CNI International News

တမ်ပီ၊ စက်တင်ဘာ ၃၀

အမေရိကန်သမ္မတ ဂျိုးဘိုင်ဒန် (Joe Biden) သည် စက်တင်ဘာ ၂၈ ရက်က သမ္မတဟောင်း ဒေါ်နယ်ထရမ့် (Donald Trump) ကို အစွန်းရောက်ဟု ခေါ်ဆို၍ ပုဂ္ဂိုလ်ရေးအရ တိုက်ခိုက်ခဲ့ကာ အမေရိကန်ဒီမိုကရေစီ အန္တရာယ်ကျရောက်နေပြီးဟု ပြောကြားခဲ့သည်။

ထို့နောက် ဘိုင်ဒန်က ထရမ့်သည် လာမည့်နှစ် သမ္မတရွေးကောက်ပွဲတွင် အနိုင်ရရှိပြီး အာဏာပြန်ရလာပါက အမေရိကန် ဖွဲ့စည်းပုံအခြေခံဥပဒေကို ဖျက်စီးလိမ့်မည်ဟု စွပ်စွဲခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ဒီမိုကရက်များနှင့် ရီပတ်ဘလစ်ကန်များအကြား အကြိတ်အနယ် ယှဉ်ပြိုင်ရသည့် အရီဇိုးနား (Arezona) ပြည်နယ်တွင် ဘိုင်ဒန်က မိန့်ခွန်းပြောကြားခဲ့ရာတွင် ထရမ့်သည် အငြိုးကြီးမားသူဖြစ်ကြောင်းနှင့် အမေရိကန် ပြည်သူများအနေဖြင့် အချိန်မနှောင်းမီ ဒီမိုကရေစီကို ကာကွယ်ကြရန် တိုက်တွန်းခဲ့သည်။

အမေရိကန်အောက်လွှတ်တော်မှ ရီပတ်ဘလစ်ကန်များက ဂျိုးဘိုင်ဒန်သည် ၎င်း၏ သားဖြစ်သူ ဟန်တာ ဘိုင်ဒန် (Hunter Biden) ၏ စီးပွားရေး လုပ်ငန်းများနှင့်ပတ်သက်ပြီး လိမ်ညာပြောဆိုမှုများ ရှိခဲ့သည်ဆိုသည့် သက်သေ အထောက်အထား မပါသော စွဲချက်များအပေါ် အခြေခံပြီး ဘိုင်ဒန်ကို စွပ်စွဲပြစ်တင်မှုဆိုင်ရာ ကြားနာစစ်ဆေးမှု များ ပြုလုပ်နေချိန်တွင် ဘိုင်ဒန်၏ မိန့်ခွန်း ထွက်ပေါ်လာခြင်း ဖြစ်သည်။

အမေရိကန်သမ္မတဟောင်း ဒေါ်နယ်ထရမ့်ကို တွေ့ရစဉ်

"ဒီမိုကရေစီဟာ သေနတ်ပြောင်းဝမှာ သေဆုံးမှာ မဟုတ်ပါဘူး။ ဒါပေမယ့် ဒီမိုကရေစီအပေါ် ခြိမ်းခြောက်မှုတွေကို ရှုတ်ချဖို့ ဒါမှမဟုတ် ကာကွယ်ပေးဖို့ ပျက်ကွက်တဲ့အချိန်၊ ပြည်သူတွေ ရေငုံနှုတ်ပိတ်နေတဲ့ အချိန်မှာတော့ ဒီမိုကရေစီဟာ သေဆုံးနိုင်တယ်ဆိုတာ ကျနော်တို့အားလုံး အမှတ်ရနေသင့်ပါတယ်" ဟု ဘိုင်ဒန်က ပြောကြားခဲ့ သည်။

၂၀၂၀ ပြည့်နှစ် ရွေးကောက်ပွဲရလဒ်ကို ဖျက်သိမ်းရန် ကြိုးပမ်းမှုများနှင့် အမေရိကန် လွှတ်တော် အဆောက်အအုံ (US Capitol) ကို ၂၀၂၁ ခုနှစ်၊ ဇန်နဝါရီ ၆ ရက်က ဝင်ရောက်စီးနင်းမှုတို့နှင့် ပတ်သက်ပြီး တရားရေးအရ ရင်ဆိုင် နေရသည့် ထရမ့်၏ အမှုအခင်းများတွင် ဘိုင်ဒင်သည် ဝင်ရောက်စွက်ဖက်ခဲ့ခြင်း မရှိခဲ့ပေ။

သို့သော် ဘိုင်ဒင်သည် အရီဇိုးနားပြည်နယ်တွင် ပြောကြားခဲ့သည့် မိန့်ခွန်းအတွင်း ထရမ့်ကို နာမည်တပ်ကာ ထည့်သွင်း ပြောကြားခဲ့သည်။

ထရမ့်သည် ရွေးကောက်ပွဲတွင် နောက်တစ်ကြိမ် အနိုင်ရရှိခဲ့မည်ဆိုပါက ထရမ့်နှင့် ၎င်းအား ထောက်ခံသူများသည် သတင်းလွတ်လပ်ခွင့်၊ တရားဥပဒေ စိုးမိုးရေးနှင့် အမေရိကန်၏ အင်စတီကျူးရှင်းများကို တိုက်ခိုက်လိမ့်မည်ဟု လည်း ဘိုင်ဒန်က စွပ်စွဲပြောကြားခဲ့သည်။

အမေရိကန်သမ္မတ ဂျိုးဘိုင်ဒန်ကို တွေ့ရစဉ်

"ဖွဲ့စည်းပုံအခြေခံဥပဒေဟာ သူ့သဘောဆန္ဒအတိုင်း လုပ်လို့ရတယ်လို့ ထရမ့်က ပြောခဲ့ဖူးပါတယ်။ သမ္မတ တစ်ယောက်ဟာ အဲဒီလိုပြောတာမျိုး ကျနော်တစ်ခါမှ မကြားဖူးခဲ့ပါဘူး" ဟု ဘိုင်ဒန်က ပြောကြားခဲ့သည်။

ထရမ့်၏ မဲဆွယ်စည်းရုံးရေး ဆောင်ပုဒ်ဖြစ်သည့် "အမေရိကန်ကို နောက်တစ်ကြိမ် ကြီးမြတ်အောင် လုပ်ဆောင် ရေး" (Make America Great Again - MAGA) ဟူသည့် ဆောင်ပုဒ်အောက်တွင် ရီပတ်ဘလစ်ကန်ပါတီသည် ခြိမ်းခြောက်ခံနေရကြောင်း ဘိုင်ဒန်က သတိပေးခဲ့သည်။

