CNI International News

ဒန်ပါဆာ၊ ဖေဖော်ဝါရီ ၂၀

ဘာလီတွင် ဖမ်းမိခဲ့သည့် အီတလီ-သြစတြေးလျ ဝရမ်းပြေးတစ်ဦးကို အီတလီနိုင်ငံသို့ ပြန်လည်ပို့ဆောင်သွားမည် ဟု အင်ဒိုနီးရှားရဲတပ်ဖွဲ့က တနင်္ဂနွေနေ့တွင် ပြောကြောင်း အေပီသတင်းတွင် ဖော်ပြထားသည်။

၎င်းသည် မူးယစ်ဆေးဝါး ကုန်သွယ်မှု၊ အုပ်စုဖွဲ့ ရာဝဇတ်မှု ကျူးလွန်မှုတို့ဖြင့် ခုနစ်နှစ်ကြာ တိမ်းရှောင်နေသူ ဖြစ်သည်။

အသက် ၃၂ နှစ်အရွယ် အန်တိုနီစတန်ဂျီယို (Antionio Strangio) သည် အင်တာပို၏ အနီရောင်အဆင့် ရာဇဝတ် သားအဖြစ် သတ်မှတ်ခံထားရသူဖြစ်ပြီး မလေးရှားနိုင်ငံ၊ ကွာလာလမ်ပူမှ ဘာလီသို့ ရောက်ရှိလာသည့် ဖေဖော်ဝါရီ ၃ ရက်တွင် ထိန်းသိမ်းခံခဲ့ရသည်။

မူးယစ်ရာဇာ စတန်ဂျီယိုကို ဖမ်းမိစဉ်(AP)

စတန်ဂျီယိုသည် ဆေးခြောက် ၁၆၀ ကီလိုဂရမ် မှောင်ခိုမှုဖြင့် အီတလီအစိုးရမှ အလိုရှိနေသူဖြစ်ကာ လုံခြုံရေး ဆိုင်ရာ အကြောင်းအရာများကြောင့် ၎င်းအား မည်သည့်အချိန်တွင် ပြည်လည် ပို့ဆောင်မည်ဆိုသည်ကို ထုတ်ဖော် ပြောဆိုရန် ဘာလီရဲတပ်ဖွဲ့က ငြင်းဆိုသည်။

သံသယရှိသူကို ရဲတပ်ဖွဲ့မှ လေဆိပ်တွင် ပြုလုပ်ခဲ့သော သတင်းစာ ရှင်းလင်းပွဲတစ်ခုတွင် ထုတ်ဖော်ပြသခဲ့ပြီး တနင်္ဂနွေနေ့ မွန်းလွဲပိုင်းတွင် ၎င်းအား ထွက်ခွာရာ ခန်းမသို့ ခေါ်ဆောင်သွားခဲ့သည်။

စတန်ဂျီယိုသည် အနောက်ကမ္ဘာတွင် အရေးပါဆုံး ရာဇဝတ်အဖွဲ့အဖြစ် အီတလီအစိုးရရှေ့နေများက သတ်မှတ် ထားသော ndrangheta မာဖီးယားဂိုဏ်းနှင့် ဆက်စပ်နေသူ ဖြစ်သည်။

ndrangheta အဖွဲ့သည် ဥရောပနိုင်ငံများအတွင်း အထူးစစ်ဆင်ရေးများ လုပ်ဆောင်ကြပြီး ယင်း၏ အဖွဲ့ဝင်တိုင်း သည် သက်ဆိုင်ရာ နိုင်ငံအသီးသီးတွင် အမှုစစ်ဆေး ကြားနာမှု လုပ်ဆောင်နိုင်သည့် အနီရောင် အဆင့် ရာဇဝတ် သားများ ဖြစ်သည်ဟု အင်ဒိုနီးရှားရဲတပ်ဖွဲ့၏ နိုင်ငံတကာမှုခင်းဌာနခွဲမှ အရာရှိတစ်ဦးဖြစ်က သတင်းထောက် များကို ပြောခဲ့သည်။

Source: AP

CNI International News

ကဘူးလ်၊ ဖေဖော်ဝါရီ ၂၀

နိုင်ငံခြားတပ်ဖွဲ့များ၏ စစ်စခန်း အဟောင်းများကို အထူးစီးပွားရေးဇုန်များအဖြစ် ပြောင်းလဲရန် တာလီဘန် အုပ်ချုပ်ရေးအဖွဲ့က ဆောင်ရွက်နေကြောင်း တာလီဘန်အဖွဲ့၏ စီးပွားရေးဆိုင်ရာ ယာယီလက်ထောက်ဝန် ကြီးချုပ်က တနင်္ဂနွေနေ့တွင် ကြေညာချက် ထုတ်ပြန် ပြောကြားခဲ့သည်ဟု ရိုက်တာ သတင်းတွင် ဖော်ပြထား သည်။

တာလီဘန်တို့၏ ယာယီ ကူးသန်းရောင်းဝန်ရေး ဝန်ကြီးဖြစ်သူက ဌာနသည် အမေရိကန် စစ်စခန်းအဟောင်းများ နှင့် ပတ်သက်သည့် အစီအစဉ်ကို ဆောင်ရွက်နေကြောင်း၊ အတည်ပြုချက် ရရှိရန် ယာယီလက်ထောက် ဝန်ကြီး ချုပ် မူလာ အဗ္ဗဒဲလ် ဂါနီဘာရာနာ (Mullah Abdul Ghani Baradar) ဦးဆောင်သော စီးပွားရေးကော်မတီနှင့် အစိုးရအဖွဲ့ နှစ်ခုစလုံးကို တင်ပြသွားမည်ဖြစ်ကြောင်း ဒီဇင်ဘာလတွင် ပြောသည်။

ဆွေးနွေးမှုများ လုပ်ဆောင်ပြီးချိန်တွင် စက်မှုနှင့်ကူးသန်းရောင်းဝယ်ရေးဌာနသည် အထူးစီးပွားရေးဇုန်များအဖြစ် ပြောင်းလဲရန် နိုင်ငံခြားတပ်ဖွဲ့များ၏ စစ်စခန်းများကို အပြည့်အဝ ထိန်းချုပ်သင့်ကြောင့် ဆုံးဖြတ်ခဲ့သည်ဟု မူလာ ဘာရာနာ(Mullah Baradar)က ကြေညာချက် တစ်စောင် ထုတ်ပြန်ခဲ့သည်။

