CNI International News

ဘန်ကောက်၊ ဖေဖော်ဝါရီ ၂၆

ထိုင်းနိုင်ငံအတွင်း မြန်မာ့တပ်မတော်ကို ဆန့်ကျင်သည့် လှုပ်ရှားမှုများကို အနီးကပ်စောင့်ကြည့်နေကြောင်း ထိုင်းကာကွယ်ရေးဝန်ကြီး စူထင် ကလန်ဆန် (Sutin Klungsang)က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထိုလှုပ်ရှားမှုများကို လုပ်ဆောင်နေသူများအား အခြား မြန်မာရွှေ့ပြောင်း နေထိုင်သူများအပေါ် ထားသော ဆက်ဆံရေးနှင့်မတူဘဲ ဆက်ဆံသင့်ကြောင်း ထိုင်းကာကွယ်ရေးဝန်ကြီး စူထင် ကလန်ဆန် (Sutin Klungsang) က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

လက်ရှိအချိန်၌ စိုးရိမ်စရာ မရှိသေးကြောင်း၊ ထိုင်းနိုင်ငံအတွင်းသို့ ထွက်ပြေးဝင်ရောက်လာသည့် မြန်မာနိုင်ငံ သူ/သား၏ အရေအတွက်သည် အရမ်းများပြားခြင်း မရှိသေးကြောင်း၊ ၎င်းတို့သည် မကြာမီ အချိန်အတွင်း နေရပ်သို့ ပြန်လိမ့်မည်ဟု မျှော်လင့်ရကြောင်း စူထင်က ပြောကြားခဲ့သည်။ 

ဒီမိုကရေစီအရေး တောင်းဆိုနေကြသူများကို တွေ့ရစဉ်

ထိုင်းနိုင်ငံတွင် ယခင်ကတည်းက ကာလကြာရှည် နေထိုင်ခဲ့သူများသာ နိုင်ငံအတွင်း ဆက်လက် နေထိုင်လိမ့်မည် ဖြစ်ကြောင်း၊ မကြာသေးမီက မြန်မာနိုင်ငံတွင် စစ်မှုမထမ်းမနေရဥပဒေ ပြဋ္ဌာန်းကြောင်း ကြေညာခဲ့သော်လည်း ထိုင်းသို့ မြန်မာနိုင်ငံသားများ အများအပြား ဝင်ရောက်လာသည့် လက္ခဏာကို မတွေ့ရကြောင်း ၎င်းက ပြော သည်။

ထိုင်းကာကွယ်ရေးဝန်ကြီးသည် တာ့ခ်(Tak)ခရိုင်၊ မဲဆောက် (MaeSot) နယ်စပ်မြို့ရှိ စစ်စခန်းတစ်ခုသို့ သွားရောက်သည့် ခရီးစဉ်အတွင်း ထိုကဲ့သို့ ပြောကြားခဲ့ခြင်း ဖြစ်သည်။

ထိုခရီးစဉ်အတွင်း စူထင်က နယ်စပ်ဒေသများတွင် တာဝန်ထမ်းဆောင်နေသည့် နယ်စပ်ရဲအရာရှိများ၊ အရန် တပ်ဖွဲ့ဝင်များနှင့် စစ်သားများကို ကိုယ်ချင်းစာကြောင်းနှင့် ၎င်းတို့ကို ထောက်ပံ့ကြေးများ ပိုပေးသွားမည် ဖြစ်ကြောင်း ကတိပြုပြောကြားခဲ့သည်။

အဆိုပါ ရဲအရာရှိများ၊ စစ်သားများသည် နယ်စပ်လုံခြုံရေးအတွက် သာမက မူးယစ်ဆေးဝါး မှောင်ခိုကူးမှုကဲ့သို့ နယ်စပ်ဒေသ ရာဇဝတ်မှုပေါင်းစုံကို တိုက်ဖျက်နေရကြောင်း စူထင်က ပြောသည်။

 ထိုင်းနယ်စပ် မဲဆောက်မြို့ကိုတွေ့ရစဉ်

ထိုင်းနိုင်ငံ၏ မြေပေါ်တွင် မြန်မာအစိုးရကို ဆန့်ကျင်သည့် တိုက်ခိုက်မှုများအတွက် ရန်ပုံငွေများ စုဆောင်းနေ သည့် အဖွဲ့များကို ထိုင်းအစိုးရနှင့် လုံခြုံရေးအာဏာပိုင်များက အအနီးကပ် စောင့်ကြည့်နေကြောင်း၊ လက်ရှိတွင် ထိုအဖွဲ့များ၏ လှုပ်ရှားမှုများသည် ကြီးမားသည့် ခြိမ်းခြောက်မှုတစ်ခုကဲ့သို့ ကောက်ချက် မချနိုင်သေးကြောင်း ၎င်းက ပြောကြားခဲ့သည်။

လတ်တလောတွင် အခြေအနေများကို ထိန်းချုပ်ထားနိုင်ကြောင်း၊ ထိုင်းရောက် မြန်မာရွှေ့ပြောင်း လုပ်သားတိုင်း ကို မြန်မာ့တပ်မတော် ဆန့်ကျင်သူများအဖြစ် မယူဆသင့်ကြောင်းလည်း စူထင်က ပြောကြားခဲ့သည်။

ထို့ပြင် ထိုင်းနိုင်ငံအတွင်းရှိ မြန်မာ့တပ်မတော်အား ဆန့်ကျင်သည့် အဖွဲ့များကို ကိုင်တွယ်ဖြေရှင်းရန် နည်းလမ်း များလည်း ရှာဖွေထားသည်ဟု ထိုင်းကာကွယ်ရေးဝန်ကြီးက ပြောကြားခဲ့သည်။

