CNI International News

ဘန်ကောက်၊ မေလ ၂၅

Move Forward Party (MFP)ပါတီ ခေါင်းဆောင် ပီတာလင်ဂျာရိုရန်ရတ် (Pita Limjaroenrat) အား ဝန်ကြီးချုပ် အဖြစ် ထောက်ခံရေး ဆီးနိတ်လွှတ်တော်အမတ်များ ယတိပြတ် မဆုံးဖြတ်ရသေးကြောင်း လွှတ်တော်အမတ် တစ်ဦးဖြစ်သူ ဝမ်ချိုင်း ဆွန်သီရိ (Wanchai Sornsiri) က ပြောသည်ဟု ဘန်ကောက်ပို့စ်သတင်းတွင် ဖော်ပြထားသည်။

ထိုကိစ္စနှင့် ပတ်သက်၍ လွှတ်တော်အမတ်များအကြား သောကြာနေ့တွင် အမြင်ချင်း ဖလှယ်ခဲ့သော်လည်း ၎င်းတို့ ၏ အယူအဆများသည် ၎င်းတို့၏ နောက်ဆုံး ရပ်တည်ချက်ကို ကိုယ်စားပြုခြင်း သို့မဟုတ် ၎င်းတို့ မည်သို့ မဲပေး မည်ကို ဖော်ညွှန်းခြင်းမရှိဟု ဝမ်ချိုင်းက ပြောသည်။

လက်ရှိတွင် ဆီးနိတ်လွှတ်တော် အမတ်များကြား၌ အယူအဆသုံးခုရှိကြောင်း ယင်းတို့မှာ ပီတာအား ထောက်ခံမဲ ပေးရန်၊ ကန့်ကွက်မဲပေးရန်နှင့် မဲမပေးဘဲ နေရန်တို့ဖြစ်ကြောင်း သို့သော် လက်ရှိတွင် လွှတ်တော်အမတ် အများစု က မည်သို့ ဆုံးဖြတ်မည်ကို ပြောရန် ခက်ကြောင်း၊ အများစုသည် မဲပေးသည့် နေ့တွင်မှ ဆုံးဖြတ်ချက် ချမည်ဖြစ် ကြောင်းလည်း ၎င်းက ပြောသည်။

ထိုင်းလွှတ်တော်ကို တွေ့ရစဉ်

၎င်းအနေဖြင့် လွှတ်တော်အတွင်း နေရာပေါင်း ၂၅၀ ကျော်ကို ရရှိသည့် ဝန်ကြီးချုပ်လောင်းအား ထောက်ခံမဲပေး မည်ဆိုသည့် ကတိကို တည်သွားမည်ဖြစ်ကြောင်း ဝမ်ချိုင်းက ပြောသည်။

MFP ဦးဆောင်သည့် ညွန့်ပေါင်းအဖွဲ့တွင် နိုင်ငံရေပါတီ ရှစ်ခုပါဝင်ကာ လွှတ်တော်နေရာ ၃၁၃ ခုကို ရရှိထားသော် လည်း ပီတာအား ဝန်ကြီးချုပ်အသစ်အဖြစ် တင်မြှောက်ရန် နေရာ ၇၅၀ ရှိသောလွှတ်တော်မှ ထောက်ခံမဲ အနည်း ဆုံး ၃၇၆ ခု လိုအပ်သည်။

ဝန်ကြီးချုပ် အသစ်နေရာအတွက် မဲပေးရာတွင် ဆီးနိတ်လွှတ်တော် အနေဖြင့် ပီတာ၏ iTV တွင် ရှယ်ယာများ ပိုင်ဆိုင်ထားမှုကို ထည့်သွင်း စဉ်းစားမည့် အခြေအနေမရှိဟု ဝမ်ချိုင်းက ပြောသည်။
ထိုကိစ္စကို သက်ဆိုင်ရာ အာဏာပိုင်များကသာ ကိုင်တွယ် ဖြေရှင်းသွားမည်ဖြစ်သည်။ ထိုင်းဥပဒေအရ မီဒီယာ ကုမ္ပဏီတစ်ခုခုတွင် ရှယ်ယာပိုင်ဆိုင်သူအား ရွေးကောက်ပွဲတွင် ကိုယ်စားလှယ်အဖြစ် ဝင်ရောက်ယှဉ်ပြိုင်ရန် တားမြစ်ထားသည်။

ထိုင်းပြည်သူများကို တွေ့ရစဉ်

ပီတာ၏ iTV တွင် ရှယ်ယာ ၄၂၀၀၀ ပိုင်ဆိုင်မှုအပေါ် စုံစမ်းစစ်ဆေးပေးရန် နိုင်ငံရေး တက်ကြွလှုပ်ရှားသူ ရန်ခရိုင် လီကစ်ဝတ်တာနန် (Ruangkrai Leekitwattana)က ရွေးကောက်ပွဲကော်မရှင်အား တောင်းဆိုထားသည်။

တော်ဝင်မိသားစုနှင့် ပတ်သက်သော ပုဒ်မ ၁၁၂ အား ပြင်ဆင်မည့် ပါတီ၏ အငြင်းပွားဖွယ် မူဝါဒကြောင့် ပီတာ အား ထောက်ခံမဲပေးမည် မဟုတ်ဟု လွှတ်တော်အမတ် တစ်ဦးဖြစ်သူ ကစ်တီဆတ် ရတ်တာနာဝါရာဟာ (Kittisak Rattanawaraha) က အင်္ဂါနေ့တွင် အတည်ပြု ပြောဆိုသည်။

လက်ရှိ လွှတ်တော်၏ ငါးနှစ်သက်တမ်းသည် လာမည့်နှစ် မေလ ၁၁ ရက်တွင် ကုန်ဆုံးမည်ဖြစ်သည်။

ထို့နောက်တွင် ၎င်းသည် ဝန်ကြီးချုပ် ရွေးချယ်ရေးအတွက် ပါဝင်ခွင့်ရှိတော့မည် မဟုတ်ကြောင်း ဒုတိယ ဝန်ကြီးချုပ်ဖြစ်သူ ဝစ်စနူ ကရီယာဂမ် (Wissanu Krea-ngam) က ပြောသည်။

သို့သော် ၎င်းတို့တွင် အိမ်စောင့်အစိုးရအဖြစ် လုပ်နိုင်စွမ်း ဆက်ရှိနေဦးမည် ဖြစ်သည်။

Source: ဘန်ကောက်ပို့စ်

CNI International News

ဘန်ကောက်၊ မေလ ၂၅

အိမ်စောင့်အစိုးရမှ အစိုးရသစ်ထံသို့ အဆင်ပြေ ချောမွေ့စွာ အာဏာလွဲပြောင်း ပေးနိုင်လိမ့်မည်ဟု ဝန်ကြီးချုပ် ပရာယွတ်ချန်အိုချာ (Prayut Chan-o-Cha) က မေလ ၂၃ ရက်တွင် အာမခံပြောဆိုခဲ့ကြောင်း ဘန်ကောက်ပို့စ် သတင်းတွင် ဖော်ပြထားသည်။

တိုင်းပြည်သည် ရှေ့ဆက် သွားရမည်ဖြစ်ကြောင်း၊ အစိုးရသစ် ဖွဲ့စည်းရေးအား စောင့်ဆိုင်းနေစဉ်တွင် ပြည်သူများ အား စောင့်ရှောက်ရန် ဆက်လက် လုပ်ဆောင်သွားရမည်ဖြစ်ကြောင်း ဗိုလ်ချုပ်ကြီးပရာယွတ်က ပြောသည်။

