CNI International News

အစ္စလာမ္မာဘတ်၊ မေလ ၁၂

ပါကစ္စတန် ဗဟိုတရားရုံးချုပ်က ဝန်ကြီးချုပ်ဟောင်း အီမရန်ခမ်း(Imran Khan)အား ဖမ်းဆီးထားခြင်းသည် တရားမဝင်ကြောင်း အမိန့်ချမှတ်ကာ ၎င်းအား ချက်ချင်း ပြန်လွှတ်ပေးရန် အမိန့်ပေးခဲ့သည်ဟု Al Jazeera သတင်းတွင် ဖော်ပြသည်။

အကျင့်ပျက် ခြစားမှု စွပ်စွဲချက်များနှင့် ၎င်းအား ထိန်းသိမ်းခဲ့မှုကြောင့် အကြမ်းဖက် ဆန္ဒပြမှုများ ပေါ်ပေါက်လာ ခဲ့ပြီးနောက် နှစ်ရက်အကြာတွင် ထိုသို့ အမိန့်ပေးခဲ့ခြင်းလည်း ဖြစ်သည်။

ဗဟိုတရားရုံး၏ ကြာသပတေးနေ့ တရားစီရင်မှုပြီးနောက် နိုင်ငံတစ်ဝန်းလုံးတွင် အကြမ်းဖက်မှုများ လျော့ကျသွား ပုံရသည်။

သို့သော် တရားရုံး အဆောက်အဦ အနီးတွင် အမိန့်နှင့်ပတ်သက်၍ အောင်ပွဲခံနေရကြသော ခမ်းအား ထောက်ခံသူ များနှင့် ရဲတပ်ဖွဲ့တို့အကြား ပဋိပက္ခဖြစ်ပွားမှု တစ်ချို့တော့ ရှိခဲ့သည်။

အစိုးရဘက်ကလည်း တရားရုံး ဆုံးဖြတ်ချက်ကို ဝေဖန်ပြစ်တင်ခဲ့ကာ PTI ပါတီခေါင်းဆောင်အား ဖမ်းဆီးရန် အတွက် တခြားသော တရားဝင် သက်သေများကို ရှာဖွေသွားမည်ဟု ပြောသည်။

အသက် ၇၀ နှစ်အရွယ် ခမ်းသည် အင်္ဂါနေ့ တရားရုံးထုတ်မှု တစ်ခုတွင် အကျင့်ပျက်ခြစားမှု စွဲချက်တစ်ခုဖြင့် အမျိုးသား တာဝန်ယူမှုဆိုင်ရာဗျူရို (NAB)၏ ဖမ်းဆီးခြင်းကို ခံခဲ့ရသည်။

 ပြည်ထဲရေးဝန်ကြီး ရာနာ ဆာနူလာ ခမ်းကို တွေ့ရစဉ်

ဖမ်းဆီးမှုကြောင့် နိုင်ငံတစ်ဝန်းလုံးတွင် အကြမ်းဖက် ဆန္ဒပြမှုများကို ဖြစ်စေခဲ့ကာ တည်ငြိမ်မှုကို ထိန်းသိမ်းရန် အစိုးရသည် ပါကစ္စတန်စစ်တပ်ကိုပင် အကူအညီ တောင်းခံခဲ့ရသည်။

ခမ်း၏ PTI ပါတီအား ထောက်ခံသူများသည်လည်း နေရာအနှံ့အပြားတွင် ရဲတပ်ဖွဲ့နှင့် ပဋိပက္ခဖြစ်ခဲ့သည်။

ထို့နောက် ၎င်းတို့(PTI ပါတီ)သည် စစ်တပ်နှင့် အစိုးရပိုင် အဆောက်အဦများကို တိုက်ခိုက်ရုံမက စစ်တပ်၏ ဌာနချုပ်များအား ဝင်ရောက် စီးနင်းရန် ကြိုးပမ်းခဲ့သလို လာဟိုး (Lahore)ရှိ ထိပ်တန်းအရာရှိ တစ်ဦး၏ နေအိမ်ကိုလည်း မီးရှို့ခဲ့ကြသည်။

ထိုသို့သော ပဋိပက္ခများအတွင်း လူ ၂၀၀၀ ကျော် ဖမ်းဆီးခံခဲ့ရကာ အနည်းဆုံး ၁၁ ဦး သေဆုံး၍ များစွာ ဒဏ်ရာ ရရှိခဲ့သည်။

လက်ရှိ အချိန်အထိ ခမ်း အိမ်ကို ပြန်နိုင်မည်လား ဆိုခြင်းကိုတော့ မသိရသေးပေ။ တရားရုံးအမိန့်တွင် PTI အကြီး အကဲ အနေဖြင့် အစ္စမ္မာဘတ် (Islamabad) ရှိ ရဲတပ်ဖွဲ့ဝင်းအတွင်း ရဲအစောင့်အရှောက်ဖြင့် ဆက်နေရမည်ဟု ပါဝင်သည်။

ခမ်းသည် ထိန်းသိမ်းခံရစဉ်ကတည်းက ယင်း၌ ရှိနေခြင်း ဖြစ်သည်။

PTI  ပါတီ၀င်များနဲ့ ထောက်ခံသူများကိုတွေ့ရစဉ်

ယခင်က တရားဝင်ဟု သတ်မှတ်ထားသော ဖမ်းဆီးမှုနှင့် ပတ်သက်၍ ပြန်လည်စဉ်းစားရန် ခမ်းအား သောကြာနေ့ တွင် အစ္စလာမ္မာဘတ် ဗဟိုတရားရုံးချုပ်သို့ လာရောက်ရန် တရားသူကြီးချုပ် အူမာအာတာဘန်ဒီရယ် (Umar Ata Bandial) က တောင်းဆိုခဲ့သည်။

ခမ်းဘက်ကလည်း ၎င်းအား အကျင့်ပျက် ခြစားမှု စွဲချက်များဖြင့် ထပ်မံဖမ်းဆီးခြင်း မလုပ်ရန် တရားရုံးတွင် အကာအကွယ်ပေးရေး တောင်းဆိုသွားဖွယ် ရှိနေသည်။

သို့သော် ၎င်းအား ဖမ်းဆီးသွားဦးမည်ဖြစ်ကြောင်း ပြည်ထဲရေးဝန်ကြီး ရာနာ ဆာနူလာ ခမ်း (Rana Sanaullah Khan) က ပြောသည်။

ပါကစ္စတန် အစိုးရအရာရှိ များသည်လည်း တရားရုံး၏ အမိန့်ကို ဝေဖန်ပြစ်တင်ခဲ့ကာ တရားသူကြီးချုပ်သည် ခမ်းနှင့်ပတ်သက်၍ ဘက်လိုက်နေသည်ဟု စွပ်စွဲကြသည်။

တရားသူကြီးချုပ် အနေဖြင့် ဗဟိုတရားရုံးတွင် ခမ်းပါတီ၏ အလံအား လွှင့်ထူထားခြင်း သို့မဟုတ် တရားရုံးသည် PTI ၏ ရုံးခွဲဖြစ်ပါသည်ဟု ကြေညာခြင်း လုပ်ဆောင်သင့်ကြောင်း ဝန်ကြီးချုပ်၏ အကြံပေးတစ်ဦးက ပြင်းပြင်း ထန်ထန် ဝေဖန်ခဲ့သည်။