ထို့ပြင် မကြာသေးမီက အမေရိကန် ထိပ်သီးစစ်ဘက် အရာရှိများကို နိုင်ငံတော် သစ္စာဖောက်မှုဖြင့် စွပ်စွဲခဲ့သည့် ထရမ့်၏ ပြောကြားချက်များနှင့် ပတ်သက်ပြီး ရီပတ်ဘလစ်ကန်ပါတီ၏ နှုတ်ဆိတ်နေမှုကိုလည်း ဘိုင်ဒန်က ဝေဖန်ခဲ့သည်။

Source: ဘန်ကောက်ပို့စ်

CNI International News

ကာဇန်၊ စက်တင်ဘာ ၃၀

အာဖဂန်နစ္စတန်နိုင်ငံအတွင်းနှင့် အနီးတစ်ဝိုက်ဒေသများတွင် ဒေသတွင်းမှ မဟုတ်သည့် အပြင်လူများ၏ လှုပ်ရှားမှုများ မြင့်တက်နေပြီး ဝင်ရောက်စွက်ဖက်ရန် ကြိုးပမ်းနေသည်ဟု ရုရှားနိုင်ငံခြားရေးဝန်ကြီး ဆာဂျေ လာဗရော့ဗ် (Sergey Lavrov) က ပြောကြောင်း တာ့စ်သတင်းဌာနမှ ဖော်ပြခဲ့သည်။

ရုရှားနိုင်ငံ၊ ကာဇန် (Kazan) မြို့တွင် ပြုလုပ်သည့် အာဖဂန်အရေး ဆွေးနွေးညှိနှိုင်းပွဲတွင်  ပါဝင်တက်ရောက် သူများကို လာဗရော့ဗ်က မိန့်ခွန်းစာရွက်ထဲတွင် ရေးသားပေးပို့ခဲ့ခြင်း ဖြစ်သည်။

"ဒေသတွင်းက မဟုတ်တဲ့ ပြင်ပနိုင်ငံတွေကလူတွေဟာ အာဖဂန်ကို ဦးတည်ချက်ထားပြီး လှုပ်ရှားမှုတွေကို တိုးမြှင့်ဖို့ ကြိုးပမ်းနေတာတွေနဲ့ ပတ်သက်ပြီး ကျနော်တို့ စိုးရိမ်မိပါတယ်" ဟု လာဗရော့ဗ်က စာဖြင့် ရေးသား ပေးပို့ခဲ့သည့် မက်ဆေ့ချ်ကို ရုရှားသမ္မတ၏ အာဖဂန်နစ္စတန်ဆိုင်ရာ အထူးကိုယ်စားလှယ် (Russian Special Presidential Representative for Afghanistan) ဇမ်မီယာ ကာဘူလော့ဗ် (Zamir Kabulov) က ဖတ်ကြား ခဲ့သည်။

ကာဘူလော့ဗ်သည် ရုရှားနိုင်ငံခြားရေးဝန်ကြီးဌာန၏ ဒုတိယ အာရှဌာန (Second Asian Department) ၏ ညွှန်ကြားရေးမှူးအဖြစ်လည်း တာဝန်ထမ်းဆောင်နေသူ ဖြစ်သည်။

အာဖဂန် အမျိုးသမီးတွေကြားမှာ တာလီဘန်တစ်ယောက်ကို တွေ့ရစဉ်

နေတိုးအဖွဲ့ဝင် နိုင်ငံများနှင့်အတူ ဒေသတွင်း နိုင်ငံများ၏ ပူးပေါင်းဆောင်ရွက်ရေး အားထုတ်ကြိုးပမ်းမှုများသည် အာဖဂန်နစ္စတန်နိုင်ငံကို ပရမ်းပတာဖြစ်စေခဲ့သည့် ၎င်းတို့၏ နှစ်ပေါင်း ၂၀ ကြာ စစ်ပွဲ၏ အန္တရာယ်ကြီးမားသော ရလဒ်များအတွက် အပြည့်အဝ တာဝန်ယူမှုနှင့် ဝန်ခံမှုကို ပြသခြင်း ဖြစ်နိုင်သည်ဟု လာဗရော့ဗ်က ပြောကြားခဲ့ သည်။

အာဖဂန်ပြည်သူများကို အစားထိုးမရနိုင်သည့် ထိခိုက်ပျက်စီးမှုများနှင့် ကြုံတွေ့ခံစားစေခဲ့ရသော အနောက် နိုင်ငံများအနေဖြင့် စစ်ပွဲအလွန် အာဖဂန်ပြန်လည် ထူထောင်ရေးတွင် အဓိကနေရာမှ ပါဝင်ထမ်းဆောင် ပေးရ မည်ဟုလည်း ရုရှားနိုင်ငံခြားရေးဝန်ကြီးက ဆိုသည်။

"ဒါနဲ့ပတ်သက်ပြီး ပြောရမယ်ဆိုရင် အာဖဂန် ဗဟိုဘဏ်ရဲ့ ပိုင်ဆိုင်မှုတွေကို အမေရိကန်က ထိန်းချုပ်ထားတာဟာ အကျိုးမရှိဘဲ အောက်ခြေ အာဖဂန်ပြည်သူတွေရဲ့ စားဝတ်နေရေးကို ပိုမိုဆင်းရဲကျပ်တည်းစေပြီး အခြေအနေ တွေကို ပိုမိုဆိုးရွားစေရုံသာ ရှိခဲ့ပါတယ်" ဟု လာဗရော့ဗ်က နိဂုံးချုပ်အနေဖြင့် ပြောကြားခဲ့သည်။

Source: တာ့စ်

CNI International News

ကိယက်ဗ်၊ စက်တင်ဘာ ၃၀

နေတိုးအဖွဲ့၏ အတွင်းရေးမှူးချုပ် ဂျန်းစ် စတိုတန်ဘာ့ချ် (Jens Stoltenberg) သည် ယူကရိန်းသမ္မတ ဗိုလိုဒီမာ ဇာလန်းစကီး (Volodymyr Zelenskyy) နှင့် စက်တင်ဘာ ၂၈ ရက်က ကိယက်ဗ်မြို့တော်တွင် တွေ့ဆုံခဲ့ပြီး စစ်ပွဲ အခြေအနေနှင့် ယူကရိန်းစစ်သားများ၏ လိုအပ်ချက်များကို ဆွေးနွေးခဲ့သည်ဟု အေပီမှ ဖော်ပြခဲ့သည်။