အမေရိကန်ရဲ့စစ်စခန်းဟောင်းတစ်ခုကိုတွေ့ရစဉ်(ရိုက်တာ)

ရှေ့ပြေး စီမံကိန်းအဖြစ် မြို့တော် ကဘူးလ် (Kabul) နှင့် မြောက်ပိုင်း ဘဲ့ခ် (Balkh) ပြည်နယ်များရှိ စစ်စခန်းများ ကို စတင်ပြောင်းလဲသွားမည်ဟုလည်း ထုတ်ပြန်ချက်တွင် ပါဝင်သည်။

အာဖဂန်နစ္စတန်နိုင်ငံ၏ စီးပွားရေးသည် ရုန်းကန်နေရပြီး နှစ် ၂၀ ကြာ စစ်ပွဲအပြီး နိုင်ငံခြားတပ်များ ထွက်ခွာသွား ချိန် တာလီဘန်တို့ အာဏာလွှဲပြောင်း ရယူခဲ့ချိန်မှစ၍ နိုင်ငံတွင်း ဆိုးရွားသော လူသားချင်းစာနာမှုဆိုင်ရာ အကြပ် အတည်း တစ်ခု ပေါ်ပေါက်လာနိုင်သည်ဟု အကူအညီပေးရေး အေဂျင်စီများက သတိပေးထားသည်။

တာလီဘန်များ တက်လာခြင်းကြောင့် ဖွံ့ဖြိုးတိုးတက်မှု ရံပုံငွေများ ဖြတ်တောက်ခံရရုံမက ဗဟိုဘဏ်၏ နိုင်ငံခြားရှိ ပိုင်ဆိုင်မှုများကို သိမ်းခံခဲ့ရပြီး ဘဏ်လုပ်ငန်းနှင့်ပတ်သက်သော ပိတ်ဆို့ အရေးယူမှုများလည်း ချမှတ် ခံခဲ့ရ သည်။

ယာယီလက်ထောက်ဝန်ကြီးချုပ် မူလာအဗ္ဗဒဲလ်ဂါနီဘာရာနာကိုတွေ့ရစဉ်(ရိုက်တာ)

နိုင်ငံတွင်းရှိ ပြည်သူသန်းချီက လူသားချင်းစာနာမှု အကူအညီများကို မှီခိုနေရချိန်တွင် NGO များ၌ အမျိုးသမီးများ တာဝန် ထမ်းဆောင်ခွင့်ကို ပိတ်ပင်လိုက်ခြင်းက အကူအညီပေးရေး အေဂျင်စီတစ်ချို့ ၎င်းတို့၏ လုပ်ငန်းဆောင် ရွက်မှုများကို တစ်စိတ်တစ်ပိုင်း ရပ်နားမှုကိုလည်း ဖြစ်စေခဲ့သည်။

ရင်းနှီးမြှုပ်နှံမှု၊ ကုန်သွယ်ရေး စသည်တို့ဖြင့် စီးပွားရေးကို မြှင့်တင်ရန် အာရုံစိုက် ဆောင်ရွက်နေသည်ဟု တာလီဘန်များက ပြောသည်။

သို့သော် နိုင်ငံတွင်း တိုက်ခိုက်မှုများစွာ ရှိနေခြင်းက နိုင်ငံခြားရှိ ရင်းနှီးမြှုပ်နှံသူများအား စိုးရိမ်မှုဖြစ်စေသည်။ သို့ သော် တာလီဘန် အုပ်ချုပ်မှုလက်အောက်တွင်ပို့ကုန်ပမာဏ မြင့်တက်လာကာ ၂၀၂၂ ခုနှစ်အတွင်း ဘဏ္ဍာငွေကိုလည်း ကောင်းမွန်စွာထိန်းသိမ်းထားနိုင်သည်ဟု ကမ္ဘာ့ဘဏ်က ပြောသည်။

Source: Reuters

CNI International News

ဝါရှင်တန်၊ ဖေဖော်ဝါရီ ၂၀

ယူကရိန်းစစ်ပွဲအတွက် တရုတ်သည် ရုရှားသို့လက်နက်၊ခဲယမ်းများပေးပို့ရန် စဉ်းစားနေကြောင်း အမေရိကန် နိုင်ငံခြားရေးဝန်ကြီး အန်တိုနီ ဘလင်ကင်(Antony Blinken) က ပြောသည်ဟု BBC သတင်းတွင် ဖော်ပြသည်။

တရုတ်ကုမ္ပဏီများသည် ရုရှားနိုင်ငံသို့ အသက်အန္တရာယ်ခြိမ်းခြောက်နိုင်ခြင်းမရှိသော အကူအညီများကို ပေးခဲ့ပြီး ဖြစ်ကာ သတင်းသစ်များအရ သေစေနိုင်လောက်သော အကူအညီများပါပေးလာနိုင်သည်ဟု ဖော်ပြသည်။

ထိုသို့ လုပ်ဆောင်ခဲ့လျှင် တရုတ်နိုင်ငံအတွက် ဆိုးရွားသောနောက်ဆက်တွဲများဖြစ်လာမည်ဟုလည်း ၎င်းက သတိပေးသည်။ သို့သော် ရုရှားဘက်က စစ်ဘက်ဆိုင်ရာ အကူအညီပေးရန်တောင်းဆိုခဲ့သည်ဆိုသည့် သတင်းများကို တရုတ်ဘက်က ငြင်းဆိုထားသည်။

နိုင်ငံခြားရေးဝန်ကြီး အန်တိုနီ ဘလင်ကန်(ဓါတ်ပုံ- Getty Images)

တရုတ်သမ္မတသည် ရုရှားသမ္မတ၏ မဟာမိတ်တစ်ဦးဖြစ်ကာ တရုတ်အစိုးရသည် ယူကရိန်းအရေးတွင် ရုရှားကို ပြစ်တင်ရှုတ်ချထားခြင်း မရှိပေ။ သို့သော် တရုတ်သမ္မတ ရှီသည် ယူကရိန်းအရေးတွင် ကြားနေအဖြစ်သာနေခဲ့ပြီး ငြိမ်းချမ်းရေးအတွက် တောင်းဆိုခဲ့သည်။ ဘလင်ကန်သည် စနေနေ့က မြူးနစ်လုံခြုံရေးညီလာခံတွင် တရုတ် ထိပ်တန်းသံတမန် ဝမ်ယိ (Wang Yi)နှင့် တွေ့ဆုံခဲ့ပြီးနောက် CBS သတင်းသို့ ပြောကြားခဲ့ခြင်း ဖြစ်သည်။

