CNI International News

ကိယက်ဗ်၊ ဒီဇင်ဘာ ၉

ယူကရိန်း၏ ရှေ့တန်းစစ်မြေပြင်အနီးရှိ လျှပ်စစ်ဓာတ်အားပေး စက်ရုံတစ်ရုံကို လက်နက်ကြီး ထိမှန်ခဲ့ပြီးနောက် လျှပ်စစ်ဓာတ်အားများကို ချွေတာရန် ယူကရိန်းအာဏာပိုင်များက ဒေသခံများကို တိုက်တွန်းခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထိုသတိပေးချက်သည် အပူချိန်များ အလွန်အမင်း ကျဆင်းနေသည့် ဆောင်းရာသီ ကာလအတွင်း ပထမဆုံး သတိပေးချက် ဖြစ်သည်။

ပြီးခဲ့သည့်နှစ်က ယူကရိန်း၏ စွမ်းအင် အရင်းအမြစ်များအပေါ် ရုရှား၏ တိုက်ခိုက်မှုများကြောင့် ယူကရိန်းတွင် လျှပ်စစ်ဓာတ်အား ပြတ်တောက်မှုများ ဖြစ်ပွားခဲ့ပြီးနောက် ရုရှားသည် ယခုနှစ် ဆောင်းရာသီတွင်လည်း ယူကရိန်း၏ စွမ်းအင်အခြေခံ အဆောက်အအုံများကို တိုက်ခိုက်မှုများအား အရှိန်မြှင့်တင်ရန် စီစဉ်ထားကြောင်း ယူကရိန်း အရာရှိများက ပြောသည်။

"ဒီနေ့ မွန်းလွဲပိုင်းမှာ ရန်သူတွေဟာ ရှေ့တန်း စစ်မြေပြင်မှာရှိတဲ့ စွမ်းအင်စက်ရုံတစ်ရုံကို တိုက်ခိုက်ခဲ့ပါတယ်။ လက်နက်ကြီးနဲ့ ပစ်ခတ်တိုက်ခိုက်မှုကြောင့် စက်ရုံမှာ အကြီးအကျယ် ထိခိုက်ပျက်စီးသွားခဲ့ပါတယ်" ဟု ယူကရိန်းစွမ်းအင်ဝန်ကြီးဌာနက ပြောသည်။

မည်သည့်စက်ရုံ ထိခိုက်ပျက်စီးခဲ့သည်ဆိုခြင်းကို အသေးစိတ် ထုတ်ပြန်ခဲ့ခြင်း မရှိသော်လည်း ထိုစက်ရုံ၏ ဓာတ်အားပေး ယူနစ်နှစ်ခု ရပ်တန့်သွားခဲ့သဖြင့် ထိုစက်ရုံ၏ ဓာတ်အားလိုင်းတွင် ယာယီ လျှပ်စစ်ဓာတ်အား ပြတ်တောက်မှု ဖြစ်ပွားခဲ့သည်ဟု ယူကရိန်းစွမ်းအင်ဝန်ကြီးဌာနက ထုတ်ပြန်ခဲ့သည်။

ထို့ကြောင့် စွမ်းအင်ဝန်ကြီးဌာန အနေနှင့် လျှပ်စစ်ဓာတ်အားသုံးစွဲမှု အမြင့်ဆုံး အချိန်ကာလအတွင်း စီးပွားရေး အရရော၊ အခြေအနေအရပါ လျှပ်စစ်ဓာတ်အား သုံးစွဲမှုများကို ချွေတာခြင်းဖြင့် စွမ်းအင်ဝန်ကြီးဌာန၏ အင်ဂျင်နီယာများကို တစ်ဖက်တစ်လမ်းမှ ကူညီပေးကြရန် မေတ္တာရပ်ခံကြောင်း ထုတ်ပြန်ချက်တွင် ဖော်ပြခဲ့ သည်။

အပူချိန်များ လျော့ကျမှု၊ အရေးပေ ါ်ပြင်ဆင်မှုများနှင့် ဆိုလာစွမ်းအင်စနစ် အားနည်းမှုများသည် လျှပ်စစ် ဓာတ်အားပြတ်တောက်မှု အခြေအနေကို ပိုမိုဆိုးရွားစေကြောင်း ယူကရိန်းဝန်ကြီးချုပ် ဒန်နိစ် ရှမိုင်ဟယ် (Denys Shmygal) က ပြောကြားခဲ့သည်။

ထို့ကြောင့် ယူကရိန်းအစိုးရနှင့် စွမ်းအင်ကဏ္ဍမှ တာဝန်ရှိသူများသည်  မနက် ၉ နာရီမှ ည ၇ နာရီအတွင်း လျှပ်စစ်ဓာတ်အားသုံးစွဲမှုများကို လျှော့ချရန် လူတိုင်းကို မေတ္တာရပ်ခံကြောင်း ရှမိုင်ဟယ်က လူမှုမီဒီယာတွင် ရေးသားဖော်ပြခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဒီဇင်ဘာ ၉

မြန်မာနိုင်ငံတွင် ဖြစ်ပွားနေသည့် တိုက်ပွဲများကြောင့် အိုးမဲ့အိမ်မဲ့ ဖြစ်ခဲ့ရသူများကို လူသားချင်း စာနာထောက်ထား မှုဆိုင်ရာ အကူအညီများပေးရန်အတွက် အထူးတာဝန်အဖွဲ့ ဖွဲ့စည်းသွားမည်ဖြစ်ကြောင်း ရိုက်တာမှ ဖော်ပြခဲ့ သည်။

ထိုအထူးတာဝန်အဖွဲ့သည် အခြား အကူအညီပေးရေး အေဂျင်စီများနှင့်လည်း ပူးပေါင်းဆောင်ရွက်သွားမည်ဟု ထိုင်းနိုင်ငံခြားရေးဝန်ကြီးဌာနက ဒီဇင်ဘာ ၉ ရက်တွင် ပြောကြားခဲ့သည်။

