CNI International News

မနီလာ၊ ဖေဖော်ဝါရီ ၅

ဖိလစ်ပိုင်အစိုးရအနေဖြင့် နိုင်ငံအားပြိုကွဲစေမည့် အားထုတ်ကြိုးပမ်းမှုများကို အင်အားသုံး နှိမ်နင်းသွားမည်ဟု ဖိလစ်ပိုင်အမျိုးသားလုံခြုံရေး အကြံပေးပုဂ္ဂိုလ် အီဒူရာဒို အန်နို (Eduardo Ano)က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ဖိလစ်ပိုင်သမ္မတဟောင်း ဒူတာတေး (Rodrigo Duterte)က ၎င်း၏ မွေးရပ်ဇာတိဖြစ်သည့် မင်ဒါနာအို (Mindanao) ပြည်နယ်ကို နိုင်ငံအတွင်းမှ ခွဲထွက်သွားမည်ဟု ခြိမ်းခြောက်ခဲ့ပြီးနောက် သမ္မတသစ် ဖာဒီနန် မားကို့စ် ဂျူနီယာ (Ferdinand Marcos Jr.) ၏ အစိုးရအဖွဲ့ထဲမှာ လုံခြုံရေးအရာရှိဖြစ်သူ အန်နို၏ မှတ်ချက် စကား ထွက်ပေါ်လာခြင်းဖြစ်သည်။ 

"နိုင်ငံတော်အစိုးရဟာ နိုင်ငံပြိုကွဲမယ့် အားထုတ်ကြိုးပမ်းမှု အားလုံးကို တားဆီးဖို့နဲ့ နှိမ်နင်းဖို့အတွက် အာဏာနဲ့ အင်အားကို အသုံးပြုသွားဖို့ တွန့်ဆုတ်နေမှာ မဟုတ်ပါဘူး" ဟု အန်နိုက ပြောကြားခဲ့သည်။

သမ္မတဟောင်း ဒူတာတေးက ၎င်းနေရာကို ဆက်ခံသူသည် ဖွဲ့စည်းပုံအခြေခံဥပဒေကို ပြင်ဆင်ရန် အစီအစဉ်များ အတိုင်း ဆက်လက် လုပ်ဆောင်ခဲ့မည်ဆိုပါက မင်ဒါနာအိုဒေသသည် လွတ်လပ်ရေး ရလာလိမ့်မည်ဖြစ်ကြောင်း ပြီးခဲ့သည့် သီတင်းပတ်က သတိပေးခဲ့သည်။ 

ဖိလစ်ပိုင်သမ္မတဟောင်း ဒူတာတေးကို တွေ့ရစဉ်

မားကို့စ်သည် နိုင်ငံစီးပွားရေးကို လှုံ့ဆော်ရန် ၁၉၈၇ ခုနှစ် ဖွဲ့စည်းပုံအခြေခံဥပဒေ၏ စီးပွားရေး အစီအစဉ်များကို ပြန်လည်စိစစ်ရန် အားထုတ်ကြိုးပမ်းမှုများကို ထောက်ခံခဲ့သော်လည်း မားကို့စ်သည် ၎င်း၏ အာဏာတည်မြဲ ရေးကို ခိုင်မာစေရန် ဖွဲ့စည်းပုံအခြေခံဥပဒေအား ပြင်ဆင်ရန် ကြိုးပမ်းနေကြောင်း ဒူတာတေးက စွပ်စွဲခဲ့သည်။

ဒူတာတေး၏ မှတ်ချက်စကားများကြောင့် ၂၀၂၂ ခုနှစ် ရွေးကောက်ပွဲက မဟာမိတ်ဖွဲ့ပြီး အနိုင်ရခဲ့သည့် ဖိလစ်ပိုင် ၏ အင်အားအကြီးဆုံး နိုင်ငံရေးမိသားစုများဖြစ်သော ဒူတာတေးမိသားစုနှင့် မားကို့စ်မိသားစုအကြား သဘော ထား ကွဲလွဲမှုများကို မီးမောင်းထိုး ဖော်ပြနေသည်။

မားကို့စ်သည် ပြီးခဲ့သည့်လက ဒေသခံမီဒီယာတစ်ခုနှင့် ပြုလုပ်သည့် အင်တာဗျူးတွင် ဖိလစ်ပိုင်၏ ကန့်သတ်ချက် များ များပြားသည့် ဖွဲ့စည်းပုံဆိုင်ရာ ပြဋ္ဌာန်းချက်များကို စိုးရိမ်ကြောင်းနှင့် နိုင်ငံရေးသမားများ၏ အာဏာရယူခွင့် သက်တမ်း ကန့်သတ်ချက်များအား ပြောင်းလဲရန် အစီအစဉ်များကို ဆက်လက် လုပ်ဆောင်နေကြောင်း ပြောကြား ခဲ့သည်။

ဖိလစ်ပိုင်အမျိုးသားလုံခြုံရေး အကြံပေးပုဂ္ဂိုလ် အီဒူရာဒိုအန်နိုကို တွေ့ရစဉ်

ဒူတာတေးကမူ မားကို့စ်အနေနှင့် ၎င်း၏ အာဏာတည်မြဲရေးအတွက် ဆက်လက် လုပ်ဆောင်နေမည်ဆိုပါက သူ့ဖခင် (ဖိလစ်ပိုင် အာဏာရှင်ဟောင်း ဖာဒီနန်မားကို့စ်) ကဲ့သို့ ရာထူးမှ ဖယ်ရှားခံရနိုင်ကြောင်း သတိပေးခဲ့သည်။

လက်ရှိသမ္မတ မားကို့စ်၏ ကွယ်လွန်သွားပြီဖြစ်သည့် ဖခင်ဖြစ်သူ ဖာဒီနန်မားကို့စ်သည် ဖိလစ်ပိုင်နိုင်ငံကို ဆယ်စုနှစ် နှစ်စုကြာ အုပ်ချုပ်ခဲ့ပြီး ၁၉၈၆  ခုနှစ်တော်လှန်ရေးတွင် ရာထူးမှ ဖယ်ရှားခံခဲ့ရသည်။

