CNI International News

တိုင်ပေ၊ ဇန်နဝါရီ ၁၂

တရုတ်သည် ဇန်နဝါရီ ၁၃ ရက်တွင် ကျင်းပမမည့် ထိုင်ဝမ်သမ္မတရွေးကောက်ပွဲနှင့် လွှတ်တော်ရွေးကောက်ပွဲများ ကို ကြားဝင်စွက်ဖက်ရန် ကြိုးပမ်းမှုများ၊ ထိုင်ဝမ်လူထုအပေါ် ခြိမ်းခြောက်မှုများ ပြုလုပ်ခဲ့ကြောင်း ထိုင်ဝမ်က ပြောကြားခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

တရုတ်သည် ရက်ပိုင်းအတွင်း ကျင်းပမည့် ထိုင်ဝမ်ရွေးကောက်ပွဲများကို ထပ်တလဲလဲ ကြားဝင်စွက်ဖက်နေ ကြောင်း ဇန်နဝါရီ ၁၁ ရက်တွင် ထိုင်ဝမ်နိုင်ငံခြားရေးဝန်ကြီး ဂျိုးဆက်ဝူ (Joseph Wu)က ဝေဖန်ခဲ့သည်။

ထို့နောက် တရုတ်သည် ထိုင်ဝမ်လူထုအပေါ် နောက်ထပ်တစ်ကြိမ် ဗြောင်ကျကျ ခြိမ်းခြောက်နေသည်ဟု ၎င်းက ပြောကြားခဲ့သည်။

ထိုင်ဝမ်ရွေးကောက်ပွဲကို နိုင်ငံတကာက အာရုံစိုက်နေပြီး တရုတ်၏ ကြားဝင်စွက်ဖက်မှုများက နိုင်ငံတကာ၏ အာရုံစိုက်မှုကို လမ်းလွဲသွားစေကြောင်း၊ တရုတ်အနေနှင့် အခြားနိုင်ငံများ၏ ရွေးကောက်ပွဲများကို ဝင်ရောက် စွက်ဖက်နေမှုကို ရပ်တန့်သင့်ကြောင်း ဝူက X လူမှုမီဒီယာတွင် ရေးသားဖော်ပြခဲ့သည်။ 

လိုင်ချင်တေးကို တွေ့ရစဉ်

ထိုင်ဝမ်၏ အာဏာရ ဒီမိုကရက်တစ် တိုးတက်ရေးပါတီ (DPP) မှ ရွေးကောက်ပွဲဝင် ကိုယ်စားလှယ်လောင်း ဖြစ်သည့် လက်ရှိ ဒုသမ္မတ လိုင်ချင်တေး (Lai Ching-te)သည် ရွေးကောက်ပွဲ အနိုင်ရခဲ့မည်ဆိုပါက ဒေသတွင်း ခြိမ်းခြောက်မှု ဖြစ်လာလိမ့်မည်ဟု တရုတ်နှင့် ထိုင်ဝမ်၏ အကြီးဆုံး ပါတီဖြစ်သည့် ကူမင်တန်ပါတီ (KMT) တို့က ပြောကြားခဲ့ပြီးနောက် ဝူက ထိုကဲ့သို့ တုန့်ပြန်ခဲ့ခြင်းဖြစ်သည်။

"DPP ပါတီရဲ့ ထိုင်ဝမ်လွတ်လပ်ရေး ရပ်တည်ချက်ရဲ့ ပြင်းထန်တဲ့ ထိခိုက်မှုနဲ့ လိုင်ချင်တေးရဲ့ ရေလက်ကြား ဖြတ်ကျော် ထိပ်တိုက်တွေ့မှုနဲ့ ပဋိပက္ခဖန်တီးမှု အန္တရာယ်ကို ထိုင်ဝမ်မှာရှိတဲ့ တရုတ်တစ်နိုင်ငံတည်းသား အများစုက သိရှိနားလည်ထားလိမ့်မယ်လို့ မျှော်လင့်မိပါတယ်"ဟု တရုတ်၏ ထိုင်ဝမ်ရေးရာရုံးက ထုတ်ပြန်ခဲ့ သည်။

အမေရိကန်၊ တရုတ်၊ ထိုင်ဝမ် ခေါင်းဆောင်များကိုတွေ့ရစဉ်

လိုင်သည် ရွေးကောက်ခံခဲ့ရမည်ဆိုပါက ထိုင်ဝမ်လွတ်လပ်ရေး၏ ဆိုးယုတ်သည့် လမ်းကြောင်းကို ရှေးရှုသော ခွဲထွက်ရေး လှုပ်ရှားမှုများကို ပိုမိုလုပ်ဆောင်လာလိမ့်မည်ဟုလည်း ထုတ်ပြန်ချက်တွင် ဖော်ပြခဲ့သည်။

တရုတ်နှင့် ရင်းနှီးသည့် ဆက်ဆံရေးရှိသော ကူမင်တန်ပါတီကလည်း လိုင်၏ ထိုင်ဝမ်လွတ်လပ်ရေး ရပ်တည် ချက်ကို ဝေဖန်ရှုတ်ချခဲ့သည်။ 

လိုင်သည် ရွေးကောက်ပွဲတွင် အနိုင်ရခဲ့မည်ဆိုပါက လက်ရှိသမ္မတ ဆိုင်အင်ဝမ် (Tsai Ing-wen) အာဏာ လွှဲပြောင်းပေးမည့် မေလ ၂၀ ရက်မတိုင်မီ တင်းမာမှုများ မြင့်တက်လာနိုင်ကြောင်း ကူမင်တန်ပါတီ၏ ဒုဥက္ကဋ္ဌ ဂျောရှောကောင် (Jaw Shw-kong) က ပြောကြားခဲ့သည်။

Source: အယ်လ်ဂျာဇီးယား

CNI International News

နီယာမေ ၊ ဇန်နဝါရီ ၁၀

နိုက်ဂျာနိုင်ငံ၊ နီယာမေ (Niamey) မြို့တော်တွင် ပြီးခဲ့သည့်နှစ်က ဖြစ်ပွားခဲ့သည့် အာဏာသိမ်းမှုတွင် ရာထူးမှ ဖြုတ်ချခံခဲ့ရသည့် သမ္မတ မိုဟာမက် ဘာဇွမ်း (Mohamed Bazoum)၏ သားဖြစ်သူ ဆာလမ် ဘာဇွမ်း (Salem Bazoum) ကို ဇန်နဝါရီ ၈ ရက်က ယာယီပြန်လွှတ်ပေးခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

