CNI International News

ဘန်ကောက်၊ ဇွန်လ ၆

ဖခင်ဖြစ်သူ ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ဇူလိုင်လတွင် ထိုင်းနိုင်ငံ သို့ ပြန်လာမည်ဖြစ်ကြောင်း သမီးဖြစ်သူ ပေတုန်တန် အန်အင်း ရှင်နာဝပ် (Paetongtarn "Ung Ing" Shinawatra) က ပြောသည်ဟု ဘန်ကောက်ပို့စ်သတင်းတွင် ဖော်ပြသည်။

ပေတုန်တန်သည် ဖြူးထိုင်း (Pheu Thai) ပါတီ၏ ဝန်ကြီးချုပ်ကိုယ်စားလှယ်လောင်းတစ်ဦးဖြစ်ကာ ပြန်လာမည့် ရက် အတိအကျကိုတော့ မသိရသေးဟု ဆိုသည်။

ရက်အတိအကျကို မသိရသေးကြောင်း၊ သက်ဆင်က နောက်လဟုသာ ပြောကြောင်း ပေတုန်တန်က သတင်းထောက်များ၏ မေးမြန်းမှုကို ဇွန်လ ၄ ရက်နေ့တွင် ပြန်လည်ဖြေကြားခဲ့သည်။ သက်ဆင်သည် ပြည်ပြေး အဖြစ် ဒူဘိုင်းမြို့တွင် နေထိုင်နေသူဖြစ်ကာ ၎င်း၏ အသက်အရွယ်တွင် မြေးများနှင့်အတူ ရှိနေချင်သည့်အတွက် ကြောင့် ဇူလိုင်လတွင် ပြည်တော်ပြန်မည်ဟု ပြောခဲ့သည်။

ဖခင်ဖြစ်သူအား ဒူဘိုင်းအထိ သွားခေါ်ရန် စီစဉ်ထားပါသလားဟု မေးမြန်းခဲ့ရာတွင် ပေတုန်တန်က သမီးတစ်ဦး နေဖြင့် ယင်းကဲ့သို့ပြုလုပ်ကာ ဖခင်နှင့်အတူ ပြန်လာချင်ကြောင်း၊ အရမ်းစိတ်လှုပ်ရှားနေကြောင်း၊ သို့သော် ၎င်းကို ယတိပြတ် မဆုံးဖြတ်ရသေးကြောင်းနှင့် သေသေချာချာ စီစဉ်ပြီးချိန်မှသာ အားလုံးကို ထုတ်ဖော်ပြောဆိုသွားမည် ဖြစ်ကြောင်း ပြန်လည် ဖြေကြားခဲ့သည်။

“သက်ဆင် ဘာ့ကြောင့် ထိုင်းနိုင်ငံသို့ ပြန်လာရပါသလဲ”ဟု ထပ်မံမေးမြန်းခဲ့ရာတွင် သမီးဖြစ်သူက ဖခင်၏ ဆုံးဖြတ်ချက်ကို လေးစားကြောင်း၊ ယင်းကြောင့်မည်သည့် အကြောင်းပြချက်အတွက်ပင်ဖြစ်စေ ၎င်းကို ထောက်ပံ့မှုလုပ်ဆောင်သွားမည်ဖြစ်ကြောင်း ပြန်လည် ဖြေကြားခဲ့သည်။

 ရှပ်နီပါတီ အာဏာရှင်ဆန့်ကျင်ရေး ဒီမိုကရေစီ ညီညွတ်ရေးတပ်ဦးကို ထောက်ခံသူတွေဟာ ဝန်ကြီးချုပ်ဟောင်း သက်ဆင်ရှင်နာဝပ်၏ အသက် ၆၇ နှစ်ပြည့် မွေးနေ့ပွဲကို ၂၀၁၆ ခုနှစ် ဇူလိုင် ၂၆ ရက်နေ့က ဘန်ကောက်မြို့တွင် ကျင်းပခဲ့စဉ်(ဓါတ်ပုံ-ဘန်ကောက်ပို့စ်)

အဆိုပါကိစ္စနှင့်ပတ်သက်၍ မေးမြန်းခဲ့ရာတွင် Move Forward ပါတီ၏ အထွေထွေ အတွင်းရေးမှူးချုပ် ချိုင်တာဝပ် တူလာသွန်း (Chaithawat Tulathon) က ယင်းသည် သက်ဆင်၏ ကိုယ်ပိုင်ဆုံးဖြတ်ချက်သာ ဖြစ်ကြောင်း၊ ၎င်းသည် ဥပဒေနှင့်အညီ ထိုင်းနိုင်ငံသို့ ဝင်ရောက်လာခွင့်ရှိကြောင်း ဖြေဆိုခဲ့သည်။

နိုင်ငံရေးအမှုဖြင့် စွပ်စွဲခံထားရသူများအား လွတ်ငြိမ်းခွင့်ပေးရေး ဥပဒေမူကြမ်းတစ်ခုကို အဆိုပြုမည့်ပါတီ၏ အစီအစဉ်နှင့်ပတ်သက်၍ မေးမြန်းခဲ့ရာတွင် ချိုင်တာဝပ်က ယင်းသည် သက်ဆင်၏ ပြည်တော်ပြန်ခရီးစဉ်နှင့် သက်ဆိုင်မှုမရှိကြောင်း၊ ထိုဥပဒေမူကြမ်းသည် အကျင့်ပျက်ခြစားမှု၊ ရာဇဝတ်မှုတို့ကြောင့် မဟုတ်ဘဲ နိုင်ငံရေး ကိစ္စဖြင့် တရားရင်ဆိုင်နေရသူများအတွက်သာ ရည်ရွယ်ခြင်းဖြစ်ကြောင်း ဖြေဆိုခဲ့သည်။

သက်ဆင်သည် ၂၀၀၆ ခုနှစ်၊ စက်တင်ဘာ ၁၉ ရက် စစ်တပ်၏အာဏာသိမ်းမှုတွင် ရာထူးမှဖယ်ရှားခြင်း ခံခဲ့ရသူ ဖြစ်သည်။ ထိုအချိန်မှစ၍ ၎င်းသည် ၂၀၀၈ ခုနှစ် ထိုင်းနိုင်ငံတွင်းသို့ ခေတ္တလာရောက်ခြင်းမှလွဲကာ ပြည်ပတွင်သာ နေထိုင်ခဲ့သည်။

သက်ဆင်ပြည်ပရောက်ရှိနေချိန်တွင် ဗဟိုတရားရုံးချုပ်၏ အာဏာရ နိုင်ငံရေးသမားဆိုင်ရာ ရာဇဝတ်မှုဌာနခွဲက စွဲချက်လေးခုအတွက် ထောင်ဒဏ် ၁၂ နှစ် ပြစ်ဒဏ်ချမှတ်ခဲ့သည်။

Source:Bangkokpost

CNI International News

ဘရပ်ဆဲလ်၊ ဇွန်လ ၆

ရုရှားအနောက်ပိုင်းဒေသကို ယူကရိန်းလိုလားသော တပ်ဖွဲ့များ ဝင်ရောက် တိုက်ခိုက်မှုတွင် ယူကရိန်း အစိုးရသို့ ထောက်ပံ့ပေးထားသော ဘယ်လ်ဂျီယံလုပ် ရိုင်ဖယ်သေနတ်များ ပါဝင်နေခြင်းအပေါ် စုံစမ်းစစ်ဆေးမှု လုပ်ဆောင် သွားမည်ဟု ဘယ်လ်ဂျီယံဝန်ကြီးချုပ် အလက်ဇန္ဒား ဒီခရိုး (Alexander De Croo) က ပြောကြောင်း အယ်ဂျာဇီးလ် ယား သတင်းတွင် ဖော်ပြထားသည်။

