CNI International News

ဝါဆော၊ မတ်လ ၁၇

ယူကရိန်းအား MiG-29 ဂျက်တိုက်လေယာဉ် တစ်ဒါဇင်ခန့် ပေးအပ်သွားမည့် အစီအစဉ်ကို ပိုလန်နိုင်ငံက ကြာသပတေးနေ့တွင် ထုတ်ဖော်ပြောကြားသွားခဲ့သည်ဟု အေပီသတင်းတွင် ဖော်ပြသည်။

ထို့ကြောင့် ပိုလန်သည် ရုရှား၏ ကျူးကျော်မှုအား ခုခံရေးအတွက် စစ်လေယာဉ်များ တောင်းဆိုထားသော ယူကရိန်းအစိုးရ၏ တောင်းဆိုမှုကို ဖြည့်စည်းပေးသည့် ပထမဆုံးသော နေတိုးအဖွဲ့ဝင် ဖြစ်လာခဲ့သည်။

ပိုလန်အစိုးရသည် လာမည့် ရက်အနည်းငယ်အတွင်း ဆိုဗီယက်ထုတ် စစ်လေယာဉ်များကို လွှဲပြောင်းပေးမည်ဟု သမ္မတ အန်ဒါဇတ် ဒူဒါ (Andrzej Duda)က ပြောသည်။ ကျန်သော လေယာဉ်များကို ပြုပြင်မှု လုပ်ဆောင်ရမည် ဖြစ်ပြီး နောက်ပိုင်းတွင် ထောက်ပံ့သွားမည်ဟုလည်း သိရသည်။

ပိုလန် သမ္မတသည် ယူကရိန်းအား လေယာဉ် ၁၁ စီးမှ ၁၉ စီးကြား ပေးအပ်သွားနိုင်ခြေ ရှိကြောင်း သိရသည်။

လေယာဉ်များသည် ၎င်းတို့၏ တာဝန်ထမ်းဆောင်မှု နောက်ဆုံးနှစ်များတွင် ရှိနေကြောင်း၊ သို့သော် ယင်းတို့သည် ကောင်းမွန်သော အခြေအနေတွင် ရှိနေကြောင်း ဒူဒါက ပြောသည်။

ဆလိုဗက်ကီးယားကလည်း ၎င်းတို့ အသုံးမပြုတော့သော MiG-29 ဂျက်တိုက်လေယာဉ်များကို ယူကရိန်းသို့ ပေးသွားရန် ပြောဆိုထားသော်လည်း ဒူဒါ၏ ပြောဆိုမှုတွင် မည်သည့် နိုင်ငံများသည် ယူကရိန်းသို့ လေယာဉ်များ ပေးမည်ကို ထုတ်ဖော်ခဲ့ခြင်း မရှိပေ။

MiG-29 ဂျက်တိုက်လေယာဉ်ကိုတွေ့ရစဉ် (GETTY IMAGES)

ပိုလန်သည် ယူကရိန်းအား ဂျာမန်လုပ် Lepord 2 တင့်ကားများ ပေးခဲ့သည့် ပထမဆုံးသော နေတိုးနိုင်ငံလည်း ဖြစ်သည်။ ဗုဒ္ဓဟူးနေ့ ပိုလန် အစိုးရအဖွဲ့ ပြောခွင့်ရပုဂ္ဂိုလ် ပီယိုတာမူလာ၏ ပြောဆိုမှုတွင် တခြားနိုင်ငံများသည် လည်း ယူကရိန်းသို့ MiG-29 ဂျက်တိုက်လေယာဉ်များ ပေးမည်ဟု ပြောဆိုခဲ့ကြောင်း ပါဝင်သော်လည်း မည်သည့် နိုင်ငံများ ဖြစ်သည်ကို မပြောခဲ့ပေ။

ပိုလန်နှင့် စလိုဗက်ကီးယား နှစ်နိုင်ငံစလုံးက ၎င်းတို့၏ လေယာဉ်များကို ယူကရိန်းသို့ ပေးပို့ရန် အဆင်သင့် ဖြစ်နေကြောင်း ပြောခဲ့သော်လည်း ယင်းသည် နိုင်ငံတကာ မဟာမိတ်အဖွဲ့မှ ထိုသို့ ပြုလုပ်ခြင်း၏ အစိတ်အပိုင်း တစ်ခုသာ ဖြစ်သည်။

ပိုလန်အစိုးရ၏ ပြောဆိုမှုက အိမ်နီးချင်း နေတိုးအဖွဲ့ဝင် ဂျာမနီနိုင်ငံအတွက် အံ့သြစရာလည်း ဖြစ်ခဲ့သည်။

လက်ရှိ အချိန်အထိ အားလုံးက ဂျက်တိုက်လေယာဉ်များ ပေးပို့ရန် အချိန်ကောင်း မဟုတ်ဟု သဘောတူထားကြောင်း ဂျာမနီကာကွယ်ရေးဝန်ကြီး ဘောရစ်ပစ်စတိုးရီးရပ်စ် (Boris Pistorius) က ပြောသည်။

ယခုကိစ္စနှင့် ပတ်သက်၍ ပိုလန်ဘက်မှ အတည်ပြုမှု မရရှိသေးကြောင်းလည်း ၎င်းက ပြောသည်။

 ဂျာမနီကာကွယ်ရေးဝန်ကြီး ဘောရစ်ပစ်စတိုးရီးရပ်စ်ကိုတွေ့ရစဉ် (GETTY IMAGES)

အိမ်ဖြူတော်ဘက်မှ ပိုလန်၏ ဆုံးဖြတ်ချက်ကို ချီးကျူးကာ ပိုလန်အစိုးရသည် ယူကရိန်းအား ကူညီရေးတွင် ၎င်းတို့ လုပ်နိုင်သည်ထက်ပို၍ ကောင်းမွန်စွာ ဆောင်ရွက်နေသည်ဟု ပြောသော်လည်း ထိုလုပ်ဆောင်ချက်သည် အမေရိကန်သမ္မတနှင့် မည်သို့မှ ပတ်သက်မှု မရှိဟု ဆိုသည်။

သမ္မတဘိုင်ဒန်သည် F-16 လေယာဉ်များ ယူကရိန်းသို့ ထောက်ပံ့ပေးရန် တောင်းဆိုမှုများကို လက်မခံခဲ့သူ ဖြစ်သည်။ ရုရှား၏ ကျူးကျော်မှု မစတင်ခင် ယူကရိန်း၌ MiG-29 လေယာဉ် ဒါဇင်တစ်ချို့ ရှိခဲ့သော်လည်း လက်ရှိ အချိန်တွင် ယင်းတို့မှ မည်မျှသည် လုပ်ငန်းဆောင်ရွက်နိုင်ဆဲ ရှိနေသည်ကိုတော့ မသိရသေးပေ။

Source: AP

CNI International News

ဆိုးလ်၊ မတ်လ ၁၇

မြောက်ကိုရီးယားသည် တိုက်ချင်းပစ် ပဲ့ထိန်းဒုံးကျည် (ICBM) တစ်လုံးအား ကြာသပတေးနေ့တွင် စမ်းသပ် ပစ်ခတ်ခဲ့သည်ဟု AP သတင်းတွင်ဖော်ပြသည်။