အသက် ၂၂ နှစ်အရွယ် ဆာလမ်သည် ပြီးခဲ့သည့်နှစ် ဇူလိုင်လက အာဏာသိမ်းမှု ဖြစ်ပွားခဲ့ချိန်ကတည်းက ၎င်း၏ မိဘများနှင့်အတူ သမ္မတအိမ်တော်တွင် ထိန်းသိမ်းခံခဲ့ရခြင်း ဖြစ်သည်။

ဆာလမ်၏ မိဘနှစ်ပါး အခြေအနေနှင့်ပတ်သက်ပြီး စစ်ခုံရုံးက အသေးစိတ် ထုတ်ပြန်ခဲ့ခြင်းမရှိပေ။

၂၀၂၀ ပြည့်နှစ်နောက်ပိုင်း အနောက်နှင့် ဗဟိုအာဖရိကတွင် ဖြစ်ပွားခဲ့သည့်် အာဏာသိမ်းမှု ၈ ခုထဲတွင် ပါဝင်ခဲ့ သည့် နိုက်ဂျာ၏ အာဏာသိမ်းမှုကို နိုင်ငံတကာ အသိုင်းအဝိုင်းက ဝေဖန်ရှုတ်ချခဲ့ပြီး အနောက်အာဖရိကနိုင်ငံများ စီးပွားရေးအဖွဲ့အစည်း (ECOWAS) က နိုက်ဂျာစစ်ခေါင်းဆောင်များကို ပိတ်ဆို့မှုများ ချမှတ်ခဲ့သည်။

နိုက်ဂျာတွင် ထိုအာဏာသိမ်းမှု ဖြစ်ပွားခဲ့ချိန်ကတည်းက စစ်တပ်ခေါင်းဆောင်များက နိုင်ငံကို အုပ်ချုပ်ခဲ့ခြင်း ဖြစ်သည်။ 

စစ်ခေါင်းဆောင် ဗိုလ်ချုပ်ကြီး အဗ္ဗဒဒူရာဟမ်မာနီ ချီယာနီ (Abdourahamane Tchiani) က ၎င်းတို့အစိုးရအဖွဲ့ သည် အရပ်သားအစိုးရအဖွဲ့ကို အာဏာလွှဲပြောင်းပေးရန် အသွင်ကူးပြောင်းရေးကာလကို ၃ နှစ်ကြာမည်ဖြစ် ကြောင်း ကြေညာခဲ့သည်။

ဆာလမ်ဘာဇွမ်းကို တွေ့ရစဉ်

နိုက်ဂျာသမ္မတဟောင်း မိုဟာမက်နှင့် နီးစပ်သည့် သတင်းရင်းမြစ်တစ်ခုကမူ ဆာလမ် ဘာဇွမ်းသည် နီယာမြေမြို့ တော်မှ တိုဂိုနိုင်ငံ လိုမီ (Lome) မြို့တော်သို့ ဇန်နဝါရီ ၈ ရက် မွန်းလွဲပိုင်းတွင် ရောက်ရှိခဲ့သည်ဟု အေအက်ဖ်ပီ သတင်းဌာနကို ပြောကြားခဲ့သည်။

တိုဂိုအစိုးရကလည်း တိုဂိုနှင့် ဆီယာလီယွန်နိုင်ငံများ၏ ကြားဝင်စေ့စပ်မှုများကြောင့် ဆာလမ်ဘာဇွမ်း လွတ်မြောက်ခဲ့ကြောင်း အတည်ပြုခဲ့သော်လည်း ဆာလမ်သည် မည်သည့်နေရာတွင် ရှိနေသည်ဆိုခြင်းကို ထုတ်ပြန်ခဲ့ခြင်းမရှိပေ။

နိုက်ဂျာနိုင်ငံသည် လက်ရှိတွင် ECOWAS ၏ အဖွဲ့ဝင်အဖြစ်မှ ဆိုင်းငံ့ခဲ့ထားရသည်။ ECOWAS အဖွဲ့ကမူ သမ္မတဟောင်း မိုဟာမက်ဘာဇွန်ကို အမြန်ဆုံး အာဏာပြန်အပ်ရန်နှင့် အပြန်အလှန်အနေနှင့် ပိတ်ဆို့မှုများကို ဖြေလျှော့ပေးမည်ဖြစ်ကြောင်း နိုက်ဂျာစစ်ခေါင်းဆောင်များကို ပြောကြားခဲ့သည်။

သို့သော် တိုဂိုနှင့် အခြားအနောက်အာဖရိက နိုင်ငံအချို့သည် ECOWAS အဖွဲ့နှင့် နိုက်ဂျာ စစ်ခေါင်းဆောင်များ အကြား တင်းမာမှုများ လျော့ကျစေရန်နှင့် ပြေလည်မှုရစေရန် ကြားဝင်စေ့စပ်ပေးလျက်ရှိသည်။

ဇန်နဝါရီ ၈ ရက်ကလည်း တိုဂိုနိုင်ငံခြားရေးဝန်ကြီး ရောဘတ် ဒပ်ဆေး (Robert Dussey) သည် နိုက်ဂျာစစ်တပ် က ခန့်အပ်ခဲ့သည့် ဝန်ကြီးချုပ်နှင့် တွေ့ဆုံခဲ့ကြောင်း နိုက်ဂျာနိုင်ငံပိုင် ရုပ်သံက ထုတ်ပြန်ခဲ့သည်။

Source: အယ်လ်ဂျာဇီးယား

CNI International News

ချာလက်စတန်၊ ဇန်နဝါရီ ၁၀ 

အမေရိကန်သမ္မတ ဂျိုးဘိုင်ဒန် (Joe Biden)သည် ဇန်နဝါရီ ၈ ရက်က တောင်ကာရိုးလိုင်းနား ( South Carolina) ပြည်နယ်သို့ သွားရောက်သည့် ခရီးစဉ်အတွင်း လူဖြူကြီးစိုးရေးဝါဒနှင့် နိုင်ငံရေး အကြမ်းဖက်မှုများကို ရှုတ်ချ ကြောင်း လူမည်းမဲဆန္ဒရှင်များအား ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဘိုင်ဒင်သည် သမ္မတတာဝန် စတင်ထမ်းဆောင်ခဲ့ချိန်ကတည်းက ထိုမဲဆန္ဒနယ်တွင် လူမည်း မဲဆန္ဒရှင်များ၏ ထောက်ခံမှုများ လျော့ကျနေမှုကို ပြန်လည်မြင့်တက်စေရန် ထိုကဲ့သို့ ပြောကြားခဲ့ခြင်း ဖြစ်နိုင်သည်ဟု ကျွမ်းကျင် သူများက ပြောကြားခဲ့သည်။