Source: ဘန်ကောက်ပို့စ်

CNI International News

မင့်စ်၊ ဖေဖော်ဝါရီ ၂၆ 

ဘယ်လာရုစ်နိုင်ငံအတွင်း အစိုးရကိုဖြုတ်ချရန် ကြံစည်မှုများသည် အောင်မြင်လိမ့်မည် မဟုတ်ကြောင်း ဘယ်လာရုစ်သမ္မတ အလက်ဇန္ဒား လူကာရှန်ကို (Alexander Lukashenko) က ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။

“သူတို့ (အစိုးရ အတိုက်အခံများ)တွေဟာ ဘယ်လာရုစ်နိုင်ငံမှာ အစွန်းရောက်မှုတွေ အပါအဝင် ဘယ်လို ရွေးချယ်မှုကိုမဆို အကောင်အထည်ဖော် လုပ်ဆောင်နိုင်မှာ မဟုတ်ပါဘူး”ဟု လူကာရှန်ကိုက ပြောသည်။

လူကာရှန်ကိုကို တွေ့ရစဉ်

မိမိတို့အနေဖြင့် မိမိတို့၏အတိတ်က အမှားများကို သင်ခန်းစာယူရမည်ကို သိရှိနားလည်ထားသဖြင့် အတိုက်အခံ များအတွက် မျှော်လင့်ချက် တစ်စုံတစ်ရာ မရှိကြောင်း လူကာရှန်ကိုက လွှတ်တော်နှင့် ဒေသန္တရ ရွေးကောက်ပွဲ များတွင် မဲပေးခဲ့ပြီးနောက် သတင်းထောက်များကို ပြောကြားခဲ့သည်။

သတင်းထောက်များက လူကာရှန်ကိုအား ၂၀၂၅ ခုနှစ်တွင် ကျင်းပမည့် သမ္မတရွေးကောက်ပွဲ၌ ဝင်ရောက် ယှဉ်ပြိုင်ရန် ရှိ/မရှိ မေးမြန်းခဲ့ချိန်တွင် ၎င်းက သေချာပေါက် ဝင်ရောက်ယှဉ်ပြိုင်မည်ဟု ဖြေကြားခဲ့သည်။

Source: တာ့စ်

CNI International News

ဖနွမ်ပင်၊ ဖေဖော်ဝါရီ ၂၆

ကမ္ဘောဒီယားနိုင်ငံတွင် ဖေဖော်ဝါရီ ၂၅ ရက်က ကျင်းပခဲ့သည့် အထက်လွှတ်တော် ရွေးကောက်ပွဲ၌ အာဏာရ ပါတီမှ အနိုင်ရရှိခဲ့ပြီးနောက် ဝန်ကြီးချုပ်ဟောင်း ဟွန်ဆန် (Hun Sen) သည် နိုင်ငံရေးလောကထဲသို့ တရားဝင် ပြန်လည် ဝင်ရောက်လာစေရန် လမ်းခင်းပေးရာ ရောက်ခဲ့သည်ဟု CNA မှ ဖော်ပြခဲ့သည်။

ဟွန်ဆန်သည် ကမ္ဘောဒီးယားနိုင်ငံကို ဆယ်စုနှစ် လေးစုနီးပါးကြာ တင်းကျပ်စွာ အုပ်ချုပ်ခဲ့ပြီးနောက် ပြီးခဲ့သည့် နှစ် ဇူလိုင်လက ကြီးမားသည့် အတိုက်အခံပါတီများ မပါဝင်သော ရွေးကောက်ပွဲကို ကျင်းပခဲ့ပြီး သားအကြီးဆုံး ဖြစ်သူ ဟွန်မာနက် (Hun Manet) ကို အာဏာလွှဲပေးခဲ့သည်။

ထိုအချိန်ကတည်းက ဟွန်ဆန်သည် ၎င်းရာထူးမှ နုတ်ထွက်ခဲ့သည့်တိုင် ကြီးမားသည့် ဩဇာကို ဆက်လက် လွှမ်းမိုးထားရန် ရည်ရွယ်ထားကြောင်း ပြောကြားခဲ့သည်။

 ဟွန်မာနက်ကို တွေ့ရစဉ်

ဖေဖော်ဝါရီ ၂၅ ရက်က အထက်လွှတ်တော် ရွေးကောက်ပွဲ မဲပေးမှု ပြီးဆုံးချိန်တွင် ဟွန်ဆန်၏ အာဏာရပါတီ (CPP)မှ အထက်လွှတ်တော် ရွေးကောက်ပွဲကို အနိုင်ရရှိကြောင်း ကြေညာခဲ့သည်။

CPP သည် ၅၈ နေရာရှိသည့် အထက်လွှတ်တော်တွင် နေရာ ၅၀ ထက်မနည်းကို အနိုင်ရခဲ့ကြောင်း ပါတီ၏ ပြောရေးဆိုခွင့်ရှိသူ ဆွတ် အိုင်ဆန် (Sok Eyson) က ပြောကြားခဲ့သည်။

ပါတီအနေဖြင့် ဧပြီလအတွင်း ကျင်းပမည့် အထက်လွှတ်တော် အစည်းအဝေးတွင် ဟွန်ဆန်အား အထက် လွှတ်တော်ဥက္ကဋ္ဌအဖြစ် အဆိုပြုသွားမည်ဖြစ်သည်။

ထို့နောက် ဟွန်ဆန်သည် ကမ္ဘောဒီးယားဘုရင် ပြည်ပသို့ရောက်နေသည့် အချိန်များတွင် နိုင်ငံခေါင်းဆောင်အဖြစ် တာဝန်ထမ်းဆောင်ခွင့် ရရှိမည်ဖြစ်သည်။

 ဟွန်ဆန်ကို တွေ့ရစဉ်

ရွေးကောက်ပွဲကော်မရှင်က တရားဝင်မဲရလဒ်များကို လာမည့် သီတင်းပတ်များအတွင်း ထုတ်ပြန်ကြေညာ ဖွယ်ရှိသည်။

