CNI International News
မနီလာ၊ ဖေဖော်ဝါရီ ၁၀
ဖိလစ်ပိုင်နိုင်ငံတွင် အမေရိကန်နှင့် ဖိလစ်ပိုင်တပ်ဖွဲ့များအကြား နှစ်စဉ်ပြုလုပ်နေကျ စစ်ရေးလေ့ကျင့်မှုများသည် ယူကရိန်းနှင့် အရှေ့အလယ်ပိုင်းတွင် ဖြစ်ပွားနေသည့် စစ်ပွဲများအပေါ် အမေရိကန်၏ အာရုံစိုက်မှုကို သက်ရောက် စေလိမ့်မည် မဟုတ်ကြောင်း အမေရိကန်ဗိုလ်ချုပ်ကြီးတစ်ဥိးက ဖေဖော်ဝါရီ ၈ ရက်တွင် ပြောကြားခဲ့သည်ဟု အေပီမှ ဖော်ပြခဲ့သည်။
အမေရိကန်သမ္မတ ဂျိုးဘိုင်ဒန် (Joe Biden) အစိုးရအဖွဲ့သည် ထိုင်ဝမ်အရေးနှင့် တောင်တရုတ်ပင်လယ် အငြင်း ပွားမှုများ အပါအဝင် တရုတ်နှင့် အနာဂတ်တွင် ဖြစ်လာနိုင်ခြေရှိသည့် ထိတ်တိုက်တွေ့မှုများကို တန်ပြန်ရန် အာရှ-ပစိဖိတ်ဒေသ၌ စစ်ရေးမဟာမိတ်ဖွဲ့မှုကို မြှင့်တင်လျက်ရှိသည်။
သို့သော် ယူကရိန်းစစ်ပွဲနှင့် အစ္စရေး-ဟားမာ့စ် စစ်ပွဲတို့ကြောင့် အမေရိကန်၏ အာရှ-ပစိဖိတ်ဒေသကို ဗဟိုပြုသည့် အစီအစဉ်ကို ထိခိုက်စေနိုင်ပြီး ထိုဒေသအတွက် ရည်ရွယ်သည့် စစ်ရေးအရင်းအမြစ်များကို လမ်းလွဲသွားစေ နိုင်မည့် စိုးရိမ်မှုများ ရှိခဲ့သည်။
"သေချာတာကတော့ ကျနော်တို့ရဲ့ ရပ်တည်မှုအပေါ် သက်ရောက်မှု မရှိပါဘူး"ဟု အမေရိကန်စစ်တပ်၏ အမှတ် ၂၅ ခြေလျင်တပ်ရင်း၏ တပ်မှူးချုပ်ဖြစ်သည့် ဗိုလ်ချုပ် မားကပ်စ် အီဗန် (Marcus Evans) က ဖေဖော်ဝါရီ ၈ ရက်က အေပီသတင်းဌာနနှင့် ပြုလုပ်သည့် အင်တာဗျူးတွင် ပြောကြားခဲ့သည်။
"တစ်ခုခု ရှိလာခဲ့မယ်ဆိုရင်တောင် ကျနော်တို့နဲ့ ဆယ်စုနှစ်များစွာကြာ ဆက်ဆံရေး ထူထောင်ခဲ့တဲ့ အရေးတကြီး အာရုံစိုက်ဖို့လိုအပ်တဲ့ မိတ်ဖက်တွေအတွက် ဦးစားပေးသွားမှာပါ" ဟု အမေရိကန်စစ်သား ၁၂၀၀၀ ကို စီမံ အုပ်ချုပ်ရသည့် အီဗန်က ပြောကြားခဲ့သည်။
ဟာဝိုင်အီ (Hawaii) တွင် ရုံးထိုင်သည့် အီဗန်သည် အမေရိကန်နှင့်် ဖိလစ်ပိုင် တပ်ဖွဲ့များအကြား အကြီးစား တိုက်ခိုက်ရေး၊ စစ်ရေး လေ့ကျင့်မှုများအတွက် ဖိလစ်ပိုင်စစ်တပ် ခေါင်းဆောင်များနှင့် ဆွေးနွေးမှုများ ပြုလုပ်ရန် မနီလာ (Manila) မြို့တော်သို့ ရောက်ရှိခဲ့ခြင်းဖြစ်သည်။
၂၀၁၆ ခုနှစ်က ဖိလစ်ပိုင်တွင် ပထမဆုံး စတင်ပြုလုပ်ခဲ့သည့် စစ်တပ်အချင်းချင်း ပူးတွဲစစ်ရေး လေ့ကျင့််မှုဖြစ်သည့် Salaknib အမည်ရှိ စစ်ရေးလေ့ကျင့်မှု အပါအဝင် နှစ်စဉ်ပြုလုပ်နေကျ စစ်ရေးလေ့ကျင့်မှုသည် Balikatan အမည်ရှိ စစ်ရေးလေ့ကျင့််မှုထက် ပိုမိုကြီးမားသည်။
၂၀၂၃ ခုနှစ်၊ ဧပြီလက ပြုလုပ်ခဲ့သည့် စစ်ရေးလေ့ကျင့်မှုအတွင်း နှစ်နိုင်ငံစလုံးမှ စစ်မှုထမ်းပေါင်း ၁၇,၆၀၀ ကျော် ပါဝင်ခဲ့ပြီး ဆယ်စုနှစ်များအတွင်း နှစ်နိုင်ငံအကြား အကြီးဆုံး တိုက်ခိုက်ရေး စစ်ရေးလေ့ကျင့်မှု ဖြစ်ခဲ့သည်။
ပြီးခဲ့သည့်နှစ်က Balikatan စစ်ရေး လေ့ကျင့်မှုများထဲမှ အချို့ကို ထိုင်ဝမ်နှင့် တောင်တရုတ်ပင်လယ်အနီးရှိ ဖိလစ်ပိုင်၏ ကန်းရိုးတန်းဒေသများတွင် ပြုလုပ်ခဲ့ခြင်းဖြစ်သည်။
တရုတ်ကမူ အမေရိကန်တပ်ဖွဲ့များ ပါဝင်သည့် ထိုစစ်ရေး လေ့ကျင့်မှုများသည် ဒေသတွင်း စည်းလုံးညီညွတ်မှုနှင့် ငြိမ်းချမ်းရေးအတွက် ခြိမ်းခြောက်မှုတစ်ခုဖြစ်သည်ဟု ဝေဖန်ခဲ့သည်။
Source: အေပီ
