- By CNI
- Category: နိုင်ငံရေး
- Hits: 744
CNI International News
တူးနစ်၊ ဒီဇင်ဘာ ၁၉
တူနီးရှားသမ္မတ ကိုင်ဆာအစ် (Kais Saied)ကို ရွေးကောက်ပွဲ အကျပ်အတည်းဖြစ်ပြီးနောက် ရာထူးမှ နှုတ်ထွက် ပေးရန် အတိုက်အခံများက တနင်္ဂနွေနေ့ (ဒီဇင်ဘာ ၁၈ ရက်)တွင် တောင်းဆိုခဲ့သည်ဟု အေပီမှ ရေးသားဖော်ပြ ထားသည်။
မဲပေးနိုင်သူများမှ ၉ ရာခိုင်နှုန်းခန့်ကသာ ပါဝင်မဲပေးခဲ့သော မအောင်မြင်ခဲ့သည့် ရွေးကောက်ပွဲအပြီး နောက်ပိုင်း တွင် ထိုသို့ တောင်းဆိုခဲ့ခြင်း ဖြစ်သည်။
ထိုသို့ မဲဆန္ဒရှင်များက ပူးပေါင်းဆန္ဒပြခြင်းသည် ဆယ်စုနှစ် တစ်ခုအကြာက အာရပ်နွေဦးတော်လှန်ရေး စတင် သန္ဓေတည်ခဲ့ရာနှင့် ထိုတော်လှန်ရေးမှတစ်ဆင့် ဒီမိုကရက်တစ် နိုင်ငံရေးစနစ်သို့ ပြောင်းလဲနိုင်ခဲ့သော တူနီးရှား နိုင်ငံအတွက် ရုပ်ရှင်ဆန်ဆန် တိုးတက်ပြောင်းလဲလာမှု ဖြစ်သည်။
စနေနေ့(ဒီဇင်ဘာ ၁၇ ရက်)တွင် ပြုလုပ်ခဲ့သော ရွေးကောက်ပွဲသည် လက်ရှိသမ္မတ ကိုင်ဆာအစ် (Kais Saied) ပြီးခဲ့သော နှစ်တွင် ဖျက်သိမ်းခဲ့သည့် ဥပဒေပြု လွှတ်တော်ကို ပြန်လည် နေရာချရန်နှင့် ပြန်လည် ပုံဖော်ရန် ရည်ရွယ် ခဲ့သည်။
တူနီးရှားရွေးကောက်ပွဲကိုတွေ့ရစဉ် (AP)
ထိုသို့ ဖျက်သိမ်းခဲ့ခြင်းက သမ္မတသည် အာဏာကို ဆွဲဆန့်ထားရန်နှင့် နိုင်ငံ၏သက်တန်းရှည် စီးပွားရေးနှင့် လူမှုရေး အကြပ်အတည်းများကို ဖြေရှင်းရန် သမ္မတဆာအစ်၏ ကြိုးပမ်းမှုများမှ တစ်ခု ဖြစ်သည်။ ရွေးကောက်ပွဲ ရလဒ်များကို လာမည့် နေ့များအတွင်း သိရှိရမည်ဟု ယူဆရသည်။
အဆိုပါ ရွေးကောက်ပွဲကို အတိုက်အခံ အများစုက သပိတ်မှောက် ခဲ့ကြသလို မဲဆန္ဒရှင် အများစုကလည်း ဆန့် ကျင်ခဲ့သည်။ ရွေးကောက်ပွဲကော်မရှင်ဥက္ကဋ္ဌ ဖာရွတ်ဘူအတ်စ်ကား (Farouk Bouaskar) မှ ကြေညာခဲ့သည့် ကိန်းဂဏန်းများအရ စနေနေ့ ရွေးကောက်ပွဲကို မဲပေးနိုင်သူ ခန့်မှန်းခြေ ၉ သန်းမှ ၈၀၀,၀၀၀ ခန့်သာ လာ ရောက် မဲပေးခဲ့သည်ဟု သိရသည်။
ထိုသို့ သိသိသာသာ မဲပေးသူနည်းခဲ့ခြင်းက တုန်လှုပ်စရာ ဖြစ်ရပ်တစ်ခုဖြစ်ပြီး ပြင်းထန်သော အကျိုးဆက်များ ရှိလာမည်ဟု အတိုက်အခံ နိုင်ငံရေးသမား အာမတ် နီဂျစ် ချက်ဘီ (Ahmed Nejib Chebbi) ကပြောသည်။
ချက်ဘီသည် ဖျက်သိမ်းခဲ့သော ဥပဒေပြု လွှတ်တော်တွင် အမတ်နေရာ အများစုကို ရရှိထားသော Ennahdha ပါတီ အပါအဝင် အတိုက်အခံပါတီ ငါးခု ပူးပေါင်းထားရာ Salvation Front ညွန့်ပေါင်းအဖွဲ့၏ ခေါင်းဆောင်လည်း ဖြစ်သည်။
တူနီးရှားနိုင်ငံ သမ္မတကိုင်ဆာအစ်ကို နှုတ်ထွက်ရန် တောင်းဆိုကြစဉ် (Reuters)
ဒီဇင်ဘာ ၁၈ ရက်တွင် ထုတ်ပြန်ခဲ့သော ကြေညာချက်တစ်ခု၌ အမှီအခိုကင်းသော တရားသူကြီးတစ်ဦး ဦးဆောင် သည့် အစောပိုင်း ရွေးကောက်ပွဲဆိုင်ရာ အဖွဲ့အစည်းတစ်ခုကို ဖွဲ့စည်းရန်နှင့် လက်ရှိသမ္မတ ရာထူးမှ နုတ်ထွက်ရန် ၎င်းက တောင်းဆိုသည်။
ရွေးကောက်ပွဲကို သပိတ်မှောက် ခဲ့သည့်အတွက် တူနီးရှားပြည်သူများကို ကျေးဇူးတင်သည်ဟုလည်း တခြား အတိုက်အခံ ခေါင်းဆောင်တစ်ဦးက ပြော၍ ဆာဒစ်ကို ရာထူးမှ နုတ်ထွက်ရန် တောင်းဆိုခဲ့သည်။
တူနီးရှားနိုင်ငံတွင် ၂၀၁၁ အာရပ်နွေဦး တော်လှန်ရေး ပြီးဆုံးချိန် ကတည်းက ပြုလုပ်ခဲ့သော ရွေးကောက် ပွဲများ တွင် ပါဝင်မဲပေးသူ အရေအတွက်မှာ ပျှမ်းမျှ ၄၀ ရာခိုင်နှုန်းရှိခဲ့ပြီး အနိမ့်ဆုံး အရေအတွက် ပင်လျှင် ၂၇ ရာခိုင်နှုန်း ဖြစ်သည်ဟု သိရသည်။
Source: AP
- By CNI
- Category: နိုင်ငံရေး
- Hits: 477
CNI International News
ဘဂ္ဂဒက်၊ ဒီဇင်ဘာ ၁၉
အီရတ်နိုင်ငံမြောက်ပိုင်း ဗုံးပေါက်ကွဲမှုနှင့် သေနတ်ပစ်ခတ်မှုတို့ကြောင့်အနည်းဆုံး ရဲတပ်ဖွဲ့ဝင် ၉ ဦး သေဆုံးခဲ့ သည်ဟု BBC သတင်းတွင်ဖော်ပြသည်။ အဆိုပါတိုက်ခိုက်မှုသည် တနင်္ဂနွေနေ့ မြို့တော်ဘဂ္ဂဒက်နှင့် မိုင် ၁၈၀ အကွာ ရေနံကြွယ်ဝသော ကာကွတ်မြို့ (Kirkuk) မြို့တွင်ဖြစ်ပွားခဲ့ခြင်းဖြစ်သည်။