ပြည်သူများ စိတ်ပျက်စေမည့် နိုင်ငံရေး အခြေအနေများကို ဖန်တီးခြင်းဖြင့် ပြည်သူများအကြား အထိတလန့် ဖြစ်အောင် လုပ်ဆောင်ခြင်းများကို ရှောင်ကျဉ်ကြရန်လည်း ဝန်ကြီးချုပ်က သက်ဆိုင်ရာ အဖွဲ့အစည်းများကို တိုက်တွန်းခဲ့သည်။

ပြဿနာများ ထပ်မံ မဖန်တီးရန် လိုကြောင်း၊ ၎င်းအနေဖြင့် မည်သည့်ဘက်နှင့်မှ ပြဿနာမရှိကြောင်း လက်ရှိ ဒီမိုကရေစီ လုပ်ငန်းစဉ်အား လေးစားမှုရှိကြောင်း ပရာယွတ်က ပြောသည်။

အိမ်စောင့်အစိုးရမှ အစိုးရအသစ်ထံသို့ အာဏာလွှဲပြောင်းရေးအတွင်း တိုင်းပြည်၏ စီးပွားရေးဖွံ့ဖြိုးတိုးတက်မှုကို ဆက်လက် ထိန်းသိမ်းနိုင်ရန်အတွက် လိုအပ်သော လုပ်ဆောင်ချက်များကို ချမှတ် ဆောင်ရွက်သွားမည်ဟု ပရာယွတ်က ပြောသည်။

MFP ပါတီခေါင်းဆောင် လူထုနဲ့တွေ့ဆုံစဉ်

ထိုင်းနိုင်ငံ၏ နိုင်ငံရေးဆိုင်ရာ မတည်ငြိမ်မှုများနှင့် ပတ်သက်သည့် စိုးရိမ်မှုများကြောင့် ထိုင်းချေးငွေ စာချုပ်များ ကို ကမ္ဘာလုံးဆိုင်ရာ ရင်းနှီးမြှုပ်နှံသူများက အကြီးအကျယ် ရောင်းချခြင်းနှင့်ပတ်သက်၍ မေးမြန်းခဲ့ရာတွင်လည်း ယင်းတို့ကို ရပ်တန့်ရန် မဖြစ်နိုင်ဟု ဝန်ကြီးချုပ်က ပြန်ဖြေခဲ့သည်။

သို့သော် ထိုင်းနိုင်ငံသည် နိုင်ငံရေးအရ မတည်ငြိမ်မှုများ ရှိနေသည့်တိုင် ဘဏ္ဍာရေးအရ တည်ငြိမ်သည့် အခြေ အနေတွင် ရှိနေကြောင်း၊ သက်ဆိုင်ရာ အဖွဲ့အစည်းများ အနေဖြင့်လည်း ဆိုးရွားသော ပြဿနာများ ထပ်မံ မဖြစ် ပေါ် လာစေရေးအတွက် ပူးပေါင်းတားဆီးသွားရန် လိုအပ်ကြောင်း ပရာယွတ်က ပြောသည်။

မိမိ(ပရာယွတ်)၏ တစ်ခုတည်းသော မျှော်လင့်ချက်မှာ တိုင်းပြည် ငြိမ်းချမ်းရန်သာဖြစ်ပြီး အိမ်စောင့်အစိုးရ၏ ဝန်ကြီးချုပ် တစ်ဦးအနေဖြင့် အစိုးရသစ် မတိုင်ခင်အထိ တာဝန်များကို အကောင်းဆုံး ထမ်းဆောင်သွားမည်ဟု ပရာယွတ်က ပြောသည်။

ဒုဝန်ကြီးချုပ် ပရာဝပ် ဝေါင်ဆူဝမ်ကို တွေ့ရစဉ်

နိုင်ငံရေး အနာဂတ်နှင့် ပတ်သက်၍ ဒုတိယဝန်ကြီးချုပ် ပရာဝပ် ဝေါင်ဆူဝမ်နှင့် ဆွေးနွေးဖြစ်သလားဟု မေးမြန်း ခဲ့ရာတွင်လည်း ၎င်းသည် လက်ရှိ အိမ်စောင့်အစိုးရအဖွဲ့၏ တာဝန်များ အကြောင်းမှလွဲ၍ ဝေါင်ဆူဝမ်နှင့် မည်သည့် ကိစ္စမှ မဆွေးနွေးဖြစ်ဟု ဖြေကြားခဲ့သည်။

အစိုးရအဖွဲ့သစ်အတွက် MFP ဦးဆောင်သော အစီအစဉ်များကို ထောက်ခံရေး လွှတ်တော်ကို ဖိအားပေးရန်နှင့် လူထု စုဝေးပွဲများ ကျင်းပရန် Move Forward Party(MFP)ပါတီအား ထောက်ခံသူများ၏ အွန်လိုင်း လှုံ့ဆော်မှု များနှင့် ပတ်သက်၍ သက်ဆိုင်ရာ လုံခြုံရေးအဖွဲ့များက လူထုစုဝေးပွဲများသည် တရားဥပဒေ အကန့်အသတ် အတွင်း ရှိနေစေရန် ဆောင်ရွက်သွားလိမ့်မည်ဟု ပရာယွတ်က ပြန်လည် ဖြေကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ မေလ ၂၄

ထိုင်းနိုင်ငံ၏ အစိုးရအဖွဲ့အသစ်သည် လာမည့်သြဂုတ်လ ဒုတိယအပတ်တွင် နေရာတကျ ဖြစ်မည်ဟု ယူဆ ကြောင်း ယာယီအစိုးရ၏ ပြောခွင့်ရပုဂ္ဂိုလ် အနူချာ ဘူရာပါချိုင်သီရိ (Anucha Burapachaisri) က မေလ ၂၃ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

အစိုးရအသစ် ဖွဲ့စည်းလာရ လုပ်ဆောင်ရမည့် ရက်စွဲများ

အိမ်စောင့်အစိုးရ၏ ဒုတိယဝန်ကြီးဖြစ်သူ ဝစ်ဆာနူ ကရီရာ ဂမ် (Wissanu Krea-ngam) သည် မေလ ၂၃ ရက်တွင် အစိုးရအဖွဲ့ အစည်းအဝေးအတွင်း အစိုးရအဖွဲ့ အသစ်နှင့် ပတ်သက်သည့် အချိန်ဇယားကို အအောက်ပါ အတိုင်း သတ်မှတ်ခဲ့သည်ဟု အနူချာက ပြောသည်။ ယင်းတို့တွင်

(၁) ရွေးကောက်ပွဲကော်မရှင်က ရွေးကောက်ပွဲ တရားဝင်ရလဒ်ကို ဇူလိုင် ၁၃ ရက်နေ့တွင် ကြေညာရန်။ ယင်းက ရွေးကောက်ပွဲအပြီး ရက် ၆၀ အကြာတွင် ဖြစ်သည်။

(၂) လွှတ်တော်အမတ်သစ်များ လွှတ်တော်သို့ ဇူလိုင် ၂၀ ရက်တွင် နောက်ဆုံးသတင်းပို့ရန်။

(၃) လွှတ်တော်၏ ပထမဆုံးသော အစည်းအဝေးကို ဇူလိုင် ၂၅ ရက်တွင် စတင်ရန်။

(၄) ဝန်ကြီးချုပ်သစ် ရွေးချယ်ရန်အတွက် လွှတ်တော်ပူးတွဲ အစည်းအဝေးကို သြဂုတ်လ ပထမအပတ်တွင် ကျင်း ပရန်။

