CNI International News

တိုင်ပေ၊ ဧပြီ ၁၈

အမေရိကန်စစ်သင်္ဘော USS Milius သည် တနင်္ဂနွေနေ့တွင် ထိုင်ဝမ်ရေလက်ကြားမှ ဖြတ်သန်းခုတ် မောင်း သွားခဲ့သည်ဟု ရိုက်တာ သတင်းတွင် ဖော်ပြသည်။

ထိုသို့ ဖြတ်သန်းခြင်းသည် အမေရိကန်ဘက်က ပုံမှန်ပြုလုပ်နေကြ အကူးအပြောင်း သွားလာမှုဟု ပြောသည်။

အဆိုပါဖြစ်စဉ်သည် တရုတ်၏ ထိုင်ဝမ်ကျွန်းအနီး နောက်ဆုံး စစ်ရေးလေ့ကျင့်မှုများ ပြုလုပ်ပြီး ရက်အနည်းငယ် အကြာတွင် ပေါ်ပေါက်ခဲ့ခြင်း ဖြစ်သည်။

တရုတ်သည် ထိုင်ဝမ်အား ၎င်းတို့ပိုင်အဖြစ် ရှုမြင်ထားသည်။ တရုတ်သည် ထိုင်ဝမ်အနီး သုံးရက်ကြာ စစ်ရေး လေ့ကျင့်မှုကို တနင်္လာနေ့တွင် တရားဝင် အဆုံးသတ်ခဲ့သည်။

အဆိုပါ စစ်ရေးလေ့ကျင့်မှုတွင် ကျွန်းအား တိုက်ခိုက်ခြင်းနှင့် ပိတ်ဆို့ခြင်းတို့ လုပ်ဆောင်ရန် လေ့ကျင့်ခဲ့သည်။

တရုတ်သည် ထိုင်ဝမ်သမ္မတ ဆိုင်အင်ဝမ် (Tsai Ing-wen) က အမေရိကန်လွှတ်တော်ဥက္ကဋ္ဌ ကီဗင် မက္ကာသီ (Kevin McCarthy) နှင့် တွေ့ဆုံခဲ့မှုအပေါ် ဒေါသထွက်ကြောင်း ပြသမှုအဖြစ် စစ်ရေးလေ့ကျင့်မှုများ လုပ်ဆောင် ခဲ့ခြင်း ဖြစ်သည်။

ထိုင်ဝမ်သမ္မတ ဆိုင်အင်ဝမ်က အမေရိကန်လွှတ်တော်ဥက္ကဋ္ဌ ကီဗင်မက္ကာသီကို တွေ့ရစဉ်

ထိုသို့ တွေ့ဆုံမှုက တရုတ်၏ ပြည်တွင်းရေးကို ဝင်ရောက်စွက်ဖက်ခြင်းနှင့် အမေရိကန်အနေဖြင့် ထိုင်ဝမ်၏ တရုတ်ပြည်မှ ခွဲထွက်ရေးကို ထောက်ခံခြင်းအဖြစ် ရှုမြင်ထားခြင်းကြောင့် ဖြစ်သည်။

USS Milius သင်္ဘောသည် လွတ်လပ်စွာ သွားလာခွင့်ရှိသော ရေပြင်တွင် နိုင်ငံတကာ ဥပဒေများနှင့်အညီ ထိုင်ဝမ် ရေလက်ကြားသို့ ပုံမှန်ကူးပြောင်း သွားလာမှု လုပ်ဆောင်ခဲ့ခြင်း ဖြစ်သည်ဟု အမေရိကန်၏ အမှတ် ၇ ရေတပ် သင်္ဘော အုပ်စုက ပြောသည်။

ထိုသို့ သွားလာမှုက အမေရိကန်၏ လွတ်လပ်၍ ပွင့်လင်းသော အင်ဒို-ပစိဖိတ် ဒေသဆိုင်ရာ ပေးထားသော ကတိကို အကောင်အထည်ဖော် ဆောင်ရွက်ခြင်း ဖြစ်သည်ဟုလည်း ပြောသည်။

အမေရိကန် ဖျက်သင်္ဘော၏ သွားလာရေး လမ်းကြောင်း တစ်လျှောက် စောင့်ကြည့်လိုက်ပါရန် တပ်ဖွဲ့များကို စုစည်း စေလွှတ်ခဲ့သည်ဟု တရုတ်၏ အရှေ့ဘက် စစ်ဌာနချုပ်က တနင်္လာနေ့တွင် လူမှုကွန်ယက်၌ ရေးသား ဖော်ပြခဲ့သည်။

ဖျက်သင်္ဘောသည် ရေလက်ကြား တစ်လျှောက် မြောက်စူးစူးသို့ ဦးတည် ခုတ်မောင်းခဲ့ကာ ယင်းက ပုံမှန် သွားလာ နေကြ အခြေအနေ တစ်ရပ် ဖြစ်သည်ဟုလည်း ထိုင်ဝမ် ကာကွယ်ရေးဌာနက ပြောသည်။

အမေရိကန် ရေတပ်သင်္ဘောများသည် ထိုင်ဝမ်ရေလက်ကြားသို့ တစ်လတစ်ခါ ဖြတ်သန်း သွားလာလေ့ရှိကာ အငြင်းပွားနေသော တောင်တရုတ် ပင်လယ်ပြင်တွင်လည်း ထိုသို့သော လွတ်လပ်စွာ သွားလာခွင့်ကို ပုံမှန်ကျင့်သုံး လေ့ရှိသည်။

ထိုင်ဝမ်လက်နက်ကိုင်တပ်ကိုတွေ့ရစဉ်

ပြီးခဲ့သည့် သီတင်းပတ်တွင် USS Milius သင်္ဘောသည် တောင်တရုတ် ပင်လယ်အတွင်းရှိ အရေးပါဆုံး လူလုပ် ကျွန်းနှင့် တရုတ်ဘက်မှ ထိန်းချုပ်ထားသော ကျွန်းများမှ တစ်ခုဖြစ်သော Mischief ကျောက်တန်းအနီးသို့ ခုတ်မောင်းခဲ့သည်။

ထိုဖြတ်သန်းမှုသည် တရားမဝင် လုပ်ရပ်ဟု တရုတ်ဘက်က ပြောသည်။ တရုတ်သည် စစ်ရေး လေ့ကျင့်မှု အဆုံးသတ် သွားသည့်တိုင် ထိုင်ဝမ်အနီးတွင် အသေးစား စစ်ရေးလှုပ်ရှားမှုများ လုပ်ဆောင်လျက် ရှိသည်။

ပြီးခဲ့သည့် ၂၄ နာရီကြာ ကာလအတွင်း ထိုင်ဝမ်ကျွန်းအနီးတွင် တရုတ်စစ်လေယာဉ် ၁၈ စင်းနှင့် စစ်သင်္ဘော လေးစင်း သွားလာနေမှုကို တွေ့ရှိခဲ့သည်ဟုလည်း ထိုင်ဝမ်ကာကွယ်ရေးဌာနက တနင်္လာနေ့ မနက်တွင် ထုတ်ပြန် သည်။

Source: ရိုက်တာ

CNI International News

စတော့ဟုမ်း၊ ဧပြီ ၁၈

၂၅ နှစ်တာကာလအတွင်း အကြီးမားဆုံးဖြစ်သော Aurora-23 နိုင်ငံတကာ စစ်ရေးလေ့ကျင့်မှုကို ဆွီဒင်နိုင်ငံ၌ တနင်္လာနေ့တွင် စတင်ခဲ့သည်ဟု တာ့စ်သတင်းတွင် ဖော်ပြသည်။

