- By CNI
- Category: နိုင်ငံရေး
- Hits: 608
CNI International News
ဘေဂျင်း၊ဒီဇင်ဘာ ၂၆
ယူကရိန်းစစ်ပွဲနှင့် ပတ်သက်သည့် တရုတ်နိုင်ငံ၏ ရပ်တည်ချက်ကို တရုတ်နိုင်ငံခြားရေးဝန်ကြီး ဝမ်ယိ( Wang Yi) က ကာကွယ်ပြောဆိုခဲ့သလို လာမည့်နှစ်တွင် ရုရှားနှင့်ဆက်ဆံရေးကို ပို၍ခိုင်မာအောင် ဆောင်ရွက်သွားမည်ဟု ပြောကြားခဲ့ကြောင်း အယ်ဂျာဇီးယားသတင်းမှာ ဖော်ပြထားသည်။
ဒီဇင်ဘာ ၂၅ ရက်နေ့က တရုတ်မြို့တော်တွင် ပြုလုပ်ခဲ့သော ဗွီဒီယိုကွန်ဖရင့်ညီလာခံတစ်ခုတွင် ဝမ်ယိ က အမေရိကန်နိုင်ငံကိုလည်း အပြစ်တင်ခဲ့သည်။
အမေရိကန်သည် ကမ္ဘာ့အကြီးဆုံး စီးပွားရေးအင်အားကို ပိုင်ဆိုင်ထားသည့် နှစ်နိုင်ငံကြားတွင် ဆက်ဆံရေး ဆိုး ရွားအောင် ဆောင်ရွက်နေကြောင်း၊ တရုတ်နိုင်ငံအနေဖြင့် အမေရိကန်၏ မှားယွင်းသော တရုတ်နိုင်ငံဆိုင်ရာ မူဝဒါ ကို ပြင်းပြင်းထန်ထန် ကန့်ကွက်ကြောင်း ဝမ်ယိ က ပြောသည်။
ဝမ်ယိ နဲ့ ဘလင်ကင်ကိုတွေ့ရစဉ် (GETTY IMAGES)
တရုတ်အစိုးရသည် ကုန်သွယ်ရေး၊ နည်းပညာ၊ လူ့အခွင့်အရေးနှင့် အနောက် ပစိဖိတ်ဒေသအတွင်း နယ်မြေများ ပိုင်ဆိုင်ကြောင်း ကြေညာခြင်း စသည်တို့နှင့် ပတ်သက်၍ ၎င်းတို့အပေါ် ကျရောက်လာသော အနောက်အုပ်စု၏ ဖိအားကို ဖယ်ရှားရန် ကြိုးပမ်းနေခြင်းဖြစ်သည်။
ထို့နောက် အမေရိကန်နိုင်ငံသည် ၎င်းတို့အပေါ် အနိုင်ကျင့်နေသည်ဟု တရုတ်နိုင်ငံခြားရေးဝန်ကြီး ဝမ်ယိ က စွပ်စွဲထားသည်။
ထို့အပြင် ယူကရိန်းအရေးနှင့်ပတ်သက်၍ ရုရှားနိုင်ငံအပေါ် ပြစ်တင်ရှုတ်ချရန်နှင့် တခြားနိုင်ငံများကဲ့သို့ ပိတ်ဆို့ အရေးယူမှုများ လုပ်ဆောင်ရ န်ငြင်းဆိုထားခြင်းကလည်း တရုတ်နှင့် ဥရောပအုပ်စုတို့အကြား ဆက်ဆံရေးကို ပိုမို ဆိုးရွားစေခဲ့ကာ ကွဲလွဲမှုများလည်း ပိုများစေလျက်ရှိသည်။
တရုတ်နိုင်ငံအနေဖြင့် ယူကရိန်းအရေးနှင့်ပတ်သက်၍ မှန်ကန်သည့် တရားစီရင်ခြင်းနှင့် သမာသမတ် ကျခြင်း ဆိုင်ရာ အခြေခံ သဘောတရားများကို ခိုင်မာစွာ လက်ကိုင်ထားကြောင်း၊ တစ်ဘက်ဘက်ကို အလေးပေး ဆောင် ရွက်ထားခြင်း သို့မဟုတ် လက်ရှိ အခြေအနေကို ပို၍ ဆိုးရွာလာအောင် ဆောင်ရွက်ခြင်းမျိုး မရှိဘဲ ထိုအခြေအနေ ကို တစ်ကိုယ်ကောင်းဆန်ဆန် ကိုယ်ကျိုးစီးပွားအတွက် ဆောင်ရွက်ခြင်းမျိုး မလုပ်ကြောင်း ဝမ်ယိ က ပြောသည်။
ဘိုင်ဒန်နဲ့ ဇာလန်းစကီးကိုတွေ့ရစဉ် (Biden-fb)
တရုတ်နိုင်ငံသည် ရုရှားနှင့် မဟာဗျူဟာမြောက် ယုံကြည်မှု၊ အပြန်အလှန်အကျိုး ဖြစ်ထွန်းစေသော ပူးပေါင်း ဆောင်ရွက်မှုများကို ပိုမိုခိုင်မာအောင် ဆောင်ရွက်သွားမည်ဟုလည်း ၎င်းက ထပ်လောင်း ပြောဆိုသည်။
တရုတ်နှင့်ရုရှားတို့မှ စစ်ရေယာဉ်များသည် ပြီးခဲ့သည့် သီတင်းပတ်တွင် အရှေ့တရုတ်ပင်လယ်အတွင်း ပူးတွဲ စစ်ရေး လေ့ကျင့်မှုများ လုပ်ဆောင်ခဲ့သည်။
ထို့အပြင် တရုတ်-ရုရှား အပြန်အလှန် ကုန်သွယ်ရေးသည် ဒေါ်လာ ဘီလီယံ ၂၀၀ သတ်မှတ်ချက်သို့ အရှိန်အဟုန် ကောင်းကောင်းဖြင့် ချဉ်းကပ်လာပြီဖြစ်ကာ အရေးပါသော ရင်းနှီးမြုပ်နှံမှု စီမံကိန်းများလည်း ကောင်းမွန်စွာ လည်ပတ်လျက်ရှိကြောင်း ဝမ်ယိ က ပြောည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 525
CNI International News
ကဘူးလ်၊ ဒီဇင်ဘာ ၂၆
အဓိကကျသော နိုင်ငံတကာအကူအညီပေးရေး အဖွဲ့ကြီးသုံးခုက အာဖဂန်နစ္စတန်နိုင်ငံတွင်း ၎င်းတို့၏ လုပ်ငန်း ဆောင်ရွက်မှုများကို တနင်္ဂနွေနေ့(ဒီဇင်ဘာ ၂၅ ရက်)တွင် ရပ်ဆိုင်းလိုက်သည်ဟု အေပီသတင်း၌ ဖော်ပြထားသည်။
