CNI International News

တိုကျို၊ ဒီဇင်ဘာ ၆

ထိုင်ဝမ်နှင့် တရုတ်အကြား ပဋိပက္ခများ ဖြစ်ပွားလာနိုင်သည့် အခြေအနေနှင့် တိုက်ခိုက်မှုများ ဖြစ်ပွားလာခဲ့ချိန် တွင် ထိုင်ဝမ်မှ ထွက်ပြေးလာနိုင်သော ဒုက္ခသည်အရေအတွက် ဂျပန်အစိုးရ၌ အစီအစဉ်များမရှိမှုအပေါ် ယိုနာဂူနီ (Yonaguni) ကျွန်းမှာ နေထိုင်သူများက စိုးရိမ်လျက်ရှိကြောင်း ရိုက်တာမှ ဖော်ပြခဲ့သည်။

ဗီယက်နမ်စစ်ပွဲ ပြီးဆုံးပြီးနောက် ၂ နှစ်အကြာဖြစ်သည့် ၁၉၇၇ ခုနှစ်ကလည်း ဂျပန်၏ အနောက်ဘက်စွန်းရှိ ယိုနာဂူနီကျွန်းပေါ်သို့ ကီလိုမီတာ ၂၀၀၀ ကျော် ကွာဝေးသော ဗီယက်နိုင်ငံမှ ဗီယက်နမ်နိုင်ငံသားများသည် ထိုကျွန်းပေါ်သို့ ထွက်ပြေးတိမ်းရှောင်လာခဲ့ဖူးသည်။

လက်ရှိတွင် ထိုကျွန်းပေါ်၌ နေထိုင်သူ ၁၇၀၀ ခန့်ရှိနေပြီး ယခင်ကတည်းက စားဝတ်နေရေး အဆင်မပြေသည့်် ကျွန်းပေါ်၌ နောက်ထပ် ဒုက္ခသည် အကျပ်အတည်းတစ်ခု ထပ်မံ ပေါ်ပေါက်လာမည့်အရေးကို ကျွန်းသူ၊ ကျွန်းသား များက စိုးရိမ်နေကြသည်။

ထိုင်ဝမ်နဲ့တရုတ် အလံများကိုတွေ့ရစဉ်

ထိုင်ဝမ်ကျွန်းသည် ယိုနာဂူနီကျွန်း၏ အနောက်ဘက်မှ ကီလိုမီတာ ၁၁၀ ခန့်သာ ကွာဝေးပြီး ယိုနာဂူနီကျွန်းမှ လှမ်းမျှော်ကြည့်ရှုမည်ဆိုပါက ထိုင်ဝမ်ကျွန်းကို မြင်တွေ့နေရသည်အထိ နီးကပ်စွာ တည်ရှိသည်။

တရုတ်သည် လူဦးရေ ၂၄ သန်း နေထိုင်သည့် ထိုင်ဝမ်ကို ၎င်း၏ နယ်မြေတစ်ခုအဖြစ် သတ်မှတ်ထားပြီး လိုအပ်လာပါက အင်အားသုံး၍ သိမ်းယူသွားမည်ဟု ကြေညာထားသည်။

ထို့ပြင် တရုတ်စစ်တပ်သည် ထိုင်ဝမ်ကျွန်းအနီးတွင် ဒုံးကျည်ပစ်လွှတ်မှုများ အပါအဝင် စစ်ရေးလေ့ကျင့်မှုများကို မကြာခဏ ပြုလုပ်ခဲ့သည်။ 

ယိုနာဂူနီကျွန်းကို တွေ့ရစဉ်

ထို့ကြောင့် တရုတ်နှင့် ထိုင်ဝမ်အကြား ပဋိပက္ခဖြစ်ပွားလာခဲ့ပါက ထိုင်ဝမ်မှ စစ်ဘေးရှောင် ဒုက္ခသည်များသည် ဂျပန်၏ ယိုနာဂူနီကျွန်းကို ထွက်ပြေးတိမ်းရှောင် လာဖွယ်ရှိသည်။

ထိုဒုက္ခသည် အရေးအတွက် ယိုနာဂူနီ ကျွန်းသူ၊ ကျွန်းသားများက စိုးရိမ်နေကြခြင်း ဖြစ်သည်။ 

Source: ရိုက်တာ

CNI International News

အဘူဂျာ၊ ဒီဇင်ဘာ ၆

နိုက်ဂျီးရီးယားစစ်တပ်သည် ဘာသာရေး အခမ်းအနား တစ်ခုအတွက် အရပ်သားများ စုဝေးနေသည့် နေရာတစ်ခု ကို ဒရုန်းဖြင့် မှားယွင်းတိုက်ခိုက်ခဲ့သဖြင့် အရပ်သား ၈၅ ဦးထက်မနည်း သေဆုံးခဲ့သည်ဟု အာဏာပိုင်များက ပြောကြောင်း အယ်လ်ဂျာဇီးယားမှ ဖော်ပြခဲ့သည်။

ထိုတိုက်ခိုက်မှုသည် ကာဒူနာ (Kaduna) ပြည်နယ်၏ အစ်ဂါဘီ (Igabi) ကောင်စီဒေသရှိ တူဒန် ဘီရီ (Tudan Biri) ကျေးရွာတွင် ဒီဇင်ဘာ ၃ ရက်နေ့ ညပိုင်းက ဖြစ်ပွားခဲ့ခြင်း ဖြစ်သည်။