တွေ့ဆုံပွဲတွင် ဝမ်ယိအား တရုတ်နိုင်ငံအနေဖြင့် ရုရှားသို့ စစ်လက်နက်များ ထောက်ပံ့ပေးမည်ဆိုသည်နှင့် ပတ်သက်၍ အလွန်အမင်းစိုးရိမ်မိကြောင်း ပြောဆိုခဲ့သည်ဟု ဘလင်ကင်က ပြောသည်။ လက်ရှိရရှိထားသော သတင်းအချက်အလက်များအရ တရုတ်ဘက်က ရုရှားကိုထောက်ပံ့ပို့ စီစဉ်နေသည်ကို သိရှိထားပါသည်ဟု ဘလင်ကန်က ပြောသည်။

သို့သော် မည်သည့်သတင်းအချက်အလက်မျိုးကို ရရှိထားသည်ဆိုသည်နှင့်ပတ်သက်၍ အတိအကျ ရှင်းလင်း ပြောဆိုခြင်းမရှိခဲ့ပေ။ တရုတ်ဘက်က မည်သည့်အရာများ ထောက်ပံ့မည်ဟု အမေရိကန်ဘက်က ယူဆထား ကြောင်း မေးမြန်းခဲ့ရာ လက်နက်များနှင့် ခဲယမ်းများဖြစ်သည်ဟု ၎င်းက ပြန်လည်ဖြေကြားခဲ့သည်။

တရုတ် ထိပ်တန်းသံတမန် ဝမ်ယိ (ဓါတ်ပုံ-Getty Images)

အမေရိကန်အစိုးရသည် ဝဂ်နာ (Wagner) ကြေးစားစစ်တပ်သို့ ယူကရိန်းနိုင်ငံ၏ ဂြိုဟ်တုဓာတ်ပုံများ ထောက်ပံ့ ပေးသည်ဟု စွပ်စွဲချက်ဖြင့် တရုတ်ကုမ္ပဏီတစ်ခုကို အရေးယူပိတ်ဆို့မှု လုပ်ဆောင်ခဲ့သည်။ ဝဂ်နာအုပ်စုသည် ရုရှားအတွက် တိုက်ခိုက်ရေးသမားများစွာ ထောက်ပံ့ပေးလျက်ရှိသည်။

တရုတ်အနေဖြင့် ရုရှားသို့ လက်နက်များအမှန်တကယ်ထောက်ပံ့ပေးမည်ဆိုလျှင် ယင်းက အမေရိကန်အတွက် သာမက တရုတ်-အမေရိကန် ဆက်ဆံရေးအတွက်ပါ ပြင်းထန်သော ပြဿနာများ ဖြစ်လာလိမ့်မည်ဟုလည်း ဘလင်ကင်က ပြောသည်။

Source:BBC

CNI International News

ဆိုးလ်၊ ဖေဖော်ဝါရီ - ၂၀

မြောက်ကိုရီးယားအစိုးရသည် တိုက်ချင်းပစ်ပဲ့ထိန်းဒုံးကျည်(ICBM)စမ်းသပ် ပစ်လွှတ်ခြင်းဖြင့် ခြိမ်းခြောက်မှု အသစ်များ ပြုလုပ်ခဲ့သလို အမေရိကန်ကလည်း ဗုံးကြဲလေယာဉ်များ ပျံသန်းခဲ့ကြောင်း အေပီသတင်းတွင် ဖော်ပြထားသည်။

နောက်ဆုံး လုပ်ဆောင်ခဲ့သည့် တိုက်ချင်းပစ်ပဲ့ထိန်းဒုံးကျည် (ICBM) စမ်းသပ် ပစ်လွှတ်မှုများသည် နိုင်ငံ၏ နျူကလီးယား တိုက်ခိုက်မှု လုပ်ဆောင်နိုင်စွမ်းကို ထပ်မံမြှင့်တင်မှုဖြစ်ကြောင်း မြောက်ကိုရီးယားအစိုးရက ပြောသည်။

မကြာခင်လုပ်မည့် အမေရိကန်၊ တောင်ကိုရီးယား ပူးတွဲစစ်ရေး လေ့ကျင့်မှုနှင့်ပတ်သက်၍ နောက်ထပ် ပြင်းထန် သော ဆောင်ရွက်ချက်များ ချမှတ်သွားမည်ဟု မြောက်ကိုရီးယားက ခြိမ်းခြောက်ခဲ့ကြောင်း အေပီ သတင်းတွင် ဖော်ပြသည်။

တောင်ကိုရီးယား၊ ဂျပန် စသော နိုင်ငံများနှင့် သီးခြား စစ်ရေး လေ့ကျင့်မှုအဖြစ် အမေရိကန်ဘက်ကလည်း အသံထက်မြန်သော ဗုံးကြဲလေယာဉ်များကို ပျံသန်းပြခြင်းဖြင့် မြောက်ကိုရီးယား၏ ခြိမ်းခြောက်မှုကို တနင်္ဂနွေနေ့ နှောင်းပိုင်းတွင် တုန့်ပြန်ခဲ့သည်။

ကိုရီးယား စစ်ပွဲ အဆုံးသတ်ရန် ဆုတောင်းထားကြစဉ်(AP)

မြောက်ကိုရီးယားသည် စနေနေ့တွင် တိုက်ချင်းပစ် ပဲ့ထိန်းဒုံးကျည်များ စမ်သပ် ပစ်လွှတ်မှုကို လုပ်ဆောင်ခဲ့သည်။

ထိုပစ်လွှတ်မှုက ယခုနှစ်အတွက် ပထမဆုံးလည်း ဖြစ်သည်။

မြောက်ကိုရီးယားသည် ရန်ဘက်နိုင်ငံများ၏ ပူးတွဲစစ်ရေး လေ့ကျင့်မှုများကို အသုံးချပြီး ၎င်းတို့၏ နျူကလီးယား လက်နက် အင်အားကို တိုးချဲ့ရန်၊ အမေရိကန်နှင့် အနာဂတ် ဆွေးနွေးမှုများတွင် အသာစီးရရန် ဆောင်ရွက်ခြင်း ဖြစ်သည်။

