CNI International News

တဲလ် အဗစ်၊ အောက်တိုဘာ ၁၂

အစ္စရေးနိုင်ငံနှင့် ဟားမာ့စ် စစ်သွေးကြွ တပ်ဖွဲ့ကြား ဖြစ်ပွားနေသော စစ်ပွဲတွင် အမေရိကန်က အစ္စရေးကို စစ်ရေးနှင့်ထောက်လှမ်းရေး အကူအညီများ ပေးအပ်သွားမည်ဟု အမေရိကန်သမ္မတ ဂျိုးဘိုင်ဒန် (Joe Biden)က ပြောသည်။

လက်ရှိတွင် အစ္စရေးကို ဟားမာ့စ်က ဝင်ရောက်တိုက်ခိုက်ခဲ့သည့် အောက်တိုဘာ ၇ ရက်မှ စတင်ပြီး အောက်တို ဘာ ၁၁ ရက်အထိ နှစ်ဖက်စလုံးတွင် သေဆုံးသူ ၂၀၀၀ ကျော်အထိ ရှိလာခဲ့သည်ဟု ဘန်ကောက်ပို့စ်မှ ဖော်ပြခဲ့ သည်။
သေဆုံးသူ စုစုပေါင်းအနက် အစ္စရေးဘက်တွင် လူပေါင်း ၁၂၀၀ ထက်မနည်း သေဆုံးခဲ့ပြီး ဂါဇာဒေသတွင် လူပေါင်း ၉၀၀ ကျော် သေဆုံးခဲ့သည်။ 

အမေရိကန်သမ္မတ ဂျိုးဘိုင်ဒန် (Joe Biden) ကမူ အစ္စရေးကိုး စစ်ရေးနှင့် ထောက်လှမ်းရေး အကူအညီများ အပြည့်အဝ ပေးသွားမည်ဟု ကတိပြုခဲ့သည်။

တခြားတစ်ဖက်မှာတော့ တရုတ်က ပါလက်စတိုင်းအတွက် လူသားချင်း စာနာထောက်ထားမှုဆိုင်ရာ အကူအညီ များပေးရန် တိုက်တွန်းခဲ့သည်။

ဟားမာ့စ်နဲ့ အစ္စရေး ဒုံးကျည်များဖြင့် ပစ်ခတ်နေကြစဉ်

ဘိုင်ဒန်သည် အစ္စရေး ဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) နှင့် ဖုန်းဆက်သွယ် ပြောကြားခဲ့ချိန်က အမေရိကန်၏ ကူညီထောက်ပံ့မှုကို အလေးပေး ပြောခဲ့သည်။

ထို့အပြင် အစ္စရေး၏ လိုအပ်ချက်များကို ကူညီပေးရန် အရှေ့အလယ်ပိုင်းဒေသသို့ အမေရိကန်နိုင်ငံခြားရေး ဝန်ကြီး အန်တိုနီ ဘလင်ကင် (Antony Blinken) ကို စေလွှတ်ခဲ့သည်။

ဘလင်ကင်သည် အောက်တိုဘာ ၁၁ ရက်မှ အောက်တိုဘာ ၁၃ ရက်အထိ အစ္စရေးနှင့် ဂျော်ဒန်နိုင်ငံများသို့ သွားရောက်ပြီး အစ္စရေး-ဟားမာ့စ်ပဋိပက္ခကို လေ့လာသွားမည်ဟု အမေရိကန်နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

ဂါဇာကမ်းမြောင်ဒေသ ဗုံးဒဏ် ခံထားရစဉ်

အရှေ့အလယ်ပိုင်းဆိုင်ရာ တရုတ်၏ အထူးသံတမန်တစ်ဦးကမူ အစ္စရေး-ဟားမာ့စ် ပဋိပက္ခနှင့််ပတ်သက်ပြီး ပထမဆုံးအကြိမ် ပြောကြားခဲ့သည့် မှတ်ချက်စကားတွင် ပါလက်စတိုင်းများအတွက် လူသားချင်းစာနာ ထောက်ထားမှုဆိုင်ရာ အကူအညီများ ပေးအပ်ရန် တိုက်တွန်းခဲ့သည်။

တရုတ်သမ္မတ ရှီကျင့်ဖျင် (Xi Jinping) ကမူ အစ္စရေး-ဟားမာ့စ် စစ်ပွဲ ဖြစ်ပွားပြီးချိန်နောက်ပိုင်း အစ္စရေးဝန်ကြီး ချုပ် နေတန်ယာဟု သို့မဟုတ် ပါလက်စတိုင်း အာဏာပိုင်အဖွဲ့ (Palestinian Authority- PA) ၏ သမ္မတ မာမွတ် အာဘက်စ် (Mahmoud Abbas) တို့နှင့် ဖုန်းဆက်သွယ် ပြောဆိုခဲ့ခြင်း မရှိပေ။

ထိုအချိန်အတောအတွင်း အစ္စရေးကို ဝင်ရောက် ကျူးကျော် တိုက်ခိုက်ခဲ့သည့် ဟားမာ့စ်အဖွဲ့၏ ဓားစာခံအဖြစ် ဖမ်းဆီးခံထားရသည့် အမေရိကန်နိုင်ငံသားများကို ပြန်လည်လွတ်မြောက်စေရေးအတွက် ကြားဝင် စေ့စပ်ညှိနှိုင်း ပေးရန် အမေရိကန်က ကာတာနိုင်ငံကို တောင်းဆိုခဲ့သည်။

Source: ဘန်ကောက်ပို့စ်

CNI International News

ဒူဘိုင်း၊ အောက်တိုဘာ ၁၂

အောက်တိုဘာ ၇ ရက်က အစ္စရေးနိုင်ငံကို ရုတ်တရက် ဝင်ရောက်တိုက်ခိုက်ခဲ့သည့် ဟားမာ့စ် (Hamas) လက်နက်ကိုင်အဖွဲ့၏ စစ်ဆင်ရေးကို နောက်ကွယ်မှ ကြိုးကိုင်နေသည့် ဟားမာ့စ်တပ်မှူးတစ်ဦးကို အစ္စရေးက ဖော်ထုတ်ခဲ့သည်ဟု ရိုက်တာမှ ဖော်ပြခဲ့သည်။

