CNI International News

တိုကျို၊ မတ်လ ၁

စံချိန်တင်ကာကွယ်ရေးအသုံးစရိတ် ယန်း ၆ ဒသမ ၈ ထရီလီယံ ပါဝင်သည့် လာမည့် ဘဏ္ဍာရေးနှစ် ဘတ်ဂျက် ကို ဂျပန်အောက်လွှတ်တော်က အင်္ဂါနေ့တွင် အတည်ပြုပေးခဲ့သည်ဟု AP သတင်းတွင် ဖော်ပြသည်။

၂၀၂၃ ခုနှစ် ကာကွယ်ရေးဘတ်ဂျက်သည် ပြီးခဲ့သည့်နှစ်ကထက် ၂၀ ရာခိုင်နှုန်းမြင့်တက်လာပြီး အမေရိကန်လုပ် Tomahawk ခရုစ် ဒုံးကျည်များတပ်ဆင်ရန်အတွက် ယန်း ၂၁၁ ဒသမ ၃ ဘီလီယံ ပါဝင်သည်။ အဆိုပါ တာဝေးပစ် ဒုံးကျည်များကို စစ်သင်္ဘောများမှတစ်ဆင့် ပစ်ခတ်နိုင်ပြီး ၁၆၀၀ ကီလိုမီတာအဝေးမှပါ ပစ်ခတ်နိုင်ပါသည်။

ကုန်ကျစရိတ်ကြောင့် Tomahawk ဒုံးကျည်များဝယ်ယူရန် အစီအစဉ်သည်ဝေဖန်မှုများနှင့် ရင်ဆိုင်နေရကာ ဂျပန်ဝန်ကြီးချုပ် ဖူမီယို ကီရှီဒါ (Fumio Kishida) သည် တခြားအရာများထက် လက်နက်အသုံးစရိတ်ကို ဦးစားပေးဆောင်ရွက်နေသည်ဟု အတိုက်အခံများက ထောက်ပြသည်။ ကလေးသူငယ်များဖွံ့ဖြိုးတိုးတက်မှုနှင့် ပတ်သက်၍ ၁၀ နှစ်ကျော်ကြာ လျစ်လျူရှုခံထားရချိန်တွင် ဒုံးကျည်ဝယ်ယူရန်အသုံးစရိတ်ကို မည်သည့်အတွက် ကြောင့် လျင်လျင်မြန်မြန် အတည်ပြုချက်ရရှိခဲ့ပါသလဲဟု ဂျပန်အတိုက်အခံအမတ်တစ်ဦးက အင်္ဂါနေ့ အောက်လွှတ်တော် ဘတ်ဂျက်ကော်မတီတွင် မေးမြန်းခဲ့ပြီး နှစ်ခုစလုံးသည် ဂျပန်ပြည်သူများ၏ ဘဝနှင့် အသက်ရှင်သန်မှုအတွက် အရေးကြီးသည်ဟု ကီရှီဒါက ပြန်လည်တုန့်ပြန်ခဲ့သည်။

ဂျပန်နိုင်ငံသည် ဧပြီလတွင် စတင်မည့် ဘဏ္ဍာရေးနှစ်တွင် အမေရိကန်အားနောက်ထပ် ယန်း ၁၁၀ ဘီလီယံ ပေးချေရမည်ဖြစ်သည်။ ယင်းမှာ Tomahawk ဒုံးကျည်များ ပစ်ရန်လိုအပ်သော ကိရိယာများ၊ ဆော့ဝဲလ်များအပြင် နည်းပညာလွှဲပြောင်းပေးခြင်းနှင့် လေ့ကျင့်ရေးကုန်ကျစရိတ်များဖြစ်သည်။ Tomahawk ၄၀၀ ကို ဝယ်ယူမည်ဟု ကီရှီဒါက တနင်္လာနေ့လွှတ်တော်အစည်းအဝေးတွင် ပြောခဲ့သည်။

ဂျပန်ဝန်ကြီးချုပ် ဖူမီယို ကီရှီဒါသည် ဖေဖော်ဝါရီ ၂၈ ရက်က တိုကျိုတွင် ကျင်းပသည့် အောက်လွှတ်တော် ဘတ်ဂျက်ကော်မတီ အစည်းအဝေးတွင် ပြောဆိုနေစဉ်(ဓါတ်ပုံ-အေပီ)

ဂျပန်နိုင်ငံတွင် အောက်လွှတ်တော်သည် အထက်လွှတ်တော်ထက် ပို၍အင်အားကြီးပြီး အောက်လွှတ်တော်တွင် အသုံးစရိတ် အတည်ပြုပေးမှုသည် အထက်လွှတ်တော်တွင် မည်သည့်ဆုံးဖြတ်ချက်မျိုး ချမှတ်သည်ဖြစ်စေ မတ်လကုန်ပိုင်းတွင် အတည်ဖြစ်စေမည်ဆိုသည့် အဓိပ္ပါယ်ဖြစ်သည်။

လာမည့်ဘဏ္ဍာရေးနှစ် ကာကွယ်ရေးအသုံးစရိတ်သည် ပြီးခဲ့သည့် ဒီဇင်ဘာလတွင် ကြေညာခဲ့သည့် ဂျပန် အမျိုးသားလုံခြုံရေး မဟာဗျူဟာသစ် အစိတ်အပိုင်းတစ်ခုဖြစ်သော ယန်း ၄၃ သန်းတန် ငါးနှစ်ကြာစီမံကိန်း၏ ပထမအရစ်ဖြစ်သည်။ မဟာဗျူဟာသစ်တွင် ရန်သူများ၏ တိုက်ခိုက်မှုကိုကာကွယ်ရေးနှင့် တန်ပြန် တိုက်ခိုက်နိုင်စွမ်းကို တည်ဆောက်ရေးလည်း ပါဝင်သည်။

ယင်းက ဒုတိယကမ္ဘာစစ်တွင် ရှုံးနိမ့်မှုကြောင့် ကာကွယ်ရေးစွမ်းရည်ကိုသာ ထားရှိရမည့် ဂျပန်၏ကတိစကားနှင့် ပတ်သက်၍ အငြင်းပွားဖွယ် ပြောင်းလဲမှုလည်းဖြစ်သည်။ ဂျပန်အစိုးရသည် တရုတ်၊ မြောက်ကိုရီးယားနှင့် ရုရှား တို့မှ ခြိမ်းခြောက်မှုများကို တုန့်ပြန်ရန်အတွက် နိုင်ငံ၏ ကာကွယ်ရေးကဏ္ဍကို တည်ဆောက်ရန် ကြိုးပမ်း နေခြင်းကြောင့် လာမည့် ငါးနှစ်အတွင်း စစ်အသုံးစရိတ်သည် နှစ်ဆနီးပါး မြင့်တက်လာဖွယ်ရှိသည်။