ယခုတိုက်ခိုက်မှုကို IS အဖွဲ့က ၎င်းတို့ပြုလုပ်ခဲ့ကြောင်း ထုတ်ပြန်သည်။ IS အဖွဲ့သည် အီရတ်စစ်သား ၃ ဦး သေဆုံးခဲ့သည့် ဗုဒ္ဓဟူးနေ့ ဘဂ္ဂမြို့အနီး လမ်းဘေးဗုံးခွဲမှုကိုလည်း ပြုလုပ်ခဲ့သည်ဟု ထုတ်ဖော်ပြောဆိုထားသည်။ တနင်္ဂနွေနေ့တိုက်ခိုက်မှုသည် ချာလယ် အယ်လ်-မာတာ (Chalal al-Matar) ကျေးရွာအနီး ရဲတပ်ဖွဲ့ဝင်များ လိုက်ပါလာသည့် ထရပ်ကားတစ်စီးကို ဗုံးခွဲမှုဖြင့် စတင်ခဲ့ကာ ယင်းနောက်တွင် လက်နက်ငယ်များဖြင့် ပစ်ခတ်မှုဖြစ်ပွားခဲ့သည်ဟု အီရတ်အရာရှိများက AFP သတင်းသို့ပြောသည်။
တိုက်ခိုက်မှုဖြစ်ပွားအပြီး အီရတ်မြို့တွင်း သွားလာသူ ပြည်သူများနှင့် အစောင့်တပ်သားတစ်ဦးကို တွေ့ရစဉ်(ဓါတ်ပုံ-RTE)
ယခုဖြစ်ရပ်တွင် အကြမ်းဖက်သမားတစ်ဦး သေဆုံးခဲ့ကာ ကျန်သူများကို ဆက်လက်ရှာဖွေနေသည်ဟုလည်း ၎င်းတို့က ပြောဆိုခဲ့ကာ တိုက်ခိုက်မှုတွင် ရဲတပ်ဖွဲ့ဝင်နှစ်ဦးပါ ဒဏ်ရာရရှိခဲ့သည်ဟု ဆိုသည်။
ဘဂ္ဂဒက်မြို့ရှိ အီရတ် ပြည်ထဲရေးဌာနကလည်း ယခုတိုက်ခိုက်မှုကို အတည်ပြုပြောဆိုသည်။ ယခုတိုက်ခိုက်မှု ကိုပြုလုပ်ခဲ့သည့် IS အဖွဲ့သည် ယခင်တုန်းက အီရတ်နိုင်ငံအရှေ့ပိုင်းမှ ဆီးရီးယားအနောက်ပိုင်းအထိ နယ်မြေ ဧရိယာ ၈၈၀၀၀ စတုရန်းကီလိုမီတာခန့်ကို သိမ်းပိုက်ခဲ့ကာ လူပေါင်း ၈ သန်းနီးပါးကို တင်းကြပ်သောစည်းမျဉ်း များဖြင့်အုပ်ချုပ်ခဲ့သည်။
၂၀၁၇ ခုနှစ် နိုဝင်ဘာ ၅ ရက်က ကာကွတ်မြို့၌ အသေခံဗုံးခွဲတိုက်ခိုက်မှုဖြစ်ပွားခဲ့သည့်နေရာကို အီရတ် လုံခြုံရေးတပ်ဖွဲ့ဝင်များက စစ်ဆေးခဲ့စဉ်(ဓါတ်ပုံ-AFP)
သို့သော် အီရတ်တပ်ဖွဲ့ဝင်များက IS တို့ ခြေကုပ်ရယူထားသော ဆီးရီးယားနယ်စပ်မှ စစ်သွေးကြွများကို ဖယ်ရှားနိုင်ခဲ့ကာ ၂၀၁၇ ဒီဇင်ဘာတွင် IS အဖွဲ့ကို အောင်နိုင်ခဲ့ပြီဟု ထုတ်ပြန်ကြေညာခဲ့သည်။ ၂၀၁၉ တွင် IS အဖွဲ့ဝင်များသည် ၎င်းတို့နောက်ဆုံးခြေကုပ်စခန်းကို လက်လွှတ်ခဲ့ရသော်လည်း ယင်းတို့သည် ပြင်းထန်သော ခြိမ်းခြောက်မှုအဖြစ်ရှိနေဆဲဟု UN က ဇူလိုင်လတွင်ကြေညာခဲ့သည်။
လက်ရှိအချိန်အထိ ဆီးရီးယားနှင့် အီရတ်တို့တွင် IS တိုက်ခိုက်ရေးသမား ၆၀၀၀ မှ ၁၀၀၀၀ ကြားရှိနေဆဲဟု UN က ခန့်မှန်းထားပြီး အဆိုပါ စစ်သွေးကြွများသည် ဝေးလံခေါင်သီသော ဧရိယာများတွင် အများဆုံးအခြေစိုက်ကာ ပစ်ခတ်ထွက်ပြေးခြင်း၊ ချုံခိုတိုက်ခိုက်ခြင်းနှင့် လမ်းဘေးဗုံးခွဲခြင်းများကို ပြုလုပ်နေကြဆဲဖြစ်သည်။
IS အဖွဲ့သည် သိသာထင်ရှားသည့်ခေါင်းဆောင်မှု ပျောက်ဆုံးသွားခဲ့ပြီဖြစ်သော်လည်း လုံခြုံရေးလစ်ဟာမှုများကို အသုံးချကာ အကြမ်းဖက်ဝါဒကို ဖြန့်ကြက်ရန် လူသစ်စုဆောင်းမှုများနှင့် တိုက်ခိုက်မှုများကို ပြုလုပ်စီစဉ်နိုင်စွမ်း ရှိနေဆဲဖြစ်သည်ဟုလည်း UN ၏ ထုတ်ပြန်ချက်တွင် ဖော်ပြထားသည်။
Source:BBC
- By CNI
- Category: နိုင်ငံရေး
- Hits: 634
CNI International News
ဆိုးလ်၊ ဒီဇင်ဘာ ၁၉
ဂျပန်နိုင်ငံအထိ ရောက်နိုင်သော ပဲ့ထိန်းဒုံးကျည်နှစ်စင်းကို မြောက်ကိုရီးယားက တနင်္ဂနွေနေ့(ဒီဇင်ဘာ ၁၈ ရက်) တွင် ပစ်လွှတ်စမ်းသပ်ခဲ့သည်ဟု အေပီမှ ရေးသားဖော်ပြခဲ့သည်။
အဆိုပါ ဒုံးကျည်ပစ်လွှတ်မှုက မြောက်ကိုရီးယားနှင့် တရုတ်နိုင်ငံတို့အပေါ် ပိုမိုပြင်းထန်သည့် ခြေလှမ်းများ ဆောင်ရွက်နိုင်ရန် တွန်းအားပေးသည့် လုံခြုံရေးမဟာဗျူဟာတစ်ခုကို ဂျပန်နိုင်ငံဘက်က စတင်ခဲ့သည့်အပေါ် တုန့်ပြန်မှုဟုလည်း ယူဆရသည်။
ပစ်လွှတ်ခဲ့သော ဒုံးကျည်နှစ်စင်းသည် နိုင်ငံ၏အနောက်မြောက် တွန်းချန်ရီ (Tongchangri) ဧရိယာမှ ၅၀၀ ကီလိုမီတာသို့ အမြင့်ဆုံး ၅၅၀ ကီလိုမီတာဖြင့် ပျံသန်းသွားခဲ့ကာ ကိုရီးယားကျွန်းဆွယ်နှင့် ဂျပန်တို့အကြား ရေပြင်သို့ ကျရောက်ခဲ့သည်ဟု တောင်ကိုရီးယားနှင့် ဂျပန်အစိုးရတို့က ပြောသည်။