ဘိုင်ဒန်သည် ၂၀၁၅ ခုနှစ်က လူဖြူကြီးစိုးရေး လူမျိုးရေးဝါဒီ ဒိုင်လန် ရုဖ် (Dylann Roof) ၏ ပစ်ခတ်မှုကြောင့် လူမည်း ဘုရားကျောင်းတက်သူ ၁၅ ဦး သေဆုံးခဲ့သည့် ချာလက်စတန် (Charleston) မြို့ရှိ မာသာ ဟေမာနွေလ အေအမ်အီး ဘုရားကျောင်း (Mother Emanuel AME Church) တွင် မိန့်ခွန်းပြောကြားခဲ့ခြင်းဖြစ်သည်။

ဘိုင်ဒန်သည် ၎င်း၏ မိန့်ခွန်းပြောကြားမှုအတွင်း ၂၀၂၄ ခုနှစ် သမ္မတရွေးကောက်ပွဲတွင် ၎င်း၏ ပြိုင်ဘက် ကိုယ်စားလှယ်လောင်း ဖြစ်လာနိုင်ခြေရှိသည့် သမ္မတဟောင်း ဒေါ်နယ်ထရမ့်(Donald Trump) ကို ဝေဖန် တိုက်ခိုက်ခဲ့သည်။

ဒေါ်နယ်ထရမ့်ကို တွေ့ရစဉ်

ထို့နောက် ငွေကြေးဖောင်းပွမှုနှင့် လူမည်းများအကြား အလုပ်လက်မဲ့နှုန်းကို လျှော့ချပေးနိုင်ခဲ့သည့် ၎င်း၏ အစိုးရ အဖွဲ့၏ အားထုတ်ကြိုးပမ်းမှုများကိုမူ ချီးကျူးဂုဏ်ပြုခဲ့သည်။ 

၂၀၁၅ ခုနှစ်က ဘုရားကျောင်းပစ်ခတ်မှုသည် ဘုရားသခင်၏ စကားလုံးများကို အမုန်းတရားနှင့် ဒေါသ ကျည်ဆန် များ ဖောက်ထွင်း ဝင်ရောက်ခဲ့ခြင်းဖြစ်ကြောင်း၊ နိုင်ငံအတွင်း လူဖြူလူမျိုးကြီးဝါဒဆိုသည့် အဆိပ်ကို သင့်စေခဲ့ ကြောင်း၊ ထိုလူမျိုးကြီးဝါဒသည် အမေရိကန်တွင် ယနေ့၊ မနက်ဖြန် သို့မဟုတ် မည်သည့်အခါမှ နေရာရှိလိမ့်မည် မဟုတ်ကြောင်း ဘိုင်ဒန်က ပြောကြားခဲ့သည်။

ထရမ့်သည် ဒီမိုကရေစီအတွက် ခြိမ်းခြောက်မှုဖြစ်ကြောင်း ဘိုင်ဒန်က ၂၀၂၁ ခုနှစ်တွင် ထရမ့်ထောက်ခံသူများက လွှတ်တော်အဆောက်အအုံအား ဝင်ရောက်စီးနင်းခဲ့သည့်် ဖြစ်စဉ်ကို ရည်ညွှန်းပြီး ပြောကြားခဲ့သည်။

“ရွေးကောက်ပွဲမှာ ရှုံးနိမ်ခဲ့တဲ့ သမ္မတဟောင်းတစ်ဦးရဲ့ အလိမ်အညာတွေကို နားယောင်ထားတဲ့ လူအုပ်ကြီးဟာ ဆူပူအုံကြွမှုတွေ ပြုလုပ်ခဲ့ပါတယ်။ သူ့ရဲ့ လုပ်ရပ်တွေဟာ အမေရိကန် နိုင်ငံသမိုင်းမှာ တာဝန်နဲ့ ဝတ္တရား ပျက်ကွက်မှု အဆိုးရွားဆုံး သမ္မတတွေထဲမှာ ပါဝင်နေပါတယ်" ဟု ဘိုင်ဒန်က ပြောကြားခဲ့သည်။

ထို့ပြင် ထရမ့်သည် အရှုံးသမားတစ်ဦးဖြစ်ကြောင်း ဘိုင်ဒန်က ပြောကြားခဲ့ချိန်တွင် ထိုဘုရားကျောင်း၌ ၎င်း၏ မိန့်ခွန်းပြောကြားမှုကို တက်ရောက်နားထောင်ခဲ့သူများက လက်ခုပ်သြဘာများတီးပြီး ဂုဏ်ပြုခဲ့ကြသည်။

Source: ရိုက်တာ

CNI International News

ကာရာကက်စ် ၊ ဇန်နဝါရီ ၁၀

အိမ်နီးချင်း ဂွိုင်ယာနာ (Guyana)နိုင်ငံနှင့် နယ်မြေပိုင်ဆိုင်မှု အငြင်းပွားနေသည့် အက်စီကွီဘို (Essequibo) ဒေသ သည် ဗင်နီဇွဲလား၏ သမိုင်းဝင် ပိုင်ဆိုင်မှု နယ်မြေဖြစ်ကြောင်း ဗင်နီဇွဲလားသမ္မတ နီကိုလပ်စ် မာဒူရို (Nicolas Maduro)က ထပ်လောင်း အတည်ပြု ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။

မာဒူရိုသည် အက်စီကွီဘိုဒေသကို ဗင်နီဇွဲလား၏ ၂၄ ခုမြောက် ပြည်နယ်အဖြစ် သတ်မှတ်ရန် လွှတ်တော်တွင် ဒုတိယအကြိမ်မြောက် အမိန့်ပြန်တမ်းဖတ်ကြားရန် ပြင်ဆင်နေချိန်တွင် ထိုကဲ့သို့ ပြောကြားခဲ့ခြင်းဖြစ်သည်။

"ဒီဇင်ဘာ ၃ ရက်က ပြုလုပ်ခဲ့တဲ့ ပြည်သူ့ဆန္ဒခံယူပွဲအရ အမျိုးသားလွှတ်တော်ဟာ အဓိကအခန်းကဏ္ဍမှာ ပါဝင် နေပါတယ်။ အက်စီကွီဘိုဒေသဟာ ဗင်နီဇွဲလားရဲ့ သမိုင်းဝင် ပိုင်ဆိုင်ခွင့်ကို ကာကွယ်ဖို့အတွက် ပြည်သူတွေရဲ့ ခိုင်မာတဲ့ ဆန္ဒတွေ ထွက်ပေါ်ခဲ့ပါတယ်" ဟု မာဒူရိုက ဗင်နီဇွဲလား၏ နိုင်ငံရေးအင်အားစုများနှင့် ဇန်နဝါရီ ၈ ရက် က ပြုလုပ်ခဲ့သည့် အစည်းအဝေးတွင် ပြောကြားခဲ့သည်။