မြန်မာနိုင်ငံနှင့် အရှေ့တောင်အာရှနိုင်ငံများအသင်း (အာဆီယံ)၊ နိုင်ငံတကာ အသိုင်းအဝိုင်းတို့အကြား ခိုင်မာသည့် ပူးပေါင်းဆောင်ရွက်မှုများကို ဖြစ်ပေါ်စေရန် ထိုအစီအစဉ်က အထောက်အကူ ပြုပေးလိမ့်မည်ဟု မျှော်လင့် ကြောင်း ထိုင်းနိုင်ငံခြားရေးဝန်ကြီးဌာနက ပြောကြားခဲ့သည်။

မြန်မာနိုင်ငံ၏ နယ်စပ်ဒေသများတွင် တပ်မတော်နှင့် လက်နက်ကိုင်အဖွဲ့များအကြား တိုက်ပွဲများ ပြင်းထန်နေပြီး လက်နက်ကိုင်အဖွဲ့များက လုံခြုံရေးတပ်ဖွဲ့များကို ပစ်မှတ်ထား တိုက်ခိုက်လျက်ရှိသည်။

အောက်တိုဘာလကုန်ပိုင်းက လက်နက်ကိုင်အဖွဲ့များ၏ ထိုးစစ်ဆင် တိုက်ခိုက်မှုများ စတင်ဖြစ်ပွားခဲ့ချိန် ကတည်း က လူပေါင်း ၃၀၀,၀၀၀ ကျော်သည် အိုးမဲ့အိမ်မဲ့ဖြစ်ခဲ့ရကြောင်း ကုလသမဂ္ဂက ခန့်မှန်းပြောကြားခဲ့သည်။

ယခုဖြစ်ပွားနေသည့် တိုက်ခိုက်မှုများသည် တပ်မတော်က အာဏာကို ရယူခဲ့ပြီးနောက်ပိုင်း တပ်မတော်အတွက် အကြီးမားဆုံး စိန်ခေါ်မှုတစ်ခုဖြစ်ခဲ့ပြီး ဒုက္ခသည်များ အစုလိုက်အပြုံလိုက် ဝင်ရောက်လာနိုင်သည့်် အခြေအနေ အပေါ် တရုတ်နှင့် ထိုင်းနိုင်ငံတို့ကို စိုးရိမ်စေခဲ့သည်။

ယခုကိစ္စအပေါ် ဆွေးနွေးမှုများ ပြုလုပ်ရန် မြန်မာနိုင်ငံသည် လုပ်ငန်းတာဝန်အဖွဲ့ တစ်ဖွဲ့ မကြာမီ စေလွှတ်သွား မည်ဖြစ်ကြောင်း၊ ကနဦး အဆင့်များ အောင်မြင်စွာ လုပ်ဆောင်နိုင်ပါက အခြား အကူအညီပေးရေး အေဂျင်စီများ ကိုလည်း ဖိတ်ကြားသွားမည်ဖြစ်ကြောင်း ထိုင်းနိုင်ငံခြားရေးဝန်ကြီးဌာနက ထုတ်ပြန်ခဲ့သည်။

မြန်မာနိုင်ငံခြားရေးဝန်ကြီး ဦးသန်းဆွေနှင့် ထိုင်းနိုင်ငံခြားရေးဝန်ကြီး ပန်ပရီ ဘာဟစ်ဒါ နူကာရာ (Parnpree Bahidha-Nukara) တို့သည် တရုတ်နိုင်ငံတွင် ပြုလုပ်သည့် မဲခေါင်-လန်ချန် ပူးပေါင်းဆောင်ရွက်ရေး (Mekong-Lancang Cooperation) အစည်းအဝေးတွင် တွေ့ဆုံဆွေးနွေးခဲ့သည်။

၎င်းတို့နှစ်ဦး၏ ဆွေးနွေးမှုများအတွင်း နှစ်နိုင်ငံပူးပေါင်းသည့် အထူးတာဝန်အဖွဲ့ကို ဖွဲ့စည်းရန် ဆုံးဖြတ်ခဲ့ခြင်း ဖြစ်ကြောင်း သိရသည်။

Source: ရိုက်တာ

CNI International News
မော်စကို၊ ဒီဇင်ဘာ ၉

အနောက်နိုင်ငံများသည် ဂါဇာကမ်းမြောင်ဒေသတွင် ပါလက်စတိုင်းတို့အပေါ် ကျူးလွန်နေသည့် အစ္စရေး၏ လူမျိုးသုဉ်း သတ်ဖြတ်မှုကို ထောက်ခံပေးနေကြောင်း အီရန်သမ္မတ အီဘရာဟင် ရိုင်စီ (Ebrahim Raisi) က ဒီဇင်ဘာ ၇ ရက်တွင် စွပ်စွဲခဲ့သည်ဟု ရိုက်တာမှ ဖော်ပြခဲ့သည်။

ရာအီစီသည် ရုရှားနိုင်ငံ၊ မော်စကိုမြို့တော်တွင် ရုရှားသမ္မတ ဗလာဒီမာ ပူတင် (Vladimir Putin) နှင့် တွေ့ဆုံပြီး အစည်းအဝေး ပြုလုပ်ချိန်၌ အထက်ပါအတိုင်း စွပ်စွဲခဲ့ခြင်း ဖြစ်သည်။

ပူတင်သည် ယူအေအီးနှင့် ဆော်ဒီအာရေဗျနိုင်ငံများသို့ သွားရောက်ခဲ့ပြီးနောက် တစ်ရက်အကြာတွင် ကရင်မလင် (Kremlin) နန်းတော်၌ ရိုင်စီကို ကြိုဆိုခဲ့ကာ ဆွေးနွေးမှုများ ပြုလုပ်ခဲ့သည်။ 

ရုပ်သံမှ ထုတ်လွှင့်သည့် မှတ်ချက်စကားများအတွင်း ပူတင်နှင့် ရိုင်စီတို့သည် နှစ်နိုင်ငံအကြား စစ်ဘက်ဆိုင်ရာ ပူးပေါင်းဆာင်ရွက်မှုများကို မြှင့်တင်ရေးကို ရည်ညွှန်းပြောကြားခဲ့သည်။

