CNI International News

ဂျေရုဆလင်၊ နိုဝ်ငဘာ ၁ 

ဟားမာ့စ်အဖွဲ့နှင့် ဖြစ်ပွားနေသည့် စစ်ပွဲတွင် အပစ်အခတ်ရပ်စဲရေးသည် ဖြစ်လာလိမ့်မည် မဟုတ်ဟု အစ္စရေး ဝန်ကြီးချုပ် ဘင်ဂျမင် နေတန်ယာဟု (Benjamin Netanyahu)က ပြောကြားခဲ့ကြောင်း CNA မှ ဖော်ပြခဲ့သည်။

အစ္စရေး-ဟားမာ့စ် စစ်ပွဲအတွင်း လက်ရှိ ထောက်ပံ့ပေးနေသည့် အကူအညီများသည် လူသားချင်း စာနာထောက် ထားမှုဆိုင်ရာ လိုအပ်ချက်များကို ပြည့်မီခြင်းမရှိကြောင်း ကုလသမဂ္ဂက သတိပေးခဲ့ပြီးနောက် နေတန်ယာဟုက အထက်ပါအတိုင်း ပြောကြားခဲ့ခြင်း ဖြစ်သည်။

လက်ရှိတွင် အစ္စရေး မြေပြင်တပ်ဖွဲ့များသည် ဟားမာ့စ်တို့ ထိန်းချုပ်ထားသည့် ဂါဇာကမ်းမြောင် ဒေသအတွင်း တိုက်ခိုက်မှုများ ပြုလုပ်နေပြီး လေကြောင်းတိုက်ခိုက်မှုများ၊ လက်နက်ကြီးဖြင့် ပစ်ခတ်တိုက်ခိုက်မှုများကို ပြင်းထန်စွာ ပြုလုပ်လျက်ရှိသည်။

ဂါဇာဒေသ တိုက်ခိုက်ခံရမှုကို တွေ့ရစဉ်

အစ္စရေး၏ ပြင်းထန်သည့် တိုက်ခိုက်မှုများကြောင့် လူဦးရေ ၂ ဒသမ ၄ သန်း နေထိုင်သည့် ဂါဇာကမ်းမြောင် ဒေသထဲတွင် လူပေါင်း ၈၃၀၀ ကျော် သေဆုံးခဲ့သည်ဟု ဂါဇာကျန်းမာရေးဝန်ကြီးဌာနက ထုတ်ပြန်ခဲ့သည်။ 

အစ္စရေးဝန်ကြီးချုပ် နေတန်ယာဟုက အပစ်အခတ်ရပ်စဲသည့် အခြေအနေသည် ဟားမာ့စ်တို့ကို လက်နက်ချ အညံ့ခံသည့် အခြေအနေမျိုးနှင့် တူညီနေလိမ့်မည်ဟု ပြောကြားခဲ့သည်။ 

အစ္စရေးတွင် ဟားမာ့စ်တို့၏ တိုက်ခိုက်မှုများကြောင့် လူ ၁၄၀၀ ခန့် သေဆုံးခဲ့ကာ လူပေါင်း ၂၃၀ ခန့် ဓားစာခံ အဖြစ် ဖမ်းဆီးခံခဲ့ရသည်ဟု အစ္စရေးအာဏာပိုင်များက ပြောကြားခဲ့သည်။

ဂါဇာဒေသခံများ စစ်ပွဲအတွင်းမှာ တွေ့ရစဉ်

"အပစ်အခတ်ရပ်စဲဖို့ တောင်းဆိုတာက အစ္စရေးကို ဟားမာ့စ်အဖွဲ့ဆီမှာ လက်နက်ချ အညံ့ခံခိုင်းတဲ့ သဘောမျိုး ဖြစ်ပါတယ်။ ဒါမျိုးက ဖြစ်လာမှာ မဟုတ်ပါဘူး" ဟု နေတန်ယာဟုက ပြောကြားခဲ့ပြီး ယခုတိုက်ခိုက်နေသည့် စစ်ပွဲကို အနိုင်ရသည့် အခြေအနေအထိ ဆက်လက် တိုက်ခိုက်သွားမည်ဟု ကတိပြုခဲ့သည်။

အစ္စရေး၏ မဟာမိတ်ဖြစ်သည့် အမေရိကန်ကလည်း အပစ်အခတ်ရပ်စဲရေးကို ဆန့်ကျင်ကန့်ကွက်ခဲ့သည်။ 

"အခုချိန်မှာ အပစ်အခတ်ရပ်စဲရေးဟာ မှန်ကန်တဲ့ အဖြေဖြစ်တယ်လို့ ကျနော်တို့ မယူဆပါဘူး" ဟု အိမ်ဖြူတော် အမျိုးသားလုံခြုံရေး ကောင်စီ၏ ပြောရေးဆိုခွင့်ရှိသူ ဂျွန်ကာဘီ(John Kirby) က ပြောကြားခဲ့သည်။

Source: CAN

CNI International News

ပေကျင်း၊ အောက်တိုဘာ ၃၁

အနောက်နိုင်ငံများသည် ယူကရိန်းစစ်ပွဲကို အာရှ-ပစိဖိတ်ဒေသအထိ ပိုမိုကျယ်ပြန့်စေရန် ကြိုးပမ်းနေသည်ဟု ရုရှားကာကွယ်ရေးဝန်ကြီး ဆာဂျေရွိူင်ဂူ (Sergey Shoigu) က ပြောကြားခဲ့ကြောင်း ရိုက်တာမှ ဖော်ပြခဲ့သည်။ 

ရွိူင်ဂူသည် အောက်တိုဘာ ၃၀ ရက်က တရုတ်နိုင်ငံ ဘေဂျင်းမြို့တော်တွင် ပြုလုပ်သည့် ရှောင်ရှန်လုံခြုံရေး ဖိုရမ် (Xiangshan Security Forum) တွင် ပြောကြားခဲ့ခြင်း ဖြစ်သည်ဟု ရုရှားနိုင်ငံပိုင် မီဒီယာဖြစ်သည့် တာ့စ်သတင်း ဌာနက ဖော်ပြခဲ့သည်။ 

