CNI International News

ပဲရစ်၊ ဇူလိုင် ၃

မြေးဖြစ်သူ အသတ်ခံရမှုကြောင့် ပေါ်ပေါက်လာသော တစ်နိုင်ငံလုံးရှိ အကြမ်းဖက်မှုများကို အဆုံးသတ်စေလို သည်ဟု ပစ်သတ်ခံရသည့် ဆယ်ကျော်သက် လူငယ်၏အဖွားဖြစ်သူက ဇူလိုင် ၂ ရက်နေ့တွင် ပြောခဲ့ကြောင်း Reuters မှဖော်ပြခဲ့သည်။ 

ပဲရစ်မြို့ ဆင်ခြေဖုံးအရပ်တစ်ခုရှိ မီးပွိုင့်တွင် ရဲတပ်ဖွဲ့က ဆယ်ကျော်သက် လူငယ်ကို ပစ်သတ်ခဲ့ခြင်းဖြစ်ပြီး ထိုဖြစ်ရပ်ကြောင့် ပြင်သစ်တွင် ဆူပူအုံကြွမှုများ ပေါ်ပေါက်လျက် ရှိသည်။ 

ကားများကို မီးရှို့ခြင်း၊ စတိုးဆိုင်များကို ဖောက်ခြင်း၊ မြို့တော်ခန်းမများနှင့် ရဲစခန်းများကို ပစ်မှတ်ထား တိုက်ခိုက် ခြင်းတို့ လုပ်ဆောင်နေသည့် ဆူပူအုံကြွသူများကို တားဆီးရန် ဇူလိုင် ၂ ရက်နေ့ညတွင် ရဲတပ်ဖွဲ့ဝင် အင်အား ၄၅၀၀၀ ခန့်ကို ဖြန့်ကျက်ထားသည်ဟု ပြည်ထဲရေးဝန်ကြီး ဂျာရဲလ် ဒါမာနီ (Gerald Darmnin)က ပြောသည်။

ပဲရစ်မြို့ ဆင်ခြေဖုံးအရပ်တစ်ခု၏ မြို့တော်ဝန် နေအိမ်တစ်ခုလည်း တိုက်ခိုက်ခြင်း ခံခဲ့ရသည်။ 

နိုင်ငံတွင်းရှိ ပဋိပက္ခများကို ဖြေရှင်းရန်အတွက် ပြင်သစ်သမ္မတ အီမန်နျူရယ် မက်ခရွန်(Emmanuel Macron) က သူ၏ ဂျာမနီခရီးစဉ်ကို ရွှေ့ဆိုင်းခဲ့သည်။ 

မက်ခရွန်သည် ဇူလိုင် ၃ ရက်နေ့တွင် လွှတ်တော်ခေါင်းဆောင်များနှင့် တွေ့ဆုံရန် စီစဉ်ထားသလို ဇူလိုင် ၄ ရက် နေ့တွင် အကြမ်းဖက်မှုများ ဖြစ်ပွားနေသည့် မြို့များမှ မြို့တော်ဝန်များနှင့် တွေ့ဆုံသွားမည် ဖြစ်သည်။ 

သတ်ခံရတဲ့ နာဟဲလ်ရဲ့အဖွား Nadia ကို တွေ့ရစဉ်

ပစ်သတ်ခံခဲ့ရသော နာဟဲလ် (Nahel) ၏ ဈာပနကို ဇူလိုင် ၁ ရက်နေ့တွင် ပဲရစ်မြို့၏ နန်တာရီအရပ်တွင် ကျင်းပ ခဲ့ပြီး ထိုနေ့ညမှာပဲ ဖမ်းဆီးမှု ၇၁၉ ခု ပြုလုပ်ခဲ့ရသည်ဟု ပြည်ထဲရေးဝန်ကြီးဌာနက ပြောသည်။ 

ဖမ်းဆီးမှုများ လျော့ကျလာသည့်တိုင် ပဋိပက္ခသည် ပြီးဆုံးသွားပြီဟု ပြောရန်စောသေးကြောင်း ပြင်သစ် အရာရှိ များက ပြောသည်။

ထိခိုက်ဆုံးရှုံးမှုများ သိသိသာသာ လျော့ကျလာသည့်တိုင် လာမည့်ရက်များအတွက် အဆင်သင့် ပြင်ထားကြောင်း၊ မည်သည့်ဘက်ကမှ အနိုင်ရရှိသည်ဟု သတ်မှတ်၍ မရနိုင်သေးကြောင်း ပဲရစ်ရဲတပ်ဖွဲ့အကြီးအကဲက ပြောသည်။ 

အသတ်ခံရသူ နာဟဲလ်၏အဖွားဖြစ်သူကို နာဒီယာ (Nadia) ဟု ပြင်သစ်မီဒီယာများတွင် ဖော်ပြထားသူက  ဆူပူ အုံကြွသူများသည် မြေးဖြစ်သူ၏ သေဆုံးမှုကိုအသုံးချကာ နိုင်ငံတွင်း အကြမ်းဖက်မှုများကို လုပ်ဆောင်နေ ကြောင်း၊ မိသားစုဝင်များအနေဖြင့် တည်ငြိမ်မှုကိုသာ လိုလားကြောင်း ပြောသည်။ 

နာဟဲလ်သတ်ခံရမှုအတွက် တောင်းဆိုနေစဉ်

ထိုလုပ်ရပ်များကို ရပ်တန့်ရန် တောင်းဆိုသည်ဟုလည်း နာဒီယာက BFM TV သို့ ပြောခဲ့သည်။ 

နာဟဲလ်သည် သေဆုံးသွားခဲ့ပြီ ဖြစ်ကြောင်း၊ သမီးဖြစ်သူသည် ဆုံးရှုံးမှုနှင့် ရင်ဆိုင်ခဲ့ရပြီဖြစ်ကြောင်း၊ မည်သူမှ အသက် ပြန်ရှင်လာမည် မဟုတ်ကြောင်းလည်း သူမက ပြောခဲ့သည်။ 

ပစ်ခတ်မှုကြောင့် လူသတ်မှုဖြင့် တရားစွဲခံထားရသည့် ရဲတပ်ဖွဲ့ဝင်အတွက် ရံပုံငွေ ယူရို ၆၇၀,၀၀၀ ကျော် ရရှိနေမှုနှင့် ပတ်သက်၍ မေးမြန်းခဲ့ရာတွင်လည်း နှလုံးသားတစ်ခုလုံး ဆို့နင့်ကြေကွဲရသည်ဟု သူမက ပြောသည်။

