CNI International News

ပြုံယမ်း၊ ဇန်နဝါရီ ၂၀

မြောက်ကိုရီးယားနိုင်ငံသည် တောင်ကိုရီးယား၊ အမေရိကန်နှင့် ဂျပန်တို့၏ ပူးတွဲရေတပ် စစ်ရေးလေ့ကျင့်မှုကို တုန့်ပြန်သည့်အနေဖြင့် နျူကလီးယားလက်နက် တပ်ဆင်နိုင်သည့် ရေအောက် တိုက်ခိုက်ရေး မောင်းသူမဲ့ ရေယာဉ်တစ်စင်းကို စမ်းသပ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

အမေရိကန်နှင့် ၎င်း၏ မဟာမိတ်များသည် မြောက်ကိုရီးယား၏ လုံခြုံရေးကို ပြင်းထန်စွာ ခြိမ်းခြောက်နေပြီး ဒေသတွင်း အခြေအနေကို တည်ငြိမ်မှု ပျက်ယွင်းစေသဖြင့် မြောက်ကိုရီးယားအစိုးရက အရှေ့ဘက်ကမ်းလွန် ရေပြင်များတွင် Haeil-5-23 လက်နက်စနစ်ကို စမ်းသပ်ခဲ့ခြင်းဖြစ်ကြောင်း မြောက်ကိုရီးယား ကာကွယ်ရေး ဝန်ကြီးဌာနက ဇန်နဝါရီ ၁၉ ရက်တွင် ထုတ်ပြန်ခဲ့သည်။

မိမိတို့စစ်တပ်၏ ရေအောက်  နျူကလီယားအခြေပြု တန်ပြန်လုပ်ဆောင်နိုင်မှုသည် ရေပေါ်၊ ရေအောက် တုန့် ပြန်နိုင်မှု စွမ်းဆောင်ရည်များကို ဆက်လက် မြင့်တက်စေပြီး အမေရိကန်နှင့် ၎င်း၏ မဟာမိတ် ရေတပ်များ၏ ရန်လိုသည့်  စစ်ရေးလှုပ်ရှားမှုများကို ဟန့်တားရန်ဖြစ်ကြောင်း မြောက်ကိုရီးယားနိုင်ငံပိုင် KCNA သတင်းအေဂျင်စီ က ဖော်ပြခဲ့သည်။

မြောက်ကိုရီးယားသည် ပြီးခဲ့သည့်နှစ်ကလည်း ရေအောက်တိုက်ခိုက်ရေး မောင်းသူမဲ့ ရေယာဉ်များကို နှစ်ကြိမ် စမ်းသပ်ခဲ့ကြောင်း ကြေညာခဲ့ပြီး ထိုရေယာဉ်များသည် ရေအောက်တွင် ပေါက်ကွဲခြင်းဖြင့် ရေဒီယိုဓာတ်သတ္တိကြွ ဆူနာမီလှိုင်းများ ဖြစ်ပွားစေကာ ရန်သူများကို ဖျက်ဆီးနိုင်လိမ့်မည်ဟု ပြောကြားခဲ့သည်။ 

ထိုလက်နက်၏ အသုံးဝင်ပုံကို သီးခြား အတည်ပြုနိုင်ခြင်း မရှိသေးဘဲ တောင်ကိုရီးယားအရာရှိများကမူ မြောက်ကိုရီးယားသည် ထိုလက်နက်၏ စွမ်းဆောင်ရည်များကို ပုံကြီးချဲ့ ဖော်ပြခြင်းဖြစ်သည်ဟု ပြောကြားခဲ့ သည်။

ယခုသီတင်းပတ် အစောပိုင်းက အမေရိကန်၏ လေယာဉ်တင်သင်္ဘော USS Carl Vinson အပါအဝင် အမေရိကန်၊ တောင်ကိုရီးယားနှင့် ဂျပန်နိုင်ငံတို့မှ စစ်သင်္ဘော ၉ စင်းပါဝင်သည့် ပူးတွဲရေတပ်စစ်ရေး လေ့ကျင့်မှုများကို တောင်ကိုရီးယား၏ တောင်ဘက် ကမ်းလွန်ရေပြင်များတွင် ပြုလုပ်ခဲ့သည်။

ဇန်နဝါရီ ၁၄ ရက်က မြောက်ကိုရီးယား၏ လောင်စာတောင့်သုံး ဟိုက်ပါဆိုးနစ် ဒုံးကျည် စမ်းသပ်ပစ်လွှတ်မှုကို တုန့်ပြန်သည့်အနေဖြင့် ပူးတွဲစစ်ရေး လေ့ကျင့်မှုများကို ပြုလုပ်ခဲ့ခြင်းဖြစ်သည်ဟု အမေရိကန်၊ တောင်ကိုရီးယား နှင့် ဂျပန်တို့က ကြေညာခဲ့သည်။

မြောက်ကိုရီးယား၏ နောက်ဆုံးအကြိမ် စမ်းသပ်ခဲ့သည့် ရေအောက် တိုက်ခိုက်ရေး မောင်းသူမဲ့ ရေယာဉ်သည် အလွန် ခေတ်မီဆန်းပြားသည့် လက်နက်စနစ် တစ်ခုဖြစ်ကြောင်း ဆိုးလ်မြို့တော်ရှိ ဟန်ကွတ် တက္ကသိုလ် (Hankuk University) မှ နိုင်ငံခြားဘာသာ လေ့လာရေး ပါမောက္ခ မာဆန် ရစ်ချေ (Mason Richey) က ပြောကြားခဲ့သည်။

ထိုလက်နက်သည် တစ်နာရီလျှင် ရေမိုင် ၈ မိုင်ခန့် သွားရောက်နိုင်ခြေရှိပြီး ရေငုပ်သင်္ဘောများကို တိုက်ခိုက်သည့် စစ်ဆင်ရေးအတွက် ဖြစ်နိုင်သည်ဟုလည်း ရစ်ချေက ပြောကြားခဲ့သည်။

