CNI International News

မင့်ခ်၊ ဧပြီ ၇

ဘယ်လာရုစ်သို့ ရုရှား၏ နျူကလီးယား လက်နက်များ ပို့ဆောင်မည့် အချိန်ကာလကို နှစ်နိုင်ငံခေါင်းဆောင်များ က ပူးတွဲဆုံးဖြတ်သွားမည်ဟု ဘယ်လာရုစ် လုံခြုံရေးကောင်စီ အတွင်းရေးမှူးက ကြာသပတေးနေ့တွင် ပြောကြောင်း တာ့စ်သတင်းတွင် ဖော်ပြသည်။

ထိုကိစ္စနှင့် ပတ်သက်သည့် အဆုံးအဖြတ်ကို ရုရှားသမ္မတ ဗလာဒီမာပူတင် (Vladimir Putin)၊ ဘယ်လာရုစ် သမ္မတ အလက်ဇန္ဒား လူကာရှန်ကို (Alexander Lukashenko)၊ ရုရှားနှင့် ဘယ်လာရုစ်တို့၏ စစ်ဦးစီးချုပ်များက ပြုလုပ်သွားမည်ဟု ဘယ်လာရုစ် လုံခြုံရေးကောင်စီအတွင်းရေးမှူး အလက်ဇန္ဒား ဗိုဖိုဗစ်ချ် (Alexander Volfovich) က ပြောသည်။

ဘယ်လာရုစ်၏ လုံခြုံရေးကောင်စီအတွင်းရေးမှူး အလက်ဇန္ဒား ဗိုဖိုဗစ်ချ်ကိုတွေ့ရစဉ်

လက်နက် အရေအတွက်သည် အရေးမကြီးကြောင်း၊ အရေးကြီးသည်မှာ ထိုလက်နက်များကို ဘာကြောင့်နှင့် ဘယ်လိုမျိုး အကျိူးရှိစွာ အသုံးပြုသွားမလဲ ဆိုခြင်းဖြစ်ကြောင်း၊ ဘယ်အနေအထားမှာ အသုံးပြုရမည်ကို သိရှိထား ပြီးဖြစ်ကြောင်း၊ မဖြစ်မနေ သုံးစွဲရန် လိုအပ်သည်ဟု မထင်ကြောင်း ဗိုဖိုဗစ်ချ်က ပြောသည်။

ထို့နောက် နောက်ဆုံးတွင် စစ်ဘက်နှင့် မဟာဗျူဟာမြောက် နျူကလီးယား လက်နက်များသည် ရုရှား- ဘယ်လာ ရုစ် နှစ်နိုင်ငံလုံးအတွက် လုံခြုံရေးကို သေချာစေသည့် ကြိုတင် ကာကွယ်မှု တစ်ခုသာ ဖြစ်ကြောင်းလည်း ဗိုဖိုဗစ်ချ်၏ ပြောစကားကို ကိုးကား၍ BelTA သတင်းက ဖော်ပြထားသည်။

ဘယ်လာရုစ်နိုင်ငံ၏ တောင်းဆိုမှုကြောင့် ရုရှား၏ နျူကလီးယား လက်နက်များကို ဘယ်လာရုစ်မြေတွင် သွားရောက် ဖြန့်ကျက်ထားမည်ဟု ပူတင်က အစောပိုင်းတွင် ပြောခဲ့သည်။

ရုရှား-ဘယ်လာရုစ် လုံခြုံရေးကောင်စီအစည်းအဝေး ကျင်းပနေစဉ်

ထိုအခြေအနေက အမေရိကန်ဘက်မှ ၎င်း၏ မဟာမိတ်များမြေပေါ်တွင် နျူကလီးယား သွားရောက် တပ်ဆင်ထား ခြင်း သကဲ့သို့ပင် ဖြစ်သည်။

ရုရှားသည် နျူကလီးယား လက်နက် သယ်ဆောင်နိုင်သည့် Iskandar စနစ်များကို ဘယ်လာရုစ်သို့ ပို့ဆောင်ခဲ့ ပြီးဖြစ်ကာ ဘယ်လာရုစ် လေတပ်အား မွမ်းမံရေးအတွက်လည်း ကူညီပေးလျက်ရှိ သည်။

Source: တာ့စ်

CNI International News

ဘေဂျင်း၊ ဧပြီ ၆

ယခုသီတင်းပတ်အတွင်း တရုတ်သမ္မတ ရှီကျင့်ဖျင် (Xi Jinping)နှင့် တွေ့ဆုံမှု၌ ယူကရိန်းငြိမ်းချမ်းရေးအတွက် တရုတ်နိုင်ငံအား တာဝန်ခွဲဝေ ပေးအပ်လိုကြောင်း ပြောဆိုသွားမည်ဟု ပြင်သစ်သမ္မတ အီမန်နျူရယ် မက်ခရွန် (Emmanuel Macron)က ဗုဒ္ဓဟူးနေ့တွင် ပြောခဲ့ကြောင်း အေပီသတင်းတွင် ဖော်ပြထားသည်။

မက်ခရွန်သည် ကြာသပတေးနေ့၌ ရှီနှင့် တွေ့ဆုံမှုတွင် ရုရှားသမ္မတအပေါ် တရုတ်၏ လွှမ်းမိုးနိုင်မှုအား အသုံး ပြုရေး တိုက်တွန်းသွားမည်ဟု ပြင်သစ်အရာရှိများက အစောပိုင်းတွင် ပြောခဲ့သော်လည်း တရုတ်ဘက်တွင် ကြီးကြီးမားမား ပြောင်းလဲမှု တစ်စုံတစ်ရာ ပေါ်ပေါက်လာဖွယ် မရှိပေ။

တရုတ်နှင့် ဆက်ဆံရေးတွင် မက်ခရွန်သည် ဥရောပကော်မရှင်ဥက္ကဋ္ဌ အာဆူလာ ဗွန်ဒါလီယန် (Ursula von der Leyen) နှင့် ပူးပေါင်း ဆောင်ရွက်သွားမည် ဖြစ်သည်။

