CNI International News

နယူးဒေလီ၊ ဇွန်လ ၁၉

တရုတ်နှင့် အိန္ဒိယအကြား ပထဝီနိုင်ငံရေးကစားပွဲတွင် တိဘက်ဒေသနှင့် မော်လ်ဒိုက်နိုင်ငံသည် အဓိကကျသည့် အခန်းကဏ္ဍမှ ပါဝင်နေသည်ဟု India Today မှ ဖော်ပြခဲ့သည်။

အဘယ်ကြောင့်ဆိုသော် တရုတ်သည် မကြာသေးမီက မော်လ်ဒိုက်၏ ရေပြင်များမှအစ တိဘက်၏ ရေခဲမြစ်များ အထိ ပိုင်ဆိုင်ကြောင်း ကြေညာထားသည်။

ထို့နောက် အသစ်တက်လာသည့် မော်လ်ဒိုက်အစိုးရသည် တရုတ်လိုလားမှုနှင့်အတူ တိဘက်ဒေသကမူ အိန္ဒိယကို လိုလားလျက်ရှိသည်။

မကြာသေးမီ လများအတွင်းက အသစ်တက်လာသည့် မော်လ်ဒိုက် အစိုးရအဖွဲ့သည် မော်လ်ဒိုက်ကျွန်းပေါ်ရှိ အိန္ဒိယစစ်သားများကို ရုပ်သိမ်းရန် တောင်းဆိုခဲ့ပြီး တရုတ်ကိုလိုလားသော သဘောထားကို ပြသခဲ့သည်။

အလားတူပင် အိန္ဒိယနိုင်ငံကလည်း တိဘက်လူမျိုးများကို ထောက်ခံပြီး တိဘက်ဘုန်းတော်ကြီး ဒလိုင်းလားမားကို လက်ခံထားရှိကာ  မော်လ်ဒိုက်တွင် တပ်စွဲထားသည့် အိန္ဒိယစစ်သားများအား ပြန်လည်ရုပ်သိမ်းခဲ့သည်။

ထို့နောက် တရုတ်၏ လှုပ်ရှားမှုများကို တန်ပြန်သည့် အစီအစဉ်များ လုပ်ဆောင်ခဲ့သည်။

မိုဒီနဲ့ မော်လ်ဒိုက်ခေါင်းဆောင်ကိုတွေ့ရစဉ်

တရုတ်သည် မော်လ်ဒိုက်တွင် ဩဇာအာဏာ လွှမ်းမိုးစေရန် လုပ်ဆောင်နိုင်ရုံမျှမက တရုတ်-အိန္ဒိယ နယ်စပ် တွင်လည်း အိန္ဒိယ၏ အာရုနာချယ် ပရာဒေ့ရှ်(Arunachal Pradesh) ပြည်နယ်ကို ပိုင်ဆိုင်ကြောင်း ကြေညာ ခဲ့သည်။

ယခုနှစ် အစောပိုင်းကလည်း တရုတ်သည် အိန္ဒိယ၏ အရှေ့မြောက်ပိုင်း ဟိမဝန္တာ (Himalayan) ဒေသ၏ ပြည်နယ်ဖြစ်သည့် အာရုနာချယ် ပရာဒေ့ရှ် (Arunachal Pradesh) ပြည်နယ်အတွင်းရှိ နေရာပေါင်း ၃၀ ခန့်ကို အမည်များ ပြောင်းလဲမှည့်ခေါ်ခဲ့သည်။

ထို့အတူ အိန္ဒိယကလည်း တရုတ်၏ လုပ်ဆောင်မှုကို တန်ပြန်သည့် အနေဖြင့် တိဘက်ဒေသရှိ နေရာဒေသပေါင်း ၃၀ ကျော်အား အမည်များ ပြောင်းလဲသတ်မှတ်ရန် စီစဉ်နေသည်ဟု အိန္ဒိယအစိုးရ အရာရှိများက ယခုလအတွင်း ပြောကြားခဲ့သည်။

တရုတ်က အုပ်ချုပ်ထားသည့် တိဘက်ဒေသရှိ နေရာများကို အမည်ပြောင်းလဲ သတ်မှတ်မည့် စာရင်းအား အိန္ဒိယစစ်တပ်က သုတေသန ပြုလုပ်ခဲ့ခြင်းဖြစ်ပြီး မကြာမီအချိန်အတွင်း ထုတ်ပြန်ရန် စီစဉ်ထားသဖြင့် တရုတ်လက်အောက်ခံ မော်လ်ဒိုက်ကျွန်းနိုင်ငံနှင့် အိန္ဒိယလိုလားသည့် တိဘက်ဒေသသည် နှစ်နိုင်ငံအကြား အဓိကကျသည့် အခန်းကဏ္ဍမှ ပါဝင်လာလိမ့်မည်ဖြစ်ကြောင်း ကျွမ်းကျင်သူများက သုံးသပ်ခဲ့ကြသည်။

Source: India Today

CNI International News

ဘေကျင်း၊ ဇွန်လ ၁၈

တရုတ်က ၎င်း၏ပိုင်ဆိုင်ကြောင်း ထွက်ဆိုထားသည့် ရေပြင်များအတွင်း ဖြတ်သန်းဝင်ရောက်လာသည်ဟု သံသယရှိသော ပြည်ပနိုင်ငံသားများကို ရက်ပေါင်း ၆၀ အထိ ဖမ်းဆီးထိန်းသိမ်းမည့် တရုတ်ကမ်းခြေစောင့် တပ်ဖွဲ့၏ စည်းမျဉ်းအသစ်သည် ဇွန်လ ၁၅ ရက်တွင် စတင်အကျုံးဝင် သက်ရောက်ခဲ့သည်ဟု Japan Times မှ ဖော်ပြခဲ့သည်။

ပြီးခဲ့သည့်လက ကြေညာခဲ့သည့် ထိုစည်းမျဉ်းစည်းကမ်း အသစ်သည် တရုတ်၏ ၂၀၂၁ ခုနှစ် ကမ်းခြေစောင့်တပ်ဖွဲ့ ဥပဒေအတွင်း ထပ်မံထည့်သွင်းခဲ့ခြင်းဖြစ်ပြီး ပိုင်ဆိုင်မှု အငြင်းပွားနေသော တောင်တရုတ်ပင်လယ်နှင့် အရှေ့တရုတ်ပင်လယ်များအတွင်း တင်းမာမှုများ မြင့်တက်လာမည့် အခြေအနေကို စိုးရိမ်မှုများ မြင့်တက်စေခဲ့ သည်။

တရုတ်ကမူ ၎င်းတို့၏ တရားစီရင် ပိုင်ခွင့်ရှိသည့် ရေပြင်များအတွင်း တရားမဝင် လှုပ်ရှားမှုများရှိနေသဖြင့် ထိုလှုပ်ရှားမှုများကို နှိမ်နင်းရန် စည်းမျဉ်းအသစ်များ ထုတ်ပြန်ခဲ့ခြင်း ဖြစ်သည်ဟု ပြောကြားခဲ့သည်။