တာလီဘန်များက အစိုးရမဟုတ်သော အဖွဲ့အစည်းများတွင် အမျိုးသမီးများ အလုပ်လုပ်ကိုင်ခြင်းကို တားမြစ် လိုက်ပြီးနောက် ယခုကဲ့သို့ ရပ်နားလိုက်ခြင်း ဖြစ်သည်။
Save the Children၊ Norwegian Refugee Council နှင့် CARE တို့က ၎င်းတို့၏ ဝန်ထမ်းများတွင် အမျိုးသမီး များ မပါဝင်လျှင် အာဖဂန်နစ္စတန်နိုင်ငံအတွင်း အမှန်တကယ် အကူအညီ လိုအပ်နေသော ကလေးများ၊ အမျိုးသမီးနှင့် အမျိုးသားများထံ ကူညီဆောင်ရွက် ပေးနိုင်လိမ့်မည် မဟုတ်ဟု ပြောသည်။
အမျိုးသမီးများကို အလုပ်လုပ်ခွင့် ပိတ်ပင်ကြောင်း ဆုံးဖြတ်ချက်အား တာလီဘန်များက စနေနေ့(ဒီဇင်ဘာ ၂၄ ရက်)တွင် စတင်ခဲ့ခြင်းဖြစ်သည်။ ထိုအဖွဲ့အစည်းများတွင် အလုပ်လုပ်ကိုင်နေသော အမျိုးသမီးများသည် အစ္စလာမ္မစ် ခေါင်းဆောင်းများကို မှန်ကန်စွာ မဝတ်ဆင်ခြင်းကြောင့် ဖြစ်သည်။
လုပ်ငန်းဆောင်ရွက်မှု ရပ်ဆိုင်းထားသော အဖွဲ့သုံးဖွဲ့သည် အာဖဂန်နိုင်ငံတွင်း ကျန်းမာရေး စောင့်ရှောက်မှု၊ ပညာရေး၊ ကလေးသူငယ် ကာကွယ်စောင့်ရှောက်ရေးနှင့် အာဟာရဝန်ဆောင်မှုတို့အပြင် ဆိုးရွားနေသော လူသားခြင်းစာနာမှုဆိုင်ရာ အခြေအနေများကို ကူညီရန် ထောက်ပံ့ပေးလျက်ရှိသည်။
အမျိုးသမီးများ သူတို့အခွင့်အရေးအတွက် တောင်းဆိုနေကြစဉ် (AP)
ယဉ်ကျေးမှု စံနှုန်းများအတိုင်း လိုက်နာဆောင်ရွက်လျက် ရှိသည်။ အမှန်တကယ် အကူအညီ လိုအပ်နေသော အမျိုးသမီးများအတွက် အမျိုးသမီး ဝန်ထမ်းများ မရှိလျှင် လုပ်ငန်းဆောင်ရွက်ရန် ဖြစ်နိုင်လိမ့်မည် မဟုတ်ဟု အာဖဂန်နစ္စတန်နိုင်ငံဆိုင်ရာ Norwegian Refugee Council ၏ အကြီးအကဲဖြစ်သူ နေးလ်တာနာ (Neil Turner) က ပြောသည်။
ထိုအဖွဲ့သည် နိုင်ငံတစ်ဝန်းလုံး၌ အမျိုးသမီး ဝန်ထမ်းဦးရေ ၄၆၈ ဦးကို ပိုင်ဆိုင်ထားသည်။ တာလီဘန်တို့သည် ၂၀၂၁ ခုနှစ်၊ သြဂုတ်လတွင် အာဖဂန်နိုင်ငံကို ထိန်းချုပ်လိုက်သည်။
ထို့ကြောင့် တိုင်းပြည်၏ စီးပွားရေး ပျက်ယွင်းသွားခဲ့ပြီး နိုင်ငံလည်း ပြောင်းလဲသွားခဲ့ရပြီး ပြည်သူသန်းပေါင်း များ စွာသည် ဆင်းရဲမှု၊ ငတ်မွတ်မှုတို့နှင့် ရင်ဆိုင်ရလျက်ရှိသည်။
တာလီဘန်တို့ကြောင့် နိုင်ငံခြား အကူအညီများလည်း ချက်ချင်းနီးပါး ရပ်တန့်သွားခဲ့သည်။
ဘဏ်မှ ငွေကြေးလွဲပြောင်းခြင်းကို ရပ်တန့်ခြင်း ၊ နိုင်ငံ၏ သီးသန့်ရန်ပုံငွေ ဘီလီယံများစွာကို ထိန်းချုပ်လိုက် သည်။
Source: AP
- By CNI
- Category: နိုင်ငံရေး
- Hits: 692
CNI International News
ဘန်ကောက်၊ ဒီဇင်ဘာ ၂၆
ဖြူးထိုင်းပါတီမှ ပေတုန်တန် ရှင်နာဝပ်(Paetongtarn Shinawatra) သည် ထိုင်းဝန်ကြီးချုပ်သစ်အဖြစ် ရေပန်းစားမှုစာရင်းမှာ ဦးဆောင်နေဆဲဖြစ်သည်ဟု Bangkok Post သတင်းတွင်ဖော်ပြသည်။
ထိုင်းနိုင်ငံ၏ ဖွံ့ဖြိုးတိုးတက်မှု စီမံခန့်ခွဲရေးဆိုင်ရာ အမျိုးသားအဖွဲ့(သို့မဟုတ်) Nida Poll ၏ စစ်တမ်း ကောက်ယူမှုတစ်ခုတွင် ထိုသို့ တွေ့ရှိခဲ့ရခြင်း ဖြစ်သည်။
အဆိုပါစစ်တမ်းကောက်ယူမှု ရလာဒ်အရ ထိုင်းနိုင်ငံမှ ထွက်ပြေးနေရသည့်ဝန်ကြီးချုပ်ဟောင်း သက်ဆင် (Thaksin)၏ သမီးဖြစ်သူ ပေတုန်တန်သည် ရေပန်းစားမှုစာရင်းတွင် United Thai Nation ပါတီ၏ လက်ရှိဝန်ကြီးချုပ် ပရာယွတ်ချန်အိုချာ (Prayut Chn-o-Cha) ကို အပြတ်အသတ် ဦးဆောင်လျက်ရှိသည်။ ဝန်ကြီးချုပ်၏ နောက်တွင် Move Forward ပါတီမှ ပီတာလမ်ဂျာအိုရန်ရတ်(Pita Limjaroenrat) သည် တတိယနေရာတွင်ရှိနေပြီး ၎င်းတို့နှစ်ဦးကြား ရေပန်းစားမှုမှာ သိသိသာသာကွာခြားခြင်းမရှိပေ။