တိုကျိုထိပ်သီးအစည်းအဝေးတစ်ခုတွင် တောင်ကိုရီးယားနှင့် ဂျပန်ခေါင်းဆောင်များ တွေ့ဆုံမှုမတိုင်ခင် ထိုသို့ စမ်းသပ်ခဲ့ခြင်းဖြစ်ပြီး ထိုအစည်းအဝေးတွင်လည်း မြောက်ကိုရီးယား၏ နျူကလီးယားစမ်းသပ်မှုများက လွှမ်းမိုး ထားမည်ဟု ယူဆရသည်။

ယခုစမ်းသပ်မှုသည် ယခုလအတွင်း မြောက်ကိုရီးယား၏ ပထမဆုံးသော ICBM စမ်းသပ်မှုဖြစ်ရုံသာမက ယခု သီတင်းပတ်အတွင်း တတိယမြောက်လက်နက်စမ်းသပ်မှုဖြစ်သည်။ ယင်းသည် တောင်ကိုရီးယားနှင့်အမေရိကန် တို့၏ ပူးတွဲစစ်ရေးလေ့ကျင့်မှု လုပ်ဆောင်ချိန်နှင့်လည်း တိုက်ဆိုင်နေသည်။ စမ်းသပ်ခဲ့သောဒုံးကျည်သည် မိနစ် ၇၀ ကြာပျံသန်းချိန်အတွင်း အမြင့်ပေ ၆၀၀၀ ကီလိုမီတာ သို့ ၁၀၀၀ ကီလိုမီတာနှုန်းခန့် ပျံသန်းခဲ့ကြောင်း တောင်ကိုရီးယားနှင့် ဂျပန်ဘက်မှ ပြောသည်။
အဆိုပါ ပမာဏသည် ပြီးခဲ့သည့် ဖေဖော်ဝါရီလက တခြားသော ICBM စမ်းသပ်မှုတစ်ခုနှင့်လည်း တူညီနေကာ စမ်းသပ်မှုသည် မြောက်ကိုရီးယားဒုံးကျည်များအနေဖြင့် အမေရိကန်မြေပေါ်သို့အထိ ရောက်ရှိနိုင်ကြောင်း ပြသမှု တစ်ခုဖြစ်သည်ဟု ကျွမ်းကျင်သူများက သုံးသပ်သည်။ ဒုံးကျည်အား သတ်မှတ်ထားသောလမ်းကြောင်းမှ ပစ်လွှတ် စမ်းသပ်ခဲ့ပြီးနောက် ယင်းသည် ကိုရီးယားကျွန်းဆွယ်နှင့်ဂျပန်နိုင်ငံတို့အကြားရေပြင်သို့ ကျခဲ့သည်။

မတ်လ ၁၆ ရက်နေ့ ကြာသပတေးနေ့တွင် တောင်ကိုရီးယားနှင့် ပူးတွဲစစ်ရေးလေ့ကျင့်မှု၌ အမေရိကန် စစ်သား များကို တွေ့ရစဉ်(ဓါတ်ပုံ-အေပီ)

စမ်းသပ်မှုကို အထူးစီးပွားရေးဇုံပြင်ပမှပြုလုပ်ခဲ့ခြင်းဖြစ်ကာ ယင်းကြောင့် မည်သည့်ထိခိုက်မှုမှမရှိခဲ့ဟု ဂျပန် ဘက်ကထုတ်ပြန်သည်။ မြောက်ကိုရီးယားသည် ICBM များအတွက် သင့်တော်သောလမ်းကြောင်း သတ်မှတ်ချက် မရရှိသေးသော်လည်း ၎င်းတို့သည်နျူကလီးယားဒုံးကျည်များပိုင်ဆိုင်ထားပြီဟု မကြာခဏ ထုတ်ဖော်ပြောဆိုလေ့ ရှိသည်။

သို့သော် မြောက်ကိုရီးယားသည် ဒုံးကျည်များတွင် တပ်ဆင်ရန် နျူကလီးယားထိပ်ဖူးအား သေးငယ်အောင် လုပ်ဆောင်ရန်နှင့် လေထုတွင်းသို့ ဝင်ရောက်လာချိန်တွင် ထိပ်ဖူးများကို ကာကွယ်ပေးရန် နည်းပညာအရ လိုအပ်ချက်ရှိနေဆဲဟု တချို့သောကျွမ်းကျင်သူများက သံသယရှိနေဆဲဖြစ်သည်။

အမေရိကန်နိုင်ငံနှင့် မဟာမိတ်များဖြစ်သော တောင်ကိုရီးယား၊ ဂျပန်တို့၏လုံခြုံရေးကို သေချာစေရန် လိုအပ် သောဆောင်ရွက်ချက်များကို လုပ်ဆောင်သွားမည်ဟု အမေရိကန်လုံခြုံရေးကောင်စီပြောခွင့်ရပုဂ္ဂိုလ် အန်ဒရီနီဝပ်ဆန် (Adrienne Watson) က ပြောသည်။

ကြာသပတေးနေ့စမ်းသပ်မှုသည် ဒေသတွင်းလုံခြုံရေးကို မတည်မငြိမ်ဖြစ်စေမှုနှင့် တင်းမာမှုများကို မြင့်တက် စေသည်ဟုလည်း သူမက ပြောသည်။ မြောက်ကိုရီးယားအနေဖြင့် ၎င်းတို့၏ ရန်စသောလုပ်ရပ်များအတွက် ပြန်လည်ပေးဆပ်ရမည်ဟုလည်း တောင်ကိုရီးယား သမ္မတ ယွန်ဆော့ရွဲက ပြောသည်။

Source:AP

CNI International News

ဝါရှင်တန်၊ မတ်လ ၁၇

ပြီးခဲ့သည့် ရက်ပိုင်းအတွင်း ဆော်ဒီအားရေးဗျနိုင်ငံသည် အမေရိကန်၊ တရုတ်ကဲ့သို့ ကမ္ဘာ့အင်အားကြီး နိုင်ငံများ နှင့် အရေးပါသော သဘောတူညီချက်များ ရယူနိုင်ခဲ့သည်ဟု အေပီသတင်းတွင် ဖော်ပြထားသည်။

ဆော်ဒီသည် အစဉ်အလာပြိုင်ဘက် အီရန်နှင့် သံတမန် ဆက်ဆံရေး ပြန်လည်စတင်ရန် တရုတ်ဘက်မှ ဦးစီး ဆောင်ရွက်ပေးသော သဘောတူညီချက်တွင် လက်မှတ် ရေးထိုးခဲ့ပြီးနောက် အမေရိကန်၏ Boeing ထံမှ စီးပွားရေး လုပ်ငန်းသုံး လေယာဉ်များ ဝယ်ယူရန် စာချုပ်ကို ထုတ်ပြန်ကြေညာခဲ့သည်။