ရုရှား၏ ယူကရိန်းအပေါ် ကျူးကျော်စစ် မစတင်ခင် ရုရှားနှင့်တရုတ်တို့ကြား ဆက်ဆံရေးမှာ အဆုံးမရှိဟု နှစ်နိုင်ငံ ခေါင်းဆောင်များက ပြောသည်။

တရုတ်သည် ကျူးကျော်မှုနှင့် ပတ်သက်၍ ရုရှားအား ဝေဖန် အပြစ်တင်ရန် ငြင်းဆိုထားသည်။

တရုတ်အလံကိုတွေ့ရစဉ်

ထိုကိစ္စတွင် ကြားနေအဖြစ် ရပ်တည်ကာ အပစ်အခတ် ရပ်စဲရေး၊ ငြိမ်းချမ်းရေးတို့ကို တောင်းဆိုထားသည်။

တရုတ်ရှိ ပြင်သစ်နိုင်ငံသားများနှင့် တွေ့ဆုံရာတွင် မက်ခရွန်က ၎င်းသည် ယူကရိန်း၊ အီရန်၊ မြောက်ကိုရီးယား အပါအဝင် နိုင်ငံတကာ အကြောင်းကိစ္စများ၌ ငြိမ်းချမ်းရေးနှင့် တည်ငြိမ်ရေးတို့အတွက် တရုတ်နိုင်ငံအား တာဝန် ခွဲဝေယူရေး လုပ်ဆောင်သွားမည်ဟု ပြောခဲ့သည်။

တရုတ်သည် ယူကရိန်း ပြည်သူများအတွက် အသုံးဝင်မည့် လုပ်ဆောင်ချက်များတွင် ပါဝင်လိမ့်မည်ဟု မျှော်လင့် ကြောင်း မက်ခရွန်က ပြောကာ တရုတ်နှင့် ဆွေးနွေးပွဲများသည် မရှိမဖြစ် အရေးပါကြောင်းလည်း ပြောသည်။

တရုတ်အစိုးရသည် ရုရှားအား ၎င်းတို့အတွက် စွမ်းအင် အရင်းအမြစ်တစ်ခုဟု ရှုမြင်ထားကာ နှစ်နိုင်ငံလုံးသည် ကမ္ဘာ့ရေးရာကိစ္စများတွင် အမေရိကန်၏ လွှမ်းမိုးမှုကို ကန့်ကွက်သည်။

တရုတ်သည် ရုရှား၏ ရေနံနှင့်သဘာဝ ဓာတ်ငွေ့ အကြီးဆုံး ဝယ်လက်ဖြစ်သည်။ ထိုအခြေအနေက အနောက် အုပ်စု၏ အရေးယူ ပိတ်ဆို့မှုများနှင့် ရင်ဆိုင်နေရချိန်တွင် ရုရှား၏ ဝင်ငွေကို အကူအညီ ဖြစ်စေသည်။

ယင်းက တရုတ်၏ ရုရှားအပေါ် လွှမ်းမိုးနိုင်မှုကို မြင့်တက်စေသော်လည်း ရှီသည် ပူတင်အား ဖိအားပေးခြင်းဖြင့် နှစ်နိုင်ငံဆက်ဆံရေး ပျက်စီးသွားမည့် အန္တရာယ်ကို ရှောင်ရှားချင်ပုံ ရသည်။

မက်ခရွန်ကိုတွေ့ရစဉ်

ပူတင်၏ ဘယ်လာရုစ်တွင် နျူကလီးယား လက်နက်များ ချထားရေး အစီအစဉ်ကို တရုတ်ဘက်က လက်မခံ ကြောင်းလည်း မက်ခရွန်က ပြောသည်။

နိုင်ငံများ၏ နယ်မြေပိုင်ဆိုင်မှုနှင့် အချုုပ်အခြာအာဏာတို့သည် ကုလသမဂ္ဂ ပဋိညာဉ် စာတမ်း၏ အစိတ်အပိုင်း ဖြစ်ကာ ယင်းကို တရုတ်ဘက်က အခိုင်အမာ လက်ကိုင်ထားသည်ဟု မက်ခရွန်က ပြောသည်။

ထိုသို့သော မူဝါဒများကို လိုက်နာခြင်းသည် ငြိမ်းချမ်းရေးလမ်းကြောင်း ရှာဖွေရန် ကြိုးစားခြင်း၊ ရှေ့ဆီသို့ သွားခြင်း ဆိုသည့် အဓိပ္ပါယ်ဖြစ်ကြောင်းလည်း မက်ခရွန်က ပြောသည်။

Source: AP

CNI International News

အင်ဖဲလ်၊ ဧပြီ - ၆

အိန္ဒိယကို တော်လှန်တိုက်ခိုက်နေသည့် ကူးကီးလွတ်လပ်ရေးတပ်မတော်/ကူးကီးလွတ်လပ်ရေးအဖွဲ့(KIA/KIO)၏ တပ်မှူးဖြစ်သူကို အိန္ဒိယနိုင်ငံ၊ မဏိပူရ် ပြည်နယ် ရဲတပ်ဖွဲ့က အလိုရှိဆုံး ရာဇဝတ်သားအဖြစ် သတ်မှတ်ခဲ့ပြီး ဆုငွေထုတ်ခဲ့သည်ဟု Imphal Times သတင်းတွင် ဖော်ပြသည်။

အဆိုပါ ခေါင်းဆောင်၏ အမည်မှာ Thangkhongam Haokip(သမ်ခိုဂမ် ဟာကီးပ်) (ခေါ်) Davidson (ဒေးဗစ်ဆန်း) (ခေါ်) Pareng Kom(ပရာကို့စ်) ဖြစ်သည်ဟု ဖော်ပြသည်။

၎င်းနှင့်ပတ်သက်သည့် သတင်းပေးနိုင်သူအား ဆုငွေ ရူပီး ၅၀၀၀၀ ပေးမည်ဟု ဆုကြေး ထုတ်ထားသည်။

