CNI International News

နယူးဒေလီ၊ မတ်လ ၂၅

အိန္ဒိယ ပင်မအတိုက်အခံပါတီ ခေါင်းဆောင် ရာဟူးဂန္ဒီ (Rahul Gandhi) ကို လွှတ်တော်အဖွဲ့ဝင်အဖြစ်မှ ဖယ်ရှား ခဲ့သည်ဟု အယ်လ်ဂျာဇီးယားသတင်းတွင် ဖော်ပြသည်။ အသရေဖျက်မှုနှင့် ထောင်ဒဏ်နှစ်နှစ် အပြစ်ပေးခံခဲ့ရပြီး နောက် ယခုကဲ့သို့ ဖယ်ရှားခဲ့ခြင်း ဖြစ်သည်။

ပြစ်ဒဏ်ချမှတ်ခံရသောနေ့မှစ၍ ရာဟူးသည် ပါလီမန် အောက်လွှတ်တော် (Lok Sabha) ၏ အဖွဲ့ဝင်တစ်ဦး မဟုတ်တော့ကြောင်း လွှတ်တော်မှ သောကြာနေ့က ထုတ်ပြန်သည့် ကြေညာချက်တစ်စောင်တွင် ဖော်ပြထား သည်။

အဆိုပါ ထုတ်ပြန်ချက်ပြီးထွက်ပေါ်လာသည့် တွစ်တာပို့စ်တစ်ခုတွင် ၎င်းသည် အိန္ဒိယအတွက် တိုက်ခိုက်နေကြောင်းနှင့် မည်သည့်ပေးဆပ်မှုမျိုးကိုမဆို ပြုလုပ်သွားမည်ဟု ရာဟူးက ဟိန္ဒူဘာသာဖြင့် ရေးသားထားသည်။ အသက် ၅၂ နှစ်အရွယ် ဂန္ဒီသည် ၂၀၁၉ အထွေထွေရွေးကောက်ပွဲမတိုင်ခင် ပြောခဲ့သောမိန့်ခွန်းနှင့်ပတ်သက်၍ ယခုကဲ့သို့အပြစ်ပေးခံရခြင်းဖြစ်ပြီး ထိုမိန့်ခွန်း၌ သူခိုးများတွင် မိုဒီဟူသော မျိုးရိုးနာမည်ပါရှိသည်ဟု ၎င်းကပြောခဲ့ ခြင်းဖြစ်သည်။

ပြစ်ဒဏ်အတွက် အထက်တရားရုံးတွင် အယူခံဝင်သွားမည်ဟုလည်း ၎င်း၏ပါတီက ပြောသည်။တရားရုံး အမိန့် တွင် နိုင်ငံရေးဆိုင်ရာ စေ့ဆော်မှုများပါဝင်နေကာ အာဏာရ BJP ပါတီသည် နိုင်ငံရေးပြိုင်ဘက်များကို ပစ်မှတ် ထားနေသည်ဟု ရာဟူး၏ ကွန်ဂရက် (Congress) ပါတီက ပြောခဲ့သည်။

အိန္ဒိယ၏ အတိုက်အခံခေါင်းဆောင် ရာဟူးဂန္ဒီသည် သောကြာနေ့တွင် နယူးဒေလီရှိ လွှတ်တော်မှ ထွက်ခွာသွားစဉ်(ဓါတ်ပုံ- ASSOCIATED PRESS)

ရာဟူးဂန္ဒီ လွှတ်တော်အတွင်း ရှိနေခြင်းထက် ပြည်သူများရှိသော အိန္ဒိယလမ်းမများပေါ်သို့ ရောက်ရှိသွားခြင်းက ပို၍ အန္တရာယ်များသည်ကို အစိုးရအနေဖြင့် မကြာခင်သဘောပေါက်နားလည်သွားလိမ့်မည်ဟုလည်း ကွန်ဂရက် ပါတီက ပြောသည်။ ရာဟူးအား ထောင်ဒဏ်နှစ်နှစ် ပြစ်ဒဏ်ချမှတ်ခဲ့ခြင်းနှင့်ပတ်သက်၍လည်း သောကြာနေ့ အစောပိုင်းတွင် ပါတီဝင်တစ်ချို့က ဆန္ဒပြမှုများ လုပ်ဆောင်ခဲ့သည်။

မိုဒီ (Modi) အစိုးရသည် ဝေဖန်သူများကို အသံတိတ်စေရန် အသရေဖျက်ခြင်း စွဲချက်ကို ကျယ်ကျယ်ပြန့်ပြန့် အသုံးပြုနေသည်ဟု ဝေဖန်ခံထားရသည်။ ရာဟူးသည် မိုဒီ၏ အကြီးဆုံးနိုင်ငံရေးပြိုင်ဘက်ဖြစ်ကာ ဂူဂျာရက် (Gujarat) ပြည်နယ် ပြောစကားနှင့် ပတ်သက်သောစွဲချက်သည် ၎င်း ရင်ဆိုင်နေရသည့် တရားစွဲဆိုမှုများမှ တစ်ခုဖြစ်သည်။

သို့သော် BJP ဘက်က ထိုစွပ်စွဲချက်များကို ငြင်းဆိုကာ ရာဟူး၏ ပြောစကားသည် ဝန်ကြီးချုပ်ကဲ့သို့ မိုဒီဆိုသည့် နာမည်ကို ပိုင်ဆိုင်ထားသည့် အိန္ဒိလူမျိုးများကို စော်ကားမှုသာ ဖြစ်သည်ဟု ပြောသည်။ ရာဟူးက မိုဒီသည် ခရိုနီ အရင်းရှင်ဝါဒကို ကိုင်ဆွဲထားကာ တန်ဖိုးကြီးသော လုပ်ငန်းစာချုပ်များအတွက် စီးပွားလုပ်ငန်းတစ်ချို့ကို မျက်နှာလိုက်ပေးအပ်ခဲ့သည်ဟု စွပ်စွဲခဲ့ကြောင်းလည်း နယူးဒေလီ(New Delhi) ရှိ အယ်ဂျာဇီးယား သတင်း ထောက်က ပြောသည်။