ဂျပန်ဒုတိယကာကွယ်ရေးဝန်းကြီး တိုရှီယို အီနိုကိုတွေ့ရစဉ် (GETTY IMAGES)
ဒုံးကျည် နှစ်စင်းလုံးသည် တာလတ်ပစ် လက်နက်များဖြစ်ပြီး ၎င်းတို့ကို မတ်စောက်သော အနေအထားမှ ပစ်လွှတ်ခဲ့ခြင်း ဖြစ်ကြောင်း၊ စံချိန်စံညွှန်းများနှင့် ကိုက်ညီသည့် လမ်းကြောင်းမှ ပစ်လွှတ်လျှင် ယခုထက်ပို၍ ပျံသန်းသွားနိုင်သည်ဟုလည်း တောင်ကိုရီးယားစစ်ဘက်က ပြောသည်။
မြောက်ကိုရီးယားသည် ပြီးခဲ့သည့် အောက်တိုဘာတွင် ဂျပန်နိုင်ငံဘက်သို့ တာလတ်ပစ် ဒုံးကျည်တစ်စင်း ပစ်လွှတ် ခဲ့ဖူးသော်လည်း ၎င်းတို့၏ ပစ်လွှတ်စမ်းသပ်မှုများ အိမ်နီးချင်နိုင်ငံများသို့ ကျရောက်ခြင်းကို ရှောင် ကျဉ်ရန် တာလတ်နှင့် တာဝေးပစ် ဒုံးကျည်များကို မြင့်သောနေရာများမှ ပစ်လွှတ်လေ့ရှိသည်။
ပြည်သူများ ဆာလောင်နေချိန်နှင့် နိုင်ငံတွင်း အစားအစာ ရှားပါးမှုများ ရှိနေသော်လည်း မြောက်ကိုရီးယားဘက်မှ ယခုကဲ့သို့ ရန်စမှုများကို ဆက်တိုက် ပြုလုပ်နေခြင်းအတွက် ဝမ်းနည်းမိသည်ဟု တောင်ကိုရီးယား အရာရှိများက အရေးပေါ် အစည်းအဝေးတွင် ပြောခဲ့သည်။
မြောက်ကိုရီးယားနဲ့ တောင်ကိုရီးယား အလံများကိုတွေ့ရစဉ် (AP)
ဂျပန်နိုင်ငံအပြင် ဒေသတွင်းနှင့် နိုင်ငံတကာ အသိုက်အဝန်းအပေါ် ခြိမ်းခြောက်နေသည့် မြောက်ကိုရီးယား၏ လုပ်ရပ်ကို ဂျပန်ဒုတိယကာကွယ်ရေးဝန်းကြီး တိုရှီယို အီနို (Toshiro Ino) ကလည်း ဝေဖန်ခဲ့သည်။
အဆိုပါ စမ်းသပ်မှုများသည် မြောက်ကိုရီးယား၏ ဖျက်ဆီးအား မြင့်မားသော တရားမဝင် လက်နက်များနှင့် ပဲ့ထိန်းဒုံးကျည် အစီအစဉ်များ၏ မတည်ငြိမ်သော သက်ရောက်မှုကို ဖော်ပြနေသည်ဟု အမေရိကန်၏ အင်ဒို-ပစိဖိတ် ဌာနချုပ်က ပြောသည်။
ထိုအခြေအနေများတွင် ဂျပန်နှင့် တောင်ကိုရီးယားကို ကာကွယ်ပေးမည့် အမေရိကန်၏ သဘောထားလည်း ခိုင်မာနေဆဲပင် ဖြစ်ကြောင်း ပါရှိသည်။
မြောက်ကိုရီးယား၏ တနင်္ဂနွေနေ့ စမ်းသပ်မှုများသည် ၎င်းတို့၏ Pukguksong-2 ဒုံးကျည်များ ဖြစ်နိုင်ကြောင်း၊ ထိုဒုံးကျည်များသည် ရေငုပ်သင်္ဘောမှ တဆင့် ပစ်ခတ်နိုင်သည့် ဒုံးကျည်အုပ်စုဝင်ဖြစ်ကြောင်း၊ ၂၀၁၇ ခုနှစ်တွင် လည်း ယခုကဲ့သို့ စမ်းသပ်ခဲ့ဖူးသည်ဟု ကိုရီးယားအမျိုးသား ကာကွယ်ရေးတက္ကသိုလ်မှ ပါမောက္ခဟောင်း ကွန်ယောင်ဆိုး (Kwon Yong Soo) က ပြောသည်။
Source: AP
- By CNI
- Category: နိုင်ငံရေး
- Hits: 529
CNI International News
ဂိုမာ၊ ဒီဇင်ဘာ ၁၇
ကွန်ဂိုနိုင်ငံအရှေ့ပိုင်း ဂိုမာ(Goma)မြို့သို့ ဝင်ရောက်လာသော ပင်မကုန်သွယ်ရေးလမ်းကြောင်းများကို M23 သူပုန်များက ဖြတ်တောက်ခဲ့သည်ဟု Bangkok Post သတင်းတွင် ဖော်ပြသည်။
ယင်းကြောင့် မြို့တွင်းရှိ ကုန်ဈေးနှုန်းများမှာ မြင့်တက်လာခဲ့ပြီး နောက်ထပ်ထိုးစစ်ဆင်မှုများက စီးပွားရေးအပေါ် ထိခိုက်မှုရှိလာနိုင်သည်ကိုလည်း စိုးရိမ်မှုများ ရှိလာသည်။
တွတ်ဆီ(Tutsi)လူမျိုးများဦးဆောင်သည့် M23 အဖွဲ့သည် နှစ်ပေါင်းများစွာ ငြိမ်သက်နေခဲ့သော်လည်း ပြီးခဲ့သော နှစ် နှောင်းပိုင်းတွင် စစ်ရေးလှုပ်ရှားမှုများပြန်လည်စတင်ခဲ့ကာ ကီဝူ(Kivu) ပြည်နယ်မြောက်ပိုင်း နယ်မြေများစွာ ကို သိမ်းပိုက်ခဲ့သည်။ သူပုန်အဖွဲ့သည် ပြီးခဲ့သည့်လတွင် ဂိုမာမြို့အနီး ကီလိုမီတာ အနည်းငယ်အကွာအထိ ရောက်ရှိလာနိုင်ခဲ့သည်။
Goma လေဆိပ်ကို ကွန်ဂိုနှင့် ကင်ညာတပ်များက စောင့်ကြပ်ခဲ့စဉ်(ဓါတ်ပုံ-အေအက်ဖ်ပီ)