တရုတ်၏ ရေပြင်များအတွင်းတွင် တရုတ်၏ လူဝင်မှုကြီးကြပ်ရေးဆိုင်ရာ စည်းကမ်းများကို ချိုးဖောက်ခြင်း သို့မဟုတ် တရုတ်၏ အမျိုးသားလုံခြုံရေးကို လျော့ပါးစေခြင်း၊ သို့မဟုတ် အများပြည်သူ တည်ငြိမ်ရေးကို လျော့ပါးစေခြင်းဖြင့် သံသယရှိသော ပြည်ပနိုင်ငံသားများကို ရက်ပေါင်း ၃၀ မှ ၆၀ အထိ ဖမ်းဆီးထိန်းသိမ်း နိုင်ကြောင်း စည်းကမ်းအသစ်များတွင် ဖော်ပြခဲ့သည်။

၂၀၂၁ ခုနှစ်က ထုတ်ပြန်ခဲ့သည့် ကမ်းခြေစောင့်တပ်ဖွဲ့၏ ဥပဒေတွင် ကမ်းခြေစောင့်တပ်ဖွဲ့သည် တရုတ်က ပိုင်ဆိုင်ကြောင်း ကြေညာထားသော ရေပြင်များအတွင်း တရားမဝင် ဝင်ရောက်သည်ဟု ယူဆရသည့် ပြည်ပနိုင်ငံများ၏ သင်္ဘောများကို လက်နက်များ အသုံးပြုခွင့် ပေးထားသည်။

တရုတ်ကမ်းခြေစောင့်တပ်ဖွဲ့ကို တွေ့ရစဉ်

တရုတ်သည် နှစ်စဉ်နှစ်တိုင်း ဒေါ်လာထရီလျံချီ တန်ကြေးရှိသည့် ပင်လယ်ကူးသင်္ဘောများ ဖြတ်သန်းရာ လမ်းကြောင်းများရှိ သယံဇာတပေါကြွယ်ဝသည့် တောင်တရုတ်ပင်လယ်၏ နယ်နိမိတ် ၉၀ ရာခိုင်နှုန်းခန့်ကို ပိုင်ဆိုင်ကြောင်း ကြေညာထားသည်။

ထို့ကြောင့် တရုတ်သည် တောင်တရုတ်ပင်လယ်တွင် ထိုင်ဝမ်၊ ဗီယက်နမ်၊ မလေးရှား၊ ဘရူနိုင်း၊ အင်ဒိုနီးရှား၊ ဖိလစ်ပိုင်နိုင်ငံတို့နှင့် နယ်နိမိတ်ပိုင်ဆိုင်မှုအပေါ် အငြင်းပွားမှုများ ဖြစ်ပွားလျက်ရှိသည်။

မကြာသေးမီ လများအတွင်းက တရုတ်နှင့် ဖိလစ်ပိုင်သည် တောင်တရုတ်ပင်လယ်၏ မဟာဗျူဟာကျသည့် ရေပြင်နယ်နိမိတ်တစ်ခုတွင် ထိပ်တိုက်တွေ့မှုဖြစ်ပွားခဲ့ပြီး တရုတ်ကမ်းခြေစောင့်သင်္ဘောများက ဖိလစ်ပိုင် သင်္ဘောများကို မီးသတ်ပိုက်ဖြင့် ထိုးခြင်း၊ ဖိလစ်ပိုင်ထောက်ပို့ သင်္ဘောများ၏ လမ်းကြောင်းများကို ပိတ်ဆို့ခြင်းတို့ ပြုလုပ်ခဲ့သည်။

တရုတ်၏ စည်းမျဉ်းအသစ်များ ထုတ်ပြန်ခဲ့သည့်တိုင် ဖိလစ်ပိုင် ငါးဖမ်းသမားများ အနေဖြင့် မိမိတို့၏ အထူး စီးပွားရေး ဇုန်အတွင်းတွင် ငါးဖမ်းမှုများကို ဆက်လက် လုပ်ဆောင်ရန် ဖိလစ်ပိုင်စစ်တပ်က တိုက်တွန်းခဲ့သည်။

Source: Japan Times

CNI International News

ဘန်ကောက်၊ ဇွန်လ ၁၈

ထိုင်းနိုင်ငံ၏ ဖြူးထိုင်းပါတီ ဦးဆောင်သည့် အစိုးရအဖွဲ့သည် လာမည့် အောက်တိုဘာလတွင် ရုရှားနိုင်ငံ၊ ကာဇန် (Kazan) မြို့၌ ကျင်းပမည့် BRICS ညီလာခံတွင် အဖွဲ့ဝင်နိုင်ငံအဖြစ် ဝင်ခွင့်ရလိမ့်မည်ဟု ယုံကြည်ထားကြောင်း Thai PBS World မှ ဖော်ပြခဲ့သည်။

ထိုင်းနိုင်ငံခြားရေးဝန်ကြီး မာရစ် ဆန်ဂီယမ်ပွန်ဆာ (Maris Sangiampongsa)သည် ဇွန်လ ၁၁ ရက်က ရုရှားနိုင်ငံ၊ နစ်ဇနီ နော့ဗ်ဂိုရော့ (Nizhny Novgorod) မြို့တွင် ပြုလုပ်ခဲ့သည့် BRICS ဝန်ကြီးအဆင့် ကောင်စီအစည်းအဝေး ကို ဧည့်သည်တော်အဖြစ် တက်ရောက်ခဲ့သည်။

ထိုအစည်းအဝေးတွင် BRICS အဖွဲ့သည် အဖွဲ့ဝင်နိုင်ငံ အသစ်များအတွက် ရည်ညွှန်းချက်များနှင့် ဖြစ်နိုင်ခြေရှိ သည့် အချက်အလက်များကို မူကြမ်းရေးဆွဲနေကြောင်း တွေ့ရှိခဲ့ရသည်ဟု မာရစ်က ပြောသည်။

ထိုင်းနိုင်ငံသည် BIRCS အဖွဲ့ဝင်သစ်အဖြစ် လျှောက်ထားခဲ့ပြီးဖြစ်သော်လည်း မကြာမီ အချိန်အတွင်း အဖွဲ့ဝင်သစ် အဖြစ် သတ်မှတ်ခံရနိုင်ခြေ ရှိ/မရှိကို သေချာစွာ မသိရးသေးပေ။

လောလောဆယ်တွင် BRICS အဖွဲ့ဝင်ဖြစ်ရန် စောင့်ဆိုင်းနေသည့် နိုင်ငံပေါင်း ၃၀ ထက်မနည်းရှိပြီး ထိုင်းသည် အရှေ့တောင်အာရှတွင် BRICS အဖွဲ့ဝင်အဖြစ် လျှောက်ထားသည့် ပထမဆုံးနိုင်ငံဖြစ်သည်။