မြောက်ကိုရီးယားအနေဖြင့် ICBM များ ပါဝင်သည့် ပုံမှန်စစ်ရေး လေ့ကျင့်မှုများကို လုပ်ဆောင်လာနိုင်သည်ဟု လေ့လာသူတစ်ဦးက သုံးသပ်သည်။

Hwasong-15 ICBM များ စမ်းသပ်မှုကို ကင်မ်ဂျုံအန်၏ တိုက်ရိုက်အမိန့်အရ ကြိုတင် စီစဉ်ထားခြင်း မရှိဘဲ ရုတ်တရက် လုပ်ဆောင်ခဲ့ခြင်းဟု နိုင်ငံပိုင် KCNA သတင်းတွင် ဖော်ပြထားသည်။

စနေနေ့ စမ်းသပ်မှုသည် လက်နက်၏ စိတ်ချရမှု၊ နျူကလီးယားတပ်ဖွဲ့၏ တိုက်ခိုက်ရန် အဆင်သင့် ဖြစ်မှုတို့ကို စမ်းသပ်ရန် ရည်ရွယ်ခြင်း ဖြစ်ကြောင်းလည်း သတင်းအရ သိရသည်။

အမေရိကန်- ရုရှား အကွာအဝေးကို ပြသထားစဉ် (AP)

စမ်းသပ်ခဲ့သော ဒုံးကျည်သည် အမြင့်ပေ ၅၇၇၀ ကီလိုမီတာသို့ ပျံ့တက်ခဲ့ပြီး ၆၇ မိနစ်အတွင်း ၉၉၀ ကီလိုမီတာ ပျံသန်းခဲ့ကာ ကိုရီးယားကျွန်းဆွယ်နှင့် ဂျပန်တို့ကြား ရေပြင်ရှိ သတ်မှတ်ထားသော ပစ်မှတ်ကို တိတိကျကျ ထိမှန် ခဲ့သည်ဟုလည်း သတင်းတွင် ဖော်ပြထားသည်။

အိမ်နီးချင်း နိုင်ငံများကို မထိလိုက်စေရန် ဒုံးကျည်ကို ထောင်လိုက် ပျံသန်းစေခဲ့ခြင်း ဖြစ်သည်။

မြောက်ကိုရီးယားဘက်က ထုတ်ပြန်သော သတင်းများသည် အိမ်နီးချင်းများ ရရှိထားသော သတင်းများနှင့် အကြမ်းအားဖြင့် ကိုက်ညီလျက်ရှိသည်။

သတ်မှတ်စံညွှန်းများအတိုင်း ပစ်ခတ်မည်ဆိုလျှင် မြောက်ကိုရီးယား၏ ဒုံးကျည်သည် သဘောတရားအရ အမေရိကန်သို့ပင် ရောက်ရှိလာနိုင်ဖွယ် ရှိနေသည်ဟု ယင်း၏ အိမ်နီးချင်းများက ခန့်မှန်းထားခြင်း ဖြစ်သည်။

Source: AP

CNI International News

မော်စကို၊ ဖေဖော်ဝါရီ ၁၈

ယူကရိန်းပဋိပက္ခအတွင်း နေတိုးနိုင်ငံများ၏ ပါဝင်ပတ်သက်မှုမှာ အမြင့်ဆုံး အခြေအနေ၌ ရှိနေကြောင်း ရုရှား နိုင်ငံခြားရေးဌာန ပြောခွင့်ရပုဂ္ဂိုလ် မာရီယာ ဇတ်ဟာရိုဗာက သောကြာနေ့တွင် ပြောကြားခဲ့သည်ဟု တာ့စ် သတင်းတွင် ဖော်ပြထားသည်။

“နေတိုးအဖွဲ့ဝင် နိုင်ငံများသည် ယူကရိန်းပဋိပက္ခနှင့် မသိသယောင်၊ အပြစ်ကင်းယောင် ဟန်ဆောင်နေကြောင်း၊ ၎င်းတို့၏ ပါဝင်မှုမှာ အမြင့်ဆုံး အနေအထားတွင်ရှိကြောင်း၊ ၎င်းတို့သည် ရန်စသော အပြုအမှုများကို နှစ်ပေါင်း များစွာ လုပ်ဆောင်ခဲ့ကြောင်းနှင့် လက်ရှိတွင် ယူကရိန်းအစိုးရကို ချုပ်ကိုင်နေကြကြောင်း၊ အားလုံးသည် ဆက်စပ် နေကြောင်း” ဇတ်ဟာရိုဗာက ပြောသည်။

ယူကရိန်းသမ္မတဇာလန်းစကီးနဲ့ နေတိုး အထွေထွေအတွင်းရေးမှူးကိုတွေ့ရစဉ်

ရုရှားသည် ယူကရိန်းနှင့် ဗြိတိန်တို့ ပူးပေါင်းကာ အမြောက်နှင့်အခြား လက်နက်များ ထုတ်လုပ်မည် ဆိုသည့် အပြင် အခြားသော နေတိုးနိုင်ငံများသည် အလားတူ စစ်ဘက်ဆိုင်ရာ ပစ္စည်းများ ပူးတွဲထုတ်လုပ် နိုင်ဖွယ်ရှိသည် ဆိုသည့် သတင်းများအပေါ် အာရုံစိုက် ဆောင်ရွက်နေသည်ဟုလည်း သူမ၏ ပြောဆိုမှုတွင် ပါဝင်သည်။

အနောက်အုပ်စု၏ ငွေလုံးငွေရင်း အင်အား ကြီးကြီးမားမားသည် ယူကရိန်း လက်နက်ကိုင်တပ်ဖွဲ့များ၊ စစ်ဆင်ရေး များ၏ နောက်ကွယ်တွင် ရှိနေသည်မှာ ထင်ရှားသည်ဟုလည်း သူမက ဆက်လက် ပြောဆိုသည်။

Source: တာ့စ်

CNI International News

နယူးဒေလီ၊ ဖေဖော်ဝါရီ ၁၈

အမေရိကန် ဘီလီယံနာ သူဋ္ဌေးကြီး ဂျော့ဂျ်ဆိုးရော့စ်က အက်ဒါနီ အုပ်စု(Adani Group) ၏ ဆုံးရှုံးမှုများသည် ဝန်ကြီးချုပ် နာရန်ဒရာမိုဒီ၏ အာဏာရယူမှုအပေါ် ဆုံးရှုံးမှု ဖြစ်စေလိမ့်မည်ဟု ဆိုးရော့စ်မှ ကြိုတင်ဟောကိန်း ထုတ်ခဲ့ရာမှာ BJP ပါတီက ပြန်လည် တုန့်ပြန် အပြစ်တင် ဝေဖန်ခဲ့သည်။