မွတ်ဆလင် ဘာသာဝင်များသည် တမန်တော် မိုဟာမက် (Prophet Muhammad) ၏ မွေးနေ့ အထိန်းအမှတ် အဖြစ် ဘာသာရေး အခမ်းအနားတစ်ခု ပြုလုပ်ရန် စုရုံးနေချိန်တွင် တိုက်ခိုက်ခံခဲ့ရခြင်း ဖြစ်သည်။

ထိုကဲ့သို့ ဒရုန်းဖြင့် မှားယွင်းတိုက်ခိုက်ခံရမှုကြောင့် အရပ်သားများသေဆုံးကာ အများအပြား ဒဏ်ရာရရှိခဲ့သည်ဟု ကာဒူနာပြည်နယ် အုပ်ချုပ်ရေးမှူး အူဘာဆာနီက ပြောကြားခဲ့သည်။

 နိုက်ဂျီးရီးယား စေတနာ့ဝန်ထမ်းများကို တွေ့ရစဉ်

လက်ရှိအချိန်အထိ ရုပ်အလောင်း ၈၅ လောင်းကို သဂြိုဟ်ခဲ့ပြီး ရှာဖွေမှုများကို ဆက်လက် လုပ်ဆောင်နေကြောင်း နိုက်ဂျီးရီးယား အမျိုးသားအရေးပေါ် စီမံခန့်ခွဲရေး အေဂျင်စီက ဒီဇင်ဘာ ၅ ရက်တွင် ထုတ်ပြန်ခဲ့သည်။ 

နိုက်ဂျီးရီးယားနိုင်ငံဆိုင်ရာ နိုင်ငံတကာ လွတ်ငြိမ်းချမ်းသာခွင့်အဖွဲ့၏ ရုံးကမူ ထိုတိုက်ခိုက်မှုအတွင်း သေဆုံးသူ ၁၂၀ ခန့်ရှိခဲ့သည်ဟု ၎င်းတို့အဖွဲ့ ဝန်ထမ်းများနှင့် စေတနာ့ဝန်ထမ်းများ၏ ပြောကြားချက်များကို ကိုးကားပြီး သတင်းထုတ်ပြန်ခဲ့သည်။

"သေဆုံးသူ အများစုဟာ အလေးတွေဖြစ်ပါတယ်" ဟု နိုက်ဂျီးရီးယားနိုင်ငံဆိုင်ရာ နိုင်ငံတကာလွတ်ငြိမ်းချမ်းသာ ခွင့် အဖွဲ့၏ရုံးမှ ညွှန်ကြားရေးမှူး အီဆာဆာနူစီ (Isa Sanusi) က အေပီသတင်းဌာနသို့ ပြောကြားခဲ့သည်။

နိုက်ဂျီးရီးယားစစ်တပ်က ဒရုန်းနဲ့မှားယွင်းတိုက်ခိုက်ခဲ့မှု နေရာများကို ပြသထားစဉ်

"အလောင်း ၅၀ ထက်မနည်း ရှာဖွေတွေ့ရှိခဲ့ပါတယ်။ စစ်တပ်က ပြောတာတော့ သူတို့က မှားပြီး ဗုံးကြဲမိတယ်လို့ ပြောပါတယ်" ဟု အစ်ဂါဘီ ဒေသတွင် နေထိုင်သူတစ်ဦးဖြစ်သည့် မူစတာဖာ ရူဖာအီ (Mustapha Rufai) က ပြောကြားခဲ့သည်။

နိုက်ဂျီးရီးယားစစ်တပ်သည် ၂၀၁၄ ခုနှစ်၊ ဖေဖော်ဝါရီလမှ ၂၀၂၂ ခုနှစ်၊ စက်တင်ဘာလအတွင်း အရပ်သားများ ရှိသည့် နေရာဒေသများကို မကြာခဏ မှားယွင်းပြီး ဗုံးကြဲတိုက်ခိုက်မှုများ ရှိခဲ့သဖြင့် လူပေါင်းများစွာ သေဆုံးခဲ့ရ သည်။

Source: အယ်လ်ဂျာဇီးယား

CNI International News

မော်စကို၊ ဒီဇင်ဘာ ၆

ယူကရိန်းနိုင်ငံတွင် ရုရှား၏ အမှတ် ၁၄ ကြည်းတပ်မှ လက်ထောက်တပ်မှူးတစ်ဦးဖြစ်သူ ဗိုလ်ချုပ် ဗလာဒီမာ ဇာဗက်စကီး (Vladimir Zavadsky) သေဆုံးခဲ့သည်ဟု ဒေသတွင်း ထိပ်သီးအရာရှိတစ်ဦးက အတည်ပြု ပြောကြားခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဇာဗက်စကီးသည် အထူးစစ်ဆင်ရေးဇုန်အတွင်းရှိ တပ်စခန်းတစ်ခုတွင် သေဆုံးခဲ့ခြင်းဖြစ်သည်ဟု ရုရှား၏ ဗိုရိုနက်ဇ် (Coronezh) ဒေသ၏ အုပ်ချုပ်ရေးမှူး အလက်ဇန္ဒား ဂူဆက်ဗ်(Alexander Gusev) က ပြောကြားခဲ့ပြီး အသေးစိတ် အချက်အလက်များကို ထုတ်ပြန်ခဲ့ခြင်း မရှိပေ။