Al Aqsa Flood အမည်ရှိ ထိုစစ်ဆင်ရေးကို နောက်ကွယ်မှ လျှို့ဝှက်စွာ ကြိုးကိုင်စေခိုင်းနေသူသည် ပါလက်စတိုင်း စစ်သွေးကြွ တစ်ဦးဖြစ်သည့် မိုဟာမက် ဒီအစ်ဖ် (Mohammed Deif)ဖြစ်သည်ဟု အစ္စရေးက ပြောကြားခဲ့သည်။ 

အောက်တိုဘာ ၇ ရက်တွင် ဟားမာ့စ်အဖွဲ့က အစ္စရေးကို ထောင်နှင့်ချီသည့် ဒုံးကျည်များဖြင့် ပစ်ခတ်တိုက်ခိုက် ချိန်၌ အစ္စရေး၏  ဖမ်းဆီးရန် အလိုအရှိဆုံး စာရင်းမှာ ထိပ်ဆုံးနေရာက ပါဝင်နေသည့် ဒီအစ်ဖ်၏ အသံဖိုင်တစ်ခု ထွက်ပေါ်လာခဲ့သည်။

ဂါဇာကမ်းမြောင်ဒေသ တိုက်ခိုက်ခံထားရစဉ်

ထိုအသံဖိုင်ထဲတွင် လက်ရှိ ပြုလုပ်နေသည့် ဟားမာ့စ်အဖွဲ့၏ စစ်ဆင်ရေးသည် ၂၀၂၁ ခုနှစ်၊ မေလက အစ္စလာမ်တို့ ၏ တတိယမြောက် အမြင့်မြတ်ဆုံး နေရာဖြစ်သည့် ဂျေရုဆလင်မြို့ရှိ Al Aqsa ဗလီကို အစ္စရေးက ဝင်ရောက် စီးနင်းခဲ့မှုအတွက် တုန့်ပြန်သော စစ်ဆင်ရေးဖြစ်သည်ဟု ဒီအစ်ဖ်က ပြောကြားခဲ့သည်။ 

ဟားမာ့စ်တပ်မှူး ဒီအစ်ဖ် စီစဉ်လုပ်ဆောင်ခဲ့သည့် စစ်ဆင်ရေးအတွင်း အစ္စရေးနိုင်ငံ၌ သေဆုံးသူ ၁၂၀၀ ကျော်ရှိခဲ့ သည်ဟု ဂါဇာကမ်းမြောင်ဒေသရှိ ဟားမာ့စ်အဖွဲ့နှင့် နီးစပ်သည့် သတင်းရင်းမြစ်တစ်ခုက ပြောကြားခဲ့သည်။ 

"ရာမဒန် (Ramadan) ဥပုပ်ကာလမှာ အစ္စရေးတပ်ဖွဲ့တွေဟာ Al Aqsa ဗလီကို ဝင်ရောက်စီးနင်းခဲ့ပြီး ဘုရားဝတ် ပြုသူတွေကို ရိုက်နှက်တိုက်ခိုက်တာ၊ အသက်အရွယ် ကြီးရင့်သူတွေကို တရွတ်တိုက်ဆွဲသွားတာ၊ လူငယ်တွေကို ဗလီအပြင်ဘက် မောင်းထုတ်တာတွေကို ရိုက်ကူးထားတဲ့ ဗွီဒီယိုဖိုင်တွေ ထွက်ပေါ်လာခဲ့ပါတယ်။ အဲဒီဖြစ်စဉ် ကြောင့် ပါလက်စတိုင်းတွေနဲ့ အာရပ်တွေကြားထဲမှာ အစ္စရေးအပေါ် ဒေါသထွက်ခဲ့ကြပါတယ်" ဟု အမည်မဖော် လိုသည့် ထိုသတင်းရင်းမြစ်က ပြောကြားခဲ့သည်။

ထိုဖြစ်စဉ်ကြောင့် ၂၀၂၁ ခုနှစ်တွင် အစ္စရေးနှင့် ဟားမာ့စ်အကြား ၁၁ ရက်ကြာ တိုက်ပွဲများ ဖြစ်ပွားခဲ့သည်။ 

ဂါဇာကမ်းမြောင်ဒေသ တိုက်ခိုက်ခံထားရစဉ်

ထိုဖြစ်စဉ်အပြီး ၂ နှစ်ကျော်အကြာတွင် ယခုကဲ့သို့ တိုက်ပွဲများ ထပ်မံဖြစ်ပွားခဲ့ခြင်းဖြစ်သည်။

စစ်ဆင်ရေးကို ကြိုးကိုင်ခဲ့သည်ဆိုသည့် ဒီအစ်ဖ်၏ ဓာတ်ပုံ ၃ ပုံသာ ထွက်ပေါ်ခဲ့သည်။ 

ပထမတစ်ပုံမှာ အသက် ၂၀ အရွယ်က ရိုက်ကူးထားသည့် ပုံဖြစ်ပြီး ဒုတိယပုံမှာ မျက်နှာဖုံး ဝတ်ဆင်ထားသည့် ပုံဖြစ်၍ တတိယပုံမှာ သူ့အရိပ်ကိုသာ မြင်တွေ့ရသည့် ပုံဖြစ်သည်။ 

၁၉၄၈ ခုနှစ် အာရပ်-အစ္စရေး စစ်ပွဲအပြီးတွင် တည်ထောင်ခဲ့သည့် Khan Yunis ဒုက္ခသည်စခန်း၌ ၁၉၆၅ ခုနှစ်က မွေးဖွားခဲ့သည့် ဒီအစ်ဖ်သည် မိုဟာမက် မာစရီ (Mohammad Masri) အမည်ဖြင့် ကြီးပြင်းခဲ့ပြီး နောက်ပိုင်းတွင် မိုဟာမက် ဒီအစ်ဖ် အမည်ဖြင့် လူသိများထင်ရှားလာသည့် စစ်သွေးကြွ ခေါင်းဆောင်တစ်ဦး ဖြစ်လာခဲ့သည်။