နေရာ ၆၂ နေရာရှိသည့် အထက်လွှတ်တော်တွင် ၅၈ နေရာကို လွှတ်တော်အမတ် ၁၂၅ ဦးနှင့် ဒေသန္တရ အုပ်ချုပ်ရေးမှူး ၁၁,၀၀၀ ကျော် မဲပေးရွေးချယ်ခြင်းဖြစ်ပြီး ကျန် ၂ နေရာကို ကမ္ဘောဒီးယားဘုရင် နိုရိုဒွန် သီဟမုနိ (Norodom Sihamoni) က ရွေးချယ်ခြင်းဖြစ်သည်။

ထို့နောက် ကျန် ၂ နေရာကို အမျိုးသားလွှတ်တော်က ရွေးချယ်ခန့်အပ်ခြင်း ဖြစ်သည်။

Source: CNA

CNI International News

ကိုဟီမာ၊ ဖေဖော်ဝါရီ ၂၄

အိန္ဒိယ-မြန်မာနယ်စပ်တွင် ခြံစည်းရိုးကာရန် အဆိုပြုထားသည့်ကိစ္စနှင့် နှစ်နိုင်ငံအကြား လွတ်လပ်စွာ လှုပ်ရှား သွားလာရေး အစီအစဉ် (FMR) ကို ဆိုင်းငံ့ရေး အစီအစဉ်များကို နာဂလန်း (Nagaland)  ပြည်နယ်လွှတ်တော်၏ ဘတ်ဂျက်အစည်းအဝေး၌ ထည့်သွင်းဆွေးနွေးဖွယ်ရှိကြောင်း Northeast Now မှ ဖော်ပြခဲ့သည်။

နာဂလန်းပြည်နယ်အတွင်းရှိ များပြားသည့် အရက်ဖက်လူမှုရေးအဖွဲ့အစည်း(CSO) များ၊ လူမျိုးစုအဖွဲ့များနှင့်  နာဂအမျိုးသားဆိုရှယ်လစ်ကောင်စီ- ဗွီးဗာ/အိုက်ဇက်ချီရှီဆူ(NSCN-IM)တို့က ဗဟိုအစိုးရ၏ ဆုံးဖြတ်ချက်ကို ပြင်းထန်စွာ ဝေဖန်လျက်ရှိသည်။

နာဂလန်းပြည်နယ်သည် မြန်မာနိုင်ငံနှင့် နယ်စပ်စည်း ၂၁၅ ကီလိုမီတာ ထိစပ်နေသည့် အိန္ဒိယ၏ ပြည်နယ်တစ်ခု ဖြစ်သည်။

ဗဟိုအစိုးရ၏ အစီအစဉ်များသည် နှစ်နိုင်ငံနယ်စပ်၏ တစ်ဖက်တစ်ချက်တွင် နေထိုင်နေကြသည့် နာဂလူမျိုးများ အကြား စိတ်ဝန်းကွဲမှုဖြစ်စေနိုင်ပြီး ၎င်းတို့၏ လူနေမှုဘ၀အပေါ် ဆိုးရွားစွာ သက်ရောက်စေလိမ့်မည်ဟု နာဂလန်းပြည်နယ်ရှိ CSO များက ပြောကြားခဲ့သည်။

နယ်စပ်ဒေသတွင် နေထိုင်သူများသည် နယ်စပ်တစ်လျှောက် လယ်ယာစိုက်ခင်းများ ထွန်ယက်လုပ်ကိုင်နေသဖြင့် ဗဟိုအစိုးရ၏ အစီအစဉ်များသည် ထိုလယ်ယာလုပ်ငန်း လုပ်ကိုင်နေသူများအတွက် ထိခိုက်နစ်နာ စေလိမ့်မည် ဟုလည်း သုံးသပ်မှုများ ထွက်ပေါ်ခဲ့သည်။

နာဂလန်းပြည်နယ်ဝန်ကြီးချုပ် နိုက်ဖရူ ရီယို (Neiphiu Rio) ကလည်း ထိုအကြောင်းအရာအပေါ် ဆွေးနွေးမှုများ သည် အလွန်အရေးကြီးကြောင်း ဖော်ပြခဲ့ပြီး အစိုးရအနေဖြင့် နောက်ဆုံးအဆင့် အကောင်အထည်ဖော်ဆောင်မှု မလုပ်ဆောင်မီအချိန်တွင် သက်ဆိုင်သူများနှင့် တိုင်ပင်ပြီး အဖြေတစ်ခုရှာရန် လိုအပ်ကြောင်း ပြောကြားခဲ့သည်။

နာဂလန်းလွှတ်တော်တွင် ဖေဖော်ဝါရီ ၂၆ ရက်မှစပြီး ၅ ရက်ကြာ ဘတ်ဂျက်အစည်းအဝေး ခေါ်ယူမည်ဖြစ်သည်။

ထိုလွှတ်တော် အစည်းအဝေးတွင် နယ်စပ်စည်းရိုးတည်ဆောက်မှုနှင့် FMR ဆိုင်းငံ့မည့် အစီအစဉ်များကို ဦးစား ပေး ဆွေးနွေးသွားလိမ့်မည်ဟု သတင်းရင်းမြစ်များက ဖော်ပြခဲ့သည်။

အဆိုပါ အစည်းအဝေးကို နာဂလန်းပြည်နယ် အုပ်ချုပ်ရေးမှူး လာဂါနက်ဆန်က နေရာ ၆၀ ရှိသည့် လွှတ်တော် အတွင်း မိန့်ခွန်းပြောကြားပြီး ဖွင့်လှစ်သွားမည်ဖြစ်သလို နာဂလန်းပြည်နယ်ဝန်ကြီးချုပ်က ဖေဖော်ဝါရီ ၂၇ ရက် တွင် ဘတ်ဂျက် အစီအစဉ်များကို တင်ပြမည်ဖြစ်သည်။