လေ့ကျင့်မှုသည် မေလ ၁၁ ရက်နေ့အထိ ပြုလုပ်သွားမည်ဖြစ်ကာ ယင်းတွင် အမေရိကန်၊ ဗြိတိန်၊ ဖင်လန်၊ ပိုလန်၊ နော်ဝေး၊ အက်စ်တိုးနီးယား၊ လတ်ဗီးယား၊ လစ်သူယေးနီးယား၊ ယူကရိန်း၊ ဒိန်းမတ်၊ သြစတြီးယား၊ ဂျာမနီနှင့် ပြင်သစ်နိုင်ငံတို့ ပါဝင်မည်ဟု ဆွီဒင်ကာကွယ်ရေးဌာနက ပြောသည်။ စစ်ရေးလေ့ကျင့်မှု၏ ရည်ရွယ်ချက်မှာ ဆွီဒင် နိုင်ငံအား တိုက်ခိုက်မှုတစ်စုံတစ်ရာ ပေါ်ပေါက်လာချိန်တွင် လက်နက်ကိုင်တပ်ဖွဲ့များ၏ တိုက်ခိုက်ရန် အဆင်သင့် ဖြစ်နေမှုကို မြှင့်တင်သွားရန်ဖြစ်သည်။

ယခုလေ့ကျင့်မှုသည် တိုက်ခိုက်ရန်အဆင်သင့် ဖြစ်နေမှုအား မြှင့်တင်ရန်၊ စမ်းသပ်ရန်၊ သရုပ်ပြရန်အတွက် အရေးပါသောအရာများမှ တစ်ခုဖြစ်သည်ဟု ဆွီဒင်ဝန်ကြီးဌာနက ပြောသည်။ မိတ်ဖက်နိုင်ငံများမှ တပ်ဖွဲ့များနှင့် ပူးပေါင်းကာ ဆွီဒင်၏ တိုက်ခိုက်ရေးစွမ်းရည်ကို မြှင့်တင်ခြင်းဖြင့် လုံခြုံရေးကို တိုးမြှင့်နိုင်သည်ဟုလည်း ပြောသည်။

 Aurora-23 နိုင်ငံတကာ စစ်ရေးလေ့ကျင့်မှု သတင်းစာရှင်းလင်းပွဲကို တွေ့ရစဉ်(ဓါတ်ပုံ-Pontus Lundahl/TT/picture alliance)

စစ်ရေးလေ့ကျင့်မှုကို ကြည်း၊ရေ၊လေ သုံးမျိုးစလုံးဖြင့် ပြုလုပ်သွားမည်ဖြစ်ကာ နိုင်ငံပေါင်းစုံမှ တပ်ဖွဲ့ဝင် ၂၆၀၀၀ ခန့်က ဆွီဒင်တောင်ပိုင်းနှင့် ဂေါ့လန်း (Gotland) ကျွန်းတို့တွင် လေ့ကျင့်မှုများကို လုပ်ဆောင်သွားမည်ဖြစ်သည်။ တိုက်လေယာဉ်များ၊ ရဟတ်ယာဉ်များ၊ သယ်ယူပို့ဆောင်ရေး ရဟတ်ယာဉ်များနှင့် တခြားသော လေယာဉ်များ သည် စစ်စခန်းများနှင့် အရပ်ဘက်လေဆိပ်များမှ ပျံသန်းထွက်ခွာကာ လေ့ကျင့်မှုတွင် ပါဝင်မည်ဖြစ်သည်။ ဆွီဒင် တောင်ပိုင်း-အလယ်ပိုင်းရှိ လေကြောင်းလေ့ကျင့်ရေးစခန်းကို ဧပြီ ၂၄ မှ မေ ၁၁ ရက်နေ့အထိ အသုံးပြုသွားမည် လည်းဖြစ်သည်။

လေ့ကျင့်မှု၏ အဓိကအစိတ်အပိုင်းများမှတစ်ခုမှာ ဆွီဒင်အား ကူညီရေးနှင့် နိုင်ငံခြားတပ်ဖွဲ့များ၏ ထောက်ပံ့ ပေးနိုင်မှုတို့အတွက်ဖြစ်သည်ဟုလည်း ဆွီဒင် Skaraborg တပ်ရင်းမှ အရာရှိတစ်ဦးက ဆွီဒင်ရေဒီယို အင်တာဗျူး တစ်ခုတွင် ရှင်းပြခဲ့သည်။

Source: တာ့စ်သတင်းဌာန

CNI International News

ဂျကာတာ၊ ဧပြီ ၈

အင်ဒိုနီးရှားနိုင်ငံသည် အာဆီယံအလှည့်ကျဥက္ကဋ္ဌ ရာထူးကို ရယူပြီးချိန်မှစ၍ လက်ရှိ မြန်မာ့နိုင်ငံရေး ပဋိပက္ခ အတွက် လူသားချင်း စာနာမှု အကူအညီများ ထောက်ပံ့ပေးရေးကိစ္စတွင် တိုးတက်မှုတချို့ ဆောင်ရွက်နိုင်ခဲ့သည် ဟု အင်ဒိုနီးရှားနိုင်ငံခြားရေးဝန်ကြီး ရတ်နိုမာဆူဒီက ပြောသည်ဟု CNA သတင်းမှာ ဖော်ပြထားသည်။

အင်ဒိုအစိုးရသည် သွေးထွက်သံယိုမှုများနှင့် အင်အား အသုံးပြုမှုများကို အဆုံးသတ်ရေး ဆက်လက် တောင်းဆို ထားကာ အရပ်သား သေဆုံးမှု များပြားလာခြင်း အတွက်လည်း စိုးရိမ်ကြောင်း ထုတ်ဖော် ပြောဆိုထားသည်ဟု သူမက သတင်းစာ ရှင်းလင်းပွဲ တစ်ခုတွင် ပြောသည်။

အာဆီယံအဖွဲ့ ခေါင်းဆောင် ရာထူးကို ရရှိခဲ့ပြီးနောက် အင်ဒိုနီးရှားသည် ပြီးခဲ့သည့် သုံးလတာ ကာလပတ်လုံး မြန်မာသို့ လူသားချင်း စာနာမှု အကူအညီများ ပေးရေးအတွက် ပဋိပက္ခတွင် ပါဝင်ပတ်သက်နေသူ အားလုံးနှင့် ဆက်သွယ်ရေးများ ပြန်လည် ဖွင့်လှစ်နိုင်ရန်၊ ဆွေးနွေးမှုများ လုပ်ဆောင်နိုင်ရေးတို့တွင် ပါဝင်ကူညီခဲ့သည်ဟု မာဆူဒီက ပြောသည်။

၎င်းက အာဆီယံ၏ သဘာဝဘေးအန္တရာယ် စီမံခန့်ခွဲမှုဆိုင်ရာ လူသားချင်း စာနာထောက်ထားမှု အကူအညီပေး ရေး ညှိနှိုင်းဆောင်ရွက်မှုစင်တာ (AHA Centre) အတွက် လူမျိုးရေး၊ ဘာသာရေး သို့မဟုတ် နိုင်ငံရေး ခံယူချက်တို့ နှင့် မသက်ဆိုင်ဘဲ မြန်မာနိုင်ငံတွင်းရှိ လိုအပ်နေသူများထံ အကူအညီများ ထောက်ပံ့ပေးနိုင်ရန် ဖြစ်စေခဲ့သည်။