အရှေ့အလယ်ပိုင်းဒေသ၏ အခြေအနေ၊ အထူးသဖြင့် ပါလက်စတိုင်း နယ်နိမိတ်များတွင် ဖြစ်ပွားနေသည့် အခြေ အနေများကို ဆွေးနွေးမှုသည် အလွန်အရေးကြီးကြောင်း ပူတင်က ပြောသည်။

ရိုင်စီကလည်း ပါလက်စတိုင်းနှင့် ဂါဇာတွင် ဖြစ်ပွားနေသည့် အခြေအနေများသည် လူမျိုးသုဉ်း သတ်ဖြတ်မှုနှင့် လူသားမျိုးနွယ်အပေါ် ဆန့်ကျင်သည့် ရာဇဝတ်မှုများဖြစ်သည်ဟု ပြောကြားခဲ့သည်။

ထိုဖြစ်စဉ်များကို အမေရိကန်နှင့် အနောက်နိုင်ငံများက ထောက်ခံနေသည်မှာ ဝမ်းနည်းစရာ ပိုကောင်းသည်ဟု ပြောကြားခဲ့သည်။

အီရန်သည် အစ္စရေး-ဟားမာ့စ် စစ်ပွဲတွင် ဟားမာ့စ်အဖွဲ့ကို ထောက်ခံပေးထားသည်။ ရုရှားကမူ အရှေ့အလယ်ပိုင်း ဒေသတွင် ဟားမာ့စ်နှင့် အစ္စရေး အပါအဝင် အဓိကကျသည့် နိုင်ငံများနှင့် ဆက်ဆံရေးများရှိနေပြီး အောက်တိုဘာလက မော်စကိုတွင် ဟားမာ့စ်ကိုယ်စားလှယ်အဖွဲ့ကို လက်ခံတွေ့ဆုံခဲ့သဖြင့် အစ္စရေး၏ ဝေဖန်မှုကို ခံခဲ့ရသည်။

အစ္စရေး-ဟားမာ့စ် စစ်ပွဲကြောင့် ယူကရိန်းတွင် စစ်ပွဲဆင်နွှဲနေသည့် ရုရှား၏ စစ်ပွဲအပေါ် နိုင်ငံတကာ၏ အာရုံစိုက် မှု ပြောင်းလဲသွားခဲ့ပြီး ရုရှားအတွက် ပါလက်စတိုင်းတို့ဘက်မှ ရပ်တည်သည့် ဖွံ့ဖြိုးဆဲနိုင်ငံများနှင့် ဆက်ဆံရေး များ ပိုမိုနီးစပ်စေရန် လုပ်ဆောင်ခွင့် ရရှိခဲ့သည်ဟု ကျွမ်းကျင်သူများက ပြောကြားခဲ့သည်။

အစ္စရေးကမူ လူမျိုးသုဉ်း သတ်ဖြတ်မှု စွပ်စွဲချက်များကို ယခင်ကတည်းက ငြင်းဆိုထားပြီး ၎င်းတို့၏ လုပ်ဆောင် ချက်များသည် ဟားမာ့စ်အဖွဲ့ကို ပစ်မှတ်ထားခြင်းဖြစ်ပြီး အရပ်သားများကို ပစ်မှတ်ထားခြင်း မဟုတ်ကြောင်း ပြောကြားခဲ့သည်။

Source: ရိုက်တာ

CNI International News

ဘေကျင်း၊ ဒီဇင်ဘာ ၈

တရုတ်နှင့် ဥရောပနိုင်ငံများအကြား တစ်ဖက်နှင့်တစ်ဖက် ပြိုင်ဘက်ကဲ့သို့ မရှုမြင်သင့်ကြောင်းနှင့်် ထိပ်တိုက် တွေ့မှုများကို မပြုလုပ်သင့်ကြောင်း တရုတ်သမ္မတ ရှီကျင့််ဖျင် (Xi Jinping) က ဒီဇင်ဘာ ၆ ရက်တွင် ဘေကျင်း မြို့တော်၌ ပြုလုပ်သည့် အစည်းအဝေးအတွင်း ဥရောပသမဂ္ဂ (အီးယူ)၏ ထိပ်သီးအရာရှိများကို သတိပေးခဲ့ သည်ဟု ရိုက်တာမှ ဖော်ပြခဲ့သည်။

ရှီသည် ၄ နှစ်အတွင်း ဥရောပ ထိပ်သီးအရာရှိများနှင့် ပထမဆုံးအကြိမ်အဖြစ် လူချင်းတွေ့ဆုံသည့် အစည်းအဝေး အတွင်း အထက်ပါအတိုင်း သတိပေးခဲ့ခြင်း ဖြစ်သည်။

ထိုအစည်းအဝေးအတွင်း တရုတ်နှင့် ဥရောပခေါင်းဆောင်များသည် ကုန်သွယ်ရေးမှအစ ယူကရိန်းစစ်ပွဲအဆုံး အကြောင်းအရာ အများအပြားကို ဆွေးနွေးခဲ့ပြီး တရုတ်သည် ဥရောပသမဂ္ဂ၏ အဓိက စီးပွားရေးနှင့် ကုန်သွယ် ရေး မိတ်ဖက်နိုင်ငံ ဖြစ်လာစေရန် ဆန္ဒရှိကြောင်း၊ သိပ္ပံနှင့် နည်းပညာကဏ္ဍတွင်လည်း ပူးပေါင်းဆောင်ရွက်မှုများ ပြုလုပ်ရန် ဆန္ဒရှိကြောင်း ရှီက ပြောကြားခဲ့သည်။

