CNI International News

ဘန်ကောက်၊ ဒီဇင်ဘာ၂၃

ထိုင်းတွင် ဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) အား အကျဉ်းထောင် အပြင်ဘက်တွင် အထူးအရေးကြီးပုဂ္ဂိုလ်အဖြစ် ဆေးဝါးကုသမှု ခံယူခွင့်ပေးသည့် ကိစ္စနှင့်စပ်လျဉ်းပြီး တရားရေးဝန်ကြီး ရဲမှူး တာဝီ ဆွတ်ဆောင် (Tawee Sodsong) က လွှတ်တော်အမတ်တစ်ဦး၏ မေးခွန်းများကို ဖြေကြားခဲ့ရသည်ဟု ဘန်ကောက်ပို့စ်မှ ဖော်ပြခဲ့သည်။

အတိုက်အခံ Move Forward ပါတီ (MFP) လွှတ်တော်အမတ်တစ်ဦးဖြစ်သူ ချွန်သီချာ ဂျန်ဂရူးသည် ထိုအကြောင်း အရာကို ဒီဇင်ဘာ ၂၁ ရက်က လွှတ်တော် အစည်းအဝေးအတွင်း ထည့်သွင်းပြောကြားခဲ့ပြီး တာဝီကို မေးခွန်းများ မေးမြန်းခဲ့ခြင်း ဖြစ်သည်။

ထိုသို့ မေးမြန်းချိန်အတွင်း တာဝီက သက်ဆင်အား အကျဉ်းထောင် အပြင်ဘက်တွင် ဆေးဝါးကုသမှုပေးခဲ့သည့်် အကျဉ်းသား စာရိတ္တ ပြုပြင်ပြောင်းလဲရေး ဌာန (Department of Corrections- DoC) ၏ ဆုံးဖြတ်ချက်သည် သူနှင့် သက်ဆိုင်ခြင်း မရှိသည့်ပုံစံမျိုးဖြင့် ဖြေကြားခဲ့သည်။

ချွန်သီချာက သက်ဆင်အား ရဲတပ်ဖွဲ့ အထွေထွေဆေးရုံတွင် ရက်ပေါင်း ၁၂၀ ထက်ကျော်လွန်ပြီး ဆေးဝါးကုသမှု ပေးခဲ့သည့် DoC ၏ ဆုံးဖြတ်ချက်ကို ပြင်းထန်စွာ ဝေဖန်ခဲ့ပြီး သက်ဆင်အား ထိုကဲ့သို့ အခွင့်ထူးခံပေးထားမှုကို အခြားအကျဉ်းသားများက လက်မခံနိုင်ကြောင်း ပြောကြားခဲ့သည်။

တရားရေးဝန်ကြီး ရဲမှူး တာဝီ ဆွတ်ဆောင်

မစ္စစ် ချွန်သီချာသည် သက်ဆင်၏ အခြေအနေကို အကျဉ်းချခံခဲ့ရသည့် နိုင်ငံရေးတက်ကြွလှုပ်ရှားသူ အီကာချိုင်း ဟောင်ကန်ဝမ် (Ekachai Hongkangwan) ၏ အခြေအနေနှင့် နှိုင်းယှဉ်ပြောကြားခဲ့သည်။

အီကာချိုင်းသည် အသည်းရောဂါကို ကုသရန် အကျဉ်းထောင် အပြင်ဘက်ရှိ ဆေးရုံသို့ လွှဲပြောင်းပို့ဆောင်ပြီး ကုသမှုခံယူခဲ့သော်လည်း ကုသမှုများ အဆုံးမသတ်မီ အကျဉ်းထောင် အပြင်ဘက်တွင် ကုသမှုခံယူခွင့်ရရှိသည့် သတ်မှတ်ကာလ ပြည့်သွားချိန်တွင် အကျဉ်းထောင်သို့ ပြန်လည်ပို့ဆောင်ခံခဲ့ရသည်ဟု ချွန်သီချာက ပြောကြား ခဲ့သည်။

ထို့ကြောင့် သက်ဆင်ကို ရဲတပ်ဖွဲ့ဆေးရုံ၏ ၁၄ လွှာရှိ အထူးအခန်းတွင် နေထိုင်ခွင့်ပေးထားသည့် အခြေအနေကို ရှင်းလင်းတင်ပြရန် ချွန်သီချာက တာဝီကို မေးမြန်းခဲ့သည်။

တာဝီကမူ သက်ဆင်ကို ကုသပေးနေသည့် ဆရာဝန်များက သက်ဆင်သည် ဖျားနာနေကြောင်း အတည်ပြုခဲ့ သည်ဟု ဆိုသည်။

ထို့ပြင် DoC အရာရှိများကလည်း သက်ဆင်သည် နာကျင်မှု၊ သွေးတိုးနှင့် နှလုံးရောဂါများ အပါအဝင် ဝေဒနာ အချို့ကို ခံစားနေရကြောင်း အတည်ပြုခဲ့သည်ဟု တာဝီက ပြောသည်။

ထို့ပြင် DoC ၏ စည်းမျဉ်းစည်းကမ်းများ အောက်တွင် သက်ဆင်၏ လုံခြုံရေးအတွက် ဆေးရုံ၏ ၁၄ လွှာတွင် ထားရှိခြင်းဖြစ်ပြီး ထို ၁၄ လွှာတွင် နေထိုင်ခြင်းသည် အခွင့်ထူးခံ အခြေအနေ မဟုတ်ကြောင်းလည်း တာဝီက ဖြေကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဒီဇင်ဘာ ၂၃

