CNI International News

အစ္စလာမ္မာဘတ်၊ ဒီဇင်ဘာ ၁၇

အိန္ဒိယဝန်ကြီးချုပ်ကို “ဂူဂျာရတ် သားသတ်သမား” ဟု ပါကစ္စတန် နိုင်ငံခြားရေးဝန်ကြီး ဘီလာဝယ် ဘူတို-ဇာဒါရီ (Bilawal Bhutto-Zardari)က ပုတ်ခတ်ပြောဆိုခဲ့ ကြောင်း အယ်ဂျာဇီးယား သတင်းတွင် ဖော်ပြထားသည်။

အိန္ဒိယဘက်မှ ပါကစ္စတန်သည် အကြမ်းဖက်မှုများ၏ ဗဟိုချက်ဖြစ်သည်ဟု ပြောဆိုခဲ့ခြင်းကို ပါကစ္စတန် နိုင်ငံခြားရေးဝန်ကြီးက ယခုလို တုန့်ပြန်ခဲ့ခြင်းဖြစ်သည်။ နျူကလီးယား ပိုင်ရှင် အိမ်နီးချင်း နှစ်နိုင်ငံသည် ကုလသမဂ္ဂတွင် စကားလုံးတိုက်ပွဲ ဆင်နွဲနေခြင်း ဖြစ်သည်။

ပါကစ္စတန်နိုင်ငံခြားရေးဝန်ကြီး ဘီလာဝယ် ဘူတို-ဇာဒါရီ (Bilawal Bhutto-Zardari) နှင့် အိန္ဒိယ နိုင်ငံခြားရေး ဝန်ကြီး ဆူဘရာမမ်ရမ် ဂျိုင်ရှန်ကာ (Subrahmanyam Jaishankar) တို့ကြား စကားလုံးတိုက်ပွဲမှာ ကုလသမဂ္ဂ လုံခြုံရေးကောင်စီတွင် အကြမ်းဖက်မှုအန္တရာယ် မြင့်တက်လာခြင်းနှင့် ပတ်သက်သည့် ထုတ်ပြန်ချက် တစ်ခု ကြောင့် စတင်ခဲ့ခြင်း ဖြစ်သည်။

ကုလ ညီလာခံအပြီး သတင်းထောက်များနှင့် စကားပြောဆိုခဲ့ရာတွင် ဂျိုင်ရှန်ကာက ပါကစ္စတန်သည် အကြမ်း ဖက်မှုများ၏ ဗဟိုချက်ဖြစ်သည်ဟု ပြောကြားခဲ့သလို သန့်သန့်ရှင်းရှင်းနေ ထိုင်၍ အိမ်နီးချင်းကောင်းဖြစ်ရန် ကြိုးစားသင့်သည်ဟု ဆိုသည်။

ကတ်ရှ်မီးယားမှာ လုံခြုံရေးတပ်ဖွဲ့ကိုတွေ့ရစဉ် (GETTY IMAGES)

မိမိ အိမ်နောက်ဖက်တွင် မြွေမွေးထားလျှင် ထိုမြွေများသည် အိမ်နီးချင်းများကိုပင် မဟုတ်ဘဲ မွေးထားသည့် အိမ်ပိုင်ရှင်များကိုပင် ပြန်ဒုက္ခပေးနိုင်သည်ဟု ဟီလာရီကလင်တန်၏ ခရီးစဉ်တွင် ပြောခဲ့ဖူးကြောင်းလည်း ဂျိုင်ရှန်ကာက ပြောခဲ့သည်။

လက်ရှိ စကားလုံး တိုက်ပွဲမဖြစ်ပွားခင် အစောပိုင်းတွင်လည်း ဂျိုင်ရှန်ကာသည် ပါကစ္စတန်နိုင်ငံနာမည်ကို တိုက် ရိုက် မပြောခဲ့သည့်တိုင် သွယ်ဝိုက်သော နည်းဖြင့် ပုတ်ခတ်ပြောဆိုမှု ပြုလုပ်ခဲ့သည်။

ထိုပြောစကားများနှင့် ပတ်သက်၍ တုန့်ပြန်ရန် သတင်းထောက်များမှ မေးမြန်းရာတွင် ဇာဒါရီက အိန္ဒိယလူမျိုးများ သည် အိန္ဒိယ၊ ပါကစ္စတန် မည်သည့်နိုင်ငံတွင် အကြမ်းဖက်မှု ဖြစ်သည်မဆို မူဆလင်များနှင့် အကြမ်းဖက်မှုများကို ရောချပစ်လိုက်ကြသည်ဟု ပြောသည်။

ဂျိုင်ရှန်ကာ အနေဖြင့် အိုစမာဘင်လာဒင် သေသွားခဲ့သည့်တိုင် ဂူဂျာရတ်ပြည်နယ်မှ လူသတ်သမား(မိုဒီ)မှာ မသေ သည့်အပြင် အိန္ဒိယဝန်ကြီးချုပ် ဖြစ်နေပြီဆိုသည်ကို မမေ့သင့်ကြောင်းလည်း ပါကစ္စတန်ဝန်ကြီးက ပြန်လည် တုန့်ပြန်ခဲ့သည်။

ပါကစ္စတန်နိုင်ငံခြားရေးဝန်ကြီး ဘီလာဝယ် ဘူတို-ဇာဒါရီကိုတွေ့ရစဉ် (fb)

၎င်းက လက်ရှိ ဝန်ကြီးချုပ်မိုဒီ ဂူဂျာရတ်ပြည်နယ် အကြီးအကဲအဖြစ် ဆောင်ရွက်နေစဉ် မူဆလင် အများစု ပါဝင်သော လူ ၂၀၀၀ နီးပါး သေဆုံးခဲ့ရသည့် ၂၀၀၂ ခုနှစ်ဖြစ်စဉ်ကို ရည်ညွှန်း ပြောဆိုခဲ့ခြင်း ဖြစ်သည်။ ထိုဖြစ်စဉ်တွင် မိုဒီသည် အကြမ်းဖက်မှုများကို လျစ်လျူရှုခဲ့သည်ဟုလည်း စွပ်စွဲခံထားရပြီး ဝန်ကြီးချုပ် မဖြစ်ခင် အထိ အမေရိကန်ပြည်ဝင်ခွင့်ပါ ပိတ်ပင်ခံခဲ့ရသည်။