Source: ဘန်ကောက်ပို့စ်

CNI International News

မော်စကို၊ ဖေဖော်ဝါရီ ၅

ရုရှားတပ်ဖွဲ့များ သိမ်းပိုက်ထားသည့် ယူကရိန်း၏ လိုင်ဆက်ချန့်စ် (Lysychansk) မြို့ရှိ ပေါင်မုန့်ဆိုင် တစ်ဆိုင်ပေါ် သို့ ဖေဖော်ဝါရီ ၃ ရက်က လက်နက်ကြီးကျည် ကျရောက်ပေါက်ကွဲခဲ့သဖြင့် လူ ၂၈ ဦးထက်မနည်း သေဆုံးခဲ့သည် ဟု အေပီမှ ဖော်ပြခဲ့သည်။

သေဆုံးသူများထဲတွင် ကလေးငယ်တစ်ဦး ပါဝင်ပြီး ကယ်ဆယ်ရေးသမားများသည် အဆောက်အအုံ အပျက်အစီး များအောက်မှ လူ ၁၀ ဦးကို အသက်ရှင်လျက် ကယ်တင်နိုင်ခဲ့ကြောင်း ရုရှားအစိုးရက ခန့်အပ်ထားသည့် ဒေသခံ ခေါင်းဆောင်တစ်ဦးဖြစ်သူ လီယိုနစ် ပါဆက်ချ်နစ်ခ် (Leonid Pasechnik)က ပြောကြားခဲ့သည်။

ယူကရိန်းအရာရှိများကမူ ထိုတိုက်ခိုက်မှုနှင့်ပတ်သက်ပြီး မှတ်ချက်ပေးခဲ့ခြင်းမရှိပေ။

ယူကရိန်း-ရုရှား စစ်ပွဲ ဖြစ်ပွားခဲ့သည်မှာ ၂ နှစ်နီးပါး ကြာမြင့်လာချိန်တွင် ၁၅၀၀ ကီလိုမီတာ ( မိုင် ၉၃၀) ရှည်လျား သည့် ရှေ့တန်းစစ်မျက်နှာပြင်၌ သိသာသည့် အပြောင်းအလဲများ မရှိသေးဘဲ ယခုနှစ် ဆောင်းရာသီတွင် နှစ်ဖက် စလုံးက တာဝေးပစ် လက်နက်များကို အများဆုံးအသုံးပြုပြီး တိုက်ခိုက်ခဲ့ကြသည်။

မည်သို့ပင်ဆိုစေ ပြီးခဲ့သည့် ၂၄ နာရီအတွင်း ယူကရိန်းတပ်ဖွဲ့များသည် ရုရှား၏ ပြင်းထန်သည့် တိုက်ခိုက်မှုကို ခံခဲ့ရပြီး ရှေ့တန်းစစ်မြေပြင်များတွင် တိုက်ခိုက်မှုများ ဆက်တိုက် ဖြစ်ပွားနေသည်ဟု ယူကရိန်းစစ်ဦးစီးချုပ်က ဖေဖော်ဝါရီ ၄ ရက်၌ ထုတ်ပြန်ခဲ့သည်။

လီယိုနစ်ပါဆက်ချ်နစ်ခ်ကို တွေ့ရစဉ်

ရုရှားတပ်ဖွဲ့များက ယူကရိန်းတပ်ဖွဲ့များကို ဝိုင်းပတ်ချေမှုန်းရန် ကြိုးပမ်းနေသည့် အက်ဒစ်ဗ်ကာ (Avdivka) မြို့တွင် နှစ်ဖက်တပ်ဖွဲ့ဝင်များအကြား တိုက်ပွဲများပြင်းထန်နေသည်။

ထို့နောက် ကူပီယန့်စ်ခ် (Kup’yans’k) ၊ လိုင်မန် (Lyman) ၊ ဘက်ခ်မွတ် (Bakhmut) နှင့် ဇာပိုရီရှား (Zaporizhzhia)မြို့များတွင်လည်း ယူကရိန်းတပ်ဖွဲ့များက ခံစစ်ဆင်နေကြောင်း ယူကရိန်းအရာရှိများက ပြောကြားခဲ့သည်။

ရုရှားတပ်ဖွဲ့များသည် ဖေဖော်ဝါရီ ၃ ရက်က မတူညီသည့် နေရာဒေသ ၁၆ ခုကို လက်နက်ကြီးများဖြင့် ပစ်ခတ် တိုက်ခိုက်ခဲ့ကြောင်း ယူကရိန်းစစ်တပ် အုပ်ချုပ်ရေးအဖွဲ့က ပြောကြားခဲ့သည်။

ယူကရိန်းတပ်ဖွဲ့များသည် ဆူမိုင် (Sumy) ဒေသတွင် ရုရှားတပ်များ၏ အဖျက်အမှောင့် အစီအစဉ်များကို တွန်းလှန်နိုင်ခဲ့ကြောင်း ယူကရိန်းပူးတွဲတပ်ဖွဲ့များ၏ တပ်မှူး ဗိုလ်ချုပ်ကြီး ဆာဟိုင်း နာအိဗ် (Serhii Naiev) က ပြောကြားခဲ့သည်။

Source: အေပီ

CNI International News

ဝါရှင်တန်၊ ဖေဖော်ဝါရီ ၅

အမေရိကန်သည် အီရတ်နှင့် ဆီးရီးယားနိုင်ငံများရှိ အီရန်၏ တော်လှန်ရေးအစောင့်တပ်ဖွဲ့(IRGC)နှင့် ဆက်နွှယ် သည့် ပစ်မှတ်များ၊ အီရန်က ထောက်ပံ့ပေးထားသော လက်နက်ကိုင်များ အပါအဝင် ပစ်မှတ် ၈၅ ခုကျော်ကို လေကြောင်းတိုက်ခိုက်ခဲ့သဖြင့် လူ ၄၀ နီးပါး သေဆုံးခဲ့သည်ဟု ရိုက်တာမှ ဖော်ပြခဲ့သည်။

ဂျော်ဒန်နိုင်ငံတွင် အမေရိကန်စစ်သားများကို ဒရုန်းနှင့်တိုက်ခိုက်ခဲ့မှုအား လက်တုန့်ပြန်သည့်အနေဖြင့် အမေရိကန်က ထိုကဲ့သို့ လေကြောင်းတိုက်ခိုက်မှုများကို ပြုလုပ်ခဲ့ခြင်းဖြစ်သည်။