ဒီဇင်ဘာ ၂၂ ရက်က ထိုင်းနိုင်ငံ၊ မောင်း (Muang)ခရိုင်ရှိ Youtuber တစ်ဦး၏အိမ်ကို ရဲတပ်ဖွဲ့က ဝင်ရောက် ရှာဖွေခဲ့ချိန်အတွင်း လက်နက်နှင့် ခဲယမ်း အများအပြားကို တွေ့ရှိခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ဆိုက်ဘာရဲတပ်ဖွဲ့ (Police Cyber Taskforce) မှ အရာရှိများနှင့် ဒေသခံရဲတပ်ဖွဲ့ဝင်များ ပူးပေါင်းထားသည့် အဖွဲ့သည် ဘန်ကရန် (Ban Krang) ရပ်ကွက်ရှိ အိမ်တစ်လုံးကို ဝင်ရောက်ရှာဖွေခဲ့ခြင်း ဖြစ်သည်။

ရဲတပ်ဖွဲ့သည် ခရစ္စမတ်ကာလနှင့် နှစ်သစ်ကူး ပျော်ပွဲရွှင်ပွဲများ မတိုင်မီ အများပြည်သူ လုံခြုံရေးကို မြှင့်တင်ရန် ရည်ရွယ်ချက်ဖြင့် သံသယရှိသည့် နေရာများကို ဝင်ရောက်ရှာဖွေသော စစ်ဆင်ရေးကို ပြုလုပ်ခဲ့ခြင်းဖြစ်သည်။

Tacticool BoB အမည်ဖြင့် YouTube ချန်နယ်တစ်ခုဖွ င့်ထားပြီး လက်နက်များအကြောင်းကို ဗွီဒီယိုများ တင်ဆက်ပေးနေသည့် ထရင်ဆက် ဝါချီရာဆရီစီရီကူလ် (Transak Wachirasrisirikul)၏ နေအိမ်ခြံဝင်းအတွင်း ရဲအရာရှိများက တရားရုံး၏ ရှာဖွေခွင့်ဝရမ်းဖြင့် ဝင်ရောက်ရှာဖွေခဲ့သည်။

ထိုရှာဖွေမှုအတွင်း အမျိုးအစားစုံလင်သည့် သေနတ် ၈၇ လက်၊ ကျည်ဆန် ၄၅၇၆ တောင့်၊ ကျည်အိမ် ၇ ခုကို တွေ့ရှိခဲ့ကြောင်း ရဲချုပ် နစ်ခွန်း ခူနိုပါရတ် (Nikhom Kheunopparat) က ပြောကြားခဲ့သည်။

အသက် ၃၃ နှစ်အရွယ် မစ္စတာ ထရင်ဆက်က သူသည် ထိုလက်နက်များကို သူ့အဖေထံမှ အမွေရရှိခဲ့ခြင်းဖြစ် သည်ဟု ရဲတပ်ဖွဲ့ကို ပြောကြားခဲ့သည်။

ထိုလက်နက်အားလုံးကိုလည်း သူ့ဖခင်အမည်ဖြင့် တရားဝင် မှတ်ပုံတင်ထားခဲ့သည်ဟု ဆိုသည်။

လက်ရှိတွင် ရဲတပ်ဖွဲ့သည် ထိုလက်နက်များ၏ မှတ်ပုံတင်ပိုင်ဆိုင်ခွင့်ကို မစ္စတာ ထရင်ဆက်အား တရားဝင် လွှဲပြောင်းရန် သင့််/မသင့် စဉ်းစားသုံးသပ်လျက်ရှိသည်။

အကယ်၍ မှတ်ပုံတင် မူပိုင်ခွင့်နှင့်ပတ်သက်ပြီး မှတ်တမ်းမရှိပါက ထရင်ဆက်သည် လက်နက်ခဲယမ်းများကို တရားမဝင် ပိုင်ဆိုင်မှုနှင့်ဆက်နွှယ်သည့် စွဲချက်များဖြင့် အမှုရင်ဆိုင်ရနိုင်သည်။

ရဲတပ်ဖွဲ့သည် ထိုလက်နက်များကို သိမ်းဆည်းခဲ့ပြီးနောက် မစ္စတာ ထရင်ဆက်သည် ဖမ်းဆီးထိန်းသိမ်း ခံခဲ့ရသည် ဟု အတည်မပြုနိုင်သည့် သတင်းများ ထွက်ပေါ်လျက်ရှိသည်။

Source: ဘန်ကောက်ပို့စ်

CNI International News

ဒါကာ၊ ဒီဇင်ဘာ ၂၃

ဘင်္ဂလားဒေ့ရှ်နိုင်ငံတွင် အထည်ချုပ်စက်ရုံဝန်ထမ်းများ၏ ဆန္ဒပြမှုများ ဖြစ်ပွားခဲ့ပြီးနောက် အနောက်နိုင်ငံများ၏ စီးပွားရေးပိတ်ဆို့မှုများ ချမှတ်ခံရမည့် အခြေအနေနှင့် ရင်ဆိုင်နေရသည်ဟု အယ်လ်ဂျာဇီးယားမှ ဖော်ပြခဲ့သည်။

အမေရိကန်သည် ဘင်္ဂလားဒေ့ရှ်နိုင်ငံအတွက် အဓိကဝင်ငွေရှာပေးနေသည့် RMG အထည်ချုပ်လုပ်ငန်းအား အလုပ်သမား အခွင့်အရေးချိုးဖောက်မှု ပြဿနာများနှင့် ပတ်သက်ပြီး ပိတ်ဆို့မှုများ ပြုလုပ်မည်ဟု ခြိမ်းခြောက်ခဲ့ သည်။