ဇာဒါရီ၏ တုန့်ပြန်မှုတွင် ၎င်းသည်ပင် အကြမ်းဖက်ဝါဒ၏ သားကောင်တစ်ဦးဖြစ်ကြောင်း ၊ အကြမ်းဖက်မှုကြောင့် ပါကစ္စတန်နိုင်ငံတွင် များစွာထိခိုက် နစ်နာခဲ့ရသည်ဟုလည်း ပြောခဲ့သည်။ ဇာဒါရီ၏ မိခင်ဖြစ်သူ ပါကစ္စတန်၏ ပထမဆုံးသော အမျိုးသမီးဝန်ကြီးချုပ် ဘနာဇီယာဘူတို အသေခံဗုံးခွဲမှု ဖြစ်စဉ်တစ်ခုတွင် လုပ်ကြံသတ်ဖြတ်ခြင်း ခံခဲ့ရမှုကို ရည်ညွှန်းပြောဆိုခဲ့ခြင်း ဖြစ်သည်။

အိမ်နီးချင်း ၂ နိုင်ငံကြား အထူးသဖြင့် ကတ်ရှ်မီးယားအရေးကြောင့် နိုင်ငံရေးဆိုင်ရာ ဆက်ဆံရေး အခြေအနေ များမှာ ဆိုးရွားခဲ့သည်။ ထိုဖြစ်ရပ်ကြောင့် ခွဲထွက်မှု၊ စစ်ပွဲများလည်း ဖြစ်ပွားခဲ့ရသည်။

၂၀၀၈ ခုနှစ် မွမ်ဘိုင်းတိုက်ခိုက်မှု အပါအဝင် အိန္ဒိယတွင် ဖြစ်ပွားခဲ့သော အကြမ်းဖက် တိုက်ခိုက်မှုများနှင့် ပတ်သက် ၍ ပါကစ္စတန်ဘက်က ကြိုးကိုင်ခဲ့သည်ဟုလည်း အိန္ဒိယက စွပ်စွဲထားသည်။

Source: အယ်ဂျာဇီးယား

CNI International News

ဝါရှင်တန်၊ ဒီဇင်ဘာ ၁၆

အာဖရိကတိုက်ကို ထောက်ပံ့ရန်နှင့် ရင်းနှီးမြှုပ်နှံမှု လုပ်ဆောင်ရန်အတွက် ဒေါ်လာ ဘီလီယံပေါင်းများစွာ အသုံး ပြုသွားမည်ဟု အမေရိကန်သမ္မတ ဂျိုးဘိုင်ဒန် (Joe Biden)က ပြောကြားခဲ့ကြောင်း ဘီဘီစီ အင်္ဂလိပ်ပိုင်းတွင် ဖော်ပြထားသည်။

အာဖရိကခေါင်းဆောင်များနှင့် ညီလာခံတစ်ခုတွင် ထိုသို့ ပြောကြားခဲ့ခြင်း ဖြစ်သည်။

ဝါရှင်တန်ဒီစီမြို့တွင် ပြုလုပ်ခဲ့သော အာဖရိကခေါင်းဆောင် ၄၉ ဦးနှင့် ညီလာခံ၌ အာဖရိကအနာဂတ်အတွက် အမေရိကန်နိုင်ငံမှ အလုံးစုံပုံအောမြှုပ်နှံထားသည်ဟု ဘိုင်ဒန်က ပြောသည်။

အဆိုပါ ညီလာခံသည် ၈ နှစ်တာကာလအတွင်း ပထမဆုံးသော အမေရိကန်ဘက်မှ လက်ခံကျင်းပသည့် အာဖရိကန်- အမေရိကန် ညီလာခံ ဖြစ်သည်။

၎င်းက တရုတ်၏ ပါဝင်ပတ်သက်မှုများကို တန်ပြန်ရန်အတွက် အမေရိကန်နိုင်ငံ၏ အာဖရိကတိုက်အပေါ် ပြန်လည် သြဇာလွှမ်းမိုးရန် ကြိုးပမ်းမှု တစ်ရပ်ဟုလည်း ရှုမြင်ခြင်း ခံထားရသည်။

အမေရိကန်သမ္မတ ဂျိုးဘိုင်ဒန်နဲ့ အာဖရိကခေါင်းဆောင်တစ်ဦးကိုတွေ့ရစဉ် (AP)

ဒေါ်နယ်ထရမ့် အစိုးရလက်ထက်တွင် အာဖရိကနိုင်ငံများနှင့် ဆက်ဆံရေး အခြေအနေ ဆိုးရွားခဲ့သော်လည်း ဘိုင်ဒန်ကမူ အာဖရိကဒေသနှင့် ဆက်ဆံရေးကောင်းတစ်ခု ထူထောင်ရန် ကြိုးပမ်းထားသည်။ အာဖရိက၏ အောင်မြင်မှုသည် အမေရိကန်၏ အောင်မြင်မှုပင်ဖြစ်ကာ တစ်ကမ္ဘာလုံး၏ အောင်မြင်မှုဟုလည်း မှတ်ယူနိုင် ကြောင်း ဘိုင်ဒန်က အခိုင်အမာ ပြောထားသည်။

ဘိုင်ဒန်က လက်ရှိကြုံတွေ့နေရသော ကမ္ဘာ့ရေးရာကိစ္စများတွင် အာဖရိက၏ ခေါင်းဆောင်မှု၊ အတွေး အခေါ်များ နှင့် စွန့်ဦးတီထွင်မှုများ လိုအပ်သည်ဟု ပြောသလို ယခင်အစိုးရ အဆက်ဆက် ပြုလုပ်ခဲ့သော အရေးပါသည့် ရင်းနှီးမြှုပ်နှံမှုများကိုလည်း ဆက်လက် ဆောင်ရွက်သွားမည်ဟု ကတိပေးခဲ့သည်။

၃ ရက်ကြာ အမေရိကန် - အာဖရိက ညီလာခံသည် ဒီဇင်ဘာ ၁၅ ရက်နေ့တွင် ပြီးဆုံးသွားခဲ့ပြီ ဖြစ်ကြောင်း၊ လာမည့် ၃ နှစ်အတွင်း အာဖရိက ဒေသသို့ ဒေါ်လာ ၅၅ ဘီလီယံ ရင်းနှီးမြှုပ်နှံသွားမည်ဟု အမေရိကန် အမျိုးသား အကြံပေးအရာရှိ ဂျိတ်ဆူလေဗန် (Jake Sullivan) က ပြောသည်။

အမေရိကန်သမ္မတ ဂျိုးဘိုင်ဒန်နဲ့ အာဖရိကခေါင်းဆောင်များကိုတွေ့ရစဉ် (AP)

ညီလာခံတွင် လက်ရှိ ဆောင်ရွက်နေသော ပရိုဂရမ်များနှင့်ပတ်သက်၍ ဦးစားပေး ဆွေးနွေးသွားခဲ့သော်လည်း မြေပြင် အခြေအနေတွင် အဆိုပါ ပရိုဂရမ်များမှာ တိုးတက်မှု နှေးကွေးလွန်းနေသည်။