ယခု စစ်တမ်းကောက်ယူမှုကို ဒီဇင်ဘာ ၁၇ ရက်မှ ၂၂ ရက် အတွင်း ပြုလုပ်ခဲ့ခြင်းဖြစ်သည်။ ထိုင်းနိုင်ငံရှိ နယ်ပယ်ကဏ္ဍအသီးသီးမှ အသက် ၁၈ နှစ်နှင့်အထက် လူအယောက် ၂၀၀၀ ကိုတယ်လီဖုန်းဖြင့် ဆက်သွယ်၍ လာမည့် အထွေထွေရွေးကောက်ပွဲအတွင်း ဝန်ကြီးချုပ်ရာထူးအတွက် ရေးပန်းအစားဆုံးအမတ်လောင်းနှင့် နိုင်ငံရေးပါတီများအကြောင်းကို မေးမြန်းစစ်တမ်းကောက်ယူခဲ့ခြင်း ဖြစ်သည်။
ပါတီထောက်ခံသူများနှင့် မဲဆွယ်ပွဲတစ်ခုတွင်တွေ့ရသော ပေတုန်တန်(ဓါတ်ပုံ-Pheu Thai Party)
ဝန်ကြီးချုပ်သစ်ရာထူးအတွက် မည်သူ့ကို ရွေးချယ်မည်လဲဆိုသည့်မေးခွန်းတွင် ဖြေဆိုသူများ၏ ၃၄ ရာခိုင်နှုန်းက ဖြူးထိုင်းပါတီ၏ ပေတုန်တန်ကို ရွေးချယ်ခဲ့ပြီး ၁၄ ဒသမ ၀၅ ရာခိုင်နှုန်းက လက်ရှိဝန်ကြီးချုပ် ပရာယွတ်ကို ရွေးချယ်ခဲ့သည်။ ၁၃ ဒသမ ၂၅ ရာခိုင်နှုန်းက Move Forward ပါတီ၏ ပီတာကို ရွေးချယ်ခဲ့ကာ ၈ ဒသမ ၂၅ ရာခိုင်နှုန်းက မည်သူမှ ဝန်ကြီးချုပ်ရာထူးနှင့် သင့်တော်မှုမရှိဟု ထူးထူးဆန်းဆန်း ဖြေကြားခဲ့သည်ကိုလည်း တွေ့ရသည်။ နံပါတ် ၅ နေရာတွင် Thai Sang Thai ပါတီခေါင်းဆောင် ဆူဒါရတ် ကီယူရာဖန်း(Sudarat Keyuraphan) က ၆ ဒသမ ၄၅ ရာခိုင်နှုန်းဖြင့် ရပ်တည်နေသည်ဟုလည်း သိရသည်။
ရွေးကောက်ပွဲတွင်အနိုင်ရမည့် နိုင်ငံရေးပါတီများနှင့်ပတ်သတ်၍မေးမြန်းရာတွင်လည်း ဖြေကြားသူများ၏ ၄၂ ဒသမ ၉၅ ရာခိုင်နှုန်းက ဖြူးထိုင်းပါတီကို ရွေးချယ်ခဲ့ကြပြီး ၁၆ ဒသမ ၆၀ ရာခိုင်နှုန်းက Move Forward ပါတီဟု ဖြေကြားခဲ့သည်။ မည်သည့်ပါတီမှ မဲမပေးဟု ဖြေကြားသူ ၈ ဒသမ ၃၀ ရာခိုင်နှုန်းရှိခြင်းကြောင့် ယင်းအဖြေသည် တတိယနေရာတွင်ရှိနေကာ စတုတ္ထနေရာတွင် United Thai Nation ပါတီက ၆ ဒသမ ၉၅ ရာခိုင်နှုန်း၊ ပဉ္စမ နေရာတွင် Democrat ပါတီက ၅ ဒသမ ၃၅ ရာခိုင်နှုန်းဖြင့် အသီးသီးရပ်တည်နေသည်ဟု သိရသည်။
Source:Bangkok Post
- By CNI
- Category: နိုင်ငံရေး
- Hits: 501
CNI International News
ပဲရစ်၊ဒီဇင်ဘာ ၂၄
ပြင်သစ်နိုင်ငံ၊ ပဲရစ်မြို့ လူစည်ကားရာ အရပ်တစ်ခုရှိ ကာ့ဒ်ယဉ်ကျေးမှုစင်တာ တစ်ခုတွင် သောကြာနေ့၌ ပစ်ခတ် မှု ဖြစ်ပွားခဲ့ရာ လူသုံးဦးသေဆုံးပြီး သုံးဦးဒဏ်ရာရရှိခဲ့သည်ဟု အေပီသတင်းတွင် ဖော်ပြထားသည်။
ပစ်ခတ်မှုအတွက် သံသယရှိသူ အသက် ၆၉ နှစ်အရွယ် အမျိုးသားတစ်ဦးကိုလည်း ဖမ်းဆီးထားသည်။
ယခုဖြစ်ရပ်အတွက် ပဲရစ်အစိုးရရှေ့နေရုံးက လူသတ်မှု၊ လူသတ်ရန် ကြံစည်မှုတို့ဖြင့် စုံစမ်းစစ်ဆေးနေပြီဖြစ်သည်။
သံသယရှိသူသည် တဲများတွင် နေထိုင်နေသော ရွှေ့ပြောင်း နေထိုင်သူများကို တိုက်ခိုက်မှုကြောင့် မကြာသေးခင် ကမှ ထောင်က လွတ်မြောက်လာခဲ့သူဖြစ်ကာ ယခုပစ်ခတ်မှု နောက်ကွယ်တွင် လူမျိုးရေးခွဲခြားမှုများ ရှိနေနိုင် သည်ဟု စုံစမ်းစစ်ဆေးသူများက စဉ်းစားနေပြီလည်း ဖြစ်သည်။
ပဲရစ်မြို့ အမှတ် ၁၀ ဒေသ၏ မြို့တော်ဝန်ကို တွေ့ရစည် (AP)
ပစ်ခတ်မှုကြောင့် ထိတ်လန့်နေသော ကာ့ဒ်လူမျိုးများက ၎င်းတို့ကို ပစ်မှတ်ထား တိုက်ခိုက်မည့် ခြိမ်းခြောက်မှုရှိ သည်ဟု ရဲတပ်ဖွဲ့မှ သတိပေးထားကြောင်းနှင့် ယခုပစ်ခတ်မှုအတွက် တရားမျှတမှုကို တောင်းဆိုကြောင်း ပြောသည်။
ပစ်ခတ်မှုသည် ခရစ္စမတ်ပွဲတော် ကာလအဖြစ် လူများရှုပ်ထွေးနေချိန်တွင် ဖြစ်ပွားခဲ့ကြောင်း၊ နေ့လည်ပိုင်း ပစ်ခတ်မှုတွင် ကာ့ဒ်စင်တာ၊ စားသောက်ဆိုင် တစ်ခုနှင့် ဆံပင်အလှပြင်ဆိုင် တစ်ခုတို့ပါ ထိခိုက်သွားခဲ့ကြောင်း ပဲရစ်မြို့ အမှတ် ၁၀ ဒေသ၏ မြို့တော်ဝန်က ပြောသည်။
