CNI International News

ဘန်ကောက်၊ ဇူလိုင် ၁၃

ဝန်ကြီးချုပ်နေရာအတွက် အဆုံးအဖြတ် မဲပေးပွဲမတိုင်မီတစ်ရက်တွင် ဝန်ကြီးချုပ်ဖြစ်ရေး ရေပန်းစားနေသော ပီတာလင်ဂျရုန်ရတ်(Pita Limjaroenrat)ကို ဟန့်တားမည့် စွဲချက်နှစ်ခု ထွက်ပေါ်လာကြောင်း ဘန်ကောက်ပို့စ်က ဖော်ပြခဲ့သည်။

ထို့ကြောင့် ပီတာသည် ဝန်ကြီးချုပ်ဖြစ်ရေး ကြိုးပမ်းမှုအပေါ် ကြီးမားသော အနှောင့်အယှက်နှင့် ကြုံနေရသည်။

နိုင်ငံရေးတွင် ဘုရင့်သစ္စာခံ စစ်တပ်၏ ပါဝင်ပတ်သက်မှုကို ဆန့်ကျင်ကြသော လူငယ်မဲဆန္ဒရှင်အများစု ဖြစ်သည့် ပီတာကို ထောက်ခံသူများက ဇူလိုင် ၁၂ ရက်နေ့က ဆန့်ကျင်ဆန္ဒပြပွဲများ ပြုလုပ်လာခဲ့ကြသည်။

ထို့ကြောင့် နိုင်ငံရေးမတည်ငြိမ်သည့် နှစ်နှစ်ဆယ်အတွင်း နောက်ထပ် မငြိမ်သက်မှုများ ဖြစ်ပွားလာဦးမည့် လက္ခဏာ ရှိနေသည်။ 

ရှေ့နေတစ်ယောက်က ပီတာနှင့် ၎င်း၏ ရွေးကောက်ပွဲအနိုင်ရ Move Forward Party(MFP)ကို တင်လာသည့် စွဲချက်အား လက်ခံလိုက်ပြီဖြစ်ကြောင်း ဖွဲ့စည်းပုံခုံရုံးက ပြောကြားခဲ့သည်။ 

ပီတာနှင့် MFP ပါတီမှာ တော်ဝင်မိသားစုအား စော်ကားခြင်းအပေါ် တားဖြစ်ထားသည့်ဥပဒေကို ပြင်ဆင်ရန် စိုင်းပြင်းနေမှုမှာ ဘုရင်အား အကြီးအကဲအဖြစ်ထားသည့် ဒီမိုကရေစီအစိုးရကိုဖယ်ရှားရန် ကြိုးစားသည့်သဘော သက်ရောက်သည်ဟု စွဲချက်တွင် ပြောကြားထားသည်။ 

ပီတာ ထောက်ခံသူများ လွှတ်တော်ကို ဆန္ဒပြနေစဉ်

ထို့နောက် ဖွဲ့စည်းပုံခုံရုံးကလည်း ပီတာအနေဖြင့် မီဒီယာကုမ္ပဏီတစ်ခုတွင် ရှယ်ယာများ ပိုင်ဆိုင်ထားခြင်းမှာ ရွေးကောက်ပွဲစည်းမျဉ်းကို ချိုးဖောက်ရာ ရောက်သောကြောင့် မေလ ၁၄ ရက်နေ့ ရွေးကောက်ပွဲတွင် ယှဉ်ပြိုင် အရွေးခံရန် သတ်မှတ်ချက်နှင့်မညီဟု စွပ်စွဲထားသည့် စွဲချက်မှာ ကျိုးကြောင်းဆီလျော်သည်ဟုဆိုကာ အမတ် အဖြစ် မသင့်လျော်ကြောင်း ရွေးကောက်ပွဲကော်မရှင်က အတည်ပြု ထောက်ခံခဲ့ပြီးနောက် နာရီပိုင်းအကြာတွင် ယခုစွဲချက် ထွက်ပေါ်လာခြင်း ဖြစ်သည်။ 

သို့သော်လည်း စွဲချက်နှစ်ခုစလုံးက အသက် ၄၂ နှစ်သာရှိသေးသည့် ပီတာကို ဇူလိုင် ၁၃ ရက်နေ့ မဲပေးပွဲတွင် အရွေးခံမှုကို တားဆီနိုင်မည့် သဘောတော့မရှိပါ။ 

ပီတာအနေဖြင့် ဝန်ကြီးချုပ် ဖြစ်လာရန်အတွက် လွှတ်တော်၏ ထက်ဝက်ကျော်က ထောက်ခံမဲပေးဖို့ လိုအပ်နေ ပါသည်။ 

ပါလီမန်တွင် လုံလောက်သော ထောက်ခံမှုရရန်လည်း ပီတာအနေဖြင့် MFP ပါတီ၏ တည်ဆဲအာဏာ အဆောက်အအုံကို တိုက်ဖျက်ပစ်မည့် မူဝါဒအား ဆန့်ကျင်နေသော ရှေးရိုးစွဲ အထက်လွှတ်တော်အမတ်များ၏ ထောက်ခံမှုကို ရမှဖြစ်မည်။ 

အထူးသဖြင့် ဘုရင်အား စော်ကားမှုကို ထောင်ဒဏ် ၁၅ နှစ်နှင့် အထက်အထိ အပြစ်ပေးနိုင်သည့် ပုဒ်မ ၁၁၂ ကို ပြင်ဆင်သွားမည့် ပါတီမူဝါဒမှာ အငြင်းအပွားရဆုံး အစိတ်အပိုင်းတစ်ခု ဖြစ်နေသည်။ 

ပီတာက သူ့ကို သတ်မှတ်ချက်နှင့်မညီကြောင်း ရွေးကောက်ပွဲကော်မရှင်၏ ထောက်ခံ အတည်ပြုမှုမှာ တရားမျှတ ခြင်းမရှိဟု ပြောသလို အချိန်ကိုက် ထွက်ပေါ်လာမှုကိုလည်း မေးခွန်းထုတ်လိုက်သည်။ 

ပီတာလင်ဂျရုန်ရတ်နဲ့ သူ၏ ထောက်ခံသူများကိုတွေ့ရစဉ်

“အလောသုံးဆယ် နိုင်လွန်းတယ်။ ဝန်ကြီးချုပ် ရွေးပွဲမတိုင်မီ တစ်ရက်အလိုမှ ကပ်ပြီး ထွက်လာတာတော့ မဖြစ်သင့်ဘူး” ဟု ပီတာက သတင်းထောက်များကို ပြောကြားခဲ့သည်။ 