ပြီးခဲ့သည့် သီတင်းပတ်က ခရိုင်းမီးယား (Crimea) ကျွန်းဆွယ်ရှိ ရုရှား၏ ရေတပ်စခန်းဌာနချုပ်အား ဒုံးကျည်ဖြင့် တိုက်ခိုက်မှုကို ယူကရိန်း၏ အနောက်နိုင်ငံများက အစီအစဉ်ရေးဆွဲပေးခဲ့ပြီး ပူးပေါင်းလုပ်ဆောင်ခဲ့သည်ဟု ရုရှားက စွပ်စွဲခဲ့ပြီး တစ်ရက်အကြာတွင် စတိုတန်ဘာ့ချ်နှင့် ဇာလန်းစကီးတို့ တွေ့ဆုံခဲ့ကြခြင်း ဖြစ်သည်။

ပြီးခဲ့သည့် ဆောင်းရာသီက ရုရှား၏ တိုက်ခိုက်မှုများကြောင့် ဆိုးရွားစွာ ထိခိုက်ပျက်စီးခဲ့သည့် ယူကရိန်း၏ လျှပ်စစ် ဓာတ်အားပေး စက်ရုံများနှင့် စွမ်းအင် အခြေခံ အဆောက်အအုံများကို ကာကွယ်ရန် နောက်ထပ် လေကြောင်းကာကွယ်ရေး စနစ်များ ပိုမိုထောက်ပံ့ပေးရေး စတိုတန်ဘာ့ချ်က သဘောတူခဲ့သည်ဟု ဇာလန်းစကီး က ပြောသည်။

ထို့ပြင် မကြာသေးမီ ရက်ပိုင်းအတွင်းက ယူကရိန်းအရပ်သားများ သေဆုံးခဲ့သည့် ရုရှား၏ ဒရုန်းတိုက်ခိုက်မှုများ၊ ဒုံးကျည်တိုက်ခိုက်မှုများနှင့် လက်နက်ကြီးဖြင့် တိုက်ခိုက်မှုများ အခြေအနေကိုလည်း ဇာလန်းစကီးက နေတိုး အကြီးအကဲကို ပြောပြခဲ့သည်။

ရုရှားရဲ့ တိုက်ခိုက်မှုကြောင့် ပျက်စီးနေသော ယူကရိန်းနိုင်ငံအတွင်းက တစ်နေရာကိုတွေ့ရစဉ်

"ယူကရိန်းပြည်သူတွေနဲ့ ယူကရိန်းရဲ့ မြို့တွေ၊ ဆိပ်ကမ်းတွေကို ပြင်းထန်စွာ တိုက်ခိုက်နေတဲ့ ရုရှားရဲ့ တိုက်ခိုက်မှု တွေကို ကာကွယ်ဖို့ လေကြောင်းကာကွယ်ရေးစနစ်ကို ပိုမိုတိုးမြှင့်ဖို့ လိုအပ်ပါတယ်။ ယူကရိန်းရဲ့ ဆိပ်ကမ်းတွေ ဟာ ကမ္ဘာလုံးဆိုင်ရာ စားနပ်ရိက္ခာ လုံခြုံရေးအတွက် အရမ်းကို အရေးကြီးပါတယ်"ဟု ဇာလန်းစကီးက ပြော သည်။

နေတိုးအဖွဲ့သည် ယူကရိန်းကို ၁၅၅ မမ ဟောင်ဝပ်ဇာ ( 150 mm Howitzer) လက်နက်ကြီးကျည်များ၊ တင့်ကား ဖျက် ပဲ့ထိန်းဒုံးကျည်များနှင့် တင့်ကားများအတွက် လိုအပ်သည့် လက်နက်ခဲယမ်းများ အပါအဝင် ဒေါ်လာ ၂ ဒသမ ၅ ဘီလျံ တန်ကြေးရှိ ကန်ထရိုက်များ ချုပ်ဆိုထားကြောင်း နေတိုးအတွင်းရေးမှူးချုပ် စတိုတန်ဘာ့ချ်က ပြော သည်။

နေတိုးအဖွဲ့၏ အတွင်းရေးမှူးချုပ် ဂျန်းစ် စတိုတန်ဘာ့ချ်နဲ့ ယူကရိန်းသမ္မတ ဗိုလိုဒီမာ ဇာလန်းစကီးကို တွေ့ရစဉ်

"ယူကရိန်းရဲ့ အင်အား ပိုမိုကြီးမားလာလေလေ၊ ရုရှားရဲ့ ကျူးကျော်မှု အဆုံးသတ်ဖို့ နီးစပ်လာလေလေပါပဲ။ ရုရှား အနေနဲ့ အခုပဲ လက်နက်ချပြီး စစ်ပွဲကို အဆုံးသတ်ရမှာ ဖြစ်ပါတယ်။ ယူကရိန်းကတော့ ဒီလိုမဟုတ်ပါဘူး။ ယူကရိန်းရဲ့ လက်နက်ချမှုဟာ ငြိမ်းချမ်းရေးကို မဖြစ်စေပါဘူး။ ရုရှားရဲ့ ကျူးကျော်မှုကို ပိုပြီးဆိုးရွားစေဖို့ပဲ ဖြစ်လာပါလိမ့်မယ်" ဟု စတိုတန်ဘာ့ချ်က ပြောကြားခဲ့သည်။

ယူကရိန်းသည် နေတိုးအဖွဲ့ထဲ ဝင်ရောက်ရေးအတွက် တွန်းအားပေး ပြောနေပြီး စတိုတန်ဘာ့ချ်ကလည်း နေတိုးအဖွဲ့အတွင်း ယူကရိန်း၏ အနာဂတ်ရှိကြောင်းနှင့် ယူကရိန်းဘက်မှ ဆက်လက် ရပ်တည်မည်ဖြစ်ကြောင်း ထပ်လောင်း အတည်ပြုခဲ့သည်။

ရုရှားကမူ ယူကရိန်းသည် နေတိုးအဖွဲ့ဝင် ဖြစ်လာနိုင်သည်ဟု ရှုမြင်ထားပြီး နေတိုးအဖွဲ့သည် ပြင်ပခြိမ်းခြောက်မှု ဖြစ်ကာ ယူကရိန်းကို နေတိုးအဖွဲ့ဝင် မဖြစ်စေရန် တားဆီးမည်ဟု ပြောကြားခဲ့သည်။