အာဖရိကသည် အမေရိကန် နိုင်ငံခြားကုန်သွယ်ရေး၏ ၁ ရာခိုင်နှုန်းကိုသာ ပိုင်ဆိုင်ထားပြီး ထိုကုန်သွယ်ကိုလည်း နိုင်ဂျီးရီးယားနှင့် အန်ဂိုလာတို့မှ ရေနံဆီ တင်သွင်းမှုများက ကြီးစိုးထားသည်။

သို့သော် အနောက်အာဖရိက၏ အရေးပါဆုံး ဆိပ်ကမ်း ဖြစ်သော ဘီနင်ဆိပ်ကမ်းတွင် သယ်ယူပို့ဆောင်စရိတ် လျော့ချရေးအတွက် ဒေါ်လာ သန်း ၅၀၀ ရင်းနှီးမြှုပ်နှံသွားမည်ဟု ဘိုင်ဒန်က ဒီဇင်ဘာ ၁၄ ရက်နေ့တွင် ပြောခဲ့ သည်။

ဒစ်ဂျစ်တယ် စီးပွားရေးကို မြှင့်တင်ရန် ဒေါ်လာ သန်း ၃၅၀ အသုံးပြုသွားမည်ဖြစ်ပြီး အမေရိကန်-အာဖရိက စီးပွားရေးဖိုရမ်တွင် ဒေါ်လာ ၁၅ ဘီလီယံတန်ကြေးရှိ သဘောတူညီချက်များကို ရရှိခဲ့သည်ဟု ၎င်းက ပြောသည်။

Source: BBC

CNI International News

ရီဂါ၊ ဒီဇင်ဘာ ၁၅

ညွှန့်ပေါင်းအစိုးရတစ်ရပ် ဖွဲ့စည်းရန် လတ်ဗီးယား နိုင်ငံရေးပါတီ သုံးခုက သဘောတူညီချက်တွင် လက်မှတ် ရေးထိုးခဲ့သည်ဟု အယ်ဂျာဇီးယားက ဖော်ပြထားသည်။

အိမ်နီးချင်း ရုရှားနိုင်ငံ၏ ယူကရိန်းကျူးကျော်စစ်၊ စီးပွားရေးဆိုင်ရာ အခက်အခဲများကြောင့် နိုင်ငံတွင်း အထွေထွေ ရွေးကောက်ပွဲ ကျင်းပပြီး နှစ်လအကြာမှ ထိုသို့ ဖွဲ့စည်းနိုင်ခဲ့ခြင်း ဖြစ်သည်။

အစိုးရအဖွဲ့သစ်ကို ဝန်ကြီးချုပ် ခရစ္စဂျားနစ် ကာရင်းစ်၏ အာဏာရ ဗဟိုလက်ယာ New Unity ပါတီက ဦးဆောင် သွားမည် ဖြစ်သည်။

ထိုပါတီသည် အောက်တိုဘာ ၁ ရက်နေ့ ရွေးကောက်ပွဲတွင် ၁၉ ရာခိုင်နှုန်း အနိုင် ရရှိခဲ့သည့် ပါတီဖြစ်သည်။

ကျန်ပါတီနှစ်ခုမှာ ကွန်ဆာဗေးတစ်(National Alliance)ပါတီနှင့် အစွန်းမရောက်သော United List ပါတီတို့ ဖြစ်သည်။

လတ်ဗီးယား လွှတ်တော်ကိုတွေ့ရစဉ် (GETTY IMAGES)

ထိုပါတီ ၃ ခုသည် အစိုးရသစ် လုပ်ငန်းများကို ကဏ္ဍ ၅ ရပ် ခွဲခြားဆောင်ရွက်သွားရန် ဗုဒ္ဓဟူး(ဒီဇင်ဘာ ၁၄ ရက်) နေ့တွင် ကတိပြုခဲ့ ကြသည်။

၎င်းတို့မှာ နိုင်ငံ၏ လုံခြုံရေး၊ ပညာရေး၊ စွမ်းအင်၊ ယှဉ်ပြိုင်ခြင်းနှင့် လူနေမှုဘဝတို့ ဖြစ်သည်။ ထုတ်ပြန်ခဲ့သော ပူးတွဲကြေညာချက် တစ်စောင်တွင် ပါတီများက ဝန်ကြီးချုပ် ဒုတိယ အစိုးရသက်တမ်း၏ ရည်ရွယ်ချက်မှာ လတ်ဗီးယားပြည်သူများ၏ လုံခြုံရေးနှင့် ကြွယ်ဝချမ်းသာမှုတို့ကို ထောက်ပံ့ပေးသော မူဝါဒများဖြင့် စီးပွားရေးကို ပြုပြင်ပြောင်းလဲရန် ဖြစ်သည်ဟု ဖော်ပြထားသည်။

ထို့ကြောင့် ပါတီ ၃ ခုသည် လတ်ဗီးယား၏ အမတ်နေရာ ၁၀၀ ပါ လွှတ်တော်နေရာ ၅၄ နေရာကို ထိန်းချုပ် နိုင်ခဲ့ပြီ ဖြစ်သော်လည်း သဘောတူညီချက်ကို လွှတ်တော်အတွင်း မဲပေး အတည်ပြုမှု လိုအပ်နေဆဲ ဖြစ်သည်။

ပြီးခဲ့သော ရွေးကောက်ပွဲတွင် ပါတီနှင့် မဟာမိတ်အဖွဲ့ ၇ ခုကသာ လိုအပ်သော ၅ ရာခိုင်နှုန်း အတားအဆီးကို ကျော်ဖြတ်နိုင်ခဲ့ပြီး ဥပဒေပြုလွှတ်တော်အတွက် ကိုယ်စားပြုခွင့် ရရှိခဲ့သည်။

ထူးခြားမှုတစ်ခုမှာ လတ်ဗီးယားနိုင်ငံ၏ များပြားသော ရုရှားလူမျိုးများကို ကိုယ်စားပြုသည့် မည်သည့်ပါတီကမှ လွှတ်တော်အတွင်း နေရာ တစ်နေရာ ရရှိအောင် စွမ်းဆောင်နိုင်ခဲ့မှု မရှိခြင်းပင် ဖြစ်သည်။

လတ်ဗီးယားနိုင်ငံတွင် လူဦးရေ ၁ ဒသမ ၉ သန်း ရှိပြီး ၎င်းတို့၏ ၂၅ ရာခိုင်နှုန်းကျော်မှာ ရုရှားအဆက်များ ဖြစ်သည်။ လတ်ဗီးယားသည် ၂၀၀၄ ခုနှစ်မှစတင်ကာ အီးယူနှင့် နေတိုးအဖွဲ့ဝင် နိုင်ငံအဖြစ် သတ်မှတ်ခြင်း ခံခဲ့ရသည်။