ဖွဲ့စည်းပုံအခြေခံဥပဒေခုံရုံးက စွဲချက်အသစ်ကို ကြေညာလိုက်ပြီးနောက် ရုပ်သံအင်တာဗျူးတွင် ပီတာက ပုဒ်မ ၁၁၂ ကို ပြင်ဆင်ရေး သူ့ပါတီ(MFP)၏ အဆိုပြုချက်မှာ ဘုရင်စနစ်ကို ပျက်ပြားစေရန် ကြိုးစားမှု မဟုတ်ကြောင်း အလေးအနက် ပြောကြားခဲ့သည်။ 

ရဲရင့်ပြတ်သားသည့် ပြုပြင်ပြောင်းလဲရေး အစီအစဉ်များကြောင့် လူငယ်မဲဆန္ဒရှင်များက ပုံအော ထောက်ခံခဲ့ကြ သည့် Move Forward ပါတီနှင့် အခြား အတိုက်အခံပါတီများက မေလရွေးကောက်ပွဲတွင် ဘုရင့်သစ္စာခံ စစ်တပ်ဖက် ယိမ်းသည့် ပြိုင်ဘက်များကို အလဲထိုး လိုက်နိုင်ခြင်းမှာ စစ်တပ်က ဦးဆောင် (သို့မဟုတ်) ထောက်ခံ သည့် အစိုးရ ၉ နှစ်တာကို လူထုက တစ်ခဲနက်ဆန့််ကျင်ကြောင်း ပြသလိုက်ခြင်းပင် ဖြစ်သည်ဟု အများက ယူဆ ထားကြသည်။ 

MFP ပါတီက အနိုင်ရရန် အလားအလာရှိသည့် ဖြူးထိုင်းပါတီကို အမတ်နေရာ ၁၀ နေရာ အသာဖြင့် အနိုင်ရခဲ့ရာ ဇူလိုင် ၁၃ ရက်နေ့ မဲပေးပွဲအပြီးတွင် ပါတီနှစ်ခုပေါင်း၍ ညွန့်ပေါင်းအစိုးရဖွဲ့ရန် သဘောတူထားကြပြီး ဖြစ်သည်။

Source: ရိုက်တာ

CNI International News

ဘန်ကောက်၊ ဇူလိုင် ၁၂

မကြာခင်မှာ အစိုးရသစ်ကို အစိုးရအဖွဲ့အာဏာကို လွှဲပြောင်းပေးရတော့မည်ဖြစ်သည့် အိမ်စောင့်အစိုးရအဖွဲ့ ဝန်ကြီးချုပ် ပရာယွတ် ချန်အိုချာ (Prayut Chan-o-cha)က နိုင်ငံရေးမှ ထွက်ခွာတော့မည်ဖြစ်သလို၊ ညီညွတ်သော ထိုင်းပါတီ (United Thai Nation Party)၏ အဖွဲ့ဝင်အဖြစ်မှလည်း နုတ်ထွက်တော့မည်ဖြစ်ကြောင်း ကြေညာ ခဲ့သည်။ 

သို့သော် ပါတီခေါင်းဆောင်နှင့် အလုပ်အမှုဆောင်များ၊ ပါတီဝင်များအနေဖြင့် ခိုင်မာသော သဘောတရားများဖြင့် နိုင်ငံရေးလှုပ်ရှားမှုများကို ဆက်လုပ်ပြီး နိုင်ငံ၏ အဆောက်အအုံများကို ကာကွယ်ကာ၊ ထိုင်းပြည်သူများကိုလည်း ဂရုစိုက်ဖို့ ၎င်း၏ ဆန္ဒကိုလည်း ပရာယွတ်က ဖော်ပြသွားခဲ့သည်။ 

ပြည်သူများအနေဖြင့်လည်း ပါတီ၏ အလုပ်ကို ဆက်လက်ထောက်ခံကြဖို့ ပရာယွတ်က တောင်းဆိုခဲ့သည်။ 

ထို့နောက် မေလ ၁၄ ရက်နေ့ အထွေထွေရွေးကောက်ပွဲတွင် ပါတီနှင့် သူ့ကို ထောက်ခံခဲ့သည့်အပေါ်လည်း ကျေးဇူးတင်ကြောင်း ၎င်းက ပြောကြားခဲ့သည်။ 

ညီညွတ်သောထိုင်းပါတီ ခေါင်းဆောင်များနဲ့အတူတွေ့ရသော ပရာယွတ်

ညီညွတ်သော ထိုင်းပါတီကို ဆန္ဒမဲပေးပိုင်ခွင့်ရှိသူများထဲမှ ၁၂.၅၂ ရာခိုင်နှုန်းက မဲပေးခဲ့ကြသည်။ ထိပ်တန်း ၁၃ ပါတီတွင် ပါဝင်ခဲ့ပြီး အမတ်နေရာ ၃၆ နေရာရခဲ့သည်။ မကြာသေးမီကမှ လောလောလတ်လတ် ထူထောင်ထားသည့် ပါတီတစ်ခုအတွက် ရလဒ်ကောင်းသည်ဟု ယူဆခဲ့ကြသည်။ 

“ညီညွတ်သော ထိုင်းပါတီကို ဝင်ခဲ့ရတာက သဘောတရားအားကောင်းတဲ့ ပါတီတစ်ခုကို အလိုရှိနေခဲ့လို့ပဲ။ နိုင်ငံ၊ ဘာသာတရားနဲ့ ဘုရင်ကိုလည်း ချစ်၊ အနာဂတ်မှာ နိုင်ငံအတွက် ဒေါက်တိုင်လည်း ဖြစ်လာရမယ်ပေါ့”ဟု ပရာယွတ်က ပြောကြားခဲ့သည်။ 

ပရာယွတ်သည် နိုင်ငံတစ်ဝန်း ခရီးလှည့်လည်၍ ပြည်သူများနှင့် တွေ့ဆုံရာတွင် နားလည် စာနာမှုနှင့် ယုံကြည် မှုများကို ရခဲ့သည်။ 

“ပါတီဝင်တွေနဲ့ ပြည်သူတွေရဲ့ ထင်မြင်ချက်တွေကို ကြားနာခွင့်ရခဲ့တာ ဝမ်းသာမိပါတယ်။ ဘယ်တော့မှ မမေ့ နိုင်တော့တဲ့ တန်ဖိုးကြီးတဲ့ အတွေ့အကြုံတွေပါ”ဟုလည်း ပရာယွတ်က ပြောသည်။ 

သူ၏ ဝန်ကြီးချုပ်သက်တမ်း ၉ နှစ်တာအတွင်း နိုင်ငံနှင့်ပြည်သူ ကြွယ်ဝလာစေရန် အပြင်းအထန် အလုပ်လုပ် ခဲ့သည်ဟုလည်း ပရာယွတ်က ပြောကြားခဲ့သည်။