နေတိုး မဟာမိတ်အဖွဲ့သည် အာရှ-ပစိဖိတ်ဒေသတွင် ဟန်ပြ ဆွေးနွေးညှိနှိုင်းမှုများနှင့်အတူ စစ်အင်အားကို တည်ထောင်နေသည်ဟုလည်း ရွိူင်ဂူက တရုတ်၏ အကြီးဆုံး စစ်ဘက်ဆိုင်ရာ သံတမန်ရေး အခမ်းအနားတွင် ပြောကြားခဲ့သည်။

ယူကရိန်းစစ်ပွဲကို တွေ့ရစဉ်

ထို့ပြင် နေတိုးအဖွဲ့သည် ဒေသတွင်း လက်နက်အပြိုင်အဆိုင် တပ်ဆင်မှုများကို ပိုမိုမြှင့်တင်နေပြီး စစ်ရေးလေ့ကျင့် မှုများကို မကြာခဏ ပြုလုပ်နေသည်ဟုလည်း ရွိူင်ဂူက ပြောကြားခဲ့သည်။

အမေရိကန်သည် မြောက်ကိုရီးယား၏ ဒုံးကျည် ပစ်လွှတ်မှုများကို ဟန့်တားရန် ဂျပန်၊ တောင်ကိုရီးယားတို့နှင့် အတူ ထောက်လှမ်းရေး သတင်းအချက်အလက်များ မျှဝေနေကြောင်း၊ အမေရိကန်သည် သဘာဝဘေးအန္တရာယ် များနှင့် ရာသီဥတု ဖောက်ပြန်ပြောင်းလဲမှုကို အကြောင်းပြပြီး လူသားချင်း စာနာထောက်ထားမှုဆိုင်ရာ ဝင်ရောက် စွက်ဖက်မှုများ ပြုလုပ်ရန် ကြိုးပမ်းနေကြောင်းလည်း ရုရှားကာကွယ်ရေးဝန်ကြီးက စွပ်စွဲခဲ့သည်။

ထို့ပြင် Quad (သြစတြေးလျ၊ အိန္ဒိယ၊ဂျပန်၊ အမေရိကန်) အဖွဲ့နှင့် AUKUS (သြစတြေးလျ၊ ဗြိတိန်နှင့် အမေရိကန်) အဖွဲ့များသည် ဒေသတွင်း အရှေ့တောင်အာရှနိုင်ငံများအသင်း (အာဆီယံ) ၏ နျူကလီးယားလက်နက် မပျံ့ပွား ရေး အားထုတ်ကြိုးပမ်းမှုများကို လျော့ပါးစေခဲ့သည်ဟုလည်း ရွိူင်ဂူက ပြောသည်။

အနောက်နိုင်ငံများကိုတွေ့ရစဉ်

တစ်ချိန်တည်းမှာပင် နျူကလီးယား စမ်းသပ်မှု တားမြစ်ပိတ်ပင်ရေး စာချုပ်မှ ရုရှားနိုင်ငံ နုတ်ထွက်မှုသည် ထိုသဘောတူညီချက်ကို အဆုံသတ်စေသည့် အဓိပ္ပာယ် မဟုတ်ကြောင်းနှင့် ရုရှားသည် နျူကလီးယား လက်နက် များ အသုံးပြုရေးအတွက် သတ်မှတ်ချက်များကို လျှော့ချသွားမည် မဟုတ်ကြောင်းလည်း ၎င်းက ဆိုသည်။ 

ရုရှားအနေဖြင့် ယူကရိန်းစစ်ပွဲကို အဆုံသတ်စေရန် ဆွေးနွေးမှုများ ပြုလုပ်ရန်နှင့် အနောက်နိုင်ငံများနှင့် တူယှဉ် တွဲနေထိုင်ရန် အသင့်ရှိကြောင်း၊ သို့သော် အနောက်နိုင်ငံများအနေနှင့် ရုရှားကို အနိုင်ယူရန် ကြိုးပမ်းနေမှုများကို ရပ်တန့်ရန် လိုအပ်ကြောင်း ရွိူင်ဂူက ပြောကြားခဲ့သည်။ 

Source: ရိုက်တာ

CNI International News

ဘန်ကောက်၊ အောက်တိုဘာ ၃၁

အစ္စရေးနိုင်ငံတွင် အလုပ်လုပ်ကိုင်ခဲ့သည့် ထိုင်းနိုင်ငံသား ၈၁၀ သည် အောက်တိုဘာ ၃၀ ရက်တွင် လေကြောင်း ခရီးစဉ် ၄ ခုဖြင့် ထိုင်းသို့ ပြန်လည် ရောက်ရှိလာခဲ့သဖြင့် အစ္စရေးမှ ထိုင်းသို့ပြန်လည် ရောက်ရှိခဲ့သော ထိုင်းနိုင်ငံ သား စုစုပေါင်း ၇၄၁၅ ဦးအထိ ရှိလာခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

ထိုင်းနိုင်ငံသား ၁၈၀ ခန့်ကို တင်ဆောင်လာခဲ့သည့် လေကြောင်းအမှတ်စဉ် Thai Lion Air Flight SL7001 သည် ထိုင်းနိုင်ငံ၏ ဒွန်မောင်း (Don Muang) လေဆိပ်သို့ နံနက် ၈ နာရီ ၄၀ မိနစ်တွင် ရောက်ရှိလာခဲ့သည်။

 အစ္စရေးနိုင်ငံမှာ အလုပ်လုပ်နေတဲ့ ထိုင်းနိုင်ငံသား ၂ ဦးကိုတွေ့ရစဉ်
 
နေရပ်သို့ ပြန်လည် ရောက်ရှိလာသည့် ထိုင်းလူမျိုးများကို ထိုင်းအလုပ်သမားရေးရာဝန်ကြီး၏ အတွင်းရေးမှူး အာရီ ကရိုင်နာရာ (Aree Krainara) နှင့် အခြား ဝန်ကြီးဌာန အရာရှိများက ကြိုဆိုခဲ့ကြသည်။ 