Source: အယ်ဂျာဇီးယား

CNI International News

ဝါရှင်တန်၊ ဒီဇင်ဘာ ၁၅

ရှရုားအစိုးရကိုယ်စား ငွေကြေးခဝါချမှု၊ ရောင်းဝယ်မှုများ ပြုလုပ်ခဲ့ရာတွင် ပါဝင်ပတ်သက်နေသည့် ရုရှားနိုင်ငံသား ၅ ဦးနှင့် အမေရိကန် နိုင်ငံသား ၂ ဦးတို့ကို အမေရိကန်အစိုးရက တရားစွဲဆိုခဲ့သည်ဟု ဘီဘီစီ အင်္ဂလိပ်ပိုင်းတွင် ဖော်ပြထားသည်။

တရားစွဲခံရသူများမှာ ရုရှားကာကွယ်ရေးကဏ္ဍအတွက် အမေရိကန်ကုမ္ပဏီများမှ စစ်ဘက်သုံးနှင့် ဘက်စုံသုံး နည်းပညာများကို ရရှိရန် ကြိုးပမ်းခဲ့မှုဖြင့် သံသယဝင်ခံခဲ့ရသည်ဟု အမေရိကန် တရားရေးဌာနက ပြောသည်။

ထိုသူများသည် အမေရိကန်နိုင်ငံ၏ ပိတ်ဆို့အရေးယူမှုများကို ချိုးဖောက်ကာ စနိုက်ဘာကျည်များအား မှောင်ခို သွင်းရန် ကြိုးပမ်းခဲ့သည်ဟုလည်း ယူဆရသည်။

ရုရှား ၅ ဦးမှ ၁ ဦးမှာ ဖက်ဒရယ်လုံခြုံရေးဌာန FSB မှ အရာရှိတစ်ဦး ဖြစ်နိုင်သည်။ လက်ရှိ အချိန်အထိ စုံစမ်း စစ်ဆေးမှုများအပေါ် သံသယဝင် ခံရသူများနှင့် ရုရှား အစိုးရဘက်မှ တစ်စုံတစ်ရာ ပြောဆိုခြင်း မရှိသေးပေ။

တရားစွဲခံရသူ ၇ ဦးထဲက ၃ ဦးမှာ ထိန်းသိမ်းခံထားရပြီး ရုရှား ၄ ဦးမှာ လွတ်မြောက်နေဆဲ ဖြစ်သည်။ တရားစွဲဆိုမှု ၁၆ ခုကို နယူးယောက်ရှိ ဘရွတ်ကလင်း ဖက်ဒရယ်တရားရုံးတွင် စစ်ဆေးခဲ့သည်ဟု အမေရိကန် တရားရေးဌာန က ထုတ်ပြန်သည်။

ဖမ်းဆီးစွပ်စွဲခံထားရသူ ဗားဒင် ကိုနိုရှက်နော့ခ်ကိုတွေ့ရစဉ် (GETTY IMAGES)

ထုတ်ပြန်ချက်အရ သံသယ ရှိသူများသည် ထိရှလွယ်မှု မြင့်မားပြီး၊ တင်းကြပ်စွာ ကန့်သတ်ထားသော အီလက် ထရွန်းနစ် ပစ္စည်းများကို ဝယ်ယူပို့ဆောင်ခဲ့သည်ဟု သိရသည်။

အဆိုပါ ပစ္စည်းများထဲကတချို့ကို နျူကလီးယားနှင့် အသံထက်မြန်သော လက်နက်များအပြင် တခြားသော စစ်ဘက်ဆိုင်ရာသုံး အပလီကေးရှင်းများတွင်ပင် အသုံးပြုနိုင် သည်ဟုလည်း သိရသည်။

တရားစွဲဆိုမှုတွင် ရုရှားနိုင်ငံသား ၅ ဦး၏ အမည်များကို ဖော်ပြထားပြီး ၎င်းတို့ထဲမှ တစ်ဦးသည် FSB အရာရှိ ဟု ယူဆရသူ ဗားဒင် ကိုနိုရှက်နော့ခ် (Vadim Konoshchenok) ဖြစ်သည်။

၎င်းသည် အက်စတိုးနီးယားနိုင်ငံတွင် ထိန်းသိမ်းခံထားကာ အမေရိကန်သို့ လွဲပြောင်းပေးရန် ဆောင်ရွက်ခံနေရသူ ဖြစ်သည်။

ကိုနိုရှက်နော့ခ်သည် စစ်ဘက်သုံး အပြင် ဘက်စုံသုံး ခဲယမ်းများနှင့် တင်ပို့ခွင့် ကန့်သတ်ထားသော တခြားအရာ များ အပါအဝင် အမေရိကန် ထုတ်ကုန်များကို သင်္ဘောဖြင့် သို့မဟုတ် ကိုယ်တိုင် မှောင်ခို ကူးခဲ့သည်ဟု ထုတ်ပြန် ချက်တွင် ဖော်ပြထားသည်။

အပြစ်ရှိကြောင်း ထင်ရှားပါက တရားစွဲခံထားရသူများသည် အမြင့်ဆုံး ထောင်ဒဏ် နှစ် ၃၀ အထိ ပြစ်ဒဏ် ကျခံရမည်ဖြစ်သည်။

Source: BBC

CNI International News

ဘန်ကောက်၊ ဒီဇင်ဘာ ၁၄

ဗိုလ်ချုပ်ကြီး ပရာယွတ် ချန်အိုချာ (Prayut Chan-o-Cha) သည် လက်ရှိအာဏာရ ပါလန်ပရာချာရတ်ပါတီ (Palang Pracharath) မဟုတ်သော တခြားနိုင်ငံရေးပါတီ တစ်ခုနှင့် ပူးပေါင်းသွားနိုင်သည်ဟု ဒုတိယဝန်ကြီးချုပ် ပရာဝပ် ဝေါင်ဆူဝန် (Prawit Wongsuwon) က ဒီဇင်ဘာ ၁၃ ရက်တွင် ဝန်ခံခဲ့သည်ဟု ဘန်ကောက်ပို့စ်၌ ဖော်ပြထားသည်။
ပါလန်ပရာချာရတ် ပါတီသည် ပရာယွတ်ကို ဝန်ကြီးချုပ် ဖြစ်စေခဲ့သော ပါတီလည်း ဖြစ်သည်။