ဗင်နီဇွဲလားနိုင်ငံသည် မိမိတို့ပိုင်ဆိုင်သည့် အရာများကို ကာကွယ်နိုင်စွမ်းရှိပြီး ဗင်နီဇွဲလားပြည်သူများသည် လက်တင်အမေရိကတွင် သမိုင်းရေးထိုးနိုင်ခဲ့သည့် တိုက်ပွဲဝင်ပြည်သူများဖြစ်ကြောင်း မာဒူရိုက ပြောကြားခဲ့သည်။

အက်စီကွီဘိုဒေသ မြေပုံကို သရုပ်ဖော်ထားစဉ်

ထို့ပြင် ယခင်က ဗြိတိသျှကိုလိုနီဖြစ်ခဲ့သည့်် ဂွိုင်ယာနာနိုင်ငံသည် လက်ရှိတွင်လည်း ဗြိတိန်အစိုးရ၏ လက်အောက်ခံ ဖြစ်နေသည်ဟုလည်း မာဒူရိုက ဝေဖန်ပြောကြားခဲ့သည်။

"ဂွိုင်ယာနာ အက်စီကွီဘို ဥပဒေနဲ့ပတ်သက်ပြီး နောက်ဆုံးအကြိမ် မဲခွဲဆုံးဖြတ်မှု အပါအဝင် လွှတ်တော်ရဲ့ လုပ်ငန်းစဉ်တွေကို ချဲ့ထွင်ခဲ့တဲ့ အမျိုးသားလွှတ်တော်ကို ကျနော် ချီးကျူးဂုဏ်ပြုပါတယ်။ ဒါနဲ့ပတ်သက်ပြီး ကျနော် အရမ်းပျော်ရွှင်မိပါတယ်" ဟု မာဒူရိုက ပြောကြားခဲ့သည်။

၂၀၂၃ ခုနှစ်၊ ဒီဇင်ဘာ ၆ ရက်က ဗင်နီဇွဲလား လွှတ်တော်သည် ဂွိုင်ယာနာ အက်စီကွီဘိုဒေသကို ဗင်နီဇွဲလား၏ ၂၄ ခုမြောက် ပြည်နယ်အဖြစ် သတ်မှတ်ရန် အဆိုပြုထားသည့် ဥပဒေမူကြမ်းကို ပထမအကြိမ် ဖတ်ကြားခဲ့သည်။

ဗင်နီဇွဲလားနှင့် ဂွိုင်ယာနာနိုင်ငံတို့သည် အက်စီကွီဘို မြစ်၏ အနောက်ဘက်ရှိ စတုရန်း ကီလိုမီတာ ၁၅၉,၅၀၀ အကျယ်ရှိသည့် အက်စီကွီဘိုဒေသကို ပိုင်ဆိုင်မှုနှင့်ပတ်သက်ပြီး အငြင်းပွားလျက်ရှိသည်။ 

လက်ရှိ ဂွိုင်ယာနာနိုင်ငံက ထိန်းချုပ်ထားသည့်် ထိုဒေသတွင် ၂၀၁၅ ခုနှစ်က ရေနံများ တွေ့ရှိခဲ့ပြီးနောက် ဗင်နီဇွဲလားနှင့် ဂွိုင်ယာနာအကြား ပိုင်ဆိုင်မှု အငြင်းပွားသည့် ပြဿနာမှာ ပိုမိုမြင့်တက်လာခဲ့သည်။

Source: တာ့စ်

CNI International News

တိုင်ပေ၊ ဇန်နဝါရီ ၁၀

ရွေးကောက်ပွဲမတိုင်မီ တရုတ်၏ စစ်ရေးဖိအားများကြောင့် ထိုင်ဝမ်၏ ကင်မန်(Kinmen)ကျွန်းပေါ်ရှိ ဒေသခံများ အကြား စိုးရိမ်မှုများ မြင့်တက်နေသည်ဟု Thai PBS World မှ ဖော်ပြခဲ့သည်။

ကင်မန်ကျွန်းသည် ထိုင်ဝမ်ကျွန်းနှင့် ကီလိုမီတာ ၂၀၀ (မိုင် ၁၂၀)ခန့် ကွာဝေးသော်လည်း တရုတ်ပြည်မကြီးနှင့် ၇ ကီလိုမီတာသာ ကွာဝေးသည်။

၁၉၄၉ ခုနှစ်က တရုတ်ပြည်မကြီးမှ အမျိုးသားရေးဝါဒီများသည် ထိုကျွန်းပေါ်သို့ ထွက်ပြေးခဲ့ကြသည်။

အဆိုပါ ကျွန်းသည် ရှေ့တန်းစစ်မြေပြင် တစ်ခုဖြစ်ခဲ့ပြီး ၁၉၇၉ ခုနှစ်အထိ မကြာခဏ ဗုံးကြဲတိုက်ခိုက်ခံခဲ့ရသည်။ 

လက်ရှိတွင် ကင်မန်ကျွန်းခံများသည် ဇန်နဝါရီ ၁၃ ရက်မှာ ကျင်းပမည့် သမ္မတရွေးကောက်ပွဲနှင့် လွှတ်တော် ရွေးကောက်ပွဲအတွက် မဲပေးရန် ပြင်ဆင်နေသည်။

တရုတ်နှင့် အမေရိကန်ကတော့ ထိုရွေးကောက်ပွဲကို အနီးကပ် စောင့်ကြည့်လျက်ရှိသည်။

ကင်မန်ကျွန်းကို တွေ့ရစဉ်

အဆိုပါ ရွေးကောက်ပွဲတွင် အနိုင်ရရှိသူသည် ထိုင်ဝမ်ကို နောက်ထပ် ၄ နှစ်တာ ကာလအတွက် မူဝါဒများ ချမှတ်သွားမည်ဖြစ်သည်။

"ရှားမန် (Xiamen) မြို့နဲ့ ကင်မန်ကျွန်းတွေဟာ နီးကပ်စွာ တည်ရှိနေပါတယ်" ဟု လိုင်ယု (Lieyu) မြို့တွင် နေထိုင်သည့် ဒေသခံတစ်ဦးဖြစ်သူ လင်မာတန်က ကင်မန်ကျွန်းနှင့် နီးကပ်စွာ တည်ရှိသော တရုတ်ပြည်မကြီး၏ ရှားမန်မြို့ကို ရည်ညွှန်းပြောကြားခဲ့သည်။ 