Source: Thai PBS World

CNI International News

ကိယက်ဗ်၊ ဇူလိုင် ၁၂

မော်စကို၏ အန္တရာယ်ကို အဓိကထားဆွေးနွေးမည့် နေတိုးညီလာခံ မစတင်မီ ရုရှားက ယူကရိန်းမြို့တော် ကိယက်ဗ် (Kyiv)၊ အိုဒက်ဆာ (Odesa)ပင်လယ်နက်ဆိပ်ကမ်းနှင့် တောင်ပိုင်း ခါဆွန် (Kherson)ဒေသများကို တိုက်ခိုက်ခဲ့သည်။ 

ညအချိန် ကိယက်ဗ်နှင့် အိုဒက်ဆာမြို့များကို ဒရုန်းဖြင့် တိုက်ခိုက်မှုများတွင် လူအသေအပျောက် သတင်း မကြားသိရသော်လည်း တောင်ပိုင်း ဆိုဖီးကာ (Sofiivka)ရွာကို အမြောက်ဖြင့် ပစ်ခတ်ရာမှာတော့ အမျိုးသမီး တစ်ယောက် သေဆုံးခဲ့သလို ခါဆွန်မြို့တွင်လည်း လူ ၂ ယောက် ထိခိုက်ဒဏ်ရာ ရရှိခဲ့သည်ဟု ခါဆွန်အုပ်ချုပ်ရေး မှူး အိုလက်ဆန်ဒါ ပရိုကူဒင် (Oleksandr Prokudin)က ပြောသည်။ 

ယူကရိန်းတစ်ခွင်တွင် လေကြောင်းအန္တရာယ် သတိပေးချက်များ ထုတ်ပြန်ထားပြီး ကရင်မလင်က ဝေဖန်နေသည့် ညီလာခံအတွက် နေတိုးခေါင်းဆောင်များ စုဝေးနေစဉ်တွင် တိုက်ပွဲများလည်း ဆက်လက်ဖြစ်ပွားနေသည်။

မော်စကိုက ၎င်း၏ လုံခြုံရေးကို ကာကွယ်ရန် တုံ့ပြန်သွားမည်ဖြစ်ကြောင်းလည်း သတိပေးထားသည်။ 

ရုရှား တိုက်ခိုက်မှုကြောင့် ပျက်စီးနေမှုကိုတွေ့ရစဉ်

“ဒီလအတွင်းမှာ ရန်သူက နှစ်ကြိမ်မြောက် ကိယက်ဗ်ကို တိုက်ခိုက်ခဲ့တာပါ”ဟု ကိယက်ဗ် စစ်တပ်ကွပ်ကဲရေးဌာန အကြီးအကဲ ဆာဟီး ပေါ့ကို(Serhiy Popko)က တယ်လီဂရမ်တွင် ရေးသားခဲ့သည်။ 

ညအချိန် ရုရှားက လွှတ်တင်သည့် အီရန်လုပ် ကာမိကာဇေ ရှာဟတ်ဒရုန်း ၂၈ စင်းအနက် ၂၆ စင်းကို ပစ်ချနိုင်ခဲ့သည်ဟု ယူကရိန်းလေတပ်က ပြောသည်။ 

အပျက်အစီး အစအနများက ကိယက်ဗ်ဒေသအတွင်းရှိ အဆောက်အဦများပေါ်သို့ ကျဆင်းခဲ့သည်ဟုလည်း စစ်တပ်က ပြောကြားသည်။ 

အိုဒက်ဆာဆိပ်ကမ်းမှ ရုံးအဆောက်အအုံ တစ်ခုမှာလည်း ပျက်စီးသွားခဲ့ပြီး ဆိပ်ကမ်းအနီးက ဂိတ်တစ်ခုကိုလည်း မီးလောင်ခဲ့ရာ အမြန်ဆုံးငြှိမ်းသတ်ခဲ့ရသည်ဟု ယူကရိန်းအာဏာပိုင်များက ပြောသည်။ 

ဗီလ်နီးယပ်စ်မြို့မှာ ကျင်းပမည့် နေတိုးညီလာခံတွင် အဖွဲ့ဝင်ဖြစ်ဖို့ ကြိုးစားနေသည့် ယူကရိန်းအဖို့ သတင်းကောင်း ကြားရလိမ့်မည်ဟု နေတိုးခေါင်းဆောင်များက ပြောကြားခဲ့သည်။ 

ကိယက်ဗ် စစ်တပ်ကွပ်ကဲရေးဌာန အကြီးအကဲ ဆာဟီးပေါ့ကို ကိုတွေ့ရစဉ်

မော်စကိုကလည်း ၂၀၂၂ ခုနှစ်၊ ဖေဖော်ဝါရီလက ယူကရိန်းသို့တပ်ဖွဲ့များ စေလွှတ်ရန် ဆုံးဖြတ်ခဲ့ရခြင်းမှာ နေတိုး၏ အရှေ့ဖက်သို့ ချဲ့ထွင်လာမှုက အကြောင်းတစ်ခု ဖြစ်သည်ဟု ပြောကြားခဲ့သည်။

အရပ်သားပြည်သူများကို တမင်ပစ်မှတ်ထား၍ တိုက်ခိုက်ခြင်း မဟုတ်ဟုလည်း ရုရှားက ငြင်းဆန်ထားသည်။ 

Source: ရိုက်တာ

CNI International News

ကာရာဘတ်၊ ဇူလိုင် ၁၂

အဇာဘိုင်ဂျန်က ကြက်ခြေနီအဖွဲ့ကြီး၏ အာမေးနီးယားဌာနခွဲမှာ မှောင်ခိုကုန်ကူးမှုများ လုပ်ဆောင်နေသည်ဟု စွပ်စွဲလိုက်ပြီး ခွဲထွက် နာဂေါ်နို-ကာရာဘတ် (Nagorno-Karabakh)ဒေသနှင့် အာမေးနီးယားကို ဆက်ထားသည့် တစ်ခုတည်းသော လမ်းမကို ယာယီ ပိတ်ထားလိုက်သည်ဟု အယ်ဂျာဇီးလ်ယားမှ ရေးသားဖော်ပြခဲ့သည်။

အာမေနီးယားအများစု နေထိုင်သည့် နာဂေါ်နို-ကာရာဘတ်ဒေသမှာ ကော့ကေးဆပ် ရန်သူနှစ်နိုင်ငံကြားတွင် ဆယ်စုနှစ်များကြာ ပိုင်နက်အငြင်းပွားနေသည့် ဒေသပင်ဖြစ်ပြီး တောင်ထူထပ်သည့် ထိုဒေသကို ပိုင်ဆိုင်ရေး စစ်ပွဲများလည်း ဖြစ်ပွားခဲ့ပြီးပြီ ဖြစ်သည်။ 

