည့် သတင်း ထွက်ပေါ်လာခဲ့ခြင်း ဖြစ် သည်။

ကာကွယ်ရေးဝန်ကြီးအသစ် ဖြစ်လာမည့် အငြိမ်းစား ဗိုလ်ချုပ်ကြီး ရှင်းဝမ်ဆစ်ကို တွေ့ရစဉ်

"ရှင်းဟာ မြောက်ကိုရီးယားရဲ့ မြင့်တက်နေတဲ့ နျူကလီးယားနဲ့ ဒုံးကျည်ခြိမ်းခြောက်မှုတွေကို ဆန့်ကျင်တဲ့ ကျနော် တို့ရဲ့ လုံခြုံရေး စွမ်းဆောင်ရည်ကို တည်ထောင်ဖို့အတွက် ကာကွယ်ရေး မူဝါဒအရရော၊ မဟာဗျူဟာအရပါ မှန်ကန်တဲ့ လူပုဂ္ဂိုလ်တစ်ဦး ဖြစ်ပါတယ်"ဟု တောင်ကိုရီးယား သမ္မတရုံး၏ ဝန်ထမ်းအကြီးအကဲ ကင်မ်ဒေးကီ (Kin Dae-ki)က သတင်းထောက်များကို ပြောကြားခဲ့သည်။

ပြည်သူ့အာဏာပါတီ (People Power Party) ဝင် တစ်ဦးဖြစ်သူ ရှင်းက သူသည် ကြီးမားသည့် လုံခြုံရေး စိန်ခေါ်မှုများကို ရင်ဆိုင်ရာတွင် ပြည်သူများ ငြိမ်းချမ်းစွာ နေထိုင်နိုင်စေရန် အကောင်းဆုံး ကြိုးစား လုပ်ဆောင် သွားမည်ဟု ပြောကြားခဲ့သည်။

ယွန်းသည် ယဉ်ကျေးမှုနှင့် လိင်ပိုင်းဆိုင်ရာ သာတူညီမျှရေး ဝန်ကြီးများကိုလည်း ပြောင်းလဲခန့်အပ်ခဲ့ပြီး အဆိုပါ ပြောင်းလဲခန့်အပ်မှုများကို လွှတ်တော်ကြားနာ စစ်ဆေးမှုတွင် အတည်ပြုမည် ဖြစ်သည်။

Source: ရိုက်တာ

CNI International News

ဝါရှင်တန်၊ စက်တင်ဘာ ၁၃

အမေရိကန်သမ္မတ ဂျိုးဘိုင်ဒန် (Joe Biden) အစိုးရသည် အီရန်တွင် ဖမ်းဆီးထိန်းသိမ်း ခံထားရသည့် အမေရိကန် နိုင်ငံသား ၅ ဦးကို ပြန်လည်လွတ်မြောက်စေရန်အတွက် နိုင်ငံတကာဘဏ်များတွင် ထုတ်ယူခွင့် ပိတ်ပင်ထား သော ဒေါ်လာ ၆ ဘီလျံတန်ဖိုးရှိသည့် ပိုင်ဆိုင်မှုများကို အီရန်အား လွှဲပြောင်းခွင့်ပြုကြောင်း ကြေညာချက် ထုတ်ပြန်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ပိတ်ဆို့မှုများကြောင့် တောင်ကိုရီးယားနိုင်ငံမှ ကာတာအထိ နိုင်ငံတကာဘဏ်များတွင် ထုတ်ယူခွင့် ပိတ်ပင်ခံထား ရသည့် အီရန်၏ ငွေကြေးများကို အီရန်သို့ လွှဲပြောင်းခွင့် ပြုလိုက်ခြင်းဖြစ်သည်။

ထို့ပြင် သဘောတူညီချက်၏ တစ်စိတ်တစ်ပိုင်းအနေနှင့် အမေရိကန်တွင် ဖမ်းဆီးခံထားရသည့် အီရန် နိုင်ငံသား ၅ ဦးကိုလည်း ပြန်လွှတ်ပေးရန် အမေရိကန်အစိုးရက သဘောတူခဲ့သည်။

အမေရိကန်နဲ့ အီရန် အလံကို တွေ့ရစဉ်

အမေရိကန်နှင့် အီရန်အကြား ဖမ်းဆီးခံထားရသည့် နှစ်နိုင်ငံပြည်သူများ ပြန်လည်လွတ်မြောက်စေရေးအတွက် နှစ်နိုင်ငံအရာရှိများအကြား သဘောတူညီချက်တစ်ခုကို လက်မှတ်ရေးထိုးခဲ့ပြီးနောက် တစ်လအကြာ ပြီးခဲ့သည့် သီတင်းပတ်တွင် အမေရိကန်နိုင်ငံခြားရေးဝန်ကြီး အန်တိုနီဘလင်ကင် (Antony Blinken)က အီရန်အပေါ် ချမှတ် ထားသော ပိတ်ဆို့မှုများကို လျှော့ပေါ့ပေးရန် သဘောတူညီချက်တွင် လက်မှတ်ရေးထိုးခဲ့သည်။