ရုရှားသည် ၂၀၂၂ ခုနှစ်၊ ဖေဖော်ဝါရီလက ယူကရိန်းကို ဝင်ရောက် တိုက်ခိုက်ခဲ့ပြီးနောက် ယူကရိန်းစစ်ပွဲကို "အထူး စစ်ဆင်ရေး" ဟု သုံးနှုန်းဖော်ပြခဲ့သည်။

ယူကရိန်းစစ်ပွဲအတွင်းက တင့်ကားတစ်စီးကိုတွေ့ရစဉ်

ဇာဗက်စကီးသည် ရဲစွမ်းသတ္တိရှိသည့် အရာရှိတစ်ဦး၊ စစ်မှန်သည့် ဗိုလ်ချုပ်တစ်ဦး၊ တန်ဖိုးရှိသည့် အမျိုးသား တစ်ဦးဖြစ်သည်ဟု ဂူဆက်ဗ်က ပြောကြားခဲ့သည်။

ဇာဗက်စကီး၏ သေဆုံးမှုသည် ရုရှားဘက်က သေဆုံးကြောင်း အတည်ပြုခဲ့သည့် သတ္တမမြောက် ဗိုလ်ချုပ်တစ်ဦး ဖြစ်ပြီး သူသည် ယူကရိန်းစစ်ပွဲ စတင်ဖြစ်ပွားခဲ့ချိန်ကတည်းက သေဆုံးကြောင်း တရားဝင် ဖော်ပြခံရသည့် ၁၂ ယောက်မြောက် ရုရှားထိပ်သီး အရာရှိတစ်ဦး ဖြစ်ခဲ့သည်။

ယူကရိန်းစစ်တပ်သည် ရုရှား၏ ညအချိန် ဒရုန်းတိုက်ခိုက်မှုများအတွင်း တိုက်ခိုက်ရေးဒရုန်း ၁၇ စင်းအနက် ၁၀ စင်းကို အောင်မြင်စွာ ပစ်ချနိုင်ခဲ့သည်ဟု ယူကရိန်းအာဏာပိုင်များက  ဒီဇင်ဘာ ၅ ရက်တွင် ပြောကြားခဲ့သည်။

ယူကရိန်းနိုင်ငံအတွင်းက အဆောက်အဦတစ်ခု တိုက်ခိုက်ခံထားရစဉ်

ယူကရိန်း၏ Lviv(ကိယက်ဗ်) ဒေသအုပ်ချုပ်ရေးမှူး၏ ထုတ်ပြန်ချက်အရ ရုရှား၏ ဒရုန်း ၃ စင်းသည် အမည် ဖော်ပြထားခြင်းမရှိသည့် အခြေခံ အဆောက်အအုံတစ်ခုကို ပစ်မှတ်ထားခဲ့ပြီး ထိခိုက်ပျက်စီးမှု အနည်းငယ် ရှိခဲ့ သော်လည်း ထိခိုက်၊ သေဆုံးသူမရှိကြောင်း သိရသည်။

ယူကရိန်း လေတပ်က ထိုဒရုန်းများကို ယူကရိန်း၏ များပြားသည့်် နေရာဒေသအနှံ့တွင် ကြားဖြတ်ပစ်ချ နိုင်ခဲ့ခြင်း ဖြစ်သည်ဟု ထုတ်ပြန်ခဲ့သည်။ 

ထို့ပြင် ရုရှားသည် S-300 ဒုံးကျည် ၆ စင်းဖြင့် ယူကရိန်း၏ ဒွန်းနက်စ် (Donetsk) နှင့် ခါဆန် (Kherson) မြို့များရှိ အရပ်ဖက် ပစ်မှတ်များကို တိုက်ခိုက်ခဲ့သည်ဟု ယူကရိန်းအာဏာပိုင်များက ပြောကြားခဲ့သည်။

Soruce: အယ်လ်ဂျာဇီးယား

CNI International News

ကာရာကက်စ်၊ ဒီဇင်ဘာ ၅

ဗင်နီဇွဲလား (Venezuela) နိုင်ငံသားများသည် အိမ်နီးချင်း ဂွိုင်ယာနာ (Guyana) နိုင်ငံက ကာလကြာရှည် ထိန်းချုပ်ထားသည့် ပိုင်ဆိုင်မှု အငြင်းပွားနေသော ရေနံများပေါကြွယ်ဝသည့် ဒေသကို ပိုင်ဆိုင်ကြောင်း ကြေညာချက်ကို သောင်းသောင်းဖျဖျ ထောက်ခံကြောင်း မဲပေးခဲ့ကြသည်ဟု ဘီဘီစီ အင်္ဂလိပ်ပိုင်းမှ ဖော်ပြ ခဲ့သည်။

အက်စီကွီဘို (Essequibo) အမည်ရှိ အဆိုပါ ပိုင်ဆိုင်မှု အငြင်းပွားနေသည့် ဒေသကို ပြည်နယ်သစ် တစ်ခုအဖြစ် ထူထောင်ရေးအတွက် ဗင်နီဇွဲလားပြည်သူ ၉၅ ရာခိုင်နှုန်းမှ အတည်ပြုခဲ့သည်ဟု ဗင်နီဇွဲလား အရာရှိများက ပြောကြားခဲ့သည်။