Source:AP

CNI International News

ဟောင်ကောင်၊ဖေဖော်ဝါရီ ၂၈

ခေါင်းဖြတ်ခြင်းနှင့် ခန္ဓာကိုယ် အစိတ်အပိုင်းများကို အပိုင်းပိုင်းဖြတ်၍ အသတ်ခံခဲ့ရသည့် မော်ဒယ်တစ်ဦး၏ ယောက္ခမနှင့် ခင်ပွန်းဟောင်းတို့ကို ဟောင်ကောင်ရဲတပ်ဖွဲ့က လူသတ်မှုဖြင့် စွဲချက်တင်ခဲ့သည်ဟု အေပီသတင်း တွင် ဖော်ပြသည်။

အသတ်ခံရသူ မော်ဒယ် အက်ဘေချိုင်၏ ခင်ပွန်းဟောင်းဖြစ်သူကို တာဝန်ရှိသူများက စနေနေ့တွင် ဖမ်းဆီးကာ တနင်္ဂနွေနေ့၌ လူသတ်မှုဖြင့် တရားစွဲဆိုခဲ့ကြောင်း ရဲမှူး အလန်ချောင် (Alan Chung) က ပြောသည်။

၎င်းတို့ သားအဖ သုံးဦးကို တနင်္လာနေ့တွင် ရုံးထုတ်မည်ဖြစ်ပြီး ခင်ပွန်းဟောင်း၏ မိခင်ဖြစ်သူကိုလည်း တရားမျှတမှုကို လမ်းလွဲစေမှုဖြင့် တရားစွဲထားသည်ဟု ရဲတပ်ဖွဲ့၏ ထုတ်ပြန်ချက်၌ ဖော်ပြထားသော်လည်း သံသယရှိ သူများ၏ အမည်များကို ထုတ်ပြန်ခြင်းမရှိပေ။

ချိုင်သည် ခင်ပွန်းဟောင်း ၊ သူ၏ မိသားစုတို့နှင့် ဟောင်ကောင် ဒေါ်လာသန်းချီ ပါဝင်သော ငွေကြေးဆိုင်ရာ ပြဿနာများ ရှိနေသည်ဟု ချောင်က အစောပိုင်းတွင် ပြောခဲ့ပြီး သူမ၏ ငွေကြေး စီမံခန့်ခွဲမှုများကို အချို့သော လူများက မပျော်ရွှင်ကြဟုလည်း ပြောခဲ့ဖူးသည်။

ဟောင်ကောင်ကိုတွေ့ရစဉ်

ချိုင်သည် မော်ဒယ်တစ်ဦး၊ ထင်ပေါ်ကျော်ကြားသူ တစ်ဦးဖြစ်ကာ အင်စတာဂရမ်တွင် ဖော်လိုဝါ ၁၀၀,၀၀၀ ကျော် ရှိသည်။ သူမသည် Dior ရှိုးကဲ့သို့ ဖက်ရှင် အခမ်းအနားများကို တက်ရောက်ခဲ့သလို နာမည်ကျော် ဖက်ရှင်မဂ္ဂဇင်း တစ်ခုဖြစ်သည့် L’Officiel Monaco အတွက်လည်း ဓာတ်ပုံ ရိုက်ခံခဲ့သူ ဖြစ်သည်။

ချိုင်သည် ရက်အတန်ကြာ ပျောက်ဆုံးနေခဲ့ကာ သူမ၏ အစိတ်အပိုင်းများ ပြတ်တောက်နေသော ခန္ဓာကိုယ်နှင့် စာရွက်စာတမ်းတချို့ကို ရဲတပ်ဖွဲ့က သောကြာနေ့တွင် ရှာတွေ့ခဲ့သည်။

သူမ၏ ခန္ဓာကိုယ် အစိတ်အပိုင်းများကို တိုင်ပို(Tai Po) ရှိ ကျေးရွာတစ်ခုမှ အိမ်တစ်လုံးအတွင်းရှိ ရေခဲသေတ္တာ အတွင်းမှာ ရှာတွေ့ခဲ့သည်။

ချိုင်၏ ဦးခေါင်းဟု ယူဆရသည့် ဦးခေါင်းခွံ တစ်ခုကို တာဝန်ရှိသူများ သိမ်းဆည်းရမိခဲ့သည့် ဟင်းအိုးတစ်ခု အတွင်းတွင် နံရိုးများ၊ ဆံပင်များ၊ တစ်သျှူးများနှင့်အတူ တွေ့ခဲ့ရသည်ဟု စနေနေ့ သတင်းစာ ရှင်းလင်းပွဲတွင် ချောင်က ပြောခဲ့သည်။

ဒုတိယ ဟင်းအိုးတစ်ခုတွင် လူအရိုး အနည်းငယ်ကိုလည်း တွေ့ခဲ့ရသည်ဟု မှုခင်ဆေးပညာဆိုင်ရာ ရောဂါ ဗေဒပညာရှင်များက ပြောသည်။

ဟောင်ကောင်ရဲ့တပ်ဖွဲ့ ချိုင်ရဲ့ အလောင်းကို ရှာဖွေနေကြစဉ်

ဦးခေါင်းခွံ၏ ညာဘက်တွင် အပေါက်တစ်ခု တွေ့ခြင်းကြောင့် သေဆုံးသူသည် ဆိုးဆိုးရွားရွား တိုက်ခိုက်ခံ ရသည်ဟု ပညာရှင်များက သတ်မှတ်ထားသည်ဟုလည်း ချောင်က ပြောသည်။

ချိုင်သည် ကားအတွင်း၌ ရှိနေစဉ် တိုက်ခိုက်ခံရပြီး သတိလစ်သွားကြောင်း၊ သူမကို အိမ်သို့ ခေါ်ဆောင်လာခဲ့ခြင်း ဖြစ်နိုင်ကြောင်းလည်း ချောင်က ပြောသည်။

လက်ရှိ အချိန်တွင် ရဲတပ်ဖွဲ့သည် ချိုင်၏ ခန္ဓာကိုယ်မှ ပျောက်ဆုံးနေသော အစိတ်အပိုင်းများနှင့် သူမ၏ သေဆုံးချိန် တိတိကျကျသိရန် ရှာဖွေနေကြဆဲ ဖြစ်သည်။

Source: AP

CNI International News

ဝါရှင်တန်၊ ဖေဖော်ဝါရီ ၂၈

ထိုင်ဝမ်ကို သိမ်းပိုက်ရေးနဲ့ပတ်သက်၍ တရုတ်သမ္မတ ရှီကျင့်ဖျင်သည် ၎င်းတို့၏ လုပ်နိုင်စွမ်းအားကို သံသယရှိနေသော်ငြားလည်း ထိုင်ဝမ်ကို ကျူးကျော်ရန် ၂၀၂၇ တွင် အဆင့်သင့်ဖြစ်နေစေရမည်ဟု တရုတ် စစ်တပ်ကို ညွှန်ကြားထားကြောင်း အမေရိကန်မှ ထောက်လှမ်းသိရှိထားသည်ဟု CIA ဒါရိုက်တာ ဝီလီယမ် ဘန်းစ်(William Burns)၏ အဆိုကို ကိုးကား၍ AP သတင်းတွင် ဖော်ပြသည်။