အဇာဘိုင်ဂျန် နယ်စပ်ကွပ်ကဲရေးဌာနက “နယ်စပ်က လာချင် စစ်ဆေးရေးဂိတ်ကို ဖြတ်သွားတဲ့ လမ်းပိုင်းကို ယာယီပိတ်ထားပါတယ်။ ဆေးပစ္စည်းယာဉ်တွေကို ခိုးထုတ်ဖို့ အသုံးပြုနေတဲ့ ကြက်ခြေနီအဖွဲ့ကို စုံစမ်းစစ်ဆေးမှု တွေလည်း ဆိုင်းငံ့ထားပါတယ်”ဟု ပြောသည်။ 

လာချင်စင်္ကြန်ကို ဖြတ်ပြီး တရားမဝင်ပစ္စည်းများ သယ်ယူနေမှုအပေါ် စိုးရိမ်မှုများကို သိရှိပါကြောင်း၊ ထိုလုပ်ရပ် ကိုလည်း မထောက်ခံကြောင်း နိုင်ငံတကာကြက်ခြေနီကော်မတီက ထုတ်ပြန်ခဲ့သည်။ 

ကြက်ခြေနီအဖွဲ့ကို စစ်သားတစ်ဦးက စစ်နေစဉ်

၎င်းအဖွဲ့ကြီးက “ကြက်ခြေနီအဖွဲ့ပိုင် ယာဉ်တွေမှာ ဘယ်လို တရားမဝင်ပစ္စည်းကိုမှ မတွေ့ရပါဘူး။ ကုန်တွေ အကုန်လုံးက အဇာဘိုင်ဂျန်သမ္မတနိုင်ငံ အကောက်ခွန်ရဲ့ စစ်ဆေးမှုကို ခံရပါတယ်။ ဒါပေမယ့်လည်း ကျနော်တို့ မသိလိုက်ရဘဲ ငှားထားတဲ့ ယာဉ်မောင်း ၄ ယောက်က သူတို့၏ ကိုယ်ပိုင်ကားများနှင့် ကုန်တချို့ သယ်ပို့ခဲ့ရာမှာ ကြက်ခြေနီအဖွဲ့ကြီး၏ အလံတပ်ထားခဲ့ပါတယ်။ အဲဒီလူတွေဟာ ကြက်ခြေနီအဖွဲ့ဝင်တွေ မဟုတ်ကြပါဘူး။ သူတို့ ရဲ့ အငှားစာချုပ်တွေကိုလည်း ချက်ချင်း ဖျက်သိမ်းပစ်လိုက်ပါပြီ”ဟု ထုတ်ပြန် ပြောခဲ့သည်။ 

ပြီးခဲ့သည် ဧပြီလတွင် အဇာဘိုင်ဂျန်က လာချင်စင်္ကြန် အဝင်ဝတွင် နယ်စပ်စခန်းတစ်ခု ထူထောင်ခဲ့ရာ အာမေးနီးယားက ပိတ်ဆို့သည်ဟု စွပ်စွဲစရာ ဖြစ်လာခဲ့သည်။ 

ပြီးခဲ့သည့် ဇွန်လနှောင်းပိုင်းကလည်း ကြက်ခြေနီအဖွဲ့ကြီး၏ အာမေးနီးယားဌာနခွဲက အဇာဘိုင်ဂျန်က ကာရာဘတ်သို့ ဆက်သွယ်သည့် လမ်းကြောင်း ပိတ်ဆို့နေကြောင်း ပြောကြားခဲ့ရာ မတည်ငြိမ်သော ဒေသအတွင်း အခြေအနေများနှင့်ပတ်သက်၍ စိုးရိမ်မှုများ ကြီးထွားလာခဲ့သည်။ 

Source: အယ်ဂျာဇီးလ်ယား

CNI International News

ဘန်ကောက်၊ ဇူလိုင် ၁၂

ဇူလိုင် ၁၃ ရက်နေ့ ဝန်ကြီးချုပ်ရွေးမည့် အောက်လွှတ်တော်နှင့် အထက်လွှတ်တော် လွှတ်တော်နှစ်ရပ် ပူးတွဲ အ စည်းအဝေးတွင် Move Forward ပါတီခေါင်းဆောင် ပီတာလင်ဂျရုန်ရတ်ကို ဝန်ကြီးချုပ်လောင်းအဖြစ် အဆိုပြု သွားမည်ဖြစ်ကြောင်း ဖြူးထိုင်း(Pheu Thai)ပါတီခေါင်းဆောင် ချိုနန် သီရိကော(Chonlanan Srikaew)က ပြော ကြောင်း Thai PBS သတင်းမှ ဖော်ပြခဲ့သည်။ 

Move Forward ပါတီ ဦးဆောင်သည့် ညွန့်ပေါင်း၈ပါတီမှာ ယနေ့ (အင်္ဂါနေ့)တွင် တွေ့ဆုံခဲ့ကြပြီး ပီတာကို အဆိုပြုသည့်အုပ်စုကို ကိုယ်စားပြုရန် ဖြူးထိုင်းပါတီကို ခန့်အပ်တာဝန်ပေးဖို့ သဘောတူခဲ့ကြသည်ဟု ချိုနန်သီရိကောက ပြောကြားခဲ့သည်။ 

အဆိုပြုခြင်း လုပ်ငန်းစဉ် ပြီးဆုံးလျှင် အောက်လွှတ်တော်အမတ်များနှင့် အထက်လွှတ်တော်အမတ်များက ပီတာ နှင့် Move Forward ပါတီ၏ မူဝါဒများနှင့် ပတ်သက်၍ သံသယရှိပါက ပီတာကို တိုက်ရိုက် မေးမြန်းနိုင်မည် ဖြစ် သည်။ 

သို့သော် အထက်လွှတ်တော်အမတ် မည်မျှက ပီတာကို မဲပေးမလဲဆိုသည်ကိုတော့ မိမိ မသိကြောင်း၊ MFP ပါတီ ၏ အထွေထွေအတွင်းရေးမှူးချုပ်ကမူ အထက်လွှတ်တော် အမတ်များထံမှ မဲများနိုင်သမျှ များများရဖို့ ကြိုးစား ထားသည်ဟု မိမိကို ပြောကြောင်း ချိုနန်သီရိကော ဝန်ခံသည်။ 