တရုတ်နဲ့ EU အလံကိုတွေ့ရစဉ်

ထို့ပြင် တရုတ်နှင့် ဥရောပသမဂ္ဂအကြား ဆက်ဆံရေးများကို ကြားဝင်စွက်ဖက်မည့် အခြေအနေများအားလုံးကို ဖယ်ရှားရန်လည်း ရှီက Diaoyutai နိုင်ငံတော်ဧည့်ဂေဟာတွင် ပြုလုပ်သည့် အစည်းအဝေးအတွင်း ဥရောပ ခေါင်းဆောင်များကို တိုက်တွန်းခဲ့သည်။

တရုတ်နှင့် ဥရောပသမဂ္ဂအနေနှင့် တစ်ဖက်နှင့်တစ်ဖက် မှန်ကန်သည့် သဘောထားတစ်ခုကို ဖော်ဆောင်ရန်နှင့် အပြန်အလှန် ယုံကြည်နားလည်မှု တည်ဆောက်ရန် လိုအပ်ကြောင်းလည်း ရှီက ပြောကြားခဲ့သည်ဟု တရုတ် နိုင်ငံပိုင် CCTV ရုပ်သံက ဖော်ပြခဲ့သည်။

ဥရောပကော်မရှင်ဥက္ကဋ္ဌ အာဆူလာ ဗွန် ဒါလီယန် (Ursula von der Leyen)၊ ဥရောပကောင်စီဥက္ကဋ္ဌ ချားလ်စ် မိုက်ကယ် (Charles Michel) နှင့် ဥရောပသမဂ္ဂ နိုင်ငံခြားရေးမူဝါဒ အကြီးအကဲ ဂျိုးဆက်ဖ် ဘော်ရဲလ် (Josep Borrell) တို့သည် တစ်ရက်ကြာ တရုတ်ခရီးစဉ်အတွင်း တရုတ်ဝန်ကြီးချုပ် လီချင် (Li Qiang) နှင့် တွေ့ဆုံခဲ့ ကြသည်။

EU ခေါင်းဆောင် ၂ ဦးကိုတွေ့ရစဉ်

ထိုတွေ့ဆုံမှုအတွင်း လီက တရုတ်သည် ဈေးကွက်စီးပွားရေး၏ အခြေခံစံနှုန်းများကို ချိုးဖောက်သည့် စီးပွားရေးနှင့် ကုန်သွယ်ရေးဆိုင်ရာ အရေးကိစ္စများတွင် နိုင်ငံရေးသဘော သက်ဝင်နေမှုကို ဆန့်ကျင်ကြောင်း ဥရောပသမဂ္ဂ ခေါင်းဆောင်များကို ပြောကြားခဲ့သည်ဟု CCTV က ဖော်ပြခဲ့သည်။

ဒီဇင်ဘာ ၇ ရက်က ပြုလုပ်ခဲ့သည့် တရုတ်-ဥရောပသမဂ္ဂ ခေါင်းဆောင်များ၏ အစည်းအဝေးသည် လာမည့် နှစ်တွင် ပြုလုပ်မည့် ဥရောပ ပါလီမန်ရွေးကောက်ပွဲ မတိုင်မီ နောက်ဆုံးအကြိမ် ပြုလုပ်သည့်် အစည်းအဝေး တစ်ခုဖြစ်သည်ဟု ရိုက်တာမှ ဖော်ပြခဲ့သည်။

Source: ရိုက်တာ

CNI News

၂၀၂၃ ခုနှစ်၊ ဒီဇင်ဘာ ၈

ကယား(ကရင်နီ)ပြည်နယ်၊ လွိုင်ကော်မြို့တွင် ကရင်နီအမျိုးသားကာကွယ်ရေးတပ်ဖွဲ့(KNDF) နှင့် PDF ပူးပေါင်း တပ်တို့သည် ၁၁၁၁ စစ်ဆင်ရေး စတင်ပြီးနောက် မြို့တွင်းတိုက်ပွဲများကြောင့် လွိုင်ကော်မြို့ခံအားလုံးနီးပါး ဘေးလွတ်ရာသို့ တိမ်းရှောင်နေကြကြောင်း မြို့ခံများက ပြောသည်။

လွိုင်ကော်မြို့တိုက်ပွဲ အခြေအနေအရ မနေသင့်တော့ဟုဆိုကာ ထွက်လာခဲ့ကြကြောင်း၊ မြို့နေလူထု ၉၀ ရာခိုင်နှုန်းခန့်မှာ ရှမ်းပြည်နယ်တောင်ပိုင်းသို့ ရောက်နေကြောင်း လွိုင်ကော်မြို့ခံတစ်ဦးက CNI သတင်းဌာနသို့ ပြောသည်။

၎င်းက “ကျနော်တို့က လွိုင်ကော်မြို့မှာ လူကို မရှိသလောက် ရှိနေပြီ။ အကုန်လုံး ရှမ်းပြည်တောင်ပိုင်းဖက်ကို ပြေးလာတော့ နောက်ပိုင်းအခြေအနေတော့ မသိတော့ဘူး။ အင်တာနက်တွေရော၊ လိုင်းတွေရော၊ ဖုန်းတွေရော ဖျက်ထားတော့ ဘယ်လိုမှ ဘာမှ အဆက်အသွယ်မရဘူး။ အဲဒီလို ဖြစ်နေတယ်၊ မီးလည်း မရှိတော့ဘူးလေ၊ မီး မရှိတော့ ဘာအားမှလည်း သွင်းလို့မရတော့ဘူး။ လွိုင်ကော်ကတော့၊ ဒီမှာ ရှိနေတဲ့ လူတော်တော်များများက ၉၀ ရာခိုင်နှုန်းလောက်က အကုန်လုံး အောင်ပန်းတို့၊ ပင်လောင်းတို့၊ တောင်ကြီးတို့၊ အေးသာယာတို့၊ ညောင်ရွှေတို့ ရောက်ကုန်ပြီလေ” ဟု ပြောသည်။