Source:Aljazeera

CNI International News

ဝါရှင်တန်၊ မတ်လ ၂၅

ဒရုန်းတိုက်ခိုက်မှု တစ်ခုတွင် အမေရိကန် ကန်ထရိုက်တာတစ်ဦး သေဆုံးသွားခဲ့ပြီးနောက် ဆီးရီးယားအရှေ့ပိုင်းရှိ အီရန်နှင့် ဆက်စပ်နေသည့် လက်နက်ကိုင်အုပ်စုများကို အမေရိကန်က လေကြောင်းတိုက်ခိုက်မှု ပြုလုပ်ခဲ့သည်ဟု အမေရိကန်ကာကွယ်ရေး အကြီးအကဲမှ ပြောသည်။

ထိုတိုက်ခိုက်မှုကြောင့် အီရန်လိုလားသည့် တိုက်ခိုက်ရေးသမား ၁၄ ဦး သေဆုံးခဲ့သည်ဟု စောင့်ကြည့်ရေးအဖွဲ့က ပြောသည်။

အီရန်လုပ်ဟု အမေရိကန် ထောက်လှမ်းရေးဘက်မှ သတ်မှတ်ထားသော ဒရုန်းတိုက်ခိုက်မှုအပြီး နာရီပိုင်းအကြာ ကြာသပတေးနေ့ညတွင် လေကြောင်းတိုက်ခိုက်မှုကို ပြုလုပ်ခဲ့သည်ဟု အမေရိကန်အရာရှိများက ပြောသည်။

ယခင်တုန်းကလည်း ဆီးရီးယားအရှေ့မြောက်ပိုင်းရှိ အမေရိကန် စစ်စခန်းများ တိုက်ခိုက်ခံခဲ့ရဖူးကြောင်း၊ ထိုတိုက်ခိုက်မှုကို အမေရိကန်ဘက်က လေကြောင်းတိုက်ခိုက်မှုများဖြင့် တုန့်ပြန်ခဲ့ဖူးသည်။

ပြီးခဲ့သည့် သြဂုတ်လတွင် အမေရိကန်သည် ဆီးရီးယားအရှေ့ပိုင်းရှိ နေရာများသို့ ဗုံးကြဲ တိုက်ခိုက်ခဲ့သည်။

ဆီးရီးယားရှိ အမေရိကန် စစ်စခန်းကိုတွေ့ရစဉ်

အီရန်၏ အင်အားကြီး IRCG တပ်ဖွဲ့နှင့် ဆက်စပ်နေသည့် လက်နက်ကိုင်အဖွဲ့များ ရှိနေသည်ဟု အမေရိကန်ဘက် က ကြေညာထားသည်။

ကြာသပတေးနေ့ညက လေကြောင်း တိုက်ခိုက်မှုကို သမ္မတ ဘိုင်ဒန် (Baiden)၏ အမိန့်ဖြင့် လုပ်ဆောင်ခဲ့ခြင်း ဖြစ်သည်။

ယင်းသည် ဆီးရီးယားရှိ ညွှန့်ပေါင်းတပ်ဖွဲ့များကို IRCG နှင့် ဆက်စပ်နေသည့် တပ်ဖွဲ့များက တိုက်ခိုက်ခဲ့မှုများ အပေါ် တုန့်ပြန်မှုဟု အမေရိကန်ကာကွယ်ရေးဝန်ကြီး လွိုက်အော်စတင်က ပြောသည်။

ထိုအဖွဲ့များ အသုံးပြုနေသည့် အဆောက်အဦများကို ပစ်မှတ်ထားသည်ဟုလည်း ၎င်းက ပြောသည်။

ကနေဒါနိုင်ငံ၊ အော့တဝါ (Ottawa) မြို့သို့ သွားစဉ် အမေရိကန် ကန်ထရိုက်တာ သေဆုံးမှုကို ကြားသိခဲ့ရပြီး မိသားစုအတွက် စိတ်မကောင်းဖြစ်မိကြောင်း ဘိုင်ဒန်က ပြောသည်။

အမေရိကန် ဗုံးကြဲတဲ့နေရာကို ညွန်းပြထားစဉ်

အီရန်နှင့် ပဋိပက္ခ မဖြစ်လိုသော်လည်း အမေရိကန်ပြည်သူများ၏ အသက်ကို ကာကွယ်ရန် အဆင်သင့် ပြင်ဆင်ထားသည်ဟု ဘိုင်ဒန်က သတင်းထောက်များကို ပြောခဲ့သည်။

အခြေအနေ တင်းမာမှုများမှာ ဆက်လက် မြင့်တက်လျက်ရှိပြီး သောကြာနေ့ မနက်ပိုင်းတွင် ဆီးရီးယား အရှေ့ မြောက်ပိုင်းရှိ Green Village ဟုခေါ်သော နောက်ထပ် အမေရိကန် စစ်စခန်းတစ်ခု ဒုံးကျည်ဖြင့် တိုက်ခိုက်ခံခဲ့ရသည်ဟု အမေရိကန်အရာရှိများက ပြောသည်။

ထိုတိုက်ခိုက်မှုတွင်တော့ ထိခိုက်ဒဏ်ရာရမှု မရှိခဲ့ပေ။ ဆီးရီးယားသည် အန္တရာယ်များသော ပတ်ဝန်းကျင်တစ်ခု ဖြစ်ကာ ယင်းရှိ နိုင်ငံသားများနှင့် အဆောက်အဦများကို ကာကွယ်နိုင်ရေး ဆောင်ရွက်သွားမည်ဟု အမေရိကန် လုံခြုံရေးကောင်စီ၏ ပြောခွင့်ရပုဂ္ဂိုလ် ဂျွန်ကာဘီ (John Kirby) က CNN နှင့်တွေ့ဆုံစဉ် ပြောကြားခဲ့သည်။

Source: BBC

CNI International News

မော်စကို၊ မတ်လ ၂၅

အမေရိကန်နှင့် ၎င်းမဟာမိတ်များ၏ ရန်လိုသည့် တိုက်ခိုက်မှုများမှ မည်သည့်နိုင်ငံမှ မလွှတ်ကင်းနိုင်ဟု ရုရှား နိုင်ငံခြားရေးဝန်ကြီး ဆာဂျေလာဗရော့ဗ် (Sergey Lavrov) က သောကြာနေ့တွင် Razvedchik မဂ္ဂဇင်းသို့ ပြောခဲ့ကြောင်း တာ့စ်သတင်းတွင် ဖော်ပြသည်။