Source: အယ်လ်ဂျာဇီးယား

CNI International News

တိုကျို၊ ဇန်နဝါရီ ၂၀

အမေရိကန်ရေတပ်သင်္ဘောများကို ဂျပန်၏ သင်္ဘောကျင်းများတွင် ဆိုက်ကပ်ထားရန်နှင့် ပြုပြင်ထိန်းသိမ်းမှုများ ပြုလုပ်နိုင်ရန်အတွက် နှစ်နိုင်ငံအကြား သဘောတူညီမှုတစ်ခု ပြုလုပ်ရန် စီစဉ်နေသည်ဟု ဂျပန်နိုင်ငံဆိုင်ရာ အမေရိကန်သံအမတ် ရာဟမ် အီမန်နျူယယ် (Rahm Emanuel) က ဇန်နဝါရီ ၁၉ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထိုသဘောတူညီချက်ကြောင့် အနာဂါတ်တွင် ဖြစ်လာနိုင်ခြေရှိသည့် ပဋိပက္ခများအတွက် အာရှ၏ ရေပြင်များတွင် အမေရိကန်စစ်သင်္ဘောများ အလွယ်တကူ မောင်းနှင်နိုင်မည်ဖြစ်သည်။

"တရုတ်ကတော့ ဘယ်သင်္ဘောတွေ ဝင်မလဲ၊ ထွက်မလဲဆိုတာကို ကြည့်နေမှာပါ။ ဒါက လျှို့ဝှက်စရာ မဟုတ်ပါ ဘူး။ ဘာတွေ ဖြစ်နေလဲဆိုတာ သူတို့သိနေတာပဲလေ။ အဲဒါကြောင့် သူတို့ဟာ သင့်ရဲ့ အခြိမ်းအခြောက် အဟန့် အတားတွေကို တန်ဖိုးဖြတ် ချင့်တွက်ကြမှာ ဖြစ်ပါတယ်"ဟု အီမန်နျူယယ်က တိုကျိုမြို့တော်အနီးရှိ Yokosuka ရေတပ်စခန်းတွင် သတင်းထောက်များကို ပြောကြားခဲ့သည်။

ဆယ်စုနှစ်များစွာကြာ အာရှ၏ ရေပြင်များတွင် စိန်ခေါ်မှုများနှင့် မကြုံတွေ့ခဲ့ရသည့် အမေရိကန်ရေတပ်သည် မကြာသေးမီ နှစ်များအတွင်းက တရုတ်ရေတပ်၏ အင်အားကြီးထွားလာသည့် အခြေအနေနှင့် ရင်ဆိုင်ခဲ့ရသည်။

တရုတ်ရေတပ်သည် သင်္ဘောကျင်းများတွင် စစ်သင်္ဘောများ တည်ဆောက်နေသဖြင့် စစ်သင်္ဘောများ ထုတ်လုပ်မှု နှုန်း၌ တရုတ်က အမေရိကန်ကို ကျော်တက်သွားခဲ့သည်ဟု လေ့လာသူများက ပြောကြားခဲ့သည်။

တရုတ်သည် စစ်သင်္ဘော ၃၄၀ ရှိခဲ့ရာမှ ၂၀၂၃ ခုနှစ်အတွင်း စစ်သင်္ဘောများနှင့် ရေငုပ်သင်္ဘောများ စုစုပေါင်း ၃၇၀ ကျော်အထိ ရှိလာခဲ့ကြောင်း အမေရိကန်ကာကွယ်ရေးဝန်ကြီးဌာနက အောက်တိုဘာလတွင် ထုတ်ပြန်ခဲ့သဖြင့် တရုတ်သည် စစ်သင်္ဘော အရေအတွက်အရ ကမ္ဘာပေါ်မှာ အကြီးမားဆုံး ရေတပ်ကို ပိုင်ဆိုင်လာခဲ့သည်။

ထို့ကြောင့် အမေရိကန်သည် ၎င်း၏ စစ်သင်္ဘောအုပ်စုကို ချဲ့ထွင်ရန်အတွက် ဂျပန်၏ သင်္ဘောကျင်းများတွင် စစ်သင်္ဘောများ ဆိုက်ကပ်မှုနှင့် ပြုပြင်ထိန်းသိမ်းမှုများ ပြုလုပ်မှုတို့အတွက် သဘောတူညီမှုရရှိရန် လုပ်ဆောင် နေခြင်းဖြစ်ကြောင်း အီမန်နျူယယ်က ပြောကြားခဲ့သည်။

ထိုသဘောတူညီချက်အတွက် ပူးပေါင်းလုပ်ဆောင်မှုများ ပြုလုပ်ရန် အမေရိကန်နှင့် ဂျပန်အကြား အကြံပေးအဖွဲ့ တစ်ဖွဲ့ ဖွဲ့စည်းထူထောင်ခဲ့ကြောင်းလည်း ၎င်းက ဆိုသည်။

အမေရိကန်၏ မဟာမိတ်ဖြစ်သည့် ဂျပန်သည် အမေရိကန်၏ ပြည်ပ စစ်အင်အား တည်ရှိမှု အများဆုံးနိုင်ငံဖြစ်ပြီး ဂျပန်၏ Yokosuka ရေတပ်စခန်းတွင် အမေရိကန် စစ်သင်္ဘောများနှင့် ရေငုပ်သင်္ဘော ၇၀ ကျော်ကို စီမံခန့်ခွဲနိုင် သည့်် အမေရိကန်၏ အမှတ် ၇ ရေတပ်စစ်သင်္ဘောအုပ်စုကို လက်ခံထားရှိခဲ့သည်။

Source: ရိုက်တာ

CNI International News

တိုကျို၊ ဇန်နဝါရီ ၁၉

ဂျပန်ကွန်မြူနစ်ပါတီ (JCP) သည် ပါတီသမိုင်းတစ်လျှောက်တွင် ပထမဆုံး အမျိုးသမီးခေါင်းဆောင်အဖြစ် တိုမိုကို တာမူရာ (Tomoko Tamura) ကို ဇန်နဝါရီ ၁၈ ရက်တွင် ရွေးချယ်ခန့်အပ်ခဲ့ကြောင်း Japan Times မှ ဖော်ပြခဲ့ သည်။ 