KNDF တပ်ဖွဲ့ကိုတွေ့ရစဉ်

ကယားပြည်နယ်တွင် လူဦးရေ စုစုပေါင်း ၅ သိန်း ဝန်းကျင်ရှိပြီး လွိုင်ကော်မြို့နယ်တွင် လူဦးရေ ၁ သိန်းကျော် နေထိုင်ကြသည်။ 

လက်ရှိတွင် လွိုင်ကော်မြို့၌ တိုက်ပွဲများဖြစ်ပေါ်နေ၍ ဒေသခံများသည် နေရပ်စွန့်ခွာ တိမ်းရှောင်နေကြရသည်။

ပြီးခဲ့သည့် နိုဝင်ဘာ ၁၁ ရက်နေ့က လွိုင်ကော်မြို့နယ်မှာ KNDF မှ မြို့သိမ်းတိုက်ပွဲ စတင်ပြီးနောက် မြန်မာ့ တပ်မတော်နှင့် တော်လှန်ရေးအင်အားစုတို့အကြား တိုက်ပွဲများပြင်းထန်ခဲ့ပြီး လက်နက်ကြီး၊ လေကြောင်း ပစ်ခတ်မှုများ ရှိခဲ့သည်။

လွိုင်ကော်မြို့သိမ်း တိုက်ပွဲများကြောင့် နေအိမ် အဆောက်အဦများစွာ ပျက်စီးခဲ့ပြီး ပြန်လည်ထူထောင်ရေး လုပ်ငန်းများ ဆောင်ရွက်ရန် အလွန်ပင် ခက်ခဲသွားပြီဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ဒီဇင်ဘာ ၄ ရက်နေ့မှာ ပြောကြားထားသည်။

တိုက်ပွဲကြောင့် မြို့ခံလူထုအများစု တိုက်ပွဲရှောင်နေကြပြီး မြို့တွင်းမှာ မြန်မာ့တပ်မတော်နှင့် တော်လှန်ရေး အင်အားစုများသာ ကျန်ရှိတော့သည့် အနေအထားဖြစ်နေကြောင်း လွိုင်ကော်မြို့ လူမှုကူညီရေးအသင်း တာဝန်ရှိသူတစ်ဦးက CNI သတင်းဌာနသို့ ပြောသည်။

KNDF တပ်ဖွဲ့ကိုတွေ့ရစဉ်

၎င်းက “မြေပြင် အခြေအနေကတော့ အတိအကျတော့ မသိရဘူး။ ဒါပေမဲ့ ခန့်မှန်းခြေ ၄ သိန်းလောက် ရှိတာက တော့ ၃ သိန်းလောက်ကတော့ မရှိတော့ဘူး။ ကျန်တာတွေတော့ ဟိုတစ်စု ဒီတစ်စု အဲဒီလောက်လေးပဲ ရှိတယ်၊ လွိုင်ကော်မြို့ပေါ်မှာတော့ မဟုတ်ဘူး။ နီးစပ်ရာ နေရာလေးတွေမှာ အဲဒါလေးပဲ ရှိပါတယ်။ မြို့သိမ်းတိုက်ပွဲတော့ ကျနော်တို့လည်း အတိအကျတော့ မသိဘူး။ ဒါပေမဲ့ စကစလောက်ပဲ ကျန်တော့တယ်လို့ ထင်တယ်၊ အဲဒီနားနဲ့ အဲဒီ ပတ်ဝန်းကျင်လောက်နဲ့ ဆေးရုံကုန်း အဲဒီဖက်လောက်ပဲ ကျန်တော့တယ်၊ ကျန်တာတွေကတော့ ကျနော်တို့ လည်း အပွင့်လင်းပြောရင် အတိအကျမသိရဘူး” ဟု ပြောသည်။

လွိုင်ကော်မြို့ကို တော်လှန်ရေးအင်အားစုများက ၁၁၁၁ စစ်ဆင်ရေးအား နိုဝင်ဘာ ၁၁ ရက်နေ့က စတင် ဆင်နွှဲ ခဲ့ပြီး လက်ရှိအချိန် တိုက်ပွားများ ဖြစ်ပွားလျက်ရှိနေသလို နှစ်ဖက်ထိခိုက် ကျဆုံးမှုများလည်း ရှိနေကြောင်း သိရသည်။

CNI International News

နယူးဒေလီ၊ ဒီဇင်ဘာ ၈ 

အိန္ဒိယဝန်ကြီးချုပ် မိုဒီ (Narendra Modi)သည် လုံခြုံရေးနှင့် နိုင်ငံရေးဆိုင်ရာ စိုးရိမ်ပူပန်မှုများကြောင့် ဆစ်ခ် (Sikh) ခွဲထွက်ရေးဝါဒီများကို အာရုံစိုက်ပြီး နှိမ်နင်းနေခြင်းဖြစ်ကြောင်း ကျွမ်းကျင်သူများက ပြောကြားခဲ့သည်ဟု ရိုက်တာမှ ဖော်ပြခဲ့သည်။

အိန္ဒိယနိုင်ငံမြောက်ပိုင်းတွင် ဆစ်ခ်ခွဲထွက်ရေး အမိမြေထူထောင်ရန် လှုပ်ရှားမှုသည် ဆယ်စုနှစ်များစွာ ကြာမြင့်ခဲ့ ပြီဖြစ်သည်။

သို့သော်လည်း မကြာသေးမီ လများအတွင်း အမေရိကန်နှင့် ကနေဒါနိုင်ငံတို့တွင် ဆစ်ခ်ခွဲထွက်ဝါဒီ ခေါင်းဆောင် များ ပစ်မှတ်ထားခံရမှု၌ အိန္ဒိယအစိုးရက ပါဝင်ပတ်သက်မှု ရှိခဲ့သည်ဆိုသည့် စွဲချက်များထွက်ပေါ်လာမှ ထိုအရေး ကို နိုင်ငံတကာက အာရုံစိုက်လာခဲ့ခြင်း ဖြစ်သည်။