BRICS အစည်းအဝေး တက်ရောက်ခဲ့သော နိုင်ငံခြားရေးဝန်ကြီးများကို တွေ့ရစဉ်

အင်ဒိုနီးရှားနိုင်ငံကလည်း BRICS အဖွဲ့ကို ဝင်ရောက်ရန် ဆန္ဒရှိကြောင်း အစောပိုင်းက ထုတ်ဖော်ပြောဆိုခဲ့ သော်လည်း နောက်ပိုင်းတွင် သဘောထားကို ပြောင်းလဲပြီး အဖွဲ့ဝင်အဖြစ် လျှောက်ထားခဲ့ခြင်းမရှိပေ။

နစ်ဇနီ နော့ဗ်ဂိုရော့မြို့တွင် ပြုလုပ်ခဲ့သည့် အစည်းအဝေး၌ BRICS အဖွဲ့သည် ပထဝီနိုင်ငံရေး စိန်ခေါ်မှုများမှ ထွက်ပေါ်လာသော ရလဒ်များကို ပြုပြင်ပြောင်းလဲမှုများ ပြုလုပ်ရန် လုပ်ဆောင်နေသည့် အဓိက မောင်းနှင်အား တစ်ခုဖြစ်ကြောင်း မာရစ်က ပြောသည်။

ပြောင်းလဲတိုးတက်လာသည့် ကမ္ဘာ့အခင်းအကျင်းကို ခိုင်မာသော နိုင်ငံပေါင်းစုံ ပါဝင်ရေးမူဝါဒ၏ ကတိကဝတ် များက ကျောထောက်နောက်ခံ ပြုထားသည့် အခြေအနေကို ထိုင်းက ထောက်ခံကြောင်းလည်း ထိုင်းနိုင်ငံခြားရေး ဝန်ကြီးက ဆိုသည်။

BRICS အဖွဲ့ဝင် ဖြစ်လာခဲ့မည်ဆိုပါက ထိုင်းသည် နယ်ပယ်ဒေသများအနှံ့ ချိတ်ဆက်မှုများနှင့် ပူးပါင်းဆောင်ရွက်မှု များအတွက် ပေါင်းကူးတံတားများ တည်ဆောက် ပေးနိုင်ကြောင်းလည်း မာရစ်က ပြောကြားခဲ့သည်။

Source: ရိုက်တာ

CNI International News

တိုင်ပေ၊ ဇွန်လ ၁၈

ထိုင်ဝမ်သည် တရုတ်နှင့် စစ်ပွဲဖြစ်ပွားရန် ကြိုးပမ်းနေခြင်း မရှိကြောင်း ထိုင်ဝမ်ကာကွယ်ရေးဝန်ကြီး ဝယ်လင်တန် ကူး (Wellington Koo)က ဇွန်လ ၁၇ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

မိမိတို့ မူဝါဒသည် ထိုင်ဝမ်ကို တရုတ်က အလွယ်တကူ သိမ်းပိုက်နိုင်ခြင်း မရှိစေရန် ကာကွယ်ရေး စွမ်းဆောင်ရည် များကို ထူထောင်နေခြင်းဖြစ်သည်ဟု ၎င်းက ပြောသည်။

တရုတ်က ထိုင်ဝမ်ကို ၎င်း၏ နယ်မြေအဖြစ် ကြေညာထားပြီး ထိုကြေညာချက်ကို လက်ခံစေရန် တရုတ်အစိုးရက ထိုင်ဝမ်အပေါ် စစ်ရေးနှင့် နိုင်ငံရေးဖိအားများ တိုးမြှင့်နေသည်။

ထိုင်ဝမ်ကမူ တရုတ်၏ ကြေညာချက်ကို ငြင်းပယ်ခဲ့သည်။

ထိုင်ဝမ်သမ္မတ လိုင်ချင်တေ(Lai Ching-te) ကလည်း ထိုင်ဝမ်ကို သိမ်းပိုက်ရေးနှင့် ချေမှုန်းရေးသည် တရုတ်၏ အဓိက အကြောင်းရင်းတစ်ခုဖြစ်ကြောင်း၊ ပထမဆုံးနှင့် နောက်ဆုံးစစ်ပွဲဆိုသည့် သီအိုရီအရ အရှုံးပေးလိုစိတ် မွေးမြူခြင်းမပြုရန် စစ်အကယ်ဒမီတစ်ခုသို့ သွားရောက်သည့် ခရီးစဉ်အတွင်း ဗိုလ်လောင်းများကို ပြောကြားခဲ့ သည်။

ထိုင်ဝမ်ကာကွယ်ရေးဝန်ကြီး ဝယ်လင်တန်ကူးကို တွေ့ရစဉ်

အမေရိကန်၏ အကူအညီမပါဘဲ ထိုင်ဝမ်သည် တရုတ်၏ တိုက်ခိုက်မှုကို မည်မျှကြာကြာ တောင့်ခံထားနိုင်မည် နည်းဟု လွှတ်တော်တွင် သတင်းထောက်များက မေးမြန်းခဲ့ချိန်တွင် ကူးက ထိုအချက်သည် မိမိတို့၏ မဟာဗျူဟာ ထဲ၌ အဓိကအချက်မဟုတ်ကြောင်း ဖြေကြားခဲ့သည်။

"ဘယ်လောက်ကြာကြာ တောင့်ခံထားနိုင်မလဲဆိုတာက ပြဿနာမဟုတ်ပါဘူး။ ကျနော်တို့ရဲ့ မဟာဗျူဟာ၊ ကျနော်တို့ရဲ့ အနုမာန အယူအဆဟာ နယ်ပယ်စုံက ကျနော်တို့ရဲ့ အခြိမ်းအခြောက် အဟန့်အတားတွေကို ထူထောင်ဖို့အတွက် အင်အားချင်းမညီမျှဘဲ တိုက်ခိုက်နိုင်တဲ့ စစ်ဆင်ရေးပုံစံတစ်ခု ဖြစ်ပါတယ်။ ပြီးတော့ အဲဒီလုပ်ငန်းစဉ်ဟာ တရုတ်ရဲ့ ကျူးကျော်မှု စွမ်းဆောင်ရည်ကို အားနည်းစေနိုင်ပါလိမ့်မယ်" ဟု ကူးက ပြောကြားခဲ့သည်။

လက်ရှိ ဆောင်ရွက်နေသည့် စစ်တပ်ပြုပြင်ပြောင်းလဲမှုများ၏ တစ်စိတ်တစ်ပိုင်း အနေဖြင့် ထိုင်ဝမ်စစ်အင်အား သည် တရုတ်စစ်အင်အားထက် သိသိသာသာ နည်းပါးနေ၍ ထိပ်တိုက်ရင်ဆိုင်ခြင်းထက် ပြောင်းလွယ်ပြင်လွယ် ရှိပြီး အလွယ်တကူ နေရာရွှေ့ပြောင်းနိုင်သော စစ်ဆင်ရေးပုံစံကို လုပ်ဆောင်ရန် အာရုံစိုက်ထားသည်ဟု ကူးက ပြောသည်။