JCP သည် မဲဆန္ဒရှင်များ၏ ထောက်ခံမှုကို ပိုမိုရရှိစေရန် ရည်ရွယ်သည့်အနေဖြင့် ထိုကဲ့သို့ အမျိုးသမီး ခေါင်းဆောင်တစ်ဦးအား ခန့်အပ်ခဲ့ခြင်းဖြစ်နိုင်သည်ဟု ကျွမ်းကျင်သူများက သုံးသပ်ခဲ့သည်။ 

အသက် ၅၈ နှစ်အရွယ် ဂျပန်အထက်လွှတ်တော် ကိုယ်စားလှယ်အဖွဲ့ဝင် တာမူရာသည် သက်တမ်း ၁၀၂ နှစ် ရှိပြီဖြစ်သည့် ဂျပန်၏ သက်တမ်းအရင့်ဆုံး ကွန်မြူနစ်ပါတီခေါင်းဆောင် နေရာကို အသက် ၆၉ နှစ်အရွယ် ကာဇူအို ရှီအီ (Kazuo Shii) ထံမှ လွှဲပြောင်းဆက်ခံခဲ့ခြင်းဖြစ်သည်။

ရှီအီသည် ၂၀၀၀ ပြည့်နှစ်ကတည်းက ဂျပန်ကွန်မြူနစ်ပါတီ၏ ခေါင်းဆောင်အဖြစ် တာဝန်ထမ်းဆောင်ခဲ့ပြီး JCP တွင် သက်တမ်းအရှည်ကြာဆုံး တာဝန်ထမ်းဆောင်ခဲ့သည့် ခေါင်းဆောင်တစ်ဦးအဖြစ် မှတ်တမ်းဝင်ခဲ့သူဖြစ်သည်။

ဂျပန်ကွန်မြူနစ်ပါတီ ခေါင်းဆောင်ဖြစ်လာတဲ့ ကာဇူအိုရှီအီကို တွေ့ရစဉ်

တာမူရာအား ပါတီခေါင်းဆောင်အဖြစ် ခန့်အပ်ရန် ရှီဇူအိုကာ (Shizuoka) စီရင်စုနယ်၊ အက်တာမီ (Atami) မြို့တွင်ပြုလုပ်သည့် ပါတီညီလာခံ၏ နောက်ဆုံးနေ့ဖြစ်သော ဇန်နဝါရီ ၁၈ ရက်တွင် ဆုံးဖြတ်ချက်ချခဲ့ခြင်း ဖြစ်သည်။

ထို့နေ့မှာပင် ရှီအီသည် JCP ပါတီ၏ အဓိက မူဝါဒချမှတ်သည့် အဖွဲ့ဖြစ်သော ဗဟိုကော်မတီ၏ ဥက္ကဋ္ဌအဖြစ် ခန့်အပ်ခံခဲ့ရပြီး သူသည် ပါတီလမ်းစဉ်များအပေါ် ဆက်လက်၍ သြဇာလွှမ်းမိုးထားဖွယ်ရှိသည်။

လက်ရှိတွင် တာမူရာသည် JCP ပါတီ၏ မူဝါဒရေးရာကော်မရှင် ဥက္ကဋ္ဌအဖြစ် တတိယသက်တမ်းကို တာဝန် ထမ်းဆောင်နေပြီး ဂျပန်အထက်လွှတ်တော် ကိုယ်စားလှယ်တစ်ဦးလည်းဖြစ်သည်။

ယခုကဲ့သို့ ဂျပန်ကွန်မြူနစ်ပါတီ၏ ခေါင်းဆောင်အသစ် ပြောင်းလဲမှုသည် ကျား/မ အခြေပြု လိင်ခွဲခြားမှုကို ဆန့်ကျင်သည့်သဘော သက်ရောက်ပြီး မျိုးဆက်သစ်လူငယ်များ၏ ထောက်ခံမှုကို ပိုမိုရရှိစေရန် မျှော်လင့်ခြင်း ဖြစ်နိုင်ကြောင်း ကျွမ်းကျင်သူများက ပြောကြားခဲ့သည်။

Source: Japan Times

CNI Internatioanl News

ကိယက်ဗ်၊ ဇန်နဝါရီ ၁၉

ရုရှားနှင့် စစ်ပွဲ ဆက်လက်ဖြစ်ပွားနေသည့်တိုင် ယူကရိန်းအာဏာပိုင်များက ပျက်စီးသွားသည့် မြို့များနှင့် မြို့နယ် များတွင် ပြန်လည်ထူထောင်ရေး လုပ်ငန်းများကို စတင်လုပ်ဆောင်နေကြောင်း ရိုက်တာမှ ဖော်ပြခဲ့သည်။

လွန်ခဲ့သည့် ၂ နှစ်နီးပါးခန့်က ရုရှားနှင့် စစ်ပွဲဖြစ်ပွားခဲ့ပြီးနောက် ယူကရိန်း၏ မြို့အများအပြားသည် ဆိုးဆိုးရွားရွား ထိခိုက်ပျက်စီးခဲ့ပြီး လက်ရှိတွင် မြို့ ၆ မြို့ကို နိုင်ငံတော်ဘဏ္ဍာဖြင့် ပြန်လည် ထူထောင်ရေးများ ပြုလုပ်လျက် ရှိသည်။

ထိုမြို့များထဲတွင် ထရိုစတီယန်နက်စ် (Trostianets) မြို့လည်း ပါဝင်နေပြီး မြို့ထဲမှာ ထွက်ပြေးတိမ်းရှောင် သွားသူများကို ပြန်လည် လာရောက်နေထိုင်စေရန် မြို့ကို ပုံမှန်အခြေအနေအတိုင်း ပြန်ဖြစ်စေဖို့ ပြန်လည် ထူထောင်ရေး လုပ်ငန်းများကို လုပ်ဆောင်နေသည်ဟု မြို့တော်ဝန် ယူရီ ဘိုဗာ (Yuriy Bova)က ပြောကြားခဲ့ သည်။

ကိယက်ဗ် (Kyiv) မြို့တော်ရှိ အရာရှိများကလည်း ယူကရိန်းတွင် ပြန်လည်ထူထောင်ရေးများကို အရေးပေါ် လုပ်ဆောင်မည့် အရိပ်လက္ခဏာများ ပြသခဲ့ပြီး ဆေးရုံများ၊ စာသင်ကျောင်းများ၊ ဓာတ်အားပေးစက်ရုံများနှင့် ရထားလမ်းကွန်ယက်များ အပါအဝင် မရှိမဖြစ် အရေးကြီးသည့် အခြေခံ အဆောက်အအုံများကို အမြန်ဆုံး ပြန်လည်ထူထောင်ရန် လိုအပ်ကြောင်း ပြောကြားခဲ့သည်။

