CNI International News

ပေကျင်း၊ နိုဝင်ဘာ ၆

တရုတ်အစိုးရသည် အနောက်နိုင်ငံများနှင့် တင်းမာမှု မြင့်တက်နေသည့်အချိန်တွင် အမျိုးသားလုံခြုံရေးကို အဓိက ထားပြီး လုပ်ဆောင်နေသကဲ့သို့ တရုတ်၏ အကျင့်ပျက်ခြစားမှု တိုက်ဖျက်ရေးအဖွဲ့က နိုင်ငံခြားရေးအရာရှိများနှင့် ကွန်မြူနစ်ပါတီ ကေဒါများကို အကျင့်ပျက်ခြစားမှုနှင့် သူလျှိုလုပ်မှုဆိုင်ရာ သတိပေးချက်များကို ထုတ်ပြန်ခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

"သံတမန်ရေးနဲ့ နိုင်ငံခြားရေးဆိုင်ရာ ကေဒါတွေဟာ ပြည်ပဆက်ဆံရေး ကိစ္စတွေမှာ အဓိက အင်အားစုတွေ ဖြစ် တယ်။ အထူးသဖြင့် ရန်လိုတဲ့ အနောက်အင်အားစုတွေနဲ့ ရင်ဆိုင်တဲ့နေရာမှာ သူတို့ဟာ ပြည်ပရေးရာ ဆက်ဆံမှု တွေအတွက် ရှေ့တန်းနေရာက ရှိနေပါတယ်" ဟု တရုတ်၏ စည်းကမ်းပိုင်းဆိုင်ရာ စစ်ဆေးရေး ဗဟိုကော်မရှင် (CCID) မှ ထိပ်သီးအရာရှိတစ်ဦးဖြစ်သူ ကျန်းကျီဝမ် (Zhang Jiwen) က နိုဝင်ဘာ ၁ ရက်တွင် ထုတ်ပြန်ခဲ့သည့် CCID မဂ္ဂဇင်းတွင် ဆောင်းပါးရေးသား ဖော်ပြခဲ့သည်။ 

"သူတို့ (သံတမန်ရေးနှင့် နိုင်ငံခြားရေးဆိုင်ရာ ကေဒါများ) တွေဟာ အကျင့်ပျက်ခြစားမှုတွေကတစ်ဆင့် ဘက်ပြောင်းခိုလှုံနိုင်ခြေ အများဆုံး အဆင့်မှာ ရှိနေပါတယ်" ဟု ကျန်းက ပြောကြားခဲ့သည်။ 

တရုတ် သမ္မတ ရှီကျင့်ဖျင်ကို တွေ့ရစဉ်

ကျန်းသည် တရုတ်ကွန်မြူနစ်ပါတီ၏ နိုင်ငံခြားရေးကို ကြီးကြပ်ရသည့် ဗဟိုနိုင်ငံခြားရေးကော်မရှင်ရုံးမှ CCID ၏ အကြီးအကဲတစ်ဦး ဖြစ်သည်။

သူရေးသားခဲ့သည့် ဆောင်းပါးထဲတွင် လျှို့ဝှက်အဆင့် သတင်းအချက်အလက်များ ပေါက်ကြားမှု အပါအဝင် များပြားလှသည့် ဌာနများအကြား လုံခြုံရေးကျိုးပေါက်နိုင်သည့် အန္တရာယ်ကို စုံစမ်းစစ်ဆေးနေကြောင်း ရေးသား ဖော်ပြခဲ့သည်။ 

"ပြည်သူ့ဘဏ္ဍာကိုသုံးပြီး ခရီးသွားတဲ့ တာဝန်ရှိသူတွေရဲ့ ခရီးစဉ်တွေအတွင်း ပုဂ္ဂလိက စီးပွားရေး လုပ်ငန်းရှင် တွေဆီက တံစိုးလက်ဆောင်တွေကို တရားမဝင် လက်ခံရယူတဲ့ ကိစ္စမျိုးတွေ အပါအဝင် ပြဿနာတွေ အများကြီး ရှိနေပါသေးတယ်" ဟု ကျန်းက ပြောကြားခဲ့သည်။ 

 ရာထူးက ဖြုတ်ခံလိုက်ရသော နိုင်ငံခြားရေးဝန်ကြီး ချင်ကန်းကို တွေ့ရစဉ်

တရုတ်နိုင်ငံတွင် ၂၀၁၂ ခုနှစ်က သမ္မတ ရှီကျင့်ဖျင် (Xi Jinping) အာဏာရလာခဲ့ချိန်ကတည်းက သောင်းနှင့်ချီ သည့် တရုတ်အရာရှိများသည် အရေးယူခံခဲ့ရသည်။ 

မကြာသေးမီ လများအတွင်းကလည်း နိုင်ငံခြားရေးဝန်ကြီး ချင်ကန်း (Qin Gang) နှင့် ကာကွယ်ရေးဝန်ကြီး လီရှန်ဖူ (Li Shangfu) တို့ကဲ့သို့ ထိပ်သီးအရာရှိများ ရာထူးမှ ဖယ်ရှားခံခဲ့ရသည်။