The Washington Post တွင် သတင်းဖော်ပြခဲ့ပြီးနောက် ဇွန်လ ၅ ရက်တွင် ဒီခရိုးက ထိုသို့ ပြောဆိုခဲ့ခြင်း ဖြစ် သည်။

ပြီးခဲ့သည့်လ ရုရှားပိုင်နက် ဘယ်လ်ဂိုရော့ဒ် (Belgorod) ဒေသသို့ နယ်စပ်ဖြတ်ကျော် တိုက်ခိုက်မှု လုပ်ဆောင် ခဲ့သည့် Freedom of Russia Legion နှင့် Russian Volunteer Corps တို့ကဲ့သို့ ရုရှားကို ဆန့်ကျင်သော တိုက် ခိုက်ရေး သမားများသည် အမေရိကန်နှင့်ပိုလန်တို့က ယူကရိန်းအစိုးရသို့ ထောက်ပံ့ထားသော ယာဉ်များကို အသုံးပြုကာ ဘယ်လ်ဂျီယံနှင့် ချက်နိုင်ငံလုပ် ရိုင်ဖယ်များကို ကိုင်ဆောင်ထားသည်ဟု သတင်းတွင် ဖော်ပြခဲ့ခြင်း ဖြစ်သည်။

သတင်းတွင် ဖော်ပြထားသည့်အတိုင်း မှန်/မမှန် ဆိုခြင်းကို သိရှိရန်အတွက် ကာကွယ်ရေးအေဂျင်စီများသည် စုံစမ်းစစ်ဆေးမှု လုပ်ဆောင်ကာ အချက်အလက်များ စုဆောင်းနေသည်ဟု ဒီခရိုးက Radio 1 သို့ ပြောသည်။

ယူကရိန်းမြေကို ကာကွယ်ရေးအတွက် သီးသန့် ယူကရိန်းမြေပေါ်တွင်သာ အသုံးပြုရန် ဥရောပထုတ် လက်နက် များကို ယူကရိန်းအစိုးရသို့ ထောက်ပံ့ခဲ့ခြင်း ဖြစ်ကြောင်း၊ ထိုလက်နက်များ အသုံးပြုခြင်းကို တင်းကြပ်စွာ ကန့် သတ် ထားကြောင်းလည်း ၎င်းက ပြောသည်။

ဘယ်လ်ဂျီယံဝန်ကြီးချုပ် အလက်ဇန္ဒား ဒီခရိုးကို တွေ့ရစဉ်

ယခုကိစ္စကို ဘယ်လ်ဂျီယံနိုင်ငံဘက်က အလေးအနက်ထား ကိုင်တွယ် ဆောင်ရွက်သွားမည်ဟု ဝန်ကြီးချုပ်က ပြောသော်လည်း စုံစမ်းစစ်ဆေးမှုများတွင် မှန်ကန်ကြောင်း တွေ့ရှိခဲ့ပါလျှင် မည်သို့ အရေးယူ ဆောင်ရွက်မည်ကို တော့ ဖြေဆိုရန် ငြင်းဆန်သွားခဲ့သည်။

အမေရိကန်၏ လက်နက်များနှင့် စစ်ယာဉ်များကို ဘယ်လ်ဂိုရော့ဒ်ရှိ နယ်စပ် ဖြတ်ကျော် တိုက်ခိုက်မှုများတွင် အသုံးပြုနေသည် ဆိုခြင်းနှင့်ပတ်သက်၍ စုံစမ်းစစ်ဆေးမှု လုပ်ဆောင်သွားမည်ဟုလည်း အိမ်ဖြူတော် ပြောခွင့်ရ ပုဂ္ဂိုလ် ဂျွန်ကာဘီ (John Kriby) က ပြောသည်။

ပြီးခဲ့သည့်လ အယ်ဂျာဇီးလ်ယားနှင့် အင်တာဗျူး အစီအစဉ်တစ်ခုတွင် Freedom of Russia Legion အဖွဲ့၏ နိုင်ငံရေး ကိုယ်စားလှယ်ဖြစ်သူ အီယာ ပိုနိုမာရတ်ဗ် (Ilya Ponomarev) က အထက်ဖော်ပြပါ တပ်ဖွဲ့နှစ်ခုသည် အပြည်ပြည်ဆိုင်ရာတပ်ဖွဲ့ဝင်များ၏ အစိတ်အပိုင်း တစ်ခုဖြစ်သော ယူကရိန်း လက်နက်ကိုင် တပ်ဖွဲ့စာရင်းတွင် ပါဝင်နေခြင်းကြောင့် ရိုင်ဖယ်နှင့် စက်သေနတ်ကဲ့သို့ အခြေခံစစ်ဘက်သုံး အသုံးအဆောင်များသည် ယူကရိန်းရှိ တိုက်ခိုက်ရေးသမားများ၏ ပုံမှန် အသုံးအဆောင်များသာ ဖြစ်သည်ဟု ပြောခဲ့သည်။

ရုရှားပိုင်နက် ဘယ်လ်ဂိုရော့ဒ် (Belgorod)ဒေသကိုတွေ့ရစဉ်

သာမာန် အသုံးအဆောင် လက်နက်များသည် စစ်တပ်ထံမှ ရရှိကြောင်း၊ ကျန်သည့် လက်နက်ကြီးများမှာ တိုက်ပွဲ အတွင်းသိမ်းဆီး ရမိခြင်းဖြစ်ကြောင်း၊ တင့်ကားများကဲ့သို့ အကြီးစား စစ်လက်နက်များကို ရုရှားတပ်များ ဆုတ်ခွာ သွားကာ ခါကိ (Kharkiv) ဒေသမှ ရရှိခြင်းဖြစ်ကြောင်း၊ ယင်းတို့ကို ဘယ်လ်ဂိုရော့ဒ် တိုက်ပွဲတွင် ပြန်လည် အသုံး ပြုနေခြင်းဖြစ်ကြောင်း ပြောသွားခဲ့သည်။

စေတနာဝန်ထမ်း တိုက်ခိုက်ရေးသမားများ၏ ရုရှားဘက်သို့ ရုတ်တရက် ဝင်ရောက် တိုက်ခိုက်ခြင်းတွင် ယူကရိန်းစစ်တပ် ပါဝင် ပတ်သက်မှု ရှိသည်ဟုလည်း ယူကရိန်းအရာရှိများက ပြောသည်။

Source: အယ်ဂျာဇီးလ်ယာ

CNI International News

စင်္ကာပူ၊ ဇွန်လ ၅

တရုတ်ကာကွယ်ရေးဝန်ကြီး လီရှန်းဖူ (Li Shangfu)က အမေရိကန်နှင့် ထိပ်တိုက်တွေ့ဆုံမှုကို တွေ့ဆုံညှိနှိုင်းရန် ကြိုးပမ်းသွားမည်ဖြစ်ပြီး နှစ်နိုင်ငံပဋိပက္ခဖြစ်ပွားခြင်းက ကမ္ဘာကြီးအတွက် ဆိုးရွားသော ဘေးအန္တရာယ်ကို ဖြစ်စေလိမ့်မည်ဟု သတိပေးခဲ့ကြောင်း Al Jazeera သတင်းမှ ဖော်ပြခဲ့သည်။

Shangri-La Dialogue ညီလာခံ၌ စကားပြောဆိုခဲ့ရာတွင် လီက တရုတ်နှင့် အမေရိကန်တို့သည် အတူတကွ တိုးတက်လာ၍ရသည်ဟု ပြောခဲ့သည်။