တရုတ်၏ ရှားမန်မြို့နှင့် ထိုင်ဝမ်၏ ကင်မန်ကျွန်းသည် တစ်ဖက်နှင့်တစ်ဖက် လှမ်းမျှော်ကြည့်ပါက ထင်ရှားပြတ် သားစွာ မြင်ရသည်အထိ နီးကပ်စွာ တည်ရှိနေသည်။

"တစ်ဖက်နဲ့တစ်ဖက် လက်နက်ကြီး၊ လက်နက်ငယ်တွေနဲ့ ရန်စောင်နေကြပါတယ်။ ကံကောင်းတာတစ်ခုက ကင်မန်ကျွန်းကို ကူမင်တန် (KMT) ပါတီက ကြီးစိုးထားတာပါပဲ"ဟု အသက် ၇၉ နှစ်အရွယ် စစ်မှုထမ်းဟောင်း တစ်ဦးဖြစ်သည့် လိုင်က ပြောကြားခဲ့သည်။ 

ကင်မန်ကျွန်းကို တွေ့ရစဉ်

ကူမင်တန်ပါတီသည် ထိုင်ဝမ်၏ သက်တမ်းအရှည်ကြာဆုံး နိုင်ငံရေးပါတီဖြစ်ပြီး တရုတ်ပြည်မကြီးနှင့် နီးစပ်သည့် ဆက်ဆံရေးကို လိုလားသည့် ပါတီဖြစ်သည်။ 

တရုတ်နှင့် ဆက်ဆံရေးများမှတစ်ဆင့် ထိုင်ဝမ်၏ စီးပွားရေးကို ပိုမိုတိုးတက်အောင် လုပ်ဆောင်ရန် ကူမင်တန် ပါတီက ရည်ရွယ်ထားသည်။ 

တရုတ်ကမူ ထိုင်ဝမ်ကို ၎င်း၏ နယ်မြေတစ်ခုအဖြစ် ရှုမြင်ထားပြီး လိုအပ်လာပါက အင်အားသုံးပြီး သိမ်းယူသွား မည်ဟု ပြောကြားခဲ့သည်။ 

ထိုင်ဝမ်ကမူ ၎င်းသည် တရုတ်၏ နယ်နိမိတ်တစ်ခု မဟုတ်ကြောင်း ငြင်းဆိုထားသည်။

Source: Thai PBS World

CNI International News

ကိုင်ရို၊ ဇန်နဝါရီ ၉

ဂါဇာတွင် ဖြစ်ပွားနေသည့် အစ္စရေး-ဟားမာ့စ်စစ်ပွဲကို လျင်မြန်စွာ အဆုံးသတ်စေရန် အမေရိကန်နှင့် စက်မှု ထိပ်သီး ၇ နိုင်ငံ (G-7) မဟာမိတ်နိုင်ငံများက ကြိုးပမ်းလျက်ရှိကြောင်း အီတလီက ဇန်နဝါရီ ၈ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) ၊ ဥရောပသမဂ္ဂ (EU) နှင့် ဂျာမနီနိုင်ငံ တို့မှ ထိပ်သီးအရာရှိများသည် အရှေ့အလယ်ပိုင်းသို့ ရောက်ရှိနေချိန်တွင် အီတလီနိုင်ငံ၏ ပြောကြားချက် ထွက်ပေါ်လာခြင်းဖြစ်သည်။

ဘလင်ကင်သည် အစ္စရေးနိုင်ငံသို့ မသွားရောက်မီ ဇန်နဝါရီ ၈ ရက်က ယူအေအီးနှင့် ဆော်ဒီအာရေဗျ နိုင်ငံများ တွင် ဂါဇာအရေးနှင့်ပတ်သက်ပြီး ဆွေးနွေးမှုများ ပြုလုပ်ခဲ့ပြီး ပိုမိုကျယ်ပြန့်စွာ ဖြစ်ပွားလာနိုင်မည့် ပဋိပက္ခကို ရှောင်လွှဲရန်အတွက် ငြိမ်းချမ်းရေးလုပ်ငန်းစဉ်များကို အရှိန်မြှင့်ဆောင်ရွက်ရမည်ဟု ပြောကြားခဲ့သည်။

အမေရိကန်နိုင်ငံခြားရေး၀န်ကြီး ဘလင်ကင်နဲ့ ဆော်ဒီမင်းသားကို တွေ့ရစဉ်

ဘလင်ကင်သည် ၅ ရက်ကြာ အရှေ့အလယ်ပိုင်း ခရီးစဉ်ကို စတင်ခဲ့သည့် ဇန်နဝါရီ ၇ ရက်တွင် ဂျော်ဒန်နှင့် ကာတာနိုင်ငံများတွင်လည်း အစည်းအဝေးများ ပြုလုပ်ခဲ့ပြီး ထိုခရီးစဉ်သည် အောက်တိုဘာ ၇ ရက်က စတင် ဖြစ်ပွားခဲ့သည့် အစ္စရေး-ဟားမာ့စ် စစ်ပွဲအတွင်း ၎င်း၏ ၄ ကြိမ်မြောက် အရှေ့အလယ်ပိုင်းခရီးစဉ်ဖြစ်သည်။

အီရန်၏ ကျောထောက်နောက်ခံ ရရှိထားသည့် အခြား လက်နက်ကိုင် စစ်သွေးကြွအဖွဲ့များကလည်း ဂါဇာပဋိပက္ခ တွင် တစ်ဖက်တစ်လမ်းမှ ပါဝင်လာခဲ့ပြီး လက်ဘနွန်နယ်စပ်ရှိ အမေရိကန်တပ်ဖွဲ့များ၊ အီရတ်နှင့် ဆီးရီးယားရှိ အမေရိကန်တပ်ဖွဲ့များ၊ ပင်လယ်နီအတွင်းရှိ ကုန်တင်သင်္ဘောများကို ပစ်မှတ်ထားတိုက်ခိုက်မှုများ ပြုလုပ်ခဲ့သည်။

အစ္စရေးကလည်း ၎င်းတို့ သိမ်းပိုက်ထားသည့် အနောက်ဘက်ကမ်းဒေသရှိ ပါလက်စတိုင်းများအပေါ် အင်အားသုံး ဖြိုခွင့်မှုများ ပြုလုပ်လျက်ရှိသည်။