လက်ရှိအချိန်အထိ ဒီအစ်ဖ်သည် မည်သည့်နေရာတွင် နေထိုင်သည်ဆိုခြင်းကို အတိအကျ မသိရသေးဘဲ သူသည် ဂါဇာကမ်းမြောင်ဒေသ၌ ရှိနေနိုင်သည်ဟု ကျွမ်းကျင်သူများက ပြောကြားခဲ့သည်။

အစ္စရေးစစ်တပ်ကလည်း ယခုစစ်ပွဲတွင် ဟားမာ့စ်အဖွဲ့၏ တိုက်ခိုက်မှုကို ဒီအစ်ဖ်က နောက်ကွယ်မှ ကြိုးကိုင်နေ ကြောင်း ပြောကြားခဲ့သည်။

Source: ရိုက်တာ

CNI International News

တိုကျို၊ အောက်တိုဘာ ၁၂

ဂျပန်နိုင်ငံတွင် တပ်သားသစ်များ စုဆောင်းရန် အခက်တွေ့နေသည်ဟု ဘန်ကောက်ပို့စ်မှ ဖော်ပြခဲ့သည်။

ဂျပန်သည် မကြာသေးမီ နှစ်များအတွင်း ၎င်း၏ ကာကွယ်ရေး အသုံးစရိတ်ကို တိုးမြှင့်ခဲ့ပြီး ဒေသတွင်း၌ တရုတ်၏ အင်အား ကြီးထွားလာမှုနှင့် မြောက်ကိုရီးယား၏ မကြာခဏ ဒုံးကျည်စမ်းသပ်မှုတို့ကို စိုးရိမ်လျက်ရှိသည်။

သို့သော် ဇူလိုင်လက ကျွမ်းကျင်သူများအဖွဲ့ တစ်ဖွဲ့၏ အစီရင်ခံစာ တစ်ရပ်၌ ဝန်ထမ်းအင်အား နည်းပါးခြင်း ကြောင့် စစ်တပ်သည် အင်အားလျော့နည်း လာမည့်အပေါ် အလွန်အမင်း စိုးရိမ်မှုများရှိကြောင်း မီးမောင်း ထိုးပြ လျက်ရှိသည်။

တပ်သားသစ်စုဆောင်းမှု အရေအတွက်သည် တစ်နှစ်ထက် တစ်နှစ် အပြောင်းအလဲ ရှိခဲ့သော်လည်း ၁၉၉၀ ပြည့် နှစ်မှစတင်ကာ ဂျပန်စစ်တပ်၏ အင်အားသည် ၂၃၀,၀၀၀ အထိ လျော့ကျခဲ့ပြီး ရာခိုင်နှုန်းအားဖြင့် ၇ ရာခိုင်နှုန်း ကျော် ကျဆင်းခဲ့သည်။

ဂျပန်လူမျိုးများကိုတွေ့ရစဉ်

၂၀၂၂ ခုနှစ်တွင် လူ ၄၀၀၀ အောက် စစ်တပ်အတွင်း ဝင်ရောက်ခဲ့သည်။ ထိုအရေအတွက်သည် မျှော်မှန်းထားသည့် ပမာဏ၏ ထက်ဝက်မျှပင် မရှိပေ။

နောက်ဆုံးအကြိမ် တပ်သားသစ် စုဆောင်းမှု အရေအတွက်အရ မျှော်မှန်းချက် ပြည့်မှီခဲ့သည်မှာ ၂၀၁၃ ခုနှစ်က ဖြစ်သည်။

စီးပွားရေးအင်အား ကောင်းမွန်သော နိုင်ငံအများအပြားတွင် တပ်သားသစ် လုံလောက်စွာ စုဆောင်းရာ၌ ပြဿနာ များရှိနေကြောင်း၊ အထူးသဖြင့် ဂျပန်နိုင်ငံတွင် လူ ၁၀ ဦး၌ တစ်ဦးသည် အသက် ၈၀ သို့မဟုတ် ၈၀ ကျော် အရွယ် ဖြစ်သည်။

သို့သော် အေအက်ဖ်ပီ သတင်းဌာန၏ မေးမြန်းမှုကို ဖြေကြားခဲ့သည့် လက်ရှိ တာဝန်ထမ်းဆောင်ဆဲ စစ်သားများ နှင့် စစ်မှုထမ်းဟောင်းများ၏ အဆိုအရ လူဦးရေ စာရင်းကိုသာ အပြစ်တင်ရမည် မဟုတ်ဟု ပြောကြားခဲ့သည်။

ဂျပန်လူမျိုးများကိုတွေ့ရစဉ်

"ရှက်ရှက်နဲ့ပဲ ဝန်ခံရမယ်ဆိုရင် ကျနော်ဟာ ကာကွယ်ရေးတပ်ဖွဲ့ဝင် တစ်ဦးဖြစ်ပေမယ့် ဒါက ကိုယ့်ကိုယ်ကို ဂုဏ်ယူတာမျိုး မဖြစ်ခဲ့ပါဘူး" ဟု စစ်မှုထမ်းဟောင်းများကို အလုပ်အကိုင်များ ရရှိစေရန် အကူအညီပေးသည့် လုပ်ငန်းတစ်ခု လုပ်ကိုင်နေသော လေထီးတပ်သားဟောင်း တစ်ဦးဖြစ်သည့် အသက် ၄၅ နှစ်အရွယ် ယူအိချီ ကီ မူရာ (Yuichi Kimura) က ပြောကြားခဲ့သည်။

ဒုတိယကမ္ဘာစစ် နောက်ပိုင်း စစ်တပ် မဖွဲ့စည်းရေး ဖွဲ့စည်းပုံ အခြေခံဥပဒေနှင့်အညီ ကာကွယ်ရေးကဏ္ဍတွင် သီးသန့်နေရာက ပါဝင်ခဲ့သည့် ဂျပန်လက်နက်ကိုင် တပ်ဖွဲ့များအတွင်း လစာငွေနည်းပါးမှု၊ အဖွဲ့အစည်း၏ ရည်မှန်းချက် ပျောက်ရှမှုတို့ကြောင့် စိတ်ဓာတ်အင်အားများ လျော့ကျနေသည်ဟု ၎င်းက ပြောကြားခဲ့သည်။