ယူကရိန်းကို ပြန်လည်ထူထောင်ရေးလုပ်နေကြစဉ်

လက်ရှိတွင် စစ်ပွဲသည် ဆက်လက် ဖြစ်ပွားနေဆဲဖြစ်ပြီး ယူကရိန်း၏ တန်ပြန်ထိုးစစ် အောင်မြင်ခြင်း မရှိခဲ့မှုနှင့် အတူ ယူကရိန်းတပ်ဖွဲ့များသည် ရုရှားတပ်ဖွဲ့များ၏ တိုက်ခိုက်မှုကို ခုခံနေရချိန်တွင် ပြန်လည်ထူထောင်ရေး လုပ်ငန်းစဉ်များအတွက် ဒေါ်လာ ဘီလျံချီ လိုအပ်မည်ဖြစ်သည်။ 

စစ်ပွဲသည် အရှိန်လျော့ကျသွားမည့် အလားအလာ မရှိသည့် အခြေအနေမျိုးတွင် ရုရှားသည် ယူကရိန်းနှင့် ဖြစ်ပွားနေသည့် ရှေ့တန်းစစ်မြေပြင်နှင့် အလှမ်းကွာဝေးသော နေရာများကို လေကြောင်းတိုက်ခိုက်မှုများ ပြင်းထန်စွာ ပြုလုပ်ခဲ့သည်။

"ပြန်လည်ထူထောင်ရေး လုပ်ငန်းတွေ အများကြီးလုပ်ရမှာပါ။ ပန်းခြံတွေ၊ ပြည်သူ့ရင်ပြင်တွေ အားလုံးဟာ စစ်ပွဲကြောင့် ပျက်စီးသွားခဲ့လို့ ဖြစ်ပါတယ်"ဟု ယူကရိန်း၏ Okhtyrka မြို့တော်ဝန် ပါဗလို ကုဇ်မန်ကို (Pavlo Kuzemnko) က ပြောကြားခဲ့သည်။

သို့သော် စစ်ပွဲ ဆက်လက် ဖြစ်ပွားနေချိန်တွင် ယခုကဲ့သို့ ပြန်လည်ထူထောင်ရေး လုပ်ငန်းများကို အလျင်စလို ပြုလုပ်နေသည့် အစိုးရ၏ အစီအစဉ်များကို ဒေသခံ အရာရှိများက ဝေဖန်ပြောဆိုနေကြပြီး သဘောထား ကွဲလွဲ မှုများလည်း ရှိနေသည်ဟု ဒေသခံမီဒီယာများက ဖော်ပြခဲ့သည်။

Source: ရိုက်တာ

CNI International News

ဝါရှင်တန်၊ ဇန်နဝါရီ ၁၉

အမေရိကန်တပ်ဖွဲ့များသည် ယီမင်နိုင်ငံရှိ အီရန်၏ ကျောထောက်နောက်ခံ ရရှိထားသည့် ဟူရ်သီသူပုန်များကို သီတင်းတစ်ပတ်အတွင်း စတုတ္ထမြောက်နေ့အဖြစ် တိုက်ခိုက်ခဲ့ရာတွင် ဟူရ်သီသူပုန်များ ပစ်လွှတ်ရန် ပြင်ဆင် ထားသော ဒုံးကျည် ၁၄ စင်းကို တိုက်ခိုက်ဖျက်ဆီးနိုင်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထိုဒုံးကျည်များသည် ဒေသတွင်း အမေရိကန်ရေတပ် စစ်သင်္ဘောများနှင့် ကုန်တင်သင်္ဘောများအတွက် ခြိမ်းခြောက်မှုဖြစ်သည်ဟု အမေရိကန်ဗဟိုစစ်ဌာနချုပ် (CENTCOM)က ဇန်နဝါရီ ၁၇ ရက်တွင် ပြောကြားခဲ့သည်။

ယီမင်နိုင်ငံ၏ နေရာဒေသ အများအပြားကို ထိန်းချုပ်ထားသည့် ဟူရ်သီသူပုန်သည် ပြီးခဲ့သည့်နှစ် နိုဝင်ဘာလ ကတည်းက ဒေသတွင်းရှိ သင်္ဘောများအား တိုက်ခိုက်နေပြီး အမေရိကန်စစ်တပ်၏ တန်ပြန်တိုက်ခိုက်မှုများကို ခံခဲ့ရသည့်တိုင် ၎င်းတို့၏ တိုက်ခိုက်မှုများကို ရပ်တန့်မည်မဟုတ်ကြောင်း ပြောကြားခဲ့သည်။

"အစ္စရေးရဲ့ သင်္ဘောတွေ၊ ဒါမှမဟုတ် အစ္စရေးဆိပ်ကမ်းတွေကို သွားရောက်မယ့် သင်္ဘောတွေကို ပစ်မှတ်ထား တိုက်ခိုက်နေတာတွေကို ကျနော်တို့ ရပ်တန့်သွားမှာ မဟုတ်ပါဘူး။ ဒါက ပါလက်စတိုင်းတွေကို ထောက်ခံကြောင်း ပြသတဲ့အနေနဲ့ တိုက်ခိုက်နေတာပါ" ဟု ဟူရ်သီသူပုန်အဖွဲ့၏ ပြောရေးဆိုခွင့်ရှိသူ မိုဟာမက် အဗ္ဗဒယ်ဆာလမ် (Mohamed Abdelsalam)က အယ်လ်ဂျာဇီးယား သတင်းဌာနကို ဇန်နဝါရီ ၁၈ ရက်တွင် ပြောကြားခဲ့သည်။