ယေဘုယျအားဖြင့်ဆိုလျှင် ယနေ့အချိန်တွင် မည်သည့်နိုင်ငံမဆို အမေရိကန်နှင့် နေတိုးအဖွဲ့ဝင်များကြောင့် မလုံခြုံဟု ၎င်းကပြောခြင်းဖြစ်သည်။ ရုရှားမှလွဲ၍ နိုင်ငံပေါင်းများစွာသည် ခြိမ်းခြောက်ခံနေရသည်ဟုလည်း ဆိုသည်။ လက်ရှိ ယူကရိန်း၏အခြေအနေသည် ကမ္ဘာကြီးအား လွှမ်းမိုးရေးအတွက် မတူကွဲပြားသော ကမ္ဘာ့ အခင်းအကျင်းမှ ကိုယ်ပိုင်ပေါ်ထွက်လာမှုဆိုင်ရာ ကွဲလွဲမှုဖြစ်သည်ဟု လာဗရော့ဗ်က ပြောသည်။

၎င်းတို့တွင် အင်ဒို-ပစိဖိတ် မဟာဗျူဟာများ၏ အစိတ်အပိုင်းတစ်ခုအဖြစ် တရုတ်အားဟန့်တားရေး မဟာဗျူဟာ မြောက်လုပ်ငန်းစဉ်တစ်ခုပင် သတ်မှတ်ထားကြောင်းလည်း ရုရှားဝန်ကြီးက ပြောသည်။ ဘယ်လာရုစ်နှင့်ကျူးဘားတို့အပါအဝင် အချုပ်အခြာအာဏာပိုင်နိုင်ငံများ၏ ပြည်တွင်းရေး ကိစ္စများကို အနောက်အုပ်စု၏ ရက်စက် ကြမ်းကြုတ်သော ပါဝင်စွက်ဖက်မှုများကိုလည်း ၎င်းက ပြစ်တင် ပြောဆိုသွားခဲ့သည်။

လစ်သူယေးနီးယားတွင် နေတိုးတပ်များကို တွေ့ရစဉ်

အဆိုးရွားဆုံး ကိုလိုနီအလေ့အထများဖြင့် အမေရိကန်နှင့် ၎င်းတို့အား ထောက်ခံသူများသည် ကမ္ဘာကြီးအား ဒီမိုကရေစီနှင့် အာဏာရှင်နိုင်ငံများဟူ၍ ခွဲခြားရန် ကြိုးပမ်းနေကြောင်း နိုင်ငံခြားရေးဝန်ကြီးက ပြောသည်။

ဥရောပအား ဥယျာဉ်ဟုသတ်မှတ်ကာ ကျန်ကမ္ဘာ့အစိတ်အပိုင်းများကို တောတွင်းဟု သုံးနှုန်းခဲ့သည့် အီးယူ သံတမန်ရေးရာအကြီးအကဲ ဂျိုးဆပ်ဘော်ရယ်(Josep Borrell) ၏ ခွဲခြားသော ထုတ်ပြန်ချက်ကိုလည်း လာဗရော့ဗ် က ပြင်းပြင်းထန်ထန် ဝေဖန်ခဲ့သည်။

Source:တာ့စ်သတင်းဌာန

CNI International News

၂၀၂၃ ခုနှစ်၊ မတ်လ ၂၄

အမေရိကန်နိုင်ငံခြားရေးဝန်ကြီး အန်တိုနီ ဘလင်ကင်(Antony Blinken)၏ ဗုဒ္ဓဟူးနေ့က ပြုလုပ်ခဲ့သည့် နိုင်ငံခြား ဆက်ဆံရေးကော်မတီ လွှတ်တော်ကြားနာမှုကို ငြိမ်းချမ်းရေး လှုပ်ရှားသူများက ဆန္ဒပြခဲ့ကြသည်။

ဆန္ဒပြသူများက တခြားနိုင်ငံများသို့ ပိုမိုကောင်းမွန်သော နိုင်ငံခြားရေးမူဝါဒများပါရှိသော သံတမန်ရေးကို ကျင့်သုံးရန် အမေရိကန်နိုင်ငံရေးသမားများကို တိုက်တွန်းသည့် စာတန်းများ၊ ဆိုင်းဘုတ်များ ကိုင်ဆောင်ခဲ့ကြသည်။

“တွေ့ဆုံညှိနှိုင်းမှုတွေ စတင်ရမည်။ တရုတ်၏ အဆိုပြုချက်ကို လက်မခံလျှင် ခင်ဗျားတို့ ကိုယ်ပိုင် အဆိုပြုချက်ကို ဘာလို့ မလုပ်တာလဲ”ဟု ငြိမ်းချမ်းရေးတက်ကြွလှုပ်ရှားသူ မီဒီယာ ဘန်ဂျမင် (Medea Benjamin) က ပြောသည်။

အမေရိကန်၏ နိုင်ငံခြားရေးမူဝါဒအပေါ် ငြိမ်းချမ်းရေးလှုပ်ရှားသူများ ဆန္ဒပြနေကြစဉ်

၎င်းသည် “ ယူကရိန်း ငြိမ်းချမ်းရေး ဆွေးနွေးပွဲ ချက်ချင်းစ” ဆိုသည့် ဆိုင်းဘုတ်ကို ကိုင်ဆောင်ထားပြီး ဘလင်ကင်က ရုရှား၏ ခြိမ်းခြောက်မှုနှင့် တရုတ်ဘက်မှ စိန်ခေါ်မှုများအကြောင်းကို ထပ်ခါထပ်ခါ ပြောဆိုနေချိန်တွင် မေးခွန်းထုတ်ခဲ့ခြင်း ဖြစ်သည်။

တရုတ်အစိုးသည် ၎င်းတို့၏ နိုင်ငံခြားရေး အဖြေရှာရေး စီမံကိန်းဖြင့် ရုရှားနှင့်ယူကရိန်းတို့အကြား ငြိမ်းချမ်းရေး ဆွေးနွေး ပွဲများအတွက် အခြေအနေများကို ဖန်တီးရန် နိုင်ငံတကာ အသိုင်းအဝိုင်းကို တောင်းဆိုမှု လုပ်ဆောင်ထားသည်။