Source: ဘန်ကောက်ပို့စ်

CNI International News

ဝါဆော၊ အောက်တိုဘာ ၁၁

ပိုလန်နိုင်ငံတွင် လွှတ်တော်ရွေးကောက်ပွဲမတိုင်မီ ရက်ပိုင်းအလို၌ ပိုလန်စစ်တပ်၏ ထိပ်သီးတပ်မှူး နှစ်ဦးသည် ရာထူးမှ နုတ်ထွက်သွားခဲ့သည်ဟု အေပီမှ ဖော်ပြခဲ့သည်။

ထို တပ်မှူးနှစ်ဦး နုတ်ထွက်မှုသည် လက်ရှိ ကွန်ဆာဗေးတစ် အစိုးရလက်ထက် ချမှတ်ကျင့်သုံးခဲ့သည့် အခြေအနေများကို မေးခွန်းများ ထွက်ပေါ်စေခဲ့သည်ဟု ပိုလန်စစ်တပ်က အောက်တိုဘာ ၁၀ ရက်တွင် ပြောကြားခဲ့သည်။

ပိုလန်စစ်ဦးစီးချုပ် ဗိုလ်ချုပ်ကြီး ရက်ဂျ်မွန် အန်ဒရေးဂျက်ခ် (Rajmund Andrzejczak) နှင့် စစ်ဆင်ရေး တပ်မှူး ဗိုလ်ချုပ်ကြီး တိုးမက်စ် ပီယိုထရိုစကီး (Tomasz Piotrowski)တို့၏ ရာထူးမှ နုတ်ထွက်စာကို သမ္မတ အန်ဒရေးဂျ် ဒူဒါ (Andrzej Duda)က လက်ခံခဲ့သည်။

 ပိုလန်သမ္မတ အန်ဒရေးဂျ် ဒူဒါကို တွေ့ရစဉ်

ထို့နောက် ၎င်းတို့နှစ်ဦး၏ ရာထူးနေရာကို လာမည့်ရက်ပိုင်းအတွင်း အစားထိုး ခန့်အပ်သွားမည်ဟု ပိုလန်အစိုးရ တာဝန်ရှိသူများက ပြောကြားခဲ့သည်။ 

သို့သော် ပိုလန်၏ ထိပ်သီးတပ်မှူးနှစ်ဦး နုတ်ထွက်မှုသည် အိမ်နီးချင်း ယူကရိန်းနိုင်ငံတွင် စစ်ပွဲ ဖြစ်ပွားနေချိန် အတွင်း လက်ရှိ ကွန်ဆာဗေးတစ် အစိုးရလက်ထက် ပိုလန်စစ်တပ်၏ အနေအထားကို မေးခွန်းများ ထွက်ပေါ်စေ ခဲ့သည်။

ပိုလန်မီဒီယာများကမူ ယခု နုတ်ထွက်သွားခဲ့သည့် ထိပ်သီးတပ်မှူးနှစ်ဦးနှင့် ပိုလန်ကာကွယ်ရေးဝန်ကြီး မာရီရုဇ် ဘလက်ရှ်တက်ခ် (Mariusz Blaszczak) တို့အကြား တင်းမာမှုများ မြင့်တက်ခဲ့ကြောင်း ဖော်ပြခဲ့သည်။

 ပိုလန်စစ်တပ်ကိုတွေ့ရစဉ်

တပ်မှူးနှစ်ဦး၏ နုတ်ထွက်စာကို အောက်တိုဘာ ၉ ရက်တွင် အစိုးရအဖွဲ့ထံ တင်သွင်းခဲ့ကြောင်း ပိုလန်အမျိုးသား လုံခြုံရေး ဗျူရို၏ အကြီးအကဲ ယာဆက် ရှယ်ရက်ဒါ (Jacek Siewiera) က ပြောကြားခဲ့သည်။

ပိုလန်စစ်တပ်၏ အဓိက လှုပ်ရှားမှုများနှင့် စီမံကွပ်ကဲရေးအတွက် နုတ်ထွက်သွားသည့် ထိပ်သီးတပ်မှူးနှစ်ဦး၏ နေရာကို ရက်ပိုင်းအတွင်း ခန့်အပ်သွားမည်ဟုလည်း ၎င်းက ပြောသည်။

ပိုလန်တွင် အောက်တိုဘာ ၁၅ ရက်၌ ရွေးကောက်ပွဲကို ကျင်းပသွားမည်ဖြစ်ပြီး ထိုရွေးကောက်ပွဲသည် ဥရောပ သမဂ္ဂကို အယုံအကြည်မရှိသည့် လက်ရှိ ကွန်ဆာဗေးတစ်အစိုးရနှင့် ဥရောပသမဂ္ဂကို လိုလားသည့် အတိုက်အခံ ပါတီတို့အကြား အားပြိုင်မှု ဖြစ်လာလိမ့်မည်ဟု ကျွမ်းကျင်သူများက သုံးသပ်ခဲ့သည်။

CNI International News

ကာရာကက်စ်၊ အောက်တိုဘာ ၁၁

ယူကရိန်းကို ပေးပို့သည့် အနောက်နိုင်ငံများ၏ လက်နက်များသည် လက်ရှိတွင် ကမ္ဘာလုံးဆိုင်ရာ လက်နက် မှောင်ခိုဈေးကွက်သို့ ရောက်ရှိလာခဲ့ကြောင်း ဗင်နီဇွဲလားသမ္မတ နီကိုလပ်စ် မာဒူရို (Nicolas Marudo) က ဝေဖန် ရှုတ်ချခဲ့ကြောင်း တာ့စ်သတင်းဌာနက ဖော်ပြခဲ့သည်။

ထိုအခြေအနေကို အနောက်နိုင်ငံများက ဖြေရှင်းရန် ပျက်ကွက်ခဲ့သည်ဟု ၎င်းက ပြောသည်။

"အမေရိကန်နဲ့ ဥရောပနိုင်ငံတွေက အစိုးရတွေဟာ ယူကရိန်းကို ဒေါ်လာဘီလျံချီ တန်ကြေးရှိတဲ့ လက်နက်တွေနဲ့ စစ်ပစ္စည်းတွေကို ထောက်ပံ့ခဲ့ပါတယ်။ အခုတော့ အဲဒီလက်နက်တွေဟာ မှောင်ခိုဈေးကွက်ထဲကို ရောက်ရှိနေတဲ့ အခြေအနေကို သူတို့ (အနောက်နိုင်ငံများ) က မျက်စိပိတ်၊ နားပိတ်နေကြပါတယ်" ဟု မာဒူရိုက ဗင်နီဇွဲလား နိုင်ငံ ပိုင် Venezolana de Television ရုပ်သံမှတဆင့် ပြောကြားခဲ့သည်။