အမေရိကန်မှ တောက်လျှောက် ပျံသန်းလာခဲ့သည့် B-1 ဗုံးကြဲလေယာဉ်များ ပါဝင်သော ထိုလေကြောင်း တိုက်ခိုက်မှုသည် ပြီးခဲ့သည့် သီတင်းပတ်က ဂျော်ဒန်တွင် အမေရိကန်စစ်သား ၃ ဦး သေဆုံးခဲ့သည့် တိုက်ခိုက်မှုကို တုန့်ပြန်သည့် ပထမဆုံး လက်စားချေတိုက်ခိုက်မှု ဖြစ်သည်။

 အီရန်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ နက်ဆာကာနာနီကို တွေ့ရစဉ်

ထို့ပြင် လာမည့် ရက်များအတွင်းတွင်လည်း အမေရိကန်၏ တိုက်ခိုက်မှုများကို ဆက်လက် မြင်တွေ့ရဖွယ် ရှိနေသည်။

အောက်တိုဘာ ၇ ရက်က အစ္စရေးကို ဟားမာ့စ်အဖွဲ့မှ ဝင်ရောက်တိုက်ခိုက်မှုကြောင့် အစ္စရေးနှင့် ဟားမာ့စ် အကြား စစ်ပွဲဖြစ်ပွားနေချိန်တွင် ယခုကဲ့သို့ အမေရိကန်၏ လေကြောင်းတိုက်ခိုက်မှုများကြောင့် အရှေ့အလယ် ပိုင်းဒေသအတွင်း ပျံ့နှံ့လာခဲ့သည့် ပဋိပက္ခများကို ပိုမိုပြင်းထန်စေခဲ့သည်။

အမေရိကန်၏ လေကြောင်းတိုက်ခိုက်မှုများသည် အမေရိကန်အစိုးရ၏ မဟာဗျူဟာမြောက် အမှားအယွင်းတစ်ခု ဖြစ်ပြီး တင်းမာမှုများနှင့် မတည်ငြိမ်မှုများကိုသာ ဖြစ်စေနိုင်လိမ့်မည်ဟု အီရန် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ နက်ဆာ ကာနာနီ (Nasser Kanaani) က ပြောကြားခဲ့သည်။

SOHR ၏ အကြီးအကဲ ရာမီအဗ္ဗဒူရာမန်ကို တွေ့ရစဉ်

အီရတ်ကလည်း ထိုလေကြောင်း တိုက်ခိုက်မှုကို ဆန့်ကျင်ကြောင်း ဖော်ပြရန်အတွက် အီရတ်နိုင်ငံဆိုင်ရာ အမေရိကန် ယာယီတာဝန်ခံသံမှူးကို ဆင့်ခေါ်ခဲ့သည်။

အီရတ်၏ နယ်နိမိတ်အတွင်း စစ်ပွဲဖြစ်ပွားရန် ရန်စောင်နေသည့် နိုင်ငံများအကြား အင်အားပြမှုများ သို့မဟုတ် ထိပ်တိုက်တွေ့မှုများကို လက်ခံမည် မဟုတ်ဟု အီရတ်က အမေရိကန်ယာယီ တာဝန်ခံသံမှူးကို ထပ်လောင်း ပြောကြားခဲ့ကြောင်း အီရတ် နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

အီရန်က ထောက်ခံပေးထားသည့် လက်နက်ကိုင်အုပ်စုများ ပါဝင်သော အီရတ်၏ Popular Mobilization Forces တပ်ပေါင်းစုကမူ အမေရိကန်၏ တိုက်ခိုက်မှုကြောင့် ၎င်းတို့တပ်ပေါင်းစုအတွင်းမှ လက်နက်ကိုင် တိုက်ခိုက်ရေး သမားများနှင့် ဆေးတပ်သားများ အပါအဝင် လူပေါင်း ၁၆ ဦး သေဆုံးခဲ့ကြောင်း ထုတ်ပြန်ခဲ့သည်။ 

ဆီးရီးယားတွင်မူ အမေရိကန်၏ လေကြောင်းတိုက်ခိုက်မှုများကြောင့် လူ ၂၃ ဦး သေဆုံးခဲ့ကြောင်း ဆီးရီးယား လူ့အခွင့်အရေးဆိုင်ရာ လေ့လာစောင့်ကြည့်ရေးအဖွဲ့ (SOHR) ၏ အကြီးအကဲ ရာမီ အဗ္ဗဒူရာမန် (Rami Abdulrahman) က ပြောကြားခဲ့သည်။

Source: ရိုက်တာ

CNI International News

တီဟီရန်၊ ဖေဖော်ဝါရီ ၃

အီရန်နိုင်ငံအနေနှင့် စစ်ပွဲကို စတင်မည် မဟုတ်သော်လည်း မိမိတို့အား အနိုင်ကျင့်ဗိုလ်ကျမည့် မည်သူ့ကိုမဆို ပြင်းထန်စွာ တုန့်ပြန်သွားမည်ဟု အီရန်သမ္မတ အီဘရာဟင် ရာအီစီ (Ebrahim Raisi) က ဖေဖော်ဝါရီ ၂ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဇန်နဝါရီ  ၂၇ ရက်က ဂျော်ဒန်နိုင်ငံရှိ စစ်စခန်းတွင် အီရန်က ကျောထောက်နောက်ခံ ပေးထားသည့် လက်နက်ကိုင် အဖွဲ့က ဒရုန်းဖြင့် တိုက်ခိုက်မှုကြောင့် အမေရိကန်စစ်သား ၃ ဦး သေဆုံးခဲ့မှုကို အမေရိကန်က လက်တုန့်ပြန်မည် ဆိုခြင်းအပေါ် ထင်ကြေးပေးမှုများ ထွက်ပေါ်ခဲ့ပြီးနောက် ရက်ပိုင်းအကြာတွင် ရာအီစီ၏ မှတ်ချက်စကားများ ထွက်ပေါ်လာခြင်းဖြစ်သည်။

အမေရိကန်၏ CBS News ကမူ အမေရိကန်သည် အီရတ်နှင့် ဆီးရီးယားရှိ အီရန်စစ်မှုထမ်းများနှင့် အဆောက်အအုံများ အပါအဝင် ပစ်မှတ် အများအပြားကို တိုက်ခိုက်ရန် အစီအစဉ်ကို အတည်ပြုခဲ့ကြောင်း ဖေဖော်ဝါရီ ၁ ရက်က သတင်းထုတ်ပြန်ခဲ့သည်။