အခြား ထိုင်းနိုင်ငံသား ၆၃၀ သည် လေကြောင်းခရီးစဉ် ၃ ခုဖြင့် ထိုင်းသို့ ရောက်ရှိခဲ့ခြင်း ဖြစ်သည်။

ထိုင်းတော်ဝင်လေတပ်မှ လေယာဉ်တစ်စင်းသည် နံနက် ၂ နာရီ ၅၀ မိနစ် အချိန်တွင် ဒွန်မောင်းလေဆိပ်သို့ ရောက်ရှိခဲ့ပြီးနောက် ပုဂ္ဂလိက လေကြောင်းလိုင်းကနေ လေကြောင်းခရီးစဉ်နှစ်ခုသည် သုဝဏ္ဏဘူမိ (Suvarna bhumi) လေဆိပ်သို့ ရောက်ရှိခဲ့ခြင်း ဖြစ်သည်။

အစ္စရေးကနေ ပြန်ရောက်လာတဲ့ ထိုင်းနိုင်ငံသားတွေကို တွေ့ရစဉ်

ထို့ကြောင့် အောက်တိုဘာ ၇ ရက်က အစ္စရေးကို ဟားမာ့စ်အဖွဲ့က ဝင်ရောက်တိုက်ခိုက်ပြီးနောက် အစ္စရေးမှ ထိုင်းသို့ ပြန်လည်ရောက်ရှိခဲ့သည့် ထိုင်းနိုင်ငံသား စုစုပေါင်းသည် ၇၄၁၅ ဦးအထိ ရှိလာခဲ့သည်။ 

Source: ဘန်ကောက်ပို့

CNI International News

ဘေဂျင်း၊ အောက်တိုဘာ ၃၁

ရုရှားနှင့် တရုတ်အကြား စစ်ဘက်ဆိုင်ရာ ပူးပေါင်းဆောင်ရွက်မှုသည် ကြီးမားသည့် အလားအလာရှိပြီး အကျိုးဖြစ် ထွန်းသည့် ရလဒ်များ ထွက်ပေါ်ခဲ့ကြောင်း တရုတ်၏ ဗဟိုစစ်ကော်မရှင် ကျန်းယူရှား (Zhang YouXia) က ဘေဂျင်းမြို့တော်တွင် ရုရှားကာကွယ်ရေးဝန်ကြီး ဆာဂျေ ရွိူင်ဂူ (Sergey Shoigu) နှင့် ပြုလုပ်သည့် ဆွေးနွေးပွဲ အတွင်း ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။

"နှစ်နိုင်ငံ ခေါင်းဆောင်တွေရဲ့ မဟာဗျူဟာမြောက် လမ်းညွှန်မှုအောက်မှာ ရုရှား-တရုတ် ဆက်ဆံရေးတွေဟာ မြင့်မားတဲ့ အဆင့်ကို ရောက်ရှိခဲ့ပြီး နှစ်နိုင်ငံ စစ်တပ်အကြား ဆက်ဆံရေးတွေဟာလည်း ခိုင်မာစွာ ဖွံ့ဖြိုးတိုးတက် ခဲ့သလို နယ်ပယ်အားလုံးမှာ ထိတွေ့ဆက်ဆံမှုတွေဟာ အကျိုးရှိတဲ့ ရလဒ်တွေကို ထွက်ပေါ်ခဲ့ပါတယ်" ဟု တရုတ် ကာကွယ်ရေးဝန်ကြီးဌာနက ထုတ်ပြန်ခဲ့သည်။

အဆိုပါ တွေ့ဆုံဆွေးနွေးမှုအတွင်း ကျန်းက ၂၀၁၂ ခုနှစ်က ရွိူင်ဂူနှင့် ပထမဆုံးအကြိမ် တွေ့ဆုံခဲ့သည့် အစည်းအဝေး အကြောင်းကိုလည်း ပြန်လည် ပြောကြားခဲ့သည်။ 

တရုတ်၏ ဗဟိုစစ်ကော်မရှင် ကျန်းယူရှားနဲ့ ရုရှားကာကွယ်ရေးဝန်ကြီး ဆာဂျေ ရွိူင်ဂူကို တွေ့ရစဉ်

ထို့ပြင် စစ်ရေး နယ်ပယ်တွင် တရုတ်နှင့် ရုရှား၏ ရပ်တည်ချက်များ တူညီမှုသည် နှစ်နိုင်ငံအကြား ပူးပေါင်း ဆောင်ရွက်မှုများကို ပိုမိုတိုးတက်စေခဲ့သည်ဟုလည်း ကျန်းက ပြောသည်။

ရွိူင်ဂူသည် အောက်တိုဘာ ၂၉ ရက်က စတင်ပြုလုပ်ခဲ့သည့် (၁၀)ကြိမ်မြောက် ရှောင်းရှန်းလုံခြုံရေးဖိုရမ် (10th Xiangshan Security Forum) ကို တက်ရောက်ရန်အတွက် ရုရှားကိုယ်စားလှယ်အဖွဲ့ကို ဦးဆောင်ပြီး ဘေဂျင်းသို့ ရောက်ရှိနေခြင်း ဖြစ်သည်။

ထိုလုံခြုံရေးဖိုရမ်ကို အောက်တိုဘာ ၃၁ ရက်အထိ ကျင်းပမည်ဖြစ်ပြီး ရုရှား၊ အီရန်၊ ဆော်ဒီနှင့် အမေရိကန် အပါအဝင် နိုင်ငံပေါင်း ၉၀ ကျော်မှ အစိုးရကိုယ်စားလှယ်အဖွဲ့များ၊ သံတမန်များနှင့် ပညာရှင်များ တက်ရောက်ခဲ့ သည်။ 

ဖိုရမ်ကို တက်ရောက်သူများအနက် သုံးပုံတစ်ပုံသည် ကာကွယ်ရေးဝန်ကြီးများနှင့် ကာကွယ်ရေး ဦးစီးချုပ်များကို ကိုယ်စားပြုသည့် ကိုယ်စားလှယ်အဖွဲ့များ ဖြစ်သည်။