Source: Aljazeera

CNI International News

အိုကီနာဝါ၊ မေလ ၁၂

တရုတ်က ထိုင်ဝမ်အား ကျူးကျော်ချိန်တွင် ဂျပန်နိုင်ငံသည် ပဋိပက္ခ၌ ပါဝင်ပတ်သက်နေမည်ကို ဂျပန်လူမျိုးများ က စိုးရိမ်နေကြသည်ဟု DW သတင်းတွင် ဖော်ပြထားသည်။

အဆာဟိရှင်ဘွန်း(Asahi Shimbun) သတင်းစာမှ ပြုလုပ်ခဲ့သော အင်တာဗျူးတစ်ခုတွင် အရွယ်ရောက်ပြီး ဂျပန် လူမျိုး အယောက် ၃၀၀၀ ၏ ၈၀ ရာခိုင်နှုန်းက စိုးရိမ်ကြောင်း ဖြေကြားခဲ့ခြင်း ဖြစ်သည်။

သို့သော် စစ်တမ်းကောက်ယူမှု ရလဒ်နှင့် ပတ်သက်၍ အံ့သြခြင်း မဖြစ်မိဟု နိုင်ငံရေးလေ့လာသူများနှင့် ဂျပန် နိုင်ငံရေး နယ်ပယ်အတွင်းရှိ အဖွဲ့ဝင်များက ပြောသည်။

တရုတ်ကသာ ထိုင်ဝမ်ကို ကျူးကျော်မည်ဆိုလျှင် အမေရိကန်သည် ထိုင်ဝမ်ဘက်ကို အကူအညီပေးမည်ဟု အားလုံးက သတ်မှတ်ထားသည်။

စစ်တပ်အင်အား မြှင့်တင်မှု ပေါင်းများစွာ လုပ်ဆောင်ထားသော ဂျပန်အစိုးရသည်လည်း တရုတ်၏ ထိုင်ဝမ်အပေါ် ကျူးကျော်မှုက ဂျပန်အတွက်လည်း ပြင်းထန်သော ခြိမ်းခြောက်မှုကို ဖြစ်စေသည်ဟု ပြောခဲ့ဖူးသည်။

ထိုင်ဝမ်ကိုတွေ့ရစဉ်

ဂျပန်အတွက် လိုအပ်သော စွမ်းအင် ၉၀ ရာခိုင်နှုန်း၊ အစားအစာ ၆၀ ရာခိုင်နှုန်းတို့အား သယ်ယူရန် အသုံးပြုသည့် ပင်လယ်လမ်းကြောင်းများကို တရုတ်ဘက်က ထိန်းချုပ်ခွင့် ရှိသွားမည် ဖြစ်ခြင်းကြောင့်ပင်။
ဂျပန်အစိုးရအနေဖြင့် တရုတ်၏ တိုက်ခိုက်မှုကို တွန်းလှန်ရန် ကြည်း၊ရေ၊လေ တပ်များ သုံးမည်ဟု ကြေညာထား ခြင်း မရှိသော်လည်း ရေတပ်နှင့်လေတပ်တို့အား အဆင့်မြှင့်တင်ရန် အသုံးစရိတ်များစွာ အသုံးပြုထားခြင်းက ကြို တင် ပြင်ဆင်ထားသည့် အဓိပ္ပာယ်ပင် ဖြစ်သည်။

စစ်ဘက် အသုံးစရိတ် တိုးမြှင့်ခြင်းကြောင့် ပဋိပက္ခဖြစ်ချိန်တွင် ဂျပန်အနေဖြင့် မည်သည့်နေရာတွင် ရှိနေမည်လဲ ဆိုသည့် ငြင်းခုံမှုများကို ဖြစ်စေခဲ့သည်။

စစ်တမ်းအရ ၅၆ ရာခိုင်နှုန်းသည် ဂျပန်၏ ကိုယ့်ကိုယ်ကို ကာကွယ်ရေးတပ်ဖွဲ့များ(JSDF) အနေဖြင့် အမေရိကန် တပ်များသို့ သယ်ယူပို့ဆောင်ရေး၊ လောင်စာ၊ အစားအစာနှင့် ဆေးဝါးကဲ့သို့ အကူအညီများ ထောက်ပံ့ခြင်းကို ကန့်သတ်သင့်သည်ဟု ပြောသည်။

၁၁ ရာခိုင်နှုန်းကသာလျှင် ဂျပန်စစ်တပ်အနေဖြင့် အမေရိကန်နှင့် ပူးပေါင်းကာ ကျူးကျော်မှုကို တွန်းလှန်သင့် သည်ဟု ဖြေဆိုခဲ့သည်။

သဘာဝပတ်ဝန်းကျင်ဆိုင်ရာ တက်ကြွလှုပ်ရှားသူ ရန်ယာဘူကီကို တွေ့ရစဉ်

ပြည်သူအများစုက စစ်ကို မလိုချင်ကြောင်း၊ အိုကီနာဝါ (Okinawa) တွင် ရှိသူအများစုသည်လည်း ထိုင်ဝမ် အရေး ဂျပန်စစ်တပ် ပါဝင်ခြင်းကို ကန့်ကွက်သည်ဟု စီရင်စု၏ နိုင်ငံရေးသမားတစ်ဦးဖြစ်သူ ရှီနာကို အိုယာကာဝါ (Shinako Oyakawa)က ပြောသည်။

ထိုင်ဝမ်နှင့် အိုကီနာဝါတို့သည် နီးကပ်နေခြင်းကြောင့် ယင်းရှိတိုက်ပွဲသည် ဂျပန်မှ ပြည်သူများအပေါ် တိုက်ရိုက် လွှမ်းမိုးမှု ရှိလာနိုင်ကြောင်း၊ အိုကီနာဝါ ဒေသခံများသည် စစ်၏ ဆိုးရွားမှုကို ကြုံတွေ့ခဲ့ရပြီးဖြစ်ကာ ယင်းကို နောက်တစ်ကြိမ် ထပ်မကြုံလိုကြကြောင်း၊ သို့သော် ဂျပန်အစိုးရအနေဖြင့် ထိုင်ဝမ်အရေးတွင် ပါဝင်ပတ်သက်ပါ က ယင်းသည် သေချာပေါက် ပြန်ဖြစ်လာမည်ဖြစ်ကြောင်းလည်း သူမက ပြောခဲ့သည်။

အိုကီနာဝါ ဒေသခံများသည် လက်ရှိ ဒေသတွင်းရှိ တင်းမာမှုများနှင့် ပတ်သက်၍ နှစ်သက်မှု မရှိကြောင်း၊ သို့သော် ယင်းသည် တရုတ်၏ ဖိအားတိုးမြှင့်မှုဒဏ် ခံစားနေရသည့် ထိုင်ဝမ်ပြည်သူများအပေါ် ကိုယ်ချင်း မစာချင်း မဟုတ် ကြောင်းလည်း အိုယာကာဝါက ပြောသည်။

လက်နက်ကိုင် တိုက်ပွဲများတွင် ဂျပန်စစ်တပ် ပါဝင်လာမည်ကို ကန့်ကွက်သည်ဟု သဘာဝပတ်ဝန်းကျင်ဆိုင်ရာ တက်ကြွလှုပ်ရှားသူ ရန်ယာဘူကီ (Ren Yabuki) က ပြောသည်။