အမေရိကန်နှင့် ဥရောပသမဂ္ဂသည် ဘင်္ဂလားဒေ့ရှ်နိုင်ငံ၏ ဒေါ်လာ ဘီလျံချီ တန်ကြေးရှိသည့် အထည်ရောင်းချမှု စုစုပေါင်း၏ ၈၀ ရာခိုင်နှုန်းကို ဝယ်ယူနေသဖြင့် ပိတ်ဆို့မှုများ ချမှတ်ခံရမည်ဆိုပါက ယခင်ကတည်းက ယိုယွင်း နေသည့် ဘင်္ဂလားဒေ့ရှ်နိုင်ငံ စီးပွားရေးအတွက် ကြီးမားသည့် ထိုးနှက်ချက်တစ်ခု ဖြစ်လာနိုင်သည်။

ဘင်္ဂလားဒေ့ရှ်တွင် ဇန်နဝါရီ ၇ ရက်၌ ရွေးကောက်ပွဲများ ကျင်းပမည်ဖြစ်ပြီး ထိုရွေးကောက်ပွဲများမတိုင်မီ အမေရိကန်၏ ပိတ်ဆို့မှု ခြိမ်းခြောက်စကားများ ထွက်ပေါ်လာခြင်းဖြစ်သည်။

ထိုရွေးကောက်ပွဲသည် အတိုက်အခံများကို ဖိနှိပ်ထားပြီး တစ်ဖက်သတ်ဆန်သည့် ရွေးကောက်ပွဲ ဖြစ်လာလိမ့် မည်ဟု ကျယ်ကျယ်ပြန့်ပြန့် ရှုမြင်ခံထားရသည်။

ဘင်္ဂလားဒေ့ရှ်၏ အထည်ချုပ် လုပ်ငန်းကဏ္ဍတွင် ထိပ်သီး ခေါင်းဆောင်များနှင့် အစိုးရ အရာရှိများကမူ အမေရိကန်၏ ပိတ်ဆို့မှု ခြိမ်းခြောက်စကားများကို ကောလာဟလအဖြစ် ယူဆထားပြီး ထိုခြိမ်းခြောက်မှုများသည် ဘင်္ဂလားဒေ့ရှ်အစိုးရကို ဆန့်ကျင်သည့် ဝါဒဖြန့်မှုများဖြစ်သည်ဟု ပြောကြားခဲ့သည်။

ထို့ပြင် ဘင်္ဂလားဒေ့ရှ်အပေါ် စီးပွားရေးပိတ်ဆို့မှုများ၊ အထူးသဖြင့် အထည်ချုပ်ကဏ္ဍအပေါ် ပိတ်ဆို့မှုများ ချမှတ်နိုင်မည် မဟုတ်ဘဲ ဘင်္ဂလားဒေ့ရှ်၏ အထည်ချုပ် လုပ်ငန်းများသည် နိုင်ငံတကာ အလုပ်သမား ဥပဒေများ အားလုံးကို လိုက်နာကျင့်သုံး လျက်ရှိကြောင်း စောဒကတက်ခဲ့သည်။

မကြာသေးမီက ဘင်္ဂလားဒေ့ရှ်တွင် အထည်ချုပ်စက်ရုံ ဝန်ထမ်းများက လုပ်ခလစာ တိုးမြှင့်ပေးရန် အစိုးရကို တောင်းဆိုသည့် ဆန္ဒပြမှုများ ပြုလုပ်ခဲ့သဖြင့် အထည်ချုပ်စက်ရုံ အများအပြားသည် လုပ်ငန်းလည်ပတ်နိုင်ခြင်း မရှိဘဲ စက်ရုံများကို ပိတ်ခဲ့ရသည်။

ထို့ပြင် ဝန်ကြီးချုပ် ရှိတ်ဟာစီနာ (Sheikh Hasina) အစိုးရအဖွဲ့ကို နုတ်ထွက်ရန် တောင်းဆိုသည့် ဆန္ဒပြမှုများ လည်း ဖြစ်ပွားခဲ့ပြီး ထိုဆန္ဒပြမှုများအတွင်း အတိုက်အခံခေါင်းဆောင် အများအပြား ဖမ်းဆီးထိန်းသိမ်းခံခဲ့ရသည်။

Source: အယ်လ်ဂျာဇီးယား

CNI International News

ကိယက်ဗ်၊ ဒီဇင်ဘာ ၂၂ 

အသက် ၂၅ နှစ်မှ ၆၀ အရွယ်ကြားတွင်ရှိသည့် ပြည်ပရောက် ယူကရိန်းအမျိုးသားများအနေဖြင့် စစ်တပ်ထဲတွင် ပြန်လည် စစ်မှုထမ်းဆောင်ရန် တိုက်တွန်းသွားမည်ဟု ယူကရိန်းကာကွယ်ရေးဝန်ကြီး ရုစ်စ်တမ် အူမာရော့ဗ် ( Rustem Umerov ) က ပြောကြားခဲ့သည်ဟု ဘီဘီစီ အင်္ဂလိပ်ပိုင်းမှ ဖော်ပြခဲ့သည်။

ထိုတိုက်တွန်းချက်သည် ဖိတ်ကြားချက် တစ်ခုသာဖြစ်ကြောင်း၊ သို့သော် လိုက်နာခြင်းမရှိသည့် မည်သူ့ကိုမဆို ပိတ်ဆို့မှုများ ချမှတ်သွားမည်ဖြစ်ကြောင်း အူမာနော့ဗ်က ပြောသည်။