အဆိုပါ ပစ်ခတ်မှုကို ဖြစ်စေသည့် စေ့ဆော်မှုအား ယခုအထိ ရှင်းရှင်းလင်းလင်း မသိရသေးကြောင်း သူမက သတင်းထောက်များကို ပြောခဲ့သည်။
၎င်း ဖြေကြားနေစဉ်အတွင်း ဘေးနားမှလူများက တူရကီသမ္မတ အာဒိုဝမ်ကို ရည်ညွှန်းကာ အာဒိုဝမ် အကြမ်းဖက် သမားဟု သံပြိုင်အော်ဟစ် နေသည်ကိုလည်း တွေ့ရသည်။
တူရကီကို အကြမ်းဖက်သမားအဖြစ် အော်ဟစ်နေစဉ် (AP)
သေနတ်သမားသည် ကာ့ဒ်စင်တာတွင်းသို့ ဦးစွာ ဝင်ရောက်ပြီး ထိုမှတဆင့် စားသောက်ဆိုင်၊ ဆံပင်ညှပ်ဆိုင်သို့ သွားခဲ့ကြောင်း၊ ၎င်းကို လမ်းသွားလမ်းလာ နှစ်ဦးမှ တားဆီးခဲ့ခြင်း ဖြစ်ကြောင်းလည်း ပစ်ခတ်မှုဖြစ်စဉ် အနီးအနား ရှိ ဆောက်လုပ်ရေး လုပ်သားတစ်ဦးက ပြောသည်။
သေနတ်သမားသည် ပစ္စတိုပြောင်းတို သေနတ်ဖြင့် တိတ်တိတ် ဆိတ်ဆိတ် သွေးအေးအေးဖြင့် ပစ်ခတ်ခဲ့ခြင်း ဖြစ်သည်ဟုလည်း ၎င်းက ဆက်လက် ပြောကြားသည်။
ပစ်ခတ်မှုတွင် ဒဏ်ရာရရှိခဲ့သူ သုံးဦးမှ တစ်ဦးသည် အရေးပေါ် အခြေအနေတွင်ရှိပြီး ကျန်နှစ်ဦးမှာ အသေးစား ဒဏ်ရာများသာ ရရှိခဲ့ကြောင်းနှင့် သေနတ်သမားသည်လည်း မျက်နှာတွင် ဒဏ်ရာနှင့် ဖမ်းဆီးခံခဲ့ရကြောင်း ပဲရစ် အစိုးရရှေ့နေ လော်ရီဘတ်စီအူး (Laure Beccuau) က ပြောသည်။
ယခု ပစ်ခတ်မှုနှင့် ပတ်သက်၍ အကြမ်းဖက် နှိမ်နင်းရေး အဖွဲ့များနှင့် ဆက်သွယ်ထားမှု ရှိသော်လည်း ယခု ဖြစ်ရပ် သည် အကြမ်းဖက်မှုနှင့် ဆက်စပ်ခြင်း ရှိ/မရှိကို ရှင်းလင်း ပြောဆိုခဲ့ခြင်း မရှိပေ။
Source: AP
- By CNI
- Category: နိုင်ငံရေး
- Hits: 941
CNI International News
ဆိုးလ်၊ ဒီဇင်ဘာ - ၂၄
မြောက်ကိုရီးယားနိုင်ငံက တာတိုပစ် ပဲ့ထိန်းဒုံးကျည် နှစ်စင်းကို သောကြာနေ့(ဒီဇင်ဘာ ၂၃ ရက်)တွင် အရှေ့ဘက် ရေပိုင်နက်အတွင်းသို့ ပစ်ခတ်ခဲ့သည်ဟု အေပီသတင်းမှာ ဖော်ပြထားသည်။
မြောက်ကိုရီးဘက်မှ ကျူးကျော်ရန် လေ့ကျင့်မှုဟု ယူဆထားသော အမေရိကန်-တောင်ကိုရီးယား ပူးတွဲ လေတပ် စစ်ရေး လေ့ကျင့်မှု စတင်ပြီး ရက်ပိုင်းအကြာတွင် ယခုလို လုပ်ဆောင်ခဲ့ခြင်း ဖြစ်သည်။
မြောက်ကိုရီးယားအစိုးရသည် ယခုနှစ်အတွင်း ဒုံးကျည် ပစ်ခတ် စမ်းသပ်မှုများစွာ ပြုလုပ်ခဲ့သည်။
၎င်းက နိုင်ငံ၏ လက်နက်စွမ်းအင်ကို မြှင့်တင်ရန်အပြင် ပြိုင်ဘက်များနှင့် ဆွေးနွေးညှိနှိုင်းရာတွင် အသာစီးရယူနိုင် ရန် ကြိုးပမ်းမှု တစ်ရပ်ဟု ကျွမ်းကျင်သူများက ရှုမြင်ထားသည်။
တောင်ကိုရီးယားနဲ့ အမေရိကန် စစ်ရေးလေ့ကျင့်နေစဉ် (GETTY IMAGES)
ထို့နောက် မြောက်ကိုရီးယားသည် နိုင်ငံအတွက် ပထမဆုံးသော ထောက်လှမ်းရေး ဂြိုလ်တု လွှတ်တင်ရန် လိုအပ် နေသည့် အရေးပါသော စမ်းသပ်မှုများအပြင် အမေရိကန်သို့ ရောက်ရှိနိုင်သည့် ပိုမိုရွေ့လျားနိုင်သော တိုက်ချင်းပစ် ပဲ့ထိန်း ဒုံးကျည် စမ်းသပ်မှုတစ်ခုကိုပါ လုပ်ဆောင်နိုင်ခဲ့သည်ဟု မကြာသေးခင်က ပြောခဲ့ဖူးသည်။
သောကြာနေ့(ဒီဇင်ဘာ ၂၃ ရက်) ညနေ ၄ နာရီ ၃၂ မိနစ်တွင် မြောက်ကိုရီးယားမှ ဒုံးကျည်နှစ်စင်း ပစ်လွှတ်ခဲ့သည် ကို သတိပြုမိခဲ့သည်ဟု တောင်ကိုရီးယားစစ်ဘက်က ပြောသည်။ မြောက်ကိုရီးယားဘက်မှ အနည်းဆုံး ဒုံးကျည် တစ်စင်း ပစ်လွှတ်ခဲ့သည်ဟုလည်း ဂျပန်ဘက်က အတည်ပြုပေးခဲ့သည်။
သို့သော် လက်ရှိအချိန်အထိ မြောက်ကိုရီးယားဘက်က မည်သည့် ဒုံးကျည် အမျိုးအစားကို ပစ်လွှတ်ခဲ့သည်ကို တော့ မသိရသေးပေ။
တောင်ကိုရီးယား စစ်ဘက်၏ အဆိုအရ ဒုံးကျည်များသည် ၂၅၀ ကီလိုမီတာနှင့် ၃၅၀ ကီလိုမီတာအထိ အသီးသီး ပျံသန်းခဲ့ပြီး ကိုရီးယားကျွန်းဆွယ်နှင့် ဂျပန်နိုင်ငံအကြား ရေပြင်သို့ ဆင်းသက်သွားသည်ဟု သိရသည်။