"ကျနော်တို့ဘက်က ဘယ်စစ်ပွဲကိုမှ စတင်မှာ မဟုတ်ပါဘူး။ ဒါပေမယ့် ကျနော်တို့ကို အနိုင်ကျင့်ချင်တဲ့ ဘယ်သူ့ ကိုမဆို ပြင်းပြင်းထန်ထန် တုန့်ပြန်သွားမှာပါ။ အရင်ကတော့ အမေရိကန်ဟာ ကျနော်တို့နဲ့ ဆွေးနွေးချင်တဲ့ အခါမျိုးမှာ စစ်ရေးရွေးချယ်မှုကို ထည့််သွင်းစဉ်စားမယ်လို့ ပြောခဲ့ပါတယ်။ အခုတော့ သူတို့ဟာ အီရန်နဲ့ ပဋိပက္ခ မဖြစ်ချင်ဘူးလို့ ပြောနေပါတယ်" ဟု ရာအီစီက ပြောကြားခဲ့သည်။

အီရန်စစ်တပ်သည် ဒေသတွင်းနှင့် မည်သည့်နိုင်ငံကိုမှ ခြိမ်းခြောက်ခဲ့ခြင်းမရှိကြောင်း ဒေသတွင်း နိုင်ငံများ၏ လုံခြုံရေးကို စိတ်ချသေချာစေရန်ဖြစ်ကြောင်း ရာအီစီက ပြောသည်။

အမေရိကန်စစ်သား ၃ ဦး သေဆုံးပြီး လူ ၄၀ ကျော် ဒဏ်ရာရခဲ့သည့် ဂျော်ဒန်ရှိ စစ်စခန်း တိုက်ခိုက်ခံရမှုကို လေ့လာခဲ့ပြီးနောက် ထိုတိုက်ခိုက်မှုကို အီရန်က ပြုလုပ်ခြင်းဖြစ်ကြောင်း အမေရိကန်အရာရှိ ၄ ဦးက ရိုက်တာသို့ ပြောကြားခဲ့သည်။

အီရန်၏ တော်လှန်ရေး အစောင့်တပ်ဖွဲ့သည် ဆီးရီးယားရှိ ထိပ်သီးအရာရှိများကို ပြန်လည်ခေါ်ယူနေကြောင်း လည်း သတင်းရင်းမြစ်များတွင် ဖော်ပြခဲ့သည်။

အီရန်၏ အကြံပေးပုဂ္ဂိုလ်များသည် အမေရိကန်စစ်သား ၂၅၀၀ ရှိသည့် အီရတ်နှင့် အမေရိကန်စစ်သား ၉၀၀ ရှိသည့် ဆီးရီးယားနိုင်ငံတို့ရှိ လက်နက်ကိုင်အဖွဲ့များကို ထောက်ပံ့ပေးလျက်ရှိသည်။

Source: ရိုက်တာ

CNI International News

ဆိုးလ်၊ ဖေဖော်ဝါရီ ၃

မြောက်ကိုရီးယားခေါင်းဆောင် ကင်မ်ဂျုံအွန်သည် စစ်ပွဲအတွက် ပြင်ဆင်မှုများကို တိုးမြှင့်ရန် တိုက်တွန်းနေချိန် တွင် မြောက်ကိုရီးယားသည် ဖေဖော်ဝါရီ ၂ ရက်က ပင်လယ်အတွင်းသို့ ခရုဇ်ဒုံးကျည်များ စမ်းသပ်ပစ်ခတ်ခဲ့ ကြောင်း အေပီမှ ဖော်ပြခဲ့သည်။

မြောက်ကိုရီးယား၏ အနောက်ဘက် ပင်လယ်အတွင်းသို့ ဒုံးကျည်များ ပစ်လွှတ်မှုကို အမေရိကန်နှင့် တောင်ကိုရီးယား စစ်တပ်မှ လေ့လာနေကြောင်း တောင်ကိုရီးယား၏ ပူးတွဲစစ်ဦးစီးချုပ်များအဖွဲ့(JCS)က ပြောကြားခဲ့သည်။

တောင်ကိုရီးယားစစ်တပ်သည် ခရုဇ်ဒုံးကျည်များ ပစ်ခတ်မှုကို ထောက်လှမ်း သိရှိခဲ့သော်လည်း ဒုံးကျည်မည်မျှ ပစ်လွှတ်ခဲ့သည်ဆိုခြင်းနှင့် ဒုံးကျည်များပျံသန်းသည့် အကွာအဝေးကိုမူ မသိရသေးကြောင်း JCS က ထုတ်ပြန်ခဲ့ သည်။

ထိုဒုံးကျည် ပစ်လွှတ်မှုများသည် ၂၀၂၄ ခုနှစ်အတွင်း မြောက်ကိုရီးယား၏ စတုတ္ထအကြိမ်မြောက် ခရုဇ်ဒုံးကျည်များ စမ်းသပ်မှုဖြစ်သည်။

တောင်ကိုရီးယားစစ်ပွဲ စစ်ရေးလေ့ကျင့်နေစဉ်

မြောက်ကိုရီးယားခေါင်းဆောင် ကင်မ်က နမ်ဖို (Nampho) သင်္ဘောကျင်းသို့ သွားရောက်ပြီး ရေတပ်၏ စီမံကိန်း များကို စစ်ဆေးခဲ့သည့် ခရီးစဉ်အတွင်း ရေတပ်အင်အားကို မြှင့်တင်ရန် တိုက်တွန်းခဲ့ကြောင်း နိုင်ငံပိုင် KCNA သတင်းအေဂျင်စီက ဖော်ပြခဲ့ပြီးနောက် နာရီပိုင်းအကြာတွင် ခရုဇ်ဒုံးကျည်များ ပစ်ခတ်ခဲ့ခြင်းဖြစ်သည်။

အမေရိကန်၊ တောင်ကိုရီးယားနှင့် ဂျပန်တို့၏ ခြိမ်းခြောက်မှုများ မြင့်တက်နေသဖြင့် ထိုခြိမ်းခြောက်မှုများကို တန်ပြန်ရန် နျူကလီးယား လက်နက်တပ်ဆင်သည့် ရေတပ်ကို ထူထောင်ရန် မကြာသေး မီလများအတွင်း ကင်မ်က ပြောကြားခဲ့သည်။