ထိုကြေညာချက်က ဆော်ဒီသည် အမေရိကန်နှင့် တရုတ်တို့အကြား သင့်တင့်မျှတစွာ ဆက်ဆံပြီး ယင်း၏ စီးပွားရေးနှင့် ပထဝီဝင်နိုင်ငံရေး အင်အားလွှမ်းမိုးမှုကို လုပ်ဆောင်နေကြောင်းလည်း ညွှန်းဆိုနေသည်။

ဆော်ဒီသည် အရှေ့အလယ်ပိုင်း နိုင်ငံရေးကဏ္ဍတွင် တရုတ်အား ပုံမှန်မဟုတ်သော ဦးဆောင်သူ နေရာအား ပေးခဲ့ သည်။ တစ်ချိန်တည်းမှာပင် ၎င်း(ဆော်ဒီ)နှင့်အမေရိကန် တို့အကြား တင်းမာမှုများ လျော့ပါးရန် ဆောင်ရွက်နိုင်ခဲ့ ပြီလားဆိုသည့် မေးခွန်းကိုလည်း ဖြစ်စေခဲ့သည်။

Boeing လေယာဉ်စက်ရုံကိုတွေ့ရစဉ်

အမေရိကန်အစိုးရဘက်မှ ထိုအခြေအနေအား ညွှန်းဆိုရတွင် ဖြစ်ပျက်ခဲ့သော အကြောင်းအရာများသည် အရှေ့ အလယ်ပိုင်းတွင် အမေရိကန်-တရုတ် ပြိုင်ဆိုင်မှုအား ပြောင်းလဲသွားစေခဲ့သည်ဆိုသည့် ပြောဆိုချက်အပေါ် ငြင်း ဆိုမှု ပြုလုပ်ခဲ့သည်။

လေယာဉ် အများအပြား ဝယ်ယူမှုကြောင့် အမေရိကန်နှင့် ဆော်ဒီတို့အကြား ဆက်ဆံရေးတွင် သိသိသာသာ ပြောင်းလဲသွားသည်ဆိုသည့် ပြောစကားများကိုလည်း အမေရိကန်အစိုးရဘက်က လက်မခံပါ။

အမေရိကန်သမ္မတ ဘိုင်ဒန်(Biden)သည် ဆော်ဒီ၏ လူ့အခွင့်အရေး မှတ်တမ်းများကို ၎င်း၏ သမ္မတသက်တမ်း အစောပိုင်းတွင် ပြင်းပြင်းထန်ထန် ဝေဖန်ခဲ့သလို ပြီးခဲ့သည့်နှစ် ဆော်ဒီဦးဆောင်သော OPEC နိုင်ငံများ၏ ရေနံ ဈေးကစားမှုကိုလည်း တုန့်ပြန်မှု လုပ်ဆောင်ထားသည်။

သို့သော် အီရန်-ဆော်ဒီ သံတမန်ဆက်ဆံရေး ပြန်လည်စတင်မှုတွင် တရုတ်၏ ပါဝင်မှု၊ Boeing လေယာဉ် အများအပြား ဝယ်ယူမှု စသည်တို့သည် ဘိုင်ဒန်နှင့် ဆော်ဒီ အိမ်ရှေ့စံမင်းသား မိုဟာမက် ဘင်ဆယ်လ်မန်တို့ အကြား အတက်အကျ များသော ဆက်ဆံရေးတွင် အလှည့်အပြောင်း အသစ်တစ်ခုကို ဖြစ်စေသည်။

ဘိုင်ဒန်နဲ့ ဆော်ဒီမင်းသားကိုတွေ့ရစဉ်

သမ္မတလောင်း အနေဖြင့် ဘိုင်ဒန်သည် ဆော်ဒီ၏ ၂၀၁၈ ခုနှစ်က အမေရိကန် သတင်းသမား တစ်ဦးအား သတ် ဖြတ်မှုအတွက် ပြန်လည် ပေးဆပ်ရမည်ဟု ပြောဆိုခဲ့သည်။ မကြာသေးခင်ကာလ OPEC နိုင်ငံများက ရေနံထုတ် လုပ်မှုကို လျော့ချလိုက်သည်ဟု ကြေညာချက်ကိုလည်း အမေရိကန်အစိုးရက ရုရှားအား ကူညီမှုဟု ယူဆကာ ထိုအတွက် အကျိုးဆက်များကို ခံစားစေရမည်ဟု ဘိုင်ဒန်က ပြောခဲ့ဖူးသည်။

လက်ရှိအချိန်တွင် အမေရိကန်နှင့် ဆော်ဒီတို့သည် ရှေ့သို့ဆက်သွားရန် ရည်ရွယ်ထားပုံရကာ တစ်ချိန်တည်းမှာပင် တရုတ်သည်လည်း အရှေ့အလယ်ပိုင်း၏ သံတမန်ရေးရာ ကိစ္စများတွင် ပို၍ နေရာယူလာသည်ကို တွေ့ရသည်။

Source: AP

CNI International News

ဘေဂျင်း၊ မတ်လ ၁၆

အမေရိကန်နှင့် ဆက်ဆံရေး ဆိုးရွားနေသော တရုတ်၊ အီရန်နှင့်ရုရှားတို့မှ ရေတပ်များသည် ယခုသီတင်းပတ် အတွင်း ပူးတွဲစစ်ရေး လေ့ကျင့်မှု ပြုလုပ်ခဲ့သည်ဟု တရုတ်ကာကွယ်ရေးဌာနက ပြောကြောင်း အေပီ သတင်းတွင် ဖော်ပြသည်။

Security Bond-2023 ဟု ခေါ်သော စစ်ရေး လေ့ကျင့်မှုတွင် တခြားသော နိုင်ငံများပါ ပါဝင်မည်ဟု တရုတ် ကာ ကွယ်ရေးဌာနက ပြောသော်လည်း အသေးစိတ်ကို မဖော်ပြခဲ့ပေ။

အီရန်၊ ပါကစ္စတန်၊ အိုမန်နှင့် ယူအေအီးတို့သည် မဟာဗျူဟာအရ အရေးပါသော ပါရှန်ပင်လယ်ကွေ့တွင် ကမ်းရိုးတန်းများကို အသီးသီး ပိုင်ဆိုင်ထားသည်။

တရုတ်-ရုရုား- အီရန် ခေါင်းဆောင်များကိုတွေ့ရစဉ်

ယခု လေ့ကျင့်မှုတွင် ပါဝင်သည့် ရေတပ်များအကြား လက်တွေ့ ပူးပေါင်းဆောင်ရွက်မှု ခိုင်မာစေရန် အထောက် အကူဖြစ်စေကာ ဒေသတွင်း ငြိမ်းချမ်းရေးနှင့်လုံခြုံရေးအတွက် အပြုသဘောဆောင် စေလိမ့်မည်ဟု တရုတ်ကာ ကွယ်ရေးဌာနမှ ထုတ်ပြန်သည့် ကြေညာချက်တွင် ဖော်ပြထားသည်။

ပြိုင်ဘက် သုံးနိုင်ငံ၏ ပူးတွဲစစ်ရေး လေ့ကျင့်မှုနှင့်ပတ်သက်၍ အိမ်ဖြူတော်ဘက်မှ စိုးရိမ်မှုမရှိကြောင်း အမေရိကန် လုံခြုံရေးကောင်စီ ပြောခွင့်ရပုဂ္ဂိုလ် ဂျွန်ကာဘီ (John Kirby)က ပြောသည်။