မည်သို့ပင်ဆိုစေ ယူကရိန်း ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူကမူ ထိုကြေညာချက်ကို ငြင်းဆိုခဲ့ပြီး စဉ်းစားသုံးသပ်မှုများ ပြုလုပ်မည်ဖြစ်ကြောင်း ထပ်မံထုတ်ပြန်ခဲ့သည်။

ပြီးခဲ့သည့် ရက်ပိုင်းအတွင်းက ယူကရိန်းစစ်တပ်သည် တပ်သားသစ် ၄၅၀,၀၀၀ မှ ၅၀၀,၀၀၀ အထိ ထပ်မံ စုဆောင်းရန် အဆိုပြုခဲ့ပြီး ယူကရိန်းသမ္မတ ဗိုလိုဒီမာ ဇာလန်းစကီး(Volodymyr Zelensky) က စစ်တပ်၏ အဆိုပြုချက်ကို စဉ်းစားမည်ဟု ပြောကြားခဲ့ပြီးနောက်ပိုင်း ယခုသတင်း ထွက်ပေါ်လာခဲ့ခြင်း ဖြစ်သည်။

စစ်မှုထမ်းရန် လေ့ကျင့်နေတဲ့ ယူကရိန်းအမျိုးသားတွေကို တွေ့ရစဉ်

အမေရိကန်တွင် ရီပတ်ဘလစ်ကန်အမတ်များက  ယူကရိန်းအား ဒေါ်လာ ၆၁ ဘီလျံ ထောက်ပံ့ပေးမည့် အစီအစဉ် ကို ပိတ်ဆို့ထားခြင်းနှင့် ဥရောပသမဂ္ဂ၌ ယူကရိန်းအား ယူရို ၅၀ ဘီလျံ ထောက်ပံ့ပေးမည့် အစီအစဉ်ကို ဟန်ဂေရီ က ပိတ်ပင်ခြင်းတို့ ကြုံတွေ့နေချိန်မှာပဲ ယူကရိန်းစစ်တပ်က မကြုံစဖူး တပ်သားသစ်များ စုဆောင်းသည့် သတင်းများ ထွက်ပေါ်လာခဲ့ခြင်း ဖြစ်သည်။

ဇာလန်းစကီးကမူ စစ်တပ်၏ တပ်သားသစ် စုဆောင်းမည့် အဆိုပြုချက်သည် အလွန်ထိလွယ်ရှလွယ်ရှိသည့် အရေးကိစ္စဖြစ်သဖြင့် ထိုအဆိုပြုချက်ကို လွှတ်တော်သို့ မတင်သွင်းမီ စစ်တပ်နှင့် အစိုးရအဖွဲ့အကြား ဆွေးနွေး မှုများ ပြုလုပ်သွားမည်ဟု ပြောကြားခဲ့သည်။

ရုရှား၏ ကျူးကျော်စစ်ကာလ အစောပိုင်းက ယူကရိန်းတွင် မိမိသဘော ဆန္ဒအလျောက် စစ်ထဲဝင် တိုက်ခိုက် ခဲ့သူများ ရှိခဲ့သော်လည်း လက်ရှိတွင် ရှေ့တန်းသို့ ပို့ထားသည့် စစ်သားများ၏နေရာတွင် စစ်သားအင်အား အစားထိုးဖြည့်ဆည်းရန် နောက်တန်း၌ တပ်သားသစ်များ စုဆောင်းလျက်ရှိသည်။

စစ်ပွဲ စတင်ဖြစ်ပွားခဲ့ချိန်ကတည်းက ယခုအချိန်အထိ ရုရှားနှင့်် ယူကရိန်းသည် ၎င်းတို့ဘက်မှ ထိခိုက်ကျဆုံးသည့် စစ်သား အရေအတွက်ကို ထုတ်ပြန်ခဲ့ခြင်း မရှိသော်လည်း နှစ်ဘက်စလုံးတွင် ထိခိုက်သေဆုံးသူ အရေအတွက် ထောင်၊ သောင်းချီ ရှိနိုင်ကြောင်း အမေရိကန်အရာရှိများက ခန့်မှန်းထားသည်။

Source: BBC

CNI International News

ဆိုးလ်၊ ဒီဇင်ဘာ ၂၂ 

နျူကလီးယား လက်နက်များနှင့် ရန်စခံရမည်ဆိုပါက နျူကလီးယားလက်နက်များဖြင့် တုန့်ပြန်တိုက်ခိုက်ရန် တုံ့ဆိုင်းသွားမည် မဟုတ်ကြောင်း မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) က ပြောသည်ဟု CNA မှ ဖော်ပြခဲ့သည်။

ပြီးခဲ့သည့် သီတင်းပတ်က ဝါရှင်တန်တွင် တောင်ကိုရီးယားနှင့် အမေရိကန်အကြား အစည်းအဝေး ပြုလုပ်ခဲ့ပြီး နောက် ဒီဇင်ဘာ ၂၁ ရက်တွင် ကင်မ်က သတိပေးခဲ့ခြင်း ဖြစ်သည်ဟု မြောက်ကိုရီးယားနိုင်ငံပိုင် KCNA သတင်း အေဂျင်စီက ဖော်ပြခဲ့သည်။