ပါလန်ပရာချာရတ်ပါတီ၏ ခေါင်းဆောင်ဖြစ်သူ ဗိုလ်ချုပ်ကြီး ပရာဝပ်က ပရာယွတ်သည် လာမည့် ရွေးကောက်ပွဲ တွင် ရွမ်ထိုင်ဆန်ချတ်ပါတီ (Ruam Thai Sang Chart) ပါတီနှင့် ပူးပေါင်းနိုင်သည်ဟု ထွက်ပေါ် နေသော ခန့်မှန်း မှုများနှင့် ပတ်သက်၍ အထက်ပါအတိုင်း ဖြေကြားခဲ့သည်။

ရွမ်ထိုင်ဆန်ချတ်ပါတီကို ပီရာပန် ဆာလီရာရာသာဗီဟဂါက ဦးဆောင်ပြီး ၎င်းသည် လက်ရှိအချိန်တွင် ဝန်ကြီးချုပ် အကြံပေးအဖြစ် ဆောင်ရွက်နေသူ ဖြစ်သည်။

ဝန်ကြီးချုပ်ပရာယွတ်နဲ့ ဗိုလ်ချုပ်ကြီးပရာဝပ်ကို တွေ့ရစဉ် (GETTY IMAGES)

သတင်းထောက်များ၏ မေးမြန်းမှုကို ပရာဝပ်က “ ဝန်ကြီးချုပ်အနေနှင့် တခြားပါတီတစ်ခုကို သွားမည့်ပုံ ပေါ်နေပါသည်။ သူသွားနိုင်ပါသည်” ဟု ပြန်လည် ဖြေကြားခဲ့သည်။

အဘယ်ကြောင့် သွားလိုခြင်း ဖြစ်နိုင်လဲဟု သတင်းထောက်များက ထပ်မံ မေးမြန်းခဲ့ရာ ပရာဝပ်က ဝန်ကြီးချုပ် သည် ပါလန်ပရာချာရတ်ပါတီ(PPRP)တွင် ပါဝင်ပတ်သတ်မှု မရှိကြောင်း၊ ပရာယွတ်ကို ဝန်ကြီးချုပ်အဖြစ် ထောက်ပံ့၍ ၎င်းကို အမည်စာရင်း တင်သွင်းပေးခဲ့သော်လည်း ၎င်းသည် ပါတီဝင်တစ်ဦး မဟုတ်ခဲ့ကြောင်း ပြန်လည် ဖြေကြားခဲ့သည်။

“သူပါတီမှာ ဆက်ရှိမည် မရှိမည်က ပရာယွတ်၏ ကိစ္စသာဖြစ်ကြောင်း၊ ၎င်းသည် ပါတီ စတင်ကတည်းက ပါဝင်ခဲ့ခြင်း မရှိခဲ့ကြောင်း”ပရာဝပ်က ဆက်လက် ပြောဆိုသည်။

ထို့ကြောင့် PPRP အနေဖြင့် လာမည့် ရွေးကောက်ပွဲတွင် ဗိုလ်ချုပ်ကြီးပရာယွတ်ကို ဝန်ကြီးချုပ်အဖြစ် ထပ်မံ ယှဉ်ပြိုင်စေမည်လားဆိုသည့် မေခွန်းအပေါ် ဗိုလ်ချုပ်ကြီးပရာဝပ်က တိုက်ရိုက် ဖြေကြားခဲ့ခြင်း မရှိဘဲ ထိုကိစ္စမှာ ပါတီဝင်များနှင့်သာ သက်ဆိုင်ကြောင်း၊ သူသည်ပင် ပါတီဝင်တစ်ဦး ဖြစ်သည့်အတွက် ထိုမေးခွန်းကို ဖြေကြား နိုင်ခြင်း မရှိဟု တုန့်ပြန်ခဲ့သည်။

ဝန်ကြီးချုပ်ပရာယွတ် တခြားနိုင်ငံရေးပါတီ တစ်ခုသို့ ရောက်ရှိသွားသည့်တိုင် သူနှင့်ဝန်ကြီးချုပ်ကြား ချစ်ခြင်း တရားမှာ ပြောင်းလဲသွားမည် မဟုတ်ကြောင်းလည်း PPRP ပါတီခေါင်းဆောင် ပရာဝပ်က ထပ်မံ ပြောကြား ခဲ့သည်။

Source: ဘန်ကောက်ပို့စ်

CNI International News

ကွာလာလမ်ပူ၊ ဒီဇင်ဘာ ၁၃

ဆိုင်းငံ့ပြည်နှင်ဒဏ် ပေးခံထားရသော မြန်မာနိုင်ငံသား ၁၁၄ ဦးကို နေရပ်ပြန်ပို့ရန် မလေးရှားတရားရုံး တစ်ခုက ဒီဇင်ဘာ ၁၃ ရက်တွင် ဆုံးဖြတ်ခဲ့ကြောင်း ဘန်ကောက်ပို့စ် သတင်းတွင် ဖော်ပြထားသည်။

မလေးရှားအစိုးရ၏ တောင်းဆိုးမှုအပေါ် တရားရုံးက ထိုသို့ဆောင်ရွက်ခဲ့ခြင်း ဖြစ်သည်။ မလေးရှား အစိုးရသည် ပြီးခဲ့သည့် ဖေဖော်ဝါရီလ မြန်မာနိုင်ငံတွင် နိုင်ငံရေး အပြောင်းအလဲ ကိစ္စရပ်များ ပေါ်ပေါက်ခဲ့ပြီးနောက် ရက်ပိုင်း အတွင်းတွင်လည်း မြန်မာနိုင်ငံသား ၁၀၈၆ ဦးကို ပြည်နှင်ဒဏ်ပေးခဲ့သည်။

တရားရုံးဘက်က ဆိုင်းငံ့ပြည်နှင်ဒဏ်ဖြင့် နိုင်ငံတွင်း ဆက်လက်နေထိုင်ရန် ခွင့်ပြုခဲ့သော်လည်း အစိုးရက ထိုသို့ လုပ်ဆောင်ခဲ့ခြင်း ဖြစ်သည်။

လက်ရှိအချိန်တွင် မြန်မာနိုင်ငံသား ၁၁၄ ဦးကို ချက်ချင်း မြန်မာနိုင်ငံသို့ ပြန်ပို့မည်လား ဆိုသည်ကိုတော့ မသိရ သေးပေ။

အစိုးရအနေဖြင့် ၎င်းတို့၏ အစီအစဉ်များကို ပြန်လည်သုံးသပ်ရန် အလေးအနက် တိုက်တွန်းသည်ဟု မလေး ရှားနိုင်ငံ၏ နိုင်ငံတကာလွတ်ငြိမ်းချမ်းသာခွင့်နှင့် နိုင်ငံရေးခိုလှုံခွင့်အဖွဲ့က ပူးတွဲကြေညာချက် တစ်စောင် ထုတ်ပြန်သည်။