ယင်းမှာ ရုရှား၏ ယူကရိန်းကျူးကျော်စစ်ကို ဥပမာပေးကာ ထိုသို့ ပြောဆိုခဲ့ခြင်းလည်း ဖြစ်သည်။

အမေရိကန်အနေဖြင့် စစ်ရေးအရ ပဋိပက္ခဖြစ်ပွားရမည်ဆိုလျှင်ပင် ထိုင်ဝမ်အား အပြီးသတ်ထိန်းချုပ်မည့် ရှီ၏ ဆန္ဒကို အလေးအနက်ထား ဆောင်ရွက်သွားမည်ဟု ဘန်းစ်က ရုပ်သံအင်တာဗျူးတစ်ခုတွင် ပြောခဲ့သည်။

ထိုင်ဝမ်အားသိမ်းပိုက်ရေး ၂၀၂၇ တွင် အသင့်ပြင်ထားရန် တရုတ်သမ္မတက တရုတ်စစ်တပ်နှင့် စစ်တပ်ခေါင်း ဆောင်များအား ညွှန်ကြားထားသည်ကို သိရှိထားကြောင်း သို့သော် ယင်းက ၂၀၂၇ ခုနှစ် (သို့မဟုတ်) တခြား အချိန်တစ်ခုခုတွင် ထိုင်ဝမ်ကိုကျူးကျော်ရန် ဆုံးဖြတ်ထားခြင်းမျိုးမဟုတ်ကြောင်း ဘန်းစ်က CBS သတင်းကို ပြောခဲ့သည်။

သမ္မတရှီနှင့် စစ်တပ်ခေါင်းဆောင်များသည် ကျူးကျော်မှုအတွက် ၎င်းတို့လုပ်ဆောင်နိုင်မည်လားဆိုသည့်အပေါ် သံသယရှိနေသည်ဟု ထင်မြင်ကြောင်းလည်း ဘန်းစ်က ပြောခဲ့သည်။

ထိုင်ဝမ်အမျိုးသမီးသမ္မတ ဆိုင်အင်ဝမ်(ဘယ်)နှင့် ကယ်လီဖိုးနီးယားအုပ်ချုပ်ရေးမှူး Ro Khanna တို့ တိုင်ပေရှိ သမ္မတရုံးတွင် တွေ့ဆုံနှုတ်ဆက်စဉ်(ဓါတ်ပုံ-အေပီ)ဆကanna

၁၉၄၉ ခုနှစ် ပြည်တွင်းစစ်ကြောင့် တရုတ်နှင့်ထိုင်ဝမ်နှစ်နိုင်ငံ ကွဲခဲ့ရသည်။ ထိုင်ဝမ်သည် အချုပ်အခြာအာဏာပိုင် နိုင်ငံတစ်ခုအဖြစ် ကိုယ်ပိုင်အုပ်ချုပ်မှုကို ကျင့်သုံးသော်လည်း ယင်းကို ကုလသမဂ္ဂ (သို့မဟုတ်) မည်သည့် အင်အားကြီးနိုင်ငံကမှ တရားဝင်အသိအမှတ်ပြုထားခြင်း မရှိပေ။ ၁၉၇၉ ခုနှစ်တွင် သမ္မတ ဂျင်မီကာတာသည် ဘေဂျင်းအစိုးရကို အသိအမှတ်ပြုခဲ့ပြီး ထိုင်ဝမ်နှင့် အပြန်အလှန်ဆက်ဆံရေးကို ဖြတ်တောက်ခဲ့သည်။

ယင်းကိုတုန့်ပြန်မှုအဖြစ် ကွန်ကရက်လွှတ်တော်က ထိုင်ဝမ်ဆက်ဆံရေးဉပဒေကို အတည်ပြုခဲ့ပြီး ထိုင်ဝမ်နှင့် ဆက်ဆံရေးကို ထိန်းသိမ်းရန် စံတစ်ခုကို ဖန်တီးခဲ့သည်။တရုတ်ဘက်က ထိုင်ဝမ်ကို ၎င်းတို့ပိုင်အဖြစ် ပြောဆို ထားပြီး နှစ်နိုင်ငံကြား ဆက်ဆံရေးတင်းမာမှုရှိနေချိန်တွင် ကျွန်း၏ဒီမိုကရေစီကို ထိန်းသိမ်းရေးအတွက် အမေရိကန်ဘက်က အကူအညီများစွာ ပေးခဲ့သည်။

တရုတ်ဘက်က ကျူးကျော်လာလျှင် အမေရိကန်အနေဖြင့် ထိုင်ဝမ်ကို ကာကွယ်ပေးသွားမည်ဟုလည်း သမ္မတ ဂျိုးဘိုင်ဒန်က ပြောသည်။ ထိုင်ဝမ်အရေးကို ငြိမ်းချမ်းစွာဖြေရှင်းစေလိုသည်ဟု အိမ်ဖြူတော်ဘက်မှ ထပ်လောင်း ပြောဆိုခဲ့သော်လည်း တရုတ်ဘက်က တိုက်ခိုက်လာလျှင် ထိုင်ဝမ်သို့ အမေရိကန်တပ်များ စေလွှတ်မည်လား ဆိုသည်နှင့်ပတ်သတ်၍ နှုတ်ဆိတ်လျက်ရှိသည်။

ရုရှား၏ ကျူးကျော်မှုကို ခံနေရသော ယူကရိန်းအပေါ် အမေရိကန်နှင့် ဥရောပမဟာမိတ်များက ထောက်ပံ့မှု လုပ်ဆောင်နေခြင်းက တရုတ်အစိုးရအတွက် အဟန့်အတားဖြစ်စေလျက်ရှိကြောင်း၊ သို့သော် တစ်ဖက်တွင်လည်း တရုတ်တို့၏ ထိုင်ဝမ်အား တိုက်ခိုက်နိုင်ဖွယ်ရှိနေသည်မှာလည်း ပို၍ခိုင်မာလာကြောင်း ဘန်းစ်က တနင်္ဂနွေနေ့က အင်တာဗျူးတွင် ပြောခဲ့သည်။

Source:AP

CNI International News

ဒွန်းတက်ခ်၊ဖေဖော်ဝါရီ ၂၈

ယူကရိန်းစစ်ပွဲ စတင်ခဲ့ပြီးနောက်ပိုင်း ယူကရိန်းသည် ဒွန်နက်စ်ဒေသကို ဗုံးကြဲတိုက်ခိုက်မှုများကြောင့် အရပ်သား ၄၄၄၉ ဦးသေဆုံးခဲ့သည်ဟု ဒွန်နက်စ်ပြည်သူ့ သမ္မတနိုင်ငံ(DPR)၏ ယူကရိန်းစစ်ရာဇဝတ်မှုဆိုင်ရာ ထိန်းချုပ်ရေး နှင့် ပူးပေါင်းဆောင်ရွက်မှု ပူးတွဲစင်တာ JCCC မှ တနင်္လာနေ့တွင် ဖော်ပြသည်ဟု တာ့စ်သတင်းတွင် ရေးသားထား သည်။