ဂိုမာမြို့သည် လူ ၁ သန်းကျော်နေထိုင်သည့် စီးပွားရေးအချက်အခြာမြို့တစ်ခုဖြစ်ကာ ရဝမ်ဒါနိုင်ငံ၏ နယ်စပ်တွင် ရှိသည်။ M23 အဖွဲ့က ဂိုမာမြို့တွင်းသို့ မြောက်ဘက်မှ ဆက်သွယ်ထားသည့် RN2 အဝေးပြေးလမ်းမကို ဖြတ်တောက်ထားသည့်အတွက် ကီဝူမြောက်ပိုင်းရှိ ရတ်ရှုရူ (Rutshuru) ပြည်နယ်မှ လယ်ယာထွက်ပစ္စည်းများ ဝင်ရောက်လာမှုကိုလည်း ပိတ်ဆို့ထားသည်။
ယခုဖြစ်ရပ်များမတိုင်ခင် အိမ်နီးချင်းရဝမ်ဒါမှ ကုန်စည်တင်သွင်းမှုများသည်လည်း RN2 မှ ဂိုမာသို့ဝင်ရောက် လာရခြင်းဖြစ်သောကြောင့် ယခုဖြစ်ရပ်များက ကုန်စည်စီးဆင်းမှုကို ဆိုးရွားလာစေသည်။ ကွန်ဂိုနိုင်ငံတွင်း ချက်ရေးပြုတ်ရေးတွင် အများဆုံးအသုံးပြုသော လောင်စာဈေးနှုန်းများမှာ မကြာသေးခင်ကာလအတွင်း သိသိသာသာ မြင့်တက်လာသည်ဟု မီးသွေးကုန်သည်တစ်ဦးက ပြောသည်။ ဈေးကိုပြောလိုက်ချိန်တွင် ဝယ်သူ အားလုံးမှာ ပြန်လည်ထွက်ခွာသွားတော့သည်ဟုလည်း ဂိုမာမြို့မှ ဆိုင်ရှင်တစ်ဦးက ပြောသည်။
လက်နက်ကိုင်များကြောင့် ဂိုမာမြို့တွင်းသို့ ရောက်ရှိနိုင်ရန်အတွက် ပိုမိုရှည်လျားသော လမ်းကို ဖြတ်သန်း သွားလာရသည့်အတွက် မီးသွေးကုန်လမ်းကြောင်းများသည်လည်း ပိုမိုရှည်လျားလာသည်။
မီးသွေးသည်တစ်ဦးကို တွေ့ရစဉ်(ဓါတ်ပုံ-အေအက်ဖ်ပီ)
ကျောင်းလခ မပေးနိုင်သောကြောင့် ကလေးများကို ကျောင်းသို့ပင်မပို့နိုင်တော့ဟု သားသမီး ၈ ဦး၏ မိခင်ဖြစ်သူ က ပြောသည်။
သို့သော် ကီဝူရေကန်၏ တခြားတစ်ဖက်တွင်ရှိသော ဘူကာဝူ (Bukavu) မြို့မှ လှေများ ဂိုမာမြို့သို့ ဝင်ရောက် နိုင်နေဆဲဖြစ်ပြီး ရဝမ်ဒါမှ ကုန်စည်များသည်လည်း ဆက်လက်ဝင်ရောက်နေဆဲပင်ဖြစ်သည်။ ကွန်ဂိုပြည်တွင်း၌မူ ဂိုမာမြို့သို့ ဝင်ရောက်သည့် အနောက်ဘက်လမ်းကြောင်းတစ်ခုသာ အသုံးပြု၍ရဆဲဖြစ်သောကြောင့် ကုန်သွယ်မှု အရေအတွက် လျော့ကျသွားကာ ဈေးနှုန်းများလည်းကြီးမြင့်လာသည်။
အစိုးရကို ဖိအားပေးရန်အတွက် M23 ဘက်မှ အဆိုပါလမ်းကြောင်းကိုပင် ပိတ်လာနိုင်ခြေရှိသည်ကိုလည်း စိုးရိမ်မှုများရှိနေသည်။
သူပုန်အဖွဲ့သည် ဂိုမာမြို့အနောက်ဘက် မာစီစီ (Masisi) ဒေသကိုပင် သိမ်းယူရန်ရည်ရွယ်ထားသည်ဟု ကွန်ဂို သုတေသီတစ်ဦးကပြောဆိုထားပြီး ဂိုမာမြို့အတွက် လူသားခြင်းစာနာမှုဆိုင်ရာ အကာအရံတစ်ခု မဖန်တီးပေး နိုင်လျှင် ယင်းသည် ကပ်ဘေးတစ်ခုဖြစ်လာနိုင်သည်ဟုလည်း ၎င်းက သုံးသပ်ပြောဆိုသည်။
Source:Bangkokpost
- By CNI
- Category: နိုင်ငံရေး
- Hits: 661
CNI International News
တိုကျို၊ ဒီဇင်ဘာ ၁၇
ယခင်က စဉ်းပင်မစဉ်းစားခဲ့ဖူးသည့် ဒေါ်လာ ၃၂၀ ဘီလီယံ တန်ကြေးရှိ စစ်ဘက်ဆိုင်ရာ တိုးချဲ့မှုများကို စတင် လုပ်ဆောင်တော့မည်ဟု ဂျပန်နိုင်ငံမှ ထုတ်ပြန်ခဲ့ကြောင်း အယ်ဂျာဇီးယား သတင်းတွင် ဖော်ပြထားသည်။
အဆိုပါ တိုးချဲ့မှုများကြောင့် ဂျပန်စစ်တပ်သည် တရုတ်နိုင်ငံကို ပစ်နိုင်သော ဒုံးကျည်များ ရရှိမည်ဖြစ်သည်။ အလားတူ ဒေသတွင်း တင်းမာမှုများကြောင့် ဖြစ်လာနိုင်သော ပဋိပက္ခနှင့် ရုရှား၏ ယူကရိန်းကျူးကျော်စစ် ကြောင့် ဖြစ်ပေါ်လာသည့် စစ်ပွဲဆိုင်ရာ စိုးရိမ်မှုများအတွက် အဆင်သင့် ဖြစ်နေစေမည် ဖြစ်သည်။
ရုရှားတို့၏ ကျူးကျော်မှု လမ်းစဉ်ကြောင့် တရုတ်၏ ထိုင်ဝမ်သို့ ကျူးကျော်မှုမျိုး ဖြစ်လာစေနိုင်ပြီး ထိုအခြေအနေ က အနီးအနားရှိ ဂျပန်ကျွန်းများကို ခြိမ်းခြောက်နေသလို ခေတ်ရှေ့ပြေး ဆီမီးကွန်ဒတ်တာများ ထောက်ပံ့မှုကို ထိခိုက်စေသည်။
ထို့နောက် အရှေ့အလယ်ပိုင်းမှ ဆီတင်သွင်းသည့် လမ်းကြောင်း ပိုင်ဆိုင်မှုဆိုင်ရာ ပြဿနာများအထိ ဖြစ်လာမည် ကို ဂျပန်ဝန်ကြီးချုပ် ဖူမီကိုကီရှီဒါ အစိုးရက စိုးရိမ်နေသည်။
ဂျပန်စစ်တပ်ကိုတွေ့ရစဉ် (GETTY IMAGES)
ဒုတိယကမ္ဘာစစ်လွန် ဂျပန်ဖွဲ့စည်းပုံအခြေခံဥပဒေအရ စစ်တပ်ကို တရားဝင် သတ်မှတ်ထားခြင်း မရှိဘဲ ဂျပန် စစ်တပ်အား ကိုယ့်ကိုယ်ကို ကာကွယ်နိုင်စွမ်းရှိသည့် အနေအထားအထိသာ ကန့်သတ်ထားသည်။