ထိုင်ဝမ်နဲ့တရုတ် အလံကိုတွေ့ရစဉ်

ထိုင်ဝမ်သမ္မတ လိုင်ချင်တေသည် ထိုင်ဝမ်၏ လွတ်လပ်ရေးအတွက် အားတက်သရော လုပ်ဆောင်နေသဖြင့် တရုတ်က ၎င်းအား အန္တရာယ်များသည့် ခွဲထွက်ဝါဒီ တစ်ဦးအဖြစ် သတ်မှတ်ထားသည်။

လိုင်ချင်တေက ထိုင်ဝမ်၏ အနာဂတ်ကို ထိုင်ဝမ်ပြည်သူများကသာ ဆုံးဖြတ်ပိုင်ခွင့်ရှိကြောင်း ပြောကြားခဲ့ပြီး တရုတ်နှင့် ဆွေးနွေးမှုများ ပြုလုပ်ရန် ကမ်းလှမ်းခဲ့သော်လည်း ငြင်းပယ်ခံခဲ့ရသည်။

တရုတ်သည် ပြဿနာကို ဖန်တီးသူဖြစ်ပြီး ထိုင်ဝမ်ရေလက်ကြားတွင် တင်းမာမှုများ မြင့်တက်စေရန် လှုံ့ဆော်နေကြောင်း ကူးက ပြောကြားခဲ့သည်။

"ကျနော်တို့က စစ်ဖြစ်ဖို့ ဘယ်တုန်းကမှ မကြိုးစားခဲ့ပါဘူး။ ကျနော်တို့ရဲ့ အလုံးစုံ မဟာဗျူဟာက ကာကွယ်မှု စစ်ဆင်ရေးတွေ ဖြစ်တယ်ဆိုတာ ရှင်းနေပါတယ်" ဟု ကူးက ပြောကြားခဲ့သည်။

Source: ရိုက်တာ

CNI International News

ဘေကျင်း၊ ဇွန်လ ၁၇

တရုတ်အစိုးရသည် လုံခြုံရေးကဏ္ဍကို အာရုံစိုက်လုပ်ဆောင်မှု၊ ပြည်ပသူလျှိုများကို ပစ်မှတ်ထား နှိမ်နင်းနေမှု၊ အစားအစာနှင့် စွမ်းအင်များကို စုဆောင်းနေမှုတို့သည် ထိုင်ဝမ်ကို ချက်ချင်းတိုက်ခိုက်တော့မည့် အရိပ်လက္ခဏာ များဖြစ်နိုင်သည်ဟု မျက်မြင်သက်သေများက ဇွန်လ ၁၃ ရက်တွင် အမေရိကန်လွှတ်တော်ဆိုင်ရာကော်မရှင်တွင် ထွက်ဆိုခဲ့သည်ဟု South China Morning Post မှ ဖော်ပြခဲ့သည်။

“ပဋိပက္ခအတွက် တရုတ်ရဲ့ ပြင်ဆင်နေမှုတွေကို နက်နက်ရှိုင်းရှိုင်း နားလည်သဘောပေါက်မှုနဲ့ တရုတ်ရဲ့ ရွှေ့ကွက် တစ်ခုအတွက် ပြင်ဆင်နေမှုတွေကို သတိပြုမိနိုင်တဲ့အချက်က အလွန်အရေးကြီးပါတယ်” ဟု ဒေါ်နယ်ထရမ့် (Donald Trump) အစိုးရလက်ထက်က အမျိုးသားထောက်လှမ်းရေး လက်ထောက် ညွှန်ကြားရေးမှူးဟောင်း ဖြစ်ခဲ့သည့် ကလစ်ဖ်တန် ဆင်းမ်စ် (Cliftom Sims) က ပြောသည်။

“ကျနော်တို့က စစ်ကို မလိုလားပါဘူး။ ဒါပေမယ့် တရုတ်က ငြိမ်းချမ်းရေးကို ကျိုးပျက်စေဖို့အတွက် အကြောင်းမဲ့ သက်သက်၊ မျှတမှုမရှိတဲ့ ဆုံးဖြတ်ချက်ကို လုပ်ဆောင်မယ့် အချိန်အခါမျိုးမှာ ဆိုရင်တော့ ကျနော်တို့ အနိုင်ရဖို့ လုပ်ကိုလုပ်ရပါလိမ့်မယ်” ဟု ၎င်းက ပြောသည်။

တရုတ်၊ ထိုင်ဝမ်၊ အမေရိကန် အလံကိုတွေ့ရစဉ်

အမေရိကန်က တရုတ်၏ ထောက်ပံ့ရေး ကွင်းဆက်များအပေါ် မှီခိုမှုကို လျှော့ချရန် လုပ်ဆောင်နေသည်။

ထို့အပြင် အမေရိကန်လုပ် နည်းပညာမြင့် တစ်ပိုင်းလျှပ်ကူးပစ္စည်း ပို့ကုန်များကို တရုတ်က စစ်ရေးရည်ရွယ်ချက် ဖြင့် အသုံးပြုနိုင်ခြေနှင့်ပတ်သက်ပြီး အမေရိကန်က စိုးရိမ်နေ၍ အင်ဒို-ပစိဖိတ်ဒေသ၌ တင်းမာမှုများ မြင့်တက် ခဲ့ပြီးနောက် လွှတ်တော်တွင် ကြားနာစစ်ဆေးမှုကို ပြုလုပ်ခဲ့ခြင်းဖြစ်သည်။

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး လိုအပ်လာပါက အင်အားသုံးပြီး ထိန်းချုပ်သွားမည်ဟု ပြောကြားခဲ့သည်။

အမေရိကန်သည် အခြားနိုင်ငံများကဲ့သို့ ထိုင်ဝမ်၏ လွတ်လပ်ရေးကို အသိအမှတ် မပြုသော်လည်း ထိုင်ဝမ် ရေလက်ကြား၏ ရှိရင်းစွဲအခြေအနေကို ပြောင်းလဲစေမည့် မည်သည့် လှုပ်ရှားမှုကိုမဆို ဆန့်ကျင်လျက်ရှိကာ ထိုင်ဝမ်ကို လက်နက်များ ထောက်ပံ့ပေးလျက်ရှိသည်။  

လက်ရှိတွင် တရုတ်နိုင်ငံအတွင်း အိမ်ခြံမြေ စျေးကွက်ပြိုလဲကာ အလုပ်လက်မဲ့နှုန်းများ မြင့်တက်မှုတို့ အပါအဝင် စီးပွားရေး အခက်အခဲများနှင့် ရင်ဆိုင်နေရသဖြင့် ထိုင်ဝမ်ကို ချက်ချင်းဝင်တိုက်မည့် အစီအစဉ်ထက် ပြည်တွင်း ရေး စိန်ခေါ်မှုများကို ဦးစားပေး ဖြေရှင်းနေရပုံပေါ်ကြောင်း လေ့လာသူများက ပြောသည်။