အမေရိကန်ဗဟိုစစ်ဌာနချုပ်ကို တွေ့ရစဉ်

အမေရိကန် ဗဟိုစစ်ဌာနချုပ်ကမူ ဟူရ်သီသူပုန်တို့၏ ဒုံးကျည်များသည် အချိန်မရွေး ပစ်လွှတ်နိုင်သည့် အသင့် အနေအထားတွင် ရှိနေသဖြင့် ထိုဒုံးကျည်များကို တိုက်ခိုက် ဖျက်ဆီးခဲ့ခြင်းဖြစ်ကြောင်း X လူမှုမီဒီယာ၌ ရေးသား ဖော်ပြခဲ့သည်။

အမေရိကန်၏ တိုက်ခိုက်မှုများသည် ပင်လယ်နီ (Red Sea) ၊ ဘက်ဘ် အယ်လ် မန်ဒက် ရေလက်ကြား (Bab-el-Mandeb Strait) နှင့် အေဒင်ပင်လယ်ကွေ့ (Gulf of Aden) အတွင်းရှိ နိုင်ငံတကာ ကုန်တင်သင်္ဘောများကို ပစ်မှတ်ထားသည့် ဟူရ်သီသူပုန်များ၏ အဆင်အခြင်ကင်းမဲ့သော တိုက်ခိုက်မှု စွမ်းဆောင်ရည်များကို လျော့ကျ စေရန်ဖြစ်ကြောင်း CENTCOM က ထုတ်ပြန်ခဲ့သည်။

ဟူရ်သီသူပုန်တို့ ထိန်းချုပ်ထားသည့် ယီမင်နိုင်ငံ၏ Saba သတင်းအေဂျင်စီကမူ အမေရိကန်နှင့် ဗြိတိန်တပ်ဖွဲ့များ သည် ဟိုဒီအိုင်ဒါ (Hodeidah) ၊ တာအစ်ဇ် (Taiz) ဒါမာ (Dhamar) ၊ အယ်လ် ဘေဒါ (al-Bayda) နှင့် ဆာဒါ (Saada) ပြည်နယ်များကို ထိမှန်ခဲ့ကြောင်း ဖော်ပြခဲ့သည်။

သို့သော် အမေရိကန်စစ်ဌာနချုပ်ကမူ ဇန်နဝါရီ ၁၇ ရက်က ပြုလုပ်ခဲ့သည့်် တိုက်ခိုက်မှုများတွင် ဗြိတိန်တပ်ဖွဲ့များ ပါဝင်ကြောင်း ပြောကြားခဲ့ခြင်းမရှိပေ။

Source: အယ်လ်ဂျာဇီးယား

CNI International News

အစ္စလာမ်မာဘက်၊ ဇန်နဝါရီ ၁၉

အီရန်နိုင်ငံအတွင်းရှိ စစ်သွေးကြွစခန်းများကို ပါကစ္စတန်လေတပ်က ဇန်နဝါရီ ၁၈ ရက်တွင် လေကြောင်း တိုက်ခိုက်ခဲ့သဖြင့် လူ ၉ ဦးထက်မနည်း သေဆုံးခဲ့ကာ နှစ်နိုင်ငံအကြား တင်းမာမှုများမြင့်တက်လာခဲ့သည်ဟု အေပီမှ ဖော်ပြခဲ့သည်။

အီရန်က ပါကစ္စတန်နယ်စပ်ဒေသတွင် ဘာလုချ် (Baluch) စစ်သွေးကြွ အဖွဲ့နှစ်ဖွဲ့ကို ဇန်နဝါရီ ၁၆ ရက်က တိုက်ခိုက်ခဲ့ပြီးနောက် ပါကစ္စတန်ကလည်း အီရန်နိုင်ငံအတွင်း လေကြောင်းတိုက်ခိုက်မှုများ ပြုလုပ်ပြီး တုန့်ပြန်ခဲ့ခြင်းဖြစ်သည်။

ထိုစစ်သွေးကြွအဖွဲ့များသည် ပါကစ္စတန်နှင့် အီရန်နိုင်ငံများတွင် အကြမ်းဖက် တိုက်ခိုက်မှုများ ပြုလုပ်နေသည်။

အဆိုပါ တိုက်ခိုက်မှုများနှင့်ပတ်သက်ပြီး အီရန်နှင့်ပါကစ္စတန်အကြား အပြန်အလှန် စွပ်စွဲပြစ်တင်မှုများ ပြုလုပ် ခဲ့သည်။

ယခုကဲ့သို့ တစ်နိုင်ငံနှင့် တစ်နိုင်ငံအကြား တိုက်ခိုက်မှုများကြောင့် အီရန်နှင့် ပါကစ္စတန်အကြား သံတမန် ဆက်ဆံရေးတွင် တင်းမာမှုများ မြင့်တက်ခဲ့ပြီး နှစ်နိုင်ငံစလုံးသည် ပြည်တွင်းရေး ဖိအားများနှင့် ရင်ဆိုင်နေရသည်။

 ကန့်ကွက်နေကြစဉ်

ဂါဇာကမ်းမြောင်ဒေသတွင် အစ္စရေးနှင့် ဟားမာ့စ်အဖွဲ့အကြား စစ်ပွဲဖြစ်ပွားနေချိန်တွင် အီရန်က ပါကစ္စတန် နယ်နိမိတ်ပေါ်တွင် တိုက်ခိုက်မှုများ ပြုလုပ်ခဲ့ပြီး ပါကစ္စတန်ကလည်း အီရန်၏ နယ်နိမိတ်ပေါ်၌ တုန့်ပြန် တိုက်ခိုက်မှုများ ပြုလုပ်ခဲ့ခြင်းဖြစ်သည်။

ဇန်နဝါရီ ၁၈ ရက်က တိုက်ခိုက်မှုသည် ရည်ရွယ်ထားသည့် စစ်ရေးပစ်မှတ်များကို တိကျစွာ ထိမှန်ခဲ့ကြောင်း ပါကစ္စတန်နိုင်ငံခြားရေးဝန်ကြီးဌာနက ပြောကြားခဲ့သည်။ 