(၈)ပါတီ ညွန့်ပေါင်းအဖွဲ့မှာ အောက်လွှတ်တော်တွင် ထောက်ခံမဲ ၃၁၂ မဲ ရရှိထားပြီးဖြစ်သည်။

ထိုင်းအောက်လွှတ်တော်ဥက္ကဋ္ဌ အဖြစ် ရွေးချယ်ခံရသူကိုတွေ့ရစဉ်

အစဉ်အလာအရ အောက်လွှတ်တော်ဥက္ကဋ္ဌက မဲမပေးဘဲ နေရမည်ဖြစ်၍ ညွန့်ပေါင်းအဖွဲ့တွင် ၃၁၁ မဲသာ ကျန် သည်။ 

ထို့ကြောင့် ညွန့်ပေါင်းအဖွဲ့ အနေဖြင့် အနည်းဆုံး လိုအပ်ချက် ၃၇၆ မဲ ပြည့်မှီရန်မှာ အထက်လွှတ်တော် အမတ် များနှင့် အခြားပါတီများထံမှ ထောက်ခံမဲ ၆၅ မဲရဖို့ လိုအပ်နေသည်။ 

ဥပဒေအရ လွှတ်တော် ၂ ရပ်ပေါင်း အမတ် ၇၅၀ ၏ တစ်ဝက်က သဘောတူမှ ပီတာကို ဝန်ကြီးချုပ်အဖြစ် ရွေးချယ်နိုင်မည် ဖြစ်သည်။ 

၈ ပါတီညွန့်ပေါင်းအဖွဲ့ကိုတွေ့ရစဉ်

လက်ရှိ အခြေအနေတွင်မူ ဇူလိုင် ၁၃ ရက်နေ့ ပထမအကြိမ် ပူးတွဲလွှတ်တော်တွင် ပီတာအနေဖြင့် ထောက်ခံမဲ ၃၇၆ မဲ မပြည့်ခဲ့လျှင် နောက်ထပ် ဆောင်ရွက်မည့် အစီအစဉ်(ဘီ) မရှိသေးကြောင်း ဖြူးထိုင်းပါတီက ပြောသည်။

ဝန်ကြီးချူပ်အား ရွေးချယ်ရန် လွှတ်တော်ကို ဘယ်နှကြိမ် ခေါ်နိုင်သည်ဟု ကန့်သတ်ချက် မရှိသော်လည်း အချိန် ကြာလေ၊ အစိုးရဖွဲ့ဖို့လည်း ကြန့်ကြာလေ ဖြစ်မည်။

ထို့နောက် နိုင်ငံရေး မတည်ငြိမ်မှုလည်း ရှည်ကြာလေဖြစ်နိုင်ကြောင်း၊ လူထု အပါအဝင် ရင်းနှီးမြှုပ်နှံသူများနှင့် နိုင်ငံတကာမှ မယုံကြည်မှုများ တိုးလာမည်ဖြစ်ကြောင်း သိရသည်။ 

Source: Thai PBS World

CNI International News

ဘေကျင်း၊ ဇူလိုင် ၁၁

တရုတ်နိုင်ငံအနေဖြင့် တောင်ကိုရီးယား၊ ဂျပန်တို့နှင့် ရပ်တန့်နေသော ဆက်ဆံရေးကို စီးပွားရေးပူးပေါင်း ဆောင်ရွက်မှုဖြင့် တိုးတက်လာစေဖို့ မျှော်လင့်ထားသော်လည်း အိမ်နီးချင်းနှစ်နိုင်ငံမှာ အမေရိကန်ဖက်သို့ ပိုယိမ်းနေမှုကို တားနိုင်ဖွယ်မရှိဟု သုတေသီများက ပြောသည်။ 

တရုတ်ထိပ်တန်းသံတမန် ဝမ်ယိက ပြီးခဲ့သည့် ရက်သတ္တပတ်က ဆိုးလ်နှင့် တိုကျိုကို ဘေကျင်းနှင့် ပူးပေါင်း ဆောင်ရွက်မှုအား ပြန်လည်စတင်ရန် လိုအပ်ကြောင်း၊ အာရှဒေသကြီးအပြင်ဘက်က အင်အားကြီးနိုင်ငံ တစ်ခု ကြောင့် မယိမ်းယိုင်သင့်ကြောင်း အလေးအနက် ပြောကြားခဲ့ပြီးနောက်မှာ ယခု အကဲဖြတ်ချက် ထွက်ပေါ်လာ ခြင်းဖြစ်သည်။ 

ဝမ်ယိက “အာရှက ကျနော်တို့ရဲ့ ဘုံမြေပါ။ သုံးနိုင်ငံဟာ အိမ်နီးချင်းတွေဆိုတာလည်း အရှိတရားပါ။ တရုတ်၊ ဂျပန် နဲ့ တောင်ကိုရီးယားတို့ဟာ သုံးနိုင်ငံ ပူးပေါင်းဆောင်ရွက်ရေး မှန်ကန်တဲ့ လမ်းကြောင်းကို အခိုင်အမာ ထိန်းသိမ်း ထားသင့်ပါတယ်”ဟု ကျင်းတောင်းတွင် ကျင်းပခဲ့သည့် သုံးနိုင်ငံဖိုရမ်တွင် ပြောကြားခဲ့သည်။ 

တောင်ကိုရီးယားနဲ့ ဂျပန် ခေါင်းဆောင်ကိုတွေ့ရစဉ်

ထိုပြောကြားချက်များမှာ တရုတ်အနေဖြင့် ဆိုးရွားလာနေသော စီးပွားရေး အခြေအနေနှင့် အမေရိကန်၏ ဖိအား များအပေါ် စိုးရိမ်နေကြောင်းကို ဖော်ပြနေသည်ဟု ဆိုးလ်ရှိ ကျွန်းဟီးတက္ကသိုလ်၊ တရုတ်ရေးရာ ပါမောက္ခ ချူး ဂျေးဝူးက ပြောသည်။ 

၂၀၁၁ ခုနှစ်တွင် ပထမဆုံးအကြိမ် ကျင်းပလာခဲ့ပြီးနောက် ကျင်းတောင်းဖိုရမ်မှာ တရုတ်နိုင်ငံ၏ သြဇာကြီးမား သည့် ပေါ်လစ်ဗျူရို အဖွဲ့ဝင်တစ်ယောက် ပထမဆုံး တက်ရောက်သည့် ဖိုရမ်ဖြစ်သည်။ 