၂၀၂၂ ခုနှစ်၊ ဖေဖော်ဝါရီ ၁၇ ရက်နေ့တွင် စတင်ခဲ့သော ယူကရိန်း-ရုရှား စစ်ပွဲအတွင်း ရုရှားက လွတ်လပ်ရေး အသိအမှတ်ပြုခဲ့သည့် ဒွန်နက်စ်ဒေသမှာ အရပ်သား သေဆုံးမှု စာရင်းဖြစ်သည်။

DPR ၏ JCCC ထံမှ ရရှိသော တရားဝင် အချက်အလက်များအရ တင်းမာမှုများ စတင်ပြီး ၃၇၅ ရက်အကြာတွင် ကလေးငယ် ၁၃၂ ဦး အပါအဝင် အရပ်သား ၄၄၄၉ ဦး သေဆုံးခဲ့သည်ဟု ထိုအဖွဲ့က ပြောသည်။

အော့တဝါ သဘောတူညီချက် (Ottawa Convention) တွင် ပိတ်ပင်ထားသည့် PFM-1၊ Lepestok ကဲ့သို့ မိုင်းများ ကြောင့် ကလေးငယ် ၈ ဦး အပါအဝင် အရပ်သား ၉၃ ဦး သေဆုံးကာ ကလေးငယ် ၂၆၆ ဦး အပါအဝင် အရပ်သား ၄၁၇၄ ဦး ဒဏ်ရာ ရရှိခဲ့သည်ဟုလည်း သိရသည်။

၃၇၅ ရက်ကြာ တိုက်ပွဲများတွင် ပစ်ခတ်မှုပေါင်း ၁၅,၈၈၈ ကြိမ်ကို မှတ်တမ်းတင်နိုင်ခဲ့ကြောင်း၊ ထိုအကြိမ်ရေထဲမှ ၁၅,၅၅၆ ကြိမ်မှာ လက်နက်ကြီးများ ဖြစ်သည်။

ဒွန်နက်စ်ပြည်သူတစ်ဦးကိုတွေ့ရစဉ်

ရန်သူ့ဘက်မှ ၁၀၁,၆၆၅ ကြိမ် ပစ်ခတ်ခဲ့ကြောင်းး၊ ထိုအထဲတွင် Tochka-U ဒုံးကျည် ၃၉ ကြိမ်၊ HIMARS ဒုံးကျည် ၂၃၉ ကြိမ်၊ BM – 30 Smerch ၁၈ ကြိမ်၊ BM-27 Uragan ဒုံးကျည် ၂၅၈ ကြိမ် ပစ်ခတ်ခဲ့ကြောင်း၊ ၁၂၂ မမဖြင့် ၁၃,၁၀၃ ကြိမ်၊ ၁၅၅ မမနှင့် ၂၂,၈၃၉ ကြိမ် ပစ်ခတ်ခဲ့ကြောင်းလည်း JCCC က ဖော်ပြထားသည်။

ဒွန်နက်စ် စစ်မြေပြင်တွင် ၂၀၂၂ ခုနှစ်၊ ဖေဖော်ဝါရီလ ၁၇ ရက်မှ စတင်ကာ တင်းမာမှုများ ဖြစ်ပွားခဲ့သည်။

ဒွန်နက်စ်ဒေသ ခေါင်းဆောင်များ၏ တောင်းဆိုမှုကြောင့် ယူကရိန်းအစိုးရ၏ ရှစ်နှစ်ကြာ အနိုင်ကျင့်မှု၊ အစုလိုက် အပြုံလိုက် သတ်ဖြတ်မှုတို့နှင့် ရင်ဆိုင်နေရသည့် ပြည်သူများကို ကာကွယ်ပေးရေး အထူးစစ်ဆင်ရေးကို စတင်ရန် ဆုံးဖြတ်လိုက်သည်ဟု ဖေဖော်ဝါရီ ၂၄ ရက် မိန့်ခွန်းတွင် ရုရှားသမ္မတ ဗလာဒီမာပူတင်က ထည့်သွင်းပြောကြား ခဲ့ သည်။

ထို့နောက် ယူကရိန်း-ရုရှား စစ်ပွဲ စတင်ဖြစ်ပွားခဲ့ရာ ၂၀၂၃ ခုနှစ်၊ ဖေဖော်ဝါရီ ၂၄ ရက်နေ့က တစ်နှစ်ပြည့်သွားခဲ့ပြီး ဖြစ်သည်။

သို့သော် လက်ရှိအချိန်ထိ စစ်ပွဲမှာ ဆက်လက်ဖြစ်ပွားနေပြီး တစ်စုံတစ်ရာ သဘောတူညီချက်များလည်း ရယူနိုင်ခြင်း မရှိသေးပါ။

Source: တာ့စ်

CNI International News

ဘဲလ်ဂရိတ်၊ ဖေဖော်ဝါရီ ၂၈

ကိုဆိုဗိုအရေးတွင် ဆားဘီးယားအနေဖြင့် အလျှော့ပေးသွားမည် မဟုတ်ကြောင်း ဆားဘီးယားသမ္မတ အလက်ဇန္ဒားဘူချိ (Aleksander Vucic) က တနင်္လာနေ့မှာပဲ အင်စတာဂရမ် ဗွီဒီယိုတစ်ခုတွင် ပြောကြားခဲ့သည်ဟု တာ့စ်သတင်း၌ ဖော်ပြထားသည်။

၁၅ မိနစ်အတွင်း ဘရပ်ဆဲလ်သို့ ထွက်ခွာလာမည် ဖြစ်ကြောင်း၊ အပြီးသတ် ပြင်ဆင်မှု လုပ်ဆောင်ထားကြောင်း၊ တစ်စုံတစ်ခုကို လက်မှတ်ရေးထိုးလျှင် ဆားဘီးယားအား သစ္စာဖောက်များအဖြစ် သို့မဟုတ် ၁၉၉၀ နှစ်များသို့ ပြန်လိုနေသည်ဟု အပြစ်တင်ရန် အဆင်သင့် ဖြစ်နေသူများကို ၎င်းတို့အနေဖြင့် ဘာအတွက်မှ စိုးရိမ်စရာ မရှိဟု ပြောလိုကြောင်း ဆားဘီးယားသမ္မတ အလက်ဇန္ဒားဘူချိက ပြောသည်။

၎င်းက “ အရှုံးပေးခြင်း သို့မဟုတ် ၁၉၉၀ နှစ်များဆီသို့ ပြန်သွားခြင်းမျိုး ရှိလာမည်မဟုတ်ကြောင်းနှင့် ဆားဘီးယားသည် မည်မျှ ခက်ခဲနေပါစေ ရှေ့သို့ဆက်သွားကာ အောင်မြင်မှုကို ရယူသွားမည်”ဟု ပြောသည်။