Source: ရိုက်တာ

CNI International News

ဘန်ကောက်၊ ဇူလိုင် ၃

ဖြူးထိုင်းပါတီ (Phue Thai)နှင့် အစိုးရတစ်ရပ်ဖွဲ့စည်းရေး လျှို့ဝှက်သဘောတူညီချက် ရရှိထားသည်ဆိုခြင်းကို Palang Pracharath ပါတီဥက္ကဋ္ဌ လက်ရှိထိုင်းအစိုးရ ဒုတိယဝန်ကြီးချုပ် ဗိုလ်ချုပ်ကြီး ပရာဝပ် ဝေါင်ဆူဝန် (Prawit Wongsuwan)က ပြတ်ပြတ်သားသား ငြင်းဆိုခဲ့သည်။

ထို့နောက် ထိုပြောစကားများသည် ခန့်မှန်းချက်များသာ ဖြစ်သည်ဟု တုံ့ပြန်ခဲ့ကြောင်း Thai PBS သတင်းတွင် ဖော်ပြထားသည်။ 

ထိုသတင်းကို မီဒီယာများက ဖွခဲ့ခြင်းဖြစ်သည်ဟု ပရာဝပ်က ပြောသည်။

ထို့နောက် ပြီးခဲ့သည့် ရွေးကောက်ပွဲတွင် အမတ် အရေအတွက် အများဆုံး အနိုင်ရရှိခဲ့သည့် ပါတီကသာလျှင် အစိုးရဖွဲ့ရန် အခွင့်အရေး ရှိသင့်သည်ဟုလည်း ၎င်းက ပြောသည်။ 

 ဖြူးထိုင်းပါတီကိုတွေ့ရစဉ်

သို့သော် Palang Pracharath ပါတီအနေဖြင့် Move Forward ပါတီ၏ ညွန့်ပေါင်းပါတီ ရှစ်ခုတွင် မပါဝင်သော တခြားသော ပါတီများနှင့် လက်တွဲထားမှု ရှိ/မရှိ မေးမြန်းမှုကိုတော့ ပရာဝပ်က ပြန်လည် ဖြေဆိုခဲ့ခြင်း မရှိပေ။

လက်ရှိအစိုးရအဖွဲ့တွင် ဒုတိယဝန်ကြီးချုပ်အဖြစ် ဆောင်ရွက်နေသော ဗိုလ်ချုပ်ကြီး ပရာဝပ်က ၎င်းတို့ပါတီ အနေဖြင့် လွှတ်တော်ဥက္ကဋ္ဌသစ်နှင့် လက်ထောက်နှစ်ဦးကို ရွေးချယ်မည့် ဇူလိုင် ၄ ရက်နေ့ မဲပေးမှုတွင် မည်သို့ မဲပေးရမည်လဲ မဆုံးဖြတ်ရသေးဟု ပြောသည်။ 

Move Forward ပါတီနဲ့ မဟာမိတ်အဖွဲ့ကိုတွေ့ရစဉ်

၎င်းတို့အနေဖြင့် မည်သူမည်ဝါအား မဲပေးမည်ဟု မရွေးချယ်ခင် လွှတ်တော်ဥက္ကဋ္ဌရာထူးအတွက် မည်သည့် ကိုယ်စားလှယ်များ ရွေးချယ်ခံရသည်ကို ရှင်းရှင်းလင်းလင်း သိရှိဖို့ စောင့်ဆိုင်းသွားမည်ဟုလည်း ပြောသည်။ 

အမျိုးသားမဟာဗျူဟာကော်မတီ၏ဥက္ကဋ္ဌ တစ်ဦးအနေဖြင့် ဝန်ကြီးချုပ် ပရာယွတ် ချန်အိုချာ (Prayut han-o-cha) နှင့် တွေ့ဆုံခဲ့ခြင်း ရှိ/မရှိ မေးမြန်းမှုကိုလည်း ၎င်းက ပြန်လည် ဖြေကြားရန် ငြင်းဆိုခဲ့သည်။

Source: Thai PBS

CNI International News

မော်စကို၊ ဇူလိုင် ၃

နျူကလီးယား မျှဝေရေး အစီအစဉ်၏ မူဘောင်များနှင့်အညီ နိုင်ငံတွင်း နျူကလီးယား လက်နက်များ တပ်ဆင်ရန် လိုအပ်သည့် အချိန်နှင့်ပတ်သက်၍ နေတိုးအဖွဲ့ဝင်များကို ပိုလန်အာဏာပိုင်များက စည်းရုံးမှုများ လုပ်ဆောင်သွား မည်ဟု ပိုလန်ဝန်ကြီးချုပ် မားတက်ဇ်မော်ရာဝပ်ခ်စကီ (Mateusz Morawiecki )က ပြောသည်။  

မဆုတ်မနစ် ကြိုးစားမှုသည် အောင်မြင်မှုကို ရရှိစေသည်ဟု ဝန်ကြီးချုပ်က ပြောသည်။ 

ပိုလန်သို့ နျူကလီးယား လက်နက်များ ဖြန့်ကျက်ရေးအတွက် အမေရိကန်ဘက်က ဆွေးနွေးမှုများကို အတည် မပြုရသေးကြောင်း မေးခွန်းများကို ဖြေဆိုရာတွင် ၎င်းက ထိုသို့ ပြောကြားခဲ့ခြင်း ဖြစ်သည်။

ရုရှားဘက်က ဘယ်လာရုစ်သို့ ၎င်းတို့၏ နျူကလီးယား လက်နက်များ ဖြန့်ကျက်သွားမည့် အစီအစဉ်ကို ကြေညာခဲ့သည့် အခြေအနေတွင် ပိုလန်အနေဖြင့် အမြင့်ဆုံး လုံခြုံရေး အခြေအနေကို ရယူလိုသည်ဟု မော်ရာဝပ်ခ်စကီက ပြောသည်။

ဘယ်လာရုစ်သမ္မတ လူကာရှန်ကိုနဲ့ ရုရှားသမ္မတ ပူတင်ကိုတွေ့ရစဉ်

လုံခြုံရေးကို မြှင့်တင်ရန်အတွက် မဖြစ်မနေ ကြိုးပမ်းသွားမည်ဖြစ်ကြောင်း၊ နျူကလီးယား မျှဝေရေးဟု ခေါ်သော နျူကလီးယား လက်နက် ခွဲဝေသုံးစွဲရေး အစီအစဉ်သည် ပိုလန်၏ လုံခြုံရေး လိုအပ်ချက်ကို ဖြည့်ဆည်းပေးနိုင် မည် ဖြစ်သည်ဟု ၎င်းက ပြောသည်။