ဗင်နီဇွဲလားအစိုးရကမူ ထိုဒေသသည် လွန်ခဲ့သည့် နှစ်ပေါင်း ၂၀၀ ခန့်က စပိန်လက်အောက်မှ လွတ်လပ်ရေး ရပြီးကတည်းက ဗင်နီဇွဲလား၏ နယ်နိမိတ် တစ်ခုဖြစ်ကြောင်း ကြေညာခဲ့သည်။

ဗင်နီဇွဲလားနဲ့ ဂွိုင်ယာနာနိုင်ငံကြား အငြင်းပွားနေသော ဒေသကိုတွေ့ရစဉ်

သို့သော် ဂွိုင်ယာနာနိုင်ငံကလည်း ၁၉ ရာစုနှစ်ကုန်ပိုင်းက ဗြိတိသျှ ဂွိုင်ယာနာ ခေတ်ကတည်းက ထိုဒေသကို ၎င်းတို့က လက်ဆောင်အဖြစ် ရရှိခဲ့ခြင်းဖြစ်ကြောင်း ကြေညာထားသည်။

ထိုဒေသတွင် ရေနံတူးဖော်မှုများ တွေ့ရှိခဲ့ပြီးနောက် ၂၀၁၅ ခုနှစ်တွင် ဗင်နီဇွဲလားနှင့် ဂွိုင်ယာနာအကြား အငြင်း ပွားမှုများ နောက်တကြိမ် မြင့်တက်လာခဲ့ခြင်း ဖြစ်သည်။

ဗင်နီဇွဲလားသမ္မတ နီကိုလပ်စ် မာဒူရို (Nicolas Maduro) ကမူ ပြည်လုံးကျွတ် ဆန္ဒခံယူပွဲအတွင်း အက်စီကွီဘို ဒေသကို ဗင်နီဇွဲလားက ပိုင်ဆိုင်သည့် ဒေသဖြစ်ကြောင်း ထောက်ခံမဲ ပေးခဲ့ကြသည့် ရလဒ်ထွက်ပေါ်မှုအတွက် ချီးကျူးဂုဏ်ပြုကြောင်း ပြောကြားခဲ့သည်။ 

အကျစီကှီဘိုဒေသကို တွေ့ရစဉ်

စတုရန်းကီလိုမီတာ ၁၅၉,၅၀၀ (စတုရန်း မိုင် ၆၁၆၀၀) ကျယ်ဝန်းသည့် အဆိုပါ အက်စီကွီဘို ဒေသကို ဂွိုင်ယာနာ နိုင်ငံက ထိန်းချုပ်ထားသည်။

ထိုဒေသတွင် ဂွိုင်ယာနာ လူဦးရေ စုစုပေါင်း၏ ၆ ပုံ ၁ ပုံနေထိုင်လျက်ရှိသည်။ 

ထိုဒေသကို ပိုင်ဆိုင်ရေးနှင့်ပတ်သက်ပြီး ဗင်နီဇွဲလားနှင့် ဂွိုင်ယာနာအကြား ကာလကြာရှည် တင်းမာမှုများ မြင့်တက်ခဲ့သည်။

Source: ဘီဘီစီ

CNI International News

ဝါရှင်တန်၊ ဒီဇင်ဘာ ၅ 

အမေရိကန်သမ္မတ ဂျိုးဘိုင်ဒန် (Joe Biden) အစိုးရအဖွဲ့သည် ရုရှားနှင့် စစ်ပွဲဖြစ်ပွားနေသည့် ယူကရိန်းစစ်တပ်ကို ကူညီထောက်ပံ့ရန် ရန်ပုံငွေများ အရေးတကြီး လိုအပ်နေကြောင်း အိမ်ဖြူတော် အမျိုးသားလုံခြုံရေးကောင်စီ၏ ညှိနှိုင်းဆောင်ရွက်ရေးအရာရှိ ဂျွန်ကာဘီ (John Kirby) က ပြောကြားခဲ့ကြောင်း ရုရှားနိုင်ငံပိုင် အာတီသတင်းဌာန မှ ဖော်ပြခဲ့သည်။

အမေရိကန်၏ ရီပတ်ဘလစ်ကန် လွှတ်တော်အမတ်များက အမေရိကန်-မက္ကဆီကို နယ်စပ်တံတိုင်း တည်ဆောက် ရေးအတွက် လုံခြုံရေးအသုံးစရိတ်ကို မြှင့်တင်ရန် ယူကရိန်းနှင့် အစ္စရေးအား ကူညီပေးမည့် ဒေါ်လာ ၁၀၆ ဘီလျံ အကူအညီသည် ခြွင်းချက်အနေနှင့် ရှိနေလိမ့်မည်ဟု ပြောကြားခဲ့သည်။ 

ထိုအကြောင်းအရာနှင့်ပတ်သက်ပြီး ဒီဇင်ဘာ ၄ ရက်တွင် ABC News သတင်းဌာနက ဂျွန်ကာဘီအား မေးမြန်းခဲ့ ရာတွင် ဂျွန်ကာဘီက ထိုမေးခွန်းကို ဖြေဆိုရန် ငြင်းဆိုခဲ့သည်။

အိမ်ဖြူတော် ပြောခွင့်ရ ဂျွန်ကာဘီကို တွေ့ရစဉ်

ဂျွန်ကာဘီက သူ့အနေနှင့် သမ္မတ၏ ဆုံးဖြတ်ချက်ကို ကျော်လွန်ပြီး လုပ်ဆောင်မည် မဟုတ်ကြောင်းနှင့် ထောက်ပံ့ရေး အစီအစဉ်များ ရပ်တန့်နေမှုသည် အလွန်အရေးကြီးသည့် ကိစ္စဖြစ်ကြောင်း ပြောကြားခဲ့သည်။