အင်ဒိုနီးရှား၊ ထိုင်း နိုင်ငံခြားရေးဝန်ကြီးတို့နဲ့ ဦးဝဏ္ဏမောင်လွင်ကိုတွေ့ရစဉ်

AHA Centre မှတစ်ဆင့် အကူအညီများ ပေးအပ်ခြင်းသည် ဘုံသဘောတူညီချက် ၅ ချက်ပါ ငြိမ်းချမ်းရေး အစီအစဉ်ထဲက တစ်ခု ဖြစ်သည်။

ထိုသို့သော တိုးတက်မှုများသည် အခက်အခဲမှ ကျော်လွှားနိုင်ခြင်း ဖြစ်သည်ဟု မာဆူဒီက ပြောသည်။

အင်ဒိုနီးရှား၏ ပါဝင်ကူညီမှုဖြင့် AHA Centre သည် ယခင်က မတွေ့ဆုံခဲ့ဖူးသည့် ပါဝင် ပတ်သက် နေသူများနှင့် တွေ့ဆုံဆွေးနွေးမှုများ အောင်မြင်စွာ လုပ်ဆောင်နိုင်ခဲ့ကြောင်း အင်ဒိုနိုင်ငံခြားရေးဝန်ကြီးက ပြောသော်လည်း ပါဝင် နေသူများသည် မည်သူမည်ဝါ ဖြစ်သူကတော့ ထုတ်ဖော်ပြောဆိုခဲ့ခြင်း မရှိပေ။

အင်ဒိုနီးရှားသည် ယခုနှစ် အစောပိုင်း အာဆီယံခေါင်းဆောင် နေရာအား ကမ္ဘောဒီယားထံမှ လွှဲပြောင်းရယူပြီးချိန် မှ စတင်ကာ မြန်မာ့နိုင်ငံရေးပဋိ့ပက္ခအား ဖြေရှင်းပေးရန် ဦးစီး ဆောင်ရွက်ခဲ့သည်။

အင်ဒိုသည် ထိုကိစ္စတွင် ကမ္ဘောဒီယားထက် ပိုမို အောင်မြင်စွာ ဆောင်ရွက်နိုင်မည်ဟုလည်း လေ့လာသူများက သုံးသပ်ထားသည်။

၂၀၂၁ ခုနှစ်၊ ဖေဖော်ဝါရီလက စတင်ခဲ့သည့် မြန်မာ့နိုင်ငံရေး ပဋိပက္ခကြောင့် လူပေါင်း ၁ ဒသမ ၄ သန်းကျော် နေ ရပ် စွန့်ခွာခဲ့ရပြီး မြန်မာ့လူဦးရေ ၅၅ သန်း၏ ၄၀ ရာခိုင်နှုန်းနီးပါးသည် ဆင်းရဲမွဲတေမှုလိုင်းအောက် ရောက်ရှိနေ သည်ဟု ကမ္ဘာ့ဘဏ်က ခန့်မှန်းထားသည်။
ဒုက္ခသည် ရာပေါင်းများစွာသည်လည်း အိမ်နီးချင်း အာဆီယံ နိုင်ငံများသို့ ထွက်ပြေးလာခဲ့ပြီး ဖြစ်သည်။

အာဆီယံကိုတွေ့ရစဉ်

အင်ဒိုနီးရှားသည် ဘုံသဘောတူညီချက် ၅ ချက်ပါ ငြိမ်းချမ်းရေး အစီအစဉ်ကို အကောင်အထည် ဖော်ဆောင်ရွက် နိုင်ရန် မြန်မာနိုင်ငံနှင့် ပူးပေါင်း ဆောင်ရွက်နေကြောင်း မာဆူဒီက ပြောသည်။

ထို ၅ ချက်တွင် အကြမ်းဖက်မှုများ ရပ်တန့်ရေး၊ ငြိမ်းချမ်းစွာ ဖြေရှင်းနည်းကို ရှာဖွေရေး အပြုသဘောဆောင် သည့် ဆွေးနွေးမှုများ ပြုလုပ်ရန်၊ လူသားချင်း စာနာမှု အကူအညီများ ထောက်ပံ့ရန်တို့ ပါဝင်သည်။

အင်ဒိုအစိုးရသည် မြန်မာနှင့် ပတ်သက်သည့် တိုးတက်မှုများကိုလည်း ပြီးခဲ့သည့်လ ကုလသမဂ္ဂ လုံခြုံရေး ကောင်စီတွင် မျှဝေခဲ့ပြီးလည်း ဖြစ်သည်။

Source: CNA

CNI International News

လန်ဒန်၊ ဧပြီ ၈

သီတင်းပတ်ကုန်ပိုင်း အီစတာအားလပ်ရက်တွင် အကြမ်းဖက် တိုက်ခိုက်မှုများ လုပ်ဆောင်ရန် လက်နက်ကိုင် အတိုက်အခံ အုပ်စုများက စီစဉ်နေသည်ဟု မြောက်အိုင်ယာလန်ရဲတပ်ဖွဲ့က သတိပေးလိုက်ကြောင်း အေပီ သတင်းမှာ ဖော်ပြထားသည်။

၁၉၉၈ ခုနှစ်၊ ဧပြီ ၁၀ ရက်တွင် Good Friday သဘောတူညီချက် ရရှိခဲ့ခြင်း၏ ၂၅ နှစ်ပြည့် အထိမ်းအမှတ် အခမ်းအနားကို မြောက်အိုင်ယာလန်တွင် ကျင်းပရန် စီစဉ်ထားပြီး အမေရိကန်သမ္မတ ဂျိုးဘိုင်ဒန် (Joe Biden) လည်း လာမည့်သီတင်းပတ်၌ ဘဲလ်ဖတ် (Belfast) သို့ သွားရောက်ရန် စီစဉ်ထားသည်။

အမေရိကန်မှ ဦးဆောင် ပြုလုပ်ပေးခဲ့သော သဘောတူညီချက်ကြောင့် အိုင်းရစ် ရီပတ်ပလီကန်များနှင့် ဗြိတိန် သစ္စာခံ လက်နက်ကိုင်အဖွဲ့များအကြား လက်နက်စွန့်ကာ မြောက်အိုင်ယာလန်အတွက် အစိုးရအာဏာ ခွဲဝေရေး ကို ဖြစ်စေခဲ့သည်။

ထိုငြိမ်းချမ်းရေး သဘောတူညီချက်သည် the Troubles ဟုခေါ်သော နှစ် ၃၀ ကြာ အကြမ်းဖက်မှုများကို အများစု ချုပ်ငြိမ်းစေခဲ့သော်လည်း ဆန့်ကျင့်သူ အုပ်စုများကတော့ လုံခြုံရေးတပ်ဖွဲ့များကို ဗုံးခွဲမှု၊ ပစ်ခတ်မှုများ လုပ်ဆောင်လျက် ရှိသေးသည်။

အကြမ်းဖက်ရန် လုပ်ဆောင်နေသည့် ပန်းချီကိုတွေ့ရစဉ်

(Londonderry) မြို့ရှိ ဒုတိယမြောက် အီစတာနေ့ အခမ်းအနား (Easter Monday) ချီတက်ပွဲတွင် အကြမ်းဖက်မှု များ ပြုလုပ်ရန် စီစဉ်နေသည့် သတင်း ရရှိထားသည်ဟု မြောက်အိုင်ယာလန်ရဲတပ်ဖွဲ့ ဒုတိယအကြီးအကဲ ဘော်ဘီ စင်ဂဲလ်တန် (Bobby Singleton) က ပြောသည်။