 ဂါဇာဒေသကို တွေ့ရစဉ်

ဂျာမနီနိုင်ငံခြားရေးဝန်ကြီး အန်နာလီနာ ဘေယာဘော့ (Annalena Baerbock) ကလည်း ဇန်နဝါရီ ၈ ရက်တွင် အစ္စရေးသို့ ရောက်ရှိခဲ့ပြီး ဥရောပသမဂ္ဂ၏ ထိပ်သီးသံတမန် ဂျိုးဆက် ဘော်ရဲလ် (Josep Borrell) ကလည်း လက်ဘနွန်နိုင်ငံသို့ ရောက်ရှိလာခဲ့သည်။

"G 7 အဖွဲ့ဝင် နိုင်ငံတွေဟာ ဂါဇာပဋိပက္ခကို လျင်မြန်စွာ အဆုံးသတ်နိုင်ဖို့ အစ္စရေးအစိုးရနဲ့ ပူးပေါင်းဆောင်ရွက် နေပါတယ်" ဟု G 7 ၏ အလှည့်ကျဥက္ကဋ္ဌ နေရာကို ရယူထားသည့် အီတလီ နိုင်ငံခြားရေးဝန်ကြီး အန်တိုနီယို တာဂျာနီ (Antonio Tajani) က ပြောကြားခဲ့သည်။

လက်ရှိအချိန်တွင် ဂါဇာ၌ တိုက်ပွဲများ ပြင်းထန်စွာ ဆက်လက် ဖြစ်ပွားနေပြီး အစ္စရေးကာကွယ်ရေးဝန်ကြီး ယိုအက်ဗ် ဂဲလန့် (Yoav Gallant) ကမူ ဂါဇာဒေသတွင် ဟားမာ့စ်အဖွဲ့ကို အမြစ်ဖြတ်ချေမှုန်းရန် ဆုံးဖြတ် ထားကြောင်း ပြောကြားခဲ့သည်။

Source: ရိုက်တာ

CNI International News

ကင်ဘာရာ၊ ဇန်နဝါရီ ၉

သြစတြေးလျနိုင်ငံတွင် နာဇီတို့၏ အလေးပြုသည့်ပုံစံနှင့် အမုန်းတရားကို ဖြစ်ပွားစေနိုင်သည့်် သင်္ကေတများကို ရာဇဝတ်မှုအဖြစ် သတ်မှတ်ခဲ့သည့် တရားဥပဒေသည် စတင် အကျုံးဝင် သက်ရောက်လာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

သြစတြေးလျတွင် ထိုဥပဒေကို ပြီးခဲ့သည့်နှစ် နွေရာသီက ထုတ်ပြန်ခဲ့ပြီး ယခုအခါမှ အကျုံးဝင် သက်ရောက်ခဲ့ခြင်း ဖြစ်သည်။ 

နာဇီပုံစံ အလေးပြုမှု၊ အကြမ်းဖက်အဖွဲ့များနှင့် ဆက်နွှယ်သည့် သင်္ကေတများကို ပြသခြင်း သို့မဟုတ် ရောင်းချ ခြင်းတို့ကို တားမြစ်ထားသော ထိုဥပဒေသည် ဇန်နဝါရီ ၈ ရက်တွင် စတင်အကျုံးဝင် သက်ရောက်ခဲ့သည်။

မကြာသေးမီ လများအတွင်းက အစ္စရေး-ဂါဇာ စစ်ပွဲဖြစ်ပွားခဲ့ချိန်တွင် သြစတြေးလျနိုင်ငံ၌ ဂျူးဆန့်ကျင်သည့် ဖြစ်စဉ်များ မြင့်တက်နေမှုကို သြစတြေးလျအစိုးရက တုန့်ပြန်ဖြေရှင်းသည့်အနေဖြင့် ထိုဥပဒေသစ်ကို ပြဋ္ဌာန်းခဲ့ ခြင်းဖြစ်သည်။

ထိုဥပဒေအရ နာဇီပါတီ၏ စကြာတံဆိပ်၊ နာဇီပါတီ၏ စစ်တပ်ဖြစ်သည့် SS ၏ သင်္ကေတာဖြစ်သော မိုးကြိုးသွား ပုံစံ သင်္ကေတများ အပါအဝင် နာဇီနှင့် ဆက်နွှယ်သည့် အဆင်တန်ဆာများကို ရောင်းချခြင်း သို့မဟုတ် ပြသခြင်း တို့ကို ရာဇဝတ်မှုအဖြစ် သတ်မှတ်ထားသည်။

သြစတြေးလျ အစိုးရရှေ့နေချုပ် မာ့ခ်ဒရေးဖုစ်ကို တွေ့ရစဉ်

"ပြည်သူ့မြင်ကွင်းမှာ နာဇီပုံစံ အလေးပြုတာ၊ ဒါမှမဟုတ် နာဇီပုံစံ အလေးပြုတာကို လူသိထင်ရှားပြသတာ၊ ဒါမှမဟုတ် နာဇီနဲ့ ဆက်နွှယ်တဲ့ သင်္ကေတတွေကို ရောင်းဝယ်တာတွေဟာ အခုအခါမှာတော့ တရားမဝင်တော့ ပါဘူး"ဟု သြစတြေးလျ အစိုးရရှေ့နေချုပ် မာ့ခ် ဒရေးဖုစ် (Mark Dreyfus) က ပြောကြားခဲ့သည်။

ထို့ပြင် ဥပဒေသစ်အရ အကြမ်းဖက်မှုနှင့် ဆက်နွှယ်သည့် လုပ်ရပ်များကို အမွမ်းတင် ဖော်ပြမှုများကိုလည်း ရာဇဝတ်မှုများအဖြစ် သတ်မှတ်ကြောင်း မာ့ခ်က ပြောကြားခဲ့သည်။

ထိုဥပဒေမူကြမ်းကို ဒီဇင်ဘာ ၆ ရက်က သြစတြေးလျလွှတ်တော်တွင် ကန့်ကွက်မဲမရှိဘဲ တစ်ညီတစ်ညွတ်တည်း မဲခွဲဆုံးဖြတ်ပြီး အတည်ပြုခဲ့ခြင်းဖြစ်သည်။

သြစတြေးလျတွင် လူမျိုးသုဉ်း သတ်ဖြတ်မှုနှင့် အကြမ်းဖက် လုပ်ရပ်များကို အမွမ်းတင်ခွင့်ပြုမည် မဟုတ်ကြောင်း ထိုဥပဒေက ပြသရာ ရောက်သည်ဟု ၎င်းက ပြောကြားခဲ့သည်။

ပြီးခဲ့သည့််နှစ် မတ်လက သြစတြေးလျ၏ မဲလ်ဘုန်းမြို့တွင် ခေတ်သစ် နာဇီဝါဒီအဖွဲ့သည် လိင်တူ စုံမက်သူများ အခွင့်အရေးအတွက် တောင်းဆိုသူများနှင့် ခိုက်ရန်ဖြစ်ပွားခဲ့သည်။