ကင်မ်သည် မည်သည့်အချိန်က နန်ဖိုသင်္ဘောကျင်းသို့ သွားရောက်ခဲ့သည်ဆိုခြင်းကိုမူ KCNA က အသေးစိတ် ဖော်ပြခဲ့ခြင်းမရှိဘဲ ထိုခရီးစဉ်အတွင်း မြောက်ကိုရီးယား၏ ပင်လယ်ရေကြောင်းဆိုင်ရာ အချုပ်အခြာအာဏာကို ကာကွယ်ရန်နှင့် စစ်ပွဲအတွက် ပြင်ဆင်မှုများကို အရှိန်မြှင့်တင်ရန် ရေတပ်ကို အင်အားတောင့်တင်းအောင် လုပ်ဆောင်ရန် တိုက်တွန်းခဲ့သည်ဟု KCNA က ဖော်ပြခဲ့သည်။

နမ်ဖိုသင်္ဘောကျင်းတွင် မည်သည့် စစ်သင်္ဘော အမျိုးအစားများ တည်ဆောက်နေသည်ဆိုခြင်းကိုလည်း KCNA က ဖော်ပြခဲ့ခြင်း မရှိသော်လည်း ၂၀၂၁ ခုနှစ်က အာဏာရပါတီ ညီလာခံအတွင်း ချမျတ်ခဲ့သည့် ငါးနှစ်သက်တမ်း စစ်ဘက်ဆိုင်ရာ အဆင့်မြှင့်တင်ရေး အစီအစဉ်နှင့် ဆက်နွှယ်မှုရှိကြောင်း ဖော်ပြခဲ့သည်။

ကင်မ်သည် ၂၀၂၁ ခုနှစ် အာဏာရပါတီ ညီလာခံအတွင်း နျူကလီးယား စွမ်းအင်သုံး ရေငုပ်သင်္ဘောများ၊ ရေအောက်မှ ပစ်လွှတ်နိုင်သည့် နျူကလီးယား ဒုံးကျည်များ အပါအဝင် ခေတ်မီ စစ်လက်နက်ပစ္စည်းများ ပိုင်ဆိုင်လိုသည့် ဆန္ဒကို ထုတ်ဖော်ပြောကြားခဲ့သည်။

Source: အေပီ

CNI International News

နယူးဒေလီ၊ ဖေဖော်ဝါရီ ၃

အိန္ဒိယနှင့် မြန်မာနိုင်ငံအကြား လွတ်လပ်စွာ သွားလာခွင့်အစီအစဉ် (FMR)အား ဖျက်သိမ်းလိုသည့် ဗဟိုအစိုးရ၏ ဆုံးဖြတ်ချက်ကို ကူကီးခေါင်းဆောင်များအသင်း Tengnoupal (KCA-T) နှင့် မဏိပူရ (Manipur) ပြည်နယ် နာဂ ကျောင်းသားများအသင်း (ANSAM) တို့က ကန့်ကွက်ခဲ့ကြောင်း Northeast Now မှ ဖော်ပြခဲ့သည်။

အိန္ဒိယ၏ မြောက်ဘက် မဏိပူရပြည်နယ်ရှိ ထိုအဖွဲ့နှစ်ဖွဲ့စလုံးက အိန္ဒိယ-မြန်မာနယ်စပ်ကို ခြံစည်းရိုးကာမည့် အဆိုပြုချက်ကိုလည်း ဆန့်ကျင်ကန့်ကွက်ခဲ့ကြသည်။

ပြည်သူလူထု၏ ပြင်းထန်သည့် ဆန့်ကျင်ကန့်ကွက်မှုများအရ နယ်စပ်ခြံစည်းရိုး တည်ဆောက်မှုသည် စိုးရိမ်ပူပန်မှု များကို မြင့်တက်စေရုံသာမက ကူကီးလူမျိုးစုအတွင်း နက်ရှိုင်းသည့် စိုးရိမ်မှုများကို ဖြစ်စေနိုင်သည်ဟု KCA-T က ထုတ်ပြန်ခဲ့သည်။

ထိုလုပ်ဆောင်မှုများသည် ဒီမိုကရေစီ၏ စံတန်ဖိုးများကို သစ္စာဖောက်ခြင်းဖြစ်ပြီး၊ လူထု၏ စည်းလုံးညီညွတ်သည့် အသံကို လျစ်လျူရှုကာ ဒီမိုကရေစီ စည်းကမ်းများ၏ အနှစ်သာရကို လျော့ပါးစေကြောင်း ထုတ်ပြန်ချက်တွင် ဖော်ပြခဲ့သည်။

အိန္ဒိယနှင့် မြန်မာအကြား နယ်စပ်စည်းရိုး တည်ဆောက်မှုသည် နှစ်နိုင်ငံနယ်စပ်ဒေသတွင် နေထိုင်သည့် ကူကီး လူများများ၏ ယဉ်ကျေးမှုနှင့် ထုံးတမ်းစဉ်လာ အခွင့်အရေးများကို ခြိမ်းခြောက်နေကြောင်းလည်း KCA-T က ပြောကြားခဲ့သည်။

ထိုကဲ့သို့ တစ်ဖက်သတ်ဆန်ပြီး အနိုင်ကျင့်ဗိုလ်ကျသည့် အားထုတ်ကြိုးပမ်းမှုများသည် ပြည်သူလူထုကို မတည်မငြိမ်ဖြစ်စေရန် လှုံ့ဆော်ပေးရာရောက်ပြီး ဒေသတွင်း တည်ငြိမ် အေချမ်းမှုကိုကြီးမားစွာ ခြိမ်းခြောက် နေကြောင်း၊ ဒေသတွင်း ငြိမ်းချမ်းရေးနှင့် သဟဇာတဖြစ်မှုကို ထိန်းသိမ်းရန် ထိုအစီအစဉ်များကို ပြန်လည် စဉ်းစား သုံးသပ်ရန် တိုက်တွန်းကြောင်း KCA-T က ပြောကြားခဲ့သည်။

တစ်ဖက်တွင်လည်း ANSAM ကိုယ်စားလှယ်အဖွဲ့သည် မဏိပူရပြည်နယ်အုပ်ချုပ်ရေးမှူး အနူဆူရိယ အူဝီကီ (Anusuiya Uikey) နှင့်တွေ့ဆုံပြီး FMR ဖျက်သိမ်းရေး ဆုံးဖြတ်ချက်ကို ပြန်လည်ရုပ်သိမ်းရန် အိန္ဒိယပြည်ထဲရေး ဝန်ကြီး အမစ်ရှား (Amit Shah) ထံသို့ အမှာစာ တင်သွင်းခဲ့သည်။