ဒေါ်နယ်ထရမ့်နဲ့ ကင်မ်ဂျုံအန် ဆွေးနွေးခဲ့စဉ်
ဒုံးကျည်တစ်စင်းသည် ကီလိုမီတာ ၃၀၀ နီးပါးအထိ သွားခဲ့သည်ဟု ဂျပန်ကာကွယ်ရေးဌာန ဒုဝန်ကြီး တိုရှီရို အီနို(Toshiro Ino) က ပြောသည်။
ထိုဒုံးကျည်သည် ပျံသန်းရာတွင် ပုံမှန်မဟုတ်သော အခြေအနေများ ရှိနိုင်ကြောင်းလည်း ၎င်းက ပြောသည်။
အဆိုပါ ပြောစကားသည် မြောက်ကိုရီးယား၏ နည်းပညာမြင့် နျူကလီးယား တင်ဆောင်နိုင်သော KN-23 ဒုံးကျည်များကို ရည်ညွှန်းခြင်း ဖြစ်နိုင်သည်။
ယခုပစ်ခတ်မှုများသည် ဆိုးဆိုးရွားရွား ရန်စမှုဖြစ်သည်ဟု တောင်ကိုရီးယား စစ်တပ်က ပြောသလို အပြည်ပြည် ဆိုင်ရာ ငြိမ်းချမ်းရေးကို ထိခိုက်စေနိုင်သည်ဟု ပြောသည်။
တောင်ကိုရီးယား အနေဖြင့် ဖြစ်လာနိုင်သည့် အန္တရာယ်များအတွက် အဆင်သင့် ပြင်ဆင်ထားကာ အမေရိကန်နှင့် ပူးပေါင်း၍ မြောက်ကိုရီးယား၏ လှုပ်ရှားမှုများကို အနီးကပ် စောင့်ကြည့်သွားမည်ဟု ပြောသည်။
လက်နက်များကို ထပ်ခါထပ်ခါ စမ်းသပ်ခြင်းဖြင့် မြောက်ကိုရီးယားသည် တင်းမာမှုများအား သိသိသာသာ မြင့်တက်လာအောင် လုပ်ဆောင်နေသည်ဟုလည်း အီနိုက စွပ်စွဲခဲ့သည်။
Source: AP
- By CNI
- Category: နိုင်ငံရေး
- Hits: 574
CNI International News
အွာဂါဒူဂူ၊ ဒီဇင်ဘာ ၂၄
ကုလသမဂ္ဂအဆင့်မြင့်အရာရှိ ဘာဘရာမန်ဇီ (Barbara Manzi)ကို နိုင်ငံတွင်းမှ ချက်ချင်းထွက်သွားရန် ဘာကီနာဖာဆို စစ်အစိုးရက သောကြာနေ့(ဒီဇင်ဘာ ၂၃ ရက်)တွင် နှင်ထုတ်ခဲ့သည်ဟု အယ်ဂျာဇီးယား သတင်း၌ ဖော်ပြထားသည်။
သို့သော် မည်သည့် အတွက်ကြောင့် ယခုကဲ့သို့ နှင်ထုတ်ရသည်ကိုတော့ အကြောင်းပြချက် မပေးထားကြောင်း သိရသည်။
အစိုးရပြောခွင့်ရပုဂ္ဂိုလ်က “နှင်ထုတ်ရသည့် အကြောင်းအရင်းကို ချက်ချင်း ရှင်းပြခြင်း မရှိခဲ့သော်လည်း ကုလသမဂ္ဂ၏ ဌာနေကိုယ်စားလှယ်ကို နိုင်ငံအတွက် အလိုမရှိသော လူဟု ခိုင်းနှိုင်းသုံးနှုန်းခဲ့ပြီး သောကြာနေ့တွင် တိုင်းပြည်မှထွက်သွားရမည်”ဟု ပြောခဲ့သည်။
ယခုဖြစ်ရပ်နှင့်ပတ်သက်၍ ကုလသမဂ္ဂရုံးချုပ်ကို ဆက်သွယ် မေးမြန်းခဲ့သော်လည်း ချက်ချင်း တုန့်ပြန်ခဲ့ခြင်း မရှိပေ။
ဘာကီနာဖာဆိုနိုင်ငံသည် ကမ္ဘာ့အဆင်းရဲဆုံးနိုင်ငံများမှ တစ်ခုဖြစ်ကာ အယ်လ်ကိုင်းဒါ (al-Qaeda) နှင့် IS အဖွဲ့ တို့နှင့် ဆက်စပ်နေသော ပဋိပက္ခများဖြင့် ရင်ဆိုင်နေရသည်။
အဆိုပါ ပဋိပက္ခအတွင်း အရပ်သား ထောင်ပေါင်းများစွာ သေဆုံးခဲ့ရသလို ဒေသတွင်း အလျင်မြန်ဆုံး ပေါ်ပေါက် လာသည့် လူသားချင်းစာနာမှုဆိုင်ရာ ပဋိပက္ခတစ်ခုကိုလည်း ပေါ်ပေါက်လာစေခဲ့သည်။
ဘာကီနာဖာဆိုကနေ ထွက်သွားဖို့ နှင်ထုတ်ခံရတဲ့ ကုလအရာရှိ ဘာဘရာမန်ဇီ(GETTY IMAGES)
ထိုအခြေအနေများကြောင့် လူ ၂ သန်းနီးပါး ဘေးလွတ်ရာ ထွက်ပြေးနေရပြီး အများစုမှာ ကုလသမဂ္ဂမှ စီစဉ် ပေးထားသည့် ယာယီတဲများတွင် နေထိုင်နေကြရသည်။
အကြမ်းဖက် အဖွဲ့များကြောင့်ဖြစ်သည့် အကြမ်းဖက်မှုများသည် ခုနစ်နှစ်တိုင် ကြာမြင့်ခဲ့ပြီဖြစ်ကာ နိုင်ငံ၏ မြောက်ဘက်နှင့် အရှေ့ဘက်တို့တွင် အဓိကပေါ်ပေါက်လျက်ရှိသည်။
အကြမ်းဖက်မှုများကြောင့် အစုလိုက်အပြုံလိုက် ငတ်မွတ်မှုကို ဖြစ်စေကာ အကူအညီပေးရေး အဖွဲ့အစည်များ သည်လည်း ဝင်ရောက်နိုင်ရန် ခက်ခဲလျက်ရှိသည်။
ကုလသမဂ္ဂသည် နိုင်ငံတွင်းရှိ ငတ်မွတ်နေသော ကလေးသူငယ်များအတွက် အစားအစာများ ထောက်ပံ့ခြင်း အပါအဝင် အရေးပါသော ဝန်ဆောင်မှုလုပ်ငန်းများကို ဆောင်ရွက်ပေးလျက်ရှိသည်။