"ဒီနေ့ မနက်ပိုင်းက လုပ်ဆောင်ချက်ဟာ အကြမ်းဖက်လှုပ်ရှားမှုတွေ မဖြစ်ပွားခင်မှာ ခိုင်မာတိကျတဲ့ ထောက်လှမ်းရေးသတင်းတွေနဲ့အတူ ပြုလုပ်ခဲ့တာ ဖြစ်ပါတယ်။ ဒီလုပ်ဆောင်ချက်ဟာ ပါကစ္စတန်ရဲ့ အမျိုးသားလုံခြုံရေးကို ခြိမ်းခြောက်မှုတွေရန်က ကာကွယ်ဖို့ ပြုလုပ်ခဲ့တာ ဖြစ်ပါတယ်" ဟု ပါကစ္စတန် နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

နိုင်ငံခြားရေး၀န်ကြီးဌာနရှေ့မှာ လုံခြုံရေးတစ်ဦးကိုတွေ့ရစဉ်

ပါစ္စတန်စစ်တပ်သည် တိုက်ခိုက်ရေးဒရုန်းများ၊ ရော့ကတ်များ၊ ဖောက်ခွဲရေးပစ္စည်းများနှင့် ဒုံးကျည်များကို အသုံးပြု တိုက်ခိုက်ခဲ့ခြင်းဖြစ်ကြောင်း ထုတ်ပြန်ခဲ့ပြီး ပါကစ္စတန် တိုက်လေယာဉ်များသည် အီရန် လေပိုင်နက် အတွင်းသို့ ဝင်ရောက်ခြင်းမရှိဘဲ အဝေးမှ ပစ်ခတ်တိုက်ခိုက်ခဲ့သည့် သဘောမျိုး ထုတ်ပြန်ခဲ့သည်။

အီရန်၏ စစ္စတန်နှင့် ဘာလူချီစတန် (Sistan and Baluchestan) ပြည်နယ်၏ ဒုတိယအုပ်ချုပ်ရေးမှူး အလီ ရီဇာ မာဟာမက်တီ (Ali Reza Marhamati) ကမူ ပါကစ္စတန်၏ တိုက်ခိုက်မှုကြောင့် အမျိုးသမီး ၃ ဦး၊ ကလေး ၄ ဦးနှင့် အမျိုးသား ၂ ဦးသေဆုံးခဲ့ပြီး အပြစ်မဲ့ အရပ်သားများ သေဆုံးခဲ့ခြင်းဖြစ်သည်ဟု ပြောကြားခဲ့သည်။

Source: အေပီ

CNI International News

ပေကျင်း၊ ဇန်နဝါရီ ၁၈

ထိုင်ဝမ်ကို ထိန်းချုပ်ရန် အင်အားသုံး လုပ်ဆောင်သွားမည်ဆိုသည့် ခြိမ်းခြောက်မှုများသည် ပြည်ပကြားဝင် စွက်ဖက်မှုများနှင့် လက်တစ်ဆုပ်စာ ထိုင်ဝမ်ခွဲထွက်ဝါဒီများကိုသာ ရည်ရွယ်ခြင်းဖြစ်ကြောင်း တရုတ်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် ထိုင်ဝမ်ဒေသခံများ အနေဖြင့် တရုတ်အပေါ် အထင်အမြင် လွဲမှားနေမှုများကို အဆုံးသတ်ရန် လိုအပ် ကြောင်းလည်း တရုတ်၏ ထိုင်ဝမ်ရေးရာရုံးက ဇန်နဝါရီ ၁၇ ရက်တွင် ပြောကြားခဲ့သည်။

ဇန်နဝါရီ ၁၃ ရက်က ပြုလုပ်ခဲ့သည့်် သမ္မတရွေးကောက်ပွဲကို အနိုင်ရခဲ့သည့် ထိုင်ဝမ်၏ ဒီမိုကရက်တစ် တိုးတက် ရေးပါတီ (DPP) ကမူ ထိုင်ဝမ်ကို ပိုင်ဆိုင်ကြောင်း ကြေညာထားသော တရုတ်၏ ပြောကြားချက်များကို ငြင်းဆို ခဲ့ပြီး တရုတ်နှင့် ဆွေးနွေးမှုများပြုလုပ်ရန် ထပ်တလဲလဲ ကမ်းလှမ်းခဲ့သည်။

သို့သော် တရုတ်အစိုးရက ထိုင်ဝမ်၏ ကမ်းလှမ်းမှုများကို ပယ်ချခဲ့သည်။

ထိုင်ဝမ်သမ္မတအဖြစ် ရွေးကောက်ခံခဲ့ရသည် လိုင်ချင်တေးကို အန္တရာယ်များသည့် ခွဲထွက်ဝါဒီ တစ်ဦးအဖြစ် တရုတ်က ယူဆထားသည်။ 

 ထိုင်ဝမ် အလံကို လွှင့်တင်နေစဉ်

တရုတ်၏ ထိုင်ဝမ်ရေးရာရုံးမှ ပြောရေးဆိုခွင့်ရှိသူ ချန်းပင်ဟွာ (Chen Binhwa) ကမူ ထိုင်ဝမ်ရွေးကောက်ပွဲ ရလဒ် သည် ထိုင်ဝမ်အပေါ်ထားရှိသည့်် တရုတ်၏သဘောထားကို ပြောင်းလဲစေနိုင်မည် မဟုတ်ကြောင်းနှင့် ထိုင်ဝမ် သည် တရုတ်နှင့်ပြန်လည် ပေါင်းစည်းရမည်ဖြစ်ကြောင်း ပြောကြားခဲ့သည်။

ထို့ပြင် မိမိတို့၏ အင်အားပြ ခြိမ်းခြောက်မှုများသည် ထိုင်ဝမ်ဒေသခံ အများစုကို ရည်ရွယ်ခြင်း မဟုတ်ကြောင်း၊ ပြည်ပ၏ ကြားဝင်စွက်ဖက်မှုများနှင့် ထိုင်ဝမ်လွတ်လပ်ရေး ခွဲထွက်ဝါဒီ အချို့ကိုသာ ရည်ရွယ်ခြင်းဖြစ်ကြောင်း ချန်က ပြောကြားခဲ့သည်။

တရုတ်သည် ပြီးခဲ့သည့် တစ်နှစ်ကျော်က ထိုင်ဝမ်ကျွန်းအနီးတွင် အကြီးစား စစ်ရေးလေ့ကျင့်မှု နှစ်ကြိမ်ပြုလုပ်ခဲ့ ပြီး ထိုင်ဝမ်ရေလက်ကြားအတွင်းသို့ တိုက်လေယာဉ်များနှင့် စစ်သင်္ဘောများကို ပုံမှန်စေလွှတ်ခဲ့သည်။