တခြားသော ဆန္ဒပြသူများကလည်း ဘလင်ကင်ကို ရဲအစောင့်အရှောက်ဖြင့် မထွက်ခွာခင် ပါလက်စတိုင်း၊ ကျူးဘားနှင့် ဗင်နီဇွဲလား နိုင်ငံများသို့ မျှတသော သံတမန် ဆက်ဆံရေးထားရှိရန် တောင်းဆိုခဲ့ကြသည်။

Source: CGTN/PandaPaws

CNI International News

မော်စကို၊ မတ်လ ၂၄

ရုရှားနိုင်ငံ၏ ထိပ်သီး လုံခြုံရေးအရာရှိတစ်ဦးဖြစ်သူ ဒီမီထရီ မက်ဗီဒက်ဗ်က နျူကလီးယားစစ်ပွဲ ဖြစ်နိုင်ခြေ မြင့်လာမှုနှင့်ပတ်သက်၍ ကြာသပတေးနေ့တွင် သတိပေးခဲ့သည်။

ထို့နောက် ပူတင်အား ဖမ်းဆီးရန် ခြိမ်းခြောက်ခဲ့သည့် ဂျာမနီဝန်ကြီးတစ်ဦးကိုလည်း ပြစ်တင်ဝေဖန်ခဲ့သည်ဟု အေပီ သတင်းတွင် ဖော်ပြသည်။

ဂျာမနီဝန်ကြီး၏ လုပ်ရပ်သည် ရုရှားနှင့်ဂျာမနီ စစ်ဖြစ်သည်အထိ အခြေအနေ ဆိုးရွားနိုင်ကြောင်းလည်း ၎င်းက ပြောသည်။

အနောက်အုပ်စုနှင့် ရုရှား၏ ဆက်ဆံရေးသည် သမိုင်းတစ်လျှောက် အဆိုးရွားဆုံး အခြေအနေတွင် ရှိနေသည်ဟု ဒီမီထရီ မက်ဗီဒက်ဗ်က သတင်းထောက်များကို ပြောခဲ့သည်။

မက်ဗီဒက်ဗ်သည် ရုရှားလုံခြုံရေးကောင်စီ၏ လက်ထောက် အတွင်းရေးမှူး ဖြစ်သည်။

နျူကလီးယားစစ်ပွဲ ဖြစ်လာနိုင်ခြေနှင့် ပတ်သက်၍ မေးမြန်းခဲ့ရာတွင်လည်း ထိုအန္တရာယ်များ လျော့ပါးမသွားဘဲ တိုးလာကြောင်း၊ အနောက်အုပ်စုမှ ယူကရိန်းကို လက်နက် ထောက်ပံ့လေ ဖြစ်လာနိုင်ခြေ မြင့်တက်လာလေ ဖြစ်သည်ဟု ၎င်းက ပြောသည်။

ဘိုင်ဒန်နဲ့ ဥရောပခေါင်းဆောင်များကိုတွေ့ရစဉ်

မက်ဗီဒက်ဗ်သည် အတိတ်တွင်လည်း ထိုသို့ ပြင်းထန်သော စကားလုံးများဖြင့် အနောက်အုပ်စုအား ဝေဖန်ခဲ့ဖူးသူ ဖြစ်သည်။

အမေရိကန်နှင့် နေတိုးမဟာမိတ်များသည် ရုရှားအား ဖျက်ဆီးရန် ကြိုးပမ်းနေသည်ဟု ၎င်းက ပြောခဲ့ဖူးသည်။

မက်ဗီဒက်ဗ်သည် တစ်ချိန်တုန်းက အနောက်အုပ်စု ကမ္ဘာတွင် ဆက်ဆံရေး ပျော့ပြောင်းသူအဖြစ် ချီးကျူးခံခဲ့ရဖူးသူ ဖြစ်သော်လည်း ၎င်းက အခြေအနေမှာ သိသိသာသာ ပြောင်းလဲလာသည်။

ကြာသပတေးနေ့က သတင်းထောက်များနှင့် တွေ့ဆုံမှုတွင် မက်ဗီဒက်ဗ်သည် ယူကရိန်းတွင် ကလေးများ သေဆုံးမှု အပါအဝင် စွဲချက်များနှင့် ပတ်သက်၍ ပူတင်အား ဖမ်းဆီးရန် ဝရမ်းထုတ်ခဲ့သည့် နိုင်ငံတကာ ရာဇဝတ်မှု တရားရုံး၏ လုပ်ရပ်နှင့်ပတ်သက်၍လည်း ပြစ်တင် ဝေဖန်ခဲ့သည်။

တရားရုံး၏ လုပ်ရပ်က ဆိုးရွားသော အနောက်အုပ်စုနှင့် ရုရှားတို့၏ ဆက်ဆံရေးကို ပိုမိုဆိုးရွား လာစေခဲ့သည်ဟု ၎င်းက ပြောသည်။ မက်ဗီဒက်ဗ်၏ ပြောစကားသည် ဂျာမနီ တရားရေးဝန်ကြီး မာကို ဘွတ်ရှ်မန်း (Marco Buschmann) အား အဓိကရည်ရွယ်ချင်း ဖြစ်သည်။

ရုရှား၏ နျူကလီးယားထိပ်ဖူးကိုတွေ့ရစဉ်

ပူတင်အနေဖြင့် ဂျာမနီသို့ လာရောက်ခဲ့မည်ဆိုလျှင် ICC ဝရမ်းအရ ၎င်းကို ဖမ်းဆီးသွားမည်ဟု ပြီးခဲ့သည့် သီတင်းပတ်တွင် ပြောခဲ့သည်။

နျူကလီးယား ပိုင်ဆိုသည့် နိုင်ငံမှ ခေါင်းဆောင်တစ်ဦး ဂျာမနီကို သွားရောက်လည်ပတ်ပြီး ဖမ်းဆီးခံရသည့် အခြေအနေကို စဉ်းစားကြည့်ပါဦး၊ ဒါက ရုရှားကို စစ်ကြေညာခြင်းမျိုးပင် ဖြစ်သည်ဟု မက်ဗီဒက်ဗ်က ပြောသည်။