ထိုကိစ္စကို မဟာမိတ်များနှင့် ဆွေးနွေးသွားမည်ဟု ပိုလန်ဝန်ကြီးချုပ် မားတက်ဇ်မော်ရာဝပ်ခ်စကီက ပြောသည်။ 

ပိုလန်နိုင်ငံသည် ရုရှားက ယူကရိန်းအား ကျူးကျော်တိုက်ခိုက်မှု စစ်ပွဲအတွင်းမှာ ယူကရိန်းဘက်က ရပ်တည်ပြီး စစ်လက်နက်များ ကူညီပေးလျက်ရှိနေသည်။ ထို့ကြောင့် အိမ်နီးချင်း ရုရှားနှင့် ဆက်ဆံရေး တင်းမာလျက်ရှိနေ သည်။

Source: တာ့စ်

CNI International News

အွာဂါဒူဂူ၊ ဇူလိုင် ၁

ဘာကီနာဖာဆို အစိုးရကို တိုက်ခိုက်နေသည့် သူပုန်များ၏ လှုပ်ရှားမှုများနှင့် ပြောဆိုချက်များသည် ယုံကြည်ရမှု မရှိဘဲ သတင်းများကိုထုတ်လွှင့်ခဲ့၍ ပြင်သစ်သတင်းဌာန တစ်ခုကို ဘာကီနာဖာဆိုက ထုတ်လွှင့်ခွင့် ရပ်ဆိုင်းလိုက် သည်။

ယင်းက ပြင်သစ်မီဒီယာများအပေါ် နှိပ်ကွပ်မှုများ၏ နောက်ဆုံး တစ်ခုလည်း ဖြစ်သည်။ 

ပြီးခဲ့သည့်နှစ် စစ်တပ်၏ အာဏာသိမ်းမှု နှစ်ကြိမ်အတွင်း လုံခြုံရေး အခြေအနေများ ဆိုးရွားလာမှုအပေါ် ဒေါသ ထွက်မှု ရှိလာခဲ့ပြီးကတည်းက ဘာကီနာဖာဆိုနှင့် ယင်း၏ကိုလိုနီဟောင်း ပြင်သစ်တို့အကြား ဆက်ဆံရေး ဆိုးရွား ခဲ့သည်။ 

ပုဂ္ဂလိကပိုင် TF1 ရုပ်သံလိုင်း တစ်ခုဖြစ်သော La Chaine Info(LCI)ကို ဧပြီလကုန်ပိုင်းတွင် ထုတ်လွှင့်ခဲ့သည့် သတင်းတစ်ပုဒ်ကြောင့် ဇွန်လ ၂၃ ရက်နေ့မှ စတင်ကာ သုံးလရပ်နားခဲ့သည်ဟု နိုင်ငံ၏ အမျိုးသား မီဒီယာ စောင့်ကြည့်ရေးအဖွဲ့မှ ဇွန်လ ၂၉ ရက်နေ့တွင် ထုတ်ပြန်သည့် ကြေညာချက်တစ်စောင်တွင် ဖော်ပြထားသည်။ 

ထိုသတင်းသည် ပုန်ကန်မှုနှင့်ပတ်သက်၍ အလွန်အမင်းချဲ့ကား ရေးသားထားကာ ပဋိပက္ခအပေါ် ဖာကီနာဖာဆို စစ်တပ်က အောင်မြင်စွာ တုံ့ပြန်ုနိုင်ခဲ့ခြင်းမရှိဟု အတည်မပြုနိုင်သည့် အခြေအနေကို ထုတ်ဖော် ရေးသားခြင်းဖြင့် အကြည်အညိုပျက်အောင် လုပ်ဆောင်ခဲ့သည်ဟု မီဒီယာစောင့်ကြည့်ရေးအဖွဲ့၏ ထုတ်ပြန်ချက်တွင် ဖော်ပြသည်။

ထိုကိစ္စနှင့်ပတ်သက်၍ TF1 ဘက်ကို ဆက်သွယ် မေးမြန်းခဲ့သော်လည်း ချက်ချင်းတုံ့ပြန် ပြောဆိုခြင်း မရှိပေ။

ဘာကီနာဖာဆိုစစ်အစိုးရသည် ဆာဟာရတောင်ပိုင်းရှိ ဆာဟယ်လ် (Sahel) ဒေသတစ်လျှောက်မှ လက်နက်ကိုင် အုပ်စုများနှင့်ပတ်သက်၍ သတင်းရေးသားမှုအတွက် ပြင်သစ်ပိုင် ရုပ်သံလိုင်းနှစ်ခုဖြစ်သော Radio France International နှင့် France 24 တို့အား ဖျက်သိမ်းခဲ့ပြီး ဖြစ်သည်။ 

ဧပြီလတွင်လည်း Le Monde နှင့် Liberation သတင်းစာ နှစ်စောင်မှ ပြင်သစ် သတင်းထောက်နှစ်ဦးကိုလည်း နိုင်ငံတွင်းမှ နှင်ထုတ်ခဲ့သေးသည်။ 

ဘာကီနာဖာဆိုသည် အယ်လ်ကေးဒါး၊ မာလီတွင် ၂၀၁၂ ခုနှစ်မှ စတင်အမြစ်တွယ်ခဲ့သည့် ISIL အဖွဲ့တို့နှင့် ဆက်စပ်နေသော လက်နက်ကိုင်အုပ်စုများ၏ အကြမ်းဖက်မှုများနှင့် ရင်ဆိုင်နေရသည့် အနောက်အာဖရိက နိုင်ငံများတစ်ခု ဖြစ်သည်။ 

အကြမ်းဖက်မှုများကြောင့် အရပ်သား ထောင်ချီသေဆုံးကာ ခြောက်သန်းခန့် ဘေးလွတ်ရာ ထွက်ပေးနေရသည်။ 

ပြီးခဲ့သည့်နှစ်တွင် အိမ်နီးချင်း မာလီမှ ပြင်သစ်တပ်ဖွဲ့များ ထွက်ခွာသွားခဲ့သည်။

မာလီနှင့် ဖာကီနာဖာဆို နှစ်နိုင်ငံစလုံးကို ပြီးခဲ့သည့် နှစ်နှစ်အတွင်း အတင်းအကြပ် အာဏာရယူခဲ့သည့် စစ်အစိုးရ များက အုပ်ချုပ်လျက်ရှိသည်။ 