တရုတ်နှင့် အမေရိကန်တို့တွင် ကွဲပြားသည့် စနစ်များနှင့် ကွဲပြားခြားနားမှု များစွာရှိကြောင်း လီက ပြောသည်။

သို့သော် ထိုအချက်က နှစ်နိုင်ငံကြား အပြန်အလှန် ဆက်ဆံရေးနှင့် နက်ရှိုင်းစွာ ပူးပေါင်း ဆောင်ရွက်မှုတို့ကို ဖော်ဆောင်ရန် ဘုံအကျိုးစီးပွား ရှာဖွေခြင်းကို တားဆီးမှု မဖြစ်သင့်ကြောင်း လီက ပြောသည်။

နှစ်နိုင်ငံကြား ပြင်းပြင်းထန်ထန် ပဋိပက္ခ ဖြစ်ပွားမှုနှင့် ထိပ်တိုက် တွေ့ဆုံမှုများက ကမ္ဘာကြီးအတွက် ပြင်းထန် သော ဘေးအန္တရာယ်ကို ဖြစ်စေလိမ့်မည်ဟုလည်း ၎င်းက ပြောသည်။

Tai Wan ကိုတွေ့ရစဉ်

တရုတ်နှင့် အမေရိကန်တို့အကြား ဆက်ဆံရေးများသည် ထိုင်ဝမ် ဒီမိုကရေစီအရေး၊ တောင်တရုတ်ပင်လယ် အတွင်း နယ်နိမိတ် အငြင်းပွားမှုအပြင် တရုတ်သို့ semiconductor chip များ တင်သွင်းခြင်းအပေါ် သမ္မတ ဘိုင်ဒန် (Biden) ၏ ပိတ်ပင်မှု စသည့် အကြောင်းအရာ မျိုးစုံကြောင့် ဆိုးရွားလျက်ရှိသည်။

နောက်ဆုံး ပေါ်ပေါက်ခဲ့သည့် တင်းမာမှုတွင် အမေရိကန်စစ်တပ်က တရုတ်ရေတပ်သည် ထိခိုက်မခံသော ထိုင်ဝမ် ရေလက်ကြားတွင်း အမေရိကန်ဖျက် သင်္ဘောတစ်စင်းအနီးတွင် အန္တရာယ်များသော လှုပ်ရှားမှုများ လုပ်ဆောင်ခဲ့ သည်ဟု စွပ်စွဲခဲ့သည်။

တရုတ်ဘက်ကလည်း အမေရိကန်သည် ထိုင်ဝမ်ဒီမိုကရေစီရေးကို အားပေးခြင်းဖြင့် ရန်စသော၊ ဒေသတွင်း ငြိမ်းချမ်းရေးနှင့် တည်ငြိမ်ရေးတို့ကို ထိခိုက်စေလျက် ရှိသည်ဟု စွပ်စွဲခဲ့သည်။

စင်္ကာပူအစည်းအဝေး၌ စကားပြောဆိုခဲ့ရာတွင် အမေရိကန်ကာကွယ်ရေးဝန်ကြီး လွိုက်အော်စတင် (Lloyd Ausitn) က အမေရိကန်သည် ထိုင်ဝမ်၏ အခြေအနေကို ဆက်လက် ထိန်းသိမ်းရန် အလေးအနက်ထား ဆောင်ရွက် နေသည်ဟု ပြောသည်။

အမေရိကန်ကာကွယ်ရေးဝန်ကြီး လွိုက်အော်စတင်ကို တွေ့ရစဉ်

ထို့အပြင် ၎င်းသည် စစ်ဘက်ဆိုင်ရာ ဆွေးနွေးပွဲ ကျင်းပရေး ကမ်းလှမ်းမှုအပေါ် တရုတ်၏ ငြင်းဆန်မှုကို ဝေဖန် ပြောဆိုခဲ့မှုကြောင့် အင်အားကြီးနိုင်ငံများကြား တင်မာမှုများကို ဆက်ရှိစေခဲ့သည်။

တရုတ်ဘက်မှ နှစ်နိုင်ငံ စစ်တပ်များအကြား ပဋိပက္ခ စီမံခန့်ခွဲရေးနှင့် ပတ်သက်၍ ပိုမိုကောင်းမွန်သော အခြေအနေ တစ်ရပ် ဖြစ်လာစေရန် အာရုံစူးစိုက်မှု အပြည့်ဖြင့် လုပ်ကိုင်ဆောင်ရွက်လိုမှု မရှိခြင်းအပေါ် စိုးရိမ်မိ သည်ဟု အော်စတင်က စင်္ကာပူအစည်းအဝေးတွင် ပြောခဲ့သည်။

ဆွေးနွေးမှု များများပြုလုပ်လေလေ၊ ပဋိပက္ခ သို့မဟုတ် ထိပ်တိုက်တွေ့ဆုံမှုကို ဖြစ်စေသည့် အထင်လွဲမှု၊ မှားယွင်း တွက်ချက်မှုများ လျော့ကျလေလေ ဖြစ်သည်ဟုလည်း အော်စတင်က ဆက်လက် ပြောဆိုခဲ့သည်။

Soure:  Aljazeera

CNI International News

လာဟိုး၊ ဇွန်လ ၅

ပါကစ္စတန်စစ်တပ်နှင့် ထောက်လှမ်းရေးအေဂျင်စီတို့သည် မိမိ၏ နိုင်ငံရေးပါတီကို ဖျက်ဆီးရန် ဗြောင်ကျကျ ကြိုးပမ်းနေကြောင်း ပါကစ္စတန်ဝန်ကြီးချုပ်ဟောင်း အီမရန်ခမ်း (Imran Khan) က စွပ်စွဲပြောဆိုခဲ့သည်။

ထို့နောက် ၎င်းကို စစ်ခုံရုံးတစ်ခုတွင် ရုံးတင်ကာ ထောင်ချပစ်လိုက်မည်ဆိုခြင်းကို သံသယမရှိကြောင်း ပြောခဲ့ သည်ဟု Reuters သတင်းတွင် ဖော်ပြထားသည်။

စစ်တပ်သည် သူ၏ Pakistan Tehreek-e-Insaf(PTI)ပါတီအား နှိမ်နင်းရန် လုပ်ဆောင်နေသည်ဟု ခမ်းက မကြာခဏဆိုသလို ပြောဆိုခဲ့ဖူးသော်လည်း ဇွန်လ ၃ ရက်နေ့ညဘက်က သူ၏လာဟိုး (Lahore) နေအိမ်တွင် ပြုလုပ်ခဲ့သည့် အင်တာဗျူး ပြောစကားများကဲ့သို့ ဗြောင်ကျကျ မရှိခဲ့ပေ။

ပါတီအား ချေမှုန်းမှုများ နောက်ကွယ်တွင် မည်သူရှိပါသနည်းဟု မေးမြန်းခဲ့ရာတွင် အဖွဲ့အစည်းတစ်ခု ရှိနေသည် ဟု ခမ်းက ပြောသည်။

PTI ပါတီထောက်ခံသူများကို တွေ့ရစဉ်

စစ်တပ် အဖွဲ့အစည်းကို ရည်ညွှန်းခြင်းဖြစ်ကြောင်း၊ ၎င်းတို့သည် လက်ရှိတွင် ပေါ်ပေါ်တင်တင် လုပ်ဆောင်လာပြီး သိုသိုသိပ်သိပ်တောင် မရှိတော့ကြောင်း ခမ်းက ပြောသည်။