Source: တာ့စ်

CNI International News

မော်စကို၊ အောက်တိုဘာ ၃၁

ရုရှားနိုင်ငံ၊ ဒါဂျက်စတန် (Dagestan) ဒေသရှိ အဓိက လေဆိပ်တစ်ခုကို အောက်တိုဘာ ၃၀ ရက်တွင် ဂျူး ဆန့်ကျင်သူများက ဝင်ရောက်စီးနင်းခဲ့ပြီး လေဆိပ်အတွင်းရှိ လေယာဉ်ကွင်းထဲသို့ ဝင်ရောက်ခဲ့ကြသည်ဟု အေပီမှ ဖော်ပြခဲ့သည်။ 

အစ္စရေးနိုင်ငံ၏ တဲလ်အဗစ် (Tel aviv) မြို့မှ ပျံသန်းထွက်ခွာလာသည့် လေယာဉ်တစ်စင်းသည် ထိုလေဆိပ်သို့ ရောက်ရှိလာခဲ့ချိန်တွင် ဂျူးဆန့်ကျင်သူများက လေဆိပ်ကို ဝင်ရောက်စီးနင်းခဲ့ခြင်း ဖြစ်သည်ဟု ရုရှားသတင်း အေဂျင်စီများနှင့် လူမှုမီဒီယာများက ဖော်ပြခဲ့သည်။

ဆူပူအုံကြွသူများသည် လေယာဉ် ဘေးပတ်ပတ်လည်ကို ဝိုင်းထားခဲ့သည်။ ထိုလေယာဉ်ကို ရုရှား၏ Red Wings လေကြောင်းလိုင်းက ပိုင်ဆိုင်ကြောင်း သတင်းများတွင် ဖော်ပြခဲ့သည်။

အာဏာပိုင်များသည် မွတ်ဆလင် ဘာသာဝင်များ လွှမ်းမိုးထားသည့် ဒါဂျက်စတန်ဒေသ၏ မြို့တော် မက်ခါချက လာ (Makhachkala) ရှိ လေဆိပ်ကို ပိတ်ခဲ့ပြီးနောက် ဆူပူအုံကြွသူများကို လူစုခွဲခဲ့ရသည်။

ရုရှား လေဆိပ်ကို ဂျူးဆန့်ကျင်သူများ စီးနင်းထားစဉ်

ထိုဖြစ်စဉ်အတွင်း ဒဏ်ရာရရှိသူ ၂၀ ကျော်ရှိပြီး ၂ ဦးသည် ပြင်းထန်ဒဏ်ရာများ ရရှိခဲ့သည်ဟု ဒါဂျက်စတန် ကျန်းမာရေး ဝန်ကြီးဌာနက ထုတ်ပြန်ခဲ့သည်။ ဒဏ်ရာရရှိသူများထဲတွင် ရဲအရာရှိများနှင့် အရပ်သားများ ပါဝင် သည်ဟု ဆိုသည်။

ထိုဆူပူအုံကြွမှုနှင့်ပတ်သက်ပြီး လူပေါင်း ၆၀ ခန့်ကို ဖမ်းဆီးထိန်းသိမ်းခဲ့သည်ဟု ဒါဂျက်စတန်ဒေသ၏ ပြည်ထဲ ရေးဝန်ကြီးဌာနက ထုတ်ပြန်ခဲ့သည်။ 

ဖမ်းဆီးထိန်းသိမ်း ခံထားရသူများကို ပြစ်မှုဆိုင်ရာ စွဲချက်တင်ရန် ရှိ/မရှိ ရှင်းလင်းစွာ မသိရသေးပေ။

လူမှုမီဒီယာများပေါ်တွင် ပျံ့နှံ့ခဲ့သည့် ဗွီဒီယိုဖိုင်များ၌ ဆူပူအုံကြွသူများသည် ပါလက်စတိုင်း အလံများကို ဝှေ့ယမ်း ခဲ့ပြီး အချို့က ရဲကားတစ်စင်းကို လူအင်အားဖြင့်် ဝိုင်းမ၍ ပက်လက်လှန်ရန် ကြိုးပမ်းနေပုံများကို မြင်တွေ့ရသည်။ 

ရုရှား လေဆိပ်ကို ဂျူးဆန့်ကျင်သူများ စီးနင်းထားစဉ်

ရုရှား တရားဥပဒေစိုးမိုးရေး အာဏာပိုင်များအနေဖြင့် အစ္စရေးနိုင်ငံသား အားလုံးနှင့် ဂျူးလူမျိုးအားလုံး၏ လုံခြုံရေးကို ကာကွယ်ပေးရန် မျှော်လင့်ကြောင်း အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) ၏ ရုံးက ထုတ်ပြန်ခဲ့သည်။

ထို့ပြင် အစ္စရေးနိုင်ငံသားများနှင့် ဂျူးလူမျိုးများကို ဘေးကင်းလုံခြုံစွာရှိစေရန် ရုရှားနှင့် ပူးပေါင်း ဆောင်ရွက် နေသည်ဟုလည်း ရုရှားနိုင်ငံဆိုင်ရာ အစ္စရေး သံအမတ်က ပြောကြားခဲ့သည်။

Source: အေပီ

CNI International News

ဘန်ကောက်၊ အောက်တိုဘာ ၂၇

ထိုင်းနိုင်ငံတွင် ဖွဲ့စည်းပုံအခြေခံဥပဒေ ပြန်လည်ပြင်ဆင်ရေးအတွက် ပြည်သူ့ဆန္ဒခံယူပွဲ ပြုလုပ်ရန် အစိုးရကို တောင်းဆိုသည့် အဆိုပြုချက်ကို အောက်တိုဘာ ၂၅ ရက်က အောက်လွှတ်တော်၌ မဲခွဲဆုံးဖြတ်ခဲ့ရာ ထောက်ခံမဲ ၁၆၂ မဲ၊ ကန့်ကွက်မဲ ၂၆၁ မဲဖြင့် ပယ်ချခံခဲ့ရသည်ဟု ဘန်ကောက်ပို့စ်မှ ဖော်ပြခဲ့သည်။ 