ထိုသို့ ဖြစ်လာမည်ဆိုလျှင် ရုရှားအနေဖြင့် ဂျာမနီဝန်ကြီးချုပ်ရုံးခန်းမှစ၍ လေကြောင်း တိုက်ခိုက်မှုများ လုပ် ဆောင် သွားမည်ဟုလည်း ၎င်းက ပြောသည်။

ရုရှား၏ နျူကလီးယား အင်အားသည် ယူကရိန်းစစ်ပွဲတွင် ရုရှားအတွက် ကြီးမားသော အထောက်အပံ့ ဖြစ်စေကြောင်း၊ နျူကလီးယား အင်အားကြောင့်သာ ရုရှားနိုင်ငံ မပျက်စီးရခြင်းဖြစ်ကြောင်း ၎င်းက ပြောခဲ့သည်။

Source: AP

CNI International News

ဝါရှင်တန်၊ မတ်လ ၂၄

နျူကလီးယား အစိတ်အပိုင်းများ ပါဝင်သည်ဟု ရုရှားဘက်မှ ယူဆထားသော ခဲယမ်းများကို ယူကရိန်းသို့ ထောက်ပံ့ သွားမည်ဖြစ်ကြောင်း ဗြိတိန်က ကြေညာခဲ့ပြီးနောက် ယူကရိန်းပဋိပက္ခသည် ပိုမိုပြင်းထန်လာလိမ့် မည်ဟု ရုရှားဘက်ကနေ သတိပေးခဲ့ကြောင်း အေပီသတင်းတွင် ဖော်ပြထားသည်။

အဆင့်နိမ့် ယူရေနီယမ် (depleted uranium-DU) များ ပါဝင်သည့် သံချပ်ကာဖောက် ကျည်ဆန်များကို ယူကရိန်း သို့ ထောက်ပံ့သွားမည်ဖြစ်ကြောင်း ဗြိတိန်ကာကွယ်ရေးဌာနက တနင်္လာနေ့တွင် အတည်ပြု ပြောဆိုခဲ့သည်။

ထိုကျည်များကို စစ်အေးတိုက်ပွဲအတွင်း ရုရှားတင့်ကားများကို ဖျက်ဆီးရန် အမေရိကန်တို့က အသုံးပြုခဲ့သည်။

ယင်းတို့တွင် လက်ရှိ ယူကရိန်းစစ်ပွဲတွင် ရုရှားတို့ အသုံးပြုနေသော T-72 တင့်ကားများလည်း ပါဝင်သည်။

DU များသည် နျူကလီးယား လက်နက် ဖန်တီးရန် လိုအပ်သော ယူရေနီယမ် သန့်စင်မှု လုပ်ငန်းစဉ်မှ ထွက်ပေါ်လာသည့် ဆင့်ပွားအရာတစ်ခု ဖြစ်သည်။

သံချပ်ကာဖျက် ကျည်ဆန်ကိုတွေ့ရစဉ်

ထိုကျည်များတွင် ရေဒီယို သတ္တိကြွ စွမ်းရည် ရှိသော်လည်း ယင်းတို့သည် နျူကလီးယားဗုံးများကဲ့သို့ နျူကလီးယား စွမ်းရည်မရှိကြောင်း နျူကလီးယားအရေး ကျွမ်းကျင်သူတစ်ဦးက ပြောသည်။

မည်သို့ပင်ဆိုစေကာမှု ထိုအချက်သည်ပင် ယင်းသို့သော လက်နက်များကြောင့် ပဋိပက္ခပိုမို ဆိုးရွားလာစေမည် ဆိုသည့် ရုရှားတို့၏ ခြိမ်းခြောက် သတိပေးမှုကို ရပ်တန့်နိုင်ခြင်း မရှိပေ။

ယူကရိန်းစစ်ပွဲသည် နျူကလီးယားစစ်ပွဲ အဆင့်သို့ ရောက်ရှိလာနိုင်သည်ဟုလည်း ရုရှားဘက်က သတိပေးခဲ့ဖူးသည်။ ဗြိတိန်မှ ပေးပို့မည့် ခဲယမ်းမျးသည် နျူကလီးယား လက်နက် မဟုတ်သည့်တိုင် အန္တရာယ်ပေးနိုင်ခြေ ရှိသည်။

ထို့နောက် အမေရိကန်နှင့် ဗြိတန်တို့ဘက်မှ ရုရှား၏ စွပ်စွဲချက်များကို ငြင်းဆိုထားသည်။

DU များသည် နျူကလီးယား လောင်စာနှင့် လက်နက်များကို ထုတ်လုပ်ရန် အသုံးပြုသည့် ယူရေနီယမ်ကို ဖန်တီး ရာမှ ထွက်ပေါ်လာသည့် ဆင့်ပွားအရာများ ဖြစ်သည်။

ယင်းတို့သည် သန့်စင်ယူရေနီယမ်ထက် အားပျော့၍ နျူကလီးယား တုန့်ပြန်မှု ပေါ်ပေါက်နိုင်ခြေ မရှိသော်လည်း DU များသည် ခဲထက် ပိုလေးသည်။ ယင်းက ကျည်ဖူးပြုလုပ်ရန် စွဲဆောင်နိုင်သော အရာလည်း ဖြစ်သည်။

ရုရှား သမ္မတ ပူတင်ကိုတွေ့ရစဉ်

အရမ်းလေးသည့်အတွက် အားကောင်းသည့် အရှိန်အဟုန်ကို ဖြစ်စေပြီး သံချပ်ကာကို ဖောက်နိုင်ကြောင်း၊ ယင်းမှ ထွက်သည့်အပူက မီးလောင်မှုကို ဖြစ်စေကြောင်း နျူကလီးယားပညာရှင်က ပြောသည်။

အမေရိကန်သည် ၁၉၇၀ နှစ်များတွင် DU များကိုသုံးကာ သံချပ်ကာဖျက် ကျည်များကို စတင်အသုံးပြုခဲ့ပြီး စွမ်းရည်ကို မြှင့်တင်ရန် တင့်ကားများတွင်လည်း ထည့်သွင်းခဲ့သည်။