Source: ဘန်ကောက်ပို့စ် 

CNI International News

ရာမလာ၊ နိုဝင်ဘာ ၆

အစ္စရေး-ဟားမာ့စ် စစ်ပွဲဖြစ်ပွားနေချိန်တွင် အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken)သည် ပါလက်စတိုင်းသမ္မတ မာမွတ် အာဘက်စ် (Mahmoud Abbas) နှင့် တွေ့ဆုံပြီး ဆွေးနွေးခဲ့ သည်ဟု အေပီမှ ဖော်ပြခဲ့သည်။ 

ဘလင်ကင်သည် အစ္စရေး-ဟားမာ့စ် စစ်ပွဲနှင့်ပတ်သက်ပြီး အရှေ့အလယ်ပိုင်း ခရီးစဉ်၏ နောက်ဆုံး ခရီး တစ်ထောက် ရပ်နားမှုအဖြစ် အနောက်ဘက်ကမ်းဒေသ (West Bank) သို့ ရောက်ရှိခဲ့ချိန်တွင် အာဘက်စ်နှင့် တွေ့ဆုံခဲ့ခြင်း ဖြစ်သည်။

ကြိုတင် ကြေညာထားခြင်း မရှိသည့် အနောက်ဘက်ကမ်း ခရီးစဉ်အတွင်း ဘလင်ကင်သည် ကျည်ကာ မော်တော်ယာဉ်တန်းဖြင့် အနောက်ဘက်ကမ်းဒေသ၏ ရာမလာ (Ramallah) မြို့သို့ သွားရောက်ခဲ့ခြင်းဖြစ်သည်။

ဘလင်ကင်ကို ကျည်ကာကားနဲ့တွေ့ရစဉ်

ဘလင်ကင်သည် အနောက်ဘက်ကမ်းဒေသသို့ သွားရောက်လိမ့်မည်ဟု အိမ်ဖြူတော်က ကြိုတင် ကြေညာချက် ထုတ်ပြန် မထားသည့််တိုင် ရာမလာမြို့တွင် ဘလင်ကင်၏ ခရီးစဉ်ကို ဆန့်ကျင်ဆန္ဒပြမှုများ ဖြစ်ပွားခဲ့သည်။ 

ရာမလာမြို့တွင် ဘလင်ကင်သည် အာဘက်စ်နှင့် အစည်းအဝေး ပြုလုပ်ခဲ့သော်လည်း ၎င်းတို့နှစ်ဦးအကြား တွေ့ဆုံမှုကို အသေးစိတ် ထုတ်ပြန်ခဲ့ခြင်း မရှိပေ။

ပါလက်စတိုင်း အာဏာပိုင်အဖွဲ့ထံသို့ အခွန် လွှဲပြောင်းပေးပို့မှုများကို ပြန်ဖွင့်ပေးရန် အမေရိကန်က အစ္စရေးကို တွန်းအားပေးခဲ့ကြောင်း ဘလင်ကင်က အာဘက်စ်ကို ပြောကြားခဲ့သည်။

ဘလင်ကင်ကို ထွက်သွားရန် ဆန္ဒပြနေကြစဉ်

အာဘက်စ်ကမူ ပါလက်စတိုင်း အာဏာပိုင်အဖွဲ့သည် နိုင်ငံရေး ဖြေရှင်းချက် တစ်ခုအနေနှင့် ဟားမာ့စ်တို့ ထိန်းချုပ်ထားသည့် ဂါဇာကမ်းမြောင်ဒေသတွင် အာဏာရယူလိုကြောင်းနှင့် ဂါဇာတွင် အစ္စရေး၏ လေကြောင်း တိုက်ခိုက်မှုများကို ရှုတ်ချကြောင်း ဘလင်ကင်ကို ပြောကြားခဲ့သည်။ 

ထို့ပြင် အစ္စရေးနှင့် ဟားမာ့စ်အကြား ချက်ချင်း အပစ်အခတ်ရပ်စဲရန်လည်း အာဘက်စ်က တောင်းဆိုခဲ့ပြီး ဂါဇာ ကမ်းမြောင် ဒေသအတွင်းသို့ အစားအစာ၊ သောက်သုံးရေ၊ လောင်စာ၊ ဆေးဝါးနှင့် လူသားချင်း စာနာထောက်ထား မှုဆိုင်ရာ အကူအညီများ ပေးအပ်ခွင့် ပြုသင့်ကြောင်းလည်း ပြောကြားခဲ့သည်။

Source: အေပီ

CNI International News

ဘန်ကောက်၊ နိုဝင်ဘာ ၆

မြန်မာနိုင်ငံ၏ ရှမ်းပြည်နယ်မြောက်ပိုင်း၊ လောက်ကိုင်မြို့ရှိ ထိုင်းနိုင်ငံသား ၁၆၂ ဦးကို နေရပ်သို့ ပြန်လည် ခေါ် ဆောင်ရေးအတွက် မြန်မာအာဏာပိုင်များနှင့် ဆွေးနွေးမှုများ ပြုလုပ်ရန် ထိုင်းအမျိုးသားရဲတပ်ဖွဲ့၏ ဒုတိယ အကြီးအကဲ ရဲချုပ် ဆူရချာတီ ဟက်ပန်း (Surachate Hakparn)သည် နိုဝင်ဘာ ၆ ရက်တွင် မြန်မာသို့လာရောက် မည်ဟု ဘန်ကောက်ပို့စ်မှ ဖော်ပြခဲ့သည်။