(၅) ဘုရင်ရှေ့မှောက်တွင် ကျမ်းကျိမ်ပြီးနောက် အစိုးရအဖွဲ့သစ်ကို သြဂုတ်လ ဒုတိယပတ်တွင် ခန့်အပ်ရန်

(၆) အိမ်စောင့်အစိုးရ၏ သက်တမ်းသည် သြဂုတ်လလယ်တွင် ကုန်ဆုံးရန်တို့ ဖြစ်သည်။

Source: ဘန်ကောက်ပို့စ်

CNI International News

ဗီယက်တိုင်း၊ မေလ ၂၄

ရုရှားလုံခြုံရေးကောင်စီ၏ ဒုတိယဥက္ကဋ္ဌဖြစ်သူ ဒီမီထရီ မက်ဗီဒက်ဗ် (Dmitry Medvedev) က ဘယ်ဂိုရော့ဒ် (Belgorod) ဒေသတွင် တိုက်ခိုက်မှုပြုလုပ်ခဲ့သော လက်သည်တရားခံများကို စက်ဆုပ်ဖွယ်ကောင်းသူများဟု သတ်မှတ်ခဲ့ကာ ယင်တို့ကို ကြွက်များကဲ့သို့ သုတ်သင်ရှင်းလင်းသွားရမည်ဟု ပြောခဲ့ကြောင်း တာ့စ်သတင်းတွင် ဖော်ပြသည်။

ထိုသူများကို စက်ဆုပ်ဖွယ်ကောင်းသူများဆိုသည်မှလွဲ၍ တခြားခေါ်စရာမရှိကြောင်း၊ ၎င်းတို့နှင့် ပတ်သက်၍ မည်သို့ကိုင်တွယ်ဆောင်ရွက်မည်ကို မေးစရာရှိကြောင်း၊ ၎င်းတို့ကို အကျဉ်းသားများအဖြစ် ဖမ်းဆီးခြင်းပင် မလုပ်ဘဲ ကြွက်များကဲ့သို့ သဘောထားကာ သုတ်သင်ရှင်းလင်းရမည်ဖြစ်ကြောင်း မက်ဗီဒက်ဗ်က ပြောခဲ့သည်။

ယခုကဲ့သို့ တိုက်ခိုက်မှုများသည် ၎င်းတို့နှင့် ပတ်သက်ခြင်းမရှိဟု ယူကရိန်းဘက်က မည်သို့ပင်ငြင်းဆိုစေကာမူ ယင်းသည် အလိမ်အညာသာဖြစ်ကြောင်း၊ ယူကရိန်းဘက်က လိမ်ညာနေကြောင်း ရုရှားမြေပေါ်တွင် ဖြစ်ပွား ခဲ့သောတိုက်ခိုက်မှုများနှင့်ပတ်သက်၍ တာ့စ်သတင်းဌာနမှ မေးမြန်းမှုအပေါ် လုံခြုံရေးကောင်စီ ဒုဥက္ကဋ္ဌ က ပြန်လည်ဖြေကြားခဲ့သည်။

တိုက်ခိုက်မှုများအတွက် တာဝန်ရှိမှုများသည် ယူကရိန်းအစိုးရနှင့် ယင်း၏ စပွန်ဆာများဖြစ်သော အမေရိကန်၊ အီးယူ၊ ဗြိတိန်နှင့်တခြားသောနိုင်ငံများပင်ဖြစ်ကြောင်း၊ ယင်းက ၎င်းတို့၏ တိုက်ရိုက်တုန့်ပြန်မှုပင်ဖြစ်ကြောင်း လည်း မက်ဗီဒက်ဗ်က အခိုင်အမာ ပြောဆိုခဲ့သည်။

ပြီးခဲ့သည့် တနင်္လာနေ့က ယူကရိန်းဘက်က တော်လှန်ပုန်ကန်ရေးအဖွဲ့တစ်ခုသည် ရုရှားနိုင်ငံ ဘယ်ဂိုရော့ဒ် ဒေသ၏ ဂရိုင်ဗိုရွန် (Graivoron) ခရိုင်သို့ ဝင်ရောက်ခဲ့ပြီး ပထမနေ့တိုက်ပွဲများတွင် လူရှစ်ဦးဒဏ်ရာရရှိခဲ့သည်။ အုပ်ချုပ်ရေးမှူး၏အဆိုအရ တိုက်ပွဲ ဒုတိယနေ့တွင် ယူကရိန်းစစ်သွေးကြွများ ဝင်ရောက်လာသည့် ရွာအတွင်းမှ လူနောက်ထပ်နှစ်ဦးထပ်မံ ဒဏ်ရာရရှိခဲ့ကာ ရွှေ့ပြောင်းမှုများအတွင်း အမျိုးသမီးကြီးတစ်ဦး သေဆုံးခဲ့သည်ဟု သိရသည်။

ထိုသို့တိုက်ခိုက်မှုများနှင့်ပတ်သက်၍ ဘယ်ဂိုရော့ဒ်ဒေသတွင် အကြမ်းဖက်မှုနှိမ်နင်းရေး အခြေအနေတစ်ရပ်ကို ကြေညာထားကာ ယူကရိန်းမှ အဖျက်သမားများကို ရုရှားမြေပေါ်မှ ဖယ်ရှားရှင်းလင်းနိုင်ရေးအတွက် ကြိုးပမ်းမှု များကိုလည်းလုပ်ဆောင်လျက်ရှိသည်။ ဒေသခံများအတွက် ယာယီရွေ့ပြောင်းရေးစင်တာများကိုလည်း စတာရီ အော့စ်ကို (Stary Oskol)၊ ယာကော့လတ်ဗ်ကာ (Yakovlevka) နှင့် အိုင်ဗန်ယန်ကာ (Ivanyanka) ခရိုင်တို့တွင် ဖွင့်လှစ်ထားသည်ဟု သိရသည်။

Source:Tass

CNI International News

ဘန်ကောက်၊ မေလ ၂၄

Palang Pracharath (PPRP)ပါတီ၏ အထွေထွေအတွင်းရေးမှူးချုပ် ဆန်တီ ပရွမ်ပတ် (Santi Prompat)က ဖြူးထိုင်း(Pheu Thai)ပါတီနှင့် ပူးပေါင်းမည်ဆိုသော သတင်းများကို ငြင်းဆိုခဲ့ကာ ဗိုလ်ချုပ်ကြီး ပရာဝပ် ဝေါင်ဆူဝန်သည် ပါတီခေါင်းဆောင်အဖြစ် ဆက်ရှိနေမည်ဟု ပြောကြောင်း ဘန်ကောက်ပို့စ်မှ ဖော်ပြခဲ့သည်။

အိမ်စောင့်အစိုးရ၏ လက်ထောက်ဘဏ္ဍာရေးဝန်ကြီးဖြစ်သူ ဆန်တီက PPRP အနေဖြင့် ဖြူးထိုင်းပါတီနှင့် ပူးပေါင်းကာ ညွန့်ပေါင်းအစိုးရအဖွဲ့သစ်ကို ဖွဲ့စည်းဦးဆောင်မည်ဟု ထိုင်းမီဒီယာများတွင် ဖော်ပြနေသည့် သတင်းများ အပေါ် တုံ့ပြန် ဖြေကြားခဲ့ခြင်းဖြစ်သည်။