အမေရိကန် ဘီလီယံနာ သူဋ္ဌေးကြီး ဂျော့ဂျ်ဆိုးရော့စ်သည် ကြိုတင်ခန့်မှန်း ပြောဆိုခြင်းဖြင့် အိန္ဒိယနိုင်ငံ၏ ဒီမိုကရေစီစနစ်ကို လျော့ပါးအောင် လုပ်ဆောင်နေကြောင်း မိုဒီ၏ BJP ပါတီက ပြန်လည်တုန့်ပြန်ခဲ့သည်။

ကြာသပတေးနေ့ မြူးနစ်လုံခြုံရေး ညီလာခံ၌ စကားပြောရာတွင် အသက် ၉၂ နှစ်အရွယ် ဆိုးရော့စ်က မိုဒီနှင့် စီးပွားရေး လုပ်ငန်းရှင် အက်ဒါနီတို့သည် ရင်းနှီးသော မဟာမိတ်များ ဖြစ်ကြောင်း၊ ၎င်းတို့၏ ကံကြမ္မာသည် ဆက်နွယ်နေကြောင်း၊ အက်ဒါနီ၏ စီပွားရေးလုပ်ငန်း အရှုံးပြမှုများသည် အိန္ဒိယဖက်ဒရယ်အစိုးရအပေါ် မိုဒီ၏ ထိန်းချုပ်မှုများ သိသိသာသာ လျော့ကျစေကာ အိန္ဒိယတွင် များစွာလိုအပ်နေသော ဖွဲ့စည်းပုံဆိုင်ရာ ပြုပြင် ပြောင်းလဲမှုများကို လမ်းပွင့်စေကြောင်း ပြောကြားခဲ့သည်ဟု Financial Times သတင်းတွင် ဖော်ပြသည်။

ဂျော့ဆိုးရော့စ်၊ ဂူတမ် အက်ဒါနီနဲ့ မိုဒီကိုတွေ့ရစဉ်

ဇန်နဝါရီ ၂၄ ရက်မှ စတင်ကာ အက်ဒါနီအုပ်စုသည် ဈေးကွက်အတွင်း ဒေါ်လာ ၁၂ ဘီလီယံ အရှုံးပေါ်ခဲ့သည်ဟု ရင်းနှီးမြှုပ်နှံမှုဆိုင်ရာ လေ့လာရေးအဖွဲ့ Hindenburg Research က ဖော်ပြသည်။

အက်ဒါနီ၏ အခွန်ရှောင်မှု၊ စတော့ အခြေအနေနှင့် အကြွေးပမာဏတို့ကြောင့် ထိုသို့ ဖြစ်ရသည်ဟုလည်း ဖော်ပြသည်။

မိုဒီနှင့် အက်ဒါနီအုပ်စုကို တည်ထောင်သူ ဂူတမ် အက်ဒါနီ (Gautam Adani) တို့သည် လွန်ခဲ့သော နှစ်နှစ်နီးပါးက ဂူဂျာရတ်ပြည်နယ် ဝန်ကြီးချုပ်အဖြစ် မိုဒီ တာဝန်ယူခဲ့စဉ် ကတည်းက ကာလရှည် ဆက်ဆံရေးကို ပိုင်ဆိုင်ထား သည်ဟု ဝန်ကြီးချုပ်၏ အတိုက်အခံများက ပြောသည်။

အစိုးရသည် ထိုအုပ်စုကို စီးပွားရေး လုပ်ငန်းများတွင် မျက်နှာသာ ပေးမှုများ ရှိနေသည်ဟု အတိုက်အခံများက စွပ်စွဲသော်လည်း အစိုးရဘက်မှ ငြင်းဆိုထားသည်။

အမျိုးသမီးနှင့် ကလေး သူငယ် ဖွံ့ဖြိုးတိုးတက်မှုဆိုင်ရာ ဖက်ဒရယ်ဝန်ကြီး  ဆမ်ရီတီ အီရာနီကိုတွေ့ရစဉ်

ဂျော့ဆိုးရော့စ် (George Soros) ဟုခေါ်သော အမျိုးသားတစ်ဦး ဦးဆောင်သည့် နိုင်ငံခြားမှ အင်အားစု တစ်ခုသည် အိန္ဒိယ၏ ဒီမိုကရေစီဖွဲ့စည်းပုံကို ထိခိုက်အောင် လုပ်ဆောင်မည်ဖြစ်ကြောင်း၊ ဝန်ကြီးချုပ်သည် ၎င်းတို့၏ ပစ်မှတ် ဖြစ်သည်ဟု ကြေညာခဲ့ကြောင်း၊ အိန္ဒိယနိုင်ငံသားများအတွက် မဟုတ်ဘဲ ၎င်း၏အကျိုးစီးပွားကို အကာအကွယ် ပေးမည့် စနစ်တစ်ခုကို အိန္ဒိယတွင် တည်ထောင်မည်ဟုလည်း ၎င်းက ပြောခဲ့ကြောင်း အမျိုးသမီးနှင့် ကလေး သူငယ် ဖွံ့ဖြိုးတိုးတက်မှုဆိုင်ရာ ဖက်ဒရယ်ဝန်ကြီး ဆမ်ရီတီ အီရာနီ (Smriti Irani) က BJP ပါတီရုံးတွင် သတင်း ထောက်များကို ပြောခဲ့သည်။

ထိုပြောစကားသည် အိန္ဒိယနိုင်ငံ၏ ပုံရိပ်တင် မဟုတ်ဘဲ အစိုးရ အပြောင်းအလဲ လုပ်မည်ဟု ဆိုလိုခြင်း ဖြစ် ကြောင်း၊ အိန္ဒိယသည် စိန်ခေါ်လာသည့် နိုင်ငံခြား အင်အားစုတိုင်းကို နှိမ်နင်းခဲ့ကြောင်း၊ နောင်တွင်လည်း ထိုသို့ လုပ်ဆောင်သွားမည်ဖြစ်ကြောင်း သူမက ဆက်လက် ပြောကြားခဲ့သည်။