ယူကရိန်းကို ထောက်ပံ့ခဲ့သည့် အနောက်နိုင်ငံများ၏ လက်နက်များသည် မှောင်ခိုဈေးကွက်အတွင်း ရောက်ရှိခဲ့ ကြောင်း ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မာရီယာဇာခါရိုဗာ (Maria Zakharova) ၏ ပြောကြားချက်နှင့်ပတ်သက်ပြီး မာဒူရိုက ယခုကဲ့သို့ မှတ်ချက်ပေးခဲ့ခြင်း ဖြစ်သည်။

ယူကရိန်းသမ္မတ ဇာလန်းစကီးကို တွေ့ရစဉ်

"ယူကရိန်းမှာ အလုံးစုံ အကျင့်ပျက်ခြစားမှုက ကြီးစားနေပါပြီ။ ဇာလန်းစကီး (Volodymyr Zelenskyy) သမ္မတ အဖြစ် စတင် ရုံးထိုင်ချိန်ကတည်းက လက်နက်မှောင်ခိုကူးမှု ပုံစံမျိုးစုံ ရှိခဲ့ပါတယ်။ ဒါဟာ နေတိုးက ယူကရိန်း အတွက် နောက်ထပ် စစ်ပွဲတစ်ခုကို ဆောင်ကြဉ်းပေးခဲ့တာ ဖြစ်ပါတယ်" ဟု မာဒူရိုက ပြောကြားခဲ့သည်။

ယူကရိန်းအရေးနှင့် ပတ်သက်ပြီး ငြိမ်းချမ်းရေး သဘောတူညီချက်ရရှိရန် တောင်းဆိုနေသည့် တရုတ်သမ္မတ ရှီကျင့်ဖျင် (Xi Jinping) ၊ ဘရာဇီးသမ္မတ လူလာ ဒါဆေးလ်ဗား (Lula da Silva) နှင့် တောင်အာဖရိကနိုင်ငံတို့ကို မိမိအနေဖြင့် ထောက်ခံကြောင်း ဗင်နီဇွဲလားသမ္မတက ပြောကြားခဲ့သည်။

အဆိုပါ အားထုတ် ကြိုးပမ်းမှုများသည် ငြိမ်းချမ်းရေးကို ပြန်လည်ထိန်းသိမ်းနိုင်ပြီး အန္တရာယ်အကြီးမားဆုံး လက်နက်မှောင်ခိုကူမှုးကို အဆုံးသတ်စေနိုင်ကြောင်း ၎င်းက ပြောသည်။  

Source: တာ့စ်

CNI International News

ဘာကူ၊ အောက်တိုဘာ ၁၀

အာမေးနီးယားလူမျိုးများ နေထိုင်သည့် နာဂေါ်နို-ကာရာဘက်ဒေသကို ပြန်လည်သိမ်းပိုက်ခဲ့သည့် အဇာဘိုင်ဂျန် နိုင်ငံ၏သမ္မတ အီလ်ဟမ် အလီယက်ဗ် (Ilham Aliyev)က အာမေးနီးယားနိုင်ငံနှင့် ငြိမ်းချမ်းရေး ဆွေးနွေးပွဲများ ပြုလုပ်ရန် အသင့်ရှိကြောင်း ပြောကြားခဲ့သည်ဟု အေပီမှ ဖော်ပြခဲ့သည်။

အလီယက်ဗ်သည် စပိန်နိုင်ငံ ဂရန်နာဒါ (Granada) မြို့တွင် ပြုလုပ်သည့် ဥရောပညီလာခံ၏ အစည်းအဝေး၌ အာမေးနီးယားဝန်ကြီးချုပ် နီကိုး ပါရှင်ယန် (Nikol Pashinyan)နှင့် တွေ့ဆုံပြီးချိန်မှာ ပြောကြားခဲ့ခြင်း ဖြစ်သည်။

အာမေးနီးယားကို လက်နက်များ ထောက်ပံ့ပေးမည်ဟု ကတိပြုခဲ့သည့် ပြင်သစ်နိုင်ငံ၏ ကတိကို အလီယက်ဗ်က ဝေဖန်ခဲ့သည်။

အဇာဘိုင်ဂျန်နယ်စပ်ပေါက်ကိုတွေ့ရစဉ်

ထို့ပြင် ဥရောပကောင်စီ၏ဥက္ကဋ္ဌ ချားစ် မိုက်ကယ် (Charles Michel) က ဂရန်နာဒါတွင်  အစည်းအဝေး ပြုလုပ် မည့် ဖုန်းခေါ်ဆိုမှုကို မကိုင်သည့်အပြင် တက်ရောက်ခဲ့ခြင်းလည်း မရှိပေ။

ထို့ကြောင် ပြင်သစ်၏ ရပ်တည်ချက်နှင့် အဇာဘိုင်ဂျန်ကို ထောက်ခံသည့် အင်အားစုအကြား တိကျသည့်  သတင်း တစ်ရပ် ထွက်ပေါ်ခဲ့ခြင်း မရှိပေ။

အဇာဘိုင်ဂျန်စစ်တပ်သည် အာမေးနီးယားလူမျိုးများက လွတ်လပ်ရေး ကြေညာထားသည့် အဇာဘိုင်ဂျန်နိုင်ငံ အတွင်းရှိ နာဂေါ်နို-ကာရာဘက်ဒေသကို ၂၀၂၃ ခုနှစ်၊ စက်တင်ဘာ ၂၄ ရက်က ထိုးစစ်ဆင် တိုက်ခိုက်ခဲ့သည်။
ထို့နောက် အာမေးနီးယားလူမျိုး ၁၂၀,၀၀၀ သည် အာမေးနီးယားနိုင်ငံသို့ ထွက်ပြေးတိမ်းရှောင်သွားခဲ့ကြသည်။