PPRP ပါတီ၏ ခေါင်းဆောင်ဖြစ်သူ ဗိုလ်ချုပ်ကြီးပရာဝပ် ကလည်း ၎င်းအနေဖြင့် ပါတီခေါင်းဆောင် ရာထူးမှ ထွက်ခွာရန် သို့မဟုတ် နိုင်ငံရေးလောကမှ အနားယူရန် အစီအစဉ် မရှိဟု ပြောသည်။

မေလ ၁၄ ရက်တွင် ပြုလုပ်ခဲ့သော ထိုင်းအထွေထွေရွေးကောက်ပွဲ၏ တရားဝင် မဟုတ်သေးသော မဲရလဒ်များတွင် ဖြူးထိုင်းပါတီသည် လွှတ်တော်နေရာ ၁၄၁ နေရာကို အနိုင်ရရှိကာ ဒုတိယနေရာ၌ ရှိနေသည်။

ဖြူးထိုင်းပါတီက ပေတုန်တန်ကို တွေ့ရစဉ် 

PPRP သည် နေရာ ၄၀ အနိုင်ရကာ စတုတ္ထနေရာတွင် ရပ်တည်နေသည်။

Move Forward (MFP) ပါတီသည် ၁၅၂ နေရာဖြင့် ဒုတိယနေရာတွင် ရှိနေပြီး Bumjaithai ပါတီက နေရာ ၇၀ ဖြင့် တတိယနေရာတွင် ရှိသည်။

သို့သော် Bumjaithai ပါတီသည် MFP ဦးဆောင်သည့် ညွန့်ပေါင်းအဖွဲ့တွင် ပါဝင်ခြင်း မရှိသေးပေ။

ဖြူးထိုင်းနှင့် PPRP ပူးပေါင်းမည်ဆိုသော ယူဆချက်များမှာ မသမာသူများက လွှင့်လိုက်သော သတင်းမှားများသာ ဖြစ်ပြီး ပါတီတွင် ထိုကဲ့သို့သော အစီအစဉ်မျိုး မရှိဟု ဆန်တီက အင်္ဂါနေ့ အစိုးရအဖွဲ့တွင် ပြောခဲ့သည်။

ယင်းသည် မဖြစ်ကြောင်း၊ ဗိုလ်ချုပ်ကြီးပရာဝပ်သည် ပါတီခေါင်းဆောင် နေရာတွင် ဆက်ရှိကြောင်း၊ ၎င်းကို ပါတီဝင်များမှ ထောက်ခံနေဆဲဖြစ်ကြောင်း ဆန်တီက ပြောခဲ့သည်။

PPRP ပါတီ၏ အထွေထွေအတွင်းရေးမှူးချုပ် ဆန်တီ ပရွမ်ပတ် (Santi Prompat)ကို တွေ့ရစဉ်

MFP အနေဖြင့် အစိုးရသစ် မဖွဲ့စည်းနိုင်လျှင် PPRP အနေဖြင့် ဖြူးထိုင်းနှင့် ပူးပေါင်းနိုင်သလားဟု မေးမြန်းမှုကို တော့ ထိုကိစ္စကို စောင့်ကြည့်ရမည်ဟုသာ ဆန်တီက ပြန်လည် ဖြေကြားခဲ့သည်။

ဖြူးထိုင်းပါတီခေါင်းဆောင် ချိုနန် သီရိကော (Cholnan Srikaew) က ၎င်းတို့အနေဖြင့် PPRP နှင့် ပူးပေါင်းကာ အစိုးရဖွဲ့စည်းနိုင်ချေမရှိဟု မေလ ၂၂ ရက်တွင် ငြင်းဆိုခဲ့သည်။

ဖြူးထိုင်းသည် MFP ပါတီ ဦးဆောင်သော အစိုးရသစ်ဖွဲ့စည်းရန်၊ MFP ခေါင်းဆောင်အား ဝန်ကြီးချုပ်သစ်အဖြစ် တင်မြှောက်ရန် ထောက်ခံသည့် ပါတီများထဲမှ တစ်ခုဖြစ်သည်။

အပတ်စဉ် အစိုးရအဖွဲ့ အစည်းအဝေးပြီးချိန်တွင် PPRP ခေါင်းဆောင် ဗိုလ်ချုပ်ကြီးပရာဝပ်သည် သတင်းသမား များနှင့် တွေ့ဆုံခဲ့သည်။

တွေ့ဆုံစဉ် ၎င်းအနေဖြင့် PPRP ပါတီ ခေါင်းဆောင်နေရာမှ နုတ်ထွက်ရန်၊ နိုင်ငံရေးလောကမှ အနားယူရန် မစဉ်းစားဘူးဟု ပြောခဲ့သည်။

Source: ဘန်ကောက်ပို့စ်

CNI International News

မော်စကို၊ မေလ ၂၃

ယူကရိန်းသို့ F-16 ဂျက်တိုက်လေယာဉ်များပေးခြင်းက ပဋိပက္ခအတွင်း နေတိုးအဖွဲ့၏ ပါဝင်မှုနှင့် ပတ်သက်သည့် မေးခွန်းများကို ဖြစ်စေကြောင်း အမေရိကန်ဆိုင်ရာ ရုရှားသံအမတ် အန်နာတိုလီ အန်တိုနော့ဗ်က (Anatoly Antonov) က ပြောသည်ဟု Al Jazeera သတင်းတွင် ဖော်ပြထားသည်။

ယူကရိန်းတွင် F-16 များကို ကိုင်တွယ်ရန် အခြေခံ အဆောက်အဦများ မရှိသလို၊ လေယာဉ်မှူး အရေအတွက်နှင့် ပြုပြင် ထိန်းသိမ်းရေး ဝန်ထမ်းအင်အားလည်း မရှိကြောင်း အန်တိုနော့ဗ်က ပြောသည်ဟု တနင်္လာနေ့ ရုရှားသံရုံးမှ ထုတ်ပြန်ချက် တစ်ခု၌ ဖော်ပြထားသည်။

နိုင်ငံခြားသားများ ထိန်းချုပ်မှုဖြင့် နေတိုး လေယာဉ်ကွင်းများမှ အမေရိကန် တိုက်လေယာဉ်များ ပျံသန်းလာလျှင် ဘာဆက်ဖြစ်မလဲဟု အန်တိုနော့ဗ်က မေးခွန်းထုတ်ခဲ့သည်။

ခေတ်မီ ဂျက်တိုက်လေယာဉ်များ ထောက်ပံ့ပေးရေးအတွက် ယူကရိန်းသမ္မတ ဇာလန်းစကီး(Zelenskyy)က အ နောက်အုပ်စု မဟာမိတ်များထံ လအတန်ကြာ တောင်းဆိုခဲ့သည်။

ထိုသို့ ထောက်ပံ့မှုက ရုရှားသမ္မတထံမှ ပိုမိုပြင်းထန်သော တုံ့ပြန်မှုများ ရရှိလာနိုင်သည့် စိုးရိမ်မှုများ ရှိနေချိန်တွင် ဖြစ်သည်။