ဆားဘီးယားနိုင်ငံသားများကိုတွေ့ရစဉ် 

ဆားဘီးယားဒုတိယဝန်ကြီးချုပ်နှင့် ဘဏ္ဍာရေးဝန်ကြီးဖြစ်သူ ဆီနီဆာ မာလီ(Sinisa Mali)မှ ဖန်တီးခဲ့သော ထိုဗွီဒီယိုတွင် ဆားဘီးယားဝန်ကြီးချုပ် အန်နာ ဘာနာဘစ် (Ana Brnabic) ကိုလည်း ဘူချိ၏ဘေးတွင် မြင်တွေ့ခဲ့ရသည်။

ဆားဘီးယားနှင့် ကိုဆိုဗိုတို့ကြား တင်းမာမှုများ ပြေလျော့ရေး ပြင်သစ်-ဂျာမနီ တို့မှ စီစဉ်ပေးသည့် ဆွေးနွေးပွဲများ ကို ဖေဖော်ဝါရီ ၂၇ ရက်တွင် ကျင်းပခဲ့သည်။

ထိုဆွေးနွေးပွဲအပြီးတွင် အနောက် ဘော်လ်ကန် (Western Balkans) နိုင်ငံများဆိုင်ရာ အီးယူ၏ အထူးကိုယ်စား လှယ် မီရိုဆလပ်ဗ် လတ်ကတ် (Miroslav Lajcak) က ဆားဘီးယားသမ္မတ၊ ကိုဆိုဗို ဝန်ကြီးချုပ်တို့နှင့် သီးခြား တွေ့ဆုံသွားမည်ဟု သိရသည်။

Source: တာ့စ်

CNI International News

ရောမ၊ ဖေဖော်ဝါရီ - ၂၇

ကျောက်တန်းများနှင့်တိုက်မိကာ လှေပျက်စီးသွားခဲ့ခြင်းကြောင့် ရွှေ့ပြောင်းနေထိုင်သူ အနည်းဆုံး ၄၅ ဦးခန့် သေဆုံးသွားခဲ့သည်ဟု အီတလီကမ်းခြေစောင့်တပ်နှင့် ကုလသမဂ္ဂအေဂျင်စီများက ပြောသည်။

ထိုဖြစ်ရပ်သည် အီတလီတောင်ပိုင်းတွင် တနင်္ဂနွေနေ့ အာရုံ မတက်မီ ဖြစ်ပွားခဲ့ခြင်းဖြစ်ကာ လူဒါဇင်ပေါင်းများစွာ ပျောက်ဆုံးနေဆဲဖြစ်သည်ဟု အသက်ရှင်သူများကပြောကြောင်း အေပီသတင်းက ဖော်ပြခဲ့သည်။

လှေမှောက်မှုမှ အနည်းဆုံး လူ ၈၀ ခန့်ကို အသက်ရှင်လျက် ကယ်နိုင်ခဲ့ကြောင်း၊တချို့မှာ ကမ်းခြေသို့ ကူးခတ် ရောက်ရှိလာသူများဖြစ်ကြောင်း အီတလီကမ်းခြေစောင့်တပ်က ပြောသည်။

လက်ရှိအချိန်အထိ ထိုဖြစ်ရပ်နှင့်ပတ်သက်၍ တိတိကျကျ မသိရသေးပေ။ အလောင်း ၆၀ ခန့်ကို ဆယ်ယူရရှိခဲ့ သည်ဟု အာဏာပိုင်များ၏ ပြောစကားကို ကိုးကား၍ အီတလီသတင်းထောက် တစ်ဦးက ပြောသည်။

ရွှေ့ပြောင်းများ လှေမှောက်သွားလို့ ကယ်ဆယ်ထားရ(AP)

အစ်ဇ်မာ (Izmir) ဟု ထင်ရှားသော တူရကီဆိပ်ကမ်း တစ်ခုဖြစ်သည့် ဆမီနာ (Smyrna) ဟူသော စကားလုံးကို ရေးထားသည့် အသက်ကယ် ဘောကွင်းများကိုလည်း အခင်းဖြစ်ရာတွင် တွေ့ရသည်။ ထိုဖြစ်ရပ်မှ တွေ့ရှိရသော အလောင်းများကို ခရိုတုန်း (Crontne) မြို့ရှိ အားကစားကွင်း တစ်ခုထဲသို့ ယူဆောင်လာကြောင်း အာဏာပိုင်များ က ပြောသည်။

အခင်းဖြစ်ရာ လှေပေါ်တွင် ရွှေ့ပြောင်းနေထိုင်သူ ၁၇၀ ကျော် ပါဝင်ခဲ့ခြင်း ဖြစ်နိုင်သည်ဟု ကုလသမဂ္ဂ အေဂျင်စီ နှစ်ခုက ပူးတွဲ ထုတ်ပြန်သည်။

ထိုထဲတွင် ကလေးငယ်များနှင့် မိသားစုလိုက် ခရီးသည်များပါ ပါဝင်သည်ဟု သိရပြီး အများစုမှာ အာဖဂန်နစ္စတန်၊ ပါကစ္စတန်နှင့် ဆိုမာလီတို့မှ ဖြစ်သည်။

ရွှေ့ပြောင်း နေထိုင်သူများကို တင်ဆောင်လာသည့် သစ်သားလှေသည် လေပြင်းတိုက်မှုကြောင့် ကျောက်တန်းများ နှင့် တိုက်မိခဲ့ခြင်း ဖြစ်သည်။

အသက်ရှင်သူ အားလုံးမှာ အရွယ်ရောက်ပြီး သူများဖြစ်သည်ဟု စေတနာ့ဝန်ထမ်း တစ်ဦးက ပြောသည်။

အီတလီရှိ သက်ဆိုင်ရာများက ရွှေ့ပြောင်းလှေတိမ်းမှောက်မှု ကယ်ဆယ်ရေးလုပ်နေစဉ်(AP)

ကံမကောင်းစွာနှင့် လှေပေါ်ပါ ကလေးငယ်များ အားလုံးသည် ပျောက်ဆုံးနေ သို့မဟုတ် သေဆုံးသွားခဲ့ပြီဟုလည်း ၎င်းက ပြောသည်။

အသက် တစ်လအရွယ် ကလေးငယ်တစ်ဦးနှင့် ရှစ်နှစ်အရွယ် ကလေးငယ်တစ်ဦးတို့သည်လည်း သေဆုံးသူများ စာရင်းတွင် ပါဝင်သည်။

အသက်ရှင် ကျန်ရစ်သူများ၏ အဆိုအရ လှေသည် လွန်ခဲ့သည့် ငါးရက်တူရကီမှ ထွက်ခွာလာခြင်း ဖြစ်သည်ဟု အီတလီနိုင်ငံပိုင် သတင်းတွင် ဖော်ပြသည်။

ရွှေ့ပြောင်း နေထိုင်သူများသည် မီတာ ၂၀ ရှည်သော သစ်သားလှေပေါ်တွင် စုံပြုံလိုက်ပါလာခြင်း ဖြစ်သည်ဟု အီတလီ ဝန်ကြီးချုပ် ဂျော်ဂျီယာ မယ်လိုနီက ပြောသည်။