အမေရိကန်နှင့် တခြားသော နိုင်ငံများသည်လည်း ပူးတွဲလေ့ကျင့်မှုများ ပြုလုပ်ခဲ့ကြောင်း၊ တရုတ်နှင့် ရုရှားတို့၏ ပူးတွဲစစ်ရေး လေ့ကျင့်မှုသည် ပထမဆုံးအကြိမ် မဟုတ်ကြောင်းလည်း ကာဘီက ပြောသည်။

ပြိုင်ဘက် သုံးနိုင်ငံ၏ စစ်ရေး လေ့ကျင့်မှုသည် အမေရိကန်၏ အမျိုးသားလုံခြုံရေး အကျိူးစီးပွားနှင့် ဒေသတွင်းရှိ မဟာမိတ် နိုင်ငံများအပေါ် ခြိမ်းခြောက်မှု မဖြစ်စေရေး သေချာစေရန် ယင်းကို အနီးကပ် စောင့်ကြည့် သွားမည် ဟုလည်း ကာဘီက ပြောသည်။

တရုတ်-အီရန်-ရုရှား သုံးနိုင်ငံ ရေတပ်ပူးတွဲစစ်ရေး လေ့ကျင့်မှုကို ဗုဒ္ဓဟူးနေ့မှ တနင်္ဂနွေနေ့အထိ ပြုလုပ် သွားမည် ဖြစ်သည်။

အမေရိကန် ခေါင်းဆောင် ဘိုင်ဒန်ကိုတွေ့ရစဉ်

ယင်းသည် တရုတ်၏ ယူကရိန်းစစ်ပွဲနှင့် ပတ်သက်၍ ရုရှားအပေါ် အပြစ်တင်ရန် ငြင်းဆိုမှု၊ ရုရှား စီးပွားရေးအား ဆက်လက် ထောက်ပံ့နေမှုတို့ အပါအဝင် တခြားသော အကြောင်းအရာများကြောင့် တရုတ်နှင့် အမေရိကန်တို့ အကြား တင်းမာမှုများ မြင့်တက်နေချိန်တွင် ပေါ်ပေါက်လာခဲ့ခြင်း ဖြစ်သည်။

အမေရိကန်နှင့် မဟာမိတ်များသည် ရုရှား၏ ကျူးကျော်မှုကို ဝေဖန်ရှုတ်ချခဲ့ပြီး ယင်းအပေါ် စီးပွားရေးဆိုင်ရာ အရေးယူမှုများ လုပ်ဆောင်ခဲ့ကာ ယူကရိန်းအတွက် ကာကွယ်ရေး လက်နက်များ ထောက်ပံ့ပေးခဲ့သည်။
အီရန်နှင့် အမေရိကန်တို့အကြား ဆက်ဆံရေးသည်လည်း ၁၉၇၉ ခုနှစ်နောက်ပိုင်း အဆိုးရွားဆုံး အခြေအနေတွင် ရှိနေသည်။

တရုတ်သည် ယခုစစ်ရေး လေ့ကျင့်မှုတွင် Nanning ဖျက်သင်္ဘောကိုပါ စေလွှတ်သွားမည် ဖြစ်သည်။

အဆိုပါ သုံးနိုင်ငံသည် ပြီးခဲ့သည့် နှစ်နှင့် ၂၀၁၉ ခုနှစ်တို့တွင်လည်း အလားတူ စစ်ရေး လေ့ကျင့်မှုများ လုပ်ဆောင် ခဲ့ပြီး ယင်းတို့က တရုတ်သည် အမေရိကန် ဦးဆောင်သည့် အနောက်အုပ်စုနှင့် အဆင်မပြေသော နိုင်ငံများနှင့် စစ်ရေး၊ နိုင်ငံရေးအရ ဆက်နွယ်မှု မြင့်တက်လာနေသည်ကိုလည်း ဖော်ပြနေသည်။

Source: AP

CNI International News

ဒါဘိုယာ၊ မတ်လ ၁၆

အနောက်အာဖရိကတွင် ရုရှား အားကောင်းလာနေပြီးနောက် အမေရိကန်ကလည်း အနောက်အာဖရိက၏ အစ္စလာမ္မစ် အကြမ်းဖက်ဝါဒ တိုက်ဖျက်ရေးတွင် လွှမ်းမိုးမှုရရှိရန် ကြိုးပမ်းလာနေကြောင်း ရိုက်တာသတင်းမှာ ရေးသားဖော်ပြထားသည်။

အနောက်အင်အားကြီး နိုင်ငံများကို မှီခိုနေသည့်အစား အစ္စလာမ္မစ်သူပုန်ထမှု ပျံ့နှံ့နေခြင်းအား ထိန်းချုပ်ရေးတွင် ကမ်းရိုးတန်းနိုင်ငံ အချင်းချင်း အပြန်လှန် မှီခိုသွားကြရန် အနောက်အာဖရိကတွင် နှစ်စဉ်ပြုလုပ်နေကြ အကြမ်းဖက်မှုတန်ပြန်ရေး လေ့ကျင့်ခန်း အစီအစဉ်များကို ဦးဆောင်နေသည့် အမေရိကန် တပ်မှူးများက တိုက်တွန်း ခဲ့သည်ဟု ရိုက်တာသတင်းတွင် ဖော်ပြထားသည်။

ပြီးခဲ့သည့် နှစ်တွင် မာလီအစိုးရက ရုရှားမှ ကြေးစားစစ်သားများကို ငှားရမ်းခဲ့ပြီးနောက် ထိုသို့ ပြောကြားခဲ့ခြင်း ဖြစ်သည်။

ရုရှားနှင့် အမေရိကန်တို့၏ ဆက်ဆံရေးသည် အဆိုးရွားဆုံး အခြေအနေသို့ ရောက်ရှိနေပြီး အမေရိကန်နှင့် မဟာမိတ်များက အနောက်အာဖရိကတွင် ရုရှား၏လွှမ်မိုးမှုကို မလိုလားပေ။

ယခုလ ဂါနာမြောက်ပိုင်း လေ့ကျင့်မှုများအတွင်း အမေရိကန် လေ့ကျင့်ရေး သင်တန်းမှူးများက ထိန်းချုပ်မှု အားနည်းသော နယ်စပ်ဒေသများ တာဝန်ယူနေသည့် တခြားနိုင်ငံမှ တပ်ဖွဲ့များနှင့် ဖုန်းနံပါတ်များဖလှယ်ရယူထားရန်၊ လျင်မြန်စွာတုန့်ပြန်နိုင်ရေး ဆိုင်ကယ်များကို အသုံးပြုရန် တိုက်တွန်းခဲ့သည်။