တောင်ကိုရီးယားနှင့် အမေရိကန်အကြား အစည်းအဝေး လုပ်ငန်းစဉ်ထဲတွင် နျူကလီးယားနှင့် မဟာဗျူဟာ မြောက် အစီအစဉ်များ ပါဝင်ခဲ့ပြီး ၎င်းတို့အပေါ် မည်သည့် နျူကလီးယား တိုက်ခိုက်မှုကိုမဆို ပြုလုပ်မည်ဆိုပါက မြောက်ကိုရီးယားအစိုးရ၏ အဆုံးသတ်ဖြစ်မည်ဟု ပြောကြားခဲ့သည်။ 

သို့သော် ကင်မ်ကမူ မြောက်ကိုရီးယားအနေဖြင့် နျူကလီးယားလက်နက်များဖြင့် ရန်စခံရမည်ဆိုပါက နျူကလီးယား လက်နက်များနှင့် ပြန်လည်တိုက်ခိုက်ရန် တွန့်ဆုတ်နေမည် မဟုတ်ကြောင်း မြောက်ကိုရီးယား စစ်တပ်၏ ဒုံးကျည်တပ်ဖွဲ့ကို ပြောကြားခဲ့သည်ဟု KCNA မှ ဖော်ပြခဲ့သည်။

တောင်ကိုရီးယားသမ္မတနဲ့ အမေရိကန်သမ္မတကို တွေ့ရစဉ်

မြောက်ကိုရီးယား၏ ကြေညာချက် ထွက်ပေါ်လာခဲ့ပြီးနောက် အမေရိကန်၊ တောင်ကိုရီးယားနှင့် ဂျပန်တို့က မြောက်ကိုရီးယားအနေဖြင့် နောက်ထပ် ရန်လိုမှုများကို ရပ်တန့်ရန်နှင့် ဆွေးနွေးညှိနှိုင်းမှုများ ပြုလုပ်ရန် ထုတ်ပြန်ခဲ့သည်။ 

ယခုနှစ်အတွင်း မြောက်ကိုရီးယားသည် ဒုံးကျည်စမ်းသပ်မှုများ စံချိန်တင် ပြုလုပ်ခဲ့ပြီးနောက် အမေရိကန်၊ တောင်ကိုရီးယားနှင့် ဂျပန်တို့သည် သုံးပွင့်ဆိုင် ကာကွယ်ရေး ပူးပေါင်းဆောင်ရွက်မှုများကို မြှင့်တင်ခဲ့သည်။

ထို့ပြင် အမေရိကန်၊ တောင်ကိုရီးယားနှင့် ဂျပန်တို့သည် မြောက်ကိုရီးယား၏ ဒုံးကျည်ပစ်လွှတ်မှုများနှင့် ပတ်သက် ပြီး အချိန်နှင့်တစ်ပြေးညီ အချက်အလက်များကို မျှဝေသည့် အစီအစဉ်အား ဒီဇင်ဘာ ၁၉ ရက်တွင် စတင် လုပ်ဆောင်ခဲ့သည်။

ဒီဇင်ဘာ ၁၈ ရက်ကလည်း မြောက်ကိုရီးယားသည် ၎င်း၏ အင်အားအပြင်းဆုံး တိုက်ချင်းပစ် ပဲ့ထိန်းဒုံးကျည်ဖြစ် သည့် Hwasong-18 ဒုံးကျည်ကို စမ်းသပ်ပစ်လွှတ်ခဲ့သည်။

ထိုဒုံးကျည် ပစ်လွှတ်မှုသည် အမေရိကန်နှင့် ၎င်း၏ မဟာမိတ်များကို သတိပေးခြင်းဖြစ်ကြောင်း မြောက်ကိုရီးယားက ပြောကြားခဲ့သည်။

Source: CNA

CNI International News

မော်စကို၊ ဒီဇင်ဘာ ၂၂

အမေရိကန်သည် ပါလက်စတိုင်းနိုင်ငံထူထောင်မည့် အခြေအနေကို ပယ်ဖျက်ရန် ကြိုးပမ်းနေသည်ဟု ရုရှားနိုင်ငံ ခြားရေးဝန်ကြီး ဆာဂျေ လာဗရော့ဗ် (Sergey Lavrov) က ပြောကြားခဲ့ကြောင်း တာ့စ်သတင်းဌာနမှ ဖော်ပြခဲ့ သည်။

အာရပ်လိဂ် (Arab League) ၊ အစ္စလာမ်မစ် ပူးပေါင်းဆောင်ရွက်ရေးအဖွဲ့ (OIC) အဖွဲ့ဝင်နိုင်ငံများအပြင် ရုရှားနှင့် တူနီးရှားနိုင်ငံတို့သည် အစ္စရေး-ပါလက်စတိုင်း ပဋိပက္ခအတွက် ကြေညာချက်တစ်ခု ထုတ်ပြန်ရန် စဉ်ဆက်မပြတ် ကြိုးပမ်းဆောင်ရွက်ခဲ့ကြောင်း လာဗရော့ဗ်က ပြောသည်။

မည်သို့ပင်ဆိုစေ မိမိတို့သည် ပါလက်စတိုင်းနိုင်ငံ ထူထောင်ရေးအတွက် အနောက်နိုင်ငံများ၏ စိတ်အားထက်သန် မှုမရှိသည့် အခြေအနေများကို မြင်တွေ့ခဲ့ရကြောင်း လာဗရော့ဗ်က တူနီးရှားနိုင်ငံတွင် တူနီးရှားသမ္မတ ကာအစ်စ် ဆိုင်အက်ဒ် (Kais Saied) နှင့် အစည်းအဝေး ပြုလုပ်ခဲ့ပြီးနောက် ပြောကြားခဲ့ခြင်း ဖြစ်သည်။