ထိုအစိုးရများသည် လုံခြုံရေးကို မြှင့်တင်ပေးရန်၊ အစဉ်အလာ မဟာမိတ်များနှင့် ဆက်ဆံရေးကို ဖြတ်တောက်ရန် ကတိကဝတ် ပေးထားသည်။ 

ပြီးခဲ့သည့်နှစ် စက်တင်ဘာလက စစ်တပ်အာဏာသိမ်းမှု ဖြစ်ပွားပြီးနောက် နိုင်ငံတွင်းရှိ ပြင်သစ်သံတမန်များနှင့် တပ်ဖွဲ့များ ထွက်ခွာရန် ဆန္ဒပြတောင်းဆိုမှုတချို့လည်း ပေါ်ပေါက်ခဲ့သေးသည်။ 

ဆန္ဒပြသူများသည် မြို့တော်ရှိ ပြင်သစ်ယဉ်ကျေးမှုစင်တာကိုလည်း တိုက်ခိုက်မှု လုပ်ဆောင်ခဲ့ကြသည်။

Source: အယ်ဂျာဇီးလ်ယား

CNI International News

တိုင်ပေ၊ ဇူလိုင် ၁

တရုတ်လေယာဉ် ၁၁ စင်းသည် ထိုင်ဝမ်ရေလက်ကြားရှိ နှစ်နိုင်ငံကြား တရားမဝင် အကန့်အသတ်ဖြစ်သော အလယ်လိုင်းကို ဇွန်လ ၃၀ ရက်နေ့ နံနက်ပိုင်းတွင် ဖြတ်ကျော်ခဲ့သည်ဟု ထိုင်ဝမ်ကာကွယ်ရေးဌာနက ပြော ကြောင်း ရိုက်တာသတင်းတွင် ဖော်ပြထားသည်။ 

ထိုအခြေအနေက ထိုင်ဝမ်ကျွန်းဆွယ်အပေါ် တရုတ်၏ စစ်ရေးအရ ဖိအားပေးမှု များပြားလာခြင်း ဖြစ်သည်။ 

တရုတ်ဘက်က ထိုင်ဝမ်၏ ကန့်ကွက်မှုများ ရှိနေသည့် ထိုင်ဝမ်ကျွန်းကို ၎င်းတို့အပိုင်ဟု သတ်မှတ်ထားသည်။

ပြီးခဲ့သည့် နှစ်များအတွင်း တရုတ်၏ လေယာဉ်များ နေ့စဉ်တိုင်းလိုလိုပင် ၎င်းတို့ပိုင်နက်ထဲသို့ ရောက်ရှိလာသည် ဟု ထိုင်ဝမ်ဘက်က ပြောထားသည်။ 

အထူးသဖြင့် အနောက်တောင်ပိုင်းရှိ လေကြောင်းကာကွယ်ရေးဆိုင်ရာ ခွဲခြားသတ်မှတ်ရေးဇုန်သို့ ဖြစ်သည်။

တရုတ်နဲ့ ထိုင်ဝမ်ကျွန်း မြေပုံကိုတွေ့ရစဉ်

ဂျက်တိုက်လေယာဉ်များ၊ ဗုံးကြဲလေယာဉ်များ အပါအဝင် တရုတ်စစ်လေယာဉ် စုစုပေါင်း ၂၄ စင်းကို ဇွန်လ ၃၀ ရက်နေ့ နံနက် ၈ နာရီတွင် ထိုင်ဝမ်အနီး၌ တွေ့ခဲ့ရသည်ဟု ကာကွယ်ရေးဌာနက ပြောသည်။

တရုတ်စစ်သင်္ဘော ငါးစင်းသည်လည်း စစ်ရေးအဆင်သင့် ဖြစ်မှုဆိုင်ရာ ပူးတွဲကင်းလှည့်မှုတွင် ပါဝင်ခဲ့သည်ဟု ဆို သည်။ 

တရုတ်၏ လှုပ်ရှားမှုများကို သတိပေးရန်အတွက် ထိုင်ဝမ်ဘက်က စစ်ရေယာဉ်နှင့် လေယာဉ်များကို စေလွှတ်ခဲ့ ကာ ဒုံးကျည်စနစ်များဖြင့် စောင့်ကြည့်ခဲ့သည်ဟု ကာကွယ်ရေးဌာနက ပြောသည်။

ဇွန်လ ၃၀ ရက်နေ့ တရုတ်ဘက်မှ လုပ်ရပ်များသည် အမေရိကန်လွှတ်တော် လက်နက်ဝန်ဆောင်မှုဆိုင်ရာ ကော်မတီဥက္ကဋ္ဌ မိုက်ရိုဂျားစ် (Mike Rogers) ဦးဆောင်သည့် အမေရိကန်လွှတ်တော် ကိုယ်စားလှယ်အဖွဲ့၏ တိုင်ပေ(Taipei) သို့ ခရီးစဉ်အပေါ် တုံ့ပြန်မှု ဖြစ်နိုင်သည်ဟု ထိုင်ဝမ်လုံခြုံရေးဌာန၏ ထိပ်တန်းအရာရှိတစ်ဦးက ပြောသည်။ 

ထိုင်ဝမ်သမ္မတ ဆိုင်အင်ဝမ်နဲ့ အမေရိကန်လွှတ်တော် လက်နက်ဝန်ဆောင်မှုဆိုင်ရာ ကော်မတီဥက္ကဋ္ဌ မိုက်ရိုဂျားစ်ကိုတွေ့ရစဉ်

တရုတ်အစိုးရသည် ထိုင်ဝမ်အား ထိန်းချုပ်ရေးအတွက် လိုအပ်လျှ င်အင်အားကို အသုံးပြုမည်ဟု အတိအလင်း ထုတ်ဖော်ပြောဆိုထားကာ ထိုင်ဝမ်သမ္မတ ဆိုင်အင်ဝမ် (Tsai Ing-wen) နှင့် အမေရိကန်လွှတ်တော်ဥက္ကဋ္ဌတို့ တွေ့ဆုံခဲ့မှုအပေါ် ဒေါသထွက်ကြောင်း ပြသမှုအနေဖြင့် ဧပြီလတွင် ထိုင်ဝမ်ကျွန်းအနီး၌ စစ်ရေးလေ့ကျင့်မှုများ လုပ်ဆောင်ခဲ့သည်။ 

ထိုင်ဝမ်အစိုးရသည် တရုတ်၏ နယ်မြေပိုင်ဆိုင်ကြောင်း ပြောဆိုမှုများကို ပြင်းပြင်းထန်ထန် ကန့်ကွက်ကာ တရုတ်ဘက်ကသာ တိုက်ခိုက်လာလျှင် ကိုယ့်ကိုယ်ကို ကာကွယ်မှု လုပ်ဆောင်သွားမည်ဟုလည်း ကျုံးဝါးထား သည်။ 

