CNI International News

ဆိုးလ်၊ မတ်လ ၂၁

ပြီးခဲ့သည့် သီတင်းပတ်ကုန်ပိုင်းတွင် တောင်ကိုရီးယားသို့ ပဲ့ထိန်းဒုံးကျည်ဖြင့် နျူကလီးယားတိုက်ခိုက်မှု လုပ် ဆောင်သည့် ပုံစံမျိုး ဖန်တီးလေ့ကျင့်ခဲ့သည်ဟု မြောက်ကိုရီးယားမှပြောကြောင်း အေပီသတင်းတွင် ဖော်ပြထားသည်။

ထိုလေ့ကျင်မှုက အမေရိကန်-တောင်ကိုရီးယားတို့၏ အင်အားအကြီးဆုံး စစ်ရေးလေ့ကျင့်မှုကို တုန့်ပြန်ရေး အ တွက် ယခုလအတွင်း ပြုလုပ်ခဲ့သော မြောက်ကိုရီးယား၏ ၅ ကြိမ်မြောက် လက်နက်စမ်းသပ်မှုလည်း ဖြစ်သည်။

ရန်သူများ၏ ရန်လိုမှုနှင့် ရင်ဆိုင်ရချိန်တွင် နျူကလီးယားတပ်ဖွဲ့၏ အဆင်သင့် ဖြစ်မှုကို မြှင့်တင်ထားရေး စစ်ရေး လေ့ကျင့်မှုများ ပိုမိုလုပ်ဆောင်ထားရန် မြောက်ကိုရီးယား ခေါင်းဆောင်ကင်မ်က စစ်တပ်အား ညွှန်ကြားထား သည်ဟု နိုင်ငံပိုင်သတင်းတွင် ဖော်ပြထားသည်။

မြောက်ကိုရီးယား ဒုံးကျည်ပစ်လွှတ်နေစဉ်

မြောက်ကိုရီးယားမှ တနင်္ဂနွေနေ့တွင် တာတိုပစ် ဒုံးကျည်တစ်စင်းကို အရှေ့ဘက် ကမ်းလွန် ပင်လယ်ပြင်သို့ ပစ်လွှတ်ခဲ့ကြောင်း သတိပြုမိခဲ့သည်ဟု တောင်ကိုရီးယားနှင့် ဂျပန်စစ်တပ်များက ထုတ်ပြန်ထားသည်။

ထို့နောက် နာရီပိုင်းအကြာတွင် အမေရိကန်၏ B-1B ဗုံးကြဲလေယာဉ်များသည် စစ်ရေးလေ့ကျင့်မှု လုပ်ဆောင်ရန် အတွက် တောင်ကိုရီးယားသို့ ရောက်ရှိလာခဲ့သည်။

တောင်ကိုရီးယားနှင့် အမေရိကန်တို့၏ စစ်ရေးလေ့ကျင့်မှုများသည် ၎င်းတို့အပေါ် ကျူးကျော်ရန် ကြိုတင်ပြင်ဆင် မှုများဟု မြောက်ကိုရီးယားဘက်က ရှုမြင်ထားသော်လည်း စစ်ရေးလေ့ကျင့်မှုများသည် ကာကွယ်ရေးအတွက်သာ ရည်ရွယ်သည်ဟု မဟာမိတ်များက ပြောသည်။

မြောက်ကိုရီးယားသည် စစ်ရေးလေ့ကျင့်မှုများကို ၎င်းတို့၏ လက်နက်စမ်းသပ်ရေး စီမံကိန်းများအတွက် အသုံးချ နေသည်ဟုလည်း လေ့လာသူတစ်ချို့က သုံးသပ်သည်။

ဗုံးကြဲလေယာဉ်တွေနဲ့ အမေရိကန်နဲ့ တောင်ကိုရီးယား ပူးတွဲစစ်ရေးလေ့ကျင့်နေစဉ်

စမ်းသပ်ပစ်လွှတ်ခဲ့သော ဒုံးကျည်သည် ကီလိုမီတာ ၈၀၀ ခန့် ပျံသန်းကာ ယင်းတွင် နျူကလီးယား ထိပ်ဖူးအတု တပ်ဆင်ထားသည်ဟု မြောက်ကိုရီးယားနိုင်ငံပိုင် KCNA သတင်းတွင် ဖော်ပြသည်။

ဒုံးကျည်သည် ပစ်မှတ်ဟု သတ်မှတ်ထားသော ရေပြင်အထက် မီတာ ၈၀၀ မှ နေရာအား အောင်မြင်စွာ ထိမှန်ခဲ့ သည်ဟု သတင်းတွင် ဖော်ပြသည်။ ဒုံးကျည်၏ နျူကလီးယား ဖောက်ခွဲမှုထိန်းချုပ်ရေး ကိရိယာများနှင့် ထိပ်ဖူး များ၏ ယုံကြည်စိတ်ချရမှုအပေါ် ထပ်မံ အတည်ပြုမှုလည်း ဖြစ်သည်။

တနင်္ဂနွေနေ့ ပစ်ခတ်မှုသည် နှစ်ရက်ကြာ လေ့ကျင့်မှု၏ နောက်ဆုံး အဆင့်ဖြစ်ကာ မြောက်ကိုရီးယားနိုင်ငံအား စစ်ပြုရန် ကြိုးပမ်းနေသည့် အမေရိကန်နှင့် တောင်ကိုရီးယားတို့အား ပြင်းထန်စွာ သတိပေးချက်ဖြစ်သည်ဟု လည်း KCNA သတင်းတွင် ဖော်ပြသည်။

KCNA မှ ထုတ်ပြန်သော ဓာတ်ပုံများ၌ တောထဲတွင် လမ်းလျှောက်နေသော ကင်မ်ဂျုံအန်၊ သမီးဖြစ်သူနှင့် စစ်တပ် အရာရှိများကို သာမက သစ်တောတွင်းမှ ပျံတက်လာသည့် တာတိုပစ် နျူကလီးယားဒုံးကျည် တစ်ခုကိုလည်း မြင်တွေ့ခဲ့ရသည်။

Source: AP

CNI International News

ဆိုးလ်၊ မတ်လ ၂၀

မြောက်ကိုရီးယားသည် ကိုရီးယားကျွန်းဆွယ်၏ အရှေ့ဘက် ကမ်းလွန်ပင်လယ်ပြင်သို့ တာတိုပစ်ပဲ့ထိန်း ဒုံးကျည် တစ်စင်း ပစ်လွှတ်ခဲ့သည်ဟု တောင်ကိုရီးယားနှင့်ဂျပန်တို့က ပြောသည်။

ဒွန်ချန်းရီ (Dong Chang ri) မှ တနင်္ဂနွေနေ့ နေ့လည် ၁၁ နာရီ ၅ မိနစ်တွင် ပစ်လွှတ်ခဲ့သော ဒုံးကျည်သည် ပစ်မှတ်ကို မထိခင် ကီလိုမီတာ ၈၀၀ ခန့် ပျံသန်းခဲ့သည်ဟု တောင်ကိုရီးယားစစ်တပ်မှ ထုတ်ပြန်သော ကြေညာ ချက်တွင် ဖော်ပြထားသည်။