မိုဒီသည် Hindenburg Research ၏ ကြေညာချက်ကြောင့် ကသောင်းကနင်း ဖြစ်ပွားခဲ့ပြီးနောက်ပိုင်း အက်ဒါနီ၏ အမည်ကို ရည်ညွှန်း ပြောဆိုခဲ့ခြင်း မရှိသော်လည်း လွှတ်တော်အတွင်း အတိုက်အခံများ၏ အော်ဟစ်လှောင် ပြောင်မှုများနှင့် ရင်ဆိုင်ရချိန်တွင် အိန္ဒိယပြည်သူများသည် ၎င်း၏အင်အားဖြစ်ကာ ယင်းကို မည်သည့် အလိမ် အညာနှင့်မှ ဖျက်ဆီး၍ ရမည်မဟုတ်ဟု ပြောခဲ့သည်။

Source: aljazeera

CNI International News

ဆိုးလ်၊ဖေဖော်ဝါရီ ၁၈

ရန်ဘက်များကို ကြိုတင်ခန့်မှန်း၍မရအောင် ပြင်းထန်သော ဆောင်ရွက်ချက်များဖြင့် တုန့်ပြန်သွားမည်ဟု မြောက်ကိုရီးယားက သောကြာနေ့တွင် ခြိမ်းခြောက်ခဲ့ကြောင်း AP သတင်းတွင် ဖော်ပြသည်။

မြောက်ကိုရီးယား၏ မြင့်တက်လာသော နျူကလီးယားခြိမ်းခြောက်မှုကို တန်ပြန်နိုင်ရေးအတွက် အမေရိကန်နှင့် ပူးတွဲစစ်ရေးလေ့ကျင့်မှုများစွာ လုပ်ဆောင်ရန် စီစဉ်ထားသည်ဟု တောင်ကိုရီးယားဘက်က ထုတ်ပြန်ပြီးနောက် တွင် ထိုသို့ ခြိမ်းခြောက်ခဲ့ခြင်းဖြစ်သည်။

မြောက်ကိုရီးယားသည် ဇန်နဝါရီ ၁ ရက်နေ့က တာတိုပစ်ဒုံးကျည်ပစ်ခဲ့ပြီးနောက်ပိုင်းကတည်းက ၎င်းတို့၏ လက်နက်ပစ်ခတ်စမ်းသပ်မှုများကို ရပ်ဆိုင်းထားသည်။ သောကြာနေ့ ခြိမ်းခြောက်မှုကြောင့် မြောက်ကိုရီးယား သည် ပစ်ခတ်စမ်းသပ်မှုများကို မကြာခင် ပြန်လည်စတင်တော့မည်ဟု ယူဆရသည်။ ခြိမ်းခြောက်မှုနှင့် စစ်ပွဲအ တွက်ကြိုတင်ပြင်ဆင်မှုဟု မြောက်ကိုရီးယားဘက်က သတ်မှတ်ထားသည့် စစ်ရေးလေ့ကျင့်မှုများကို တောင်ကို ရီးယားနှင့် အမေရိကန်တို့ဘက်မှ ပြုလုပ်မည်ဆိုလျှင် ၎င်းတို့သည် ကြိုတင်မခန့်မှန်းနိုင်အောင် ပြင်းထန်သည့် တုန့်ပြန်မှုများနှင့်ရင်ဆိုင်ရမည်ဟု မြောက်ကိုရီးယား နိုင်ငံခြားရေးဌာနက ပြောကြောင်း နိုင်ငံပိုင်မီဒီယာတွင် ဖော် ပြသည်။

မြောက်ကိုရီးယားနိုင်ငံ၊ ပြုံယမ်းရှိ ကင်အီဆောင်း ရင်ပြင်၌ ကိုရီးယားပြည်သူ့တပ်မတော် တည်ထောင်ခြင်း (၇၅) နှစ်မြောက်အထိမ်းအမှတ် စစ်ရေးပြအခမ်းအနားတစ်ခုအတွင်း Hwasong-17 တိုက်ချင်းပစ်ဒုံးကျည်များကို ပြသခဲ့စဉ်(ဓါတ်ပုံ-အေပီ)

အကြီးမားဆုံး စစ်ရေးလေ့ကျင့်မှုများအပါအဝင် တောင်ကိုရီးယားနှင့်အမေရိကန်တို့သည် စစ်ရေးလေ့ကျင့်မှုပေါင်း ၂၀ ကျော်ကို လုပ်ဆောင်သွားရန်စီစဉ်ထားသည်ဟုလည်း ထိုထုတ်ပြန်ချက်တွင် ပါဝင်သည်။တောင်ကိုရီးယားနှင့် အမေရိကန်တို့သည် ဒေသတွင်းတည်ငြိမ်ရေးနှင့် ငြိမ်းချမ်းရေးကို ပူးပေါင်ဖျက်ဆီးနေကြသူများဟုလည်း မြောက်ကိုရီးယားဘက်က ပြောသည်။

ထုတ်ပြန်ချက်တွင် မြောက်ကိုရီးယားအစိုးရအနေဖြင့် မည်သည့်အမေရိကန်-တောင်ကိုရီးယားပူးတွဲစစ်ရေး လေ့ကျင့်မှုကို ရည်ညွှန်းပြောဆိုသလဲဆိုသည်ကို ကွဲကွဲပြားပြားမဖော်ပြထားပေ။သို့သော် မြောက်ကိုရီးယားသည် အဆိုပါ နှစ်နိုင်ငံပူးတွဲစစ်ရေးလေ့ကျင့်မှု လုပ်ဆောင်တိုင်း ယင်းသည် ကျူးကျော်စစ်ဆင်နွှဲရန်အတွက် ကြိုတင် ပြင်ဆင်မှု ဖြစ်သည်ဟု ရှုတ်ချခဲ့ကာ ၎င်းတို့ ကိုယ်ပိုင်လက်နက်များကို ပစ်ခတ်စမ်းသပ်ခြင်းဖြင့် တုန့်ပြန်မှု လုပ်ဆောင်လေ့ရှိသည်။

ယင်းကြောင့်မြောက်ကိုရီးယားသည် တောင်ကိုရီးယား - အမေရိကန်စစ်ရေးလေ့ကျင့်မှုများကို ၎င်းတို့၏ လက်နက်များ စမ်းသပ်ရန် အခွင့်အရေးတစ်ရပ်အဖြစ် အသုံးချနေသည်ဟုပင် တစ်ချို့သော လေ့လာသုံးသပ် သူများက ရှုမြင်သည်။