Source: Northeast Now

CNI International News

ဝါရှင်တန်၊ ဖေဖော်ဝါရီ ၃

ပြီးခဲ့သည့်ရက်ပိုင်းက အမေရိကန်စစ်သား ၃ ဦး သေဆုံးခဲ့သည့် တိုက်ခိုက်မှုတစ်ခုအတွက် လက်တုန့်ပြန်သည့် အနေဖြင့် အမေရိကန်က အီရတ်နှင့် ဆီးရီးယားရှိ အီရန်နှင့် ဆက်နွှယ်မှုရှိသည့် ပစ်မှတ်များကို တိုက်ခိုက်ရန် အစီအစဉ်ကို အတည်ပြုခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဖေဖော်ဝါရီ ၂၇ ရက်က ဆီးရီးယားနှင့် ဂျော်ဒန်နိုင်ငံ နယ်စပ်အနီးရှိ Tower 22 စစ်စခန်းတွင် ဒရုန်းတိုက်ခိုက်မှု ကြောင့် အမေရိကန်စစ်သား ၃ ဦး သေဆုံးခဲ့သော ဖြစ်စဉ်ကို တုန့်ပြန်သည့်အနေဖြင့် နှစ်နိုင်ငံအတွင်းရှိ အီရန် စစ်မှုထမ်းများနှင့် အဆောက်အအုံများကို ပစ်မှတ်ထားရန် အိမ်ဖြူတော်က အတည်ပြုခဲ့ခြင်း ဖြစ်သည်ဟု အမေရိကန်၏ CBS News ရုပ်သံလိုင်းက ဖေဖော်ဝါရီ ၁ ရက်တွင် ဖော်ပြခဲ့သည်။

ထိုအစီအစဉ်နှင့် ပတ်သက်ပြီး အသေးစိတ် အချက်အလက်များကို ထပ်မံ ထုတ်ပြန်ခြင်း မရှိပေ။

သို့သော်လည်း အရပ်သားများကို ထိခိုက်နိုင်မည့်အရေးမှ ရှောင်လွှဲနိုင်ရန် မြင်ကွင်းကို ရှင်းရှင်းလင်းလင်း မြင်ချင် သဖြင့် ရာသီဥတု အခြေအနေသည် တိုက်ခိုက်မှုများ၏ အဓိက အကြောင်းရင်းတစ်ခု ဖြစ်လာလိမ့်မည်ဟု အမည် မဖော်လိုသည့် အမေရိကန်အရာရှိတစ်ဦးက ပြောကြားခဲ့သည်။

အမေရိကန်စစ်စခန်းအား တိုက်ခိုက်မှုကို အမေရိကန်နှင့် အစ္စရေးကို ဆန့်ကျင်သည့် အီရတ်နိုင်ငံရှိ Islamic Resistance အမည်ရှိ လက်နက်ကိုင်အဖွဲ့က တာဝန်ခံ ထွက်ဆိုခဲ့သည်။

ထိုတိုက်ခိုက်မှုသည် အစ္စရေး-ဟားမာ့စ်စစ်ပွဲ စတင်ခဲ့ပြီးနောက်ပိုင်း ပထမဆုံးအကြိမ်အဖြစ် အမေရိကန်စစ်သား များ သေဆုံးသည့် တိုက်ခိုက်မှုဖြစ်သည်။

မကြာသေးမီ နှစ်များအတွင်းက အီရန်နှင့် ဆက်နွှယ်မှုရှိသည့် လက်နက်ကိုင် အဖွဲ့များသည် အီရတ်နှင့် ဆီးရီးယား ရှိ အမေရိကန်စစ်စခန်းများကို တိုက်ခိုက်မှုပေါင်း ရာချီပြုလုပ်ခဲ့သော်လည်း ဂါဇာစစ်ပွဲ စတင်ခဲ့ပြီးနောက်ပိုင်း ထိုတိုက်ခိုက်မှုများသည် ပိုမိုပြင်းထန်လာခဲ့သည်။

Islamic Resistance လက်နက်ကိုင်အဖွဲ့သည် ဒေသတွင်း အီရန်က ထောက်ခံပေးထားသည့် တော်လှန်ရေး ဝင်ရိုးတန်းအဖွဲ့ထဲတွင် ပါဝင်သောအဖွဲ့ဖြစ်သည်။

သို့သော် အီရန်သည် ထိုအဖွဲ့ထဲတွင် ပါဝင်သည့် အဖွဲ့များအား ၎င်းတို့ကိုယ်ပိုင် ဆုံးဖြတ်ချက်များဖြင့် လွတ်လပ်စွာ လုပ်ဆောင်ခွင့်ပေးထားပြီး ထိုအဖွဲ့များကို အမိန့်များ ပေးခဲ့ခြင်းမရှိပေ။

အမေရိကန်စစ်စခန်း တိုက်ခိုက်ခံရပြီး ၅ ရက်ကြာပြီးနောက် အမေရိကန်သမ္မတ ဂျိုဘိုင်ဒန် (Joe Biden) က တုန့်ပြန်သွားမည်ဟု ထပ်မံ ကတိပြုခဲ့သည်။

တုန့်ပြန်တိုက်ခိုက်မှုများသည် လာမည့်ရက်ပိုင်းအတွင်း ပေါ်ပေါက်လာမည်ဖြစ်ပြီး ပစ်မှတ် အများအပြားကို တိုက်ခိုက်သွားမည်ဟု အမေရိကန်အရာရှိများက ပြောကြားခဲ့သည်။

အစ္စရေး-ဟားမာ့စ် စစ်ပွဲဖြစ်ပွားနေသဖြင့် အီရန်နှင့် အမေရိကန်တို့က ထိပ်တိုက်တွေ့လိုသည့် ဆန္ဒမရှိကြောင်း ပြောကြားထားသည်။