လူ့အခွင့်အရေးနှင့် နိုင်ငံတကာ ဥပဒေများကို လေးစားရန် ခေါင်းဆောင်များကို ဆက်လက် တောင်းဆို သွားမည် ဟုလည်း ၎င်းအဖွဲ့က ပြောသည်။

 မလေးရှား တရားရုံးတစ်ခုကိုတွေ့ရစဉ် (GETTY IMAGES)

မြန်မာနိုင်ငံသား ၁၁၄ ဦးတွင် ကလေးများနှင့် နိုင်ငံရေးခိုလှုံခွင့် တောင်းခံသည်ဟု ယူဆရသူများ ပါဝင်ကြောင်း၊ ၎င်းတို့သည် လူဝင်မှုကြီးကြပ်ရေး ထိန်းသိမ်းမှု အောက်တွင် ရှိနေကြောင်း မလေးရှား လွတ်ငြိမ်း ချမ်းသာခွင့်အဖွဲ့ အမှုဆောင်ဒါရိုက်တာ ကတ်ထရီနာ မာလီယာမူး (Kartrina Maliamauv) က Reuters သို့ ပြောသည်။

ကုလသမဂ္ဂ ဒုက္ခသည် အေဂျင်စီသည်လည်း ထိုသူများ၏ အခြေအနေကို သိရှိရန် တွေ့ဆုံခွင့် မရခဲ့ကြောင်း သူမက ဆက်လက် ပြောကြားသည်။

မလေးရှားနိုင်ငံတွင် ဒုက္ခသည်များဟု တရားဝင် သတ်မှတ်ထားခြင်း မရှိမှုကြောင့် ၎င်းတို့ကို အထောက် အထားမဲ့ ရွှေ့ပြောင်း နေထိုင်သူများအဖြစ် သတ်မှတ်သည်။

ထိုသူများသည် လူဝင်မှုကြီးကြပ်ရေးဆိုင်ရာ ဥပဒေများကို ချိုးဖောက်ခြင်းအတွက် ထိန်းသိမ်းခံထားရခြင်း ဖြစ်သည်ဟု မလေးရှားဝန်ကြီးဌာနက ပြောခဲ့ဖူးသည်။

မလေးရှားနိုင်ငံသည် မြန်မာနိုင်ငံတွင်းမှ အခြေအနေများနှင့်ပတ်သတ်၍ ဝေဖန်ပြစ်တင်မှုများ ပြုလုပ်ခဲ့ သော်လည်း ဒုက္ခသည်ဟု ယူဆရသူများ အပါအဝင် မြန်မာနိုင်ငံသားများကို နေရပ်ပြန်ပို့ လျက်ရှိသည်။

ထိုသို့ နေရပ်ပြန်ပို့မှုများသည် နိုင်ငံတကာ ဥပဒေများကို ချိုးဖောက်ခြင်း ဖြစ်သည်ဟုလည်း ကုလသမဂ္ဂက ပြောဆိုထားသည်။

Source: Bangkok Post

CNI International News

ဘရာစီးလီးယား၊ ဒီဇင်ဘာ ၁၄

လက်ယာစွန်း သမ္မတဟောင်း ဂျဲဘော်ဆွန်နာရို (Jair Bolsonaro)ကို ထောက်ခံသူများက ရဲဌာချုပ်ကို တိုက်ခိုက် ရန် ကြိုးစားခဲ့သည်ဟု ဘရာစီးလီးယား ရဲတပ်ဖွဲ့က ပြောခဲ့ကြောင်း BBC သတင်းတွင် ဖော်ပြသည်။

ယင်းမှာ ဘော်ဆွန်နာရိုအားထောက်ခံသည့် တိုင်းရင်းသားခေါင်းဆောင်တစ်ဦးကို ဖမ်းဆီးခဲ့ပြီးနောက် တင်းမားမှု များ မြင့်တက်လာခဲ့ခြင်း ဖြစ်သည်။

ဘော်ဆွန်နာရိုသည် ပြီးခဲ့သည့်လ ရွေးကောက်ပွဲတွင်လက်ဝဲယိမ်း ပြိုင်ဘက် လူးဝစ္စ အီနာစီယို လူလာ (Luiz Inacio Lula) ကို ရှုံးနိမ့်ခဲ့သော်လည်း ၎င်းကိုထောက်ခံသူများက ရလာဒ်ကိုအသိအမှတ်ပြုရန် ငြင်းဆန်နေကြ သည်ဟု ရဲတပ်ဖွဲ့က ပြောသည်။

ရဲအရာရှိတစ်ဦးမှ သေနတ်ဖြင့် ပစ်ခတ်နေစဉ်(ဓါတ်ပုံ-ရိုက်တာ)

၎င်းတို့သည် ကားများကို မီးတင်ရှို့ကာ လမ်းများကိုပိတ်ထားခဲ့သည်ဟုလည်း သိရသည်။ ဆန္ဒပြသူများသည် တိုင်းရင်းသားခေါင်းဆောင် ဟိုဆေးအကာစီယို ဆီရီရီ ရှီဗန်တီ (Jose Acacio Serere Xavante) ကို ထိန်းသိမ်း ထားရာ ဖက်ဒရယ်ရဲတပ်ဖွဲ့ အဆောက်အဦကို ကျူးကျော်ရန် ကြိုးပမ်းခဲ့သည်ဟုလည်း ရဲတပ်ဖွဲ့၏ ထုတ်ပြန်ချက် တွင်ပါဝင်သည်။

ဟိုဆေးသည် ဒီမိုကရေစီနည်းလမ်းများနှင့်ဆန့်ကျင်သည့် လုပ်ဆောင်ချက်များကြောင့် ၎င်းကို ၁၀ ရက် ထိန်းသိမ်း ထားရမည်ဟု ဘရာဇီး ဗဟိုတရားရုံးချုပ်က ပြောသည်။ ဟိုဆေးသည် နိုင်ငံ၏တရားဥပဒေစိုးမိုးရေးကို ဖျက်ဆီး ရန်၊ ရွေးကောက်ခံသမ္မတနှင့် ဒုသမ္မတတို့၏ ကျမ်းကျိမ်ပွဲများကို နှောင့်ယှက်ရန် လူများကို စည်းရုံးလှုံ့ဆော်ခဲ့ သည်ဟု အစိုးရရှေ့နေ များက ပြောသော်လည်း မည်သို့ဆောင်ရွက်ခဲ့သည်ဆိုခြင်းနှင့် ပတ်သတ်၍ အသေးစိတ် ပြောကြားခဲ့ခြင်းမရှိပေ။