ဂျပန်၊ တောင်ကိုရီးယား၊ တရုတ် စည်းလုံးမှုကိုပြသထားစဉ်

ပြီးခဲ့သည့်ရက်က ဘေကျင်းတွင် ဂျပန်နိုင်ငံခြားရေးဝန်ကြီးဟောင်း ယိုဟဲ ကိုနိုနှင့် တွေ့ဆုံရာတွင်လည်း ဝမ်ယိက သုံးနိုင်ငံ ဆက်ဆံရေးကို အလေးအနက်ထား ပြောကြားခဲ့ပြီး ပြည်ပစွက်ဖက်မှုကို ဖယ်ရှားကာ အာရှဒေသကြီးတွင် ငြိမ်းချမ်းရေးနှင့် တည်ငြိမ်မှုကို ပူးတွဲထိန်းသိမ်းကြရန် လိုအပ်ကြောင်း ပြောကြားခဲ့သည်ဟု တရုတ်နိုင်ငံခြားရေး ဝန်ကြီးဌာန၏ ထုတ်ပြန်ချက်တွင် ဖော်ပြထားသည်။ 

ထို့နောက် ဘေကျင်းတွင် တရုတ်ဒုနိုင်ငံခြားရေးဝန်ကြီး ဆွန်ဝေတုံနှင့် တောင်ကိုရီးယား ဒုနိုင်ငံခြားရေးဝန်ကြီး ချွိုင်ယန်းဆန် (Choi Young-sam)တို့ တွေ့ဆုံရာတွင်လည်း အပြန်အလှန် လေးစားမှုကို အခြေခံ၍ နှစ်နိုင်ငံ ဆက်ဆံရေးကို တိုးမြှင့်ရန် နှစ်ဖက်စလုံးက သဘောတူခဲ့ကြသည်ဟု တောင်ကိုရီးယား နိုင်ငံခြားရေးဝန်ကြီးဌာန က ပြောသည်။ 

Source: South China Morning Post

CNI International News

ဆိုးလ်၊ ဇူလိုင် ၁၁

မြောက်ကိုရီးယား၏ နျူကလီးယား ရည်မှန်းချက်များကို ဟန့်တားရန် နိုင်ငံတကာ အသိုင်းအဝိုင်း၏ ခိုင်မာသော သန္နိဋ္ဌာန်ကို ရှင်းလင်းပြတ်သွားစွာ ဖော်ပြဖို့ အချိန်ကျပြီဖြစ်ကြောင်း တောင်ကိုရီးယားသမ္မတ ယွန်းဆော့ရွဲက ပြောသည်ဟု အေပီသတင်းမှ ဖော်ပြခဲ့သည်။

၎င်းအနေဖြင့် မြောက်ကိုရီးယား၏ ကြီးထွားလာနေသော လက်နက်တိုက်ကိစ္စကို မည်သို့ကိုင်တွယ်ရမည်ကို ယခုရက်သတ္တပတ်တွင် နေတိုး ခေါင်းဆောင်များနှင့် ဆွေးနွေးသွားရန် စီစဉ်ထားသည်ဟု ပြောသည်။

တောင်ကိုရီးယားသမ္မတ ယွန်းဆော့ရွဲ(Yoon Suk Yeol)သည် လစ်သူရေးနီးယားနိုင်ငံ၊ ဗီလ်နီးယပ်စ်တွင် ကျင်းပ မည့် နေတိုး နှစ်ပတ်လည် ညီလာခံကို တက်ရောက်မည် ဖြစ်သည်။ 

နေတိုးခေါင်းဆောင်နဲ့ တောင်ကိုရီးယားသမ္မတ ယွန်းဆော့ရွဲကို တွေ့ရစဉ်

“အခုအချိန်ဟာ မြောက်ကိုရီးယားရဲ့ နျူကလီးယား လက်နက်စီမံကိန်းကို ဟန့်တားသွားဖို့ နိုင်ငံတကာ အသိုင်း အဝိုင်းရဲ့ သန္နိဋ္ဌာန်ဟာ မြောက်ကိုရီးယားရဲ့ နျူကလီးယားလက်နက် ထုတ်လုပ်ချင်တဲ့ ဆန္ဒထက်ကို ပိုပြီး ပြင်းပြ အားကောင်းတယ်ဆိုတာကို ပြရမယ့်အချိန်ပါ”ဟု ယွန်းဆော့ရွဲက ပြောသည်။ 

ယွန်းဆော့ရွဲသည် ညီလာခံကို နှစ်နှစ်ဆက်တိုက် တက်ရောက်လာခြင်းဖြစ်ပြီး ကမ္ဘာ့အကြီးဆုံး စစ်မဟာမိတ် အဖွဲ့ကြီးနှင့် ရင်းရင်းနှီးနှီး ဆက်ဆံလိုသည့် ဆန္ဒကို ဖော်ပြနေသည်။ 

တောင်ကိုရီးယားမှာ မြောက်ကိုရီးယား၏ နျူကလီးယားလက်နက် အန္တရာယ်အပြင် ကန်-တရုတ် ပြိုင်ဆိုင်မှု၏ အန္တရာယ်ကိုပါ ရင်ဆိုင်နေရသည်။ 

ယမန်နှစ်က စပိန်တွင် ကျင်းပခဲ့သည့် နေတိုးညီလာခံသို့ တောင်ကိုရီးယားက ပထမဆုံးအကြိမ် တက်ရောက်ခဲ့ သည်။ 

မြောက်ကိုရီးယား ခေါင်းဆောင်နဲ့ နျူထိပ်ဖူးများကိုတွေ့ရစဉ်

ပြီးခဲ့သည့် နှစ်အစပိုင်းက မြောက်ကိုရီးယားက ဒုံးကျည် အစင်း ၁၀၀ ကျော်ကို စမ်းသပ်ပစ်လွှတ်ခဲ့သလို တောင်ကိုရီးယား၊ အမေရိကန်တို့နှင့် ဖြစ်လာနိုင်သည့် စစ်ပွဲများတွင် နျူကလီးယား လက်နက်များ အသုံးပြု မည်ဟု ဗြောင်ခြိမ်းခြောက်လာခဲ့သည်။

ထို့နောက် မြောက်ကိုရီးယား၏ နျူကလီးယားခြိမ်းခြောက်မှုမှာ တောင်ကိုရီးယားနှင့် အမေရိကန်အတွက် အရေးကြီးလာခဲ့သည်။ 

မြောက်ကိုရီးယားမှာ အမှန်တကယ် ထိရောက်သည့် နျူကလီးယားဒုံးကျည်များ ပိုင်ဆိုင်နေပြီလားဆိုသည့် မေးခွန်းမှာ ဆွေးနွေးငြင်းခုန်နေရဆဲပင် ဖြစ်သည်။

၂၀၁၈ ခုနှစ်က တောင်ကိုရီးယားအစိုးရ၏ ခန့်မှန်းချက်အရ မြောက်ကိုရီးယားသည် နျူကလီးယားထိပ်ဖူး ၆၀ ကျော် ပိုင်ဆိုင်ထားကြောင်း ဖော်ပြထားသည်။ 