Source: အေပီ

CNI International News

မော်စကို၊ စက်တင်ဘာ ၃၀

ရုရှားသမ္မတ ဗလာဒီမာ ပူတင် (Vladimir Putin) သည် စက်တင်ဘာ ၂၉ ရက်က ဝဂ်နာ ကြေးစားအုပ်စု၏ ထိပ်သီးတပ်မှူး တစ်ဦးဖြစ်သည့် ဒန်ဒရီ ထရိုရှက်ဗ် (Andrei Troshev) နှင့် တွေ့ဆုံခဲ့ပြီး ယူကရိန်းစစ်ပွဲအတွင်း ဗော်လန်တီယာ တပ်ဖွဲ့များကို အသုံးပြုရေးနှင့်ပတ်သက်ပြီး ဆွေးနွေးခဲ့သည်ဟု ရိုက်တာမှ ဖော်ပြခဲ့သည်။

ထိုတွေ့ဆုံဆွေးနွေးမှုအရ ဇွန်လအတွင်း အောင်မြင်ခြင်း မရှိခဲ့သည့် ဝဂ်နာအဖွဲ့၏ ပုန်ကန်မှုဖြစ်ပွားပြီးနောက် ရုရှားအစိုးရသည် ဝဂ်နာအဖွဲ့အပေါ် လွှမ်းမိုးချုပ်ကိုင်ထားနိုင်ခဲ့သည့် အခြေအနေကို ပြသရာရောက်ခဲ့သည်။

ရုရှားအစိုးရအား ပုန်ကန်မှုကို ဦးဆောင်ခဲ့သည့် ဝဂ်နာအဖွဲ့အကြီးအကဲ ယက်ဂျီနီ ပရီဂေါ့ဇ်ဟင် (Yevgeny Prigozhin) နှင့် ၎င်း၏ ထိပ်သီးတပ်မှူး အချို့သည် သြဂုတ်လက လေယာဉ်ပျက်ကျမှုတွင် သေဆုံးခဲ့သည်။

ရုရှားနိုင်ငံပိုင် ရုပ်သံတွင်မူ ပူတင်သည် ဝဂ်နာ တပ်မှူးဟောင်း ထရိုရှက်ဗ်နှင့် တွေ့ဆုံပြီး အစည်းအဝေး ပြုလုပ်နေ ပုံများကို ဖော်ပြခဲ့သည်။

ဝဂ်နာတပ်ဖွဲ့ ထိပ်သီးတပ်မှူး တစ်ဦးဖြစ်တဲ့ ဒန်ဒရီ ထရိုရှက်ဗ်ကို တွေ့ရစဉ်

မကြာသေးမီ လများအတွင်းက ဝဂ်နာ ကြေးစားစစ်သားများ လှုပ်ရှားနေသည့် နိုင်ငံအချို့သို့ သွားရောက်ခဲ့သည့် ရုရှား၏ ဒုကာကွယ်ရေးဝန်ကြီး ယူနက်စ်-ဘက်ခ် ယက်ဗ်ကူရော့ဗ် (Yunus-Bek Yevkurov) သည်လည်း ထိုအစည်းအဝေးကို တက်ရောက်ခဲ့သည်။

ဗော်လန်တီယာ တပ်ဖွဲ့များအနေဖြင့် တိုက်ခိုက်ရေး တာဝန်များနှင့် အထူးစစ်ဆင်ရေးများ ပြုလုပ်သည့် ဇုန်များ တွင် မည်ကဲ့သို့ စွမ်းဆောင်နိုင်မည်ဆိုခြင်းကို ဆွေးနွေးခဲ့ကြသည်ဟု ပူတင်က ပြောကြားခဲ့သည်။

"သင့်အနေနဲ့ အဲဒီလို တပ်ဖွဲ့ထဲမှာ တစ်နှစ်ကျော်လောက် ပါဝင်တိုက်ခိုက်ခဲ့ဖူးပါတယ်။ ဘာတွေလုပ်ရမလဲ ဆိုတာ ကိုလည်း သိထားပြီးပါပြီ။ တိုက်ပွဲကို အအောင်မြင်ဆုံး နည်းလမ်းနဲ့ အကောင်းဆုံး တိုက်ခိုက်ဖို့အတွက်လည်း သင်သိပါတယ်" ဟု ပူတင်က ထရိုရှက်ဗ်အား ပြောကြားခဲ့သည်။

လေယာဉ်ပျက်ကျလို့ သေဆုံးသွားတဲ့ ဝဂ်နာတပ်ဖွဲ့ခေါင်းဆောင် ယက်ဂျီနီ ပရီဂေါ့ဇ်ဟင်ကို တွေ့ရစဉ်

ထို့ပြင် ယူကရိန်းစစ်ပွဲတွင် ပါဝင်တိုက်ခိုက် ခဲ့သူများအတွက် လူမှုရေးဆိုင်ရာ အကူအညီများ ပေးရေးနှင့်လည်း ဆွေးနွေးခဲ့သည်ဟု ပူတင်က ပြောသည်။

ထရိုရှက်ဗ်သည် ပူတင်၏ ပြောစကားများကို ရိုကျိုးစွာ နားထောင်နေပြီး လက်ထဲတွင်လည်း ဘောပင်တစ်ချောင်း ကိုင်ထားသည်ကို ရုရှားနိုင်ငံပိုင် ရုပ်သံက ထုတ်လွှင့်သည့် မှတ်တမ်းများတွင် မြင်တွေ့ရသည်။

သို့သော် ထိုအစည်းအဝေးအတွင်း ထရိုရှက်ဗ်၏ မှတ်ချက်စကားများကိုမူ ရုရှားနိုင်ငံပိုင်ရုပ်သံက ဖော်ပြခဲ့ခြင်း မရှိပေ။

Source: ရိုက်တာ

CNI International News

ဆိုးလ်၊ စက်တင်ဘာ ၂၉

စစ်အေးအသစ်တွင် အမေရိကန်နှင့် ထိပ်တိုက်တွေ့သည့် ညွန့်ပေါင်းနိုင်ငံများ၌ ကြီးမားသည့် အခန်းကဏ္ဍမှ ပါဝင်ရန်နှင့် နျူကလီးယား လက်နက်များ ထုတ်လုပ်မှုကို အဆမတန် တိုးမြှင့်ရန် မြောက်ကိုရီးယား ခေါင်းဆောင် ကင်မ်ဂျုံအန်က ပြောကြားခဲ့ကြောင်း အေပီမှ ဖော်ပြခဲ့သည်။ 