 ပါလက်စတိုင်း တက်ကြွလှုပ်ရှားသူများကို တွေ့ရစဉ်

အမေရိကန်သည် ကုလသမဂ္ဂလုံခြုံရေးကောင်စီတွင် အစ္စရေး-ပါလက်စတိုင်း ပဋိပက္ခအတွက် အပစ်အခတ်ရပ်စဲ ရေး၊ လူသားချင်း စာနာထောက်ထားမှုဆိုင်ရာ အကူအညီများ ထောက်ပံ့ပေးရေးနှင့်ပတ်သက်ပြီး ကြေညာချက် တစ်စောင် ထုတ်ပြန်ရန် အဆိုပြုချက်များကို ဗီတိုအာဏာဖြင့် ပယ်ချခဲ့ကြောင်း လာဗရော့ဗ်က ပြောကြားခဲ့သည်။

"ကုလသမဂ္ဂလုံခြုံရေးကောင်စီရဲ့ ပြဋ္ဌာန်းချက်ကို ပိုမိုထင်ရှားစေမယ့် မူဝါဒတွေအပေါ် အခြေခံထားတဲ့ ဆွေးနွေး ညှိနှိုင်းမှုတွေမှာ ပါလက်စတိုင်းနိုင်ငံ ထူထောင်ရေးနဲ့ပတ်သတ်တဲ့ အားထုတ်ကြိုးပမ်းမှုတွေဟာ ပယ်ချခံခဲ့ရပါ တယ်”ဟု ရုရှားနိုင်ငံခြားရေးဝန်ကြီးက ပြောသည်။

လာဗရော့ဗ်က  သူသည် ဂါဇာကမ်းမြောင်ဒေသ အရေးနှင့်ပတ်သက်ပြီး တူနီးရှားသမ္မတနှင့် ဆွေးနွေးမှုများ လုပ်ဆောင်ခဲ့ပြီး လူသားချင်းစာနာထောက်ထားမှုဆိုင်ရာ အကူအညီများ အမြန်ဆုံးရရှိရေးနှင့် အကြမ်းဖက် မှုများကို အမြန်ဆုံး ရပ်တန့်အောင် လုပ်ဆောင်ရန် သဘောတူညီခဲ့သည်ဟုလည်း ပြောကြားခဲ့သည်။

Source: တာ့စ်

CNI International News

မော်စကို၊ ဒီဇင်ဘာ ၂၁

ဖင်လန်နှင့် အမေရိကန်အကြား ကာကွယ်ရေးသဘောတူစာချုပ် အသစ်တစ်ခု ချုပ်ဆိုခဲ့မှုကို ဆန့်ကျင်ရန် ရုရှားက ဒီဇင်ဘာ ၁၉ ရက်တွင် ဖင်လန် သံအမတ်ကြီးအား ဆင့်ခေါ်ခဲ့ပြီး ထိုစာချုပ်ကို တုန့်ပြန်သွားမည်ဖြစ်ကြောင်း ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဖင်လန်နှင့် အမေရိကန်အကြား သဘောတူညီချက်အရ ရုရှားနှင့် နယ်စပ်ချင်းထိစပ်နေသည့် ဖင်လန်နိုင်ငံ၏ နယ်စပ်ဒေသတစ်လျှောက်တွင် အမေရိကန်က ကျယ်ကျယ်ပြန့်ပြန့် ဝင်ရောက်လှုပ်ရှားခွင့် ရရှိမည်ဖြစ်သည်။

ရုရှားအနေဖြင့် မိမိတို့ နယ်စပ်ဒေသတစ်လျှောက် နေတိုး၏ စစ်အင်အား တည်ဆောက်မှု အလားအလာကို ခွင့်ပြုမည်မဟုတ်ဘဲ ထိုအခြေအနေသည် မိမိတို့နိုင်ငံ၏ လုံခြုံရေးကို ခြိမ်းခြောက်နေကြောင်း၊ မိမိတို့အနေနှင့် ဖင်လန်နှင့် ၎င်း၏ နေတိုးမဟာမိတ်များ၏ ရန်လိုသည့် ဆုံးဖြတ်ချက်များကို တန်ပြန်ရန် လိုအပ်သည့် အစီအမံ များ လုပ်ဆောင်သွားမည်ဖြစ်ကြောင်း ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မာရီယာ ဇာခါရိုဗာ (Maria Zakharova) က ပြောကြားခဲ့သည်။

ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မာရီယာ ဇာခါရိုဗာကို တွေ့ရစဉ်

၂၀၂၂ ခုနှစ်၊ ဖေဖော်ဝါရီလက ယူကရိန်းကို ရုရှားက ဝင်ရောက် တိုက်ခိုက်ခဲ့ပြီးနောက် ဖင်လန်သည် ဧပြီ ၄ ရက် တွင် နေတိုးမဟာမိတ်အဖွဲ့၏ အဖွဲ့ဝင်အသစ်ဖြစ်လာခဲ့သည်။ 

ဒီဇင်ဘာ ၁၈ ရက်က ဖင်လန်နှင့် အမေရိကန်အကြား သဘောတူညီချက်အရ ပဋိပက္ခဖြစ်ပွားလာခဲ့သည့် အခြေအနေတွင် အမေရိကန်သည် ဖင်လန်ကို စစ်ရေးကူညီထောက်ပံ့မှုများအား လျင်မြန်စွာ ပေးနိုင်လိမ့်မည် ဖြစ်ကြောင်း အမေရိကန်အရာရှိများက ပြောကြားခဲ့သည်။ 