F-16 တိုက်လေယာဉ်ကိုတွေ့ရစဉ်

သို့သော် ဇာလန်းစကီး၏ တက်သုတ်ရိုက် ဆောင်ရွက်မှုများကြောင့် ဂျပန်တွင် ပြုလုပ်ခဲ့သော G-7 ညီလာခံ အဆုံးမသတ်ခင်ကပင် ယူကရိန်းသို့ ဂျက်တိုက်လေယာဉ်များ ထောက်ပံ့ပေးရေး နိုင်ငံတကာ မဟာမိတ်အဖွဲ့တစ်ခု ဖွဲ့စည်းရန် သဘောတူညီမှု ရရှိခဲ့ကြောင်း ဗြိတိန်နှင့် နယ်သာလန် ဝန်ကြီးချုပ်တို့က ပြီးခဲ့သည့် သီတင်းပတ်တွင် ကြေညာခဲ့သည်။

F-16 ဂျက်တိုက်လေယာဉ်များနှင့် ပတ်သက်၍ ယူကရိန်းလေယာဉ်မှူးများအတွက် လေ့ကျင့်ရေး အစီအစဉ်များ လုပ်ဆောင်ပေးသွားမည်ဟု အမေရိကန်သမ္မတ ဘိုင်ဒန် (Biden) က သောကြာနေ့တွင် အတည်ပြုပေးခဲ့သည်။

ထိုလေယာဉ်များကို ရုရှားနယ်မြေများသို့ သွားရောက် တိုက်ခိုက်ရေးတွင် အသုံးမပြုဟုဇာလန်းစကီးထံမှ အာမခံချက် ရရှိပြီးနောက်တွင် ဖြစ်သည်။

ယူကရိန်းသို့ F-16 လေယာဉ်များ ထောက်ပံ့ပေးခြင်းကို ရှေ့ဆက်လုပ်ဆောင်လျှင် အနောက်နိုင်ငံများအနေဖြင့် အလွန်ကြီးမားသော အန္တရာယ်များနှင့် ရင်ဆိုင်ရမည်ဟု ရုရှားလက်ထောက် နိုင်ငံခြားရေးဝန်ကြီး အလက်ဇန္ဒား ဂရက်ရှ်ကို (Alexander Grushko) က ပြီးခဲ့သည့် သီတင်းပတ်ကုန်ပိုင်းတွင် သတိပေးခဲ့သည်။

ရုရှားလက်ထောက် နိုင်ငံခြားရေးဝန်ကြီး အလက်ဇန္ဒားဂရက်ရှ်ကို ကိုတွေ့ရစဉ်

အမေရိကန်အနေဖြင့် ရုရှား၏ တုံ့ပြန်မှုအပေါ် အပြည့်အဝ သတိပြုမိရန် လိုအပ်သည်ဟု အန်တိုနော့ဗ်က ပြောသည်။

အမေရိကန်ထုတ် F-16 များသည် ရုရှားလေတပ်နှင့် ရင်ဆိုင်နေရသော ယူကရိန်းအတွက် အားသာချက် တစ်ခု ဖြစ်လာနိုင်သော်လည်း အင်အားပြင်း ဒုံးကျည်များ၊ ပစ်မှတ်ဆိုင်ရာ အချက်အလက်များနှင့် ပေါင်းစပ်ပြီး ချိန်မှသာ ဖြစ်ကြောင်း လေကြောင်းကာကွယ်ရေးဆိုင်ရာ ကျွမ်းကျင်သူများက ပြောသည်။

လိုအပ်နေသော ဒုံးကျည်နှင့် ပစ်မှတ် အချက်အလက်များကို အနောက်အုပ်စုက ယူကရိန်းသို့ ထောက်ပံ့ပေးရမည် ဖြစ်ကာ ထိုသို့ လုပ်ဆောင်ခြင်းက အနောက်အုပ်စု မဟာမိတ်များ အနေဖြင့် စစ်ပွဲအတွင်း ပိုမို ပါဝင်ရဖွယ် ရှိသည့် အန္တရာယ်ကိုလည်း ဖြစ်စေသည်။

Source: Aljazeera

CNI International News

ဘန်ကောက်၊ မေလ ၂၃

အစိုးရဖွဲ့စည်းရေးအတွက် ပူးတွဲ သဘောတူညီချက်တစ်ခုတွင် လက်မှတ် ရေးထိုးခဲ့သည်ဟု ထိုင်းနိုင်ငံ၏ ညွန့်ပေါင်းမဟာမိတ်ပါတီများက မေလ ၂၂ ရက်တွင် ကြေညာခဲ့ကြောင်း The Nation သတင်းတွင် ဖော်ပြထားသည်။

ရေးထိုးခဲ့သော နားလည်မှုစာချွန်လွှာ (MoU) သည် ညွန့်ပေါင်းအစိုးရ ဖွဲ့စည်းရေးနှင့် ပါတီများအကြား ပူးပေါင်း ဆောင်ရွက်ရေးတို့အတွက် အခြေခံ ဖြစ်လာမည်ဟု ဝန်ကြီးချုပ်သစ်ဖြစ်ရန် လျာထားခံရသော Move Forward ပါတီ ခေါင်းဆောင် ပီတာလင်ဂျာရိုရန်ရတ် (Pita Limjaroenrat) က ပြောသည်။

အစိုးရ၏ လုပ်ဆောင်ချက်များသည် ထိုင်းနိုင်ငံ၏ ဘုရင်စနစ်နှင့် ချိုးဖောက်၍ မရသော ဘုရင်စနစ်တို့အပေါ် မည်သည့်ဆိုးကျိုး သက်ရောက်မှုမှ မရှိစေရေးအတွက်လည်း ပါတီအားလုံးက သဘောတူသည်ဟု ပီတ၏ ပြောစကားတွင် ပါဝင်သည်။

MoU အား လက်မှတ် ရေးထိုးခြင်းသည် ၂၀၁၄ ခုနှစ် အာဏာသိမ်းယူမှု၏ ၉ နှစ်ပြည့် နှစ်ပတ်လည် အခမ်းအနား နှင့် တိုက်ဆိုင်နေသည်။

ညွန့်ပေါင်းပါတီများ သဘောတူညီခဲ့သည့် အချက် ၂၃ ချက်ကို တွေ့ရစဉ်

ထိုအခြေအနေက ဝန်ကြီးချုပ်ဟောင်း ပရာယွတ်၏ ခေါင်းဆောင်မှု ပြီးဆုံးသွားပြီဆိုသော အမှတ်အသား ဖြစ်သည်ဟုလည်း ပီတာက ပြောသည်။

MoU အား ဖန်တီးခြင်းသည် အစိုးရနှင့် လွှတ်တော် လုပ်ငန်းစဉ်များမှတစ်ဆင့် အပြန်အလှန် အကျိုးစီးပွားနှင့် ပူးပေါင်းဆောင်ရွက်မှုကို ပူးတွဲမြှင့်တင်ရန် ရည်ရွယ်ခြင်းဖြစ်ကာ အစိုးရအတွင်း ညွန့်ပေါင်းပါတီများက တာဝန်ယူမှုများကို မျှဝေ ဆောင်ရွက်သွားမည်ဟုလည်း ပီတာက ပြောသည်။

ညွန့်ပေါင်းပါတီများမှ သဘောတူခဲ့သော အရေးပါဆုံး သဘောတူညီချက် ၂၃ ခုမှာ အောက်ပါအတိုင်း ဖြစ်သည်။