Haokip(ဟာကီးပ်) သည် မြန်မာနှင့်နယ်စပ် မဏိပူရ်ပြည်နယ် (Manipur) ချူရာချန်ပါခရိုင် (Churachandpur)၊ မာတီဂျန်းခိုပီ (Matijang Khopi) ကျေးရွာဇာတိ ဖြစ်သည်ဟု ဖော်ပြသည်။

ဆုငွေထုတ်ခံထားရတဲ့ ကူးကီးသူပုန်ခေါင်းဆောင် Thangkhongam Haokip ကို တွေ့ရစဉ်

ထို့နောက် ၎င်းသည် မကြာသေးခင်က ဖြစ်ပွားခဲ့သော ငွေရရှိရန် ပြန်ပေးဆွဲမှု၊ ငွေညှစ်မှုနှင့် ဗုံးခွဲမှုများတွင် ပါဝင် ပတ်သက်နေသည်ဟု စွပ်စွဲခံထားရသူ ဖြစ်သည်။

ဟာကီးပ်အား ချူရာချန်ပါ ရဲစခန်းတွင် အမှုဖွင့်ထားသည့် အမှုနှစ်ခု၊ ခရိုင်အတွင်းရှိ တခြားသော တရားရုံးများတွင် ဖွင့်ထားသောအမှု ၈ ခုတို့နှင့် ဆက်စပ်နေခြင်းအတွက် အလိုရှိနေခြင်း ဖြစ်သည်။

ရဲတပ်ဖွဲ့သည် စွပ်စွဲခံထားရသူ၏ ဓာတ်ပုံနှင့်အတူ သတင်းပေးရန် ဖုန်းနံပါတ်များကိုလည်း ဖော်ပြထားသည်။

ထို့နောက် သတင်းပေးသူ၏ အချက်အလက်များကို လျှို့ဝှက်ပေးထားမည်ဟု ကြေညာထားသည်။

Source: Imphal Times

CNI International News

ဂျကာတာ၊ ဧပြီ ၆

အင်ဒိုနီးရှားအရာရှိများသည် ပိုမိုများပြားသော မြန်မာ့အရေး ပါဝင်ပတ်သက် နေသူများနှင့် တွေ့ဆုံခဲ့ပြီးနောက် မြန်မာ့နိုင်ငံရေး အကျပ်အတည်းကို ဖြေရှင်းနိုင်ရေး တိုးတက်မှုများ လုပ်ဆောင်နိုင်ခဲ့သည်ဟု အင်ဒိုနီးရှားနိုင်ငံ ခြားရေးဝန်ကြီး ရတ်နိုမာဆူဒီ (Retno Marsudi) က ပြောကြောင်း The Straits Times သတင်းမှ ဖော်ပြသည်။

ငြိမ်းချမ်းရေး အစီအစဉ်များနှင့်အညီ ဆွေးနွေးမှုများကို လုပ်ဆောင်ခဲ့သည်။

ထိုဆွေးနွေးမှုများတွင် ယခင်က တွေ့ဆုံဆွေးနွေးခဲ့ဖူးခြင်း မရှိသူများပါ ပါဝင်လာသည်ဟု ရတ်နိုက ပြော သော်လည်း ၎င်းတို့သည် မည်သူမည်ဝါ ဖြစ်သည်ကို တော့ မပြောခဲ့ပေ။

၂၀၂၃ ခုနှစ်အတွက် အာဆီယံဥက္ကဋ္ဌအဖြစ် တာဝန်ယူရသည့် အင်ဒိုနီးရှားသည် မြန်မာနိုင်ငံမှ အခြေအနေများ တိုးတက်ကောင်းမွန်လာစေရေး အစွမ်းကုန် လုပ်ဆောင်သွားမည်ဟု ကြုံးဝါးထားသည်။

အင်ဒိုနီးရှားနိုင်ငံခြားရေးဝန်ကြီး ရတ်နိုမာဆူဒီကိုတွေ့ရစဉ်

၂၀၂၁ ခုနှစ်၊ ဧပြီလတွင် အာဆီယံက ဘုံသဘောတူညီချက် ၅ ချက်ပါ ငြိမ်းချမ်းရေး အစီအစဉ်ကို ထုတ်ပြန်ခဲ့ သော်လည်း ငြိမ်းချမ်းရေး ထိန်းသိမ်းမှု လုပ်ငန်းများတွင်တော့ တိုးတက်မှု အနည်းငယ်သာ ရှိသေးသည်။

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီလ နောက်ပိုင်း ဖြစ်စဉ်များကြောင့် လူထောင်ချီ သေဆုံးခဲ့ရပြီး ဖြစ်သည်။

မြန်မာဘက်မှ သဘောတူထားသည့် ငြိမ်းချမ်းရေး အစီအစဉ်ကို အကောင်အထည်ဖော်ရန် အင်ဒိုနီးရှားနှင့် အာဆီယံတို့က ဦးစားပေး လုပ်ငန်းစဉ်အဖြစ် သတ်မှတ်ထားကြောင်း ရတ်နိုက ပြောသည်။

အင်ဒိုနီးရှားသည် မြန်မာပဋိပက္ခအား ဖြေရှင်းရာတွင် ပါဝင်နေသည့် အထူးကိုယ်စားလှယ်အဖွဲ့များနှင့် ပထမဆုံး အကြိမ် တွေ့ဆုံခဲ့သည်ဟု ရတ်နိုက ပြောသည်။

အာဆီယံကိုယ်စားလှယ်များကိုတွေ့ရစဉ်

ထိုအဖွဲ့တွင် ကုလသမဂ္ဂနှင့် မြန်မာတို့မှ ပါဝင်သည်။

အာဆီယံအား ဗဟိုပြုမှုကို ဆက်လက် မြှင့်တင်ဆောင်ရွက်ခြင်းဖြင့် ပူးပေါင်းဆောင်ရွက်မှုများ၊ စုပေါင်းညှိနှိုင်း ဆောင်ရွက်မှုများကို မြှင့်တင်ရန် ရည်ရွယ်ထားကြောင်း သူမက ပြောသည်။