မြောက်ကိုရီးယားသည် တိုးတက်လာသော ၎င်းတို့၏ နျူကလီးယားလက်နက်အင်အားကို အသုံးချပြီး နျူကလီးယာပိုင်ရှင်နိုင်ငံအဖြစ် နိုင်ငံတကာ၏ တရားဝင်အသိအမှတ်ပြုခံရရေးအပြင် ပိတ်ဆို့အရေးယူမှုများကို ဖယ်ရှားရေးနှင့် အခြားသောလိုက်လျောမှုများကို ရရှိရေး ဆောင်ရွက်နေသည်ဟုလည်း ၎င်းတို့က ပြောသည်။

မြောက်ကိုရီးယား၏ ခြိမ်းခြောက်မှုများ ထွက်ပေါ်လာသော်ငြားလည်း စစ်ရေးလေ့ကျင့်မှုများသည် ကာကွယ်ရေး အတွက်သာ ရည်ရွယ်သည်ဟု တောင်ကိုရီးယားနှင့်အမေရိကန်တို့က ပြောသည်။

Source:AP

CNI International News

မင့်ခ်၊ ဖေဖော်ဝါရီ ၁၇

တိုင်းပြည်သို့ ရန်လိုမှုများရှိလာချိန်မှသာ ရုရှားနှင့်အတူတကွ တိုက်ပွဲဝင်သွားမည်ဟု ဘယ်လာရုစ်သမ္မတ အလက်ဇန်းဒါး လူကာရှန်ကို (Alexander Lukashenko) က ကြေညာခဲ့ကြောင်း BelTA သတင်းတွင် ဖော်ပြသည်။

ယူကရိန်းမှ စစ်သားတစ်ဦး ဘယ်လာရုစ်နိုင်ငံတွင်းသို့ ရောက်ရှိကာ ဘယ်လာရုစ်ပြည်သူများကို သတ်ဖြတ် လာချိန်မှသာ ရုရှားနှင့်အတူ တိုက်ပွဲဝင်ရန် အဆင်သင့်ရှိနေပါသည်ဟု လူကာရှန်ကိုက ကြာသပတေးနေ့တွင် မီဒီယာများကို ပြောသည်။

ဘယ်လာရုစ်ကို ရန်လိုလာလျှင် ပြင်းထန်သော လက်စားခြေမှုကို လုပ်ဆောင်မည်ဟုလည်း ၎င်းက ပြောသည်။ ထိုအခြေအနေတွင် စစ်ပွဲသည် လုံးဝခြားနားသောအသွင်အပြင်သို့ ရောက်ရှိသွားမည်ဟုလည်း လူကာရှန်ကိုက သတိပေးသည်။ ယူကရိန်းသာမက အခြားအိမ်နီးချင်းများနှင့်လည်း သက်ဆိုင်မှုရှိပြီး ဘယ်လာရုစ်ပြည်သူများသည် ငြိမ်းချမ်းသော စိတ်ထားရှိကြောင်း လူကာရှန်ကိုက ပြောသည်။

အီတလီနိုင်ငံ မီလန်မြို့တွင်ပြုလုပ်သည့် ဆန္ဒပြပွဲတစ်ခု၌ ရုရှား-ယူကရိန်းစစ်ပွဲအရေးနဲ့ပတ်သက်ပြီး No War ဆိုသည့် ဆိုင်းဘုတ်ကိုင်ဆောင်ကာ ဆန္ဒထုတ်ဖော်နေစဉ်(ဓါတ်ပုံ-Getty Images)

စစ်ကိုမလိုလားကြောင်း၊ ဘယ်လာရုစ်နိုင်ငံအတွင်း မည်သည့်ရန်လိုမှုမှ မရှိမခြင်း ဘယ်လာရုစ်စစ်တပ်ကို အသုံးမပြုကြောင်းလည်း ၎င်းက ပြောသည်။ ရုရှားသည် ဘယ်လာရုစ်၏ မဟာမိတ်တစ်ဦးဖြစ်ပြီး နှစ်နိုင်ငံကြား ပူးတွဲ တပ်ဖွဲ့များ ဖွဲ့စည်းထားကြောင်း၊ သို့သော် ရုရှားသည် ဘယ်လာရုစ်အား ယူကရိန်းစစ်ပွဲအတွင်းသို့ ဝင်ရောက်ရန် တောင်ဆိုခဲ့ခြင်း မရှိကြောင်းလည်း ၎င်းက ပြောသည်။

လူကာရှန်ကို၏ ပြောစကားများအရ ဘယ်လာရုစ်သည် အနောက်အုပ်စုသို့ လုံခြုံရေးအရ ထောက်ပံ့ပေးကြောင်း၊ သို့သော် ထောက်လှမ်းရေးအချက်အလက်များအရ အနောက်အုပ်စုသည် ဘယ်လာရုစ်အား စစ်ပွဲအတွင်းသို့ ပါဝင်လိုနေကြောင်း၊ ယင်းသည် စိတ်ကူးယဉ်ခြင်းသာဖြစ်ပြီး ဘယ်လာရုစ်သည် စစ်ပွဲအတွင်း ပါဝင်လာပါက ၂၅၀၀ ကီလိုမီတာရှည်သော နယ်စပ်သည် ရှေ့တန်းစစ်မျက်နှာပြင်များ ဖြစ်လာနိုင်ကာ အခြေအနေများသည် ပိုမို ရှုပ်ထွေးလာမည်ဖြစ်ကြောင်း သိရသည်။

ဘယ်လာရုစ်သည် သာမာန်အချိန်တွင် စစ်သည်အင်အား ၇၅၀၀၀(ခုနှစ်သောင်းငါးထောင်)သာရှိသော်လည်း စစ်ဖြစ်လာမည်ဆိုလျှင် အဆိုပါအရေအတွက်သည် တစ်သန်းခွဲအထိ မြင့်တက်လာနိုင်ကြောင်းလည်း လူကာရှန်ကို က ဆက်လက်ပြောကြားခဲ့သည်။