"ကျနော်ပြောချင်တာက ယူကရိန်း၊ အစ္စရေးနဲ့ နယ်စပ်တံတိုင်း တည်ဆောက်ရေးမှာ ကျနော်တို့ရဲ့ အစီအစဉ်တွေ အတွက် ငွေကြေးတွေ အလွန်အမင်း လိုအပ်နေတယ်ဆိုပါတာပဲ" ဟု ဂျွန်ကာဘီက ပြောကြားခဲ့သည်။

လူဝင်မှုကြီးကြပ်ရေး အစီအစဉ် ပြုပြင်ပြောင်းလဲမှုအတွက်လည်း ရီပတ်ဘလစ်ကန်များ ဦးဆောင်ထားသည့် အောက်လွှတ်တော်က လျစ်လျူရှုထားသည်ဟု ၎င်းက ဆိုသည်။

ထို့ကြောင့် လွှတ်တော်အနေနှင့် စစ်ရေး အထောက်အပံ့များ ရပ်တန့်နေမှုကို ဖြေရှင်းရန် ချက်ချင်းလုပ်ဆောင် သင့်ကြောင်း ဂျွန်ကာဘီက တိုက်တွန်းခဲ့သည်။

ယူကရိန်းသမ္မတ ဇာလန်းစကီးကိုတွေ့ရစဉ်

ဘိုင်ဒန် အစိုးရအဖွဲ့သည် ယူကရိန်းနှင့် အစ္စရေးအတွက် စစ်ရေးအကူအညီအဖြစ် ဒေါ်လာ ၁၀၆ ဘီလျံ ထောက်ပံ့ ပေးမည့် အစီအစဉ်ကို အောက်တိုဘာလ အစောပိုင်းကတည်းက တွန်းအားပေး ဆောင်ရွက်ခဲ့သော်လည်း ထိုအစီအစဉ်ကို ရီပတ်ဘလစ်ကန်များက ဆန့်ကျင်ကန့်ကွက်ခဲ့ကြောင်း ဂျွန်ကာဘီက ပြောကြားခဲ့သည်။

အမေရိကန်သည် ယူကရိန်း-ရုရှား စစ်ပွဲစတင် ဖြစ်ပွားခဲ့ချိန်ကတည်းက ယူကရိန်းကို ဒေါ်လာ ၇၆ ဘီလျံကျော် စစ်ရေးအကူအညီများနှင့် အခြား ကူညီထောက်ပံ့မှုများ ပေးအပ်ခဲ့ပြီးဖြစ်သည်။

Source: အာတီ

CNI International News

ဂါဇာ၊ ဒီဇင်ဘာ ၅

အစ္စရေးတပ်ဖွဲ့မျာသည် ဂါဇာကမ်းမြောင်ဒေသ၏ တောင်ပိုင်းကို ပိုမိုနက်ရှိုင်းစွာ ဝင်ရောက်ပြီး မြေပြင်စစ်ဆင်ရေး များ ပြုလုပ်နေသဖြင့် ဂါဇာတောင်ပိုင်းရှိ ခန်းယွန်းနစ် (Khan Younis) မြို့၏ နေရာဒေသ အများအပြားမှ ထွက်ခွာ ကြရန် ဂါဇာဒေသခံများကို အစ္စရေးက အမိန့်ထုတ်ပြန်ခဲ့ကြောင်း ရိုက်တာမှ ဖော်ပြခဲ့သည်။

အစ္စရေးစစ်တပ်သည် X လူမှုမီဒီယာတွင် ခန်းယွန်းနစ်မြို့၏ မြေပုံကို တင်ခဲ့ပြီး ထိုမြေပုံထဲတွင် အဝါရောင်ဖြင့် ဖော်ပြထားသော နေရာဒေသများတွင် နေထိုင်သူများကို ချက်ချင်းရွှေ့ပြောင်းရန် ညွှန်ကြားချက် ထုတ်ပြန်ခဲ့သည်။

ထိုမြေပုံထဲတွင် ဂါဇာ၏ တောင်ပိုင်းနှင့် အနောက်ပိုင်းဒေသများကို ညွှန်ပြထားသည့် မြားသုံးခုကို ထောက်ပြထား ပြီး ဒေသခံများကို မြေထဲပင်လယ် (Mediterranean sea)နှင့် အီဂျစ်နယ်စပ်သို့ သွားရောက်ရန် တိုက်တွန်းခဲ့သည်။

အစ္စရေးစစ်တပ်ကိုတွေ့ရစဉ်

ဂါဇာဒေသခံများအား ရွှေ့ပြောင်းရန် ညွှန်ကြားထားသည့် နေရာအများစုတွင် ယခင်ကတည်းက စစ်ဘေးရှောင် စခန်းများနှင့် ပြည့်နှက်နေပြီး စစ်ဘေးရှောင် အများစုသည် ယာယီတဲများထိုးကာ အိပ်စက်နေရသည့်် နေရာများ ဖြစ်သည်။