အတိုက်အခံများ၏ ခြိမ်းခြောက်မှုကြောင့် ဗြိတိန်အာဏာပိုင်များသည် ပြီးခဲ့သည့်လတွင် မြောက်အိုင်ယာလန်၏ အကြမ်းဖက် ခြိမ်းခြောက်မှုအဆင့်ကို ပြင်းထန်သည့် အခြေအနေသို့ တိုးမြှင့်ခဲ့သည်။

တိုက်ခိုက်မှုများ ဖြစ်ပွားနိုင်ရန် အလားအလာ အမြင့်ဆုံးတွင် ရှိနေသည့် သဘော ဖြစ်သည်။

ဖော်ဝါရီလတွင် ရဲအရာရှိတစ်ဦးကို မျက်နှာဖုံးစွပ် သေနတ်သမားနှစ်ဦးက ပစ်သတ်မှု ဖြစ်ပွားခဲ့သည်။

ဘိုင်ဒန်ကိုတွေ့ရစဉ် 

ရဲတပ်ဖွဲ့ဝင်များ၊ စစ်သားများနှင့် ထောင်ဝန်ထမ်းများ၊ ၎င်းတို့၏ မိသားစုများသည် အကြမ်းဖက်သမားများ၏ အဓိက ပစ်မှတ်ဖြစ်သည်ဟု ရဲချုပ် ဆိုင်မွန် ဘာနီ (Simon Byrne)က ပြောသည်။

Good Friday သဘောတူညီချက်ကို မြောက်အိုင်ယာလန်တွင် ကောင်းမွန်စွာ ကျင့်သုံးနိုင်လျက်ရှိသော်လည်း နိုင်ငံရေးဘက်တွင်တော့ ပဋိပက္ခများစွာ ပေါ်ပေါက်လျက်ရှိသည်။

Brexit အလွန် မြောက်အိုင်ယာလန်၏ ကုန်သွယ်ရေး သတ်မှတ်ချက်များကို ဆန့်ကျင့်ဆန္ဒပြသည့် ပင်မ သမဂ္ဂ အဖွဲ့တစ်ခုက အစိုးရအဖွဲ့မှ ထွက်ခွာသွား ခဲ့ပြီးနောက် မြောက်အိုင်ယာလန် လွှတ်တော်ကို မကျင်းပနိုင်သည်မှာ တစ်နှစ်ကျော်ကြာခဲ့ပြီ ဖြစ်သည်။

Source: AP

CNI International News

ဝါရှင်တန်၊ ဧပြီ ၈

ထရမ့်၏ အာဖဂန်မှ အမေရိကန်တပ်များ ဝရုန်းသုန်းကား ထွက်ခွာခဲ့ရသည့် အစီအစဉ်ကို အမေရိကန်သမ္မတ ဂျိုးဘိုင်ဒန် (Joe Biden) အစိုးရက အပြစ်တင်ထားသည့် အစီအရင်ခံစာ တစ်စောင်ကို ကြာသပတေးနေ့က ထုတ်ပြန်ခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden) အစိုးရသည် ကြာသပတေးနေ့တွင် အစီရင်ခံစာများကို စုပေါင်း၍ အကျဉ်းချုပ် မှတ်တမ်းတစ်စောင် ထုတ်ပြန်ခဲ့ရာမှာ တာလီဘန်များနှင့် ရရှိခဲ့သော သဘောတူညီချက်အတိုင်း အမေရိကန်တပ်များကို အာဖဂန်မှ ဆုတ်ခွာရန် အောင်မြင်စွာ ဆောင်ရွက်နိုင်ခဲ့ခြင်းမရှိသည့် သမ္မတဟောင်း ထရမ့်၏ အစိုးရကို အများစု အပြစ်တင်ထားသည်ဟု The Straits Times သတင်းတွင် ဖော်ပြထားသည်။

ဒီမိုကရက်တစ် အစိုးရ၏ အကျဉ်းချုပ်မှတ်တမ်းကို ရီပတ်ပလီကန် လွှတ်တော်အမတ်များက ဒေါသတကြီး တုံ့ပြန်ခဲ့ပြီး ၂၀၂၁ ခုနှစ်၊ သြဂုတ်လက အမေရိကန်တပ်ဖွဲ့များ ထွက်ခွာမှုနှင့် ပတ်သက်သည့် မှတ်တမ်းများအား ၎င်းတို့ကို ကြည့်ရှုခွင့်ပေးရန်လည်း တောင်းဆိုခဲ့သည်။

ရီပတ်ပလီကန် တစ်ဦးဖြစ်သည့် အမေရိကန်အောက်လွှတ်တော် ကြီးကြပ်ရေးကော်မတီဥက္ကဋ္ဌ ဂျိမ်းစ် ကိုမာ (James Comer) ကလည်း ဘိုင်ဒန်အစိုးရ၏ ထုတ်ပြန်ချက်သည် အလောတကြီး အာဖဂန်မှ အမေရိကန်တပ်များ ဆုတ်ခွာခဲ့မှုအတွက် အကြောင်းပြချက်တစ်ခုသာ ဖြစ်သည်ဟုပြောသည်။

 ထရမ့်၊ အမေရိကန်စစ်တပ်နဲ့ ပြည်ပြေး အာဖဂန် သမ္မတကိုတွေ့ရစဉ်

သမ္မတဘိုင်ဒန်၏ အာဖဂန်မှ အမေရိကန်တပ်များ ဆုတ်ခွာရန် ရွေးချယ်မှုသည် ယခင်အစိုးရဟောင်းမှ ဖန်တီးခဲ့သည့် အခြေအနေများကြောင့်များစွာ အနှောင့်အယှက် ဖြစ်ခဲ့ရသည်ဟု အကျဉ်းချုပ်မှတ်တမ်းတွင် ဖော်ပြထားသည်။

အစိုးရဟောင်းသည် တပ်များ နောက်ဆုံးဆုတ်ခွာမှု သို့မဟုတ် အမေရိကန်နှင့် ယင်း၏ မဟာမိတ်များကို ကယ်ထုတ်မှုစသည်တို့နှင့်ပတ်သက်၍ မည်သည့် အစီအစဉ်မှ ထောက်ပံ့ပေးခဲ့ခြင်း မရှိဟုလည်း ထိုအစီအရင်ခံစာတွင် ဖော်ပြထားသည်။

အမေရိကန်၏ အရှည်ကြာဆုံး ဖြစ်သော အာဖဂန်စစ်ပွဲမှ တပ်များ ဆုတ်ခွာမှုသည် တာလီဘန်များ ပြန်လည် အာဏာရရှိရန် ဖြစ်စေခြင်းကြောင့် အာဖဂန်ပြည်သူ ထောင်ပေါင်းများစွာသည် နိုင်ငံတွင်းမှ ထွက်ပြေးရန် ကြိုးစားခဲ့ကာ ကဘူးလ် အပြည်ပြည်ဆိုင်ရာ လေဆိပ်တွင်လည်း ဝရုန်းသုန်းကား အခြေအနေများကို ဖြစ်စေခဲ့သည်။

တချို့ အာဖဂန်များသည် ၎င်းတို့၏ သားသမီးများကို အမေရိကန်တပ်ဖွဲ့များထံပေးခြင်း သို့မဟုတ် ထွက်လာသော လေယာဉ်ပေါ်တွင် ခိုး၍ လိုက်ခြင်းတို့အထိ အခြေအနေ ဆိုးရွားခဲ့သည်။