(၁) ဒီမိုကရေစီစနစ်ကို ပြန်လည်ထိန်းသိမ်းရန်အတွက် ထိုင်းဖွဲ့စည်းပုံအခြေခံဉပဒေကို ရွေးကောက်ပွဲ အနိုင်ရ လွှတ်တော်အမတ်များ ပါသည့် ကိုယ်စားလှယ်အဖွဲ့က ပြန်လည်ရေးဆွဲရန်

(၂) စုံတွဲတိုင်းအတွက် ညီမျှသော အခွင့်အရေးရှိစေရန် လက်ထပ် ထိမ်းမြှားခြင်းဆိုင်ရာ သာတူညီမျှမှု ဥပဒေအား အတည်ပြုရန်

(၃) ဒီမိုကရေစီ နည်းလမ်းများနှင့်အတူ အစိုးရဝန်ထမ်းများ၊ ရဲတပ်ဖွဲ့၊ စစ်တပ်နှင့် တရားစီရင်ရေး လုပ်ငန်းစဉ်များ ကို ပြုပြင်ပြောင်းလဲရန်

(၄) စစ်မှု မထမ်းမနေရစနစ်မှ ကိုယ့်သဘောဆန္ဒဖြင့် စစ်မှုထမ်းခြင်းသို့ ပြောင်းလဲရန်

(၅) တောင်ပိုင်းနယ်စပ် ပြည်နယ်များတွင် တည်ငြိမ်သော ငြိမ်းချမ်းရေး လုပ်ငန်းစဉ်အတွက် ပူးပေါင်းဆောင်ရွက်ရန်

(၆) အာဏာခွဲဝေနှင့် ဘတ်ဂျက်တို့တွင် ဗဟိုချုပ်ကိုင်မှုကို ဖျက်သိမ်းရေး လုပ်ဆောင်ရန်

(၇) အကျင့်ပျက် ခြစားမှုများကို တိုက်ဖြတ်ရန်

(၈) စီးပွားရေး ပြန်လည်ဦးမော့လာစေရန်

(၉) ပြည်သူများ၏ အသက်မွေး ဝမ်းကြောင်းလုပ်ငန်း၊ စားသောက်နေထိုင်ရေးတို့နှင့် ပတ်သက်သော ဥပဒေများကို ပြင်ဆင်မွမ်းမံရန်

(၁၀) စီးပွားရေး လုပ်ငန်းများတွင် လက်ဝါးကြီးအုပ်မှုများကို ဖယ်ရှားကာ မျှတစွာယှဉ်ပြိုင်ရသော စနစ်ဖြစ်လာရန်

(၁၁) သက်ဆိုင်ရာ ဥပဒေများကို ပြင်ဆင်ခြင်းဖြင့် မြေယာခွဲဝေမှုစနစ်ကို ပြုပြင်ပြောင်းလဲရန်

(၁၂) လျှပ်စစ်မီး ထုတ်လုပ်မှုနှင့် ဈေးနှုန်းပြောင်းလဲ သတ်မှတ်ရန်

(၁၃) ဘတ်ဂျက်စနစ်သစ်တစ်ခု ထူထောင်ရန်

(၁၄) မွေးဖွားသည်မှ သေဆုံးသည်အထိ ကျယ်ပြန့်သော ဖူလုံရေး စနစ်တစ်ခု တည်ထောင်ရန်

(၁၅) မူးယစ်ဆေးဝါးပြဿနာကို အမြန်ဆုံးဖြေရှင်းရန်

(၁၆) ဆေးခြောက် ရောင်းဝယ်သုံးစွဲမှုအား ကန့်သတ်ရန်

(၁၇) စိုက်ပျိုးရေးနှင့် မွေးမြူရေးကဏ္ဍတွင် ပြုပြင်ပြောင်းလဲမှုများ လုပ်ဆောင်ရန်

(၁၈) ရေလုပ်ငန်းဥပဒေကို ပြန်လည်ရေးဆွဲရန်

(၁၉) အလုပ်သမား အခွင့်အရေးများကို မြှင့်တင်ရန်

(၂၀) ကျန်းမာရေးစနစ်ကို မြှင့်တင်ရန်

(၂၁) ပညာရေးစနစ်ကို ပြုပြင်ပြောင်းလဲရန်

(၂၂) ညစ်ညမ်းမှုများကို ဖြေရှင်းရေး ပြည်တွင်း/ပြည်ပ ပူးပေါင်းဆောင်ရွက်မှု၊ လုပ်ငန်းစဉ်များကို မြှင့်တင်ရန်

(၂၃) အာဆီယံဒေသတွင်း ဦးဆောင်မှုနှင့် နိုင်ငံတကာ စာမျက်နှာတွင် ပူးပေါင်းဆောင်ရွက်မှုများကို ပြန်လည်ထိန်း သိမ်းရေး နိုင်ငံရေးမူဝါဒပိုင်းဆိုင်ရာ ဆောင်ရွက်ချက်များကို အကောင်အထည်ဖော် ဆောင်ရွက်ရန်တို့ ဖြစ်သည်။

အချက် ၂၃ ချက်ကို လက်မှတ်ထိုးထားမှု ထုတ်ပြန်စဉ်

ညွန့်ပေါင်းပါတီများသည် အောက်ပါ အကြောင်းအရာများကို အခြေခံကာ တိုင်းပြည်အား အုပ်ချုပ်ရေးအတွက် ပူးပေါင်းဆောင်ရွက်သွားရန်လည်း သဘောတူညီခဲ့သည်။ ထိုသဘောတူညီချက်များမှာ

(၁) ပြည်သူများ၏ အခွင့်အရေးနှင့် နိုင်ငံရေး အခွင့်အရေးကို ကာကွယ်ပေးရန်

(၂) ရိုးသားဖြောင့်မတ်စွာ တာဝန်ယူ ဆောင်ရွက်ရန်

(၃) အပြန်အလှန်လေးစားမှု၊ ရိုးသားမှုတို့ဖြင့် ဆောင်ရွက်ကာ အပြန်အလှန် ထောက်ပံ့ကူညီကြရန်

(၄) ပူးတွဲ သဘောတူညီချက်ပါ အချက်အလက်များကို မချိုးဖောက်သော ပါတီတိုင်းအနေဖြင့် အစိုးရအဖွဲ့ အတွင်း ရှိ ပါတီကိုယ်စားပြု ဝန်ကြီးများ၏ စီမံခန့်ခွဲမှုဆိုင်ရာ အခွင့်အာဏာဖြင့် ထပ်တိုးမူဝါဒများကို အတည်ပြု ခွင့်ရှိခြင်း

(၅) ပူးတွဲ သဘောတူညီချက်ပါ အချက်အလက်များကို မချိုးဖောက်သော ပါတီများအနေဖြင့် ပါတီကိုယ်စားလှယ် များ၏ ဥပဒေပြု အခွင့်အာဏာဖြင့် ထပ်တိုးမူဝါဒများကို အတည်ပြုရန် အခွင့်အရေးရှိခြင်းတို့ ဖြစ်သည်။

ညွန့်ပေါင်းပါတီများကို ဦးဆောင်သည့် Move Forward Party ခေါင်းဆောင်ကို တွေ့ရစဉ်

MoU အား လက်မှတ် ရေးထိုးသည့် အထင်ကရ ဖြစ်ရပ်သည် ထိုင်းနိုင်ငံတွင် စုပေါင်းအစိုးရအဖွဲ့၏ ခေတ်သစ် တစ်ခု ထူထောင်ခြင်းနှင့် အာဏာသိမ်းမှုများ လွှမ်းမိုးခဲ့သည့် ခေတ်တစ်ခု အဆုံးသတ်ခြင်းကို ကိုယ်စားပြုကြောင်း နိုင်ငံရေး လေ့လာသုံးသပ်သူများက ပြောသည်။