ထိုင်းနိုင်ငံသား ၁၆၂ ဦးသည် ကိုးကန့်ကိုယ်ပိုင်အုပ်ချုပ်ခွင့်ရဒေသ၏ မြို့တော်ဖြစ်သည့် လောက်ကိုင်တွင် တရုတ် စီးပွားရေး လုပ်ငန်းရှင်များ ဖွင့်လှစ်ထားသော တရားမဝင် လုပ်ငန်းများတွင် အလုပ်လုပ်ကိုင်ရန် အင်တာနက်မှ တဆင့် လိမ်လည်သည့်် ဒုစရိုက်ဂိုဏ်းတစ်ဂိုဏ်း၏ သွေးဆောင်ဖြားယောင်းပြီး ခေါ်ယူခြင်းကို ခံခဲ့ရသည်။

နိုဝင်ဘာ ၄ ရက်က လောက်ကိုင်မြို့တွင် အွန်လိုင်းမှတဆင့် လိမ်ညာခေါ်ယူခံခဲ့ရသည့် ထိုင်းနိုင်ငံသား ၂၉ ဦးကို ၎င်းတို့ ပုန်းအောင်းနေသော နေရာတစ်ခုမှ ဟော်တယ်တစ်ခုသို့ မြန်မာအာဏာပိုင်များက ကူညီရွှေ့ပြောင်း ပေးခဲ့သည်။

လောက်ကိုင်မြို့ရှိ တိုက်ပွဲရှောင်စခန်းကိုတွေ့ရစဉ်

နောက်ပိုင်းတွင် ထိုထိုင်းနိုင်ငံသား ၂၉ ဦးသည် မြန်မာနိုင်ငံအတွင်းရှိ စစ်စခန်းတစ်ခုအတွင်း ခိုလှုံနေသည့် ထိုင်းနိုင်ငံသား ၁၃၃ ဦးနှင့် ပူးပေါင်းခဲ့၍ စုစုပေါင်း ထိုင်းနိုင်ငံသား ၁၆၂ ဦးအထိ ရှိလာခဲ့သည်။

ရဲချုပ် ဆူရချာတီက သူသည် ရန်ကုန်သို့ ရောက်ရှိချိန်တွင် ထိုထိုင်းနိုင်ငံသား ၁၆၂ ဦးကို ထိုင်းနိုင်ငံသို့ ပြန်လည် ခေါ်ဆောင်ရန် မြန်မာအာဏာပိုင်များနှင့် တွေ့ဆုံဆွေးနွေးသွားမည်ဟု ပြောကြားခဲ့သည်။ 

ထို့နောက် သူသည် ထိုင်နိုင်ငံသားများ ခိုလှုံနေသည့် တပ်မတော်၏ စစ်စခန်းသို့ သွားရောက်ပြီး ထိုစခန်းရှိ ထိုင်းနိုင်ငံသားများနှင့် တွေ့ဆုံရန် စီစဉ်ထားသည်။

ရှမ်းပြည်နယ်မြောက်ပိုင်းရှိ တပ်မတော် ရှေ့တန်းစခန်းတစ်ခုမှ တပ်သားများကိုတွေ့ရစဉ်

ထိုထိုင်းနိုင်ငံသားများထဲက အချို့သည် တရားမဝင် လူမှောင်ခို ကူးခံရသူများဖြစ်ပြီး အချို့သည် အင်တာနက်မှ တဆင့် သွေးဆောင်ဖြားယောင်းခံရပြီး မြန်မာနိုင်ငံသို့ လိမ်ညာခေါ်ဆောင်ခံရသူများဖြစ်သည်ဟု ဆူရချာတီက ပြောသည်။
မြန်မာနိုင်ငံတွင် တပ်မတော်နှင့် လူမျိုးစု လက်နက်ကိုင်များအကြား တိုက်ပွဲများ ပြင်းထန်စွာ ဖြစ်ပွားနေချိန်တွင် တပ်မတော် စစ်စခန်းအတွင်း ခိုလှုံနေရသည့် ထိုင်းနိုင်ငံသား ၁၆၂ ဦးကို တရုတ်နိုင်ငံ၊ ကူမင်း (Kunming) မြို့သို့ အရင်ဆုံး ပို့ဆောင်ပေးမည်ဖြစ်သည်။

ထိုမှတစ်ဆင့် ထိုင်းနိုင်ငံသို့ လေယာဉ်ဖြင့် ခေါ်ဆောင်မည်ဟု ဆူရချာတီက ပြောကြားခဲ့သည်။

Source: ဘန်ကောက်ပို့စ်

CNI International News 

မော်စကို၊ နိုဝင်ဘာ ၆

ရုရှားသည် နျူကလီးယား လက်နက်ထိပ်ဖူးများ တပ်ဆင်နိုင်သည့် နျူကလီးယားစွမ်းအင်သုံး Imperator Alexander III ရေငုပ်သင်္ဘောအသစ်ဖြင့် Bulava တိုက်ချင်းပစ် ပဲ့ထိန်းဒုံးကျည်တစ်စင်းကို စမ်းသပ် ပစ်လွှတ်ခဲ့ သည်ဟု ရုရှားကာကွယ်ရေးဝန်ကြီးဌာနက ထုတ်ပြန်ခဲ့ကြောင်း ရိုက်တာမှ ဖော်ပြခဲ့သည်။