ထိုဖြစ်ရပ်နှင့် ပတ်သက်၍ ရဟတ်ယာဉ် တစ်စင်း၊ ရဲတပ်ဖွဲ့လေယာဉ်၊ မီးသတ်တပ်ဖွဲ့ လှေများ၊ ကမ်းခြေစောင့် တပ်၊ နယ်စပ်ရဲ စသည်တို့ ပါဝင်သည့် ရှာဖွေကယ်ဆယ်ရေး လုပ်ငန်းများ ဆောင်ရွက်နေသည်ဟု အီတလီ အရာရှိများက ပြောသည်။

Souce: AP

CNI International News

အဘူဂျာ၊ဖေဖော်ဝါရီ ၂၇

အာဖရိက၏ လူဦးရေ အထူထပ်ဆုံးနိုင်ငံ၏ သမ္မတနှင့်လွှတ်တော် ရွေးကောက်ပွဲများအတွက် မဲပေးမှုများသည် စနေနေ့တွင် အဆုံးသတ်ရမည်ဖြစ်သည့်တိုင် တနင်္ဂနွေနေ့ မနက်ပိုင်းအထိ နိုင်ဂျီးရီးယား ပြည်သူများမှာ မဲပေးနေ ကြဆဲ ဖြစ်သည်ဟု အေပီသတင်းတွင် ဖော်ပြထားသည်။

မဲရုံများ ပိတ်ခဲ့ပြီဖြစ်သော ပြည်နယ်များတွင် တနင်္ဂနွေနေ့၌ မဲရေတွက်မှုများ လုပ်ဆောင်လျက်ရှိသော်လည်း ဘီနူး၊ အက်ဒါမာဝါနှင့် ဘာရယ်လ်ဆာ (Benue၊ Adamawa နှင့် Bayelsa) ပြည်နယ်များတွင် မဲပေးမှုများ ဆက်ရှိ နေဆဲဟု ရွေးကောက်ပွဲ လေ့လာစောင့်ကြည့်သူများက ပြောသည်။

မဲရေတွက်မှု ကနဦးရလဒ်များကို တနင်္ဂနွေနေ့ ညနေပိုင်းတွင် ထုတ်ပြန်မည်ဟုလည်း ယူဆရသည်။

လုံခြုံရေးတပ်ဖွဲ့များကိုတွေ့ရစဉ်(AP)

သယ်ယူပို့ဆောင်ရေးနှင့် လုံခြုံရေးဆိုင်ရာ စိန်ခေါ်မှုများက စနေနေ့တွင် နိုင်ငံတစ်လွှား ကြန့်ကြာမှုများကို ဖြစ်စေခဲ့ပြီး မဲဆန္ဒရှင်များကို ဒေါသထွက်စေခဲ့သည်။

မဲဆန္ဒရှင်တချို့သည် ညလုံးပေါက်နီးပါး ထိုင်စောင့်ခဲ့ကြသော်လည်း နောက်တစ်နေ့ မနက်မိုးလင်းချိန်အထိ မဲမပေးရသည်များလည်း ရှိသည်။

ခေါင်းဆောင်ကောင်း တစ်ဦးကိုရွေးရန် အနစ်နာခံသင့်ရင် ခံရပါမည်ဟု စောင့်ဆိုင်းနေသည့် မဲဆန္ဒရှင်တစ်ဦးက ပြောသည်။

ရွေးကောက်ပွဲ တာဝန်ရှိသူများက ကြန့်ကြာမှုများအတွက် သယ်ယူပို့ဆောင်ရေး ကိစ္စများကို အပြစ်တင်သော်လည်း တချို့သော လေ့လာသူများက ငွေကြေးပုံစံသစ် ဖန်တီးခြင်းကြောင့် ပြည်သူများ လက်ထဲတွင် ငွေမရှိခြင်းကို ထောက်ပြသည်။

နိုင်ဂျီးရီးယား ရွေးကောက်ပွဲ မဲရလဒ် စောင့်ကြည့်နေသူများကိုတွေ့ရစဉ်(AP)

ငွေစက္ကူ ရှားပါးနေခြင်းသည် မဲဆန္ဒရှင်များအတွက် သယ်ယူပို့ဆောင်ရေးဆိုင်ရာ ကိစ္စများကို သာမက၊ ရွေးကောက်ပွဲ ဝန်ထမ်းများနှင့် လုံခြုံရေး ဆောင်ရွက်ပေးမည့် ရဲတပ်ဖွဲ့ဝင်များအတွက်လည်း ဆိုးကျိုုးများကို ဖြစ်စေသည်။

ထိုအခြေအနေက မဲပေးသူအရေအတွက် နည်းပါးခြင်းကို ဖြစ်စေသည်ဟု နိုင်ငံ၏ အကြီးမားဆုံးသော ရွေးကောက်ပွဲ စောင့်ကြည့်ရေးအဖွဲ့ Yiaga Africa က ပြောသည်။

စိန်ခေါ်မှုများစွာ ရှိခဲ့သော စနေနေ့က ကျင်းပသည့် နိုင်ဂျီးရီးယား ရွေးကောက်ပွဲသည် အများအားဖြင့် ငြိမ်းချမ်းစွာ ပြီးစီးခဲ့သော်လည်း မဲလုပြေးမှု ရှစ်ခုအပြင် တိုင်းပြည်၏ ဒီမိုကရေစီကို ထိပါးစေသော အရေးကြီးသည့် ဖြစ်ရပ် အနည်းဆုံး ၁၃၅ ခုခန့် ဖြစ်ပွားခဲ့သည်ဟု လေ့လာသူများက ပြောသည်။

Source: AP

CNI International News

တယ်လင်း၊ဖေဖော်ဝါရီ ၂၇

ရုရှားတွင် ရွေးချယ်စရာမရှိကြောင်း၊ နေတိုး၏ နျူကလီးယားစွမ်းရည်ကို ထည့်သွင်းစဉ်းစားရမည်ဖြစ်ကြောင်း တနင်္ဂနွေနေ့၌ ထုတ်လွှင့်ခဲ့သော အင်တာဗျူးတစ်ခုတွင် ရုရှားသမ္မတ ပူတင်က ပြောခဲ့သည်ဟု AP သတင်းတွင် ဖော်ပြသည်။

New START စာချုပ်တွင် ပါဝင်နေမှုအား ရုရှားဘက်မှ ရပ်ဆိုင်းလိုက်ခြင်းနှင့်ပတ်သက်၍ မေးမြန်းမှုကို ပူတင်က ပြန်လည်ဖြေကြားခဲ့ခြင်းဖြစ်သည်။