အတိုက်အခံ Move Forward ပါတီ (MFP) က တင်သွင်းခဲ့သည့် ထိုအဆိုပြုချက်ကို လွှတ်တော်တွင်း ၄ နာရီကြာ အချေအတင် ဆွေးနွေးခဲ့ပြီးနောက် မဲခွဲဆုံးဖြတ်မှု ပြုလုပ်ခဲ့ခြင်း ဖြစ်သည်။

ထိုမဲခွဲဆုံးဖြတ်မှုတွင် ကန့်ကွက်မဲ ၂၆၁ မဲ၊ ထောက်ခံမဲ ၁၆၂ မဲနှင့် ကြားနေမဲအဖြစ် လွှတ်တော်ကိုယ်စားလှယ် ၆ ဦး ရှိခဲ့သည်။ 

ဖွဲ့စည်းပုံအခြေခံဥပဒေ ပြင်ဆင်ရေးသည် ပါတီအားလုံး၏ ပူးပေါင်းဆောင်ရွက်မှုကို လိုအပ်သဖြင့် MFP ၏ အဆိုပြုချက်ကို အာဏာရဖြူးထိုင်းပါတီက ဆန့်ကျင်ခြင်း မရှိခဲ့ကြောင်း ဖြူးထိုင်းပါတီ၏ လွှတ်တော် ကိုယ်စားလှယ် ချာတူရွန် ချိုင်ဆာအန် (Chaturon Chaisaeng) က ပြောကြားခဲ့သည်။

မည်သို့ပင်ဆိုစေ ပြည်သူ့ဆန္ဒခံယူပွဲ ဥပဒေကို အရင်ဆုံး ပြုပြင်ပြောင်းလဲရန် လိုအပ်ကြောင်း အဘယ်ကြောင့် ဆိုသော် ဖွဲ့စည်းပုံအခြေခံဥပဒေ ပြန်လည်ပြင်ဆင်ရေးအတွက် လိုအပ်ချက်များသည် အလွန်ခက်ခဲနေခြင်းကြောင့် ဖြစ်ကြောင်း ချာတူရွန်က ပြောကြားခဲ့သည်။ 

 MFP ပါတီ၏ လွှတ်တော် ကိုယ်စားလှယ် ပါရစ် ဝါချာရာဆင်ဒူကို တွေ့ရစဉ်

ပြည်သူ့ဆန္ဒခံယူပွဲဥပဒေ၏ အပိုဒ်ခွဲ ၁၃ တွင် ဆန္ဒခံယူပွဲပြုလုပ်ရန် အချက်နှစ်ချက် လိုအပ်ကြောင်း ဖော်ပြထား သည်။ 

ပထမအချက်မှာ မဲခွဲဆုံးဖြတ်သည့် လွှတ်တော်အမတ် ထက်ဝက်ကျော်၏ ထောက်ခံမဲကို လိုအပ်ကြောင်းနှင့် ဒုတိယအချက်မှာ ပြည်သူ့ဆန္ဒခံယူပွဲတွင် ပါဝင်မဲပေးခွင့််ရသည့် မဲဆန္ဒရှင် ထက်ဝက်ကျော် ရှိရန်လိုအပ်ကြောင်း ဖော်ပြထားသည်။

"အဲဒီလိုအပ်ချက်တွေက ဖွဲ့စည်းပုံအခြေခံဥပဒေကို ပြန်လည် ပြင်ဆင်ရေးဆွဲဖို့ ပြည်သူ့ဆန္ဒခံယူပွဲ ကျင်းပရေး အတွက် အခက်တွေ့စေတဲ့ အချက်တွေဖြစ်ပါတယ်။ ဒီဥပဒေကို အရင်မပြင်ဘူးဆိုရင် ဆန္ဒခံယူပွဲလည်း ကျင်းပဖို့ ခက်ခဲပါတယ်" ဟု ချာတူရွန်က ပြောကြားခဲ့သည်။

ထိုင်းအောက်လွှတ်တော် ကျင်းပနေစဉ်

MFP ပါတီအနေဖြင့် အစိုးရက ခန့်အပ်ထားသည့် ပြည်သူ့ဆန္ဒခံယူပွဲဥပဒေ ပြင်ဆင်ရေးအဖွဲ့သည် ထိုဥပဒေကို ပြင်ဆင်ရေးအတွက် အချိန်မည်မျှယူပြီး ပြင်ဆင်မည်ဆိုခြင်းကိုမူ ဂရုမစိုက်ကြောင်း MFP ပါတီ၏ လွှတ်တော် ကိုယ်စားလှယ် ပါရစ် ဝါချာရာဆင်ဒူ (Parit Wacharasindhu) က အောက်လွှတ်တော်ကို ပြောကြားခဲ့သည်။ 

ထိုအချိန်အတောအတွင်း ထိုင်းအစိုးရသည် ဖွဲ့စည်းပုံအခြေခံဥပဒေ ပြန်လည် ပြင်ဆင်ရေးနှင့်ပတ်သက်ပြီး ပြည်သူ့ဆန္ဒခံယူပွဲနှင့်ပတ်သက်ပြီး သက်ဆိုင်ရာ အဖွဲ့အစည်းများထံမှ လူထုသဘောထား စစ်တမ်းများကို ကောက်ခံရန် စီစဉ်လျက်ရှိသည်။ 

Source: ဘန်ကောက်ပို့စ်

CNI International News 

မော်စကို၊ အောက်တိုဘာ ၂၇

အစ္စရေး-ဟားမာ့စ် စစ်ပွဲသည် အရှေ့အလယ်ပိုင်းဒေသထက် ပိုမိုကျော်လွန်ပြီး ပျံ့နှံ့လာနိုင်သည်ဟု ရုရှားသမ္မတ ပူတင် (Vladimir Putin) က သတိပေးခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။
 