ထရမ့်အစိုးရသည် အမေရိကန် အစိုးရအတွက် အလုပ်လုပ်ပေးခဲ့ခြင်းကြောင့် အာဖဂန်မှ ထွက်ခွာလိုနေသည့် အာဖဂန်ပြည်သူ ထောင်ပေါင်းများစွာအတွက် ဒုက္ခသည် ထောက်ပံ့မှုများ၊ အထူးလူဝင်မှု ဗီဇာများ ထုတ်ပေးခြင်းကို ရပ်တန့်လိုက်ခြင်းကြောင့် လုပ်ဆောင်ရန် အလုပ်အကြွေးများစွာကို ဖြစ်စေခဲ့သည်ဟုလည်း အကျဉ်းချုပ် မှတ်တမ်းတွင် ဖော်ပြသည်။

အမေရိကန်တပ်များ အာဖဂန်မှဆုတ်ခွာနေစဉ်

၁၂ မျက်နှာပါ မှတ်တမ်းတွင် အာဖဂန်မှ ကသောင်းကနင်း အခြေအနေများအတွက် အမေရိကန် ထောက်လှမ်းရေး နှင့် စစ်တပ်တို့၏ မှားယွင်းသော ကြိုတင်ခန့်မှန်းမှုများကိုလည်း တစ်စိတ်တစ်ပိုင်း အပြစ်တင်ထားသည်။

စစ်တပ်သည် တာလီဘန်များ လျင်မြန်စွာ အာဏာလွှဲပြောင်း ရယူနိုင်မှုကို ကြိုတင်ခန့်မှန်းနိုင်ခြင်း မရှိခဲ့ကာ မြို့တော် ကဘူးလ်ကို အာဖဂန်လုံခြုံရေး တပ်ဖွဲ့များ ထိန်းချုပ်နိုင်မည်ဟု မှားယွင်းစွာ သုံးသပ်ခဲ့ကြောင်းလည်း အစီအရင်ခံစာတွင် ဖော်ပြထားသည်။

အမေရိကန်တပ်များ ထွက်ခွာပြီးနောက် ၂၀၂၁ ခုနှစ် နှောင်းပိုင်းအထိ ကဘူးလ်မြို့သည် ပြင်းထန်သော ဖိအားများ အောက် ရောက်ရှိနိုင်ခြင်း မရှိနိုင်ဟု ခန့်မှန်းခဲ့ကြောင်း ၎င်း အစီအရင်ခံစာတွင် ရေးသားထားသည်။

Source: Straits Times

CNI International News

တိုင်ပေ၊ ဧပြီ ၈

တရုတ်သည် ဒုတိယမြောက်နေ့အဖြစ် သောကြာနေ့တွင်လည်း စစ်သင်္ဘောများနှင့် လေယာဉ်များကို ထိုင်ဝမ် အနီးသို့ စေလွှတ်ခဲ့သည်ဟု ထိုင်ဝမ်အစိုးရက ပြောသည်။ ထိုင်ဝမ်သမ္မတ ဆိုင်အင်ဝမ် (Tasi Ing-wen) က အမေရိကန်လွှတ်တော်ဥက္ကဋ္ဌ ကီဗင်မက္ကာသီနှင့်တွေ့ဆုံကာ တရုတ်အစိုးရကို ဒေါသဖြစ်အောင်လုပ်ဆောင်ခဲ့ ပြီးနောက် ထိုသို့ဖြစ်ခဲ့ခြင်းဟု Bangkok Post သတင်းတွင် ဖော်ပြသည်။

တရုတ်စစ်သင်္ဘောသုံးစင်းသည် ထိုင်ဝမ်ကျွန်းအနီးရေပြင်သို့ ရောက်ရှိလာကာ၊ ဂျက်တိုက်လေယာဉ်တစ်စင်းနှင့် ရေငုပ်သင်္ဘောဖျက် ရဟတ်ယာဉ်တစ်စင်းတို့သည်လည်း ထိုင်ဝမ်၏ လေကြောင်းကာကွယ်ရေးဇုံအတွင်းသို့ ဝင်ရောက်လာခဲ့သည်ဟု ထိုင်ဝမ်အမျိုးသားကာကွယ်ရေးဌာနက ပြောသည်။ ဗုဒ္ဓဟူးနေ့တွင် တရုတ်၏ ရှန်ဒေါင် (Shandong) လေယာဉ်တင်သင်္ဘောသည် အနောက်ပစိဖိတ်သို့သွားရန် ထိုင်ဝမ်၏အရှေ့တောင်ဘက်ရေပြင်သို့ ဖြတ်သွားခဲ့သည်။

ထိုင်ဝမ်သမ္မတနှင့်မက္ကာသီတို့ တွေ့ဆုံပွဲမတိုင်ခင် နာရီပိုင်းအလိုတွင် ဖြစ်သည်။ တရုတ်သည် ထိုင်ဝမ်အား ၎င်းတို့ အပိုင်အဖြစ် ရှုမြင်ထားကာ သမ္မတနှင့်လွှတ်တော်ဥက္ကဋ္ဌတို့၏တွေ့ဆုံမှုအတွက် ကြိုတင်သတိပေးမှုများစွာ လုပ်ဆောင်ထားသည်။ ထို့အပြင် တုန့်ပြန်မှုလုပ်ဆောင်သွားမည်ဟုလည်း ပြောသည်။

ဆိုင်သည် ထိုင်ဝမ်အစိုးရအနေဖြင့် ထိုင်ဝမ်ပြည်သူများအတွက် လွတ်လပ်၍ ဒီမိုကရေစီနည်းလမ်းကျသော လူနေမှုပုံစံအား သေချာစေရန် ဆုံးဖြတ်ထားသည်ဟု ပြောသည်။ လက်တင်အမေရိကနိုင်ငံများမှ ပြန်လည် ရောက်ရှိလာသည့် လမ်းတစ်ထောက်နားရာ လော့စ်အိန်ဂျလိစ်မြို့တွင် သတင်းထောက်များကို ထိုသို့ ပြောခဲ့ခြင်းဖြစ်သည်။

၂၀၂၂ ခုနှစ် အောက်တိုဘာ ၁၈ ရက်က ထိုင်ဝမ်အနီးတစ်ဝိုက်တွင် တရုတ်ရေတပ်သင်္ဘောနှစ်စင်းကို တွေ့ရစဉ်

နှစ်ဖက်အကြား ငြိမ်းချမ်းရေးနှင့်တည်ငြိမ်ရေးကို ထိန်းသိမ်းရန် အကောင်းဆုံးလုပ်ဆောင်သွားမည်ဟုလည်း သူမကပြောသည်။ ပြီးခဲ့သည့်နှစ် သြဂုတ်လက ထိုင်ဝမ်သို့ အမေရိကန်လွှတ်တော်ဥက္ကဋ္ဌ နန်စီပလိုစီ (Nancy Pelosi) ရောက်ရှိလာခဲ့ပြီးနောက် တရုတ်သည် ထိုင်ဝမ်အနီးတွင် စစ်သင်္ဘောများ၊ ဒုံးကျည်များနှင့် ဂျက်တိုက် လေယာဉ်များပါဝင်သော အကြီးမားဆုံး စစ်ရေးလေ့ကျင့်မှုကို လုပ်ဆောင်ခဲ့သည်။