နေတိုးအဖွဲ့ဝင်နိုင်ငံများသည် ရုရှားအား စစ်ဗျူဟာအရ ရှုံးနိမ့်စေရန် လုပ်ဆောင်နေခြင်းကြောင့် ရုရှားသည် ဖြစ်တည်မှုဆိုင်ရာ ခြိမ်းခြောက်မှုနှင့် ရင်ဆိုင်နေရသည်ဟု ပူတင်က ပြောသည်။ ယူကရိန်းစစ်ပွဲနှင့်ပတ်သက် ၍လည်း ၎င်းကထိုသို့ ကြိမ်ဖန်များစွာ ပြောဆိုခဲ့ဖူးသည်။ New START နျူကလီးယားသဘောတူညီချက်မှ နုတ်ထွက်ခြင်းသည် ရုရှားအတွက်လုံခြုံရေး၊ မဟာဗျူဟာမြောက်တည်ငြိမ်ရေး စသည့်လိုအပ်ချက်များကြောင့် ဖြစ်သည်ဟု ပူတင်က ရုရှားနိုင်ငံပိုင်သတင်းသို့ ပြောခဲ့သည်။

နေတိုး၏ ဦးဆောင်နိုင်ငံများအားလုံးမှ ၎င်းတို့၏ ပင်မရည်ရွယ်ချက်သည် ရုရှားအား စစ်ဗျူဟာအရ ရှုံးနိမ့်မှု ဖြစ်စေရေးအတွက်ဟု ကြေညာထားချိန်တွင် နျူကလီးယားစွမ်းရည်ကို မည်သည့်အတွက်ကြောင့် လျစ်လျူရှုထားရပါမည်လဲဟု ပူတင်က ပြောခြင်းဖြစ်သည်။

တောင်ကိုရီးယားနိုင်ငံ ဆိုးလ်မြို့လယ်တွင် ရုရှားကျူးကျော်မှု တစ်နှစ်ပြည့် အထိမ်းအမှတ် လူထုစည်းဝေးပွဲ အတွင်း အမေရိကန်သမ္မတ ဂျိုးဘိုင်ဒန်နှင့် ရုရှားသမ္မတ ဗလာဒီမာပူတင်တို့၏ ဓာတ်ပုံများကို ကိုင်ဆောင်ကာ ဆန္ဒပြနေစဉ်(ဓါတ်ပုံ-အေပီ)

ပြီးခဲ့သည့်နှစ် ယူကရိန်းအားကျူးကျော်မှုသည် ၎င်းတို့ယူဆထားသည့် ရုရှားလုံခြုံရေးအပေါ်ခြိမ်းခြောက်မှုများကို လျော့ချရန်ဟု ပူတင်ကပြောခဲ့ပြီး ထိုအချိန်၌ ယင်းကိုပဋိပက္ခအတွင်း ခြိမ်းခြောက်မှုများအတွက် နျူကလီးယား အသုံးပြုရန် သက်သေပြမှုအဖြစ် ၎င်းကအသုံးချခဲ့သည်။ ၂၀၁၀ ခုနှစ် New START သဘောတူညီချက်တွင် ပါဝင်မှုကို ရုရှားအနေဖြင့် ရပ်ဆိုင်းကြောင်း အင်္ဂါနေ့တွင် ပူတင်က ကြေညာခဲ့သည်။ အမေရိကန်နှင့် နေတိုးမဟာ မိတ်များက ယူကရိန်းအရေးတွင်ရုရှားကို ရှုံးနိမ့်ရန်လုပ်ဆောင်နေချိန်တွင် ရုရှားအနေဖြင့် ၎င်းတို့ နျူကလီးယား စခန်းများအပေါ် အမေရိကန်၏ စစ်ဆေးမှုကိုလက်မခံနိုင်ကြောင်း ပူတင်က ပြောသည်။

သို့သော် စာချုပ်မှ နုတ်ထွက်ခြင်းမဟုတ်ကြောင်း၊ စာချုပ်ပါအချက်အလက်များကို လေးစားသွားမည်ဖြစ်ကြောင်း နှင့် ပဲ့ထိန်းဒုံးကျည်စမ်းသပ်မှုများကို အမေရိကန်သို့ အသိပေးမှု ဆက်လက်လုပ်ဆောင်သွားမည်ဖြစ်ကြောင်း ရုရှားတာဝန်ရှိသူများက ပြောသည်။

Russia 1 ရုပ်သံနှင့် အင်တာဗျူးတွင် ပူတင်က နေတိုးနိုင်ငံများသည် စာချုပ်တွင် မပါဝင်သော်လည်း ၎င်းတို့သည် ထိုအကြောင်းအရာနှင့် ပတ်သက်သည့် ဆွေးနွေးမှုများတွင် ပါဝင်လာကြောင်း၊ ယင်းကို ရုရှားက ကန့်ကွက် ကြောင်း၊ အထူးသဖြင့် နေတိုး၏ နျူကလီးယားစွမ်းရည်ကို လျစ်လျူရှုထား၍ မရသည့်အခြေအနေတွင်ရှိကြောင်း ပြောသည်။ အနောက်အုပ်စုသည် ရုရှားကို ပျောက်ကွယ်သွားစေလိုနေသည်ဟုလည်း ပူတင်က စွပ်စွဲသည်။ ယူကရိန်းကျူးကျော်စစ်နှင့်ပတ်သက်၍ ကာကွယ်ရာတွင်လည်း ၎င်းက ထိုသို့ ကြိမ်ဖန်များစွာ ပြောခဲ့ဖူးသည်။

၎င်းတို့တွင် ရည်ရွယ်ချက်တစ်ခုသာရှိကြောင်း၊ ဆိုဗီယက်ပြည်ထောင်စုဟောင်းနှင့် ယင်း၏အခြေခံအကျဆုံး အစိတ်အပိုင်းဖြစ်သော ရုရှားဖက်ဒရေးရှင်းနိုင်ငံကို ဖျက်သိမ်းရန်ပင်ဖြစ်ကြောင်းလည်း ပူတင်က ပြောခဲ့သည်။

Source:AP

CNI International News

ကိုလံဘို၊ဖေဖော်ဝါရီ ၂၇

ရွေးကောက်ပွဲဆိုင်ရာ မကျေနပ်ချက်များအပေါ် ဆန္ဒပြသူများကို သီရီလင်္ကာရဲတပ်ဖွဲ့က တနင်္ဂနွေနေ့တွင် မျက်ရည်ယိုဗုံးများ၊ ရေအမြောက်များသုံးကာ လူစုခွဲခဲ့သည်ဟု အေပီသတင်းတွင် ဖော်ပြထားသည်။

ယိုယွင်းနေသော တိုင်းပြည်၏ စီးပွားရေး အခြေအနေကြောင့် ရွေးကောက်ပွဲ ကျင်းပရန် အကုန်အကျခံနိုင်ခြင်း မရှိဟုဆိုကာ အစိုးရကဒေသဆိုင်ရာ ရွေးကောက်ပွဲများကို ရွှေ့ဆိုင်းလိုက်ပြီးနောက် ထိုသို့ ဆန္ဒပြခဲ့ကျခြင်း ဖြစ်သည်။

တနင်္ဂနွေနေ့ ဖြစ်ရပ်တွင် လူ ၁၅ ဦးခန့် အသေးစား ဒဏ်ရာများ ရရှိခဲ့သည်ဟု ကိုလံဘိုအမျိုးသားဆေးရုံက ပြော သည်။