အာဖရိက တပ်သားများ သေနတ်ပစ် လေ့ကျင့်နေစဉ်

အစ္စလာမ္မစ် အဖွဲ့အစည်းများ၏ ပုန်ကန်မှုအပြင် ကိုလိုနီဟောင်း ပြင်သစ်နှင့် အဆင်မပြေမှုများကြောင့် မာလီ၏ စစ်အစိုးရသည် စစ်သွေးကြွများကို နှိမ်နင်းရေးအတွက် ပြီးခဲ့သည့်နှစ်တွင် ရုရှား၏ ဝဂ်နာကြေးစား စစ်သားများကို ငှားရမ်းခဲ့သည်။

ထိုငှားရမ်းမှုက အမေရိကန်နှင့် ကုလသမဂ္ဂတို့ကို စိုးရိမ်စေခဲ့ပြီး ကြေးစားတပ်ဖွဲ့များသည် အကြမ်းဖက်များကို ပိုဖြစ်စေခဲ့သည်ဟု ကုလသမဂ္ဂအဖွဲ့က ထောက်ပြခဲ့သည်။

သို့သော် ရုရှားတပ်ဖွဲ့များသည် ကြေးစားများ မဟုတ်ကြောင်း၊ ၎င်းတို့သည် ဒေသခံတပ်ဖွဲ့များအား ကူညီပေးသည့် သင်တန်းမှူးများသာ ဖြစ်ကြောင်း ထုတ်ပြန် ပြောဆိုခဲ့သည်။

အစိုးရများတွင် ပြဿနာများစွာ ရှိနေခြင်းကြောင့် ပို၍ အန္တရာယ်များသော တခြားသူများထံ ရောက်ရှိသွားကာ ထိုသူများက ယင်းနိုင်ငံများ၏ အရင်းအမြစ်များကို တစ်ဖက်သတ် ရယူသွားကြသည်ဟု အမေရိကန်၏ အာဖရိက အထူးစစ်ဆင်ရေးဌာနချုပ် (SOCAF)မှ ဗိုလ်မှူးကြီး ရောဘတ်ဇီလာ (Robert Zyla)က ပြောသည်။

ယခုလ လေ့ကျင့်ရေး မဟာဗျူဟာတွင် နယ်ဒေသများ၌ နေထိုင်သူများအား စည်းရုံးခြင်း၊ နယ်နိမိတ်ချင်း ရှည် လျားစွာ ထိစပ်နေသော နယ်စပ်ဒေသမှ စစ်တပ်များ အတူတကွ ပူးပေါင်းဆောင်ရွက်သည်ကို သေချာစေရေး တို့က အရေးပါသည်။

အမေရိကန်၏ အာဖရိက အထူးစစ်ဆင်ရေးဌာနချုပ် (SOCAF)မှ ဗိုလ်မှူးကြီး ရောဘတ်ဇီလာကိုတွေ့ရစဉ်

မည်သည့်နိုင်ငံမှ အစ္စလာမ္မစ် အကြမ်းဖက်မှု ပြဿနာကို တစ်ကိုယ်တည်း မဖြေရှင်းနိုင်ကြောင်း၊ နောက်ပိုင်းတွင် ဒေသတွင်းရှိ နိုင်ငံများအား မည်ကဲ့သို့ နယ်စပ် ဖြတ်ကျော် ပြောဆိုဆောင်ရွက်ရမည်ကို လေ့ကျင့်သင်ကြားပေး သွားမည်ဟုလည်း ဇီလာက ပြောသည်။

ပြီးခဲ့သည့် ဆယ်စုနှစ်အတွင်း အာဖရိကဒေသများတွင် အစွန်းရောက် သူပုန်ထမှုများကြောင့် လူထောင်ပေါင်းများစွာ သေဆုံးပြီး၊ ထောင်ပေါင်းများစွာ နေရပ်စွန့်ခွာ ထွက်ပြေးခဲ့ရသည်။

ယင်းကို တားဆီးရေး ထိုးစစ်ဆင်မှုများသည်လည်း အောင်မြင်ခဲ့ခြင်း မရှိခဲ့သလို ယခုနှစ် အတွင်း ပြင်သစ်တပ်ဖွဲ့ ဝင်များကို မာလီနှင့်ဘာကီနာဖာဆိုတို့မှ အာဏာရှင် အစိုးရများက နှင်ထုတ်လိုက်မှုကြောင့် အခြေအနေများမှာ ပို၍ ဆိုးရွားလာဖွယ် ရှိနေသည်ဟု လေ့လာသူများက သုံးသပ်ထားသည်။

Source: ရိုက်တာ

CNI International News

လာဟိုး၊ မတ်လ ၁၆

ဝန်ကြီးချုပ်ဟောင်း အီမရန်ခမ်း (Imran Khan) အား ဖမ်းဆီးနိုင်ရေး စစ်ဆင်ရေးကို ခေတ္တရပ်ဆိုင်းရန် ပါကစ္စတန်တရားရုံးတစ်ခုက ဗုဒ္ဓဟူးနေ့တွင် အမိန့်ချမှတ်ခဲ့သည်ဟု ရိုက်တာသတင်းတွင် ဖော်ပြသည်။

ယင်းကြောင့် ဝန်ကြီးချုပ်ဟောင်းအား ထောက်ခံသူများနှင့် ရဲတပ်ဖွဲ့ဝင်များအကြား ပဋိပက္ခများသည်လည်း ရပ်တန့်သွားခဲ့ပြီဖြစ်သည်။

ခမ်း၏ လာဟိုးနေအိမ်အနီးမှ လုံခြုံရေးတပ်ဖွဲ့ဝင်များ ထွက်ခွာသွားခဲ့ကြပြီဖြစ်ပြီး ယင်းက ဘဏ္ဍာရေးဆိုင်ရာ ပဋိပက္ခနှင့် ရင်ဆိုင်နေရသည့် နျူကလီးယားပိုင်ရှင် ပါကစ္စတန်နိုင်ငံအတွင်း နိုင်ငံရေးဆိုင်ရာ မတည်မငြိမ်ဖြစ်မှု များကို လျော့ပါးသွားစေခဲ့သည်။

ခမ်းအားဖမ်းဆီးရန်ကြိုးပမ်းမှုကို ကြာသပတေးနေ့အထိ ရပ်နားထားရန် လာဟိုးတရားရုံးတစ်ခုက ရဲတပ်ဖွဲ့အား အမိန့်ထုတ်ပြန်ခဲ့သည်ဟု ပြည်နယ်သတင်းအချက်အလက်ဝန်ကြီး အေမာမား (Amir Mir) က ပြောသည်။ ခမ်း၏ နေအိမ်နှင့် ကီလိုမီတာအနည်းငယ်အကွာရှိ အားကစားကွင်းတွင် ကျင်းပမည့် ခရစ်ကတ်ပွဲအတွက် လုံခြုံရေး တပ်ဖွဲ့များကို ရုပ်သိမ်းခဲ့ရခြင်းဖြစ်သည်ဟု ပါကစ္စတန်ရဲအရာရှိတစ်ဦးက အစောပိုင်းတွင် ပြောခဲ့သည်။