ထိုအကြောင်းအရာနှင့် ပတ်သက်ပြီး အစိုးရအဖွဲ့က လွှတ်တော်ကို စက်တင်ဘာ ၁၁ ရက် မတိုင်မီအထိ အသိပေးခဲ့ ခြင်း မရှိကြောင်း အေပီမှ ဖော်ပြခဲ့သည်။

ပိတ်ဆို့မှုများ လျှော့ပေါ့ရေးနှင့် သဘောတူညီချက်၏ မူကြမ်းကို ယခင်က ကြေညာခဲ့ပြီး ဖြစ်သော်လည်း အီရန် အကျဉ်းသား ၅ ဦးကို ပြန်လွှတ်ပေးမည့် သဘောတူညီချက်အား အမေရိကန်အစိုးရက စက်တင်ဘာ ၁၁ ရက်တွင် ပထမဆုံးအကြိမ် ကြေညာခဲ့ခြင်း ဖြစ်သည်။

အီရန်အပေါ် ချမှတ်ထားသည့် ပိတ်ဆို့မှုများ လျှော့ပေါ့ရေးကို ရီပတ်ဘလစ်ကန်များက ဝေဖန်ခဲ့ကြပြီး အရှေ့ အလယ်ပိုင်းတွင် အမေရိကန်စစ်သားများနှင့် မဟာမိတ်များအပေါ် အီရန်က ခြိမ်းခြောက်မှုများ တိုးမြှင့်နေချိန်၌ ထိုသဘောတူညီချက်သည် အီရန်၏ စီးပွားရေးအား မြင့်တက်စေလိမ့်မည်ဟုလည်း လေ့လာသူများက ပြောကြားခဲ့ သည်။

အီရန်အလံနဲ့ ဒုံးကျည်တစ်စင်းကိုတွေ့ရစဉ်

အိုင်အိုဝါ (Iowa) ပြည်နယ်မှ အမေရိကန် အထက်လွှတ်တော်အမတ် ချက် ဂရက်စ်လေ (Chuck Grassley) ကမူ အီရန်တွင် ဖမ်းဆီးခံထားရသည့် အမေရိကန်နိုင်ငံသားများ ပြန်လည်လွတ်မြောက်ရေးအတွက် ဒေါ်လာ ၆ ဘီလျံ ပေးဆောင်ရန် ခြိမ်းခြောက်ငွေညှစ် ခံရခြင်းသည် အဓိပ္ပာယ်မရှိကြောင်း Twitter ဟု လူသိများခဲ့သည့် X လူမှု မီဒီယာတွင် ရေးသားခဲ့သည်။

အာကန်ဆပ် (Arkansas) ပြည်နယ်မှ အထက်လွှတ်တော်အမတ် တွမ် ကော်တွန် (Tom Cotton) ကလည်း ဘိုင်ဒန်သည် ကမ္ဘာ့အဆိုးရွားဆုံး အကြမ်းဖက်မှုကို ထောက်ခံ အားပေးသည့် အီရန်ကို ပြန်ပေးရွေးငွေများ ပေးဆောင်နေသည်ဟု စွပ်စွဲခဲ့သည်။

Source: အယ်လ်ဂျာဇီးယား

CNI International News

ဘန်ကောက်၊ စက်တင်ဘာ ၁၃

ထိုင်းနိုင်ငံတစ်ဝန်းတွင် မာဖီးယားပုံစံ ဒုစရိုက်ဂိုဏ်းများနှင့် ဒေသန္တရ အုပ်ချုပ်ရေး အဖွဲ့များအပေါ် ၎င်းတို့၏ လွှမ်းမိုးမှုကို တိုက်ဖျက်ရန် အားထုတ်ကြိုးပမ်းမှုအသစ်၌ ၎င်း၏ လက်ထောက်ဖြစ်သူ ချာဒါ ထိုင်းဆက် (Chada Thaiset) ၏ စွမ်းဆောင်ရည်ကို ယုံကြည်ကြောင်း ထိုင်းပြည်ထဲရေးဝန်ကြီးလည်းဖြစ် ဒုတိဝန်ကြီးချုပ်လည်း ဖြစ်သည့် အနူတင် ချန်ဗီရာကူလ် (Anutin Charnvirakul) က စက်တင်ဘာ ၁၁ ရက်တွင် ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ပြီးခဲ့သည့် သီတင်းပတ်က အနူတင်သည် ထိုင်းနိုင်ငံတစ်ဝန်းရှိ မာဖီးယားပုံစံ ဒုစရိုက်ဂိုဏ်းများနှင့် ဆက်နွှယ်မှုရှိ သည့် သြဇာကြီးမားသည့် ဒေသန္တရ ခေါင်းဆောင်များကို လေ့လာဆန်းစစ်ရန် အပြင် ဒုစရိုက်ဂိုဏ်းများနှင့် ဆက်နွှယ်သူများအား အမည်ပျက်စာရင်းသွင်းရန် ချာဒါကို တာဝန်ပေးအပ်ခဲ့သည်။