ထိုပြောစကားနှင့် ပတ်သက်၍ စစ်တပ်ဘက်ကို ဆက်သွယ် မေးမြန်းခဲ့ရာတွင် ယင်း၏ ပြောခွင့်ရပုဂ္ဂိုလ်တစ်ဦးက မေးမြန်းမှုကို တုံ့ပြန်ခဲ့ခြင်း မရှိသေးပေ။

ပါကစ္စတန်စစ်တပ်သည် နိုင်ငံ၏ ၇၅ နှစ်ကြာ သက်တမ်းအတွင်း နိုင်ငံရေးတွင် တိုက်ရိုက်တစ်ဖုံ၊ သွယ်ဝိုက်၍ တစ်နည်းဖြင့် ပါဝင်ပတ်သက်နေခဲ့ကာ ယခုခမ်း၏ ပြောဆိုမှုကဲ့သို့ ပြည်သူများ၏ ဝေဖန်မှုနှင့် များများစားစား မကြုံခဲ့ရဖူးချေ။

ခမ်းနှင့် ပါကစ္စတန်စစ်တပ်တို့၏ နှစ်ရှည်ကြာ မတင်မကျ အခြေအနေသည် ခမ်းအား ထောက်ခံသူများဟု စွပ်စွဲ ခံထားရသည့် ဆန္ဒပြသူများက စစ်တပ် အဆောက်အဦများနှင့် ပိုင်ဆိုင်မှုများကို ဖျက်ဆီးခဲ့သော ပြီးခဲ့သည့် လမှစ ၍ ပိုမိုပြင်းထန်လာခဲ့သည်။

ထိုကဲ့သို့ နိုင်ငံရေးဆိုင်ရာ မတည်ငြိမ်မှုများက ဘဏ္ဍာရေးဆိုင်ရာ ပြဿနာများရှိနေသော ပါကစ္စတန်အတွက် မတည်ငြိမ်မှုများကိုလည်း ဖြစ်စေခဲ့သည်။

ယင်း၏ ဒေါ်လာ ဘီလီယံ ၃၅၀ တန် စီးပွားရေးသည်လည်း အကြွေးမဆပ်နိုင်မှု၊ စံချိန်တင် ငွေကြေးဖောင်းပွမှုကို ထိန်းချုပ်ရန်နှင့် ငွေကြေးတန်ဖိုး ကျဆင်းမှုများကို ထိန်းချုပ်ရန် ရုန်းကန်နေရသည်။

၎င်းအား ယာယီဖမ်းဆီးမှုပြီးနောက် ပေါ်ပေါက်လာခဲ့သည့် အကြမ်းဖက် ဆန္ဒပြမှုများသည် ၎င်းအား ပစ်မှတ်ထား သော လုပ်ကြံမှုများသာ ဖြစ်သည်ဟု ခမ်းက သတ်မှတ်သည်။

ထိုအကြမ်းဖက် ဆန္ဒပြမှုများကြောင့် အာဏာပိုင်များသည် ခမ်း၏ ပါတီဝင်များ အပါအဝင် လူပေါင်းများစွာကို စစ်ခုံရုံးတွင် ရုံးတင်စစ်ဆေးခဲ့သည်။

PTI ပါတီထောက်ခံသူများကို တွေ့ရစဉ်

စစ်ခုံရုံးတွင် စစ်သားများနှင့် နိုင်ငံတော်၏ ရန်သူဟု သတ်မှတ်ခံရသူများကိုသာ ပုံမှန်စစ်ဆေးလေ့ ရှိသည်။

ထိုသတ်မှတ်ချက်သည် ၎င်းအား ထောင်ချရန်အတွက် စစ်တပ်ဘက်က လုပ်သည့် တစ်ခုတည်းသော နည်းလမ်း ဖြစ်ကြောင်း ခမ်းကပြောသည်။

စစ်တပ်သည် လာမည့် နိုဝင်ဘာလ ရွေးကောက်ပွဲတွင် ၎င်းကို ပါဝင်ခွင့် မပေးလိုဟု အီမရန်ခမ်းက ပြောသည်။

၎င်းအပေါ် စွပ်စွဲထားသော စွဲချက် ၁၅၀ ခန့်သည်လည်း ပြင်းထန်မှုမရှိကြောင်း၊ ယင်းတို့ကို အရပ်ဖက် တရားရုံး တွင် စစ်ဆေးမှု လုပ်ဆောင်နိုင်ကြောင်းလည်း ခမ်းက ပြောသည်။

ထို့ကြောင့် စစ်တပ်သည် မည်သည့် နည်းနှင့်ဖြစ်စေ ၎င်းအား ထောင်ဒဏ် ပေးမည်မှာ သေချာသည်ဟုလည်း ခမ်းက ပြောသည်။

ခမ်းသည် အာမခံဖြင့် လွတ်မြောက်နေသူဖြစ်ကာ စစ်ခုံရုံးများသည် ၎င်းအား ထောင်ချရန် ရည်ရွယ်ခြင်း သက်သက်ဟုလည်း ပြောသည်။

ပါကစ္စတန် စစ်ခုံရုံးများသည် လုပ်ငန်းစဉ်များကို လျစ်လျူရှုခြင်း၊ ပွင့်လင်းမြင်သာမှု မရှိခြင်း၊ အတင်းအကြပ် ဝန်ခံ ခိုင်းခြင်းနှင့် မတရားသဖြင့် ပစ်ဒဏ် ချမှတ်ခြင်းများ ရှိသည်ဟုလည်း အပြည်ပြည်ဆိုင်ရာ လွတ်ငြိမ်းချမ်းသာခွင့် အဖွဲ့က ထုတ်ပြန်ခဲ့ဖူးသည်။

Source: Reuters

CNI International News

ဘန်ကောက်၊ ဇွန်လ ၅

Move Forward ပါတီအား စွန့်ခွာကာ လက်ရှိအစိုးရအတွင်းမှ ပါတီများနှင့် ညွန့်ပေါင်းဖွဲ့ခြင်းသည် ဖြူးထိုင်း (Pheu Thai) ပါတီအတွက် နောက်ဆုံး ရွေးချယ်စရာတစ်ခု ဖြစ်လာနိုင်သည်ဟု ပါတီ၏အရေးပါသော ခေါင်းဆောင်များမှ တစ်ဦးဖြစ်သူက ပြောသည်ဟု Thai PBS သတင်းတွင် ဖော်ပြခဲ့သည်။

လက်ရှိအချိန်တွင် ပြည်သူ့ဆန္ဒနှင့်အညီ ညွန့်ပေါင်းအဖွဲ့တစ်ခု ဖွဲ့စည်းရေးအတွက် ဖြစ်နိုင်ဖွယ်ရှိသည်များ အားလုံး ကို လုပ်ဆောင်သွားရမည်ဟု ဖြူးထိုင်းပါတီ၏ ဒုတိယခေါင်းဆောင် ဖမ်သမ် ဝီချာရာချိုင်း (Phumtham Wechayachai) က ပြောသည်။

MFP ၏ ဦးဆောင်မှုအောက်တွင် ရွေးကောက်ပွဲအလွန် ညွန့်ပေါင်းအဖွဲ့တစ်ခု ဖွဲ့စည်းရေး ပါတီရှစ်ခု၏ ကြိုးပမ်းမှု ကို ရည်ညွှန်း ပြောဆိုခြင်း ဖြစ်သည်။

သီတင်းပတ်ကုန်ပိုင်း Thai PBS သတင်းနှင့် အင်တာဗျူးတစ်ခုတွင် လွှတ်တော်အမတ်များက ပီတာအား ဝန်ကြီးချုပ်အဖြစ် လက်မခံခြင်း ရှိလာနိုင်သည်ဆိုခြင်းကို ဖမ်သမ်က မငြင်းဆန်ခဲ့ပေ။