လုပ်ကြံခံရလို့ သေဆုံးသွားတဲ့ ဆစ်ခ်ခွဲထွက်ရေးသမားကိုတွေ့ရစဉ်

အိန္ဒိယအစိုးရကမူ ကနေဒါနိုင်ငံ၊ ဗန်ကူးဗား (Vancouver) မြို့ ဆင်ခြေဖုံးတွင် ဆစ်ခ်ခွဲထွက်ရေး တက်ကြွလှုပ်ရှား သူတစ်ဦး သတ်ဖြတ်ခံရမှု၌ အိန္ဒိယအစိုးရနှင့် ပတ်သက်မှုမရှိကြောင်း ငြင်းဆိုထားသည်။ 

ထို့ပြင် အမေရိကန်တွင်လည်း ဆစ်ခ်ခွဲထွက်ရေး တက်ကြွလှုပ်ရှားသူ တစ်ဦးအား ပစ်မှတ်ထားသည့် အစီအစဉ် အောင်မြင်ခြင်း မရှိခဲ့သော်လည်း ထိုဖြစ်စဉ်တွင် အိန္ဒိယအစိုးရက ပါဝင်ပတ်သက်နေကြောင်း စွပ်စွဲခံခဲ့ရသည်။ 

အိန္ဒိယအစိုးရကမူ ထိုစွပ်စွဲချက်များကို ငြင်းဆိုခဲ့သည်။

ဆစ်ခ်ခွဲထွက်ရေး လှုပ်ရှားမှုသည် လာမည့်နှစ်တွင် ပြုလုပ်မည့်် အိန္ဒိယအထွေထွေ ရွေးကောက်ပွဲ၌ မိုဒီ၏ အာဏာရပါတီဖြစ်သည့် ဟိန္ဒိူမျိုးချစ် (BJP) ပါတီက ဖြေရှင်းရမည့် နိုင်ငံရေး ပုစ္ဆာတစ်ပုဒ် ဖြစ်နေသည်ဟု ကျွမ်းကျင်သူများက ပြောကြားခဲ့သည်။

ဆစ်ခ်ခွဲထွက်ရေး တက်ကြွသူများကိုတွေ့ရစဉ်

အိန္ဒိယလုံခြုံရေး အရာရှိများကလည်း ပန်ဂျပ်ပြည်နယ်၏ ဆစ်ခ်ဝါဒီများနှင့် အဆက်အသွယ်ရှိသည့် ပြည်ပ နိုင်ငံများမှ ဆစ်ခ်ဝါဒီ အဆက်အသွယ်များကို နှိမ်နင်းရမည်ဟု ပြောကြားခဲ့သည်။

ဆစ်ခ်ဘာသာဝင်များကမူ မိုဒီသည် ၎င်းတို့၏ ခေါင်းဆောင်မှုအပိုင်းကို ဖျက်ဆီးရန် ကြိုးပမ်းနေပြီး ၎င်း၏ ဟိန္ဒိူအခြေပြု မူဝါဒများဖြင့် အစားထိုးရန် ကြံစည်နေသည်ဟု စွပ်စွဲခဲ့သည်။

ဆစ်ခ်ခွဲထွက်ဝါဒီများကမူ ၁၅ ရာစုနှစ် ကုန်ပိုင်းက တည်ထောင်ခဲ့သည့် ဆစ်ခ်ဘာသာ၏ တည်နေရာဖြစ်သည့် ပန်ဂျပ်ပြည်နယ်တွင် ခါလစ္စတန်ဟု လူသိများသည့် ဆစ်ခ်အမိမြေကို ထူထောင်ခွင့်ရရှိရန် တောင်းဆိုပြီး ခွဲထွက် ရေး လှုပ်ရှားမှုများ ပြုလုပ်လျက်ရှိသည်။

Source: ရိုက်တာ

CNI International News

ဝါရှင်တန်၊ ဒီဇင်ဘာ ၈

ယူကရိန်းအတွက် စစ်ရေးအကူအညီပေးမည့် အစီအစဉ်ကို ထောက်ခံရန် အမေရိကန်သမ္မတ ဂျိုးဘိုင်ဒန် (Joe Biden) က ဒီဇင်ဘာ ၆ ရက်တွင် လွှတ်တော်အား တိုက်တွန်း ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့ သည်။ 

ထို့ပြင် ရုရှားသမ္မတ ဗလာဒီမာ ပူတင် (Vladimir Putin) သည် ယူကရိန်းတွင် ဆင်နွှဲနေသည့် စစ်ပွဲကို ရပ်တန့်လိမ့် မည်မဟုတ်ဘဲ နေတိုးမဟာမိတ်အဖွဲ့နှင့်လည်း ထိပ်တိုက်တွေ့နိုင်ကြောင်း ဘိုင်ဒန်က သတိပေးခဲ့သည်။

ဘိုင်ဒန်က သူ့အနေနှင့် ယူကရိန်းအား စစ်ရေး အထောက်အပံ့အတွက် ဒေါ်လာ ၆၀ ဘီလျံတန်ကြေးရှိ အကူအညီ ပေးရေး အစီအစဉ်ကို ပိတ်ဆို့ထားသည့် ရီပတ်ဘလစ်ကန်များနှင့် ဆွေးနွေးညှိနှိုင်းမှုများ ပြုလုပ်ရန် အသင့် ပြင် ထားသည်ဟုလည်း ပြောကြားခဲ့သည်။ 

အမေရိကန်လွှတ်တော်ကို တွေ့ရစဉ်

"ယူကရိန်းကို ကူညီပေးမယ့် အစီအစဉ်ကို စောင့်ဆိုင်းလို့ မရနိုင်ပါဘူး။ ရှင်းရှင်းပြောရမယ်ဆိုရင် ဒီလို အခြေအနေ မျိုးမှာ ရီပတ်ဘလစ်ကန်တွေက ပူတင်ကို အခွင့်အရေးပေးနေသလို ဖြစ်နေတာဟာ ယုံကြည်နိုင်စရာမရှိပါဘူး"ဟု ဘိုင်ဒန်က ပြောသည်။