စက်တင်ဘာ ၆ ရက်က မအွန် (Muang) ခရိုင် နာခွန်း ပက်သွမ် (Nakhon Pathom) မြို့တွင် သြဇာကြီးမားသည့် ဒေသခံခေါင်းဆောင်၏ နေအိမ်၌ ပြုလုပ်သည့် ညစာစားပွဲ ပါတီတစ်ခုမှာ ပစ်ခတ်မှု ဖြစ်ပွားခဲ့ပြီးနောက် ယာဉ် ထိန်း ရဲတစ်ဦး သေဆုံးခဲ့ကာ အခြားသူတစ်ဦး ဒဏ်ရာရခဲ့သည့် ဖြစ်စဉ်ကို တုံ့ပြန်သည့်အနေဖြင့် အနူတင်က ချာဒါကို တာဝန်ပေးအပ်ခဲ့ခြင်း ဖြစ်သည်။

အထက်လွှတ်တော်အမတ် ပရာဆစ် ပက်သွမ်မာရက်ကို တွေ့ရစဉ်

ထိုပစ်ခတ်မှုဖြစ်စဉ်ကြောင့် ပြည်သူ့ဝန်ထမ်းများအကြား အဂတိလိုက်စားမှုနှင့်ပတ်သက်ပြီး ငြင်းခုံမှုများ ပေါ်ပေါက်လာခဲ့သည်။

အစိုးရအဖွဲ့၏ မူဝါဒ ကြေညာချက်နှင့်ပတ်သက်ပြီး စက်တင်ဘာ ၁၁ ရက်က ပြုလုပ်ခဲ့သည့် လွှတ်တော်တွင်း အချေအတင် ဆွေးနွေးမှုတွင် အထက်လွှတ်တော်အမတ် ပရာဆစ် ပက်သွမ်မာရက် (Prasit Pathummarak) က တရားမဝင် မူးယစ်ဆေးဝါးများကို မှောင်ခိုကူးနိုင်စွမ်းရှိသည့် သြဇာကြီးမားသည့် လူပုဂ္ဂိုလ်များနှင့် မာဖီးယားပုံစံ ဒုစရိုက်ဂိုဏ်းများကို နှိမ်နင်းမည့် အစိုးရအဖွဲ့သစ်၏ ကတိကဝတ်များအတွက် ကျေးဇူးတင်ကြောင်း ပြောကြား ခဲ့သည်။

ထိုင်းနိုင်ငံ၏ အကျင့်ပျက် ခြစားမှုတိုက်ဖျက်ရေး အဖွဲ့ (ACT) ကလည်း အစိုးရအရာရှိများအကြား အကျင့်ပျက် ခြစားမှုများကို တိုက်ဖျက်မည်ဟု ပြောကြားခဲ့သည့် အစိုးရအဖွဲ့၏ ကတိစကားများအတိုင်း အကောင်အထည် ဖော်လုပ်ဆောင်ရန် တိုက်တွန်းခဲ့သည်။

ဝန်ကြီးချုပ် ဆရီသာ သာဗီဆင်ကို တွေ့ရစဉ်

နာခွန်းပက်သွမ်မြို့တွင် ဖြစ်ပွားခဲ့သည့် ဖြစ်စဉ်သည် အစိုးရ၏ အုပ်ချုပ်ရေးစနစ်အတွင်း အကျင့်ပျက်ခြစားမှုများ ပြည့်နှက်နေပြီး ကောင်းမွန်သည့် အစိုးရဖြစ်စေရန် လုပ်ဆောင်မှု အပိုင်းတွင် အားနည်းနေသည်ကို ပြသရာရောက်သည့် ဥပမာတစ်ခုဖြစ်သည်ဟု ACT က ပြောကြားခဲ့သည်။ 

ထို့ပြင် ဝန်ကြီးချုပ် ဆရီသာ သာဗီဆင် (Srettha Thavisin) အနေနှင့် အကျင့်ပျက်ခြစားမှုများကို တိုက်ဖျက် မည်ဟု ပြောကြားခဲ့သည့် ကတိစကားများကို ဂုဏ်သိက္ခာရှိစွာဖြင့် အကောင်အထည် ဖော်လုပ်ဆောင်ရန် ACT က တိုက်တွန်းခဲ့သည်။

ဝန်ကြီးချုပ် ဆရီသာကလည်း ၎င်း၏ အစိုးရအဖွဲ့ လက်ထက်တွင် အကျင့်ပျက်ခြစားမှုများကို တိုက်ဖျက်မည်ဟု ကတိပြုခဲ့သည်။

Source: ဘန်ကောက်ပို့စ်