ထိုင်ဝမ်အား ဒေါ်လာသန်း ၄၄၀ တန်ဖိုးရှိ သီးခြား သဘောတူညီချက်နှစ်ခုဖြင့် လက်နက်ခဲယမ်းများနှင့် သယ်ယူပို့ ဆောင်ရေး အကူအညီများ ရောင်းချရန် အမေရိကန်နိုင်ငံခြားရေးဌာနက ဇွန်လ ၂၉ ရက်နေ့တွင် အတည်ပြုခဲ့ သည်။

Source: ရိုက်တာ

CNI International News 

ဘန်ကောက်၊ ဇူလိုင် ၁

ဖြူးထိုင်း(Pheu Thai) ပါတီသည် လွှတ်တော်ဥက္ကဋ္ဌရာထူးကို Move Forward ပါတီအတွက် လက်လွှတ်ပေးခဲ့ သည်ဟု သတင်းထွက်ပေါ်လာကြောင်း Thai PBS သတင်းတွင် ဖော်ပြထားသည်။ 

ဖြူးထိုင်းပါတီအနေဖြင့် Move Forward ပါတီဥက္ကဋ္ဌ ပီတာလင်ဂျာရိုရန်ရတ် (Pita Limjaroenrat) ဝန်ကြီးချုပ် ဖြစ်ရေး လွှတ်တော်ထံမှ လုံလောက်သည့် ထောက်ခံမှု မရရှိသည့် အခြေအနေ၌ပင် ညွန့်ပေါင်းအဖွဲ့အတွင်း၌ ဆက်ရှိနေမည် ဖြစ်သည်ဟုလည်း ထိုသတင်းတွင် ဖော်ပြထားသည်။ 

ညွန့်ပေါင်းမဟာမိတ် ပါတီများကိုတွေ့ရစဉ်

ပီတာအနေဖြင့် ဝန်ကြီးချုပ်ဖြစ်ရေး အဆင်မပြေခဲ့လျှင် ဖြူးထိုင်းပါတီက အစိုးရအဖွဲ့ကို ဦးဆောင်မည် ဖြစ် ကြောင်း၊ ထိုအချိန်တွင် Move Forward သည် အစိုးရဖွဲ့ရန်အတွက် ညွန့်ပေါင်းအဖွဲ့အတွင်း၌ ဆက်ရှိနေမည်ဟု ကတိကဝတ်ပေးထားကြောင်း သတင်းအရင်းအမြစ်များက Thai PBS သို့ ပြောသည်။ 

လွှတ်တော်ဥက္ကဋ္ဌ ရာထူးအတွက် ပါတီနှစ်ခုတို့ကို ထောက်ခံသူတို့အကြား ရက်အတန်ကြာ အပြင်းအထန် အငြင်း အခုန် ဖြစ်ပွားနေချိန်တွင် အပြန်အလှန် ထောက်ခံသူများအနေဖြင့် ထိုကိစ္စအပေါ် လူသိရှင်ကြား ထပ်မံအငြင်း မပွားသင့်ကြောင်း၊ ထိုသို့ အငြင်းပွားနေခြင်းက ဇူလိုင် ၂ ရက်တွင် ကျင်းပရန် စီစဉ်ထားသည့် ညွန့်ပေါင်းမဟာမိတ် ၈ ဖွဲ့အကြား ဆွေးနွေးပွဲများအပေါ် အကျိုးသက်ရောက်မှု ရှိစေနိုင်သည်ဟု ပါတီများက သဘောတူခဲ့ကြောင်း သိရ သည်။ 

Move Forward ပါတီဥက္ကဋ္ဌ ပီတာလင်ဂျာရိုရန်ရတ်ကို တွေ့ရစဉ်

ဖြူးထိုင်းပါတီသည် လွှတ်တော်ဥက္ကဋ္ဌရာထူး အပါအဝင် ညွန့်ပေါင်းအစိုးရအဖွဲ့တွင် နေရာ ၁၄ နေရာ ရယူလို ကြောင်း သဘောထား ဆန္ဒရှိနေကြောင်း၊ ထို့ကြောင့် ဖြူးထိုင်းပါတီက ၁၄+၁ သဘောတရားကို Move Forward ပါတီကို ချပြ၍ ဆွေးနွေးလျက် ရှိကြောင်း သိရသည်။

Source: Thai PBS

CNI International News

နန်တာရီ၊ ဇူလိုင် ၁

ဆယ်ကျော်သက် လူငယ်တစ်ဦးကို ရဲတပ်ဖွဲ့က ပစ်သတ်လိုက်ခြင်းကြောင့် ပေါ်ပေါက်လာသော ဆူပူအကြမ်းဖက် မှုများကို နှိမ်နင်းမည်ဖြစ်၍ လူငယ်များအား လမ်းပေါ်မထွက်စေရန် မိဘများက တားဆီးပေးရန် ပြင်သစ်သမ္မတ မက်ခရွန်(Emmanuel Macron)က တောင်းဆိုခဲ့သည်။ 

မတည်ငြိမ်မှုများအတွက် လူမှုကွန်ယက်ကို သမ္မတ မက်ခရွန်က အပြစ်တင်ခဲ့သလို ဖိအားများလည်း ပိုတိုးလာ စေခဲ့သည်။ 

ဆယ်ကျော်သက်တစ်ဦးကို ရဲတပ်ဖွဲ့၏ ဆိုးဆိုးရွားရွား ပစ်ခတ်မှုကြောင့် ပေါ်ပေါက်လာခဲ့သော ပြင်သစ်နိုင်ငံတွင်း မှ အကြမ်းဖက်မှုများ၏ စတုတ္တနေ့ဖြစ်သည့် ဇွန်လ ၃၀ ရက်နေ့တွင် လူငယ်များနှင့် ရဲတပ်ဖွဲ့ကြား ပဋိပက္ခဖြစ်ပွား ကာ စတိုးဆိုင်များကို ဖောက်ယူမှုတွေ ရှိခဲ့သည်ဟု AP မှ ဖော်ပြခဲ့သည်။ 

နိုင်ငံအရှေ့ပိုင်း စထရက်ဘော့ဂျ် (Strasbourg) မြို့တွင် Apple စတိုးဆိုင်တစ်ခု အဖောက်ခံခဲ့ရကာ ရဲတပ်ဖွဲ့က မျက်ရည်ယိုဗုံးများ သုံးခဲ့ရသည်။