ယင်းက အစပြုမှု အသစ်တစ်ခုဖြစ်ကာ ထိုင်းနိုင်ငံ၏ အနာဂတ်အတွက် မျှော်လင့်ချက်များကို ရှင်သန် လာစေ သည်ဟုလည်း မှတ်ချက်ပေးသည်။

Source: The Nation

CNI International News

ဒူဘိုင်း၊ မေလ ၂၃

အီရန် နျူကလီးယား အရေးနှင့် ပတ်သက်၍ တင်းမာမှုများ ရှိနေချိန် ယခုလအတွင်း အမေရိကန်စစ်တပ်က ၎င်းတို့၏ အင်အားပြင်း ဗုံးလက်နက်တစ်ခု၏ ဓာတ်ပုံများကို ထုတ်ဖော်ပြသခဲ့သည်ဟု အေပီသတင်းတွင် ဖော်ပြ ထားသည်။

ထိုဗုံးများကို GBU-57 ဟု ခေါ်ပြီး ယင်းသည် ယူရေနီယံ သန့်စင်မှု လုပ်ဆောင်နေသော မြေအောက်ရှိ စက်ရုံများကို ဖျက်ဆီးရန်အတွက် ရည်ရွယ်ထုတ်လုပ်ထားခြင်း ဖြစ်သည်။

ဘန်ကာဖျက် ဗုံးလက်နက်ကြီး (Massive Ordnance Penetrator) ဟုခေါ်သော GBU-57 လက်နက်များ၏ ပုံကို အမေရိကန်လေတပ်က မေလ ၂ ရက်နေ့တွင် ထုတ်ပြန်ခဲ့ခြင်း ဖြစ်သော်လည်း နောက်တွင် ပြန်ဖြုတ်ချသွားခဲ့ သည်။

ဓာတ်ပုံထဲတွင် ထိုလက်နက်နှင့် ပတ်သက်သည့် အသေးစိတ် အချက်အလက်များကို ဖော်ပြထားခြင်းကြောင့် ယခုကဲ့သို့ ပြန်ဖြုတ်ချ သွားခဲ့ပုံရသည်။

GBU-57 သည် မြေအောက် ဘန်ကာများကို ဖျက်ဆီးရေးနှင့် ပတ်သက်သည့် အမေရိကန်စစ်တပ်၏ နောက်ဆုံး လက်နက် ဖြစ်သည်။

အီရန်ရဲ့ မြေအောက် နျူကလီးယား စက်ရုံကိုတွေ့ရစဉ်

အီရန်အနေဖြင့် GBU-57 များ မရောက်ရှိနိုင်သော မြေအောက် နျူကလီးယားစက်ရုံတစ်ခု တည်ဆောက်ရေးတွင် တိုးတက်မှုများစွာ ရရှိထားသည်ဟု သတင်းများ ထွက်ပေါ်လာခဲ့ပြီးနောက် အမေရိကန်စစ်တပ်က ယခုကဲ့သို့ လက်နက်ပုံများကို လူသိရှင်ကြား ထုတ်ပြန်ခဲ့ခြင်း ဖြစ်သည်။

အီရန်၏ မြေအောက် နျူကလီးယားစက်ရုံများ တည်ဆောက် အောင်မြင်နေခြင်းနှင့် ပတ်သက်သည့် စိုးရိမ်မှုများ မြင့်တက်လာချိန် ၂၀၀၀ ပြည့်နှစ်များတွင် အမေရိကန်သည် GBU-57 များကို စတင်တီထွင်ခဲ့သည်။

လေတပ်မှ ထုတ်ပြန်ခဲ့သော လက်နက်ပုံများသည် Whiteman လေတပ်စခန်း အတွက်ဖြစ်ကာ ယင်းတွင် ဗုံးများ ကို သယ်ဆောင်နိုင်သည့် တစ်ခုတည်းသော B-2 ကိုယ်ပျောက် လေယာဉ်များ အခြေစိုက်သည်။

GBU-57 ဗုံးနှစ်လုံး ရရှိထားခြင်းကြောင့် ယင်း၏ စွမ်းဆောင်ရည်ကို စမ်းသပ်နိုင်တော့မည်ဆိုသည့် caption နှင့်အတူ ဗုံးပုံများကို တင်ခဲ့ခြင်း ဖြစ်သည်။

အီရန်ရဲ့ မြေအောက် နျူကလီးယားစက်ရုံကိုတွေ့ရစဉ်

အီရန်နျူကလီးယား အရေးနှင့်ပတ်သက်၍ တင်းမာမှုများ မြင့်တက်ချိန်တိုင်း အမေရိကန်စစ်တပ်သည် GBU-57 ပုံများကို ဖော်ပြလေ့ရှိပြီး ၂၀၁၉ ခုနှစ်ကလည်း B-2 ဗုံးကြဲ လေယာဉ်တစ်စင်းမှ GBU-57 ဗုံးနှစ်လုံး ပစ်ချလိုက် သည့် ဗွီဒီယိုဖိုင်တစ်ခုကို ထုတ်ပြန်ခဲ့ဖူးသည်။

ဗုံးပုံများကို တင်ကာ ပြန်ဖြုတ်ခဲ့ခြင်းနှင့် ပတ်သက်၍ အမေရိကန် လေတပ်ဘက်က တစ်စုံတစ်ရာ တုန့်ပြန်မှု မရှိ သေးသော်လည်း ထွက်ပေါ်လာသော ဓာတ်ပုံပါ ဗုံးတွင် ရိုက်နှိပ်ထားသည့် စာများအရ ယင်းတို့သည် ၁၂၃၀၀ ကီလို ဂရမ် အလေးချိန် ရှိသည်ဟု သိနိုင်သည်။

ထို့အပြင် ဗုံး၌ AFX-757 နှင့် PBXN-114 ကဲ့သို့ ဖောက်ခွဲရေးပစ္စည်းများ ပါဝင်ကြောင်းကိုလည်း တွေ့မြင်ရသည်ဟု လက်နက်ရေးရာ ကျွမ်းကျင်သူတစ်ဦးက ပြောသည်။

ဓာတ်ပုံပါ အချက်လက်များအရ ဗုံး၏ အလေးချိန် အများစုမှာ ယင်း၏ ထူထဲသော စတီးကိုယ်ထည်ကြောင့်ဖြစ်ပြီး ထိုစတီးကိုယ်ထည်က ဗုံးမပေါက်ခင် မြေကြီး သို့မဟုတ် ကွန်ကရစ်မျက်နှာပြင်များကို ထိုးဖောက်နိုင်ရန် ဆောင် ရွက်ပေးသည်။

သို့သော် လက်ရှိ အချိန်အထိ ဗုံး၏ စွမ်းဆောင်ရည် အတိအကျကိုမူ မသိရသေးပေ။

Source: AP

CNI International News

ဘန်ကောက်၊ မေလ ၂၃

Move Forward Party (MFP)ပါတီနှင့် ညွန့်ပေါင်းမဟာမိတ်ပါတီ(၇ ပါတီ)တို့သည် ရည်ရွယ်ချက် ကြီးမားသော ပြုပြင်ပြောင်းလဲရေး အစီအစဉ်များကို ချမှတ်ပေးမည့် သဘောတူညီချက်တစ်ခု လက်မှတ်ရေးထိုးခဲ့သည်။