ပါကစ္စတန်မြို့တော် အစ္စလာမ္မာဘတ် (Islamabad) ရှိ အောက်တရားရုံးတစ်ခုက စွပ်စွဲချက်များကို ဖြေရှင်းရေး၊ တရားရုံးသို့ လာရောက်ရန်အမိန့်ကို ဖီဆန်မှုအတွက် ခမ်းကို ဖမ်းဝရမ်းထုတ်ခဲ့သည်။ ခမ်းသည် ဝန်ကြီးချုပ်အဖြစ် တာဝန်ယူခဲ့စဉ် နိုင်ငံခြားကိုယ်စားလှယ်များပေးသော လက်ဆောင်များကို တရားမဝင်ရောင်းချခဲ့မှုဖြင့် တရားစွဲဆို ခံထားရသူလည်း ဖြစ်သည်။

လာဟိုးတွင် ဝန်ကြီးချုပ်ဟောင်း အီမရန်ခမ်းကို ထောက်ခံအားပေးသူများ၏ ပဋိပက္ခဖြစ်စဉ်အတွင်း ကားများအား မီးရှို့ဖျက်ဆီးထားသည့်နေရာအနီး၌ ရဲတပ်ဖွဲ့ဝင်တစ်ဦးအား တွေ့ရစဉ်(ဓါတ်ပုံ-အေအက်ဖ်ပီ)

“မဖမ်းဆီးပါဘူး”ဟု အာမခံချက်ပေးသော လုံခြုံရေးစာချုပ်တစ်ခုတွင် လက်မှတ်ရေးထိုးခဲ့ကြောင်း ခမ်းက တွစ်တာတွင် ရေးသားခဲ့ပြီး ခမ်း၏ပါတီက ၎င်းအားလိုက်လံဖမ်းဆီးနေခြင်းကို ရပ်တန့်ရန် ရဲတပ်ဖွဲ့ကို တောင်းဆိုခဲ့သည်ဟု လက်ထောက်ဖြစ်သူက ပြောသည်။

ပြန်ကြားရေးဝန်ကြီး မာရီယန် အူရန်းဇဘ် (Mrriyum Aurangzeb) ၏ ပြီးခဲ့သည့်နှစ် ထုတ်ပြန်ခဲ့သော စာရင်းတွင် ခမ်းအား နိုင်ငံခြားကိုယ်စားလှယ်များမှပေးခဲ့သည့် လက်ဆောင်များတွင် ရူပီး ၈၅ သန်းတန်နာရီတစ်လုံး အပါ အဝင် နာရီခုနှစ်လုံးပါဝင်သည်ဟု ဖော်ပြထားသည်။

အဆိုပါ ထုတ်ပြန်ချက်ကို ရိုက်တာ သတင်းဌာနမှ သီးသန့်အတည်မပြုနိုင်သော်လည်း ထိုစာရင်းတွင် ရေမွှေးများ၊ စိန်ထည်များနှင့် ညစာစားပွဲ အစီအစဉ်များလည်း ပါဝင်နေသည်။

သို့သော်ဝန်ကြီးချုပ်ဟောင်းက ၎င်းသည် မည်သည့်အမှားအယွင်းမှ လုပ်ဆောင်ခဲ့ခြင်းမရှိဟု ပြောဆိုထားသည်။

Source:Reuters

CNI International News

ကိယက်ဗ်၊ မတ်လ ၁၆

ရုရှား ဂျက်တိုက်လေယာဉ်တစ်စင်းနှင့်တွေ့ဆုံပြီးနောက် ပင်လယ်နက်အတွင်းသို့ ပျက်ကျသွားခဲ့သည့် အမေရိကန် ထောက်လှမ်းရေး ဒရုန်းတစ်စင်း၏ အပျက်အစီးများကို ရုရှားအစိုးရက ဆယ်ယူလိုနေသည်ဟု ရုရှား လုံခြုံရေး အရာရှိတစ်ဦးက ဗုဒ္ဓဟူးနေ့တွင် ပြောကြောင်း AP သတင်းတွင် ဖော်ပြသည်။

အဆိုပါဖြစ်ရပ်သည် ယူကရိန်းပဋိပက္ခတွင် အမေရိကန်၏ တိုက်ရိုက်ပါဝင်ပတ်သက်မှုအတွက် နောက်ထပ် အတည်ပြုမှုဖြစ်ကြောင်း ရုရှားလုံခြုံရေးကောင်စီ၏အတွင်းရေးမှူးဖြစ်သူ နီကိုလိုင် ပတ်ထရူရှက်ဗ် (Nikolai Patrushev) က ရုပ်သံတွင် ပြောခဲ့ပြီး ဒရုန်း၏အပျက်အစီးများကို ရှာဖွေရန်စီစဉ်နေသည်ဟုလည်း ဆိုသည်။ အောင်မြင်မည်လားမသိရသေးသော်လည်း ရှာဖွေမှုကိုလုပ်ဆောင်သွားမည်ဟု ပတ်ထရူရှက်ဗ်က ပြောသည်။

သို့သော် အမေရိကန်၏ MQ-Reaper ဒရုန်းသည် အပြည်ပြည်ဆိုင်ရာ ရေပိုင်နက်ပေါ်ရှိ အပြည်ပြည်ဆိုင်ရာ လေပိုင်နက်တွင် ပျံသန်းနေစဉ် ရုရှားတိုက်လေယာဉ်တစ်စင်း၏ တိုက်ခိုက်မှုနှင့် ကြုံတွေ့ခဲ့ရသည်ဟု အမေရိကန်အမျိုးသားလုံခြုံရေးကောင်စီ ပြောခွင့်ရပုဂ္ဂိုလ် ဂျွန်ကာဘီ (John Kirby) က ပြောသည်။ ပင်လယ်နက်အတွင်း ရုရှားတပ်များရှိမှုသည် ပုံမှန်ဖြစ်သော်လည်း ရုရှားသည် အမေရိကန်ဒရုန်းအား ကြားဖြတ်တိုက်ခိုက်ရန် ကြိုးစားခဲ့သည်ဟု အမေရိကန်အရာရှိများက စွပ်စွဲခဲ့သည်။

ထိုကဲ့သို့သော ထိပ်တိုက်တွေ့ဆုံမှုများက မှားယွင်းတွက်ချက်မှုနှင့် အထင်လွဲမှုများကိုဖြစ်နိုင်ခြေ တိုးလာစေသည်ဟုလည်း ကာဘီက ပြောသည်။ ပင်လယ်အတွင်းပြုတ်ကျခဲ့သော ဒရုန်းကို ပြန်မဆယ်ယူရသေးကြောင်း၊ ဆယ်ယူ နိုင်မလားမသေချာကြောင်း သို့သော် အမေရိကန်အနေဖြင့် အချက်အလက်များကို ကာကွယ်ရန်၊ အဆိုပါ ဒရုန်း သည်တစ်စုံတစ်ဦးအတွက် အသုံးဝင်သောအကြောင်းအရာ ဖြစ်သွားနိုင်ခြေကို လျော့ချရန်နှင့် ကာကွယ်ရန် ဆောင်ရွက်သွားမည်ဟုလည်း ၎င်းက ပြောသည်။

ရုရှားလေတပ်၏ Su-25 မြေပြင်တိုက်ခိုက်ရေးဂျက်လေယာဉ်သည် ယူကရိန်းနိုင်ငံကို ဒုံးကျည်များဖြင့် ပစ်ခတ်ခဲ့စဉ်(ဓါတ်ပုံ-အေပီ)