သို့သော် ဂျပန်အစိုးရ၏ အလုံးစုံ ပါဝင်သော ၅ နှစ်တာ စီမံကိန်းနှင့် အမျိုးသားလုံခြုံရေး မဟာဗျူဟာကို ပြန်လည် မွမ်းမံခြင်းတွင် အစိုးရအနေဖြင့် အပိုပစ္စည်းများနှင့် စစ်ဘက်သုံး လက်နက်များကို သိုလှောင်ထားခြင်း၊ သယ်ယူ ပို့ဆောင်ရေးကို အားဖြည့်ခြင်း၊ ဆိုက်ဘာ စွမ်းရည်ကို မြှင့်တင်ခြင်း အပြင် အမေရိကန် အပါအဝင် တူညီသော သဘောထားရှိသည့် နိုင်ငံများနှင့် ပိုမိုနီးကပ်စွာ ပူးပေါင်းဆောင်ရွက် သွားခြင်းဖြင့် လက်ရှိ အပြည်ပြည်ဆိုင်ရာ ပဋိညာဉ်အပေါ် ခြိမ်းခြောက်မှုများကို ရှာဖွေသွားမည်ဟု ပြောသည်။
ရုရှား၏ ယူကရိန်းကျူးကျော်စစ်က အင်အား အသုံးပြုခြင်းကို တားမြစ်သည့် ဥပဒေများအပေါ် ပြင်းပြင်းထန်ထန် ချိုးဖောက်ခြင်းဖြစ်ပြီး နိုင်ငံတကာပဋိညာဉ်၏ အခြေခံ သဘောထားအပေါ် သက်ရောက်မှု ရှိစေသည်ဟု အစိုးရ၏ အမျိုးသားလုံခြုံရေးစာတမ်းတွင် ဖော်ပြထားသည်။
တရုတ်-ထိုင်ဝမ်-ဂျပန် နယ်နိမိတ် အခြေပြ မြေပုံကိုတွေ့ရစဉ် (GETTY IMAGES)
တရုတ်၏ မဟာဗျူဟာမြောက် စိန်ခေါ်မှုများသည် ဂျပန်နိုင်ငံ ရင်ဆိုင်ဖူးသမျှတွင် အကြီးမားဆုံးဟုလည်း ပြောသည်။
ယခင်အစိုးရ အဆက်ဆက်တွင် မစဉ်းစားခဲ့ဖူးသည့် ဂျပန်စစ်တပ်အပေါ် ထပ်ဖန်တလဲလဲ အင်အား ဖြည့်တင်းခြင်း နှင့် ပတ်သက်၍ မဲဆန္ဒအများစုက ထောက်ခံနေကြသည်ကို စစ်တမ်းများတွင် တွေ့နိုင်သည်။ တချို့သော စစ်တမ်း ရလဒ်များအရ မဲဆန္ဒရှင် ၇၀ ရာခိုင်နှုန်းနီးပါးခန့်က ယခုလုပ်ရပ်များကို ထောက်ခံနေကြသည်ကိုပင် တွေ့ရသည်။ ဝန်ကြီးချုပ် ကီရှီဒါ၏ အစီအစဉ်မှာ လာမည့် ၅ နှစ်အတွင်း ကာကွယ်ရေးအသုံးစရိတ်ကို GDP ၏ ၂ ရာခိုင်နှုန်း အထိ ၂ ဆမြှင့်တင်ရန်နှင့် ကာကွယ်ရေးဌာန အသုံးစရိတ်ကို ပြည်သူ့အသုံးစရိတ်၏ ၁၀ ပုံ ၁ ပုံအထိ မြှင့်တင် သွားရန် ဖြစ်သည်။
ထို့ကြောင့် ဂျပန်သည် အမေရိကန်၊ တရုတ်တို့ ပြီးနောက် တတိယမြောက် ကာကွယ်ရေး အသုံးစရိတ် အမြင့် မားဆုံးနိုင်ငံလည်း ဖြစ်လာမည်။
သို့သော် ဆွေးနွေးမှုများ လုပ်ဆောင်နေဆဲ အခြေအနေတွင်သာ ရှိနေသေးခြင်းကြောင့် ဝန်ကြီးချုပ်၏ စီမံကိန်း အတွက် ကျသင့်ငွေကို အခွန်မြှင့်တင်ခြင်း သို့မဟုတ် ငွေချေးခြင်းဖြင့် ရှာဖွေမည်လား ဆိုသည်ကိုတော့ တိတိကျ ကျ မသိရသေးပေ။
Source: အယ်ဂျာဇီးယား
- By CNI
- Category: နိုင်ငံရေး
- Hits: 715
CNI International News
အစ္စလာမ္မာဘတ်၊ ဒီဇင်ဘာ ၁၇
အိန္ဒိယဝန်ကြီးချုပ်ကို “ဂူဂျာရတ် သားသတ်သမား” ဟု ပါကစ္စတန် နိုင်ငံခြားရေးဝန်ကြီး ဘီလာဝယ် ဘူတို-ဇာဒါရီ (Bilawal Bhutto-Zardari)က ပုတ်ခတ်ပြောဆိုခဲ့ ကြောင်း အယ်ဂျာဇီးယား သတင်းတွင် ဖော်ပြထားသည်။
အိန္ဒိယဘက်မှ ပါကစ္စတန်သည် အကြမ်းဖက်မှုများ၏ ဗဟိုချက်ဖြစ်သည်ဟု ပြောဆိုခဲ့ခြင်းကို ပါကစ္စတန် နိုင်ငံခြားရေးဝန်ကြီးက ယခုလို တုန့်ပြန်ခဲ့ခြင်းဖြစ်သည်။ နျူကလီးယား ပိုင်ရှင် အိမ်နီးချင်း နှစ်နိုင်ငံသည် ကုလသမဂ္ဂတွင် စကားလုံးတိုက်ပွဲ ဆင်နွဲနေခြင်း ဖြစ်သည်။
ပါကစ္စတန်နိုင်ငံခြားရေးဝန်ကြီး ဘီလာဝယ် ဘူတို-ဇာဒါရီ (Bilawal Bhutto-Zardari) နှင့် အိန္ဒိယ နိုင်ငံခြားရေး ဝန်ကြီး ဆူဘရာမမ်ရမ် ဂျိုင်ရှန်ကာ (Subrahmanyam Jaishankar) တို့ကြား စကားလုံးတိုက်ပွဲမှာ ကုလသမဂ္ဂ လုံခြုံရေးကောင်စီတွင် အကြမ်းဖက်မှုအန္တရာယ် မြင့်တက်လာခြင်းနှင့် ပတ်သက်သည့် ထုတ်ပြန်ချက် တစ်ခု ကြောင့် စတင်ခဲ့ခြင်း ဖြစ်သည်။
ကုလ ညီလာခံအပြီး သတင်းထောက်များနှင့် စကားပြောဆိုခဲ့ရာတွင် ဂျိုင်ရှန်ကာက ပါကစ္စတန်သည် အကြမ်း ဖက်မှုများ၏ ဗဟိုချက်ဖြစ်သည်ဟု ပြောကြားခဲ့သလို သန့်သန့်ရှင်းရှင်းနေ ထိုင်၍ အိမ်နီးချင်းကောင်းဖြစ်ရန် ကြိုးစားသင့်သည်ဟု ဆိုသည်။
ကတ်ရှ်မီးယားမှာ လုံခြုံရေးတပ်ဖွဲ့ကိုတွေ့ရစဉ် (GETTY IMAGES)