ဒုံးကျည်သည် အမြင့် ၅၀ ကီလိုမီတာခန့်မှ ပျံသန်းသွားခြင်း ဖြစ်သည်ဟု ဂျပန်ကာကွယ်ရေးဌာနက ပြောသည်။

ယခုကဲ့သို့ ပဲ့ထိန်းဒုံးကျည်များ မကြာခဏ ပစ်လွှတ်နေခြင်းသည် မြောက်ကိုရီးယားအနေဖြင့် ကုလသမဂ္ဂ လုံခြုံရေး ကောင်စီ ဆုံးဖြတ်ချက်ကို သိသိသာသာ ချိုးဖောက်မှုဟု တောင်ကိုရီးယားဘက်မှ ပြောသည်။

ဂျပန်ကာကွယ်ရေးဝန်ကြီးဌာန ဒုတိယဝန်ကြီး တိုရှီရို အီနိုကိုတွေ့ရစဉ်

မြောက်ကိုရီးယား၏ ဒုံးကျည်စမ်းသပ်မှု လုပ်ဆောင်ပြီးနောက် လေကြောင်း ပူးတွဲစစ်ရေး လေ့ကျင့်မှုများတွင် ပူးပေါင်းရန်အတွက် အမေရိကန်ဘက်မှ B-1B စစ်လေယာဉ်တစ်စင်း ထားရှိခဲ့သည်ဟု တောင်ကိုရီးယား အမျိုးသား ကာကွယ်ရေးဌာနက ပြောသည်။

မြောက်ကိုရီးယား၏ တနင်္ဂနွေနေ့ စမ်းသပ်ပစ်လွှတ်မှုကို အမေရိကန်နှင့်ဂျပန်တို့ကလည်း ပြစ်တင်ရှုတ်ချခဲ့သည်။

ဒုံးကျည်သည် ဂျပန်၏ အထူးစီးပွားရေးဇုန် အပြင်ဘက်သို့ ကျရောက်ခဲ့ပြီး ထိုဖြစ်ရပ်ကြောင့် ထိခိုက်ပျက်စီးမှု တစ်စုံတစ်ရာ သတင်းမရရှိသေးဟု ဂျပန်ကာကွယ်ရေးဝန်ကြီးဌာန ဒုတိယဝန်ကြီး တိုရှီရို အီနို (Toshiro Ino) က ပြောသည်။

ထိုလုပ်ရပ်သည် လုံးဝ သည်းခံ၍ မရကြောင်း၊ ဂျပန်ဒေသတွင်းနှင့် နိုင်ငံတကာ အသိုင်းအဝိုင်းအပေါ် ခြိမ်းခြောက် မှုဟုလည်း ဂျပန်ဘက်က သတ်မှတ်ခဲ့သည်။

မြောက်ကိုရီးယားခေါင်းဆောင် ကင်မ်ကိုတွေ့ရစဉ်

မြောက်ကိုရီးယား၏ လုပ်ရပ်များသည် နိုင်ငံတကာ ငြိမ်းချမ်းရေးနှင့်လုံခြုံရေးကို ခြိမ်းခြောက်ကာ ယင်းသည် လက်ခံနိုင်စရာ မဟုတ်ကြောင်း အီနိုက သတင်းစာ ရှင်းလင်းပွဲတစ်ခုတွင် ပြောဆိုခဲ့သည်။

ထို့နောက် ဂျပန်အစိုးရသည် ထိုဖြစ်ရပ်အတွက် ဘေဂျင်းရှိ မြောက်ကိုရီးယားသံရုံးကို ဆန္ဒပြ ကန့်ကွက်ခဲ့သည် ဟုလည်း ၎င်းက ဆိုသည်။

တနင်္ဂနွေနေ့ စမ်းသပ်ပစ်လွှတ်မှုသည် အမေရိကန် တပ်ဖွဲ့ဝင်များနှင့် မဟာမိတ်များအပေါ် ချက်ချင်း ဆိုးကျိုး သက်ရောက်မှုရှိသည်ဟု အမေရိကန် အင်ဒို-ပစိဖိတ်ဌာနချုပ်က ပြောသည်။

သို့သော် မကြာသေးခင်က ပြုလုပ်ခဲ့သော စမ်းသပ်မှုများသည် မြောက်ကိုရီးယား၏ တရားမဝင် အဖျက်စွမ်းအား ပြင်း လက်နက်များနှင့် ပဲ့ထိန်း ဒုံးကျည်စနစ်များက မတည်မငြိမ်ဖြစ်သော အကျိုးသက်ရောက်မှုများ ဖြစ်စေသည် ကို ဖော်ညွှန်းနေသည်ဟုလည်း ဌာနချုပ်မှ ထုတ်ပြန်သော ကြေညာချက် တစ်စောင်တွင် ဖော်ပြထားသည်။

Source: Aljazeera

CNI International News

ကိယက်ဗ်၊ မတ်လ ၂၀

ရုရှားသမ္မတ ဗလာဒီမာပူတင်သည် (Vladimir Putin) သည် ရုရှားတို့ သိမ်းပိုက်ထားသော ယူကရိန်း၏ မာရီယူ‌ပေါလ်(Mariupol) သို့ သွားရောက်လည်ပတ်ခဲ့ကြောင်း AP သတင်းတွင် ဖော်ပြသည်။

ယင်းသည် စက်တင်ဘာလကမှ သိမ်းပိုက်ထားသော ယူကရိန်းနယ်မြေသို့ ပူတင်၏ ပထမဆုံးခရီးစဉ်ဖြစ်ကာ စစ်ရာဇဝတ်မှုများအတွက် ၎င်းအပေါ် ICC က ဖမ်းဝရမ်းထုတ်မှုအပေါ် အာခံပြခဲ့ခြင်းလည်းဖြစ်သည်။

ပူတင်သည် ခရိုင်းမီးယား(Crimea) ကို သွားရောက်ခဲ့ပြီးနောက် မာရီယူပေါလ်သို့ တနင်္ဂနွေနေ့နှောင်းပိုင်းတွင် ရောက်ရှိခဲ့သည်ဟု ရုရှားအစိုးရအဖွဲ့ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ် (Dmitry Peskov) က ပြောသည်။ ခရိုင်းမီးယားကျွန်းဆွယ်အား ရုရှားတို့ သိမ်းပိုက်ခြင်း ကိုးနှစ်ပြည့်အထိမ်းအမှတ်အဖြစ် ပင်လယ်နက်ကျွန်းဆွယ်သို့ ပူတင်သွားရောက်ခဲ့ခြင်းဖြစ်သည်။

အဆိုပါ ခရီးစဉ်များအတွင်း ပူတင်သည် မာရီယူပေါလ်ဒေသခံများနှင့် စကားပြောဆိုခြင်း၊ ခရိုင်းမီးယားရှိ အနုပညာကျောင်းတစ်ခုနှင့် ကလေးစင်တာတစ်ခုသို့ သွားရောက်လည်ပတ်ခဲ့ခြင်းတို့ကိုလည်း တွေ့ခဲ့ရသည်။ ယူကရိန်းတပ်သားတစ်စုသည် စတီးစက်ရုံတစ်ခုတွင် အစစ အရာရာ အင်အားသာလွန်သော ရုရှားတပ်သားများကို သုံးလနီးပါးကြာခံတိုက်ခဲ့သည့်ဖြစ်စဉ်ကြောင့် မာရီယူပေါလ်သည် ကမ္ဘာ့အလယ်တွင် ယူကရိန်းသားတို့၏ ခုခံမှု ပြယုဂ်တစ်ခုအဖြစ်ထင်ရှားခဲ့သည်။