သို့သော် ငြင်းပယ်သူများ အနေဖြင့် ဘာကြောင့် ပီတာအား လက်မခံရပါသလဲ ဆိုခြင်းအပေါ် ခိုင်မာသော အကြောင်းပြချက်တစ်ခု ပေးရမည်ဟု ၎င်းက ပြောသည်။

 ဖြူးထိုင်းပါတီ၏ ဒုတိယခေါင်းဆောင် ဖမ်သမ် ဝီချာရာချိုင်းကို တွေ့ရစဉ်

နိုင်ငံရေးပါတီ ရှစ်ခုသည် လွှတ်တော်တွင်း နေရာများစွာဖြင့် ညွန့်ပေါင်းအဖွဲ့တစ်ခု ဖွဲ့စည်း၍ MFP ပါတီ ခေါင်းဆောင် ပီတာ လင်ဂျာရိုရန်ရတ် (Pita Limjaroenrat) အား ဝန်ကြီးချုပ်အဖြစ် တင်မြောက်ရန် သဘောတူ ထားသည်။

သို့သော် ဝန်ကြီးချုပ်အဖြစ် အမည်စာရင်း သွင်းရန်အတွက် ပီတာသည် လွှတ်တော်အမတ်များ၏ ထောက်ခံမှုကို လိုအပ်သည်။

ပုဒ်မ ၁၁၂ ကို ပြင်ဆင်မည်ဆိုသည့် MFP ၏ ရပ်တည်မှုကြောင့် ပီတာအား ဝန်ကြီးချုပ်အဖြစ် တင်မြှောက်ခြင်းကို ကန့်ကွက်သွားမည်ဟု လွှတ်တော်အမတ်အများစုက ပွင့်ပွင့်လင်းလင်း ပြောဆိုထားသည်။

ပီတားအား လွှတ်တော်ဘက်ကသာ ပယ်ချခဲ့ပါလျှင် ပါတီရှစ်ခု အနေဖြင့် မည်သို့လုပ်ဆောင်မည်နည်းဟု မေးမြန်း ခဲ့ရာတွင် ဖမ်သမ်က အကြောင်းပြချက်ကို နားထောင်းရန် လိုအပ်ကြောင်း၊ ပြီးမှသာလျှင် ပါတီရှစ်ခု အနေဖြင့် မည်သို့ ဆက်လက် ဆောင်ရွက်မည်ကို ဆုံးဖြတ်သွားမည်ဖြစ်ကြောင်း ဖြေကြားခဲ့သည်။

ထိုင်းလွှတ်တော်ကိုတွေ့ရစဉ်

သို့သော် ဖမ်သမ်က ဖြူးထိုင်းအနေဖြင့် ညွန့်ပေါင်းဖွဲ့စည်းရန်အတွက် MFP ကို စွန့်ခွာကာ လက်ရှိ ပရာယွတ် အစိုးရထံမှ ပါတီများဖြင့် ပူးပေါင်းနိုင်သည် ဆိုခြင်းကိုတော့ မငြင်းဆိုခဲ့ပေ။

ယင်းက အလွန်အမင်း ခက်ခဲလိမ့်မည် ဖြစ်ကြောင်း၊ နောက်ဆုံး ရွေးချယ်စရာ တစ်ခုအဖြစ်သာ အသုံးပြုသွားမည် ဖြစ်ကြောင်း ဖမ်သမ်က ဖြေကြားခဲ့သည်။

ဖြူးထိုင်းပါတီသည် မေလ ၁၄ ရက်နေ့ ရွေးကောက်ပွဲတွင် MFP ပါတီပြီး နောက်ဒုတိယနေရာမှ အနိုင်ရရှိခဲ့သည်။

ဖြူးထိုင်းပါတီသည် လက်ရှိအစိုးရအဖွဲ့မှ ပါတီတစ်ချို့နှင့် လျှို့ဝှက်သဘောတူ ညီချက်တစ်ခု ရယူထားသည် ဆိုသည့် ကောလာဟလများလည်း ထွက်ပေါ်လျက် ရှိသည်။

သို့သော် MFP ဦးဆောင်သည့် ပါတီရှစ်ခုသည် ညွန့်ပေါင်းဖွဲ့စည်းရေးအတွက် ကတိပြုထားသည်ဟု ဖမ်သမ်က ပြောသည်။

မဲပေးရာမှ ဖြစ်ပေါ်လာသည့် ပြည်သူများ၏ ဆန္ဒကို လေးစားလိုက်နာ သွားမည်ဟုလည်း ၎င်းက ပြောသည်။

Source: Thai PBS

CNI International News

စင်္ကာပူ၊ ဇွန်လ ၃

ထိုင်ဝမ်နှင့် ပြန်လည် ပေါင်းစည်းရေးတွင် အင်အားအသုံးပြုသွားရန် အခွင့်အရေးကို လုံးဝငြင်းဆိုသွားလိမ့်မည် မဟုတ်ဟု တရုတ်ကာကွယ်ရေးဝန်ကြီး လီရှန်းဖူ (Li Shangfu) က ဇွန်လ ၁ ရက်နေ့တွင် ပြောကြောင်း South China Morning Post သတင်းတွင် ဖော်ပြထားသည်။

တစ်ချိန်တည်းမှာပင် တရုတ်ကာကွယ်ရေးဝန်ကြီးက ငြိမ်းချမ်းစွာ ပြန်လည်ပေါင်းစည်းရေးကို မျှော်လင့်ကြောင်း ဖွင့်ဟခဲ့သော်လည်း ထိုင်ဝမ်အရေး အခြားနိုင်ငံများ၏ ကြားဝင်စွက်ဖက်မှုများကို သတိပေးခဲ့သည်။

ဇွန်လ ၁ ရက်နေ့ သတင်းစာ ရှင်းလင်းပွဲတစ်ခုတွင် တရုတ်ကာကွယ်ရေးဌာနက ပြောခွင့်ရပုဂ္ဂိုလ် တန်ကီဖိန် (Tan Kefei) က လီနှင့် စင်္ကာပူကာကွယ်ရေးဝန်ကြီးတို့၏ ဆွေးနွေးပွဲအကြောင်း ထုတ်ဖော်ပြောဆိုခဲ့သလို ဝန်ကြီးနှစ်ဦး သည် ထိုင်ဝမ်အရေး ဆွေးနွေးခဲ့သည်ဟု ပြောသည်။

ထိုင်ဝမ် လွတ်လပ်ရေးအတွက် Democratic Progressive Party က တာဝန်ရှိသူများ၏ နိုင်ငံခြားမှ အထောက် အပံ့ကို ရရှိရန် ကြိုးပမ်းမှုအား သည်းခံသွားမည် မဟုတ်သလို တရုတ်အား ထိန်းချုပ်ရေးအတွက် ပြင်ပနိုင်ငံများက ထိုင်ဝမ်အား အသုံးချမည်ကိုလည်း သည်းခံမည် မဟုတ်ကြောင်း၊ အင်အားကို အသုံးမပြုပါဟု မည်သို့မှ အာမခံ ချက် မပေးနိုင်ကြောင်း ပြောခွင့်ရပုဂ္ဂိုလ်က ပြောသည်။

ထိုင်ဝမ်အာဏာရပါတီကို ရည်ညွှန်းပြောဆိုခြင်း ဖြစ်သည်။

ထိုင်ဝမ်ပြည်သူအမျိုးသမီးတစ်ဦးကို ဒုံးကျည်တစ်စင်းပစ်လွှတ်လိုက်တဲ့ နောက်ခံနဲ့အတူတွေ့ရစဉ်