ပဲ့ထိန်းဒုံးကျည် စမ်းသပ်ပစ်လွှတ်မှုသည် ရေငုပ်သင်္ဘောအသစ် စမ်းသပ်မှု၏ နောက်ဆုံးအဆင့်ဖြစ်ပြီး ရုရှား ရေတပ်အတွင်းသို့ ထည့်သွင်းရန် ဆုံးဖြတ်သွားမည်ဟု ရုရှားကာကွယ်ရေးဝန်ကြီးဌာနက Telegram တွင် ဖော်ပြခဲ့သည်။

ရုရှားသမ္မတ ပူတင် (Vladimir Putin)သည် လုံခြုံရေး ခြိမ်းခြောက်မှုများကို တန်ပြန်ရန် နိုင်ငံ၏ နျူကလီးယား အဟန့်အတားအား ထိန်းသိမ်းထားရေးအတွက် တွန်းအားပေး လုပ်ဆောင်ခဲ့သည်။

၂၀၂၂ ခုနှစ်က ယူကရိန်းကို ကျူးကျော်ခဲ့မှုနှင့်ပတ်သက်ပြီး ရုရှားနှင့် အနောက်နိုင်ငံများအကြား ဆက်ဆံရေးများ ကျဆင်းနေချိန်တွင် ပူတင်က နျူကလီးယား အင်အားကို မြှင့်တင်ရန် အားထုတ်ကြိုးပမ်းခဲ့ခြင်းဖြစ်သည်။

ရုရှားရေငုပ်သင်္ဘောကိုတွေ့ရစဉ်

ရုရှား၏ မြောက်ဘက်ကမ်းလွန် ပင်လယ်ဖြူ (White Sea) အတွင်းရှိ ရေငုပ်သင်္ဘောပေါ်မှ ပစ်လွှတ်ခဲ့သည့် Bulava ပဲ့ထိန်းဒုံးကျည်သည် ရုရှားအရှေ့ဖျားဒေသရှိ ကမ်ချက်ကာ (Kamchatka) ကျွန်းဆွယ်နှင့် ကီလိုမီတာ ထောင်ချီကွာဝေးသည့်် ပစ်မှတ်ကို ထိမှန်ခဲ့သည်ဟု ရုရှားကာကွယ်ရေးဝန်ကြီးဌာနက ထုတ်ပြန်ခဲ့သည်။

ထိုဒုံးကျည်ကို မည်သည့်အချိန်တွင် စမ်းသပ်ပစ်လွှတ်ခဲ့သည် ဆိုခြင်းကိုမူ ထုတ်ပြန်ချက်တွင် ဖော်ပြခြင်းမရှိခဲ့ပေ။

Borei အမျိုးအစား မဟာဗျူဟာမြောက် ဒုံးကျည်တပ် နျူကလီးယားစွမ်းအင်သုံး ရေငုပ်သင်္ဘော Imperator Alexander III သည် Bulava ဒုံးကျည် ၁၆ စင်းနှင့် ခေတ်မီ တော်ပီဒိုလက်နက်များ တပ်ဆင်ထားသည့်် ရေငုပ်သင်္ဘောဖြစ်သည်။ 

ထိုရေငုပ်သင်္ဘောကို ပြီးခဲ့သည့်နှစ် ဒီဇင်ဘာလက ဖွင့်ပွဲအခမ်းအနားဖြင့် ရေချခဲ့ပြီး ထိုအခမ်းအနားကို သမ္မတ ပူတင်လည်း တက်ရောက်ခဲ့သည်။ 

လက်ရှိ ရုရှားရေတပ်တွင် Borei အမျိုးအစား နျူကလီးယားစွမ်းအင်သုံး ရေငုပ်သင်္ဘော ၃ စင်းသည် တပ်တော်ဝင် တာဝန် ထမ်းဆောင်လျက်ရှိပြီး တစ်စင်းသည် စမ်းသပ်မှုများ ပြီးစီးခဲ့ကာ နောက်ထပ် သုံးစင်းကို တည်ဆောက်နေ ဆဲဖြစ်ကြောင်း ရုရှား ကာကွယ်ရေးဝန်ကြီးဌာနက ထုတ်ပြန်ခဲ့သည်။

Source: ရိုက်တာ

CNI International News

ဘေရွတ်၊ နိုဝင်ဘာ ၄

ဟစ်ဇ်ဘိုလာ (Hezbollah)ခေါင်းဆောင် ဆေးယက် ဟက်ဆန် နာဆရာလာ (Sayyed Hassan Nasrallah) သည် အစ္စရေး-ဟားမာ့စ် စစ်ပွဲနှင့်ပတ်သက်ပြီး ပထမဆုံးအကြိမ် မှတ်ချက်ပေး ပြောကြားလိမ့်မည်ဟု ရိုက်တာမှ ဖော်ပြခဲ့သည်။

အီရန်၏ ကျောထောက်နောက်ခံကို ရရှိထားသည့် ဟစ်ဇ်ဘိုလာအဖွဲ့သည် လက်ဘနွန်နှင့် အစ္စရေးနယ်စပ်တွင် အစ္စရေးတပ်ဖွဲ့များနှင့် ထိတွေ့တိုက်ပွဲများ ဖြစ်ပွားလျက်ရှိသည်။