ထို့ပြင် အခြားသူများ၏ ရာဇဝတ်မှုများကြောင့် ဂါဇာတွင် ပါလက်စတိုင်း အမျိုးသမီးများ၊ ကလေးသူငယ်များနှင့် သက်ကြီးရွယ်အိုများပါ ရောနှောပြီး အပြစ်ပေးခံနေရခြင်းသည် မှားယွင်းသည်ဟုလည်း ပူတင်က ပြောကြား ခဲ့သည်။  

"ဒီနေ့ ကျနော်တို့ရဲ့ အဓိက တာဝန်ကတော့ သွေးထွက်သံယိုမှုတွေနဲ့ အကြမ်းဖက်မှုတွေကို ရပ်တန့်ဖို့ ဖြစ်ပါ တယ်" ဟု ပူတင်က အောက်တိုဘာ ၂၅ ရက်က ရုရှားဘာသာရေး ခေါင်းဆောင်များနှင့် ကရင်မလင်နန်းတော်တွင် အစည်းအဝေး ပြုလုပ်ချိန်အတွင်း ပြောကြားခဲ့သည်။

အကယ်၍ အစ္စရေးအနေနှင့် ဂါဇာကမ်းမြောင်ဒေသတွင် စစ်ဆင်ရေးများကို ရပ်တန့်ခြင်းမရှိပါက ထိုပဋိပက္ခသည် ပိုမိုကြီးမား ကျယ်ပြန့်လာလိမ့်မည်ဟုလည်း ပူတင်က အခြားနိုင်ငံများမှ ခေါင်းဆောင်များနှင့် ဖုန်းဆက်သွယ် ပြောဆိုမှုအတွင်း ပြောကြားခဲ့သည်။

 အရှေ့အလယ်ပိုင်းဒေသ နိုင်ငံများကို တွေ့ရစဉ်

"ဒီပဋိပက္ခ ပိုပြီး အရှိန်မြင့်လာခဲ့မယ်ဆိုရင် အန္တရာယ်ကြီးမားပြီး ထိခိုက်ပျက်စီးမှုတွေ ဖြစ်ပွားလာမယ့် အကျိုး ဆက်တွေကို မြင်တွေ့ရမှာ ဖြစ်ပါတယ်။ ဒါဟာ အရှေ့အလယ်ပိုင်း ဒေသမှာတင် မဟုတ်ပါဘူး။ အရှေ့အလယ်ပိုင်း ထက် ကျော်လွန်တဲ့ နေရာတွေအထိပါ ပျံ့နှံ့သွားနိုင်ပါလိမ့်မယ်" ဟု ပူတင်က ပြောကြားခဲ့သည်။ 

ထို့ပြင် အခြား အင်အားစုများသည်လည်း ပဋိ့ပက္ခကို ပိုမိုအရှိန်မြင့်တက်စေရန် ကြိုးပမ်းနေပြီး အခြားနိုင်ငံများကို ပါ အစ္စရေး-ဟားမာ့စ် စစ်ပွဲအတွင်း ပါဝင်လာစေရန် လုပ်ဆောင်နေသည်ဟု ပူတင်က အနောက်နိုင်ငံများကို ရည်ရွယ်ပြောကြားခဲ့သည်။ 

ထိုအင်အားစုများ၏ ရည်ရွယ်ချက်မှာ အရှေ့အလယ်ပိုင်းတွင်သာမက အရှေ့အလယ်ပိုင်းထက် ကျော်လွန်သည့် နေရာဒေသများတွင်ပါ အပြန်အလှန် မုန်းတီးမှုများနှင့် ပရမ်းပတာ အခြေအနေများကို ဖန်တီးရန် ဖြစ်သည်ဟု လည်း ပူတင်က ပြောသည်။ 

 အစ္စရေးစစ်သားတွေကို တွေ့ရစဉ်

အောက်တိုဘာ ၂၅ ရက်က ကုလသမဂ္ဂ လုံခြုံရေးကောင်စီတွင် အမေရိကန်က အဆိုပြုသည့် လူသားချင်း စာနာထောက်ထားမှုဆိုင်ရာ အပစ်အခတ်ရပ်စဲရေး၊ အရပ်သားများကို ကာကွယ်ရေး၊ ဂါဇာဒေသကို ထိန်းချုပ် ထားသည့်် ဟားမာ့စ်အဖွဲ့နှင့်အခြား လက်နက်ကိုင်အဖွဲ့များကို လက်နက်ထောက်ပံ့မှုများအား ရပ်တန့်ရေး တောင်းဆိုထားသည့် ကြေညာချက် မူကြမ်းတစ်စောင်ကို ရုရှားနှင့်တရုတ်က ဗီတိုအာဏာဖြင့် ပယ်ချခဲ့သည်။ 

လူသားချင်း စာနာထောက်ထားမှုဆိုင်ရာ အပစ်ရပ်မှုသည် ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က ထောက်ခံထားသည့် သမားရိုးကျ အပစ်အခတ်ရပ်စဲရေးနှင့် တူညီမှုမရှိကြောင်း သံတမန်များက ပြောကြားခဲ့သည်။ 

အဘယ်ကြောင့်ဆိုသော် လူသားချင်း စာနာထောက်ထားမှုဆိုင်ရာ အပစ်ရပ်မှုသည် နာရီပိုင်းသာ ကြာမြင့်သော ကြောင့် ဖြစ်သည်။

Source: အယ်လ်ဂျာဇီးယား

CNI International News

ဝါရှင်တန်၊ အောက်တိုဘာ ၂၇

အစ္စရေး-ဟားမာ့စ် စစ်ပွဲသည် အစ္စရေးနှင့် နယ်စပ်ချင်း ထိစပ်နေသည့် အီဂျစ်၊ ဂျော်ဒန်နှင့် လက်ဘနွန်နိုင်ငံတို့တွင် စီးပွားရေး အကျပ်အတည်းများ ဖြစ်ပွားစေနိုင်သည်ဟု အေပီမှ ဖော်ပြခဲ့သည်။