ရုရှားသမ္မတ ဗလာဒီမာပူတင်သည် ရုရှားထိန်းချုပ်ထားသော ဒွန်နက်စ်ဒေသရှိ မာရီယူပေါလ်သို့ လာရောက် လည်ပတ်စဉ်

ရုရှားတို့၏ ဒုံးကျည်ဒဏ်ကြောင့် မြို့ဧရိယာ အများစုသည် အပျက်အစီးများဖြင့် ပြည့်နှက်လျက်ရှိသည်။ ခရီးစဉ် များအတွင် ပူတင်သည် ၎င်းအပေါ်ဖမ်းဝရမ်းထုတ်ခြင်းနှင့်ပတ်သက်၍ တစ်စုံတစ်ရာပြောဆိုခြင်းမရှိခဲ့ပေ။ ဝရမ်း ကြောင့် ပူတင်သည် ချက်ချင်းလက်ငင်း အဖမ်းခံရနိုင်ခြေမရှိပေမယ့်လည်း ယင်းက ၎င်းအား နိုင်ငံတကာ စာမျက်နှာတွင် ပို၍ အထီးကျန်မှုကို ဖြစ်စေမည်ဖြစ်သည်။ ရုရှားအစိုးရသည် ICC အား အသိအမှတ်ပြုခြင်း မရှိသကဲ့သို့ ဝရမ်းထုတ်ခြင်းကိုလည်း အဓိပ္ပါယ်မရှိသည့်လုပ်ရပ်ဟု မှတ်ယူထားသည်။

ပူတင်သည် မာရီယူပေါလ်သို့ ရဟတ်ယာဉ်ဖြင့်ရောက်ရှိခဲ့ကာ နောက်တွင် ၎င်းကိုယ်တိုင်ကားမောင်း၍ မြို့၏ အထိမ်းအမှတ်နေရာများ၊ ခန်းမနှင့်ကမ်းရိုးတန်းတို့ကို သွားရောက်ကြည့်ရှုခဲ့သည်ဟု ရုရှားသတင်းများတွင် ဖော်ပြသည်။

အဆောက်အဦးသစ်ဟု ယူဆရသည့်နေရာတစ်ခုအပြင်ဘက်တွင် ပူတင်နှင့်ဒေသခံများ စကားပြောနေသည်ကိုလည်း Rossiya 24 ရုပ်သံသတင်းတွင် ဖော်ပြသည်။ ယခုသီတင်းပတ်အတွင်း တရုတ်သမ္မတ၏ ရုရှားသို့ ခရီးစဉ်မတိုင်ခင် ပူတင်က မာရီယူပေါလ်သို့ ရုတ်တရက်သွားရောက်ခဲ့ခြင်းဖြစ်သည်။

၂၀၂၂ ခုနှစ် ဧပြီလ ၁၆ ရက်နေ့က ယူကရိန်းနိုင်ငံ မာရီယူပေါလ်ရှိ  Illich Iron and Steel Works Metallurgical Plant အနီးတွင် တိုက်ပွဲများပြင်းထန်စွာ ဖြစ်ပွားခဲ့စဉ် ပျက်စီးသွားသော တိုက်ခန်း အဆောက်အအုံကို ဒေသခံတစ်ဦးက ကြည့်ရှုနေစဉ်(ဓါတ်ပုံ-အေပီ)

တရုတ်သမ္မတ၏ခရီးစဉ်က အနောက်အုပ်စုနှင့် ရင်ဆိုင်နေရသော ပူတင်အတွက် အရေးပါသည့် သံရေးတမံရေး မြှင့်တင်မှုတစ်ခုဖြစ်လာမည်ဟုလည်း ယူဆရသည်။ ပူတင်သည် မာရီယူပေါလ် ခရီးစဉ်ပြီးနောက် ရုရှား တောင်ပိုင်းမြို့တစ်မြို့ရှိ စစ်ဌာနချုပ်တစ်ခုသို့ သွားရောက်ကာ စစ်တပ်ခေါင်းဆောင်များ၊ တပ်သားများနှင့် တွေ့ဆုံခဲ့သည်။ ပူတင်သည် သူ၏ခရီးစဉ်များကို ကြိုတင်ကြေညာထားခြင်းမရှိဘဲ ဌာနချုပ်၏ သာမာန်လုပ်ငန်း လုပ်ဆောင်မှုများကို စစ်ဆေးရန် သွားရောက်ခဲ့ခြင်းဖြစ်သည်ဟုလည်း ပတ်စ်ကော့ဗ်က ပြောသည်။

Source:AP

CNI International News

၂၀၂၃ ခုနှစ်၊ မတ်လ ၂၀

၂၀၀၃ ခုနှစ်၊ မတ်လ ၂၀ ရက်တွင် အမေရိကန်သည် ညွှန့်ပေါင်းအဖွဲ့တစ်ခုကို ဦးဆောင်ကာ အီရတ်သို့ အလုံး အရင်းဖြင့် ကျူးကျော်စစ် စတင်ခဲ့သည်။

၎င်းတို့ကို ဗြိတိန်မှ အနီးကပ် ထောက်ပံ့မှု လုပ်ဆောင်ပေးခဲ့သည်။

အမေရိကန်သည် အီရတ်အား အကြောင်းပြချက် သုံးချက်ဖြင့် ကျူးကျော်မှု လုပ်ဆောင်ခဲ့ခြင်း ဖြစ်သည်။

ဆက်ဒမ်ဟူစိန် (Saddam Hussein) အစိုးရတွင် ဖျက်အားပြင်း လက်နက် (WMD) များရှိနေခြင်း၊ WMD များ ထပ်ထုတ်ကာ အကြမ်းဖက် အုပ်စုများကို ထောက်ပံ့ပေးနေခြင်းနှင့် အီရတ်အား ပိုမိုရင်းနှီးဖွယ်ကောင်းကာ ဒီမို ကရေစီစနစ် ကျင့်သုံးသော နိုင်ငံအဖြစ် ပြောင်းလဲ၍ ဒေသတွင်း ဥပမာတစ်ခုအဖြစ် ရှိနေစေရေးတို့အတွက် ဖြစ် သည်။

သို့သော် Operation Iraqi Freedom ဟုခေါ်သော ကျူးကျော်မှု နှစ်၂၀ ပြည့်သည့်တိုင် အီရတ် ကျူးကျော်စစ်သည် အမေရိကန်၊ ဗြိတိန်နှင့် တခြားနိုင်ငံများ၏ လိမ်ညာမှုရလဒ်တစ်ခုလား၊ ထောက်လှမ်းရေး သတင်းမှားကြောင့်လား သို့မဟုတ် မဟာဗျူဟာမြောက် တွက်ချက်မှုကြောင့်လား အငြင်းအခုန်တစ်ခုအဖြစ် ကျန်ရှိနေဆဲ ဖြစ်သည်။