လက်နက်ကိုင် ဖြေရှင်းခြင်းကို အားမပေးကြောင်း၊ နိုင်ငံရေးအရသာ အဖြေရှာသင့်ကြောင့်လည်း ၎င်းက ထောက် ပြသည်။

ပင်လယ်ကွေ့ စစ်ပွဲ အပါအဝင် JSDF သည် တခြားသော နိုင်ငံတပ်ဖွဲ့များသို့ သယ်ယူပို့ဆောင်ရေးဆိုင်ရာ အထောက်အပံ့များ ပေးခဲ့ဖူးသော်လည်း ယာဘူကီက ယင်းကို လက်မခံပေ။
JSDF သည် ဂျပန်၏ ကာကွယ်ရေးအတွက် သက်သက်သာ ဖြစ်သင့်သည်ဟုလည်း ၎င်းက ပြောသည်။

Source: DW

CNI International News

နယူးယောက်၊ မေလ ၁၂

ယူကရိန်းပဋိပက္ခကို ရပ်တန့်နိုင်ရန်အတွက် ရုရှားသမ္မတ ဗလာဒီမာပူတင် (Vladimir Putin)၊ ယူကရိန်းသမ္မတ ဗိုလိုဒီမီယာ ဇာလန်းစကီး (Vladimir Zelensky) တို့နှင့် တွေ့ဆုံသွားမည်ဟု အမေရိကန်သမ္မတဟောင်း ဒေါ်နယ်ထရမ့် (Donlad Trump) က ပြောကြောင်း တာ့စ်သတင်းတွင် ဖော်ပြသည်။

အနိုင်၊အရှုံးကို မစဉ်းစားကြောင်း၊ စစ်ပွဲကို ရပ်တန့်ရန်ကြိုးပမ်းခြင်းဖြင့် လူများစွာ သေဆုံးနေရခြင်းကို တားဆီး နိုင်ကြောင်း ထရမ့်က CNN နှင့် တွေ့ဆုံမှုတစ်ခုတွင် ဖြေကြားခဲ့သည်။ သူသာ သမ္မတဖြစ်မည်ဆိုလျှင် ယူကရိန်း ပဋိပက္ခကို ၂၄ နာရီအတွင်း ဖြေရှင်းလိမ့်မည်ဖြစ်ကြောင်းလည်း ထရမ့်က ပြောသည်။

ရုရှားဖြစ်စေ၊ ယူကရိန်းဖြစ်စေ ၎င်းတို့ သေဆုံးနေရခြင်းကို ရပ်တန့်ပေးလိုသည်ဟု အမေရိကန်သမ္မတဟောင်းက CNN ကို ဖြေကြားခဲ့ကာ ထိုကိစ္စကို ၂၄ နာရီနှင့် အပြတ်ဖြတ်နိုင်သည်ဟု ဆိုသည်။

CNN နဲ့ ဒေါ်နယ်ထရမ့် အင်တာဗျူးလုပ်နေစဉ်

ထရမ့်က ၎င်းအနေဖြင့် ပူတင်အား ထက်မြက်သူတစ်ဦးအဖြစ် သတ်မှတ်ထားကြောင်း သို့သော် ရုရှားသမ္မတသည် ယူကရိန်းအား အထူးစစ်ဆင်ရေး ဆင်နွှဲခြင်းဖြင့် အမှားကို ကျူးလွန်ခဲ့သည်ဟု ပြောသည်။

လက်ရှိအချိန်တွင် ပူတင်အား စစ်ရာဇဝတ်ကောင်အဖြစ် မသတ်မှတ်သင့်ကြောင်း ထောက်ပြခဲ့ကာ ထိုသို့ဆိုလျှင် စစ်ပွဲကိုရပ်တန့်ရေး ပို၍ခက်ခဲသွားလိမ့်မည်ဟု ထရမ့်က ထောက်ပြခဲ့သည်။

စစ်ရာဇဝတ်မှုကိစ္စကို နောက်ပိုင်းမှသာ ဆွေးနွေးအဖြေရှာသင့်သည်ဟုလည်း ထရမ့်က အကြုံပြုသည်။

Source:တာ့စ်သတင်းဌာန

CNI International News

တီဘီလီဆီ ၊ မေလ ၁၁

ရုရှားသမ္မတ ဗလာဒီမာပူတင် (Vladimir Putin) သည် ဂျော်ဂျီယာ နိုင်ငံသားများအတွက် ဗီဇာပယ်ဖျက်ပေးကာ တောင်ပိုင်း ကော့ကေးဆက် (South Caucasus)သို့ လေယာဉ်တိုက်ရိုက် ပျံသန်းခြင်းဆိုင်ရာ ၂၀၁၉ ခုနှစ် ပိတ်ပင် မှုကိုလည်း ဖယ်ရှားပေးခဲ့သည်ဟု Reuters သတင်းတွင် ဖော်ပြထားသည်။

ယင်းက နှစ်နိုင်ငံကြား ဆက်ဆံရေး ဆိုးရွားနေချိန်တွင် ပေါ်ပေါက်လာခြင်းဖြစ်ကာ ရန်စမှုတစ်ခု ဖြစ်သည်ဟု ဂျော်ဂျီယာသမ္မတက ပြစ်တင်ရှုတ်ချခဲ့သည်။

ရုရှားအစိုးရ ဝက်ဘ်ဆိုဒ်တွင် ဖော်ပြထားသော ကြေညာချက်၌ မေလ ၁၅ ရက်မှစကာ ရက် ၉၀ ကြာ ဗီဇာ ကင်းလွတ်ခွင့် ပေးသည်ဟု ဖော်ပြထားသည်။

ထိုကြေညာချက်တွင် ရုရှားလေကြောင်းလိုင်းများသည် မော်စကို (Moscow) နှင့် ဂျော်ဂျီယာမြို့တော် တီဘီလီဆီ (Tbilisi ) အကြား အပတ်စဉ် (၇)ကြိမ် ပြေးဆွဲသွားမည်ဟုလည်း ရုရှားသယ်ယူပို့ဆောင်ရေး ဝန်ကြီးဌာနက ပြောသည်။

ဂျော်ဂျီယာနိုင်ငံသားများကိုတွေ့ရစဉ်

ရုရှားနှင့် ဂျော်ဂျီယာ ဒေသခံများအကြား ဆက်သွယ်ရေးနှင့် အဆက်အသွယ် ပြုလုပ်မှုဆိုင်ရာ အခြေအနေများ အတွက် အထောက်အကူ ဖြစ်စေရန် ယခုကဲ့သို့ လုပ်ဆောင်ခြင်းဟုလည်း ကြေညာချက်တွင် ဖော်ပြထားသည်။

ရုရှားတို့၏ နောက်ထပ် ရန်စမှု တစ်ခုဖြစ်ကြောင်း ရုရှားအနေဖြင့် ယူကရိန်းအပေါ် ရန်လိုမှုများ ဆက်လုပ်နေ သရွေ့၊ ဂျော်ဂျီယာနယ်မြေများကို သိမ်းပိုက်ထားသရွေ့ တိုက်ရိုက် လေယာဉ်ပြေးဆွဲခြင်းနှင့် ဂျော်ဂျီယာအပေါ် ဗီဇာပြန် ဖွင့်ပေးခြင်းတို့သည် လက်ခံနိုင်စရာ မဟုတ်ဟု ဂျော်ဂျီယာသမ္မတ ဆယ်လိုမီ ဇိုရာဘစ်ချ်ဗီလီ (Salome Zourabichvili) က တွစ်တာတွင် ရေးသားပြောဆိုခဲ့သည်။