ကျွမ်းကျင်သူများကတော့ မြောက်ကိုရီးယားသည် နှစ်စဉ် သူ၏ လက်နက်တိုက်ထဲသို့ ထိပ်ဖူးသစ် ၆ ခုမှ ၁၈ ခု အထိ ဖြည့်တင်းနေသည်ဟု ခန့်မှန်းထားကြသည်။ 

Source:AP

CNI International News

ဝါရှင်တန်၊ ဇူလိုင် ၁၁

အိန္ဒိယသည် အမေရိကန်လက်နက်များကို ဒေါ်လာ ဘီလျံနှင့်ချီ၍ ဝယ်ယူနေခြင်းမှာ ကာကွယ်ရေးပစ္စည်းတွင် ရုရှားကို မှီခိုနေရာမှ အနောက်ကမ္ဘာသို့ ခြေဦးလှည့်လာသည်ဆိုသည်ထက် ပြည်တွင်းတွင် လက်နက်ကို တိုး၍ ထုတ်လုပ်လာသောကြောင့် ဖြစ်သည်ဟု အိန္ဒိယက ပြောကြောင်း ရိုက်တာမှ ဖော်ပြခဲ့သည်။ 

အိန္ဒိယသည် ကမ္ဘာ့အကြီးဆုံး လက်နက်တင်သွင်းသည့် နိုင်ငံဖြစ်သော်လည်း ယခုလက်ရှိ လက်နက်ဝယ်ယူမှု အားလုံးနီးပါးတွင် မည်သည့်နိုင်ငံနှင့်ဖြစ်စေ ဖက်စပ်ထုတ်လုပ် (သို့မဟုတ်) နည်းပညာ လွှဲပြောင်းရယူဖို့ဟူသည့် အချက်များ ပါဝင်နေသည်။ 

ယူကရိန်းစစ်ပွဲကြောင့် ရုရှားက အိန္ဒိယသို့ လက်နက်တင်ပို့မှု လျော့နည်းလာခြင်းကြောင့် အိန္ဒိယသည် လက်နက် တင်သွင်းမှုကို တစ်နေရာတည်း မဟုတ်ဘဲ ခွဲထားလိုသော ဆန္ဒနှင့် ပြည်တွင်းထုတ် လက်နက်များ ထုတ်လုပ်လို သော ကာလကြာမြင့်စွာကတည်းက မက်လာခဲ့သော အိပ်မက်ကို အကောင်အထည်ဖော်ရန် ဖြစ်လာခဲ့ရသည်ဟု အိန္ဒိယကာကွယ်ရေးဌာနက ပြောသည်။ 

အမေရိကန်သမ္မတ ဘိုင်ဒန်နဲ့ အိန္ဒိယဝန်ကြီးချုပ် မိုဒီကို တွေ့ရစဉ်

လွန်ခဲ့သည့် နှစ် ၂၀ အတွင်း အိန္ဒိယက လက်နက်များကို ကန်ဒေါ်လာ ၆၀ ဘီလီယံအထိ ဝယ်ယူတင်သွင်းခဲ့ ကြောင်း၊ ထိုတင်သွင်းမှုများအနက် ၆၅ ရာခိုင်နှုန်းမှာ ရုရှားထံမှ ဖြစ်ကြောင်း၊ တန်ဖိုးအနေဖြင့် ဒေါ်လာ ၃၉ ဘီလီယံ ရှိကြောင်း သိရသည်။ 

အိန္ဒိယသည် လာမည့် ဆယ်စုနှစ်တွင် ပြည်တွင်း စစ်လက်နက်လုပ်ငန်းမှ ကန်ဒေါ်လာ ၁၀၀ ဘီလီယံ တန်ဖိုးအထိ လက်နက်များ မှာယူသွားရန် ရည်ရွယ်ထားသည်ဟု ကာကွယ်ရေးဝန်ကြီး ရာနတ်ဆင်း (Rajnath Singh)က ပြောသည်။ 

အမည်မဖော်လိုသူ အိန္ဒိယကာကွယ်ရေး ဝန်ကြီးဌာနမှ အရာရှိတစ်ဦးက “ရုရှားအပေါ်  မှီခိုမှုကို လျှော့ချရမှာက တကယ့် အမှန်တရားပါ။ ဒါပေမယ့် ဒါက အပိုင်းနှစ်ပိုင်း ရှိပါတယ်။ တစ်ပိုင်းက သွင်းကုန် လုပ်ငန်းနယ်ပယ်ထဲက ထွက်ဖို့ ကြိုးစားတာပါ”ဟု ပြောသည်။ 

ပြီးခဲ့သည့်လက အိန္ဒိယဝန်ကြီးချုပ် မိုဒီ (Narendra Modi)၏ ဝါရှင်တန်ခရီးစဉ်အတွင်း တိုက်လေယာဉ်များ အတွက် ကန်ဒေါ်လာ ၁ ဘီလီယံ တန်ဖိုးရှိ ဂျီအီးအင်ဂျင်များ အပါအဝင် အမေရိကန် ကာကွယ်ရေးပစ္စည်းများကို ဝယ်ယူခဲ့ကြောင်း ကြေညာခဲ့သည်။ 

အိန္ဒိယထုတ် စစ်ရဟတ်ယာဉ်ကိုတွေ့ရစဉ်

ထို့နောက် ကန်ဒေါ်လာ ၃ ဘီလီယံ  တန်ဖိုးရှိ ဒရုန်းများ ဝယ်ယူရန်လည်း ဆွေးနွေးခဲ့သည်။ 

တိုင်းပြည်နှင့်လူထု ကာကွယ်ရေးတွင် ကိုယ့်အားကိုယ်ကိုးလိုသည့် မိုဒီ၏ “အိန္ဒိယထုတ်”မူဝါဒအရ ဂျက်အင်ဂျင် အရောင်းအဝယ်၌ နောင်တွင် ဖက်စပ်ထုတ်လုပ်သွားမည့် သဘောတူညီချက် ပါဝင်သည်။
အလားတူ ဒရုန်းများကိုလည်း ပြည်တွင်းတွင်သာ တပ်ဆင်ပြုပြင် ထိန်းသိမ်းသွားမည့် သဘောတူညီချက် ပါသည်။  