အစိုးရဘက်မှ နှင်ထုတ်ခဲ့သော မင်ဇီသည် ဖွံ့ဖြိုးဆဲနိုင်ငံများတွင် လူသားချင်း စာနာမှုဆိုင်ရာ ဆောင်ရွက်ချက်များ လုပ်ဆောင်ခြင်းနှင့်ပတ်သက်၍ အတွေ့အကြုံများသူဖြစ်ပြီး သူမကို ပြီးခဲ့သည့်နှစ်တွင် ဘာကီနာဖာဆိုနိုင်ငံ အတွက် တာဝန်ပေးခဲ့သည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 558
CNI International News
ဘေဂျင်း၊ ဒီဇင်ဘာ ၂၃
တရုတ်သမ္မတတစ်ဖြစ်လဲ တရုတ်ကွန်မြူနစ်ပါတီ(CPC) ဗဟိုကော်မတီ၏ အထွေထွေအတွင်းရေးမှူးချုပ်တာဝန် နှင့်တရုတ်သမ္မတ တာဝန်တို့ကို ထမ်းဆောင်နေသည့် ရှီကျင့်ဖျင် (Xi Jinping)နှင့် ရုရှားသမ္မတဟောင်း ဒီမီထရီ မက်ဗီဒက်ဗ် (Dmitry Medvedev)တို့ တွေ့ဆုံ၍ ယူကရိန်းအရေး ဆွေးနွေးခဲ့ကြသည်။
လက်ရှိတွင် ဒီမီထရီ မက်ဗီဒက်ဗ်သည် ညီညွတ်သောရုရှားပါတီ (United Russia) ဥက္ကဋ္ဌအဖြစ် တာဝန် ထမ်းဆောင်လျက်ရှိသည်။
ရှီကျင့်ဖျင်နှင့် မက်ဗီဒက်ဗ်တို့သည် ဒီဇင်ဘာ ၂၁ ရက်နေ့က တွေ့ဆုံခဲ့ခြင်းဖြစ်သည်ဟု Global Times သတင်းတွင် ဖော်ပြထားသည်။
အဆိုပါ တွေ့ဆုံပွဲတွင် နှစ်ဖက်စလုံးက နှစ်နိုင်ငံဆက်ဆံရေး အကြောင်းနှင့် ယူကရိန်း ပဋိပက္ခအပေါ် ဆွေးနွေးခဲ့ ကြသည်။
ရှီကျင့်ဖျင်နဲ့ မက်ဗီဒက်ဗ် တွေ့ဆုံ ဆွေးနွေးစဉ်
ထိုဆွေးနွေးမှုက ယူကရိန်းအရေး ငြိမ်းချမ်းရေး ဆွေးနွေးပွဲများတွင် တိုးတက်မှုများ ရှိလာစေရေး အကူအညီ ဖြစ်စေရန် မျှော်လင့်ထားသည်။ ခေါင်းဆောင်နှစ်ဦး တွေ့ဆုံပွဲသည် နှစ်နိုင်ငံရေတပ်များ ပူးတွဲစစ်ရေး လေ့ကျင့်မှု ကျင်းပခြင်းနှင့်လည်း တိုက်ဆိုင်နေသည်။
ထို လေ့ကျင့်မှုက နှစ်နိုင်ငံကြား အပြန်အလှန် ယုံကြည်မှုကို ထင်ဟပ်ကာ ငြိမ်းချမ်းရေးနှင့် တည်ငြိမ်ရေးတို့ အတွက် အထောက်အကူ ဖြစ်စေနိုင်သည်ဟုလည်း လေ့လာသူများက သုံးသပ်ထားသည်။
မက်ဒီဗက်ဗ်နှင့် တွေ့ဆုံစဉ် သမ္မတရှီက “CPC နှင့်ရုရှား ပါတီတို့အကြား ကာလရှည် ဆက်ဆံရေးမှာ ပိုမို ကောင်းမွန်သော လမ်းကြောင်းတစ်ခု ဖြစ်လာပြီး နှစ်နိုင်ငံကြား နိုင်ငံရေးဆိုင်ရာ အပြန်အလှန် ယုံကြည်မှုကို မြှင့်တင်ပေးသည့်အပြင် အပြန်အလှန် အကျိုးဖြစ်ထွန်းစေမည့် ပူးပေါင်းဆောင်ရွက်မှုများကို မြှင့်တင်ပေးကာ မဟာဗျူဟာမြောက် ညီညွှတ်မှုကို ဖော်ပြနေသည်”ဟု ပြောသည်။
နိုင်ငံတကာ ပြောင်းလဲမှုဆိုင်ရာ စမ်းသပ်မှုများ ရှိနေသော်လည်း ပြီးခဲ့သည့် ဆယ်စုနှစ်အတွင်း တရုတ်-ရုရှား ဆက်ဆံရေးမှာ သိသိသာသာ ဖွံ့ဖြိုးတိုးတက်လာကြောင်း၊ ခေတ်သစ် တစ်ခုအတွက် နှစ်နိုင်ငံကြား ပူးပေါင်း ဆောင်ရွက်မှုဆိုင်ရာ သိသာထင်ရှားသည့် မဟာဗျူဟာမြောက် မိတ်ဖက်ဆက်ဆံရေး တစ်ခု ဖော်ဆောင်ခြင်းသည် သက်ဆိုင်ရာ နိုင်ငံအခြေအနေများအပေါ်တွင် အခြေခံကာ နှစ်ဖက်စလုံးမှ ရွေးချယ်ထားသော ကာလရှည် မဟာ ဗျူဟာမြောက် ဆက်ဆံရေး ဖြစ်သည်ဟု ရှီက ပြောခဲ့သည်။
ဇာလန်းစကီးနဲ့ ဘိုင်ဒန် တွေ့ဆုံစဉ်
ညီညွတ်သော ရုရှားပါတီနှင့် CPC တို့ကြား ဆက်ဆံရေးမှာ တရုတ်-ရုရှား ဆက်ဆံရေးအတွက် အရေးပါသော အစိတ်ပိုင်းတစ်ခု ဖြစ်သည်ဟု မက်ဗီဒက်ဗ်က ပြောသည်။
ရုရှားပါတီအနေဖြင့် နိုင်ငံခေါင်းဆောင်များအကြား ရရှိထားသော သဘောတူညီချက်များကို အပြည့်အဝ အကောင် အထည် ဖော်လိုကြောင်း၊ စီးပွားရေး၊ ကုန်သွယ်ရေး၊ စွမ်းအင်နှင့် စိုက်ပျိုးရေးကဏ္ဍတို့တွင် အပြန်အလှန် ပူးပေါင်း မှုများကို မြှင့်တင်ကာ ပြင်ပဖိအားများနှင့် မမျှတသော လုပ်ရပ်များကို ကြံ့ကြံ့ခံရင်း နှစ်နိုင်ငံဆက်ဆံရေးအား မြှင့် တင် သွားလိုသည်ဟု ပြောခဲ့သည်။