ဂျော်ဂျီယာသမ္မတသည် လက်ရှိ အာဏာရပါတီ၏ ဝန်ကြီးချုပ် အီရာကီ ဂါရီဘတ်ရှ်ဗီလီ (Irakli Garibashvili)အား ရုရှားနှင့် မေးခွန်းထုတ်ဖွယ် ဆက်ဆံရေးကို ထိန်းသိမ်းထားမှုဖြင့် မကြာခဏဆိုသလို စွပ်စွဲပြောဆိုမှု လုပ်ဆောင် လေ့ ရှိသည်။

ဆိုဗီယက် နိုင်ငံဟောင်းများအတွင်း ရုရှားနှင့် ဂျော်ဂျီယာတို့သည် ဆန်းပြားသော ဆက်ဆံရေးကို ပိုင်ဆိုင်ထားကာ အိုဆီးရှား တောင်ပိုင်းဒေသ (South Ossetia)အရေးနှင့် ပတ်သက်၍ ကာလတိုစစ်ပွဲ ဖြစ်ပွားခဲ့သည့် ၂၀၁၈ ခုနှစ်မှ စတင်ကာ တရားဝင် သံတမန်ဆက်ဆံရေး မရှိတော့ပေ။

ဂျော်ဂျီယာနိုင်ငံသား အများစုတွင် ပြင်းထန်သော ရုရှား ဆန့်ကျင်ရေး သဘောထားရှိကြပြီး ရုရှားထောက်ခံသော ခွဲထွက်ရေး ဒေသများမှ ထွက်ပြေးလာသူ ထောင်ပေါင်းများစွာသည်လည်း ပြည်တွင်းဒုက္ခသည်များအဖြစ် နေထိုင် နေရသည်။

ဂျော်ဂျီယာနယ်စပ်ကိုတွေ့ရစဉ်

မတ်လတွင် ဂျော်ဂျီယာအစိုးရသည် နိုင်ငံခြားအေးဂျင့်များ (Foreign agents) ဟုခေါ်သည့် ဥပဒေမူကြမ်း အတည် ပြုရေးကိစ္စကို ရပ်တန့်ခဲ့ရသည်။

ဆန္ဒပြပွဲများ ပေါ်ပေါက်ပြီးနောက် ထိုသို့ လုပ်ဆောင်ခဲ့ခြင်းဖြစ်ကာ ယင်းသည် အရပ်ဘက် လူ့အဖွဲ့အစည်းများကို နှိပ်ကွပ်ရန် ရုရှားဘက်က သုံးသော ဥပဒေတစ်ရပ်ကို မှီငြမ်းထားခြင်းဟု ဝေဖန်သူများက ထောက်ပြသည်။

ရုရှားအနေဖြင့် ဆိုဗီယက် နိုင်ငံဟောင်း အများစုကို ဗီဇာကင်းလွတ်ခွင့် ပေးထားသော်လည်း လုံခြုံရေးကို အကြောင်းပြကာ ဂျော်ဂျီယာအား ၂၀၀၀ ခုနှစ်တွင် ဗီဇာပိတ်ပင်ခဲ့သည်။

ထို့အပြင် ရုရှားဆန့်ကျင်ရေး ဆန္ဒပြပွဲများ ပေါ်ပေါက်ခဲ့ပြီးနောက် ၂၀၁၉ ခုနှစ်တွင် ဂျော်ဂျီယာသို့ လေယာဉ် တိုက်ရိုက် ပြေးဆွဲခြင်းကိုလည်း တားမြစ်ခဲ့သည်။

Source: Aljazeera

CNI International News

လာဘူရန် ဘာဂျို၊ မေလ ၁၁

မြန်မာနိုင်ငံအတွင်း ဖြစ်ပွားနေသော တိုက်ခိုက်မှုများကို ချက်ခြင်းရပ်တန့်ရန်နှင့် တွေ့ဆုံ ဆွေးနွေးပွဲများ လျင်လျင် မြန်မြန် စတင်ရန် အာဆီယံအဖွဲ့ဝင်နိုင်ငံများမှ ခေါင်းဆောင်များက ဗုဒ္ဓဟူးနေ့တွင် တောင်းဆိုခဲ့သည်ဟု Reuters သတင်းတွင် ဖော်ပြထားသည်။

အာဆီယံ (ASEAN) ထိပ်သီး အစည်းအဝေးတွင် မြန်မာပဋိပက္ခနှင့် ပတ်သက်၍ အပြိုင်အဆိုင် ဆွေးနွေး သွားကြ မည်ဟု ယူဆခဲ့ကြသည်။

နစကသည် လွန်ခဲ့သော ၂ နှစ်က အာဆီယံအဖွဲ့နှင့် သဘောတူညီခဲ့သော ငြိမ်းချမ်းရေး အစီအစဉ်အား အကောင် အထည်ဖော်ခြင်း မရှိသေးသည့်အပေါ် စိတ်ရှည်မှုလည်း လျော့နည်းလာပြီ ဖြစ်သည်။

လက်ရှိ မြန်မာနိုင်ငံမှ အကြမ်းဖက်မှုများနှင့် ပတ်သက်၍ အလွန်အမင်း စိုးရိမ်မိကြောင်း၊ အင်အား အသုံးပြုခြင်း နှင့် အကြမ်းဖက်မှု ပုံစုံ အားလုံးကို ချက်ချင်း ရပ်တန့်ရန် တိုက်တွန်းကြောင်း ခေါင်းဆောင်များမှ ထုတ်ပြန်သည့် ကြေညာချက် တစ်စောင်တွင် ဖော်ပြထားသည်။

အင်ဒိုနီးရှားသမ္မတ ဂျိုကိုဝီဒိုဒိုကိုတွေ့ရစဉ်

လူသားချင်း စာနာမှု အထောက်အပံ့များကို လုံခြုံစွာ အချိန်ကိုက် ပို့ဆောင်နိုင်ရေးနှင့် အားလုံး ပါဝင်သော ဆွေးနွေးပွဲများ ကျင်းပနိုင်ရေးတို့အတွက် အခြေအနေကောင်းတစ်ခုကို ဖန်တီးရန် ကြိုးပမ်းနေခြင်း ဖြစ်သည်။

အာဆီယံ အစည်းအဝေးသည် မြန်မာနိုင်ငံတွင်း ရွေးကောက်ပွဲ မကျင်းပခင်ကာလ တိုက်ပွဲများ ပြင်းထန် နေချိန် တွင် ပေါ်ပေါက်လာခြင်း ဖြစ်သည်။

ထိုအစည်းအဝေး မတိုင်ခင် ရက်ပိုင်းကလည်း မြန်မာနိုင်ငံတွင်းရှိ နေရပ်စွန့်ခွာ ထွက်ပြေးလာရသူများကို ထောက် ပံ့ရန် အကူအညီများ သယ်ဆောင်လာသော ဒေသတွင်း သံတမန်များနှင့် အကူအညီပေးရေး ဝန်ထမ်းများ ပါသည့် ယာဉ်တန်းကို အမည်မသိ သေနတ်သမားများက ပစ်ခတ်ခဲ့ပြီးနောက် ပေါ်ပေါက်လာခြင်း ဖြစ်သည်။