မြောက်ကိုရီးယား၏ နှစ်ရက်ကြာ ပြုလုပ်ခဲ့သည့်် လွှတ်တော်အစည်းအဝေးတွင် ကင်မ်က အထက်ပါအတိုင်း မှတ်ချက်ပေးခဲ့ခြင်း ဖြစ်သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီက ဖော်ပြခဲ့သည်။

စက်တင်ဘာ ၂၆ ရက်နှင့် ၂၇ ရက်တွင် ပြုလုပ်ခဲ့သည့် မြောက်ကိုရီးယား၏ အမြင့်ဆုံး ပြည်သူ့လွှတ်တော် အစည်းအဝေး၌ မြောက်ကိုရီးယား၏ နျူကလီးယားလက်နက် စီမံကိန်းကို တိုးမြှင့်ရန် မူဝါဒများပါဝင်သည့် ဖွဲ့စည်းပုံအခြေခံဥပဒေ ပြင်ဆင်ရေးဆွဲမှုကို ပြုလုပ်ခဲ့သည်။

မြောက်ကိုရီးယား လွှတ်တော် အစည်းအဝေး ကျင်းပနေစဉ်

ကင်မ်သည် ရုရှား၏ အရှေ့ဖျားဒေသသို့ သွားရောက်ခဲ့ပြီး ရုရှားသမ္မတ ဗလာဒီမာ ပူတင်နှင့် အစည်းအဝေး ပြုလုပ်ခဲ့သလို ရုရှား၏ စစ်ဘက်ဆိုင်ရာနှင့် နည်းပညာစင်တာများကို လေ့လာကြည့်ရှုခဲ့ပြီးနောက် လွှတ်တော် အစည်းအဝေးကို ပြုလုပ်ခဲ့ခြင်း ဖြစ်သည်။

ကင်မ်၏ ရုရှားခရီးစဉ်အတွင်း မြောက်ကိုရီးယားသည် ယူကရိန်းစစ်ပွဲတွင် ရုရှားအား လက်နက်ခဲယမ်းများ ထောက်ပံ့ပေးဖွယ်ရှိပြီး အပြန်အလှန်အနေဖြင့် ၎င်း၏ နျူကလီးယားနှင့် ဒုံးကျည်စနစ်များကို တိုးမြှင့်ရန် ရုရှား၏ နည်းပညာများနှင့် စီးပွားရေးအကူအညီများကို လက်ခံရယူဖွယ်ရှိသည်။

ထိုအခြေအနေအပေါ် အနောက်နိုင်ငံများက စိုးရိမ်နေသည်။

မြောက်ကိုရီးယားသည် ကပ်ရောဂါဆိုင်ရာ လော့ဒေါင်းများကို တဖြည်းဖြည်း အဆုံးသတ်နေချိန်တွင် အမေရိကန် ကို ဆန့်ကျင်သည့် အင်အားစုတစ်ခုတွင် ပါဝင်ရန်နှင့် သံတမန်ရေးအရ ဖယ်ကြဉ်ခံထားရမှုကို ရှောင်လွှဲရန် ကင်မ် သည် ရုရှား၊ တရုတ်တို့နှင့် မိတ်ဖက် ဆက်ဆံရေးများကို တိုးမြှင့်လုပ်ဆောင်နေသည်။

မြောက်ကိုရီးယား၏ ဖွဲ့စည်းပုံအခြေခံဉပဒေ စာအုပ်ကို တွေ့ရစဉ်

ကမ္ဘာသည် စစ်အေးအသစ်ထဲသို့ ဝင်ရောက်နေသဖြင့် မြောက်ကိုရီးယားအနေဖြင့် နျူကလီးယား စွမ်းဆောင်ရည် များကို တိုးမြှင့်သင့်ကြောင်း ကင်မ်က ပြောကြားခဲ့သည်။

မြောက်ကိုရီးယား လွှတ်တော် အစည်းအဝေးအတွင်း နိုင်ငံ၏ နျူကလီးယား လက်နက် ထုတ်လုပ်မှုကို လျင်မြန်စွာ မြှင့်တင်ခြင်းဖြင့် ဒေသတွင်းနှင့် ကမ္ဘာလုံးဆိုင်ရာ ငြိမ်းချမ်းရေးကို ကာကွယ်ရန် အတည်ပြုခဲ့ကြသည်။

အလားတူ စစ်ပွဲကို တားဆီးရန် အပြင် မြောက်ကိုရီးယား၏ တည်ရှိပိုင်ခွင့်နှင့် ဖွံ့ဖြိုးတိုးတက်ပိုင်ခွင့်တို့ကို စိတ်ချ သေချာစေမည့် ဖွဲ့စည်းပုံအခြေခံဥပဒေ အပိုဒ်ခွဲအသစ်တစ်ခုကို ထပ်မံထည့်သွင်းရန် တစ်ညီတစ်ညွတ်တည်း အတည်ပြုခဲ့ကြသည်။

ထို့ပြင် အမေရိကန်၊ တောင်ကိုရီးယားနှင့် ဂျပန်တို့အကြား စစ်ရေး ပူးပေါင်းဆောင်ရွက်မှုများ မြှင်တင်နေခြင်းသည် ကြီးမားသည့် ခြိမ်းခြောက်မှုဖြစ်ပြီး ထိုသုံးနိုင်ငံသည် အာရှနေတိုးအဖွဲ့ပုံစံ ဖန်တီးနေခြင်းဖြစ်ကြောင်း ကင်မ်က စွပ်စွဲခဲ့သည်။

Source: အေပီ

CNI International News

ကောင်းရှောင်၊ စက်တင်ဘာ ၂၉

ထိုင်ဝမ်သည် စက်တင်ဘာ ၂၈ ရက်က ၎င်း၏ ပထမဆုံး ပြည်တွင်းလုပ် ရေငုပ်သင်္ဘောတစ်စင်းကို ထုတ်ဖော်ပြသ ခဲ့သည်ဟု ရိုက်တာမှ ဖော်ပြခဲ့သည်။

တရုတ်ရေတပ်ကို ဆန့်ကျင်သည့် ထိုင်ဝမ်၏ ကာကွယ်ရေးစနစ်အား တိုးမြှင့်သည့်အနေဖြင့် ပြည်တွင်းတွင် ရေငုပ်သင်္ဘောများ ထုတ်လုပ်ရေး စီမံကိန်းကို ပြုလုပ်ခဲ့ခြင်း ဖြစ်သည်။