အမေရိကန်သမ္မတ ဂျော့ဂျ်ဘုရ်

ထိုကျူးကျော်စစ်သည် အမေရိကန်၏ နိုင်ငံခြားရေးမူဝါဒများအပေါ် အရိပ်မည်းကြီး တစ်ခုသဖွယ် ယနေ့တိုင် ခြောက်လှန့်နေဆဲ ဖြစ်သည်။

ထိုစဉ်က အမေရိကန်သမ္မတ ဂျော့ဂျ်ဘုရှ် (George Bush)နှင့် ဗြိတိန်ဝန်ကြီးချုပ်တို့သည် ကျူးကျော်စစ် မစတင် ခင် အီရတ်တွင် ဓာတုပစ္စည်းများနှင့် ဇီဝလက်နက်များရှိနေကာ နျူကလီးယားထုတ်ရန် ကြိုးပမ်းနေသည်ဟု ပြောခဲ့သည်။

သို့သော် အီရတ်၏ လက်နက်များကို ရှာဖွေ၊ ဖျက်ဆီးရေးအဖွဲ့ (ISG) ခေါင်းဆောင်၏ ၂၀၀၄ ခုနှစ် အမေရိကန် လွှတ်တော်သို့ အစီအရင်ခံစာတွင် ဆက်ဒမ်ဟူစိန်တွင် လက်နက်ထုတ်လုပ်ရေး စီမံကိန်းများ ရှိသည်ဆိုသည့် သက်သေ အထောက်အထားမျိုး လုံးဝ မတွေ့ခဲ့ရဟု ဖော်ပြထားသည်။

ဆက်ဒမ်ဟူစိန်သည် အီရတ်တွင် WMD အစီစဉ်အသက်ဝင်နေဆဲဖြစ်သည်ကိုအားလုံးယုံကြည်အောင် ပြောဆိုခဲ့သူ ဖြစ်ပြီး ထိုလက်နက်များနှင့် ပတ်သက်၍ ကုလသမဂ္ဂအဖွဲ့မှ ဝင်ရောက်စစ်ဆေးခြင်းကိုလည်း ငြင်းဆန်ခဲ့သည်။

အမေရိကန်တွင် နှိမ့်ချတတ်သော နိုင်ငံခြားရေးမူဝါဒကို ကျင့်သုံးသွားမည်ဟု ဘုရ်က မဲဆွယ်မှုလုပ်နေစဉ်၌ ပြောကြားခဲ့သည်။

ထို့နောက် အမေရိကန်ရှိ ကမ္ဘာ့ကုန်သွယ်ရေးစင်တာ တိုက်ခိုက်ခံရမှုကြောင့် အမေရိကန်သည် War on Terror ဟုခေါ်သော ဆယ်စုနှစ်ချီကြာ အကြမ်းဖက်မှု တန်ပြန်ရေး စစ်ရေးလှုပ်ရှားမှုကို စတင်ခဲ့သည်။

၂၀၀၂ မိန့်ခွန်းတွင် အမေရိကန် အနေဖြင့် အကြမ်းဖက်အုပ်စုများ သို့မဟုတ် ၎င်းတို့ကို ထောက်ပံ့၊ လေ့ကျင့်ပေးနေသော နိုင်ငံများအားလုံးကို နှိမ်နင်းသွားမည်ဟု ပြောခဲ့သည်။

ရှေ့တန်း တစ်နေရာကိုတွေ့ရစဉ်

၂၀၂၃ ခုနှစ်တွင် ဒုတိယသမ္မတ ဒစ်ချီနေး (Dick Cheney) က ဆက်ဒမ်ဟူစိန် အစိုးရနှင့် ၉/၁၁ တိုက်ခိုက်မှုကို လုပ်ဆောင်ခဲ့သည့် အယ်လ်ကိုင်းဒါး (al-Qaeda) တို့အကြား ဆက်စပ်မှုရှိသည်ဟု ပြောခဲ့သည်

သို့သော် စစ်ပွဲအပြီး နှစ် ၂၀ ကြာခဲ့သည့်တိုင် ဆက်ဒမ်ဟူစိန်နှင့် အယ်လ်ကိုင်းဒါးတို့အကြား ဆက်စပ်နေသည့် သက်သေတစ်စုံတစ်ရာကို ရရှိခဲ့ခြင်းမရှိပေ။

အီရတ်တွင် ဒီမိုကရေစီ အစိုးရသစ်တစ်ရပ် ပေါ်ပေါက်လာကာ ယင်းသည် ဒေသတွင်းရှိ တခြားနိုင်ငံများအတွက် လွတ်လပ်ခြင်း ဥပမာတစ်ခု ဖြစ်လာမည်ဟု ၂၀၀၂ ခုနှစ်တွင် ဘုရှ်က ပြောခဲ့သည်။

ထိုပြောဆိုမှု အပြီးတွင် အမေရိကန်အစိုးရသည် အီရတ်အား ဒီမိုကရက်တစ် နိုင်ငံတစ်ခုအဖြစ် ပြောင်းလဲရန် စတင်ကြိုးပမ်းခဲ့သော်လည်း အောင်မြင်ခဲ့ခြင်းမရှိဟု လေ့လာသူများက ပြောသည်။

အာဏာရဘသ်ပါတီ (Baath Party)အား ပိတ်ပင်ခြင်း၊ အီရတ်စစ်တပ်အား ဖျက်သိမ်းခြင်းသည့် အမေရိကန်၏ ဆုံးဖြတ်ချက်သည် မှားယွင်းမှု ဖြစ်ခဲ့သည်။

၂၀၀၅ ခုနှစ် အမေရိကန်၏ သိမ်းပိုက်ခံကာလတွင် အမေရိကန်မှ ခေါ်ဆောင်လာသော ပညာရှင်များက အီရတ်တွင် ဖွဲ့စည်းပုံအခြေခံဥပဒေတစ်ခု ရေးဆွဲကာ လွှတ်တော် စနစ်သစ်တစ်ခုကိုပါ စတင်ခဲ့သည်။

ဖွဲ့စည်းပုံတွင် ထည့်သွင်း ရေးသားမထားသည့်တိုင် သမ္မတနေရာအတွက် ကာ့ဒ် (Kurd)၊ လွှတ်တော်ဥက္ကဋ္ဌကို ဆွန်နီ(Sunni) နှင့် ဝန်ကြီးချုပ်ကို ရှီးအိုက်လူမျိုးကို ပေးရမည်ဟု ယေဘုယျ သတ်မှတ်ထားခဲ့သည်။

သို့သော် ယင်းတို့သည် အီရတ်၏ ပကတိအခြေအနေနှင့် လုံးဝဆန့်ကျင်နေကာ အမေရိကန်အနေဖြင့် အီရတ်အား ၎င်းတို့ ကိုယ်ပိုင် ဖြေရှင်းနည်းကို ကျင့်သုံးစေခြင်းဖြင့် အမှားလုပ်ခဲ့သည်ဟု အရှေ့အလယ်ပိုင်းရေးရာ ပညာရှင် တစ်ဦးက သုံးသပ်သည်။