Source:တာ့စ်သတင်းဌာန

CNI International News

ဘန်ကောက်၊ ဖေဖော်ဝါရီ ၁၇

ဆွေမျိုးကောင်းစားရေးဝါဒကို လုပ်ဆောင်ခြင်းမရှိဟု ထိုင်းဝန်ကြီးချုပ် ပရာယွတ်ချန်အိုချာ (Prayut Chan-o-cha) က ဗုဒ္ဓဟူးနေ့တွင် ငြင်းဆိုသည်။

နိုင်ငံအတွက် ဝယ်ယူရေး ပရောဂျက်များမှ လေလံများတွင် တူဖြစ်သူ ပါဝင် ပတ်သက်နေသည်ဟု အတိုက်အခံ များက စွပ်စွဲခဲ့ပြီးနောက် ထိုသို့ ငြင်းဆိုခဲ့ခြင်း ဖြစ်သည်ဟု ဘန်ကောက်ပို့စ် သတင်းတွင် ဖော်ပြထားသည်။

ဗုဒ္ဓဟူးနေ့ လွှတ်တော်အတွင်းမှ အထွေထွေ စကားစစ်ထိုးမှုတွင် ဗိုလ်ချုပ်ကြီးပရာယွတ်က ပုံမှန်မဟုတ်သော စွပ်စွဲချက်များကို တရားဥပဒေက ဆုံးဖြတ်ပေးပါစေဟု ပြောသည်။

ဆွေမျိုးများနှင့် သူ၏ နာမည်အား ဆက်စပ်နေမှုကို ရပ်တန့်သင့်ကြောင်း၊ မည်သူ့ကိုမှ မျက်နှာသာ မပေးခဲ့ ကြောင်းနှင့် ယခင်အစိုးရများ၏ အကျင့်ပျက် ခြစားမှုများတွင် ဘာကြောင့် နှုတ်ပိတ်နေခဲ့ပါသလဲဟု ပရာယွတ်က ပြန်လည် မေးခွန်းထုတ်သည်။

ဖြူးထိုင်းပါတီမှ လွှတ်တော်အမတ် ဂျီယာပွန် ဆင်သူပရိုင်ကိုတွေ့ရစဉ်

ရွေးကောက်ပွဲ မဲဆွယ်မှု တစ်စိတ်တစ်ပိုင်းအဖြစ် ထိုသို့သော ကိစ္စမျိုးကို ကြိုးစားနေခြင်း ဖြစ်ကြောင်း၊ စုံစမ်း စစ်ဆေးမှု လုပ်ဆောင်သင့်ကြောင်း၊ ယင်းကို လျစ်လျူရှုသွားမည် မဟုတ်ကြောင်း ပရာယွတ်က ပြောသည်။

တရားဥပဒေကို လေးစားရန် တိုက်တွန်းကြောင်း၊ မူမမှန်မှု တစ်ခုခုကို တွေ့လျှင် ရဲတိုင်နိုင်ကြောင်းလည်း ပရာယွတ်က ပြန်လည်ချေပခဲ့သည်။

ဗုဒ္ဓဟူးနေ့တွင် စတင်သော စကားစစ်ထိုးမှုအတွင်း သူ၏ တူဖြစ်သူနှင့် ပတ်သက်၍ ဖြူးထိုင်းပါတီဘက်မှ ပြုလုပ်ခဲ့သော စွပ်စွဲမှုကို ပရာယွတ်က ပြန်လည် တုန့်ပြန်ခဲ့ခြင်းဖြစ်ကာ ထိုစကားစစ်ထိုးမှုသည် မည်သည့် မဲခွဲမှုမှ မလုပ်ဆောင်ဘဲ အဆုံးသတ်သွားခဲ့ပြီ ဖြစ်သည်။

ယင်းက မတ် ၂၃ ရက်နေ့တွင် ကုန်ဆုံးမည့် လွှတ်တော်၏ ၄ နှစ် သက်တမ်းမတိုင်ခင် နောက်ဆုံးအကြိမ် စစ်ဆေး ခြင်းလည်း ဖြစ်သည်။ ဖြူးထိုင်းပါတီမှ လွှတ်တော်အမတ် ဂျီယာပွန် ဆင်သူပရိုင် (Jiraporn Sinthuprai)က ပရာယွတ်၏ တူဖြစ်သူသည် ဖစ်ဆနူလွတ် (Phitsanulok) ပြည်နယ်ရှိ Somdet Phra Eka Thotsarot စစ်စခန်းတွင် ဆောက်လုပ်ရေးကုမ္ပဏီတစ်ခု ဖွင့်လှစ်ခွင့်နှင့် လုပ်ငန်းလုပ်ကိုင်ခွင့် ရရှိခဲ့သည်ဟု ပြောသည်။

ထိုင်းဝန်ကြီးချုပ် ပရာယွတ်ချန်အိုချာကိုတွေ့ရစဉ်

ပြည်သူများ၏ ဝေဖန်မှုကြောင့် ထိုကုမ္ပဏီသည် ၂၀၁၆ ခုနှစ်၊ နိုဝင်ဘာ ၃ ရက်တွင် စစ်စခန်းမှ ရွှေ့ပြောင်း ပေးခဲ့ရ သည်ဟုလည်း သူမက ပြောသည်။

စစ်ဆေးမှုများအတွင်း ကုမ္ပဏီသည် ၂၀၁၂ မှ ၂၀၁၃ ခုနှစ်အတွင်း အရှုံးပေါ်မှုများ ရှိသော်လည်း ၂၀၁၄ တွင် ယင်းသည် စစ်တပ်၏ ဘတ် ၂၈ သန်းတန် ဆောက်လုပ်ရေး ပရောဂျက်သုံးခုကို အောင်မြင်ခဲ့သည်ဟု သူမက ပြောသည်။

၂၀၁၄ အာဏာသိမ်းပြီးနောက် ကုမ္ပဏီသည် စစ်တပ်တရားစီရင်ခွင့် လက်ရောက်ရှိ ပြည်နယ်များ၌ ပရောဂျက်များ ကို ရရှိခဲ့ကြောင်း၊ ကုမ္ပဏီသည် ဘတ် ၁ ဒသမ ၅ သန်းနှင့် စတင်တည်ထောက်ခဲ့သော်လည်း တန်ဖိုးကြီး နိုင်ငံပိုင် ပရောဂျက် စာချုပ်များကို အနိုင်ရရှိခဲ့သည်ဟုလည်း အတိုက်အခံ အမတ်က ပြောခဲ့သည်။

Source: ဘန်ကောက်ပို့စ်