ယခုထုတ်ဖော်ပြသခဲ့သည့် ရေငုပ်သင်္ဘောကိုမူ လာမည့်နှစ်နှစ်အတွင်း ရေတပ်တွင် တာဝန်အပ်နှင်းသွားဦးမည် မဟုတ်ပေ။

ထိုင်ဝမ်သမ္မတ ဆိုင်အင်ဝမ်ကို တွေ့ရစဉ်

ထိုင်ဝမ်အနီးတွင် တရုတ်က နေ့စဉ်နီးပါး စစ်ရေးလှုပ်ရှားမှုများ ပြုလုပ်နေသဖြင့် ထိုင်ဝမ်သည် ၎င်း၏ လက်နက် ကိုင် တပ်ဖွဲ့အင်အားကို အဆင့်မြှင့်တင်ရန် ရည်မှန်းချက်ကြီးမားသည့် စီမံကိန်းများ၏ တစ်စိတ်တစ်ပိုင်း အနေဖြင့် ပြည်တွင်းတွင် ရေငုပ်သင်္ဘောများ ထုတ်လုပ်သည့် အစီအစဉ်ကို လုပ်ဆောင်ခဲ့ခြင်းဖြစ်သည်။

၂၀၁၆ ခုနှစ်က အာဏာရလာခဲ့သည့် ထိုင်ဝမ်သမ္မတ ဆိုင်အင်ဝမ် (Tsai Ing-wen) သည် စက်တင်ဘာ ၂၈ ရက်က ထိုင်ဝမ်တောင်ပိုင်း ကောင်းရှောင်မြို့တွင် ပထမဆုံး ပြည်တွင်းလုပ် ရေငုပ်သင်္ဘောကို ထုတ်ဖော်ပြသခဲ့သည်။ 

ထိုရေငုပ်သင်္ဘောသည် ပြည်တွင်းတွင် ထုတ်လုပ်ရန် စီစဉ်ထားသည့် ရေငုပ်သင်္ဘော ၈ စင်းထဲမှ ပထမဆုံး ရေငုပ် သင်္ဘော ဖြစ်သည်။ 

"အတိတ်ကာလတုန်းကတော့ ရေငုပ်သင်္ဘောကို ပြည်တွင်းမှာ ထုတ်လုပ်ဖို့ဆိုတာ မဖြစ်နိုင်တဲ့ အလုပ်တစ်ခုပါ။ ဒါပေမယ့် ဒီနေ့မှာတော့ ကျမတို့ ပြည်သူတွေရဲ့ မျက်စိရှေ့မှောက်မှာပဲ ရေငုပ်သင်္ဘောတစ်စင်းကို ဒီဇိုင်းထွင် ထုတ်လုပ်နိုင်ခဲ့ပါပြီ" ဟု ဆိုင်က ပြောကြားခဲ့သည်။

ထိုင်ဝမ်ပြည်တွင်းထုတ် ရေငုပ်သင်္ဘောကို တွေ့ရစဉ်

ရေငုပ်သင်္ဘော ထုတ်လုပ်မှုကို အရဲစွန့်ပြီး လုပ်ဆောင်ခဲ့ခြင်းဖြစ်ကာ စိန်ခေါ်မှုများနှင့် ကြုံတွေ့ခဲ့ရသည့်တိုင် ထိုင်ဝမ်သည် မိမိကိုယ်ကိုယ် အားထားသည့် အမျိုးသားကာကွယ်ရေးမူဝါဒကို ဆက်လက် ရှင်သန်စေရန်နှင့် ထိုင်ဝမ်အား ကြီးပွားတိုးတက်စေရန် ဆက်လက် လုပ်ဆောင်ရမည်ဟုလည်း ဆိုင်က ပြောသည်။

Narwhal ဟု အမည်ပေးထားသည့် အဆိုပါ ရေငုပ်သင်္ဘောသည် ၂၀၂၅ ခုနှစ်တွင် တပ်တော်ဝင်ပြီး တာဝန် ထမ်းဆောင်မည်ဖြစ်ကာ ၁၉၈၀ ပြည့်နှစ်က နယ်သာလန်နိုင်ငံမှ ဝယ်ယူထားသော ရှိရင်းစွဲ ရေငုပ်သင်္ဘော နှစ်စင်းနှင့် ပူးပေါင်းမည်ဟု ထိုင်ဝမ်သမ္မတက ဆိုသည်။

ထိုင်ဝမ်သည် ၂၀၂၇ ခုနှစ်တွင် နောက်ထပ် ပြည်တွင်းလုပ် ရေငုပ်သင်္ဘောနှစ်စင်း ထပ်မံဖြန့်ကြက်ရန် မျှော်လင့် ထားပြီး ထိုရေငုပ်သင်္ဘောများတွင် ဒုံးကျည်များ တပ်ဆင်သွားမည်ဟု ရေငုပ်သင်္ဘော တည်ဆောက်ရေး စီမံကိန်း ကို တာဝန်ယူ ဆောင်ရွက်နေသည့် ထိုင်ဝမ်၏ CSBC Corp က ပြောကြားခဲ့သည်။

Source: ရိုက်တာ

CNI International News

မော်စကို၊ စက်တင်ဘာ ၂၉

မြေပြင်တွင် ဖြစ်ပွားနေသည့် အခြေအနေများနှင့် ရုရှား၏ လုံခြုံရေးအကျိုးစီးပွားများကို ထည့်သွင်းစဉ်းစားပြီး ယူကရိန်းနှင့် ဆွေးနွေးမှုများ ပြုလုပ်ရန် ရုရှားက အသင့်ရှိကြောင်း ရုရှားနိုင်ငံခြားရေးဝန်ကြီး ဆာဂျေ လာဗရော့ဗ် (Sergey Lavrov) က ပြောသည်ဟု တာ့စ်သတင်းဌာနမှ ဖော်ပြခဲ့သည်။

"ကျနော်တို့ရဲ့ သဘောထားက မပြောင်းလဲပါဘူး။ ကျနော်တို့ရဲ့ လုံခြုံရေး အကျိုးစီးပွားတွေအပေါ် ထားရှိတဲ့ ကျနော်တို့ရဲ့ ရပ်တည်ချက်နဲ့ မြေပြင်မှာ ဖြစ်ပွားနေတဲ့ လက်ရှိ အခြေအနေတွေကို ထည့်သွင်းစဉ်စားပြီး ယူကရိန်း နဲ့ သဘောတူညီမှုတွေ ပြုလုပ်ဖို့ ကျနော်တို့ဘက်က အသင့်ရှိပါတယ်"ဟု လာဗရော့ဗ်က တာ့စ်နှင့် ပြုလုပ်သည့် အင်တာဗျူးတွင် ပြေကြားခဲ့သည်။