Source: Aljazeera

CNI International News

တူးနစ်၊ မတ်လ ၁၈

မိသားစုအကြောင်းပြချက်များဖြင့် ရာထူးမှ နှုတ်ထွက်ကြောင်း တူနီးရှားပြည်ထဲရေးဝန်ကြီး တူဖစ် ချာဖီဒင် (Taoufik Charfeddine) က သောကြာနေ့တွင် ထုတ်ပြန်ကြေညာခဲ့သည်ဟု Aljazeera သတင်းတွင် ဖော်ပြထား သည်။

ချာဖီဒင်သည် သမ္မတ ကိုင်ဆာအစ် (Kais Saied) ၏ နီးကပ်မဟာမိတ် တစ်ဦးဖြစ်ကာ ပြီးခဲသည့်နှစ် ဇနီးဖြစ်သူ သေဆုံးသွားခဲ့ပြီးနောက် ကလေးများအတွက် အချိန်ပိုပေးလိုသောကြောင့် ဖြစ်သည်ဟု သောကြာနေ့တွင် သတင်း ထောက်များကို ပြောခဲ့သည်။

အသက် ၅၄ နှစ်အရွယ် ချာဖီဒင်သည် ၂၀၂၁ ခုနှစ်၊ အောက်တိုဘာလတွင် ပြည်ထဲရေးဝန်ကြီးရာထူးကို ရရှိခဲ့ကာ သူ၏ တောင်းဆိုမှုအပေါ် နားလည်ပေးမှုနှင့် တာဝန်များမှ နှုတ်ထွက်ရန် ခွင့်ပြုပေးခြင်းတို့အတွက် သမ္မတ ဆာအစ်ကို ကျေးဇူးတင်သည်ဟု သတင်းထောက်များကို ပြောခဲ့သည်။

ချာဖီဒင်၏ ဇနီးဖြစ်သူ ဆယ်လ်ဝါ (Salwa)သည် ပြီးခဲ့သည့် ဇွန်လ နေအိမ်တွင် ဂတ်စ်အိုးယိုစိမ့်မှုကြောင့် ဖြစ်သော မီးလောင်မှုတစ်ခုအတွင်း သေဆုံးသွားခဲ့ခြင်း ဖြစ်သည်။

ချာဖီဒင်သည် တစ်ချိန်တုန်းက တူနီးရှားသမ္မတနှင့် အရင်းနှီးဆုံး အရာရှိတစ်ဦးအဖြစ် ရှုမြင်ခြင်း ခံခဲ့ရသော်လည်း မကြာသေးခင် ကာလများတွင် ၎င်းသည် လူမြင်ကွင်းသို့ ထွက်ပေါ်လာမှု နည်းပါးခဲ့သည်။

တူနီးရှားသမ္မတ ကိုင်ဆာအစ်ကို တွေ့ရစဉ်

၎င်း၏ နေရာကို အစားထိုးရန်လည်း သမ္မတဘက်မှ ထုတ်ပြန်ကြေညာခြင်း မရှိသေးပေ။

ဆာအစ်သည် ၂၀၂၁ ခုနှစ်၊ ဇန်နဝါရီလ ဝန်ကြီးချုပ် ဟီချန် မီချီချီ (Hichem Mechichi) အစိုးရအား ဖယ်ရှားခြင်း၊ လွှတ်တော်အား ဖျက်သိမ်းခြင်းတို့ လုပ်ဆောင်ခဲ့ပြီး ပြီးခဲ့သည့်နှစ်တွင် အတည်ပြုနိုင်ခဲ့သည့် ဖွဲ့စည်းပုံအခြေခံ ဥပဒေသစ် မရရှိခင် အမိန့်ဒီကရီတစ်ခုဖြစ် အုပ်ချုပ်ခဲ့သူ ဖြစ်သည်။

၎င်းသည် ထိုအချိန်မှ စတင်ကာ လုံခြုံရေးတပ်ဖွဲ့များအတွင်း ထိန်းချုုပ်မှုလည်း မြင့်တက်လာခဲ့သည်။

ချာဖီဒင်သည် မီချီချီ လက်ထက်ကတည်းက ဝန်ကြီးအဖြစ် ဆောင်ရွက်ခဲ့သူ ဖြစ်သည်။ သို့သော် သမ္မတ နှင့် ဝန်ကြီးချုပ်တို့အကြား ဆက်ဆံရေး ပြိုကွဲသွားခဲ့ပြီးနောက် ၂၀၂၁ ခုနှစ်တွင် မီချီချီက ၎င်းအား ရာထူးမှထုတ် ပယ်ခဲ့သည်။

မီချီချီ၏ အစိုးရအဖွဲ့အား ဖျက်သိမ်းခဲ့ပြီးနောက် ဆာအစ်က ၎င်းကို ပြန်လည် ခန့်အပ်ခဲ့ခြင်း ဖြစ်သည်။

Source: Aljazeera

CNI International News

ပရပ်၊ မတ်လ ၁၈

ယူကရိန်းသို့ ဆိုဗီယက်ခေတ် လက်ကျန် MiG-29 ဂျက်တိုက်လေယာဉ် ၁၃ စင်း ထောက်ပံ့ပေးရန် အစီအစဉ်အား ဆလိုဗက်ကီးယားအစိုးရက သောကြာနေ့တွင် အတည်ပြုခဲ့သည်ဟု အေပီသတင်းတွင် ဖော်ပြထားသည်။

ထို့ကြောင့် ဆလိုဗက်ကီးယားသည် ရုရှားကျူးကျော်စစ်အား ခုခံရေးအတွက် စစ်လေယာဉ်များ ကူညီပေးရန် ယူကရိန်းအစိုးရ၏ တောင်းဆိုမှုအား တုန့်ပြန်သော ဒုတိယမြောက် နေတိုးအဖွဲ့ဝင် နိုင်ငံဖြစ်လာခဲ့သည်။

အစိုးရ၏ ဆုံးဖြတ်ချက်သည် သမိုင်းမှတ်တမ်းတွင် မှန်ကန်သောဘက်မှ ရပ်တည်နိုင်ရန်အတွက် ဖြစ်သည်ဟု ဆလိုဗက်ကီးယားဝန်ကြီးချုပ် အက်ဒွပ်ဟီဂါ (Eduard Heger)က သတင်းစာ ရှင်းလင်းပွဲတစ်ခုတွင် ပြောခဲ့သည်။

ယူကရိန်းအတွက် သာမက ဥရောပတိုက်တစ်ခုလုံးကို ရုရှားရန်မှ ကာကွယ်ရန်အတွက် စစ်ရေးအကူအညီများသည် အရေးပါဆုံးဖြစ်ကြောင်းလည်း ဟီဂါကတွစ်တာတွင် ရေးသားခဲ့သည်။

ယူကရိန်းအား MiG-29 လေယာဉ် ၁၂ စင်းခန့် ပေးအပ်သွားမည်ဟု ပိုလန်က ကြာသပတေးနေ့တွင် ကြေညာခဲ့သည်။