ဇန်နဝါရီ ၂၆ ရက်ကလည်း နာဂလန်းပြည်နယ် ဝန်ကြီးချုပ်သည် အန္ဒိယ-မြန်မာ နယ်စပ်စည်းရိုး တည်ဆောက် မည့် ဗဟိုအစိုးရ၏ ဆုံးဖြတ်ချက်ကို အကောင်အထည်မဖော်မီ ဆွေးနွေးညှိနှိုင်းမှုများ ပြုလုပ်ရန် လိုအပ်ကြောင်း အလေးထား ပြောဆိုခဲ့သည်။

Source: Northeast Now

CNI International News

ဒူဘိုင်း၊ ဖေဖော်ဝါရီ ၂၄

ယီမင်နိုင်ငံတွင် အီရန်မှ ကျောထောက်နောက်ခံ ပေးထားသည့် ဟူရ်သီသူပုန်အဖွဲ့က ဖေဖော်ဝါရီ ၂၂ ရက်တွင် ဗြိတိန်ပိုင် ကုန်တင်သင်္ဘောတစ်စင်းကို တိုက်ခိုက်မှုနှင့် အမေရိကန်ဖျက်သင်္ဘောတစ်စင်းကို ဒရုန်းဖြင့် တိုက်ခိုက် ခဲ့ကြောင်း ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် အစ္စရေး၏ ဆိပ်ကမ်းတစ်ခုနှင့် အပန်းဖြေ စခန်းမြို့ဖြစ်သည့် အီလက် (Eilat) မြို့ကိုလည်း ပဲ့ထိန်းဒုံးကျည် များ၊ ဒရုန်းများနှင့်  ပစ်မှတ်ထား တိုက်ခိုက်ခဲ့ကြောင်း ဟူရ်သီအဖွဲ့က ပြောသည်။

ဂါဇာဒေသတွင် အစ္စရေး၏ စစ်ဆင်ရေးများကို တုန့်ပြန်သည့်အနေဖြင့် ရေငုပ်သင်္ဘောဖျက် လက်နက်အသစ်များ အပါအဝင် ပင်လယ်နီနှင့် အခြားရေပြင်များအတွင်းရှိ သင်္ဘောများကို တိုက်ခိုက်မှုများ အရှိန်မြှင့် လုပ်ဆောင်သွား မည်ဟု ဟူရ်သီအဖွဲ့ခေါင်းဆောင်က ပြောကြားခဲ့ပြီးနောက် ဟူရ်သီအဖွဲ့ ကိုယ်စားလှယ်တစ်ဦးက X လူမှုမီဒီယာ တွင် ထုတ်ပြန်ခဲ့ခြင်း ဖြစ်သည်။

အစ္စရေး-ဟားမာ့စ်စစ်ပွဲ ဖြစ်ပွားခဲ့ပြီးနောက် ဟူရ်သီအဖွဲ့သည် ပင်လယ်နီ၊ ဘက်ဘ်အယ် မန်ဒက် ရေလက်ကြား (Bab al-Mandab Strait) နှင့် အေဒင်ပင်လယ်ကွေ့ (Gulf of Aden) တို့တွင် ဒရုန်း တိုက်ခိုက်မှုများနှင့် ဒုံးကျည် တိုက်ခိုက်မှုများကို အဆက်မပြတ် ပြုလုပ်ခဲ့သည်။

“ပင်လယ်နီ၊ အာရေဗျ ပင်လယ် (Arabian Sea)၊ ဘက် အယ် မန်ဒက် ရေလက်ကြားနဲ့ အေဒင် ပင်လယ်ကွေ့မှာ စစ်ဆင်ရေးတွေကို ထိထိရောက်ရောက် ဆက်လက် လုပ်ဆောင်နေပါတယ်”ဟု ဟူရ်သီအဖွဲ့ ပြောရေးဆိုခွင့်ရှိသူ အဗ္ဗဒူ မာလစ် အယ် ဟူရ်သီ (Abdul Malik al-Houthi) က ပြောကြားခဲ့ပြီး အသေးစိတ် အချက်အလက်များကို ထုတ်ပြန်ခဲ့ခြင်းမရှိပေ။

ဟူရ်သီအဖွဲ့၏ တိုက်ခိုက်မှုများသည် ကမ္ဘာလုံးဆိုင်ရာ ပင်လယ်ရေကြောင်း ကုန်သွယ်မှုလမ်းကြောင်း စုစုပေါင်း၏ ၁၂ ရာခိုင်နှုန်းရှိသည့် စူးအက် တူးမြောင်း (Suez Canal) တွင် ကုန်သွယ်ရေးလမ်းကြောင်းများကို အနှောင့်အယှက် ဖြစ်စေခဲ့သည်။

ထို့ပြင် သင်္ဘောကုမ္ပဏီများသည် ဟူရ်သီတို့၏ တိုက်ခိုက်မှုများကို ရှောင်လွှဲရန် အာဖရိကဘက်မှပတ်ပြီး သင်္ဘော များကို မောင်းနှင်ခဲ့သဖြင့် ကုန်ပစ္စည်းများ ပို့ဆောင်မှု ပိုမိုအချိန်ကြာမြင့်ခြင်းနှင့် ကုန်ကျစရိတ်များကို ပိုမိုမြင့်တက် စေခဲ့သည်။

ဟူရ်သီအဖွဲ့ကမူ ၎င်းတို့သည် အစ္စရေး၊ အမေရိကန်၊ ဗြိတိန်တို့နှင့် အဆက်အသွယ်ရှိသည့် သင်္ဘောများကိုသာ တိုက်ခိုက်ခြင်းဖြစ်ကြောင်း သင်္ဘောကုမ္ပဏီများကို အာမခံသည့် အနေဖြင့် ဖေဖော်ဝါရီ ၂၂ ရက်က ပြောကြားခဲ့ သည်။