 မြန်မာလူငယ်များ ဒီမိုကရေစီအရေး လှုပ်ရှားနေကြစဉ်

လက်ရှိ အာဆီယံဥက္ကဋ္ဌဖြစ်သူ အင်ဒိုနီးရှားသမ္မတ ဂျိုကိုဝီဒိုဒို (Joko Widodo) က အာဆီယံအဖွဲ့အနေဖြင့် မြန်မာ့အရေးကို စိန်ခေါ်မှု အများဆုံး အကြောင်းအရာများမှ တစ်ခုအဖြစ် သတ်မှတ် ဆောင်ရွက်သင့်သည်ဟု ပြောခဲ့သည်။

အာဆီယံအနေဖြင့် နှုတ်ဆိတ်နေမလား သို့မဟုတ် အာဆီယံအနေဖြင့် ဦးဆောင်သူ သို့မဟုတ် ငြိမ်းချမ်းရေး သို့မဟုတ် ဖွံ့ဖြိုးတိုးတက်မှုအတွက် ဆောင်ရွက်မည်လား ဟု ဝီဒိုဒိုက ပြောသည်။

အာဆီယံအဖွဲ့သည် အဖွဲ့ဝင်များ၏ ပြည်တွင်းရေးကိစ္စကို ဝင်ရောက် မစွက်ဖက်ရေး မူဝါဒကို ကိုင်စွဲထားသော် လည်း သဘောတူထားသော ငြိမ်းချမ်းရေးဆိုင်ရာ ဘုံသဘောတူညီချက် ၅ ချက်အား နစကဘက်မှ အထောင် အထည် ဖော်နိုင်ခြင်း မရှိသေးသည့်အပေါ် ယုံကြည်ချက် လွန်ကဲလျက်ရှိသည်။

Source: Reuters

CNI International News

နယူးဒေလီ၊ မေလ ၁၁

ပြည်နယ်တွင်းရှိ မူးယစ်မာဖီးယားဂိုဏ်းသည် လက်ရှိမဏိပူရ (Manipur) တွင်ဖြစ်ပွားနေသော အကြီးစား အကြမ်း ဖက်မှုများအတွက် တာဝန်ရှိသည်ဟု နယူးဒေလီ (New Delhi) မြို့ ဂျဝါဟာလယ် နေရူးလ် တက္ကသိုလ် (Jawaharlal Nehru - JNU) မှ အကြီးတန်း ပါမောက္ခတစ်ဦးက စွပ်စွဲပြောဆိုခဲ့ကြောင်း NORTHEAST NOW သတင်းတွင် ဖော်ပြသည်။

မေလ ၃ ရက်နေ့မှ စတင်ကာ မဏိပူရပြည်နယ်အတွင်း ဖြစ်ပွားခဲ့သော အကြမ်းဖက်မှုများကို စနစ်တကျ ကြိုတင်စီစဉ်ထားခြင်းဖြစ်သည်ဟု JNU ပါမောက္ခ ဘာဂတ်အိုနမ် (Bhagat Oinam) က ပြောသည်။ မဏိပူရ ငြိမ်းချမ်းရေးနှင့် ဖွံ့ဖြိုးတိုးတက်မှုဆိုင်ရာ ပြည်သူ့မဟာမိတ်အဖွဲ့၊ ဒေလီမဏိပူရအသင်းတို့မှ ဦးဆောင်ကျင်းပ သော သတင်းစာရှင်းလင်းပွဲတစ်ခုအတွင်း မီဒီယာများနှင့်တွေ့ဆုံစဉ်တွင် ပါမောက္ခ အိုနမ်က ထိုသို့စွပ်စွဲပြော ဆိုခဲ့ခြင်းဖြစ်သည်။

မဏိပူရတဝှမ်းတွင် ဖြစ်ပွားခဲ့သော ကြီးမားသော ရုန်းရင်းဆန်ခတ်မှုများအတွင်း မီးလောင်ဆုံးရှုံးမှုများကို တွေ့ရစဉ်

မဏိပူရပြည်နယ်တွင် BJP အစိုးရက မူးယစ်မာဖီးယားများအပေါ် တင်းကြပ်စွာ ကိုင်တွယ်ခဲ့ကြောင်း၊ ယင်း ကြောင့် ထိုဖြစ်ရပ်တွင် မာဖီးယားများက ပို၍အားစိုက်လာခဲ့ကြောင်းနှင့် ၎င်းတို့သည် မဏိပူရမှ အကြမ်းဖက်မှု များအတွင် အဓိကနေရာမှ ပါဝင်နေကြောင်း ပါမောက္ခ အိုနမ်က ပြောသည်။

ကူကီးလူမျိုးများသည် ကသည်းလူမျိုးများအား တိုင်းရင်းသားအဖြစ် အိန္ဒိယအစိုးရမှ သတ်မှတ်ခဲ့ခြင်းကြောင့် ၎င်းတို့အတွက် အလုပ်အကိုင်များ ငြင်းဆိုခံရနိုင်သည့် အခြေအနေပေါ် စိုးရိမ်နေသည်။
ယင်းက အကြမ်းဖက်မှုများ ဖြစ်ရသည့် နောက်ထပ် အကြောင်းအရင်းတစ်ခု ဖြစ်သည်ဟုလည်း ၎င်းက ထပ်လောင်း ပြောဆိုခဲ့သည်။

Source:nenow.in

CNI International News

အစ္စလာမ္မာဘတ်၊ မေလ ၁၁

ဝန်ကြီးချုပ်ဟောင်း အီမရန်ခမ်း (Imran Khan) အား ဖမ်းဆီးမှုကြောင့် ဖြစ်ပေါ်လာသော ဆိုးဆိုးရွားရွား မတည် ငြိမ်မှုများကို ရပ်တန့်ရေး အကူအညီပေးရန် ပါကစ္စတန်အစိုးရက စစ်တပ်ကို အကူအညီ တောင်းခဲ့သည်ဟု Retuers မှ ရေးသားဖော်ပြခဲ့သည်။

ပြည်သူပိုင် အဆောက်အဦများကို ထပ်မံ အကြမ်းဖက်မှု လုပ်ဆောင်ခြင်းများနှင့် ပတ်သက်၍လည်း ဆန္ဒပြသူများ ကို သတိပေးခဲ့သည်။ အကြမ်းဖက် ဆန္ဒပြမှုများကြောင့် အနည်းဆုံး လူ ၅ ဦး သေဆုံးခဲ့ရပြီးလည်း ဖြစ်သည်။

ပါကစ္စတန်နိုင်ငံသည် ပြင်းထန်သော စီးပွားရေးပဋိပက္ခများနှင့် ကြုံတွေ့နေရကာ အကြမ်းဖက် ဆန္ဒပြမှုများ ကြောင့် လူသန်း ၂၂၀ နေထိုင်ရာ အရှေ့တောင်အာရှနိုင်ငံတွင် မတည်ငြိမ်မှုများစွာကို ဖြစ်စေခဲ့သည်။

စစ်တမ်းများအရ ပါကစ္စတန်၏ အထင်ရှားဆုံး နိုင်ငံရေးခေါင်းဆောင် တစ်ဦးဖြစ်သူ ခမ်းသည် မြေယာပိုင်ဆိုင်မှု ဆိုင်ရာ လိမ်လည်မှုဖြင့် အင်္ဂါနေ့တွင် အဖမ်းခံခဲ့ရသည်။