ဆလိုဗက်ကီးယားက ယူကရိန်းကို ပေးမယ့် MiG-29 တိုက်လေယာဉ်များကိုတွေ့ရစဉ်

လေယာဉ် လေးစင်းကို လာမည့်ရက်များအတွင်း ပေးပို့သွားနိုင်မည်ဟုလည်း ယူဆရသည်။ ပိုလန်နှင့် ဆလိုဗက် ကီးယား နှစ်နိုင်ငံစလုံးသည် ၎င်းတို့အနေဖြင့် ယူကရိန်းသို့ လေယာဉ်များပေးရန် အဆင့်သင့် ရှိသော်လည်း ယင်းသည် နိုင်ငံတကာ ညွှန့်ပေါင်းအဖွဲ့၏ လုပ်ဆောင်မှု အစိတ်အပိုင်းတစ်ခုသာ ဖြစ်လိမ့်မည်ဟု ပြောခဲ့သည်။

ဆလိုဗက်ကီးယားအစိုးရ၏ ဆုံးဖြတ်ချက်သည် ပိုလန်၊ ယူကရိန်းအပြင် တခြားမဟာမိတ်များနှင့် အနီးကပ် ပူးပေါင်း ဆောင်ရွက်ရန် ချမှတ်ခဲ့သည်ဟု ဟီဂါက ပြောသည်။

ယခုကဲ့သို့ ယူကရိန်းအား လေယာဉ်များပေးရန် ကတိကဝတ်များသည် နေတိုးအဖွဲ့ဝင် နိုင်ငံများအနေဖြင့် ယူကရိန်းပဋိပက္ခတွင် တိုက်ရိုက် ပါဝင်ပတ်သက်မှု မြင့်တက်လာနေကြောင်း နောက်ထပ် ဥပမာတစ်ခုပင် ဖြစ်သည်ဟု ရုရှားအစိုးရအဖွဲ့ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ် (Dmitry Peskov) က ပြောသည်။

 ရုရှားအစိုးရအဖွဲ့ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ်ကိုတွေ့ရစဉ်

ဆလိုဗက်ကီးယားသည် ယူကရိန်းသို့ လေယာဉ်များ ပေးခြင်းအတွက် အပြန်အလှန် အနေဖြင့် ဥရောပသမဂ္ဂထံမှ လျော်ကြေး ယူရိုသန်း ၂၀၀ အပြင် အမေရိကန်ထံမှ အတည် မပြုနိုင်သေးသော ယူရိုသန်း ၇၀၀ တန်ဖိုးရှိ လက်နက်များကို ရရှိသွားမည်ဟု ဆလိုဗက်ကီးယား ကာကွယ်ရေးဝန်ကြီး ဂျာရိုဆလပ်ဗ်နတ် (Jaroslav Nad) က ပြောသည်။

ယူကရိန်းသမ္မတသည် ၎င်းတို့ စစ်တပ်အား ဂျက်တိုက်လေယာဉ်များ ထောက်ပံ့ပေးရေး အနောက်အုပ်စုမဟာ မိတ်များထံ ထပ်ခါထပ်ခါ တောင်းဆိုထားသော်လည်း ထိုသို့ ကူညီပေးခြင်းက နေတိုးအဖွဲ့၏ ပဋိပက္ခအတွင်း ပါ ဝင်ပတ်သက်မှုကို မြင့်တက်စေခြင်းကြောင့် နေတိုးအဖွဲ့က ငြင်းဆိုထားခြင်း ဖြစ်သည်။

Source: AP

CNI International News

မော်စကို၊ မတ်လ ၁၈

ရုရှားသမ္မတဗလာဒီမာ ပူတင် (Vladimr Putin) ၏ ဖိတ်ကြားမှုကြောင့် တရုတ်သမ္မတရှီကျင့်ဖျင် (Xi Jinping) သည် လာမည့်သီတင်းပတ်တွင် ရုရှားသို့လာရောက်မည်ဟု ရုရှားအစိုးရဘက်မှ သောကြာနေ့တွင် ပြောကြား ခဲ့ကြောင်း အယ်လ်ဂျာဇီးယားသတင်းတွင် ဖော်ပြသည်။

တနင်္လာနေ့တွင် စတင်မည့် နှစ်ရက်ကြာခရီးစဉ်သည် ယူကရိန်းပဋိပက္ခအတွက် ငြိမ်းချမ်းရေးကို တရုတ်မှ ကြားဝင်ဆောင်ရွက်ပေးနေချိန်တွင် ပေါ်ပေါက်လာခဲ့သည်။ တရုတ်၏ ဆောင်ရွက်မှုသည် ရုရှားအား သံတမန် ရေးအရ ထောက်ပံ့မှုပြုလုပ်ရန်အတွက်ဟု အနောက်နိုင်ငံများက သံသယရှိကြသည်။

ဆွေးနွေးပွဲများအတွင်း ခေါင်းဆောင်နှစ်ဦးသည် အပြန်အလှန်မိတ်ဖက်ဆက်ဆံရေးကို ထပ်မံမြှင့်တင်ရန်နှင့် မဟာဗျူဟာမြောက် ပူးပေါင်းဆောင်ရွက်မှုများနှင့်ဆိုင်သော အကြောင်းအရာများကို ဆွေးနွေးသွားမည်ဟု ကရင်မလင်ဘက်က ပြောသည်။ အရေးကြီးသည့်စာရွက်စာတမ်းများစွာကိုလည်း လက်မှတ်ရေးထိုးမည်ဟု ဖော်ပြထားသည်။

တရုတ်နှင့်ရုရှားတို့သည် ၂၀၂၂ ဖေဖော်ဝါရီလတွင် အကန့်အသတ်မရှိသော ဆက်ဆံရေးအခြေအနေတွင် ရှိနေကြောင်း ကြေညာခဲ့သည်။ ယူကရိန်းအား ကျူးကျော်မှုမစတင်ခင် သီတင်းပတ်အနည်းငယ်အလို Winter Olympics ဖွင့်ပွဲအတွက် သမ္မတ ပူတင်သည် ဘေဂျင်းသို့ရောက်ရှိနေစဉ် ထိုသို့ကြေညာခဲ့ခြင်း ဖြစ်သည်။

ရုရှားသမ္မတ ပူတင်နှင့် တရုတ်သမ္မတ ရှီကျင့်ဖျင်(ဓါတ်ပုံ-အေပီ)

ထိုအချိန်မှစ၍ နှစ်နိုင်ငံကြားဆက်ဆံရေး ခိုင်မာစေရန် ထပ်လောင်းပြောဆိုမှုများကို ဆက်တိုက်ပြုလုပ်ခဲ့သည်။ ယူကရိန်းကျူးကျော်စစ် နောက်ပိုင်းမှစတင်ကာ နှစ်နိုင်ငံကြားကုန်သွယ်ရေးမှာမြင့်တက်လာခဲ့ပြီး တရုတ်သည် ရုရှား၏ရေနံအတွက် ပင်မဝယ်လက်ဖြစ်ခဲ့ကာ ရုရှားအစိုးရအတွက် ငွေကြေးရရှိရာ ပင်မရင်းမြစ်တစ်ခုဖြစ်ခဲ့သည်။