ထိုသဘောတူညီချက်တွင် လေတပ်စခန်း ၄ ခုနှင့် စစ်ဘက်ဆိုင်ရာ ဆိပ်ကမ်းတစ်ခု အပါအဝင် ဖင်လန်ရှိ အဆောက်အအုံများနှင့် နေရာဒေသ ၁၅ ခု၌ အမေရိကန်စစ်တပ်က ဝင်ရောက်လှုပ်ရှားခွင့်နှင့် လက်နက်ပစ္စည်း များ၊ ခဲယမ်းများ သိုလှောင်ခွင့် ရရှိမည်ဖြစ်သည်။
အမေရိကန်သည် အရှေ့ဥရောပနိုင်ငံ အများစုနှင့််လည်း အလားတူ သဘောတူညီချက်များ ရရှိထားသည်။ 

ရုရှားအစိုးရကမူ ထိုသဘောတူညီချက်သည် မိမိတို့အတွက် ခြိမ်းခြောက်မှု ဖြစ်လာလိမ့်မည်ဖြစ်ပြီး ရုရှားနှင့် ဖင်လန်အကြား တင်းမာမှုများ မြင့်တက်စေနိုင်ကြောင်း ဒီဇင်ဘာ ၁၅ ရက်က ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ ဒီဇင်ဘာ ၂၁

အမေရိကန်သည် အီရန်တွင် ဒရုန်းများ ထုတ်လုပ်ရန် ကုန်သွယ်ရေး တားမြစ်ကန့်သတ်ချက်များကို ရှောင်ကွင်းပြီး ဒရုန်းအစိတ်အပိုင်းများအား ထောက်ပံ့ပေးနေသည့် ကွန်ရက်တစ်ခုကို ပိတ်ဆို့မှုများ ပြုလုပ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။ 

အဆိုပါ ပိတ်ဆို့မှု အစီအစဉ်များသည် အီရန်သို့ တားမြစ်ပိတ်ပင်ခံထားရသည့် အစိတ်အပိုင်းများကို ပေးပို့နေသော ပြည်ပကုမ္ပဏီများ၏ ကွန်ရက်တစ်ခုကို ပစ်မှတ်ထားခဲ့ခြင်း ဖြစ်သည်ဟု အမေရိကန်ဘဏ္ဍာရေးဝန်ကြီးဌာနက ဒီဇင်ဘာ ၁၉ ရက်တွင် ထုတ်ပြန်ခဲ့သည်။

အီရန်နိုင်ငံတွင် ထုတ်လုပ်ခဲ့သည့် ဒရုန်းများသည် အရှေ့အလယ်ပိုင်းနှင့် ယူကရိန်းတွင် ဖြစ်ပွားနေသည့် စစ်ပွဲများ၌ တွင်ကျယ်စွာ အသုံးပြုလျက်ရှိသည်။

အမေရိကန်၏ ပိတ်ဆို့မှုများထဲတွင် အဖွဲ့အစည်း ၁၀ ခုနှင့် လူပုဂ္ဂိုလ် ၄ ဦးတို့ကို ပစ်မှတ်ထားခဲ့ခြင်း ဖြစ်သည်။ 

အမေရိကန်ဘဏ္ဍာရေးဝန်ကြီးဌာနကိုတွေ့ရစဉ်

ပိတ်ဆို့ခံခဲ့ရသည့် ကုမ္ပဏီများနှင့် အဖွဲ့အစည်းများသည် အီရန်၊ မလေးရှား၊ ဟောင်ကောင်နှင့် အင်ဒိုနီးရှား နိုင်ငံတို့ တွင် အခြေစိုက်ပြီး ကွန်ရက်ဖွဲ့လှုပ်ရှားနေကြောင်း အမေရိကန်က ပြောကြားခဲ့သည်။ 

ထိုကွန်ရက်သည် အီရန် တော်လှန်ရေးအစောင့်တပ်ဖွဲ့၏ လေကြောင်းအာကာသ အဖွဲ့အစည်းအတွက် ဒေါ်လာ သောင်းချီတန်ဖိုးရှိသည့် ဒရုန်းအစိတ်အပိုင်းများကို ထောက်ပံ့ပေးနေသည်ဟု အမေရိကန် ဘဏ္ဍာရေးဝန်ကြီးဌာန က ပြောသည်။

ထို့ပြင် အီရန်သည် အရှေ့အလယ်ပိုင်းနှင့် ရုရှားရှိ အကြမ်းဖက်အဖွဲ့များကို ဒရုန်းများ ထောက်ပံ့ပေးနေသည်ဟု  အမေရိကန်အစိုးရက စွပ်စွဲခဲ့သည်။

အမေရိကန် တရားရေးဝန်ကြီးဌာနကလည်း ဒီဇင်ဘာ ၁၉ ရက်တွင် ထိုကွန်ရက်၏ ခေါင်းဆောင်ဟု ယူဆရသည့် ဟော့စိန် ဟာတီဖီ အာဒါကာနီ (Hatefi Ardakani) ကို စွပ်စွဲပြစ်တင်မှု ပြုလုပ်ခဲ့သည်။ 

အီရန်အခြေစိုက် အာဒါကာနီသည် အမေရိကန်လုပ် လျှပ်စစ်ပစ္စည်းများကို တရားမဝင်ဝယ်ယူပြီး အီရန်သို့ ထောက်ပံ့ ပို့ဆောင်ပေးရန် ပူးပေါင်းကြံစည်မှုစွဲချက်များဖြင့် စွပ်စွဲခံထားရသည်။ 