လက်ရှိအချိန်အထိ ဆိုင်နှင့်မက္ကာသီတို့တွေ့ဆုံမှုအပေါ် တရုတ်၏တုန့်ပြန်မှုမှာ ပြင်းထန်သည့်အနေအထားတွင် ရှိမနေသော်လည်း ထိုင်ဝမ်အနေဖြင့် အသင့်အနေအထားတွင် ရှိနေသည်။ ထိုင်ဝမ်ကာကွယ်ရေးနှင့် လုံခြုံရေး အေဂျင်စီများသည် လက်ရှိအချိန်အထိ အခြေအနေများကို အနီးကပ်စောင့်ကြည့်လျက်ရှိကာ ပြည်သူများအတွက် အာခံချက်ပေးထားသည်ဟုလည်း ထိုင်ဝမ်ဝန်ကြီးချုပ်က ပြောသည်။

တရုတ်စစ်သင်္ဘောသုံးစီးကို ထိုင်ဝမ်ရေလက်ကြားအနီးတွင်တွေ့ခဲ့ရကာ တရုတ်ရေတပ် ရဟတ်ယာဉ်တစ်စင်း သည်ထိုင်ဝမ်၏ လေကြောင်း ကာကွယ်မှုဇုံကို ဖြတ်သန်းသွားသည်ဟု ထိုင်ဝမ်ကာကွယ်ရေးဌာနက ကြာသပတေး နေ့တွင် ထုတ်ပြန်ခဲ့သည်။

ထိုအခြေအနေများကြောင့် အမေရိကန်ဘက်က တရုတ်အနေဖြင့် ထိုင်ဝမ်အား စစ်ရေး၊ သံတမန်ရေးနှင့် စီပွားရေး အရ ဖိအားပေးနေမှုများကို လျော့ချကာ အဓိပ္ပါယ်ရှိသော သံတမန်ရေးနည်းလမ်းကို ကျင့်သုံးရန် တောင်းဆိုခဲ့ သည်။

Source:Bangkokpost

CNI International News

ဘေဂျင်း၊ ဧပြီ ၇

ယူကရိန်းစစ်ပွဲနှင့် ပတ်သက်၍ ရုရှားအား ပြန်လည်သုံးသပ်ရေး တိုက်တွန်းရန် တရုတ်သမ္မတ ရှီကျင့်ဖျင် (Xi Jinping) အား တောင်းဆိုမှု လုပ်ဆောင်လျက်ရှိသည်ဟု ပြင်သစ်သမ္မတ အီမန်နျူရယ် မက်ခရွန် (Emmanuel Macron) က ပြောကြောင်း Al Jazeera သတင်းတွင် ဖော်ပြသည်။

တရုတ်သို့ သုံးရက်ကြာ ခရီးစဉ်အဖြစ် ရောက်ရှိနေသော မက်ခရွန်သည် ၎င်းအနေဖြင့် ရုရှား ကျူးကျော်စစ်အပေါ် တရုတ်ထောက်ခံနေမှုကို ရပ်တန့်ရေး ကြိုးပမ်းနေသည်ဟု ကြာသပတေးနေ့တွင် ပြောသည်။

ရုရှားအား ပြန်လည် သုံးသပ်မှု ပြုလုပ်ရန်၊ ညှိနှိုင်းရေး စားပွဲဝိုင်းဆီသို့ အားလုံးကို ခေါ်ဆောင်လာနိုင်ရန် တိုက် တွန်း စေလိုသည်ဟု ရှီနှင့် ဘေဂျင်းမြို့မှာ တွေ့ဆုံစဉ် မက်ခရွန်က ပြောခဲ့သည်။

ဆွေးနွေးပွဲများအပြီး ပူးတွဲ ထုတ်ပြန်သည့် ကြေညာချက် များတွင်လည်း ရုရှားနှင့်ယူကရိန်းအကြား ငြိမ်းချမ်းရေး ကို တတ်နိုင်သမျှ အမြန်ဆုံး ဆောင်ရွက်ရန်လည်း ခေါင်းဆောင်နှစ်ဦးက အလေးအနက်ထား တောင်းဆိုထားသည်။

ပဋိပက္ခအတွင်း နျူကလီးယား အသုံးပြုမှုကို ဆန့်ကျင်မှုလည်း ပါဝင်သည်။

ပူတင်နဲ့ ရှီကျင့်ဖျင်ကိုတွေ့ရစဉ်

ခေါင်းဆောင်နှစ်ဦး၏ တွေ့ဆုံမှုနှင့် တိုက်ဆိုင်စွာ တရုတ်နိုင်ငံပိုင် CCTV သတင်း၌ ရှီက ကမ္ဘာကြီးတွင် သမိုင်းဝင် ပြောင်းလဲမှု ကြီးကြီးမားမား ဖြစ်ပွားနေချိန်၌ ပြင်သစ်နှင့် ဆက်ဆံရေးသည် အပြုသဘောဆောင်၍ မြဲမြံစွာ ရှိနေကြောင်း ချီးကျူးခဲ့သည်ဟု ဖော်ပြခဲ့သည်။

တရုတ်သည် ပဋိပက္ခအတွက် ငြိမ်းချမ်းရေးကို ရှာဖွေရေးလမ်းကြောင်းတွင် အဓိကအခန်းကဏ္ဍမှ ပါဝင်နေ ကြောင်း ပြင်သစ်သမ္မတက ပြောကာ တရုတ်၏ အဖြေရှာရန် ကတိတည်မှုကိုလည်း ကြိုဆိုခဲ့သည်။

၎င်း၏ တရုတ်ခရီးစဉ်သည် ၂၀၁၉ ခုနှစ်နောက်ပိုင်း ပထမဆုံးဖြစ်ကာ ယူကရိန်းအတွက် ငြိမ်းချမ်းရေး အဖြေရှာ ရန် တရုတ်အပေါ် အနောက်အုပ်စု၏ ဖိအားများ များပြားနေချိန်တွင် ပေါ်ပေါက်လာသည်။

တရုတ်သည် ယူကရိန်းအရေးတွင် ကြားနေအဖြစ်သာ ရှိသော်လည်း ရုရှား၏ ကျူးကျော်မှုနှင့် ပတ်သက်၍ တစ်စုံတစ်ရာ ဝေဖန်ခဲ့ခြင်း မရှိပေ။ ရှီသည် မကြာသေးခင်က မော်စကိုသို့သွားကာ ပူတင်နှင့် တွေ့ဆုံခဲ့သော်လည်း လက်ရှိ အချိန်အထိ ယူကရိန်းသမ္မတနှင့် ဖုန်းဆက်သွယ်မှုပင် မရှိသေးပေ။

မက်ခရွန်၊ ရှီကျင့်ဖျင်၊ ဗွန်ဒါလီယန်တို့ကိုတွေ့ရစဉ်

ဆွေးနွေးမှုများသည် ပွင့်လင်း၍ အပြုသဘောဆောင်ကြောင်း ပြင်သစ်အစိုးရဘက်က ထုတ်ပြန်ကာ မက်ခရွန်နှင့် ရှီတို့၏ ဆွေးနွေးမှုများသည် ဖော်ရွှေကာ လေးနက်မှုရှိသည်ဟု တရုတ်ဘက်က ထုတ်ပြန်သည်။

မက်ခရွန်သည် ဥရောပကော်မရှင် အကြီးအကဲ ဗွန်ဒါလီယန် နှင့် တရုတ်သို့ သွားရောက်ခဲ့ခြင်း ဖြစ်သည်။ ထိုသို့ အတူ တကွ သွားရောက်ခဲ့ခြင်းက ပုံမှန်မဟုတ်သော အခြေအနေတစ်ခုဖြစ်ကာ ဝေခွဲရခက်မှုကို ဖြစ်စေသည်ဟု လေ့လာ သူများက သုံးသပ်သည်။