ထို့ပြင် အစ္စရေး၊ အမေရိကန်၊ ဗြိတိန်နိုင်ငံများနှင့် ဆက်နွှယ်မှုရှိသည့် ကုမ္ပဏီများက ပိုင်ဆိုင်သည့် သင်္ဘောများကို ပင်လယ်နီ၊ အာရေဗျပင်လယ်၊ အေဒင်ပင်လယ်ကွေ့တို့တွင် မောင်းနှင်ခွင် ပိတ်ပင်ကြောင်းလည်း ဟူရ်သီအဖွဲ့က ထုတ်ပြန်ခဲ့သည်။

Source: ရိုက်တာ

CNI International News

ပေကျင်း၊ ဖေဖော်ဝါရီ ၂၄

တရုတ်နိုင်ငံ စူကျိုး (Suzhou) မြို့ရှိ အဝေးပြေးလမ်းပေါ်တွင် နှင်းများထူထပ်စွာ ကျဆင်းမှုကြောင့် ကားများ လမ်းချော်ပြီး ကားအစီးရေ ၁၀၀ ကျော် ဆင့်ကဲ တိုက်မိခဲ့သဖြင့် လူအချို့ ဒဏ်ရာရရှိခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

တရုတ်နိုင်ငံပိုင် CCTV ရုပ်သံ၏ ဖော်ပြချက်တွင် ကားများ အစုလိုက်အပြုံလိုက် တိုက်မိနေသည့် မြင်ကွင်းများနှင့် မှန်ကွဲစများ၊ အပျက်အစီး အပိုင်းအစများကို မြင်တွေ့ရသည်။

ထိုမတော်တဆမှုကြောင့် လူ ၃ ဦး ဒဏ်ရာရရှိခဲ့ကာ ဆေးရုံတင်ထားရပြီး လူ ၆ ဦးမှာ အသေးစား ပွန်းပဲ့ဒဏ်ရာ များ ရရှိခဲ့သည်ဟု စူကျိုးမြို့ စက်မှုဥယျာဉ် ယာဉ်ထိန်းရဲအဖွဲ့က ၎င်းတို့၏ WeChat လူမှုမီဒီယာတွင် ထုတ်ပြန်ခဲ့ သည်။

ယာဉ်လမ်းကြောင်းများကို ပြန်လည် ထိန်းချုပ်နိုင်ခဲ့ပြီး မတော်တဆမှု ဖြစ်ပွားရသည့် အကြောင်းရင်းကို စုံစမ်း စစ်ဆေးနေကြောင်း ရဲတပ်ဖွဲ့က ပြောကြားခဲ့သည်။

ပြီးခဲ့သည့် သီတင်းပတ် အနည်းငယ်အတွင်း တရုတ်နိုင်ငံ၏ နေရာဒေသ အများအပြားတွင် အအေးလှိုင်း ကျရောက်ခဲ့ပြီး လမ်းများပေါ်တွင် ဆီးနှင်းများ ကျရောက်ခဲ့ကာ တရုတ်နှစ်သစ်ကူး အားလပ်ရက် ကာလအတွင်း တရုတ်နိုင်ငံသို့ ပြန်လည်ရောက်ရှိလာကြသည့် သန်းနှင့်ချီသော တရုတ်နိုင်ငံသားများအတွက် သက်ယူပို့ဆောင် ရေးကဏ္ဍကို ထိခိုက်စေခဲ့သည်။

ယခုသီတင်းပတ်အတွင်း တရုတ်အစိုးရသည် အပူချိန်များ ဆိုးရွားစွာ ကျဆင်းမှုအတွက် တုန့်ပြန်ဆောင်ရွက်ရန် အရေးပေါ် အစီအစဉ်များကို လုပ်ဆောင်ခဲ့ပြီး ဘေကျင်း (Beijing) ၊ ဟီပေ (Hebei) ၊ ရှန်းရှီ (Shanxi) ၊ အန်ဟွေ (Anhui) နှင့် ဟူပေ (Hubei) မြို့များ အပါအဝင် အခြားမြို့များနှင့် ပြည်နယ်များတွင် လမ်းပန်းဆက်သွယ်ရေး အဆင်ပြေ ချောမွေ့စေရန် အစီအစဉ်များ၊ ကူညီထောက်ပံ့မှုများနှင့် လျှပ်စစ်ဓာတ်အား ရရှိစေရန် အစီအစဉ်များ ကို စတင်လုပ်ဆောင်ခဲ့သည်။

တရုတ် မိုးလေဝသ အုပ်ချုပ်ရေးအဖွဲ့ကလည်း အလွန်အေးခဲသည့် ရာသီဥတု အခြေအနေအတွက် သတိပေး နှိုးဆော်မှုကို တိုးမြှင့်ထားပြီး နိုင်ငံအလယ်ပိုင်းနှင့် တောင်ပိုင်းဒေသများတွင် အပူချိန်များ ကျဆင်းနိုင်ကြောင်း သတိပေးထားသည်။

VariFlight ဝက်ဘ်ဆိုက်၏ မိုးလေဝသ သတိပေးချက် မှတ်တမ်းတွင် နိုင်ငံအတွင်းရှိ လေဆိပ် ၂၆၀ ကျော်အနက် ၃၄ ခု၌ မီးခိုးမြူများနှင့် ဆီးနှင်းများ ကျရောက်သည့် သတိပေးချက်ကို ထုတ်ပြန်ထားသည်ဟု CCTV က ထုတ်ပြန် ခဲ့သည်။