ယူကရိန်းအရေးနှင့် ပတ်သက်၍ ရှီက တရုတ်နိုင်ငံ၏ ရပ်တည်ချက်နှင့် မူဝါဒများအကြောင်းကို ပြောကြားခဲ့ကာ ငြိမ်းချမ်းရေး ဆွေးနွေးပွဲများကို လုပ်ဆောင်သွားရန်လည်း တိုက်တွန်းခဲ့သည်။
Source: Global Times
- By CNI
- Category: နိုင်ငံရေး
- Hits: 708
CNI International News
ဆူဗာ၊ ဒီဇင်ဘာ ၂၃
လွှတ်တော် မခေါ်နိုင်ခဲ့သည့် ပြီးခဲ့သည့် သီတင်းပတ် အငြင်းပွားဖွယ် ရွေးကောက်ပွဲပြီးနောက် နိုင်ငံ၏ တရား ဥပဒေ စိုးမိုးမှုကို ထိန်းသိမ်းရန် ဖီဂျီစစ်တပ်အား ဝန်ကြီးချုပ် ဖရန့်ဘိုင်နီမာရာမာ (Frank Bainimarama)က အကူအညီ တောင်းခံခဲ့ရသည်ဟု အယ်ဂျာဇီးယားသတင်းတွင် ဖော်ပြထားသည်။
နိုင်ငံ၏ သက်တော်ရှည် ဝန်ကြီးချုပ် ဖရန့်ဘိုင်နီမာရာမာက ယခုဖြစ်ရပ်ကို ကြာသပတေးနေ့(ဒီဇင်ဘာ ၂၂ ရက်) တွင် အတည်ပြုပေးသည်။
ရွေးကောက်ပွဲ မတိုင်ခင် လူမျိုးစု အကြမ်းဖက်မှုများ ပေါ်ပေါက်ခဲ့သည်ဆိုသော သတင်းများကြောင့် ယခုကဲ့သို့ စစ်တပ်ကို အကူအညီတောင်းခံရခြင်း ဖြစ်ကြောင်း ၎င်းက ပြောသည်။
ရွေးကောက်ပွဲတွင် ညွှန့်ပေါင်းအစိုးရဖွဲ့ရန် လိုအပ်သော မဲအရေအတွက်ကို ရရှိခဲ့သည်ဟု ပြိုင်ဘက် ဆီတီဗန်နီ ရာဗူကာ(Sitiveni Rabuka)၏ Political Alliance ပါတီနှင့် တခြား ပါတီနှစ်ခုတို့က ပြောသော်လည်း ဘိုင်နီ မာရာမာက ဝန်ခံရန် ငြင်းဆိုထားသည်။
ဝန်ကြီးချုပ် ဖရန့်ဘိုင်နီမာရာမာကိုတွေ့ရစဉ် (GETTY IMAGES)
“အစိုးရအဖြစ် ကျနော်တို့မှာ တာဝန်ရှိနေသရွေ့ ဖီဂျီနိုင်ငံသားတိုင်း၏ လုံခြုံရေးကို ကာကွယ်ရမည်မှာ ကျနော်တို့ တာဝန်ဖြစ်သည်”ဟု ၎င်းက လူမှုကွန်ယက်တွင် ရေးသားခဲ့သည်။
ဒီဇင်ဘာ ၁၄ ရက်က ရွေးကောက်ပွဲ ပြီးနောက် ပထမဆုံးအကြိမ် လူသိရှင်ကြား ရေးသား ပြောဆိုခြင်းလည်း ဖြစ် သည်။
“ရွေးကောက်ပွဲ အချိန်ကာလတွင်း ကျနော်တို့ နိုင်ငံသားများ ထိခိုက်မှု၊ အင်ဒို-ဖီဂျီ အိမ်များနှင့်စီးပွားရေး လုပ်ငန်း များ အကြမ်းဖက် ခံရသည်ဆိုသည့် သတင်းများက စိတ်ပျက်စရာ ကောင်းသည်”ဟု ဝန်ကြီးချုပ်က ပြောခဲ့သည်။
ဘိုင်နီမာရာမာနှင့် ရဲတပ်ဖွဲ့၊ စစ်ဘက်ဆိုင်ရာ အရာရှိများ တွေ့ဆုံပြီးနောက် စစ်တပ်နှင့် ရေတပ် တပ်သားများကို အကူအညီ တောင်းခံခဲ့ခြင်း ဖြစ်သည်ဟု ရဲကော်မရှင်နာ ဆီတီဗန်နီကွီလီဟို (Sitiveni Qiliho)က ပြောသည်။
နိုင်ငံတွင်းရှိ လူနည်းစု တိုင်းရင်းသားများအပေါ် ခြိမ်းခြောက်မှုများ ရှိနေပြီး ၎င်းတို့သည် နိုင်ငံရေး အခြေအနေများ ကြောင့် ကြောက်ရွံမှုဖြင့် နေထိုင်နေရသည်ဟု ကွီလီဟိုက ပြောသည်။
ပြိုင်ဘက် ဆီတီဗန်နီ ရာဗူကာ(Sitiveni Rabuka)ကိုတွေ့စဉ် (GETTY IMAGES)
သို့သော် ထိုသတင်းများမှာ လုံးဝ အခြေအမြစ်မရှိဟု နိုင်ငံ၏ပထမဆုံးသော အင်ဒို-ဖီဂျီ ဝန်ကြီးချုပ် မဟန်ဒရာ ချောက်ရီ (Mahendra Chaudhry)က ပြောသည်။
မတည်ငြိမ်မှုများ လုံးဝ မရှိကြောင်းနှင့် ပြည်သူများသည် ဝန်ကြီးချုပ်အသစ် ရွေးချယ်ရေး လွှတ်တော်ခေါ်ရန် သမ္မတကို စောင့်ဆိုင်းနေကြောင်း မဟန်ဒရာချောက်ရီ (Mahendra Chaudhry) က ပြောသည်။
၎င်းသည် ၂၀၀၀ ခုနှစ် အာဏာသိမ်းမှုတွင် ရာထူးမှ ဖယ်ရှားခံခဲ့ရသူဖြစ်သည်။
ပစိတ်ဖိတ် နိုင်ငံငယ်ဖြစ်သည့် ဖီဂျီသည် လွန်ခဲ့သော ၃၅ နှစ်အတွင်း စစ်တပ် အာဏာသိမ်းမှု ၄ ကြိမ်နှင့် ကြုံတွေ့ ခဲ့ရပြီး ဖြစ်သည်။
လက်ရှိ ဝန်ကြီးချုပ် ဘိုင်နီမာရာမာသည် စစ်တပ် အာဏာသိမ်းမှု တစ်ခုကို ဦးဆောင်ခဲ့ပြီးနောက် မိမိကိုယ် မိမိ ဒီမိုကရက်တစ် ခေါင်းဆောင်တစ်ဦးအဖြစ် အသွင်ပြောင်းကာ ရာထူးကို ၁၆ နှစ်ကြာ ရယူထားခဲ့သူ ဖြစ်သည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 915