ယူကရိန်းသမ္မတ ဇာလန်စကီးကို တွေ့ရစဉ်

ခရိုင်းမီးယား(Crimea) နှင့် နိုဗိုရော့စီယာ (Novorossiya) ဒေသများရှိ ရုရှား၏ ပိုင်ဆိုင်မှုအားလုံးကို ဖျက်ဆီးရန် ကြေညာခဲ့သည့် ရုရှားနယ်စပ်အနီးရှိ ရန်လိုသော နာဇီစနစ်ဖန်တီးမှုအား တားဆီးရန်လည်း ပါဝင်သည်ဟု လာဗရော့ဗ်က ပြောသည်။ 

ယူကရိန်းနှင့် ရုရှားအကြား ဆွေးနွေးမှုများ နှောင့်နှေးကြန့်ကြာလေလေ၊ သဘောတူညီမှုတစ်စုံတစ်ရာ ရရှိရန် ခက်ခဲလေလေဖြစ်ကြောင်း လာဗရော့က ပြောသည်။ 

ထို့ပြင် ရုရှားနှင့် ဆွေးနွေးမှုများကို တားမြစ်ထားသည့် ယူကရိန်းသမ္မတ ဇာလန်စကီး (Volodymyr Zelensky) ၏ တားမြစ်ချက်ကို ပြန်လည်ရုပ်သိမ်းသင့်ကြောင်းနှင့် ဆွေးနွေးမှုများပြုလုပ်ရန် လမ်းဖွင့်ပေးသင့်ကြောင်းလည်း လာဗရော့ဗ်က ပြောကြားခဲ့သည်။

Source: တာ့စ်

CNI International News

နယူးယောက်၊ စက်တင်ဘာ ၂၈

နျူကလီးယားလက်နက်များ အပြိုင်အဆိုင် တပ်ဆင်မှုသည် ကမ္ဘာကို ပျက်သုဉ်းစေမည့် အန္တရာယ်တစ်ခုကို ဆောင်ကြဉ်းလာကြောင်း ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် (Antonio Gutteres)က သတိပေးခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

ကိုရီးယားကျွန်းဆွယ်ပေါ်တွင် နျူကလီးယား စစ်ပွဲဖြစ်ပွားလုနီး အခြေအနေအထိ ရောက်ရှိနေကြောင်း မြောက်ကိုရီးယားက ပြောကြားခဲ့ပြီးနောက် ဂူတာရက်စ်၏ သတိပေးချက် ထွက်ပေါ်လာခဲ့ခြင်းဖြစ်သည်။

နျူကလီးယားလက်နက် ပိုင်ဆိုင်သည့် နိုင်ငံများသည် ၎င်းတို့၏ နျူကလီးယား လက်နက်များကို တိုးမြှင့်ထုတ်လုပ် ခြင်း၊ အဆင့်မြှင့်တင်မှုများ ပြုလုပ်နေခြင်းနှင့်အတူ ထိုနျူကလီးယား လက်နက်များ လျှော့ချရေးနှင့် ဖျက်သိမ်းရေး အတွက် အားထုတ်ကြိုးပမ်းမှုများကို ပြန်လည် လုပ်ဆောင်သင့်သည်ဟု ဂူတာရက်စ်က တိုက်တွန်းခဲ့သည်။

ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်ကို တွေ့ရစဉ်

"စိုးရိမ်ဖို့ကောင်းတဲ့ လက်နက်အပြိုင်အဆိုင် တပ်ဆင်မှု အခြေအနေသစ်တစ်ခု ပေါ်ပေါက်လာခဲ့ပါပြီ။ ဆယ်စုနှစ် တွေအတွင်း ပထမဆုံးအကြိမ်အဖြစ် နျူကလီးယားလက်နက် အရေအတွက် မြင့်တက်လာနိုင်ပါတယ်"ဟု ဂူတာရက်စ်က ကုလသမဂ္ဂ အထွေထွေညီလာခံ၏ နောက်ဆုံးနေ့ဖြစ်သည့် စက်တင်ဘာ ၂၆ ရက်တွင် ပြောကြားခဲ့သည်။

"နျူကလီးယားလက်နက်တွေကို ဘယ်အချိန်၊ ဘယ်နေရာမှာ ဘယ်လို အခြေအနေမျိုးနဲ့မဆို အသုံးပြုတာဟာ လူသားချင်းစာနာထောက်ထားမှုအတွက် ကြီးမားတဲ့ ကပ်ဘေးတစ်ခုကို ဖြစ်စေနိုင်ပါလိမ့်မယ်။ နျူကလီးယား လက်နက်တွေရဲ့ ခြိမ်းခြောက်မှုက နောက်တစ်ကြိမ် မြင့်တက်လာခဲ့ပါပြီ။ ဒါဟာ ရူးသွပ်မှုတစ်ခုပါပဲ။ ကျနော်တို့ အနေနဲ့ နောက်ကြောင်း ပြန်လှည့်ရမှာပါ" ဟု ဂူတာရက်စ်က ပြောသည်။ 

ရုရှားနှင့် အမေရိကန်သည် နျူကလီးယား လက်နက် အများဆုံးနိုင်ငံများဖြစ်ပြီး တရုတ်၏ နျူကလီးယား လက်နက် အင်အားသည်လည်း လျင်မြန်စွာ မြင့်တက်လာခဲ့သည်။ 

ဗုံးကြဲမှုကို တွေ့ရစဉ်

ထို့အတူ မြောက်ကိုရီးယားသည်လည်း နျူကလီးယား လက်နက် စီမံကိန်းနှင့် ဒုံးကျည်စမ်းသပ်မှုများကို မကြာခဏ ပြုလုပ်လျက်ရှိသည်။ 

ကုလအထွေထွေညီလာခံတွင် မြောက်ကိုရီးယားသံအမတ် ကင်မ်ဆောင်း (Kim Song) က မိန့်ခွန်းပြောကြားခဲ့ရာ တွင် အမေရိကန်သည် ကိုရီးယားကျွန်းဆွယ်ကို နျူကလီးယားစစ်ပွဲ ဖြစ်ပွားမည့် အခြေအနေသို့ တွန်းပို့နေသည်ဟု စွပ်စွဲခဲ့သည်။ 