တွေ့ဆုံ ဆွေးနွေးမှုများအရ အင်ဒို၏ အာဆီယံဥက္ကဋ္ဌ ရာထူး၊ အာဆီယံဗဟိုပြုမှုနှင့် ဘုံသဘောတူညီချက် ၅ ချက်တို့အပေါ် ခိုင်မာစွာထောက်ခံမှု ရရှိထားပုံရကြောင်းလည်း သူမက ဆက်လက် ပြောဆိုခဲ့သည်။

Source: The Straits Times

CNI International News

လော့စ်အိန်ဂျလိစ်၊ဧပြီ ၆

တရုတ်သံရုံးသည် ထိုင်ဝမ်သမ္မတ ဆိုင်အင်ဝမ် (Tsai Ing-wen) နှင့် တွေ့ဆုံရန် စီစဉ်ထားသည့် အမေရိကန် အောက်လွှတ်တော်ဥက္ကဋ္ဌ ကီဗင်မက္ကာသီနှင့် တခြားသော ကွန်ဂရက်လွှတ်တော်အမတ်များအား ခြိမ်းခြောက်သည့် အီးမေးလ်တစ်စောင်ကို ဗုဒ္ဓဟူးနေ့တွင် ရေးသားပေးပို့ခဲ့သည်ဟု Fox News သတင်းတွင် ဖော်ပြသည်။

ဆိုင်သည် အမေရိကန်ဆီးနိတ်လွှတ်တော်အမတ်များနှင့် တွေ့ဆုံခဲ့ပြီးဖြစ်ကာ မက္ကာသီနှင့် ယခုသီတင်းပတ် အတွင်း တွေ့ရန်စီစဉ်ထားသည်။ ပြီးခဲ့သည့်နှစ် ထိုင်ဝမ်သို့ လွှတ်တော်ဥက္ကဋ္ဌဟောင်း နန်စီပလိုစီ (Nancy Pelosi) ရောက်ရှိလာမှုကဲ့သို့ အခြေအနေမျိုးဖြစ်သည်။

တရုတ်သံရုံး၏ ကွန်ဂရက်လွှတ်တော်ကိုယ်စားလှယ် လီရှန်း (Li Xiang) က ဆိုင်နှင့်တွေ့ဆုံမှုကြောင့် ပေါ်ပေါက် လာနိုင်သည့် နောက်ဆက်တွဲကိစ္စများနှင့်ပတ်သက်၍ လေးမျက်နှာနီးပါးရှိသော အီးမေးလ်တစ်စောင်ကို ပေးပို့ ခဲ့ခြင်းဖြစ်သည်။ ရန်စမှုတစ်ခုနှင့် ရင်ဆိုင်ရခြင်းအပေါ် တရုတ်အနေဖြင့် ဒီအတိုင်းထိုင်ကြည့်နေမည် မဟုတ် ကြောင်း၊ မလိုချင်သော အခြေအနေနှင့်ပတ်သက်၍ လိုအပ်သောလုပ်ဆောင်ချက်များ ချမှတ်တုန့်ပြန်သွားမည် ဖြစ်ကြောင်း လီရှန်းက ပြောသည်။ ထိုကဲ့သို့ အခြေအနေမျိုးမဖြစ်အောင် အတူတကွ ပူးပေါင်းဆောင်ရွက်သွား မည်ဟုလည်း ၎င်းက တောင်းဆိုထားကြောင်း PunchBowl သတင်းမှ ရရှိသည့် အီးမေးလ်မိတ္တူတွင် ဖော်ပြ ထားသည်။

အမေရိကန် အောက်လွှတ်တော်ဥက္ကဋ္ဌ ကီဗင်မက္ကာသီ(ဓါတ်ပုံ-Getty Images)

ပြီးခဲ့သည့်နှစ် နန်စီပလိုစီ၏ ထိုင်ဝမ်ခရီးစဉ်ကြောင့် အမေရိကန်-တရုတ် ဆက်ဆံရေး ဆိုးဆိုးရွားရွား ထိခိုက်စေခဲ့ ကာ ယင်းမှ သင်ခန်းစာယူရမည်ဖြစ်ကြောင်းလည်း ၎င်းက ပြောခဲ့သည်။

ဆိုင်သည် ပြီးခဲ့သည့် သီတင်းပတ်တွင် နယူးယောက်သို့ရောက်ရှိလာခဲ့ပြီး ထိုင်ဝမ်သားများကို မိန့်ခွန်း ပြောခဲ့ သည်။ ထို့အပြင် လုံခြုံရေးဆောင်ရွက်ပေးသော အမေရိကန်အား ကျေးဇူးတင်စကားပြောခဲ့ကာ ထိုင်ဝမ်သား များကို ညီညွတ်ရန်လည်း သူမက တိုက်တွန်းခဲ့သည်။ “ထိုင်ဝမ်ဘေးကင်းလေ၊ ကမ္ဘာကြီးပါအန္တရာယ်ကင်းလေ” ဟု သူမကပြောခဲ့ပြီး ထိုင်ဝမ်အနေဖြင့် ဒီမိုကရေစီလမ်းကြောင်းပေါ်တွင် ဆက်ရှိရေး ဒီမိုကရတ်တစ် မိတ်ဖက်များ နှင့် ပူးပေါင်းသွားမည်ဟုလည်း ပြောသည်။