မိမိ အိမ်နောက်ဖက်တွင် မြွေမွေးထားလျှင် ထိုမြွေများသည် အိမ်နီးချင်းများကိုပင် မဟုတ်ဘဲ မွေးထားသည့် အိမ်ပိုင်ရှင်များကိုပင် ပြန်ဒုက္ခပေးနိုင်သည်ဟု ဟီလာရီကလင်တန်၏ ခရီးစဉ်တွင် ပြောခဲ့ဖူးကြောင်းလည်း ဂျိုင်ရှန်ကာက ပြောခဲ့သည်။
လက်ရှိ စကားလုံး တိုက်ပွဲမဖြစ်ပွားခင် အစောပိုင်းတွင်လည်း ဂျိုင်ရှန်ကာသည် ပါကစ္စတန်နိုင်ငံနာမည်ကို တိုက် ရိုက် မပြောခဲ့သည့်တိုင် သွယ်ဝိုက်သော နည်းဖြင့် ပုတ်ခတ်ပြောဆိုမှု ပြုလုပ်ခဲ့သည်။
ထိုပြောစကားများနှင့် ပတ်သက်၍ တုန့်ပြန်ရန် သတင်းထောက်များမှ မေးမြန်းရာတွင် ဇာဒါရီက အိန္ဒိယလူမျိုးများ သည် အိန္ဒိယ၊ ပါကစ္စတန် မည်သည့်နိုင်ငံတွင် အကြမ်းဖက်မှု ဖြစ်သည်မဆို မူဆလင်များနှင့် အကြမ်းဖက်မှုများကို ရောချပစ်လိုက်ကြသည်ဟု ပြောသည်။
ဂျိုင်ရှန်ကာ အနေဖြင့် အိုစမာဘင်လာဒင် သေသွားခဲ့သည့်တိုင် ဂူဂျာရတ်ပြည်နယ်မှ လူသတ်သမား(မိုဒီ)မှာ မသေ သည့်အပြင် အိန္ဒိယဝန်ကြီးချုပ် ဖြစ်နေပြီဆိုသည်ကို မမေ့သင့်ကြောင်းလည်း ပါကစ္စတန်ဝန်ကြီးက ပြန်လည် တုန့်ပြန်ခဲ့သည်။
ပါကစ္စတန်နိုင်ငံခြားရေးဝန်ကြီး ဘီလာဝယ် ဘူတို-ဇာဒါရီကိုတွေ့ရစဉ် (fb)
၎င်းက လက်ရှိ ဝန်ကြီးချုပ်မိုဒီ ဂူဂျာရတ်ပြည်နယ် အကြီးအကဲအဖြစ် ဆောင်ရွက်နေစဉ် မူဆလင် အများစု ပါဝင်သော လူ ၂၀၀၀ နီးပါး သေဆုံးခဲ့ရသည့် ၂၀၀၂ ခုနှစ်ဖြစ်စဉ်ကို ရည်ညွှန်း ပြောဆိုခဲ့ခြင်း ဖြစ်သည်။ ထိုဖြစ်စဉ်တွင် မိုဒီသည် အကြမ်းဖက်မှုများကို လျစ်လျူရှုခဲ့သည်ဟုလည်း စွပ်စွဲခံထားရပြီး ဝန်ကြီးချုပ် မဖြစ်ခင် အထိ အမေရိကန်ပြည်ဝင်ခွင့်ပါ ပိတ်ပင်ခံခဲ့ရသည်။
ဇာဒါရီ၏ တုန့်ပြန်မှုတွင် ၎င်းသည်ပင် အကြမ်းဖက်ဝါဒ၏ သားကောင်တစ်ဦးဖြစ်ကြောင်း ၊ အကြမ်းဖက်မှုကြောင့် ပါကစ္စတန်နိုင်ငံတွင် များစွာထိခိုက် နစ်နာခဲ့ရသည်ဟုလည်း ပြောခဲ့သည်။ ဇာဒါရီ၏ မိခင်ဖြစ်သူ ပါကစ္စတန်၏ ပထမဆုံးသော အမျိုးသမီးဝန်ကြီးချုပ် ဘနာဇီယာဘူတို အသေခံဗုံးခွဲမှု ဖြစ်စဉ်တစ်ခုတွင် လုပ်ကြံသတ်ဖြတ်ခြင်း ခံခဲ့ရမှုကို ရည်ညွှန်းပြောဆိုခဲ့ခြင်း ဖြစ်သည်။
အိမ်နီးချင်း ၂ နိုင်ငံကြား အထူးသဖြင့် ကတ်ရှ်မီးယားအရေးကြောင့် နိုင်ငံရေးဆိုင်ရာ ဆက်ဆံရေး အခြေအနေ များမှာ ဆိုးရွားခဲ့သည်။ ထိုဖြစ်ရပ်ကြောင့် ခွဲထွက်မှု၊ စစ်ပွဲများလည်း ဖြစ်ပွားခဲ့ရသည်။
၂၀၀၈ ခုနှစ် မွမ်ဘိုင်းတိုက်ခိုက်မှု အပါအဝင် အိန္ဒိယတွင် ဖြစ်ပွားခဲ့သော အကြမ်းဖက် တိုက်ခိုက်မှုများနှင့် ပတ်သက် ၍ ပါကစ္စတန်ဘက်က ကြိုးကိုင်ခဲ့သည်ဟုလည်း အိန္ဒိယက စွပ်စွဲထားသည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 594
CNI International News
ဝါရှင်တန်၊ ဒီဇင်ဘာ ၁၆
အာဖရိကတိုက်ကို ထောက်ပံ့ရန်နှင့် ရင်းနှီးမြှုပ်နှံမှု လုပ်ဆောင်ရန်အတွက် ဒေါ်လာ ဘီလီယံပေါင်းများစွာ အသုံး ပြုသွားမည်ဟု အမေရိကန်သမ္မတ ဂျိုးဘိုင်ဒန် (Joe Biden)က ပြောကြားခဲ့ကြောင်း ဘီဘီစီ အင်္ဂလိပ်ပိုင်းတွင် ဖော်ပြထားသည်။
အာဖရိကခေါင်းဆောင်များနှင့် ညီလာခံတစ်ခုတွင် ထိုသို့ ပြောကြားခဲ့ခြင်း ဖြစ်သည်။
ဝါရှင်တန်ဒီစီမြို့တွင် ပြုလုပ်ခဲ့သော အာဖရိကခေါင်းဆောင် ၄၉ ဦးနှင့် ညီလာခံ၌ အာဖရိကအနာဂတ်အတွက် အမေရိကန်နိုင်ငံမှ အလုံးစုံပုံအောမြှုပ်နှံထားသည်ဟု ဘိုင်ဒန်က ပြောသည်။
အဆိုပါ ညီလာခံသည် ၈ နှစ်တာကာလအတွင်း ပထမဆုံးသော အမေရိကန်ဘက်မှ လက်ခံကျင်းပသည့် အာဖရိကန်- အမေရိကန် ညီလာခံ ဖြစ်သည်။
၎င်းက တရုတ်၏ ပါဝင်ပတ်သက်မှုများကို တန်ပြန်ရန်အတွက် အမေရိကန်နိုင်ငံ၏ အာဖရိကတိုက်အပေါ် ပြန်လည် သြဇာလွှမ်းမိုးရန် ကြိုးပမ်းမှု တစ်ရပ်ဟုလည်း ရှုမြင်ခြင်း ခံထားရသည်။
အမေရိကန်သမ္မတ ဂျိုးဘိုင်ဒန်နဲ့ အာဖရိကခေါင်းဆောင်တစ်ဦးကိုတွေ့ရစဉ် (AP)