၎င်းကို ဖမ်းဆီးခြင်းက ထောက်ခံသူများအား စစ်တပ် အဆောက်အဦများ ဝင်စီးခြင်းကိုဖြစ်စေခဲ့ပြီး အရှေ့ပိုင်း လာဟိုး (Lahore) မြို့ရှိ ထိပ်တန်းဗိုလ်ချုပ်ကြီး တစ်ဦးပိုင် နေအိမ်ကိုလည်း ဝင်ရောက် မွှေနှောက်ခဲ့ကြသည်။

ပါကစ္စတန် အကြမ်းဖက်မှုများကိုတွေ့ရစဉ်

ဆန္ဒပြသူများသည် တခြားသော ပြည်သူပိုင် အဆောက်အဦများကိုလည်း တိုက်ခိုက်ခြင်း၊ မီးရှို့ခြင်းတို့ လုပ် ဆောင်ကာ အစိုးရအနေဖြင့် ပါကစ္စတန်၏ ပြည်နယ်လေးခုတွင် တည်ငြိမ်မှုကို ထိန်းသိမ်းရန် တပ်ဖွဲ့ဝင် အင်အား များ ချထားရေးအတွက် တောင်းဆိုမှုအား အတည်ပြုချက် ရရှိခဲ့သည်ဟု ဗုဒ္ဓဟူးနေ့တွင် ပြောသည်။

တည်ငြိမ်မှုကို ထိန်းသိမ်းရန် ကြိုးပမ်းနေရသည့် ဒေသများမှာ ခမ်းအား ထောက်ခံသူ အများစုရှိရာ ပန်ဂျပ် (Punjab) နှင့် ပတ်ရှ်တန်ခွာ (Pakhtunkhwa)တို့အပြင် မြို့တော် အစ္စလာမ္မာဘတ် (Islamabad) လည်း ပါဝင်သည်။

အစောပိုင်း အကြမ်းဖက်မှုများအတွင်း ထိန်းထိန်းသိမ်းသိမ်း ဆောင်ရွက်ခဲ့သည်ဟု စစ်တပ်က ထုတ်ပြန်သည့် ကြေညာချက် တစ်စောင်တွင် ဖော်ပြထားသည်။

စစ်တပ် သို့မဟုတ် တရားဥပဒေ ထိန်းသိမ်းရေး အေဂျင်စီများနှင့် ပြည်သူပိုင် အဆောက်အဦများအပေါ် ထပ်မံ အကြမ်းဖက် တိုက်ခိုက်မှုများကို ပြင်းထန်စွာ တုံ့ပြန်သွားမည်ဟု ပြောသည်။

ပါကစ္စတန်ရှိ အဖွဲ့အစည်း အားလုံးအနေဖြင့် အကြမ်းဖက်မှုများကို ရှောင်ရှားစေလိုကြောင်းနှင့် ငြိမ်းချမ်းစွာ စုဝေး ခွင့်ကို လေးစားရန် လိုအပ်ကြောင်း ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရတ်စ် (Antonio Guterres) က ပြောသည်ဟု ကုလ၏ ပြောခွင့်ရပုဂ္ဂိုလ်တစ်ဦးက ပြောသည်။

အီမရန်ခမ်းကိုတွေ့ရစဉ်

ပါကစ္စတန် အာဏာပိုင်များ အနေဖြင့် ခမ်းအား တရားစီရင်မှုတွင် လုပ်ငန်းစဉ်နှင့် တရားစီရင်ရေးကို လေးစားရန် လည်း ဂူတာရတ်စ်က တောင်းဆိုခဲ့သည်။

လမ်းမများပေါ်တွင် ဆန္ဒပြမှုများ ရှိနေချိန်၌ ပါကစ္စတန် တရားရုံးတစ်ခုသည် အသက် ၇၀ အရွယ် ခမ်းအား ၈ ရက်ကြာ စစ်ဆေးမေးမြန်းမှုများ လုပ်ဆောင်ရန် အကျင့်ပျက်ခြစားမှု တိုက်ဖြတ်ရေး အဖွဲ့အစည်းတစ်ခုထံ လွှဲပြောင်းပေးခဲ့သည်ဟု အစိုးရအဖွဲ့ အကြံပေးတစ်ဦးက ပြောသည်။

လက်ရှိတွင် ခမ်းအား မြို့တော်ရှိ ရဲတပ်ဖွဲ့ နားနေဆောင် တစ်ခုတွင် ထိန်းသိမ်းထားသည်ဟု သိရသည်။

ခမ်းအား ဝန်ကြီးချုပ်အဖြစ် တာဝန်ယူနေစဉ် နိုင်ငံတော်ပိုင် လက်ဆောင်ပစ္စည်းများကို ရောင်းချမှုစွဲချက်ဖြင့် ပါကစ္စတန် တရားရုံးတစ်ခုက ဗုဒ္ဓဟူးနေ့ အစောပိုင်းတွင် ထပ်မံတရားစွဲခဲ့သည်ဟုလည်း သိရသည်။

Source: CNA

CNI International News

အန်ကာရာ၊ မေလ ၁၀

တူရကီအစိုးရသည် အလုပ်သမားများ၏ လစာကို ၄၅ ရာခိုင်နှုန်း တိုးမြှင့်ပေးကြောင်း သမ္မတ ရီဆက် တေရစ် အာဒိုဂန် (Recep Tayyip Erdogan) က ပြောသည်ဟု Al Jazeera သတင်းတွင် ဖော်ပြသည်။

သမ္မတနှင့်လွှတ်တော်ဆိုင်ရာ ရွေးကောက်ပွဲများ မကျင်းပခင် ၅ ရက်အလို၌ ထိုသို့ ပြောခဲ့ခြင်း ဖြစ်သည်။

တူရကီသမ္မတသည် လာမည့် ရွေးကောက်ပွဲတွင် ပင်မ အတိုက်အခံ ကိုယ်စားလှယ်လောင်း ကီမဲလ် ကီလစ်ဒါ ရော့ဂလူ (Kemal Kilicdaroglu) နှင့် ပြင်းပြင်းထန်ထန် ယှဉ်ပြိုင်ရမည်ဟု စစ်တမ်း ကောက်ယူမှုများတွင် ဖော်ပြ သည်။

အာဒိုဂန်သည် လစာတိုးသည့် ကိစ္စကို အင်္ဂါနေ့တွင် ကျင်းပခဲ့သည့် စီးပွားရေးနှင့် ပြည်သူ့ဝန်ထမ်းများ၏ လူမှုရေး အခွင့်အလမ်းများဆိုင်ရာ အစည်းအဝေးတစ်ခုတွင် ပြောဆိုခဲ့ခြင်း ဖြစ်သည်။

တူရကီ ရွေးကောက်ပွဲ စည်းရုံးနေကြစဉ်

မြို့တော် အန်ကာရာ (Ankara) တွင် ပြုလုပ်ခဲ့သော အစည်းအဝေးကို ပြည်သူ့စုပေါင်း ညှိနှိုင်းမှု သဘောတူညီချက် ညှိနှိုင်းမှု မှတ်တမ်း (Public Collective Bargaining Agreement Framework Protocol) ကို အခြေခံကာ လုပ် ဆောင်ခဲ့ခြင်း ဖြစ်သည်။