ဆန္ဒပြသူများက ဘတ်စ်ကားများကို မီးရှို့ဖျက်ဆီးခဲ့ကြသည်(ဓါတ်ပုံ-ရိုက်တာ)

ဆန္ဒပြသူများက ရဲတပ်ဖွဲ့ရုံးချုပ်တွင် စုဝေးစဉ် ထိန်းသိမ်းခံထားရသော ဟိုဆေးက ရဲတပ်ဖွဲ့များနှင့် ထိတွေ့ခြင်း၊ တိုက်ခိုက်ခြင်းနှင့် ထိပ်တိုက်တွေ့ဆုံခြင်းတို့ကို ရှောင်ကျဉ်ရန် ထိန်းသိမ်းခံထားရာမှ ဗီဒီယိုဖြင့်ထုတ်လွှင့် တောင်းဆိုခဲ့သည်။

စုဝေးနေသော ဆန္ဒပြသူများကို လူစုခွဲရန် ရဲတပ်ဖွဲ့က မျက်ရည်ယိုဗုံးများနှင့် ရာဘာကျည်ဆန်များကိုအသုံးပြုခဲ့ပြီး ဘတ်စ်ကား ၅ စီးနှင့် ကား ၈ စီး မီးရှို့ဖျက်ဆီးခံခဲ့ရသည်ဟု မီးသတ်တပ်ဖွဲ့က ပြောသည်။ ဆန္ဒပြသူများကြောင့် အရေးပါသောလမ်းမများသည် အင်္ဂါနေ့အထိ ပိတ်ထားရဆဲ ဖြစ်သည်။

Source:BBC

CNI International News

ဒါကာ၊ ဒီဇင်ဘာ ၁၄

ဘင်္ဂလားဒေ့ရှ်နိုင်ငံ၏ အကြီးမားဆုံး မူဆလင်ပါတီ ဂျာမာအတ်-အီး-အစ္စလာမ္မီပါတီ၏ ခေါင်းဆောင် ရှာဖီကာ ရာမန်(Shafiqur Rahman) ဖမ်းဆီး ခံခဲ့ရသည်ဟု အယ်ဂျာဇီးယား သတင်းတွင် ဖော်ပြထားသည်။

အဆိုပါ ပါတီအနေဖြင့် ဝန်ကြီးချုပ် ရှိတ်ဟာဆီနာ ရာထူးမှ နုတ်ထွက်ရေး အတိုက်အခံများ ဦးဆောင်သော ဆန္ဒပြပွဲ များတွင် ပါဝင်မည်ဟု ကြေညာခဲ့ပြီး ရက်ပိုင်းအကြာတွင် ဖမ်းဆီးခံခဲ့ရခြင်း ဖြစ်သည်။

ပါတီခေါင်းဆောင် ရှာဖီကာ ရာမန် (Shafiqur Rahman) သည် ဒီဇင်ဘာ ၁၃ ရက် မနက် ၁ နာရီတွင် ၎င်း၏ နေအိမ်၌ ဖမ်းဆီးခံခဲ့ရသည်ဟု ပါတီ၏ယာယီအတွင်းရေးမှူးချုပ် မြူလာနာ အေတီအမ် မာဆမ် (Maulana ATM Masum)က ပြောသည်။

ထိုသို့ဖ မ်းဆီးမှုအပေါ် ပြင်းပြင်းထန်ထန် ရှုတ်ချ ကန့်ကွက်ကြောင်းနှင့် ၎င်းကို ချက်ခြင်း ပြန်လွှတ်ပေးရန် တောင်းဆိုကြောင်းလည်း မာဆမ်က ပြောသည်။

ရှိုတ်ဟာစီနာ ရာထူးက ဆင်းပေးရေး ဆန္ဒနေကြစဉ် (GETTY IMAGES)

နိုင်ငံ၏ တတိယအင်အား အကြီးမားဆုံးနှင့် ၂၀၁၂ ရွေးကောက်ပွဲတွင် ပါဝင်ခွင့် ပိတ်ခံခဲ့ရသော ဂျာမာအတ် ပါတီသည် ပင်မအတိုက်အခံပါတီ BNP အပြင် ၎င်း၏ မိတ်ဖက်ပါတီများနှင့် နှစ်ပေါင်းများစွာ မဟာမိတ်များ ဖြစ်ခဲ့သည်။

သို့သော် ဟာစီနာ အာဏာရလာခဲ့ပြီးနောက် ပါတီခေါင်းဆောင် အားလုံး ဖမ်းဆီးခံခဲ့ရပြီး ၁၉၇၁ ပါကစ္စတန်စစ်ပွဲ အတွင်း စစ်ရာဇဝတ်မှုများ ကျူးလွန်ခဲ့မှုအတွက် တရားစွဲခံခဲ့ရသည်။

ထိုဖြစ်ရပ်များကြောင့် ၂၀၁၃ နှင့် ၂၀၁၆ ခုနှစ်အတွင်း ပါတီထိပ်တန်း ခေါင်းဆောင် ၅ ဦး ကြိုးပေးခံခဲ့ရသည်။

အဆိုပါ ကွပ်မျက်မှုများကို ဆန့်ကျင်ဆန္ဒပြခဲ့သည့် ပါတီဝင် ရာနှင့်ချီ ပစ်သတ်ခံခဲ့ရပြီး ထောင်နှင့်ချီ ဖမ်းဆီး ထိမ်းသိမ်း ခံခဲ့ရသည်။

ရှိုတ်ဟာစီနာ ရာထူးက ဆင်းပေးရေး ဆန္ဒနေကြသူများကို လုံခြုံရေးတပ်ဖွဲ့က ပစ်ခတ် ဖြိုခွင်းနေစဉ် (GETTY IMAGES)

ထိုတရားစီရင်မှုများတွင် နိုင်ငံရေး အကြောင်းပြချက်များ ပါဝင်နေပြီး ၎င်းသည် ပါတီခေါင်းဆောင်များကို နှိပ်ကွပ်သည့် အစီအစဉ်၏ အစိတ်အပိုင်း ဖြစ်သည်ဟု ဂျာမာအတ်ပါတီက ပြောသည်။

တစ်ဖက်တွင် ဒီမိုကရေစီ၊ ရွေးကောက်ပွဲဟု တွင်တွင်ပြောနေသော်လည်း တစ်ဖက်မှာတော့ အတိုက်အခံများကို ဖိနှိပ်နေခြင်းအတွက် ၎င်းတို့သည် ဒီမိုကရေစီစနစ်ကို အယုံအကြည် မရှိသူများဟု ဂျမာအတ်ပါတီက ထုတ်ပြန် ခဲ့ သည်။