ဒေါ်နယ်ထရမ့် အစိုးရလက်ထက်တွင် အာဖရိကနိုင်ငံများနှင့် ဆက်ဆံရေး အခြေအနေ ဆိုးရွားခဲ့သော်လည်း ဘိုင်ဒန်ကမူ အာဖရိကဒေသနှင့် ဆက်ဆံရေးကောင်းတစ်ခု ထူထောင်ရန် ကြိုးပမ်းထားသည်။ အာဖရိက၏ အောင်မြင်မှုသည် အမေရိကန်၏ အောင်မြင်မှုပင်ဖြစ်ကာ တစ်ကမ္ဘာလုံး၏ အောင်မြင်မှုဟုလည်း မှတ်ယူနိုင် ကြောင်း ဘိုင်ဒန်က အခိုင်အမာ ပြောထားသည်။
ဘိုင်ဒန်က လက်ရှိကြုံတွေ့နေရသော ကမ္ဘာ့ရေးရာကိစ္စများတွင် အာဖရိက၏ ခေါင်းဆောင်မှု၊ အတွေး အခေါ်များ နှင့် စွန့်ဦးတီထွင်မှုများ လိုအပ်သည်ဟု ပြောသလို ယခင်အစိုးရ အဆက်ဆက် ပြုလုပ်ခဲ့သော အရေးပါသည့် ရင်းနှီးမြှုပ်နှံမှုများကိုလည်း ဆက်လက် ဆောင်ရွက်သွားမည်ဟု ကတိပေးခဲ့သည်။
၃ ရက်ကြာ အမေရိကန် - အာဖရိက ညီလာခံသည် ဒီဇင်ဘာ ၁၅ ရက်နေ့တွင် ပြီးဆုံးသွားခဲ့ပြီ ဖြစ်ကြောင်း၊ လာမည့် ၃ နှစ်အတွင်း အာဖရိက ဒေသသို့ ဒေါ်လာ ၅၅ ဘီလီယံ ရင်းနှီးမြှုပ်နှံသွားမည်ဟု အမေရိကန် အမျိုးသား အကြံပေးအရာရှိ ဂျိတ်ဆူလေဗန် (Jake Sullivan) က ပြောသည်။
အမေရိကန်သမ္မတ ဂျိုးဘိုင်ဒန်နဲ့ အာဖရိကခေါင်းဆောင်များကိုတွေ့ရစဉ် (AP)
ညီလာခံတွင် လက်ရှိ ဆောင်ရွက်နေသော ပရိုဂရမ်များနှင့်ပတ်သက်၍ ဦးစားပေး ဆွေးနွေးသွားခဲ့သော်လည်း မြေပြင် အခြေအနေတွင် အဆိုပါ ပရိုဂရမ်များမှာ တိုးတက်မှု နှေးကွေးလွန်းနေသည်။
အာဖရိကသည် အမေရိကန် နိုင်ငံခြားကုန်သွယ်ရေး၏ ၁ ရာခိုင်နှုန်းကိုသာ ပိုင်ဆိုင်ထားပြီး ထိုကုန်သွယ်ကိုလည်း နိုင်ဂျီးရီးယားနှင့် အန်ဂိုလာတို့မှ ရေနံဆီ တင်သွင်းမှုများက ကြီးစိုးထားသည်။
သို့သော် အနောက်အာဖရိက၏ အရေးပါဆုံး ဆိပ်ကမ်း ဖြစ်သော ဘီနင်ဆိပ်ကမ်းတွင် သယ်ယူပို့ဆောင်စရိတ် လျော့ချရေးအတွက် ဒေါ်လာ သန်း ၅၀၀ ရင်းနှီးမြှုပ်နှံသွားမည်ဟု ဘိုင်ဒန်က ဒီဇင်ဘာ ၁၄ ရက်နေ့တွင် ပြောခဲ့ သည်။
ဒစ်ဂျစ်တယ် စီးပွားရေးကို မြှင့်တင်ရန် ဒေါ်လာ သန်း ၃၅၀ အသုံးပြုသွားမည်ဖြစ်ပြီး အမေရိကန်-အာဖရိက စီးပွားရေးဖိုရမ်တွင် ဒေါ်လာ ၁၅ ဘီလီယံတန်ကြေးရှိ သဘောတူညီချက်များကို ရရှိခဲ့သည်ဟု ၎င်းက ပြောသည်။
Source: BBC
- By CNI
- Category: နိုင်ငံရေး
- Hits: 421
CNI International News
ရီဂါ၊ ဒီဇင်ဘာ ၁၅
ညွှန့်ပေါင်းအစိုးရတစ်ရပ် ဖွဲ့စည်းရန် လတ်ဗီးယား နိုင်ငံရေးပါတီ သုံးခုက သဘောတူညီချက်တွင် လက်မှတ် ရေးထိုးခဲ့သည်ဟု အယ်ဂျာဇီးယားက ဖော်ပြထားသည်။
အိမ်နီးချင်း ရုရှားနိုင်ငံ၏ ယူကရိန်းကျူးကျော်စစ်၊ စီးပွားရေးဆိုင်ရာ အခက်အခဲများကြောင့် နိုင်ငံတွင်း အထွေထွေ ရွေးကောက်ပွဲ ကျင်းပပြီး နှစ်လအကြာမှ ထိုသို့ ဖွဲ့စည်းနိုင်ခဲ့ခြင်း ဖြစ်သည်။
အစိုးရအဖွဲ့သစ်ကို ဝန်ကြီးချုပ် ခရစ္စဂျားနစ် ကာရင်းစ်၏ အာဏာရ ဗဟိုလက်ယာ New Unity ပါတီက ဦးဆောင် သွားမည် ဖြစ်သည်။
ထိုပါတီသည် အောက်တိုဘာ ၁ ရက်နေ့ ရွေးကောက်ပွဲတွင် ၁၉ ရာခိုင်နှုန်း အနိုင် ရရှိခဲ့သည့် ပါတီဖြစ်သည်။
ကျန်ပါတီနှစ်ခုမှာ ကွန်ဆာဗေးတစ်(National Alliance)ပါတီနှင့် အစွန်းမရောက်သော United List ပါတီတို့ ဖြစ်သည်။
လတ်ဗီးယား လွှတ်တော်ကိုတွေ့ရစဉ် (GETTY IMAGES)
ထိုပါတီ ၃ ခုသည် အစိုးရသစ် လုပ်ငန်းများကို ကဏ္ဍ ၅ ရပ် ခွဲခြားဆောင်ရွက်သွားရန် ဗုဒ္ဓဟူး(ဒီဇင်ဘာ ၁၄ ရက်) နေ့တွင် ကတိပြုခဲ့ ကြသည်။
၎င်းတို့မှာ နိုင်ငံ၏ လုံခြုံရေး၊ ပညာရေး၊ စွမ်းအင်၊ ယှဉ်ပြိုင်ခြင်းနှင့် လူနေမှုဘဝတို့ ဖြစ်သည်။ ထုတ်ပြန်ခဲ့သော ပူးတွဲကြေညာချက် တစ်စောင်တွင် ပါတီများက ဝန်ကြီးချုပ် ဒုတိယ အစိုးရသက်တမ်း၏ ရည်ရွယ်ချက်မှာ လတ်ဗီးယားပြည်သူများ၏ လုံခြုံရေးနှင့် ကြွယ်ဝချမ်းသာမှုတို့ကို ထောက်ပံ့ပေးသော မူဝါဒများဖြင့် စီးပွားရေးကို ပြုပြင်ပြောင်းလဲရန် ဖြစ်သည်ဟု ဖော်ပြထားသည်။