Source: ဘန်ကောက်ပို့စ်

CNI International News

နယူးယောက်၊ ဖေဖော်ဝါရီ ၂၃ 

မြန်မာနိုင်ငံမှ နျူကလီးယားနှင့် ဆက်နွှယ်သည့် ပစ္စည်းများကို ထိန်းချုပ်ပြီး တရားမဝင် ရောင်းချနိုင်ရေး အကျိုး ဆောင်ပေးမှုဖြင့် ဂျပန်ယာကူဇာ ဒုစရိုက်ဂိုဏ်းဝင်တစ်ဦးကို တရားစွဲဆိုခဲ့ကြောင်း အမေရိကန်အာဏာပိုင်များက ဖေဖော်ဝါရီ ၂၁ ရက်တွင် ပြောကြားခဲ့ကြောင်း Thai PBS World မှ ဖော်ပြခဲ့သည်။

ထို ယာကူဇာခေါင်းဆောင်သည် တရားမဝင် လက်နက်များ ရောင်းချရေးကိုလည်း လုပ်ဆောင်သူ ဖြစ်စစ်သည်။

မန်ဟက်တန် (Manhattan) တရားရုံးတွင် စွပ်စွဲပြစ်တင်ခဲ့သည့် ထိုအမှုတွင် ယာကူဇာခေါင်းဆောင် တာကီရှီ အီဘီဆာဝါ (Takeshi Ebisawa) နှင့် ၎င်း၏ အမှုတွဲ ဆွမ်ဖို့ ဆင်ဟာသိရီ (Somphop Singhasiri) တို့ကို ၂၀၂၂ ခုနှစ်၊ ဧပြီလကတည်းက မူးယစ်ဆေးဝါး မှောင်ခိုကူးမှု၊ လက်နက်နှင့်ပတ်သက်သည့် ပြစ်မှုများဖြင့် တရားစွဲဆိုခဲ့ ခြင်းဖြစ်ကြောင်းနှင့် နှစ်ဦးစလုံးကို ရမန်ဖြင့် ထိန်းသိမ်းထားကြောင်း ဖော်ပြခဲ့သည်။

 အမေရိကန် DEA ကိုတွေ့ရစဉ်

“တရားစွဲဆို ခံထားရသူနှစ်ဦးဟာ မြန်မာနိုင်ငံက လက်နက်ပြုလုပ်နိုင်တဲ့ နျူကလီးယား ပစ္စည်းတွေနဲ့ မူးယစ် ဆေးဝါးတွေကို ရောင်းချဖို့နဲ့ လက်နက်ကိုင် သောင်းကျန်းသူတွေကိုယ်စား စစ်လက်နက်ပစ္စည်းတွေ ဝယ်ယူပေးဖို့ စွဲချက်တွေနဲ့ စွပ်စွဲခံထားရပါတယ်”ဟု အမေရိကန် တရားရေးဝန်ကြီးဌာန၏ အမျိုးသားလုံခြုံရေးဌာနမှ လက်ထောက်အစိုးရရှေ့နေချုပ် မက်သူး အိုလ်ဆန် (Matthew Olsen) က ပြောကြားခဲ့သည်။

“သူတို့ရဲ့ အစီအစဉ်တွေသာ အောင်မြင်ခဲ့မယ်ဆိုရင် နောက်ဆက်တွဲ အကျိုးဆက်တွေကို တွေးကြည့်ရုံနဲ့တင် တော်တော် စိုးရိမ်ဖို့ကောင်းပါတယ်။ တရားရေးဝန်ကြီးဌာနက အမေရိကန်ရဲ့ အမျိုးသားလုံခြုံရေးနဲ့ နိုင်ငံတကာ တည်ငြိမ်မှုကို ခြိမ်းခြောက်နေတဲ့ ဒီအမှုမှာ တာဝန်ရှိသူတွေကို အရေးယူသွားမှာဖြစ်ပါတယ်”ဟု အိုလ်ဆန်က ပြောကြားခဲ့သည်။

အီဘီဆာဝါနှင့် ဆင်ဟာသီရိတို့၏ လက်နက်ရောင်းဝယ်ရေး သဘောတူညီချက်ထဲတွင် ပါဝင်သည့် လက်နက်များ အနက် မြေပြင်မှ ဝေဟင်ပစ် ဒုံးကျည်များလည်း ပါဝင်နေသည်ဟု အမေရိကန်အာဏာပိုင်များက စွပ်စွဲထားသည်။

အီဘီဆာဝါသည် မြန်မာနိုင်ငံမှ ယူရေနီယံပါဝင်သည့် ပစ္စည်းများနှင့် လက်နက် ထုတ်လုပ်နိုင်သော ပလူတိုနီယံ များကို မူးယစ်ဆေးဝါးများနှင့်အတူ ရွှေ့ပြောင်းသယ်ဆောင်ခဲ့ကြောင်း အမေရိကန် အစိုးရရှေ့နေများက စွပ်စွဲခဲ့ သည်။

ယာကူဇာခေါင်းဆောင် တာကီရှီ အီဘီဆာဝါကို တွေ့ရစဉ်

၂၀၂၀ ပြည့်နှစ်မှစပြီး အီဘီဆာဝါသည် နျူကလီးယား ဆက်စပ်ပစ္စည်းများကို ရောင်းချရန် အမေရိကန်၏ အသွင်ယူ ထောက်လှမ်းရေး အရာရှိတစ်ဦးနှင့် ဆက်သွယ်ခဲ့ကြောင်း တရားရုံးမှတ်တမ်းများတွင် ဖော်ပြခဲ့သည်။

၎င်းတို့နှစ်ဦး၏ အစီအစဉ်အား ဖော်ထုတ်သည့် စစ်ဆင်ရေးတွင် ထိုင်းအာဏာပိုင်များက အမေရိကန် စုံစမ်း စစ်ဆေးသူများကို အကူအညီပေးခဲ့ကြောင်း သိရသည်။

ထိုအမှုနှင့်ပတ်သက်ပြီး အီဘီဆာဝါနှင့် ဆင်ဟာသီရိတို့အား တရားရုံးတွင် စစ်ဆေးကြားနာမည့် နေ့ကိုမူ ထုတ်ပြန်ခြင်း မရှိသေးပေ။