တရုတ်သည် ထိုင်ဝမ်နှင့် ငြိမ်းချမ်းစွာ ပြန်လည်ပေါင်းစည်းရေးအတွက် အစွမ်းကုန် ကြိုးပမ်းသွားမည်ဟုလည်း ၎င်းက ဆက်လက် ပြောကြားသည်။

စင်္ကာပူတွင် ပြုလုပ်နေသော ရှန်ဂရီလာ လုံခြုံရေးဖိုရမ် (Shangri-La) ၏ ဘေးဆွယ်အဖြစ် ကာကွယ်ရေးဝန်ကြီး နှစ်ဦး တွေ့ရန် အမေရိကန်ဘက်က တောင်းဆိုမှုကို လီက ငြင်းဆိုခဲ့သည်ဟု အမေရိကန်မှ ထုတ်ပြန်ခဲ့သည်။

အမေရိကန်အနေဖြင့် တရုတ်နှင့် သက်ဆိုင်သော ၎င်းတို့၏ မူဝါဒများကို ပြင်ဆင်ရန်၊ တရုတ်အရေး ကြားဝင် မစွက်ဖက်ရန် လိုအပ်သည်ဟု တရုတ်ဘက်က ထုတ်ပြန်သည်။

ထိုင်ဝမ် ခေါင်းဆောင်နဲ့ အမေရိကန်လွှတ်တော်ဥက္ကဋ္ဌဟောင်း နန်စီပလိုစီကိုတွေ့ရစဉ် 

လီနှင့် အမေရိကန် ကာကွယ်ရေးဝန်ကြီး လွိုက်အော်စတင် (Lloyd Austin) တို့အကြား တွေ့ဆုံဖွယ် ရှိ/မရှိနှင့် ပတ်သက်၍ မေးမြန်းခဲ့ရာတွင်လည်း ခိုင်မာသည့် မူဝါဒများမရှိဘဲ ဆွေးနွေးပွဲများ ဖြစ်လာရန် မရှိဟု တရုတ် ကာကွယ်ရေးဌာနက တုံ့ပြန်ခဲ့သည်။

တစ်ဖက်တွင် အမေရိကန်က တရုတ်နှင့် ဆက်ဆံရေးများကို ခိုင်မာအောင် မြင့်တက်လိုသည်ဟု ပြောနေသော် လည်း တစ်ဖက်တွင် ၎င်းတို့သည် တရုတ်၏ စိုးရိမ်မှုများကို လျစ်လျူရှုကာ၊ အခက်အခဲများကို ဖြစ်စေရုံမက နှစ်နိုင်ငံ စစ်တပ်များအကြား အပြန်အလှန် ယုံကြည်မှုကို လျော့ပါးစေသည်ဟု တရုတ်ကာကွယ်ရေးဌာန ပြောခွင့် ရပုဂ္ဂိုလ်က ပြောသည်။

ပရမ်းပတာ အခြေအနေများ ဖြစ်ပွားခြင်းကို ကာကွယ်တားဆီးရန် နှစ်နိုင်ငံကြား ဆက်ဆံရေးကို မြှင့်တင်လိုခြင်း ဖြစ်သည်ဟု အမေရိကန်ဘက်က ထုတ်ပြန်ထားသည်။

Source: အာတီ

CNI International News

ဒါကာ၊ ဇွန်လ ၃

ရဲတပ်ဖွဲ့နှင့် ဆီနီဂေါ အတိုက်အခံ ခေါင်းဆောင် အူစမာနီဆွန်ကို(Ousmane Sonko)အား ထောက်ခံသူများ အကြား ပဋိပက္ခများ ကြောင့် လူ ၉ ဦး သေဆုံးခဲ့ရသည်ဟု ဆီနီဂေါအစိုးရက ဇွန်လ ၂ ရက်နေ့တွင် ပြောကြား ခဲ့သည်ဟု အေပီမှ ရေးသားခဲ့သည်။

အကြမ်းဖက်မှုများ ဖြစ်ပွားပြီးနောက်တွင် အာဏာပိုင်များက လူမှုကွန်ယက် အသုံးပြုမှုများကိုလည်း ပိတ်ပင်မှု လုပ်ဆောင်ထားသည်။

သေဆုံးမှုများသည် ဆွန်ကို နေထိုင်ရာနှင့် မြို့တော်ဝန်အဖြစ် ဆောင်ရွက်သော မြို့တော် ဒါကာ (Dakar)နှင့် တောင်ပိုင်းရှိ ဇီချင်ချော် (Zinguinchor) မြို့တို့တွင် အဓိက ဖြစ်ပွားခဲ့သည်ဟု ပြည်ထဲရေးဝန်ကြီး အန်တိုနီဖိလစ် အဒီယိုလာယီ ဒီအိုမီ (Antoine Felix Abdoulaye Diome) က ကြေညာချက် တစ်စောင်တွင် ပြောသည်။

Facebook၊ WhatsApp နှင့် Twitter တို့ကဲ့သို့ အကြမ်းဖက်မှုများကို လှုံ့ဆော်ရန် ဆန္ဒပြသူများ အသုံးပြုသော လူမှုကွန်ယက်တချို့ကို ခေတ္တပိတ်ပင် ထားသည်ဟုလည်း ၎င်းက ပြောသည်။

ပြည်သူများနှင့် ပိုင်ဆိုင်မှုများ ဘေးကင်းရေးကို အာမခံချက် ပေးနိုင်ရန် ဆီနီဂေါအစိုးရသည် လိုအပ်သည့် ဆောင်ရွက်ချက်ကို ချမှတ်ဆောင်ရွက်ထားကြောင်း၊ နိုင်ငံတွင်း လုံခြုံရေးကို တိုးမြှင့်ဆောင်ရွက် သွားမည် ဖြစ်ကြောင်းလည်း ဒီအိုမီက ပြောသည်။

ဆွန်ကိုအား ထောက်ခံသူများနှင့် ရဲတပ်ဖွဲ့တို့အကြား ပဋိပက္ခများ ဆက်လက် ဖြစ်ပွားနေခြင်းကြောင့် မြို့၏ အစိတ်အပိုင်းတချို့တွင် စစ်တပ်ကို တပ်ဖြန့်ထားရသည်။

ဆီနီဂေါ အတိုက်အခံ ခေါင်းဆောင် အူစမာနီဆွန်ကိုအား တွေ့ရစဉ်

ဇွန်လ ၁ ရက်တွင် ဆွန်ကိုအား လူငယ်များကို အလွဲသုံးစားလုပ်မှုဖြင့် ပြစ်ဒဏ် ချမှတ်ခဲ့သော်လည်း အနှိပ်ပညာ ရှင် အမျိုးသမီးတစ်ဦးကို အဓမ္မကြံစည်မှု၊ သူမကို အသက်အန္တရာယ် ခြိမ်းခြောက်မှု စသည့် စွဲချက်များကိုတော့ တရားသေ လွှတ်ပေးခဲ့သည်။

ဒါကာတွင် ပြုလုပ်ခဲ့သည့် တရားရုံးစစ်ဆေးမှုကို တက်ရောက်ခဲ့ခြင်း မရှိသည့် ဆွန်ကိုအား ထောင်ဒဏ် ၂ နှစ် ချမှတ်ခဲ့ခြင်း ဖြစ်သည်။

လက်ရှိအချိန်အထိ ဆွန်ကိုအား ဖမ်းဆီးရန် ဝရမ်းထုတ်ပြန်ခြင်း မရှိသေးဟုလည်း ရှေ့နေဖြစ်သူက ပြောသည်။