ဘိုင်ဒန်သည် ယူကရိန်းသမ္မတ ဇာလန်းစကီး (Volodymyr Zelensky)အပြင် စက်မှုထိပ်သီး ၇ နိုင်ငံ (G-7)မှ ခေါင်းဆောင်များနှင့် ဗွီဒီယိုဆက်သွယ်မှုမှတစ်ဆင့် အစည်းအဝေးပြုလုပ်ခဲ့သည်။

ထို့နောက် ၂၀၂၂ ခုနှစ်၊ ဖေဖော်ဝါရီလက စတင်ခဲ့သည့် ရုရှား၏ ကျူးကျော်စစ်ကို ခုခံတိုက်ခိုက်နေသည့် ယူကရိန်း အတွက် အကူအညီများ တိုးမြှင့်ပေးရန် ဆွေးနွေးခဲ့ကြသည်။

ယူကရိန်းသမ္မတ ဇာလန်းစကီးနဲ့ ယူကရိန်းစစ်ဦးစီးချုပ်ကိုတွေ့ရစဉ်

ယူကရိန်းသမ္မတ ဇာလန်းစကီးကမူ ရုရှားသည် လာမည့်နှစ်အတွင်း အနောက်နိုင်ငံများ၏ စည်းလုံးညီညွတ်မှု ပြိုကွဲမည့် အခြေအနေကို စောင့်ဆိုင်းနေပြီး ရှေ့တမ်းစစ်မျက်နှာပြင်တွင် ဖိအားများကို မြှင့်တင်နေကြောင်း သတိပေးခဲ့သည်။

ဘိုင်ဒန်ကလည်း ယူကရိန်းစစ်ပွဲတွင် ရုရှားအနိုင်ရသွားမည်ဆိုပါက ပူတင်သည် ရပ်တန့်နေမည် မဟုတ်ကြောင်း ပြောကြားခဲ့သည်။

"တကယ်လို့ သူ (ပူတင်) သာ ယူကရိန်းစစ်ပွဲမှာ အနိုင်ရမယ်ဆိုရင် နေတိုးမဟာမိတ်တွေကို ဆက်ပြီး တိုက်ခိုက် ပါလိမ့်မယ်။ အမေရိကန်စစ်သားတွေနဲ့ ရုရှားစစ်သားတွေ တိုက်ခိုက်နေတဲ့ အခြေအနေမျိုးကို ကျနော်တို့ မလို ချင်ပါဘူး" ဟု ဘိုင်ဒန်က ပြောကြားခဲ့သည်။ 

Source: ဘန်ကောက်ပို့စ်

CNI International News

မော်စကို၊ ဒီဇင်ဘာ ၈

ရုရှားနိုင်ငံတွင် ၂၀၂၄ ခုနှစ် သမ္မတရွေးကောက်ပွဲကို မတ်လ ၁၇ ရက်၌ ကျင်းပရန် လွှတ်တော်အမတ်များက ဒီဇင်ဘာ ၇ ရက်နေ့မှာ ရက်သတ်မှတ်လိုက်သဖြင့် သမ္မတ ဗလာဒီမာ ပူတင်(Vladimir Putin)သည် ပဉ္စမ သက်တမ်းကို ထပ်မံရရှိရန် နီးစပ်လာခဲ့သည်ဟု အေပီမှ ဖော်ပြခဲ့သည်။

ရုရှား၏ အထက်လွှတ်တော်ဖြစ်သည့် Federation Council ၏ အဖွဲ့ဝင်များသည် လာမည့်နှစ် မတ်လ ၁၇ ရက် တွင် သမ္မတရွေးကောက်ပွဲ ပြုလုပ်ရန် တစ်ညီတစ်ညွတ်တည်း ထောက်ခံမဲ ပေးခဲ့ကြသည်။

"အချုပ်ဆိုရရင် ဒီဆုံးဖြတ်ချက်ဟာ ရွေးကောက်ပွဲ စတင်မယ့်ရက်ကို သတ်မှတ်လိုက်တာ ဖြစ်ပါတယ်" ဟု အောက်လွှတ်တော်ဥက္ကဋ္ဌ ဗလန်တီနာ မတ်ဗီယန်ကိုက ပြောကြားခဲ့သည်။

ပူတင်ကို တွေ့ရစဉ်

ရုရှား၏ ဗဟိုရွေးကောက်ပွဲကော်မရှင်သည် ဒီဇင်ဘာ ၈ ရက်တွင် အည်းအဝေးပြုလုပ်ရန် စီစဉ်ထားကြောင်းလည်း သိရသည်။

အသက် ၇၁ နှစ်အရွယ်ရှိ ပူတင်သည် ထိုရွေးကောက်ပွဲကို ဝင်ရောက်ယှဉ်ပြိုင်သွားရန် ရှိ/မရှိ ကြေညာခြင်း မရှိသေးသော်လည်း လက်ရှိတွင် ရွေးကောက်ပွဲကျင်းပမည့်ရက်ကို သတ်မှတ်လိုက်ပြီဖြစ်သဖြင့် ရွေးကောက်ပွဲ ဝင်ရောက်ယှဉ်ပြိုင်မည့် အခြေအနေအား ရက်ပိုင်းအတွင်း ကြေညာဖွယ်ရှိနေသည်။

ရုရှား၏ ဖွဲ့စည်းပုံအခြေခံဥပဒေ ပြောင်းလဲမှုအရ ပူတင်သည် လာမည့်နှစ်တွင် သက်တမ်းကုန်မည့် လက်ရှိ သမ္မတ သက်တမ်းအပြီး၌ နောက်ထပ် ခြောက်နှစ်သက်တမ်းရှိသည့် သမ္မတရာထူးနေရာအတွက် ရွေးကောက်ပွဲနှစ်ကြိမ် ထပ်မံယှဉ်ပြိုင်ခွင့် ရရှိထားသည်။ 
ထို့ကြောင့် ပူတင်သည် ၂၀၃၆ ခုနှစ်အထိ ရုရှားသမ္မတအဖြစ် အာဏာရရှိမည့် အလားအလာ ရှိနေသည်။