ထို့ကြောင့် ပါတီ ၃ ခုသည် လတ်ဗီးယား၏ အမတ်နေရာ ၁၀၀ ပါ လွှတ်တော်နေရာ ၅၄ နေရာကို ထိန်းချုပ် နိုင်ခဲ့ပြီ ဖြစ်သော်လည်း သဘောတူညီချက်ကို လွှတ်တော်အတွင်း မဲပေး အတည်ပြုမှု လိုအပ်နေဆဲ ဖြစ်သည်။
ပြီးခဲ့သော ရွေးကောက်ပွဲတွင် ပါတီနှင့် မဟာမိတ်အဖွဲ့ ၇ ခုကသာ လိုအပ်သော ၅ ရာခိုင်နှုန်း အတားအဆီးကို ကျော်ဖြတ်နိုင်ခဲ့ပြီး ဥပဒေပြုလွှတ်တော်အတွက် ကိုယ်စားပြုခွင့် ရရှိခဲ့သည်။
ထူးခြားမှုတစ်ခုမှာ လတ်ဗီးယားနိုင်ငံ၏ များပြားသော ရုရှားလူမျိုးများကို ကိုယ်စားပြုသည့် မည်သည့်ပါတီကမှ လွှတ်တော်အတွင်း နေရာ တစ်နေရာ ရရှိအောင် စွမ်းဆောင်နိုင်ခဲ့မှု မရှိခြင်းပင် ဖြစ်သည်။
လတ်ဗီးယားနိုင်ငံတွင် လူဦးရေ ၁ ဒသမ ၉ သန်း ရှိပြီး ၎င်းတို့၏ ၂၅ ရာခိုင်နှုန်းကျော်မှာ ရုရှားအဆက်များ ဖြစ်သည်။ လတ်ဗီးယားသည် ၂၀၀၄ ခုနှစ်မှစတင်ကာ အီးယူနှင့် နေတိုးအဖွဲ့ဝင် နိုင်ငံအဖြစ် သတ်မှတ်ခြင်း ခံခဲ့ရသည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 426
CNI International News
ဝါရှင်တန်၊ ဒီဇင်ဘာ ၁၅
ရှရုားအစိုးရကိုယ်စား ငွေကြေးခဝါချမှု၊ ရောင်းဝယ်မှုများ ပြုလုပ်ခဲ့ရာတွင် ပါဝင်ပတ်သက်နေသည့် ရုရှားနိုင်ငံသား ၅ ဦးနှင့် အမေရိကန် နိုင်ငံသား ၂ ဦးတို့ကို အမေရိကန်အစိုးရက တရားစွဲဆိုခဲ့သည်ဟု ဘီဘီစီ အင်္ဂလိပ်ပိုင်းတွင် ဖော်ပြထားသည်။
တရားစွဲခံရသူများမှာ ရုရှားကာကွယ်ရေးကဏ္ဍအတွက် အမေရိကန်ကုမ္ပဏီများမှ စစ်ဘက်သုံးနှင့် ဘက်စုံသုံး နည်းပညာများကို ရရှိရန် ကြိုးပမ်းခဲ့မှုဖြင့် သံသယဝင်ခံခဲ့ရသည်ဟု အမေရိကန် တရားရေးဌာနက ပြောသည်။
ထိုသူများသည် အမေရိကန်နိုင်ငံ၏ ပိတ်ဆို့အရေးယူမှုများကို ချိုးဖောက်ကာ စနိုက်ဘာကျည်များအား မှောင်ခို သွင်းရန် ကြိုးပမ်းခဲ့သည်ဟုလည်း ယူဆရသည်။
ရုရှား ၅ ဦးမှ ၁ ဦးမှာ ဖက်ဒရယ်လုံခြုံရေးဌာန FSB မှ အရာရှိတစ်ဦး ဖြစ်နိုင်သည်။ လက်ရှိ အချိန်အထိ စုံစမ်း စစ်ဆေးမှုများအပေါ် သံသယဝင် ခံရသူများနှင့် ရုရှား အစိုးရဘက်မှ တစ်စုံတစ်ရာ ပြောဆိုခြင်း မရှိသေးပေ။
တရားစွဲခံရသူ ၇ ဦးထဲက ၃ ဦးမှာ ထိန်းသိမ်းခံထားရပြီး ရုရှား ၄ ဦးမှာ လွတ်မြောက်နေဆဲ ဖြစ်သည်။ တရားစွဲဆိုမှု ၁၆ ခုကို နယူးယောက်ရှိ ဘရွတ်ကလင်း ဖက်ဒရယ်တရားရုံးတွင် စစ်ဆေးခဲ့သည်ဟု အမေရိကန် တရားရေးဌာန က ထုတ်ပြန်သည်။
ဖမ်းဆီးစွပ်စွဲခံထားရသူ ဗားဒင် ကိုနိုရှက်နော့ခ်ကိုတွေ့ရစဉ် (GETTY IMAGES)
ထုတ်ပြန်ချက်အရ သံသယ ရှိသူများသည် ထိရှလွယ်မှု မြင့်မားပြီး၊ တင်းကြပ်စွာ ကန့်သတ်ထားသော အီလက် ထရွန်းနစ် ပစ္စည်းများကို ဝယ်ယူပို့ဆောင်ခဲ့သည်ဟု သိရသည်။
အဆိုပါ ပစ္စည်းများထဲကတချို့ကို နျူကလီးယားနှင့် အသံထက်မြန်သော လက်နက်များအပြင် တခြားသော စစ်ဘက်ဆိုင်ရာသုံး အပလီကေးရှင်းများတွင်ပင် အသုံးပြုနိုင် သည်ဟုလည်း သိရသည်။
တရားစွဲဆိုမှုတွင် ရုရှားနိုင်ငံသား ၅ ဦး၏ အမည်များကို ဖော်ပြထားပြီး ၎င်းတို့ထဲမှ တစ်ဦးသည် FSB အရာရှိ ဟု ယူဆရသူ ဗားဒင် ကိုနိုရှက်နော့ခ် (Vadim Konoshchenok) ဖြစ်သည်။
၎င်းသည် အက်စတိုးနီးယားနိုင်ငံတွင် ထိန်းသိမ်းခံထားကာ အမေရိကန်သို့ လွဲပြောင်းပေးရန် ဆောင်ရွက်ခံနေရသူ ဖြစ်သည်။
ကိုနိုရှက်နော့ခ်သည် စစ်ဘက်သုံး အပြင် ဘက်စုံသုံး ခဲယမ်းများနှင့် တင်ပို့ခွင့် ကန့်သတ်ထားသော တခြားအရာ များ အပါအဝင် အမေရိကန် ထုတ်ကုန်များကို သင်္ဘောဖြင့် သို့မဟုတ် ကိုယ်တိုင် မှောင်ခို ကူးခဲ့သည်ဟု ထုတ်ပြန် ချက်တွင် ဖော်ပြထားသည်။
အပြစ်ရှိကြောင်း ထင်ရှားပါက တရားစွဲခံထားရသူများသည် အမြင့်ဆုံး ထောင်ဒဏ် နှစ် ၃၀ အထိ ပြစ်ဒဏ် ကျခံရမည်ဖြစ်သည်။
Source: BBC