ထို့အပြင် အဆိုပါ သုံးနိုင်ငံအတွင်း ဘဏ္ဍာရေးနှင့် နိုင်ငံရေး မတည်ငြိမ်မှုများလည်း ပိုမို ဆိုးရွားစေနိုင်သည်ဟု ကျွမ်းကျင်သူများက သုံးသပ်နေကြသည်။ 

အီဂျစ်၊ ဂျော်ဒန်နှင့်် လက်ဘနွန်နိုင်ငံတို့တွင် လူမှုနိုင်ငံရေး တည်ငြိမ်မှုကို ဆုံးရှုံးနိုင်ကြောင်း နိုင်ငံတကာ ငွေကြေး ရန်ပုံငွေအဖွဲ့ (IMF) က စက်တင်ဘာလအတွင်း သတိပေးခဲ့ပြီးနောက် အစ္စရေး-ဟားမာ့စ် ပဋိပက္ခ ဖြစ်ပွားလာချိန် တွင် ထိုနိုင်ငံများ၏ စီးပွားရေးဖိအားများ ပိုမိုမြင့်တက်လာခဲ့သည်။ 

ဟားမာ့စ်တို့က အစ္စရေးကို ဝင်ရောက်တိုက်ခိုက်ခဲ့သည့် အောက်တိုဘာ ၇ ရက် နောက်ပိုင်းတွင် ထိုစစ်ပွဲသည် စီးပွားရေး အကျပ်အတည်းတစ်ခုကို အလွယ်တကူ ဖြစ်ပေါ်စေနိုင်သည်ဟု ဥရောပသမဂ္ဂနှင့် အမေရိကန်သမ္မတ ဂျိုးဘိုင်ဒန် (Joe Biden) တို့က သတိပေးခဲ့သည်။

 အမေရိကန် နိုင်ငံခြားရေး၀န်ကြီး ဘလင်ကင်နဲ့ အမေရိကန် ဘဏ္ဍာရေးဝန်ကြီးကို တွေ့ရစဉ်

ထိုသတိပေးချက်ကို လက်ရှိတွင် ကမ္ဘာ့ခေါင်းဆောင်များနှင့် နိုင်ငံရေး ကျွမ်းကျင်သူများက စတင် လက်ခံလာခဲ့ ကြသည်။ 

အစ္စရေး-ဟားမာ့စ် စစ်ပွဲကြောင့် စီးပွားရေး အကျပ်အတည်းများ ဖြစ်ပွားလာနိုင်သလို ဒေသတွင်းနိုင်ငံများ၏ အစိုးရများ ပြုတ်ကျမည့်အရေးမှ ကာကွယ်ရန် အမေရိကန်အစိုးရအနေနှင့် ထိုပဋိပက္ခကို အဆုံးသတ်ဖို့ လုပ်ဆောင်ရမည် ဖြစ်သည်။

"စီးပွားရေး မတည်ငြိမ်မှု ဖြစ်ပွားလာရင် ဒေသတွင်းက အဖျက်သမားတွေက အဲဒီအခြေအနေကို ပိုပြီးဆိုးရွား အောင် လှုံ့ဆော်ဖို့ လွယ်ကူလာပါလိမ့်မယ်" ဟု အမေရိကန် ဘဏ္ဍာရေးဝန်ကြီးဌာန၏ အရာရှိဟောင်း တစ်ဦး ဖြစ်ပြီး နိုင်ငံတကာ ရှေ့နေတစ်ဦးဖြစ်သူ ခရစ္စတိုဖာ ဆွစ်ဖ် (Christopher Swift) က ပြောကြားခဲ့သည်။

ကမ္ဘာ့ဘဏ် အကြီးအကဲ အာဂျေး ဘန်ဂါ (Ajay Banga) ကလည်း ယခုသီတင်းပတ်အတွင်း ဆော်ဒီနိုင်ငံတွင် ပြုလုပ်ခဲ့သည့် ညီလာခံတစ်ခု၌ အစ္စရေး-ဟားမာ့စ်စစ်ပွဲသည် စီးပွားရေးဖွံ့ဖြိုးတိုးတက်မှုအတွက် အလွန် အန္တရာယ်ရှိစေနိုင်သည်ဟု သတိပေးခဲ့သည်။ 

 ကမ္ဘာ့ဘဏ် အကြီးအကဲ အာဂျေး ဘန်ဂါကို တွေ့ရစဉ်

အထူးသဖြင့် ဂါဇာဒေသရှိ ပါလက်စတိုင်းများနှင့် ဆူဒန်ပြည်တွင်းစစ်ကြောင့် ထွက်ပြေး တိမ်းရှောင်လာသည့် စစ်ဘေးဒုက္ခသည်များအား လက်ခံရဖွယ်ရှိသော အီဂျစ်နိုင်ငံအတွက် စီးပွားရေးဖိအားများကို ဖြေရှင်းရာတွင် ကူညီထောက်ပံ့မှုများ ပိုမိုပေးဆောင်ရန် ဥရောပကောင်စီဥက္ကဋ္ဌ ချားလ်စ် မိုက်ကယ် (Charles Michel) က ပြီးခဲ့သည့် သီတင်းပတ်အတွင်း IMF နှင့် တွေ့ဆုံချိန်တွင် ပြောကြားခဲ့သည်။ 

"အီဂျစ်ကို ထောက်ပံ့ကြစို့။ အီဂျစ်ဟာ ကျနော်တို့ရဲ့ ကူညီထောက်ပံ့မှုကို လိုအပ်ပြီး ကျနော်တို့ကလည်း အီဂျစ်ကို ထောက်ပံ့ဖို့ လိုအပ်ပါတယ်" ဟု မိုက်ကယ်က IMF နှင့် တွေ့ဆုံမှု အပြီးတွင် သတင်းထောက်များကို ပြောကြား ခဲ့သည်။ 