တရုတ်အစိုးရသည် ဆိုင်နှင့်မက္ကာသီတို့ တွေ့ဆုံမှုနှင့်ပတ်သက်၍ အင်္ဂါနေ့တွင် သတိပေးမှုလုပ်ဆောင်ခဲ့ကာ ယင်း က တရုတ်တစ်နိုင်ငံတည်း မူဝါဒကို ချိုးဖောက်မှုဟု ပြောသည်။ မက္ကာသီအနေဖြင့် တရုတ်တစ်နိုင်ငံတည်း သဘောတရားကို လျစ်လျူရှုမည်၊ အမှားများမှ သင်ခန်းစာယူရန် ငြင်းဆန်မည်၊ ထိုင်ဝမ်ကို ဆက်ကစားနေဦး မည်ဆိုလျှင် ယင်းက တရုတ်-အမေရိကန်ဆက်ဆံရေးကို ထပ်မံထိခိုက်စေသည့်အပြင် တရုတ်ပြည်သူများ၏ စည်းလုံးမှု၊ နိုင်ငံတော်ပြန်လည်ပေါင်းစည်းရေးအတွက် ပိုမိုအားကောင်းလာစေမည်ဟု လော့စ်အိန်ဂျလိစ်ရှိ တရုတ်ကောင်စစ်ဝန်ရုံး ပြောခွင့်ရပုဂ္ဂိုလ်တစ်ဦးက ပြောသည်။

အမေရိကန်အပါအဝင် တခြားနိုင်ငံများ လက်ခံကျင့်သုံးနေသည့် တရုတ်တစ်နိုင်ငံတည်း မူဝါဒသည် ဘေဂျင်း အစိုးရသာလျှင် တရုတ်၏တစ်ခုတည်းသော တရားဝင်အစိုးရအဖြစ် သတ်မှတ်ထားသည်။

Source:Fox News

CNI International News

ဘရပ်ဆဲလ်၊ ဧပြီ ၅

ဖင်လန်သည် အင်္ဂါနေ့တွင် နေတိုးအဖွဲ့သို့ တရားဝင် ပူးပေါင်းနိုင်ခဲ့သည်။ ယင်းသည် ရုရှား၏ ယူကရိန်း ကျူးကျော် စစ်ကြောင့်ဖြစ်သော သမိုင်းဝင် မူဝါဒရေးရာ အရွေ့တစ်ခုဖြစ်ကာ တန်ပြန်ဆောင်ရွက်ချက်များ လုပ်ဆောင်သွား မည်ဟု ရုရှားဘက်မှ ခြိမ်းခြောက်လာခဲ့ကြောင်း ရိုက်တာသတင်းတွင် ဖော်ပြထားသည်။

ဖင်လန်ကြောင့် နေတိုးအဖွဲ့နှင့် ရုရှားတို့၏ နယ်နိမိတ်ချင်း ထိစပ်မှုသည် နှစ်ဆနီးပါး တိုးမြှင့်လာကာ ယူကရိန်း စစ်ပွဲအတွက် အဖြေရှာမရ ဖြစ်နေချိန်တွင် ရုရှား၏ အရှေ့ဘက် စစ်မြေပြင် ကျယ်ပြန့်လာသည့် သဘောဖြစ်သည်။

အမေရိကန် နိုင်ငံခြားရေးဝန်ကြီးအား တရားဝင် စာရွက်စာတမ်းများ လွှဲပြောင်းပေးခြင်းဖြင့် ဖင်လန်နိုင်ငံခြားရေး ဝန်ကြီး ပတ်ကာ ဟာဗစ်စတိုသည် ဖင်လန်၏ နေတိုးအဖွဲ့နှင့် ပူးပေါင်းခြင်း လုပ်ငန်းစဉ်ကို အဆုံးသတ်နိုင်ခဲ့သည်။

နေတိုးအဖွဲ့သည် ၇၅ နှစ်တိုင်တိုင် အဖွဲ့ဝင်များအတွက် ကာကွယ်ပေးနိုင်ခဲ့ကြောင်း၊ ဥရောပသို့ စစ်ပွဲများ ပြန်လည် ရောက်ရှိလာချိန်တွင် ဖင်လန်သည် နေတိုးအဖွဲ့နှင့် ပူးပေါင်းရန် ဆုံးဖြတ်ခဲ့ကြောင်း အဖွဲ့၏အတွင်းရေးမှူး ဂျိန်းစ် စတိုတန်ဘာ့ဂျ် (Jens Stoltenberg)က ပြောသည်။

ရုရှားသမ္မတသည် နေတိုးအဖွဲ့ ကျယ်ပြန့်လာမှုကို ယူကရိန်းအား ကျူးကျော်စစ် ဆင်နွှဲရခြင်း၏ အကြောင်းပြချက် တစ်စိတ်တစ်ဒေသအဖြစ် အသုံးချနေသည်ဟုလည်း စတိုတန်ဘာ့ဂျ်က ပြောခဲ့ဖူးသည်။

ရုရှား ကာကွယ်ရေးဝန်ကြီးကိုတွေ့ရစဉ်

နေတိုးအဖွဲ့သို့ ဝင်ရောက်ခြင်းသည် ဖင်လန်၏ နယ်မြေများကို ကာကွယ်ရန်သာ ဖြစ်ကြောင်း၊ အဖွဲ့နှင့် ပူးပေါင်း ဆောင်ရွက်သွားရန် လုပ်ဆောင်စရာများစွာ ကျန်ရှိနေဆဲဖြစ်ကြောင်းလည်း ဖင်လန်သမ္မတ ဆောနီနီစတို (Saul Niinisto) က ပြောသည်။

သို့သော် ရုရှားက ဖင်လန်နှင့် နေတိုး ပူးပေါင်းမှုအား ခြိမ်းခြောက်မှုတစ်ခု ရှုမြင်ထားသည်။

ဖင်လန်အတွက် တန်ပြန်လုပ်ဆောင်ချက်များ လုပ်ဆောင်သွားမည်ဟု ကရင်မလင်က ပြောသည်။

နေတိုး အဖွဲ့ဝင်အသစ် တိုးမှုသည် ယူကရိန်းပဋိပက္ခအား ပိုမိုပြင်းထန်လာ စေနိုင်သည်ဟုလည်း ရုရှား ကာကွယ်ရေးဝန်ကြီးက ပြောသည်။