ပဲရစ်ရှိ အသင့်စား စားသောက်ဆိုင်တစ်ခု၏ ပြတင်းပေါက်များ ခွဲခံခဲ့ရကာ စတိုးဆိုင်တစ်ခုကို ဖောက်ရန် ကြိုးပမ်း နေသူများကိုလည်း ရဲတပ်ဖွဲ့က လူစုခွဲခဲ့ရသည်ဟု အာဏာပိုင်များက ပြောသည်။ 

မာဆေးလ် (Marseille) မြို့တွင်လည်း ဒုတိယမြောက်ညအဖြစ် အကြမ်းဖက်မှုများ ဖြစ်ပွားခဲ့သည်။ 

 ပြင်သစ်သမ္မတ မက်ခရွန်ကိုတွေ့ရစဉ်

ညမရောက်ခင်မှာပင် လူငယ်များသည် တိုက်ခိုက်မှုများ၊ မီးရှို့မှုများ၊ ဖောက်ထွင်းမှုများ လုပ်ဆောင်ခဲ့သည်ဟု ရဲတပ်ဖွဲ့ကပြောသလို လူ ၉၀ နီးပါးကို ဖမ်းဆီးခဲ့သည်။ 

ဇွန်လ ၃၀ ရက်နေ့ ညနေပိုင်းတွင် မာဆေးလ်ရှိ သေနတ်စတိုးတစ်ခု ဖောက်ထွင်းခံခဲ့ရကာ သေနတ်များ ပျောက်ဆုံးခဲ့ပြီး အမျိုးသားတစ်ဦးကို အမဲပစ် ရိုင်ဖယ်တစ်လက်နှင့်အတူ ဖမ်းမိခဲ့သည်ဟု ရဲက ပြောသည်။

ထိုမတိုင်ခင် ဇွန်လ ၂၉ ရက်နေ့ ညတွင်လည်း တာဝန်ချိန်ပြင်ပ ရဲနှစ်ဦးကို လူ ၂၀ ခန့်က တိုက်ခိုက်ခဲ့ကြရာ ဓားထိုးခံရခြင်း အပါအဝင် ပြင်းပြင်းထန်ထန် ဒဏ်ရာရရှိခဲ့သည်။ 

လိုင်ယွန် (Lyon) တွင်လည်း အကြမ်းဖက်မှုများ ဖြစ်ပွားခဲ့သည်။ ဇွန်လ ၃၀ ရက်နေ့ ညနေပိုင်း လူပေါင်း ၁၃၀၀ ခန့် ပါဝင်သည့် ခွင့်ပြုချက်မရှိသော အကြမ်းဖက်မှု ဆန့်ကျင်ရေး ဆန္ဒပြပွဲတစ်ခု ပြီးဆုံးချိန်တွင် ဆိုင်များကို ဖောက်ထွင်းရန် ကြိုးပမ်းနေသူ ၂၁ ဦးကို ရဲတပ်ဖွဲ့က ဖမ်းဆီးခဲ့သည်။ 

အကြမ်းဖက်မှုများသည် ပြင်သစ်မြေပေါ်တွင် သာမက နိုင်ငံရပ်ခြားရှိ ပြင်သစ်ပိုင် နယ်မြေများတွင်လည်း ဖြစ်ပွားခဲ့သည်။ 

ပြင်သစ်မှာ အကြမ်းဖက်မှုတွေဖြစ်ပွားနေစဉ်

ဂူနီယာတွင် ဘယ်ကမှန်းမသိသော ကျည်ဆန်ကြောင့် အသက် ၅၄ နှစ်အရွယ် အမျိုးသားတစ်ဦး သေဆုံးခဲ့ရကာ အိန္ဒိယသမုဒ္ဒရာအတွင်းရှိ Reunion ကျွန်းတွင်လည်း ဆန္ဒပြသူများက မီးရှို့ခြင်း၊ ရဲတပ်ဖွဲ့ဝင်များကို တိုက်ခိုက်ခြင်း တို့ လုပ်ဆောင်ခဲ့ကာ ကားများ အဆောက်အဦများ ပျက်စီးခဲ့ရသည်။ 

လူရာချီ ဖမ်းဆီးခြင်း၊ ရဲအင်အား ထောင်ချီ ချထားခြင်းတို့ လုပ်ဆောင်ခဲ့သည့်တိုင် အကြမ်းဖက်မှုများကို ထိန်းသိမ်း နိုင်ခြင်း မရှိသေးသော်လည်း မက်ခရွန်သည် အရေးပေါ် အခြေအနေ ကြေညာခြင်း မရှိသေးပေ။ 

ထိုအစား ၎င်း(မက်ခရွန်)သည် ရဲနှင့်လုံခြုံရေးတပ်ဖွဲ့ဝင် အင်အားကိုသာ တိုးမြှင့်ချထားသည်။

ဇွန်လ ၂၉ ရက်နေ့ တစ်နေ့ထဲတွင်ပင် ဖမ်းဆီးမှုပေါင်း ၉၁၇ ခု လုပ်ဆောင်ခဲ့ကြောင်း၊ ပျမ်းမျှအသက် ၁၇ နှစ်အရွယ် လူငယ်များ ဖြစ်ကြောင်း ပြင်သစ်ပြည်ထဲရေးဝန်ကြီး ဂျီရယ် ဒါမာနင် (Gerald Darmanin) က ပြောသည်။ 

ရဲတပ်ဖွဲ့ဝင်နှင့် မီးသတ် တပ်ဖွဲ့ဝင် ၃၀၀ ကျော်လည်း ထိခိုက်ဒဏ်ရာ ရရှိခဲ့သည်ဟု ၎င်းက ပြောသည်။ 

Source: AP

CNI International News

ဂူဝါဟာတီ၊ ဇွန်လ ၃၀

လက်နက်ကိုင်များသည် ဇွန်လ ၂၉ ရက်နေ့ မနက် ၅ နာရီ ၃၀ မိနစ်တွင် မဏိပူရ် (Manipur) ပြည်နယ်၊ ဆီနာပါတီ (Senapati) ခရိုင်ရှိ ဟာရိုသဲ (Haraothel) ကျေးရွာတွင် အကြောင်းမဲ့ ပစ်ခတ်မှု ပြုလုပ်ခဲ့ကြောင်း အိန္ဒိယစစ်တပ် အရာရှိများက ပြောသည်ဟု NORTHEAST NOW သတင်းတွင် ဖော်ပြထားသည်။ 