နယ်စပ်တစ်လျှောက် အစ္စရေးနှင့်ဖြစ်ပွားခဲ့သည့် ထိတွေ့တိုက်ပွဲများအတွင်း ဟစ်ဇ်ဘိုလာ တပ်ဖွဲ့ဝင် ၅၅ ဦး သေဆုံးခဲ့သည်။ ထိုသေဆုံးသူ အရေအတွက်သည် ၂၀၀၆ ခုနှစ်က အစ္စရေးနှင့် ပထမအကြိမ် စစ်ပွဲဖြစ်ပွားပြီး နောက်ပိုင်း ဟစ်ဇ်ဘိုလာ အဖွဲ့ဝင်များ သေဆုံးမှုအများဆုံး ဖြစ်ခဲ့သည်။

အစ္စရေးဝန်ကြီးချုပ် ဘင်ဂျမင် နေတန်ယာဟုကို တွေ့ရစဉ်

ဟစ်ဇ်ဘိုလာခေါင်းဆောင် နာဆရာလာ၏ မိန့်ခွန်းမပြောကြားမီ နာရီပိုင်းအလိုတွင် ဟစ်ဇ်ဘိုလာအဖွဲ့သည် အစ္စရေး-ဟားမာ့စ် စစ်ပွဲဖြစ်ပွားနေသည့် သီတင်း ၃ ပတ်ကျော်အတွင်း အကြီးမားဆုံး တိုက်ခိုက်မှုအဖြစ် အစ္စရေး စစ်တပ်၏ စခန်းများကို ၁၉ ကြိမ်တိတိ မရပ်မနား တိုက်ခိုက်ခဲ့သည်။

အစ္စရေးကလည်း ဟစ်ဇ်ဘိုလာအဖွဲ့၏ တိုက်ခိုက်မှုကို တုန့်ပြန်သည့်အနေဖြင့် လေကြောင်းတိုက်ခိုက်မှုများ၊ တင့်ကားများ၊ အမြောက်များဖြင့် ပစ်ခတ်မှုများကို လုပ်ဆောင်ခဲ့သည်။

မည်သို့ပင်ဆိုစေ ထိုတိုက်ပွဲငယ်များသည် စစ်မြေပြင်နှင့် ဝေးကွာလွန်းသည့် နေရာများတွင် ဖြစ်ပွားခဲ့ခြင်း ဖြစ် သည်။ ဟစ်ဇ်ဘိုလာ အဖွဲ့သည် လက်နက်ကြီး ပစ်ကူ အနည်းငယ်ဖြင့်သာ အစ္စရေးကို ခြိမ်းခြောက်နိုင်ခဲ့သည်။

ဟစ်ဇ်ဘိုလာ အဖွဲ့ကို တွေ့ရစဉ်

အစ္စရေးစစ်တပ်ကမူ လက်ဘနွန်နှင့် မြောက်ပိုင်းနယ်စပ်တွင် စစ်မျက်နှာသစ် ဖွင့်ရန် ဆန္ဒမရှိကြောင်း ပြောကြားခဲ့ သည်။

အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) ကလည်း ဟစ်ဇ်ဘိုလာအဖွဲ့ အနေနှင့် အစ္စရေးနှင့် ဒုတိယအကြိမ်မြောက် စစ်ပွဲဖြစ်ပွားရန် ပြင်ဆင်နေသည့် အခြေအနေကို သတိပေးခဲ့သည်။

ဟစ်ဇ်ဘိုလာ အဖွဲ့သည် အစ္စရေးကို စစ်ပွဲဆင်နွှဲမည်ဆိုပါက အစ္စရေးဘက်က မမျှော်မှန်းနိုင်လောက်သည့် တန်ပြန် တိုက်ခိုက်မှုများကို လုပ်ဆောင်သွားမည်ဟု ၎င်းက ပြောကြားခဲ့သည်။

Source: ရိုက်တာ

CNI International News

ကိယက်ဗ်၊ နိုဝင်ဘာ ၄

ရုရှားသည် အောက်တိုဘာ ၃ ရက် နံနက်အစောပိုင်းက အကြီးမားဆုံး ဒရုန်းတိုက်ခိုက်မှုများကို ပြုလုပ်ခဲ့သဖြင့် ယူကရိန်းနိုင်ငံ အနောက်ပိုင်းနှင့် တောင်ပိုင်းရှိ အဓိက အခြေခံအဆောက်အအုံများကို ထိမှန်ခဲ့သည်ဟု ရိုက်တာမှ ဖော်ပြခဲ့သည်။

ထိုတိုက်ခိုက်မှုများကြောင့် ယူကရိန်း၏ ဒုတိယအကြီးဆုံးမြို့ဖြစ်သည့် ခါကိဗ် (Kharkiv) မြို့ရှိ လူနေအိမ်ရာများ၊ စီးပွားရေး အဆောက်အအုံများလည်း ထိခိုက်ပျက်စီးခဲ့သည်ဟု ယူကရိန်းအရာရှိများက ပြောကြားခဲ့သည်။

သီတင်းပတ်များစွာအတွင်း အပြင်းထန်ဆုံး ဒရုန်းတိုက်ခိုက်မှုအဖြစ် ယူကရိန်း အရှေ့မြောက်ပိုင်း ခါကိဗ်၊ တောင်ပိုင်းရှိ အိုဒက်ဆာ (Odesa) နှင့် ခါဆွန် (Kherson)၊ အနောက်ပိုင်းရှိ ပိုလန်နယ်စပ်အနီး လီဗစ် (Lviv) မြို့တို့ကို ရုရှားက Shahed ဒရုန်း အစင်း ၄၀ ဖြင့် တိုက်ခိုက်ခဲ့ခြင်း ဖြစ်သည်။