ဖင်လန် နေတိုးအဖွဲ့သို့ ဝင်ရောက်ခြင်းအတွက် နိုင်ငံ၏အနောက်နှင့် အနောက်မြောက်ဒေသများမှ တပ်ဖွဲ့ဝင် အင်အားကို မြှင့်တင်သွားမည်ဟု ရုရှားအာဏာပိုင်များက တနင်္လာနေ့တွင် ပြောသည်။

ဖင်လန်နဲ့နေတိုးအလံကို ပူးတွဲလွှင့်ထူထားစဉ်

ဖင်လန်၏ လုပ်ဆောင်ချက်များကို ယူကရိန်း အစိုးရဘက်ကလည်း ချီးကျူးကာ နေတိုးအဖွဲ့သို့ ဝင်ရောက်ခွင့်ရရေးသည် ယူကရိန်း၏ ရည်မှန်းချက် ဖြစ်သည်ဟုလည်း ပြောသည်။

နေတိုးအဖွဲ့တွင်းသို့ ဝင်ရောက်ခြင်းက စစ်ရေးအရ ပူးပေါင်းဆောင်ရွက်မှု မလုပ်ရန်၊ အိမ်နီးချင်း ရုရှားနှင့် မိတ်ဖက် ဆက်ဆံရေးကို ထိန်းသိမ်းရန်ဆိုသည့် ဖင်လန်၏ ကာလရှည် ရပ်တည်မှုကို အဆုံးသတ်သွားစေခဲ့သည်။

ယူကရိန်းသို့ ရုရှား၏ ကျူးကျော်မှုက ဖင်လန်အား နေတိုးအဖွဲ့သို့ ဝင်ရောက်ရန် ဖြစ်စေခဲ့ပြီး ရုရှားအနေဖြင့် ဖင်လန်တွင် နေတိုးတပ်ဖွဲ့ဝင်များ ချထားမှုအပေါ် အနီးကပ်စောင့်ကြည့်သွားမည်ဟု ရုရှားအစိုးရအဖွဲ့ပြောခွင့်ရပုဂ္ဂိုလ် ပတ်စ်ကော့ဗ် (Peskov) က ပြောသည်။

Source: Reuters

CNI International News

ကဘူးလ်၊ ဧပြီ ၅

အာဖဂန်နိုင်ငံမြောက်ပိုင်း ဘတ်ခ် (Balkh) ပြည်နယ်မှ စီးနင်းတိုက်ခိုက်မှုတစ်ခုတွင် တာလီဘန်တပ်ဖွဲ့များသည် ISIL အဖွဲ့ဝင်ခြောက်ဦးကို သုတ်သင်နိုင်ခဲ့သည်ဟု တာလီဘန်ပြောခွင့်ရပုဂ္ဂိုလ်တစ်ဦးက အင်္ဂါနေ့တွင်ပြော ကြောင်း အယ်လ်ဂျာဇီးယားသတင်းတွင် ဖော်ပြသည်။

ယခုစီးနင်းမှုသည် တာလီဘန်အာဏာပိုင်များက ISIL အဖွဲ့၏ ဒေသတွင်းအဖွဲ့ခွဲ ISKP အားဖြိုခွဲမှုများ လုပ်ဆောင် နေချိန်တွင် ပေါ်ပေါက်ခဲ့ခြင်းဖြစ်သည်။ ISKP သည် ပြီးခဲ့သည့်လများအတွင်း ဆိုးရွားသော တိုက်ခိုက်မှုများကို ပြုလုပ်ခဲ့ကာ ဘတ်ခ်အုပ်ချုပ်ရေးမှူးအပါအဝင် လူပေါင်းများစွာကို သေဆုံးစေခဲ့သည်။

တနင်္လာနေ့ည စီးနင်းမှုသည် နာရီ ရှာဟီ (Nahri Shahi) ခရိုင်မှ ISIL အဖွဲ့၏ ခိုအောင်းရာနေရာတစ်ခုကို ပစ်မှတ်ထားခြင်းဖြစ်သည်ဟု ဘတ်ခ် ရဲတပ်ဖွဲ့ပြောခွင့်ရပုဂ္ဂိုလ် မိုဟာမက် အာဆစ် ဝါဇီရီ (Mohammad Asif Waziri) က ပြောသည်။

တာလီဘန်များ အာဏာရလာပြီးနောက် တနှစ်အကြာ ကဘူးလ်မြို့ရှိ တာလီဘန် လုံခြုံရေးအစောင့်များကို လမ်းမများပေါ်တွင်တွေ့ရစဉ်(ဓါတ်ပုံ-EPA)

ယင်းမှ အဖွဲ့ဝင်ခြောက်ဦး သေဆုံးခဲ့ကြောင်းလည်း ၎င်းကပြောသည်။ သေဆုံးခဲ့သော ဘတ်ခ်အုပ်ချုပ်ရေးမှူး မူဇမ်မီ(Muzammil)သည် ISIL အဖွဲ့အား တော်လှန်မှုကြောင့် ထင်ရှားသူဖြစ်သည်။ ISIL အဖွဲ့သည် တာလီဘန် များအတွက် အကြီးမားဆုံးသော လုံခြုံရေးခြိမ်းခြောက်မှုကိုလည်း ဖြစ်စေလျက်ရှိသည်။ တာလီဘန်များသည် နိုင်ငံတွင်းမှ အမေရိကန်ဦးဆောင်သည့် နိုင်ငံခြားတပ်များထွက်ခွာချိန် ၂၀၂၁ ခုနှစ် သြဂုတ်လမှ စတင်ကာ အာဖဂန်တွင် အာဏာလွှဲပြောင်း ရယူခဲ့သည်။