သို့သော် မည်သည့် လက်နက်ကိုင် အဖွဲ့အစည်း ဖြစ်သည်ကိုတော့ အတိအကျ ဖော်ပြထားခြင်း မရှိပေ။

ထို့နောက် ပစ်ခတ်မှုကို လုံခြုံရေးတပ်ဖွဲ့များ၏ လျင်မြန်တိကျသော ဆုံးဖြတ်ချက်ကြောင့် အခြေအနေကို မြန်မြန်ဆန်ဆန်ပင် ထိန်းချုပ်နိုင်ခဲ့ပြီး အကြမ်းဖက်မှုများ အားကောင်းလာခြင်းကို တားဆီးနိုင်ခဲ့သည်ဟုလည်း စစ်တပ်အရာရှိ များက ပြောသည်။ 

ပစ်ခတ်မှုနှင့်ပတ်သက်၍ သတင်းရရှိပြီးနောက်တွင် အခြေအနေကို ထိန်းသိမ်းရန်အတွက် စစ်သားများကို အနီး ပတ်ဝန်းကျင်သို့ ချက်ချင်းစုစည်း တပ်ဖြန့်ထားခဲ့သည်။ 

အခင်းဖြစ်ပွားရာသို့ သွားသည့်လမ်းကြောင်းတွင် တပ်ဖွဲ့များသည် လက်နက်ကိုင် ဆူပူအုံကြွသူများ၏ ပစ်ခတ်မှု နှင့် ကြုံတွေ့ခဲ့ရကြောင်း၊ လုံခြုံရေးတပ်ဖွဲ့များသည် နောက်ထပ် ဆုံးရှုံးမှုများကို တွက်ချက်၍ တုံ့ပြန်ခဲ့သည်။

မဏိပူရ်ပြည်နယ်အတွင်း လူမျိုးရေး ပဋိပက္ခကြောင့် ပျက်စီးသွားမှုကိုတွေ့ရစဉ်

ထို့နောက် အဆိုပါဧရိယာမှ တပ်သားများ၏ လုံခြုံရေးကို ကာကွယ်ပေးနိုင်ခဲ့သည်ဟု အိန္ဒိယစစ်တပ်အရာရှိ တစ်ဦးက ပြောသည်။ 

လုံခြုံရေးတပ်ဖွဲ့များ၏ လျင်မြန်သော တွက်ချက်တုံ့ပြန်မှုများကြောင့် ပစ်ခတ်မှု အခြေအနေသည် ရပ်တန့်သွား သလို လက်နက်ကိုင် အုံကြွသူများပြု လုပ်သည့် ခြိမ်းခြောက်မှုလည်း လျှော့ပါးသွားခဲ့သည်။ 

ထို့အပြင် လုံခြုံရေး သတ်မှတ်ချက်များနှင့် တည်ငြိမ်မှုကို ထိန်းသိမ်းရေး အားဖြည့်ရန် နောက်တိုး တပ်ဖွဲ့ဝင်များကို ပါ စုစည်းထားသည်ဟု အိန္ဒိယစစ်တပ်အရာရှိက ပြောသည်။ 

ထိုပစ်ခတ်မှုတွင် ထိခိုက်သေဆုံးမှု တချို့ရှိသည်ဟု အတည်မပြုနိုင်သေးသော သတင်းများတွင် ဖော်ပြသည့်တိုင် ကိန်းဂဏန်း အချက်အလက် အတိအကျကိုမူ မသိရသေးပေ။ 

မဏိပူရ်ပြည်နယ်အတွင်း လူမျိုးရေး ပဋိပက္ခကြောင့် ကားများ မီးရှို့ခံထားရစဉ်

ပစ်ခတ်မှု ဖြစ်ပွားရာနှင့် အနီးပတ်ဝန်းကျင် ဒေသများတွင် လူစုလူဝေး ကြီးကြီးမားမား ဖြစ်ပွားခဲ့သည်ဟု သတင်း အိန္ဒိယပြည်တွင်း သတင်းများတွင် ဖော်ပြခဲ့ကြသည်။ 

ယင်းတွင် အသေးစိတ် စစ်ဆေးသည့် စနစ်ကို ဆက်လက် ကျင့်သုံးလျက်ရှိသလို လုံခြုံရေးတပ်ဖွဲ့ဝင်များနှင့် အာဏာပိုင်များသည်လည်း အခြေအနေကို အနီးကပ် စောင့်ကြည့်လျက် ရှိသည်။ 

ဇွန်လ ၂၉ ရက်နေ့ ဖြစ်ရပ်သည် အကြမ်းဖက်မှုများ ထူပြောရာ မဏိပူရ်ပြည်နယ်တွင် တရားဥပဒေကို ထိန်းသိမ်း ရေးအတွက် လုံခြုံရေးတပ်ဖွဲ့ဝင်များ ရင်ဆိုင်နေရသည့် စိတ်ခေါ်မှုများအတွက် သတိပေးချက် တစ်ခုလည်း ဖြစ် သည်။

Source:  NORTHEAST NOW

CNI International News

ဖနွမ်းပင်၊ ဇွန်လ ၃၀

ကမ္ဘောဒီးယားဝန်ကြီးချုပ် ဟွန်ဆန် (Hun Sen)သည် Facebook တွင် နိုင်ငံရေးပြိုင်ဘက်များကို အကြမ်းဖက် ခြိမ်းခြောက်မှု လုပ်ဆောင်ခဲ့သည်ဟု စွပ်စွဲခံထားရသည်။

ထို့နောက် သူ၏ Facebook နှင့် Instagram အကောင့်များကို ခြောက်လချက်ချင်း ရပ်ဆိုင်းရန်အတွက် ကုမ္ပဏီ၏ ကြီးကြပ်ရေးဘုတ်အဖွဲ့မှ ထောက်ပြမှုကို ဖြစ်စေသည်ဟု Al Jazeera သတင်းတွင် ဖော်ပြသည်။ 

Meta Platforms Inc မှ ကျွမ်းကျင်သူ ဘုတ်အဖွဲ့တစ်ခုက ကုမ္ပဏီ၏ content ပိုင်းဆိုင်ရာ စောင့်ကြည့်လေ့လာ သူများသည် နိုင်ငံရေး အတိုက်အခံများကို ခြိမ်းခြောက်ထားသော ဟွန်ဆန်၏ livestream မိန့်ခွန်းပြောဆိုမှု တစ်ခု ကို သူ၏ facebook page တွင် ဆက်ထားရန် ခွင့်ပြုပေးထားခြင်းဖြင့် အမှားကျူးလွန်ခဲ့သည်ဟု ဇွန်လ ၂၉ ရက် တွင် ကြေညာခဲ့သည်။ 