ယူကရိန်းနိုင်ငံအတွင်းက အဆောက်အအုံများ တိုက်ခိုက်ခံရစဉ်

ထိုဒရုန်းများထဲမှ ဒရုန်း ၂၄ စင်းနှင့် X-59 ဒုံးကျည်တစ်စင်းကို ပစ်ချနိုင်ခဲ့သည်ဟု ယူကရိန်းလေတပ်က ပြောကြား ခဲ့သည်။

"ဆောင်းရာသီ ရောက်ကာနီးအချိန်မှာ ရုရှားတပ်ဖွဲ့တွေဟာ ကျနော်တို့ရဲ့ အခြေခံ အဆောက်အအုံတွေကို ပိုပြီး တိုက်ခိုက်လာပါလိမ့်မယ်။ ကျနော်တို့ဘက်ကလည်း ရန်သူကို တုန့်ပြန်တိုက်ခိုက်သွားမှာပါ"ဟု ယူကရိန်းသမ္မတ ဇာလန်းစကီး (Volodymyr Zelenskiy) က ပြောကြားခဲ့သည်။

ထို့ပြင် ယူကရိန်းစစ်တပ်သည် မတူကွဲပြားသည့် ဒေသ ၁၀ ခုတွင် လေကြောင်းကာကွယ်ရေးစနစ်များကို ဖြန့်ကြက်ချထားသည်ဟု ဇာလန်းစကီးက ထပ်လောင်း ပြောကြားခဲ့သည်။

ရုရှားနှင့် ဖြစ်ပွားနေသည့် စစ်ပွဲအတွင်း ဒုတိယမြောက် ဆောင်းရာသီသို့ ရောက်ရှိလာခဲ့ချိန်တွင် မိမိတို့၏ စွမ်းအင် အခြေခံ အဆောက်အအုံများကို ရုရှားက လေကြောင်းတိုက်ခိုက်မှုများ ပြုလုပ်လာနိုင်သော အခြေအနေအတွက် ကြိုတင် ပြင်ဆင်ထားသည်ဟုလည်း ယူကရိန်းအာဏာပိုင်များက ပြောကြားခဲ့သည်။

ယူကရိန်းနိုင်ငံအတွင်းက အဆောက်အအုံများ တိုက်ခိုက်ခံရစဉ်

လီဗစ်မြို့တွင် ဖြစ်ပွားခဲ့သည့် တိုက်ခိုက်မှုများအတွင်း အခြေခံ အဆောက်အအုံများသည် ယခင်ကထက် ၅ ဆ ပိုပြီး တိုက်ခိုက်ခံခဲ့ရသည်ဟု လီဗစ်မြို့ အုပ်ချုပ်ရေးမှူး မက်ဆင်မ် ကိုဇက်စကီး (Maksym Kozytskiy) က ပြောကြားခဲ့သော်လည်း ထိခိုက်ပျက်စီးမှု အသေးစိတ် အချက်အလက်ကို ထုတ်ပြန်ခဲ့ခြင်း မရှိပေ။

ရုရှား၏ နောက်ဆုံးအကြိမ် ဒရုန်းတိုက်ခိုက်မှုများကြာင့် ခါကိဗ်မြို့တွင် လူနေအိမ် ၈ လုံး၊ ၃ ထပ်တိုက် အဆောက်အအုံ ၁ လုံး၊ ကားအချို့နှင့် ကားဝပ်ရှော့ရုံ တစ်ရုံတို့ ထိခိုက် ပျက်စီးခဲ့သည်ဟု ယူကရိန်း ပြည်ထဲရေးဝန်ကြီး အိုင်ဟော် ကလီမန်ကို (Ihor Klymenko) က ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ နိုဝင်ဘာ ၄

အမေရိကန် အောက်လွှတ်တော်သည် အစ္စရေးအတွက် ဒေါ်လာ ၁၄ ဒသမ ၅ ဘီလျံတန်ကြေးရှိ စစ်ရေးအကူအညီ ထောက်ပံ့ပေးမည့် အစီအစဉ်ကို အတည်ပြုပေးခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထို့ကြောင့် မဟာမိတ်ဖြစ်သည့် အစ္စရေးအပေါ် အမေရိကန်၏ ရပ်တည်ချက်နှင့် ပတ်သက်ပြီး ဒီမိုကရက်တစ်နှင့် ရီပတ်ဘလစ်ကန်ပါတီအကြား သဘောထားကွဲလွဲမှုများ ဖြစ်ပွားခဲ့သည်။

ပြည်တွင်း အခွန်ဘဏ္ဍာဌာနက ထောက်ပံ့ပေးထားသည့် ထိုအစီအစဉ်ကို နိုဝင်ဘာ ၂ ရက်က အောက်လွှတ်တော် တွင် မဲခွဲဆုံးဖြတ်ခဲ့ရာ ထောက်ခံမဲ ၂၂၆ မဲနှင့် ကန့်ကွက်မဲ ၁၉၆ မဲ ရှိခဲ့သည်။

ထိုအစီအစဉ်သည် ပြီးခဲ့သည့် သီတင်းပတ်က ရွေးကောက်ခံခဲ့ရသည့် အောက်လွှတ်တော်ဥက္ကဋ္ဌသစ် မိုက် ဂျွန်ဆင် (Mike Johnson)၏ လက်ထက်တွင် ပထမဆုံးနှင့် အထင်ရှားဆုံး ဥပဒေမူကြမ်းတစ်ခု ဖြစ်လာခဲ့သည်။