လူမှုဖူလုံရေး အပါအဝင် လစာကို ၄၅ ရာခိုင်နှုန်းတိုးကြောင်း သမ္မတက ပြောခဲ့သည်ဟု အစိုးရဝက်ဘ်ဆိုဒ်တွင် ထုတ်ပြန်ထားသည့် ကြေညာချက် တစ်စောင်၌ ဖော်ပြသည်။

ထို့ကြောင့် အနိမ့်ဆုံး ပြည်သူ့ဝန်ထမ်း လစာသည် တူရကီ လိုင်ရာ (TL) ၁၅၀၀၀ ထိ မြင့်တက်သွားမည်ဟုလည်း ၎င်းက ပြောသည်။

ပြည်သူ့ဝန်ထမ်းများ၏ လစာနှင့် ပင်စင်ကို တိုးပေးသွားရန်အတွက် ဆက်လက် လုပ်ဆောင်သွားဦးမည်ဟုလည်း အာဒိုဂန်က ပြောသည်။

ဇူလိုင်လတွင် ငွေကြေးဖောင်းပွမှု ခြားနားချက်နှင့် လူမှုဖူလုံရေးကိစ္စများကို အခြေခံကာ ပြင်ဆင်မှုများ လုပ်ဆောင် သွားမည်ဟုလည်း ၎င်းက ပြောသည်။

တူရကီ၏ စီးပွားရေးသည် လာမည့် တနင်္ဂနွေနေ့ ရွေးကောက်ပွဲအတွက် အဓိက အကြောင်းအရာလည်း ဖြစ်သည်။

တူရကီ ရွေးကောက်ပွဲ စည်းရုံးနေကြစဉ်

အာဒိုဂန်၏ ပုံမှန် မဟုတ်သော အတိုးနှုန်း လျော့မှုကြောင့် ၂၀၂၁ ခုနှစ် နှောင်းပိုင်းတွင် တူရကီငွေကြေး တန်ဖိုး ကျဆင်းမှု ပေါ်ပေါက်လာခဲ့ကာ ပြီးခဲ့သည့်နှစ်၌ ငွေကြေးဖောင်းပွမှုနှုန်းသည် ၂၄ နှစ်အတွင်း အမြင့်ဆုံးအဖြစ် ၈၅ ဒသမ ၅ ရာခိုင်နှုန်းသို့ ရောက်ရှိခဲ့သည်။

ဖေဖော်ဝါရီလက အင်အားပြင်းငလျင် နှစ်ခုကြောင့် အပါအဝင် ရုန်းကန်နေရသည့် တူရကီ၏ စီးပွားရေးသည် အာဒိုဂန်၏ ပြန်လည် ရွေးချယ်ခံရရေး မဲဆွယ်မှုများကို ထိခိုက်စေလျက်ရှိသည်။

အာဒိုဂန်သည် တူရကီအား လွန်ခဲ့သည့်နှစ် ၂၀ ခန့်ကတည်းက ဦးဆောင်ခဲ့သူဖြစ်ကာ သူ၏ မဲဆွယ်မှုများတွင် စီးပွားရေး အကျပ်အတည်းကို ဖြေရှင်းရန် အတိုးနှုန်း လျှော့ခြင်းကို နည်းလမ်းတစ်ခုအဖြစ် အသုံးပြုသွား မည်ဟု ကတိပြုထားသည်။

ငွေကြေးဖောင်းပွမှု ပမာဏကို ဂဏန်းတစ်လုံးထဲသို့ လျှော့ချကာ စီးပွားရေး တိုးတက်မှုကိုပါ မြှင့်တင် သွားမည်ဟုလည်း ၎င်းက ပြောသည်။

Source: Aljazeera

CNI International News

ဘာလင်၊ မေလ ၁၀

ယူကရိန်းအရေးနှင့် ပတ်သက်၍ တရုတ်နှင့်ဂျာမနီတို့သည် အင်္ဂါနေ့က အပြန်အလှန် ပြစ်တင်ပြောဆိုမှု လုပ် ဆောင်ခဲ့ ကြသည်ဟု ဘန်ကောက်ပို့စ် သတင်းတွင် ဖော်ပြထားသည်။

တရုတ်ကုမ္ပဏီများအပေါ် အီးယူ(EU)က ပစ်မှတ်ထား အရေးယူခြင်းနှင့် ပတ်သက်၍ တရုတ်ဘက်က သတိပေးခဲ့ ပြီး ပဋိပက္ခအတွင်း ကြားနေခြင်းသည် ရုရှားဘက်တွင် ရပ်တည်နေသည့် အဓိပ္ပာယ်ဖြစ်သည်ဟု ဂျာမနီက ပြော သည်။

တစ်လအတွင်း ဒုတိယမြောက် တွေ့ဆုံမှုတွင် တရုတ်နိုင်ငံခြားရေးဝန်ကြီး ကျင်ဂန်း (Qin Gang)နှင့် ဂျာမနီ နိုင်ငံ ခြားရေးဝန်ကြီးဝန်ကြီး အန်နာလီနာ ဘဲရာဘော့ (Annalena Bearbock) တို့သည် ကမ္ဘာ့စင်မြင့်၌ အင်အားကြီး နိုင်ငံများ၏ တာဝန်ယူမှုနှင့် ပတ်သက်၍ ထပ်ခါထပ်ခါ အငြင်းပွားမှု ဖြစ်ခဲ့သည်။

ရုရှားအရေးကြောင့် တရုတ်ကုမ္ပဏီများအပေါ် ဒဏ်ခတ်ပိတ်ဆို့မှုများ ချမှတ်မည့် အီးယူကို ကျင်က သတိပေးခဲ့ သလို အကျိုးစီးပွားကို ကာကွယ်ရန် တုံ့ပြန်မှု လုပ်ဆောင်သွားမည်ဟု ပြောသည်။

တရုတ်ကုမ္ပဏီ ၈ ခုအပေါ် အရေးယူမှု လုပ်ဆောင်ရန် အီးယူက ဆွေးနွေးနေမှုနှင့် ပတ်သက်၍ အမှန်တကယ် အရေးယူခဲ့မည်ဆိုလျှင် တရုတ်ဘက်ကလည်း ကုမ္ပဏီများ၏ အကျိုးစီးပွားအတွက် လိုအပ်သော တုံ့ပြန်မှုများ လုပ်ဆောင်သွားမည်ဟု ပြောသည်။

ကျင်သည် ဂျာမနီမြို့တော်တွင် ဘဲရာဘော့နှင့် တွေ့ခဲ့စဉ် တရုတ်နှင့် ရုရှားကုမ္ပဏီများသည် ပုံမှန် ဆက်ဆံရေး ရှိသည့်အတွက် ယင်းကို အရေးယူခြင်းမှာ မဖြစ်သင့်ဟု ပြောခဲ့သည်။

ကျင်သည် ဂျာမနီပြီးနောက် ပြင်သစ်နှင့် နော်ဝေတို့သို့ သွားရောက်ရန် စီစဉ်ထားသည်။

တရုတ်အနေဖြင့် တခြားနိုင်ငံများ၏ ကိုယ်ပိုင် သတ်မှတ်ချက်များ သို့မဟုတ် တစ်ဖက်သတ် လုပ်ဆောင်ချက်များ ကို ပြင်းပြင်းထန်ထန် ကန့်ကွက်သည်ဟု ပြောခဲ့သည်။