ရုရှားတွင် ပင်လယ်နက်အောက်ခြေသို့ရောက်ရှိနေသော ဒရုန်း၏ အပျက်အစီးများကို ဆယ်ယူနိုင်သော နည်းပညာရှိသည်ဟု ရုရှား၏နိုင်ငံခြားထောက်လှမ်းရေးအကြီးအကဲ ဆာဂျီ နာရစ်ချ်ကင် (Sergei Naryahkin) က ပြောသည်။ ရုရှားဂျက်လေယာဉ်များသည် အမေရိကန်ဒရုန်းအား လက်နက်အသုံးပြုခဲ့ခြင်း၊ ထိခိုက်စေခဲ့ခြင်းမျိုး မရှိခဲ့ဟုလည်း ရုရှားအစိုးရပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ် (Dmitry Peskov) က ကာကွယ်ရေးဌာန၏ ထုတ်ပြန်ချက်အတိုင်း ဗုဒ္ဓဟူးနေ့အစောပိုင်းတွင် ပြောခဲ့သည်။

ရုရှား-အမေရိကန်ဆက်ဆံရေးမှာ အဆိုးရွားဆုံးအခြေအနေသို့ ရောက်ရှိနေသော်လည်း ရုရှားသည် အပြုသဘောဆောင်သည့် ဆွေးနွေးပွဲတစ်ခုကျင်းပရေးအတွက် မည်သည့်အခါတွင်မှ ငြင်းဆန်ခြင်းမရှိဟုလည်း ပတ်စ်ကော့ဗ်က ပြောခဲ့သည်။

အင်္ဂါနေ့ဖြစ်စဉ်နှင့် ပတ်သက်၍ အမေရိကန်ကာကွယ်ရေးဝန်ကြီး လွိုက်အော်စတင် (Lloyd Austin) ကလည်း ရုရှားဂျက်လေယာဉ်၏ ကြားဖြတ်မှုသည် နိုင်ငံတကာလေပိုင်နက်အတွင်း ရုရှားလေယာဉ်မှူးများ၏ ရန်လို သော၊အန္တရာယ်များ၍ မလုံခြုံသောလုပ်ရပ်များမှ အစိတ်အပိုင်းတစ်ရပ်သာဖြစ်သည်ဟု ပြောသည်။

ရုရှားအနေဖြင့် ၎င်းတို့၏လေယာဉ်များကို ပိုမိုအန္တရာယ်ကင်းစွာ ထိန်းချုပ်သင့်သည်ဟုလည်း ၎င်းက ပြောသည်။

Source:AP

CNI International News

တိုင်းချွန်း၊ မတ်လ ၁၅

ပြည်တွင်းဖြစ် စစ်ဖက်သုံး ဒရုန်းမော်ဒယ်သစ်များကို ထိုင်ဝမ်အစိုးရက အင်္ဂါနေ့တွင် ထုတ်ပြန်ပြသခဲ့သည်ဟု ရိုက်တာသတင်းတွင် ဖော်ပြသည်။

ဒရုန်းများသည် ပိုမိုအင်အားကြီးမားသော တရုတ်စစ်တပ်နှင့် ရင်ဆိုင်ရချိန်တွင် ထိုင်ဝမ်စစ်တပ်အား ပိုမို လျင်မြန်စွာ တုန့်ပြန်နိုင်ရန် ယင်း၏ဘက်မမျှသော စစ်ပွဲစွမ်းရည်အတွက် အဓိကကျသည်ဟုလည်း ပြောသည်။
ထိုင်ဝမ်ဘက်မှ ငြင်းဆန်နေသော်လည်း တရုတ်အစိုးရသည် ထိုင်ဝမ်အား တရုတ်၏ အချုပ်အခြာပိုင်အဖြစ် လက်ခံရေးအတွက် ကျွန်းအနီးတွင် စစ်ရေးလှုပ်ရှားမှုများပြုလုပ်ကာ ဖိအားပေးလျက်ရှိသည်။ လိုအပ်ပါက တပ် အင်အားကို အသုံးပြုသွားမည်ဟုလည်း တရုတ်အစိုးရက ပြောဆိုထားသည်။

ယူကရိန်းစစ်ပွဲသည် ဒရုန်းထုတ်လုပ်မှု အပါအဝင် ကာကွယ်ရေးအင်အားကို မြှင့်တင်ရေးအတွက် ထိုင်ဝမ် စစ်တပ် အနေဖြင့် ကြိုးပမ်းမှုများကို အရှိန်မြှင့်တင်ဆောင်ရွက်ရန် လိုအပ်နေသည်ကို ပြသနေသည်။ ဒရုန်းစွမ်းရည်နှင့် ပတ်သက်၍ ကြုံတောင့်ကြုံခဲ ထုတ်ဖော်ပြသမှုတွင် စစ်တပ်ပိုင် ချောင်-ရှန် အမျိုးသားသိပ္ပံနှင့် နည်းပညာအဖွဲ့ (NCSIST) သည် Albatross II ထောက်လှမ်းရေး ဒရုန်းနှင့် ဂျီပီအက်စ်သုံးတိုက်ခိုက်ရေးဒရုန်းများအပြင် နောက်ဆုံး ပေါ် ဒရုန်းများကိုထုတ်ပြန် ပြသခဲ့သည်။

ထိုင်ဝမ်ကာကွယ်ရေးဝန်ကြီးဌာနသည် ၎င်း၏ပြည်တွင်း၌ တီထွင်ထုတ်လုပ်ထားသော ဒရုန်းများကို မတ်လ ၁၄ ရက်နေ့က တိုင်ချွန်၌ စာနယ်ဇင်းများကို ပြသခဲ့စဉ်(ဓါတ်ပုံ-ရိုက်တာ)

ထိုင်ဝမ်စစ်တပ်က လာမည့်နှစ်တွင် ဒရုန်းအစီးရေ ၃၀၀၀ ထုတ်လုပ်နိုင်ရေးအတွက် ကုမ္ပဏီများနှင့် မိတ်ဖက် သဘောတူညီချက်ရရှိခဲ့သည်ဟုလည်း ထုတ်ပြန်ကြေညာခဲ့သည်။

လက်နက်ကိုင်တပ်ဖွဲ့များအနေဖြင့် ၎င်းတို့၏မဟာဗျူဟာများတွင် ဒရုန်းများအသုံးပြုမှုကို တိုးမြှင့်ဆောင်ရွက် သင့်သည်ဟု NCSIST ၏ လေယာဉ်စနစ်လေ့လာမှုအဖွဲ့ခွဲမှ ဒါရိုက်တာဖြစ်သူ ချီလီ-ပင် (Chi Li-Pin) က ပြောသည်။

ထိုင်ဝမ်တပ်များ၏ ပိုမိုရွေ့လျားနိုင်ရေးနှင့် ခက်ခက်ခဲခဲ တိုက်ခိုက်ရေးအတွက် အရေးပါသော ဘက်မညီသော စစ်ပွဲကို သမ္မတ ဆိုင်အင်ဝမ် (Tsai Ing-wen) ကလည်း ချီးကျူးခဲ့သည်။