Source: Thai PBS World

CNI International News

ဘေကျင်း၊ ဖေဖော်ဝါရီ ၂၃

တရုတ်နိုင်ငံသည် စင်္ကာပူလေကြောင်းပြပွဲတွင် ၎င်း၏ Z-10 တိုက်ခိုက်ရေး ရဟတ်ယာဉ်ကို ပွဲထုတ်ပြသခဲ့သည်ဟု ရိုက်တာမှ ဖော်ပြခဲ့သည်။ 

ထိုကဲ့သို့ ပြသမှုသည် Z-10 ရဟတ်ယာဉ်ကို တရုတ်နိုင်ငံပြင်ပတွင် ပထမဆုံးအကြိမ် ပြသခြင်းဖြစ်သည်။

တရုတ်၏ AVIC ကုမ္ပဏီမှ ထုတ်လုပ်ခဲ့သည့် Z-10 တိုက်ခိုက်ရေး ရဟတ်ယာဉ်သည် ယခုနှစ်အတွင်း အနောက် နိုင်ငံများ၏ ဒီဇိုင်းမျိုးမဟုတ်သည့် တစ်ခုတည်းသော တိုက်ခိုက်ရေး ရဟတ်ယာဉ်ဖြစ်သည်။

ထိုလေကြောင်းပြပွဲတွင် ရုရှားကာကွယ်ရေးကုမ္ပဏီများ ပါဝင်ခဲ့ခြင်းမရှိပေ။

အဆိုပါ Z-10 ရဟတ်ယာဉ်ကို ဝယ်ယူသည်ဟု သိရသည့် တစ်ခုတည်းသောနိုင်ငံမှာ ပါကစ္စတန်နိုင်ငံဖြစ်ပြီး ထိုလေကြောင်းပြပွဲတွင် အရောင်းပိတ်မည့် ဖေဖော်ဝါရီ ၂၃ ရက် မတိုင်မီ Z-10 ရဟတ်ယာဉ် ဝယ်ယူမှုများနှင့် ပတ်သက်ပြီး ကြေညာချက်များ မထွက်ပေါ်သေးပေ။

 နိုင်ငံတကာ မဟာဗျူဟာလေ့လာရေး အင်စတီကျု၏ ကျွမ်းကျင်သူ ဒေါက်ဂလပ်စ် ဘာရီကို တွေ့ရစဉ်

“Z-10 ရဟတ်ယာဉ်ဟာ အမေရိကန်ကာကွယ်ရေး နည်းပညာတွေကို မသုံးစွဲနိုင်တဲ့ နိုင်ငံအချို့အတွက် အစားထိုး အသုံးပြုနိုင်မယ့် ရဟတ်ယာဉ် အမျိုးအစား ဖြစ်လာပါလိမ့်မယ်” ဟု နိုင်ငံတကာ မဟာဗျူဟာလေ့လာရေး အင်စတီကျု၏ ကျွမ်းကျင်သူ ဒေါက်ဂလပ်စ် ဘာရီ (Douglas Barrie) က ပြောကြားခဲ့သည်။

“ဒါပေမယ့် ရဟတ်ယာဉ်တွေ ရောင်းချပြီးတဲ့နောက် ထောက်ပံ့ပို့ဆောင်ရေးနဲ့ ပြုပြင်ထိန်းသိမ်းရေး အပိုင်းမှာတော့ စိန်ခေါ်မှုရှိလာနိုင်ပါတယ်။ တရုတ်ဟာ အဲဒီနယ်ပယ်မှာ အတွေ့အကြုံ သိပ်မရှိသေးလို့ ဖြစ်ပါတယ်” ဟု ၎င်းက ပြောသည်။

ထိုအကြောင်းအရာနှင့်ပတ်သက်ပြီး စင်္ကာပူလေကြောင်းပြပွဲရှိ AVIC ၏ ကိုယ်စားလှယ်များကမူ မှတ်ချက်ပေးရန် ငြင်းဆိုခဲ့သည်။

လေကြောင်းပြပွဲတွင် Z-10 ရဟတ်ယာဉ်နှင့်အတူ ထိုရဟတ်ယာဉ်တွင် တပ်ဆင်အသုံးပြုနိုင်သည့် သေနတ်များ၊ ဒုံးကျည်များနှင့် ရော့ကတ်များကိုပါ ပြသထားခဲ့သည်။

 တရုတ်ထုတ် Z-10 တိုက်ခတ်ရေး ရဟတ်ယာဉ်ကို တွေ့ရစဉ်

စင်္ကာပူစစ်တပ်နှင့် အမေရိကန်၏ မဟာမိတ်နိုင်ငံများ အသုံးပြုနေသည့် Boeing ကုမ္ပဏီ၏ AH-64 Apache တိုက်ခိုက်ရေး ရဟတ်ယာဉ်နှင့် ကွာခြားမှု မရှိသည်ကို တွေ့ရမည်ဖြစ်သည်။

သို့သော် Z-10 ရဟတ်ယာဉ်သည် Apache ရဟတ်ယာဉ်၊ Airbus ကုမ္ပဏီ၏ Bell ရဟတ်ယာဉ်များ အပါအဝင် လေကြောင်းပြပွဲတွင် ပြသခဲ့သည့် တိုက်ခိုက်ရေး ရဟတ်ယာဉ်များနှင့် ယှဉ်နိုင်စွမ်း မရှိနိုင်ကြောင်း ကျွမ်းကျင်သူ များက ပြောကြားခဲ့သည်။