အစ္စရေးသည် လက်ဘနွန်နိုင်ငံရှိ ဟစ်ဇ်ဘိုလာအဖွဲ့ကို တိုက်ခိုက်နေခြင်း၊ ယီမင်နိုင်ငံရှိ ဟူရ်သီအဖွဲ့က ပင်လယ်နီ အတွင်းရှိ ကုန်တင်သင်္ဘောများနှင့် အမေရိကန်၊ ဗြိတိန်စစ်သင်္ဘောများကို တိုက်ခိုက်နေခြင်းတို့ကြောင့် စစ်ပွဲသည် ဒေသတွင်း ပျံ့နှံ့သွားမည့်အရေးအာား စိုးရိမ်မှုများ မြင့်တက်နေသည်။

အီရန်၏ အစ္စလာမ်မစ် တော်လှန်ရေး အစောင့်တပ်ဖွဲ့ (IRGC) ၏ တပ်မှူး ဟော့စိန် ဆလာမီ (Hossein Salami) က အီရန်အနေနှင့် အမေရိကန်၏ မည်သည့် တိုက်ခိုက်မှုမျိုးကိုမဆို တုန့်ပြန်သွားမည်ဟု သတိပေးခဲ့သည်။

Source: အယ်လ်ဂျာဇီးယား

CNI International News

တိုင်ပေ၊ ဖေဖော်ဝါရီ ၂

ထိုင်ဝမ်လွှတ်တော်သည် ထိုင်ဝမ်၏ အကြီးဆုံး အတိုက်အခံပါတီဖြစ်သည့် ကူမင်တန်(KMT)ပါတီမှ အတိုက်အခံ တစ်ဦးဖြစ်သော ဟန်ကော်ယု (Han Kuo-yu)ကို လွှတ်တော်ဥက္ကဋ္ဌအဖြစ် ဖေဖော်ဝါရီ ၁ ရက်တွင် ခန့်အပ်ခဲ့ သည်ဟု ရိုက်တာမှ ဖော်ပြခဲ့သည်။ 

ဟန်သည် တရုတ်လိုလားသူ တစ်ဦးဖြစ်သည်ဟု အာဏာရ DPP ပါတီက ရှုမြင်ထားပြီး ဟန် လွှတ်တော်ဥက္ကဋ္ဌ ဖြစ်လာချိန်တွင် ထိုင်ဝမ်သို့ လာရောက်မည့် ပြည်ပမှ လွှတ်တော်အမတ်များကို လက်ခံတွေ့ဆုံရမည်ဖြစ်သည်။

DPP ပါတီသည် ပြီးခဲ့သည့်လက ပြုလုပ်ခဲ့သည့် သမ္မတရွေးကောက်ပွဲတွင် အနိုင်ရခဲ့သော်လည်း လွှတ်တော် ရွေးကောက်ပွဲ၌ အမတ်အများစုနေရာကို ဆုံးရှုံးခဲ့သည်။ 

တရုတ်ကမူ DPP ပါတီကို ခွဲထွက်ရေးဝါဒီများအဖြစ် ယူဆထားပြီး ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားသည်။ 

ကူမင်တန်ခေါင်းဆောင် ချန်ကေရှိန် ဓာတ်ပုံကို တွေ့ရစဉ်

ထိုင်ဝမ်အစိုးရ၏ သမ္မတဆိုင်ရာ ဖွဲ့စည်းပုံစနစ်အရ သမ္မတသည် ဝန်ကြီးချုပ်ကို ခန့်အပ်နိုင်သော်လည်း အာဏာရ DPP ပါတီသည် လွှတ်တော်တွင် အမတ်နေရာ အများစုအား ရရှိခဲ့ခြင်းမရှိသဖြင့် ဥပဒေပြုရေး လုပ်ငန်းစဉ်များ၌ အတိုက်အခံများနှင့် လက်တွဲလုပ်ဆောင်ရမည်ဖြစ်သည်။

ပြီးခဲ့သည့်လက ကျင်းပခဲ့သည့် လွှတ်တော်ရွေးကောက်ပွဲတွင် ကူမင်တန်ပါတီသည် DPP ပါတီထက် လွှတ်တော် နေရာ ၁ နေရာ အသာစီးရခဲ့သော်လည်း သေးငယ်သည့် TPP ပါတီက လွှတ်တော်နေရာ ၈ နေရာကို ရရှိခဲ့သည်။

ထို့နောက် ကူမင်တန်ပါတီသည်လည်း နေရာ ၁၁၃ နေရာရှိသည့် အောက်လွှတ်တော်တွင် အမတ်နေရာ အများစု ကို ရရှိခဲ့ခြင်း မရှိပေ။

ယခု လွှတ်တော်ဥက္ကဋ္ဌအဖြစ် ခန့်အပ်ခံခဲ့ရသည့် ဟန်သည် ၂၀၂၀ ပြည့်နှစ် သမ္မတရွေးကောက်ပွဲတွင် DPP ပါတီ၏ ကိုယ်စားလှယ်လောင်းဖြစ်သော လက်ရှိသမ္မတ ဆိုင်အင်ဝမ် (Tsai Ing-wen)ကို မဲအပြတ်အသတ်ဖြင့် ရှုံးနိမ့်ခဲ့သူ ဖြစ်သော်လည်း လက်ရှိလွှတ်တော်ဥက္ကဋ္ဌ ရွေးကောက်ပွဲတွင် အနိုင်ရရှိခဲ့သည်။

"ထိုင်ဝမ်လူထု အများစုဟာ အုပ်ချုပ်ရေး၊ စည်းလုံးညီညွတ်မှု၊ ပူးပေါင်းဆောင်ရွက်မှုတွေနဲ့ ပတ်သက်ပြီး ထိုင်ဝမ် လွှတ်တော်ကို ကောင်းမွန်စွာ မျှော်လင့်ထားကြမယ်လို့ ကျနော်ယုံကြည်ပါတယ်"ဟု ဟန်က သတင်းထောက် များကို ပြောကြားခဲ့သည်။ 

ဟန်ကော်ယုနဲ့ ကူမင်တန်ပါတီကိုတွေ့ရစဉ်

ရွေးကောက်ပွဲအကြို မဲဆွယ်စည်းရုံးချိန် ကာလများအတွင်း DPP ၏ ရုပ်သံကြေညာများတွင် ၂၀၁၉ ခုနှစ်က ဟောင်ကောင်ရှိ တရုတ်အစိုးရ၏ ဆက်ဆံရေးရုံးသို့ သွားရောက်ခဲ့သည့် ဟန်၏ ခရီးစဉ်အကြောင်းကို အလေး ထားဖော်ပြခဲ့သည်။