အဘူ မိုဟာမက် (Abu Mohammed) အမည်ရှိ ဂါဇာဒေသခံ တစ်ဦးကမူ သူသည် ဂါဇာကမ်းမြောင်ဒေသ၏ မြောက်ဘက် ဂါဇာ စီးတီး (Gaza City) မြို့ရှိ ၎င်း၏ နေအိမ်မှ ထွက်ပြေးတိမ်းရှောင် လာခဲ့ပြီးနောက် ယခု အကြိမ်သည် တတိယအကြိမ်မြောက် ဒုက္ခသည်စခန်း ပြောင်းရွှေ့မှု ဖြစ်သည်ဟု ရိုက်တာသတင်းဌာနသို့ ပြောကြားခဲ့သည်။

"မနေ့ညက ဂါဇာဒေသရဲ့ အရှေ့ဘက်နဲ့ မြောက်ဘက်မှာရှိတဲ့ အစ္စရေးတင့်ကားတွေက အမြောက်နဲ့ ပစ်ခတ်ခဲ့ ပါတယ်။ ပြီးတော့ ဂါဇာဒေသရဲ့ အနောက်ဘက် ပင်လယ်ထဲမှာရှိတဲ့ အစ္စရေးရေတပ် သင်္ဘောတွေကလည်း လက်နက်ကြီးတွေနဲ့ ပစ်ခတ်ခဲ့ပါတယ်" ဟု မိုဟာမက်က ပြောသည်။

အစ္စရေးရဲ့ တိုက်ခိုက်ရေး လေယာဉ်တွေကိုတွေ့ရစဉ်

ထိုတိုက်ခိုက်မှုများကြောင့် ပေါက်ကွဲမှုများနှင့် မီးလောင်ကျွမ်းမှုများ ဖြစ်ပွားခဲ့သည်ဟုလည်း ၎င်းက ဆိုသည်။

အောက်တိုဘာ ၇ ရက်ကစပြီး အစ္စရေးနှင့် ဟားမာ့စ်အဖွဲ့အကြား စစ်ပွဲဖြစ်ပွားခဲ့ပြီးနောက် ဂါဇာဒေသတွင် နေထိုင်သည့် လူဦးရေ ၂ ဒသမ ၃ သန်း၏ ၈၀ ရာခိုင်နှုန်းသည် အစ္စရေး၏ ထိုးစစ်ဆင်တိုက်ခိုက်မှုများကြောင့် ၎င်းတို့၏ နေအိမ်များကို စွန့်ခွာပြီး ဘေးလွတ်ရာ ထွက်ပြေးတိမ်းရှောင်ခဲ့ရသည်။

Source: ရိုက်တာ

CNI International News

ဘရပ်ဆဲလ်၊ ဒီဇင်ဘာ ၅

ယူအေအီးနိုင်ငံ၊ ဒူဘိုင်း (Dubai) တွင် COP28 ရာသီဥတုညီလာခံ ကျင်းပနေချိန်တွင် ရာသီဥတုဖောက်ပြန် ပြောင်းလဲမှု၏ အန္တရာယ်များကို အလေးထားဖော်ပြရန် ထောင်နှင့််ချီသည့် လူများသည် ဒီဇင်ဘာ ၃ ရက်က ဘယ်လ်ဂျီယံနိုင်ငံ ဘရပ်ဆဲလ် (Brussels) မြို့တော်၌ ချီတက်ဆန္ဒပြခဲ့သည်ဟု အေပီမှ ဖော်ပြခဲ့သည်။

ဆန္ဒပြသူများ ကိုင်ဆောင်ထားသည့် လက်ကိုင်ပိုစတာတစ်ခုတွင် "ကျနော်တို့ရဲ့ ကမ္ဘာကြီးကို ကျနော်တို့ ကယ်တင်ရပါမယ်။ ဘီယာက ကမ္ဘာပေါ်မှာပဲ ရှိတာပါ" ဟု ရေးသားထားသည်ကို မြင်တွေ့ရသည်။

ဒူဘိုင်းမြို့မှာ ကျင်းပနေတဲ့ ရာသီဉတုအရေး ညီလာခံကို တွေ့ရစဉ်

ထို့ပြင် ကမ္ဘာကြီးပူနွေးလာမှုကို တန်ပြန်ရန် ပိုမိုခိုင်မာသည့် စီမံချက်များ လုပ်ဆောင်ရေးအတွက်လည်း ရာသီဥတုအရေး ညွန့်ပေါင်းအဖွဲ့ (Climate Coalition) ၏ တက်ကြွလှုပ်ရှားသူများက နိုင်ငံရေးသမားများကို တိုက်တွန်းခဲ့သည်။

လုခ် ဒါနက်ဇ် (Luc Durnez) အမည်ရှိ ဆန္ဒပြသူတစ်ဦးကမူ ဘယ်လ်ဂျီယံအစိုးရသည် ရာသီဥတု ဖောက်ပြန် ပြောင်းလဲရေးကို တားဆီးရန် အစီအစဉ်မရှိဘဲ ရာသီဥတုညီလာခံသို့ တက်ရောက်မှုသည် ရှက်စရာကောင်း သည်ဟု ပြောကြားခဲ့သည်။ 