ထိုသဘောတူညီချက်ထဲတွင် ဘုရင်စနစ်ကို ဖျက်သိမ်း သို့မဟုတ် ပြုပြင်ပြောင်းလဲရေးလုပ်မည်ဟု မပါဝင်ဘဲ နိုင်ငံ၏ ဘုရင်စနစ်ကို ဆက်လက် ထိန်းသိမ်းသွားရန် ကတိကဝတ်ပြုထားခြင်းဖြင့် လုပ်ဆောင်ခဲ့သည်ဟု ဘန်ကောက်ပို့စ်က ရေးသားဖော်ပြထားသည်။

တနင်္လာနေ့ ညနေပိုင်းတွင် လက်မှတ်ရေးထိုးခဲ့သော နားလည်မှုစာချွန်လွှာ (MoU) သည် ၎င်းတို့ အတူတကွ ဖွဲ့စည်းခြင်းဖြင့် လာမည့် အစိုးရသစ်အတွက် မူဝါဒဆိုင်ရာ လမ်းပြမှုတစ်ခု ဖြစ်လာလိမ့်မည်ဟု ညွန့်ပေါင်းပါတီများ က ပြောသည်။

အစိုးရသစ်၏ လုပ်ငန်းစဉ်များသည် ဖွဲ့စည်းပုံအခြေခံဥပဒေနှင့်ညီသော ဘုရင်စနစ်အပြင် တော်ဝင်မိသားစု၏ ဂုဏ်သတင်းနှင့် ရပ်တည်ချက်တို့ကို ထိခိုက်မှုမရှိစေရဟု MFP ပါတီခေါင်းဆောင် ပီတာ လင်ဂျာရိုရန်ရတ် (Pita Limjaroenrat) က ပြောသည်။

လက်မှတ် ရေးထိုးကြောင်း ကြေညာချက် မတိုင်ခင် မဟာမိတ်ပါတီများသည် ဘုရင်စနစ်ကို ကာကွယ်ရေးနှင့် ပတ်သက်၍ MFP ပါတီအား စည်းရုံးနိုင်ခဲ့သည်ဟု နီးစပ်သူ တစ်ဦးက ပြောသည်။

ထိုင်းဘုရင်ကိုတွေ့ရစဉ်

MFP ပါသည် မေလ ၁၄ ရက်က ကျင်းပခဲ့သည့် ရွေးကောက်ပွဲတွင် နေရာအများစုကို အနိုင်ရခဲ့ခြင်းဖြစ်ကာ တော်ဝင်မိသားစုနှင့် ပတ်သက်သည့် ဥပဒေကို ပြင်ဆင်လိုကြောင်း ပြောစကားကြောင့် ပြင်းထန်သော ဝေဖန်မှု များနှင့် ရင်ဆိုင်နေရသည်။

လက်မှတ် ရေးထိုးခဲ့သော မဟာမိတ်ပါတီများ(၇ ပါတီ)မှာ Pheu Thai (ဖြူးထိုင်း)ပါတီ၊ Prachachart ပါတီ။ Thai Sang Thai (ထိုင်းဆမ်ထိုင်း)ပါတီ၊ Seri Ruam Thai(စီရီ ရမ်လွန်း ထိုင်း) ပါတီ၊ Fair(ဖဲလ်)ပါတီ၊ Plung Sungkom Mai (ဖလမ် ဆန်ခွန် မိုင်)ပါတီနှင့် Peu Thai Rumphlang (ဖုထိုင်းရမ်ဖလိမ်း)ပါတီတို့ ဖြစ်သည်။

ထိုနားလည်မှု စာချွန်လွှာက ပြုပြင်ပြောင်းလဲရေးနှင့် ပတ်သက်၍ ရည်မှန်းချက်ကြီးမားကာ အားလုံး ပါဝင်မှုရှိ သော အစီအစဉ်တစ်ခုကို ရှေ့ဆက်လုပ်ဆောင်ရန် ဖြစ်သည်။

ညွန့်ပေါင်းအဖွဲ့သည် တိုက်ရိုက် ရွေးကောက်ခံရသူများနှင့်အတူ ဖွဲ့စည်းပုံအခြေခံဥပဒေသစ်တစ်ခု ရေးဆွဲခြင်းကို အလျင်အမြန် ဆောင်ရွက်နိုင်ရေး ကြိုးပမ်းသွားမည် ဖြစ်သည်။

ဗျူရိုကရေစီစနစ်၊ ရဲတပ်ဖွဲ့၊ လက်နက်ကိုင်တပ်ဖွဲ့နှင့် တရားစီရင်ရေးတို့တွင်လည်း ပြုပြင်ပြောင်းလဲမှု လုပ်ဆောင် နိုင်ရေး တွန်းအားပေးသွားမည် ဖြစ်သည်။

အစိုးရသစ်၏ အစီအစဉ်သစ်များတွင် လိင်တူလက်ထပ်ခြင်းကို အတည်ပြုမှုလည်း ပါဝင်သည်။ သို့သော် ယင်းကို ဘာသာရေး ရှုထောင့်အရ လက်မခံမှု ရှိလာနိုင်သည်။

Move Forward Party ခေါင်းဆောင် ပီတာ လင်ဂျာရိုရန်ရတ်ကို တွေ့ရစဉ်

စစ်မှု မထမ်းမနေရစနစ်မှ ကိုယ်ပိုင်သဘောဆန္ဒဖြင့် စစ်မှုထမ်းခြင်းစနစ်သို့ ပြောင်းလဲမည်လည်းဖြစ်ကာ နိုင်ငံ တောင်ပိုင်းရှိ နယ်စပ်ပြည်နယ်များတွင် တည်ငြိမ်သော ငြိမ်းချမ်းမှုရရှိရန် ဆောင်ရွက်သွားမည်။

အစိုးရသစ်သည် ဝင်ငွေမြှင့်ပေးခြင်း၊ အကျင့်ပျက် ခြစားမှု ကင်းစင်အောင် ဆောင်ရွက်ခြင်း၊ အသေးစားနှင့် အလတ်စား လုပ်ငန်းများအတွက် ငွေကြေးထောက်ပံ့မှုကို တိုးမြှင့်ခြင်းဖြင့် စီးပွားရေး ပြဿနာများကို ဖြေရှင်းရန် စီစဉ်ထားသလို အဖျော်ယမကာအပြင် စီးပွားရေးကဏ္ဍများတွင် လက်ဝါးကြီး အုပ်မှုကိုလည်း အဆုံးသတ် သွားမည် ဖြစ်သည်။

အစိုးရသစ်၏ ပြုပြင်ပြောင်းလဲရေး အစီအစဉ်များတွင် မြေယာပိုင်ဆိုင်မှု၊ လျှပ်စစ်မီးရရှိမှု၊ ပြည်သူ့အသုံးစရိတ် မြှင့်တင်မှု၊ မူးယစ်ဆေးဝါး၊ ရေလုပ်ငန်း၊ အလုပ်သမားအရေး၊ ပညာရေး၊ ကျန်းမာရေးတို့အပြင် အကျင့်ပျက် ခြစားမှု တိုက်ဖြတ်ရေးတို့လည်း ပါဝင်နေသည်။

Source: ဘန်ကောက်ပို့စ်