အလားတူ အာမေးနီးယား လွတ်လပ်ရေးအတွက် တိုက်ပွဲဝင်နေသည့် ခေါင်းဆောင်များကို အဇာဘိုင်ဂျန်က ဖမ်းဆီးထားသည်။

Source: အေပီ

CNI Sport News

၂၀၂၃ ခုနှစ်၊ အောက်တိုဘာ ၁၀

ပေါ်တူဂီအသင်းခေါင်းဆောင် ရော်နယ်ဒိုဟာ ဆော်ဒီပရိုလိဂ်ကလပ် အယ်လ်နာဆာအသင်းမှာ ၂၀၂၇ ခုနှစ်အထိ ဆက်ရှိမယ့်စာချုပ်ကို သက်တမ်းတိုးချင်နေတယ်လို့ သိရပါတယ်။

ရော်နယ်ဒိုဟာ အသက် ၃၈ နှစ်အရွယ်ရှိပြီဖြစ်ပေမယ့် ကစားသမားဘဝက အနားယူမယ့် အရိပ်အယောင် ပြသ ခြင်း မရှိသေးဘဲ ပေါ်တူဂီလက်ရွေးစင်အသင်းအတွက် ပါဝင်ကစားပေးနေသလို အယ်လ်နာဆာအသင်းအတွက် ၃၆ ပွဲကစားအပြီးမှာ ၃၁ ဂိုးသွင်းယူထားတာပါ။ ဘောလုံးဂျာနယ်လစ်တစ်ဦးဖြစ်တဲ့ အလီအယ်လ်ဟာဘီက ရော်နယ်ဒိုဟာ အယ်လ်နာဆာအသင်းမှာ ၂၀၂၇ ခုနှစ်အထိရှိမယ့် စာချုပ်သက်တမ်းတိုးချင်နေတဲ့အကြောင်းကို ဆော်ဒီကလပ်ထံ အကြောင်းကြားထားတယ်လို့ ပြောခဲ့ပါတယ်။

ရော်နယ်ဒိုဟာ အယ်လ်နာဆာကစားသမားအဖြစ်နဲ့ ၂၀၂၆ ကမ္ဘာ့ဖလားပြိုင်ပွဲကို ပါဝင်ချင်ပြီး ဒီပြိုင်ပွဲအပြီးမှာ ကစားသမားဘဝက အနားယူကြောင်းကြေညာဖွယ်ရှိတယ်လို့ အလီအယ်လ်ဟာဘီရဲ့ ပြောဆိုတဲ့ အထဲမှာ ပါဝင်ခဲ့တာပါ။ ရော်နယ်ဒိုအနေနဲ့ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားခဲ့မယ်ဆိုရင် သူဟာ အသက် ၄၁ နှစ် အရွယ်အထိရှိလာမှာဖြစ်ပြီး အားကစားသမားတစ်ဦးအတွက် မယုံနိုင်ဖွယ်စွမ်းဆောင်မှုတစ်ခု ဖြစ်လာမယ်လို့ သတင်းမှာ ဖော်ပြထားပါတယ်။

ရော်နယ်ဒိုဟာ လက်ရှိအချိန်မှာ ယူရို ၂၀၂၄ ခြေစစ်ပွဲကစားဖို့ ပေါ်တူဂီအသင်းနဲ့အတူ လေ့ကျင့်ပြင်ဆင်မှုတွေ ပြုလုပ်နေတာပါ။ ယူရို ၂၀၂၄ ခြေစစ်ပွဲမှာ ရာနှုန်းပြည့်နိုင်ပွဲရယူထားတဲ့ ပေါ်တူဂီအသင်းဟာ အောက်တိုဘာ ၁၃ ရက်မှာ ဆလိုဗားကီးယား၊ ၁၆ ရက်မှာ ဘောစနီးယားအသင်းတို့နဲ့ ယှဉ်ပြိုင်ရမှာဖြစ်ပြီး ရော်နယ်ဒိုဟာ ဒီ ၂ ပွဲစလုံးကို ပွဲထွက်ကစားသမားအဖြစ် ပါဝင်ခွင့်ရဖွယ်ရှိနေပါတယ်။

ရော်နယ်ဒိုဟာ ယူရို ၂၀၂၄ ခြေစစ်ပွဲမှာ ပေါ်တူဂီအသင်းအတွက် ၅ ဂိုးအထိ သွင်းယူပေးထားပြီး အသင်းခြေစစ်ပွဲ အောင်မြင်ဖို့ နီးစပ်အောင် အဓိက စွမ်းဆောင်ပေးနေတာ ဖြစ်ပါတယ်။

Source:Eurosport

CNI International News

ဝါရှင်တန်၊ အောက်တိုဘာ ၁၀

အမေရိကန်သည် ဟားမာ့စ် (Hamas) စစ်သွေးကြွများနှင့် စစ်ပွဲဖြစ်ပွားနေသည့် အစ္စရေးကို ထောက်ခံကြောင်း ပြသသည့်အနေဖြင့် အစ္စရေးနိုင်ငံအနီးသို့ စစ်သင်္ဘောများနှင့် လေယာဉ်များ စေလွှတ်သွားမည်ဖြစ်ကြောင်း အမေရိကန်ကာကွယ်ရေးဝန်ကြီး လွိုက်အော်စတင် (Lloyd Austin) က ပြောသည်ဟု ရိုက်တာမှ ဖော်ပြခဲ့သည်။ 

ဟားမာ့စ်၏ ပြင်းထန်သည့်် တိုက်ခိုက်မှုများသည် အစ္စရေးနှင့်ဆော်ဒီ ဆက်ဆံရေး ပုံမှန်ပြန်လည် ထူထောင်မှု အလားအလာကို အနှောင့်အယှက် ဖြစ်စေရန် ရည်ရွယ်ချက်ဖြင့် ပြုလုပ်ခဲ့ခြင်း ဖြစ်နိုင်သည်ဟု အမေရိကန် အစိုးရက ယူဆထားချိန်တွင် အော်စတင်၏ ပြောကြားချက်များ ထွက်ပေါ်ခဲ့ခြင်းဖြစ်သည်။ 