DPP ပါတီအနေဖြင့် နောင်တမရဘဲ လွတ်လပ်ရေးကြိုးပမ်းသည့် ရန်လိုမှုများကို ဆက်လက် လုပ်ဆောင်မည် ဆိုပါက ထိုင်ဝမ်ကို အန္တရာယ်များသည့် အခြေအနေသို့ တွန်းပို့ရာရောက်ပြီး ထိုင်ဝမ်ကို အကြီးအကျယ် ထိခိုက် နစ်နာစေလိမ့်မည်ဖြစ်ကြောင်း ချန်က ပြောကြားခဲ့သည်။

Source: ရိုက်တာ

CNI International News

ဘန်ကောက်၊ ဇန်နဝါရီ ၁၈ 

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ရဲတပ်ဖွဲ့ အထွေထွေဆေးရုံတွင် ဆက်ရှိနေဆဲဖြစ်ကြောင်းနှင့် ပြစ်ဒဏ်ကာလမစေ့မီ ကတိခံဝန်ဖြင့် ပြန်လည်လွတ်မြောက်ရန် လျှောက်ထား နိုင်ကြောင်း တရားရေးအာဏာပိုင်များက ဇန်နဝါရီ ၁၇ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့ သည်။ 

သက်ဆင်သည် အမှန်တကယ် နာမကျန်းဖြစ်နေခြင်း ဟုတ်/မဟုတ်နှင့် ဆေးရုံ၏ ဆေးကုသဆောင်တွင် တကယ် ရှိ/မရှိ အတည်ပြုရန် နိုင်ငံရေးပါတီများက ကြိုးပမ်းနေချိန်တွင် တရားရေးဝန်ကြီး၏ အကြံပေးပုဂ္ဂိုလ် ဆွမ်ဘွန် မူအန်ကလမ် (Somboon Muangklum) က တရားရေးဝန်ကြီးဌာန၌ ပြုလုပ်သည့် သတင်းစာ ရှင်းလင်းပွဲမှာ အထက်ပါအတိုင်း ပြောကြားခဲ့သည်။

အစိုးရဌာနများအပေါ် မကျေနပ်ချက်များကို စုံစမ်းတင်ပြရန် အစိုးရက ခန့်ထားသည့် အရာရှိ (ombudsman)၏ ကိုယ်စားလှယ်တစ်ဦးသည် ရဲတပ်ဖွဲ့ အထွေထွေဆေးရုံသို့ လာရောက်ခဲ့ပြီး ဆေးရုံဝင်းအတွင်းရှိ မဟာ ဘူမီဘော ရာချာနူဆွန်း ၈၈ ပန်ဆာ အဆောက်အအုံ (Maha Bhumibol Rachanusorn 88 Phansa Building) ၏ ၁၄ လွှာ တွင် သက်ဆင်နှင့် တွေ့ဆုံခဲ့ကြောင်း ဆွမ်ဘွန်က ပြောကြားခဲ့သည်။

သက်ဆင်နဲ့ ထိုင်းရဲတပ်ဖွဲ့အကြီးအကဲကိုတွေ့ရစဉ်

သက်ဆင်သည် ဆေးရုံတွင် ဆက်ရှိနေပြီး အခြားသူများ ထင်နေသကဲ့သို့ လူနေတိုက်ခန်းထဲတွင် နေထိုင်နေခြင်း မဟုတ်ကြောင်း မစ္စတာဆွမ်ဘွန်က ပြောသည်။

အကျဉ်းသားများ အကျင့်စာရိတ္တ ပြန်လည်ထူထောင်ရေးဌာနမှ လက်ထောက်ညွှန်ကြားရေးမှူးချုပ် စစ်သီ သုတိဗွန် (Sitthi Sutivong) လည်း ထိုသတင်းစာ ရှင်းလင်းပွဲကို တက်ရောက်ခဲ့ပြီး သက်ဆင်သည် အသက်အရွယ် ကြီးရင့်ပြီး နာမကျန်းဖြစ်နေ၍ ခံဝန်ဖြင့် ပြန်လည်လွတ်မြောက်ရန် လျှောက်ထားခွင့်ရှိကြောင်း သတင်းထောက် များကို ပြောကြားခဲ့သည်။

မည်သို့ပင်ဆိုစေ အကျဉ်းသားများသည် ၎င်းတို့ကိုယ်တိုင် ခံဝန်ဖြင့် လွတ်မြောက်ရန် လုပ်ဆောင်ခွင့်မရှိသဖြင့် အကျဉ်းသားများကို ခံဝန်ဖြင့် ပြန်လွှတ်ပေးရန် အကျဉ်းထောင် အုပ်ချုပ်ရေးမှူး၏ ခံဝန်လျှောက်ထားပေးမှုကို လိုအပ်ကြောင်း စစ်သီက ပြောကြားခဲ့သည်။

သက်ဆင်နဲ့ သမီး ၂ ဦးကိုတွေ့ရစဉ်

သက်ဆင်ကို အကျဉ်းချခဲ့သည့် ဘန်ကောက် ရမန်အကျဉ်းထောင်၏ အုပ်ချုပ်ရေးမှူးသည် လက်ရှိအချိန်အထိ သက်ဆင်ကို ခံဝန်ဖြင့် ပြန်လွှတ်ပေးရန် တောင်းဆိုခြင်းမရှိသေးကြောင်း ၎င်းက ထပ်လောင်း ပြောကြားခဲ့သည်။

အသက် ၇၄ နှစ်အရွယ် သက်ဆင်သည် ပြီးခဲ့သည့်နှစ် သြဂုတ်လ ၂၂ ရက်က ထိုင်းနိုင်ငံသို့ ပြန်လည် ရောက်ရှိခဲ့ ပြီးနောက် အကျင့်ပျက်ခြစားမှု၊ အာဏာအလွဲသုံးမှုများဖြင့် ထောင်ဒဏ် ၁၅ နှစ် ချမှတ်ခံခဲ့ရသည်။ 