မက်ခရွန်နှင့် ဗွန်ဒါလီယန်တို့သည် တရုတ်တွင် good cop၊ bad cop နည်းလမ်းကို ကျင့်သုံးမည့်ပုံ ဖြစ်သည်ဟု လည်း လေ့လာသူများက သုံးသပ်ထားသည်။

Source: aljazeera

ဂျေဂုဆလင်၊ ဧပြီ - ၇

အစ္စရေးစစ်တပ်က လက်ဘနွန်နိုင်ငံသို့ ဒုံးကျည်ဖြင့် ပစ်ခတ်တိုက်ခိုက်ခဲ့ရာ ဂါဇာကမ်းမြှောင် ဒေသအတွင်းမှ ပစ်မှတ်များကို ထိမှတ်ခဲ့ကြောင်း အေပီသတင်းတွင် ဖော်ပြထားသည်။

ဂါဇာစစ်သွေးကြွများ ဘက်ကလည်း ဒုံးကျည်များဖြင့် ပြန်လည်တုန့်ပြန် ပစ်ခတ်ခြင်းကြောင့် အစ္စရေးတောင်ပိုင်း တနှံ့တလျားတွင် လေကြောင်း အချက်ပေးသံများ ဆူညံခဲ့ရသည်။

ဂျေရုဆလင်ရှိ ထိလွယ်ရှလွယ်သော မြင့်မြတ်သည့် နေရာတစ်ခုတွင် နှစ်ရက်ကြာ ဆူပူမှုများ ဖြစ်ပွားခဲ့ခြင်း ကြောင့် အစ္စရေးဘက်က နိုင်ငံ၏မြောက်ပိုင်းနှင့် တောင်ပိုင်း နယ်စပ်များသို့ ဒုံးကျည်များဖြင့် ပစ်ခတ်ခဲ့မှုအပြီး ဒေသတွင်း၌ ပိုမိုကြီးများသော ထိပ်တိုက် တွေ့ဆုံမှုများဆီသို့ ဦးတည်လာခြင်း ဖြစ်သည်။

အစ္စရေးတို့၏ ပစ်ခတ်မှုများကြောင့် ဂါဇာတွင် ကျယ်လောင်စွာ ပေါက်ကွဲမှု အနည်းဆုံး လေးခုအထိ ဖြစ်ခဲ့ရသည်။

လှိုဏ်ခေါင်းနှစ်ခုနှင့် လက်နက်ထုတ်လုပ်ရေး စက်ရုံနှစ်ခုတို့ကို ပစ်မှတ်ထား တိုက်ခိုက်ခြင်းဟု အစ္စရေးစစ်တပ်က ပြောသည်။ ယခု အခြေအနေက အထိအခိုက် မခံသော အားလပ်ရက်ကာလတွင် တင်းမာမှုများ မြင့်တက်လာသည့် အရိပ်အယောင် ဖြစ်သည်။

အစ္စရေးဘက်ကို ဒုံးကျည်ကျရောက် ပေါက်ကွဲနေစဉ်

၂၀၂၁ ခုနှစ်ကလည်း အလားတူ တိုက်ခိုက်မှုများကြောင့် အစ္စရေးနှင့် ဟားမက်စ် (Hamas) အဖွဲ့တို့အကြား ၁၁ ရက်ကြာ စစ်ပွဲဖြစ်ပွားခဲ့ဖူးသည်။

အစ္စရေး၏ လေကြောင်း တိုက်ခိုက်မှုများသည် လက်ဘနွန်နိုင်ငံမှ စစ်သွေးကြွများက အစ္စရေးဘက်သို့ ဒုံးကျည် များဖြင့် ပစ်ခတ်ပြီးနောက် ပေါ်ပေါက်လာခြင်း ဖြစ်သည်။

ထိုပစ်ခတ်မှုများကြောင့် အစ္စရေးမြောက်ပိုင်း နယ်စပ်တွင် လူနှစ်ဦး ဒဏ်ရာ ရရှိခဲ့သည်။

ဂါဇာမှ စစ်သွေးကြွများကလည်း အစ္စရေးဘက်သို့ တိုက်ခိုက်မှု လုပ်ဆောင်ခဲ့သည်။

ပါလက်စတိုင်း စစ်သွေးကြွများ၏ တိုက်ခိုက်မှုများသည် ဂျေရုဆလင်မြို့ဟောင်းရှိ Al-Aqsa ဗလီမှ ယခု သီတင်း ပတ်အတွင်း ဖြစ်ပေါ်ခဲ့သော အကြမ်းဖက်မှုများနှင့် ဆက်စပ်နေသည်ဟု အစ္စရေးစစ်တပ်က ပြောသည်။

ထို့နောက် အဆောက်အဦအား အစ္စရေးရဲတပ်ဖွဲ့က နှစ်ရက်ဆက်တိုက် ဝင်ရောက်စီးနင်းခဲ့ကာ ဗလီတွင် ဖြစ်ပွားခဲ့ သော အကြမ်းဖက် ဖြစ်ရပ်များက ဒေသတွင်း တင်းမာမှုများကို မြင့်မားလာစေလျက်ရှိသည်။

ဒုံးကျည် တိုက်ခိုက်မှုများနှင့် ပတ်သက်၍ အစ္စရေးဝန်ကြီးချုပ် ဘင်ဂျမင် နေတန်ညာဟု (Benjamin Netanyahu) က အစိုးရအဖွဲ့နှင့် တွေ့ဆုံ ဆွေးနွေးခဲ့ပြီးနောက် လေကြောင်းတိုက်ခိုက်မှုများ ပြုလုပ်ခဲ့ကြောင်း ရှင်းပြခဲ့သည်။

ထို့နောက် ပြင်းထန်စွာ တုန့်ပြန်သွားမည်ဟုလည်း ၎င်းက ပြောသည်။

ဟစ်ဇ်ဘိုဘာအဖွဲ့ကိုတွေ့ရစဉ်

အစ္စရေးသို့ လက်ဘနွန်ဘက်က ဒုံးကျည် ၃၄ လုံးဖြင့် တိုက်ခိုက်မှု လုပ်ဆောင်ခဲ့ခြင်းဖြစ်ပြီး လက်ရှိ အချိန်အထိ လက်ဘနွန် စစ်သွေးကြွများအား တုန့်ပြန်မှု လုပ်ဆောင်ခြင်း မရှိသေးပေ။

ထိုဒုံးကျည်များမှ ၂၅ လုံးကို ပစ်ချနိုင်ခဲ့ကာ ဒုံးကျည် ငါးလုံးသည် အစ္စရေးမြေပေါ်သို့ ရောက်လာခဲ့ကြောင်း၊ တခြား ဒုံးကျည်များကို စုံစမ်းနေဆဲဖြစ်ကြောင်း အစ္စရေးစစ်တပ်က ပြောသည်။

ထိုသို့ ဒုံးကျည်များ အလုံးအရင်းဖြင့် ရောက်ရှိလာခြင်းက ပိုမိုကျယ်ပြန့်သော ထိပ်တိုက်တွေ့ဆံမှု တစ်ခုဆီသို့ ဦးတည်နေသည်။

အစ္စရေး၏ ခါးသီးသောရန်ဘက် အီရန်မှ ထောက်ပံ့ထားသည့် ဟစ်ဇ်ဘိုလာ (Hezbollah) စစ်သွေးကြွများသည် လက်ဘနွန် မြောက်ပိုင်းနေရာ အများစုကို ထိန်းချုပ်ထားခြင်းကြောင့် ဖြစ်သည်။