စစ်ရေးသရုပ်ဖော်ပြထားစဉ်

သို့သော် တရုတ်သည် ထိုင်ဝမ်ဒေသခံများကို ခြိမ်းခြောက်သည့် လှုပ်ရှားမှုများနှင့် သတင်းအမှား ဖြန့်မှုများ၊ သွေးထိုးလှုံ့ဆော်မှုများ အပါအဝင် အနာဂတ်တွင် စစ်ရေးလှုပ်ရှားမှုများကို ပြုလုပ်လာနိုင်ခြေ ရှိသည်ဟုလည်း ကျွမ်းကျင်သူများက ပြောသည်။

ပဋိပက္ခအတွက် ပြင်ဆင်နေသည့် သိသာထင်ရှားသော အခြားလက္ခဏာများတွင် တရုတ်သည် အစားအစာများ၊ စွမ်းအင်များနှင့် မဟာဗျူဟာမြောက် တွင်းထွက်ပစ္စည်းများကို ပမာဏ အများအပြားနှင့် လျှင်မြန်စွာ စုဆောင်းနေ မှု၊ ရှေးဦးသူနာပြု အစီအစဉ်၊ ကယ်ဆယ်ရေး စခန်းများနှင့် အရပ်ဖက် ကာကွယ်ရေးအစီအစဉ်များကို ဖူကျန်း (Fujian) ၊ ကွမ်တုံ (Guangdong) နှင့် ထိုင်ဝမ်အနီးရှိ အချို့ နေရာဒေသများတွင် လုပ်ဆောင်နေခြင်းဖြစ်သည်။

တရုတ်သည် ပြည်ပကုမ္ပဏီများ၊ ဒေတာစီးဆင်းမှုများအပေါ် ထိန်းချုပ် ကန့်သတ်မှုများကို တိုးမြှင့်ခဲ့သဖြင့် တရုတ်၏ ရည်ရွယ်ချက်များကို ခန့်မှန်းရာတွင် ရှုပ်ထွေးစေခဲ့ကြောင်း ကျွမ်းကျင်သူများက ပြောကြားခဲ့သည်။

Source: SCMP

CNI International News

နယူးဒေလီ၊ ဇွန်လ ၁၇

အမေရိကန် အောက်လွှတ်တော်ဥက္ကဋ္ဌဟောင်း နန်စီပယ်လိုစီ (Nancy Pelosi) အပါအဝင် အမေရိကန်၏ ထိပ်သီး ကိုယ်စားလှယ်အဖွဲ့သည် ယခုသီတင်းပတ်တွင် အိန္ဒိယသို့ လာရောက်မည်ဖြစ်ပြီး ဒါရမ်ရှာလာ (Dharamshala) မြို့တွင် တိဘက်ဘုန်းတော်ကြီး ဒလိုင်းလားမား (Dalai Lama) နှင့် တွေ့ဆုံလိမ်မည်ဟု Devdiscourse သတင်းဝက်ဘ်ဆိုက်မှ ဖော်ပြခဲ့သည်။

အိန္ဒိယသို့ လာရောက်မည့် ပါတီနှစ်ရပ်ပေါင်းမှ ထိပ်သီးအရာရှိများ ပါဝင်သည့် အမေရိကန်ကိုယ်စားလှယ်အဖွဲ့ကို အောက်လွှတ်တော် နိုင်ငံခြားရေးကော်မတီဥက္ကဋ္ဌ ရီပတ်ဘလစ်ကန်ပါတီမှ မိုက်ကယ် မက်ကူးလ် (Michael McCaul) က ဦးဆောင်မည်ဖြစ်သည်။

“ကိုယ်စားလှယ်အဖွဲ့ထဲမှာ ဂုဏ်ထူးဆောင်လွှတ်တော်ဥက္ကဋ္ဌ နန်စီပယ်လိုစီ (ဒီမိုကရက်) ၊ အောက်လွှတ်တော် နိုင်ငံခြားရေး ကော်မတီအဖွဲ့ဝင် ဂရီဂိုရီ ဒဗလျူ မစ်စ် (Gregory W. Meeks) (ဒီမိုကရက်)၊ အောက်လွှတ်တော် စည်းကမ်းထိန်းသိမ်းရေး ကော်မတီအဖွဲ့ဝင် ဂျင်မ် မက်ဂိုဗန် (Jim McGovern) (ဒီမိုကရက်) ၊ အင်ဒို-ပစိဖိတ် ဒေသဆိုင်ရာ အောက်လွှတ်တော် နိုင်ငံခြားရေးဆပ်ကော်မတီအဖွဲ့ဝင် အမ်မီ ဘာ့်ချ် (Ami Berg) (ဒီမိုကရက်) နှင့် မာရီယာနက်တီ မီလာ မစ်စ် (Marianette Miller-Meeks) (ရီပတ်ဘလစ်ကန်) နဲ့ နစ်ကိုးလ် မီလီယော့တာကစ် (Nicole Malliotakis) (ရီပတ်ဘလစ်ကန်) တို့ ပါဝင်ပါတယ်”ဟု  အောက်လွှတ်တော်နိုင်ငံခြားရေးကော်မတီက သတင်းထုတ်ပြန်ခဲ့သည်။

အမေရိကန် အောက်လွှတ်တော် နိုင်ငံခြားရေးကော်မတီဥက္ကဋ္ဌ ရီပတ်ဘလစ်ကန်ပါတီမှ မိုက်ကယ် မက်ကူးလ်ကို တွေ့ရစဉ်

ထိုကိုယ်စားလှယ်အဖွဲ့သည် အိန္ဒိယတွင် ၁၄ ပါးမြောက် ဒလိုင်းလားမား ဘုန်းတော်ကြီး၊ အိန္ဒိယအစိုးရအရာရှိများ၊ အိန္ဒိယရှိ အမေရိကန်စီးပွားရေး လုပ်ငန်းများမှ ကိုယ်စားလှယ်များနှင့် တွေ့ဆုံမည်ဟု ထုတ်ပြန်ချက်တွင် ဖော်ပြခဲ့ သည်။

အိန္ဒိယသည် ကမ္ဘာ့အကြီးဆုံး ဒီမိုကရေစီနိုင်ငံဖြစ်ပြီး အမေရိကန်၏ အရေးကြီးသည့် မဟာဗျူဟာမြောက် မိတ်ဖက်နိုင်ငံဖြစ်ကြောင်း၊ နှစ်နိုင်ငံ ဆက်ဆံရေးများကို ပိုမိုခိုင်မာစေရန် အိန္ဒိယအစိုးရ အရာရှိများနှင့် အမေရိကန် စီးပွားရေး အသိုင်းအဝိုင်းမှ ကိုယ်စားလှယ်များနှင့် အစည်းအဝေးများ ပြုလုပ်ရန် မျှော်မှန်းထားကြောင်း မက်ကူးလ် က ပြောသည်။

ထို့ပြင် တိဘက်လူမျိုးများသည် လွတ်လပ်စွဲ ဘာသာရေး ကိုးကွယ်ခွင့်ကို ကျင့်သုံးလိုသည့် ဒီမိုကရေစီကို ချစ်မြတ် နိုးသူများဖြစ်ကြောင်းနှင့် ဘုန်းတော်ကြီး ဒလိုင်းလားမားနှင့် တွေ့ဆုံခွင့်ရမည့် အခွင့်အရေးအတွက် ဂုဏ်ယူ ကြောင်း ၎င်းက ပြောသည်။