နိုင်ငံခြားရေးဌာနအား ပစ်မှတ်ထားသည့် ဇန်ဝါရီလ ဖောက်ခွဲမှုတစ်ခုကြောင့် အနည်းဆုံးလူငါးဦး သေဆုံးခဲ့သည်။ ISIL အဖွဲ့သည် ကာဘူးလ် (Kabul) တွင် မကြာသေးခင်က ဖြစ်ပွားခဲ့သော တိုက်ခိုက်မှုများကိုလည်း ၎င်းတို့ လက်ချက်ဖြစ်သည်ဟု ကြေညာထားသည်။ ယင်းတို့တွင် စစ်တပ်လေဆိပ်ရှိ စစ်ရေးဂိတ်အနီးတွင် ဗုံးခွဲမှုနှင့် ကဘူးလ်မြို့မှဟိုတယ်တစ်ခုအား တိုက်ခိုက်မှုတို့ ပါဝင်သည်။

ISIL အဖွဲ့သည် အာဖဂန်ရှိ ရှီးအိုက်လူမျိုးများ၊ နိုင်ငံခြားသားများနှင့် နိုင်ငံခြားပိုင်များကို အဓိက ပစ်မှတ်ထား တိုက်ခိုက်လေ့ရှိသည်။

Source:Aljazeera

CNI International News

ဝါရှင်တန်၊ ဧပြီ ၅

အမေရိကန် အစိုးရသည် ယူကရိန်းကို ဒေါ်လာ ၂ ဒသမ ၆ ဘီလီယံတန်ကြေးရှိ စစ်ရေး အကူအညီများ ပေးအပ် သွားမည်ဟု အေပီက ဖော်ပြခဲ့သည်။

လက်နက် ခဲယမ်းနှင့် ပစ္စည်းကိရိယာများအတွက် ဒေါ်လာ သန်း ၅၀၀ အသုံးပြုကာ ဒရုန်းများကို တန်ပြန်ရေး စစ်လက်နက်များ၊ ရေဒါများနှင့် လက်နက်သစ်များအတွက် ဒေါ်လာ ၂ ဘီလီယံကျော် သုံးစွဲသွားမည်ဟု ပင်တဂွန် က အင်္ဂါနေ့တွင် ပြောသည်။

အကူအညီများတွင် အမေရိကန်မှ ထောက်ပံ့ထားသည့် HIMARS များအတွက် ခဲယမ်းများ၊ လေကြောင်း ကာကွယ် ရေး ကြားဖြတ် လက်နက်များနှင့် အမြောက်ဆံများ ပါဝင်ကြောင်း၊ ထိုပစ္စည်းများကို အမေရိကန် လက်နက်တိုက် များမှ ထုတ်ယူပေးပို့ သွားမည်ဖြစ်သောကြောင့် စစ်မြေပြင်သို့ အလျင်အမြန် ရောက်ရှိလာမည်ဖြစ်ကြောင်း နိုင်ငံ ခြားရေးဝန်ကြီး အန်တိုနီ ဘလင်ကင် (Antony Blinken) က ကြေညာချက် တစ်စောင်တွင် ပြောထားသည်။

အကူအညီများတွင် အီရန်ထုတ် ဒရုန်းများကို တန်ပြန်ရန် ရည်ရွယ်သည့် လက်နက်စနစ်သစ် အနည်းဆုံး နှစ်ခု လည်း ပါဝင်သည်။

အမေရိကန် လက်နက်ခဲယမ်းများကိုတွေ့ရစဉ်

အမေရိကန်အစိုးရသည် ပထမဆုံးအကြိမ်အဖြစ် ၃၀ မမ လက်နက်များနှင့် ယင်းအတွက် ကျည်ဆန်များအပြင် ရွေ့လျားနိုင်သည့် လေဆာသုံး ဒုံးကျည်စနစ် ၁၀ ခု ကိုလည်း ထောက်ပံ့ပေးသွားမည် ဖြစ်သည်။

ပင်တဂွန် လက်နက်တိုက်များမှ ပေးပို့မည့် လက်နက်များတွင် ဟောင်ဝပ်ဇာများအတွက် ၁၅၅ မမ ကျည်များပါ ပါဝင်သည်။ သို့သော်လည်း လက်နက်များအတွက် ကျည်ဆန် အရေအတွက်ကိုတော့ ထုတ်ပြန်ခြင်း မရှိပေ။

ရုရှား၏ ထိုးစစ်ဆင်မှုများမှ ကာကွယ်ရေးအတွက် ယူကရိန်းစစ်တပ်အား ထောက်ပံ့ပေးမည့် လက်နက်များတွင် သံချပ်ကာဖျက်စနစ်များ၊ လက်နက်ငယ်များနှင့် သယ်ယူပို့ဆောင်ရေး ယာဉ်ကြီးများအပြင် လောင်စာတင်ကားနှင့် ပြုပြင်ထိန်းသိမ်းရေး အထောက်အပံ့များလည်း ပါဝင်သည်ဟု ပင်တဂွန်၏ ကြေညာချက်တွင် ဖော်ပြထားသည်။

စစ်မြေပြင်တွင် အခြေအနေ ပြောင်းလဲနိုင်ရေး ယူကရိန်းစစ်တပ်အား ကူညီရန်အတွက် ယခုကဲ့သို့ ထောက်ပံ့ရခြင်း ဟု အမေရိကန်အရာရှိတစ်ဦးက ပြောသည်။

ဘလင်ကင်ကိုတွေ့ရစဉ်

လက်ရှိ စစ်မြေပြင်တွင် မည်သည့်ဘက်ကမှ သိသိသာသာ အသာစီး မရရှိသေးဟုလည်း အမေရိကန်ဘက်က ပြောသည်။

အမေရိကန်၏ ထောက်ပံ့ပေးမှု အားလုံးအတွက် ဝမ်းသာမိကြောင်း ယူကရိန်းနိုင်ငံခြားရေးဝန်ကြီးက ပြောသည်။

ဒေါ်လာ ၂ ဒသမ ၁ ဘီလီယံ တန်ကြေးရှိ ကာလရှည် အကူအညီများသည် NASAMS မြေပြင်မှ ဝေဟင်ပစ် ဒုံးကျည် များ၊ ရေဒါများအပြင် လောင်စာဆီ ကားများ၊ သံချပ်ကာဖျက် ဒုံးကျည်များ ဝယ်ယူရန်အပြင် ယူကရိန်းတပ်ဖွဲ့များ အား လေ့ကျင့်ပေးရန်လည်း အသုံးပြုသွားမည်ဖြစ်သည်။