တနင်္ဂနွေနေ့ ဆန္ဒပြပွဲတွင် အတိုက်အခံ National People’s Power ပါတီအား ထောက်ခံသူ ထောင်ပေါင်းများစွာ သည် မြို့တော်ကိုလံဘို (Colombo) ရှိ စီးပွားရေး အချက်အချာကျရာ ခရိုင်သို့ ချီတတ်ရန် ကြိုးပမ်းခဲ့သည်။

ယင်းတွင် သမ္မတနန်းတော်၊ ရုံးနှင့် အရေးပါသော အစိုးရ အဆောက်အဦးများ ရှိနေခြင်းကြောင့် ထိုဧရိယာသို့ မဝင်ရောက်ရန် တရားရုံးအမိန့်ကို လျစ်လျူရှု ချီတက်ခဲ့ခြင်း ဖြစ်သည်။

ဆန္ဒပြသူများနဲ့ သီရီလင်္ကာရဲတပ်ဖွဲ့ကိုတွေ့ရစဉ်(AP)

ပြီးခဲ့သည့် ဇူလိုင်လက ပြင်းထန်သော ဆန္ဒပြပွဲများ ဖြစ်ပွားပြီးနောက် တရားရုံးဘက်က ထိုသို့ အမိန့်ထုတ်ပြန် ခဲ့ခြင်း ဖြစ်သည်။ ဇူလိုင်က ဆန္ဒပြပွဲများတွင် လူထောင်ပေါင်းများစွာသည် သမ္မတနန်းတော်နှင့် ရုံးကို ဝင်စီးကာ ရက်ပေါင်းများစွာ သိမ်းပိုက်ခဲ့သည်။

ထိုပဋိပက္ခကြောင့် ထိုစဉ်က သမ္မတ ဂိုတာဘာယာ ရာဂျာပတ်ဆာ(Gotabaya Rajapaksa)သည် နိုင်ငံမှထွက်ပြေးကာ ရာထူးမှ နုတ်ထွက်ခဲ့ရသည်။

နိုင်ငံခြားကြွေးမြီများ မပေးနိုင်တော့ခြင်းကြောင့် သီရီလင်္ကာနိုင်ငံသည် ဒေဝါလီခံခဲ့ ရသည်။

ဒေဝါလီ ခံခဲ့ပြီးနောက်နိုင်ငံတွင်း အစားအစာ၊ လောင်စာ၊ ဟင်းချက်ဓာတ်ငွေ့နှင့် ဆေးဝါးများ ရှားပါးလာမှုကြောင့် ကြီးမားသော ဆန္ဒပြပွဲများ ပေါ်ပေါက်ခဲ့ရခြင်း ဖြစ်သည်။

သမ္မတသစ် ရာနီဝစ်ရီမီဆင်ဟီ (Ranil Wickremesinghe) သည် လေးနှစ်အတွင်း ဒေါ်လာ ၂ ဒသမ ၉ ဘီလီယံ ရရှိမည့် ကယ်ဆယ်ရေး အစီအစဉ်တစ်ခုကို နိုင်ငံတကာ ငွေကြေးရန်ပုံငွေအဖွဲ့နှင့် ဆွေးနွေးခဲ့သော်လည်း အကြွေး များနှင့်ပတ်သက်၍ အကြွေးရှင်များဘက်မှ အာမခံချက်ပေးမှ သာလျှင် ယင်းကို အပြီးသတ် နိုင်မည် ဖြစ်သည်။

သီရီလင်္ကာနိုင်ငံ၏ နိုင်ငံခြား အကြွေးမှာ ဒေါ်လာ ၅၁ ဘီလီယံကို ကျော်လွန်သွားခဲ့ပြီဖြစ်ပြီး ယင်းတို့မှ ၂၈ ဘီလီယံ ကို ၂၀၂၇ တွင် ပြန်ဆပ်ရမည် ဖြစ်သည်။ အိန္ဒိယနှင့် တခြားသော အကြွေးရှင် နိုင်ငံတစ်ချို့က IMF သတ်မှတ်ချက် များနှင့် ကိုက်ညီစေမည်ဟု အာမခံချက် ပေးထားသော်လည်း တရုတ်အနေဖြင့် တခြားနိုင်ငံများ နည်းတူ လက်ခံ နိုင်မလားဆိုသည်က မေးခွန်းထုတ်စရာ ရှိနေသည်။

သမ္မတသစ် ရာနီဝစ်ရီမီဆင်ဟီကိုတွေ့ရစဉ်(AP)

မတ်လ ၉ ရက်တွင် ကျင်းပရန် စီစဉ်ထားသော မြို့နှင့်ကျေးရွာကောင်စီ ရွေးကောက်ပွဲအတွက် နိုင်ငံရေးပါတီများ ဘက်မှ အမည်စာရင်း တင်သွင်းထားသော်လည်း ယင်းအတွက် လိုအပ်သော ရံပုံငွေကို အစိုးရအနေဖြင့် ကျခံနိုင် ခြင်းမရှိဟု ဝစ်ရီမီဆင်ဟီ အစိုးရ၏ ဘဏ္ဍာရေးဝန်ကြီးက ပြောသည်။

ထိုဆုံးဖြတ်ချက်ကြောင့် ရွေးကောက်ပွဲကော်မရှင်သည် ရွေးကောက်ပွဲကို ရွှေ့ဆိုင်းလိုက်ခြင်း ဖြစ်သည်။

တစ်နှစ်ကျော်ကြာ ကာလအတွင်း ရှားပါးမှုနှင့် နေ့စဉ်စွမ်းအင် ပြတ်တောက်မှုတို့ကို လျော့နည်းလာအောင် ဆောင်ရွက်နိုင်ခဲ့သော်လည်း ဝစ်ရီမီဆင်ဟီသည် ပြည်သူများကြားတွင် ရေးပန်းစား လာခဲ့ခြင်း မရှိပေ။

ရာဂျာပတ်ဆာ ဘက်တော်သား လွှတ်တော်အမတ်များ၏ ရွေးချယ်ခံထားရခြင်းကြောင့် ဝစ်ရီမီဆင်ဟီတွင် မည်သည့် လုပ်ပိုင်ခွင့်မှမရှိဟု အများစုက ပြောသည်။

ဝစ်ရီမီဆင်ဟီသည် လွှတ်တော်တွင်း ထောက်ခံမှု ရရှိရန် ရာဂျာပတ်ဆာ မိသားစု၏ အကျင့်ပျက် ခြစားမှုများကို ကာကွယ်ပေးနေသည်ဟုလည်း စွပ်စွဲခံထားရသည်။

တနင်္ဂနွေနေ့ လူထုချီတက်ပွဲကို ဦးဆောင်ခဲ့သော အတိုက်အခံ National People’s Power ပါတီသည် ၂၂၅ နေရာ ရှိသော သီရီလင်္ကာလွှတ်တော်အတွင်း အမတ် သုံးနေရာသာ ရရှိထားသော်လည်း စီးပွားရေး အကြပ်အတည်း ပြီးနောက် ပြည်သူများ၏ တစ်ခဲနက် ထောက်ခံမှုကို ရရှိထားသည်။

Source: AP