အီးယူ ကိုယ်စားလှယ်များသည် ယူကရိန်းစစ်ပွဲအတွက် ရုရှားအား ၁၁ ကြိမ်မြောက် အရေးယူ ပိတ်ဆို့မှု ပြုလုပ်ရန် ဗုဒ္ဓဟူးနေ့မှ စတင် ဆွေးနွေးသွားမည်။

ယူကရိန်းအလံကိုတွေ့ရစဉ်

ယင်း၏ အစိတ်အပိုင်း တစ်ရပ်အဖြစ် အီးယူ ကိုယ်စားလှယ်များက ရုရှားသို့ ပြန်ရောင်းနေသည့် သံသယဖြစ်ရ သော တရုတ်ကုမ္ပဏီ ၈ ခုအား ထိလွယ်ရှလွယ်သည့် နည်းပညာများ ရောင်းချနေမှုကို ရပ်နားရန် ထောက်ခံချက် ပေးထားသည်။

မိုက်ခရိုချပ်စ်များ အပါအဝင် တိုက်ပွဲအတွင်း အသုံးပြုနိုင်သည့် ထိလွယ်ရှလွယ်သော နည်းပညာများကို တတိယ နိုင်ငံတစ်ခုမှတစ်ဆင့် ရုရှားသို့ ပြန်လည် တင်ပို့နေမှုကို အီးယူဘက်က ဖယ်ရှားလိုနေခြင်း ဖြစ်သည်။

တရုတ်ကုမ္ပဏီများအပေါ် အီးယူဘက်မှ ချမှတ်နိုင်သည့် လုပ်ဆောင်ချက်များနှင့် ပတ်သက်၍ ဘဲရာဘော့က ပြောဆိုရန် ငြင်းဆိုခဲ့သော်လည်း ရုရှားအပေါ် လက်ရှိ ချမှတ်ထားသော အရေးယူမှုများကို တတိယနိုင်ငံတစ်ခု အကူအညီဖြင့် ဖောက်ထွက်သွားခြင်းမျိုး မဖြစ်ရန် အီးယူက သေချာစေလိုနေသည်ဟု ပြောသည်။

စစ်ပွဲအတွက် အရေးပါသည့် ကုန်ပစ္စည်းများကို ရုရှားလက်နက် ကုမ္ပဏီများ ရရှိနေခြင်းမှာ အရေးကြီးသည့် အကြောင်းအရာဖြစ်ကြောင်း တရုတ် အပါအဝင် ကမ္ဘာ့နိုင်ငံများ အနေဖြင့် ၎င်းတို့၏ လွှမ်းမိုးနိုင်မှုဖြင့် ယင်းကို ရပ်တန့်သင့်ကြောင်း ဘဲရာဘော့က ပြောသည်။

သို့သော် ကျင်က တရုတ်သည် ယူကရိန်းစစ်ပွဲ အဆုံးသတ်ရေး ငြိမ်းချမ်းစွာ ဆွေးနွေးသည့် နည်းလမ်းကို တွန်းအား ပေးနေကြောင်း ပြောကာ တရုတ်သည် အလွန်အကျူး ဝင်ရောက် စွက်ဖက်ခြင်းဖြင့် မီးလောင်ရာ လေမပင့်ဟု တုံ့ပြန်သည်။

တရုတ်သည် ယူကရိန်းအရေးအတွက် ငြိမ်းချမ်းရေး ကိုယ်စားလှယ်အဖွဲ့ စေလွှတ်မည်ဟု ပြောခဲ့ကာ ဂျာမနီ အနေ ဖြင့် အပစ်အခတ်ရပ်စဲရေး၊ ငြိမ်းချမ်းရေး ဆွေးနွေးပွဲများ ပေါ်ပေါက်လာစေရန် ပို၍ လုပ်ဆောင်ရန်လည်း တိုက် တွန်းခဲ့သည်။

ဘဲရာဘော့ဘက်က တရုတ်အနေဖြင့် ရုရှားနှင့်ပတ်သက်၍ ပြတ်သားသော ရပ်တည်ချက်ရှိရန် တောင်းဆိုခဲ့ကာ ကြားနေအဖြစ် နေနေခြင်းသည် ရုရှားဘက်တွင် ရှိနေသည့် အဓိပ္ပါယ်ဖြစ်သည်ဟု တုံ့ပြန်သည်။

ကျင်ဂန်းနဲ့ အန်နာလီနာဘဲရာဘော့ကို တွေ့ရစဉ်

ဂျာမနီဝန်ကြီး၏ ပြောစကားကို ကျင်က ဥရောပ ထိပ်သီး စီးပွားရေး အင်အားကြီးဖြစ်သော ဂျာမနီအနေဖြင့် တရုတ်နှင့် အဆက်ဖြတ်ခြင်းကြောင့် ဖြစ်လာနိုင်သည့် အန္တရာယ်ကြီးကြီးမားမားကို လက်ခံနိုင်သလား သို့မဟုတ် နိုင်ငံရေး အမြင်မတူမှုကြောင့် တရုတ်နှင့်ကင်းအောင် နေနိုင်ပါမည်လားဟု ပြန်လည် မေးခွန်းထုတ်ခဲ့သည်။

တရုတ်ဘက်မှ ပြိုင်ဆိုင်မှုနှင့် ယှဉ်ပြိုင်မှုများ မြင့်တက်လာသည်ဟု ဂျာမနီဝန်ကြီးချုပ်က အီးယူ လွှတ်တော်တွင် ပြောခဲ့ဖူးသည်။

ဥရောပသည် တရုတ်နှင့် ပတ်သက်လာလျှင် အမေရိကန်၏ ပြင်းထန်သော လုပ်ငန်းစဉ်များထက် စွန့်စားမှုများကို ပါးပါးနပ်နပ် လျှော့ချနိုင်သည့် နည်းလမ်းတစ်ခုကို လိုအပ်နေသည်ဆိုသည့် အီးယူကော်မရှင် ဥက္ကဋ္ဌ၏ ပြောစကား ကိုလည်း ဂျာမနီဝန်ကြီးချုပ်က ထောက်ခံခဲ့သည်။

တရုတ်သည် ယူကရိန်းစစ်ပွဲတွင် ကြားနေနိုင်ငံ တစ်ခုဖြစ်ကြောင်း သိသာစေရန် ဆောင်ရွက်မှုများ လုပ်ဆောင်နေ ကာ ပြီးခဲ့သည့်လတွင် ယူကရိန်းသမ္မတဗိုလိုဒီမီယာ ဇာလန်းစကီးနဲ့ပထမဆုံးဖုန်းပြောဆိုမှုလုပ်ဆောင်ခဲ့သည်။

သို့သော် ပြင်သစ်နိုင်ငံဆိုင်ရာ တရုတ်သံအမတ်၏ ဆိုဗီယက်နိုင်ငံဟောင်းများ၏ အချုပ်အခြာ အာဏာ အပေါ် ပြောဆိုမှုသည် ယင်း၏ ရပ်တည်ချက်နှင့် ပတ်သက်၍ မေးခွန်းထုတ်စရာ ဖြစ်ခဲ့ကာ တရုတ်ဘက်မှ အဆိုပြုသော ငြိမ်းချမ်းရေး လုပ်ငန်းစဉ်ကိုလည်း အမေရိကန်နှင့် နေတိုးအဖွဲ့တို့က ဝေဖန်မှု လုပ်ဆောင်ထားသည်။

Source: ဘန်ကောက်ပို့စ်