အမေရိကန် အောက်လွှတ်တော်ဥက္ကဋ္ဌဟောင်း နန်စီပယ်လိုစီနဲ့ ဒလိုင်းလားမားကို တွေ့ရစဉ်

တိဘက်ဘာသာရေး ခေါင်းဆောင်ဖြစ်သည့် ဒလိုငးလားမားသည် ဆေးဝါးကုသမှု ခံယူရန်အတွက် အမေရိကန်သို့ သွားရောက်ရန် စီစဉ်ထားကြောင်း ၎င်း၏ ရုံးက ဇွန်လ ၃ ရက်တွင် ထုတ်ပြန်ခဲ့သည်။

ထို့ကြောင့် ဇွန်လ ၂၀ ရက်မှစပြီး နောက်ထပ် ထုတ်ပြန်ချက် မတိုင်မီအထိ မည်သူနှင့်မျှ ထိတွေ့ဆက်ဆံမှုများ ပြုလုပ်မည် မဟုတ်ကြောင်း ထုတ်ပြန်ချက်တွင် ဖော်ပြခဲ့သည်။

ဒလိုင်းလားမားသည့် ၎င်း၏ ဒူးကို အမေရိကန်တွင် ဆေးဝါးကုသမှု ခံယူမည်ဖြစ်သဖြင့် အများပြည်သူများနှင့် တွေ့ဆုံမှုများကို ဇွန်လ ၂၀ နောက်ပိုင်း ယာယီဆိုင်းငံ့မည်ဟုလည်း သိရသည်။

ထို့ကြောင့် အမေရိကန်ကိုယ်စားလှယ်အဖွဲ့သည် ဒလိုင်းလားမား၏ အမေရိကန်သို့ ဆေးဝါးကုသမှု သွားရောက် ခံယူမည့် ခရီးစဉ်မတိုင်မီ အိန္ဒိယတွင် ဒလိုင်းလားမားနှင့် ကြိုတင်တွေ့ဆုံခွင့်ရရှိရန် စီစဉ်ခဲ့ခြင်းဖြစ်သည်။

Source: Devdiscourse

CNI International News

ဂျီနီဗာ၊ ဇွန်လ ၁၇

ဆွစ်ဇာလန်နိုင်ငံတွင် ကျင်းပနေသည့် ယူကရိန်းငြိမ်းချမ်းရေးညီလာခံ၏ ဒုတိယမြောက်နေ့ဖြစ်သည့် ဇွန်လ ၁၆ ရက်၌ အနောက်နိုင်ငံများနှင့် အခြားနိုင်ငံများသည် ယူကရိန်းစစ်ပွဲ အဆုံးသတ်ရေး သဘောတူညီမှုရရှိရန် ကြိုးပမ်းခဲ့ကြသည်ဟု ရိုက်တာမှ ဖော်ပြခဲ့သည်။

ထို့နောက် ရုရှား၏ ကျူးကျော်မှုကို ရှုတ်ချခဲ့ကြသည်။ 

ရိုက်တာသတင်းဌာနက မြင်တွေ့ခဲ့ရသည့် ညီလာခံ၏ နောက်ဆုံးကြေညာချက် မူကြမ်းတွင် ရုရှား၏ ကျူးကျော်မှု ကို “စစ်ပွဲ”ဟူသည့် စကားလုံးဖြင့် သုံးနှုန်းဖော်ပြထားပြီး ဇာပိုရီရှား (Zaporizhzhia) နျူကလီးယားစက်ရုံနှင့် အဇော့ (Azov) ဆိပ်ကမ်းများကို ယူကရိန်း၏ ထိန်းချုပ်မှုအောက်သို့ ပြန်လည်ရရှိစေရန် တိုက်တွန်းထားသည်။

ဇွန်လ ၁၃ ရက် နေ့စွဲတပ်ထားသည့် ထိုကြေညာချက်မူကြမ်းတွင် ယူကရိန်း၏ နယ်မြေတည်တံ့ခိုင်မြဲမှုကို လေးစားလိုက်နာရန်လည်း တိုက်တွန်းထားသည်။

ယူကရိန်းငြိမ်းချမ်းရေးညီလာခံ ကျင်းပနေစဉ်

သို့သော် စစ်ပွဲအပြီးတွင် ယူကရိန်းအနေဖြင့် နေတိုးမဟာမိတ်အဖွဲ့ထဲ ဝင်ရောက်မည် ဟုတ်/မဟုတ် အပါအဝင် ရုရှားနှင့် ယူကရိန်း နှစ်ဘက်စလုံးမှ စစ်သားများကို မည်သို့ ပြန်လည်ရုပ်သိမ်းရမည်ဆိုသည့် အချက်များသည် ရှုပ်ထွေးဖွယ် ရှိနေသည်။

ယူကရိန်းနှင့် အနောက်နိုင်ငံများကမူ ရုရှားသည် တရားမဝင် စစ်ပွဲဆင်နွှဲနေခြင်းဖြစ်သည်ဟု ပြောသည်။

အမေရိကန်ဒုသမ္မတ ကာမယ်လာ ဟားရစ် (Kamala Harris) ၊ ဂျာမနီဝန်ကြီးချုပ် အိုလက်ဖ်ရှောဇ် (Olaf Scholz) နှင့် ပြင်သစ်သမ္မတ မက်ခရွန် (Emmanuel Macron) တို့ အပါအဝင် ကမ္ဘာ့ခေါင်းဆောင်များသည် ဆွစ်ဇာလန်၏ ဘာဂန်စတော့ (Buergenstock) အပန်းဖြေစခန်းမြို့တွင် ပြုလုပ်သည့် ငြိမ်းချမ်းရေးညီလာခံ၌  ယူကရိန်းစစ်ပွဲ အဆုံးသတ်ရေးအတွက် နိုင်ငံတကာ၏ ထောက်ခံမှုကို တိုးမြှင့်ရရှိစေရန် ကြိုးပမ်းခဲ့သည်။

အနောက်နိုင်ငံများမှ ခေါင်းဆောင် အများစုကမူ ရုရှား၏ ကျူးကျော်မှုကို ပြင်းပြင်းထန်ထန် ဝေဖန်ရှုတ်ချခဲ့ပြီး ငြိမ်းချမ်းရေးဆွေးနွေးပွဲများအတွက် ယူကရိန်း၏ နယ်မြေအချို့ကို တောင်းဆိုထားသည့် ရုရှားသမ္မတ ပူတင် (Vladimir Putin) ၏ တောင်းဆိုချက်ကို ငြင်းဆိုခဲ့ကြသည်။