အစ္စရေးကို ကူညီပေးမည့် စစ်ရေးအထောက်အပံ့ထဲတွင် ဒေါ်လာ ၄ ဘီလျံ တန်ကြေးရှိသည့် အစ္စရေး၏ Iron Dome ဒုံးကျည် ကာကွယ်ရေးစနစ်ကို ထပ်မံဖြည့်သွင်းပေးရေး အစီအစဉ်နှင့် David's Sling ဒုံးကျည် ကာကွယ် ရေး စနစ်များ၊ အမေရိကန် လက်နက်တိုက်မှ စစ်လက်နက်ပစ္စည်းများကို လွှဲပြောင်းပေးပို့ရေးတို့ ပါဝင်ခဲ့သည်။

အောက်လွှတ်တော်ဥက္ကဋ္ဌ ဂျွန်ဆင်ကမူ ထိုအစီအစဉ်ကို ဥပဒေအဖြစ် အတည်ပြုပေးရန် အထက်လွှတ်တော်နှင့် အိမ်ဖြူတော်ကို တိုက်တွန်းခဲ့သည်။

"အခုအချိန်အထိတော့ အထက်လွှတ်တော်နဲ့ အိမ်ဖြူတော်က ဒီအစီအစဉ်ကို အတည်မပြုသေးပါဘူး။ အဲဒါကြောင့် ဒီအစီအစဉ်ကို ဥပဒေတစ်ရပ်အဖြစ် ပြဋ္ဌာန်းပေးဖို့ အထက်လွှတ်တော်နဲ့ အိမ်ဖြူတော်ကို ကျနော် တိုက်တွန်းပါ တယ်" ဟု ဂျွန်ဆင်က X လူမှုမီဒီယာတွင် ရေးသားခဲ့သည်။

မည်သို့ပင်ဆိုစေ အစ္စရေးကို စစ်ရေး အထောက်အပံ့ပေးမည့် ထိုအစီအစဉ်သည် ဥပဒေတစ်ရပ်အဖြစ် ထုတ်ပြန် ကြေညာရန် အလားအလာသည် နည်းပါးနေသည်။

အဘယ်ကြောင့်ဆိုသော် အမေရိကန်သမ္မတ ဂျိုးဘိုင်ဒန် (Joe Biden) နှင့် အထက်လွှတ်တော်မှ ဒီမိုကရက်များ သည် ယခုတင်သွင်းသည့် အစီအစဉ်၌ ယူကရိန်းအတွက် စစ်ရေး အကူအညီများ မပါသည့်အတွက် ဥပဒေအဖြစ် ပြဋ္ဌာန်းရန် ဆန့်ကျင်သည့် သဘောထားများကို ပြသခဲ့ကြသည်။

Source: အယ်လ်ဂျာဇီးယား

CNI International News

မော်စကို၊ နိုဝင်ဘာ ၄

ပိုလန်၏ လုပ်ဆောင်ချက်များသည် ရုရှား၊ ဘယ်လာရုစ် နိုင်ငံများနှင့် တိုက်ရိုက် ထိပ်တိုက်တွေ့မည့် အခြေအနေ ကို ဖြစ်စေနိုင်ကြောင်းသလို တတိယကမ္ဘာစစ်ကိုလည်း ဖြစ်စေနိုင်ကြောင်း ရုရှားသမ္မတဟောင်းဖြစ်ပြီး လက်ရှိ ရုရှား လုံခြုံရေးကောင်စီ ဒုဥက္ကဋ္ဌ ဒီမီထရီ မက်ဗီးဒက်ဗ် (Dmitry Medvedev) က ပြောကြားခဲ့သည်ဟု တာ့စ် သတင်းဌာနမှ ဖော်ပြခဲ့သည်။

"ပိုလန်နိုင်ငံရဲ့ စစ်တပ် တည်ဆောက်မှုနဲ့ ယူကရိန်းမှာ ပိုလန်ရဲ့ စစ်အင်အားတည်ရှိမှုဟာ ပိုလန်နဲ့ ရုရှား၊ ဘယ်လာရုစ် နိုင်ငံတွေအကြား တိုက်ရိုက် ထိပ်တိုက်တွေ့မှုကို ဖြစ်စေနိုင်ပါတယ်" ဟု မက်ဗီးဒက်ဗ်က Rossiyskaya Gazeta သတင်းစာ၏ ဆောင်းပါးတစ်ပုဒ်တွင် ရေးသားဖော်ပြခဲ့သည်။

"ဒီလိုအခြေအနေမျိုးမှာ ပိုလန်ရဲ့ ဆိုးယုတ်တဲ့ ရည်မှန်းချက်ကတစ်ဆင့် ဖြစ်ပေါ်လာမယ့် ခြိမ်းခြောက်မှုတွေကို မိမိတို့ မဟာမိတ် အုပ်စုတွေက သင့်တော်သလို တုန့်ပြန်သွားမှာပါ" ဟု မက်ဗီးဒက်ဗ်က ပြောကြားခဲ့သည်။