လက်ရှိအချိန်တွင် ဂါဇာကမ်းမြောင် ဒေသအတွင်း ပါလက်စတိုင်း ၁ သန်းကျော်သည် အစ္စရေး၏ လေကြောင်း တိုက်ခိုက်မှုများကြောင့် အိုးမဲ့အိမ်မဲ့ဖြစ်ခဲ့ရပြီး လက်ဘနွန်နှင့် အစ္စရေး နယ်စပ်တွင်လည်း အပြန်အလှန် ပစ်ခတ်တိုက်ခိုက်မှုများ ဖြစ်ပွားနေသဖြင့် စစ်ပွဲသည် ပိုမိုအရှိန်မြင့် လာနိုင်သည်ဟု သုံးသပ်မှုများ ထွက်ပေါ်ခဲ့ သည်။ 

Source: အေပီ

CNI International News

ဘန်ကောက်၊ အောက်တိုဘာ ၂၆

ထိုင်းနိုင်ငံမှ Move Forward ပါတီ (MFP) ခေါင်းဆောင်ဟောင်း ပီတာ လင်မ်ဂျာရွန်ရတ် (Pita Limjaroenrat) သည် အမေရိကန်နိုင်ငံ၊ နယူးယောက်မြို့တွင် လှုပ်ရှားသွားလာနေသည့် ဓာတ်ပုံများ ထွက်ပေါ်လာခဲ့သည်ဟု Thai PBS World မှ ဖော်ပြခဲ့သည်။

လူမြင်ကွင်းကနေ ပျောက်ကွယ်နေသည့် ပီတာသည် ယခုအခါမှာတော့ ပြန်လည်ထွက်ပေါ်လာခြင်းကြောင့် ထိုင်း သတင်းဌာနများက ပီတာ ပြန်လာပြီဟု ဖော်ပြနေကြသည်။

ပီတာသည် ၂၀၁၃ ခုနှစ်အတွက် TIME မဂ္ဂဇင်း၏ ထင်ရှားကျော်ကြားပုဂ္ဂိုလ် အယောက် ၁၀၀ (Time 100 Next) စာရင်းတွင် နောက်ထပ် မျိုးဆက်သစ်အတွက် ခေါင်းဆောင်မှုကဏ္ဍကို အဓိပ္ပာယ်ဖွင့်ဆိုခဲ့သည့် ခေါင်းဆောင် တစ်ဦးအဖြစ် ညစာစားပွဲကို တက်ရောက်ရန် နယူးယောက်မြို့သို့ ရောက်ရှိခဲ့ခြင်း ဖြစ်သည်။

သူသည် စက်တင်ဘာလက MFP ပါတီ ခေါင်းဆောင်အဖြစ်မှ နုတ်ထွက်ခဲ့ပြီးကတည်းက လူမြင်ကွင်းမှ ပျောက်ကွယ်ခဲ့သူ ဖြစ်သည်။ 

ပီတာကို တွေ့ရစဉ်

ပီတာ၏ Instagram အကောင့်တွင် တင်ထားသည့် ဓာတ်ပုံများထဲမှာ နယူးယောက်မြို့၌ ရှိခဲ့သည့်အချိန်က ရိုက်ကူးခဲ့သော ဓာတ်ပုံများကို တင်ထားခဲ့ပြီး ရာနှင့်ချီသည့် like များနှင့် comment များကို မြင်တွေ့ရသည်။

ထိုဓာတ်ပုံများထဲတွင် ပီတာသည် နယူးယောက် မြေအောက်ရထားကို စီးနေပုံ၊ နယူးယောက်မြို့၏ လမ်းပေါ်တွင် တစ်ဦးတည်း လမ်းလျှောက်နေပုံ၊ လမ်းဘေး စားသောက်ဆိုင် တစ်ဆိုင်တွင် အအေးသောက်နေပုံနှင့် Times Square တွင် မတ်တပ်ရပ်နေပုံတို့ ပါဝင်သည်။

ပီတာကို ထောက်ခံသည့် ဖော်လိုဝါများကလည်း ပီတာကို ချစ်ခင်နှစ်သက်သည့် မှတ်ချက်များ ရေးသားခဲ့ကြ သည်။ 

"ခင်ဗျားဟာ ထိုင်းဝန်ကြီးချုပ် မဖြစ်နိုင်ပေမယ့်လည်း ကျနော်တို့ ရင်ထဲက ထာဝရ ဝန်ကြီးချုပ်ပါ၊ နိုင်ငံရေးကို လက်မလျှော့လိုက်ပါနဲ့ ကျနော်တို့ ခင်ဗျားကို အမြဲတမ်း ထောက်ခံသွားမှာပါ" အစရှိသည့်  မှတ်ချက်များကို မြင်တွေ့ရသည်။

ပီတာကို တွေ့ရစဉ်

"သင့်အနေနဲ့ နိုင်ငံရေးလောကထဲက ထွက်ခွာသွားရင်တောင် မော်ဒယ်တစ်ယောက် ဖြစ်နိုင်ပါသေးတယ်" ဟု ပီတာ၏ ပရိသတ်တစ်ဦးက မှတ်ချက်ရေးသားခဲ့သည်။

ပီတာသည် နယူးယောက်တွင် ထိုဓာတ်ပုံများ ရိုက်ကူးရန်အတွက် ထိုင်းဓာတ်ပုံ ဆရာတစ်ဦးကို ငှားရမ်းခဲ့ သည်ဟုလည်း သတင်းများ ထွက်ပေါ်ခဲ့သည်။ 

ထိုဓာတ်ပုံများ ထွက်ပေါ်လာခဲ့ပြီးနောက် ထိုင်းနိုင်ငံ၏ မီဒီယာအားလုံးနီးပါးတွင် ပီတာ၏ ဓာတ်ပုံများနှင့်တကွ "ပီတာ ပြန်လာပြီ" ၊ "သူ့ရဲ့ ဂုဏ်သတင်းကို ပြန်ယူဖို့အတွက် ပီတာ ပြန်လာပြီ" ဟူသည့် သတင်းခေါင်းစဉ်များနှင့် ဖော်ပြခဲ့သည်။ 

Source: Thai PBS World