သို့သော် ထိုင်ဝမ်တပ်ဖွဲ့များသည် လက်နက်အပြည့်အဝတပ်ဆင်ထားစေကာမူ တရုတ်စစ်တပ်နှင့်ယှဉ်လျှင် နိမ့်ပါးနေဆဲ ဖြစ်သည်။ တရုတ်သည် တုန့်ပြန်မှုကို လေ့လာရန် ထိုင်ဝမ်အနီးဧရိယာများသို့ ဒရုန်းများ စေလွှတ် ခဲ့ကြောင်း ကျွန်း၏ကာကွယ်ရေးဌာနက ပြောသည်။

ပြီးခဲ့သည့်နှစ်တွင်လည်း ထိုင်ဝမ်စစ်တပ်သည် လေပိုင်နက်အတွင်းသို့ ဝင်ရောက်လာသော အရပ်ဘက်သုံး ဒရုန်း တစ်စင်းကို ပစ်ချခဲ့သည်။

Source:Reuters

CNI International News

ဘေဂျင်း၊ မတ်လ ၁၅

အမေရိကန်၊ သြစတြေးလျနှင့် ဗြိတိန်တို့သည် ၎င်းတို့၏ ပထဝီဝင် နိုင်ငံရေး အကျိုးအမြတ်အတွက် အန္တရယ်ရှိ သော လမ်းကြောင်းပေါ်သို့ ထပ်မံ လျှောက်လှမ်းလျက်ရှိကြောင်း တရုတ်နိုင်ငံခြားရေးဌာနက အင်္ဂါနေ့တွင် ပြော ကြားခဲ့သည်ဟု အေပီသတင်းတွင် ဖော်ပြထားသည်။

သြစတြေးလျ၏ ရေတပ်အင်အားကို တိုးချဲ့ရန် အမေရိကန်ထံမှ နျူကလီးယားစွမ်းအင်သုံး တိုက်ခိုက်ရေး ရေငုပ် သင်္ဘောများ ဝယ်ယူရေး သဘောတူညီချက်နှင့် ပတ်သက်၍ ထိုသို့ ပြောကြားခဲ့ခြင်း ဖြစ်သည်။

သုံးနိုင်ငံပါဝင်သော ထိုသဘောတူညီချက်ကို AUKUS ဟုခေါ်သည်။

ထိုသဘောတူညီချက်သည် လက်နက်ချင်း ယှဉ်ပြိုင်မှုကို အားပေးသော၊ အပြည်ပြည်ဆိုင်ရာ နျူကလီးယား မပြန့်ပွားရေး သဘောတူညီချက်ကို ပျက်စီးစေသော၊ ဒေသတွင်း ငြိမ်ချမ်းရေးနှင့် တည်ငြိမ်ရေးကို ထိခိုက်စေသော စစ်အေးခေတ် သဘောထားမှ အခြေခံကာ ပေါ်ပေါက်လာခြင်း ဖြစ်သည်ဟု ဌာန၏ ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin)က ပြောသည်။

AUKUS ရဲ့ ရေငုပ်သင်္ဘောကိုတွေ့ရစဉ်

ထိုသုံးနိုင်ငံမှ ပူးတွဲ ထုတ်ပြန်ခဲ့သော နောက်ဆုံး ထုတ်ပြန်ချက်တွင် ယင်းတို့သည် နိုင်ငံတကာ အသိုင်းအဝိုင်း၏ စိုးရိမ်မှုကို လျစ်လျူရှုကာ ၎င်းတို့ကိုယ်ပိုင် အကျိုးစီးပွားအတွက် အန္တရာယ်ရှိသော လမ်းကြောင်းတွင် ဆက်လျှောက်နေဆဲ ဖြစ်သည်ကို ဖော်ပြနေသည်ဟု ဝမ်က ပြောသည်။

အမေရိကန်သမ္မတ ဂျိုးဘိုင်ဒန်(Joe Biden)သည် သြစတြေးလျဝန်ကြီးချုပ် အန်တိုနီအယ်လ်ဘာနိစ် (Anthony Albabese)၊ ဗြိတိန်ဝန်ကြီးချုပ် ရီရှီဆူနတ် (Rishi Sunak) တို့နှင့် ဆန်ဒီယေဂိုမြို့တွင် တွေ့ဆုံခဲ့ကာ ၁၈ လ သက်တမ်းရှိ နျူကလီးယား မိတ်ဖက် သဘောတူညီချက်ကို ချီးကျူးမှု ပြုလုပ်ခဲ့သည်။

ထိုသဘောတူညီချက်ကြောင့် သြစတြေးလျသည် တရုတ်၏ စစ်ရေးတိုးချဲ့မှုများကို တန်ပြန်ရန် နိုင်ငံတစ်ခု အနေဖြင့် သာမာန်စွမ်းအင်သုံး ရေငုပ်သင်္ဘောများထက် ပိုကောင်းသော နျူကလီးယား စွမ်းအင်သုံး ရေငုပ်သင်္ဘောများကို ပိုင်ဆိုင်ခွင့် ရရှိမည် ဖြစ်သည်။

ဘိုင်ဒန်က ထိုသင်္ဘောများတွင် မည်သည့် နျူကလီးယား လက်နက်မှ တပ်ဆင်သွားဖို့ မရှိကြောင်း အခိုင်အမာ ပြောသည်။

AUKUS အဖွဲ့ကိုတွေ့ရစဉ်

ထိုသဘောတူညီချက်ကြောင့် တရုတ်နှင့်ဆက်ဆံရေးကို ထိခိုက်စေမည်ဟု မထင်ကြောင်းလည်း အယ်လ်ဘာနိစ် က ပြောသည်။

သို့သော် AUKUS သည် နျူကလီးယား ပျံ့ပွားမှုအတွက် ဆိုးရွားသည့် အန္တရာယ်များကို ဖြစ်စေကာ နျူကလီးယား လက်နက် မပျံ့ပွားရေး သဘောတူညီချက်၏ ရည်ရွယ်ချက်များကို ချိုးဖောက်ခြင်း ဖြစ်သည်ဟု ဝမ်က ထပ်ခါထပ်ခါ ပြောဆိုထားသည်။

AUKUS သည် ဒုတိယကမ္ဘာစစ် နောက်ပိုင်း ဒေသတွင်း အကြီးမားဆုံး စစ်အင်အား ပြင်ဆင်မှုကို တန်ပြန်ရန် မရှိမဖြစ် လိုအပ်ကြောင်း သြစတြေးလျ ကာကွယ်ရေးဌာနက အင်္ဂါနေ့တွင် ပြောသည်။

ထိုသဘောတူညီချက်သည် လာမည့် ဆယ်စုနှစ် သုံးခုအတွင်း ဒေါ်လာ ၂၄၅ ဘီလီယံ ကုန်ကျမည်ဖြစ်ကာ အလုပ်အကိုင်ပေါင်း ၂၀၀၀၀ ကို ဖန်တီးပေးမည်ဟုလည်း ဌာန၏ ထုတ်ပြန်ချက်တွင် ဖော်ပြထားသည်။

Source: AP