ထို့နောက် ဟန်သည် တရုတ်နှင့် ဆက်နွှယ်သည့် နေရာများကို သွားရောက်ရန် နှစ်သက်သူဖြစ်ကြောင်း ပြောကြား ခဲ့သည်။ 

ထို့ပြင် ဟန်သည် ၂၀၁၉ ခုနှစ်က တရုတ်ပြည်မကြီးသို့လည်း သွားရောက်ခဲ့ပြီး တရုတ်ထိပ်သီး အရာရှိများနှင့် တွေ့ဆုံခဲ့ကာ ထိုင်ဝမ်နှင့် တရုတ်သည် 'တရုတ်တစ်နိုင်ငံတည်း' ဆိုသည့် ခေါင်းစဉ်အောက်တွင်ရှိကြောင်း ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ ဖေဖော်ဝါရီ ၂

အမေရိကန်စစ်တပ်သည် ယီမင်နိုင်ငံအတွင်းရှိ အီရန်က ကျောထောက်နောက်ခံ ပေးထားသည့် ဟူရ်သီသူပုန်များ ပိုင်ဆိုင်သော ဒရုန်း ၁၀ စင်းနှင် မြေအောက်ထိန်းချုပ်ရေးစခန်းကို ပစ်မှတ်ထား တိုက်ခိုက်ခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ဖေဖော်ဝါရီ ၁ ရက်က အမေရိကန်တပ်ဖွဲ့များ သည် ဒေသတွင်း ကုန်တင်သင်္ဘောများနှင့် အမေရိကန် စစ်သင်္ဘော များကို ခြိမ်းခြောက်နေသည့် ဟူရ်သီတို့၏ ဒရုန်း ၁၀ စင်းနှင့် မြေအောက်ထိန်းချုပ်ရေးစခန်းအား တိုက်ခိုက်ခဲ့ ကြောင်း အမေရိကန်ဗဟိုစစ်ဌာနချုပ် (CENTCOM) ၏ ထုတ်ပြန်ခဲ့သည်။

ကုန်တင်သင်္ဘောများနှင့် အမေရိကန် ရေတပ်သင်္ဘောများအတွက် ဘေးကင်းလုံခြုံစေရန်၊ နိုင်ငံတကာ ရေပိုင်နက် တွင် ဘေးကင်းမှုရှိစေရန်နှင့် လွတ်လပ်စွာ ရေကြောင်းသွားလာခွင့်တို့ကို ကာကွယ်ရန် ယခုကဲ့သို့ လုပ်ဆောင်ခဲ့ ခြင်းဖြစ်ကြောင်း ထုတ်ပြန်ချက်တွင် ဖော်ပြခဲ့သည်။

ဟူရ်သီအဖွဲ့ကမူ ယီမင်နိုင်ငံကို ရန်လိုနေသည့် အမေရိကန်နှင့် ဗြိတိန်စစ်သင်္ဘောများ အားလုံးသည် ပစ်မှတ်များ ဖြစ်ကြောင်း ဇန်နဝါရီ ၃၁ ရက်က ပြောကြားခဲ့သဖြင့် ကမ္ဘာ့ကုန်သွယ်ရေးလမ်းကြောင်း ပြတ်တောက်နိုင်ခြေရှိ သည့် အလားအလာနှင့် ဒေသတွင်း တင်းမာမှုများ မြင့်တက်လာနိုင်သော အလားအလာတို့အပေါ် စိုးရိမ်မှုများ မြင့်တက်စေခဲ့သည်။

အမေရိကန်စစ်သင်္ဘောကို တွေ့ရစဉ်

အစောပိုင်းကလည်း အမေရိကန်ဖျက်သင်္ဘော USS Carney သည် ဟူရ်သီတို့ ပစ်ခတ်ခဲ့သည့်  သင်္ဘောဖျက် ပဲ့ထိန်းဒုံးကျည်တစ်စင်း၊ အီရန်လုပ် ဒရုန်း ၃ စင်းကို ပစ်ချခဲ့ကြောင်း CENTCOM က ထုတ်ပြန်ခဲ့သည်။

သို့သော်လည်း ထိုဒရုန်းများသည် တိုက်ခိုက်ရေးဒရုန်းများ သို့မဟုတ် ကင်းထောက်ဒရုန်းများ ဖြစ်သည်ဆိုခြင်းကိုမူ အသေးစိတ် ပြောကြားခဲ့ခြင်းမရှိပေ။

အမေရိကန်ရေတပ်၏ ဖျက်သင်္ဘော Gravely က ဒုံးကျည်များဖြင့် ပစ်ခတ်ခဲ့ပြီးနောက် နာရီပိုင်းအကြာတွင် ဟူရ်သီအဖွဲ့၏ ရေတပ်သည် အေဒင်ပင်လယ်ကွေ့ (Gulf of Aden) ရှိ အမေရိကန်ကုန်တင်သင်္ဘော တစ်စင်းကို တိုက်ခိုက်ခဲ့ကြောင်း ဇန်နဝါရီ ၃၁ ရက်က ပြောကြားခဲ့သည်။ 

ထိုဖြစ်စဉ်များနှင့်ပတ်သက်ပြီး အမေရိကန်နှင့်အီရန်သည် တိုက်ရိုက် ထိပ်တိုက်တွေ့မည့် အရေးကို ရှောင်ကြဉ် နေသော်လည်း အမေရိကန်သည် အရှေ့အလယ်ပိုင်းဒေသတွင်  ဟူရ်သီအဖွဲ့အပြင် အခြား အီရန်နှင့် ဆက်နွှယ် သည့် လက်နက်ကိုင်အဖွဲ့များကို တိုက်ခိုက်လျက်ရှိသည်။

ဇန်နဝါရီ ၃၁ ရက်ကလည်း အမေရိကန်လေယာဉ်များကို ခြိမ်းခြောက်နိုင်သည့် ဟူရ်သီတို့၏ မြေပြင်မှဝေဟင်ပစ် ဒုံးကျည် တစ်စင်းကို တိုက်ခိုက်ဖျက်ဆီးနိုင်ခဲ့ကြောင်း CENTCOM က ထုတ်ပြန်ခဲ့သည်။

Source: အယ်လ်ဂျာဇီးယား