CNI International News
မော်စကို၊ ဒီဇင်ဘာ ၂၃
အမေရိကန်နိုင်ငံသည် ရုရှားကိုဆန့်ကျင်သည့် ကြားခံစစ်ပွဲတစ်ခုကို လုပ်ဆောင်နေကြောင်း ရုရှားအစိုးရဘက်မှ စွပ်စွဲလိုက်သည်ဟု Aljazeera သတင်းတွင်ဖော်ပြသည်။
ယူကရိန်းသမ္မတ၏ သမိုင်းဝင်အမေရိကားခရီးစဉ်တွင် ယူကရိန်းကို အမေရိကန်ဘက်မှ စစ်လက်နက်များ တိုးမြှင့် ထောက်ပံ့ပေးသွားမည်ဟု ပြောဆိုခဲ့ပြီးနောက် ယခုကဲ့သို့ စွပ်စွဲလိုက်ခြင်းဖြစ်သည်။
ယူကရိန်းသမ္မတ ဇာလန်းစကီး (Zelenskyy) သည် ဗုဒ္ဓဟူးနေ့ အမေရိကန်ခရီးစဉ်တွင် အမေရိကန်သမ္မတ ဂျိုးဘိုင်ဒန် (Joe Biden) နှင့် တွေ့ဆုံခဲ့သည်။ ထိုတွေ့ဆုံမှုတွင် Patriot ဒုံးကျည်ကာကွယ်ရေးစနစ်အပါအဝင် ဒေါ်လာ ၁ ဒသမ ၈ ဘီလီယံတန်ကြေးရှိ စစ်ဘက်သုံးပစ္စည်းများကို ယူကရိန်းသို့ ထောက်ပံ့ပေးမည်ဟု ဘိုင်ဒန်က ပြောကြားခဲ့သည်။
ယင်းနှင့်ပတ်သတ်၍ ရုရှားအစိုးရအဖွဲ့ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ် (Dmitry Peskov) က သတင်း ထောက်များနှင့်တွေ့ဆုံရာတွင် အမေရိကန်တို့ ယခုတစ်ခေါက်ပေးပို့မည့် ထောက်ပံ့ရေးပစ္စည်းများက ရက် ၃၀၀ ကျော်ကြာ ယူကရိန်းပဋိပက္ခကို ရပ်တန့်နိုင်လိမ့်မည်မဟုတ်ဟု ပြောခဲ့သည်။အမေရိကန်တို့၏ ထောက်ပံ့မှုကြောင့် မြန်မြန်အဆင်ပြေသွားရန်ထက် ပိုဆိုးရွားဖို့ ဖြစ်လာနိုင်သည်ဟုလည်း ၎င်းက ထပ်လောင်းပြောကြားပြီး ယင်းက ရုရှားနိုင်ငံ၏ အထူးစစ်ဆင်ရေးဆိုင်ရာ ရည်မှန်းချက်များကို တားဆီးဖို့မဖြစ်နိုင်ပါဘူးဟု ပတ်စ်ကော့ဗ်က ဆိုသည်။
ရုရှားအစိုးရ ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ်(ဓါတ်ပုံ-ရိုက်တာ)
ယူကရိန်း ကျူးကျော်စစ်နှင့်ပတ်သက်၍ ရုရှားတို့ဘက်က ၎င်းတို့၏ ထိုးစစ်ဆင်မှုများအပေါ် သုံးနှုန်းထားသည့် အသုံးအနှုန်းအတိုင်း ပြောဆိုသွားခဲ့ခြင်းဖြစ်သည်။ ဇာလန်းစကီး၏ အမေရိကန်ခရီးစဉ်အတွင်း ငြိမ်းချမ်းရေး အတွက် တောင်းဆိုခြင်း သို့မဟုတ် ရုရှားဘက်မှစိုးရိမ်မှု များအပေါ် နားထောင်ပေးလိုစိတ်မရှိခြင်းတို့ကိုသာ မြင်တွေ့ခဲ့ရပြီး ယင်းက အမေရိကန်အနေဖြင့် ယူကရိန်းကို အသုံးချပြီး ရုရှားနှင့်ကြားခံစစ်ပွဲတစ်ခု ဆင်နွှဲနေခြင်း သာဖြစ်သည်ဟုလည်း ပတ်စ်ကော့ဗ်က ပြောခဲ့သည်။
ယူကရိန်းသမ္မတ ဇာလန်းစကီး၏ ရုရှားခရီးစဉ်သည် ယူကရိန်းကို ရုရှားတို့ဘက်မှ ကျူးကျော်ခဲ့သည့် ဖေဖော်ဝါရီ ၂၄ ရက် နောက်ပိုင်း ပထမဆုံးသော နိုင်ငံခြားခရီးစဉ်ဖြစ်သည်။ ကွန်ဂရက်ပူးတွဲအစည်းအဝေးတွင် မိန့်ခွန်းမပြော ခင် ဇာလန်းစကီးသည် သမ္မတဘိုင်ဒန်နှင့်အိမ်ဖြူတော်တွင်တွေ့ဆုံခဲ့ပြီး ထိုတွေ့ဆုံမှုအတွင်း ယူကရိန်းသို့ Patriot ဒုံးကျည်စနစ်များ ပေးပို့သွားမည်ဟု ဘိုင်ဒန်က ကတိပြုခဲ့သည်။
ရုရှားတို့အနေဖြင့် ယူကရိန်းနိုင်ငံတစ်ဝန်းမှ စွမ်းအင်ဆိုင်ရာ အခြေခံအဆောက်အဦများကို ပစ်မှတ်ထားကာ လေကြောင်းတိုက်ခိုက်နေမှုများကို ကာကွယ်ရန်အတွက် ယူကရိန်းလေကြောင်း ကာကွယ်ရေးစနစ်ကို အဆင့် မြှင့်တင်ရေး အကူအညီများပေးရန် ဇာလန်းစကီးသည် ယခင်ကတည်းက တောင်းဆိုခဲ့ဖူးသည်။ ထို တောင်းဆိုမှု တွင် Patriot ဒုံးကျည်စနစ်လည်း တစ်ခုအပါအဝင်ဖြစ်သည်။ ယင်းသည် အမေရိကန်၏ ခေတ်ရှေ့ပြေး လေကြောင်းကာကွယ်ရေးစနစ်တစ်ခုဖြစ်ကာ လေယာဉ်များနှင့် ပဲ့ထိန်းဒုံးများကို ကြားဖြတ်နိုင်စွမ်းရှိသည်ဟု သိရသည်။
Source:Aljazeera