သို့သော် ပြီးခဲ့သည့် သီတင်းပတ်များမှစတင်ကာ တရုတ်သည် ရုရှားနှင့် ယူကရိန်းပဋိပက္ခအတွင်း ကြားဝင်စေ့စပ် ပေးသူအဖြစ် ဆောင်ရွက်ရန်ကြိုးပမ်းလာသည်ကို တွေ့လာရသည်။ ယူကရိန်းကျူးကျော်စစ် တစ်နှစ်တိတိ ပြည့်သည့် ဖေဖော်ဝါရီ ၂၄ ရက်တွင် တရုတ်သည်အချက် ၁၂ ချက်ပါ အဆိုပြုချက်တစ်ခုကို ထုတ်ပြန်ခဲ့ပြီး ရုရှား၊ ယူကရိန်းနှစ်နိုင်ငံအကြား အပစ်အခတ်ရပ်စဲရေးနှင့် ဆွေးနွေးမှုများလုပ်ဆောင်ရန် တောင်းဆိုခဲ့သည်။

ယခုသီတင်းပတ်အစောပိုင်းတွင်လည်း တရုတ်အစိုးရသည် ပင်လယ်နက်သယ်ယူပို့ဆောင်ရေးဆိုင်ရာ သဘော တူညီချက်နှင့်ပတ်သက်၍ ရုရှားနှင့်ယူကရိန်းတို့အကြား ကြားဝင်စေ့စပ်ပေးရန် ကမ်းလှမ်းခဲ့ဖူးသည်။

ကြာသပတေးနေ့ ယူကရိန်းဝန်ကြီးနှင့် ကြုံတောင့်ကြုံခဲ ဖုန်းပြောဆိုမှုတွင် တရုတ်နိုင်ငံခြားရေးဝန်ကြီးက တရုတ် အစိုးရသည် ယူကရိန်းပဋိပက္ခ မထိန်းချုပ်နိုင်တော့မည်ကို စိုးရိမ်ကြောင်းပြောကာ ရုရှားနှင့်နိုင်ငံရေးအရ အဖြေ ရှာရန်အတွက် ဆွေးနွေးပွဲများလုပ်ဆောင်ရန် တိုက်တွန်းခဲ့သည်ဟု သိရသည်။

Source:Aljazeera

CNI International News

ဆိုးလ်၊ မတ်လ ၁၈

ရန်သူများကို ခြောက်လှန့်ရန်အတွက် တိုက်ချင်းပစ် ပဲ့ထိန်းဒုံးကျည်တစ်လုံး စမ်းသပ် ပစ်ခတ်ခဲ့သည်ဟု မြောက်ကိုရီးယားဘက်မှ သောကြာနေ့တွင် ပြောခဲ့ကြောင်း အေပီသတင်းက ဖော်ပြသည်။

တောင်ကိုရီးယားနှင့် ဂျပန်တို့အကြား အမေရိကန်နှင့်ဒေသတွင်း လုံခြုံရေးကို အနီးကပ် ဆောင်ရွက်ရန်၊ စစ်ရေး လေ့ကျင့်မှုများ ပြုလုပ်ရန် ဆွေးနွေးပွဲတစ်ခုတွင် သဘောတူညီချက် ရရှိချိန်တွင် ထိုသို့ စမ်းသပ်ခဲ့ခြင်း ဖြစ်သည်။
ဒုံးကျည် ပစ်လွှတ်မှုကို ကြာသပတေးနေ့က မြောက်ကိုရီးယား၏ အရေးပါသော လေဆိပ်မှ လုပ်ဆောင်ခဲ့ခြင်း ဖြစ်သည်။

ထိုဖြစ်ရပ်က နာရီပိုင်းအကြာတွင် ကျင်းပခဲ့သော တောင်ကိုရီးယားသမ္မတ ယွန်ဆော့ရွဲ(Yoon Suk Yoel)နှင့် ဂျပန် ဝန်ကြီးချုပ် ဖူအီအို ကီရှီဒါ (Fumio Kishida) တို့အကြား ဆွေးနွေးပွဲကို လွှမ်းမိုးထားခဲ့သည်။

ဂျပန်တွင် ပြုလုပ်ခဲ့သော ခေါင်းဆောင်နှစ်ဦး၏ အစည်းအဝေးသည် မြောက်ကိုရီးယား၏ နျူကလီးယား ခြိမ်းခြောက်မှုနှင့် ရင်ဆိုင်နေရချိန်တွင် အမေရိကန် မဟာမိတ်တို့အကြား လုံခြုံရေးဆိုင်ရာ ဆက်သွယ်မှုများ ပြန်လည် တည်ဆောက်ရန် ရည်ရွယ်သည်။

တောင်ကိုရီးယားသမ္မတ ယွန်ဆော့ရွဲနှင့် ဂျပန်ဝန်ကြီးချုပ် ဖူအီအို ကီရှီဒါကိုတွေ့ရစဉ်

တစ်ပတ်အတွင်း ဒုံးကျည်စမ်းသပ်မှု လုပ်ဆောင်ခဲ့မှုသည် နှစ်ပေါင်းများစွာအတွင်း အင်အားအကြီးမားဆုံး ဖြစ် သော အမေရိကန်-တောင်ကိုရီးယားတို့၏ စစ်ရေးလေ့ကျင့်မှုအပေါ် မြောက်ကိုရီးယား၏ တုန့်ပြန်မှုလည်း ဖြစ် သည်။

မြောက်ကိုရီးယား၏ ခြိမ်းခြောက်မှု၊ တရုတ်၏ လွှမ်းမိုးမှု မြင့်တက်လာခြင်းတို့အတွက် အမေရိကန် အစိုးရသည် အာရှရှိ မဟာမိတ် ကွန်ယက်ကို ခိုင်မာအောင် အားထုတ် ဆောင်ရွက်နေပြီး တောင်ကိုရီးယားနှင့် ဂျပန်တို့အကြား ပိုမိုကောင်းမွန်သော ဆက်ဆံရေး ရရှိစေလိုနေသည်။

မကြာသေးခင် နှစ်များအတွင်း နှစ်နိုင်ငံကြား ဆက်ဆံရေးမှာ သမိုင်းဝင် အကြောင်းအရာများကြောင့် ထိခိုက်မှုရှိ ခဲ့သည်။

တနင်္လာနေ့မှ စတင်ကာ မတ်လ ၂၃ ရက်အထိ လုပ်ဆောင်မည့် စစ်ရေးလေ့ကျင့်မှုအပြင် အမေရိကန်နှင့် တောင်ကိုရီးယားတို့သည် ဗုဒ္ဓဟူးနေ့တွင် စတင်သည့် ရေငုပ်သင်္ဘော တိုက်ခိုက်မှု တွန်းလှန်ရေး စစ်ရေးလေ့ကျင့်မှုကို ဂျပန်၊ ကနေဒါ ၊ အိန္ဒိယတို့နှင့် ပူးတွဲ လုပ်ဆောင်လျက်ရှိသည်။

မြောက်ကိုရီးယား ခေါင်းဆောင်ကင်မ်ကိုတွေ့ရစဉ် 

ကြာသပတေးနေ့က Hwasong – 17 ဒုံးကျည်စမ်းသပ်မှုကို မြောက်ကိုရီးယား ခေါင်းဆောင် ကင်မ်က ဦးဆောင်ခဲ့သည်။ ယင်းကို လေယာဉ်ပြေးလမ်းပေါ်တွင် ရပ်ထားသော ကားပေါ်မှ လုပ်ဆောင်ခဲ့သည်ဟု မြောက်ကိုရီးယား နိုင်ငံပိုင် KCNA သတင်းတွင် ဖော်ပြသည်။