Source: AP

CNI International News

နယူးဒေလီ၊ ဧပြီ ၅

နေရာ ၁၁ ခုကို နာမည်ပြောင်းရန် တရုတ်၏ ကြိုးပမ်းမှုများကို အိန္ဒိယဘက်က ပယ်ချခဲ့သည်ဟု Aljazeera သတင်းမှ ဖော်ပြခဲ့သည်။

ထိုနေရာများကို တရုတ်ဘက်က ၎င်းတို့ပိုင်ဟု ကြေညာထားပြီး အိန္ဒိယ ဘက်ကလည်း ထိုဒေသများသည် အရှေ့ဘက် အာရူနာချယ်ပရာဒတ်ချ် (Arunachal Pradesh) ပြည်နယ်အတွင်း ရှိသည်ဟု သတ်မှတ်ကာ အငြင်းပွားလျက်ရှိသည်။

နျူကလီးယားပိုင်ရှင် အိမ်နီးချင်း နှစ်နိုင်ငံကြား ဆက်ဆံရေးမှာ ဆိုးရွားလျက်ရှိပြီး ယခုတစ်ခေါက် ဖြစ်စဉ်သည် ပြီးခဲ့သည့် တနင်္ဂနွေနေ့က တရုတ်ပြည်ထဲရေးဌာနမှ ကြေညာချက် တစ်စောင် ထုတ်ပြန်လိုက်ချိန်တွင် ပေါ်ပေါက် လာခဲ့သည်။

ထိုကြေညာချက်တွင် တရုတ်အစိုးရသည် တောင်ပိုင်း တိဗက်ဒေသဟု တရုတ်ဘက်မှ သတ်မှတ်ထားသော တောင်ငါးလုံး အပါအဝင် နေရာ ၁၁ ခု၏ အမည်ကို ပြောင်းလဲခဲ့သည်ဟု ဖော်ပြထားသည်။

အဆိုပါ နေရာ ၁၁ ခုကို Zangnan ဒေသ သို့မဟုတ် တရုတ်၏တောင်ပိုင်း တိဗက်ဒေသထဲ ပါဝင်သည်ဟု သတ်မှတ်၍ အမည်ပြောင်းလဲထားသော မြေပုံတစ်ခုလည်း ပါဝင်သည်။

အိန္ဒိယနိုင်ငံခြားရေးဌာနက ပြောခွင့်ရ ပုဂ္ဂိုလ် အာရင်ဒန် ဘတ်ချီကိုတွေ့ရစဉ်

ထိုပြောင်းလဲမှုတွင် အရူနာချယ်ပရာဒတ်ရှ်ပြည်နယ်အား တိဗက်တောင်ပိုင်းသို့ ထည့်သွင်း သတ်မှတ်ထားကာ အိန္ဒိယနှင့် နယ်စပ်ကိုလည်း ဘရာမာပူထရာ(Brahmaputura) မြစ်မြောက်ဘက်ပိုင်းမှ စတင်သတ်မှတ်ထား သည်။

ထိုသတ်မှတ်ချက်ကို အိန္ဒိယနိုင်ငံခြားရေးဌာနက ပယ်ချသည်။

တရုတ်သည် ယခင်ကလည်း ထိုသို့သော နယ်မြေသတ်မှတ်မှုမျိုး လုပ်ဆောင်ခဲ့ဖူးကြောင်း၊ အရူနာချယ်ပရာဒတ်ချ် သည် အိန္ဒိယ၏ အစိတ်အပိုင်း တစ်ခုအဖြစ် အမြဲမပြောင်းမလဲ ရှိနေမည်ဟု အိန္ဒိယနိုင်ငံခြားရေးဌာနက ပြောခွင့်ရ ပုဂ္ဂိုလ် အာရင်ဒန် ဘတ်ချီ (Arindam Bagchi) ကပြောသည်။

ယခု နာမည်ပြောင်းလဲမှုများသည် တရုတ်ပိုင် နယ်မြေများကိုသာ ပြုလုပ်ခဲ့ခြင်း ဖြစ်သည်ဟုလည်း တရုတ် နိုင်ငံခြားရေးဌာနက ပြန်လည် ချေပသည်။

တရုတ်နဲ့  အိန္ဒိယ နယ်စပ်မှတ်တိုင်ကိုတွေ့ရစဉ်

၂၀၂၀ ခုနှစ်တွင် နယ်စပ်ရှိ လာဒတ်ခ် (Ladakh) ဒေသတွင် နှစ်ဖက်စစ်သားများ ပဋိပက္ခဖြစ်ခဲ့ပြီး အိန္ဒိယ လူမျိုး ၂၀ ဦး အပါအဝင် အနည်းဆုံး ၂၄ ဦး သေဆုံးခဲ့သည်။

ထိုအချိန်မှ စတင်၍ အိန္ဒိယသည် တရုတ်မှ ဖန်တီးထားသော မိုဘိုင်းဖုန်း အပလီကေးရှင်း ရာချီကို နိုင်ငံတွင်း အသုံးပြုခွင့် ပိတ်ပင်ခဲ့သည်။

ထိုမျှမက Xiaomi နှင့် Huawei ကဲ့သို့ အန္ဒိယတွင် လုပ်ငန်း လုပ်ဆောင်နေေသာ တရုတ်ကုမ္ပဏီများလည်း အခွန် အရာရှိများ၏ စီးနင်းမှုများနှင့် ရင်ဆိုင်ခဲ့ရသည်။

သို့သော် နှစ်နိုင်ငံကြား ကုန်သွယ်မှု အခြေအနေမှာ နှစ်စဉ် ဒေါ်လာ ဘီလီယံ ၁၀၀ နီးပါးရှိသည့် အခြေအနေတွင် ဆက်ရှိနေဆဲပင် ဖြစ်သည်။

Source: Aljazeera