တရုတ်အစိုးရသည် Z-10 တိုက်ခိုက်ရေး ရဟတ်ယာဉ်၏ စွမ်းဆောင်ရည်နှင့် လုပ်နိုင်စွမ်းအားများကို လူသိရှင် ကြား ကြေညာခဲ့ခြင်း မရှိသော်လည်း တရုတ်နိုင်ငံပိုင် Global Times သတင်းစာကမူ Z-10 ရဟတ်ယာဉ်သည် ပျံသန်းမှုစွမ်းရည်၊ ပစ်ခတ်တိုက်ခိုက်မှုအပိုင်းနှင့် အကြမ်းခံနိုင်မှုတို့တွင် အလွန်ကောင်းမွန်ကြောင်း ဖော်ပြခဲ့သည်။

Source: ရိုက်တာ

CNI International News

ဝါရှင်တန်၊ ဖေဖော်ဝါရီ ၂၂

ရုရှားအတိုက်အခံခေါင်းဆောင် အလက်ဇီ နာဗာညီ (Alexei Navalny) သေဆုံးမှုနှင့်ပတ်သက်ပြီး အမေရိကန် သမ္မတဟောင်း ဒေါ်နယ်ထရမ့် (Donald Trump) ၏ တုန့်ပြန်မှုကို ဂျိုးဘိုင်ဒန် (Joe Biden)က ပြစ်တင်ဝေဖန် ခဲ့ကြောင်း ရိုက်တာမှ ဖော်ပြခဲ့သည်။

ထို့ပြင် ထရမ့်သည် အမေရိကန်ကို အဘယ်ကြောင့် အမြဲတမ်း အပြစ်တင် နေသနည်းဟုလည်း ဘိုင်ဒန်က မေးခွန်းထုတ်ခဲ့သည်။

ဖေဖော်ဝါရီ ၁၆ ရက်က နာဗာညီ သေဆုံးသည့်သတင်း ထွက်ပေါ်လာခဲ့ပြီးနောက် ဘိုင်ဒန်သည် ရုရှားသမ္မတ ဗလာဒီမာ ပူတင် (Vladimir Putin) ကို တိုက်ရိုက်ဝေဖန် ပြစ်တင်ခဲ့ပြီး ထရမ့်ကမူ ဖေဖော်ဝါရီ ၁၉ ရက် မတိုင်မီ အချိန်အထိ နာဗာညီသေဆုံးမှုအား ရေငုံနှုတ်ပိတ်နေခဲ့သည်။ 

ထရမ့်၏ လူမှုမီဒီယာတွင်လည်း နာဗာညီ သေဆုံးမှုအပေါ် အပြစ်တင်ခြင်း၊ ဝမ်းနည်းခြင်းတို့ ဖော်ပြခဲ့ခြင်းမရှိခဲ့ပေ။ 

သို့သော် ထရမ့်သည် အမေရိကန်တွင် ၎င်း၏ကိုယ်ရေးကိုယ်တာ တရားရေး အမှုအခင်းများနှင့် ရင်ဆိုင်နေရသဖြင့် နာဗာညီ၏ သေဆုံးမှုကို အာရုံမစိုက်နိုင်ခြင်း ဖြစ်နိုင်သည်ဟုလည်း သုံးသပ်ချက်များ ထွက်ပေါ်လျက်ရှိသည်။

ဘိုင်ဒန်ကို တွေ့ရစဉ်

“သမ္မတဟောင်း ထရမ့်နဲ့ အခြား ရီပတ်ဘလစ်ကန်တွေဟာ နာဗာညီ သေဆုံးမှုအတွက် ပူတင်မှာ တာဝန်ရှိတဲ့ အကြောင်းကို ပြောဖို့ ငြင်းဆိုနေကြပါတယ်။ အဲဒီအစား ထရမ့်ဟာ နာဗာညီရဲ့ သေဆုံးမှုကို အမေရိကန်နိုင်ငံ ဘယ်လောက် ဆိုးရွားနေလဲဆိုတာကို သူနားလည်တဲ့ ပုံစံမျိုးနဲ့ ပြောဆိုခဲ့ပါတယ်”ဟု ဘိုင်ဒန်က ပြောကြားခဲ့သည်။

“ထရမ့်က အမေရိကန်ကို ဆုတ်ယုတ်နေပြီး ကျရှုံးနိုင်ငံ ဖြစ်လာကြောင်း ပြောခဲ့ပါတယ်။ သူ့အနေနဲ့ ဘာလို့ အမေရိကန်ကိုပဲ အပြစ်တင် နေရတာလဲ။ နာဗာညီ သေဆုံးမှုမှာ ပူတင်က တာဝန်ရှိပါတယ်။ အဲဒါကို ထရမ့်က ဘာလို့မပြောခဲ့တာလဲ” ဟု ဘိုင်ဒန်က မေးခွန်းထုတ်ခဲ့သည်။

နာဗာညီ သေဆုံးမှုနှင့်ပတ်သက်ပြီး ရုရှားနိုင်ငံအပေါ် ပိတ်ဆို့မှုများ ချမှတ်မည်ဖြစ်ကြောင်း ဘိုင်ဒန်က ဖေဖော်ဝါရီ ၂၀ ရက်တွင် ကြေညာခဲ့သည်။ 

ထရမ့်ကမူ ဖေဖော်ဝါရီ ၂၀ ရက်က Fox News သတင်းဌာနနှင့် ပြုလုပ်သည့် အင်တာဗျူးတွင် နာဗာညီသည် ဖမ်းဆီးခံရမည်မှန်း သိလျက်နှင့် ရုရှားနိုင်ငံသို့ ပြန်လည် ဝင်ရောက်လာခဲ့ခြင်းသည် အလွန်သတ္တိရှိသူဖြစ်ကြောင်း၊ မည်သို့ပင်ဆိုစေ နာဗာညီအနေဖြင့် ပြည်ပတွင် နေထိုင်ပြီး အတိုက်အခံ ဆက်လုပ်လျင် ပိုမိုအလုပ်ဖြစ်လိမ့်မည် ဖြစ်ကြောင်း ပြောကြားခဲ့သည်။