ဆွန်ကိုသည် ဆီနီဂေါ၏ ၂၀၁၉ သမ္မတ ရွေးကောက်ပွဲတွင် တတိယနေရာ ရရှိခဲ့သူဖြစ်ပြီး နိုင်ငံတွင်းရှိ လူငယ်များ ကြားတွင် အထူးထင်ရှားသည်။

လက်ရှိ ၎င်းအပေါ် စစ်ဆေးမှုများသည် ၂၀၂၄ သမ္မတ ရွေးကောက်ပွဲ မဝင်နိုင်စေရန် ယခု တာဝန်ယူထားသည့် အစိုးရ၏ ကြိုးပမ်းမှုဟုလည်း ထောက်ခံသူများက ယုံကြည်လျက် ရှိသည်။

သမ္မတ မက်ကီဆောလ်ကို တွေ့ရစဉ်

ဆွန်ကိုသည် သမ္မတ မက်ကီဆောလ် (Macky Sall)၏ ပင်မ အတိုက်အခံ တစ်ဦးအဖြစ် သတ်မှတ်ခံထားရသူ ဖြစ်ကာ တတိယအကြိမ်မြောက် သမ္မတသက်တမ်းကို ဝင်မပြိုင်ပါဟု လူသိရှင်ကြား ထုတ်ပြန်ရန်လည်း သမ္မတကို တိုက်တွန်းထားသူ ဖြစ်သည်။

ဆွန်ကိုအား ပြစ်ဒဏ် ချမှတ်ပြီးချိန်မှစ၍ နိုင်ငံတစ်ဝန်းလုံး၌ ပဋိပက္ခများ ပေါ်ပေါက်လာခဲ့ကာ ဆန္ဒပြသူများက ကျောက်တုံးများဖြင့် ပစ်ခြင်း၊ ကားများကို မီးရှို့ခြင်း၊ တချို့အရပ်များတွင် အတားအဆီးများကို ပြုလုပ်ခြင်းတို့ လုပ်ဆောင်ခဲ့သည်။

ထို့နောက် ၎င်းတို့ကို မျက်ရည်ယို ဗုံးများဖြင့် ရဲတပ်ဖွဲ့က တုန့်ပြန်ခဲ့သည်။

ထိုသို့ ဆန္ဒပြသူများနှင့် ရဲတပ်ဖွဲ့တို့၏ ထိပ်တိုက် တွေ့ဆုံမှုများကြောင့် ဒါကာရှိ ပင်မတက္ကသိုလ်ကို ပိတ်ခဲ့ရသည်။

Source: AP

CNI International News

ဘန်ကောက်၊ ဇွန်လ ၃

ပြည်ပြေးအဖြစ် ၁၇ နှစ်ကြာ နေထိုင်ခဲ့ပြီးနောက်တွင် ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ဇူလိုင်လတွင် ထိုင်းနိုင်ငံသို့ ပြန်လာရန် စိတ်ပိုင်းဖြတ်ထားသည်ဟု Thai PBS World သတင်း တွင် ဖော်ပြထားသည်။

၎င်း ထွက်ပြေးရသည့် အကြောင်းအရင်းဖြစ်သော ထောင်ဒဏ် ၁၀ နှစ် ပြစ်ဒဏ်ကို ပြန်လည် ကျခံရနိုင်ခြေ ရှိသည့် အခြေအနေတွင် ဖြစ်သည်။

သက်ဆင်၏ မွေးနေ့သည် ဇူလိုင် ၂၆ ရက်နေ့တွင် ဖြစ်သည်။

စင်္ကာပူတွင် မှတ်တမ်းတင်ထားသည့် မကြာသေးခင်က ပြုလုပ်ခဲ့သော အင်တာဗျူးတစ်ခု၌ သက်ဆင်က ပြည် တော်ပြန်မည့် ၎င်း၏ အစီအစဉ်ကို ထပ်လောင်း ပြောကြားခဲ့သည်။

သက်ဆင် သူ့ရဲ့ သားသမီး သုံးဦး ဓာတ်ပုံကိုင်ထားစဉ်

ယခင်က ပြောခဲ့သည့်အတိုင်းပင် ထပ်မံ အတည်ပြုကြောင်း၊ သူ၏ သမီးဖြစ်သူ ရက်သတ်မှတ်မည့် အချိန်ကို စောင့်နေကြောင်း သက်ဆင်က ပြောခဲ့သည်။

မြေး ၇ ဦးကို စောင့်ရှောက်နိုင်လိုကြောင်း၊ ထိုမှသာ သူတို့၏ မိဘများထံမှ ဝန်ထုပ်ဝန်ပိုးများကို လျှော့ချ နိုင်မည် ဖြစ်ကြောင်း၊ သူ၏သားသမီးများသည် ပြန်တော်ပြန် အစီအစဉ်အတွက် အာရုံစိုက် ဆောင်ရွက်နေ ကြောင်းလည်း သက်ဆင်က ပြောသည်။

သမီးဖြစ်သူ ဖြူးထိုင်းပါတီက ပေတုန်တန်ကိုတွေ့ရစဉ်

သက်ဆင်က “မိမိအနေဖြင့် နိုင်ငံရေး ကစားပွဲသို့ ထပ်ဝင်ရန် အသက်ကြီးသွားပြီ ဖြစ်ကြောင်း၊ ကျနော့်ခေတ် ကုန် သွားခဲ့ပါပြီ။ ယခုအချိန်သည် လူကြီးများအတွက် မဟုတ်ဘဲ မျိုးဆက်သစ်များအတွက် အချိန်ဖြစ်သည်။ အသက် ကြီး သူများသည် လူငယ်များနှင့်အပြိုင် မကြဲနိုင်တော့သည့်အတွက် လူငယ်များကို ဖိအားပေးခြင်းထက် အကြံ ဉာဏ်သာပေးရမည်။ အသက်ကြီးသူများသည် လူငယ်များကို နားလည်မှု ပေးနိုင်ရမည်ဖြစ်ပြီး ယင်းက ထိုင်းနိုင်ငံ တွင်နေကာ အင်္ဂလိပ်စာကို လေ့လာသူများနှင့် ဆင်တူသည်။ ထိုင်းနိုင်ငံမှ အင်္ဂလိပ်စာ လေ့လာသူများသည် နိုင်ငံ ခြားတွင် ရှင်သန်ကြီးပြင်း လာသူများကို ဘာသာစကားအရာတွင် လိုက်မမှီသကဲ့သို့ပင် ဖြစ်သည်”ဟု ပြောသည်။

သက်ဆင်က သူ့တွင် ရှည်လျားသော သမိုင်းကြောင်း ရှိခဲ့သည့်တိုင် အနာဂတ်သည် ကာလတိုသာ ရှိတော့ ကြောင်း၊ သို့သော် မျိုးဆက်သစ်များတွင် သမိုင်းကြောင်း ခိုင်ခိုင်မာမာ မရှိသည့်တိုင် ရှည်လျားသည့် အနာဂတ် ရှိ ကြောင်း၊ လူကြီးများထက် စာရင်ပို၍ ရှည်လျားသော အနာဂတ်ကို ပိုင်ဆိုင်ထားသည့် လူငယ်များသည် လူကြီးများ ထက် ပိုကောင်းသော အနာဂတ်အမြင်ကို ပိုင်ဆိုင်ထားသည်ဟု သက်ဆင်က ပြောသည်။