မြောက်ကိုရီးယားအတွက် ရန်စမှုကိုဖြစ်သော အမေရိကန်-တောင်ကိုရီးယားတို့၏ စစ်ရေးလေ့ကျင့်မှုများအတွက် ရန်သူများကို ထိတ်လန့်နေစေရန် လိုအပ်ကြောင်းလည်း ကင်မ်က အခိုင်အမာ ပြောခဲ့သည်။

စမ်းသပ်ခဲ့သော ဒုံးကျည်သည် အမြင့် ၆၀၄၅ ကီလိုမီတာသို့ ၁၀၀၀ ကီလိုမီတာခန့် သွားရောက်ခဲ့ပြီး နိုင်ငံ၏ အရှေ့ဘက် ကမ်းရိုးတန်းသို့ ကျရောက်ခဲ့သည်ဟုလည်း KCNA သတင်းတွင် ဖော်ပြသည်။

Source: AP

CNI International News

လန်ဒန်၊ မတ်လ ၁၇

အစိုးရဖုန်းများတွင် TikTok အသုံးပြုခြင်းအား ချက်ချင်း ပိတ်ပင်သွားမည်ဟု ဗြိတိန်အစိုးရက အင်္ဂါနေ့တွင် ကြေညာခဲ့ကြောင်း ရိုက်တာသတင်းတွင် ဖော်ပြထားသည်။

ယင်းမတိုင်ခင် တခြားသော အနောက်နိုင်ငံများသည်လည်း လုံခြုံရေးဆိုင်ရာ စိုးရိမ်မှုများကြောင့် TikTok အသုံးပြုမှုအား ပိတ်ပင်ခဲ့သည်။

ဘေဂျင်းအခြေစိုက် ByteDance ကုမ္ပဏီပိုင် TikTok အဲပလီကေးရှင်းမှ အသုံးပြုသူများ၏ အချက်အလက်များ သည် တရုတ်အစိုးရထံသို့ ရောက်ရှိသွားသည်ဆိုသည့် စိုးရိမ်မှုများသည် အနောက်နိုင်ငံများ၏ လုံခြုံရေးဆိုင်ရာ အကျိုးစီးပွားကို ထိခိုက်စေခြင်းကြောင့် ထိုအဲပလီကေးရှင်းအား အသုံးပြုခြင်းနှင့် ပတ်သက်၍ စိစစ်ခြင်းများစွာ လုပ်ဆောင်လျက်ရှိသည်။

ဗြိတိန်အစိုးရအဖွဲ့ဝန်ကြီး အိုလီဗာဒေါ်ဒန်ကိုတွေ့ရစဉ်

အထိအခိုက်မခံသော အစိုးရ သတင်း အချက်အလက်များကို ဦးစားပေး ရမည်ဖြစ်ကြောင်း၊ ထို့ကြောင့် ယနေ့တွင် အစိုးရသုံး ကိရိယာများ၌ TikTok အသုံးပြုခြင်းကို ပိတ်ပင်လိုက်ပြီ ဖြစ်ကြောင်း ဗြိတိန်အစိုးရအဖွဲ့ဝန်ကြီး အိုလီဗာဒေါ်ဒန် (Oliver Dowdan)က ကြေညာချက် တစ်စောင် ထုတ်ပြန်ပြောဆိုခဲ့သည်။

လူမှုကွန်ယက် အဲပလီကေးရှင်းများမှ တစ်ဆင့် အစိုးရ၏ အချက်လက်များ ယိုစီးမှု ဖြစ်လာနိုင်သည်နှင့် အထိ အခိုက် မခံသော အချက်အလက်များကို မည်သို့ ရယူအသုံးပြုနေသလဲ ဆိုခြင်းနှင့် ပတ်သက်၍ စစ်ဆေးမှု လုပ်ဆောင်ရန် ဗြိတိန်အစိုးရက အမျိုးသား ဆိုက်ဘာလုံခြုံရေးစင်တာအား တောင်းဆိုထားသည်။

ဗြိတိန်မတိုင်ခင် အမေရိကန်၊ ကနေဒါ၊ ဘယ်လ်ဂျီယံတို့မှ အစိုးရများနှင့် ဥရောပကော်မရှင်တို့သည် ၎င်းတို့ အသုံးပြုသော ကိရိယာများတွင် TikTok အသုံးပြုခြင်းအား ပိတ်ပင်ခဲ့ပြီး ဖြစ်သည်။

ဆိုက်ဘာလုံခြုံရေးဆိုင်ရာ ပညာရှင်များ၏ အကြံပေးမှုအရ အစိုးရသုံး ကိရိယာများတွင် TikTok အား ပိတ်ပင်ရန် ဆုံးဖြတ်ခဲ့သည်ဟု ဒေါ်ဒန်က ပြောသည်။

ဗြိတိန်အစိုးရက Tik Tok အသုံးပြုမှုပိတ်ပင်ထားစဉ်

ထိုဆုံးဖြတ်ချက်နှင့် ပတ်သက်၍ စိတ်ပျက်မိကြောင်း၊ ဥရောပမှ အသုံးပြုသူများ၏ အချက်အလက်များကို ကာကွယ်ရန် လိုအပ်သော ဆောင်ရွက်ချက်များကို ချမှတ်ခဲ့ပြီးဖြစ်ကြောင်း TikTok ဘက်မှ ပြောသည်။

ယခုဆုံးဖြတ်ချက်ကို မှားယွင်းသော အယူအဆပေါ်တွင် အခြေခံကာ ချမှတ်ခဲ့သည်ဟု ယုံကြည်ကြောင်းနှင့် ယင်း သည် ကုမ္ပဏီ၊ အသုံးပြုသူများနှင့် မသက်ဆိုင်သည့် ပထဝီဝင် နိုင်ငံရေးဆိုင်ရာ ကျယ်ပြန့်သော အကြောင်းအရာ များကြောင့် ပေါ်ပေါက်လာခြင်း ဖြစ်ကြောင်းလည်း TikTok ဘက်မှ ပြောခွင့်ရပုဂ္ဂိုလ် တစ်ဦးက ပြောသည်။

ဗြိတိန်၏ ဆုံးဖြတ်ချက်သည် အမှန်တရားထက် နိုင်ငံရေးဆိုင်ရာ စဉ်းစားတွေးခေါ်မှုများတွင် အခြေခံထားကြောင်း လည်း တရုတ်အစိုးရဘက်မှ ပြောသည်။

မဲဆန္ဒရှင်များနှင့် ဆက်သွယ်ရန် ဗြိတိန်အစိုးရဌာနများသည် TikTok နှင့် တခြားသော လူမှုကွန်ယက် ပလက် ဖောင်းများကို အသုံးပြုမှု မြင့်တက်လာချိန်တွင် ယခုကဲ့သို့ ပိတ်ပင်ခဲ့ခြင်းလည်း ဖြစ်သည်။

Source: ရိုက်တာ