ထို့ပြင် ပိုလန်၏ အဆင်အခြင်မဲ့ လုပ်ရပ်များနှင့် နေတိုးမဟာမိတ်များက ပိုလန်ကို ထောက်ခံမှုများသည် တစ် ကမ္ဘာလုံးအတွက် အန္တရာယ်ဖြစ်စေနိုင်သည့် အကျိုးသက်ရောက်မှုများကို ပေါ်ပေါက်စေနိုင်ကြောင်း မက်ဗီးဒက်ဗ် က ပြောသည်။

ထို့နောက် ပိုလန်သည် တတိယကမ္ဘာစစ်ကို ဖြစ်ပွားစေနိုင်မည့် အခန်းကဏ္ဍတွင် ပါဝင်လာလိမ့်မည်ဟုလည်း မက်ဗီးဒက်ဗ်က Rossiyskaya Gazeta သတင်းစာ၏ အတွေးအမြင်ကဏ္ဍ ဆောင်းပါးထဲတွင် ရေးသားဖော်ပြခဲ့ သည်။

Source: တာ့စ်

CNI International News

ဘေဂျင်း၊ နိုဝင်ဘာ ၃

တရုတ်နိုင်ငံတွင် ကွယ်လွန်သွားခဲ့သည့် ဝန်ကြီးချုပ်ဟောင်း လီခဲကျင်း (Li Keqiang) အား မီးသဂြိုဟ်သည့် အခမ်းအနားကို ဘေဂျင်းမြို့တော်ရှိ တီအန်မင် (Tiananmen) ရင်ပြင်၌ နိုဝင်ဘာ ၂ ရက်က ပြုလုပ်ခဲ့သည်ဟု CNA မှ ဖော်ပြခဲ့သည်။ 

ပြည်သူ့ ဝန်ကြီးချုပ် (the people's premier) ဟု လူသိများထင်ရှားသည့် လီအား မီးသဂြိၤုဟ်သည့် အခမ်းအနားအတွင်း နိုင်ငံတော်အလံကို တစ်ဝက်လွှင့်ထူပြီး ဝမ်းနည်းကြောင်း ဖော်ပြခဲ့ကြသည်။ 

စီးပွားရေးပညာရှင်ဟောင်း တစ်ဦးဖြစ်ပြီး ပြုပြင်ပြောင်းလဲရေး လိုလားသည့် လီသည် ယခုနှစ် မတ်လက ရာထူးမှ အနားမယူမီ အချိန်အထိ တရုတ်ဝန်ကြီးချုပ်အဖြစ် ၁၀ နှစ်ကြာ တာဝန်ထမ်းဆောင်ခဲ့သူဖြစ်သည်။

လီသည် အောက်တိုဘာ ၂၇ ရက်က ရှန်ဟိုင်းမြို့တွင် ရုတ်တရက် နှလုံးဖောက်ပြီး ကွယ်လွန်သွားခဲ့ခြင်းဖြစ်ကာ ကွယ်လွန်ချိန်တွင် အသက် ၆၈ နှစ်ရှိပြီဖြစ်သည်။ 

တရားစွဲဆိုမှုများကိုလည်း ရှောင်ရှားခဲ့သည်

ထိပ်သီးအရာရှိများနှင့် နိုင်ငံသူရဲကောင်းများကို မြှုပ်နှံသည့် ဘေဂျင်းသုသာန် (Beijing cemetery) တွင် ပြုလုပ်သည့် လီ၏ ဈာပနကို တရုတ်သမ္မတ ရှီကျင့်ဖျင် (Xi Jinping) ၊ ၎င်း၏ ဇနီးသည် နှင့်အတူ တရုတ်၏ နိုင်ငံရေး အာဏာအမြင့်ဆုံးဖြစ်သည့် ကွန်မြူနစ်ပါတီ၏ ပေါ်လစ်ဗျူရို အမြဲတမ်းကော်မတီ အဖွဲ့ဝင် ၆ ဦး အပါအဝင် ဒုတိယသမ္မတ ဟန်ကျန်း (Han Zheng) လည်း တက်ရောက်ခဲ့သည်။

ရှီနှင့် ထိပ်သီး အရာရှိများသည် လီ၏ ဈာပနတွင် ငြိမ်သက်ပြီး သုံးကြိမ် ဂါရဝပြုခဲ့ကြသည်ဟု နိုင်ငံပိုင် စင်ဟွာ သတင်းအေဂျင်စီက ထုတ်ပြန်ခဲ့သည်။

ထို့ပြင် လီ၏ ဈာပနအခမ်းအနားသို့ တရုတ်သမ္မတ ဟူကျင်တောင်း (Hu Jintao) ကလည်း လွှမ်းသူပန်းခွေ ပေးပို့ခဲ့သည်ဟု စင်ဟွာက ဖော်ပြခဲ့သည်။  

တရုတ်၏ လူမှုကွန်ယက်ဖြစ်သည့် Weibo တွင်လည်း လီ၏ ဈာပနအခမ်းအနား ပြုလုပ်သည့်် အကြောင်းအရာ များက လွှမ်းမိုးခဲ့သည်။ 

တစ်ချိန်က ကွန်မြူနစ်ပါတီ ခေါင်းဆောင်နေရာအတွက် ယှဉ်ပြိုင်မည့်သူအဖြစ် ယူဆခံခဲ့ရသည့် လီသည် မကြာသေးမီနှစ်များအတွင်း ချောင်ထိုးခံခဲ့ရသည်ဟု ကျွမ်းကျင်သူများနှင့် သံတမန်များက ပြောကြားခဲ့သည်။

Source: CAN