ဟားမာ့စ် လက်နက်ကိုင်များသည် ဆယ်စုနှစ် များစွာအတွင်း အစ္စရေးနိုင်ငံတွင် သွေးထွက်သံယို အများဆုံး တိုက်ခိုက်မှု တစ်ခုအဖြစ် အောက်တိုဘာ ၈ ရက်က အစ္စရေးနိုင်ငံ၏ မြို့များကို ဝင်ရောက် တိုက်ခိုက်ခဲ့သည်။ 

အစ္စရေးကလည်း ဟားမာ့စ်အဖွဲ့၏ တိုက်ခိုက်မှုကို တုံ့ပြန်သည့်အနေဖြင့် အောက်တိုဘာ ၈ ရက်တွင် ဂါဇာ ကမ်းမြောင် ဒေသကို လေကြောင်းတိုက်ခိုက်မှုများ ပြင်းထန်စွာ ပြုလုပ်ခဲ့သည်။

ဘိုင်ဒန်နဲ့ နေတန်ယာဟုကို တွေ့ရစဉ်

အဆိုပါ တိုက်ခိုက်မှုများကြောင့် နှစ်ဖက်စလုံးတွင် သေဆုံးသူ ရာနှင့်ချီရှိခဲ့သည်။

ထိုပဋိပက္ခသည် အရှေ့အလယ်ပိုင်းဒေသတွင် အကြီးဆုံး စစ်ပွဲအသစ်တစ်ခု စတင်ပေါ်ပေါက် လာနိုင်မည့် အခြေအနေကို ခြိမ်းခြောက်နေသည်။

သေဆုံးသူများထဲတွင် အမေရိကန်နိုင်ငံသား ၃ ဦးထက်မနည်း ပါဝင်သည်ဟု CNN သတင်းဌာနက အောက်တိုဘာ ၈ ရက်တွင် ဖော်ပြခဲ့သည်။

အမေရိကန်ကာကွယ်ရေးဝန်ကြီး လွိုက်အော်စတင်က  USS Gerald R.Ford Carrier လေယာဉ်တင်သင်္ဘော ဦးဆောင်သည့် တိုက်ခိုက်ရေး စစ်သင်္ဘောအုပ်စုကို မြေထဲပင်လယ် အရှေ့ပိုင်းမှ အစ္စရေးနိုင်ငံအနီးသို့ သွားရောက် ရန် အမိန့်ထုတ်ပြန်ခဲ့သည်။

အစ္စရေးစစ်တပ်ကိုတွေ့ရစဉ်

ထိုစစ်သင်္ဘောအုပ်စုတွင် ပဲ့ထိန်းစနစ်တိုက် ခရုဇာ စစ်သင်္ဘောကြီး တစ်စင်း (guided missile cruiser) နှင့် ပဲ့ထိန်းစနစ်တပ် ဖျက်သင်္ဘော လေးစင်း (guided missile destroyer) ပါဝင်သည်။ 

အမေရိကန်သည် ထိုဒေသတွင် အမေရိကန်လေတပ်မှ F-35 ၊ F-15 ၊ F-16 နှင့် A-10 တိုက်လေယာဉ်များကို တိုးမြှင့် ဖြန့်ကြက်ချထားရန် အစီအစဉ်များကိုလည်း လုပ်ဆောင်ခဲ့သည်ဟု အော်စတင်က ပြောကြားခဲ့သည်။ 

ထို့ပြင် အမေရိကန်သည် အစ္စရေးကို လက်နက်ခဲယမ်းများလည်း ထောက်ပံ့ပေးသွားမည်ဟု ၎င်းက ဆိုသည်။

အမေရိကန်သမ္မတ ဂျိုးဘိုင်ဒန် (Joe Biden) နှင့် အစ္စရေးဝန်ကြီးချုပ် ဘင်ဂျမင်နေတန်ယာဟု (Benjamin Netanyahu) တို့သည် အောက်တိုဘာ ၈ ရက်က ဖုန်းဆက်သွယ်၍ ဆွေးနွေးခဲ့ကြသည်။

ထို့နောက် အစ္စရေးတပ်ဖွဲ့များအတွက် နောက်ထပ် ကူညီထောက်ပံ့မှုများကို ပို့ဆောင်ထားကြောင်းနှင့် လာမည့် ရက်ပိုင်းအတွင်း နောက်ထပ် ကူညီထောက်ပံ့မှုများ ဆက်လက် ပို့ဆောင်ပေးမည်ဖြစ်ကြောင်း ဘိုင်ဒန်က နေတန်ယာဟုကို ပြောကြားခဲ့သည်။

ထို့ပြင် အမေရိကန် ဒုသမ္မတ ကာမယ်လာ ဟားရစ် (Kamala Harris) နှင့် အစ္စရေးသမ္မတ အိုင်းဆက် ဟာဇော့ (Issac Herzog) ၊ အမေရိကန်ကာကွယ်ရေးဝန်ကြီး အော်စတင်နှင့် အစ္စရေး ကာကွယ်ရေးဝန်ကြီး ယိုအက်ဗ် ဂဲလန့် (Yoav Gallant) တို့သည်လည်း အစ္စရေးအား အမေရိကန်၏ ကူညီထောက်ပံ့မှုများနှင့်ပတ်သက်ပြီး တယ်လီဖုန်းဖြင့်် ဆက်သွယ် ဆွေးနွေးခဲ့ကြသည်။

Source: ရိုက်တာ

CNI International News

ဘန်ကောက်ပို့စ်၊ အောက်တိုဘာ ၁၀

ထိုင်းနိုင်ငံတွင် ဒိန်းမတ်နိုင်ငံဆိုင်ရာ ထိုင်းသံအမတ်ဟောင်း ဝီချစ် ဝီချစ်မန်(Vichit Vichitmarn) ဓားထိုး အသတ်ခံ ခဲ့ရမှု၌ လူသတ်မှုဖြင့် ဖမ်းဆီးရန် အလိုရှိနေသည့်် မြန်မာလူငယ်တစ်ဦးသည် အောက်တိုဘာ ၉ ရက်က ချင်းရိုင် (Chiang Rai)မှ နယ်စပ်ကိုဖြတ်ပြီး မြန်မာနိုင်ငံအတွင်းသို့ ထွက်ပြေး ဝင်ရောက်ခဲ့သည်ဟု ဘန်ကောက်ပို့စ်မှ  ဖော်ပြခဲ့သည်။ 