သတင်းဖြစ်လောက်သော ဟွန်ဆန်၏ ခြိမ်းခြောက်စကားများသည် Facebook တွင် ဆက်ရှိနေသင့်သည့် အကြောင်းပြချက်မဟုတ်ကြောင်း ဘုတ်အဖွဲ့ကပြောသည်။

ကုမ္ပဏီသည် ထိုမိန့်ခွန်းကို အွန်လိုင်းတွင် ဆက်ရှိနေစေခြင်းဖြင့် ဇူလိုင် ၂၃ ရက် ရွေးကောက်ပွဲမတိုင်ခင် ဟွန်ဆန် ၏ အကြမ်းဖက်ခြိမ်းခြောက်မှုများကို ပို၍ အသံကျယ်စေခဲ့သည်ဟု ဘုတ်အဖွဲ့က ပြောသည်။ 

ဟွန်ဆန်သည် သူ၏ ခြိမ်းခြောက်မှုများကို ပို၍ ကျယ်လောင်စေရန် လူမှုကွန်ယက်ကို အသုံးချခဲ့ကြောင်း၊ ၎င်းအနေဖြင့် Meta ကုမ္ပဏီ၏ ပလက်ဖောင်းများကို အသုံးမပြုခဲ့ဘူးဆိုင်လျှင် ယခုကဲ့သို့ ကျယ်လောင်မှုနှင့် ထိခိုက်နစ်နာမှု ရှိလာနိုင်မည် မဟုတ်ကြောင်းလည်း ဘုတ်အဖွဲ့က ထုတ်ပြန်သည့် ၂၆ မျက်နှာပါ ကြေညာချက် တွင် ဖော်ပြထားသည်။

ဟွန်ဆန် ဖေ့စ်ဘွတ်ခ်ကို ကြည့်ရှုနေစဉ်

ကမ္ဘောဒီးယား ခေါင်းဆောင်၏ အမူအကျင့်များသည် သတ်မှတ်ချက်များကို ပြင်းထန်စွာ ချိုးဖောက်မှု ဖြစ်သည် ဟုလည်း သတ်မှတ်သည်။ 

ဟွန်ဆန်၏ ခြိမ်းခြောက်မှု၊ ယင်း၏ သမိုင်းအစဉ်အလာ၊ အစိုးရ၏ လူ့အခွင့်အရေး မှတ်တမ်းတို့အပြင် လာမည့် ရွေးကောက်ပွဲ စသည့် အကြောင်းအရာများကို စုပေါင်းမှု ရလဒ်အရ ၎င်းနှင့်ပတ်သက်သည့် အရေးယူမှုကို လျင်လျင်မြန်မြန် ချမှတ်ရမည်ဟုလည်း ဘုတ်အဖွဲ့က ပြောသည်။ 

ဘုတ်အဖွဲ့၏ တင်ပြချက်ကို Meta ဘက်က သဘောတူကာ ဟွန်ဆန်၏ မူရင်းဗွီဒီယိုဖိုင်များ၊ live မိန့်ခွန်းများကို ဖြုတ်ချသွားမည်ဟု Reuters သတင်းတွင် ဖော်ပြသည်။ 

ဝန်ကြီးချုပ်၏ Facebook နှင့် Instagram အကောင့်များကို ပိတ်သိမ်းရေး ဘုတ်အဖွဲ့၏ တင်ပြချက်အား  လက်ခံသင့် မသင့်ကို ကုမ္ပဏီဘက်က ဆုံးဖြတ်ရန် ရက် ၆၀ အချိန်ရသည်။ 

ဇန်နဝါရီလတွင် လွှင့်ခဲ့သည့် အငြင်းပွားဖွယ် live မိန့်ခွန်း၌ ဟွန်ဆန်က ပြီးခဲ့သည့်နှစ် ဒေသဆိုင်ရာ ရွေးကောက်ပွဲ များမှာ ၎င်း၏ ကမ္ဘောဒီးယားပြည်သူ့ပါတီ (Cambodian People’s Party) အား မဲခိုးသည်ဟု စွပ်စွဲခဲ့သူများအား ခြိမ်းခြောက်မှု ပြုလုပ်ခဲ့သည်။

ဝေဖန်သူများအနေဖြင့် တရားရင်ဆိုင်မည်လား သို့မဟုတ် အရိုက်ခံမည်လား ရွေးဟုလည်း ဟွန်ဆန်က ပြော သည်။ 

ထရမ့်ကိုတွေ့ရစဉ်

ထိုဗွီဒီယိုတစ်ခုသည် ကြည့်ရှုမှုပေါင်း ၆၀၀,၀၀၀ ရှိခဲ့သည်ဟု Meta ၏ အချက်အလက်များတွင် ဖော်ပြသည်။

ဘုတ်အဖွဲ့၏ အဆိုပြုချက်အတိုင်း ပိတ်သိမ်းမှုကို ပြုလုပ်ခဲ့မည်ဆိုလျှင် ဟွန်ဆန်သည် အကြမ်းဖက်မှုများကို ပျံ့နှံ့စေခြင်းဖြင့် အကောင့်ပိတ်ခံရသည့် ကမ္ဘာ့ခေါင်းဆောင် အနည်းငယ်မှ တစ်ဦး ဖြစ်လာနိုင်ဖွယ် ရှိသည်။

ယင်းမတိုင်ခင် အမေရိကန်သမ္မတဟောင်း ဒေါ်နယ်ထရမ့်သည် ၂၀၂၁ ခုနှစ်တွင် Facebook နှင့် Instagram အကောင့်များ နှစ်နှစ် ပိတ်ခံခဲ့ရဖူးသည်။ 

Facebook သည် ကမ္ဘောဒီးယားနှင့် အရှေ့တောင်အာရှတွင် အထင်ရှားဆုံး လူမှုကွန်ယက်များမှ တစ်ခုဖြစ်ကာ နိုင်ငံရေးဆိုင်ရာ သတင်းစကားပါးရန်အတွက် ဟွန်ဆန်သည် ယင်းကို အသုံးချသည်။

ဟွန်ဆန်သည် Facebook တွင် follower ၁၄ သန်းကို ပိုင်ဆိုင်ထားသလို ထို follower များ မည်သို့ရရှိထားသည် လည်းနှင့် ပတ်သက်၍လည်း မေးခွန်းများ ထွက်ပေါ်လျက်ရှိသည်။ 

Source: Aljazeera