ထိုခေတ်သစ် နာဇီအဖွဲ့ဝင်များသည် သြစတြေးလျပါလီမန် အဆောက်အအုံအနီးတွင် နာဇီပုံစံ အလေးပြုခဲ့ ကြသည်။

Source: အယ်လ်ဂျာဇီးယား

CNI International News

ဂျာကာတာ၊ ဇန်နဝါရီ ၉

အင်ဒိုနီးရှားနိုင်ငံတွင် ဇန်နဝါရီ ၇ ရက်က ကျင်းပခဲ့သည့် ရွေးကောက်ပွဲအကြို စကားစစ်ထိုးပွဲ၌ သမ္မတ ရွေးကောက်ပွဲဝင် ကိုယ်စားလှယ်လောင်း ပရာဘိုဝို ဆူဘီယန်တို (Prabowo Subianto)သည် ၎င်း၏ ကာကွယ် ရေး အစီအစဉ်များကြောင့် ပြိုင်ဘက်ကိုယ်စားလှယ်လောင်းများ၏ ဝေဖန်ထိုးနှက်ခြင်းကို ခံခဲ့ရသည်ဟု ဘန်ကောက်ပို့စ်မှ ဖော်ပြခဲ့သည်။

အင်ဒိုနီးရှားအထူးတပ်ဖွဲ့၏ တပ်မှူးဟောင်းဖြစ်သည့် လက်ရှိ ကာကွယ်ရေးဝန်ကြီးဖြစ်သူ ပရာဘိုဝိုသည် သမ္မတ ရွေးကောက်ပွဲတွင် အနိုင်ရရန် ရေပန်းစားနေသော်လည်း ၎င်း၏ ပြိုင်ဘက် ကိုယ်စားလှယ်လောင်းနှစ်ဦးကမူ ပရာဘိုဝို၏ စစ်ရေးမဟာဗျူဟာများကို အဆင်အခြင်မရှိဘဲ ဖြုန်းတီးမှု သက်သက်သာဖြစ်ကြောင်း ဝေဖန်ခဲ့ကြ သည်။

ဖေဖော်ဝါရီ ၁၄ ရက်တွင် ပြုလုပ်မည့် ရွေးကောက်ပွဲမတိုင်မီ လူထုသဘောဆန္ဒ စစ်တမ်းကောက်ယူမှုများ၌ ပရာဘိုဝိုသည် ပြိုင်ဘက်ကိုယ်စားလှယ်လောင်းများထက် အသာစီးရနေသော်လည်း စစ်တပ်ကို အဆင်မြှင့်တင် မွမ်းမံသည့် ၎င်း၏ လုပ်ဆောင်မှုကို ပြိုင်ဘက်များက ဝေဖန်ခဲ့ကြခြင်းဖြစ်သည်။ 

ဂျာကာတာမြို့တော်ဝင်ဟောင်းဖြစ်သည့် အန်နီးစ်ဘက်စ်ဝီဒန်ကို တွေ့ရစဉ်

ဂျာကာတာမြို့တော်ဝင်ဟောင်းဖြစ်သည့် အန်နီးစ် ဘက်စ်ဝီဒန် (Anies Baswedan) ကမူ ကာတာနိုင်ငံမှ Mirage 200-5 တိုက်လေယာဉ်အုပ်စု အပါအဝင် စစ်လက်နက်ပစ္စည်းများ ဝယ်ယူရန် အစီအစဉ်များကို ရှုတ်ချခဲ့ပြီး ၎င်း၏ ကာကွယ်ရေးဝန်ကြီးဌာနသည် ပြီးခဲ့သည့်နှစ်က ဟက်ကာများ၏ ဆိုက်ဘာတိုက်ခိုက်မှုကို ကာကွယ်နိုင်ခဲ့ခြင်း မရှိကြောင်း ပြောကြားခဲ့သည်။

"ကာကွယ်ရေးဝန်ကြီးဌာနက ဆိုက်ဘာတိုက်ခိုက်ခံရပါတယ်။ ရူပီး ၇၀၀ ထရီလျံ (ဒေါ်လာ ၄၅ ဒသမ ၁၃ ဘီလျံ) အသုံးစရိတ်ရထားတဲ့ ကာကွယ်ရေးဝန်ကြီးဌာနက အဲဒီဆိုက်ဘာ တိုက်ခိုက်မှုကို မကာကွယ်ခဲ့နိုင်ပါဘူး။ အဲဒီ ဆိုက်ဘာတိုက်ခိုက်မှုကို ကာကွယ်ရမယ့်အစား တစ်ပတ်ရစ် စစ်လက်နက်ပစ္စည်းတွေကို ဝယ်ယူခဲ့ပါတယ်" ဟု ဘက်စ်ဝီဒန်က ပြောကြားခဲ့သည်။

လက်ရှိ အင်ဒိုနီးရှား၏ အာဏာရပါတီဖြစ်သည့် PDI-P ၏ သမ္မတရွေးကောက်ပွဲဝင် ကိုယ်စားလှယ်လောင်း ဂန်ဂျာ ပရာနိုဝိုကလည်း ဘတ်ဂျက်ပြဿနာကြောင့် နှောင့်နှေးကြန့်ကြာခဲ့သည့် ကာတာမှ တိုက်လေယာဉ်များ ဝယ်ယူ ရေး သဘောတူညီချက်သည် ဆင်ခြင်မှုကင်းမဲ့သည့် အစီအစဉ်ဖြစ်သည်ဟု ပြောကြားခဲ့သည်။

အရှေ့တောင်အာရှ၏ စီးပွားရေး အင်အားအကြီးဆုံး အင်ဒိုနီးရှားနိုင်ငံသည် ပြီးခဲ့သည့် ၁၀ စုနှစ်အတွင်း ဒေသ တွင်း ကာကွယ်ရေး အသုံးစရိတ်သုံးစွဲမှုသည် ဂျီဒီပီ အချိုးနှင့်နှိုင်းယှဉ်ပါက အခြားနိုင်ငံများထက် နောက်ကောက် ကျ ကျန်ခဲ့သည်။

ပရာဘိုဝိုကမူ စစ်တပ်ကို အဆင့်မြှင့်တင်ရန် မရှိမဖြစ် စစ်လက်နက်ပစ္စည်းများ ဝယ်ယူသည့် မဟာဗျူဟာသည် သင့်တင့်မျှတမှုရှိကြောင်းနှင့် ၂၅ နှစ်မှ နှစ်ပေါင်း ၃၀ အတွင်း အသုံးပြုနိုင်သည့်် ၁၅ နှစ်ကြာ အသုံးပြုပြီးသော တိုက်လေယာဉ်များကို ဝယ်ယူမှုသည် သင့်တော်မှုရှိသည်ဟု ပြောကြားခဲ့သည်။