ထိုလူသတ်မှု မတိုင်မီ၊ လူသတ်မှု အချိန်အတွင်းနှင့် လူသတ်မှုအပြီး ဖြစ်စဉ် အသေးစိတ် အချက်အလက်များကို ရဲတပ်ဖွဲ့က အောက်တိုဘာ ၉ ရက်တွင် ထုတ်ပြန်ခဲ့သည်။

ယခုအချိန်အထိ ထိုလူသတ်မှုတွင် တစ်ဦးတည်းသော သံသယရှိသူမှာ အသက် ၁၉ နှစ်အရွယ် မြန်မာနိုင်ငံသား စိုင်းမြတ်မိုး (Sai Myat Moe) ဖြစ်ကြောင်း ဘန်ကောက်မြို့တော် ရဲတပ်ဖွဲ့အကြီးအကဲ ရဲချုပ် အက်တာပို အနူစစ် (Attapol Anusit) က ပြောကြားခဲ့သည်။

အသက် ၆၃ နှစ်အရွယ် သံအမတ်ဟောင်း ဝီချစ် ဝီချစ်မန် (Vichit Chitvimarn) ၏ ရုပ်အလောင်းကို ဘန်ကောက် မြို့တော် ချတ်တူချက် (Chatuchak) ခရိုင်ရှိ သုံးထပ်တိုက်၏ ဒုတိယထပ်မှ အိမ်သာထဲတွင် တွေ့ရှိခဲ့ခြင်း ဖြစ် သည်။

 ထိုင်း-မြန်မာ နယ်စပ်ဂိတ်ကို တွေ့ရစဉ်

သေဆုံးသူသည် စက်တင်ဘာ ၉ ရက်က ထိုအိမ်သို့ ပြောင်းရွှေ့လာခဲ့ပြီး တစ်ဦးတည်း နေထိုင်ခဲ့ခြင်းဖြစ်သည်။

ထိုင်းသံအမတ်ဟောင်း သေဆုံးမှုဖြင့် သံသယရှိသူသည် စက်တင်ဘာ ၁၉ ရက်ကတည်းက သေဆုံးသူအတွက် အလုပ်လုပ်ကိုင် ပေးခဲ့သူဖြစ်သည်ဟု သတင်းများ ထွက်ပေါ်ခဲ့သည်။ 

သံသယရှိသူသည် ဆေးသုတ်သမား တစ်ဦးဖြစ်သည်ဟု ရဲချုပ် အက်တာပိုက ပြောသည်။ 

သေဆုံးသွားသည့် ထိုင်းသံအမတ်ဟောင်း နေအိမ်ကို ထိုင်းရဲတပ်ဖွဲ့က စစ်ဆေးနေစဉ်

CCTV မှတ်တမ်းများတွင် သံသယရှိသူသည် သေဆုံးသူ၏ နေအိမ်သို့ စက်တင်ဘာ ၂၅ ရက်တွင် ရောက်ရှိလာခဲ့ သည်ကို မြင်တွေ့ရသည်။ ဝီချစ်ကလည်း သံသယရှိသူကို ဂိတ်တံခါးဖွင့်ပြီး အိမ်ထဲဝင်ခွင့် ပေးခဲ့သည်ကို မြင်တွေ့ရ သည်။

သုံးရက်အကြာတွင် သံသယရှိသူသည် သေဆူံးသူကို ပထမထပ်တွင် ဓားဖြင့် တိုက်ခိုက်ခဲ့ဖွယ်ရှိကြောင်း၊ ထို့နောက် သေဆုံးသူသည် ဒုတိယထပ်သို့ လွတ်မြောက်ရန် ထွက်ပြေး သွားဖွယ်ရှိကြောင်း၊ ဒုတိယထပ် အိမ်သာ ထဲတွင် သံသယရှိသူက သေဆုံးသူကို ATM ကဒ် password ပေးရန် ခြိမ်းခြောက်ခဲ့ကြောင်း၊ သံသယရှိသူသည် သေဆုံးသူကို ဓားဖြင့် အသေတိုက်ခိုက်ခဲ့ပြီး တန်ဖိုးရှိသည့် ပစ္စည်းများကို ခိုးယူထွက်ပြေး သွားဖွယ်ရှိကြောင်း ရဲတပ်ဖွဲ့က ပြောကြားခဲ့သည်။

သေဆုံးသူ ဝီချစ်၏ မိုဘိုင်းဖုန်းများနှင့် တက်ဘလက် ကွန်ပြူတာများသည်  ထိုအိမ်မှ ပျောက်ဆုံးနေပြီး လက် ဖာရို(Lat Phro) ခရိုင်ရှိ ATM မှ ဝီချစ်၏ အကောင့်ထဲမှ ငွေကြေးများလည်း ထုတ်ယူခံထားရသည်ဟု ရဲတပ်ဖွဲ့က ပြောကြားခဲ့သည်။

ထို့နောက် သံသရှိသူသည် မိုချစ် (Mo Chit) ဘတ်စ်ကားမှတ်တိုင်မှ မြန်မာနယ်စပ်ရှိ ချင်းရိုင်ပြည်နယ်သို့ ထွက်ခွာ သွားခဲ့သည်ဟု ရဲတပ်ဖွဲ့က ပြောကြားခဲ့သည်။

ထိုသံသယရှိသူသည် စက်တင်ဘာ ၂၉ ရက်နေ့ နံနက် ၇ နာရီ ၂၂ မိနစ်တွင် မယ်ဆိုင် (Mae Sai)မှ တဆင့် မြန်မာ နိုင်ငံထဲသို့ ဝင်ရောက် ထွက်ပြေးသွားခဲ့သည့် သတင်းကို ရရှိခဲ့သည်ဟု ရဲချုပ် အက်တာပိုက ပြောကြားခဲ့သည်။

Source: ဘန်ကောက်ပို့စ်