ယူကရိန်းငြိမ်းချမ်းရေးညီလာခံ တက်ရောက်နေတဲ့ခေါင်းဆောင်တွေကိုတွေ့ရစဉ်

“ဒီပဋိပက္ခမှာ ရှင်းလင်းပြတ်သားတဲ့ အချက်ကတော့ ကျူးကျော်သူဟာ ပူတင်ဖြစ်ပြီး နစ်နာသူဟာ ယူကရိန်း ပြည်သူတွေ ဖြစ်တယ်ဆိုတဲ့ အချက်ပါ” ဟု စပိန်ဝန်ကြီးချုပ် ပက်ဒရို ဆန်းချက် (Pedro Sanchez) က ပြောကြားခဲ့သည်။

ထိုငြိမ်းချမ်းရေးညီလာခံကို နိုင်ငံပေါင်း ၉၀ ကျော် တက်ရောက်ခဲ့သော်လည်း တရုတ်နိုင်ငံက တက်ရောက်ခဲ့ခြင်း မရှိခဲ့ပေ။ 

ထို့ကြောင့် ထိုညီလာခံသည် ရုရှားအား ကမ္ဘာလုံးဆိုင်ရာ ဖယ်ကြဉ်ထားမှုကို ပြသလိုသည့် အနောက်နိုင်ငံများ၏ ရည်ရွယ်ချက်သည် မှေးမှိန်ခဲ့သည်။

Source: ရိုက်တာ

CNI International News

ဖာဆာနို၊ ဇွန်လ ၁၅

ယူကရိန်းကို ရုရှားက ဝင်ရောက်တိုက်ခိုက်ခဲ့ချိန်ကတည်းက ပိတ်ဆို့ထားခဲ့သည့် ရုရှား၏ ပိုင်ဆိုင်မှုများမှ အကျိုးအမြတ်များကို အသုံးပြုပြီး ယူကရိန်းအတွက် ဒေါ်လာ ၅၀ ဘီလျံ ချေးငွေထောက်ပံ့ပေးရန် စက်မှုထိပ်သီး ၇ နိုင်ငံ (G-7) ခေါင်းဆောင်များက ဇွန်လ ၁၃ ရက်တွင် သဘောတူခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

အီတလီနိုင်ငံတောင်ပိုင်း ဖာဆာနို (Fasano) မြို့တွင် ပြုလုပ်သည့် G-7 အစည်းအဝေး၏ ပထမနေ့၌  ယူကရိန်း ပဋိပက္ခအပြင် ဂါဇာကမ်းမြောင်ဒေသမှာ ဖြစ်ပွားနေသော အစ္စရေး-ဟားမာ့စ် စစ်ပွဲအကြောင်းကိုလည်း အဓိက ထား ဆွေးနွေးခဲ့သည်။

ထို့နောက် G-7 အဖွဲ့ဝင်များသည် အမေရိကန်က အဆိုပြုထားသည့် ဂါဇာ အပစ်အခတ်ရပ်စဲရေး အစီအစဉ်ကို ထောက်ခံခဲ့ကြသည်။

ယူကရိန်းကို လက်နက်များ ထောက်ပံ့မှုနှင့် အခြေခံ အဆောက်အအုံများ ပြန်လည်ထူထောင်မှုတွင် အမေရိကန် နှင့် သဘောထားချင်း တိုက်ဆိုက်သည့် မိတ်ဖက်နိုင်ငံများအကြား မည်မျှကြာရှည် ဆက်လက် ကူညီနိုင်မည် ဆိုခြင်းအား သံသယများ ထွက်ပေါ်နေမှုနှင့်အတူ စစ်ပန်းနေသော ယူကရိန်းကို ချေးငွေပေးရန် G-7 ခေါင်းဆောင် များကြား သဘောတူညီမှု ရရှိခဲ့ခြင်းဖြစ်သည်။

ဘိုင်ဒန်နဲ့ ဇာလန်းစကီးကို တွေ့ရစဉ်

၂၀၂၂ ခုနှစ်၊ ဖေဖော်ဝါရီလက စတင်ခဲ့သည့် ရုရှား၏ ကျူးကျော်မှုသည် ကမ္ဘာကြီးအတွက် စမ်းသပ်ချက် တစ်ခုဖြစ် ပြီး အနိုင်ကျင့် ဗိုလ်ကျမှုကို ဆန့်ကျင်ရေးနှင့် အချုပ်အခြာအာဏာ တည်တံ့ခိုင်မြဲမှု၊ လွတ်လပ်မှုတို့အတွက် စည်းလုံးညီညွတ်နိုင်ခြင်း ရှိ/မရှိတို့အပေါ် မေးခွန်းထုတ်နေခြင်းဖြစ်သည်ဟု အမေရိကန်သမ္မတ ဂျိုးဘိုင်ဒန် (Joe Biden) က ပြောကြားခဲ့သည်။

အမေရိကန်၊ G-7 နှင့် ကမ္ဘာတစ်ဝန်းမှ နိုင်ငံများသည် ထိုမေးခွန်းကို ပြန်လည် ဖြေကြားရာတွင် မိမိတို့အနေဖြင့် စည်းလုံးညီညွတ်စွာရှိမည်ဖြစ်ကြောင်း၊ ယူကရိန်းဘက်မှ ရပ်တည်သွားမည့်အကြောင်းကို ထပ်ကာထပ်ကာ ဖြေကြားခဲ့ကြောင်း ဘိုင်ဒန်က ပြောသည်။

ဘိုင်ဒန်သည် G-7 အစည်းအဝေးသို့ ဧည့်သည်တော်အဖြစ် တက်ရောက်ရန် ဖိတ်ကြားခံရသည့် ယူကရိန်းသမ္မတ ဇာလန်းစကီး (Volodymyr Zelenskyy) နှင့် ပြုလုပ်သော ပူးတွဲသတင်းစာ ရှင်းလင်းပွဲတွင် ထိုကဲ့သို့ ပြောကြားခဲ့ ခြင်းဖြစ်သည်။

 G-7 ခေါင်းဆောင်များကို တွေ့ရစဉ်

အမေရိကန်သည် ယူကရိန်းအား ချေးငွေထောက်ပံ့မည့် ပမာဏကို ဒေါ်လာ ၅၀ ဘီလျံအထိရှိစေရန် မြှင့်တင်ခဲ့ခြင်း ဖြစ်ကြောင်း၊ ထိုချေးငွေများကို အမေရိကန် တစ်နိုင်ငံတည်းက မဟုတ်ဘဲ အခြားနိုင်ငံများနှင့် အစုအဖွဲ့လိုက် ထောက်ပံ့ ပေးသွားမည်ဖြစ်ကြောင်း အမေရိကန်အရာရှိတစ်ဦးက ပြောကြားခဲ့သည်။

G-7 အဖွဲ့ဝင်နိုင်ငံများသည် ယူကရိန်းစစ်ပွဲ စတင်ခဲ့ချိန်ကစပြီး ၎င်းတို့၏ သက်ဆိုင်ရာ နိုင်ငံများအတွင်းရှိ ရုရှား၏ ပိုင်ဆိုင်မှုများကို ထိန်းချုပ်ခဲ့ကာ ရုရှားအပေါ် ပိတ်ဆို့မှုများ ပြုလုပ်ခဲ့သည်။