အီရန်သည် ယူကရိန်းစစ်ပွဲတွင် ရုရှားအား ဒရုန်းများ အပါအဝင် လက်နက်များ ထောက်ပံ့ပေးနေသည်ဟု ကာလကြာရှည် စွပ်စွဲခံနေရသော်လည်း အီရန်ကမူ ထိုစွပ်စွဲချက်များကို ငြင်းဆိုခဲ့သည်။

Source: အယ်လ်ဂျာဇီးယား

CNI International News

ကိယက်ဗ်၊ ဒီဇင်ဘာ ၂၁

ယူကရိန်းစစ်တပ်သည် တပ်သားသစ် ၄၅၀,၀၀၀ မှ ၅၀၀,၀၀၀ အထိ စုဆောင်းရန် အဆိုပြုခဲ့ပြီး ထိုအဆိုပြုချက်ကို ဆွေးနွေးမှုများ ပြုလုပ်ရန်လိုအပ်ကြောင်း ယူကရိန်းသမ္မတ ဇာလန်းစကီး (Volodymyr Zelenskyy)က ပြောကြား ခဲ့သည်။

စစ်တပ်၏ တပ်သားသစ် စုဆောင်းမည့် အဆိုပြုချက်သည် အလွန်ထိလွယ်ရှလွယ်ရှိသည့် အရေးကိစ္စဖြစ်သဖြင့် ထိုအဆိုပြုချက်ကို လွှတ်တော်သို့ မတင်သွင်းမီ စစ်တပ်နှင့် အစိုးရအဖွဲ့အကြား ဆွေးနွေးမှုများ ပြုလုပ်သွားမည်ဟု ဇာလန်းစကီးက နှစ်ကုန်ပိုင်းတွင် ပြုလုပ်နေကျ သတင်းစာရှင်းလင်းပွဲ၌ ပြောကြားခဲ့သည်။

ထိုအဆိုပြုချက်ကို အတည်မပြုမီ တပ်သားသစ်များ စုဆောင်းမည့် အစီအစဉ်များနှင့်ပတ်သက်ပြီး အချေအတင် ဆွေးနွေးမှုများကို ပိုမိုနားထောင်ချင်ကြောင်း ပြောကြားခဲ့သည်။ 

"ဒါက တော်တော်များပြားတဲ့ တပ်သားသစ် စုဆောင်းမှု အရေအတွက် ဖြစ်ပါတယ်။ ဒီအဆိုပြုချက်နဲ့ ပတ်သက်ပြီး မေးခွန်းတွေ ရှိနေပါတယ်။ ပြည်သူတွေဆီက ကြားရမယ့် မေးခွန်းတွေ၊ တပ်သားသစ် စုဆောင်မှုမှာ သာတူညီမျှမှု နဲ့ပတ်သက်တဲ့ မေးခွန်းတွေ၊ စစ်တပ်ရဲ့ စွမ်းဆောင်ရည်အပေါ် မေးခွန်းတွေနဲ့ ငွေကြေးပိုင်းအရ မေးခွန်းတွေ ရှိနေ ပါတယ်" ဟု ဇာလန်းစကီးက ပြောသည်။ 

ယူကရိန်းစစ်တပ်ကိုတွေ့ရစဉ်

ရုရှား၏ ကျူးကျော်စစ်ကာလ အစောပိုင်းက ယူကရိန်းတွင် မိမိသဘောဆန္ဒအလျောက် စစ်တပ်ထဲဝင်ရောက် တိုက်ခိုက်ခဲ့သူများ ရှိခဲ့သော်လည်း လက်ရှိမှာတော့ ရှေ့တန်းသို့ ပို့ထားသည့် စစ်သားများ၏နေရာတွင် စစ်သား အင်အား အစားထိုး ဖြည့်ဆည်းရန် နောက်တန်း၌ တပ်သားသစ်များ စုဆောင်းလျက်ရှိသည်။

စစ်ပွဲစတင် ဖြစ်ပွားခဲ့ချိန်ကတည်းက ယခုအချိန်အထိ ရုရှားနှင့်် ယူကရိန်းသည် ၎င်းတို့ဘက်မှ ထိခိုက်ကျဆုံးသည့် စစ်သားအရေအတွက်ကို ထုတ်ပြန်ခဲ့ခြင်း မရှိသော်လည်း နှစ်ဘက်စလုံးတွင် ထိခိုက်သေဆုံးသူ အရေအတွက် ထောင်၊သောင်းချီ ရှိနိုင်ကြောင်း အမေရိကန်အရာရှိများက ခန့်မှန်းထားသည်။

ယူကရိန်း၏ စစ်သားအရေအတွက်ကို မသိရသော်လည်း စစ်ပွဲမဖြစ်ပွားမီ ယူကရိန်း၏ ပြောကြားချက်များအရ ယူကရိန်းစစ်တပ်တွင် စစ်သားအင်အား ၁ သန်းနီးပါးရှိကြောင်း သိရသည်။

ရုရှားနိုင်ငံကမူ စစ်ပွဲအတွင်း ၎င်း၏ တပ်ဖွဲ့ဝင်အင်အားကို တိုးမြှင့်ခဲ့ပြီး ရုရှားစစ်သား အရေအတွက်ကို ၁ ဒသမ ၅ သန်းအထိ မြှင့်တင်ရန်စီစဉ်ထားကြောင်း ဒီဇင်ဘာ ၁၉ ရက်က ပြောကြားခဲ့သည်။

Source: ရိုက်တာ