Source: ဘန်ကောက်ပို့စ်

CNI International News

ဘေရွတ်၊ ဇန်နဝါရီ ၈

မကြာသေးမီ သီတင်းပတ်များအတွင်း အစ္စရေးနှင့် လက်ဘနွန်အခြေစိုက် ဟစ်ဇ်ဘိုလာ (Hezbollah) လက်နက် ကိုင်အဖွဲ့အကြား အပြင်းထန်ဆုံး နယ်စပ်ဖြတ်ကျော် တိုက်ခိုက်မှုများ ဖြစ်ပွားခဲ့သည်ဟု အေပီမှ ဖော်ပြခဲ့သည်။

လက်ဘနွန်နိုင်ငံ၏ ဘေရွတ်မြို့တော်တွင် အစ္စရေး၏ လက်ချက်ဟု ယူဆရသည့် တိုက်ခိုက်မှုတစ်ခုကြောင့် ဟားမာ့စ်အဖွဲ့ ထိပ်သီးခေါင်းဆောင်တစ်ဦး သေဆုံးခဲ့ပြီး တစ်ရက်အကြာတွင် အစ္စရေးနှင့် ဟစ်ဇ်ဘိုလာအဖွဲ့ အကြား အပြန်အလှန်တိုက်ခိုက်မှုများ ဖြစ်ပွားခဲ့ခြင်း ဖြစ်သည်။ 

ဟစ်ဇ်ဘိုလာခေါင်းဆောင် ဆေးယက် ဟက်ဆန် နာစရာလာ (Sayyed Hassan Nasrallah) ကမူ ၎င်းတို့အဖွဲ့ အနေနှင့် ဟားမာ့စ်အဖွဲ့၏ ဒုတိယနိုင်ငံရေးခေါင်းဆောင် ဆာလာ အာရူရီ (Saleh Arouri) သတ်ဖြတ်ခံရမှုကို လက်တုန့်ပြန်ခြင်းမရှိပါက လက်ဘနွန်တစ်နိုင်ငံလုံးသည် အစ္စရေး၏ တိုက်ခိုက်မှုများကို ခံရလိမ့်မည်ဟု ပြောကြားခဲ့သည်။

ထို့ကဲ့သို့ တင်းမာမှုများ မြင့်တက်နေချိန်တွင် အမေရိကန် နိုင်ငံခြားရေးဝန်ကြီး အန်တိုနီ ဘလင်ကင်သည် အရှေ့အလယ်ပိုင်းခရီးစဉ်ကို စတင်ခဲ့ပြီး ထိုခရီးစဉ်သည် အစ္စရေး-ဟားမာ့စ် စစ်ပွဲဖြစ်ပွားပြီးနောက်ပိုင်း ၎င်း၏ စတုတ္ထမြောက် အရှေ့အလယ်ပိုင်းခရီးစဉ်ဖြစ်သည်။ 

"လက်ဘနွန်ကို ဒေသတွင်း ပဋိပက္ခထဲ ဆွဲသွင်းဖို့ လုံးဝမလိုအပ်ပါဘူး" ဟု ဥရောပသမဂ္ဂ၏ နိုင်ငံခြားရေးမူဝါဒ ဂျိုးဆက် ဘော်ရဲလ် (Josep Borrell) က ပြောကြားခဲ့သည်။

ဟစ်ဇ်ဘိုလာက ၎င်းတို့သည် မီရွန်တောင် (Mount Meron) ပေါ်ရှိ အစ္စရေးလေတပ် စောင့်ကြည့်ရေး အခြေစိုက် စခန်းသို့ ဒုံးကျည် ၆၂ စင်း ပစ်လွှတ်ခဲ့သည်။

ထိုဒုံးကျည် တိုက်ခိုက်မှုသည် အာရူရီ သတ်ဖြတ်ခံရမှုအတွက် တိုက်ရိုက်တုန့်ပြန်ခြင်း ဖြစ်သည်ဟုဆိုသည်။ 

နေအိမ်အဆောက်အအုံများ တိုက်ခိုက်ခံရစဉ်

ဒုံးကျည်များသည် နယ်စပ်အနီးရှိ စစ်စခန်းနှစ်ခုကို ထိမှန်ခဲ့သည်ဟုလည်း ဆိုသည်။ 

စစ်တပ်ပြောရေးဆိုခွင့်ရှိသူ ဒန်နီယယ်ဟာဂါရီ (Daniel Hagari) က အစ္စရေးတွင် ဒုံးကျည်များကြောင့် သေဆုံးမှု ဖြစ်စဉ်မရှိကြောင်း ပြောကြားခဲ့သည်။

အစ္စရေးစစ်တပ်သည် ဒုံးကျည်များဖြင့် ပစ်ခတ်နေသော ဟစ်ဇ်ဘိုလာ ဒုံးတိုက်ခိုက်ရေးစခန်းကို ပြန်လည် ပစ်ခတ်ခဲ့ခဲ့သည်ဟု ဟာဂါရီက ပြောသည်။

ဇန်နဝါရီ ၆ ရက်က အစ္စရေး၏ တိုက်ခိုက်မှုကြောင့် ၎င်းတို့၏ တိုက်ခိုက်ရေးသမား ခြောက်ဦး သေဆုံးခဲ့သည်ဟု ထုတ်ပြန်ထားပြီး အစ္စရေး၏ တိုက်ခိုက်မှုကြောင့် စုစုပေါင်း ဟစ်ဇ်ဘိုလာ တိုက်ခိုက်ရေးသမား ၁၅၀ ခန့် သေဆုံးခဲ့ ပြီးဖြစ်သည်။                                                                                                                                                                                                                                                                
                                                      
လက်ဘနွန်နိုင်ငံတောင်ပိုင်းတွင် အစ္စရေး၏ လေကြောင်းတိုက်ခိုက်မှုများကြောင့် နယ်စပ်မှ ၂၅ မိုင်အကွာရှိ ခိုသာရီရာအယ်ဆီရတ်(Kouthariyeh al-Siyad) ကျေးရွာ၏ အပြင်ဘက်ကို ထိမှန်ခဲ့ကာ အသေအပျောက်များ ရှိကြောင်း လက်ဘနွန်နိုင်ငံပိုင် သတင်းတွင် ဖော်ပြထားသည်။

Source: အေပီ