တင့်ဖျက် လက်နက်ဟု ထင်ရှားသည့် A-10 လေယာဉ်များတွင်လည်း DU ကျည်များကို အသုံးပြုသည်။ အမေရိကန် စစ်တပ်သည် M1A2 Abram တင့်ကားအတွက် M829A4 တင့်ဖျက် ကျည်များအပြင် DU ခဲယမ်းများကို အသုံးပြုနေဆဲ ဖြစ်သည်။

အနောက်အုပ်စုမှ နျူကလီးယား ပါဝင်မှုရှိသော လက်နက်များကို အသုံးပြုလာမည်ဆိုလျှင် ရုရှားအနေဖြင့်လည်း ထိုလက်နက်နှင့် တူညီသည့် စွမ်းရည်ရှိသော လက်နက်များကို အသုံးပြုသွားမည်ဟု ရုရှားသမ္မတက အင်္ဂါနေ့တွင် သတိပေးခဲ့သည်။

Source: AP

CNI International News

ပဲရစ်၊ မတ်လ ၂၄

လာမည့် သီတင်းပတ်တွင် တစ်နိုင်ငံလုံးအတိုင်းအတာဖြင့် သပိတ်မှောက်မှုများနှင့် ဆန္ဒပြမှုများလုပ်ဆောင် သွားရန် ပြင်သစ်သမဂ္ဂများက တောင်းဆိုခဲ့သည်ဟု အေပီသတင်းတွင် ဖော်ပြသည်။

ကြာသပတေးနေ့တွင် လူကြိုက်နည်းသည့် ပင်စင်ပြုပြင်ပြောင်းလဲမှုများနှင့်ပတ်သက်၍ နိုင်ငံတွင်း လူ ၁ သန်း ကျော်က ဆန့်ကျင်ဆန္ဒပြခဲ့ကာ လာမည့် သီတင်းပတ်ဆန္ဒပြပွဲများက ချားလ်ဘုရင် ၃ ၏ ပြင်သစ်ခရီးစဉ်နှင့်လည်း တိုက်ဆိုင်နေသည်။

အကြမ်းဖက်မှုများရှိခဲ့သော ပဲရစ်(Paris) မြို့မှ ပင်စင်မူဝါဒပြုပြင်ပြောင်းလဲရေးဆိုင်ရာ ဆန္ဒပြပွဲများအတွင်း လူပေါင်း ၁၁၉၀၀၀ အထိ စံချိန်တင်ပါဝင်ခဲ့သည်ဟု ပြင်သစ်ပြည်ထဲရေးဝန်ကြီးက ပြောသည်။ စစ်တမ်း ကောက်ယူမှုများအရ ပြင်သစ်အများစုသည် သမ္မတ အီမန်နွယ် မက်ခရွန် (Emmanuel Macron)၏ အနားယူ ရမည့် သက်တမ်းတိုးမြှင့်မှုအပေါ် ကန့်ကွက်ကြသည်ကို တွေ့ခဲ့ရကြောင်း ၎င်းက ဆိုသည်။

ပါဝင်သူ အရေအတွက် မြင့်တက်လာခြင်းကြောင့် လာမည့် အင်္ဂါနေ့တွင်လည်း ဆန္ဒပြမှုများ သပိတ်မှောက်မှု များကို လုပ်ဆောင်ကြရန် သမဂ္ဂများက တောင်းဆိုခဲ့သည်။ ထိုနေ့တွင် ဗြိတိန်ဘုရင်ကြီးသည် ပြင်သစ်ခရီးစဉ်၏ ဒုတိယနေ့အဖြစ် ဘော်ဒိုးမြို့သို့ လာရောက်ရန် စီစဉ်ထားသည်။ တရားမဝင် ဆန္ဒပြပွဲတစ်ခုမှ အဖွဲ့ဝင်တစ်ဦးသည် ကြာသပတေးနေ့ ညနေပိုင်းတွင် ဘော်ဒိုး (Bordeaux) မြို့ မြို့တော်ခန်းမ၏ သစ်သားတံခါးကြီးအား မီးတင်ရှို့ ခဲ့သည်ဟုလည်း Sud Ouest သတင်းစာတွင် ဖော်ပြထားသည်။

ပဲရစ်မြို့တွင် စုဝေးချီတက်ဆန္ဒပြခဲ့ကြစဉ်(ဓါတ်ပုံ-အေပီ)

တစ်နိုင်ငံလုံး အတိုင်းအတာဖြင့် လူပေါင်း ၁ သန်းကျော်သည် ကြာသပတေးနေ့ ဆန္ဒပြချီတက်မှုများတွင် ပါဝင် ခဲ့သည်ဟုလည်း ပြည်ထဲရေးဌာနက ပြောသည်။ အကြမ်းဖက်မှုများရှိနေသော်လည်း ပြည်ထဲရေးဝန်ကြီး ဂျာရယ် ဒါမာနင် (Gerald Darmanin) က လုံခြုံရေးအတွက် မည်သည့်ပြဿနာမှ မရှိဟု အာမခံကာ ဗြိတိန်ဘုရင်ကို ကြိုဆိုသွားမည်ဟု ပြောခဲ့သည်။ မက်ခရွန်က ပင်စင်ဥပဒေမှုကြမ်းနှင့်ပတ်သက်သည့် ခိုင်မာသောရပ်တည်ချက်ကို ပြသခြင်းဖြင့် ဝေဖန်သူများကို ပိုမိုဒေါသထွက်စေခဲ့ပြီးနောက် တစ်နေ့တွင် ထိုသို့ ဆန္ဒပြပွဲကြီးများ ပေါ်ပေါက် လာရခြင်းဖြစ်သည်။

သီတင်းပတ်ကုန်ပိုင်းတွင် မိမိတို့အစီအစဉ်ဖြင့် ဆန္ဒပြပွဲများပြုလုပ်ပြီး အင်္ဂါနေ့တွင် တစ်နိုင်ငံလုံး အတိုင်းအတာဖြင့် ဆန့်ကျင့်ကန့်ကွက်မှု လုပ်ဆောင်သွားရန် ပင်စင်မူဝါဒပြောင်းလဲမှုကို ဆန့်ကျင်နေသည့် သမဂ္ဂအဖွဲ့ရှစ်ခုမှ ထုတ်ပြန်သောကြေညာချက်တွင် ဖော်ပြထားသည်။