 COP28 ရာသီဥတုညီလာခံကို တွေ့ရစဉ်

ကမ္ဘာကြီးပူနွေးလာမှုကို စက်မှုမတိုင်မီ ခေတ်ကာလကနှင့် နှိုင်းယှဉ်ပါက ၁ ဒသမ ၅ ဒီဂရီ ဆဲလ်စီးယပ်စ် (၂ ဒသမ ၇ ဒီဂရီ ဖာရင်ဟိုက်) တွင် ရှိစေရန် လာမည့် ၇ နှစ်အတွင်း ဖန်လုံအိမ်ဓာတ်ငွေ့ (Greenhouse gas) ထုတ်လွှတ် မှုများကို ထက်ဝက်လျှော့ချရန် ယူအေအီးနိုင်ငံ၊ ဒူဘိုင်းမြို့တွင် ကမ္ဘာ့နိုင်ငံများမှ ခေါင်းဆောင်များက ဆွေးနွေး လျက် ရှိသည်။

သို့သော်လည်း ဘရပ်ဆဲလ်မြို့တော်တွင် ချီတက်ဆန္ဒပြသူများကမူ ဥရောပသည် ရာသီဥတု ဖောက်ပြန် ပြောင်းလဲမှုကို တားဆီးရန် လုံလောက်သည့် အစီအမံများ လုပ်ဆောင်ခဲ့ခြင်းမရှိကြောင်း ပြောကြားခဲ့သည်။

Source: အေပီ

CNI International News

ဝါရှင်တန်၊ ဒီဇင်ဘာ ၄

အမေရိကန်သမ္မတ ဂျိုးဘိုင်ဒန် (Joe Biden) သည် ဂါဇာကမ်းမြောင်ဒေသတွင် အစ္စရေး၏ စစ်ပွဲကို ထောက်ခံမှု ကြောင့် အမေရိကန်ရှိ မွတ်ဆလင် မဲဆန္ဒရှင်များ၏ ထောက်ခံမှုအား ဆုံးရှုံးရဖွယ်ရှိသည်ဟု ရိုက်တာမှ ဖော်ပြခဲ့ သည်။

ဘိုင်ဒန်ကို ဆန့်ကျင်ရန် အမေရိကန် မွတ်ဆလင် အသိုင်းအဝိုင်းက ဆော်သြလျက်ရှိနေသည်။ 

သမ္မတရွေးကောက်ပွဲတွင် ရီပတ်ဘလစ်ကန်နှင့် ဒီမိုကရက်တစ်ပါတီအကြား အကြိတ်အနယ် ယှဉ်ပြိုင်ရမည့် ပြည်နယ်ခြောက်ခု၌ နေထိုင်သည့် မွတ်ဆလင် အမေရိကန် ခေါင်းဆောင်များက ၂၀၂၄ ခုနှစ် ရွေးကောက်ပွဲတွင် အခြား ကိုယ်စားလှယ်လောင်းတစ်ဦးကို ထောက်ခံရန် ရွေးချယ်ရခြင်း မရှိသေးပေ။

ထိုပြည်နယ်ခြောက်ခုသည် ၂၀၂၀ ပြည့်နှစ် ရွေးကောက်ပွဲက ဘိုင်ဒန်ကို အနိုင်ရရှိစေခဲ့သည့် အနည်းငယ်သော ပြည်နယ်များထဲတွင် ပါဝင်ခဲ့သည်။

အမေရိကန်-အစ္စလာမ်မစ် ဆက်ဆံရေး ကောင်စီ၏ ညွှန်ကြားရေးမှူး ဂျေလာနီ ဟူစိန်ကိုတွေ့ရစဉ်

သို့သော် မွတ်ဆလင်နှင့် အာရပ် အမေရိကန် အသိုင်းအဝိုင်း၏ ဆန့်ကျင်မှုသည် လာမည့်နှစ်တွင် ပြုလုပ်မည့် ရွေးကောက်ပွဲ၌ ဘိုင်ဒန်၏ သမ္မတရွေးကောက်ပွဲ ဝင်ရောက်ယှဉ်ပြိုင်မည့် အစီအစဉ်များကို ရှုပ်ထွေးစေမည် ဖြစ်သည်။

"ကျနော်တို့မှာ ရွေးချယ်စရာ နှစ်ခုတည်း မဟုတ်ပါဘူး။ ရွေးစရာ အများကြီးရှိပါတယ်" ဟု မင်နီဆိုးတား (Minnesota) ပြည်နယ်၏ အမေရိကန်-အစ္စလာမ်မစ် ဆက်ဆံရေး ကောင်စီ၏ ညွှန်ကြားရေးမှူး ဂျေလာနီ ဟူစိန် (Jaylani Hussein) က မီချီဂန် (Michigan) ပြည်နယ် ဒီးယားဘွန်း (Dearborn) မြို့တွင် ပြုလုပ်သည့်် သတင်းစာ ရှင်းလင်းပွဲ တစ်ခုတွင် ပြောကြားခဲ့သည်။

ဟူစိန်သည် ဘိုင်ဒန်အား ထောက်ခံရန် ရှိ/မရှိ မေးမြန်းခံရချိန်တွင် အထက်ပါအတိုင်း ပြောကြားခဲ့ခြင်း ဖြစ်သည်။

ထို့ပြင် ၎င်းတို့အနေနှင့် သမ္မတဟောင်း ဒေါ်နယ်ထရမ့် (Donald Trump) ကိုလည်း ထောက်ခံမည် မဟုတ် ကြောင်းနှင့် မွတ်ဆလင် အသိုင်းအဝိုင်းသည် အခြား ကိုယ်စားလှယ်လောင်းများကို ထောက်ခံရေးအတွက် ဆုံးဖြတ်သွားမည်ဟု ဟူစိန်က ထပ်လောင်း ပြောကြားခဲ့သည်။