ထို့ပြင် တောင်ကိုရီးယားသမ္မတ ယွန်းဆော့ရွဲ (Yoon Suk Yeol) လက်ထက်တွင် တောင်ကိုရီးယားသည် အမေရိကန်၊ ဂျပန်တို့နှင့် ပူးပေါင်းဆောင်ရွက်မှုများ မြှင့်တင်နေမှုကိုလည်း ကင်မ်က ရှုတ်ချခဲ့သည်။

"ပြင်ပ အင်အားစုတွေကို အရမ်းမှီခိုလွန်းတဲ့ တောင်ကိုရီးယားရဲ့ မူဝါဒကြောင့် ကိုရီးယားကျွန်းဆွယ်ဟာ နျူကလီယားစစ်ပွဲ ချက်ချင်းဖြစ်ပွားမယ့် အခြေအနေကို ကြုံတွေ့နေရပါတယ်" ဟု ကင်မ်က ပြောကြားခဲ့သည်။

Source: ဘန်ကောက်ပို့စ်

CNI International News

နယူးဒေလီ။ စက်တင်ဘာ ၂၈

ကနေဒါနိုင်ငံတွင် ဆစ်ခ်ဘာသာဝင် ခွဲထွက်ဝါဒီ ဟာဒိပ် ဆင်း နစ်ဂျား (Hardeep Singh Nijjar) သတ်ဖြတ်ခံ ရသည့် အသေးစိတ် အချက်အလက်များကို လေ့လာသုံးသပ်လိုကြောင်း ကနေဒါအစိုးရအား ပြောခဲ့သည်ဟု အိန္ဒိယနိုင်ငံခြားရေးဝန်ကြီး ဆူဘရာမန်ယမ် ဂျိုင်ရှန်ကာ (Subramanyam Jaishankar) က ပြောကြောင်း CNA မှ ဖော်ပြခဲ့သည်။

နစ်ဂျား သတ်ဖြတ်ခံရမှုတွင် အိန္ဒိယ ထောက်လှမ်းရေး အေးဂျင့်များနှင့် ဆက်နွှယ်မှုရှိကြောင်း ကနေဒါ ဝန်ကြီးချုပ် ဂျပ်စတင် ထရူဒိုး (Justin Trudeau) က ပြီးခဲ့သည့် သီတင်းပတ်တွင် ပြောကြားခဲ့သည်။

အိန္ဒိယအစိုးရကမူ ကနေဒါ၏ စွပ်စွဲချက်များကို ဒေါသတကြီး တုံ့ပြန်ခဲ့ပြီး ထိုစွပ်စွဲချက်များကို ငြင်းဆိုခဲ့သည်။ 

ထိုအကြောင်းအရာနှင့် ပတ်သက်ပြီး နယူးယောက်မြို့ရှိ ပြည်ပဆက်ဆံရေးကောင်စီတွင် မေးမြန်းခံရချိန်၌  ဂျိုင်ရှန်ကာက အိန္ဒိယ၏ သံတမန် ထိတွေ့ဆက်ဆံမှုများ အကြောင်းကို အသေးစိတ် ရှင်းလင်းပြောကြားခဲ့သည်။ 

"ပထမအချက်က ဒီဖြစ်စဉ်ဟာ အိန္ဒိယအစိုးရရဲ့ မူဝါဒ မဟုတ်ဘူးဆိုတာကို ကနေဒါကို ပြောခဲ့ပါတယ်။ ဒုတိယ အချက်က ဒီအကြောင်းအရာနဲ့ ပတ်သက်ပြီး ရရှိထားတဲ့ အသေးစိတ် အချက်အလက်တွေကို ကျနော်တို့ကို မျှဝေ ပေးဖို့ ကနေဒါကို ပြောခဲ့ပါတယ်"ဟု ဂျိုင်ရှန်ကာက ပြောကြားခဲ့သည်။

 သေဆုံးခဲ့သော ဆစ်ခ်ဘာသာဝင် ခွဲထွက်ဝါဒီ ဟာဒိပ် ဆင်း နစ်ဂျားရဲ့ ရုပ်ပုံကိုတွေ့ရစဉ်

ပြီးခဲ့သည့် သီတင်းပတ်တွင် အိန္ဒိယသည် ကနေဒါနိုင်ငံများအတွက် ဗီဇာအသစ်များ ထုတ်ပေးမှုကို ဆိုင်းငံ့ခဲ့ပြီး အိန္ဒိယတွင် ကနေဒါ၏ သံတမန်ရေးရာ တည်ရှိမှုကို လျှော့ချရန် ကနေဒါအစိုးရကို တောင်းဆိုခဲ့သည်။

နစ်ဂျား သတ်ဖြတ်ခံရမှုနှင့် ပတ်သက်ပြီး ကနေဒါအစိုးက ထွက်ဆိုခဲ့သည့် အကြောင်းအရာများအပေါ် အိန္ဒိယ အစိုးရက ကနေဒါကို နားပူနားဆာ မလုပ်ခဲ့ကြောင်းနှင့် အသေးစိတ် အချက်အလက်များကို အိန္ဒိယထံ လွှဲပြောင်း ပေးရန်သာ တောင်းဆိုခဲ့ကြောင်း ဂျိုင်ရှန်ကာက ပြောသည်။

"နောက်ခံ အခြေအနေတွေမပါတဲ့ ရုပ်ပုံကားချပ်တစ်ခုဟာ မပြည့်စုံပါဘူး။ မကြာသေးခင် နှစ်တွေအတွင်း ကနေဒါ ဟာ စနစ်တကျ ကျူးလွန်တဲ့ ရာဇဝတ်မှုတွေ၊ ခွဲထွက်ရေး အင်အားစုတွေ၊ အကြမ်းဖက်မှုတွေ၊ အစွန်းရောက်မှုတွေ အများကြီးကို မြင်တွေ့ခဲ့ရပါတယ်"ဟု ၎င်းက ဆိုသည်။

အမေရိကန် အပါအဝင် ကနေဒါ၏ မဟာမိတ်များကမူ ကနေဒါ၏ ပြောကြားချက်များနှင့် ပတ်သက်ပြီး စိုးရိမ် ကြောင်း ဖော်ပြခဲ့ကာ ကနေဒါ၏ စုံစမ်းစစ်ဆေးမှုကို ပူးပေါင်းပါဝင်ရန် အိန္ဒိယကို တိုက်တွန်းခဲ့သည်။ 

Source: CAN