ဆန္ဒပြသူများသည် ပြင်သစ်ရှိ Charles de Gaulle လေဆိပ် နှင့် ဆိပ်ကမ်းများကို ပိတ်ဆို့ထားခြင်းကြောင့် ခရီးသွားလာမှု အခက်အခဲများလည်းပေါ်ပေါက်ခဲ့သည်။ ပြင်သစ်တွင် မျက်နှာဖုံးစွပ် ဆန္ဒပြအုပ်စုများက အသင့်စားစားသောက်ဆိုင်နှစ်ခု၊ စူပါမားကတ်တစ်ခုနှင့် ဘဏ် တစ်ခုတို့ကို တိုက်ခိုက်ခဲ့ပြီး ယင်းက အကြမ်းဖက်မှုများမြင့်တက်လာသည့်သဘောဖြစ်ရုံသာမက ငြိမ်းချမ်းစွာ ဆန္ဒပြသူများထက်ပို၍ အာရုံစိုက်စရာဖြစ်ခဲ့သည်။

Source:AP

CNI International News

နယူးဒေလီ၊ မတ်လ ၂၄

သူခိုးတိုင်း၏နာမည်တွင် မိုဒီပါသည်ဆိုသော စကားကြောင့် မိုဒီ၏ အိန္ဒိယအတိုက်အခံ ခေါင်းဆောင် ရာဟူးဂန္ဒီ (Rahul Gandhi)ကို အသရေဖျက်မှုဖြင့် ထောင်ဒဏ် ၂ နှစ် ပြစ်ဒဏ်ချမှတ်ခဲ့သည်ဟု ဘီဘီစီ အင်္ဂလိပ်ပိုင်း သတင်းတွင် ဖော်ပြထား သည်။

ဝန်ကြီးချုပ် နာရန်ဒရာမိုဒီ (Narendra Modi) ၏ မျိုးရိုးနာမည်နှင့် ပတ်သက်၍ ရာဟူးဂန္ဒီသည် ရွေးကောက်ပွဲ ဆိုင်ရာ လူထုစုဝေးပွဲ တစ်ခုတွင် ထည့်သွင်း ပြောဆိုခဲ့သည့်အတွက် ဂူဂျာရတ် (Gujarat) ပြည်နယ်တရားရုံး တစ်ခုက ပြစ်ဒဏ် ချမှတ်ခဲ့ခြင်း ဖြစ်သည်။

ရာဟူးဂန္ဒီသည် ပြစ်ဒဏ်အတွက် ရက် ၃၀ အာမခံရရှိကာ အယူခံဝင်မည် ဖြစ်သည်။

၎င်းသည် အစိုးရ၏ မကောင်းမှုများကို ဖော်ထုတ်မိမှုကြောင့် ပစ်မှတ်ထား ခံခဲ့ရသည်ဟု ကွန်ဂရက်ပါတီက ပြော သည်။ အိန္ဒိယတွင် ရွေးကောက်ပွဲကို လာမည့်နှစ်တွင် ကျင်းပသွားမည်ဖြစ်သည်။

ပြစ်ဒဏ်သည် တရားဥပဒေအရ ခိုင်လုံမှုမရှိကြောင်း ကွန်ဂရက်ပါတီ၏ ပြောခွင့်ရပုဂ္ဂိုလ်က ပြောခဲ့သလို ပြစ်ဒဏ် အပေါ် နှုတ်ဆိတ်မနေရန်လည်း တိုက်တွန်းခဲ့သည်။

၂၀၁၉ ခုနှစ်၊ ဧပြီလက ကာနာတာကာ (Karnataka) ပြည်နယ်မှ လူထုစုဝေးပွဲ တစ်ခု၌ စကားပြောခဲ့ရာတွင် ရာဟူးက နီယတ်ဗ်မိုဒီ၊ လာလစ်မိုဒီနှင့် နာရန်ဒရာမိုဒီ အစရှိသည်ဖြင့် သူခိုးများ၏ နာမည်တွင် ဘာကြောင့် မိုဒီ ပါဝင်နေရပါသလဲဟု ပြောခဲ့သည်။

မိုဒီမျက်နှာကို တပ်ထားသော လူအုပ်ကြီးကိုတွေ့ရစဉ်

နီယတ်ဗ် မိုဒီ (Nirav Modi) သည် ဝရမ်းပြေး စိန်လုပ်ငန်းရှင် တစ်ဦးဖြစ်ကာ လာလစ် မိုဒီ (Lalit Modi) သည် ခရစ်ကတ် ဘုတ်အဖွဲ့မှ တစ်သက်တာ ပွဲပယ်ထားသည့် အိန္ဒိယပရီးမီးယားလိဂ် အကြီးအကဲဟောင်း ဖြစ်သည်။

ထိုပြောစကားသည် အကျင့်ပျက် ခြစားမှုများကို ဦးစားပေး ပြောဆိုခြင်း မဖြစ်သလို မည်သူ တစ်ဦးတစ်ယောက်ကို မှ တိုက်ရိုက်စော်ကားခြင်း မဟုတ်ဟု ရာဟူးဂန္ဒီက ပြောသည်။

အိန္ဒိယအစိုးရအား ဝေဖန်သည်ဟု ယူဆခံထားရသည့် တခြားသော အတိုက်အခံ နိုင်ငံရေးသမားများနှင့် အဖွဲ့စည်း များသည်လည်း တရားစွဲဆိုမှုများနှင့် ရင်ဆိုင်ခဲ့ရသည်။

အရေးပါသည့် အဖွဲ့ဝင်နှစ်ဦး ဖမ်းဆီးခံထားရသော AAP ပါတီကလည်း ဂန္ဒီအား ထောက်ခံကြောင်း ပြောသည်။

ဂန္ဒီအား အပစ်ပေးခဲ့သည့် အမှုကို BJP လွှတ်တော် အမတ်တစ်ဦးဖြစ်သူ ပါနက်ရှ် မိုဒီ (Purnesh Modi) က တိုင်ကြားခဲ့ခြင်းဖြစ်ကာ ရာဟူးသည် မိုဒီ အသိုင်းအဝိုင်း တစ်ခုလုံးကို စော်ကားသည့်စကား ပြောဆိုခဲ့သည်ဟု ပြောသည်။