Source: Reuters

CNI International News

ဝါရှင်တန်၊ ဇူလိုင် ၁၁

ကိယက်ဗ်အစိုးရအား တွဲဆက်ဗုံး (cluster munitions)များ ထောက်ပံ့ခြင်းနှင့် စပ်လျဉ်းပြီး အမေရိကန် အိမ်ဖြူတော် အမျိုးသားလုံခြုံရေးကောင်စီ၏ ပြောခွင့်ရပုဂ္ဂိုလ် ဂျွန်ကာဘီ (John Kirby)၏ ကြေညာချက်အရ အမေရိကန်အစိုးရသည် ယူကရိန်းတွင် စစ်ရာဇဝတ်မှုများအား ကျူးလွန်နေသည်ကို ဝန်ခံရာရောက်နေကြောင်း ဝါရှင်တန်ရှိ ရုရှားသံရုံးက တုန့်ပြန်ပြောကြားခဲ့သည်ဟု တာ့စ်သတင်းတွင် ဖော်ပြသည်။

“ယူကရိန်းကို ဗုံးတွဲတွေ ထောက်ပံ့တာနဲ့ ပတ်သက်လို့ အမျိုးသားလုံခြုံရေးကောင်စီ (NSC)ရဲ့ မဟာဗျူဟာ ဆက်ဆံရေးဒါရိုက်တာ ဂျွန်ကာဘီရဲ့ ကြေညာချက်ကို ကျနော်တို့ သတိထားမိပါတယ်။ ဒါဟာ ယူကရိန်းစစ်ပွဲမှာ အမေရိကန်က စစ်ရာဇဝတ်မှုတွေ ကျူးလွန်နေတယ်ဆိုတာကို တရားဝင် ဝန်ခံလိုက်တဲ့သဘောပါပဲ။ အမေရိကန် ဗုံးတွဲလက်နက်တွေရဲ့ဒဏ်ကို ခံရမှာက အရပ်သားပြည်သူတွေဖြစ်တယ်လို့လည်း သူက ဗြောင်ပြောလိုက်တဲ့ သဘောပါ။ အိမ်ဖြူတော်ကိုယ်စားလှယ်ရဲ့ အမြင်မှာတော့ ဒါက ရုရှားတွေရဲ့ လုပ်ရပ်လောက် အန္တရာယ် မရှိသ ယောင် ဖြစ်နေပါတယ်” ဟု ရုရှားသံရုံးက ပြောကြားခဲ့သည်။ 

ဆက်လက်ပြီး “ဗုံးတွဲတွေ လွှဲပြောင်းပေးဖို့ ဆုံးဖြတ်ချက်ရဲ့ နောက်ကွယ်မှာ အတွေးအခေါ် တစ်စုံတစ်ရာ ရှိတယ်ဆိုရင်လည်း ထူးပြီး ဆိုးရွားမှာမဟုတ်တော့ဘူးဆိုတဲ့ အမြင်ပဲ ဖြစ်ပါတယ်။ အမေရိကန်ပြည်ထောင်စုဟာ သူနဲ့ အနေသာကြီးလို့ ပြောရမယ့်ဘဝတွေကို ယူကရိန်းလက်နဲ့ ဖျက်စီးဖို့ အသင့်ဖြစ်နေပါတယ်” ဟုလည်း သံရုံးက ပြောကြားခဲ့သည်။ 

အမေရိကန်ဆိုင်ရာ ရုရှားသံရုံးကို တွေ့ရစဉ်

အမေရိကန်အစိုးရအနေဖြင့် ယခုကဲ့သို့ လုပ်ဆောင်နေခြင်းမှာ သူ့ပြည်သူနှင့် သူ့မြေကို ကာကွယ်နေသည့် ရုရှား ဖက်ဒရေးရှင်းနိုင်ငံကို ရှုံးနိမ့်စေမည်ဟူသော မဖြစ်နိုင်သည့်အိပ်မက်ကို မက်နေသောကြောင့် ဖြစ်ကြောင်း၊ မိမိတို့က အကြမ်းဖက်သမားများကို ကူညီနေသည့် ကိယက်ဗ်ရာဇဝတ်ကောင်များကို တိုက်ခိုက်နေခြင်း ဖြစ်ကြောင်း၊ အမေရိကန်ပြည်ထောင်စုကမူ လူမဆန်သည့် လုပ်ရပ်များကို ကျူးလွန်နေသည့် ယူကရိန်း နာဇီများကို ကူညီနေခြင်းသာဖြစ်ကြောင်းလည်း ရုရှားသံတမန်များက ထပ်လောင်းပြောကြားခဲ့သည်။ 

တနင်္ဂနွေနေ့က ထုတ်လွှင့်ခဲ့သည့် အင်တာဗျူးတစ်ခု၌ ယူကရိန်းတပ်များတွင် အလျင်အမြန် ကုန်ခမ်းနေသည့် သမားရိုးကျအမြောက်ကျည်များနေရာကို အစားထိုးဖြည့်တင်းသည့်အနေဖြင့် ဝါရှင်တန်က ကိယက်ဗ်ကို ဗုံးတွဲများ ထောက်ပံ့နေခြင်းဖြစ်ကြောင်း ကာဘီက ပြောကြားခဲ့သည်။ 

 ဇာလန်းစကီးနဲ့ ဘိုင်ဒန်ကိုတွေ့ရစဉ်

“ကျနော်တို့က မြန်မြန်ကြီး ကုန်သွားနေတဲ့ အမြောက်ကျည်အမျိုးအစားတွေ ထုတ်လုပ်မှုကို မြှင့်တင်ဖို့ ကြိုးစား နေပါတယ်။ ဒါပေမယ့်လည်း မျှော်မှန်းတဲ့ အတိုင်းအတာအထိ မရောက်နိုင်ဘူးဖြစ်နေတယ်။ ဒါ့ကြောင့် ပုံမှန် အမြောက်ဆံထုတ်လုပ်မှုကို တိုးမြှင့်နေတဲ့ကာလမှာ လပ်နေတာကို အစားထိုးဖို့အတွက် ဗုံးတွဲတွေကို ထောက်ပံ့ ရတာပါ”ဟု ၎င်းက ပြောကြားခဲ့သည်။ 

သို့ရာတွင် ကုလသမဂ္ဂအထွေထွေအတွင်းရေးမှူးချုပ်၏ ပြောခွင့်ရပုဂ္ဂိုလ် ဖာဟန်ဟတ် (Farhan Haq)ကမူ ကုလ ထွေချုပ်အနေဖြင့် ဗုံးတွဲဆိုင်ရာ သဘောတူညီချက်ကို ထောက်ခံပြီး ယခုကဲ့သို့သော လက်နက်အမျိုးအစားကို စစ် မြေပြင်တွင် အသုံးပြုမှုကို ဆန့်ကျင်ကြောင်း အစောပိုင်းက ပြောကြားခဲ့သည်။

Source:တာ့စ်