စနေနေ့မှ စတင်ကာ BNP ပါတီဝင်များနှင့် ခေါင်းဆောင်များ ဦးဆောင်ကာ လောင်စာဆီဈေး မြင့်မားမှု၊ လူနေမှု စရိတ် ကြီးမြင့်လာမှုများအတွက် ဆန္ဒပြပွဲများ ပြုလုပ်ခဲ့သည်။ အတိုက်အခံများဘက်မှ ဟာဆီနာကို ရာထူးမှ ဆင်း ပေးရန်၊ ယာယီအစိုးရတစ်ရပ်မှ ဦးဆောင်ကာ လွတ်လပ်၍ တရားမျှတမှုရှိသော ရွေးကောက်ပွဲ ကျင်းပရန် တောင်း ဆိုထားသည်။

Source: Al Jazeera

CNI International News

ကဘူးလ်၊ ဒီဇင်ဘာ ၁၃

အာဖဂန်နစ္စတန်နိုင်ငံ ကဘူးလ်မြို့လယ်ရှိ ဟိုတယ်တစ်လုံးကို ဒီဇင်ဘာ ၁၂ ရက်တွင် လက်နက်ကိုင်များက ဝင်ရောက် ပစ်ခတ်ခဲ့သည်ဟု CNA သတင်းတွင် ဖော်ပြထားသည်။

ထိုဖြစ်ရပ်အတွင်း သေနတ်သမား သုံးဦးကို အသေပစ်ခတ် ဖမ်းဆီးနိုင်ခဲ့ကြောင်း တာလီဘန် အစိုးရအဖွဲ့မှ ပြောသည်။

ပစ်ခတ်မှု ဖြစ်ပွားရာ ဟိုတယ်သည် တရုတ်နိုင်ငံသားများကြားတွင် ထင်ရှားပြီး ဟိုတယ်ဝရံဒါမှ ထွက်ပြေးရန် ကြိုးပမ်းသည့် နိုင်ငံခြားသား နှစ်ဦး ဒဏ်ရာရရှိခဲ့သည်ဟု တာလီဘန်ပြောခွင့်ရပုဂ္ဂိုလ် ဇဘီဟူလာ မူဂျာဟစ် (Zabijullah Mujahid)က တွစ်တာတွင် ရေးသားထားသည်။

ပစ်ခတ်မှုသည် မြို့လယ်ရှိ Shahr-e-Naw ဒေသတွင် ဖြစ်ပွားခဲ့ပြီး ဒဏ်ရာရရှိသူ ၁၈ ဦးနှင့် သေဆုံးသူ ၃ ဦး စုစုပေါင်း ၂၁ ဦး ဆေးရုံသို့ ရောက်ရှိလာသည်ဟု ကဘူးလ်အရေးပေါ် ဆေးရုံက ပြောသည်။

တရုတ်နှင့် နိုင်ငံခြားသားများ တည်းခိုလေ့ရှိသော လွန်ဂန် (Longan) ဟိုတယ်တွင် ပစ်ခတ်မှု ဖြစ်ပွားခဲ့ကြောင်း တာလီဘန် သတင်းရင်းမြစ်များက ပြောသည်။

ကဘူးလ်မြို့မှ ဂျာနယ်လစ် တစ်ဦး တွစ်တာတွင် တင်ထားသည့် ဗွီဒီယိုဖိုင်တစ်ခုတွင်လည်း ဟိုတယ်အထပ် တစ်ခု မှ မီးခိုးများ ထွက်နေခြင်းနှင့် သေနတ်သံများကို ကြားခဲ့ရပြီး ပြတင်းပေါက်မှတဆင့် ထွက်ပြေးရန် ကြိုးပမ်းနေသူ တစ်ဦးကိုလည်း မြင်ခဲ့ရသည်။

ဟိုတယ် တိုက်ခိုက်ခံရစဉ် ပြတင်းပေါက် ခုန်ပြီးထွက်ပြေးနေသူတစ်ဦးကိုတွေ့ရစဉ်

တိုက်ခိုက်မှုသည် နေ့လည် ၂ နာရီခွဲတွင် ဖြစ်ပွားခဲ့သည်ဟု ကဘူးလ်ရဲတပ်ဖွဲ့က ပြောသည်။ ပေါက်ကွဲသံကြီး တစ်ခုနှင့် သေနတ်သံများကို ကြားခဲ့ရသည်ဟုလည်း ဒေသခံများက ပြောသည်။

အဆိုပါ တိုက်ခိုက်မှုသည် လုံခြုံရေးဆိုင်ရာ အကြောင်းအရာများနှင့် တရုတ်သံရုံးကို ကာကွယ်ရေး ပိုမို အာရုံစိုက် ဆောင်ရွက်ရန် အာဖဂန် လက်ထောက် နိုင်ငံခြားရေးဝန်ကြီးနှင့် တရုတ်သံတမန်တို့ တွေ့ဆုံခဲ့ပြီး တစ်ရက် အကြာတွင် ဖြစ်ပွားခဲ့သည်။

ထို့နောက် အထက်ပါ တိုက်ခိုက်မှုသည် တရုတ်တည်းခိုခန်း တစ်ခုအနီးတွင် ဖြစ်ပွားခဲ့ပြီး ကဘူးလ်ရှိ တရုတ်သံရုံး ကလည်း အခြေအနေကို အနီးကပ်စောင့်ကြည့်နေသည်ဟု တရုတ်နိုင်ငံပိုင် ရှင်ဟွာသတင်းဌာနတွင် ဖော်ပြထားသည်။

သို့သော် သံရုံးဘက်က ယခု တိုက်ခိုက်မှုနှင့်ပတ်သက်၍ တစ်စုံတစ်ရာ ပြောဆိုထားခြင်း မရှိသေးပေ။ ပါကစ္စတန် သံရုံးကို တိုက်ခိုက်မှု၊ ရုရှားသံရုံးအနီး အသေခံဗုံးခွဲမှုများ အပါအဝင် မကြာသေးခင် လများအတွင်း အာဖဂန် နစ္စတန် နိုင်ငံတွင်း၌ ဗုံးခွဲမှုများစွာ ပေါ်ပေါက်ခဲ့သည်။

သံရုံးတိုက်ခိုက်မှုများကို IS အဖွဲ့က ကျူးလွန်ကြောင်း ထုတ်ဖော်ပြောဆို ထားပြီး လက်ရှိပါကစ္စတန်နိုင်ငံကို ထိန်းချုပ်ထားသည့် တာလီဘန်များကလည်း နိုင်ငံတွင်းလုံခြုံရေးကို အာရုံစိုက် ဆောင်ရွက်သွားမည်ဟု ပြောသည်။

Source: CNA