Source: AP

CNI International News

ဘန်ကောက်၊ ဧပြီ ၇

ထိုင်းဝန်ကြီးချုပ် ပရာယွတ်ချန်အိုချာ (Prayut Chan-o-cha) က ရွေးကောက်ပွဲမတိုင်ခင် နိုင်ငံတွင်း စည်းလုံးမှု အားနည်းခြင်းနှင့် ပတ်သက်သည့် သူ၏ စိုးရိမ်မှုကို အရိပ်အမြွက်ထုတ်ဖော်ပြောဆိုခဲ့ကာ လုံခြုံရေးနှင့် ငြိမ်းချမ်း ရေးကို ဦးစားပေးဆောင်ရွက်သွားရန်အတွက် ပါဝင်ပတ်သက်နေသူအားလုံးကို တိုက်တွန်းခဲ့ကြောင်း Bangkok Post သတင်းတွင် ဖော်ပြသည်။

ဝန်ကြီးချုပ်သည် သူဘာကို စိုးရိမ်နေသလဲဆိုခြင်းကိုတော့ ရှင်းလင်းပြောဆိုခဲ့ခြင်းမရှိပေ။ စိုးရိမ်မှုနှင့်ပတ်သက်၍ ရှင်းလင်းပြောဆိုရန် လိုအပ်သည်ဟု မထင်ကြောင်း၊ လူ့အဖွဲ့အစည်းအား မတည်မငြိမ် ဖြစ်စေသည့်အရာများကို စဉ်းစားစေလိုကြောင်း ပရာယွတ်က သူ၏စိုးရိမ်မှုနှင့်ပတ်သက်၍ မေးမြန်းမှုကို ပြန်လည်ဖြေကြားခဲ့သည်။

ဝန်ကြီးချုပ်၏ စိုးရိမ်မှုသည် မေလ အထွေထွေရွေးကောက်ပွဲအပြီး ပါတီများ၊ အဖွဲ့အစည်းများဘက် ပြောင်းလဲ ခြင်းနှင့် သက်ဆိုင်နေလားဆိုသည့် မေးမြန်းမှုများနှင့်ပတ်သက်၍လည်း ပရာယွတ်က အဆိုပါကိစ္စ မဟုတ်ကြောင်း ပြောကာ ရုတ်တရက် စကားလမ်းကြောင်း လွှဲသွားခဲ့သည်။

 ဝန်ကြီးချုပ် ပရာယွတ်ချန်အိုချာသည် ၎င်း၏ ပထမဆုံးသော ရွေးကောက်ပွဲ မဲဆွယ်စည်းရုံးရေး မိန့်ခွန်းကို ပြောကြားနေစဉ်

ဝန်ကြီးချုပ်သည် ထိုင်းကာကွယ်ရေးဌာန၏ ၁၃၆ နှစ်ပြည့် နှစ်ပတ်လည်နေ့ အခမ်းအနားတစ်ခုတွင် လက်နက် ကိုင်တပ်ဖွဲ့ခေါင်းဆောင်များနှင့် နေ့လည်စာ စားခဲ့ပြီးနောက် သတင်းထောက်များထံ စကားပြောဆိုမှု လုပ်ဆောင် ခဲ့သည်။ ကာကွယ်ရေးဌာနမှ ထွက်လာချိန်တွင် ဝန်ကြီးချုပ်သည် သတင်းသမားများကို လက်ယပ်ခေါ်ကာ ၎င်း အနီးသို့ လာစေခဲ့ပြီး အင်တာဗျူး ဖြေဆိုမှု လုပ်ဆောင်ခဲ့သည်။

ပရာယွတ်သည် ရာမဘုရင် ၆ ၏ Rai Rak Rai Phon (မေတ္တာတရားမရှိရင် အောင်မြင်မှုမရှိ) ဆိုသော စာပေ လက်ရာကို ကိုးကား၍ နိုင်ငံ၏စည်းလုံးမှုနှင့် ငြိမ်းချမ်းမှု၏ အရေးပါပုံကိုလည်း အလေးအနက်ထား ပြောဆို ခဲ့သည်။ ယင်းကို သီချင်းအဖြစ် ပြောင်းလဲဖန်တီးခဲ့ပြီးလည်းဖြစ်သည်။ နိုင်ငံတွင်းငြိမ်းချမ်းမှုအားနည်းခြင်းက ထိုင်းနိုင်ငံအား နိုင်ငံတကာစာမျက်နှာတွင် အခွင့်အရေးကောင်းများ ဆုံးရှုံးရန် ဖြစ်စေသည်ဟု သတိပေးခဲ့ပြီး ဖြစ်ကြောင်းလည်း ပရာယွတ်က ပြောသည်။ အားလုံးမေ့နေလောက်ပြီဖြစ်သော ရာမဘုရင် ၆ ၏ သီချင်းကို ပြန်လည်နားထောင်ရန် တိုက်တွန်းသည်ဟု ပရာယွတ်က ပြောသည်။

လက်ရှိအာဏာရ PPRP ပါတီနှင့် ပင်မအတိုက်အခံ ဖြူးထိုင်း (Pheu Thai) ပါတီတို့အကြား လျှို့ဝှက် သဘော တူညီချက်တစ်ခု ရှိနေနိုင်သည်ဟု ယခုဖျက်သိမ်းခဲ့ပြီဖြစ်သော UDD ၏ ဥက္ကဋ္ဌဟောင်းဖြစ်သူ ဂျာတူပွန်း ပရွန်ပန် (Jatuporn Prompan) က အင်္ဂါနေ့တွင် ပြောခဲ့သည်။ ၎င်းသည် ဖြူးထိုင်းပါတီအား ဝေဖန်မှုများစွာ ပြုလုပ်ထား သူတစ်ဦးလည်း ဖြစ်သည်။

ပင်မအတိုက်အခံပါတီတစ်ခုဖြစ်သည့် ဖြူးထိုင်း ပါတီဝင်များ၏ မဲဆွယ်စည်းရုံးရေး ခရီးစဉ်တစ်ခု

သဘောတူညီချက်အရ ပါတီများသည် ညွန့်ပေါင်းအစိုးရဖွဲ့ကာ ရွေးကောက်ပွဲပြီးချိန်တွင် ဒုတိယဝန်ကြီးချုပ်နှင့် PPRP ခေါင်းဆောင် ပရာဝစ် ဝေါင်ဆူဝမ် (Prawit Wongsuwon) တို့အား ဝန်ကြီးချုပ်အဖြစ် အဆိုတင်သွင်းရန် ကြံစည်ထားသည်ဟု ဂျာတူပွန်းက ပြောသည်။ ဗိုလ်ချုပ်ကြီး ပရာဝစ်နှင့် ရင်းနှီးသောမိတ်ဆွေတစ်ဦး၏ ဇနီးကို ဖြူးထိုင်းပါတီ၏ ၂၂ ဦးမြောက်အမတ်လောင်းအဖြစ် အဆိုတင်သွင်းလိုက်ခြင်းကြောင့် ဂျာတူပွန်းက ယခုကဲ့သို့ ပြောဆိုခဲ့ခြင်းဖြစ်က ထိုကိစ္စကြောင့် ဖြူးထိုင်းနှင့် PPRP တို့အကြား လျှို့ဝှက်သဘောတူညီချက်နှင့် ပတ်သက် သည့် ကောလာဟလများကိုလည်း ဖြစ်စေခဲ့သည်။ သို့သော် အဆိုပါ ကောလာဟလများကို ဖြူးထိုင်းဘက်က ငြင်းဆိုထားသည်။

Source:Bangkokpost