ကမ္ဘာသစ် တစ်ခုဆီ ရောက်ရှိနေပြီလားဟု မေးမြန်းခဲ့ရာတွင် သက်ဆင်က Yes ဟု ပြန်ဖြေခဲ့ရာ အင်္ဂလိပ်ဘာသာ တွင် ယင်းကို စံပြောင်းလဲမှုဟု ခေါ်ကြောင်း၊ လူငယ်များ၏ တွေးခေါ်ပုံသည် ပြောင်းလဲလာခဲ့ပြီဖြစ်ကြောင်း၊ လူကြီးများက ၎င်းတို့ လိုက်မှီသည်ဟု ပြောကြောင်း၊ စာအများကြီး ဖတ်သည့်တိုင် အနေအထား တစ်ခုထိသာ မြင့်တက်လာကြောင်း၊ လူငယ်များ၏ တွေးခေါ်နိုင်စွမ်းအထိ မြင့်တက်လာနိုင်ခြင်း မရှိကြောင်းလည်း သက်ဆင်က ပြန်လည် ဖြေကြားခဲ့သည်။

Source: Thai PBS

CNI International News

ကိတ်တောင်း၊ ဇွန်လ ၂

အနောက်အုပ်စုအား ယှဉ်ပြိုင်ရန် ရည်မှန်းချက်ဖြင့် ဖွဲ့စည်းထားသည့် BRICS အဖွဲ့၏ နိုင်ငံခြားရေးဝန်ကြီးများ အစည်းအဝေးတွင် ပူတင်အား ဖမ်းဝရမ်းထုတ်ထားသည့် အရေးကိစ္စသာ ကြီးစိုးခဲ့ကြောင်း ရိုက်တာသတင်းမှ ဖော်ပြခဲ့သည်။

တောင်အာဖရိကတွင် ပြုလုပ်ခဲ့သော အစည်းအဝေးတွင် သြဂုတ်လ ညီလာခံသို့ ရုရှားသမ္မတ ပူတင် (Putin) တက်ရောက်မည်ဆိုလျှင် အဖမ်းခံရမည်လားဆိုသည့် မေးခွန်းက လွှမ်းမိုးထားခဲ့သည်။

ရုရှားသမ္မတ ပူတင်သည် ဂျိုဟန်နစ္စဘာ့ဂျ် (Johannesburg) ရှိ BRICS ထိပ်သီး အစည်းအဝေးသို့ တက်ရောက် လျှင် ၎င်းကို ဖမ်းဆီးမည်လားဆိုသည့် ကိစ္စနှင့်ပတ်သက်၍ တောင်အာဖရိကနိုင်ငံက အလေးအနက်ထား စဉ်းစား နေသည်ဟု နိုင်ငံခြားရေးဝန်ကြီး နာလီဒီ ပန်ဒေါ (Naledi Pandor) က ပြောသည်။

ပူတင်သည် စစ်ရာဇဝတ်မှုဆိုင်ရာ စွပ်စွဲချက်များဖြင့် နိုင်ငံတကာရာဇဝတ်မှုခုံရုံး (ICC)၏ ဖမ်းဝရမ်း ထုတ်ခြင်းကို ခံထားရသူ ဖြစ်သည်။

ICC ၏ အဖွဲ့ဝင် နိုင်ငံတစ်ခု အနေဖြင့် တောင်အာဖရိကသည် ပူတင်အား ဖမ်းဆီးရန် တာဝန်ရှိနေသည်။

ရုရှားကိုယ်စားလှယ်နဲ့ အာဖရိကကိုယ်စားလှယ်တွေ့ဆုံစဉ်

ပန်ဒေါသည်လည်း ဘရာဇီးလ်၊ ရုရှား၊ အိန္ဒိယနှင့် တရုတ်တို့မှ ကိုယ်စားလှယ်များ ပါဝင်သော ဆွေးနွေးပွဲ ပထမ အကျော့သို့ ရောက်ရှိလာချိန်တွင် ပူတင်အား ဖမ်းဆီးမည်လားဆိုသည့် မေးခွန်းအား တရစပ် မေးမြန်းခြင်းနှင့် ရင်ဆိုင်ခဲ့ရသည်။

ထိုမေးခွန်းကို သမ္မတ စီရယ် ရာမာဖိုဆာ (Cyril Ramaphosa)က တောင်အာဖရိကသည် မည်သည့် အနေအထားတွင် ရှိနေမည်လဲဆိုခြင်းဖြင့် အဖြေပေးသွားမည်ဟု ပန်ဒေါက ပြောသည်။

နောက်ပိုင်းတွင် ပြုလုပ်ခဲ့သော သတင်းစာ ရှင်းလင်းပွဲတွင်လည်း တောင်အာဖရိက နိုင်ငံခြားရေးဝန်ကြီးသည် ပူတင်နှင့် ပတ်သက်သော မေးခွန်းများအား ဖြေဆိုခြင်းကို ရှောင်လွှဲသွားခဲ့သည်။

ပူတင်သည် ရုရှားတို့ သိမ်းပိုက်ထားရာ ယူကရိန်းမြေမှ ကလေးများကို အတင်းအကြပ် ရွှေ့ပြောင်းခဲ့ကြောင်း မတ်လတွင် ICC က စွပ်စွဲခဲ့သည်။
ထိုစွပ်စွဲမှုများ အားလုံးကို ရုရှားဘက်က ငြင်းထားသည်။

BRICS အဖွဲ့၀င် အလံများကိုတွေ့ရစဉ် 

တောင်အာဖရိကသည် ဇန်နဝါရီလတွင်လည်း ပူတင်အား ဖိတ်ခေါ်ခဲ့သေးသည်။ လက်ရှိ အချိန်အထိ ပူတင်က ၎င်း၏ အစီအစဉ်နှင့်ပတ်သက်၍ အတည်မပြုသေးဘဲ ကရင်မလင်ဘက်ကလည်း ရုရှားသည် သင့်တော်သော အနေအထားတစ်ခုဖြင့် ပါဝင် ဆောင်ရွက်သွားမည်ဟုသာ ပြောသည်။

ဆွေးနွေးပွဲတွင် နိုင်ငံခြားရေးဝန်ကြီးများသည် အားလုံးပါဝင်မှုရှိသော ကမ္ဘာ့အရေး၌ အဖွဲ့၏ လွှမ်းမိုးမှုကို တည်ဆောက်ရေးနှင့် ပတ်သက်သည့် ၎င်းတို့၏ ရည်ရွယ်ချက်ကို အာရုံစိုက်နိုင်ရန် ကြိုးပမ်းခဲ့ကြသည်။

ကမ္ဘာ့စီးပွားရေး အင်အားကြီး နိုင်ငံများနှင့်ပတ်သက်၍ ပြောဆိုရာတွင် အိန္ဒိယနိုင်ငံခြားရေးဝန်ကြီး ဆူဘရာ မန်ယမ် ဂျိုင်ရှန်ကာ (Subrahmanyam Jaishankar)က နိုင်ငံပေါင်းများစွာသည် ၎င်းတို့ပြုသမျှ နုရသည့် အခြေအနေတွင် ရှိနေကြောင်း၊ ထို့ကြောင့် ကုသမဂ္ဂလုံခြုံရေးကောင်စီ အပါအဝင် ကမ္ဘာလုံးဆိုင်ရာ အကြောင်း အရာများအတွက် ဆုံးဖြတ်ချက်ပေးသည့် အခြေအနေကို ပြောင်းလဲရန် လိုအပ်သည်ဟု ပြောသည်။

နည်းလမ်းဟောင်းများသည် ပြောင်းလဲသော အခြေအနေ သစ်များကို မဖြေရှင်းနိုင်တော့ကြောင်း၊ BRICS သည် ပြောင်းလဲမှုအတွက် ပြယုဂ်ဖြစ်ကာ မဖြစ်မနေ ဆောင်ရွက်ရမည်ဖြစ်ကြောင်း အိန္ဒိယဝန်ကြီးက ပြောခဲ့သည်။

Source: ရိုက်တာ