ထိုနိုင်ငံများရှိ ရုရှား၏ ပိုင်ဆိုင်မှုများမှ အကျိုးအမြတ်များကို အသုံးပြုပြီး ထောက်ပံ့မည့် ထိုချေးငွေများအား  ယူကရိန်းအနေဖြင့် ပြန်လည်ပေးဆပ်စရာမလိုကြောင်း အမေရိကန် အရာရှိတစ်ဦးက ပြောကြားခဲ့သည်။

Source: ဘန်ကောက်ပို့စ်

CNI International News

နယူးဒေလီ၊ ဇွန်လ ၁၅

အီတလီနိုင်ငံတွင် ပြုလုပ်သည့် စက်မှုထိပ်သီး ၇ နိုင်ငံ (G-7) ညီလာခံတွင် အိန္ဒိယဝန်ကြီးချုပ် မိုဒီ (Modi) မတက် ရောက်မီ ရက်ပိုင်းအလိုတွင် ခါလစ္စတန် (Khalistani) ခွဲထွက်ရေး အစွန်းရောက်ဝါဒီများသည် အီတလီရှိ မဟတ္တမ ဂန္ဒီ (Mahatama Gandhi)၏ ရုပ်တုကို ဖျက်စီးခဲ့ကြောင်း Khalsa Vox သတင်းဝက်ဘ်ဆိုဒ်မှ ဖော်ပြခဲ့သည်။

ထိုကဲ့သို့ ဖျက်ဆီးသည့် လုပ်ရပ်အတွက် အလွန်စိုးရိမ်ကြောင်း အိန္ဒိယနိုင်ငံခြားရေးဝန်ကြီးဌာနက သတင်း ထုတ်ပြန်ခဲ့သည်။ 

အိန္ဒိယနိုင်ငံခြားရေးဝန်ကြီးဌာနသည် ထိုဖြစ်စဉ်ကို အီတလီအာဏာပိုင်များအား အလေးအနက်ထား ပြောဆိုခဲ့ပြီး ဂန္ဒီ၏ ရုပ်တုကို ပြုပြင်ရန် လုပ်ငန်းစဉ်များကိုလည်း တစ်ဆင့်ချင်း လုပ်ဆောင်ခဲ့ကြောင်း အိန္ဒိယနိုင်ငံခြားရေး အတွင်းဝန် ဗီနေးကွာထရာ(Vinay Kwatra)က ပြောကြားခဲ့သည်။

“ဂန္ဒီရဲ့ ရုပ်တုဖျက်ဆီးခံရတဲ့ သတင်းကို ကျနော်တို့ ကြားခဲ့ရပြီး ဒီဖြစ်စဉ်ကို အီတလီ အာဏာပိုင်တွေနဲ့အတူ ညှိနှိုင်းဆောင်ရွက်နေပါတယ်။ ရုပ်တုကို ပြန်လည်ပြုပြင်ဖို့ လုပ်ဆောင်နေတယ်ဆိုတာကိုလည်း ကျနော်တို့ သိခဲ့ရပါတယ်”ဟု ၎င်းက ပြောသည်။

ခါလစ္စတန်ခွဲထွက်ရေး တောင်းဆိုနေကြစဉ်

ရုပ်တုကို ဖျက်ဆီးသည့် အားထုတ်ကြိုးပမ်းမှုများသည် မနှစ်မြို့စရာကောင်းသော လုပ်ရပ်ဖြစ်ပြီး ရုပ်တုပြုပြင်ရေး အတွက် လိုအပ်သည့်အရာများကို လုပ်ဆောင်ခဲ့ကြောင်း ကွာထရာက ဆိုသည်။

အိန္ဒိယဝန်ကြီးချုပ် မိုဒီသည် နိုင်ငံတကာ အသိုင်းအဝိုင်းနှင့် ထိတွေ့ဆက်ဆံမှုများ လုပ်ဆောင်နေချိန် ထိုကဲ့သို့ ဖျက်လိုဖျက်ဆီး လုပ်ရပ်များနှင့် ကြုံတွေ့ရလေ့ရှိသည်။

ပြီးခဲ့သည့်နှစ်ကလည်း မိုဒီ၏ သြစတြေးလျ ခရီးစဉ်မတိုင်မီတွင် ခါလစ္စတန် အစွန်းရောက်များသည် ဆစ်ဒနီ (Sydney)မြို့ရှိ ဟိန္ဒူဘာသာရေးဂိုဏ်း အဆောက်အအုံဖြစ်သည့် BAPS Shri Swaminarayan Mandir အဆောက်အအုံပေါ်၌ အိန္ဒိယဆန့်ကျင်သော နံရံဆေးရေးပန်းချီများ ရေးဆွဲခဲ့သည်။

ထိုကဲ့သို့ ဖြစ်စဉ်များသည်  အိန္ဒိယနှင့်နိုင်ငံတကာ အသိုင်းအဝိုင်းအကြား အရေးကြီးသည့် သံတမန်ထိတွေ့ ဆက်ဆံမှုများ မပြုလုပ်မီတွင် အချိန်ကိုက် ပေါ်ပေါက်လေ့ရှိသည်။

ခါလစ္စတန်ခွဲထွက်ရေး တောင်းဆိုနေကြစဉ်

ထိုသို့ ဖျက်လိုဖျက်ဆီး လုပ်ခဲ့သူများ၏ ရည်ရွယ်ချက်အပေါ် မေးခွန်းများ ထွက်ပေါ်စေခဲ့သည်။

မဟတ္တမဂန္ဒီ၏ ရုပ်တုကို ခါလစ္စတန်ခွဲထွက်ဝါဒီများက ဖျက်ဆီးမှုကဲ့သို့ မကြာသေးမီက ယဉ်ကျေးမှုသင်္ကေတများ ဖျက်ဆီးခံရမှုသည် ဆစ်ခ်ဘာသာဝင်များ၏ အဓိကစံတန်ဖိုးများနှင့် သိသိသာသာ ဆန့်ကျင်လျက်ရှိသည်။ 

ဆစ်ခ်ဘာသာသည် ကရုဏာတရား၊ သာတူညီမျှမှု၊ လူသားဆန်မှုတို့အပေါ် အခြေခံ ထူထောင်ထားပြီး အကြမ်းဖက်မှုနှင့် သည်းမခံနိုင်သည့် လုပ်ရပ်များကို ရှုတ်ချထားသည်။

ထိုကဲ့သို့ ယဉ်ကျေးမှုသင်္ကေတများ၊ လေးစားကြည်ညိုဖွယ် ကောင်းသူများ၏ ရုပ်တုများကို ဖျက်ဆီးခြင်းသည် ဆစ်ဘာသာ၏ ကျင့်ဝတ်နီတိကို သစ္စာဖောက်ရုံသာမကဘဲ ငြိမ်းချမ်းရေးနှင့် လူမှုတရားမျှတမှုရှိသည့် ဆစ်ခ်ဘာသာ၏ ဂုဏ်သိက္ခာကိုလည်း အစွန်းအထင်း ဖြစ်စေခဲ့သည်။

Source: Khalsa Vox