သို့သော် ဆူရတ် (Surat) မြို့ တရားရုံးမှ ချမှတ်ခဲ့သော အမိန့်က ဥပဒေပညာရှင်တစ်ချို့ကို ပဟေဋိဖြစ်စေခဲ့သည်။

မျိုးရိုးနားမည်နှင့် ပတ်သက်သည့် ညွှန်းဆိုမှုတွင် တစ်စုံတစ်ယောက်ဘက်မှ ၎င်းတို့ပေါ် တိုက်ရိုက် သက်ရောက်မှု ရှိသည်ဟု မဖော်ပြနိုင်မခြင်း တရားဥပဒေအရ အရေးယူ၍မရဟု ဥပဒေပညာရှင်တစ်ဦးက ပြောသည်။

ရာဟူးအား ပြစ်ဒဏ် ချမှတ်ခဲ့ခြင်းနှင့် ပတ်သက်၍ အချက်လေးချက်ကို ကိုးကားကာ ခုခံကာကွယ်သွားမည်ဟု သူ၏ရှေ့နေ့က ဘီဘီစီသတင်းကို ပြောခဲ့သည်။

Source: BBC

CNI International News

ဒီမာပူရ်၊ မတ်လ ၂၃

အိန္ဒိယဗဟိုအစိုးရနှင့် အပစ်အခတ်ရပ်စဲရေး သဘောတူညီချက် လက်မှတ်ရေးထိုးထားသည့် နာဂလက်နက်ကိုင် အဖွဲ့ NSCN-IM က အိန္ဒိယအစိုးရသည် အခြေခံမူဘောင် ရှေ့ဆက်ရေးကို အလေးအနက်မထားကြောင်း စွပ်စွဲခဲ့ သည်။

ထို့နောက် အဆိုပါ လုပ်ရပ်က နာဂငြိမ်းချမ်းရေး လုပ်ငန်းစဉ်ကို ဟာသဖြစ်စေသည်ဟု ပြောခဲ့သည်။

အိန္ဒိယဗဟိုအစိုးရနှင့် NSCN-IM တို့၏ ဆွေးနွေးပွဲများသည် လေကြီးလေကျယ် ပြောသော်လည်း လေးနက်မှု မရှိကြောင်း အဖွဲ့၏ ဥက္ကဋ္ဌဖြစ်သူ Q Tuccu က ဟီဘရွမ်ရုံးချုပ်မှာ ပြောကြားခဲ့သည်။

ထိုအခြေအနေကြောင့် အဖွဲ့အနေဖြင့် အိန္ဒိယအစိုးရသည် ၎င်းတို့နိုင်ငံ ပြည်တွင်း အရင်းအမြစ်အားလုံးဖြင့် နာဂများအား တရားမဝင် နည်းလမ်းများဖြင့် တိုက်ခိုက်ရန် စီစဉ်နေသည်ဟု နားလည် သဘောပေါက်စေသည်။

ထို့ကြောင့် NSCN-IM ဘက်တွင် ယုံကြည်ချက် လျော့နည်းလာသည်ဟုလည်း ၎င်းက ပြောသည်။

NSCN-IM တပ်ဖွဲ့ကိုတွေ့ရစဉ်

NSCN-IM သည် အိန္ဒိယဗဟိုအစိုးရနှင့် နာဂငြိမ်းချမ်းရေး ဆွေးနွေးပွဲများကို ၁၉၉၇ ခုနှစ်မှ စတင်၍ အခြေခံစေ့စပ် ညှိနှိုင်းသူ အဖြစ် ဆောင်ရွက်ခဲ့ကာ ၂၀၁၅ ခုနှစ်၊သြဂုတ် ၃ ရက်တွင် မူဘောင် သဘောတူညီချက်၌ လက်မှတ်ရေး ထိုးခဲ့သည်။

သို့သော် နောက်ဆုံး အဖြေကိုတော့ ရရှိခြင်း မရှိသေးပေ။ အိန္ဒိယဗဟိုအစိုးရသည် ငြိမ်းချမ်းရေး ဆွေးနွေးပွဲများကို ဆောင်ရွက်နေသော်လည်း NSCN-IM သည် ဆွေးနွေးပွဲများကို ကတိ၊ ခံယူချက်တို့ဖြင့် ရှေ့ဆက်လျက် ရှိသည်ဟု အဖွဲ့ဥက္ကဋ္ဌက ပြောသည်။

နာဂသမိုင်းနှင့် နိုင်ငံရေး အခွင့်အရေးကို ကာကွယ်ရေးထက် မည်သည့် စွန့်လွှတ် အနစ်နာခံမှုမှ မမြင့်မြတ်ဟု ၎င်းက ပြောသည်။

အိန္ဒိအစိုးရအတွက် အတူတကွ လုပ်ဆောင်ရန်၊ ယခင်အတိုင်း ပြန်ဖြစ်ရန် လိုအပ်ကြောင်း၊ ပေးထားသော ကတိ များသည် ယခင်နှင့်ယခု ပုံမှန်မဟုတ်သည့် အခြေအနေများကြောင့် မူဘောင် သဘောတူညီချက်၏ အခြေအနေ သည် မတည်မငြိမ် ဖြစ်နေကြောင်း NSCN-IM ခေါင်းဆောင်က ပြောသည်။

 နာဂအလံကို ကိုင်ထားတဲ့ NSCN-IM ရဲဘော်ကိုတွေ့ရစဉ်

အိန္ဒိယဗဟိုအစိုးရသည် NSCN-IM ၏ နာဂများအတွက် သီးခြားအလံ တစ်ခုနှင့် ဖွဲ့စည်းပုံအခြေခံဥပဒေ တစ်ခုပေး ရန် စဉ်ဆက်မပြတ် တောင်းဆိုမှုကို ငြင်းဆိုထားသည်။

ယင်းက အရှေ့မြောက်ပိုင်းဒေသ၏ အရှည်ကြာဆုံး ပုန်ကန်မှု ပြဿနာများမှ တစ်ခုကို အဆုံးသတ် အဖြေရှာရေး နည်းလမ်းအတွက် အဟန့်အတား ဖြစ်စေလျက်ရှိသည်။

Source: East Mojo