မီချီဂန်၊ အရီဇိုးနား (Arizona) ၊ ဝစ္စကွန်ဆင် (Wisconsin) ၊ ပန်ဆယ်ဗေးနီးယား (Pennsylvania) နှင့် ဖလော်ရီဒါ (Florida) ပြည်နယ်များတွင် ဂါဇာဒေသကို တိုက်ခိုက်နေသော အစ္စရေးကို ထောက်ခံသည့် ဘိုင်ဒန်အား ဆန့်ကျင် ကန့်ကွက်ကြောင်း ပြသသည့်အနေဖြင့် ဆန္ဒပြမှုများ ပြုလုပ်ခဲ့သည်။

Source: ရိုက်တာ

CNI International News

မနီလာ၊ ဒီဇင်ဘာ ၄

ဖိလစ်ပိုင်နိုင်ငံတောင်ပိုင်း တက္ကသိုလ်တစ်ခု၏ အားကစားရုံတွင် ဗုံးခွဲတိုက်ခိုက်မှု တစ်ခုကြောင့် လူ ၄ ဦး သေဆုံး ကာ လူအများအပြား ဒဏ်ရာ ရရှိသွားခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဒီဇင်ဘာ ၃ ရက်နေ့ နံနက်ပိုင်းက မင်ဒါနာအို (Mindanao)ကျွန်း၊ မာရာဝီ (Marawi) မြို့ရှိ မင်ဒါနာအိုပြည်နယ် တက္ကသိုလ် (Mindanao State University) ၏ အားကစားခန်းမတွင် ကက်သလစ် (Catholic) ဘာသာဝင်များက ဘုရားဝတ်ပြုရန် စုဝေးနေချိန်၌ ဗုံးပေါက်ကွဲမှု ဖြစ်ပွားခဲ့ခြင်း ဖြစ်သည်။

ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr) က ထိုတိုက်ခိုက်မှုကို ရှုတ်ချခဲ့ပြီး အများ ပြည်သူ ဘေးကင်းလုံခြုံရေးကို စိတ်ချသေချာစေအောင် လုပ်ဆောင်ရန် ရဲတပ်ဖွဲ့နှင့် စစ်တပ်ကို ညွှန်ကြားခဲ့သည်။

ဖိလစ်ပိုင်သမ္မတ ဖာဒီနန် မားကို့စ် ဂျူနီယာကို တွေ့ရစဉ်

"ပြည်ပ အကြမ်းဖက်သမားတွေ ကျူးလွန်ခဲ့တဲ့ အဓိပ္ပာယ်မရှိတဲ့ စက်ဆုပ်ရွံရှာဖွယ် အကောင်းဆုံး လုပ်ရပ်တွေကို ပြင်းပြင်းထန်ထန် ရှုတ်ချပါတယ်။ အပြစ်မဲ့တဲ့ သူတွေကို ဆန့်ကျင်တိုက်ခိုက်တဲ့ အကြမ်းဖက်မှုကို ပြုလုပ်ခဲ့တဲ့ အစွန်းရောက်တွေကို ကျနော်တို့ လူ့အသိုင်းအဝိုင်းရဲ့ ရန်သူတွေဖြစ် အမြဲတမ်း သတ်မှတ်ထားမှာပါ" ဟု မားကို့စ် ဂျူနီယာက ပြောသည်။

မင်ဒါနာအိုကျွန်းပေါ်ရှိ လာနာအို ဒယ်ဆော (Lanao del Sur)ပြည်နယ် အုပ်ချုပ်ရေးမှူး မာမင်တယ် အလွန်တို အဒီယွန် ဂျူနီယာ (Mamintal Alonto Adiong Jr) ကလည်း ထိုအကြမ်းဖက် ဗုံးခွဲတိုက်ခိုက်မှုကို ရှုတ်ချခဲ့သည်။

"ကျနော့်ရဲ့ ပြည်နယ်အတွင်းမှာ ဘာသာရေး လွတ်လပ်ခွင့် အပါအဝင် အခြေခံ လူ့အခွင့်အရေးတွေကို အတည်ပြု ထိန်းသိမ်းထားပါတယ်" ဟု အဒီယွန်က ထုတ်ပြန်ခဲ့သည်။

ပညာရေး အဆောက်အအုံများသည် ဖိလစ်ပိုင်၏ အနာဂတ် ပုံဖော်မည့် လူငယ်များကို အသိပညာ ကြွယ်ဝစေ နိုင်ပြီး ယဉ်ကျေးမှုနှင့် ငြိမ်းချမ်းရေးကို မြင့်တက်စေသည့် နေရာများဖြစ်သောကြောင့် ပညာရေး အဆောက်အအုံ များကို အကြမ်းဖက် တိုက်ခိုက်မှုများကို ရှုတ်ချရမည်ဖြစ်ကြောင်း အဒီယွန်က ပြောသည်။
မင်ဒါနာအိုပြည်နယ် တက္ကသိုလ်ကလည်း ထိုတိုက်ခိုက်မှုအတွက် ဝမ်းနည်းကြောင်း ထုတ်ပြန်ခဲ့ပြီး နောက်ထပ် သတိပေးချက်များ မထုတ်ပြန်မီ အချိန်အထိ စာသင်ကြားမှုများကို ဆိုင်းငံ့ထားမည်ဖြစ်ကြောင်း ကြေညာခဲ့သည်။