သို့သော် သက်ဆင်က ထိုင်းဘုရင်ထံတွင် အသနားခံစာတင်ခဲ့ပြီးနောက် ထိုင်းဘုရင်က ၎င်း၏ ထောင်ဒဏ်ကို ၁ နှစ်အထိ လျှော့ချပေးခဲ့သည်။

ထိုင်းအထက်လွှတ်တော် အမတ်တစ်ဦးကမူ သက်ဆင်သည် လာမည့်လတွင် ပြန်လည်လွတ်မြောက် လာနိုင် ကြောင်း ခန့်မှန်းပြောကြားခဲ့သည်။ 

Source: ဘန်ကောက်ပို့စ်

CNI International News

မော်စကို၊ ဇန်နဝါရီ ၁၈

စစ်ပွဲဆက်လက် ဖြစ်ပွားနေမည်ဆိုပါက ယူကရိန်း၏ အချုပ်အခြာအာဏာကို ပြင်းထန်စွာ ထိခိုက်စေလိမ့်မည် ဖြစ်ကြောင်း ရုရှားသမ္မတ ဗလာဒီမာပူတင် (Vladimir Putin)က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထို့နောက် ရုရှားသည် မိမိတို့ရရှိထားသည် နယ်နိမိတ်များကို မည်သည့်အခါမျှ စွန့်လွှတ်မည်မဟုတ်ကြောင်း ရုရှားသမ္မတ ပူတင် (Vladimir Putin) က ဇန်နဝါရီ ၁၆ ရက်တွင် ပြောကြားခဲ့သည်။

ယူကရိန်းသမ္မတ  ဇာလန်းစကီး (Volodymyr Zelenskiy) ၏ တောင်းဆိုမှုဖြင့် ကမ္ဘာလုံးဆိုင်ရာ ညီလာခံတစ်ခုကို လက်ခံကျင်းပရန် ဆွစ်ဇာလန်နိုင်ငံက သဘောတူခဲ့ပြီးနောက် တစ်ရက်အကြာတွင် ပူတင်၏ မှတ်ချက်စကားများ ထွက်ပေါ်ခဲ့ခြင်းဖြစ်သည်။

အနောက်နိုင်ငံများနှင့် ယူကရိန်းအကြား ဆွေးနွေးနေသည့် ငြိမ်းချမ်းရေးဖော်မြူလာများကို ပူတင်က ပယ်ချခဲ့ပြီး ထိုငြိမ်းချမ်းရေးဖော်မြူလာများထဲတွင် လက်မခံနိုင်ဖွယ် တောင်းဆိုချက်များ ပါဝင်နေသည်ဟု ပြောကြားခဲ့သည်။

 ဇာလန်းစကီးကို တွေ့ရစဉ်

"ကောင်းပြီလေ။ သူတို့က မဆွေးနွေးချင်ဘူးဆိုလည်း မဆွေးနွေးရုံပဲပေါ့။ ယူကရိန်းရဲ့ တန်ပြန်ထိုးစစ်က ကျရှုံးရုံ တင် မကပါဘူး။ အခြေအနေက ရုရှားစစ်တပ်ရဲ့ လက်ထဲကို အလုံးစုံရောက်ရှိနေပါပြီ။ ဒီအတိုင်းသာ ဆက်သွား မယ်ဆိုရင် ယူကရိန်းရဲ့ အချုပ်အခြာအာဏာပိုင်မှုကို အစားထိုး မရလောက်တဲ့အထိ အကြီးအကျယ် ထိခိုက်စေ ပါလိမ့်မယ်"ဟု ပူတင်က ပြောကြားခဲ့သည်။

ယူကရိန်း၏ တန်ပြန်ထိုးစစ် အောင်မြင်ခြင်း မရှိမှုနှင့်အတူ မကြာသေးမီ လများအတွင်းက စစ်ပွဲနှင့်ပတ်သက်ပြီး ထုတ်ပြန်ခဲ့သည့် ပူတင်၏ အစီရင်ခံစာများထဲတွင် ၎င်းကိုယ်ကိုယ် ပိုမိုယုံကြည်မှုရှိလာသည့် လက္ခဏာများကို ပြသခဲ့သလို ပိုမိုရန်လိုလာသည့် အသွင်ကို မြင်တွေ့ရသည်။

လက်ရှိအချိန်တွင် ရုရှားသည် ယူကရိန်း၏ နယ်မြေ ၁၇ ဒသမ ၅ ရာခိုင်နှုန်းကို ထိန်းချုပ်ထားသည်။ 

ယူကရိန်းစစ်သားတွေကိုတွေ့ရစဉ်

ဆွေးနွေးညှိနှိုင်းမှုများအတွက် ပြောဆိုမှုများသည် ယူကရိန်းတွင် မိမိတို့ ထိန်းချုပ်ထားသည့် နယ်မြေများကို စွန့်လွှတ်ရန် ကြိုးပမ်းချက် တစ်ခုဖြစ်သည်။

ထိုကြိုးပမ်းချက်သည် မဖြစ်နိုင်ကြောင်း၊ အောင်မြင်လိမ့်မည် မဟုတ်သည်ကို လူတိုင်းက သိရှိထားကြောင်း ပူတင် က ပြောကြားခဲ့သည်။  

ဇာလန်းစကီးက အဆိုပြုခဲ့သည့် ငြိမ်းချမ်းရေး ဖော်မြူလာတစ်ခုတွင် ယူကရိန်း၏ နယ်မြေတည်တံ့ခိုင်မြဲရေးကို ပြန်လည်ထိန်းသိမ်းရန်၊ ရန်လိုမှုများကို ရပ်နားရန်၊ ရုရှားစစ်သားများ ယူကရိန်းမှ ထွက်ခွာရန်နှင့် အခြားအချက် များ ပါဝင်သည်။ 

ရုရှားကမူ ဆွေးနွေးညှိနှိုင်းမှုများသည် မြေပြင်တွင် ရုရှားတပ်ဖွဲ့များ ဖန်တီးခဲ့သည့် လက်တွေ့ကျသော အခြေအနေ အသစ်များကိုပါ ထည့််သွင်း ဆွေးနွေးရမည်ဖြစ်ကြောင်း ပြောကြားခဲ့သည်။

Source: ရိုက်တာ