 ရုရှားနိုင်ငံ နှင်းကျနေစဉ်

ပူတင်သည် ရုရှား၏ နိုင်ငံရေးစနစ်ကို တင်းကြပ်စွာ ထိန်းချုပ်ထားခဲ့သဖြင့် ရွေးကောက်ပွဲတွင် အနိုင်ရရှိရန် ရာနှုန်းပြည့်နီးပါး သေချာမှုရှိနေသည်။

ပူတင်ကို ရွေးကောက်ပွဲတွင် စိန်ခေါ်နိုင်ခြေရှိသည့် ထင်ရှားသော အတိုက်အခံများနှင့် ဝေဖန်သူများသည် အကျဉ်းချခံထားရခြင်း သို့မဟုတ် ပြည်ပနိုင်ငံများသို့ ထွက်ပြေးတိမ်းရှောင် နေရသူများရှိနေပြီး လွတ်လပ်သည့် မီဒီယာများလည်း ပိတ်ပင်ခံထားရသည်။

Source: အေပီ

CNI International News

ပက်ရှ်ဝါ၊ ဒီဇင်ဘာ ၆

ပါကစ္စတန်နိုင်ငံ အနောက်မြောက်ပိုင်းရှိ စာသင်ကျောင်းတစ်ကျောင်း၏ အနီးတွင် ဒီဇင်ဘာ ၅ ရက်က လမ်းဘေး ဗုံးတစ်လုံး ပေါက်ကွဲမှုကြောင့် ဖြတ်သွားဖြတ်လာ လူ ၃ ဦးထက်မနည်း ဒဏ်ရာရရှိခဲ့သည်ဟု အာဏာပိုင်များက ပြောကြားခဲ့ကြောင်း အေပီမှ ဖော်ပြခဲ့သည်။

ဗုံးပေါက်ကွဲမှုသည် အာဖဂန်နစ္စတန်နယ်စပ်အနီး ခိုင်ဘာ ပက်ထန်ခါဝါ (Khyber Pakhtunkhwa) ပြည်နယ်၏ မြို့တော် ပက်ရှ်ဝါ (Peshawar) ၏ စီးပွားရေးစင်တာတစ်ခုတွင် ဖြစ်ပွားခဲ့ခြင်းဖြစ်သည်ဟု နိုင်ငံပိုင် အရေးပေါ် ကယ်ဆယ်ရေးဌာန၏ ပြောရေးဆိုခွင့်ရှိသူ ဘိုင်လယ် အာမက် ဖိုင်ဇီ (Bilal Ahmad Faizi) က ပြောကြားခဲ့သည်။

ခိုင်ဘာ ပက်ထန်ခါဝါပြည်နယ်သည် တာရစ် အီး တာလီဘန် ပါကစ္စတန် (Tehreek-e-Taliban Pakistan) သို့မဟုတ် TTP ဟု လူသိများသည့် ပါကစ္စတန် တာလီဘန် စစ်သွေးကြွ အုပ်စု၏ အခိုင်အမာ ခြေကုပ်ယူခဲ့ဖူးသည့် နယ်မြေတစ်ခုဖြစ်သည်။

နိုင်ငံပိုင် အရေးပေါ် ကယ်ဆယ်ရေးဌာန၏ ပြောရေးဆိုခွင့်ရှိသူ ဘိုင်လယ် အာမက် ဖိုင်ဇီကို တွေ့ရစဉ်

ပေါက်ကွဲမှုဖြစ်ပွားခဲ့သည့် နေရာသို့ ရောက်ရှိလာသော လုံခြုံရေးတပ်ဖွဲ့များနှင့် အရာရှိများက ဝါဆက် လမ်းမ (Warsak Road) ပေါ်ရှိ စီးပွားရေးစင်တာကို မည်သူက ဗုံးထောင် ဖောက်ခွဲခဲ့သည်ဆိုခြင်းကို စုံစမ်းစစ်ဆေးနေ ကြောင်း ဖိုင်ဇီက ပြောကြားခဲ့သည်။

ခိုင်ဘာ ပက်ထန်ခါဝါပြည်နယ်တွင် လူသေဆုံးမှုများရှိခဲ့သည့် တိုက်ခိုက်မှုများနှင့်အတူ အကြမ်းဖက်မှုများ မြင့်တက်လာခဲ့သည်။

ဇန်နဝါရီလအတွင်းကလည်း ပက်ရှ်ဝါမြို့တော်ရှိ ဗလီတစ်ခုတွင် အသေခံ ဗုံးခွဲသမားတစ်ဦး၏ တိုက်ခိုက်မှုကြောင့် လူ ၁၀၁ ဦးထက်မည်း သေဆုံးခဲ့သည်။

တာရစ် အီး တာလီဘန် ပါကစ္စတန်အဖွဲ့ကိုတွေ့ရစဉ်

ယခုတိုက်ခိုက်မှုဖြစ်စဉ်ကို မည်သည့် လက်နက်ကိုင်အဖွဲ့ကမျှ တာဝန်ခံ ထွက်ဆိုခဲ့ခြင်း မရှိသော်လည်း အများစုက ပါကစ္စတန် တာလီဘန်အဖွဲ့၏ လက်ချက်ဖြစ်နိုင်ကြောင်း ယူဆထားကြသည်။

ပါကစ္စတန် တာလီဘန်အဖွဲ့သည် အာဖဂန်တာလီဘန်အဖွဲ့နှင့် သီးခြားအဖွဲ့ဖြစ်ပြီး ၂၀၂၁ ခုနှစ်၊ သြဂုတ်လက အာဖဂန်တွင် တာလီဘန်တို့ အာဏာရလာခဲ့မှုသည် ပါကစ္စတန်တာလီဘန်အဖွဲ့ကို ရဲဆေးတင်ပေးခဲ့သည့် အခြေအနေမျိုး ဖြစ်လာခဲ့သည်။

Source: အေပီ